Iimbekiselo Zencwadi Yobomi BamaKristu Nomsebenzi Wokushumayela
AGASTI 1-7
UBUTYEBI OBUPHUMA ELIZWINI LIKATHIXO INDUMISO 87-91
“Hlala Kwindawo Efihlakeleyo yOyena Uphakamileyo”
(INdumiso 91:1, 2) Nabani na ohleli kwindawo efihlakeleyo yOyena Uphakamileyo uya kuzifumanela indawo yokulalisa emthunzini waLowo unguSomandla. 2 Ndiza kuthi kuYehova: “Uyindawo yam yokusabela negwiba lam, Thixo wam, endiza kukholosa ngaye.”
Qhubekani Nihamba Ngeyona Ndlela Igqwesileyo Yokuphila!
Sihleli Ngokukhuselekileyo “Kwindawo Efihlakeleyo”
10 Ukuzahlulela nokubhaptizwa kusenza sifumane enye intsikelelo—ilungelo lokuhlala “kwindawo efihlakeleyo yOyena Uphakamileyo.” (Funda iNdumiso 91:1.) Yindawo ekhuselekileyo yokomfuziselo—esikhusela kwiingozi zokomoya. ‘Yindawo efihlakeleyo’ kuba abantu abangenamdla kwizinto zokomoya nabangamthembiyo uThixo abayazi. Xa siphila ngokuvisisana nokuzahlulela kwethu size sithembele kuYehova ngokupheleleyo, kufana nokungathi sithi kuye: “Uyindawo yam yokusabela negwiba lam, Thixo wam, endiza kukholosa ngaye.” (INdu. 91:2) UYehova uba yindawo yethu yokuhlala ekhuselekileyo. (INdu. 91:9) Ayikho enye into elunge ngakumbi kunaleyo.
11 Ukuhlala “kwindawo efihlakeleyo” kaYehova kukwathetha ukuba sijizekwe ngelungelo lokuba nolwalamano naye. Kodwa kufuneka kuqala sizahlulele size sibhaptizwe. Emva koko, siba nolwalamano olusondeleyo noThixo ngokufunda iBhayibhile, sithandaze kuye ngokunyanisekileyo size simthobele ngokupheleleyo. (Yak. 4:8) Akukho mntu owakha wasondela kuYehova njengoYesu owayemthemba ngokupheleleyo uMdali. (Yoh. 8:29) Ngoko masingaze simthandabuze uYehova okanye umnqweno wakhe namandla akhe okusinceda sizalisekise izifungo esizenzileyo. (INtshu. 5:4) Amalungiselelo okomoya uThixo awenzele abantu bakhe abubungqina obungenaphikiswa bokuba usithanda ngokwenene yaye ufuna simkhonze.
(INdumiso 91:3) Kuba yena uya kukuhlangula kwisibatha sombambisi weentaka, Nakwindyikitya yokufa ebangela iinkxwaleko.
Ukuhlangulwa Kwisibatha Sombambisi Weentaka
ONKE amaKristu okwenyaniso ajamelene nomzingeli, kodwa asiloqhitala nje lomzingeli eli, unkone ngamaqhinga, ukrelekrele yaye unamandla angaphaya kwawomntu. KwiNdumiso 91:3 uchazwa ‘njengombambisi weentaka.’ Ngubani olu tshaba? Ukususela kwinkupho yesiNgesi kaJuni 1, 1883 yeli phephancwadi, olu tshaba luye lwachazwa njengoSathana uMtyholi. Eli qothaqikili lomzingeli yincutshe kumsebenzi walo, yaye ngobuqhetseba lizama konke okusemandleni alo ukubambisa abantu bakaYehova njengombambisi weentaka.
2 Mandulo, iintaka zazibanjiswa ngenxa yomculo wazo omyoli, imibalabala yazo emihle okanye zibe sisidlo nemibingelelo. Noko ke, iintaka ngokwemvelo ziphaphile, zindwebile yaye kunzima ukuzibambisa. Ngenxa yoko, kwixesha lokubhalwa kweBhayibhile umbambisi weentaka ebehlala phantsi aze aqwalasele zonke iimpawu nemikhwa yeentaka afuna ukuzibambisa. Emva koko, ayile indlela echuliweyo yokuzibambisa. Xa iBhayibhile ithelekisa uSathana nombambisi weentaka, isinceda siqonde amaqhinga awasebenzisayo. USathana wazi umntu ngamnye kuthi. Wakhel’ umkhanya izinto esizithandayo neempawu zethu aze abeke imigibe efihlakeleyo ukuze asibambise siphila. (2 Timoti 2:26) Ukubanjiswa kuthetha ukuqhawuka kolwalamano lwethu noThixo yaye oko kusikhokelela kwantshabalalo. Ngoko ke, ukuze sikhuseleke kufuneka siwazi amaqhinga awahlukeneyo ‘ombambisi weentaka.’
3 Emthelekisa nezinto esizazi kakuhle, umdumisi ufanisa amaqhinga kaSathana nawengonyama entsha nephimpi. (INdumiso 91:13) Njengengonyama, ngamanye amaxesha uSathana ubahlasela ngokungqalileyo abantu bakaYehova ngentshutshiso okanye ngemithetho yoorhulumente. (INdumiso 94:20) Ezi ntlaselo zifana nezengonyama, zinokwenza abathile ukuba bagxadazele ngokomoya. Noko ke, kumathuba amaninzi isikhuni sibuya nomkhwezeli yaye abantu bakaThixo bamanyana nangakumbi. Kuthekani ke ngeendledlana ezingacacanga asinqoloba ngazo uSathana ezifana nendlela iphimpi elihlasela ngayo?
4 UMtyholi, ngamandla angaphaya kwawomntu usebenzisa iindlela zobuqhophololo neziyingozi yaye zifana twatse nenyoka enobuhlungu kwindawo efihlakeleyo. Ngale ndlela, uye waphumelela ekutyhefeni iingqondo zabantu baThixo, ebalukuhlela ekwenzeni ukuthanda kwakhe kunokwenza ukuthanda kukaYehova, yaye uqengq’ ugodo. Okuvuyisayo kukuba, siyawazi amaqhinga kaSathana. (2 Korinte 2:11) Makhe sihlolisise imigibe emine eyingozi esetyenziswa ngulo ‘mbambisi weentaka.’
Ukoyika Abantu
5 Lo ‘mbambisi weentaka’ uyazi ukuba ngokwemvelo umntu unomnqweno wokwamkeleka nokukholisa abanye abantu. AmaKristu akakubethi ngoyaba ukwahluka kweengcinga neemvakalelo zabantu ababangqongileyo xa kuthelekiswa nezabo. Ngenxa yokuba ekwazi oku, uMtyholi usebenzisa ubuthathaka bokuxhalabela kwala maKristu oko abantu bakucingayo ngawo. Ngokomzekelo, ubambisa abanye abantu bakaThixo ngokusebenzisa umgibe ‘wokungcangcazela ngomntu.’ (IMizekeliso 29:25) Ukuba ngenxa yokoyika umntu, abakhonzi bakaThixo bathelela abantu abenza akuthiyileyo uYehova, okanye bangakwenzi oko iLizwi Lakhe libayalela ukuba bakwenze, sele bebanjisiwe kumgibe ‘wombambisi weentaka.’—Hezekile 33:8; Yakobi 4:17.
6 Ngokomzekelo, umntu oselula usenokunikezela kwingcinezelo yokutshaya nabantwana afunda nabo. Kusenokwenzeka ukuba ngoxa ebesiya esikolweni ngaloo ntsasa, ayikhange ithi qatha into yokuba uza kutshaya ngaloo mini. Ngesiquphe, wenza into eyenzakalisa impilo yakhe nengamkholisiyo uThixo. (2 Korinte 7:1) Utsalwe yintoni kwesi senzo? Mhlawumbi uye waqhelana noontanga abangafanelekanga yaye unoloyiko lokungamkeleki kubo. Lutsha, musani ukuvumela ‘umbambisi weentaka’ anithiyele, aze anibambise kumgibe wakhe! Ukuze ningabanjiswa niphila, kulumkeleni ukunikezela nakweyona migibe ikhangeleka ingeyongozi! Thobelani isilumkiso seBhayibhile sokuphepha unxulumano olubi.—1 Korinte 15:33.
7 Abazali abalumkileyo abangamaKristu, bakugqala njengembopheleleko ebalulekileyo ukunyamekela iintswelo zokwenyama zeentsapho zabo. (1 Timoti 5:8) Noko ke, uSathana wenza amaKristu aphulukane nembono elungeleleneyo ngalo mbandela. Mhlawumbi ngoku sele ingumkhwa kuwo ukuphoswa ziintlanganiso ngenxa yokunikezela kwingcinezelo yabaqeshi ukuze benze umsebenzi owongezelelekileyo. Kusenokwenzeka ukuba bayoyika ukucela ixesha lekhefu ukuze bafumane lonke ucwangciso lwendibano yesithili baze banqule uYehova nabazalwana babo. Ukuze sikhuseleke kulo mgibe simele ‘sikholose ngoYehova.’ (IMizekeliso 3:5, 6) Ukongezelela, ukukhumbula ukuba sonke singamalungu entsapho kaYehova yaye uzibophelele ekusikhuseleni, kuya kusinceda sigcine imbono elungeleleneyo. Bazali, ngaba ngokwenene ninokholo lokuba uYehova, kungakhathaliseki ukuba kungayiphi na indlela, uya kuninyamekela nina neentsapho zenu ukuba nenza ukuthanda kwakhe? Okanye ngaba uMtyholi uza kunibambisa niphila, nize nenze ukuthanda kwakhe ngenxa yokoyika abantu? Siyanibongoza ukuba niyicingisise ngomthandazo le mibuzo.
Umgibe Wezinto Eziphathekayo
8 USathana ukwasebenzisa nomgibe wezinto eziphathekayo ukuze asibambise. Inkqubo yezoqoqosho yeli hlabathi ikhuthaza ukuba abantu babe zizityebi ngephanyazo yaye oku kuye kwabambisa nabantu bakaThixo. Ngamanye amaxesha, umntu unokuphenjelelwa ngamazwi athi: “Sebenza nzima. Xa ufikelela umgangatho omhle wobutyebi uza kunaba unandiphe ubomi. Mhlawumbi unokude ube nguvulindlela.” La mazwi anokuvela kumntu onengqiqo engalungelelananga ofuna ukuphehluzelisa amalungu ebandla. Yicingisise kakuhle le nto. Ngaba la mazwi akafani nendlela eyayicinga ngayo indoda eyayisisityebi kumzekeliso kaYesu?—Luka 12:16-21.
9 USathana usebenzisa le nkqubo yakhe ingendawo yezinto ukuze iphembelele abantu banqwenele ooni nooni. Lo mnqweno unokuchaphazela ubomi bomKristu, uze uminxe ilizwi ‘lingabi nasiqhamo.’ (Marko 4:19) IBhayibhile isibongoza ukuba saneliswe sisixhaso nento yokwambatha. (1 Timoti 6:8) Noko ke, abanye babanjiswa ‘ngumbambisi weentaka’ becinga ukuba lo mbhalo awunanto yakwenza nabo. Ngaba ikratshi libenza bacinge ukuba kufuneka baphile umgangatho ophezulu wobomi? Kuthekani ngathi siqu? Ngaba umnqweno wethu wokuba nezinto eziphathekayo, usenza sibeke izinto zokomoya kwindawo yesibini ebomini bethu? (Hagayi 1:2-8) Okulusizi kukuba, xa imeko yezoqoqosho isiba mandundu, abanye bananisa ngobumoya babo ukuze baphile ubomi obutofotofo kuba bakuqhelile ukutyibilika ebhotolweni. Isimo sengqondo esinjalo ngezinto eziphathekayo, senza kuthi ngco entliziyweni ‘yombambisi weentaka’!
