June

Jehovah bless Christians for the apostles time because them continue to endure when problem come. Plenty times, people suffer Christians for apostles time, and sometimes na when them no expect-am. Make we talk about wetin happen to Barnabas and Paul when them de preach for Lystra. The day wey them first reach there, the people welcome them well and listen to them. But later, some people wey dey against the preaching work make the people hate Paul and Barnabas and them try use stone kill apostle Paul. (Acts 14:19) But Barnabas and Paul comot from the area and go de preach for other place. Wetin happen? Them “make some people become disciples.” Their example and wetin them talk help other Christians dey strong. (Acts 14:​21, 22) Plenty people gain because Barnabas and Paul no stop to preach even though say people suffer them. So Jehovah go bless us if we no stop to do the work wey e give us. w23.04 16-17 ¶13-14

From when King David dey young, e get plenty enemy wey try to kill-am, so e always pray to Jehovah for help. King David dey sure say Jehovah hear e prayers and answer them. You too fit dey sure of this one. Bible teach us say Jehovah fit give us the sense and power wey we need to endure. Jehovah fit still use our brothers and sisters and some people wey no de worship-am now, help us when we need help. Na true say sometimes, Jehovah fit no answer our prayer the way wey we expect, but we know say e go always answer them. E go give us wetin we need for the time wey we need-am. So, continue to pray and believe say Jehovah go hear your prayer. And dey sure say Jehovah go care for you now and for paradise, e go “give everything wey get life wetin they want.”—Ps. 145:16. w23.05 8 ¶4; 13 ¶17-18

E good to de put our mind for wetin we go gain if we succeed to do wetin we don plan to do. Which blessing you go put for mind wey go move you to fit do wetin you plan? If your plan na to make your Bible reading and prayer better, think about how e go make your friendship with Jehovah strong more-more. (Ps. 145:​18, 19) If your plan na to get some better character, think about how the character go help you be better person to other people. (Col. 3:14) You fit even write all the reason why you want do wetin you plan. And you fit de always check-am. Another thing wey fit help us na to de spend time with people wey fit encourage us to do wetin we plan. (Prov. 13:20) To talk true, sometimes e no de hungry us to do wetin we don plan. When this one happen, e mean say we no go fit do wetin we plan? No. We fit still try our best to do wetin we don plan even when e no de hungry us again to do-am. Even though say e no go easy, you go dey happy when you succeed to do wetin you plan. w23.05 27-28 ¶5-8

When we know say we need to accept anything wey come from the decision wey we make, we go quick confess our sin, correct our mistake and do our best make we no make the mistake again. When we do like that, e go help us continue to run the race for life. If you no go fit change wetin happen because of your bad decision, accept the way things be for you. No de waste your time and de give yourself headache to de try prove say wetin you do correct or de blame yourself or other people. Instead, accept your mistake and do the best wey you fit do now. If wetin you do still de worry you, pray to Jehovah, tell-am your mistake and beg-am make e forgive you. (Ps. 25:11; 51:3, 4) Beg the people wey you offend, and if na wetin elders need to know about, tell them make them help you. (Jas. 5:​14, 15) Learn from your mistake and try make e no happen again. If you do this one, make you dey sure say Jehovah go pity you and give you the help wey you need.—Ps. 103:​8-13. w23.08 28-29 ¶8-9

Jehoiada help Jehoash to be good king. Because of this one, King Jehoash worship Jehovah well when e dey young. But after Jehoiada die, Jehoash start to listen to prince them wey no de worship Jehovah. (2 Chron. 24:4, 17, 18) This one really pain Jehovah, so e send different-different prophets to go warn them, but them no gree listen. Them no even listen to Zechariah wey be Jehoiada pikin. Zechariah no only be prophet, but e still be priest and Jehoash cousin. King Jehoash even kill Zechariah. (2 Chron. 22:11; 24:​19-22) Jehoash no continue to fear Jehovah. Jehovah don talk before say anybody wey no respect-am, e no go value the person. (1 Sam. 2:30) Jehoash get plenty army, but when e go fight war with Syria people wey their army no plenty, them win Jehoash army and wound Jehoash well-well. (2 Chron. 24:​24, 25) After, Jehoash servants kill Jehoash because e kill Zechariah. w23.06 18-19 ¶16-17

