Julho

Zvese zvakarekethwa uye zvakaizwa ndi Djesu kutobatanidzawo zvishamiso iyena akanyasa kuteedzera nge mushobo wakakwana marangariro no mazwiro a Baba ake. (Juau 14:9) Tingafundei kubva pa zvishamiso zva Djesu? Djesu na Baba ake Djehovha anotida maningi. Djesu paainga ari pa nyika pano akapangidza madire aaiita anhu ngekuita zvishamiso kuti aabetsere pa matambudziko awo. Pa nguwa imweni, anarume airi ainga ari mapofu akadaidzira Djesu kuti aporeswe. (Mat. 20:30-34) Onai kuti Djesu “akazwira usisi” anarume aya uye akaaporesa. Mu vherisikuro ii, soko re Cigrego rakaturikirhwa kuti “akazwira usisi” rinopangidza mazwiro e cemukati. Ndiwo mazwiro aya e cemukati ainga ana Djesu akaita kuti ade kupasa zvekurhya anhu uye kuporesa ainga ecirhwara. (Mat. 15:32; Mark. 1:41) Tingagara no rugondo rekuti Djehovha Mwari we “usisi wakakura,” uye Mwana wake Djesu anotida uye anoshuphikawo paanotiwona tecishuphika. (Ruka 1:78; 1 Ped. 5:7) Atina mubvunzo kuti Djehovha na Djesu anoda kupedza zviro zvese zvinobara matambudziko ku anhu! w23.04 paji. 3 mandi. 4-5

Tinodikana kuita zvese zvatinokwanisa kuti tisagare no marangariro asikazi kunaka, uye tisagare no marangariro e nyika ya Sathani. Patinofunda uye kuerenga Bhaibheri, tinodzadza ndangariro dzedu ngo marangariro akanaka uye akacena. Kupinda misangano uye kuparidzira kunotibetsera kuti ticengetedze ndangariro dzedu. Ngokudaro, Djehovha acadzadzisa cipikirhwa cake ngekusama kutendera kuti tisaedzwe kupinda paya patisikakwanisi kushingirira. (1 Ako. 10:12, 13) Umwe na umwe wedu unodikana kuita munamato kupinda zvataiita kare kuti tirumbwe takagondeka kuna Djehovha mazuwa ano atirikurarama anoshupha. Djehovha anoda kuti ‘tidurure mwoyo yedu pamberi pake’ teciseenzesa munamato. (Pis. 62:8) Kudzai uye tendai Djehovha ngo zvese zvaanoita. Kumbirai rubetso rake kuti mugare no ushingi mu basa re kuparidzira. Itai munamato nguwa dzese mecikumbira rubetso kuti mukwanisane no matambudziko amunobatana nawo uye kuti mushingirire muedzo upi hawo wamungasongana nawo. Musasiye kuti munhu upi hake, kana kuti ciro cipi haco cecimuitisai kuti musaite munamato kuna Djehovha. w23.05 paji. 7 mandi. 17-18

Ngei tecipinda misangano? Cikonzero cikuru, nge cekukudza Djehovha. (Pis. 26:12; 111:1) Cikonzero cimweni, ngece kubambisana mukati me nguwa ino inoshupha yatiri kurarama. (1 Ate. 5:11) Patinomutsa nyara uye topasa mhinduro, tiri kuita zviro zviiri izvi. Asi patinonga tecida kupasa mhinduro, pamweni tingasongana no zvinetso. Tingakwanisa kuzwa kuthya patinonga tecida kupasa mhinduro. Pamweni tingatoda kudaira asi atipaswi mukana patinomutsa nyara. Tingarhwisana kudini no zvinetso izvi? Muphostori Pauro wakabhuya kuti awona aidikana kukanda ndangariro dzawo pa “kubambisana.” Hino patinozwisisa kuti hama dzimweni dzingazwa kubambiswa nge mhinduro doko dzatinopasa, isusu tinozwa takasudzunuka kuti tipase mhinduro. Kunyazi tisikazi kupaswa mukana kakawanda hingana zvataida, tinopfara nge kuziya kuti hama dzimweni dzaonawo mukana we kupasa mhinduro.—1 Ped. 3:8. w23.04 paji. 20 mandi. 1-3

Mambo wakaziisa kuti Adjudha ainga akasungwa ku Bhabhironi ke makore 70, angahwirira ku nyika yawo ku Israeri. (Esdra 1:2-4) Zviri pamhene kuti Djehovha ndiyena waiitisa kuti zviitike. Ngekuti Abhabhironi ainga asikatenderi kusudzunura asungwa awo. (Isa. 14:4, 17) Mutungamiriri wawo mupsva wakatendera kuti Adjuda abude mu Bhabhironi. Mudjudha umwe na umwe maka-maka misoro ye mhuri aidikana kuita cisananguro cokuti obuda here mu Bhabhironi kana kuti orumbwa arimo. Zvainga zvisiripi nyore kuita cisananguro cakadai. Adjudha akawanda ainga acembera, ndiyo ndaa zvaizoshupha maningi kuita rhwendo iri. Adjudha akawanda ainga abarirhwa mu Bhabhironi, ndikona kaaiziya basi. Kaari Israeri yainga iri nyika ye madzibaba awo no madzitsekuru awo. Adjudha amweni ainga atori apfumi ku Bhabhironi, zvaizoashuphira kuti asiye nyumba dzawo dzakanaka pamwepo no mabhizi awo kuti atangisezve papsva ku mbuto yaasikazii. w23.05 paji. 14 mandi. 1-2