Umgibe Wokuzonwabisa Okuyingozi
10 Elinye iqhinga elisetyenziswa ‘ngumbambisi weentaka’ kukonakalisa imbono yabantu ngokulungileyo nokuphosakeleyo. Esi simo sengqondo sifana nqwa neso saseSodom naseGomora yaye sitshotsh’ entla kushishino lokuzonwabisa. Kwiindaba zikamabonwakude nakumaphephancwadi kubalaseliswa ubundlobongela nesini. Izinto ezininzi ezivela kumabonwakude zenza kube nzima ngabantu “ukwahlula okulungileyo nokubi.” (Hebhere 5:14) Kodwa khumbula amazwi kaYehova ngomprofeti uIsaya athi: “Yeha ke abo bathi okulungileyo kubi nokubi kulungile.” (Isaya 5:20) Ngaba ‘umbambisi weentaka’ sele eyithimbile ingqondo yakho ngezi ndlela zokuzonwabisa ziyingozi? Ukuzihlola kulo mbandela kubalulekile.—2 Korinte 13:5.
11 Malunga neminyaka engama-25 eyadlulayo, IMboniselo yalumkisa amaKristu okwenyaniso ngamabali kamabonwakude aqhutywa ngokweziqendu. Naku okwathethwayo malunga nendlela la mabali asityhefa ngokuthe ngcembe ngayo: “Ukufunwa kothando kusetyenziswa ukuthethelela nayiphi na ihambo. Ngokomzekelo, intombazana engatshatanga ekhulelweyo ithi kumhlobo wayo: ‘Kodwa ndiyamthanda uVictor. Andikhathali. . . Ndingenza nantoni na ukuze ndibe nosana lwakhe!’ Umculo otsholo phantsi ukwenza kube nzima ukulijonga ikhondo layo njengelibi kakhulu. Nawe uyamthanda uVictor. Uziva unovelwano ngale ntombazana. ‘Uyayiqonda’ indlela evakalelwa ngayo. Omnye umbukeli owathi kamva wabuyela ezingqondweni uthi ‘iyamangalisa indlela onokukuthethelela ngayo oku. Siyazi ukuba ukuziphatha kakubi kuphosakele. . . . Kodwa ndaqonda ukuba engqondweni ndandisiba nenxaxheba kuko.”
12 Ukususela ekupapashweni kwaloo manqaku, la mabali athoba isidima aye anda. Kwiindawo ezininzi, ezi nkqubo zidlala imini yonke. Amadoda, abafazi nenkumbula yolutsha, bondla iingqondo neentliziyo zabo ngokuthe rhoqo ngala mabali. Noko ke, thina asimele siziqhathe ngale ndlela itenxileyo yokucinga. Kuphosakele ukucinga ukuba indlela eqaqadekileyo yokuzonwabisa ibhetele kunezinto ezenziwa ngokoqobo ehlabathini. Ngaba ngokwenene umKristu angakuthethelela ukukhetha ukonwatyiswa ngabantu angenakuze nasemdudweni abamemele ekhayeni lakhe?
13 Abaninzi baye bazuza lukhulu ngokuthobela eso silumkiso sivela ‘kwikhoboka elithembekileyo neliyingqondi.’ (Mateyu 24:45-47) Emva kokufunda iziluleko ezicace gca ezisekelwe eBhayibhileni, abanye baye babhala bechaza indlela abaye bancedakala ngayo ngala manqaku. Elinye ibhinqa lazityand’ igila lisithi: “Kangangeminyaka eli-13 bendiyingedle yamabali aqhutywa ngokweziqendu. Ndandicinga ukuba ndikhuselekile ngokuya kwiintlanganiso zamaKristu nokuya manqaphanqapha entsimini. Kodwa ndaba nesimo sengqondo sehlabathi ngala mabali, ndicinga ukuba xa umyeni ekuphatha gadalala okanye uziva ungathandwa, ukukrexeza kuyathetheleleka—ndisithi le ndoda izinkale ngenyhek’ etyeni. Ndizithethelela ngolo hlobo, ndakrexeza ndisona uYehova nomyeni wam.” Lo mfazi wasuswa kubudlelane. Kamva wabuyela ezingqondweni, waguquka waza wabuyiselwa. Amanqaku alumkisa ngamabali aqhutywa ngokweziqendu kumabonwakude, amnika amandla okuba angafuni nokuva ngokuzonwabisa akuthiyileyo uYehova.—Amosi 5:14, 15.
14 Omnye umfundi owayechaphazeleka kulo mkhwa wathi: “Ndalila iinyembezi xa ndandifunda la manqaku, kaloku ndafumanisa ukuba intliziyo yam yayingaphelelanga kuYehova. Ndamthembisa ukuba andisayi kuba likhoboka lala mabali.” Emva kokuba livakalise uxabiso lwalo ngala manqaku, elinye ibhinqa elingumKristu lavuma ukuba lalilikhoboka lamabali aqhutywa ngokweziqendu lisithi: “Andazi nokuba ulwalamano lwam noYehova luchaphazelekile kusini na. Ndinokubenza njani ‘abantu abanje’ abahlobo bam, ndize ndiphinde ndithi ndingumhlobo kaYehova?” Ukuba iinkqubo ezinjalo zikamabonwakude zonakalisa iintliziyo zabantu kwiminyaka engama-25 eyadlulayo, zonakalisa ukusa kuwuphi umkhamo namhlanje? (2 Timoti 3:13) Simele sikulumkele ukuzonwabisa okuyingozi kwazo naziphi na iindlela, nokuba ngamabali aqhutywa ngokweziqendu kamabonwakude, yimidlalo yeevidiyo enobundlobongela okanye iividiyo zomculo ezibalaselisa ukuziphatha kakubi.
Umgibe Wokungaboni Ngasonye
15 USathana usebenzisa ukungaboni ngasonye ukuze adale iintanda kulwalamano lwabantu bakaYehova. Sinokubanjiswa kulo mgibe, kungakhathaliseki ukuba sinaliphi na ilungelo lenkonzo. Abanye babanjiswa bephila nguMtyholi ngokuvumela ukungaboni ngasonye kuphazamise uxolo nomanyano oluhle noluyintsikelelo yokomoya emiselwe nguYehova.—INdumiso 133:1-3.
16 Ukutyhubela iMfazwe YeHlabathi I, uSathana wazama ukutshayela kuthi tu inxalenye yentlangano kaThixo yasemhlabeni ngokuyihlasela ngokuthe ngqo, kodwa watsho phantsi. (ISityhilelo 11:7-13) Ukususela ngoko, uye wazama iindledlana ezingacacanga zokuphazamisa umanyano lwethu. Xa sivumela ukungaboni ngasonye kwenze isidubedube phakathi kwethu, siya kuba sinika ‘umbambisi weentaka’ indawo yokubambelela. Ngaloo ndlela, siya kuba sithintela ukusebenza komoya oyingcwele kubomi bethu nasebandleni. Ukuba oko bekunokwenzeka, uSathana uya kuzigobha amacala, kuba nantoni na egxobha uxolo nomanyano lwebandla, igxobha ukushunyayelwa kweendaba ezilungileyo.—Efese 4:27, 30-32.
17 Yintoni omele uyenze ukuba akuboni ngasonye nomzalwana wakho? Inyaniso kona kukuba zonke iimeko ziyahluka. Noko ke, nakuba zininzi izizathu zokuba kubekho iingxaki, akukho nasinye isizathu sokuba sijongane ngezikhondo zamehlo nabazalwana bethu size singakucombululi oko. (Mateyu 5:23, 24; 18:15-17) Icebiso elivela kwiLizwi likaThixo liphefumlelwe yaye alinasiphako. Xa isetyenziswa imigaqo yeBhayibhile ayinakuze isilele. Ngalo lonke ixesha, iyaphumelela!
18 UYehova “ukulungele ukuxolela,” yaye ‘uxolela ngenyaniso.’ (INdumiso 86:5; 130:4) Sibonisa ukuba singabantwana bakaYehova xa simxelisa. (Efese 5:1) Sonke singaboni yaye sikufuna ngamehlo abomvu ukuxolelwa nguYehova. Ngoko simele silumkele utyekelo lokungafuni ukuxolela abanye. Sinokuzibona sifana nekhoboka kumzekeliso kaYesu, elalingafuni ukuxolela elinye ikhoboka ityala elincinane kakhulu xa lithelekiswa netyala lalo kwinkosi yalo neyayikulungele ukulixolela. Xa inkosi yakuvayo oku, yayalela ukuba ikhoboka elingaxoleliyo liphoswe entolongweni. UYesu waqukumbela ngokuthi: “UBawo osemazulwini uya kuqhubana nani ngohlobo olufanayo ukuba anixoleli ngamnye umzalwana wakhe ngokusuka ezintliziyweni zenu.” (Mateyu 18:21-35) Ukucamngca ngalo mzekeliso, nangokukhumbula izihlandlo uYehova asixolela ngazo ngesisa, kuya kusinceda xa sifuna ukulungisa ukungaqondani phakathi kwethu nabazalwana bethu!—INdumiso 19:14.
(INdumiso 91:9-14) Ngenxa yokuba uthe: “UYehova uyindawo yam yokusabela,”Wenze Oyena Uphakamileyo waba yindawo yakho yokuhlala; 10 Akukho ntlekele iya kukuhlela, Nesibetho asiyi kusondela ententeni yakho. 11 Kuba iingelosi zakhe uya kuzinika umyalelo ngawe, Ukuba zikulinde ezindleleni zakho zonke. 12 Ziya kukuthwala ngezandla zazo, Ukuze ungabetheki ngonyawo lwakho kulo naliphi na ilitye. 13 Uya kunyathela phezu kwengonyama entsha nephimpi; Uya kunyathelela phantsi ingonyama entsha enesingci nenyoka enkulu. 14 Ngenxa yokuba ebonise umsa wakhe kum, Nam ndiya kumsindisa. Ndiya kumkhusela ngenxa yokuba elazi igama lam.
Ukuba NgabakaYehova—Ububele Obungasifanelanga
13 UYehova ubakhusela njani abantu bakhe kwezi ngozi zokomoya? Indumiso ithi: “Iingelosi zakhe uya kuzinika umyalelo ngawe, ukuba zikulinde ezindleleni zakho zonke.” (INdu. 91:11) Iingelosi zasezulwini ziyasikhokela zize zisikhusele ukuze sikwazi ukushumayela iindaba ezilungileyo. (ISityhi. 14:6) Ngaphandle kokukhuselwa ziingelosi, nabadala abangamaKristu bayasikhusela ngeemfundiso ezisekelwe ngokuqinileyo eZibhalweni ukuze singalahlekiswa ziingcinga eziphosakeleyo. Banokunceda nabani na ozama ukulwisana nesimo sengqondo sehlabathi. (Tito 1:9; 1 Pet. 5:2) ‘Nekhoboka elithembekileyo neliyingqondi’ lisinika ukutya kokomoya ukuze sikhuseleke kwiimfundiso zendaleko, iminqweno yokuziphatha okubi, ukufuna ubutyebi nodumo neminye iminqweno eyingozi. (Mat. 24:45) Yintoni ekuncedileyo wena ukuze ukwazi ukuzixhathisa ezo ngozi?