Apostle Paul spend some time de preach and teach for Ephesus. (Acts 19:1, 8-10; 20:​20, 21) E love im brothers and sisters well-well, so e want help them continue to hold Jehovah tight. Before, the people for Ephesus wey Paul de write to, be dey lie-lie religion, put trust for magic, and when something happen to them, them believe say no be ordinary. People for Ephesus de do all kind of dirty things and them no de shame to do-am. Them de talk joke about sex for party, even when them de do party to worship their gods. (Eph. 5:3) Many people for Ephesus “no de care again about wetin good or bad.” (Eph. 4:​17-19) Before the Christians for Ephesus learn the truth, their mind no de worry them if them do wetin Jehovah hate. Na this one make apostle Paul describe them as people wey “dey darkness for the way them de think and them no dey part of the life wey God de give.” But some people for Ephesus no continue to stay for darkness. w24.03 20 ¶2, 4; 21 ¶5-6

Na really big work Jehovah give Gideon when e choose-am to lead Israel people. When Gideon and e 300 soldiers attack Midian for midnight, them run, so Gideon and e men pursue them from Valley of Jezreel sotey go reach River Jordan. (Judg. 7:22) Gideon and e men stop when them reach River Jordan? No! Even though say them don tire, them continue to pursue Midian people until them catch Midian people and win them for the war. (Judg. 8:​4-12) Gideon trust Jehovah say E go give-am power, and Jehovah really give Gideon the power wey e need. (Judg. 6:​14, 34) E get one time wey Gideon and e men use leg pursue two king of Midian people wey de use camel run. (Judg. 8:​12, 21) But God help Gideon and e men to fit catch and win them. For the same way, elders fit trust Jehovah as God wey “no de ever tire.” And e go give them power when them need-am.—Isa. 40:​28, 29. w23.06 6 ¶14, 16

We fit stand strong no matter the problem wey we de face. So trust Jehovah. See how Barak win Jehovah enemy because e trust Jehovah. Even though say soldiers for Israel that time no get wetin them fit use protect theirself and fight their enemy for war, Jehovah tell Barak say make e go fight Sisera and e army wey get plenty weapon. (Judg. 5:8) Jehovah use Deborah tell Barak say make e go down from mountain to where ground level, go fight Sisera and e 900 chariot. Even though Barak know say e no go easy for them to fight Sisera and e men wey get plenty chariot if them dey level ground, e still obey Jehovah. As Barak and e men de come down from Mount Tabor, Jehovah make heavy rain fall. This one make potopoto no allow Sisera and e men to fit use their chariots fight, na so Jehovah take make Barak win the war. (Judg. 4:​1-7, 10, 13-16) For the same way, Jehovah go make us succeed if we trust-am and obey wetin e use e organization tell us to do. w23.07 19 ¶17-18

We need to dey patient to fit get life wey no go end. Just like servant of Jehovah for Bible, we need to dey patient as we de wait for Jehovah to do the things wey e promise. (Heb. 6:​11, 12) Bible compare us to farmer. (James 5:7, 8.) Farmer de work hard to plant and put water for wetin e plant, but e no know the time wey e go grow. So the farmer go dey patient as e de wait because e dey sure say e go harvest wetin e plant. Na so e still be with us, we go continue to work hard as we de worship Jehovah even though say we “no know the day wey [our] Lord de come.” (Matt. 24:42) We go continue to dey patient as we de wait because we dey sure say Jehovah go do all the things wey e promise, for the correct time. If we no dey patient, we fit tire as we de wait and start to leave Jehovah small-small. We fit begin look for things wey go make us happy only for this Satan world. But if we dey patient, we go fit endure to the end and get life wey no go end.—Mic. 7:7. w23.08 22 ¶7

When we compare wetin dey Daniel 2:​41-43 with other chapter for the book of Daniel and Revelation, we go fit talk say the feet of the image stand for Britain and America government wey come together to form one world power. And for this our time, na them get power pass for the whole world. Prophet Daniel talk say this world power “go strong for one way and still weak for another way.” Why e still weak? Because the people wey them de rule, wey stand for the clay de make the government weak and no fit use their strong power for some matter. We learn plenty things from the dream about the image wey prophet Daniel explain to King Nebuchadnezzar, and especially about the feet of the image. Number one, the world power wey Britain and America form don show say e strong like iron. For example, even though Britain and America join other country to win World War I and World War II, na them do the main work. But this world power don weak and e go continue to de weak because people wey them de rule de fight against each other and against the government. Number two, na this world power go be the last to rule before God Kingdom go destroy all the government for this earth. w23.08 10-11 ¶12-13