Soko ra Mwari rinotikohomedzesa kuti tirumbwe tecipangidza kushingirira, usisi uye rudo. Ruka 21:19 inoti: “Nge kushingirira kenyu, imwimwi mucaponesa upenyu wenyu.” Akorosi 3:12 inoti: “Pangidziranai . . . usisi.” Uye 1 Atesaronika 4:9, 10 inoti: “Imwimwi munofundiswa na Mwari kuti mudanane. . . . Asi isusu tinomukohomedzesai hama, kuti murumbwe mecitunhudzira kuita kudaro.” Masoko aya akatarirhwa ku afundi ainga aakupangidza usisi kushingirira uye rudo. Asi kunyazi zvakadaro, awona aidikana kurumbwa ecipangidza mawara aya. Isusu tinodikana kuitawo zvimwezvo. Kuti tibetsereke ngatione kuti Akristu ekutanga akapangidza kudini mawara aya. Uyewo, mucaona kuti muingateedzera kudini afundi aya, uye mopangidza kuti makagadzirira pacazoitika dambudziko guru. Uye dambudziko guru parinozotanga, imwimwi munonga makafunda kushingirira uye mucagara makashinga kuti murumbwe meciita izvona. w23.07 paji. 2 ndi. 4; paji. 3 ndi. 8

Azvinei kuti isusu tiri anhu akadzodzwa kana kuti e “mabira amweni,” tese isusu tinodikana kurumbwa tecihamba mu “Gwanza Rakacena.” Izvona zvicatibetsera kurumbwa tecinamata Djehovha nyamasi uno uye mune ramangwana paticatambira makomborero acaunziswa no Umambo wa Mwari. (Juau 10:16) Kubvira muna 1919 K.A., mamiriyonji e anarume, anakadzi uye ana adoko, ari kubuda mu Bhabhironi Guru kana kuti mu magereja e kunyepa uye arikutanga kuita rhwendo mu gwanza rekuezanisira. Djehovha akagondesa kuti aizobvisa ngozi ipi hayo yaizopingaidza Adjudha mu gwanza rawo pa kuhwirira kubva ku Bhabhironi. (Isa. 57:14) Kodi mu mazuwa edu ano, Djehovha akaita zviro zvakatodzana no “Gwanza Rakacena” here? Honde. Mazana e makore, gore ra 1919 risati raguma, Djehovha akaseenzesa anarume akagondeka kuti abetsere amweni kubuda mu Bhabhironi Guru. (Ezanisai na Isaya 40:3.) Anarume aya kagadzirira gwanza kuitira kuti anhu ano mwoyo wakanaka abude mukunamata kekunyepa uye anamate Djehovha pamwepo no anhu ake. w23.05 mapaji. 15-16 mandi. 8-9

Djehovha aadi kuti tiite ciro hingana tiri kubambidzirhwa, asi kuti tiite no cido. (2 Ako. 9:7) Hino tinodikana kurumbwa teciseenza no simba kuti tidzadzise cinangwa cekunamata kunyazi tisina cido cekuzviita here? Onai muezaniso we muphostori Pauro. Iyena wakati: “Ndinopangira mwiri wangu ndeciuita hinga muranda.” (1 Ako. 9:25-27, masoko o pasi) Pauro waidzibambidzira kuita zviro zvakanaka kunyazi paainga asina cido cekuzviita. Uye Djehovha aiwona kudini zvaiizwa ndi Pauro? Iyena akapfara nge basa rakaizwa ndi Pauro! Uye akakomborera kupeta kake masimba. (2 Ti. 4:7, 8) Ngo mushobo umwewo, Djehovha anopfara maningi paanotiona teciseenza no simba kuti tidzadzise cinangwa catinaco kunyazi tisina cido cekuzviita. Iyena anopfara ngekuti anoziya kuti isusu tirikupeta masimba haiwa nge ndaa ye rudo ratinaro ku ciro icona, asi ku rudo redu kaari. Kuita hingana Pauro wakakomborerhwa ndi Djehovha, Djehovha acakomborerawo kupeta kedu masimba. (Pis. 126:5) Uye patinoona kuti Djehovha arikutikomborera, cido cedu cinotunhudzirikawo. w23.05 paji. 29 mandi. 9-10

Muphostori Pauro unoezanisa aya asikazoponi pa zuwa ra Djehovha no anhu ari kuwata. Awona aoni nguwa yecipinda uye kunyazi zviri kuitika. Ndiyo ndaa, awona aazwisisi ciro cinokosha pacinoiitika uye anorumbwa asikaiti ciro. Anhu akawanda nyamasi ari kuwata pa zvekumwiya. (Aro. 11:8) Awona aatenderi kuti tiri kurarama mu “mazuwa ekupedzesera” uye kuti dambudziko guru raa dhuze kuguma. (2 Ped. 3:3, 4) Asi, isusu tinozviziya kuti zvinokosha maningi kuti tirumbwe takamuka. (1 Ate. 5:6) Pedzepo, tinodikana kurumbwa takaterama uye takadzimikidza. Ngei tecidikana kudaro? Kuitira kuti tisapindire mune zvematongerhwe e nyika uye mu migariro we nyika ino. Patinorumbwa tecikhwedera dhuze no zuwa ra Djehovha, ticabambidzirhwawo maningi kuti tigare no dii ratinotsigira pa nyaya idzi. Asi atidikani kunyanya kunetseka nazvo. Mwiya mucena wa Djehovha ucatibetsera kuti tigare takaterama uye kuti tiite zvisananguro zvakanaka.—Ruka 12:11, 12. w23.06 paji. 10 mandi. 6-7