14 Yintoni esimele siyenze ukuze sihlale “kwindawo efihlakeleyo” kaThixo? Kanye njengokuba sisoloko sizikhusela kwiingozi zokoqobo, kwizikrelemnqa nakwizifo, simele siqhubeke sizikhusela nakwiingozi zokomoya. Ngoko sifanele silulandele rhoqo ukhokelo esilufumana kuYehova ngeempapasho zethu, ngeentlanganiso zebandla nangeendibano. Sifanele sifune uncedo lwabadala. Ngaba asingenelwa kwiimpawu ezintle zabazalwana noodadewethu abangamaKristu? Eneneni, ukunxulumana kwethu nebandla kusenza silumke.—IMize. 13:20; funda eyoku-1 kaPetros 4:10
UYehova Yindawo Yethu Yokusabela
‘Akukho Ntlekele Iya Kusehlela’
13 Nangona unqabiseko lweli hlabathi luwohloka, sibeka uThixo kwindawo yokuqala size sizuze ukhuthazo kumazwi omdumisi athi: “Ngenxa yokuba uthe: ‘UYehova uyindawo yam yokusabela,’ wenze Oyena Uphakamileyo waba yindawo yakho yokuhlala; akukho ntlekele iya kukuhlela, nesibetho asiyi kusondela ententeni yakho.” (INdumiso 91:9, 10) Ewe, uYehova yindawo yethu yokusabela. Noko ke, Oyena Thixo Uphakamileyo simenza ‘indawo yethu yokuhlala,’ apho sizuza khona ukhuseleko. Siyamdumisa uYehova njengoMongami Wendalo Iphela, ‘sihlale’ kuye njengoMthombo wonqabiseko, size sivakalise iindaba ezilungileyo zoBukumkani bakhe. (Mateyu 24:14) Ngoko ke, ‘akukho ntlekele iya kusehlela’—akukho nanye kwiintlekele ezichazwe ngaphambilana kule ndumiso. Kwanaxa thina kunye nabanye, sifikelwa ziintlekele ezifana neenyikima, iinkanyamba, izikhukula, iindlala neemfazwe, azilutshabalalisi ukholo lwethu okanye unqabiseko lwethu lokomoya.
14 AmaKristu athanjisiweyo afana nabemi basemzini abahlala ezintenteni ngaphandle kwale nkqubo yezinto. (1 Petros 2:11) ‘Akukho sibetho sisondelayo ententeni yawo.’ Enoba sinethemba lokuphila ezulwini okanye emhlabeni, asiyonxalenye yehlabathi, yaye asasulelwa zizibetho ezibulalayo ezifana nokuziphatha kwalo okubi, ukuthanda izinto eziphathekayo, unqulo lobuxoki, unqulo ‘lwerhamncwa’ ‘nomfanekiselo’ walo, iZizwe Ezimanyeneyo.—ISityhilelo 9:20, 21; 13:1-18; Yohane 17:16.
15 Ngokuphathelele ukhuseleko esilunandiphayo, umdumisi wongezelela esithi: ‘Kuba uYehova uya kunika iingelosi zakhe umyalelo ngawe, ukuba zikulinde ezindleleni zakho zonke. Ziya kukuthwala ngezandla zazo, ukuze ungabetheki ngonyawo lwakho kulo naliphi na ilitye.’ (INdumiso 91:11, 12) Iingelosi zinikwe amandla okusikhusela. (2 Kumkani 6:17; INdumiso 34:7-9; 104:4; Mateyu 26:53; Luka 1:19) Ziyasilinda ‘ezindleleni zethu zonke.’ (Mateyu 18:10) Njengabavakalisi boBukumkani iingelosi ziyasikhokela zize zisilondoloze yaye asikhubeki ngokomoya. (ISityhilelo 14:6, 7) ‘Kwanamatye’ anjengokuvalwa komsebenzi wethu akakhange asikhubekise asenze siphulukane nenkoliseko kaThixo.
16 Umdumisi uhlabela mgama esithi: “Uya kunyathela phezu kwengonyama entsha nephimpi; uya kunyathelela phantsi ingonyama entsha enesingci nenyoka enkulu.” (INdumiso 91:13) Kanye njengokuba ingonyama entsha ihlasela ngokuthe ngqo, ezinye zeentshaba zethu zisichasa ngeendlela ezicacileyo ngokumisela imithetho yokuvala umsebenzi wethu wokushumayela. Ukanti, sihlaselwa nangezinye iindlela ezifihlakeleyo njengaxa ubani ehlaselwa liphimpi. Ngokufihlakeleyo, maxa wambi abefundisi bayasihlasela besebenzisa abo bamisela imithetho, abagwebi nabanye. Kodwa ngenkxaso kaYehova, ngomoya woxolo siyamangala ezinkundleni, ngaloo ndlela ‘sithethelela yaye simisela ngokusemthethweni iindaba ezilungileyo.’—Filipi 1:7; INdumiso 94:14, 20-22.
17 Umdumisi uthetha ngokunyathelela phantsi “ingonyama entsha enesingci nenyoka enkulu.” Ingonyama entsha enesingci inokuba neengcwangu kakhulu, yaye inyoka enkulu inokuba sisirhubuluzi esikhulu. (Isaya 31:4) Noko ke, enoba ingonyama entsha enesingci inokuba neengcwangu kangakanani xa ihlasela, ngokufuziselayo, siyinyathelela phantsi, ngokuthobela uThixo kunokuba sithobele iintlangano zabantu ezifana nengonyama. (IZenzo 5:29) Ngoko ke ukusongelwa ‘yingonyama’ akusenzakalisi ngokomoya.
18 KwiSeptuagint yesiGrike, ‘inyoka enkulu’ ibizwa ngokuba ‘yinamba.’ Oku kusikhumbuza “inamba enkulu, inyoka yantlandlolo, leyo ibizwa ngokuba nguMtyholi, noSathana.” (ISityhilelo 12:7-9; Genesis 3:15) Ufana nesirhubuluzi esoyikekayo esikwaziyo ukutyumza nokuginya ixhoba laso. (Yeremiya 51:34) Xa uSathana ezama ukusirhintyela, asoyise ngeengcinezelo zeli hlabathi, aze asiginye, masiqhawule kuloo makhamandela akhe size siyinyathelele phantsi le ‘nyoka enkulu.’ (1 Petros 5:8) Intsalela ethanjisiweyo imele yenze oku ukuze ibe nesabelo ekuzalisekiseni eyabaseRoma 16:20.
UYehova—Umthombo Wethu Wosindiso
19 Ngokuphathelele umnquli wokwenyaniso, umdumisi efanekisela uThixo uthi: “Ngenxa yokuba ebonise umsa wakhe kum, nam ndiya kumsindisa. Ndiya kumkhusela ngenxa yokuba elazi igama lam.” (INdumiso 91:14) Ibinzana elithi “ndiya kumkhusela” ngokoqobo lithetha ukuba “ndiya kumbeka phezulu,” oko kukuthi, kwindawo engenakufikeleleka. UYehova simenza indawo yethu yokusabela njengabanquli bakhe ingakumbi ngenxa yokuba ‘sibonise umsa kuye.’ (Marko 12:29, 30; 1 Yohane 4:19) Ngenxa yoko, uThixo ‘uyasisindisa’ kwiintshaba zethu. Asinakutshayelwa emhlabeni. Kunoko, siya kusindiswa ngenxa yokuba sazi igama likaThixo yaye sibiza kulo sinokholo. (Roma 10:11-13) Yaye sizimisele ‘ukuhamba egameni likaYehova ngonaphakade.’—Mika 4:5; Isaya 43:10-12.
Ukwemba Ubuncwane ObuseBhayibhileni
(INdumiso 89:34-37) Andiyi kuwuhlambela umnqopiso wam,Namazwi emilebe yam andiyi kuwatshintsha. 35 Ndakuba ndifungile ebungcweleni bam, Andiyi kumxokisa uDavide. 36 Imbewu yakhe iya kubakho de kuse kwixesha elingenammiselo, Netrone yakhe ibe njengelanga phambi kwam. 37 Iya kumiselwa ngokuqinileyo njengenyanga kangangexesha elingenammiselo, Nanjengengqina elithembekileyo esibhakabhakeni.” (Selah)
Yiba Nokholo Olungagungqiyo KuBukumkani
14 Khawuve ukuba uYehova wamthembisa ntoni uKumkani uDavide wakwaSirayeli esebenzisa umnqophiso kaDavide. (Funda eyesi-2 kaSamuweli 7:12, 16.) UYehova wawenza lo mnqophiso ebudeni bolawulo lukaDavide eYerusalem, emthembisa ukuba uMesiya wayeza kuphuma kwisizukulwana sakhe. (Luka 1:30-33) Ngaloo ndlela, uYehova wasikrobisa ukuba yayiza kuphuma kubani le mbewu waza wamisela ukuba indlalifa ethile kaDavide yayiza kuba ‘nelungelo elisemthethweni’ lokuhlala kwitrone yoBukumkani bukaMesiya. (Hez. 21:25-27) Ekubeni uYesu enguKumkani, ulawulo lukaDavide luza ‘kumiselwa ngokuqinileyo kangangexesha elingenammiselo.’ Imbewu kaDavide “iya kubakho de kuse kwixesha elingenammiselo, netrone yakhe ibe njengelanga.” (INdu. 89:34-37) Ulawulo lukaMesiya alusoze lonakale, ibe luza kwenza izinto eziya kuhlala ngonaphakade!
‘Ingqina Elithembekileyo Esibhakabhakeni’
Kwiminyaka engaphezu kwama-3 000 eyadlulayo, uYehova uThixo wenza umnqophiso woBukumkani noKumkani uDavide wakwaSirayeli wamandulo. (2 Samuweli 7:12-16) Injongo yaloo mnqophiso yayikukumisela uYesu Kristu ngokusemthethweni njengendlalifa kaDavide ukuba ahlale etroneni ngonaphakade. (Isaya 9:7; Luka 1:32, 33) Ebhekisela kwitrone ‘yembewu’ kaDavide, umdumisi wavuma le ngoma: “Iya kumiselwa ngokuqinileyo njengenyanga kangangexesha elingenammiselo, nanjengengqina elithembekileyo esibhakabhakeni.”—INdumiso 89:36, 37.
Ngoko ‘njengesikhanyiso esilawula ubusuku’—inyanga—isikhumbuza ukuba ulawulo lukaKristu luya kubakho ngokusisigxina. (Genesis 1:16) Ngokuphathelele uBukumkani bakhe, uDaniyeli 7:14 uthi: “Ulawulo lwakhe lulawulo oluhlala ngokungenammiselo olungayi kudlula, nobukumkani bakhe bobungayi konakaliswa.” Inyanga lingqina elisikhumbuza ngobo Bukumkani neentsikelelo obuya kuzizisela uluntu.
(INdumiso 90:10) Imihla yeminyaka yethu yiminyaka engamashumi asixhenxe; Yaye ukuba ithe ngenxa yamandla akhethekileyo yangamashumi asibhozo, Ukuzingisa kwayo kusenkathazweni nakwizinto ezenzakalisayo;Kuba imele idlule ngokukhawuleza, siphaphazele simke.
(INdumiso 90:12) Sibonise kanye indlela yokubala imihla yethu ngendlelaYokuba sizuze intliziyo yobulumko.
Iimbalasane Zenxalenye Yesithathu Neyesine YeeNdumiso
90:10, 12. Ekubeni ubomi bubufutshane, sifanele ‘sibale imihla yethu.’ Njani? Ngokuzuza “intliziyo yobulumko,” okanye ngokuba nobulumko ukuze imihla yethu eseleyo singadlali ngayo, kodwa siyisebenzise ngendlela emkholisayo uYehova. Oku kufuna ukuba sizibekele usukelo lwezinto zokomoya size silisebenzise ngobulumko ixesha.—Efese 5:15, 16; Filipi 1:10.
