KOSEPELE YA MATHEU

1 Buka ya histori* ya Jesu Kreste* mora wa Davida.+ Davida o tswa lelapeng la Abrahama:+

17 Ka hoo, meloko yohle e ne e eme tjena: Ho tloha ho Abrahama ho fihlela ho Davida e ne e le meloko e 14. Ho tloha ho Davida ho fihlela ha Bajuda ba iswa Babilona e le meloko e 14 mme ho tloha ha Bajuda ba iswa Babilona ho fihlela ho Kreste e le meloko e 14.

18 Ha Jesu Kreste a tla hlaha, ho ile ha etsahala tjena: Nakong eo Josefa a neng a lebeleditse Maria, Maria o ile a ima ka moya o halalelang*+ pele ba nyalana. 19 Ka ha Josefa monna wa Maria o ne a lokile ebile a sa batle ho mo hlabisa dihlong, a rera ho mo hlala ka lekunutu.+ 20 Ka mora hore a nahanisise ka dintho tsena, a bona lengeloi la Jehova* torong le re: “Josefa, mora wa Davida, o se ke wa tshaba ho isa Maria mosadi wa hao lapeng hobane o imme ngwana eo ka moya o halalelang.+ 21 O tla tswala mora mme o tla mo reha Jesu*+ hobane o tla pholosa batho ba habo dibeng tsa bona.”+ 22 Tsena tsohle di etsahetse ho phethahatsa mantswe ao Jehova* a ileng a a bua ka moprofeta wa hae, ha a re: 23 “Morwetsana o tla ima mme a tswale mora, ba mo rehe Emanuele,”+ eo ha e fetolelwa e bolelang “Modimo o na le Rona.”+

24 Yaba Josefa o a tsoha mme o etsa ka moo lengeloi la Jehova* le neng le mo laetse ka teng, a isa mosadi wa hae lapeng. 25 Empa ha a ka a etsa thobalano le yena ho fihlela a tswetse mora+ yaba o mo reha Jesu.+

2 Ka mora hore Jesu a hlahele Bethlehema+ e Judea mehleng ya puso ya Morena Heroda,*+ balepi ba dinaledi* ba tswang ka Botjhabela ba tla Jerusalema 2 ba re: “O kae morena wa Bajuda ya sa tswa hlaha?+ Re bone naledi e re tataisetsang ho yena ha re le ka Botjhabela jwale re tletse ho tla mo tlotla.”* 3 Ha Morena Heroda le batho bohle ba Jerusalema ba utlwela ka taba ena ba halefa haholo. 4 Morena a bokella baprista bohle ba baholo le bangodi ba setjhaba a ba botsisisa hore na Kreste* o lokela ho hlahela hokae. 5 Ba re ho yena: “Bethlehema+ e Judea hobane moprofeta o ile a bua ka taba ena ha a re: 6 ‘Wena Bethlehema wa naha ya Juda, ho hang ha o motse o monyenyane haholo mahlong a babusisi ba Juda ka ha ho wena ho tla tswa ya busang, ya tla disa setjhaba sa ka sa Iseraele.’”+

7 Heroda a bitsetsa balepi ba dinaledi sephiring mme a ba botsisisa hore na naledi eo e qadile ho bonahala neng. 8 A ba romela Bethlehema a re: “Eyang le yo batlisisa hore na ngwana eo o hokae. Ha le mo fumane le kgutle le ntsebise e le hore le nna ke yo mo kgumamela.” 9 Ka mora hore morena a ba fe taelo eo, ba tsamaya yaba naledi eo ba e boneng ha ba le ka Botjhabela+ e ba etella pele ho fihlela e ema hodima sebaka seo ngwana eo a neng a le ho sona. 10 Ha ba bona naledi ba thaba haholo. 11 Ha ba kena ka tlung ba fumana ngwana le mme wa hae Maria. Ba kgumama ba mo tlotla. Ba ne ba ena le matlotlo mme ba mo fa kgauta, dibano tse tshweu le mira e le dimpho. 12 Empa ka ha Modimo o ile a ba laela torong+ hore ba se ke ba boela ho Heroda, ba kgutlela naheng ya habo bona ka tsela e nngwe.

13 Ha ba qeta ho tloha, lengeloi la Jehova* la hlaha ho Josefa torong,+ la re: “Tsoha, o nke ngwana le mme wa hae o balehele Egepeta. O dule moo ho fihlela ke o laela hore o kgutle hobane Heroda o tlo batla ngwana eo e le hore a mo bolaye.” 14 Ka hoo, Josefa a tsoha bosiu a nka ngwana le mme wa hae mme a tloha ho ya Egepeta. 15 A dula moo ho fihlela Heroda a shwa. Ha phethahala mantswe ao Jehova* a ileng a a bua ka moprofeta wa hae ha a re: “Ke bitsitse mora wa ka hore a tswe Egepeta.”+

16 Eitse ha Heroda a hlokomela hore balepi ba dinaledi ba mo tswile tlase, a halefa haholo yaba o laela hore ho bolawe bana bohle ba bashanyana Bethlehema le diterekeng tsohle tsa yona, ho tloha ka ba dilemo di pedi ho ya tlase, ho latela nako eo balepi ba dinaledi ba neng ba e boletse.+ 17 Yaba ho phethahala mantswe ao Modimo a a buileng ho moprofeta Jeremia ha a re: 18 “Lentswe le utlwahetse Rama, seboko le sello se bohloko. E ne e le Ragele+ a llela bana ba hae, a sa tshedisehe hobane bana ba hae ha ba sa le yo.”+

19 Ka mora hore Heroda a shwe, lengeloi la Jehova* la hlaha ho Josefa torong+ a le Egepeta. 20 La re: “Tsoha, o nke ngwana le mme wa hae o ye naheng ya Iseraele ka ha ba neng ba batla ho bolaya ngwana ba shwele.” 21 Ka hoo, a ema a nka ngwana le mme wa hae mme a kgutlela naheng ya Iseraele. 22 Empa ha a utlwa hore Arkelause o busa Judea sebakeng sa ntate wa hae Heroda, a tshaba ho ya moo. Hape Modimo o ile a mo lemosa ka toro+ hore a se ke a ya moo. Ka hoo, a tloha a ya Galilea.+ 23 Yaba o dula motseng o bitswang Nazaretha+ e le hore ho ka phethahala mantswe a baprofeta a reng: “O tla bitswa Monazaretha.”*+

3 Ha morao Johanne+ Mokolobetsi a tla lefeelleng la Judea yaba o a ruta+ 2 o re: “Bakang hobane Mmuso wa mahodimo o atametse.”+ 3 Ha e le hantle Johanne enwa ke yena eo moprofeta Esaia a neng a bua ka yena+ ha a re: “Ho na le motho ya hweletsang lefeelleng a re: ‘Lokisang tsela ya Jehova,* otlollang ditsela tsa hae.’”+ 4 Johanne o ne a apara diaparo tsa boya ba kamele, a itlama ka lebanta la letlalo thekeng.+ O ne a ja ditsie le mahe a dinotshi tsa naheng.+ 5 Batho ba Jerusalema, Judea le dibakeng tsohle tse potolohileng Jordane ba ne ba ya ho yena.+ 6 Ba ne ba ipolela dibe phatlalatsa ebe o ba kolobetsa* Nokeng ya Jordane.+

7 Ha Johanne a bona Bafarisi le Basaduse+ ba bangata ba tla hore ba kolobetswe, a re ho bona: “Madinyane a dinoha tsa marabe,+ ke mang ya le hlokomedisitseng hore le balehe bohale bo tlang?+ 8 Qalang pele ka hore le bontshe* hore le bakile. 9 Le se ke la ithetsa ka hore Abrahama ke ntate wa lona+ hobane Modimo a ka mo hlahisetsa bana le ka majwe ana. 10 Selepe se se se le metsong ya difate. Sefate se seng le se seng se sa beheng ditholwana tse ntle se tla rengwa mme se lahlelwe mollong.+ 11 Nna ke le kolobetsa ka metsi hobane le bakile.+ Ya tlang ka mora ka yena o tla le kolobetsa ka moya o halalelang+ le ka mollo.+ O matla ho mpheta mme ha ke tshwanelehe ho mo rodisa dieta.*+ 12 O tshwere kgarafu ya hae e olosang. O tla hlwekisa seotlo sa hae ka ho feletseng, a bokelle koro ya hae ka setorong empa o tla tjhesa mmoko ka mollo+ o ke keng wa tima.”

13 Jesu a tloha Galilea a ya Jordane hore Johanne a mo kolobetse.+ 14 Empa Johanne a leka ho mo thiba a re: “Ke wena ya tlamehang ho nkolobetsa. Jwale ke hobaneng ha o tla ho nna hore ke o kolobetse?” 15 Jesu a mo araba a re: “Ha re etsa jwalo re tla etsa ntho eo Modimo a e ratang. Ka hoo, o se ke wa nthiba.” Yaba Johanne ha a sa mo thiba. 16 Hang ka mora hore Jesu a kolobetswe, a nyoloha ka metsing yaba mahodimo a a buleha.+ A bona moya wa Modimo o theoha jwalo ka leeba o tla hodima hae.+ 17 Hape lentswe le tswang mahodimong+ la re: “Enwa ke Mora wa ka+ eo ke mo ratang, ya nkgahlisang.”+

4 Moya o halalelang wa tataisetsa Jesu lefeelleng. Ha a le moo, Diabolose a mo leka.+ 2 E ne e le ka mora hore a itime dijo ka matsatsi a 40 le masiu a 40 mme o ne a utlwa a lapile. 3 Diabolose+ a atamela mme a re ho yena: “Haeba o mora wa Modimo, bolella majwe ana hore a fetohe mahobe.” 4 Empa Jesu a araba a re: “Mangolo a re: ‘Motho a ke ke a phela ka bohobe feela empa o tla phela le ka lentswe le leng le le leng le tswang molomong wa Jehova.’”*+

5 Yaba Diabolose o mo isa motseng o halalelang+ yaba o mo emisa hodima tora* ya tempele.+ 6 A re ho yena: “Haeba o mora wa Modimo, itihele fatshe etswe Mangolo a re: ‘O tla romela mangeloi a hae ho wena. A tla o jara ka matsoho e le hore leoto la hao le se ke la kgoptjwa ke lejwe.’”+ 7 Jesu a re ho yena: “Mangolo a boetse a re: ‘O se ke wa leka Jehova* Modimo wa hao.’”+

8 Diabolose a boela a mo isa thabeng e phahameng haholo, a mo bontsha mebuso yohle ya lefatshe le maruo a yona.+ 9 A re ho yena: “Ke tla o fa dintho tsena kaofela ha o ka kgumama wa nthapela.”* 10 Jesu a re ho yena: “Tloha Satane! Mangolo a re: ‘Ke Jehova* Modimo wa hao eo o lokelang ho mo rapela+ ebile ke yena feela eo o lokelang ho mo sebeletsa.’”+ 11 Diabolose a mo tlohela+ yaba mangeloi a a tla ho tla matlafatsa Jesu.+

12 Ha Jesu a utlwa hore Johanne o tshwerwe,+ a kgutlela Galilea.+ 13 Ka mora hore a tlohe Nazaretha, a dula Kapernauma+ ka thoko ho lewatle diterekeng tsa Zabulone le Nefthali 14 e le hore ho ka phethahala mantswe ao moprofeta Esaia a ileng a a bua ha a re: 15 “Lona baahi ba naha ya Zabulone le Nefthali, pela tsela ya lewatle, ka lehlakoreng le leng la Jordane, Galilea ya ditjhaba, 16 batho ba dutseng lefifing ba ile ba bona lesedi le leholo. Ha e le ba dutseng sebakeng sa moriti wa lefu, lesedi+ le ile la ba tjhabela.”+ 17 Ho tloha ka nako eo ho ya pele, Jesu a qala ho ruta a re: “Bakang hobane Mmuso wa mahodimo o atametse.”+

18 Ha a tsamaya haufi le Lewatle la Galilea, a bona bana ba motho ba babedi ba akgela letlowa* la ho tshwasa ditlhapi ka lewatleng ka ha e ne e le batshwasi ba ditlhapi.+ E mong e ne e le Simone ya bitswang Petrose,+ e mong e le Andrease. 19 A re ho bona: “Ntshaleng morao, ke tla le etsa batshwasi ba batho.”+ 20 Hanghang ba tlohela matlowa a bona yaba ba a mo latela.+ 21 Ha a fetela pele, a bona ba bang ba babedi bao e neng e le bana ba motho e leng Jakobo le Johanne bara ba Zebedea.+ Ba ne ba le ka sekepeng ba ena le ntate wa bona Zebedea, ba lokisa matlowa a bona yaba o a ba bitsa.+ 22 Hanghang ba siya ntate wa bona ha mmoho le sekepe, ba latela Jesu.

23 A tsamaya Galilea+ yohle a ruta ka matlung a bona a thapelo,*+ a bua ka ditaba tse monate tsa Mmuso a bile a phekola mafu a mefuta yohle.+ 24 Siria yohle e ile ya tseba ka yena mme batho ba moo ba mo tlisetsa bohle ba kulang, ba opelwang,+ ba nang le bademona,+ ba tshwerweng ke sethwathwa*+ le ba shweleng ditho yaba o a ba phekola. 25 Ka lebaka leo, letshwele le leholo le tswang Galilea, Dekapolise,* Jerusalema, Judea le ka lehlakoreng le leng la Jordane la mo latela.

5 Ha Jesu a bona letshwele a nyolohela thabeng. Ka mora hore a dule fatshe barutuwa ba hae ba tla ho yena. 2 A qala ho ruta a re:

3 “Ho thaba ba hlokomelang hore ba hloka Modimo+ ka ha Mmuso wa mahodimo ke wa bona.

4 Ho thaba ba utlwileng bohloko ka ha ba tla tshediswa.+

5 Ho thaba ba bonolo+ ka ha ba tla rua lefatshe.+

6 Ho thaba ba lapelang le ho nyorelwa+ ho loka ka ha ba tla kgotsofatswa.+

7 Ho thaba ba mohau+ ka ha ba tla hauhelwa.

8 Ho thaba ba dipelo di hlwekileng+ ka ha ba tla bona Modimo.

9 Ho thaba ba bopang kgotso*+ ka ha ba tla bitswa bara ba Modimo.

10 Ho thaba ba hlorisitsweng ka lebaka la ho loka+ ka ha Mmuso wa mahodimo ke wa bona.

11 Ho thaba lona ha batho ba le rohaka,+ ba le hlorisa+ le ho le etselletsa ka ntho e nngwe le e nngwe e mpe ka lebaka la ka.+ 12 Thabang, le tlolatlole ke thabo+ hobane moputso wa lona+ o moholo mahodimong ka ha le nakong e fetileng ba ile ba hlorisa baprofeta ka tsela e tshwanang.+

13 Le letswai+ la lefatshe empa haeba letswai le tapa, le ka etswang hore le be le tatso hape? Ha le sa na thuso haese hore feela le lahlelwe ka ntle,+ le hatakelwe ke batho.

14 Le lesedi la lefatshe.+ Motse o ke ke wa pateha ha o dutse hodima thaba. 15 Ha batho ba kgantsha lebone ha ba le behe tlasa baskete empa ba le beha hodima tafole ebe le kgantshetsa bohle ka tlung.+ 16 Lesedi la lona le ke le kganyetse batho+ jwalo e le hore ba ka bona mesebetsi ya lona e metle+ mme ba tlotlisa Ntate wa lona ya mahodimong.+

17 Le se ke la nahana hore ke tletse ho fedisa Molao kapa mantswe a Baprofeta. Ha ke a tlela ho di fedisa empa ke tletse ho di phethahatsa.+ 18 Ka nnete ke re ho lona, le haeba lehodimo le lefatshe di ne di ka timela, ha ho tlhaku le e nngwe e nyenyane ka ho fetisisa kapa letshwao le le leng Molaong le tla timela ho fihlela dintho tsena tsohle di etsahetse.+ 19 Ka hona, mang kapa mang ya tlolang o mong wa melao ena e menyenyane mme a ruta batho ho e tlola, a ke ke a tshwanelwa ke ho kena* Mmusong wa mahodimo. Empa mang kapa mang ya e mamelang le ho e ruta, o tla tshwanelwa ke ho kena* Mmusong wa mahodimo. 20 Ke a le bolella, haeba le sa bontshe hore le lokile* ho feta bangodi le Bafarisi,+ ho hang le ke ke la kena Mmusong wa mahodimo.+

21 Le utlwile hore ho itswe ho batho ba mehleng ya kgale: ‘O se ke wa bolaya.+ Mang kapa mang ya bolayang o tla ikarabella lekgotleng la toka.’+ 22 Empa ke re ho lona, e mong le e mong ya dulang a halefetse+ ngwanabo o tla ikarabella lekgotleng la boahlodi. Mang kapa mang ya buang mantswe a etsang hore ngwanabo a ikutlwe a se na thuso, o tla ikarabella Lekgotleng le Phahameng ka ho Fetisisa. Athe mang kapa mang ya reng ho e mong: ‘Sehole towe!’ o tla lokelwa ke mollo wa Gehena.*+

23 Haeba o tlisa mpho ya hao aletareng+ ebe o a hopola hore ho na le ntho eo o kgopisitseng ngwaneno ka yona, 24 o siye mpho ya hao moo ka pela aletare o tsamaye. O bope kgotso le ngwaneno pele ebe ha o kgutlile o nyehela mpho ya hao.+

25 Potlakela ho lokisa ditaba le moqosi wa hao ha o sa ntse o e na le yena tseleng e yang kgotla e le hore moqosi a se ke a tloha a o isa ho moahlodi, moahlodi a o isa ho mohlanka wa lekgotla yaba o iswa teronkong.+ 26 Ka nnete ke a o jwetsa, o ke ke wa tswa moo ho fihlela o patetse le sente ya ho qetela.*

27 Le utlwile hore ho itswe: ‘O se ke wa feba.’+ 28 Empa ke re ho lona, e mong le e mong ya ntseng a sheba mosadi+ e le hore a be le takatso ya ho etsa thobalano le yena o se a febile le yena ka pelong ya hae.+ 29 Haeba leihlo la hao le letona le etsa hore o etse sebe,* o le honye mme o le lahlele hole le wena.+ Ho molemo hore o lahlehelwe ke setho se le seng ho ena le hore mmele wohle wa hao o lahlelwe Gehena.*+ 30 Hape haeba letsoho la hao le letona le etsa hore o etse sebe,* o le kgaole mme o le lahlele hole le wena.+ Ho molemo hore o lahlehelwe ke setho se le seng ho ena le hore mmele wohle wa hao o lahlelwe Gehena.*+

31 Ho boetse ho itswe: ‘Mang kapa mang ya hlalang mosadi wa hae, a mo fe lengolo la tlhalo.’+ 32 Empa ke re ho lona, motho ya hlalang mosadi wa hae empa mosadi a sa etsa boitshwaro bo bobe bo amanang le thobalano,* o mo beha kotsing ya hore a etse bofebe. Hape mang kapa mang ya nyalang mosadi ya hladilweng ka tsela eo o a feba.+

33 Hape le utlwile hore ho itswe ho batho ba mehleng ya kgale: ‘O se ke wa hlapanya ebe ha o phethe+ empa o phethe boitlamo boo o bo etseditseng Jehova.’*+ 34 Empa ke re ho lona: Le se ke la hlapanya ho hang,+ le ha e le ka lehodimo hobane ke terone ya Modimo 35 kapa ka lefatshe hobane ke setulwana sa maoto a hae+ kapa ka Jerusalema hobane ke motse wa Morena e moholo.*+ 36 Le se ke la hlapanya ka dihlooho tsa lona hobane le ke ke la fetola qoba le ha e le nngwe ya moriri hore e be putswa kapa e be ntsho. 37 Ha le re le tla etsa ntho, le fele le e etse. Ha le re le ke ke la etsa ntho, le se ke la e etsa*+ hobane ho fetang hoo ho tswa ho Diabolose.*+

38 Le utlwile hore ho itswe: ‘Leihlo bakeng sa leihlo le leino bakeng sa leino.’+ 39 Empa ke re ho lona: O se ke wa hanyetsa motho ya kgopo empa mang kapa mang ya o otlang lerameng le letona, o mo fe le leng.+ 40 Haeba motho a batla ho o isa kgotla hobane a batla ho inkela seaparo sa hao, o mo tlohele a nke le seaparo sa hao se seng.+ 41 Haeba motho ya nang le bolaodi a o qobella hore o tsamaye le yena khilomithara* e le nngwe, o ye le yena dikhilomithara tse pedi. 42 O fe ya o kopang mme o se ke wa furalla ya batlang hore o mo adime.*+

43 Le utlwile hore ho itswe: ‘O rate moahisani wa hao+ mme o hloye sera sa hao.’ 44 Empa ke re ho lona: Le nne le rate dira tsa lona+ le ho rapella ba le hlorisang+ 45 e le hore le ka bontsha hore le bana ba Ntate wa lona ya mahodimong+ ka ha o tjhabisetsa batho ba kgopo le ba lokileng letsatsi la hae mme o nesetsa batho ba lokileng le ba sa lokang pula ya hae.+ 46 Le lebeletse ho fumana moputso ofe haeba le rata batho ba le ratang feela?+ Na le babokelli ba lekgetho ha ba etse ntho e tshwanang? 47 Hape haeba le dumedisa bana ba bo lona feela, le etsa ntho efe e mohlolo? Na le batho ba ditjhaba ha ba etse ntho e tshwanang? 48 Ka hoo, le phethahale jwalo ka ha Ntate wa lona ya lehodimong a phethahetse.+

6 Hlokomelang hore le se ke la etsa mesebetsi e lokileng ka pela batho hore feela ba le bone,+ ho seng jwalo Ntate wa lona ya mahodimong a ke ke a le fa moputso. 2 Ka hoo, ha o fa bafutsana diphallelo,* o se ke wa ipoledisa* jwalo ka ha baikaketsi ba etsa matlong a thapelo* le diterateng e le hore ba roriswe ke batho. Ka nnete ke re ho lona, ba se ba fumane moputso wa bona o feletse. 3 Empa wena ha o fa bafutsana diphallelo, o se ke wa dumella letsoho la hao le letshehadi hore le tsebe seo le letona le se etsang 4 e le hore thuso ya hao e be lekunutu. Ka ha Ntate wa hao ya mahodimong o bona ntho e nngwe le e nngwe, o tla o hlohonolofatsa.+

5 Hape, ha le rapela, le se ke la ba jwalo ka baikaketsi+ hobane ba rata ho rapela ba eme ka matlung a thapelo le dikhoneng tsa diterata tse kgolo hore ba bonwe ke batho.+ Ka nnete ke re ho lona, ba se ba fumane moputso wa bona o feletse. 6 Empa ha o rapela, o kene ka kamoreng, o kwale monyako ebe o rapela Ntate wa hao ya mahodimong.*+ Ka ha Ntate wa hao ya mahodimong o bona ntho e nngwe le e nngwe, o tla o hlohonolofatsa. 7 Ha o rapela, o se ke wa phetapheta mantswe a tshwanang jwalo ka batho ba ditjhaba hobane ba nahana hore Modimo o tla ba utlwa ha ba sebedisa mantswe a mangata. 8 Le se ke la ba etsisa hobane Ntate wa lona o a tseba+ hore na le hlokang le pele le mo kopa.