Imwimwi munorangaridzei pamunozwa ngezve zina ra Samusoni? Pamweni imwimwi munoedzurira kuti iyena wainga ari mwanarume wakabamba maningi. Izvona izvirokwazvo. Asi nge dii rimweni, iyena wakaita zvisananguro zvakashata uye wakazobatana no matambudziko nge ndaa yazvo. Kunyazi zvakadaro, Djehovha wakakanda ndangariro dzake pa zviro zvese zvakanaka zvainga zvakaizwa na Samusoni. Uye Mwari wakasiya muezaniso wa Samusoni mu Bhaibheri kuti utibetsere. Djehovha akaseenzesa Samusoni kuti aite zviro zvinoshamisa uye kuti abetsere Aisraeri. Paa padarika mazana e makore mumasure me kufa ka Samusoni, Djehovha akafemera muphostori Pauro kuti abatanidze zina ra Samusoni pa mundandanda we anhu ainga apangidza kutenda kakabamba. (Aheb. 11:32-34) Muezaniso wa Samusoni ungatibambisa. Iyena wakagonda Djehovha, kunyazi ecibatana no migariro inoshupha. Muezaniso wa Samusoni ungatibambisa kudini uye i fundo dzipi dzinokosha dzatingafunda kaari. w23.09 paji. 2 mandi. 1-2

Isusu tingabambisawo kushingirira kedu nge kuita munamato kuna Djehovha nguwa dzese uye kumupanganidzira zviya zviri kutinetsa. (1 Ate. 5:17) Pamweni imwimwi amuripi kubatana no dambudziko guru pa nguwa ino. Asi, munoita here munamato kuna Djehovha mecikumbira rubetso rake pamunonga makanyangadzwa, mecinetseka mu ndangariro kana kuti musikazii zvekuita here? Kana imwimwi muno musambo wekukumbira rubetso kuna Djehovha pamunobatana no matambudziko madoko e zuwa no zuwa, imwimwi mungagara no rugondo rekuti mucaitawo izvona pamunonga mecibatana no matambudziko akakura mune ramangwana. Imwimwi mucagara no rugondo rekuti Djehovha anonyasa kuziya nguwa uye mushobo wakanaka wekutipasa rubetso ratinoda. (Pis. 27:1, 3) Kana tikashingirira patinobatana no zvinetso zvino zvicagara nyore kuita izvona pa nguwa ye dambudziko guru. (Aro. 5:3) Tinozviziya kudini izvona? Hama dzakawanda dzakaona kuti nguwa dzese dzaanokurira muedzo wekutenda, awona anozwa akabamba kuti akurire pa dambudziko rinoteera. Paanobatana no dambudziko uye oshingirira kutenda kaanoita kekuti Djehovha akagadzirira kuabetsera kunorumbwa kecitunhudzira. Kutenda ikona, kunoabetsera kuti awona akurire dambudziko rinoteera.—Tig. 1:2-4. w23.07 paji. 3 mandi. 7-8

Kudzidodosa no usisi wa Djehovha zvinoita kuti iyena agare munhu anozwisisa. Ngo muezaniso, kudzidodosa ka Djehovha kakaoneka pamhene pa nguwa yaaida kuparadza anhu akashata mu Sodhoma. Eciseenzesa ngirozi dzake, Djehovha akabvunza munhu munatsi Roti kuti atize aende ku matunhu. Asi Roti wakathya uye wainga asikadi kuenda ikona. Hino, Roti wakakumbira kuti iyena no mhuri yake atize ecienda ku Zoari, thaundi ridoko rainga rakasanangurhwa na Djehovha kuti riparadzwe. Djehovha angadai akabvunza Roti kuti atondoedze nhungamiriro dzaakamupasa pakutanga. Asi pane kudaro, iyena akadaira cikumbiro ca Roti uye akasanangura kutama kuparadza thaundi iri. (Gen. 19:18-22) Zana re makore raaradarika, Djehovha akapangidza usisi ku anhu aigara ku Ninivhi. Iyena akatumira muphorofita Djona kuti abvunze agari e Ninivhi kuti aizoparadzwa. Asi anhu e ku Ninivhi paakacinyuka Djehovha akaazwira usisi uye aazi kuparadza thaundi iri.—Djon. 3:1, 10; 4:10, 11. w23.07 paji. 21 ndi. 5

Tingafundei no muezaniso wa Djoashi? Muti uno nzinde dzisikazi kubamba unodikana kutsigirhwa kuti urumbwe wakaima. Kana uwona ukasama kutsigirhwa dutu ricauwisira pasi. Ndizvona zvakaitika na Djoashi. Iyena waitsigirhwa ndi Djeoyadha uye mumasure mekuti Djeoyadha afa, iyena wakapfuridzirhwa nge anhu akapauka uye wakawa pakunamata uye wakagara munhu usikazi kugondeka nuka Djehovha. Kuezanisa uku kunopangidza kuti atidikani kuteerera Djehovha ngekuti mu mhuri medu kana kuti mu ungano muno anhu ano miezaniso yakanaka uye anotikohomedzesa kuti tiite izvona. Kana tecida kugara no ushamwari wakabamba na Djehovha, tinodikana kubambisa rudo uye kuthya kedu Djehovha ngekufunda Bhaibheri, kunyasa kurangarira uye kuita munamato. (Djer. 17:7, 8; Ako. 2:6, 7) Zvezvirokwazvo zvatinokumbirhwa na Djehovha kuti tiite azvishuphi. Zvaanoda zvakatarhwa nge mucigwagwa pana Muparidzi 12:13, inoti: “Ithya Mwari we cokwadi uye cengeta mitemo yake, ngekuti ici ndico ciro cikuru cinodikana kuizwa no munhu.” Kana tikathya Djehovha ticakwanisa kukunda muedzo upi hawo kana cinetso cingatiwira mune. Apana ciro cipi haco kana munhu ucakwanisa kukuwadza ushamwari wedu na Djehovha. w23.06 paji. 19 mandi. 17-19