UYehova Usibonisa Indlela Yokubala Imihla Yethu
19 La mazwi omdumisi ngumthandazo wokucela uYehova ukuba afundise abantu bakhe ukusebenzisa ubulumko ngokubonakalisa uxabiso nokusebenzisa imihla yabo eseleyo ngendlela ekholisa uThixo. Iminyaka engama-70 yobomi bomntu lithemba lokuphila iintsuku ezimalunga nama-25 500. Noko ke, enoba sibadala kangakanani, ‘asikwazi oko ubomi bethu buya kuba kuko ngomso, kuba sifana nje nenkungu ebonakala okwethutyana ize ithi shwaka.’ (Yakobi 4:13-15) Ekubeni ‘sonke sisehlelwa lixesha nasisihlo esingenakubonwa kwangaphambili,’ asinakwazi ukuba siya kuphila ixesha elide kangakanani na. Ngoko ke, masithandazele ubulumko bokuhlangabezana nezilingo, sibaphathe kakuhle abanye yaye senze konke okusemandleni enkonzweni kaYehova kanye ngoku—namhlanje! (INtshumayeli 9:11; Yakobi 1:5-8) UYehova uyasikhokela ngeLizwi lakhe, ngomoya wakhe nangentlangano yakhe. (Mateyu 24:45-47; 1 Korinte 2:10; 2 Timoti 3:16, 17) Ukuqhelisela ubulumko kusishukumisela ukuba ‘sifune kuqala uBukumkani bukaThixo’ size sisebenzise imihla yethu ngendlela ezisa uzuko kuYehova nevuyisa intliziyo yakhe. (Mateyu 6:25-33; IMizekeliso 27:11) Kakade ke, ukumnqula ngentliziyo iphela akuyi kuzishenxisa zonke iingxaki zethu, kodwa ngokuqinisekileyo kubangela uvuyo olukhulu.
AGASTI 8-14
UBUTYEBI OBUPHUMA ELIZWINI LIKATHIXO | INDUMISO 92-101
“Ukuchuma Ngokomoya Nakuba Waluphele”
(INdumiso 92:12) Ilungisa liya kutyatyamba njengesundu;Liya kukhula njengomsedare waseLebhanon.
“Ukuchuma Ebudeni Bokuba Nezimvi”
ABANTU abaninzi kumazwe angqonge iMeditera batyala imithi yesundu evelisa iidatilisi emizini yabo. Le mithi yaziwa ngobuhle neziqhamo zayo ezimnandi. Enye into, iqhubeka ivelisa isiqhamo ixesha elingaphezu kweminyaka elikhulu.
Kumbongo wakhe, uKumkani uSolomon wamandulo kwaSirayeli wafanisa umShulamikazi oyinzwakazi nomthi wesundu. (INgoma yazo iiNgoma 7:7) Incwadi ethi Plants of the Bible ithi: “NgesiHebhere lo mthi wesundu kuthiwa ‘yitàmâr.’ . . . KumaYuda lo mthi wawufuzisela inceba nomtsalane ibe amantombazana ayedla ngokuthiywa ngawo.” Ngokomzekelo, omnye udadeboSolomon owayeyinzwakazi kwakusithiwa nguTamare. (2 Samuweli 13:1) Nanamhlanje abanye abazali basazithiya ngelo gama iintombi zabo.
Asingomabhinqa mahle kuphela awayefaniswa nalo mthi. Umdumisi wathi: “Ilungisa liya kutyatyamba njengesundu; liya kukhula njengomsedare waseLebhanon. Abo batyalwe endlwini kaYehova, ezintendelezweni zoThixo wethu, baya kutyatyamba. Baya kuqhubeka bechuma ebudeni bokuba nezimvi, baya kuqhubeka betyebile yaye besiba nentlahla.”—INdumiso 92:12-14.
Ngokufuziselayo, abo bakhonza uThixo ngokuthembeka ebudaleni banezinto ezininzi abafana ngazo nalo mthi wesundu unomtsalane. IBhayibhile ithi: “Isithsaba sokuhomba zizimvi xa sifunyanwa endleleni yobulungisa.” (IMizekeliso 16:31) Nakuba baluphele, abantu abadala banokuhlala bebatsha ngokomoya ukuba baqhubeka befunda iLizwi likaThixo, iBhayibhile. (INdumiso 1:1-3; Yeremiya 17:7, 8) Ngenxa yamazwi amnandi nomzekelo wabo omhle, abantu abakhulileyo abathembekileyo balukhuthazo kwabanye yaye baqhubeka bethwala isiqhamo minyaka le. (Tito 2:2-5; Hebhere 13:15, 16) Njengomthi wesundu ovelisa iidatilisi, abantu abakhulileyo banokuqhubeka bechuma nasebudaleni babo.
Iimbalasane Zencwadi Yesithathu Neyesine YeeNdumiso
92:12— Iya kwenzeka njani into yokuba ilungisa ‘lityatyambe njengesundu’? Isundu laziwa ngokuba nemveliso. Ilungisa lifana nomthi wesundu kuba lithe tye emehlweni kaYehova yaye liqhubeka livelisa “isiqhamo esihle,” esiquka imisebenzi emihle.—Mateyu 7:17-20.
(INdumiso 92:13, 14) Abo batyalwe endlwini kaYehova,Ezintendelezweni zoThixo wethu, baya kutyatyamba. 14 Baya kuqhubeka bechuma ebudeni bokuba nezimvi, Baya kuqhubeka betyebile yaye besiba nentlahla,
Ukukhonza UYehova Ngaphambi Kokuba Imihla Yentlekele Ifike
17 Namhlanje, simele singayilibali into yokunceda amaKristu alupheleyo okanye agulayo. Nakuba amanye enqwena ukubakho kwiintlanganiso zebandla neendibano, kusenokuba nzima ukwenjenjalo. Kwezinye iindawo, ngothando amabandla aye alungiselele ukuba abalupheleyo baphulaphule iintlanganiso ngefowuni. Kwezinye kusenokuba nzima ukwenza oku. Sekunjalo, amaKristu angakwaziyo ukubakho kwiintlanganiso anokukwazi ukuxhasa unqulo lwenyaniso. Ngokomzekelo, imithandazo yawo inegalelo kwimpumelelo yebandla lamaKristu.—Funda iNdumiso 92:13, 14.
Abakhulileyo—Amalungu Axabisekileyo Obuzalwana Bethu BobuKristu
“Baya Kuqhubeka Betyebile Yaye Besiba Nentlahla”
9 Ethetha ngokuba nemveliso kwabakhonzi baYehova abakhulileyo, umdumisi wathi: “Ilungisa liya kutyatyamba njengesundu; liya kukhula njengomsedare waseLebhanon. Baya kuqhubeka bechuma ebudeni bokuba nezimvi, baya kuqhubeka betyebile yaye besiba nentlahla.”—INdumiso 92:12, 14.
10 Unokuhlala njani womelele ngokomoya nakuba ukhulile ngeminyaka? Ukuze uqhubeke ukwimeko entle, umthi wesundu uxhomekeke ekufumaneni amanzi amaninzi. Ngokufanayo, nawe unokufumana amandla kumanzi enyaniso yeBhayibhile ngokufundisisa iLizwi likaThixo nangokunxulumana nentlangano yakhe. (INdumiso 1:1-3; Yeremiya 17:7, 8) Xa womelele ngokomoya uya kuba luncedo gqitha kwabo ukholwa kunye nabo. Oku sinokukubona kwimeko yoMbingeleli Omkhulu nowayesele ekhulile uYehoyada.
(INdumiso 92:15) Ukuze baxele ukuba uYehova uthe tye.Yena uliLiwa lam, ekungekho ntswela-bulungisa kuye.
Abakhulileyo—Amalungu Axabisekileyo Obuzalwana Bethu BobuKristu
13 Mhlawumbi impilo enkenenkene okanye ezinye iimeko zikusikel’ umda oko unokukwenza ukuze ukhuthaze unqulo lokwenyaniso. Kwanaxa kunjalo, unako ‘ukwenza okulungileyo kuThixo oyinyaniso nendlu yakhe.’ Unokuba nenzondelelo ngendlu kaYehova yokomoya ngokuya nokuba nenxaxheba kwiintlanganiso zebandla nangokushumayela nangaliphi na ithuba elivelayo. Ukusamkela ngovuyo isiluleko seBhayibhile nokulixhasa ngokunyaniseka “ikhoboka elithembekileyo neliyingqondi” nebandla kuya kubomeleza ubuzalwana bobuKristu. (Mateyu 24:45-47) Kanti unokuvuselela abo ukhonza kunye nabo “eluthandweni nasemisebenzini emihle.” (Hebhere 10:24, 25; Filemon 8, 9) Yaye uya kuba yintsikelelo kwabanye ukuba wenza ngokuvisisana nesi siluleko sompostile uPawulos: “Amadoda awalupheleyo makabe ngcathu ngokwemikhwa, andileke, abe ngaphilileyo engqondweni, aphile elukholweni, eluthandweni, ekunyamezeleni. Ngokunjalo abafazi abalupheleyo mabaziphathe ngokuhlonel’ uThixo, banganyelisi, bangakhotyokiswa yiwayini eninzi, mabafundise oko kulungileyo.”—Tito 2:2-4.
14 Ngaba uye wakhonza njengomdala webandla kangangeminyaka emininzi? Omnye umdala webandla oligqala ucebisa ngelithi: “Musa ukubugogotya ubulumko oye wabufumana ukutyhubela iminyaka. Yabela abanye imisebenzi uze wabelane nabo basebenza ngokuzimisela ngamava onawo . . . Khangela izinto abanobuchule kuzo abanye. Bakhuthaze kwezo zinto. Baxhobisele ikamva.” (Duteronomi 3:27, 28) Ukuba nomdla wokwenene kumsebenzi owandayo woBukumkani kuya kuphumela ekufumaneni kwabanye iintsikelelo ezininzi kubuzalwana bethu bobuKristu.
“Xela Ukuba UYehova Uthe Tye”
15 Abakhonzi bakaThixo abasele bekhulile bayiphumeza ngovuyo imbopheleleko abanayo ‘yokuxela ukuba uYehova uthe tye.’ Ukuba ungumKristu okhulileyo, amazwi nezenzo zakho zinokubonisa abanye ukuba ‘uYehova uliLiwa lakho, ekungekho ntswela-bulungisa kuye.’ (INdumiso 92:15) Umthi wesundu unikela ubungqina beempawu ezibalaseleyo zoMdali. Kodwa uYehova ukunike ilungelo lokunikela ubungqina ngaye kwabo balwamkelayo unqulo lokwenyaniso. (Duteronomi 32:7; INdumiso 71:17, 18; Yoweli 1:2, 3) Kutheni oku kubalulekile?
16 Xa inkokeli yamaSirayeli uYoshuwa yayisele ‘indala neentsuku zihambile kuyo, yabiza uSirayeli wonke, amadoda ayo amakhulu neentloko zayo nabagwebi bayo namagosa ayo’ ukuze iwakhumbuze ngokuthi tye kweendlela zikaThixo. Yathi: “Akusilelanga nalinye ilizwi kuwo onke amazwi alungileyo uYehova uThixo wenu awathethileyo kuni. Onke abe yinyaniso kuni.” (Yoshuwa 23:1, 2, 14) Kangangethuba elithile, la mazwi abomeleza abantu ukuze baqhubeke bethembekile. Noko ke, uthe esakufa uYoshuwa, “kwavela esinye isizukulwana . . . esasingamazi uYehova okanye umsebenzi awayewenzele uSirayeli. Yaye oonyana bakaSirayeli benza okubi emehlweni kaYehova bakhonza ooBhahali.”—ABagwebi 2:8-11.
17 Ukugcina ingqibelelo kwebandla lamaKristu namhlanje akuxhomekekanga kubungqina obunikelwa ngabakhonzi abakhulileyo bakaThixo. Sekunjalo, ukholo lwethu kuYehova nakwizithembiso zakhe luyomelela xa sisiva iingxelo ‘zemisebenzi emikhulu’ ayenzele abantu bakhe kule mihla yokugqibela. (ABagwebi 2:7; 2 Petros 1:16-19) Ukuba sele uneminyaka emininzi usentlanganweni kaYehova, kusenokwenzeka ukuba uyalikhumbula ixesha laxa kwakukho abavakalisi boBukumkani abambalwa gqitha kummandla okanye kwilizwe ohlala kulo, okanye xa umsebenzi wokushumayela wawuchaswa ngokukrakra. Ngokuhamba kwexesha, uye wabona ngoxa uYehova esusa imiqobo ethile waza ‘wakhawulezisa’ ulwando loBukumkani. (Isaya 54:17; 60:22) Uye waphawula ukucaciswa kwenyaniso yeBhayibhile waza wabona nendlela eye yaphuculwa ngayo ngokuthe ngcembe inxalenye ebonakalayo yentlangano kaThixo. (IMizekeliso 4:18; Isaya 60:17) Ngaba uyabakhuthaza abanye ngokwabelana nabo ngamava akho ngokuphathelele ukuthi tye kweendlela zikaYehova? Olunjani lona ukhuthazo okunokuba lulo oku kubuzalwana bobuKristu!