9 Lona le rapele tjena:+

‘Ntate wa rona ya mahodimong, lebitso la hao+ le halaletswe.+ 10 Mmuso+ wa hao o tle. Thato ya hao+ e etswe lefatsheng jwalo ka ha e etswa lehodimong.+ 11 O re fe bohobe ba letsatsi lena+ 12 hape o re tshwarele diphoso tsa rona jwalo ka ha le rona re tshwaretse ba re etseditseng diphoso.+ 13 O se ke wa re dumella hore re hlolwe ke moleko*+ empa o re lopolle ho ya kgopo.’+

14 Haeba le tshwarela batho diphoso tsa bona, Ntate wa lona ya lehodimong le yena o tla le tshwarela.+ 15 Empa haeba le sa tshwarele batho diphoso tsa bona, Ntate wa lona le yena a ke ke a le tshwarela.+

16 Ha le itima dijo,+ le kgaotse ho bonahala eka le utlwile bohloko jwalo ka baikaketsi hobane ba etsa jwalo* hore batho ba ba bone hore ba itima dijo.+ Ka nnete ke re ho lona, ba se ba fumane moputso wa bona o feletse. 17 Empa ha o itima dijo, o tlotse hlooho ya hao ka oli o be o itlhatswe sefahleho 18 e le hore e be Ntate wa hao ya mahodimong ya bonang hore o itima dijo eseng hore o bonwe ke batho. Ka ha Ntate wa hao ya mahodimong o bona ntho e nngwe le e nngwe, o tla o hlohonolofatsa.

19 Kgaotsang ho ipolokela matlotlo lefatsheng,+ moo tshwele* le mafome di jang le moo mashodu a thuhang mme a utswe. 20 Empa le ipolokele matlotlo lehodimong,+ moo tshwele* kapa mafome di sa jeng+ le moo mashodu a sa thuheng mme a utswe. 21 Etswe moo letlotlo la hao le leng teng, le pelo ya hao e tla ba hona teng.

22 Lebone la mmele ke leihlo.+ Haeba leihlo la hao le sheba nqa e le nngwe, mmele wohle wa hao o tla kganya. 23 Empa haeba leihlo la hao le sheba dintho tse fosahetseng,*+ mmele wohle wa hao o tla ba lefifi. Ha e le hantle, haeba lesedi le ka ho wena ke lefifi, lefifi leo ke le leholo haholo.

24 Ha ho na motho ya ka sebeletsang benghadi ba babedi hobane o tla rata e mong ebe o hloya e mong+ kapa a hlomphe e mong ebe o tella e mong. Le ke ke la sebeletsa Modimo le Maruo.+

25 Ka lebaka lena ke re ho lona, tlohelang ho tshwenyeha+ ka bophelo ba lona hore na le tla jang kapa le tla nwang kapa la tshwenyeha ka mmele ya lona hore na le tla aparang.+ Na bophelo ha bo bohlokwa ho feta dijo le mmele ha o bohlokwa ho feta diaparo?+ 26 Shebang dinonyana,+ ha di jale peo le ha e le ho kotula kapa ho boloka dijo ka setorong empa Ntate wa lona ya lehodimong o a di fepa. Na ha le bohlokwa ho di feta? 27 Ke mang ho lona eo ha a tshwenyeha a ka lelefatsang bophelo ba hae le ha e le hanyenyane feela?*+ 28 Hape ke hobaneng ha le tshwenyeha ka diaparo? Ithuteng ka moo dipalesa* tsa naha di holang ka teng. Ha di lohe diaparo ebile ha di sebetse ka thata 29 empa ke a le bolella hore esita le Solomone+ le hoja a ne a apara hantle, o ne a sa apare jwalo ka tsona. 30 Jwale haeba ena ke tsela eo Modimo a apesang dimela tsa naha ka yona, tse leng teng kajeno mme hosane di lahlelwa ka ontong, na lona a ke ke a le apesa le ho feta, lona ba nang le tumelo e nyenyane? 31 Ka hoo, le ka mohla le se ke la tshwenyeha+ mme la re: ‘Re tla jang?’ ‘Re tla nwang?’ kapa ‘Re tla aparang?’+ 32 Tsena tsohle ke dintho tseo batho ba ditjhaba ba phathahanang ka tsona. Ntate wa lona ya lehodimong o a tseba hore le hloka dintho tsena tsohle.

33 Ka hoo, etsang hore Mmuso wa Modimo le ho mamela Modimo e be dintho tse tlang pele bophelong ba lona* mme o tla le ekeletsa dintho tse ding tsohle.+ 34 Le ka mohla le se ke la tshwenyeha ka letsatsi le hlahlamang+ hobane letsatsi le hlahlamang le tla ba le matshwenyeho a lona. Letsatsi ka leng le na le mathata a lona.

7 Kgaotsang ho ahlola+ e le hore le se ke la ahlolwa 2 hobane le tla ahlolwa ka kahlolo eo le ahlolang ba bang ka yona+ mme batho ba tla le tshwara ka tsela eo le ba tshwarang ka yona.*+ 3 Ke hobaneng ha o sheba lehlokwana le ka leihlong la ngwaneno empa wena o sa bone lepolanka* le ka leihlong la hao?+ 4 Kapa ke jwang o ka reng ho ngwaneno: ‘Ere ke ntshe lehlokwana ka leihlong la hao’ empa wena o ena le lepolanka ka leihlong? 5 Wena moikaketsi, ntsha lepolanka le ka leihlong la hao pele, o tsebe ho bona hantle hore na o ka ntsha lehlokwana le ka leihlong la ngwaneno jwang.

6 Le se ke la fa dintja dintho tse halalelang kapa la lahlela diperela tsa lona ka pela dikolobe+ e le hore le ka mohla di se ke tsa hatakela diperela ka maoto yaba di a le hlasela.

7 Le nne le kope, le tla fuwa.+ Le nne le batle, le tla fumana. Hape le nne le kokote, le tla bulelwa.+ 8 Mang kapa mang ya kopang o a fuwa,+ ya batlang o a fumana le ya kokotang o a bulelwa. 9 Ke mang hara lona eo e ka reng ha mora wa hae a mo kopa bohobe yaba o mo fa lejwe? 10 Kapa ha a mo kopa tlhapi ebe o mo fa noha? 11 Ka hona, haeba lona le hoja le le baetsadibe le tseba ho fa bana ba lona dimpho, le tsebe hore jwang kapa jwang le Ntate wa lona ya mahodimong o tla fana ka dintho tse molemo+ ho ba mo kopang.+

12 Ka hona, dintho tsohle tseo le batlang hore batho ba le etse tsona, le lona le ba etse tsona.+ Ha e le hantle, ena ke ntho e bolelwang ke Molao le Baprofeta.+

13 Kenang ka keiti e nyenyane*+ hobane keiti e isang timelong e kgolo le tsela e lebisang teng e sephara mme ba kenang ka yona ba bangata. 14 Athe keiti e isang bophelong e nyenyane* le tsela e isang teng e patisane mme ke ba seng bakae ba e fumanang.+

15 Hlokomelang baprofeta ba bohata+ ba tlang ho lona ba ikgakantse eka ke dinku+ empa ka hare e le diphiri tse harolang.+ 16 Le tla ba tseba ka diketso* tsa bona. Na ho na le mohla batho ba kgang morara meutlweng kapa difeie* hlabahlabaneng?+ 17 Ho hlakile hore sefate se seng le se seng se setle se hlahisa ditholwana tse ntle empa sefate se seng le se seng se bodileng se hlahisa ditholwana tse se nang thuso.+ 18 Sefate se setle se ke ke sa beha ditholwana tse se nang thuso kapa sefate se bodileng sa hlahisa ditholwana tse ntle.+ 19 Sefate se seng le se seng se sa hlahiseng ditholwana tse ntle se a rengwa ebe se lahlelwa mollong.+ 20 Ka hona, le tla tseba batho bao ka diketso tsa bona.+

21 Ha se e mong le e mong ya reng ho nna: ‘Morena, Morena,’ ya tla kena Mmusong wa mahodimo empa ho tla kena feela ya etsang thato ya Ntate ya mahodimong.+ 22 Ho na le mohla ba bangata ba tla re ho nna: ‘Morena, Morena,+ na ha re a ka ra profeta ka lebitso la hao, ra leleka bademona ka lebitso la hao, ra ba ra etsa mehlolo e mengata ka lebitso la hao?’+ 23 Le ha ho le jwalo, ka nako eo ke tla re ho bona: ‘Ha ke a ka ka le tseba le ka mohla. Tlohang ho nna, lona ba tlolang molao.’+

24 Ka hona, e mong le e mong ya utlwang mantswe ana a ka mme a a phetha, o tla tshwana le monna ya bohlale ya ileng a haha ntlo ya hae hodima letlapa.+ 25 Pula ya tsholoha, merwallo ya tla le meya ya foka yaba e otla ntlo eo empa ha e a ka ya wa hobane e ne e thehilwe hodima letlapa. 26 Ho feta moo, e mong le e mong ya utlwang mantswe ana a ka empa a sa a phethe, o tla tshwana le monna wa sethoto ya ileng a haha ntlo ya hae lehlabatheng.+ 27 Pula ya tsholoha, merwallo ya tla le meya ya foka yaba e otla ntlo eo mme ya wa,+ ya putlama hampe.”

28 Ha Jesu a qeta ho bua mantswe ana, batho ba ne ba tsota tsela eo a rutang ka yona+ 29 ka ha ha a ba ruta, ho ne ho utlwahala hore o fuwe matla a bolaodi ke Modimo.+ O ne a sa ba rute jwalo ka bangodi ba bona.

8 Ka mora hore Jesu a theohe thabeng, batho ba bangata ba mo latela. 2 Monna ya nang le lepera a tla mme a mo kgumamela a re: “Morena, haeba feela o batla, o ka ntlhwekisa.”+ 3 Jesu a otlolla letsoho a mo tshwara yaba o re: “Ke a batla, hlweka.”+ Lepera la hae la fola hanghang.+ 4 Jesu a re ho yena: “O etse bonnete ba hore ha o bolelle mang kapa mang+ empa o ye ho moprista a o bone.+ O nyehele mpho eo Molao wa Moshe o laetseng hore e nyehelwe+ hore e be bopaki ho baprista.”

5 Ha a kena Kapernauma, molaodi wa sesole a tla ho yena, a mo kopa+ 6 a re: “Mohlomphehi, mohlanka wa ka o robetse ka tlung ya ka, o shwele ditho, o kula hampe.” 7 Jesu a re ho yena: “Ha ke fihla moo ke tla mo fodisa.” 8 Molaodi wa sesole a re: “Mohlomphehi, ha ke tshwanelwe ke hore o kene ka tlung ya ka. Bua feela, mohlanka wa ka o tla fola. 9 Etswe le nna ke a laolwa empa ke na le masole ao ke a laolang. Ha ke re ho lesole lena: ‘Tsamaya,’ le a tsamaya. Ha ke re ho le leng: ‘Tloo,’ le a tla. Le ha ke re ho lekgoba la ka: ‘Etsa tjena,’ le etsa jwalo.” 10 Ha Jesu a mo utlwa, a makala mme a re ho ba mo setseng morao: “Ka nnete ke a le bolella, ha ho na motho eo ke fumaneng a ena le tumelo e matla hakana Iseraele.+ 11 Empa ke a le bolella hore ba bangata ba tswang botjhabela le bophirimela ba tla tla mme ba dule tafoleng le Abrahama, Isaka le Jakobo Mmusong wa mahodimo.+ 12 Athe bara ba Mmuso wa mahodimo ba tla lahlelwa lefifing ka ntle. Ke hona moo ba tla lla le ho tsikitlanya meno teng.”+ 13 Yaba Jesu o re ho molaodi eo wa sesole: “Tsamaya. Ka ha o bontshitse hore o na le tumelo, ho ke ho etsahale feela jwalo ka ha o kopile.”+ Mohlanka eo a fola ka yona nako eo.+

14 Ha Jesu a kena ka tlung ya Petrose, a fumana mohwehadi wa Petrose*+ a robetse a tshwerwe ke feberu.+ 15 Ka hoo, Jesu a tshwara letsoho la hae+ yaba o a fola. Mohwehadi wa Petrose a ema yaba o ba etsetsa dijo. 16 Empa ha e eba mantsiboya, batho ba mo tlisetsa batho ba bangata ba nang le bademona. A leleka bademona bao ka ho ba laela feela mme a phekola bohle ba neng ba kula 17 e le hore a phethahatse mantswe a ileng a buuwa ka moprofeta Esaia ha a re: “O ile a jara malwetse a rona, a jara le mafu a rona.”+

18 Ha Jesu a bona letshwele le mo potolohile, a laela barutuwa ba hae hore ba tshelele ka lehlakoreng le leng la Lewatle la Galilea.+ 19 Mongodi e mong a tla ho Jesu yaba o re ho yena: “Mosuwe, ke tla o latela kae kapa kae moo o yang teng.”+ 20 Empa Jesu a re ho yena: “Diphokojwe di na le moo di dulang* le dinonyana di na le dihlaha empa Mora motho yena ha a na ntlo.”*+ 21 Yaba e mong wa barutuwa o re ho yena: “Morena, ke kopa ho yo pata Ntate pele.”+ 22 Jesu a re ho yena: “O nne o ntatele, o tlohele bafu ba pate bafu ba bona.”+

23 A palama sekepe yaba barutuwa ba hae ba a mo latela.+ 24 Ha ba le lewatleng, ha tsoha sefefo se matla hoo sekepe se neng se kwahelwa ke maqhubu. Empa Jesu yena o ne a robetse.+ 25 Yaba ba a tla mme ba a mo tsosa ba re: “Morena, re thuse re a shwa!” 26 Empa a re ho bona: “Ke hobaneng ha le tshohile* hakaale? Tumelo ya lona e fokola hakaakang!”+ Yaba o a ema o kgalemela sefefo le lewatle ka matla mme ha thola tu!+ 27 Ka hoo, banna bao ba makala ba re: “Motho eo ke wa mofuta ofe? Esita le difefo le lewatle di a mo mamela.”

28 Ha a fihla lehlakoreng le leng naheng ya Bagadara, banna ba babedi ba nang le bademona ba ya ho yena ba hlaha mabitleng.+ Ba ne ba le bohale bo tshosang. Ka hoo, ho ne ho se na motho ya sebete sa ho feta ka tsela eo. 29 Ba hweletsa ba re: “Hantle o re batlang Mora Modimo?+ Na o tlile moo ho tla re hlokofatsa+ e eso be nako ya teng?”+ 30 Hojana le bona ho ne ho ntse ho fula dikolobe tse ngata.+ 31 Ka hoo, bademona ba mo kopa ba re: “Haeba o re leleka, o mpe o re romele dikolobeng.”+ 32 A re ho bona: “Tsamayang!” Ba tswa yaba ba kena dikolobeng. Dikolobe tseo kaofela tsa mathela selomong tsa wela ka lewatleng yaba di shwella ka metsing. 33 Badisana ba balehela motseng, ba tlaleha ntho e nngwe le e nngwe, ho akareletsa le taba ya banna ba nang le bademona. 34 Yaba batho bohle ba motse ba a tswa ho tla kopana le Jesu, ha ba mo bona ba mo kopa hore a tsamaye.+

9 Jesu a palama sekepe a tshelela motseng wa habo.+ 2 Batho ba mo tlisetsa monna ya shweleng ditho a robetse hodima lempara. Ha Jesu a bona ka moo ba nang le tumelo ka teng, a re ho motho ya shweleng ditho: “Ngwaneso,* o se ke wa tshwenyeha. O tshwaretswe dibe.”+ 3 Bangodi ba bang ba buela ka pelong ba re: “Motho enwa o rohaka Modimo.” 4 Ka ha Jesu o ne a tseba hore na ba nahanang, a re ho bona: “Ke hobaneng ha le nahana dintho tse fosahetseng jwalo?+ 5 Ke hofe ho bonolo? Na ke ho re: ‘O tshwaretswe dibe’ kapa ho re: ‘Ema o tsamaye’?+ 6 Le ha ho le jwalo, e le hore le tsebe hore Mora motho o na le matla a ho tshwarela dibe lefatsheng . . .” A sheba ka ho motho ya shweleng ditho yaba o re: “Ema, o nke lempara la hao o ye hae.”+ 7 Yaba o a ema o ya hae. 8 Ha setjhaba se bona ntho e etsahetseng sa tshoha haholo. Ka hoo, sa tlotlisa Modimo ya fileng batho matla a makaalo.

9 Ka mora moo, ha Jesu a fetela pele a bona monna ya bitswang Matheu a dutse ofising ya lekgetho. A re ho yena: “Eba molatedi wa ka.” A ema a mo latela.+ 10 Ha morao, ha a ntse a dutse tafoleng ka tlung, babokelli ba lekgetho le baetsadibe ba bangata ba tla mme ba dula tafoleng le Jesu le barutuwa ba hae.+ 11 Ha Bafarisi ba mo bona ba re ho barutuwa ba hae: “Ke hobaneng ha mosuwe wa lona a ja le babokelli ba lekgetho le baetsadibe?”+ 12 Ha a ba utlwa a re: “Batho ba phetseng hantle ha ba hloke ngaka empa ba kulang ba a e hloka.+ 13 Jwale eyang mme le ithute hore na mantswe ana a bolelang: ‘Ke batla mohau eseng sehlabelo.’+ Ke tletse ho bitsa baetsadibe eseng batho ba lokileng.”

14 Barutuwa ba Johanne ba tla ho yena ba re: “Ke hobaneng ha barutuwa ba hao ba sa itime dijo empa rona le Bafarisi re tlwaetse ho itima dijo?”+ 15 Jesu a re ho bona: “Na metswalle ya monyadi e na le lebaka la ho utlwa bohloko ha monyadi+ a ntse a ena le yona? Empa ho na le nako eo monyadi a tla tloswa ho metswalle ya hae,+ jwale ke hona e tla itima dijo. 16 Ha ho motho ya ka rokellang lesela le letjha leseleng la kgale hobane le letjha le tla rutla la kgale ebe la kgale le taboha le ho feta.+ 17 Ebile ha ho motho ya ka tshelang veine e ntjha ka makukeng* a kgale a veine. Haeba a etsa jwalo, makuka a veine a tla phatloha, veine e qhalane ebe makuka ao a a senyeha. Empa motho o tshela veine e ntjha ka makukeng a veine a matjha mme ka bobedi di a bolokeha.”

18 Ha Jesu a ntse a ba bolella ditaba tsena, ha fihla mmusi e mong yaba o a mo kgumamela o re: “E tlameha ebe moradi wa ka o shwele empa ha o ka tla yaba o beha letsoho hodima hae, o tla phela.”+

19 Jesu a ema, a tsamaya le barutuwa ba hae mme ba sala mmusi eo morao. 20 Mosadi e mong ya neng a ena le bothata ba phallo ya madi ka dilemo tse 12+ a tla ka morao mme a tshwara ditjobo tsa seaparo sa Jesu+ 21 ka ha o ne a ntse a re ka pelong: “Haeba feela nka tshwara seaparo sa hae ke tla fola.” 22 Jesu a hetla a mo bona yaba o re ho yena: “Ngwaneso,* o se ke wa tshwenyeha. Tumelo ya hao e o fodisitse.”+ Yaba mosadi eo o fola hanghang.+

23 Ha Jesu a fihla ntlong ya mmusi eo, a bona batho ba letsa makodilo le ba bang ba bangata ba ntse ba bokolla+ 24 yaba o re: “Tsamayang hobane ngwanana enwa ha a shwa empa o robetse.”+ Yaba ba a mo tsheha. 25 Hang ha batho ba se ba le ka ntle, a kena a mo tshwara ka letsoho+ yaba ngwanana eo o a ema.+ 26 Taba eo ya tsebahala dibakeng tsohle tse haufi le moo.

27 Yare ha Jesu a tloha moo, banna ba babedi ba sa boneng+ ba mo sala morao ba hweletsa ba re: “Mora wa Davida, re hauhele.” 28 Ka mora hore a kene ka tlung, banna bao ba sa boneng ba tla ho yena yaba Jesu o re ho bona: “Na le a dumela hore nka le fodisa?”+ Ba re: “E, Morena.” 29 Jwale a thetsa mahlo a bona+ a re: “Mahlo a lona a tla bona hobane le na le tumelo.” 30 Yaba ba a bona. Jesu a ba laela ka thata a re: “Etsang bonnete ba hore ho se ke ha eba le ya mong ya tsebang ka taba ena.”+ 31 Empa ka mora hore ba tswele ka ntle, ba mo phatlalatsa dibakeng tsohle tse haufi le moo.

