Fai ke Toka Koe mō te Aso o Ieova

1. Se a te mea e ‵tau o fai ne tatou ke ‵sao atu i te aso o Ieova?

KAFAI e faipati te Tusi Tapu ki te “aso o Ieova,” e fakauiga loa ki te taimi ka fakaseai ei ne Ieova ana fili kae faka‵sao ana tino. I aso mua, ne fakasala sāle ne Ieova a nisi atufenua. (Isa. 13:1, 6; Eseki. 13:5; Sefa. 1:8) I ‵tou aso nei, ka kamata te “aso o Ieova” ki te fakaseaiga o Papelonia te Sili telā ka iku atu ki te taua o Amaketo. Ke ‵sao tatou i te “aso” tenā, e ‵tau mo tatou o na fakatoka atu nei. Ne akoako mai a Iesu me e se ‵tau fua o fakatoka tatou mō te “fakalavelave lasi” kae e ‵tau foki o “toka faeloa” tatou ki ei.—Mata. 24:21; Luka 12:40.

2. Kaia e mafai ei o aoga ki a tatou a pati i te 1 Tesalonia?

² I tena tusi muamua ki te kau Tesalonia, ne fakaaoga ne te apositolo ko Paulo a nai ata fakatusa ke fesoasoani ki Kelisiano ke toka faeloa mō te aso o te fakamasinoga sili a Ieova. Ne iloa ne Paulo me ka se oko mai te aso o Ieova i te taimi tenā. (2 Tesa. 2:1-3) Kae ne fakamalosi atu a ia ki ana taina ke fakatoka mō te aso tenā e pelā eiloa me oko mai ma taeao, kae e mafai foki o fai tatou penā. Ke onoono tatou ki ana fakamatalaga e uiga ki mea konei: (1) te auala ka oko mai ei te aso o Ieova, (2) ko oi ka se ‵sao i te aso tenā, mo te (3) te auala ke fakatoka tatou ke mafai o ‵sao i ei.

KA OKO MAI PEFEA TE ASO O IEOVA?

3. I te auala fea ka oko mai ei te aso o Ieova e pelā me se tino kaisoa i te po? (Onoono foki ki te ata.)

³ “E pelā me se tino kaisoa i te po.” (1 Tesa. 5:2) Tenei te fakatusaga muamua mai fakatusaga e tolu e fakamatala mai i ei a te oko mai o te aso o Ieova. A tino kai‵soa e masani o ga‵sue fakavave maise i te pouliga ke ‵poa ne latou a tino i se auala fakapoi. A te aso o Ieova ka oko fakapoi mai foki, kae ka ‵poi i ei te tokoukega o tino. Ke oko ki Kelisiano ‵tonu e mafai o ‵poi latou i te uke o mea ‵fou e ‵tupu. Kae ko tatou ka se fakaseai atu e pelā mo tino amio ma‵sei.

4. I auala fea e ‵pau ei te aso o Ieova mo te ‵mae o se fafine ka fai o fanau?

⁴ “E pelā eiloa mo te ‵mae o se fafine ka fai o fanau.” (1 Tesa. 5:3) A te fafine ka fai o fanau e se iloa ne ia te taimi tonu ka ‵mae ei a ia. Kae e mautinoa i a ia me ka oko mai eiloa te taimi tenā. Kafai ko oko mai, e oko fakapoi mai, e ‵mae ‵ki, kae e se mafai o faka‵noga aka. E penā foki te aso o Ieova, e se iloa ne tatou te taimi e kamata i ei. Kae mautinoa i a tatou me ka oko mai eiloa, kae ko te fakaseaiga o tino amio ma‵sei ne te Atua ka oko fakapoi mai kae seai se tino ka sao i ei.