18 Kuthekani ngezihlandlo apho uye wabona uthando nolwalathiso lukaYehova ebomini bakho? (INdumiso 37:25; Mateyu 6:33; 1 Petros 5:7) Omnye udade okhulileyo ogama linguMartha wayedla ngokuthi xa ekhuthaza abanye: “Enoba sekutheni, ungaze umlahle uYehova. Uya kukulondoloza.” Eli cebiso laba nempembelelo entle kuTolmina, ongomnye wababeqhutyelwa isifundo seBhayibhile nguMartha nowabhaptizwa ebutsheni beminyaka yee-1960. UTolmina uthi: “Ekufeni komyeni wam, ndadimazeka gqitha kodwa loo mazwi andomeleza kangangokuba kwakungekho nokuba ibe nye intlanganiso eyayindiphosa. Yaye ngokwenene uYehova wandomeleza ukuze ndiqhubeke.” UTolmina uye wakhuthaza nabo abaqhubela izifundo zeBhayibhile ukutyhubela iminyaka esebenzisa icebiso elifanayo. Ngokwenene, ngokukhuthaza nokubachazela kwakho ngokuthi tye kweendlela zikaYehova, unokulwakha ukholo lwabo ukholwa kunye nabo.
Ukwemba Ubuncwane ObuseBhayibhileni
(INdumiso 99:6, 7) UMoses noAron babephakathi kwababingeleli bakhe,NoSamuweli wayephakathi kwabo babiza egameni lakhe. Babebiza kuYehova, yaye yena waqhubeka ebaphendula. 7 Waqhubeka ethetha nabo ngomqulu welifu.Bazigcina izikhumbuzo zakhe nommiselo awabanika wona.
Zimiseleni Ukuphucula IParadesi Yokomoya
5 Xa sidumisa uYehova, silandela umzekelo wabakhonzi bakaThixo abathembekileyo abachazwe kwiNdumiso 99:1-3, 5. (Yifunde.) Amadoda athembekileyo afana noMoses, uAron noSamuweli alixhasa ngokupheleleyo ilungiselelo likaThixo lonqulo lokwenyaniso elalikho ngelo xesha. (INdumiso 99:6, 7) Namhlanje, ngaphambi kokuba abathanjiswa emhlabeni babe ngababingeleli kunye noYesu ezulwini, bakhonza uYehova ngokuthembeka kwinxalenye esemhlabeni yetempile yokomoya. Izigidi ‘zezinye izimvu’ zibancedisa ngokuthembeka. (Yohane 10:16) Omabini la maqela amanyene ekunquleni uYehova. Noko ke, ngamnye wethu umele azibuze lo mbuzo, ‘Ngaba ndilixhasa ngokupheleleyo ilungiselelo likaYehova lonqulo lokwenyaniso?’
(INdumiso 101:2) Ndiza kwenza ngokunengqiqo ngendlela engenasiphoso. Uya kuza nini na kum? Ndiya kuhamba ngengqibelelo yentliziyo yam ngaphakathi endlwini yam.
Ngaba Uya Kuhamba NoThixo?
Hamba Ngokungathi “Uyambona Lowo Ungabonakaliyo”
14 Ukuze sihambe noYehova, ufanele abe ngumntu wokwenene kuthi. Khumbula ukuba, uYehova waqinisekisa abo babethembekile kuSirayeli wamandulo ukuba wayengazifihlanga kubo. Ngokufanayo namhlanje, uzityhila kubantu bakhe njengomYaleli Ozukileyo. Ngaba uYehova ungumntu wokwenene ngaloo ndlela kuwe, ngokungathi umi phambi kwakho ekuyalela? Nalo ke ukholo esimele sibe nalo ukuze sihambe noThixo. UMoses wayenokholo olunjalo, “kuba waqhubeka eqinile ngokungathi uyambona Lowo ungabonakaliyo.” (Hebhere 11:27) Ukuba uYehova ngumntu wokwenene kuthi, siya kuyicinga indlela avakalelwa ngayo xa sisenza izigqibo. Ngokomzekelo, asiyi kuyicinga into yokwenza ububi size sizame ukuzifihla ezo zono zethu kubadala abangamaKristu okanye kumalungu entsapho. Siya kuzabalazela ukuhamba noThixo kwanokuba akukho mntu usibonayo. NjengoKumkani uDavide wamandulo, siya kufikelela kwesi sigqibo: “Ndiya kuhamba ngengqibelelo yentliziyo yam ngaphakathi endlwini yam.”—INdumiso 101:2.
AGASTI 15-21
UBUTYEBI OBUPHUMA ELIZWINI LIKATHIXO | INDUMISO 102-105
“UYehova Uyakhumbula Ukuba Siluthuli”
(INdumiso 103:8-12) UYehova unenceba nobabalo,Uzeka kade umsindo yaye unobubele bothando obuninzi. 9 Akayi kuqhubeka ehlab’ amadlala ngalo lonke ixesha, Engayi kuhlala ecaphukile ukusa kwixesha elingenammiselo. 10 Akenzanga kuthi kanye ngokwezono zethu;Engasiziseli noko kusifaneleyo ngokweziphoso zethu. 11 Kuba njengoko amazulu ephakamile kunomhlaba, Ububele bakhe bothando bongamile kwabo bamoyikayo. 12 Njengokuba kude kwempumalanga entshonalanga, Kunjalo ukukukhwelelisa kwakhe kude nathi ukunxaxha kwethu.
Kuxabise Ukunyaniseka Nokuxolela KukaYehova
14 Singathuthuzelwa kukucamngca ngendlela axolela ngayo uYehova. Nanku umzekelo. Kwiminyaka eyadlulayo, omnye udade esiza kuthi nguElaine wasuswa kubudlelane. Emva kweminyaka ethile, wabuyiselwa. Uthi: “Nangona ndandisazi ukuba uYehova undixolele, kwakungathi mna andinalo ulwalamano olusondeleyo naye njengokuba kunjalo ngabanye.” Noko ke, uElaine wathuthuzelwa kukufunda nokucamngca ngendlela iBhayibhile ekuchaza ngayo ukuxolela kukaYehova. Uthi: “Kwaba ngathi ndiyaqala ukuqonda indlela andithanda nanobubele ngayo uYehova kum.” Wachukunyiswa ngala mazwi: “Xa uYehova exolela izono zethu, akukho mfuneko yokuvakalelwa kukuba siya kuhlala sinebala lezo zono ubomi bethu bonke.” UElaine uthi: “Ndaqonda ukuba bendingakholelwa ukuba uYehova unokundixolela ngokupheleleyo, yaye ndandicinga ukuba ndiza kuthwala elo xanduva ubomi bam bonke. Ndiyazi kuseza kuthatha ixesha, kodwa sendiziva ukuba ndinako ukusondela kuYehova, ibe sekungathi ndothulwe umthwalo.” Akanakuze abekho uThixo onothando noxolela njengalo simkhonzayo!—INdu. 103:9.
Khonza UThixo Wenkululeko
17 Kambe ke, maxa wambi sonke siyazenza iimpazamo. (INtshu. 7:20) Xa oko kusenzeka, musa ukuphelelwa kukuzixabisa okanye udane ngokugqithiseleyo. Ukuba uyakhubeka, ngokungathi kunjalo, phakama uze uqhubeke uhamba—enoba loo nto ithetha ukucela uncedo kubadala bebandla okulo. UYakobi uthi, ‘umthandazo wabo wokholo uya kumphilisa lowo ungaphilanga, uYehova amvuse. Kanjalo, ukuba uye wenza izono, uya kuxolelwa.’ (Yak. 5:15) Ngokwenene, ungaze ulibale ukuba uThixo unenceba ngokwenene yaye wakutsalela ebandleni ngenxa yokuba wabona iimpawu ezintle kuwe. (Funda iNdumiso 103:8, 9.) Ngoko, logama usaqhubeka unentliziyo ephelele kuYehova, akasayi kuze akulahle.—1 Kron. 28:9.
(INdumiso 103:13, 14) Njengoyise obenzela inceba oonyana bakhe,UYehova ubenzele inceba abo bamoyikayo. 14 Kuba yena uyakwazi ukuyilwa kwethu, Ekhumbula ukuba siluthuli.
Kholosa NgoYehova Ngalo Lonke Ixesha!
8 Enye into esingamele kuyilibala kukuba uYehova uyazazi izinto ngamnye kuthi anokuzinyamezela nangenakukwazi ukuzithwala. (INdumiso 103:14) Ngoko uyasinika amandla esiwadingayo. Abakho amaxesha apho sisenokuvakalelwa kukuba noko kwanele ngoku. Kodwa uYehova uthembisa ukuba xa sisonganyelwa sisilingo, uya ‘kwenza indlela yokuphuma.’ (Funda eyoku-1 kwabaseKorinte 10:13.) Kuyasithuthuzela ukwazi ukuba uYehova uyazazi izinto esinokukwazi ukuzinyamezela.
Kuxabise Ukuba Nesisa Nengqiqo KukaYehova
16 Masithi ungumSirayeli yaye uhlwempuzeke gqitha. Njengoko ufika emnqubeni nomgubo omncinane oza kunikela ngawo, ubona izityebi zisiza kubingelela ngemfuyo. Usenokuziva uhlazekile ngomnikelo wakho obonakala kungekho yawo. Kuthi kusenjalo ukhumbule ukuba uxabisekile phambi koYehova. Kwenziwa yintoni oko? Kaloku, uYehova wayalela ukuba ibe ngumgubo oxabisekileyo. Enyanisweni, uYehova wayesithi kumaSirayeli ahlwempuzekileyo: ‘Ndiyaqonda ukuba akunamandla okunikela njengabanye, kodwa ndiyazi ukuba undinika okona kulungileyo unako.’ Ngokwenene, uYehova ubonisa ingqiqo ngokucingela iimeko zabakhonzi bakhe aze angafuni okungaphaya kwamandla abo.—INdu. 103:14.
(INdumiso 103:19) UYehova uyimise ngokuqinileyo itrone yakhe emazulwini; Ubukumkani bakhe bulawula phezu kwayo yonk’ into.
(INdumiso 103:22) Mbongeni uYehova, nonke nina misebenzi yakhe,Kuzo zonke iindawo zolawulo lwakhe. Mbonge uYehova, mphefumlo wam.
UYehova YiNkosi Yethu EnguMongami!
5 NjengoMdali, uYehova uThixo unguMongami wehlabathi nendalo yonke. (Funda iSityhilelo 4:11.) UYehova unguMgwebi, uMmisi-mthetho noKumkani wethu, kuba kurhulumente wakhe wendalo yonke nguye onelungelo lokugweba, lokuwisa imithetho nelokulawula. (Isa. 33:22) Ekubeni sidalwe nguThixo sixhomekeke kuye yaye sifanele simgqale njengeNkosi enguMongami. Ukuba sihlala sikhumbula ukuba ‘uYehova uyimise ngokuqinileyo itrone yakhe emazulwini; yaye ubukumkani bakhe bulawula phezu kwayo yonk’ into,’ siya kuluphakamisa ulongamo lwakhe.—INdu. 103:19; IZe. 4:24.
Ulongamo LukaYehova NoBukumkani BukaThixo
“UYEHOVA uyimise ngokuqinileyo itrone yakhe emazulwini; ubukumkani bakhe bulawula phezu kwayo yonk’ into.” (INdumiso 103:19) Ngaloo mazwi, umdumisi wayechaza inyaniso ecacileyo ngokuphathelele ulawulo. Ekubeni uYehova uThixo enguMdali, unelungelo lokuba nguMlawuli onguMongami wendalo yonke.