32 Ha banna bao ba tloha, batho ba mo tlisetsa monna ya sa kgoneng ho bua ya nang le modemona.+ 33 Monna eo a qala ho bua ka mora hore Jesu a leleke modemona ya neng a le ho yena.+ Jwale letshwele la makala la re: “Haesale ha re eso bone ntho e tjena Iseraele.”+ 34 Empa Bafarisi ba ne ba re: “O leleka bademona ka mmusi wa bademona.”+

35 Jesu a qala ho etela metse le metsana yohle, a ruta ka matlung a thapelo,* a bolella batho ditaba tse monate tsa Mmuso a bile a phekola mafu a mefuta yohle.+ 36 Ha a bona batho, a ba hauhela+ hobane ba ne ba sotlehile ebile ba qhalakane jwalo ka dinku tse se nang modisa.+ 37 Yaba o re ho barutuwa ba hae: “Ka nnete kotulo e kgolo empa basebetsi ba a fokola.+ 38 Ka hona, le kope Monga kotulo hore a romele basebetsi kotulong ya hae.”+

10 Jesu a bitsa barutuwa ba hae ba 12 mme a ba fa matla a ho leleka bademona+ le ho phekola mafu a mefuta yohle.

2 Mabitso a baapostola ba 12 ke+ Simone, ya bitswang Petrose+ le Andrease+ ngwanabo, Jakobo mora wa Zebedea le Johanne+ ngwanabo, 3 Filipi, Bartholome,+ Thomase,+ Matheu+ mmokelli wa lekgetho, Jakobo mora wa Alfiase, Thadiase, 4 Simone wa Mokanana* le Judase Iskariota, eo ha morao a ileng a rekisa* Jesu.+

5 Jesu o ile a roma baapostola bana ba 12, a ba fa ditaelo tsena:+ “Le se ke la ya ho batho ba ditjhaba kapa la kena motseng ofe kapa ofe wa Basamaria+ 6 empa le nne le ye dinkung tse lahlehileng tsa ntlo ya Iseraele.+ 7 Ha le ntse le tsamaya, le phatlalatse le re: ‘Mmuso wa mahodimo o atametse.’+ 8 Phekolang bakudi,+ le tsose bafu, le fodise balepera, le leleke bademona. Le fuwe mahala, le lona fanang mahala. 9 Le se ke la nka kgauta, silevera kapa koporo ka dipatjheng tsa lona.+ 10 Le se ke la nka mokotla wa dijo, seaparo sa bobedi,* dieta* kapa lere+ bakeng sa leeto ka ha motho ya sebetsang o tshwanela ho fuwa dijo.+

11 Ha le fihla motseng kapa motsaneng ofe kapa ofe, le batle hore na ke mang ho wona ya ka le amohelang, le dule moo ho fihlela le tloha.+ 12 Ha le kena ka tlung, le dumedise. 13 Haeba ba le amohela, kgotso eo le ba lakaletsang yona e ke e be ho bona.+ Empa haeba ba sa le amohele, kgotso e tswang ho lona e ke e kgutlele ho lona. 14 Haeba mang kapa mang a sa le amohele kapa a sa le mamele ntlong kapa motseng, ha le tswa moo le hlohlore lerole maotong a lona.+ 15 Ka nnete ke re ho lona, ka Letsatsi la Kahlolo, kotlo ya Sodoma le Gomora+ e tla ba bobebe ho feta ya motse oo.

16 Ke le romela le le jwalo ka dinku hara diphiri. Ka hona le be sedi jwalo ka dinoha empa le hloke molato jwalo ka maeba.+ 17 Le be hlokolosi hobane batho ba tla le isa makgotleng a dibaka+ mme ba tla le shapela+ ka matlung a bona a thapelo.*+ 18 Hape le tla iswa ka pela babusisi le marena+ ka lebaka la ka e le hore le bolelle bona le ditjhaba ka tumelo ya lona.+ 19 Le ha ho le jwalo, ha ba le isa le se ke la tshwenyeha ka hore na le tla reng kapa le tla bua jwang. Le tla tseba ka nako eo hore na le reng.+ 20 Le ke ke la bua ka bolona empa moya wa Ntate wa lona o tla le thusa ho bua.+ 21 Motho o tla fana ka ngwanabo hore a bolawe, le ntate a fane ka ngwana wa hae hore a bolawe. Bana le bona ba tla tsohela batswadi matla ba be ba etse hore ba bolawe.+ 22 Batho bohle ba tla le hloya ka lebaka la lebitso la ka+ empa ya mameletseng ho fihlela qetellong ke yena ya tla pholoha.+ 23 Ha ba le hlorisa motseng o mong, le balehele ho o mong+ hobane ka nnete ke a le bolella, Mora motho o tla fihla pele le qeta mosebetsi wa ho bolela metseng le metsaneng ya Iseraele.

24 Moithuti ha a phahamela mosuwe wa hae le lekgoba ha le a phahamela monga lona.+ 25 Moithuti o tla tshwarwa ka tsela eo mosuwe wa hae a tshwarwang ka yona* le lekgoba le tla tshwarwa jwalo ka monga lona.+ Haeba batho ba bitsitse monga ntlo Beelzebube,*+ ba tla bitsa ba ntlo ya hae jwalo. 26 Ka hona, le se ke la ba tshaba ka ha dintho tsohle tse kwahetsweng di tla kwahollwa, le diphiri tsohle di tla senolwa.+ 27 Dintho tseo ke le boleletseng tsona lefifing, le di bue leseding, tseo ke le sebetseng tsona le di bolele le le hodima matlo.+ 28 Le se ke la tshaba ba ka le bolayang empa ba ke ke ba le sitisa ho phela hape.*+ Ho ena le hoo, le tshabe ya ka le fedisang Gehena.*+ 29 Le hoja dirobele tse pedi di rekiswa ka tjhelete ya tshepe,* ha ho le se le seng sa tsona se tla wela fatshe Ntate wa lona a sa tsebe.+ 30 Ha e le lona, o tseba palo ya moriri o dihloohong tsa lona. 31 Ka hona, le se ke la tshoha, le bohlokwa ho feta dirobele tse ngata.+

32 E mong le e mong ya buang phatlalatsa hore ke morutuwa wa ka,+ le nna ke tla bua ka pela Ntate ya mahodimong hore ke morutuwa wa ka.+ 33 Empa mang kapa mang ya ntatolang ka pela batho, le nna ke tla mo latola ka pela Ntate ya mahodimong.+ 34 Le se ke be la nahana hore ke tlisitse kgotso lefatsheng. Ha ke a tlisa kgotso empa ke tlisitse sabole.+ 35 Ke tletse ho baka karohano: Mora o tla lwantsha ntate, moradi a lwantshe mme le ngwetsi e lwantshe matsale.+ 36 Motho o tla hlouwa ke ba lelapa la hae. 37 Mang kapa mang ya ratang ntate kapa mme ho mpheta le ya ratang mora kapa moradi ho mpheta, ha a tshwanelwe ke ho ba morutuwa wa ka.+ 38 Mang kapa mang ya sa ikemisetsang ho mamella mahloriso* le ho ntshala morao ha a tshwanelwe ke ho ba morutuwa wa ka.+ 39 Mang kapa mang ya lekang ho sireletsa bophelo ba hae, o tla fellwa ke bona. Empa mang kapa mang ya shwang hobane e le molatedi wa ka, o tla phela hape.+

40 Mang kapa mang ya le amohelang o a nkamohela le nna hape mang kapa mang ya nkamohelang o amohela le ya nthomileng.+ 41 Mang kapa mang ya amohelang moprofeta hobane e le moprofeta, o tla fumana moputso wa moprofeta.+ Mang kapa mang ya amohelang motho ya lokileng hobane e le motho ya lokileng, o tla fumana moputso wa motho ya lokileng. 42 Mang kapa mang ya fang e mong wa ba banyenyane bana kopi feela ya metsi a batang hore a nwe hobane e le morutuwa, ka nnete ke a le bolella, jwang kapa jwang o tla fumana moputso.”+

11 Ha Jesu a qeta ho fa barutuwa ba hae ba 12 ditaelo, a tloha moo hore a yo ruta le ho bolela metseng e meng.+

2 Empa ka ha Johanne o ne a utlwetse ka mesebetsi ya Kreste a le teronkong,+ a roma barutuwa ba hae ho yena+ 3 hore ba mo botse potso ena: “Na ke wena Ya Tlang kapa re lebelle e mong?”+ 4 Jesu a ba araba a re: “Tsamayang le bolelle Johanne hore na le utlwang le hore na le bonang:+ 5 Hona jwale ba foufetseng ba a bona,+ ba holofetseng ba a tsamaya, balepera+ ba ntse ba fodiswa, ba sa utlweng ditsebeng ba a utlwa le bafu ba ntse ba tsoswa, bafutsana bona ba bolellwa ditaba tse monate.+ 6 Ho thaba motho ya ntshepang a sa belaele.”*+

7 Ha barutuwa ba Johanne ba ntse ba le tseleng, Jesu a re ho matshwele ka Johanne: “Monna eo le mo boneng lefeelleng ke mang?+ Na ke motho ya kang lehlaka le ntseng le tsukutlwa ke moya?+ 8 Le bone mang? Na le bone monna ya apereng diaparo tse turu? Batho ba apereng diaparo tse turu ba matlong a marena. 9 Jwale ha e le hantle, e ne e le mang? Na e ne e le moprofeta? E, e ne e le moprofeta a bile a le bohlokwa haholo ho feta baprofeta.+ 10 Enwa ke eo ho ngotsweng tjena ka yena: ‘Ke romela moromuwa wa ka pele ho wena* ya tla lokisa tsela ya hao ka pela hao.’+ 11 Ka nnete ke re ho lona, hara bohle ba kileng ba phela, ha ho eso hlahe mang kapa mang e moholo ho Johanne Mokolobetsi empa motho e monyenyane Mmusong wa mahodimo o moholo ho yena.+ 12 Ho tloha mehleng ya Johanne Mokolobetsi ho tla fihlela jwale, batho ba sebeletsa ho kena Mmusong wa mahodimo mme ba sebetsang ka thata ba a o fumana.+ 13 Etswe bohle e leng Baprofeta le Molao, ba ile ba profeta ho fihlela Johanne a fihla.+ 14 Ebang le a kgolwa kapa ha le kgolwe, ke yena ‘Elia ya tlang.’+ 15 Ya nang le ditsebe a ke a utlwe.

16 Moloko oo ke tla o bapisa le mang?+ O jwalo ka bana ba banyenyane ba dutseng dimmarakeng ba ntseng ba buisana le metswalle ya bona 17 ba re: ‘Re ile ra le letsetsa lekodilo yaba ha le tantshe, ra lla yaba ha le utlwe bohloko.’ 18 Ka tsela e tshwanang, Johanne o tlile a sa je, a sa nwe empa batho ba re: ‘O na le modemona.’ 19 Mora motho yena o tlile a ja, a nwa+ empa batho ba re: ‘Bonang motho enwa ya jang ho feta tekano le ya ipolaisang veine. Ke motswalle wa babokelli ba lekgetho le baetsadibe.’+ Le ha ho le jwalo, dintho tse lokileng tseo motho a di etsang di bontsha hore o bohlale.”+

20 Jesu a qala ho kgalemela baahi ba metse eo a entseng mehlolo* ho yona hobane ha ba a ka ba baka. A re: 21 “Ho madimabe lona baahi ba Korazine le Bethsaida. Hoja mehlolo e etsahetseng metseng ya lona e etsahetse Tire le Sidone, e ka be e le kgale baahi ba teng ba bakile, ba apere lesela le hwashang* le ho dula moloreng.+ 22 Empa ke re ho lona, ka Letsatsi la Kahlolo, kotlo ya baahi ba Tire le Sidone e tla ba bobebe ho feta ya lona.+ 23 Le lona baahi ba Kapernauma,+ na Modimo o tla le phahamisetsa lehodimong? Ho hang. O tla le theolela Lebitleng*+ hobane hoja baahi ba Sodoma ba ile ba bona mehlolo* eo le e boneng motseng wa lona, motse wa bona o ka be o ntse o le teng ho fihlela letsatsing lona lena. 24 Empa ke re ho lona, ka Letsatsi la Kahlolo, kotlo ya baahi ba Sodoma e tla ba bobebe ho feta ya lona.”+

25 Ka nako eo, Jesu a re: “Ke o rorisa phatlalatsa, Ntate, Morena wa lehodimo le lefatshe hobane o patetse ba bohlale le ba nang le kelello dintho tsena empa o di senoletse bana ba banyenyane.+ 26 E, Ntate hobane ke thato ya hao hore ho be jwalo. 27 Ntate ke yena ya mphileng dintho tsohle. Ha ho na motho ya ntsebang* hantle haese Ntate+ ebile ha ho na motho ya tsebang Ntate+ hantle haese nna le mang kapa mang eo ke ratang ho mo ruta ka Ntate.+ 28 Tloong ho nna, lona bohle ba sehlang le ba imetsweng, ke tla le kgatholla. 29 Jarang joko ya ka le ithute ho nna hobane ke bonolo ebile ke ikokobeditse+ mme le tla kgatholoha. 30 Etswe joko ya ka ha e boima le mojaro wa ka o bobebe.”

12 Ka letsatsi le leng ha Jesu a ntse a tsamaya hara masimo a koro* ka Sabatha, barutuwa ba hae ba lapa yaba ba kga koro ba a ja.+ 2 Ha Bafarisi ba ba bona ba re ho yena: “Bona, barutuwa ba hao ba etsa ntho eo ba sa lokelang ho e etsa ka Sabatha.”+ 3 Jesu a re ho bona: “Na ha le a ka la bala hore na Davida o ile a etsang ha yena le banna ba neng ba ena le yena ba lapile?+ 4 Hore o ile a kena ka tlung ya Modimo yaba ba ja bohobe bo halalelang*+ boo yena le banna ba neng ba ena le yena ba neng ba sa dumellwa ho bo ja, bo jewang ke baprista feela?+ 5 Kapa na ha le a bala Molaong hore ka Disabatha, baprista ba a sebetsa tempeleng empa ha ba molato wa ho tlola molao wa Sabatha?+ 6 Empa ke a le bolella hore ya teng mona o bohlokwa ho feta tempele.+ 7 Jwale hoja le ne le utlwisisa hore na ho bolelwang ha ho thwe: ‘Ke batla mohau+ eseng sehlabelo,’+ le ka be le sa ahlola ba se nang molato. 8 Mora motho ke Morena wa Sabatha.”+

9 Ha Jesu a tloha moo, a kena ntlong ya bona ya thapelo.* 10 Ho ne ho ena le monna ya omeletseng* letsoho moo.+ Ka ha Bafarisi ba ne ba batla ho qosa Jesu, ba re ho yena: “Na molao o dumella motho ho fodisa ka Sabatha?”+ 11 A re ho bona: “Haeba e mong wa lona a ena le nku e le nngwe ebe e wela ka sekoting ka Sabatha, na a ka e tlohela ebe ha a e ntshe?+ 12 Motho yena o bohlokwa haholo ho feta nku. Ka hoo, molao o dumella motho ho etsa ntho e ntle ka Sabatha.” 13 Jwale a re ho monna eo: “Otlolla letsoho la hao.” A le otlolla, la fola yaba le tshwana le le leng. 14 Empa Bafarisi ba tswa mme ba rera ho bolaya Jesu. 15 Ha Jesu a tseba ka taba ena a tloha moo. Batho ba bangata ba mo sala morao+ yaba o ba phekola kaofela. 16 Yaba o ba laela ka thata hore ba se ke ba bolella batho ka yena+ 17 e le hore ho ka phethahala mantswe a ileng a buuwa ka moprofeta Esaia ya ileng a re:

18 “Bonang! Mohlanka wa ka+ eo ke mo kgethileng, moratuwa wa ka, ya nthabisang.+ Ke tla mo fa moya wa ka+ mme o tla bontsha ditjhaba hore na toka ke eng. 19 A ke ke a pheha kgang+ kapa a hweletsa hape a ke ke a buela hodimo diterateng tse kgolo. 20 A ke ke a roba lehlaka le tletleraneng kapa a tima kgwele ya lebone le haufi le ho tima+ ho fihlela a tlisa toka. 21 Ruri ditjhaba di tla tshepela ho yena.”*+

22 Jwale ba mo tlisetsa monna ya nang le modemona, a sa bone a bile a sa tsebe ho bua. Jesu a phekola monna eo yaba o kgona ho bua le ho bona. 23 Batho bohle ba hlollwa mme ba re: “Na ebe eo ha se yena Mora wa Davida?” 24 Ha Bafarisi ba utlwa ba re: “Motho enwa o leleka bademona ka Beelzebube* mmusi wa bademona.”+ 25 Ka ho tseba menahano ya bona, a re ho bona: “Mmuso o mong le o mong o arohaneng o a wa, le motse o mong le o mong kapa lelapa* le arohaneng le ke ke la tshwarella. 26 Ka tsela e tshwanang, haeba Satane a leleka Satane, o a itwantsha. Jwale mmuso wa hae o tla ema jwang? 27 Hape, haeba nna ke leleka bademona ka Beelzebube, bara ba lona ba ba leleka ka mang? Ke ka lebaka lena ba tla le ahlola. 28 Empa haeba ke leleka bademona ka moya wa Modimo, Mmuso wa Modimo o se o fihlile empa ha le eso o bone.+ 29 Motho a ka futuhela ntlo ya monna ya matla a ba a nka thepa ya hae jwang ntle le hore a mo fase pele? Ka mora moo, ke hona a ka utswang thepa e ka tlung ya hae. 30 Mang kapa mang ya seng ka lehlakoreng la ka o kgahlanong le nna mme mang kapa mang ya sa bokelleng le nna o a hasanya.+

31 Ka lebaka lena ke re ho lona, batho ba tla tshwarelwa sebe sa mofuta o mong le o mong le ho nyefola empa ya rohakang moya wa Modimo a ke ke a tshwarelwa.+ 32 Mohlala, mang kapa mang ya nyefolang Mora motho, o tla tshwarelwa.+ Empa mang kapa mang ya rohakang moya o halalelang, a ke ke a tshwarelwa, eseng mehleng ena* kapa e tlang.+

33 Haeba o le sefate se setle, ditholwana tsa hao di tla ba monate empa haeba o le sefate se sebe, ditholwana tsa hao di tla ba mpe hobane sefate se tsejwa ka ditholwana tsa sona.+ 34 Madinyane a marabe,+ le ka bua dintho tse lokileng jwang empa le le kgopo? Motho o bua ntho e tletseng ka pelong ya hae.*+ 35 Motho ya lokileng o bua dintho tse ntle hobane ho tletse tsona ka pelong ya hae empa motho ya kgopo o bua dintho tse mpe hobane ho tletse tsona ka pelong ya hae.+ 36 Ke a le bolella hore ka Letsatsi la Kahlolo batho ba tla ikarabella+ bakeng sa ntho e nngwe le e nngwe e se nang thuso eo ba e buang. 37 Haeba o bua dintho tse ntle, Modimo o tla o nka o lokile empa haeba o bua dintho tse mpe o tla o nka o le molato.”

38 Bangodi ba bang le Bafarisi ba mo araba ba re: “Mosuwe, etsa mohlolo re tsebe ho bona hore ehlile o ronngwe ke Modimo.”+ 39 A re ho bona: “Batho ba kgopo le ba sa tshepahaleng* ba moloko ona ba ntse ba batla mohlolo empa ha ho mohlolo oo ba tla o bona haese mohlolo o etsahaletseng moprofeta Jonase.+ 40 Feela jwalo ka ha Jonase a ile a ba ka mpeng ya tlhapi ya tonanahadi ka matsatsi a mararo le masiu a mararo,+ Mora motho le yena o tla ba ka mpeng ya lefatshe ka matsatsi a mararo le masiu a mararo.+ 41 Ka letsatsi la kahlolo, batho ba Ninive ba tla tsoha bafung le ba moloko ona mme batho ba Ninive ba tla ba ahlola hobane ba ile ba baka ha ba utlwa molaetsa wa Jonase.+ Empa ya teng mona o bohlokwa ho feta Jonase.+ 42 Mofumahadi wa borwa o tla tsoswa bafung le batho ba moloko ona ka Letsatsi la Kahlolo mme o tla ba ahlola hobane o ile a tla a tswa sebakeng se hole haholo ho tla bona ka moo Solomone a leng bohlale ka teng.+ Empa ya teng mona o bohlokwa ho feta Solomone.+

43 Ha modemona a tswa ho motho, o feta dibakeng tse omeletseng a ntse a batla sebaka sa phomolo. Ha a sa se fumane+ 44 o re: ‘Ke tla kgutlela ntlong ya ka eo ke ileng ka tswa ho yona.’ Ha a fihla o fumana ho se na motho ya dulang ntlong eo empa e fietswe e bile e kgabisitswe. 45 Jwale o lata bademona ba bang ba supileng ba kgopo ho mo feta ebe o tsamaya le bona. Ba a kena ebe ba dula moo mme qetellong motho eo o ba mobe ho feta pele.+ Ho tla ba jwalo le ka moloko ona o kgopo.”

