July

Jesus copy the way e Papa de think and feel for everything wey e talk and do, even for the miracles wey e do. (John 14:9) Wetin we fit learn from the miracles wey Jesus do? Jesus and e Papa really love us. When Jesus dey this earth, e use im power help people wey de suffer, this one show say e really love people. One time, two men wey blind beg-am make e help them. (Matthew 20:​30-34.) Bible talk say “Jesus feel pity for them” and heal them. The Greek word wey them translate as “feel pity,” describe the strong feeling wey person de feel when e see person wey de suffer. Na this kind strong feeling, wey show the kind love wey Jesus get for people, make Jesus do miracle to give people food and heal one man wey get leprosy. (Matt. 15:32; Mark 1:41) We dey sure say when we de suffer, e de pain Jehovah wey be the God wey de “show pity,” and e Son wey really love us. (Luke 1:78; 1 Pet. 5:7) True-true, e really de hungry them to remove all the problem wey de make us suffer! w23.04 3 ¶4-5

We fit try our best make we no read or listen to any bad idea wey Satan de spread for this world. We fit try to put wetin good for our mind when we de read and study Bible. Another thing wey fit still help us na to de preach and attend meetings. And Jehovah don promise us say e no go allow us face any temptation wey pass our power. (1 Cor. 10:​12, 13.) All of us need to de pray now pass before say make Jehovah help us to fit hold-am tight for this last days wey things really hard. Jehovah want make you tell-am everything wey dey your mind. (Ps. 62:8) Praise Jehovah and thank-am for wetin e de do. Beg-am make e give you strong heart to de preach and make e help you to fit endure any problem and temptation wey you de face. No allow anything or anybody stop you to de pray to Jehovah. w23.05 7 ¶17-18

Why we de attend meeting? The number one reason na to praise Jehovah. (Ps. 26:12; 111:1) Another reason na to encourage each other for this hard time. (1 Thess. 5:11) When we answer question for meeting, we de praise Jehovah and encourage our brothers and sisters. But some things fit make-am hard for us to answer question for meeting. E fit be say our heart de cut when we want answer question or we fit like to answer question plenty time, but the brothers wey de handle the different-different part fit no call us the way we for like. Wetin fit help us? Apostle Paul tell us say make we put mind to ‘encourage each other.’ When we know say other people go gain when we answer question, e go make-am easy for us to raise our hand to answer question. And if they no call us plenty time as we for like, make we still happy say other people for congregation get the chance to answer question.—1 Pet. 3:8. w23.04 20 ¶1-3

After the new king start to rule, e make one special announcement. Israel people wey don dey Babylon as slave for 70 years, don free now and them fit go back to their country wey be the land of Israel. (Ezra 1:​2-4.) Na only Jehovah fit make this kind thing happen. Na because Babylon people no de release people wey them catch as slave. (Isa. 14:4, 17) But another country don take over Babylon, so the new king tell Israel people say them fit go back to their country. All Israel people, especially family head, get serious decision to make: whether them go go back to the land of Israel or stay for Babylon. This decision fit no easy for them. Many of them don old, so this one make them no fit go back. Another thing be say, since na for Babylon they born plenty of the people, them never stay for another place before. So to them, the land of Israel na their papa-papa land no be their own. Some Israel people for Babylon don do business and get plenty money, this one fit don make-am hard for them to leave their fine-fine house or business and go de stay where them never go before. w23.05 14 ¶1-2

Bible de encourage us make we continue to show pity, de endure and get strong love more-more. Luke 21:19 talk say: “If una endure, una go save una life.” Colossians 3:12 talk say: ‘Make una get deep. . . pity]’ for one another. And 1 Thessalonians 4:9, 10 talk say: “God de teach una to love each other. . . . But brothers, we de encourage una to continue to do-am more-more.” Them write this Bible verse them to Christians wey don already de endure, de show pity and get strong love for each other. But they need to continue to show-am more-more. You too need to continue to show this better-better character more-more. To fit do this one, make you see how Christians for apostles time show this better-better character. Then you go see how you fit copy their example and show say you don ready for great tribulation. When the great tribulation start, you go don learn how to endure and make up your mind say you go endure. w23.07 3 ¶4, 8

