MASANGO

Kukanganiswa Kuri Kuitwa Masango

Gore negore, vanhu vanotema mabhiriyoni emiti kuti vawane pekurima. Kubvira kumakore ekuma1940 ava kunopera kusvika pari zvino, hafu yemasango akasvibirira anogara achinaya mvura yakaparadzwa.

Sango parinoparadzwa, mhuka dzese nezvinomera zvemo zvinobva zvapararawo.

Nyika Yedu Yakasikwa Kuti Irambe Iripo Nekusingaperi

Kunyange kana masango akaparadzwa, miti inotungira, yokurazve. Vamwe vaongorori vakashamiswa nekukurumidza kukura kunoita miti mumasango ainge aparadzwa. Ona zvinotevera:

• Vaongorori vari kuongorora zvinoitika kumasango akambotemwa vanhu vachida kuwana pekurima vachibva vazosiya minda yacho. Ongororo yeminda yakadaro inosvika 2 200 iri kuitwa kuAmerica nekuWest Africa yakaratidza kuti minda inenge isisarimwi inogona kuva masango zvakare mumakore 10.

• Ongororo yakabudiswa mumagazini inonzi Science inoratidza kuti pashure pemakore anenge 100, masango iwayo anogona kudzoka pane zvaaiva miti yacho isati yatemwa.

• Nyanzvi dzesainzi muBrazil dzakaongorora kuti kudyara miti kunobatsira here kuti masango akurumidze kudzokera pane zvaaiva. Vakaenzanisa nzvimbo dzaikura miti yega nenzvimbo dzayaiita zvekudyarwa nevanhu mumasango akanga amboparadzwa.

• Ichitaura nezvenyanzvi dzesainzi idzi, National Geographic yakati: “Vakafara chaizvo pavakaona kuti hazvidi hazvo kuti vanhu vaite zvekudyara miti.” Mumakore mashanu chete, nzvimbo dzakasiyiwa miti ichikura yega dzakanga “dzatozara miti yemunyika iyoyo.”

Zviri Kuedza Kuitwa Nevanhu

Pasi rese, vanhu vari kuedza kuchengetedza masango uye kudyarazve miti mune aya akaparadzwa. Nemhaka yeizvi, mashoko akabva kuSangano Remubatanidzwa Wenyika Dzepasi Rese anoratidza kuti mumakore 25 apfuura, “kutemwa kwemiti pasi rese kwaderera neinopfuura 50%.

Asi izvi handizvo zvega zvinodiwa kuti tichengetedze masango. Mumwe mushumo wakabudiswa nesangano rinonzi Global Forest Watch wakati: “Mumakore mashoma apfuura, mumasango anogara achinaya mvura, nhamba yemiti iri kutemwa haina kunyanya kuderera.

Makambani anotema miti zvisiri pamutemo ari kuita mabhiriyoni emadhora uye makaro iwayo ndiwo ari kuita kuti miti yakawanda iri mumasango anogara achinaya mvura itemwe.

Bhaibheri Rinotii?

“Jehovhaa Mwari akaita kuti mumunda macho mumere miti yese inoyevedza uye yakanakira kudya.”—Genesisi 2:9.

Musiki wemasango ese akaasika nenzira yekuti haaparari kana vanhu vakashandisa zvinhu zviri maari zvine mwero. Anoda kuchengetedza masango iwayo nezvinhu zviri maari kuitira kuti zvirambe zviripo.

Bhaibheri rinoratidza kuti Mwari haasi kuzorega vanhu vane makaro vachiparadza nyika nezvinhu zvipenyu zviri pairi. Ona nyaya yakanzi “Mwari Anovimbisa Kuti Nyika Haisi Kuzoparadzwa,” iri papeji 15.