5. I te auala fea e fai ei te fakalavelave lasi e pelā mo te vaveao ‵malu?

⁵ E pelā mo te vaveao ‵malu. A te tolu o ata fakatusa a Paulo ne toe taku mai foki ne ia i ei a tino kai‵soa kolā e olo o kai‵soa i te po. Kae i te taimi nei ko fakatusa ne Paulo a te aso o Ieova ki te vaveao ‵malu. (1 Tesa. 5:4) A tino kai‵soa kolā e olo o kai‵soa i po e mafai o se iloa ne latou me ko tā te fia ona ko te fakalave‵lave i te kai‵soaga o olotou mea. E mafai o ‵poa aka io me tuku faka‵sau atu latou ki te mainaga o te aso fou. Ka fakaasi faka‵sau mai i te fakalavelave lasi a tino kolā e fai pelā me ne tino kai‵soa, ko latou kolā e tumau i te pouliga me fai faeloa ne latou a mea kolā e se fiafia ki ei a te Atua. E ‵kese mo latou, e mafai o toka tatou mai te ‵teke atu ki faifaiga kolā e se fiafia a Ieova ki ei kae kausaki atu ki “vaega katoa o te aga‵lei mo te amiotonu mo te munatonu.” (Efe. 5:8-12) E lua foki a nisi ata fakatusa tai ‵pau ne fakaaoga ne Paulo ke fakamatala mai ei a tino kolā ka se ‵sao.

KO OI KA SE ‵SAO I TE ASO O IEOVA?

6. I te auala fea e ‵to ei a ‵moe o te tokoukega o tino? (1 Tesalonia 5:6, 7)

⁶ “Tino kolā e ‵moe.” (Faitau te 1 Tesalonia 5:6, 7.) Ne fakatusa ne Paulo a tino kolā ka se ‵sao i te aso o Ieova ki tino kolā e ‵moe. E se iloa ne latou a mea e ‵tupu i olotou tafa io me ko te vave o te taimi. Tela la, e se iloa ne latou māfai ko tupu se mea tāua io me ‵saga atu ki ei. A te tokoukega o tino i aso nei e ‵to olotou ‵moe i te feitu faka-te-agaga. (Loma 11:8) E se fia ‵saga atu latou ki fakamaoniga me ko ola tatou i “aso fakaoti” kae ko pili fua o oko mai te fakalavelave lasi. E mafai o ‵fagu aka ne mea ‵tupu ‵lasi i te lalolagi nei a nisi tino ke mo a ma ‵moe i te feitu faka-te-agaga kae fakamalosi ei latou ke fakaasi mai se tamā fiafia ki te fekau o te Malo. Kae tokouke a tino e toe ‵foki o ‵moe i lō te tumau i te ala. Ke oko foki loa ki tino kolā e tali‵tonu me isi se aso o te fakamasinoga, e mafau‵fau latou me koi tuai o oko mai. (2 Pe. 3:3, 4) Kae ko iloa ne tatou me i te fakatonuga fakaosofia ke tumau i te ala faeloa ko gasolo o sili atu tena tāua i aso takitasi konei.

7. I te auala fea e fai ei a tino kolā ka fakaseai ne te Atua e pelā me ne tino ko‵nā?

⁷ “Latou kolā e ko‵nā.” Ne fakatusa ne te apositolo a latou kolā ka fakaseai ne te Atua ki tino ko‵nā. A tino ko‵nā e tuai olotou mea e fai, kae se ‵lei foki a fakaikuga e fai ne latou. E penā foki a tino amio ma‵sei, e tuai o ‵saga tonu atu ki faka‵pulaga a te Atua. E filifili ne latou te auala telā e iku atu ki te lotou fakaseaiga. Kae ne fakailoa atu ki Kelisiano ke tausi olotou mafaufau ke ‵lei, ke mafau‵fau faka‵lei. (1 Tesa. 5:6) Ne fakamatala mai ne se tino poto i te Tusi Tapu me i te mafaufau faka‵lei “ko te mafaufau telā e tokagamalie, e toka o fuafua faka‵lei a mea kae mafai foki o fai ne ia te fakaikuga tonu.” Kaia e ‵tau ei o tokagamalie kae toka tatou? I te mea ma ‵to atu tatou ki faifaiga fakapolitiki io me ko mea fakafenua. A fakamalosiga mai tino ke ‵kau ki mea konei ka gasolo aka eiloa ki luga māfai ko pili mai te aso o Ieova. Kae e se ‵tau eiloa o manava‵se tatou ki te auala e ‵saga atu ei ki mea konā. E mafai eiloa o fesoasoani mai te agaga o te Atua o fai ke tokagamalie kae toka ‵tou mafaufau kae ke fai a fakaikuga ‵poto.—Luka 12:11, 12.