Ukwemba Ubuncwane ObuseBhayibhileni
(INdumiso 102:12) Wena ke, Yehova, uya kuhlala ukusa kwixesha elingenammiselo, Nesikhumbuzo sakho siya kuba kwizizukulwana ngezizukulwana.
(INdumiso 102:27) Kodwa wena ukwanguwe, neminyaka yakho ayiyi kuphela.
Izinto Ezinokukunceda Uyeke Ukuhlala Uzigxeka
“UMTHANDAZO WOXHWALEKILEYO”
19 Umbhali weNdumiso 102 wayesengxakini. ‘Wayexhwalekile,’ ebandezeleke gqitha emzimbeni nangokweemvakalelo, ibe wayengenamandla okujamelana neengxaki zakhe. (INdu. 102, umbhalo osemantla) Kumazwi akhe sifumanisa ukuba wayesentlungwini, elilolo yaye enomvandedwa. (INdu. 102:3, 4, 6, 11) Wayecinga ukuba uYehova ufuna ukumlahlela kude.—INdu. 102:10.
20 Noko ke, umdumisi wayesenalo ithuba lokudumisa uYehova. (Funda iNdumiso 102:19-21.) Njengokuba sibona kule Ndumiso 102, nabo banokholo banokuba sentlungwini baze bangakwazi ukucinga ngayo nantoni na enye. Umdumisi wayeziva elilolo kanye ‘njengentaka eyodwa eluphahleni,’ ngokungathi uphahlwe ziingxaki kuphela. (INdu. 102:7) Xa uvakalelwa ngaloo ndlela, xelisa umdumisi uphalaze imbilini yakho kuYehova. Ukuthandaza xa uxhwalekile, kunokukunceda njengoko usilwa nengxaki yokuziva ungaxabisekanga. UYehova uthembisa ukuba “uya kuphethukela emthandazweni wabo baphangwe yonk’ into, aze angawudeli umthandazo wabo.” (INdu. 102:17) Sithembe eso sithembiso.
21 INdumiso 102 iphinda ibonise indlela onokuyeka ngayo ukusoloko uzigxeka. Umdumisi wancedwa kukucinga ngolwalamano awayenalo noYehova. (INdu. 102:12, 27) Wathuthuzelwa kukwazi ukuba uYehova wayeza kusoloko ekho ukuze omeleze abantu bakhe baphumelele kwiimvavanyo. Ngoko ke, ukuba okwangoku kukho iingxaki ezikuphazamisayo ekukhonzeni uThixo kangangoko unako, thandaza. Cela uThixo aphulaphule umthandazo wakho kungekhona nje ukuze ufumane isiqabu kwiingxaki zakho kodwa nokuze “igama likaYehova livakaliswe.”—INdu. 102:20, 21.
(INdumiso 103:13) Njengoyise obenzela inceba oonyana bakhe,UYehova ubenzele inceba abo bamoyikayo.
Kholosa NgoYehova Ngalo Lonke Ixesha!
7 Kutheni uYehova engasoloko eyiphendula ngoko nangoko imithandazo yethu? IBhayibhile ithi uYehova unguBawo, thina singabantwana bakhe. (INdumiso 103:13) Umntwana akanikwa yonk’ into ayifunayo okanye ayinikwe ngoko nangoko into ayicela kuyise. Kaloku uyise uyazi ukuba umntwana unokuphum’ izithuba efuna into ngoku, kwimizuzwana engephi akasenamdla waloo nto. Uyazazi izinto eziya kumnceda umntwana wakhe, kwaye uyayazi nendlela eziya kubachaphazela ngayo abanye abantu. Uyazazi izinto azidingayo, nexesha afanele azifumane ngalo. Ukuba ebenokumtefisa ngokumnika yonk’ into le, ebeya kuphela sele etatazeliswa nguloo mntwana. UBawo wethu osezulwini, uYehova, uyasithanda. Ekubeni enguMdali wethu kwaye elumkile, uyazazi izinto esizidingayo, kwaye nguye ogqiba ngelona xesha lifanelekileyo lokusinika izinto esizicelayo. Kuya kusakha ukulinda ukuze sibone indlela aza kuyiphendula ngayo imithandazo yethu.—Thelekisa noIsaya 29:16; 45:9.
AGASTI 22-28
UBUTYEBI OBUPHUMA ELIZWINI LIKATHIXO | INDUMISO 106-109
“Bulelani kuYehova”
(INdumiso 106:1-3) Dumisani uYa! Bulelani kuYehova, kuba ulungile;Kuba ububele bakhe bothando bukho ukusa kwixesha elingenammiselo. 2 Ngubani na onokuthetha ngezenzo zamandla zikaYehova, Okanye onokuvakalisa yonke indumiso yakhe? 3 Banoyolo abo bagcina okusesikweni,Abenza ubulungisa lonke ixesha.
Mbulele UYehova Uze Usikeleleke
KUFANELEKILE ukuba simbulele uYehova, kuba “sonke isipho esilungileyo naso sonke isipho esigqibeleleyo” sivela kuye. (Yak. 1:17) UnguMalusi wethu onothando, kwaye usinika zonke izinto esizidingayo. (INdu. 23:1-3) Uzingqine ‘eyindawo yokusabela namandla kuthi’—ngokukodwa xa kunyembelekile! (INdu. 46:1) Ngokuqinisekileyo sinezizathu ezininzi zokungqinela umdumisi owabhala wathi: “Bulelani kuYehova, kuba ulungile; kuba ububele bakhe bothando bukho ukusa kwixesha elingenammiselo.”—INdu. 106:1.
Yoliswa Bubulungisa BukaYehova
19 Kule mihla yamanqam neyokungaqiniseki, ukuyoliswa bubulungisa bukaYehova kulunqabiseko nenkuselo. Kumbuzo othi: “Owu Yehova, ngubani na oya kuba lundwendwe ententeni yakho? Ngubani na oya kuhlala entabeni yakho engcwele?” UKumkani uDavide waphendula: “Ngulowo uhamba ngokungenasiphoso eqhelisela ubulungisa.” (INdumiso 15:1, 2) Ngokuphila ngobulungisa bukaThixo size siyoliswe bubo, sinokuba nolwalamano oluhle naye size siqhubeke simkholisa aze yena asisikelele. Ngaloo ndlela, siya kuphila ubomi bokwaneliseka, bokuzixabisa, sibe noxolo lwengqondo. ILizwi likaThixo lithi: “Osukela ubulungisa nobubele bothando uya kufumana ubomi, ubulungisa nozuko.” (IMizekeliso 21:21) Ngaphezu koko, ukwenza konke okusemandleni ukuze senze okusesikweni nobulungisa kuzo zonke izinto kuya kubangela ukuba sibe nolwalamano oluhle nabanye nobomi obonwabisayo—ngokuziphatha nangokomoya. Umdumisi wathi: “Banoyolo abo bagcina okusesikweni, abenza ubulungisa lonke ixesha.”—INdumiso 106:3.
(INdumiso 106:7-14) Bona ke ookhokho bethu eYiputa,Abazange babonakalise nakuphi na ukuyiqiqa imisebenzi yakho emangalisayo.Abazange babukhumbule ububele bakho bothando obuninzi, Kodwa baziphatha ngemvukelo elwandle, kuLwandle Olubomvu. 8 Wabasindisa ngenxa yegama lakhe, Ukuze azise amandla akhe. 9 Ngako oko walukhalimela uLwandle Olubomvu, loma; Kwaye wabahambisa emanzini anzongonzongo kwanga kusentlango; 10 Waza ngoko wabasindisa esandleni salowo wayebathiyileWabahlangula esandleni sotshaba. 11 Amanzi azigubungela iintshaba zabo;Akuzange kusale namnye kuzo. 12 Ngoko bakholwa lilizwi lakhe;Bayivuma indumiso yakhe. 13 Bayilibala ngokukhawuleza imisebenzi yakhe;Abazange balindele icebo lakhe. 14 Kodwa babonisa umnqweno wabo wokuzingca entlango Baza bamcikida uThixo enkqantosini.
(INdumiso 106:19-25) Ngapha koko, benza ithole eHorebheBaza baqubuda kuwo umfanekiso otyhidiweyo; 20 Kangangokuba balwananisa uzuko lwam Ngembonakaliso yenkunzi yenkomo, into edla utyani. 21 Bamlibala uThixo uMsindisi wabo, UMenzi wezinto ezinkulu eYiputa, 22 Imisebenzi emangalisayo kwilizwe lakwaHam, Izinto ezoyikekayo kuLwandle Olubomvu. 23 Wayesele eza kuthi mababhujiswe, Ukuba kwakungekho ngenxa kaMoses onyuliweyo wakhe, Owema ethubeni phambi kwakhe, Ukuze ubuye umsindo wakhe, angabonakalisi. 24 Balicekisa ilizwe elinqwenelekayo; Babengakholwa lilizwi lakhe. 25 Bamana bembombozela ezintenteni zabo;Abazange baliphulaphule ilizwi likaYehova.
(INdumiso 106:35-39) Baxubana neentlangaYaye bafunda imisebenzi yazo. 36 Bakhonza izithixo zazo,Zona ke ezi zaba ngumgibe kubo. 37 Babebingelela ngoonyana baboNangeentombi zabo kwiidemon. 38 Ngoko baphalaza igazi elimsulwa,Igazi loonyana babo neentombi zabo, Ababingelela ngazo kwizithixo zakwaKanan;Nelizwe langcoliswa luphalazo-gazi. 39 Baba ngabangahlambulukanga ngemisebenzi yabo Baba neentlobano zokuziphatha okubi ngezenzo zabo.
Mbulele UYehova Uze Usikeleleke
2 Kutheni kubalulekile ukuba sikhe siwujonge lo mba wokubulela? Njengoko kwakuprofetiwe, abantu bale mihla yokugqibela baya beqatsela ekungabini nambulelo. (2 Tim. 3:2) Abaninzi bazikha kancinci izinto abasikelelwe ngazo. Izigidi zabantu azaneli zizinto ezinazo, kunoko zifuna ezingakumbi, zintyontyelwa ngabarhwebi nazizibhengezo. Nathi sinokuzibona sele singenalo uxabiso. NjengamaSirayeli amandulo, sinokuphelelwa luxabiso size singayiboni indlela olubaluleke ngayo ulwalamano lwethu noYehova kunye nezinto asisikelele ngazo.—INdu. 106:7, 11-13.
3 Kwelinye icala, khawucinge ngoko kunokwenzeka xa ujongene nesilingo. Ngamaxesha anjalo, kuba lula ukusindwa ziingxaki uze ungabi sazibona nezo zinto usikelelwe ngazo. (INdu. 116:3) Ngoko, sinokwenza njani ukuze sihlale sinombulelo? Kwaye yintoni eya kusinceda siqhubeke sinembono efanelekileyo ngezinto kwanaxa sijongene nezilingo eziqatha? Makhe sibone.
Musani Ukuba Ngabevayo Nize Nilibale
“AYINAKULIBALEKA” imimangaliso eyenziwa nguYehova kwiYiputa yamandulo. Ngokungathandabuzekiyo, ngasinye kwiZibetho Ezilishumi sasisoyikeka ngendlela emangalisayo. Emva kwezo zibetho abantu bakwaSirayeli bahlangulwa ngendlela emangalisayo ngokwahlukaniswa kwamanzi kuLwandle Olubomvu. (Duteronomi 34:10-12) Ukuba wawuzibonele ngawakho amehlo ezo ziganeko, ngokuqinisekileyo wawungayi kumlibala Lowo wayezenzile. Ukanti, umdumisi wavuma ingoma esithi: ‘AmaSirayeli amlibala uThixo uMsindisi wawo, UMenzi wezinto ezinkulu eYiputa, imisebenzi emangalisayo kwilizwe lakwaHam, izinto ezoyikekayo kuLwandle Olubomvu.’—INdumiso 106:21, 22.