Sometimes, the plenty problem wey David face make-am worry well-well. (Ps. 18:4, 5) Even with this one, the love wey Jehovah show-am and the way Jehovah care for-am, make im mind come down. Na im make David talk say Jehovah lead-am go where “plenty grass dey,” and where “water dey” so that e go fit rest. This one make David get power to fit continue to happy as e de worship Jehovah. (Ps. 18:​28-32; 23:2) For the same way, even with all the problem wey we de face for Satan world, “na because of Jehovah love wey no de fail we still dey alive.” (Lam. 3:22; Col. 1:11) Plenty time, David life dey for danger, and the people wey be im enemy really get power. But because e know say Jehovah love-am, and go protect-am, this one make-am no fear. E dey clear to David say Jehovah dey with-am all the time wey e de face problem, and that one make im mind come down. Na this one make David sing say: “[Jehovah] save me from all my fear.” (Ps. 34:4) Sometimes, David face problem wey really make-am fear, but because e know say Jehovah love-am, this one help-am fit stop to de fear. w24.01 30 ¶15-17

Learn from the bad decision wey Jehoash make. After High Priest Jehoiada die, Jehoash start to follow bad friends. (2 Chron. 24:​17, 18) E decide to de take advice from the prince them for Judah wey no de worship Jehovah. Jehoash suppose run from this kind people. Instead, e listen to their bad advice. Even when im cousin wey be Zechariah try to correct-am, e say make them kill-am. (2 Chron. 24:​20, 21; Matt. 23:35) This one really bad! Jehoash serve Jehovah well when e dey young, but later, e turn against Jehovah and kill im cousin wey be Jehovah prophet. For the end, na im own servants kill-am. (2 Chron. 24:​22-25) If to say e continue to worship Jehovah well and de listen to people wey love Jehovah, im life for no end like that. w23.09 9 ¶6

Jesus know say Peter go continue to hold Jehovah tight. So Jesus tell-am say: “Make you no fear again.” Because Jesus trust Peter, e make Peter change im life. Later, Peter and im brother wey im name na Andrew leave their fisherman work and become Jesus disciple. This one bring plenty blessing to them. (Mark 1:​16-18) Peter enjoy plenty blessing because e follow Jesus. E see as Jesus heal sick people, pursue demons comot from people body and even bring people wey don die back to life. (Matt. 8:​14-17; Mark 5:​37, 41, 42) Another thing be say, e see vision of how Jesus go be when E don become King of God Kingdom and Peter no ever forget this one. (Mark 9:​1-8; 2 Pet. 1:​16-18) Peter for no enjoy this blessings if to say e no follow Jesus. Because Peter no allow the way e de feel about imself stop-am make e no follow Jesus, this one make-am enjoy plenty blessings. w23.09 21 ¶4-5

For the book of first Peter, apostle Peter talk say make we “get deep love” for each other. This kind love de cover “plenty sin,” no be just small number of sin. (1 Pet. 4:8) E fit be say Peter remember wetin Jesus teach-am when e still dey with them, about how to forgive. That time Peter think say e don try if e forgive im brother “reach seven times.” But Jesus answer-am say no be just seven times, but “e go reach 77 times.” This one mean say we no go de count how many times we go forgive. (Matt. 18:21) If e hard you to forgive like this, no let-am tire you because you no dey alone. Sometimes, e no dey easy for us to forgive because we no dey perfect. E really dey important now for you to do your best to de forgive and dey in peace with brothers and sisters. w23.09 29 ¶12

When Jonah dey inside the big fish belle, e dey sure say Jehovah go answer im prayer and say e go help-am. Later, the fish vomit Jonah for dry land and na that time e make up im mind to do the work wey Jehovah give-am. (Jonah 2:10–3:4) When you de face problem, e de hard you to tell Jehovah exactly how you de feel? Or e de tire you to study? Remember say Jehovah understand wetin you de face. So even when you pray short prayer, you fit dey sure say Jehovah go give you wetin you need. (Eph. 3:20) If you de feel bad sotey e de hard you to read and study, you fit try to listen to Bible or our book them wey them don record. Another thing wey fit help you na to listen to our song or watch video for jw.org. As you de pray to Jehovah and de look for answer for Bible and from the things wey Jehovah organization don give us, Jehovah go make you strong. w23.10 13 ¶6; 14 ¶9