Whether we be anointed or “other sheep,” all of us need to continue to waka for that road. This one go help us continue to worship Jehovah go reach when God Kingdom go bring paradise for this earth. (John 10:16) Since 1919, plenty people; men, women, and children don free from Babylon the Great wey be all lie-lie religion for the whole world and don start to waka for “the Holy Road.” When Israel people comot from Babylon, Jehovah make sure say e remove anything wey fit block road for them. (Isaiah 57:14.) What about “the Holy Road” for this our time? Plenty years before 1919, Jehovah use people wey love-am prepare the road wey people go pass comot from lie-lie religion. (Compare Isaiah. 40:3.) The work wey them do help people wey want worship Jehovah fit comot from lie-lie religion and start to worship Jehovah with e people. w23.05 15-16 ¶8-9

Jehovah want make we de happy as we de use all our heart serve-am. (2 Cor. 9:7) So when e no de hungry us again to do wetin we don plan to do for Jehovah, e good make we continue to do wetin we plan? Make we see the example of apostle Paul. E talk say: “I de train my body, and de control-am as slave.” (1 Cor. 9:​25-27) Paul force e self to do wetin correct even when e body no want-am. Jehovah happy with wetin Paul do? Yes! And Jehovah even bless-am. (2 Tim. 4:7, 8) Just as Jehovah happy with apostle Paul, e go happy with us if we continue to do wetin we plan for im work even when e no de hungry us again to do-am. Jehovah go happy with us because e know say na the love wey we get for-am de make us do wetin we plan, no be just because we love wetin we de do. And Jehovah go bless us as e bless apostle Paul. (Ps. 126:5) As we de see the way Jehovah de bless us, e go start to hungry us again to do wetin we plan. w23.05 29 ¶9-10

Apostle Paul compare people wey no go survive the day of Jehovah to people wey de sleep. People wey de sleep no de know how things de be around them or say time don go. So because them de sleep, them no de know when important things de happen and this one no de make them fit do anything about-am. For matter wey concern the day of Jehovah, e just be like say plenty people de sleep. (Rom. 11:8) Them no believe say the things wey de happen for this “last days” de show say great tribulation go soon come, and say Jehovah go soon destroy wicked people. (2 Pet. 3:3, 4) But with wetin Bible don talk, we know say as each day de pass, the day of Jehovah de near more-more. (1 Thess. 5:6) So we no need to de overworry. Why? Na because when we de worry, e fit make us want put hand for politics matter and other things wey concern this world. As the end of Satan world de near more-more, things wey go de happen for this world go want force us to put hand for politics matter. Even with this one, we no need to overworry ourself about how we go handle this kind matter. Holy spirit go fit help us dey calm, use our sense well, and make better decision.—Luke 12:​11, 12. w23.06 10 ¶6-7

Wetin de come your mind when you think about Samson for Bible? You fit de think about the kind power wey e get. Na true say e really get power, but e make one bad decision wey make-am suffer. Even with this one, Jehovah put mind for the better things wey Samson do to worship-am and e make sure say them write-am for Bible so that we go learn from-am. Jehovah use Samson help Israel people. Plenty years after Samson die, Jehovah use apostle Paul write im name join the name of people wey worship Jehovah with all their heart. (Heb. 11:​32-34) We fit learn plenty things from Samson example. E trust Jehovah even when things really hard. We go fit learn important lesson from Samson example. w23.09 2 ¶1-2