NE A MEA E MAFAI O FAI NE TATOU KE FAKATOKA EI MŌ TE ASO O IEOVA?

8. E fakamatala mai pefea i te 1 Tesalonia 5:8 a uiga kolā ka fesoasoani mai ke ala faeloa tatou kae tausi faka‵lei ‵tou mafaufau? (Onoono foki ki te ata.)

⁸ “‵Pei ki te ufi fatafata . . . mo te . . . puloutau.” E fakatusa ne Paulo a tatou ki sotia matapula‵pula kolā e ‵pei ki te gatu tau. (Faitau te 1 Tesalonia 5:8.) A te sotia tū e ‵tau o toka o taua i so se taimi. E penā foki tatou. E toka tatou mō te aso o Ieova māfai e ‵pei tatou ki te ufi fatafata o te fakatuanaki mo te alofa mo te puloutau o te fakamoemoega. Ka aoga malosi eiloa a uiga konei ki a tatou.

9. E puipui pefea tatou ne te ‵tou fakatuanaki?

⁹ A te ufi fatafata e puipui i ei te fatu o te sotia. A te fakatuanaki mo te alofa e puipui i ei ‵tou loto. Ka fesoasoani mai i ei ke tumau tatou i te tavini atu ki te Atua kae tau‵tali i a Iesu. A te fakatuanaki e fakamautinoa mai ne ia me ka tuku mai eiloa ne Ieova te ‵tou taui māfai e ‵sala tatou ki a ia mo ‵tou loto kātoa. (Epe. 11:6) Ka fakamalosi i ei tatou ke tumau i te fakamaoni ki te ‵tou Takitaki, ko Iesu, ke oko foki loa ki taimi kolā e ‵tau o kufaki tatou i tulaga faiga‵ta. E mafai o ati aka ne tatou te fakatuanaki ke fakafesagai atu ki tulaga faiga‵ta mai te mafau‵fau ki fakaakoakoga ‵gali o tino i aso nei kolā ne ‵mautakitaki i te fakamaoni faitalia a fakasauaga io me ko fakalavelave i mea tau tupe. Kae mafai o ‵kalo keatea tatou mai te malei ko te fia fai kope mai te fakaakoako ki tino kolā ne fakafaigofie olotou olaga ke fakamuamua a manakoga o te Malo.b

10. E fesoasoani mai pefea te alofa ki te Atua mo tuakoi ke kufaki tatou?

¹⁰ E aoga foki te alofa ki te faiga ke tumau tatou i te ala kae ke tausi ‵tou mafaufau ke ‵lei. (Mata. 22:37-39) A te alofa ki te Atua e fesoasoani mai ke tumau tatou i te talai faitalia so se fakalavelave e fepaki mo tatou. (2 Timo. 1:7, 8) Ona ko te mea e ‵tau o fakaasi ne tatou te alofa ki tino sē tali‵tonu, tenā te pogai e ‵tau ei o tumau tatou i te talai i ‵tou koga talai, pelā foki mo te talai i telefoni mo te tusiga o tusi. E se ‵fiu eiloa tatou i te fakamoe‵moe me isi se aso ka ‵fuli ei ‵tou tuakoi kae kamata o fai te mea tonu.—Eseki. 18:27, 28.