Pakutanga pe vhersikuro 5 panobhuya kuti: “Uya ainga akagara pacigaro ce umambo akati.” (Zvak. 21:5a) Masoko aya anokosha ngekuti Djehovha akareketa katatu mubhuku ra zvakapangidzwa. Apona anoti: Aingirozipi kana kuti Djesu akapasa rugondo iri, asi Djehovha kamare! Izvona zvinopangidza kuti tinodikana kugonda no zvaakareketa pa vhersikuro 5. Ngei? Ngekuti Djehovha “aanyepi.” (Tito 1:2) Hino tingagonda no masoko ari pana Zvakapangidzwa 21:5, 6. Onai soko rokuti “Ona!” Mu Cigrego soko rakaturikirhwa kuti “ona!” rinoseenzeswa kakawanda mu bhuku ra Zvakapangidzwa. Uye Djehovha akazobhuyei mumasure mazvo? Iyena akati: “Ndiri kuita kuti zviro zvese zvigare zvipsva.” Djehovha acaita zviro izvi mune ramangwana, asi iyena ano rugondo rese rekuti acadzadzisa zvese zvaakapikira. Iyena ari kutobhuya hingana kuti cinjo idzi dzakatoitika kamare.—Isa. 46:10. w23.11 paji. 3 mandi. 7-8

Pedru wairumbwa ecirhwisana no kutama kukwana kake. Ngatione miezaniso minganani. Djesu paakabhuya kuti waidikana kutambudzika no kufa kuti adzadzise uphorofita we mu Bhaibheri, Pedru wakabvunza Djesu kuti izvi azvizomboitiki. (Mark. 8:31-33) Nguwa dzimweni, Pedru no amweni ake aireketedzana ecida kuziya kuti ndiani waikosha pakati pawo. (Mark. 9:33, 34) Usiku umwe Djesu asati afa, Pedru wakaita zviro asikazi kurangarira uye wakagura nzee ye mwanarume umweni. (Juau 18:10) Pa usiku uwona kamare, Pedru wakathya maningi zvekuti wakaguma pakuramba katatu kese kuti wainga ari shamwari ya Djesu. (Mark. 14:66-72) Izvi zvakaita kuti iyena aceme maningi. Pedru wakadzinyangadzirhwa ega kamare, asi kunyazi zvakadaro Djesu aazi kumuramba. Mumasure mekumutswa, Djesu akapasa Pedru mukana wekuti apangidze rudo rake kaari. Djesu akapasa basa ripsva Pedru rokuti agare muushi anodzidodosa uye kuriritira mabira ake. (Juau 21:15-17) Pedru wakaita zviya kamare zvaakakumbirhwa na Djesu. Pedru wainga ari ku Djerusarema pa zuwa re pentekoste uye wakagara umwe we akatanga kudzodzwa no mwiya mucena. w23.09 paji. 22 mandi. 6-7

Muphostori Pedru wakabvunza akuru e ungano kuti, “Ushai mabira a Mwari.” (1 Ped. 5:1-4) Kana imwimwi muri mukuru, tinoziya kuti munoda maningi hama no hanzvadzi uye munoda kunyasa kuacengeta zvakanaka. Asi pamweni paya, mungakwanisa kugara makabatikana maningi kana kuzwa makaremba zvoita kuti musakwanise kuita basa renyu. Pakadaro, zvinyi zvamungaita? Bvunzai Djehovha zvamuri kuzwa. Pedru wakatara kuti: “Kana munhu eciseenzera, ngaaite izvona no simba raanopaswa na Mwari.” (1 Ped. 4:11) Pamweni hama no hanzvadzi dziri kubatana no matambudziko ekuti aagadzirisiki zvino. Asi edzurirai kuti “muushi mukuru” Djesu Kristu angakwanisa kuabetsera kupinda imwimwi. Iyena anokwanisa kuzviita zvino uno kutobatanidzawo no munyika ipsva. Djehovha anoda basi kuti akuru ade hama no hanzvadzi, adziushe uye agare “muezaniso wakanaka ku mabira.” w23.09 mapaji. 29-30 mandi. 13-14

