Petero 2
NO TE HOˈIRAA MAI O TE MESIA I TE HAAVARAA, E TE PAU-ROA-RAA O TE FENUA I MURI AˈE.
3 E au mau here e, te papai atu nei au i te piti o te episetole ia outou i teie nei; ei faaararaa ˈtu i to outou aau haavare ore ia manaˈo: 2 ia manaˈo hoi outou i te parau i parauhia mai e te mau peropheta moˈa i mutaa ihora, e tei haapiihia ˈtu e matou e te mau aposetolo a te Fatu ra a te Ora: 3 ia ite ra outou i teie e ia tae i te mau mahana hopea ra, e itea mai ai te feia tâhitohito, i te haapaoraa i to ratou iho hinaaro, 4 e te parauraa mai e, Teihea te haerea mai no ˈna i parauhia ra? te vai noa nei â hoi te mau mea atoa mai te taotoraa mai â o te feia metua ra, mai te hamaniraa mai â i te matamua ra. 5 Te tia ra hoi ia ratou te haamoe i teie, e na te parau a te Atua i hamani i te raˈi i tahito ra, e te fenua i vai i raro i te miti, e tei araa i nia i te miti: 6 i pohe ai te reira fenua i te ninaraahia e te miti: 7 area te raˈi e te fenua e vai nei, te tapeahia nei ïa e taua parau ra no te auahi ia tae i te mahana haavaraa, i te poheraa o te feia paieti ore ra. 8 Eiaha na ia moe ia outou teie nei parau iti, e au mau here e, hoê â hete i te Fatu te mahana hoê e te matahiti hoê tausani ra; e te matahiti hoê tausani ra, hoê â hete e te mahana hoê. 9 Aore te Fatu i faaroaroa i ta ˈna i parau maira, mai ta te tahi pae i parau ra e, e faaroaroa; e faaoromai rahi râ to ˈna ia tatou, aita roa i hinaaro e ia pohe atu te hoê, ia noaa paatoa râ te tatarahapa. 10 E tae mai râ te mahana o te Fatu mai te eiâ i te rui ra; e pee ê atu ai teie nei raˈi ma te haruru rahi, e mou hoi te mau mea rii tumu i te veavea rahi, e te fenua hoi e te mau ohipa i nia iho, e pau ïa i te auahi. 11 E teie nei, e mou anaˈe taua mau mea atoa nei, mai te aha to outou huru e tia ˈi i te haapao maitai e te paieti; 12 i te tiairaa e te ruraa ˈtu ia tae mai taua mahana o te Atua ra, te mahana e mou ai te raˈi i te tutuihia i te auahi, e e tarapape te mau mea rii tumu i te veavea rahi? 13 Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.
14 E teie nei, e au mau here e, o te reira mau mea ta outou e tiai na, e faaitoito, e haapapu hua ia roohia mai outou e ana ma te hau, ma te porao ore e te hapa ore. 15 E e parau outou i te faaoromai rahi o to tatou Fatu ra e o te ora ïa, mai ta to tatou taeae here ra mai ta Paulo i papai mai ia outou na, i te paari i horoahia mai ia ˈna ra: 16 e tei roto atoa i ta ˈna ra mau episetole te parauraa mai i teie nei mau mea; e e mea imi taiata hoi e tahi pae, ta te feia haapii-ore-hia ra, e te papu ore ra i ruri ê, mai ta ratou i ruri ê i te mau parau â i papaihia ra, e riro atura ei pohe no ratou iho. 17 E tena na, e au mau here, ua ite na outou i teie nei mau mea, e ara ia outou, ia ore outou ia riro i te haavare a te taata iino ra, e hiˈa ihora outou i to outou itoitoraa na. 18 Ia tupu râ to outou i te maitai, e te ite i to tatou Fatu ra i te Ora ia Iesu Mesia. Ei ia ˈna te haamaitai i teie nei, e a muri noa ˈtu. Amene.