11. E fesoasoani mai pefea ki a tatou a te alofa ki taina tali‵tonu? (1 Tesalonia 5:11)

¹¹ A te alofa ki tuakoi e aofia i ei te alofa ki taina Kelisiano. E fakaasi atu ne tatou te alofa mai te “tumau i te fakamalosi atu te suā tino ki te suā tino.” (Faitau te 1 Tesalonia 5:11.) E fakamalosi ne tatou te suā tino ki te suā tino e pelā eiloa mo sotia kolā e taua ki te fili i tafa o nisi sotia. E tonu, e mafai o pakia fakafuasei se sotia i te taua ona ko tena taina sotia, kae e mautinoa me ne seki manako tonu a ia o fakapakia a ia. E penā foki tatou, e se ma‵nako eiloa o fakalogo‵mae ne tatou a ‵tou taina mo tuagane io me taui atu te masei ki te masei. (1 Tesa. 5:13, 15) E fakaasi atu foki ne tatou te alofa mai te āva ki taina kolā e fai te takitakiga i te fakapotopotoga. (1 Tesa. 5:12) I te tusiga ne Paulo te tusi tenei, kae seki kātoa te tasi tausaga ne fakatu i ei te fakapotopotoga i Tesalonia. Kāti a tāgata kolā ne fai te takitakiga i ei e se apo malosi kae kāti e isi ne mea ‵se ne fai ne latou. Kae koi manakogina loa ke fakaasi atu te āva ki a latou. I te pili mai o te fakalavelave lasi, kāti ka sili atu te manakogina ke fakalago‵lago malosi tatou ki te takitakiga a toeaina i ‵tou fakapotopotoga i te taimi tenā i lō te taimi nei. Kāti ka oko mai te taimi ka se mafai o fesokotaki tatou mo taina i ‵tou laumua mo te ofisa lagolago; tela la, e tāua ke na fakamasani tatou o fakaasi te alofa mo te āva ki ‵tou toeaina i te taimi nei. Faitalia me ne a mea e mafai o ‵tupu, ke na tausi faka‵lei ‵tou mafaufau ke ‵lei, mai te sē ‵saga atu ki olotou vāivāiga, kae ‵saga atu ki te manatu me ko Ieova mo Keliso e takitaki ne lāua a tāgata fakamaoni konei.

12. E puipui pefea ne te fakamoemoega a ‵tou mafaufau?

¹² E pelā eiloa mo te puloutau o se sotia e puipui ne ia tena ulu, e puipui foki ne te ‵tou fakamoemoega ki te fakaolataga a ‵tou mafaufauga. Kafai e malosi ‵tou fakamoemoega, ka iloa ne tatou me e seai se aoga o mea a te lalolagi konei e ofo mai ki a tatou. (Fili. 3:8) E fesoasoani mai ‵tou fakamoemoega ke tokagamalie tatou kae ke toka foki. Tenā eiloa te mea ne fai ne Wallace mo Laurinda, kolā e tavini atu nei i Afelika. I loto i se tolu vaiaso, ne isi faeloa se mātua o lāua ne mate i ei. Ona ko te masaki ‵pisi ko te COVID-19, ne seki mafai o ‵foki lāua ki te lā fenua ke ‵kau fakatasi mo lā kāiga. Ne tusi mai a Wallace: “A te fakamoemoega ki te toetuga ne fesoasoani mai ke mafaufau au ki a lāua, e se ki toe aso o lāua i te lalolagi nei, kae ki lā foliga i te aso muamua o lāua i te lalolagi fou. Ne fai ne te fakamoemoega tenei ke tokagamalie au māfai ko oko mai a lagonaga fanoanoa.”

13. Ne a ‵tou mea e mafai o fai ke maua te agaga tapu?

¹³ “Ke mo a ma tamate te afi o te agaga.” (1 Tesa. 5:19) Ne fakatusa ne Paulo te agaga tapu ki se afi i loto i a tatou. Kafai e maua ne tatou te agaga o te Atua, ka momea aka i ei te ‵tou loto finafinau mo te loto fiafia o fai te mea tonu kae ma‵losi foki tatou o ga‵lue mō Ieova. (Loma 12:11) Ne a mea e mafai o fai ne tatou ke maua te agaga tapu? Ko te ‵talo, sukesuke ki te Muna fakaosofia a te Atua, kae ‵kau fakatasi mo tena fakapotopotoga telā e takitaki ne tena agaga. Ka fesoasoani mai a te fai penā, ke ati aka ne tatou a “fuataga o te agaga.”—Kala. 5:22, 23.