Wetin go help us to fit endure na when we de pray to Jehovah every time, and de tell-am everything wey de worry us. (1 Thess. 5:17) E fit be say you no de face serious problem now. But you de pray to Jehovah when person make you vex or when you no know wetin to do? If you de always pray to Jehovah when you de face small-small problem now, e go easy for you to fit pray when you get serious problem for future. Then you go trust say Jehovah know the best way and the best time to help you. (Ps. 27:1, 3.) If we de endure problems wey we de face now, e go help us to fit endure problems wey we go face for great tribulation. (Rom. 5:3) Why we talk like that? Plenty of our brothers and sisters don see say if them endure problem, e de help them fit endure the one wey go come later. When Jehovah help them to fit endure problem, e de make their faith strong say Jehovah always ready to help them. And because them put faith for Jehovah, this one de help them fit endure any problem wey them face.—Jas. 1:​2-4. w23.07 3 ¶7-8

As Jehovah de carry body down and de feel for people, this one de make-am ready to adjust. Jehovah show say e really de carry body down the time wey e want destroy Sodom and Gomorrah. Jehovah use im angels tell Lot say make e and im family run go the area wey mountains dey. But Lot de fear the area. So e beg Jehovah say make e allow-am and im family run go Zoar. And Jehovah don decide say e go destroy Zoar. Jehovah get the power to tell Lot say e must do wetin E don tell-am, but Jehovah no do like that, e allow Lot run go Zoar. This one mean say Jehovah no go destroy Zoar again. (Gen. 19:​18-22) Plenty years later, Jehovah show say e de feel for people when e forgive the people of Nineveh. Jehovah send prophet Jonah say make e go tell Nineveh people say E go destroy them and their city, because of their wicked life. But when the people repent, Jehovah pity them and e no destroy them again.—Jonah 3:1, 10; 4:​10, 11. w23.07 21 ¶5

Wetin we fit learn from Jehoash example? Jehoash just be like tree wey them use stick support because e root no strong for ground. Na Jehoiada be like the stick wey support Jehoash. But after Jehoiada die, Jehoash leave Jehovah because e start to listen to people wey don stop to worship Jehovah. This example show say we suppose fear Jehovah, no be only because people for our family or congregation de do-am. To fit continue to hold Jehovah tight, we must continue to make our love and respect for-am strong more-more. To fit do this one, we need to always study Bible, think deep about wetin we learn, and de pray. (Jer. 17:7, 8; Col 2:6, 7) Wetin Jehovah want from us no be wetin we no go fit do. In fact, Ecclesiastes 12:13 tell us wetin Jehovah want from us, e talk say: “Fear the true God and follow e law, because this na the whole thing wey person suppose do.” When we de fear God, we go fit stand well when we face problem for future wey go test our faith. And nothing go fit spoil our friendship with Jehovah. w23.06 19 ¶17-19

The first part of verse 5 talk say: “The Person wey sitdown for the throne talk say.” (Rev. 21:5a) This words really dey special because na only three times Jehovah talk by imself for the vision wey apostle John write for the book of Revelation, and this na one of them. So na Jehovah give us this hope by imself, e no use angel or even Jesus Christ! This one show say we fit trust the next thing wey e talk with all our heart. Why we talk like that? Na because, Jehovah “no fit lie.” (Titus 1:2) This one mean say wetin dey Revelation 21:5, 6, must happen. Think about this word, “See!” Them use the Greek word wey them translate as “see!” plenty times for the book of Revelation. Wetin be the next thing wey Jehovah talk? E say: “I de make everything new.” Na true say wetin Jehovah de talk about, na wetin go happen for future, but because e sure say e must do-am, e talk about-am like say e don de do-am already.—Isa. 46:10. w23.11 3-4 ¶7-8