Just as the tabernacle get two room for inside, na so e still be for the temple wey them later build for Jerusalem. Them de call the two room “Holy Place” and “the Most Holy” and na curtain divide them. (Heb. 9:​2-5; Ex. 26:​31-33) The things wey dey inside the room wey them de call the Holy Place na, lampstand wey them make with gold, altar wey them take de burn incense, and one table wey them de put showbread. Na only the priests de enter this Holy Place to do the work wey Jehovah give them. (Num. 3:3, 7, 10) And the thing wey dey the room wey them de call Most Holy na, ark of covenant wey show say Jehovah dey with them. (Ex. 25:​21, 22) Na only the high priest fit enter Most Holy once every year, the day wey them de do sacrifice for all Israel people sin. (Lev. 16:2, 17) E go enter the Most Holy with the blood of animal to sacrifice for im own sin and the sin of everybody for Israel. As time de go, Jehovah use im holy spirit help im servants understand wetin this part of the tabernacle, stand for.—Heb. 9:6, 7. w23.10 27 ¶12

For plenty place for Bible, Jehovah tell us say make we “love each other.” (John 15:12; Rom. 13:8; 1 Thess. 4:9; 1 Pet. 1:22; 1 John 4:11) But na for our heart we de love person, and nobody fit see wetin dey our heart. So, how other people fit know say we love them? Na with wetin we de talk and do. Different-different ways dey wey we fit show say we love our brothers and sisters. See some example. “Talk truth with each other.” (Zech. 8:16) “De always make peace dey among una.” (Mark 9:50) Make una “be the first to show honor to each other.” (Rom. 12:10) “De welcome each other.” (Rom. 15:7) “Continue to . . . de forgive each other.” (Col. 3:13) “Continue to help each other when problem dey.” (Gal. 6:2) “Continue to . . . de comfort one another.” (1 Thess. 4:18) “Continue to de . . . make each other strong.” (1 Thess. 5:11) “De pray for each other.”—Jas. 5:16. w23.11 9 ¶7-8

Everyday, we de make decisions wey need say make we get strong faith. For example, we de make decision about the kind friends wey we go get, the kind music and video wey we go listen to or watch, whether we go go university, marry, born children or the kind work wey we go do. E go good make we ask ourself say, ‘My decisions de show say I really believe say this Satan world go soon end and say paradise go soon come? Or I de live my life like people wey no believe say paradise go come?’ (Matt. 6:​19, 20; Luke 12:​16-21) If we make our faith about paradise strong, e go help us make better decisions. Another thing be say, we de face problems wey we need strong faith to endure. For example, they fit de suffer us because of our faith, or we fit get serious sickness or some other problem wey fit make life tire us. When the problem just start, we fit feel say e go easy for us to endure. But many times, this kind problems no de quick go, so we need strong faith to continue to endure and de happy as we de serve Jehovah.—1 Pet. 1:6, 7. w23.04 27 ¶4-5

Jehovah want make we do wetin we fit do to make our prayer work. For example, imagine say you de work for somebody or company, and you need to take time from work to fit go convention. So you pray to Jehovah make e help you. How e fit answer your prayer? E fit give you strong mind to fit go meet your oga and tell-am wetin you want. But you go still need to do some things like, to go meet your oga and tell-am wetin you need. E fit be say you go need to go meet-am plenty times. And you fit even arrange with your workmate make e do your work when you go the convention, so that you go do im own another day or you fit tell your oga say e fit comot the money for the day wey you no work, from your salary. Jehovah want make we pray to-am plenty times about our problem. Wetin Jesus talk show say no be everything wey we pray for, na im Jehovah go do for us at once. (Luke 11:9) So, make you no tire to de beg Jehovah. Make you pray well-well and plenty times. (Luke 18:​1-7) When we continue to pray to Jehovah about something, e mean say we really need the thing. And e still de show say we get faith say Jehovah get power to help us. w23.11 22 ¶10-11

Abraham na Jehovah friend, na im make Jehovah promise-am say e go born pikin wey be boy, and all nations for this earth go get blessing because of the pikin. (Gen. 15:5; 22:18) Because Abraham get strong faith, e believe say wetin Jehovah promise-am go happen. But even when Abraham dey 100 years and im wife Sarah dey 90 years, them never still get the pikin. (Gen. 21:​1-7) Even with this one, Bible talk say: “Because of [im] hope, e get faith say e go be papa of many nations as God don promise.” (Rom. 4:18) We know say wetin Abraham hope for, happen. E born Isaac, wey be the pikin wey e don de hope for. Why Abraham dey sure say Jehovah go do wetin e promise? Because Abraham get better friendship with Jehovah, this one make-am “really dey sure say God” go do wetin e don promise-am. (Rom. 4:21) Jehovah happy with Abraham because of im faith and call-am righteous person.—Jas. 2:23. w23.12 8 ¶1-2