14. Ne a mea e se ‵tau o fai ne tatou māfai e fia maua faeloa ne tatou te agaga o te Atua? (Onoono foki ki te ata.)

¹⁴ Kafai ko tuku mai ne te Atua tena agaga tapu, e ‵tau o fakaeteete tatou “ke mo a ma tamate te afi o te agaga.” E tuku atu ne te Atua tena agaga ki a latou fua kolā e ‵ma olotou mafaufauga mo amioga. Ka se tuku mai ne ia tena agaga ki a tatou māfai e mafau‵fau kae fai faeloa ne tatou a mea se ‵ma. (1 Tesa. 4:7, 8) Ko te mea ke maua faeloa ne tatou te agaga tapu, e se ‵tau foki mo tatou o “manatu māmā ki valoaga.” (1 Tesa. 5:20) I te fuaiupu tenei, e fakasino atu a “valoaga” ki fekau mai te Atua kolā e tuku mai ne ia e auala i tena agaga, e aofia i ei a fekau e uiga ki te aso o Ieova mo te tāua o te taimi ko ola tatou i ei. E se mafai o fakapuli ne tatou i ‵tou mafaufau a te aso tenā, kae manatu aka me ka se oko mai a Amaketo i te taimi koi ola ei tatou. I lō te fai penā, e fakaasi atu me ‵nofo fakatalitali kae mafau‵fau faeloa tatou ki ei, mai te “tapuaki fakamaoni ki te Atua” i aso katoa kae tumau i te tausiga o ‵tou amioga ke ‵ma.—2 Pe. 3:11, 12.

“KE TOFOTOFO AKA A MEA KATOA”

15. E ‵kalo kea‵tea pefea tatou ke mo a ma fakaloiloigina ne fakamatalaga sē ‵tonu mo fakamatalaga a temoni? (1 Tesalonia 5:21)

¹⁵ I aso mai mua, ka folafola mai a fili o te Atua, penei: “Ko filemu kae tokagamalie a mea!” (1 Tesa. 5:3) Ka ‵fonu te lalolagi i fakamatalaga fakaosofia a temoni, kae ka takitaki‵segina i ei a te tokoukega o tino. (Faka. 16:13, 14) Kae e pefea tatou? Ka se mafai o fakaloiloigina tatou māfai e “tofotofo [io me “fakamautinoa”] aka a mea katoa.” (Faitau te 1 Tesalonia 5:21.) A te pati Eleni telā ne ‵fuli ki te “tofotofo aka” ne fakaaoga ke fakamatala atu i ei te auala e tofotofo i ei a fiti tāua. Tela la, e ‵tau mo tatou o tofotofo muamua a tala e ‵logo tatou i ei io me ko mea e fai‵tau ne tatou ke fakamautinoa aka me ne tala ‵tonu io me ikai. Ne tāua ‵ki eiloa te mea tenā ki te kau i Tesalonia, kae ka sili atu te lotou tāua ki a tatou i te pili mai o te fakalavelave lasi. I lō te talitonu vave ki pati katoa e fai mai ne nisi tino, ke na fakaaoga ne tatou te malosi o ‵tou mafaufau o fakatusa‵tusa a mea e fai‵tau io me ‵logo tatou i ei mo mea e fai mai i te Tusi Tapu mo te fakapotopotoga a Ieova. Mai te fai penā, ka se mafai eiloa o fakaloiloigina tatou ne fakamatalaga io me ko takolekolega a temoni.—Faata. 14:15; 1 Timo. 4:1.

16. Se a te fakamoemoega mautinoa e maua ne tatou, kae se a te mea ka fakaiku aka ke fai ne tatou?

¹⁶ E pelā me se potukau, ka ‵sao eiloa a tavini a te Atua i te fakalavelave lasi. Kae pelā me ne tino taki tokotasi, e se iloa ne tatou a mea ka ‵tupu i te aso ma taeao. (Iako. 4:14) Tela la, faitalia me oko atu tatou ki te fakalavelave lasi io me ‵mate mai mua i ei, ka maua eiloa ne tatou a te taui ko te ola se-gata-mai māfai e tumau tatou i te fakamaoni. Ka ‵kau fakatasi te kau fakaekegina mo Keliso i te lagi. Ka ola a nisi mamoe i te lalolagi palataiso. Ke na ‵saga tonu atu tatou ki te ‵tou fakamoemoega gali kae ke toka faeloa mō te aso o Ieova!