Atidikani kugonda no murangariro we munhu usikazwiri Djehovha. Kana tikarangarira hinga anhu asikakoshesi mitemo ya Djehovha, isusu tingapedzesera tapfuridzirhwa nawo. (1 Ako. 3:19) “Ungwaru we mu nyika” kakawanda kakhona unoita kuti awona apandukire Mwari. Akristu amweni eku Pergano no Tiyatira akapfuridzirhwa no anhu ainga akaatenderedza aiita zviro zvisikazi kucena uye ainamata zvidhori. Djesu wakapasa mazano akabamba ku ungano idzi ngekuti awona aitendera uhure pakati pawo. (Zvak. 2:14, 20) Nyamasi uno, tinobambidzirhwa maningi kuti tirangarire nge mushobo unorangarirhwa no nyika. Mhuri dzedu no shamwari dzedu pamweni dzingaedza kuita kuti tirangarire kuti tinodziomesera maningi uye kuti apana cakashata pakutama kuzwira mitemo ya Djehovha. Nge muezaniso, awona angareketa kuti apana cakashata kutendera kuita zvido zvedu uye angabhuya kuti zviya zvinorekethwa no Bhaibheri zvakasaririra. Nguwa dzimweni, tingatanga kurangarira kuti nhungamiriro dzatinopaswa na Djehovha adzizi kunyasa kudjeka. Pamweni tingazwa teciedzwa kuti ‘tiite zviro kudarika zviya zvakatarhwa.’—1 Ako. 4:6. w23.07 paji. 16 mandi. 10-11

Mariya mai a Djesu, waida simba kuti aite zvaidiwa na Djehovha. Rangaridzai kuti iyena wakazwa kudini mumasure mekupaswa basa riya raishupha no ngirozi Gabrieri. Iyena wainga asikazi kuwakwa asi wainga ano pamwiri. Iyena wainga asina esperiensiya ye kurera ana, asi iyena waidikana kuriritira mwana waizogara Mesiya. Uye ngekuti wainga ari mhandwe, Mariya waizopanganidza kudini mugariro wake ku mwanarume waizogara mwamuna wake, Zuzee? (Ruka 1:26-33) Mariya wakaitei paakatambira basa rinoshupha? Iyena wakapsvaka rubetso re amweni. Nge muezaniso, iyena wakakumbira ku ngirozi Gabrieri masoko akadzara nge ndaa ye basa raaidikana kuita. (Ruka 1:34) Pasikazi kutora nguwa yakareba, iyena wakaita rhwendo ecienda “ku mutanha we matunhu” e Djudha kuti avhakacire hama yake Erizabheti. Erizabheti wakatenda maningi Mariya uye wakafemerhwa na Djehovha kuti arekete ngezve uphorofita wakaringana ngezve mwana wa Mariya. (Ruka 1:39-45) Mariya wakabhuya kuti Djehovha ainga “amupasa simba no nyara yake.” (Ruka 1:46-51) Djehovha akaseenzesa Gabrieri na Erizabheti kuti abambise Mariya. w23.10 mapaji. 14-15 mandi. 10-12

Akristu anganani akasanangurhwa arikudzodzwa no mwiya mucena uye nge ndaa yazvo awona ano ukama unokosha na Djehovha. Hama idzi dzinokwana kuita 144 000 dzicaseenza hinga apristi kudenga pamwepo na Djesu. (Zvak. 14:1) Mbuto Cena ye mu tabhernakuro inoimirira mbuto yawo hingana ana akasanangurhwa na Mwari aciri pa nyika. (Aro. 8:15-17) Mbuto Yakacenesesa ye mu tabhernakuro inoimirira kudenga kuna Djehovha. “Kortina” yaisiyanisa mbuto Cena no mbuto Yakacenesesa inoimirira mwiri wa Djesu. Paainga ari pa nyika pano, iyena ainga ano mwiri we nyama, ngekudaro, ainga asikakwanisi kukwira kudenga kuti agare Mupristi Mukuru we tempro ye ku mwiya. Paakapasa upenyu wake hingana cibairo, Djesu akafunungura mukana kuti Akristu ese akadzodzwa akwanise kurarama upenyu wawo kudenga. Kuitawo hingana Djesu, Akristu akadzodzwa anodikana kusiyawo mwiri wawo we nyama kuti akwanise kutambira makomborero awo e kudenga kupasa upenyu wawo.—Aheb. 10:19, 20; 1 Ako. 15:50. w23.10 paji. 28 ndi. 13

Gidhioni wakarumbwa akaterama paakashorhwa no Aefremu. (Ato. 8:1-3) Gidhioni aazi kugara no shungu. Iyena wakapangidza kuti waidzidodosa mundangariro nge kupurutana zvaibhuiwa no anarume aya, nge kudaro wakaita kuti anhu aterame. Zvakanaka maningi kuti akuru ateedzere muezaniso wa Gidhioni paanonga ecishorhwa, nge kunyasa kupurutana uye kuita ciito akaterama. (Tig. 3:13) Nge kuita kudaro, awona anoita kuti mu ungano mugare no runyararo. Paakasimbwa ngekuti akaponesa anhu a Djehovha mu nyara dze Amidhiyani, Gidhioni wakapasa rukudzo rese kuna Djehovha. (Ato. 8:22, 23) Akuru angateedzera kudini muezaniso wa Gidhioni? Awona angakwanisa kupasa Djehovha rukudzo rese nge zvese zvaanoita. (1 Ako. 4:6, 7) Ngo muezaniso, kana mukuru akasimbwa nge ndaa ye uzii wake wekufundisa, iyena ungakwanisa kupanganidza kuti zvabuda zvakanaka nge ndaa ye manyuku e fundiso, Soko ra Mwari kana kuti nge ndaa ye rowedzo yaakapaswa nge sangano ra Djehovha. Nguwa dzimweni akuru anodikana kuima kuti aongorore kuti aaripi kuita zviro kuti adzionese. w23.06 paji. 4 mandi. 7-8

