马太福音

24 耶稣离开圣殿嗰阵，门徒过嚟，请佢望吓圣殿嘅建筑。 2 耶稣就话：“你哋系咪觉得呢啲建筑物好令人赞叹呢？我可以好肯定噉同你哋讲，呢度绝对唔会有一块石头*留喺石头上面，全部都会被拆毁。”

3 耶稣坐喺橄榄山，门徒私下嚟问佢：“话俾我哋知吖，呢啲事几时会发生呀？将来会有咩征象显示你已经返到嚟我哋呢度*，显示呢个制度*已经到咗末期呢？”

4 耶稣答佢哋：“你哋要小心，唔好俾人误导， 5 因为会有好多人冒我嘅名而嚟，话‘我就系基督’，好多人就被误导嘞。 6 当你哋听到邻近有战争嘅声音，远方有战争嘅消息，都唔使恐慌。因为呢啲事一定会发生，不过末日仲未到。

7 “民族会攻打民族，国家*会攻打国家，一个接一个地方有粮食短缺同地震。 8 呢一切只系苦难*嘅开始。

9 “到时，啲人会迫害你哋，仲会杀死你哋。你哋会因为我嘅名，而俾所有国族憎恨。 10 仲会有好多人放弃信仰*，互相出卖，互相憎恨。 11 会有好多假先知出现，误导好多人； 12 由于不法*嘅事越嚟越多，大多数人嘅爱心都会冷淡落嚟。 13 但系，忍耐到底嘅人，必定得救。 14 呢个王国嘅好消息会传遍天下*，所有国族都会听到*，到时末日就会嚟到。

15 “但以理先知提过‘有一个可憎之物会造成荒凉’，你哋会见到佢企喺圣地（读呢句话嘅人要辨明含意）， 16 当你哋见到呢件事，喺犹地亚嘅人就应该逃走上山。 17 喺屋顶嘅，唔好返入屋攞嘢； 18 喺田度嘅，唔好返入屋拎外衣。 19 喺嗰段时期，怀孕嘅妇女同喂奶嘅妈妈*有祸嘞！ 20 你哋要不断祷告，祈求你哋唔需要喺冬天或者安息日逃难。 21 因为到时会有大患难，噉样嘅患难，由人类被创造直到而家都冇发生过，将来都绝对唔会再发生。 22 如果唔系嗰段时期被缩短，就冇人可以得救嘞。不过，为咗被上帝拣选嘅人，嗰段时期系会被缩短㗎。

23 “到时，如果有人同你哋讲‘基督喺呢度呀’，或者话‘基督喺嗰度呀’，你哋唔好相信。 24 因为会有假基督同假先知出现，佢哋会施行令人惊讶嘅神迹同埋做奇异嘅事，就连被拣选嘅人都想迷惑*。 25 要记住！我预先警告咗你哋嘞。 26 所以，如果有人对你哋讲‘基督喺旷野呀’，你哋唔好去；或者话‘基督喺隐蔽嘅地方㖞’，你哋唔好信。 27 因为人子返到你哋呢度嘅时候*会好似闪电喺东边发出，连西边都可以见到噉样。 28 尸体喺边度，鹰就聚集喺边度。

29 “嗰段患难嘅时期一过，太阳就会变黑，月亮唔会再有光芒，星辰会从天上坠落，天上嘅力量会动摇。 30 到时，表明人子嚟到嘅神迹*会喺天上出现，于是地上所有民族都悲痛捶胸，佢哋会见到人子喺天云带住力量，以充满荣耀嘅方式嚟到。 31 当响亮嘅号筒声发出，人子会派佢嘅天使去，从四方，由天嘅一边到另一边，聚集嗰啲被拣选嘅人。

32 “用无花果树打个比喻吖：树开始出嫩枝，生啲新叶出嚟，你哋就知道夏天好快到嘞。 33 同样，当你哋见到呢一切发生，就知道人子好快到嘞*。 34 我可以好肯定噉同你哋讲，喺呢一代人消逝之前，呢一切一定会发生。 35 天地都会消逝，但系我嘅说话绝对唔会消逝。

36 “至于几时系嗰个日子、嗰个时刻，边个都唔知道，天上嘅天使唔知道，人子*亦都唔知道，净系得我嘅爸爸知道。 37 挪亚嘅时代系点样，将来人子返到你哋呢度嘅时候*都会系点样。 38 大洪水之前嘅时代，人挂住吃喝嫁娶，直到挪亚入方舟嘅嗰一日； 39 佢哋完全唔理听到同睇到嘅嘢，大洪水嚟到，就将佢哋全部冲走嘞。将来人子返到你哋呢度嘅时候*都会系噉。 40 到时，两个男人喺田里面做嘢，一个被接走，一个被舍弃。 41 两个女人推住一个手磨，一个被接走，一个被舍弃。 42 所以，要不断守望，因为你哋唔知道你哋嘅主喺乜嘢日子嚟到。

43 “试谂吓，一个家主如果一早知道夜晚几时*有贼嚟，就会保持警醒，唔会俾个贼偷偷入屋。 44 所以你哋都要做好准备，因为人子会喺你哋认为冇乜可能嘅时刻嚟到。

45 “到底边个系忠信睿智嘅奴隶，受主人委派管理佢嘅仆役，喺适当嘅时候供应食物俾佢哋呢？ 46 佢嘅主人嚟到，见到奴隶噉样做紧，奴隶就有福嘞*！ 47 我可以好肯定噉同你哋讲，主人会委派佢管理所有财物。

48 “但系，如果嗰个奴隶系邪恶嘅，心谂‘主人唔会咁快返嚟嘅’， 49 仲郁手打其他奴隶，又同醉酒嘅人饮饮食食， 50 噉奴隶嘅主人就会喺佢估唔到嘅日子，喺佢唔知道嘅时刻嚟到， 51 用最严厉嘅方式惩罚佢，佢会同虚伪嘅人有一样嘅下场。喺嗰度佢会痛哭流泪，咬牙切齿。”