46 Ha Jesu a ntse a bua le letshwele, mme wa hae le bana babo+ ba ne ba eme ka ntle ba batla ho bua le yena.+ 47 Motho e mong a re ho yena: “Mme wa hao le bana beno ba eme ka ntle ba batla ho bua le wena.” 48 A re ho motho eo: “Mme ke mang hona bana beso ke bomang?” 49 A otlollela letsoho ho barutuwa ba hae a re: “Mme le bana beso ke bana.+ 50 Mang kapa mang ya etsang thato ya Ntate ya lehodimong ke yena ngwaneso, kgaitsedi ya ka le mme wa ka.”+

13 Letsatsing leo, Jesu a tswa ka tlung a yo dula pela lewatle. 2 Letshwele le leholo la mo bokanela yaba o palama sekepe, a dula ka ho sona ha batho bao kaofela ba eme lebopong.+ 3 A ba ruta dintho tse ngata ka ho ba etsetsa dipapiso.+ A re: “Mojadi o ile a tswa ho ya jala.+ 4 Ha a ntse a jala, peo e nngwe ya wela haufi le tsela yaba dinonyana di a e ja.+ 5 E nngwe ya wela dipakeng tsa majwe moo ho se nang mobu o mongata. Ya mela hanghang hobane mobu o ne o sa teba.+ 6 Ha letsatsi le tjhaba ya tjha yaba e a omella hobane e ne e se na metso. 7 E nngwe ya wela hara meutlwa yaba meutlwa e a hola e a e bipetsa.+ 8 E nngwe yona ya wela mobung o motle mme ya qala ho beha ditholwana. Peo e nngwe ya beha tse 100, e nngwe tse 60, e nngwe tse 30.+ 9 Ya nang le ditsebe a ke a utlwe.”+

10 Barutuwa ba tla ho yena ba re: “Ke hobaneng ha o bua le bona o sebedisa dipapiso?”+ 11 Ha a araba a re: “Le dumeletswe ho utlwisisa diphiri tse halalelang+ tsa Mmuso wa mahodimo empa bona ha ba a dumellwa. 12 Etswe mang kapa mang ya nang le letho, o tla ekeletswa a be le ho hongata. Empa mang kapa mang ya se nang letho, o tla amohuwa le seo a nang le sona.+ 13 Ke ka lebaka lena ke buang le bona ke sebedisa dipapiso hobane ba a sheba empa ha ba bone, ba a mamela empa ha ba utlwe hape ha ba utlwisise.+ 14 Ba phethahatsa boprofeta ba Esaia bo reng: ‘Ho utlwa le tla utlwa empa ho hang le ke ke la utlwisisa. Ho sheba le tla sheba empa ho hang le ke ke la bona.+ 15 Batho bana ba dihlooho* di thata. Ka ditsebe ba utlwile empa ba se ke ba araba. Ba kwetse mahlo ebile ba ithibile ditsebe e le hore le ka mohla ba se ke ba bona le ho utlwa. Ke ka hoo ba sa utlwisiseng* hore na ba lokela ho etsang ebile ba sa kgutleleng ho nna e le hore nka ba fodisa.’+

16 Empa le a thaba hobane le bona dintho tsena ebile le a di utlwa.+ 17 Ka nnete ke re ho lona, baprofeta le banna ba bangata ba lokileng ba ile ba lakatsa ho bona dintho tseo le di bonang le ho utlwa dintho tseo le di utlwang+ empa ha ba a ka ba di bona kapa ba di utlwa.

18 Jwale mamelang tlhaloso ya papiso ya monna ya ileng a jala.+ 19 Peo e jetsweng haufi le tsela ke motho ya utlwang molaetsa wa Mmuso empa a sa o utlwisise ebe Diabolose*+ o a tla mme o fothola se jetsweng pelong ya hae.+ 20 Peo e jetsweng dipakeng tsa majwe, ke motho ya utlwang molaetsa ebe hanghang o o amohela ka thabo.+ 21 Empa ka ha molaetsa ha o a mela ka metso ka pelong ya hae, o o dumela ka nakwana ebe ha ho hlaha matshwenyeho kapa mahloriso ka lebaka la molaetsa wa Mmuso, hanghang o kgaotsa ho dumela molaetsa oo. 22 Peo e jetsweng hara meutlwa, ke motho ya utlwang lentswe empa mathata a lefatshe lena*+ le tabatabelo ya ho rua* di bipetsa lentswe ebe ha le behe ditholwana.+ 23 Peo e jetsweng mobung o motle ke batho ba utlwang lentswe mme ba le utlwisisa, ba hlileng ba behang ditholwana, e mong a hlahisa tse 100, e mong tse 60, e mong tse 30.”+

24 A ba etsetsa papiso e nngwe a re: “Mmuso wa mahodimo o ka tshwantshwa le motho ya ileng a jala peo e ntle tshimong ya hae. 25 Ha batho ba ntse ba robetse, sera sa hae sa tla, sa jalella mofoka hara koro yaba se a tsamaya. 26 Ha lekgasi le hlaha mme le beha, mofoka le wona wa bonahala. 27 Ka hoo, makgoba a monga ntlo a ya ho yena yaba a re: ‘Monghadi, na ha o a ka wa jala peo e ntle tshimong ya hao? Jwale ho tla jwang hore ebe e na le mofoka?’ 28 A re ho ona: ‘Sera sa ka ke sona se entseng jwalo.’+ Makgoba a re ho yena: ‘Jwale ha o batle hore re ye re o fothole?’ 29 A re: ‘Tjhe, ke tshaba hore ha le ntse le fothola mofoka le tla tloha le o fotholella le koro. 30 Di tloheleng di hole mmoho ho fihlela ha ho kotulwa. Ka nako ya kotulo ke tla re ho bakotudi: “Qalang pele ka ho bokella mofoka, le o tlame mangata hore o tjheswe ebe le bokella koro ka setorong sa ka.”’”+

31 A ba etsetsa papiso e nngwe a re: “Mmuso wa mahodimo o tshwana le peo ya mosetareta eo motho e mong a ileng a e lema tshimong ya hae.+ 32 Ha e le hantle, ke peo e nyenyane ka ho fetisisa hara dipeo tsohle empa ha e hodile ke yona e kgolo ka ho fetisisa hara meroho mme e ba jwalo ka sefate seo dinonyana di fumanang bodulo hara makala a sona.”

33 A ba etsetsa papiso e nngwe a re: “Mmuso wa mahodimo o tshwana le tomoso eo mosadi a ileng a e nka a e tswaka le dijeke tse tharo tse kgolo* tsa phofo ho fihlela hlama eo kaofela e betse.”+

34 Jesu o ile a bolella letshwele dintho tsena tsohle ka ho etsa dipapiso. O ne a sa bue le bona a sa etse papiso+ 35 e le hore ho ka phethahala se ileng sa buuwa ka moprofeta ya ileng a re: “Ke tla bua dipapiso ka molomo wa ka, ke phatlalatse dintho tse ileng tsa patwa ho tloha qalong.”*+

36 Ka mora ho bolella letshwele hore le tsamaye, a ya ka tlung. Barutuwa ba hae ba ya ho yena ba re: “Re hlalosetse papiso ya mofoka o tshimong.” 37 A re ho bona: “Motho ya jalang peo e ntle ke Mora motho, 38 tshimo ke lefatshe,+ peo e ntle ke bana ba Mmuso, mofoka wona ke bana ba Diabolose,*+ 39 sera se ileng sa jala mofoka ke Diabolose. Kotulo ke nako ya bofelo ba lefatshe* mme bakotudi ke mangeloi. 40 Ka hona, jwalo ka ha mofoka o bokellwa mme o tjheswa ka mollo, ho tla ba jwalo ha bofelo ba lefatshe* bo le haufi.+ 41 Mora motho o tla romela mangeloi a hae mme a tla bokella dintho tsohle tse dihelang batho sebeng* le batho ba tlwaetseng ho etsa tlolo ya molao, a ba tlose Mmusong wa hae. 42 A tla ba lahlela seboping sa mollo.+ Ke hona moo ba tla lla le ho tsikitlanya meno teng. 43 Ka nako eo, ba lokileng ba tla kganya jwalo ka letsatsi+ Mmusong wa Ntate wa bona. Ya nang le ditsebe a ke a utlwe.

44 Mmuso wa mahodimo o tshwana le letlotlo le patilweng tshimong, leo motho a ileng a le fumana yaba o le pata hape hona tshimong eo. Ka lebaka la ho thaba, o rekisa dintho tsohle tseo a nang le tsona ebe o reka tshimo eo.+

45 Hape Mmuso wa mahodimo o tshwana le rakgwebo ya tsamayang ya batlang diperela tse ntle. 46 Ha a fumana perela e le nngwe ya boleng bo phahameng, a tloha a rekisa dintho tsohle tseo a neng a ena le tsona kapele yaba o a e reka.+

47 Hape Mmuso wa mahodimo o tshwana le letlowa* le leholo le akgelwang lewatleng mme le bokella ditlhapi tsa mefuta yohle. 48 Ha le tletse, batho ba le hulela lebopong ebe ba dula fatshe. Ba tshela tse ntle+ ka dijaneng, tse mpe+ ba a di lahla. 49 Ho tla ba jwalo nakong eo bofelo ba lefatshe* bo leng haufi. Mangeloi a tla tla ebe a arola ba sa lokang ho ba lokileng 50 mme a tla lahlela ba sa lokang seboping sa mollo. Ke hona moo ba tla lla le ho tsikitlanya meno teng.

51 Na le utlwisisitse dintho tsee tsohle?” Ba re ho yena: “E.” 52 Yaba o re ho bona: “Ha ho le jwalo, morupedi e mong le e mong wa setjhaba ya rutilweng ka Mmuso wa mahodimo o tshwana le mongantlo ya ntshang dintho tse ntjha le tsa kgale letlotlong la hae.”

53 Ha Jesu a qeta ho etsa dipapiso tsena a tloha moo. 54 Ka mora hore a kene motseng wa habo,+ a ba ruta a le ka tlung ya bona ya thapelo* yaba batho ba a hlollwa ba re: “Monna eo o fumane bohlale boo le matla a ho etsa mehlolo ee hokae?+ 55 Na eo ha se mora wa mmetli wa mapolanka?+ Na mme wa hae ha se Maria? Na bana babo ha se Jakobo, Josefa, Simone le Judase?+ 56 Na dikgaitsedi tsa hae kaofela ha di hara rona moo? Jwale o fumane dintho tsee tsohle hokae?”+ 57 Ka hoo, ba hana ho dumela ho yena.+ Empa Jesu a re ho bona: “Moprofeta o hlomphuwa hohle ntle le ha habo le ka tlung ya hae.”+ 58 Ha a ka a etsa mehlolo e mengata moo hobane ba ne ba se na tumelo.

14 Heroda,* mmusi wa setereke, a utlwela ka Jesu.+ 2 Yaba o re ho bahlanka ba hae: “Enwa ke Johanne Mokolobetsi. O tsositswe bafung, ke ka lebaka leo a nang le matla a ho etsa mehlolo ena.”+ 3 Heroda o ne a ile a tshwara Johanne a mo tlama mme a mo kwalla teronkong ka lebaka la Herodiase. Qalong Herodiase e ne e le mohatsa Filipi moholwane wa Heroda.+ 4 Johanne o ne a ye a re ho Heroda: “Molao ha o o dumelle hore o nyale mosadi eo.”+ 5 Heroda o ne a batla ho bolaya Johanne le hoja a ne a tshaba batho hobane ba ne ba mo nka e le moprofeta.+ 6 Mohla ho ketekwang letsatsi la tswalo ya Heroda,+ moradi wa Herodiase a tantsha ka pela bona yaba Heroda o thaba haholo+ 7 hoo a ileng a ikana hore o tla mo fa eng kapa eng eo a e kopang. 8 Mme wa hae a mo susumeletsa hore a re: “Mphe hlooho ya Johanne Mokolobetsi e behilwe hodima sejana.”+ 9 Le hoja morena a ile a sarelwa, ka ha o ne a hlompha dikano tsa hae a bile a hlompha le batho ba jang le yena, a laela hore e fanwe. 10 Ka hoo, a roma lesole mme la kgaola Johanne hlooho a le teronkong. 11 Hlooho ya hae ya tliswa e le hodima sejana mme ya fuwa morwetsana, yena a e isa ho mme wa hae. 12 Ha morao barutuwa ba Johanne ba tla mme ba tlosa setopo sa hae, ba mo pata yaba ba ya ho Jesu ba a mo tlalehela. 13 Ha Jesu a utlwa ditaba tsena a tloha moo ka sekepe a ya moo a leng mong. Empa ha batho ba utlwa hore o tsamaile ba mo sala morao ka maoto ba tloha metseng ya bona.+

14 Ha a fihla lebopong, a bona batho ba bangata, a ba hauhela+ mme a phekola ba kulang.+ 15 Empa ha letsatsi le dikela barutuwa ba hae ba tla ho yena ba re: “Sebaka sena se hole haholo hape e se e le mantsiboya. Ere batho bana ba tsamaye e le hore ba ka kena metsaneng ba ithekela dijo.”+ 16 Le ha ho le jwalo, Jesu a re ho bona: “Ha ho hlokahale hore ba tsamaye. Lona ba feng dijo.” 17 Ba re ho yena: “Ha re na letho mona haese mahobe a mahlano le ditlhapi tse pedi.” 18 A re: “Di tliseng.” 19 Ka mora moo, a re batho ba dule hodima jwang.* Yaba o nka mahobe ao a mahlano le ditlhapi tse pedi, a sheba lehodimong a kopa tlhohonolofatso.+ A qhetsola mahobe, a a fa barutuwa, barutuwa bona ba a fa batho. 20 Ka hoo, bohle ba ja ba kgora. Barutuwa ba nka bohobe bo setseng yaba bo tlala dibaskete tse 12.+ 21 Ho ile ha ja batho ba ka bang 5 000 ho sa balellwe basadi le bana.+ 22 Ntle ho tshenyo ya nako, a re barutuwa ba hae ba palame sekepe mme ba mo etelle pele ho ya ka lehlakoreng le leng la lewatle ho fihlela batho ba tsamaile.+

23 Ka mora hore a re batho ba tsamaye, a nyolohela thabeng a le mong ho ya rapela.+ O ne a ntse a le mong moo ho fihlela mantsiboya. 24 Ka nako ena, sekepe se ne se le hole le lebopo ka dimithara tse makgolokgolo,* barutuwa ba sokodiswa ke maqhubu hobane moya o ne o le matla haholo. 25 Empa ka meso* a tla ho bona a tsamaya hodima lewatle. 26 Ha barutuwa ba mo bona a tsamaya hodima lewatle ba hweletsa ba tshohile ba re: “Keng ntho e tlang le moo?”* 27 Hanghang Jesu a re ho bona: “Le se ke la tshoha, ke nna.”+ 28 Petrose a re ho yena: “Morena, haeba ke wena, ere ke tle ho wena ke tsamaya hodima metsi.” 29 Jesu a re: “Tloo!” Yaba Petrose o theoha sekepe o ya ho Jesu a tsamaya hodima metsi. 30 Empa ha a bona sefefo, a tshoha yaba o a teba. A hweletsa a re: “Morena, mpholose!” 31 Kapelepele Jesu a otlolla letsoho a mo tshwara mme a re ho yena: “Tumelo ya hao e fokola hakaakang! Ke hobaneng ha o ile wa belaela?”+ 32 Ka mora hore ba kene ka sekepeng, sefefo sa kokobela. 33 Jwale ba ka sekepeng ba mo kgumamela* ba re: “Ka nnete o Mora Modimo.” 34 Ba tshelela mose sebakeng se bitswang Genesarete.+

35 Ha banna ba sebaka seo ba mo hlokomela ba bolella batho ba dibakeng tsohle tse haufi le moo. Batho ba mo tlisetsa bohle ba neng ba kula. 36 Ba qala ho mo kopa hore ba mpe ba tshware ditjobo tsa seaparo sa hae+ mme bohle ba ileng ba di tshwara ba fola.

15 Bafarisi le bangodi ba tswang Jerusalema ba tla ho Jesu+ ba re: 2 “Ke hobaneng ha barutuwa ba hao ba sa hlomphe moetlo wa baholoholo ba rona? Ha ba hlape matsoho* pele ba ja.”+

3 Ha a araba a re ho bona: “Ke hobaneng ha lona le tlola melao ya Modimo ka lebaka la moetlo wa lona?+ 4 Modimo o ile a re: ‘Hlompha ntate wa hao le mme wa hao,’+ a boela a re: ‘Mang kapa mang ya rohakang* ntate wa hae kapa mme wa hae o lokela ho bolawa.’+ 5 Empa lona le re: ‘Mang kapa mang ya reng ho ntate wa hae kapa mme wa hae: “Ntho e nngwe le e nngwe eo ke neng nka o thusa ka yona ke se ke e file Modimo e le mpho,”+ 6 ha ho hlokahale hore a hlomphe ntate wa hae ho hang.’ Ka hoo, le entse lentswe la Modimo ntho e se nang thuso ka lebaka la moetlo wa lona.+ 7 Baikaketsi! Esaia o profetile hantle ka lona ha a re:+ 8 ‘Batho bana ba ntlhompha ka melomo feela empa dipelo tsa bona di suthetse hole le nna. 9 Ha ho na thuso ya hore ebe ba ntse ba nthapela hobane ba ruta ditaelo tsa batho jwalo ka ha eka ke dithuto tsa Modimo.’”+ 10 Yaba o bitsetsa batho haufi le yena mme o re ho bona: “Mamelang le utlwisise:+ 11 Motho ha a silafatswe ke ntho eo a e jang empa o silafatswa ke e tswang molomong wa hae.”+

12 Barutuwa ba tla ho yena ba re: “Na o a tseba hore Bafarisi ba ile ba kgopiswa ke dintho tseo o di buileng?”+ 13 A re: “Semela se seng le se seng seo Ntate wa ka ya lehodimong a sa kang a se lema se tla fotholwa. 14 Ba tloheleng, ke batataisi ba foufetseng. Haeba batho ba babedi ba sa boneng ba tataisana, ka bobedi ba tla wela ka sekoting.”+ 15 Petrose a re: “Re hlakisetse papiso ena.” 16 Yaba Jesu o re: “Na le lona le ntse le sa utlwisise?+ 17 Na ha le tsebe hore ntho e nngwe le e nngwe e jewang e feta ka maleng ebe e ntshetswa ka sekoting sa dikgwerekgwere? 18 Le ha ho le jwalo, dintho tse tswang molomong di tswa pelong mme dintho tseo di silafatsa motho.+ 19 Mohlala, pelong ho tswa menahano e fosahetseng+ e etsang hore ho be le dipolao, bofebe, boitshwaro bo bobe bo amanang le thobalano,* boshodu, bopaki ba bohata le dithohako. 20 Motho o silafatswa ke dintho tsena eseng ho ja dijo ka matsoho a sa hlatsuwang.”*

21 Ha Jesu a tloha moo, a ya dibakeng tse haufi le Tire le Sidone.+ 22 Mosadi e mong wa Mofoenisia ya tswang dibakeng tseo a tla ho yena a hweletsa haholo a re: “Nkgauhele, Morena, Mora wa Davida. Moradi wa ka o kenwe ke modemona ya mo sotlang hampe.”+ 23 Empa Jesu ha a ka a mo araba. Ka hoo, barutuwa ba hae ba tla ho yena ba re: “Ere a tsamaye hobane o ntse a tla a hweletsa ka mora rona.” 24 Jesu a re ho mosadi eo: “Ha ke a romelwa ho mang kapa mang haese dinku tse lahlehileng tsa ntlo ya Iseraele.”+ 25 Empa mosadi eo a tla a mo kgumamela a re: “Morena, nthuse!” 26 Ha a araba a re: “Ha ho a nepahala ho nka bohobe ba bana ebe bo akgellwa madinyane a dintja.” 27 A re: “Ke nnete Morena empa le ona madinyane a dintja a ja makumane a wang tafoleng ya beng ba ona.”+ 28 Jesu a re ho yena: “Tumelo ya hao e matla. Ho ke ho etsahale jwalo ka ha o lakatsa.” Moradi wa hae a fola ka yona nako eo.

29 Jesu a tloha moo a ya haufi le Lewatle la Galilea.+ A nyolohela thabeng, a dula teng. 30 Batho ba bangata ba mo atamela ba tlile le batho ba holofetseng, ba sa boneng, ba sa kgoneng ho bua le ba bang ba bangata. Ba ba tlisa ho Jesu yaba o a ba phekola.+ 31 Ka hoo, ha letshwele le bona batho ba sa kgoneng ho bua ba bua, ba holofetseng ba tsamaya le ba sa boneng ba bona, la makala yaba le tlotlisa Modimo wa Iseraele.+

32 Empa Jesu a bitsa barutuwa ba hae a re: “Ke hauhela batho bana+ hobane ba se ba qetile matsatsi a mararo ba dutse le nna mme ha ba na dijo. Ha ke batle hore ba tsamaye ba lapile hobane ba ka nna ba fellwa ke matla tseleng.”+ 33 Le ha ho le jwalo, barutuwa ba re ho yena: “Re tla fumana mahobe a tla fepa batho ba bangata hakaale hokae re le hole tjee?”+ 34 Yaba Jesu o re ho bona: “Le na le mahobe a makae?” Ba re: “A supileng le ditlhapi tse nyenyane tse seng kae.” 35 Ka hoo, ha a qeta ho bolella batho hore ba dule fatshe, 36 a nka mahobe ao a supileng le ditlhapi mme ka mora ho leboha, a di arola, a di fa barutuwa, barutuwa bona ba di fa batho.+ 37 Bohle ba ja ba kgora yaba barutuwa ba nka dibaskete* tse supileng tse kgolo tse tletseng bohobe bo setseng.+ 38 Ho ile ha ja batho ba 4 000 ho sa balellwe basadi le bana. 39 Qetellong, ka mora hore a re batho ba tsamaye, a kena sekepeng a ya Magadane.+

16 Bafarisi le Basaduse ba tla ho yena ba mo kopa hore a ba etsetse mohlolo o tswang lehodimong e le ho mo leka.+ 2 A re ho bona: “Ha letsatsi le dikela le tlwaetse ho re: ‘Boemo ba lehodimo bo tla ba botle hobane lehodimo le bofubedu bo hlakileng.’ 3 Hoseng teng le re: ‘Kajeno ho tla bata le pula e tla na ka ha lehodimo le bofubedu bo hlakileng ebile ho maru.’ Le tseba ho hlalosa ponahalo ya lehodimo empa ha le utlwisise hore na dintho tse etsahalang hona jwale di bolelang. 4 Batho ba kgopo le ba sa tshepahaleng* ba moloko ona ba ntse ba batla mohlolo empa ha ho mohlolo oo ba tla o bona+ haese mohlolo o etsahaletseng Jonase.”+ Yaba o a tsamaya o a ba siya.