Apostle Peter make mistakes. See some example. When Jesus de tell im disciples say e go suffer and die as them don write-am for Bible, Peter take-am go one corner and begin tell-am say make e no de talk like that. (Mark 8:​31-33) Many times, Peter and the other apostles argue among theirself about who big pass. (Mark 9:​33, 34) When people come arrest Jesus the night before e die, Peter attack one man and cut im ear comot. (John 18:10) That same night, Peter deny Jesus three times because e de fear. (Mark 14:​66-72) This one make Peter cry well-well. Jesus no leave Peter even though say e make plenty mistake. After Jehovah bring Jesus back to life, Jesus give Peter chance to show im love for-am. E give Peter work to care for im sheep. (John 21:​15-17) And Peter accept the work. And e dey among the first people wey receive holy spirit for Jerusalem for Pentecost for the year 33 C.E. w23.09 22 ¶6-7

Apostle Peter tell elders say, “like shepherd, make una care for God sheep.” (1 Pet. 5:​1-4) If you be elder, we know say you love your brothers and sisters and you like to care for them. But sometimes, you fit tire or get plenty things to do and this one fit make-am hard for you to care for congregation well. Wetin you fit do? Tell Jehovah how you de feel. Apostle Peter write say: “If anybody de help other people, make e do-am with the power wey God de give.” (1 Pet. 4:11) Na true say na only God Kingdom go fit comot some of the problems wey our brothers and sisters de face. But remember say, Jesus Christ wey be the “main shepherd,” fit help them pass the way you fit help them. And e go help them now and for paradise. Wetin Jehovah want make elders do na to love their brothers and sisters, care for them, and “be example for the sheep.” w23.09 29-30 ¶13-14

Make we no de think like people for this world. If we de think like people wey no value Jehovah law, we go start to do things like them and we no go obey Jehovah law again. (1 Cor. 3:19) The way people de think and do things for this world, de make people no de obey God. Some brothers and sisters for Pergamum and Thyatira follow the bad example of people wey dey around them wey de worship idol and do sex wey no clean. Jesus give the two congregations strong correction because them no de do anything to people wey do sex wey no clean. (Rev. 2:​14, 20) For this our time, people for Satan world de try to make us de do like them. Our family members and other people fit tell us say make we try de enjoy ourself and want make we do wetin Jehovah no like. For example, them fit talk say Bible na old school so e no matter if we do sex wey no clean for God eye. Sometimes, we fit de think say the things wey Jehovah say make we do, no clear finish. If we no dey careful, this one fit make us want do “pass the things wey them don write.”—1 Cor. 4:6. w23.07 16 ¶10-11

Mary need strong mind to fit do the work wey Jehovah give-am. E never marry, but the angel tell-am say e go get belle. E never get pikin before, but the angel tell-am say e go care for the pikin wey go later be the Messiah. And since e never sleep with man before, how e go take explain all this one to Joseph wey go soon become im husband? (Luke 1:​26-33) Wetin Mary do wey help-am get strong mind? E look for help from other people. For example, e ask angel Gabriel make e tell-am more about the work. (Luke 1:34) Small time after Mary talk with the angel, e travel “go one city for Judah for the area wey mountains dey” to visit Elizabeth wey be im relative. And Jehovah use Elizabeth tell-am plenty things wey go happen to the pikin and e praise Mary well-well. All this one really encourage-am. (Luke 1:​39-45) Mary talk say, Jehovah “don use im hand do powerful things.” (Luke 1:​46-51) Jehovah use angel Gabriel and Elizabeth to encourage Mary. w23.10 14-15 ¶10-12

Jehovah don use holy spirit anoint some of Jesus disciples and this one make them special children to Jehovah. Them be 144,000 people and them go be priest with Jesus for heaven. (Rev. 14:1) The part for the tabernacle wey them de call Holy Place, stand for the favor wey God show them as e choose them as im children when them still dey this earth. (Rom. 8:​15-17) The part of the tabernacle wey be Most Holy stand for heaven, where Jehovah dey. “The curtain” wey divide Holy Place and Most Holy stand for Jesus body when e dey this earth, wey make-am no fit enter heaven as great High Priest of Jehovah wonderful temple. As Jesus sacrifice imself, e no come get human being body again. This one open way for all anointed Christians to fit go heaven. But for them to fit go heaven, them must die so that Jehovah go bring them back to life as spirit and them no go get body like us again.—Heb. 10:​19, 20; 1 Cor. 15:50. w23.10 28 ¶13