2 Emva kokuwela uLwandle Olubomvu, amaSirayeli ‘amoyika uYehova aza akholwa kuYehova.’ (Eksodus 14:31) Amadoda akwaSirayeli athelela uMoses ekuvumeleni uYehova ingoma yoloyiso, yaye uMiriyam namanye amabhinqa badlala intambula baza bangqungqa. (Eksodus 15:1, 20) Ewe, abantu bakaThixo babechukumisekile zizenzo zikaYehova zamandla. Kodwa uxabiso ababenalo kuLowo wenza le misebenzi lwaphelela emoyeni. Kungekudala emva koko, abaninzi kubo baziphatha ngokungathi banesifo esinzulu sokulibala. Babembombozela yaye bemkhalazela uYehova. Bambi kubo babandakanyeka kunqulo zithixo nasekuziphatheni okubi ngokwesini.—Numeri 14:27; 25:1-9.
Yintoni Enokusenza Silibale?
3 Ukungabi naluxabiso kukaSirayeli kuyamangalisa ngokwenene. Sekunjalo, nakuthi kunokwenzeka okufanayo. Liyinyaniso elokuba, asikhange simbone uThixo esenza imimangaliso enjalo. Noko ke, kulwalamano lwethu noThixo, ngokuqinisekileyo ziye zakho iziganeko esingenakuzilibala. Abanye bethu basenokukhumbula ixesha esamkela ngalo inyaniso yeBhayibhile. Amanye amaxesha avuyisayo asenokuquka umthandazo esawenzayo ngoxa sasizahlulela kuYehova nokubhaptizwa kwethu emanzini njengamaKristu enyaniso. Abaninzi kuthi baye bancedwa nguYehova kwezinye iinkalo zethu zobomi. (INdumiso 118:15) Ngaphezu kwako konke, ngokufa okulidini koNyana kaThixo, uYesu Kristu, siye saba nethemba lokusindiswa. (Yohane 3:16) Sekunjalo, ngenxa yokungafezeki kwethu, xa sineminqweno engafanelekanga namanye amaxhala obomi, sisenokuzilibala ngokulula izinto ezintle esizenzelwe nguYehova.
(INdumiso 106:4, 5) Ndikhumbule, Yehova, ngenkoliseko kubo abantu bakho. Ndinyamekele ngosindiso lwakho, 5 Ukuze ndibone ukulunga kwabanyuliweyo bakho, Ukuze ndibe nemihlali ngokuba nemihlali kohlanga lwakho, Ukuze ndiqhayise ngelifa lakho.
(INdumiso 106:48) Makabongwe uYehova uTHIXO kaSirayeliUkususela kwixesha elingenammiselo kuse kwixesha elingenammiselo;Yaye bonke abantu bamele bathi Amen. Dumisani uYa!
Masibe Nemihlali Kunye!
Kodwa ke, umoya wabazalwana bethu abangamaKristu, wahlukile. Umpostile uPawulos wathi: “Hlalani ninemihlali.” (1 Tes. 5:16) Sinezizathu ezininzi zokuba novuyo nokuba nemihlali kunye. Sinqula Oyena Thixo Uphakamileyo, uYehova; siyasiqonda isigidimi seBhayibhile senyaniso; sinethemba losindiso nelobomi obungunaphakade; yaye sinokunceda nabanye bafumane iintsikelelo ezifanayo.—INdu. 106:4, 5; Yer. 15:16; Roma 12:12.
“Hlalani Ninombulelo”
Izizathu Zokuba Nombulelo
3 Sifanele simbulele uYehova uThixo, uMdali noMniki-bomi wethu, ingakumbi xa sicinga ngezipho ezininzi asijizeke ngazo. (Yakobi 1:17) Imihla ngemihla, siyambulela uYehova kuba sisaphila. (INdumiso 36:9) Singqongwe yimisebenzi yezandla zikaYehova, njengelanga, inyanga neenkwenkwezi. Esi sijikelezi-langa sethu sizaliswe zizinto ezenza umhlaba uchume, umoya osesibhakabhakeni oxutywe kakuhle, nayo yonke imijikelo entsonkothileyo yendalo engqina indlela esixhomekeke ngayo kuBawo wethu wasezulwini onothando. UKumkani uDavide wacula esithi: “Zininzi izinto ozenzileyo, owu Yehova Thixo wam, kwanemisebenzi yakho emangalisayo neengcamango zakho kuthi; akukho namnye onokuthelekiswa nawe. Ukuba bendityekele ekuxeleni ndize ndithethe ngazo, zininzi kakhulu kunokuba ndinokubalisa.”—INdumiso 40:5.
4 Nangona siphila kumhlaba ongafaniyo kwaphela neparadesi, abakhonzi bakaYehova namhlanje bayakuvuyela ukuphila kwiparadesi yokomoya. KwiiHolo zethu zoBukumkani nakwiindibano ezinkulu nezincinane, sibona indlela ezisebenza ngayo iziqhamo zomoya kaThixo kwamanye amakholwa. Enyanisweni, xa sishumayela kubantu abanolwazi oluncinane okanye abangenalo kwaphela ngezinto zokomoya, wambi amaNgqina alatha koko uPawulos wakuchaza kwincwadi eyayisiya kwabaseGalati. Aqala ngokubonisa abantu “imisebenzi yenyama” aze ababuze oko bakuphawulileyo. (Galati 5:19-23) Inkoliso ivuma ngokukhawuleza ukuba abantu abaninzi banjalo namhlanje. Xa bechazelwa isiqhamo somoya kaThixo baze bamenyelwe kwiHolo yoBukumkani ukuze bakubone oku, abaninzi bakhawuleza bavume besithi: “Ngokwenene uThixo uphakathi kwenu.” (1 Korinte 14:25) Yaye oku akwenzeki kuphela kwiHolo yoBukumkani yasekuhlaleni. Enoba unokuya phi, xa udibana nelinye kumaNgqina kaYehova angaphezu kwezigidi ezithandathu, uya kufumana umoya ofanayo wolonwabo. Ngokwenene, olu nxulumano lwakhayo lusisizathu sokumbulela uYehova, lowo usinika umoya wakhe ukuze oku kwenzeke.—Zefaniya 3:9; Efese 3:20, 21.
5 Esona sipho sikhulu nesona sigqibeleleyo uYehova asinike sona, seso soNyana wakhe, uYesu, oye wayintlawulelo yethu. Umpostile uYohane wabhala: “Ekubeni uThixo eye wasithanda ngolo hlobo, nathi simele sithandane.” (1 Yohane 4:11) Ewe, sibonakalisa umbulelo ngentlawulelo kungekuphela nje ngokubonakalisa uthando nombulelo kuYehova kodwa kwakhona nangokubonakalisa uthando kwabanye.—Mateyu 22:37-39.
6 Sinokufunda okungakumbi ngendlela yokubonakalisa umbulelo ngokuqwalasela indlela uYehova awawaphatha ngayo amaSirayeli amandulo. NgoMthetho uYehova awawudlulisela kolu hlanga ngoMoses, wafundisa abantu izinto ezininzi. Nathi, “ngesakhelo solwazi nesenyaniso kuwo uMthetho,” sinokufunda okuninzi okunokusinceda sithobele isiluleko sikaPawulos esithi: “Hlalani ninombulelo.”—Roma 2:20; Kolose 3:15.
Ukwemba Ubuncwane ObuseBhayibhileni
(INdumiso 109:8) Imihla yakhe mayibe mbalwa; Isigxina sakhe sobuveleli masithatyathwe ngomnye.
Yimani Ngokuqinileyo Ningahexi
20 Akufanele kuphazanyiswa okanye udinyazwe sisibakala sokuba ingengabo bonke abemi ngokuqinileyo nangolweyiseko olupheleleyo. Bambi banokusilela, baphambuke, okanye banikezele. Oko kwenzeka kwabo babesondele gqitha kuYesu, abapostile bakhe. Kodwa xa uYudas wajika waba ngumngcatshi, ngaba abanye abapostile bayekelela okanye ngaba bayeka? Nakanye! UPetros wasebenzisa INdumiso 109:8 ukubonisa ukuba indawo kaYudas yayiya kuthatyathwa ngomnye. Kwanyulwa owayeza kuthabatha indawo yakhe, yaye abanyanisekileyo bakaThixo baqhubeka ngenkuthalo nesabelo sabo sokushumayela. (IZenzo 1:15-26) Babezimisele ukuma ngokuqinileyo bangahexi.
it-1-E 857-858
Ukwazi Kwangaphambili, Ukumisela Kusengaphambili
Ngaba uThixo wamisela kwangaphambili ukuba ibe nguYudas ongcatsha uYesu ukuze kuzaliseke isiprofeto?
Ukungcatsha kukaYudas Skariyoti kwazalisekisa isiprofeto kwaye kwabonisa ukuba uYehova noNyana wakhe bazi izinto zingekenzeki. (Nd 41:9; 55:12, 13; 109:8; IZe 1:16-20) Sekunjalo, akunakuthiwa uThixo wamisela kwangaphambili ukuba nguYudas owayeza kuba ngumngcatshi. Iziprofeto zachaza ukuba omnye umntu osondeleyo kuYesu wayeza kumngcatsha, kodwa azizange zitsho ukuba yayiza kuba ngubani. Kwakhona, ukuba uThixo wayemmisele kwangaphambili uYudas ukuba abe ngumngcatshi, oko bekuya kuphikisana nemigaqo yeBhayibhile. Umgaqo owabhalwa ngumpostile uthi: “Uze ungabeki nawuphi na umntu izandla ngokungxama; kanjalo ungabi nesabelo kwizono zabanye; zigcine unyulu.” (1Ti 5:22; thelekisa no-3:6.) Exhalabele indlela efanelekileyo awayeza kukhetha ngayo abapostile abayi-12, uYesu wachitha ubusuku ethandaza kuYise ngaphambi kokuba enze isigqibo. (Luk 6:12-16) Ukuba uYudas wayesele emiselwe ukuba uza kuba ngumngcatshi ngelo xesha, oko bekuya kuthetha ukuba ukhokelo lukaThixo luyatshintshatshintsha, kwaye ngokutsho kompostile, wayeya kuba unesabelo kwizono zikaYudas.
Ngoko, kubonakala ukuba ngexesha awakhethwa ngalo ukuba abe ngumpostile, kwakungekho nento encinci eyayibonisa ukuba uYudas wayeza kuba ngumngcatshi. Wavumela ‘ingcambu enetyhefu yaphuma’ yaza yamngcolisa. Oku kwamenza waphambuka waza akalwamkela ukhokelo lukaThixo, wamkela olukaMtyholi, olwamenza walisela nomntu obawayo. (Heb 12:14, 15; Yoh 13:2; IZe 1:24, 25; Yak 1:14, 15; funda indawo ethi uYUDAS No. 4.) Xa wayesiya ephum’ endleleni, uYesu wayibona intliziyo yakhe waza waprofeta esithi uza kumngcatsha.—Yoh 13:10, 11.