5 Barutuwa ba tshelela ka lehlakoreng le leng la lewatle yaba ba lebala ho nka bohobe.+ 6 Jesu a re ho bona: “Dulang le butse mahlo mme le hlokomele tomoso ya Bafarisi le Basaduse.”+ 7 Ka hoo, ba buisana ba re: “Ha re a ka ra nka bohobe.” 8 Ha Jesu a ba utlwa a re: “Ke hobaneng ha le ntse le re ha le na bohobe? Tumelo ya lona e a fokola. 9 Na le ntse le eso hlakelwe kapa ha le hopole hore na le ile la nka dibaskete tse kae ka mora hore ke fepe batho ba 5 000 ka mahobe a mahlano?+ 10 Kapa le se le lebetse hore na le ile la nka dibaskete* tse kae ka mora hore ke fepe batho ba 4 000 ka mahobe a supileng?+ 11 Ho tla jwang hore ebe ha le lemohe hore ke ne ke sa bue le lona ka bohobe? Ke ne ke bolela hore le hlokomele tomoso ya Bafarisi le Basaduse.”+ 12 Ka hoo, ba utlwisisa hore o ne a sa bue ka tomoso ya bohobe empa o ne a re ba hlokomele thuto ya Bafarisi le Basaduse.

13 Ha Jesu a le motseng wa Sesarea Filipi a re ho barutuwa ba hae: “Batho ba re Mora motho ke mang?”+ 14 Ba re: “Ba bang ba re ke Johanne Mokolobetsi,+ ba bang ba re ke Elia,+ ba bang bona ba re ke Jeremia kapa e mong wa baprofeta.” 15 A re ho bona: “Lona le re ke mang?” 16 Simone Petrose a re: “O Kreste,+ Mora wa Modimo ya phelang.”+ 17 Jesu a re ho yena: “O hlohonolofetse wena Simone mora wa Jona hobane ha se motho* ya o senoletseng taba ena empa o e senoletswe ke Ntate ya mahodimong.+ 18 Hape ke re ho wena: O Petrose.+ Ke tla haha phutheho ya ka hodima lefika lena+ mme lefu* le ke ke la e hlola ka matla. 19 Ke tla o fa dinotlolo tsa Mmuso wa mahodimo. Eng kapa eng e tlanngweng mahodimong, o tla e tlama lefatsheng. Hape eng kapa eng e lokolotsweng mahodimong, o tla e lokolla lefatsheng.” 20 Jesu a laela barutuwa ka thatathata hore ba se ke ba bolella mang kapa mang hore ke yena Kreste.+

21 Ho tloha ka nako eo ho ya pele Jesu a hlalosetsa barutuwa ba hae hore o tla ya Jerusalema, a hloriswe hampe ke baholo, baprista ba baholo le bangodi, a be a bolawe ebe o tsoswa ka letsatsi la boraro.+ 22 Yaba Petrose o mo nkela ka thoko mme o qala ho mo kgalemela o re: “Ikgauhele, Morena. Ho hang o ke ke wa etsahallwa ke ntho e tjena.”+ 23 Empa Jesu a mo furalla, a re ho yena: “Tloha* Satane! O tshitiso ho nna hobane o nahana menahano ya batho eseng ya Modimo.”+

24 Jesu a re ho barutuwa ba hae: “Haeba mang kapa mang a batla ho ntshala morao, a se ke a hlola a iphelela. A ikemisetse ho mamella mahloriso* mme a nne a ntatele.+ 25 Mang kapa mang ya batlang ho sireletsa bophelo ba hae, o tla fellwa ke bona. Empa mang kapa mang ya shwang hobane e le molatedi wa ka, o tla phela hape.+ 26 Ha e le hantle motho o tla fumana molemo ofe ha a rua lefatshe lohle empa a feletswe ke bophelo ba hae?+ Kapa a ka reka bophelo ba hae ka eng?+ 27 Mora motho o tla tla ka kganya ya Ntate wa hae a ena le mangeloi a hae ebe o ahlola e mong le e mong ho ya ka mesebetsi ya hae.+ 28 Ka nnete ke re ho lona, ho na le ba bang ba emeng mona bao ho hang ba ke keng ba shwa pele ba bona Mora motho a tla ka Mmuso wa hae.”+

17 Matsatsi a tsheletseng ha morao, Jesu a tsamaya le Petrose, Jakobo le Johanne ngwanabo mme a nyolohela le bona thabeng e phahameng ba le bang.+ 2 Tjhebahalo ya hae ya fetoha ba ntse ba mo shebile. Sefahleho sa hae sa kganya jwalo ka letsatsi, le diaparo tsa hae tsa phatsima* haholo.+ 3 Ho sa le jwalo, ba bona Moshe le Elia ba hlaha ba buisana le Jesu. 4 Yaba Petrose o re ho Jesu: “Morena, ke hantle hore ebe re mona. Haeba o batla, ke tla hloma ditente tse tharo mona, e nngwe e be ya hao, e nngwe e be ya Moshe, e nngwe e be ya Elia.” 5 Ha a sa ntse a bua, leru le kganyang la ba kwahela. Lentswe la hlaha lerung leo la re: “Enwa ke Mora wa ka eo ke mo ratang, ya nkgahlisang.+ Mo mameleng.”+ 6 Ha barutuwa ba utlwa ditaba tsena ba tshoha haholo yaba ba kgumama difahleho di shebile fatshe. 7 Jesu a ba atamela yaba o a ba tshwara o re: “Emang. Le se ke la tshoha.” 8 Ha ba sheba hodimo, ba bona Jesu a setse a le mong feela. 9 Ha ba ntse ba theoha thabeng, Jesu a ba laela a re: “Le se ke la bolella mang kapa mang pono ena ho fihlela Mora motho a tsoswa bafung.”+

10 Le ha ho le jwalo, barutuwa ba re: “Ke hobaneng ha bangodi ba re Elia o tla tla pele?”+ 11 Ha a araba a re: “Ehlile Elia o a tla mme o tla busetsa dintho tsohle madulong.+ 12 Le ha ho le jwalo, ke re ho lona Elia o se a tlile empa ha ba a ka ba mo tseba. Ba ile ba mo etsa dintho tseo ba di batlang.+ Ka tsela e tshwanang, le Mora motho o tlo hlokofatswa ke bona.”+ 13 Barutuwa ba hlokomela hore o ne a bua ka Johanne Mokolobetsi.

14 Ha ba tla ba lebile letshwele,+ monna e mong a mo atamela, a mo kgumamela yaba o re: 15 “Morena, hauhela mora wa ka hobane o a kula o tshwerwe ke sethwathwa.* O atisa ho wela mollong le ka metsing.+ 16 Ke ile ka mo tlisa ho barutuwa ba hao empa ba sitilwe ho mo phekola.” 17 Ha Jesu a araba a re: “Lona moloko o se nang tumelo o bileng o leng kgopo,+ ke tla dula le lona ho fihlela neng? Ke tla le mamella ho fihlela neng? Mo tliseng kwano.” 18 Jwale Jesu a kgalemela modemona mme a tswa ho yena. Moshanyana eo a fola hanghang.+ 19 Ka mora moo, barutuwa ba tla ho Jesu moo ba leng bang ba re: “Ke hobaneng ha re ile ra sitwa ho leleka modemona eo?” 20 A re ho bona: “Ke hobane tumelo ya lona e a fokola. Ka nnete ke a le bolella hore haeba tumelo ya lona e lekana le peo ya mosetareta, le tla re ho thaba ena: ‘Tloha mona o ye mane,’ ebe e a tloha mme ha ho letho leo le ke keng la kgona ho le etsa.”+ 21 *——

22 Ha ba ntse ba bokane Galilea Jesu a re ho bona: “Mora motho o tlo rekiswa* ebe ho fanwa ka yena matsohong a batho.+ 23 Ba tla mo bolaya ebe o tsoswa ka letsatsi la boraro.”+ Yaba barutuwa ba sarelwa haholo.

24 Ka mora hore ba fihle Kapernauma, banna ba bokellang lekgetho la tempele* ba tla ho Petrose ba re: “Na mosuwe wa lona o ntsha lekgetho la tempele?”+ 25 A re: “E.” Yare ha a kena ka tlung Jesu a re ho yena: “Simone, o nahana jwang? Marena a lefatshe a fumana lekgetho ho bomang? Ho bana ba ona kapa ho batho ba bang?” 26 Petrose a re: “Ho batho ba bang.” Yaba Jesu o re: “E leng hore bana ba ona ha ba ntshe lekgetho. 27 Empa e le hore re se ke ra ba kgopisa,+ eya lewatleng o lahlele huku e tshwasang ditlhapi* ebe o nka tlhapi ya pele eo o tla e tshwasa. Ha o e ahlamisa o tla fumana tjhelete ya silevera.* O e nke o re patalle re le babedi.”

18 Ka nako eo, barutuwa ba tla ho Jesu ba re: “Ha e le hantle ke mang e moholo Mmusong wa mahodimo?”+ 2 A bitsa ngwana e monyenyane, a mo emisa ka pela bona 3 mme a re: “Ka nnete ke a le bolella hore ha le sa fetohe la tshwana le bana ba banyenyane,+ ho hang le ke ke la kena Mmusong wa mahodimo.+ 4 Ka hona, mang kapa mang ya tla ikokobetsa jwalo ka ngwana enwa, ke yena e moholo Mmusong wa mahodimo.+ 5 Hape mang kapa mang ya amohelang ngwana e monyenyane jwalo ka enwa ka lebaka la lebitso la ka, le nna o a nkamohela. 6 Haeba motho a etsa hore e mong wa ba banyenyane bana ba dumelang ho nna a lahle tumelo ya hae,* ho ka ba molemo haholo hore lelwala le leholo* le tlamellwe molaleng wa hae ebe o lahlelwa ka lewatleng.+

7 Ho madimabe lefatshe hobane le etsisa batho sebe. Ke nnete hore dintho tse dihelang batho sebeng di tla dula di le teng empa ho madimabe motho eo di tlang ka yena. 8 Jwale, haeba letsoho kapa leoto la hao le etsa hore o etse sebe,* o le kgaole o le lahlele hole le wena.+ Ho molemo hore o fumane bophelo o qhwadile kapa o holofetse ho ena le ho lahlelwa mollong o sa feleng* o ena le matsoho kapa maoto a mabedi.+ 9 Hape, haeba leihlo la hao le etsa hore o etse sebe,* le honye o le lahlele hole le wena. Ho molemo hore o fumane bophelo o ena le leihlo le le leng ho ena le ho lahlelwa mollong wa Gehena* o ena le mahlo a mabedi.+ 10 Itlhokomeleng hore le se ke la nyefola e mong wa ba banyenyane bana hobane ke a le bolella hore mangeloi a bona a dula a le ka pela Ntate ya lehodimong.+ 11 *——

12 Le nahana jwang? Haeba motho a ena le dinku tse 100 ebe e nngwe e a lahleha,+ na a ke ke a siya tse 99 dithabeng ebe o a tsamaya o yo batla e lahlehileng?+ 13 Haeba a e fumane, ka nnete ke a le bolella, o e thabela haholo ho feta tse 99 tse sa kang tsa lahleha. 14 Ka tsela e tshwanang, Ntate* ya lehodimong ha a rate hore ho timele le ya mong wa ba banyenyane bana.+

15 Hape haeba ngwaneno a etsa sebe, eya o mo bontshe phoso ya hae* moo le leng bang.+ Haeba a o mamela, o tla be o thusitse ngwaneno ho etsa ntho e nepahetseng.+ 16 Empa haeba a sa mamele, o ye le paki e le nngwe kapa tse pedi e le hore taba e nngwe le e nngwe e ka tiiswa ka bopaki* ba dipaki tse pedi kapa tse tharo.+ 17 Haeba a sa ba mamele, o bue le phutheho. Haeba a sa mamele le phutheho, ho wena a be feela jwalo ka moditjhaba+ kapa mmokelli wa lekgetho.+

18 Ka nnete ke re ho lona, eng kapa eng e tlanngweng mahodimong, le tla e tlama lefatsheng. Hape eng kapa eng e lokolotsweng mahodimong, le tla e lokolla lefatsheng. 19 Ka nnete ke boetse ke re ho lona, haeba ba babedi ba lona lefatsheng ba dumellana ho kopa ntho efe kapa efe ya bohlokwa, Ntate ya lehodimong o tla ba etsetsa yona.+ 20 Etswe moo ho nang le ba babedi kapa ba bararo ba bokaneng ka lebitso la ka,+ ke teng moo hara bona.”

21 Jwale Petrose a tla mme a re ho yena: “Morena, ke lokela ho tshwarela ngwaneso ka makgetlo a makae ha a ntshitetswe? A supileng?” 22 Jesu a re: “Eseng ka makgetlo a supileng empa ka makgetlo a 77.+

23 Ke ka lebaka leo Mmuso wa mahodimo o ka bapiswang le morena ya neng a batla hore makgoba a hae a mo patale tjhelete eo a mo kolotang yona. 24 Ha a qala ho bokella tjhelete eo a e kolotwang, bahlanka ba hae ba mo tlisetsa motho ya neng a mo kolota ditalenta tse 10 000.* 25 Empa ka ha o ne a se na mokgwa wa ho patala, monga hae a laela hore yena, mosadi wa hae, bana ba hae le dintho tsohle tseo a nang le tsona di rekiswe e le hore ho patalwe sekoloto.+ 26 Ka hona, lekgoba leo la itihela fatshe la mo kgumamela yaba le re: ‘O se ke wa mphella pelo hle monga ka. Ke tla patala sekoloto sa ka kaofela.’ 27 Monga lekgoba a le hauhela, a le tlohela hore le tsamaye yaba o hlakola sekoloto sa lona.+ 28 Empa lekgoba leo la tswa mme la fumana lekgobammoho le lona le neng le le kolota didenari tse 100.* La le tshwara, la le kgama yaba le re: ‘Mpatale ntho e nngwe le e nngwe eo o nkolotang yona.’ 29 Lekgobammoho le lona la itihela fatshe yaba le a le kopa le re: ‘O se ke wa mphella pelo hle ngwaneso, ke tla o patala.’ 30 Empa la hana ho le mamela. La tloha yaba le a le tshwarisa e le hore le dule teronkong ho fihlela le ka patala sekoloto sa lona. 31 Ha batho bao e leng makgobammoho le lona ba bona hore na ho etsahetseng, ba utlwa bohloko haholo. Ba tsamaya ba tlalehela monga bona dintho tsohle tse etsahetseng. 32 Jwale monga lekgoba leo a le bitsa a re ho lona: ‘Wena lekgoba le kgopo, ke o hlakoletse sekoloto sa hao kaofela ha o ne o nkopa. 33 Na le wena o ne o sa tshwanela hore ebe o hauhetse lekgobammoho le wena jwalo ka ha le nna ke o hauhetse?’+ 34 Monga lona a halefa haholo, a le kenya teronkong* ho fihlela le ka patala sekoloto sa lona kaofela. 35 Ntate wa ka wa lehodimo le yena o tla le etsa jwalo+ haeba le lona le sa tshwarele bana ba bo lona ka dipelo tsohle tsa lona.”+

19 Ha Jesu a qetile ho bua ditaba tsena, a tloha Galilea a ya meeding ya Judea ka mose ho Jordane.+ 2 Letshwele le leholo la mo sala morao mme a le phekolela moo.

3 Bafarisi ba tla ho yena ba ikemiseditse ho mo leka ba re: “Na molao o dumella monna ho hlala mosadi wa hae ka lebaka le ha e le lefe?”+ 4 Ha a araba a re: “Na ha le eso bale hore qalong Modimo o bopile monna le mosadi+ 5 yaba o re: ‘Ka lebaka leo, monna o tla siya ntate wa hae le mme wa hae a kgomarele mosadi wa hae mme bobedi ba bona e tla ba nama e le nngwe’?+ 6 E leng hore ha ba sa le babedi empa e se e le nama e le nngwe. Ka hona, ho se ke ha eba le motho ya arolang batho bao Modimo a ba kopantseng.”*+ 7 Ba re ho yena: “Jwale ke hobaneng ha Moshe a laetse hore monna a fe mosadi lengolo la tlhalo, a mo hlale?”+ 8 A re ho bona: “Moshe o ile a le dumella ho hlala basadi ba lona hobane le le manganga.+ Empa qalong ho ne ho se jwalo.+ 9 Ke re ho lona, mang kapa mang ya hlalang mosadi wa hae haese ka lebaka la boitshwaro bo bobe bo amanang le thobalano* ebe o nyala e mong o a feba.”+

10 Barutuwa ba re ho yena: “Haeba lenyalo le jwalo, ha se bohlale ho nyala.” 11 A re ho bona: “Ha se bohle ba ka kgonang ho phela jwalo empa ke feela ba nang le mpho eo+ 12 hobane ho na le batho ba hlahileng e le maqhalaha* le ba entsweng maqhalaha ke batho. Hape ho na le ba sa nyaleng* ka lebaka la Mmuso wa mahodimo. Ya ka kgonang ho phela jwalo a ke a phele jwalo.”+

13 Batho ba tlisa bana ba banyenyane ho yena e le hore a ba hlohonolofatse* le ho ba rapella empa barutuwa ba ba kgalemela.+ 14 Le ha ho le jwalo, Jesu a re: “Tlohelang bana ba banyenyane ba tle ho nna. Le se ke la leka ho ba thiba hobane Mmuso wa mahodimo ke wa ba tshwanang le bona.”+ 15 A ba hlohonolofatsa* yaba o a tsamaya.

16 Mohlankana e mong a tla ho yena a re: “Mosuwe, ke etseng e molemo hore ke be le bophelo bo sa feleng?”+ 17 Jesu a re ho yena: “Ke hobaneng ha o mpotsa hore na o etseng e molemo?+ Ke Modimo feela ya molemo. Empa haeba o batla ho ba le bophelo bo sa feleng, o mamele ditaelo o sa kgaotse.”+ 18 A re ho yena: “Dife?” Jesu a re: “O se ke wa bolaya,+ o se ke wa feba,+ o se ke wa utswa+ kapa wa fana ka bopaki ba bohata.+ 19 O hlomphe ntate wa hao le mme wa hao.+ O rate moahisani wa hao jwalo ka ha o ithata.”+ 20 Mohlankana eo a re ho yena: “Ke phetha ditaelo tseo tsohle. Ho sa setseng?” 21 Jesu a re ho yena: “Haeba o batla ho phethahala, tsamaya o rekise dintho tsa hao ebe o fa bafutsana tjhelete eo, jwale o tla ba le letlotlo lehodimong.+ Ka mora moo o tle, o be molatedi wa ka.”+ 22 Ha mohlankana eo a utlwa mantswe ao, a tloha a saretswe hobane o ne a ruile haholo.+ 23 Yaba Jesu o re ho barutuwa ba hae: “Ka nnete ke re ho lona, e tla ba ntho e thata hore morui a kene Mmusong wa mahodimo.+ 24 Hape ke re ho lona, ho bonolo hore kamele e tswe lesobeng la nale ho ena le hore morui a kene Mmusong wa Modimo.”+

25 Ha barutuwa ba utlwa a tjho jwalo, ba makala haholo ba re: “Ke mang ya ka pholohang?”+ 26 Jesu a ba sheba yaba o re ho bona: “Ho batho ho ke ke ha kgoneha empa dintho tsohle di a kgoneha ho Modimo.”+

27 Petrose a re: “Bona, re siile dintho tsohle mme ra o latela. Jwale re tla fumana eng?”+ 28 Jesu a re ho bona: “Ka nnete ke re ho lona, ha dintho tsohle di ntjhafatswa, Mora motho a dula teroneng ya hae e kganyang, lona ba ntatetseng le tla dula diteroneng tse 12, le ahlole meloko e 12 ya Iseraele.+ 29 E mong le e mong ya siileng matlo, bana babo, ntate kapa mme, bana kapa masimo ka lebaka la lebitso la ka o tla fumana dintho tsena halekgolo a be a fumane bophelo bo sa feleng.+

30 Empa ba bangata ba pele e tla ba ba ho qetela mme ba ho qetela e be ba pele.+

20 Mmuso wa mahodimo o jwalo ka mongantlo, ya ileng a tswa hoseng haholo ho ya hira basebetsi bakeng sa tshimo ya hae ya morara.+ 2 Ka mora hore a dumellane le basebetsi hore o tla ba patala denari* ka letsatsi, a ba romela tshimong ya hae ya morara. 3 Ha a tswa hape hoo e ka bang ka hora ya borobong hoseng,* a bona ba bang ba eme mmarakeng ba hloka mosebetsi. 4 Le ho bao a re: ‘Le lona eyang tshimong ya morara mme ke tla le fa eng kapa eng e loketseng.’ 5 Ka hoo ba ya. A boela a tswa hoo e ka bang ka 12 motshehare* le ka hora ya boraro motshehare wa mantsiboya* mme a hira basebetsi ba bang. 6 Qetellong, hoo e ka bang ka hora ya bohlano mantsiboya* a tswa mme a fumana ba bang ba eme yaba o re ho bona: ‘Ke hobaneng ha le eme moo letsatsi lohle le hloka mosebetsi?’ 7 Ba re ho yena: ‘Hobane ha ho na motho ya re hirileng.’ A re ho bona: ‘Le lona eyang tshimong ya ka ya morara.’