When Ephraim people talk bad about Gideon, e no quarrel with them because e know say e no dey perfect. (Judg. 8:​1-3) E no use vex answer them. E show say e carry body down as e listen to them when them de complain, and e use sense calm them down. Elder fit show say e de do e best to copy Gideon example when e use sense sofri listen and answer for kind way when people talk bad about-am. (James 3:13.) This one de make peace dey congregation. When people praise Gideon because e win Midian people, e give the praise to Jehovah. (Judg. 8:​22, 23) How elders fit follow Gideon example? Make them de praise Jehovah for the things wey them do. (1 Cor. 4:6, 7) For example, if them praise elder because e sabi give talk well, the brother fit praise Jehovah as e de use Bible and e organization teach all of us. Sometimes, elders need to check whether the way them de teach na to honor Jehovah or na to make people praise them. w23.06 4 ¶7-8

If we no get wetin we de pray for, we fit ask ourself this questions. The first one na, ‘I de pray for the correct thing?’ Plenty times, we de think say we know wetin better pass for us. But wetin we de pray for, fit no be the best thing for us. When we pray and tell Jehovah how we want make e solve our problem, e fit be say the one wey Jehovah get for mind, better pass the way we want make e answer-am. And some things wey we pray for, fit no be wetin Jehovah want. (1 John 5:14) For example, make we talk about one papa and mama wey beg Jehovah make e keep their pikin for the truth. You think say this na the correct thing to pray for? Your answer fit be yes! But the truth be say, Jehovah no go force anybody to worship-am. E want make all of us, even our pikin them, choose by ourself to worship-am. (Deut. 10:​12, 13; 30:​19, 20) So the correct thing wey them suppose pray for na, make Jehovah help them fit teach their pikin the way e go touch im heart and make-am love Jehovah and become Im friend.—Prov. 22:6; Eph. 6:4. w23.11 21 ¶5; 23 ¶12

Why we fit talk say to de comfort our brothers and sisters, na one better way to show say we love them? One book wey them write about Bible talk say, the word wey Paul use, wey them translate as comfort, mean “to stand near person wey get serious problem to fit encourage-am.” So, when we comfort brother or sister wey de suffer, we de help-am to fit continue to worship Jehovah. We still de use-am show say we love-am. (2 Cor. 7:6, 7, 13) Na when we de feel pity for people, we go fit comfort them. Why we talk like that? Person wey de feel pity for people de like to comfort them and do something to help them. So, to de feel pity for person de help us fit comfort the person. Apostle Paul explain say Jehovah de comfort people because E de feel pity for them. Na im make Paul talk say Jehovah na “Papa wey de really show pity and the God wey de give all kind of comfort.”—2 Cor. 1:3. w23.11 9-10 ¶8-10

All of us wey de worship Jehovah know say we go face problems. Make we talk about apostle Paul example. E tell the Christians for Thessalonica say: “When we dey with una, we de tell una before e happen say we go suffer, and na so e happen.” (1 Thess. 3:4) And e tell the brothers for Corinth say: “My brothers, we want make una know about the suffer wey we face . . . and we no even dey sure about our life at all.” (2 Cor. 1:8; 11:​23-27) We wey de serve Jehovah today suppose get-am for mind say we go face problems. (2 Tim. 3:12) Your friends and family people fit de treat you for bad way because you de serve Jehovah. Or, e fit be say your oga for work or your workmate de treat you anyhow because you no want join them for the bad things wey them de do. (Heb. 13:18) Or, e fit be say government people de suffer you because you de preach about the hope wey you get. No matter the kind problem wey you de face, apostle Paul talk say make we de happy. w23.12 10-11 ¶9-10