Kwingxelo ekuYohane 6:64, ngexesha abanye abapostile babekhutyekiswe zezinye iimfundiso zikaYesu, sifunda ukuba “ukususela ekuqaleni” uYesu wayebazi abangakholwayo kwezi mfundiso, esazi nomntu owayeza kumngcatsha.” Ngoxa igama elithi ‘ekuqaleni’ (Gr., ar·kheʹ) elisetyenziswe ku-2 Petros 3:4 libhekisela ekuqaleni kwendalo, lisenokubhekisela nakwamanye amaxesha. (Luk 1:2; Yoh 15:27) Ngokomzekelo, xa umpostile uPetros wathi umoya oyingcwele wehlela abantu beeNtlanga “kanye njengoko wawenjenjalo naphezu kwethu ekuqaleni,” ngokuqinisekileyo wayengathethi ngexesha awaqalisa ngalo ukuba ngumfundi okanye umpostile, kodwa wayethetha ngexesha elibalulekileyo kubulungiseleli bakhe, usuku lwePentekoste ka-33 C.E., “ekuqaleni” kokuhla komoya oyingcwele ngenjongo ethile. (IZe 11:15; 2:1-4) Ngoko ibangela umdla indlela incwadi ethi Lange’s Commentary on the Holy Scriptures (iphe. 227) emcacisa ngayo uYohane 6:64, ithi: “Ekuqaleni . . . akuthethi kuthi ekuqaleni kokudalwa kwazo zonke izinto, . . . okanye ekuqaleni kukaYesu ukusondelelana nabafundi, . . . okanye ekuqaleni kwakhe ukukhetha abafundi, okanye ekuqaleni kobulungiseleli bakhe njengoMesiya, . . . kodwa kuthetha ukuba ekuqaleni kokuntshula kokungakholwa [okwabangela ukuba abanye abafundi bakhubeke]. Ngoko nomngcatshi wakhe wamazi kwasekuqaleni.”—Iguqulelwe yaza yahlelwa nguP. Schaff, 1976; thelekisa u-1Yo 3:8, 11, 12.
(INdumiso 109:31) Kuba uya kuma ngasesandleni sokunene solihlwempu, Ukuze amsindise kwabo bagweba umphefumlo wakhe.
Iimbalasane Zencwadi Yesihlanu YeeNdumiso
109:30, 31; 110:5. Isandla sasekunene sejoni esiphatha ikrele sidla ngokuba sesichengeni, kuba ikhaka liphathwa ngesandla sasekhohlo. Ngokungathi kunjalo, uYehova ‘ungasekunene’ kwabakhonzi bakhe, ukuze abalwele. Ngaloo ndlela uyabakhusela aze abancede—eso sisizathu esihle ‘sokumbonga kakhulu’!
AGASTI 29–SEPTEMBA 4
UBUTYEBI OBUPHUMA ELIZWINI LIKATHIXO | INDUMISO 110-118
“Ndiya Kumbuyekeza Ngantoni Na UYehova?”
(INdumiso 116:3, 4) Iintsontelo zokufa zandirhawulaNeemeko ezibandezelayo zeShiyol zandifumana. Ndaqhubeka ndifikelwa kukubandezeleka nentlungu. 4 Kodwa ndabiza egameni likaYehova, ndathi: “Awu, Yehova, sindisa umphefumlo wam!”
(INdumiso 116:8) Kuba uwuhlangule umphefumlo wam ekufeni,Iliso lam ezinyembezini, unyawo lwam ekukhubekeni.
UThixo Owonwabileyo, Abantu Abonwabileyo!
116:3—Ziyintoni “izintya zokufa”?
Kubonakala ngathi ukufa kwakuqamangele umdumisi ngezintya ezingenakuqhawulwa kangangokuba ukuphuncula kwakungenakwenzeka. Iintambo ezibotshelelwe ngokuqinileyo kumalungu omzimba zibangela iintlungu ezingcungcuthekisayo, okanye ezifana nenimba, yaye inguqulelo yeSiptuagint yesiGrike igama lesiHebhere elithi “izintya” iliguqulela njengelithi “inimba.” Ngenxa yoko, xa uYesu Kristu wayesifa, wayekwiintlungu zokufa eziqobayo, okanye ezifana nezenimba. Ngoko ke, xa uYehova wamvusayo uYesu, ‘wayemkhlula kwinimba yokufa.’—IZenzo 2:24.
(INdumiso 116:12) Ndiya kumbuyekeza ngantoni na uYehovaNgalo lonke uncedo lwakhe kum?
Yamkela Ngombulelo—Uphe Ngokusuka Entliziyweni
Umdumisi wabuza: “Ndiya kumbuyekeza ngantoni na uYehova ngalo lonke uncedo lwakhe kum?” (INdu. 116:12) Luluphi olo ncedo walufumanayo? UYehova wamomeleza ngexesha ‘lokubandezeleka nentlungu.’ Ngaphezu koku uYehova ‘wayewuhlangule umphefumlo wakhe ekufeni.’ Ngoko, wayefuna ‘ukubuyekeza’ uYehova ngandlel’ ithile. Wayeza kwenza ntoni lo mdumisi? Wathi: “Ndiya kuzifezekisa izibhambathiso zam kuYehova.” (INdu. 116:3, 4, 8, 10-14) Wagqiba ekubeni agcine zonke izithembiso awayezenze kuYehova aze aphumeze zonke iimbopheleleko awayemnike zona.
Nawe unokwenza okufanayo. Njani? Ngokuphila ngokuvisisana nemithetho nemigaqo kaThixo ngalo lonke ixesha. Ngenxa yoko qiniseka ukuba ukunqula uYehova kusoloko kuyeyona nto ibalulekileyo ebomini bakho uze uvumele umoya wakhe ukukhokele kuyo yonke into oyenzayo. (INtshu. 12:13; Gal. 5:16-18) Eneneni, akunakuze umbuyekeze uYehova ngazo zonke izinto akwenzele zona. Sekunjalo, ‘iba nemihlali intliziyo’ yakhe xa ekubona uzinikele ngentliziyo epheleleyo enkonzweni yakhe. (IMize. 27:11) Kulilungelo lokwenene ukuvuyisa uYehova ngale ndlela!
Ukuma Emgubasini Womsebenzi Othe Kratya
Kwalandela iintetho ezintathu ezanikelwa ngamalungu eqela labahlohli baseGiliyadi. Kwaqala uKarl Adams, owayethetha phantsi komxholo othi “Uya Kumbuyisela Ngantoni UYehova?” Intetho yakhe yayisekelwe kwiNdumiso ye-116, ekusenokwenzeka ukuba uYesu wayivuma ngobusuku obungaphambi kokufa kwakhe. (Mateyu 26:30, umbhalo osemazantsi weNW) Wayecinga ntoni uYesu xa wayevuma la mazwi: “Ndingambuyisela ngantoni na uYehova konke ukundiphatha kwakhe kakuhle”? (INdumiso 116:12) Kusenokwenzeka ukuba wayecinga ngomzimba ofezekileyo awayewulungiselelwe nguYehova. (Hebhere 10:5) Ngemini elandelayo, wayeza kunikela ngaloo mzimba ube lidini, ebonisa indlela olunzulu ngayo uthando lwakhe. Abafundi beklasi ye-105 bakubone kakuhle ukulunga kukaYehova kwezi nyanga zintlanu zidluleyo. Ngoku baza kubonisa indlela abamthanda ngayo uThixo ngokuzibhokoxa kwizabelo zabo zobuvangeli basemazweni.
(INdumiso 116:13, 14) Ndiya kuthabatha indebe yosindiso olukhulu,Ndiya kubiza egameni likaYehova. 14 Ndiya kuzifezekisa izibhambathiso zam kuYehova, Ewe, phambi kwabo bonke abantu bakhe.
(INdumiso 116:17, 18) Ndiya kunikela kuwe imibingelelo yokubulela,Yaye ndiya kubiza egameni likaYehova. 18 Ndiya kuzifezekisa izibhambathiso zam kuYehova, Ewe, phambi kwabo bonke abantu bakhe,
w10 4/15 27, ibhokisi
Ngaba Umlandela Ngokupheleleyo UKristu?
Yintoni Eya Kukunceda Uqhubeke Ulandela UKristu?
▪ Funda iLizwi likaThixo yonke imihla uze ucamngce ngoko ukufundayo.—INdu. 1:1-3; 1 Tim. 4:15.
▪ Thandaza rhoqo ucele umoya kaThixo ukuxhase uze ukukhokele.—Zek. 4:6; Luka 11:9, 13.
▪ Nxulumana nabo bakhutheleyo kubulungiseleli.—IMize. 13:20; Heb. 10:24, 25.
▪ Yiqonde into yokuba siphila kumaxesha ongxamiseko.—Efe. 5:15, 16.
▪ Yiphaphele imiphumo emibi ‘yokuzilandulela.’—Luka 9:59-62.
▪ Hlala usikhumbula isifungo sakho sokuzahlulela neentsikelelo ezininzi ezifumaneka ngenxa yokukhonza uYehova nokulandela uKristu ngentliziyo epheleleyo.—INdu. 116:12-14; 133:3; IMize. 10:22.
Ukwemba Ubuncwane ObuseBhayibhileni
(INdumiso 110:4) UYehova ufungile (yaye akayi kuzisola), wathi:“Ungumbingeleli ukusa kwixesha elingenammiselo Ngokohlobo lukaMelkitsedeki!”
Yiba Nokholo Olungagungqiyo KuBukumkani
UMNQOPHISO WOMBINGELELI
15 Nakuba umnqophiso ka-Abraham nokaDavide usiqinisekisa ukuba imbewu yomfazi yayiza kuba nokumkani, kwakuza kufuneka okungakumbi ukuze kuziswe iintsikelelo kubantu bazo zonke iintlanga. Ukuze basikelelwe ngokwenene, kwakuza kufuneka bakhululwe kwisono baze babe yinxalenye yentsapho kaYehova. Ngoko kufuneka le mbewu iphinde ibe ngababingeleli. UMdali wethu osisilumko wenza elinye ilungiselelo elisemthethweni, umnqophiso wombingeleli onjengoMelkitsedeki.
16 Esebenzisa uKumkani uDavide, uYehova wachaza ukuba wayeza kwenza umnqophiso noYesu ngeenjongo ezimbini: ukuze ‘ahlale ngasekunene kukaThixo’ de oyise iintshaba zakhe, nokuze abe ‘ngumbingeleli ukusa kwixesha elingenammiselo ngokohlobo lukaMelkitsedeki.’ (Funda iNdumiso 110:1, 2, 4.) Kutheni kusithiwa “ngokohlobo lukaMelkitsedeki”? Kungenxa yokuba kwakude kudala ngaphambi kokuba inzala ka-Abraham izuz’ ilifa iLizwe Lesithembiso, uMelkitsedeki, owayengukumkani waseSalem, ‘wayengumbingeleli wOyena Thixo Uphakamileyo.’ (Heb. 7:1-3) Wamiselwa nguYehova ngokuthe ngqo. Nguye kuphela ekuthethwa ngaye kwiZibhalo zesiHebhere owayengukumkani nombingeleli. Ngaphezu koko, ekubeni kungekho ngxelo yamntu owayenesi sikhundla ngaphambi nasemva kwakhe, kunokuthiwa ‘ngumbingeleli ngokungapheliyo,’ okanye ngonaphakade.
17 UYesu umiselwa ukuba abe ngumbingeleli kusetyenziswa lo mnqophiso owenziwa nguYehova kunye naye, ibe uya kuhlala ‘engumbingeleli ngonaphakade ngokohlobo lukaMelkitsedeki.’ (Heb. 5:4-6) Oku kwenza kucace ukuba uYehova uye wazibophelela ukuba uza kusebenzisa uBukumkani bukaMesiya ukuze aphumeze injongo yakhe ngabantu.
Iimbalasane Zencwadi Yesihlanu YeeNdumiso
110:4—Yintoni le uYehova wayifungayo ‘ngaphandle kokuzisola’? Esi sifungo ngumnqophiso uYehova awawenza noYesu Kristu wokuba abe nguKumkani noMbingeleli oMkhulu.—Luka 22:29.
(INdumiso 116:15) Kuxabisekile emehlweni kaYehovaUkufa kwabanyanisekileyo bakhe.
Imibuzo Evela Kubafundi
Xa kunikelwa intetho yomngcwabo womKristu, akufanelekanga ukusebenzisa iNdumiso 116:15 kulo mntu uswelekileyo, nangona efe engumkhonzi kaYehova onyanisekileyo. Ngoba? Ngenxa yokuba oko kuthethwa ngumdumisi kunentsingiselo ebanzi. Kuthetha ukuba uThixo akayi kuvumela ukuba lonke iqela labakhonzi bakhe abanyanisekileyo life ngenxa yokuba ulijonga njengelixabisekileyo.—Sicela ufunde iNdumiso 72:14; 116:8.