8 Ha letsatsi le dikela, monga tshimo ya morara a re ho motho ya ikarabellang: ‘Bitsa basebetsi mme o ba lefe meputso ya bona,+ ho qala ka wa ho qetela ho isa ho wa pele.’ 9 Ha banna ba hirilweng ka hora ya bohlano mantsiboya* ba tla, e mong le e mong a patalwa denari.* 10 Ka hoo, ha ba pele ba tla, ba nahana hore ba ne ba tla patalwa haholwanyane empa le bona ba patalwa denari.* 11 Ba e amohela ba ntse ba korotlela monga tshimo 12 ba re: ‘Banna ba ho qetela ba sebeditse hora e le nngwe feela empa o ba patetse moputso o lekanang le wa rona ba sebeditseng ka thata letshehare lohle hara motjheso o bataolang.’ 13 Empa ha a araba e mong wa bona a re: ‘Monna heso, ha ke o qhekelle. Na ha re a dumellana ka hore ke tla o patala denari?*+ 14 Nka moputso wa hao o tsamaye. Ke batla ho fa enwa wa ho qetela moputso o lekanang le oo ke o fileng wona. 15 Na ha ke na tokelo ya ho etsa ntho eo ke e batlang ka dintho tsa ka? Kapa o mona ha ke ba entse hantle?’*+ 16 Ka tsela ena ba ho qetela e tla ba ba pele, ba pele e be ba ho qetela.”+

17 Ha Jesu a le tseleng e nyolohelang Jerusalema, a nkela barutuwa ba 12 lekunutung yaba o re ho bona:+ 18 “Re nyolohela Jerusalema mme ba tla nehelana ka Mora motho ho baprista ba baholo le bangodi. Ba tla mo ahlolela lefu,+ 19 ba nehelane ka yena ho baditjhaba hore ba mo some, ba mo shape ba be ba mo bolaele palong.+ O tla tsoswa ka letsatsi la boraro.”+

20 Mohatsa Zebedea+ a ya ho yena a ena le bara ba hae. A mo kgumamela yaba o mo kopa ho hong.+ 21 Jesu a re ho yena: “O batlang?” Mme eo a re: “Ke kopa hore bara bana ba ka ba babedi ba dule le wena Mmusong wa hao, e mong ka letsohong la hao le letona mme e mong ka ho le letshehadi.”+ 22 Jesu a re: “Ha le tsebe hore na le kopang. Na le ka nwa ntho eo ke leng haufi le ho e nwa?”+ Ba re ho yena: “Re ka e nwa.” 23 A re ho bona: “E, ho e nwa le tla e nwa+ empa ha se nna ya kgethang hore na ke mang ya tla dula ka letsohong la ka le letona kapa le letshehadi. Ke Ntate ya kgethang.”+

24 Ha barutuwa ba bang ba leshome ba utlwa taba ena, ba halefela Jakobo le Johanne.+ 25 Empa Jesu a ba bitsetsa ho yena a re: “Le a tseba hore babusi ba ditjhaba ba di tshwara ka thata le banna ba baholo ba a di hatella.+ 26 Lona ha le a lokela ho etsa jwalo+ empa ya batlang ho ba moholo hara lona e lokela ho ba mosebeletsi wa lona.+ 27 Ya batlang ho ba wa pele hara lona, e lokela ho ba mohlanka wa lona.+ 28 Etswe le Mora motho ha a ka a tlela lefatsheng ho sebeletswa empa o tletse ho sebeletsa+ le ho fana ka bophelo ba hae e le tefo bakeng sa ho lopolla batho ba bangata.”+

29 Ha ba tswa Jeriko, letshwelehadi la mo latela. 30 Ho ne ho ena le banna ba babedi ba sa boneng ba dutseng pela tsela. Ba utlwa hore Jesu o feta moo yaba ba a hweletsa ba re: “Morena, Mora wa Davida, re hauhele!”+ 31 Letshwele la ba kgalemela la re ba thole empa ba hweletsa le ho feta ba re: “Morena, Mora wa Davida, re hauhele!” 32 Ka hoo, Jesu a ema, a ba bitsa a re: “Ke le etsetseng?” 33 Ba re ho yena: “Morena, re kopa o re bule mahlo.” 34 Jesu a ba hauhela yaba o thetsa mahlo a bona.+ Hanghang ba bona mme ba mo sala morao.

21 Ha ba le haufi le Jerusalema, ba fihla Bethefage Thabeng ya Mehlwaare, jwale Jesu a roma barutuwa ba babedi+ 2 a re ho bona: “Tsamayang le kene motsaneng wane o ka pela lona. Ha le fihla le tla fumana tonki e tlanngweng e ena le petsana ya yona. Le di tlamolle mme le di tlise kwano. 3 Ya tla le botsa le mo jwetse hore Morena o a di hloka. Hanghang o tla le tlohela hore le tsamaye le tsona.”

4 Tsena tsohle di etsahetse hore ho phethahale mantswe a ileng a buuwa ke moprofeta a reng: 5 “Ereng ho moradi wa Sione: ‘Morena wa hao o tla ho wena+ a ikokobeditse+ a palame petsana ya tonki.’”+

6 Ka hoo, barutuwa ba tsamaya mme ba etsa feela jwalo ka ha Jesu a ne a ba laetse.+ 7 Ba tlisa tonki le petsana ya yona, ba beha diaparo tsa bona hodima tsona yaba o palama petsana.+ 8 Boholo ba batho ba ala diaparo tsa bona ka tseleng,+ ba bang bona ba poma makala difateng ba a ala ka tseleng. 9 Hape batho ba mo eteletseng pele le ba mo setseng morao ba nna ba hweletsa ba re: “Re rapella hore o pholose Mora wa Davida!+ Ho hlohonolofetse ya tlang ka lebitso la Jehova.*+ Re a rapela, mo pholose wena ya hodimo!”+

10 Jwale ha a fihla Jerusalema, batho bohle ba motseng ba etsa moferefere o moholo ba re: “Ke mang enwa?” 11 Batho ba neng ba ena le yena ba nna ba re: “Ke Jesu, moprofeta+ ya tswang Nazaretha e seterekeng sa Galilea.”

12 Jesu a kena ka tempeleng, a tebela bohle ba rekisang le ba rekang ka tempeleng. A phethola le ditafole tsa ba tjhentjhang tjhelete* le dibentjhe tsa ba rekisang maeba.+ 13 A re ho bona: “Mangolo a re: ‘Ntlo ya ka e tla bitswa ntlo ya thapelo’+ empa lona le e etsa lehaha la mashodu.”+ 14 Hape, batho ba sa boneng le ba qhwadileng ba tla ho yena ka tempeleng mme a ba phekola.

15 Baprista ba baholo le bangodi ba halefa+ ha ba bona dintho tse makatsang tseo a di entseng le ha ba utlwa bashanyana ba neng ba hweletsa ka tempeleng ba re: “Re rapella hore o pholose Mora wa Davida!”+ 16 Ba re ho yena: “Na o a utlwa hore na bana baa ba reng?” Jesu a re ho bona: “E. Na ha le eso bale moo ho thweng: ‘O etsa hore masea le bana ba banyenyane ba o rorise’?”+ 17 A tloha motseng oo a ya Bethani mme a qeta bosiu moo.+

18 Hoseng ha letsatsi le hlahlamang ha a kgutlela Jerusalema, a utlwa a lapile.+ 19 A bona sefate sa feie* ka thoko ho tsela yaba o ya ho sona empa a fumana se sa beha, e le makgasi feela+ yaba o re ho sona: “O se ke wa hlola o beha ditholwana le ka mohla.”+ Sefate seo sa omella hanghang. 20 Taba ena ya makatsa barutuwa yaba ba re: “Ho tla jwang hore ebe sefate sa feie se ile sa omella hanghang?”+ 21 Jesu a ba araba a re: “Ka nnete ke re ho lona, haeba feela le ena le tumelo mme le sa belaele, le tla etsa seo ke se entseng ka sefate sa feie. Hape haeba le re ho thaba ena: ‘Phahama o yo wela ka lewatleng,’ ho tla etsahala.+ 22 Le tla fumana dintho tsohle tseo le di rapellang haeba le ena le tumelo.”+

23 Ka mora hore a kene ka tempeleng, baprista ba baholo le baholo ba setjhaba ba tla ho yena ha a ntse a ruta mme ba re: “Dintho tsee o di etsa ka matla afe? Hona ke mang ya o fileng ona?”+ 24 Jesu a re ho bona: “Ke tla le botsa potso e le nngwe. Haeba le ka nkaraba le nna ke tla le bolella hore na ke etsa dintho tsena ka matla afe. 25 Ke mang ya fileng Johanne matla a ho kolobetsa? Ke Modimo* kapa ke batho?” Yaba ba a buisana ba re: “Haeba re re: ‘Ke Modimo,’ o tla re ho rona: ‘Jwale, ke hobaneng ha le sa ka la dumela ho yena?’+ 26 Empa haeba re re: ‘O a filwe ke batho,’ letshwele lee le tla re etsang hobane kaofela le nka Johanne e le moprofeta?” 27 Ka hoo, ba araba Jesu ba re: “Ha re tsebe.” Le yena a re ho bona: “Le nna nke ke ka le bolella hore na ke nka matla a ho etsa dintho tsena hokae.

28 Le ka reng ka taba ee? Monna e mong o ne a ena le bana ba babedi. A re ho wa pele: ‘Ngwanaka, tsamaya o yo sebetsa tshimong ya morara kajeno.’ 29 A araba a re: ‘Ha ke batle.’ Empa ha morao a swaba yaba o a ya. 30 A ya ho wa bobedi, a bua ntho e tshwanang. Eo a re: ‘Ke tla ya Ntate.’* Empa a se ke a ya. 31 Ke ofe ho ba babedi baa ya ileng a etsa thato ya ntate wa hae?” Ba re: “Wa pele.” Jesu a re ho bona: “Ka nnete ke re ho lona, babokelli ba lekgetho le dihlola ba tla kena pele ho lona Mmusong wa Modimo. 32 Hobane Johanne o ile a tla ho tla le bontsha tsela e lokileng yaba ha le dumele ho yena. Babokelli ba lekgetho le dihlola ba ile ba dumela ho yena+ empa le ka mora moo, ha le a ka la ikutlwa le swabile yaba le dumela ho yena.

33 Papiso e nngwe ke ena: Motho e mong o ne a ena le tshimo ya morara.+ O ile a e lema, a e kampela yaba o etsa sebaka seo a ka tlhotlelang morara ho sona, a haha le tora.+ A hirisetsa balemi tshimo eo yaba o etela hole.+ 34 Ha nako ya ho kotula morara e fihla, a roma makgoba a hae ho balemi ho ya lata morara. 35 Balemi bao ba tshwara makgoba a hae. Ba kgakgatha le leng, ba bolaya le leng mme ba tlepetsa le leng ka majwe.+ 36 A boela a roma makgoba a mang, a mangata ho feta a pele empa le ona ba a etsa jwalo.+ 37 A qetella a romme mora wa hae ho bona, a nahana hore ba tla hlompha mora wa hae. 38 Ha balemi ba bona mora ba buisana ba re: ‘Enwa ke yena mojalefa.+ A re mo bolayeng re tle re je lefa la hae.’ 39 Ka hoo, ba mo tshwara ba mo lahlela ka ntle ho tshimo eo yaba ba a mo bolaya.+ 40 Jwale ha monga tshimo a tla, o tla ba etsang balemi bao?” 41 Ba re ho yena: “Ka ha ba kgopo, o tla ba bolaya ebe o hirisetsa balemi ba bang tshimo eo ya morara, ba tla mo fa karolo ya hae ka nako ya kotulo.”

42 Jesu a re ho bona: “Na ha le eso bale moo Mangolo a reng: ‘Lejwe leo dihahi di le lahlileng le fetohile lejwe la sekgutlo la sehlooho.*+ Lejwe lena le tswa ho Jehova* mme le letle haholo ho rona’?+ 43 Ke ka lebaka lena ke reng ho lona, le tla tsekiswa Mmuso wa Modimo ebe o fuwa setjhaba se hlahisang ditholwana tse lebeletsweng. 44 Hape, motho ya welang hodima lejwe lena o tla hlaha kotsi e mpe.+ Eo le tla mo wela hodimo yena le tla mo silakanya.”+

45 Ha baprista ba baholo le Bafarisi ba utlwile dipapiso tsa hae, ba tseba hore o ne a bua ka bona.+ 46 Ba ne ba batla ho mo tshwara empa ba tshaba letshwele hobane le ne le mo nka e le moprofeta.+

22 Jesu a boela a ba etsetsa dipapiso a re: 2 “Mmuso wa mahodimo o ka tshwantshwa le morena ya ileng a etsetsa mora wa hae mokete wa lenyalo.+ 3 A roma makgoba a hae ho ya bitsa ba memetsweng moketeng empa ba hana ho tla.+ 4 A boela a roma makgoba a mang a re: ‘Bolellang bamemuwa hore ke ba etseditse dijo tsa motshehare. Ke hlabile dipoho le diphoofolo tse ding tse nontshitsweng, dintho tsohle di lokile, ba tle moketeng.’ 5 Empa bamemuwa ba se ke ba a tsotella, ba itsamaela. E mong a ya tshimong ya hae, e mong a ya kgwebong ya hae.+ 6 Ba bang kaofela ba tshwara makgoba a hae, ba a rohaka mme ba a bolaya.

7 Morena a halefa yaba o roma masole a hae ho bolaya babolai bao, a ba a tjhesa motse wa bona.+ 8 A re ho makgoba a hae: ‘Dintho tsohle di lokile bakeng sa mokete empa batho ba menngweng ba ne ba sa tshwanelehe.+ 9 Ka hona, eyang ditseleng tse kgolo ebe le mema motho e mong le e mong eo le tla mo fumana hore a tle moketeng.’+ 10 Ka lebaka leo, makgoba ao a tsamaya yaba a bokella bohle bao a ba fumaneng, ba lokileng le ba kgopo mme ba dula ditafoleng, holo ya letjhato ya tlala.

11 Ha morena a kena ho tla bona baeti, a bona monna e mong ya sa aparelang ho tla moketeng. 12 Ka hoo, a re ho yena: ‘Monna heso, o kene jwang ka moo o sa aparela ho tla moketeng?’ A sitwa ho araba. 13 Yaba morena o re ho bahlanka ba hae: ‘Mo tlameng maoto le matsoho le mo lahlele ka ntle lefifing. Ke hona moo a tla lla le ho tsikitlanya meno teng.’

14 Ba menngweng ba bangata empa ho kgethilwe ba seng bakae.”

15 Jwale Bafarisi ba tsamaya mme ba rerisana hore ba mo tshware ka dipuo tsa hae.+ 16 Ka hoo, ba romela barutuwa ba bona ho yena ha mmoho le balatedi ba Heroda+ ba re: “Mosuwe, re a tseba hore o na le nnete le hore o ruta tsela ya Modimo ka nnete le hore ha o reke sefahleho sa mang kapa mang hobane ha o shebe ponahalo ya batho. 17 Re bolelle, o reng ka taba ee? Na ka molao* motho o lokela ho patala lekgetho ho Sesare kapa tjhe?” 18 Empa ka ha Jesu o ne a tseba merero ya bona e fosahetseng, a re: “Baikaketsi, le ntekelang? 19 Mpontsheng tjhelete ya tshepe e patalang lekgetho.” Ba mo fa denari.* 20 A re ho bona: “Setshwantsho le mongolo oo ke tsa mang?” 21 Ba re: “Ke tsa Sesare.” Yaba o re ho bona: “Ka hona, le fe Sesare dintho tsa hae le Modimo le mo fe tsa hae.”+ 22 Ha ba utlwa a tjho jwalo, ba hlollwa yaba ba a tsamaya.

23 Letsatsing leo Basaduse, ba reng ha ho na tsoho ya bafu,+ ba tla ho yena ba re:+ 24 “Mosuwe, Moshe o ile a re: ‘Haeba monna a shwa a se na bana, ngwanabo o tla nyala mosadi wa hae e le hore a tle a mo etsetse bana.’+ 25 Jwale ho ne ho ena le bana ba motho ba supileng. Wa pele a nyala empa a shwa a se na bana yaba ngwanabo o nyala mohlolohadi eo. 26 Ntho e tshwanang ya hlahela wa bobedi le wa boraro, ho fihlela ho wa bosupa. 27 Qetellong le yena mosadi eo a shwa. 28 Ha ba se ba tsositswe, mosadi eo e tla ba wa mang ho bao ba supileng hobane kaofela ba ile ba mo nyala?”

29 Jesu a re ho bona: “Le fositse hobane ha le tsebe Mangolo le hore na Modimo o matla hakae.+ 30 Ha batho ba se ba tsositswe, ba ke ke ba nyala kapa ba nyalwa empa ba tla tshwana le mangeloi lehodimong.+ 31 Le badile ka tsoho ya bafu. Na ha le a ka la bala moo Modimo a neng a re ho lona: 32 ‘Ke nna Modimo wa Abrahama, Isaka le Jakobo’?+ Yena ke Modimo wa ba phelang eseng wa bafu.”+ 33 Batho ba ne ba hloletswe ha ba utlwa dintho tseo a di rutang.+

34 Ha Bafarisi ba utlwa hore Basaduse ba ne ba sa kgone ho mo araba, ba tla ho yena. 35 E mong wa bona, eo e leng setsebi sa Molao, a mo leka ka ho re: 36 “Mosuwe, taelo e kgolo ke efe Molaong?”+ 37 A re ho yena: “‘O rate Jehova* Modimo wa hao ka pelo ya hao yohle, ka moya* wa hao wohle le ka kelello ya hao yohle.’+ 38 Ena ke yona taelo e kgolo, ya pele. 39 Ya bobedi e tshwanang le yona ke ena: ‘O rate moahisani wa hao jwalo ka ha o ithata.’+ 40 Molao wohle le mantswe a Baprofeta a tswa ditaelong tsena tse pedi.”+

41 Ha Bafarisi ba ntse ba bokane, Jesu a re ho bona:+ 42 “Le nahana jwang ka Kreste? Ke mora wa mang?” Ba re ho yena: “Wa Davida.”+ 43 A re ho bona: “Jwale ke hobaneng ha moya o halalelang o ile wa susumelletsa Davida+ hore a mo bitse Morena, a re: 44 ‘Jehova* o itse ho Morenaka: “Dula ka letsohong la ka le letona ho fihlela ke beha dira tsa hao tlasa maoto a hao”’?+ 45 Jwale haeba Davida a mo bitsa Morena, ke mora wa hae jwang?”+ 46 Ha ho ya ileng a kgona ho mo araba. Ho tloha letsatsing leo ho ya pele, ha ho le ya mong ya ileng a iteta sefuba ho mo botsa hape.

23 Jesu a bua le letshwele le barutuwa ba hae a re: 2 “Bangodi le Bafarisi ba dutse setulong sa Moshe. 3 Ka hona, le etse dintho tsohle tseo ba le bolellang tsona. Empa le se ke la ba etsisa hobane ba bua feela ebe ha ba etse dintho tseo ba di rutang.+ 4 Ba beha mejaro e boima mahetleng a batho+ empa bona ha ba batle le ho e sisinya ka monwana.+ 5 Ntho e nngwe le e nngwe eo ba e etsang ba e etsa hore ba bonwe ke batho+ ka ha ba atolosa mabokosana a tshetseng mangolo ao ba a rwalang diphatleng le matsohong e le ditshireletso+ le ho lelefatsa ditjobo tsa diaparo tsa bona.+ 6 Ba rata ditulo tse ka pele ka matlung a thapelo* le ho dula ditulong tsa bahlomphehi meketeng.+ 7 Ba rata ho dumediswa dimmarakeng le ho bitswa Rabi.* 8 Empa lona le se ke la bitswa Rabi ka ha Mosuwe wa lona o mong+ ebile lona kaofela le bana ba motho. 9 Ho feta moo, ho se ke ha eba le motho eo le mo bitsang ntate wa lona lefatsheng mona hobane Ntate wa lona o mong,+ ke Ya lehodimong. 10 Hape le se ke la bitswa baetapele ka ha Moetapele wa lona o mong, ke Kreste. 11 E moholo hara lona e lokela ho ba mosebeletsi wa lona.+ 12 Mang kapa mang ya iphahamisang o tla kokobetswa+ empa mang kapa mang ya ikokobetsang o tla phahamiswa.+

13 Le madimabe lona bangodi le Bafarisi, baikaketsi! hobane le kwalla batho Mmuso wa mahodimo. Ha le kene ebile le sitisa ba batlang ho kena.+ 14 *——

15 Le madimabe lona bangodi le Bafarisi, baikaketsi!+ hobane le tsamaya hohle hore le sokolle motho a le mong ebe ha a sokoloha le etsa hore a tshwanelwe ke Gehena* ho le feta.

16 Le madimabe lona batataisi ba foufetseng+ hobane le re: ‘Haeba motho a ikana ka tempele, ha ho na taba empa haeba a ikana ka kgauta ya tempele, o tlameha ho phetha kano ya hae.’+ 17 Lona mawatla a sa boneng! Hantle ke hofe ho bohlokwa, kgauta kapa tempele e entseng hore kgauta e halalele? 18 Hape le re: ‘Haeba motho a ikana ka aletare, ha ho na taba empa haeba a ikana ka mpho e hodima yona, o tlameha ho phetha kano ya hae.’ 19 Lona difofu! Hantle ke hofe ho bohlokwa, mpho kapa aletare e etsang hore mpho e halalele? 20 Ya ikanang ka aletare o ikana ka yona le ka dintho tsohle tse hodima yona 21 le ya ikanang ka tempele o ikana ka yona le ka ya ahileng ho yona.+ 22 Hape ya ikanang ka lehodimo o ikana ka terone ya Modimo le ka ya dutseng ho yona.