Jacob face plenty problems. Two of Jacob son wey their name na Simeon and Levi do wetin fit spoil their family and Jehovah name. Ontop this one, Rachel die when e de born e second pikin. And because of serious hunger wey happen, Jacob pack go Egypt when e don old. (Gen. 35:​16-19; 37:28; 45:​9-11, 28) Even with all this problem wey Jacob face, e continue to put faith for Jehovah and Im promise. And Jehovah show say e dey with Jacob. For example, Jehovah bless Jacob with many property. And just think how Jacob go don thank Jehovah as e meet Joseph again after many years wey e think say Joseph don die. Na because Jacob love Jehovah well-well, make-am fit endure all this problem. (Gen. 30:43; 32:9, 10; 46:​28-30) If we hold Jehovah tight, we go fit endure when we de face problem wey we no expect. w23.04 15 ¶6-7

Psalm 23 na song wey David use show say e trust say Jehovah love-am and e de care for-am. David use-am describe the strong friendship between e and Jehovah wey be im shepherd. David no fear to allow Jehovah direct-am, and e trust Jehovah with all im heart. David know say Jehovah go love-am everyday of im life. Wetin make David dey sure say Jehovah love-am? David no ever feel say e lack wetin e need. Why? Na because Jehovah always give-am the things wey e need. Another thing be say, David enjoy better friendship with Jehovah and e know say Jehovah happy with-am. Na this one make David dey sure say no matter wetin happen to-am for future, Jehovah go continue to care for-am and give-am wetin e need. So, because David trust say Jehovah love-am and say e go care for-am, this one make-am de happy for wetin e get, instead to de worry.—Ps. 16:11. w24.01 29 ¶12-13

Since the time of World War II, Jehovah people de preach for different-different country wey people no de disturb them. In fact, Jehovah people de preach for everywhere for this earth and this one don help plenty people to fit learn about Jehovah. For this our time, Governing Body continue to allow Jesus direct them. Them want make wetin them tell brothers and sisters for congregation be the way Jehovah and Jesus de see things. And them de use circuit overseers and elders to give direction to brothers and sisters for congregation. Anointed elders and even elders wey no be anointed, dey for Jesus “right hand.” (Rev. 2:1) This elders fit make mistake because them no dey perfect. Moses, Joshua and even the apostle them make mistake sometimes. (Num. 20:12; Josh. 9:​14, 15; Rom. 3:23) Even with this one, Jesus still de use the faithful slave and the elders for congregation to direct us. And e go continue to use them. So we get better reason to trust the directions wey Jesus de use the faithful slave and the elders give us. w24.02 23-24 ¶13-14

For this our time, we fit make Jehovah happy when the way we de talk about-am show say we love-am and value wetin e de do for us. When we de preach to people, make we always remember say the main reason why we de preach to them be say, we want help them de see Jehovah the way we de see-am. (Jas. 4:8) We de happy to show people how Bible describe Jehovah, how e talk about im love, the way e de judge, im sense, power and other better-better character. We still de praise Jehovah when we do our best to copy im example. When we do like this, we de show say we dey different from people for this world. People fit see-am, and want know why we dey different. (Matt. 5:​14-16) When we de do things with them, we fit get the chance to explain to them why we dey different. And this one fit make people wey get good heart want know Jehovah. When we praise Jehovah like this, e de make-am happy.—1 Tim. 2:3, 4. w24.02 10 ¶7

Young brother wey want become mature Christian need to learn how to do some things. This things wey you learn go help you handle your work for congregation well, help you get work and fit do-am well, and to fit care for yourself and your family. E go still help you enjoy better friendship with people. For example, learn how to read and write. Bible talk say person wey de read God Word everyday and de think deep about wetin e read, go happy and succeed. (Ps. 1:​1-3) When you read Bible everyday, you go know the way Jehovah want make you de think, this one go help you de think for the correct way and de think well. (Prov. 1:3, 4) We need brothers wey go fit use Bible teach us well and give us better advice. If you sabi read and write, e go help you fit prepare your talk well and answer question for meeting for way wey go make the faith of brothers and sisters strong. E go still help you fit write things wey you fit use encourage other people and make your faith strong. w23.12 26-27 ¶9-11