Zviya zvatinokumbira mumunamato kuna Djehovha zvikatama kuitika,tingadzibvundzisa kuti: ‘Candiri kukumbira ici cakanaka here?’ Kakawanda kakhona, isusu tinorangarira kuti tinozviziya zvakatinakira. Asi pamweni zviya zvatiri kukumbira azvitikosheri ke nguwa yakareba. Kana teciita munamato tecikumbira kuti dambudziko redu rigadziriswe, pamweni pano mushobo umweni wakanaka maningi wekugadzirisa dambudziko irona. Uye zvimweni zvatinokumbira Djehovha, pamweni azvienderani no kuda kake. (1 Juau 5:14) Rangarirai ngezve muezaniso we abereki akakumbira kuna Djehovha kuti mwana wawo arumbwe ari mu cokwadi. Zviri kuita hinga kuti apana cakashata pa cikumbiro ici. Asi Djehovha aabambidziri munhu kuti amuseenzere. Iyena anoda kuti tese isusu kutobatanidzawo ana edu, asanangure kumuseenzera. (Dhe. 10:12, 13; 30:19, 20) Hino pane kukumbira kuna Djehovha kuti mwana wawo arumbwe ari mu cokwadi, abereki angakumbira kuti Djehovha aabetsere kuti akwanise kubaya mwoyo ye ana awo, ade Djehovha uye kuti akwanise kugara shamwari Yake.—Zvie. 22:6; Aef. 6:4. w23.11 paji. 21 ndi. 5; paji. 23 ndi. 12

Ngei zvecikosha kunyaradza hama no hanzvadzi dzedu? Mabhuku amweni anopanganidza ngezve Bhaibheri, anopanganidza kuti soko rakaseenzeswa na Pauro rekuti “kunyaradza” rinoreya “kugara ku dii re munhu kuti timubambise paanonga ecibatana no matambudziko.” Hino, kana tikanyaradza hama dzedu tinodzibetsera kuti dzimuke, dzirumbwe dzecihamba mu gwanza re upenyu. Paya patinocema pamwepo no hama yedu, tinopangidza kuti tinoida maningi. (2 Ako. 7:6, 7, 13) Munhu paanozwira usisi munhu umweni uri kubatana no matambudziko, acada kumunyaradza uye kumubetsera. Hino, pakutanga tinomuzwira usisi, pedzepo tomunyaradza. Ngatione kuti Pauro wakaezanisa kudini usisi wa Djehovha no nyaradzo Yaanotipasa. Pauro wakabhuya kuti: Djehovha ndi “Baba e usisi ukuru uye Mwari wekunyaradza kese.”—2 Ako. 1:3. w23.11 mapaji. 9-10 mandi. 8-10

Ese afundi a Djesu angaetsera kubatana no matambudziko. Onai muezaniso wa muphostori Pauro. Iyena wakabvunza Akristu e ku Tesaronika kuti: “Patainga tinemwi taimubvunzai kuti taizobatana no matambudziko, uye hinga zvamunoziya, ndizvo kamare zviri kuitika na isusu.” (1 Ate. 3:4) Pauro watarira Akorinti kuti: “Hama, tinoda kuti muziye ngezve matambudziko atakabatana nawo . . . Zvekutoti tainga tisisitona cokwadi cokuti taizopona.” (2 Ako. 1:8; 11:23-27) Mazuwa ano, tese isusu tingaetsera kusongana no matambudziko akasiyana-siyana. (2 Ti. 3:12) Nge ndaa yekutenda muna Djesu, hama dzenyu uye shamwari dzenyu dzakambomupsvinyirai. Kana kuti zvingaita kuti awona akamubatai ngo mushobo usikazi kunaka. Pamweni imwimwi makasongana no muedzo kubasa nge ndaa ye kutendeseka kenyu? (Aheb. 13:18) Zvingatoita kuti imwimwi makateererhwa nge anyautongi nge ndaa ye kushingaira kenyu mu basa re kuparidzira. Asi azvinei no matambudziko atiri kusongana nawo, Pauro wakabuya kuti tingakwanisa kupfara. w23.12 mapaji. 10-11 mandi. 9-10

Djakobo wakasongana no matambudziko akawanda. Ana airi a Djakobo, Simeyau na Revhi, akatosvipisa haiwa basi zina re mhuri yawo, asi ra Djehovha. Kupinda izvona, Rakeri, mukadzi waidiwa ndi Djakobo, wakafa paaibereka mwana wake we cipiri. Nge ndaa ye nzara yakakura, Djakobo kunyazi wainga akura, zvakamubambidzira kuti acinje kwenda koogara ku nyika ye Edjipito. (Gen. 35:16-19; 37:28; 45:9-11, 28) Kunyazi no zvese zvakaitika, Djakobo aazi kuruza kugondeka kake kuna Djehovha no zvipikirhwa Zvake. Djehovha akapangidza pamhene kuti ainga apfarira Djakobo. Hinga muezaniso, Djehovha akarumbwa ecikomborera Djakobo pa zviro zve kurarama nazvo. Uye cimborangarirai kutenda kakaita Djakobo kuna Djehovha nge kuonanazve no mwana wake waaida, Zuzee—mwana waairangarira kuti wainga afa ke makore ainga adarika! Ushamwari wakabamba wainga una Djakobo na Djehovha ndiwona wakaita kuti akwanise kukunda matambudziko ese aaisongana nawo. (Gen. 30:43; 32:9, 10; 46:28-30) Kana tikarumbwa tino ushamwari wakabamba na Djehovha, ticakwanisa kukunda matambudziko atingasongana nawo tisikaakariri. w23.04 paji. 15 mandi. 6-7