23 Le madimabe lona bangodi le Bafarisi, baikaketsi! hobane le fana ka karolo ya leshome ya kwena, dille le kumine+ empa le tlohetse ditaba tsa bohlokwa haholo tsa Molao e leng toka,+ mohau+ le botshepehi. Le ne le tlameha ho etsa dintho tsena empa eseng hore le iphapanyetse dintho tse ding.+ 24 Le batataisi ba foufetseng,+ ba sefang monwang+ empa ba kwenya kamele.+

25 Le madimabe lona bangodi le Bafarisi, baikaketsi! hobane le hlwekisa bokantle ba kopi le ba sejana+ empa ka hare di tletse meharo*+ le ho hloka boitshwaro.+ 26 Sefofu sa Mofarisi! Hlwekisa bokahare ba lebekere le ba sejana pele ebe o hlwekisa le bokantle ba tsona.

27 Le madimabe lona bangodi le Bafarisi, baikaketsi!+ hobane le tshwana le mabitla a pentilweng,+ a bonahalang a le matle ka ntle empa ka hare a tletse masapo a bafu le dibodu tsa mefuta yohle. 28 Le lona le bonahala le lokile ho batho empa ka hare le tletse boikaketsi le tlolo ya molao.+

29 Le madimabe lona bangodi le Bafarisi, baikaketsi!+ hobane le haha mabitla a baprofeta mme le kgabisa mabitla a ba lokileng+ 30 ebile le re: ‘Hoja re phetse mehleng ya baholoholo ba rona, re ka be re sa ba thusa ho bolaya baprofeta.’ 31 Ka hona, le a ipaka hore le bara ba batho ba bolaileng baprofeta.+ 32 Jwale he, qetelang mesebetsi eo baholoholo ba lona ba e qadileng.

33 Lona dinoha, madinyane a marabe,+ le tla phonyoha kahlolo ya Gehena* jwang?+ 34 Ke ka hoo ke romang baprofeta ho lona,+ banna ba bohlale le barupedi ba setjhaba.+ Ba bang ba bona le tla ba bolaya,+ le ba fanyehe dipalong mme ba bang le tla ba shapela+ ka matlung a lona a thapelo,* le ba hlorise+ ho tloha motseng o mong ho ya ho o mong 35 e le hore le ka ba molato wa madi a batho bohle ba lokileng ba bolaetsweng lefatsheng, ho tloha ka madi a Abele+ ya lokileng ho ya ka a Zakaria mora wa Barakia, eo le mo bolaetseng dipakeng tsa sehalalelo le aletare.+ 36 Ka nnete ke a le bolella hore moloko ona o tla ikarabella ka dintho tsena tsohle.

37 Jerusalema, Jerusalema, mmolai wa baprofeta le ya tlepetsang ka majwe ba rometsweng ho yena,+ ke hakae ke neng ke batla ho bokella bana ba hao jwalo ka ha kgoho e bokella ditsuonyana tsa yona tlasa mapheo a yona empa la nna la hana?+ 38 Modimo o tla tlohela ntlo ya lona a le siye le yona.*+ 39 Ke a le bolella hore ho tloha jwale le ke ke la hlola le mpona ho fihlela le re: ‘Ho hlohonolofetse ya tlang ka lebitso la Jehova.’”*+

24 Ha Jesu a tsamaya a tloha tempeleng, barutuwa ba hae ba atamela ba mo supisa mehaho ya yona. 2 A re ho bona: “Na le a e bona mehaho ee kaofela? Ka nnete ke re ho lona, majwe ohle a teng mona a tla heletswa. Ha ho lejwe le tla sala hodima le leng.”+

3 Ha Jesu a ntse a dutse Thabeng ya Mehlwaare, barutuwa ba tla ho yena moo ba leng bang ba re: “Re bolelle, dintho tsee di tla etsahala neng? Hona re tla bona kang hore o teng*+ le hore lefatshe lee* le a fela?”+

4 Jesu a re ho bona: “Itlhokomeleng hore ho se ke ha eba le motho ya le kgelosang+ 5 ka ha ba bangata ba tla tla ka lebitso la ka ba re: ‘Ke nna Kreste’ ebe ba kgelosa ba bangata.+ 6 Le tla utlwela ka dintwa le ditlaleho tsa dintwa, le ha ho le jwalo, le se ke la tshoha. Dintho tsena di tla etsahala empa ha e eso be bofelo.+

7 Ditjhaba di tla lwantshana le mebuso e hlaselane.+ Ho tla ba le tlala+ le ditshisinyeho tsa lefatshe sebakeng se seng ka mora se seng.+ 8 Dintho tsena tsohle ke qalo feela ya tlokotsi.

9 Ka nako eo, batho ba tla fana ka lona hore le hloriswe+ ebile ba tla le bolaya.+ Ditjhaba tsohle di tla le hloya ka lebaka la lebitso la ka.+ 10 Hape ba bangata ba tla suthela hole le Modimo mme ba tla fetohelana le ho hloyana. 11 Ho tla hlaha baprofeta ba bangata ba bohata ebe ba kgelosa batho ba bangata.+ 12 Batho ba bangata ha ba sa tla ratana ka lebaka la ho ata ha tlolo ya molao. 13 Empa ya mameletseng ho fihlela qetellong ke yena ya tla pholoha.+ 14 Ditaba tse monate tsa Mmuso di tla bolelwa lefatsheng lohle hore batho ba ditjhaba tsohle+ ba di utlwe* ebe ke hona bofelo bo tlang.

15 Ka hona, ha le bona ntho e nyonyehang le e senyang e le sebakeng se halalelang jwalo ka ha moprofeta Daniele a boletse,+ (ya balang boprofeta boo a bo utlwisise hantle) 16 ba leng Judea ba balehele dithabeng.+ 17 Monna ya ka hodima ntlo a se ke a theoha ebe o kena ka tlung ya hae ho ya nka ntho le ha e le efe 18 le ya tshimong a se ke a kgutla ho ya nka seaparo sa hae. 19 Matsatsing ao, baimana le batswetse ba tla ba madimabe. 20 Le nne le rapelle hore le se ke la tlameha ho baleha e le mariha kapa ka Sabatha 21 ka ha nakong eo, ho tla ba le mahlomola a maholo.+ A kang ona ha a eso be teng ho tloha ha lefatshe le thehwa ho fihlela jwale ebile ha a sa tla ba teng.+ 22 Ha e le hantle, ho ne ho se motho ya ka pholohang hoja matsatsi ao a se ke a fokotswa. Empa a tla fokotswa ka lebaka la bakgethwa.+

23 Haeba mang kapa mang a re ho lona: ‘Bonang, Kreste ke enwa!’+ kapa, ‘Ke yane!’ le se ke la mo kgolwa.+ 24 Etswe ho tla hlaha bo Kreste le baprofeta ba bohata+ mme ba tla etsa mehlolo e mengata e meholo hore haeba ho kgoneha ba kgelose+ esita le bakgethwa. 25 Le tle le hopole hore ke ile ka le lemosa. 26 Ka hoo, haeba batho ba re ho lona: ‘O lefeelleng!’ le se ke la ya, kapa ba re: ‘O ka dikamoreng!’ le se ke la ba kgolwa.+ 27 Ha lehadima le benya ka botjhabela le bonahala le ka bophirimela. Le ha Mora motho a eba teng* ho tla ba jwalo.+ 28 Hohle moo ho nang le setopo, dintsu di tla bokana teng.+

29 Hanghang ka mora mahlomola a matsatsi ao, letsatsi le tla fifala,+ kgwedi e ke ke ya kganya, dinaledi di tla wa lehodimong le dintho tse mahodimong di tla sisinyeha.+ 30 Pontsho ya Mora motho e tla bonahala lehodimong. Ditjhaba tsohle* tsa lefatshe di tla lla+ mme di tla bona Mora motho+ a tla ka maru,* matla le kganya e kgolo.+ 31 Terompeta e tla llela hodimo ebe Mora motho o romela mangeloi a hae. A tla bokella bakgethwa ba hae ho tswa dikgutlong tse nne tsa lefatshe,* ho tloha pheletsong e nngwe ya mahodimo ho ya ho e nngwe.+

32 Ithuteng ka mohlala wa sefate sa feie.* Hang feela ha lekala la sona le lenyenyane le nolofala mme le hlahisa makgasi, le a tseba hore lehlabula le haufi.+ 33 Ka tsela e tshwanang le lona ha le bona dintho tsena tsohle, le tsebe hore o haufi, o eme menyako.+ 34 Ka nnete ke a le bolella hore dintho tsena tsohle di tla etsahala pele moloko ona o fela. 35 Lehodimo le lefatshe di tla nyamela empa mantswe a ka ona a tla ba teng ho ya ho ile.+

36 Ha ho ya tsebang letsatsi leo kapa hora.+ Mangeloi a mahodimong ha a le tsebe le Mora ha a le tsebe, ke Ntate feela ya le tsebang.+ 37 Ha Mora motho a eba teng,* ho tla tshwana le mehleng ya Noe.+ 38 Etswe mehleng eo pele ho Morwallo, batho ba ne ba ja, ba nwa, banna ba nyala le basadi ba nyadiswa, ho fihlela letsatsing leo Noe a ileng a kena ka arekeng ka lona.+ 39 Ha ba a ka ba elellwa ho fihlela Morwallo o fihla, o ba hohola kaofela.+ Ho tla ba jwalo ha Mora motho a eba teng. 40 Mohlang oo banna ba babedi ba tla be ba le tshimong, e mong o tla nkwa, e mong a siuwe. 41 Basadi ba babedi ba tla be ba sila lelwaleng, e mong o tla nkwa, e mong a siuwe.+ 42 Ka hoo, le dule le fadimehile hobane ha le tsebe hore na Morena wa lona o tla ka letsatsi lefe.+

43 Empa hopolang hore haeba monga ntlo a ne a tsebile hore na leshodu le tla fihla ka nako efe bosiu,*+ a ka be a ile a dula a fadimehile, a se ke a dumella hore ntlo ya hae e thuhuwe.+ 44 Ka hoo, le lona le itokise+ hobane Mora motho o tla tla mohla le sa mo lebellang.

45 Hantle ke mang mohlanka ya tshepahalang le ya bohlale eo monga hae a mo kgethileng hore a hlokomele bahlanka ba ntlo ya hae, a ba fe dijo tsa bona ka nako e tshwanetseng?+ 46 Mohlanka eo o tla thaba haeba monga hae a mo fumana a etsa jwalo.+ 47 Ka nnete ke a le bolella hore o tla mo kgetha hore a hlokomele dintho tsohle tsa hae.

48 Empa haeba mohlanka eo a le kgopo, o tla re ka pelong: ‘Mongaka o a dieha,’+ 49 ebe o otla bahlankammoho le yena, a je a be a nwe le ba tsebahalang e le matahwa. 50 Monga hae o tla tla ka letsatsi leo a sa le lebellang le ka hora eo a sa e lebellang.+ 51 O tla mo fa kotlo e boima ho feta tsohle ebe o mo beha hara baikaketsi. Ke hona moo a tla lla le ho tsikitlanya meno teng.+

25 Mmuso wa mahodimo o ka tshwantshwa le barwetsana ba leshome ba ileng ba nka mabone a bona+ mme ba tswa ho ya kgahlanyetsa monyadi.+ 2 Ba bahlano e ne e le mawatla, ba bang ba bahlano ba le bohlale.+ 3 Ba mawatla ba ile ba nka mabone empa ba siya oli. 4 Ba bohlale bona ba nka oli ka dibotlolo tsa bona ha mmoho le mabone a bona. 5 Ha monyadi a dieha, ba otsela kaofela yaba ba a robala. 6 Hara bosiu batho ba hweletsa ba re: ‘Monyadi ke eo! Tswang le mo kgahlanyetse.’ 7 Yaba barwetsana bao kaofela ba a tsoha ba lokisa mabone a bona.+ 8 Mawatla a re ho ba bohlale: ‘Re qhatsetseng oli ya lona hobane mabone a rona a tlo tima.’ 9 Ba bohlale ba re: ‘E ka nna ya se ke ya re lekana kaofela. Empa le ka ya ho ba e rekisang la ithekela yona.’ 10 Ha ba tloha ba yo e reka, monyadi a fihla. Barwetsana ba neng ba itokisitse ba kena le yena moketeng wa lenyalo+ mme monyako wa kwalwa. 11 Ka mora moo, barwetsana bane ba bang le bona ba tla ba re: ‘Mohlomphehi, Mohlomphehi, re bulele!’+ 12 A re ho bona: ‘Ka nnete ha ke le tsebe.’

13 Ka hona, le dule le fadimehile+ hobane ha le tsebe letsatsi kapa yona hora.+

14 Mmuso wa mahodimo o ka boela wa tshwantshwa le motho ya tlo etela hole ebe o bitsa makgoba a hae o a siya le thepa ya hae.+ 15 O ile a fa makgoba a hae ditalenta* ho ya ka bokgoni ba ona, a fa lekgoba le leng ditalenta tse hlano, le leng tse pedi, le leng e le nngwe yaba o a tsamaya. 16 Le ileng la fuwa ditalenta tse hlano la tsamaya hanghang ho ya hweba ka tsona yaba le fumana tse ding tse hlano. 17 Le ileng la fuwa tse pedi le lona la etsa tse ding tse pedi. 18 Empa le ileng la fuwa e le nngwe feela la tloha mme la tjheka fatshe la tsetela tjhelete* eo ya monga lona.

19 Ka mora nako e telele, monga makgoba ao a fihla ho tla lata tjhelete ya hae.+ 20 Yaba le fuweng ditalenta tse hlano le tlisa tse ding tse hlano le re: ‘Mongaka, o ile wa ntshiya le ditalenta tse hlano. Bona, ke fumane tse ding tse hlano.’+ 21 Monga lona a re ho lona: ‘O entse hantle, wena lekgoba le molemo le le tshepahalang. O ile wa tshepahala dinthong tse seng kae. Ke tla beha dintho tse ding tse ngata taolong ya hao.+ Thaba le monga hao.’+ 22 Ka mora moo, lekgoba le fuweng ditalenta tse pedi la re: ‘Mongaka, o ile wa ntshiya le ditalenta tse pedi. Bona, ke fumane tse ding tse pedi.’+ 23 Monga lona a re ho lona: ‘O entse hantle, wena lekgoba le molemo le le tshepahalang. O ile wa tshepahala dinthong tse seng kae. Ke tla beha dintho tse ding tse ngata taolong ya hao. Thaba le monga hao.’

24 Qetellong lekgoba le fuweng talenta e le nngwe la re: ‘Mongaka, ke a tseba hore o motho ya thata, ya kotulang moo a sa jalang, ya bokellang moo a sa olosang.+ 25 Ka hoo, ke ile ka tshoha yaba ke tsetela talenta ya hao. Ke ena ke a e kgutlisa.’ 26 Monga lona a re ho lona: ‘Wena lekgoba le se nang thuso,* le botswa, akere o tsebile hore ke kotula moo ke sa jalang ebile ke bokella moo ke sa olosang? 27 Jwale he, o ka be o ile wa isa tjhelete* ya ka bankeng ebe ha ke kgutla ke e fumana e ena le tswala.’

28 Yaba o re: ‘Mo amoheng talenta eo le e fe ya nang le tse leshome+ 29 ka ha e mong le e mong ya nang le dintho tse itseng o tla fuwa tse ding e le hore a be le tse ngata. Empa ya se nang letho o tla amohuwa le dintho tseo a nang le tsona.+ 30 Lahlelang lekgoba lena le se nang thuso ka ntle lefifing. Ke hona moo le tla lla le ho tsikitlanya meno teng.’

31 Ha Mora motho+ a fihla ka kganya ya hae a ena le mangeloi ohle,+ o tla dula teroneng ya hae e hlomphehang. 32 Ditjhaba tsohle di tla bokellwa ka pela hae mme o tla arola batho dihlopha tse pedi, feela jwalo ka ha modisa a arola dinku ho dipodi. 33 O tla beha dinku+ ka letsohong la hae le letona, dipodi ka ho le letshehadi.+

34 Morena o tla re ho ba ka letsohong le letona: ‘Tloong, lona ba hlohonolofaditsweng ke Ntate, le je lefa la Mmuso oo le o lokiseditsweng ho tloha ha lefatshe le thehwa. 35 Ke ile ka lapa, la mpha dijo, ka nyorwa la mpha metsi. Ke ne ke le moeti yaba le a nkamohela.+ 36 Ha ke ne ke hlobotse* la mpha diaparo,+ ha ke kula la ntlhokomela, ha ke le teronkong la tlo mpona.’+ 37 Ba lokileng ba tla re ho yena: ‘Morena, ke neng re ileng ra o bona o lapile, ra o fepa, kapa o nyorilwe ra o fa metsi?+ 38 Ke neng o neng o le moeti yaba re a o amohela kapa o hlobotse yaba re o fa diaparo? 39 O kutse neng kapa o ne o le teronkong neng mme ra ya re ilo o bona?’ 40 Morena o tla re ho bona: ‘Ka nnete ke re ho lona, ha le etseditse e mong wa ba banyenyane bana bao e leng bana beso dintho tsena, le nna le nketseditse tsona.’+

41 O tla re ho ba ka letsohong le letshehadi: ‘Tlohang pela ka+ lona ba rohakilweng, le kene mollong o sa feleng*+ o lokiseditsweng Diabolose le mangeloi a hae+ 42 hobane ke ile ka lapa yaba ha le mphe dijo, ka nyorwa yaba ha le mphe metsi. 43 Ha ke ne ke le moeti ha le a ka la nkamohela, ha ke hlobotse ha le a ka la mpha diaparo, ha ke kula ebile ke le teronkong, ha le a ka la ntlhokomela.’ 44 Le bona ba tla re: ‘Morena, ke neng re ileng ra o bona o lapile kapa o nyorilwe, o le moeti kapa o hlobotse, o kula kapa o le teronkong mme ra se ke ra o sebeletsa?’ 45 O tla re ho bona: ‘Ka nnete ke re ho lona, ha le sa etsetsa e mong wa ba banyenyane bana dintho tsena, ha le a nketsetsa tsona.’+ 46 Batho bana ba tla fedisetswa ruri+ empa ba lokileng ba tla phela ka ho sa feleng.”+

26 Ha Jesu a qetile ho bua dintho tsena tsohle, a re ho barutuwa ba hae: 2 “Le a tseba hore matsatsi a mabedi ho tloha jwale ho tla ba le Paseka+ mme ho tla nehelanwa ka Mora motho hore a bolaelwe palong.”+

3 Jwale baholo ba setjhaba le baprista ba baholo ba bokana lebaleng la moprista ya phahameng ya neng a bitswa Kaifase.+ 4 Ba rera+ ho tshwara Jesu ka bolotsana ebe ba a mo bolaya. 5 Le ha ho le jwalo, ba re: “Re se ke ra mo tshwarela moketeng e le hore batho ba se ke ba etsa moferefere.”

6 Ha Jesu a le Bethani ka tlung ya Simone ya neng a kile a tshwarwa ke lepera,+ 7 mosadi e mong ya nkileng botlolo ya alabastera e tshetseng oli e turu e nkgang ha monate a tla ho Jesu mme a e tshela hloohong ya hae ha a ntse a dutse tafoleng. 8 Ha barutuwa ba bona taba ena ba halefa haholo mme ba re: “Tshenyo e kaale ke ya eng? 9 Oli ena e ka be e rekisitswe ka tjhelete e ngata ebe tjhelete eo e fuwa bafutsana.” 10 Jesu a hlokomela hore na ba bua kang yaba o re: “Ke hobaneng ha le nyahamisa mosadi eo? O nketseditse ntho e ntle. 11 Le tla dula le ena le bafutsana+ empa le ke ke la dula le ena le nna.+ 12 Ha mosadi enwa a tshela oli ena e nkgang ha monate mmeleng wa ka, o ne a ntokisetsa lepato.+ 13 Ka nnete ke re ho lona, kae kapa kae moo ditaba tsena tse monate tsa Mmuso di bolelwang teng lefatsheng lohle, ketso ya mosadi enwa le yona e tla bolelwa e le hore a hopolwe ka yona.”+

14 E mong wa baapostola ba 12 ya bitswang Judase Iskariota+ a ya ho baprista ba baholo a re:+ 15 “Le tla mpha eng ha nka le fa yena* hore le mo tshware?”+ Ba mo tshepisa dikotwana tsa silevera tse 30.+ 16 Ka hoo, ho tloha ka nako eo a nna a batla monyetla o motle wa ho ba fa yena.*

17 Ka letsatsi la pele la Mokete wa Mahobe a se Nang Tomoso,+ barutuwa ba tla ho Jesu ba re: “O batla hore re o lokisetse ho jella Paseka hokae?”+ 18 A re: “Kenang motseng le ye ho Nnyeo le re ho yena: ‘Mosuwe o re: “Nako ya hore ke shwe e haufi. Nna le barutuwa ba ka re tla ketekela Paseka ha hao.”’” 19 Barutuwa ba etsa ka moo Jesu a ba laetseng ka teng mme ba lokisetsa Paseka.