When you de fear, think deep about wetin Jehovah go do for future when Satan no go dey again. For one demonstration wey them do for 2014 convention, one brother discuss with im family about how wetin 2 Timothy 3:​1-5 talk go dey different if e de talk about Paradise. E talk say: “For Paradise, people go really de happy. Because people go love each other, people go love the truth, no go de do pass where their power reach, no go de carry shoulder up, them go love God, go de obey their papa and mama, go de talk thank you, go hold their friends tight, them go get human feeling well-well, them go de follow agreement wey them make, de talk good things about people, control theirself, gentle for heart, love to do good things, them no go turn against their friends, them no go de do strong head, them go de bring theirself down, them go love God pass enjoyment, them go de show-am for the way them de live their life say them de worship God well, and make you hold this kind people tight.” You de discuss with your family members or brothers and sisters how life go be like for Paradise? w24.01 6 ¶13-14

E really de sweet us to know say Jehovah de happy with us. Bible talk say: “Jehovah dey happy with im people.” (Ps. 149:4) But sometimes, because of the problem wey some of us de face, we fit de ask ourself say, ‘Jehovah de happy with me?’ Many people wey worship Jehovah well for Bible, feel like that sometimes. (1 Sam. 1:​6-10; Job 29:2, 4; Ps. 51:11.) Bible make-am clear say even though say we no dey perfect, we fit make Jehovah happy. How we fit do this one? We must show say we put faith for Jesus sacrifice and baptize. (John 3:16) This one go show people say we don repent, and we don promise Jehovah say we want use all our life do wetin e want. (Acts 2:38; 3:19) Jehovah de happy with us well-well when we do this things to fit be im friend. If we continue to do our best to live our life the way Jehovah want just as we promise-am, e go continue to happy with us and see us as im tight friend.—Ps. 25:14. w24.03 26 ¶1-2

We go fit copy the example of Jesus disciples when we continue to preach even if government talk say make we stop to preach. We fit dey sure say Jehovah go help us fit continue to de preach. So pray make Jehovah give you strong mind and deep sense. Another thing be say, make you beg Jehovah make e help you fit endure when you get problem. Many of us get problem wey we de endure, the problem fit be sickness, person wey we love die, family problem, they fit de suffer us because we de worship Jehovah, or some other problem wey fit make us no happy. Things like disease wey de spread and war don make-am hard more-more for people to fit endure their problems. So make you use all your heart pray to Jehovah and tell-am how things be for you the way you go tell your tight friend. Make you know say Jehovah “go help you.” (Psalm 37:3, 5) When we de always pray, e go help us fit “endure when [we] de suffer.” (Rom. 12:12) Jehovah know all the problem wey e servants de face. “E de hear as them de beg make e help them.”—Ps. 145:​18, 19. w23.05 5-6 ¶12-15

When we want make any important decision, we need to first “understand wetin Jehovah want” and then use wetin we learn make better decision. (Eph. 5:17) When we de look for advice for Bible wey fit help us for our condition, e mean say we de look for wetin Jehovah think about wetin we want do. And, when we follow the advice for Bible, we go fit make better decision. Satan “na wicked person,” e want make we use all our time de do things wey people for this world de do, sotey we no go get time to serve Jehovah. (1 John 5:19) Servant of Jehovah fit start to de put mind for money, school matter, or work, instead make e put mind for how e go fit worship Jehovah well. If e happen like that, e mean say e don de allow the way people for this world de think, to affect-am. The truth be say this things no be sin, but make them no be number one thing for our life. w24.03 24 ¶16-17