Young brother wey no de play with im work, de use all im heart do im work. Make we see the example of Jesus. Jesus na serious person wey no de play with im work. E do the work wey Jehovah give-am even when e no easy for-am. E love people, na im make-am die for them. (John 13:1) Do your best for any work wey them give you. This one go show say you de copy Jesus example. If you no sabi do the work, make you no shame to talk say you no sabi-am and beg any mature brother make e show you how to do-am. Make you no de tell yourself say, ‘at-all at-all na im bad.’ (Rom. 12:11) Instead, do the work with all your heart and finish-am. Do-am for Jehovah, no be for people. (Col. 3:23) The truth be say you no dey perfect, so no do pass where your power reach, and when you make mistake, no deny-am or try to hide-am.—Prov. 11:2. w23.12 26 ¶8

We de happy when we baptize and join Jehovah family. Na special honor we get to be Jehovah friend. Wetin David talk na really true when e talk say: ‘Person wey you choose and wey you carry near you to come stay for your temple go dey happy.’ (Ps. 65:4) No be just anybody Jehovah de allow join im family. Jehovah de near people wey show say them want be im friend. (Jas. 4:8) When you give your life to Jehovah and baptize, you fit dey sure say after you don baptize, Jehovah go “pour blessing give [you] until nothing go dey wey [you] de lack.” (Mal. 3:10; Jer. 17:8) When you baptize, you just de start. You go continue to do your best to do wetin you promise Jehovah as you give-am your life, and continue to hold-am tight no matter wetin happen. (Eccl. 5:4, 5) As Jesus disciple, you go do your best to follow Jesus example and obey im command.—Matt. 28:​19, 20; 1 Pet. 2:21. w24.03 8 ¶1-3

Wetin you go do if you and your husband or wife no de enjoy to spend time together? Wetin fit help you? Think about fire. Fire no go start to catch well-well when you just light-am. You go need to de add firewood small-small to the fire to make-am catch more. As time de go, you go de put big-big firewood for the fire. Na the same thing una fit do, una fit start to spend small time together every day. And when una want spend time together, make una do wetin two of una go enjoy. (Jas. 3:18) When una start small-small, una go see say una love fit start to grow again. Respect really dey important for marriage. E just be like the air wey de make fire burn well-well. If air no dey, the fire go quick quench. Na so e still be, if husband and wife no de respect each other, their love go quick die. But if husband and wife de respect each other, their love go continue to grow. Make you put-am for mind say this one no be whether you think say you de respect your husband or wife, but na if your husband or wife feel say you de respect-am. w23.05 22 ¶9; 24 ¶14-15

For Bible, we get plenty servants of Jehovah wey talk about how their enemy them or other things make them fear. (Ps. 18:4; 55:1, 5) For this our time, people fit dey against us for school, where we de work, for our family, or government fit de suffer us because we de worship Jehovah. We fit de fear say we go die because we de sick. When this kind things de happen to us, we fit feel like small pikin wey no know how to help imself. How Jehovah de help us when we de face this kind problem? E de comfort us and make our mind come down. So, always spend time with Jehovah. How? Always pray to-am and read Bible. (Ps. 77:1, 12-14) If na so you de do, na Jehovah go be the first Person wey you go run to when you get problem. Tell Jehovah wetin de make you fear and wetin de worry your mind. Make you de read Bible to show say you de listen to-am as e de talk to you and you go see how e de comfort you. —Ps. 119:28. w24.01 24-25 ¶14-16

E dey important make you de put mind for things wey go help you do wetin you plan. Na this kind things go move you fit do wetin you plan. The more we get things wey de move us to do wetin we plan, the more we go fit do wetin we plan. So wetin you go do so that you go get more things wey go make you want do as you plan? Pray make Jehovah help you make e de hungry you to do wetin you plan. Jehovah fit use e holy spirit move you to fit do wetin you don plan. Sometimes, we de make plan to do something wey we know say we suppose do and this one really good. But as time de go, e fit no dey our mind again to do wetin we don plan. Think deep about wetin Jehovah don do for you. (Ps. 143:5) Apostle Paul think deep about the special favor wey Jehovah show-am, and this one move-am to work more for Jehovah. (1 Cor. 15:9, 10; 1 Tim. 1:​12-14) Na so e go still be for you. The more you de think about wetin Jehovah don do for you, the more e go de hungry you to do wetin you plan.—Ps. 116:12. w23.05 27 ¶3-5