20 Ha letsatsi le dikela,+ a dula tafoleng le barutuwa ba hae ba 12.+ 21 Ha ba ntse ba ja a re: “Ka nnete ke a le jwetsa, e mong wa lona o tlo nthekisa.”*+ 22 Kaofela ba sarelwa haholo ke taba ena yaba e mong le e mong o re: “Morena, na ke nna?” 23 A re ho bona: “Ya kenyang letsoho la hae le nna ka sekotlolong ke yena ya tla nthekisa.+ 24 Ke nnete Mora motho o tla shwa feela jwalo ka ha Mangolo a bolela+ empa ho madimabe motho ya mo rekisang.+ Ho ka be ho bile molemo ha motho eo a ne a sa tswalwa.”+ 25 Judase ya neng a tlo mo rekisa a re: “Rabi, na ke nna?” Jesu a re ho yena: “E, ke wena.”*

26 Ha ba ntse ba ja, Jesu a nka bohobe, a rapela, a bo qhetsola,+ a bo fa barutuwa yaba o re: “Nkang, le je. Bohobe bona bo emela mmele wa ka.”+ 27 Hape, a nka senwelo se tshetseng veine, a leboha Modimo, a ba fa sona a re: “Nkang le nwe kaofela ha lona+ 28 ka ha veine ena e emela madi+ a ka e leng ‘madi a selekane,’+ a tlang ho tshollwa molemong wa ba bangata+ hore ba tshwarelwe dibe.+ 29 Empa ke a le bolella, nke ke ka hlola ke nwa veine ena hape ho fihlela letsatsing leo ka lona ke e nwang le lona e le ntjha Mmusong wa Ntate.”+ 30 Qetellong, ka mora ho binela Modimo dithoriso,* ba tswa ba ya Thabeng ya Mehlwaare.+

31 Jwale Jesu a re ho bona: “Kaofela ha lona le tla ntahla* ka lebaka la ntho e tla nketsahalla bosiung bona hobane Mangolo a re: ‘Ke tla otla modisa, dinku di qhalane.’+ 32 Empa ka mora hore ke tsoswe, ke tla le etella pele ho kena Galilea.”+ 33 Yaba Petrose o re: “Le haeba ba bang kaofela ba o lahla* ka lebaka la ntho e tla o etsahalla, le ka mohla nke ke ka o lahla.”+ 34 Jesu a re ho yena: “Ka nnete ke re ho wena, bosiung bona, pele mokoko o lla o tla be o ntatotse hararo.”+ 35 Petrose a re ho yena: “Le haeba nka tlameha ho shwa le wena, ho hang nke ke ka o latola.”+ Barutuwa ba bang kaofela le bona ba bua ntho e tshwanang.

36 Jwale Jesu a tla le barutuwa sebakeng se bitswang Gethesemane+ mme a re ho bona: “Dulang mona, ke ya mane ke yo rapela.”+ 37 A tsamaya le Petrose le bara ba babedi ba Zebedea yaba o qala ho sarelwa le ho kgathatseha ha bohloko.+ 38 A re ho bona: “Ke saretswe haholo hoo nka nnang ka shwa. Dulang mona le fadimehe le nna.”+ 39 A ya pejana, a kgumama sefahleho se shebile fatshe, a rapela a re:+ “Ntate, haeba ho kgoneha, senwelo sena+ se ke se mphete. Empa ho ke ho etsahale thato ya hao eseng ya ka.”+

40 A kgutlela ho barutuwa yaba o ba fumana ba robetse. A re ho Petrose: “Le sitilwe ho fadimeha le nna hora e le nngwe?+ 41 Fadimehang+ mme le rapele le sa kgaotse+ e le hore le se ke la wela molekong.+ Ho hlakile hore pelo e na le tabatabelo empa nama e a fokola.”+ 42 A tloha hape lekgetlo la bobedi yaba o a rapela o re: “Ntate, haeba ho ke ke ha kgoneha hore senwelo sena se fete ntle le hore ke se nwe, ho ke ho etsahale thato ya hao.”+ 43 A boela a tla yaba o ba fumana ba robetse hobane ba ne ba tshwerwe ke boroko. 44 Ka hoo, a tsamaya a ba siya yaba o yo rapela ka lekgetlo la boraro. A nna a bua ntho e tshwanang. 45 Yaba o kgutlela ho barutuwa o re ho bona: “Ka nako ee le robetse ebile le phomotse? Nako ya hore Mora motho a nehellwe baetsadibe e atametse. 46 Emang re tsamaye. Motho ya nthekisitseng o se a le haufi.” 47 Ha a sa ntse a bua, Judase, e mong wa baapostola ba 12, a fihla le letshwele le leholo la batho ba nkileng disabole le melangwana ba tswa ho baholo ba setjhaba le baprista ba baholo.+

48 Jwale Judase* o ne a itse ho bona: “Eo ke tla mo suna ke yena. Le mo tshware.” 49 A ya a tobile ho Jesu a re: “Dumela, Rabi!” Yaba o a mo suna. 50 Empa Jesu a re ho yena: “Monna heso, o batlang moo?”+ Jwale ba atamela yaba ba tshwara Jesu. 51 E mong wa ba neng ba ena le Jesu a tsomula sabole ya hae yaba o kgaola tsebe ya lekgoba la moprista ya phahameng.+ 52 Jesu a re ho yena: “Kgutlisetsa sabole ya hao sebakeng sa yona+ ka ha bohle ba lwanang ka sabole ba tla bolawa ka sabole.+ 53 Kapa o nahana hore nka sitwa ho kopa Ntate hore a mphe mangeloi a dikete* hona jwale?+ 54 Empa ha nka etsa jwalo, Mangolo a reng ho tla etsahala ka tsela ee a ne a tla phethahala jwang?” 55 Yaba Jesu o re ho letshwele: “Na ke leshodu ha e le moo le tla le nkile disabole le melangwana ho tla ntshwara? Ke ne ke dula ke ruta ka tempeleng letsatsi le letsatsi+ empa ha le a ka la ntshwara.+ 56 Empa tsena tsohle di etsahetse hore mangolo a baprofeta a phethahale.”+ Barutuwa kaofela ba mo siya ba baleha.+

57 Batho ba ileng ba tshwara Jesu ba mo isa ho Kaifase+ moprista ya phahameng, moo bangodi le baholo ba neng ba bokane.+ 58 Empa Petrose a nna a mo latela a le sebakana, ho ya fihla lebaleng la moprista ya phahameng. Ha a fihla a dula le bahlanka ba ntlo hore a bone hore na ho tla qetella ho etsahetseng.+

59 Baprista ba baholo le ditho tsohle tsa Lekgotla le Phahameng la Bajuda* ba ne ba batla bopaki ba bohata boo ba ka qosang Jesu ka bona e le hore ba mo bolaye.+ 60 Empa ha ba a ka ba bo fumana le hoja dipaki tsa bohata di ile tsa tla ka bongata.+ Ha morao ha tla tse pedi tsa re: 61 “Monna enwa o itse a ka kgona ho heletsa tempele ya Modimo a ba a e haha ka matsatsi a mararo.”+ 62 Moprista ya phahameng a ema a re ho yena: “O ikarabella ka ho reng? Na o a utlwa hore na banna baa ba o qosa ka eng?”+ 63 Empa Jesu a thola.+ Moprista ya phahameng a re ho yena: “Ke o laela hore o ikane ka Modimo ya phelang o re bolelle hore na o Kreste Mora wa Modimo.”+ 64 Jesu a re ho yena: “E, ke yena.* Empa ke re ho lona: Ho tloha hona jwale le tla bona Mora motho+ a dutse ka letsohong le letona la Modimo ya matla+ mme a tla ka maru.”*+ 65 Jwale moprista ya phahameng a tabola diaparo tsa hae a re: “O rohakile Modimo! Le ikutlwetse ha a rohaka Modimo. Re sa hlokelang dipaki tse ding? 66 Lona le reng?” Ba re: “Ha a bolawe!”+ 67 Yaba ba mo tshwela ka mathe sefahlehong+ mme ba mo otla ka ditebele.+ Ba bang ba mo otla lerameng+ ba re: 68 “Re profetele, wena Kreste. Ke mang ya o otlileng?”

69 Petrose o ne a dutse ka ntle lebaleng ha ngwanana* e mong a tla ho yena a re: “Le wena o ne o tsamaya le Jesu wa Mogalilea.”+ 70 Empa a hana ka pela bona kaofela a re: “Ha ke tsebe hore na o bua kang.” 71 Ha a ya ntlong e keiting, ngwanana e mong a mo bona yaba o re ho ba teng moo: “Monna enwa o ne a ena le Jesu wa Monazaretha.”+ 72 A hlapanya a ba a hana a re: “Monna eo ha ke mo tsebe!” 73 Ka mora nakwana ba emeng moo ba tla ho Petrose ba re: “Ka nnete le wena o e mong wa bona hobane le tsela eo o buang ka yona e a o paka.” 74 A hlapanya* a re: “Motho eo ha ke mo tsebe!” Hanghang mokoko wa lla. 75 Petrose a hopola hore Jesu o ile a re: “Pele mokoko o lla, o tla be o ntatotse hararo.”+ Yaba o tswela ka ntle o lla ha bohloko.

27 Hoseng, baprista bohle ba baholo le baholo ba setjhaba ba rerisana hore ba bolaye Jesu.+ 2 Ba mo fasa, ba mo kganna yaba ba mo isa ho mmusisi Pilato.+

3 Jwale ha Judase ya mo rekisitseng* a bona hore Jesu o ne a ahlotswe, a itshwabela yaba o kgutlisetsa dikotwana tsa silevera tse 30 ho baholo le baprista ba baholo a re:+ 4 “Ke entse sebe ka ho rekisa* motho ya se nang molato.” Ba re: “Jwale rona re kena kae? Ke taba ya hao.” 5 Yaba o akgela dikotwana tsa silevera ka tempeleng, a tsamaya mme a iphanyeha.+ 6 Empa baprista ba baholo ba nka dikotwana tseo tsa silevera ba re: “Molao ha o dumelle hore di tshelwe ka polokelong ya matlotlo e halalelang hobane di kgenathetse* madi a motho.” 7 Ka mora hore ba buisane, ba sebedisa tjhelete eo ho reka tshimo ya motho ya bopang ka letsopa, hore e be moo ba patelang baditjhaba teng. 8 Ka hona, tshimo eo ya bitswa Tshimo ya Madi+ ho fihlela letsatsing lena. 9 Jwale ha phethahala mantswe a ileng a buuwa ke moprofeta Jeremia a reng: “Ba nka dikotwana tsa silevera tse 30 e leng theko eo Baiseraele ba dumellaneng ho e patala bakeng sa hae, 10 ba fana ka tsona hore ba reke tshimo ya sebopi, ho ya ka moo Jehova* a neng a ntaetse ka teng.”+

11 Jesu a ema ka pela mmusisi. Mmusisi a re ho yena: “Na o Morena wa Bajuda?” Jesu a re: “E, ke yena.”*+ 12 Empa ha a ka a araba ha a ntse a qoswa ke baprista ba baholo le baholo.+ 13 Pilato a re ho yena: “Na o a utlwa hore na ba o qosa ka dintho tse ngata hakae?” 14 Empa ha a ka a mo araba le ha e le ka lentswe le le leng, hoo mmusisi a ileng a makala haholo.

15 Ha e le Paseka, mmusisi o ne a tlwaetse ho lokollela setjhaba motshwaruwa eo se mo batlang.+ 16 Ka yona nako eo, ba ne ba tshwere monna e mong wa senokwane ya tsebahalang. Lebitso la hae e ne e le Barabase. 17 Ka hoo, ha ba bokane Pilato a re ho bona: “Le batla ke le lokollele mang, Barabase kapa Jesu eo ho thweng ke Kreste?” 18 Pilato o ne a bona hore ba tlisitse Jesu ho yena hobane ba le mona. 19 Ha a ntse a dutse setulong sa kahlolo, mosadi wa hae a mo romela molaetsa a re: “O se ke wa itshunyatshunya ditabeng tsa monna eo ya lokileng hobane ke lorile ka yena mme toro eo e ne e le bohloko haholo.” 20 Empa baholo le baprista ba baholo ba susumeletsa setjhaba ho kopa hore Barabase+ a lokollwe empa Jesu a bolawe.+ 21 Mmusisi a boela a re ho setjhaba seo: “Le batla ke le lokollele ofe ho baa ba babedi?” Sa re: “Barabase.” 22 Pilato a re ho bona: “Jwale ke etseng ka Jesu eo ho thweng ke Kreste?” Setjhaba sohle sa re: “Ha a kgokgothelwe palong!”*+ 23 A re: “Hobaneng? O entseng e mpe?” Empa sa hweletsa le ho feta sa re: “Ha a kgokgothelwe palong!”*+

24 Ha Pilato a bona hore ha ho na letho leo a ka le etsang ebile ho tsoha moferefere, a nka metsi a hlapa matsoho ka pela setjhaba yaba o re: “Ha ke na molato mading a motho enwa. Ke taba ya lona.” 25 Yaba batho kaofela ba re: “Madi a hae a be hodima rona le bana ba rona.”+ 26 A ba lokollela Barabase empa a laela hore Jesu a shapuwe ka sephadi+ mme a fana ka yena ho masole hore a mo kgokgothele palong.+

27 Jwale masole a mmusisi a isa Jesu ha mmusisi mme a bokella sehlopha sohle sa masole ho mo potapota.+ 28 Masole ao a mo hlobodisa seaparo se selelele, a mo apesa se sefubedu+ 29 yaba a loha korone ka meutlwa a mo rwesa yona mme a mo fa lehlaka ka letsohong la hae le letona. A kgumama ka pela hae, a mo soma a re: “Dumela, wena Morena wa Bajuda!” 30 Yaba a mo tshwela ka mathe,+ a nka lehlaka a mo otla ka lona hloohong. 31 Ha a qeta ho mo soma, a mo hlobodisa seaparo se sekareleta, a mo apesa diaparo tsa hae mme a mo etella pele hore a yo kgokgothelwa palong.+

32 Yare ha masole a tswa a fumana monna e mong wa Saerene ya bitswang Simone. A qobella monna eo hore a jare palo eo Jesu a neng a tlo kgokgothelwa ho yona.*+ 33 Ha masole a fihla Golgotha, e bolelang Sebaka sa Lehata,+ 34 a mo fa veine e tswakilweng le nyooko* hore a e nwe.+ Empa ka mora ho e latswa, a hana ho e nwa. 35 A mo kgokgothela palong yaba a aba diaparo tsa hae ka ho lahla lotho+ 36 mme a dula moo a mo kata. 37 Ka hodima hlooho ya hae a beha boto e ngotsweng hore na o qoseditsweng. E ne e re: “Enwa ke Jesu Morena wa Bajuda.”+

38 Jwale mashodu a mabedi a ne a kgokgothetswe dipalong pela hae, le leng ka ho le letona, le leng ka ho le letshehadi.+ 39 Batho ba fetang ka tsela ba mo nyefola,+ ba sisinya dihlooho ba re:+ 40 “O itse o tla heletsa tempele o be o e hahe ka matsatsi a mararo.+ Ipholose he! Haeba o mora wa Modimo, theoha palong eo o kgokgothetsweng ho yona!”*+ 41 Baprista ba baholo, bangodi le baholo le bona ba qala ho mo soma ba re:+ 42 “O pholositse ba bang, yena o sitwa ho ipholosa. Haeba ke Morena wa Iseraele,+ ha a theohe palong eo a kgokgothetsweng ho yona* mme re tla dumela ho yena. 43 O tshepile Modimo, jwale haeba Modimo o a mo rata, ha a mo pholose+ ka ha o ile a re: ‘Ke Mora Modimo.’”+ 44 Esita le mashodu a neng a kgokgothetswe dipalong tse pela hae a ile a mo rohaka jwalo.+

45 Ka 12 motshehare* lefifi la aparela naha yohle ka dihora tse tharo.*+ 46 Hoo e ka bang ka hora ya boraro mantsiboya,* Jesu a hweletsa a re: “Eli, Eli, lama sabakthani?” e bolelang: “Modimo wa ka, Modimo wa ka, o ntahletseng?”+ 47 Ha batho ba emeng moo ba utlwa a tjho jwalo ba re: “Monna enwa o bitsa Elia.”+ 48 E mong wa bona a matha hanghang yaba o nka sepontjhe o se kenya ka hara veine e bodila, a se hloma lehlakeng yaba o a mo fa hore a nwe.+ 49 Empa ba bang kaofela ba re: “Mo tlohele re bone hore na Eli o tla tla a mo pholose.” 50 Jesu a boela a hweletsa yaba o a shwa.*+

51 Kgaretene ya sehalalelo+ ya taboha ka lehare+ ho tloha hodimo ho ya tlase,+ lefatshe la sisinyeha, mafika a petsoha. 52 Mabitla a buleha yaba ditopo tse ngata tsa bahalaledi ba neng ba shwele* di a tswa 53 mme batho ba bangata ba di bona (Ka mora hore Jesu a tsoswe, batho ba neng ba le mabitleng ba kena motseng o halalelang). 54 Empa ha molaodi wa sesole le ba neng ba katile Jesu le yena ba bona tshisinyeho ya lefatshe le dintho tse etsahalang, ba tshoha haholo ba re: “Ka nnete monna enwa e ne e le Mora Modimo.”+

55 Hape basadi ba bangata ba neng ba feleheditse Jesu ha a tloha Galilea e le hore ba mo sebeletse, ba ne ba shebeletse ba le hojana.+ 56 Hara bona ho ne ho ena le Maria Magdalena, Maria mme wa Jakobo le Jose ha mmoho le mme wa Jakobo le Johanne.*+

57 Motshehare wa mantsiboya ha fihla monna e mong ya ruileng wa Arimathea, ya bitswang Josefa, ya neng a fetohile morutuwa wa Jesu.+ 58 A ya ho Pilato a kopa setopo sa Jesu+ yaba Pilato o laela hore a se fuwe.+ 59 Josefa a nka setopo seo, a se phuthela ka lesela la line e hlwekileng ya boleng bo botle+ 60 yaba o se beha ka lebitleng leo+ a neng a sa tswa le tjheka lefikeng. A beha lejwe le leholo monyako wa lebitla, a tsamaya. 61 Maria Magdalena le Maria e mong ba sala ba dutse moo ka pela lebitla.+

62 Letsatsing le hlahlamang e leng la Sabatha,*+ baprista ba baholo le Bafarisi ba bokana ka pela Pilato ba re: 63 “Mohlomphehi, re hopotse hore raleshano yane ha a sa ntse a phela o ile a re: ‘Ke tla tsoswa ka mora matsatsi a mararo.’+ 64 Laela hore lebitla la hae le katwe ho fihlela letsatsing la boraro e le hore barutuwa ba hae ba se ke ba mo utswa+ yaba ba re ho batho: ‘O tsositswe bafung!’ Jwale leshano lena la ho qetela le tla ba lebe ho feta la pele.” 65 Pilato a re ho bona: “Nkang balebedi, le kate lebitla leo ka hohle ka moo le ka kgonang.” 66 Ka hoo, ba ya mme ba sireletsa lebitla ka ho tiisa lejwe le ho beha balebedi.

28 Mesong ya letsatsi la pele la beke ka mora Sabatha, Maria Magdalena le Maria e mong ba tla ho tla bona lebitla.+

2 Ka tshohanyetso ha eba le tshisinyeho e kgolo ya lefatshe hobane lengeloi la Jehova* le ne le theohile lehodimong. La suthisetsa lejwe thoko yaba le dula hodima lona.+ 3 Le ne le shebahala jwalo ka lehadima mme diaparo tsa lona di le tshweu jwalo ka lehlwa.+ 4 Ka ha balebedi ba ne ba tshaba lengeloi leo, ba thothomela mme ba akgeha.

5 Empa lengeloi la re ho basadi bao: “Le se ke la tshoha, ke a tseba hore le batla Jesu ya ileng a kgokgothelwa palong.+ 6 Ha a yo mona. O tsositswe bafung feela jwalo ka ha a tjhulo.+ Tloong, le bone moo a neng a robetse teng. 7 Tsamayang kapele le yo bolella barutuwa ba hae hore o tsositswe bafung. O se a ntse a le tseleng e yang Galilea.+ Le tla mo fumana moo. Le hopole ditaba tseo ke le boleletseng tsona.”+

8 Ka hoo, ba tloha lebitleng kapele ba thabile haholo empa ba tshohile, ba matha ho ya tlalehela barutuwa ba hae.+ 9 Jesu a kopana le bona yaba o re: “Dumelang!” Ba ya ho yena mme ba mo kgumamela, ba mo tshwara maoto. 10 Jwale Jesu a re ho bona: “Le se ke la tshoha. Tsamayang le tlalehele bana beso* e le hore ba ye Galilea, ba tla mphumana moo.”

11 Ha ba ntse ba le tseleng, ba bang ba balebedi+ ba ya motseng mme ba tlalehela baprista ba baholo dintho tsohle tse neng di etsahetse. 12 Baprista ba baholo ba kopana le baholo mme ba buisana yaba ba fa masole ao dikotwana tsa silevera tse ngata mme ba re: 13 “Le tle le re barutuwa ba hae ba ile ba tla bosiu ba mo utswa le robetse.+ 14 Haeba mmusisi a ka utlwa ditaba tsena, re tla mo hlalosetsa hore na ho etsahetseng,* le se ke la tshwenyeha.” 15 Ka hoo, masole a nka dikotwana tsa silevera mme a etsa jwalo ka ha a ile a laelwa. Taba ena e hasitswe hohle hara Bajuda ho fihlela letsatsing lona lena.

16 Le ha ho le jwalo, barutuwa ba 11 ba ya Galilea+ thabeng moo Jesu a neng a itse ba kopane le yena teng.+ 17 Ha ba mo bona ba mo kgumamela empa ba bang ba belaela hore na ehlile ke yena. 18 Jesu a atamela a bua le bona a re: “Ke filwe matla hodima ntho e nngwe le e nngwe e lehodimong le lefatsheng.+ 19 Ka hona, eyang le etse batho ba ditjhaba tsohle barutuwa,+ le ba kolobetse+ ka lebitso la Ntate le la Mora le la moya o halalelang. 20 Le ba rute ho mamela dintho tsohle tseo ke le laetseng tsona.+ Ke na le lona ka matsatsi ohle ho fihlela lefatshe* le fela.”+