Pana Pisarema 23, Dhavhidhi wakapangidza rugondo rake rekuti Djehovha aimuda uye aimucengeta. Iyena wakapanganidza ngezve ushamwari we pa dhuze waainga anawo na Djehovha uye wakati Djehovha Muushi wake. Iyena waizwa akacengeteka ecisiya Djehovha ecimutungamirira uye iyena wainyasa kugonda Djehovha. Dhavhidhi waizviziya kuti Djehovha aizopangidza rudo rake kaari mazuwa ese. Ngei Dhavhidhi waikwanisa kugara no rugondo iri? Nguwa dzese Dhavhidhi waizwa akanyasa kucengethwa na Djehovha ngokuti wainga ano zvese zvaaida. Uyezve, Dhavhidhi waiziya kuti Djehovha ainga ari shamwari yake uye aimupfarira. Ndiyo ndaa Dhavhidhi waiziya kuti azvinei no zviro zvaizoitika mu nguwa yemberi, Djehovha aizonyasa kumudziirira. Rugondo rainga rina Dhavhidhi mu rudo ra Djehovha rainga rino simba maningi kupinda cinetso cipi haco, uye ndizvona zvaiita kuti Dhavhidhi apfare uye agutsikane.—Pis. 16:11. w24.01 paji. 29 mandi. 12-13

Mumasure me Hondo ye Cipiri ye Nyika Yese, anhu a Djehovha e mu nyika dzakasiyana-siyana anosokwanisa kuita basa re kuparidzira no rusudzunuko. Kubhuya zvazviri, basa re kuparidzira mu nyika yese ririkurumbwa recitunhudzira. Mazuwa ano, nhengo dze Dare Rinotungamirira dzinorumbwa dzeciteerera nhungamiriro dza Djesu. Awona anoita izvona ngekugara no cokwadi cekuti zvisananguro zvawo zvinoenderana maererano no zvinodiwa na Djesu. Kusiya izvona, aonereri e nharaunda no akuru anoseenzeswa kuti agumise nhungamiriro idzona ku ungano. Akuru akadzodzwa ari ku “moko kwawo” wa Djesu (Zvak. 2:1) Zviri pamhene kuti akuru ese anhu asikazi kukwana uye anotoshaishawo. Mozesi na Djoshuwa akatomboshaishawo nguwa dzimweni uye no aphostori amweni. (Num. 20:12; Djs. 9:14, 15; Aro. 3:23) Kunyazi zvakadaro, isusu tirikunyasa kuona pamhene kuti Djesu acirikurumbwa ecitungamirira muranda akatendeka no akuru, uye iyena acarumbwa eciseenzesa anarume. Hino isusu tino zvikonzero zvese zvekuti tigonde nhungamiriro dzatirikupaswa na Djesu eciseenzesa anarume aya akatendeka. w24.02 mapaji. 23-24 mandi. 13-14

Isusuwo tingakudza Djehovha patinoreketa nge zvake no rureremedzo, rudo uye ngo kumutenda. Patinonga tiri mu basa rekuparidzira, tinodikana kuedzurira kuti cinangwa cedu cikuru ngece kuita kuti anhu akhwedere dhuze na Djehovha uye kuabetsera kuti anhu amuone hingana Baba ano rudo. (Tig. 4:8) Katiri mupfaro mukuru kupangidza anhu mu Bhaibheri kuti Djehovha ndi Mwari we rudo, ano unatsi, uzii, simba uye kuti iyena ano mawara amweni anoshamisa. Mushobo umweni wekukudza Djehovha uye we kumupfadza, ndi paya patinopeta masimba kuti timuteedzere. Patinoita izvona, amweni angakwanisa kuona kuti isusu takasiyana no anhu amweni. (Mat. 5:14-16) Patinonga tinawo mu upenyu wedu we zuwa no zuwa, pamweni tingagara no mukana we kupanganidza kuti ngei takasiyana. Mugumisiro wakhona ngewe kuti anhu ano mwoyo unoda angapedzisira aakutoda kuziya zvakawanda ngezve Mwari wedu. Patinokudza Djehovha nge mushobo uwona, iyena anopfara maningi ndizvona.—1 Ti. 2:3, 4. w24.02 paji. 10 ndi. 7

Kuti mugare Mukristu wakakura pakunamata, munodikana kufundira kuita mabasa anobetsera. Mabasa awona acamubetserai kuti mucengetedze ubaba wamunawo mu ungano, muone basa ricamubetserai kuti mudziriritire uye muriritire mhuri yenyu, uyewo acamubetserai kuti mugare no ushamwari wakanaka no anhu amweni. Ngo muezaniso, fundirai kuerenga no kutara zvakanaka. Bhaibheri rinoti kuerenga Soko ra Mwari nokunyasa kurangarira mazuwa ese zvinoita kuti munhu akwanise kupfara uye abudirire pa zvese zvaanoita. (Pis. 1:1-3) Kuerenga Bhaibheri mazuwa ese kucamubetserai kuti munyase kuziya marangariro a Djehovha awo acamubetsera kuti murangarire zvakanaka, mugare no ungwaru uye mufundire kuseenzesa mazano e Bhaibheri. (Zvie. 1:3, 4) Ungano inoda hama dzinonyasa kufundisa kuti dzifundise uye dzipase mazano anobva mu Bhaibheri. Kana imwimwi mukaziya kuerenga no kutara zvakanaka, mucakwanisa kugadzirira zvakanaka mharidzo uye kupasa mhinduro dzicabambisa kutenda ke hama no hanzvadzi. Mucakwanisawo kutarira mafundo anokosha acabambisa kutenda kenyu uye no ke amweni. w23.12 mapaji. 26-27 mandi. 9-11