We de make our Papa for heaven happy when we praise im name. (Ps. 119:108) This one mean say Jehovah be like Person wey want make people de praise-am before e go know say e de do wetin correct? No. Another thing be say, when we praise our Papa for heaven, we de show say wetin Satan talk about each of us na lie. Satan talk say nobody for this earth go ever hold Jehovah tight when them face serious problem. Wetin Satan mean be say, nobody go continue to worship Jehovah when e face serious temptation. E talk say we go leave Jehovah if we think say that one go make our condition better. (Job 1:​9-11; 2:4) But Job hold Jehovah tight and show say Satan na liar. What about you? Each of us get the honor to choose to continue to worship Jehovah even when we de face problem. This one go show say we de praise Jehovah name, and e go make Jehovah happy. (Prov. 27:11) This na really big honor for us. w24.02 8-9 ¶3-5

After Moses and Joshua, Jehovah use judges direct im people. Later, for the time of the kings, Jehovah use prophets direct im people. And the kings wey love Jehovah, follow the prophets advice. For example, King David show say e carry body down as e accept correction from prophet Nathan. (2 Sam. 12:7, 13; 1 Chron. 17:3, 4) King Jehoshaphat follow direction from prophet Jahaziel, and tell Judah people say make them put “faith for [God] prophets.” (2 Chron. 20:​14, 15) When King Hezekiah dey for serious problem, e meet prophet Isaiah make e advice-am. (Isa. 37:​1-6) Any time wey the kings follow direction from Jehovah prophet, Jehovah bless them and protect them. (2 Chron. 20:​29, 30; 32:22) E dey clear to everybody for Israel say Jehovah de use im prophets direct im people. w24.02 21 ¶8

Satan want make we make friend with people wey go make-am hard for us to worship Jehovah well. We need to remember say the people wey be our friend no be only the people wey we de see face to face. Even people wey we de talk to for Internet na our friend. We need to dey careful, make we no let this world make us believe say dirty life good. We know say that kind life no good at all. (Eph. 4:​19, 20) So, make we ask ourself this questions: ‘I de do my best make I no de spend time with people wey I de work with, my school mate or anybody wey no de follow Jehovah law? I de use strong mind do wetin Jehovah want, even when people talk say my own too much?’ As e dey for 2 Timothy 2:​20-22, we still need to dey careful when we de choose friends even for inside congregation. Make we get-am for mind say no be everybody go help us to fit serve Jehovah well. w24.03 22-23 ¶11-12

You don ever imagine how Jehovah be? Even though say we no de see Jehovah, Bible use different-different things describe Jehovah. E call Jehovah “sun and shield” and “fire wey de burn something finish.” (Ps. 84:11; Heb. 12:29) Prophet Ezekiel describe Jehovah as iron wey de shine well-well, and say e sitdown ontop throne wey be like fine stone wey them de call sapphire, and rainbow surround-am. (Ezek. 1:​26-28) Because we no de see Jehovah, e fit hard us to believe say e love us. Some people think say Jehovah no go ever fit love them because of the bad things wey don happen for their life. Jehovah understand how them de feel and how e de affect them. Na im make Jehovah tell us for Bible the kind God wey e be, say e get deep love for us. The best word wey we fit ever use describe Jehovah, na love. (1 John 4:8) Na im make Bible talk say “God na love.” Na love de move-am to do everything wey e de do. Jehovah love deep well-well, na im make-am de show love even to people wey no love-am.—Matt. 5:​44, 45. w24.01 26 ¶1-3

Jehovah choose Moses to lead Israel people comot from Egypt. And e make-am dey clear say na im de direct them, as e use pillar of cloud for day time, and pillar of fire for night. (Ex. 13:21) Moses follow the pillar and e lead them to the Red Sea. But Egypt people start to pursue them. So, Israel people begin fear say Egypt people go catch them and kill them. But no be mistake, na Jehovah use Moses lead them go there. (Ex. 14:2) And God save them from Egypt people hand. (Ex. 14:​26-28) For 40 years, Moses continue to follow the pillar of cloud as e de direct Jehovah people for wilderness. (Ex. 33:7, 9, 10) When Jehovah talk to Moses from the pillar of cloud, Moses go carry the message go give Israel people. So them get plenty reason to believe say na Moses Jehovah de use direct them. w24.02 21 ¶4-5