Kana mukazwa kuthya, nyasai kurangarira zvicaizwa na Djehovha mune ramangwana. Gungano ro nyika dzese rakaizwa mu 2014, rakapangidza muezaniso wekuti mhuri imweni yainga yecirangaridza kuti upenyu mu paraizo waizonga wakadini uye iyona yakarangarira kuti 2 Timoti 3:1-5 ingagara kudini no masoko akasiyana ecida kureya ngezve Paraizo: “Asi ziyai kuti mu nyika ipsva mucaoneka nguwa dzinopfadza kudarika dzipi hadzo. Ngokuti anhu acagara anodanana, anoda maningi zviro zve kunamata, asikadadi, anodzidodosa, anonamata Mwari, anozwira abereki, anotenda, akagondeka, ano rudo re kubarhwa naro, anoda kupindirana no amweni, anoreketa zvakanaka ngezve amweni, anodzibata, asikathyisi, anoda zvakanaka, anozwa zvinobhuiwa no amweni, akadzara ngo kudzidodosa, anonyanya kuda Mwari pa mbuto pe mapfaro, anonamata Mwari uye anoita zvinoenderana no kumunamateko; iwewe gara dhuze nawo.” Imwimwi munosocedza no mhuri yenyu kana no hama ngezve upenyu waticazogara nawo mu nyika ipsva here? w24.01 paji. 6 mandi. 13-14

Zvinonyaradza maningi kuziya kuti Djehovha anotendera anhu ake hingana grupu. Bhaibheri rinoti: “Djehovha anopfarira anhu ake.” (Pis. 149:4) Asi nguwa dzimweni akawanda anodzirhya mwoyo otanga kurangarira kuti: ‘Kodi inini ndinokosha kuna Djehovha here?’ Aseenzi a Djehovha akawanda kunyazi e mu nguwa dze Bhaibheri akabatanawo no mazwiro akadaro. (1 Sam. 1:6-10; Djobo 29:2, 4; Pis. 51:11) Bhaibheri rinopangidza pamhene kuti anhu asikazi kukwana angapfadza Djehovha uye kutenderhwa naye. Angazviita kudini? Tinodikana kupangidza kuti tino kutenda muna Djesu uye kubhabhatidzwa. (Juau 3:16) Nge kuita kudaro tinopangidza pamhene kuti tacinyuka zvitema zvedu uye kuti tagondesa Djehovha kuti ticaita kuda kake. (Zvii. 2:38; 3:19) Djehovha anopfara maningi patinoita izvona kuti tikhwedere dhuze kaari. Patinoita zviri zvese kuti tidzadzise mhiko yedu Djehovha acatitendera uye otiona hinga shamwari dze padhuze.—Pis. 25:14. w24.03 paji. 26 mandi. 1-2

Isusu tingateedzera afundi aya ngekurumbwa teciparidzira kunyazi anyautongi ecitirambidza kuti tizviite. Isusu tingagonda kuti Djehovha acatibetsera kuti tiite basa redu re kuparidzira. Hino, namatai mecikumbira ushingi no ungwaru. Kumbirai Djehovha rubetso kuti mukwanise kushingirira matambudziko. Akawanda edu tirikusongana no zvinetso zvo mwiri, zve mu ndangariro, kufirhwa ngo munhu watinoda, migariro inoshupha mu mhuri, kuteererhwa kana kuti dambudziko rimweniwo. Uye zviro zvimweni zvinoita kuti upenyu ubambirire kushupha i hondo no matenda. Hino fungurai mwoyo wenyu kuna Djehovha. Bhuyai zvese zvamuri kusongana nazvo kuita hingana kuti murikucedza no shamwari. Gondai Djehovha uye iyena “acagadzirisa zviro.” (Pis. 37:3, 5) Kurumbwa teciita munamato ndizvona zvicatibetsera kuti “tishingirire pa kutambudzika.” (Aro. 12:12) Djehovha anoziya zvirikuitika no anamati ake—“iyena anozwa kukumbira kawo kubetserhwa.”—Pis. 145:18, 19. w23.05 mapaji. 5-6 mandi. 12-15

Kana tecida kuita cisananguro cinokosha “tinodikana kuzwisisa zvinoda Djehovha” uye toita zvinoenderana nazvo. (Aef. 5:17) Nge kuziya zvokwadi zviri mu Bhaibheri zvinopindirana no mingariro yedu, zvinoita hinga tagumira zvinorangarirhwa na Djehovha ngezve nyaya iyona. Pedzepo patinoseenzesa zvokwadi zvisikacinji zviri mu Bhaibheri tinoita zvisananguro zvakanaka. Sathani “muzondi wedu,” unoda kuti tigare takabatikana nge zviro zve nyika ino uye pakupedzesera, togara tisina nguwa ye kuseenzera Djehovha. (1 Juau 5:19) Asikazwisisi, Mukristu ungatanga kukanda ndangariro dzake pa mare, pa kufunda uye pa basa pane kuseenzesa mukana iwona pakuseenzera Djehovha. Kana izvona zvikaitika zvinonga zvecipangidza pamhene kuti iyena watanga kurangarira hinga anhu e nyika. Zviri pamhene kuti mare, kufunda uye zviro zvekurarama nazvo azvizi kushata. Asi izvona azvimbodikani kugara pa mbuto ye kutanga mu upenyu wedu. w24.03 paji. 24 mandi. 16-17