KALƐ

1 Kɛ Izraɛlifuɛ’m be fin Ezipti lɔ fiteli’n, i afuɛ nɲɔn su, i anglo nɲɔn su, i cɛn ba klikli’n su’n,+ Zoova kannin ndɛ kleli Moizi, tannin sua mɔ Ɲanmiɛn yi i wun nglo nun’n, i nun.+ Kɛ ɔ́ yó sɔ’n, nn Izraɛlifuɛ’m b’a ju Sinai aawlɛ flɛnnɛn’n nun.+ Ɔ seli kɛ: 2 “Amun ka Izraɛlifuɛ’m* be kwlaa. Amun nian be awlobo’n nin be si’m be awlo’m be nun, naan amun klɛ yasua’m be kwlaa be dunman+ kunngunngun* naan amun ka be. 3 A nin Aarɔn, amun nian be akpasuaakpasua’m be nun naan be nga be le afuɛ ablaɔn (20) nin afuɛ ablaɔn tra su+ mɔ be kwla yo Izraɛli sonja’n, amun klɛ be kwlaa be dunman.

4 “Akpasua kwlaa nun’n, amun fa yasua kun. Maan sran sɔ’n yo i si’m be awlo’m be su kpɛn.+ 5 Yasua nga bé wá úka amun’n, be dunman mun yɛ: Ribɛnin akpasua’n nun’n, amun fa Elizii+ m’ɔ ti Sedeu i wa’n, 6 Simeɔn akpasua’n nun’n, amun fa Selumiɛli+ m’ɔ ti Zirisadai i wa’n, 7 Zida akpasua’n nun’n, amun fa Nasɔn+ m’ɔ ti Aminadabu i wa’n, 8 Isakaa akpasua’n nun’n, amun fa Netanɛli+ m’ɔ ti Ziaa i wa’n, 9 Zabilɔn akpasua’n nun’n, amun fa Eliabu+ m’ɔ ti Elɔn i wa’n, 10 Zozɛfu i mma’m be nun’n, Efraimun+ akpasua’n nun’n, amun fa Elisama m’ɔ ti Amiidi i wa’n. Manase akpasua’n nun’n, amun fa Gamaliɛli m’ɔ ti Pedazu i wa’n, 11 Bɛnzamɛn akpasua’n nun’n, amun fa Abidan+ m’ɔ ti Gideɔnin i wa’n, 12 Dan akpasua’n nun’n, amun fa Aiezɛɛ+ m’ɔ ti Amisadai i wa’n, 13 Azɛɛ akpasua’n nun’n, amun fa Paziɛli+ m’ɔ ti Okran i wa’n, 14 Gadi akpasua’n nun’n, amun fa Eliasafu+ m’ɔ ti Deiɛli i wa’n, 15 Nɛftali akpasua’n nun’n, amun fa Aira+ m’ɔ ti Enan i wa’n. 16 Sran nga be yiali be’n, be yɛ be o lɛ-ɔ. Sran sɔ’m be ti be si’m be akpasua’m be su kpɛn.+ Be ti Izraɛlifuɛ akpi su kpɛn.”+

17 Moizi nin Aarɔn be fali yasua sɔ mɔ be boli be dunman lɛ’n. 18 Anglo nɲɔn su’n, i cɛn ba klikli’n su’n, be yiali Izraɛlifuɛ’m be wunmuan’n. I liɛ’n, bé nían kɛ be awlobo’n nin be si’m be awlo’m be fa ti’n su naan bé klɛ́ be nga be le afuɛ ablaɔn (20) nin afuɛ ablaɔn (20) tra su’n be tinuntinun be dunman.+ 19 I sɔ yɛ Zoova seli Moizi kɛ ɔ yo-ɔ. Ɔ maan ɔ klɛli be kwlaa be dunman Sinai aawlɛ flɛnnɛn’n nun lɔ.+

20 Be niannin Ribɛnin m’ɔ ti Izraɛli i wa kpɛn’n i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be tinuntinun be dunman-ɔn. 21 Ribɛnin akpasua’n nunfuɛ nga be klɛli be dunman’n, be ti akpiakpi ablanan-nin-nsiɛn nin ya nnun (46.500).

22 Be niannin Simeɔn i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be tinuntinun be dunman-ɔn. 23 Simeɔn akpasua’n nunfuɛ nga be klɛli be dunman’n, be ti akpiakpi ablenun-nin-ngwlan nin ya nsan (59.300).

24 Be niannin Gadi i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 25 Gadi akpasua’n nunfuɛ nga be klɛli be dunman’n, be ti akpiakpi ablanan-nin-nnun nin ya nsiɛn ablenun (45.650).

26 Be niannin Zida i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 27 Zida akpasua’n nunfuɛ nga be klɛli be dunman’n, be ti akpiakpi ableso-nin-nnan nin ya nsiɛn (74.600).

28 Be niannin Isakaa i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 29 Isakaa akpasua’n nunfuɛ nga be klɛli be dunman’n, be ti akpiakpi ablenun-nin-nnan nin ya nnan (54.400).

30 Be niannin Zabilɔn i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 31 Zabilɔn akpasua’n nunfuɛ nga be klɛli be dunman’n, be ti akpiakpi ablenun-nin-nso nin ya nnan (57.400).

32 Be niannin Zozɛfu i wa Efraimun i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 33 Efraimun akpasua’n nunfuɛ nga be klɛli be dunman’n, be ti sran akpiakpi ablanan nin ya nnun (40.500).

34 Be niannin Manase i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 35 Manase akpasua’n nunfuɛ nga be klɛli be dunman’n, be ti sran akpiakpi ablasan-nin-nɲɔn nin ya nɲɔn (32.200).

36 Be niannin Bɛnzamɛn i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 37 Bɛnzamɛn akpasua’n nunfuɛ nga be klɛli be dunman’n, be ti akpiakpi ablasan-nin-nnun nin ya nnan (35.400).

38 Be niannin Dan i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 39 Dan akpasua’n nunfuɛ nga be klɛli be dunman’n, be ti akpiakpi ablesiɛn-nin-nɲɔn nin ya nso (62.700).

40 Be niannin Azɛɛ i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 41 Azɛɛ akpasua’n nunfuɛ nga be klɛli be dunman’n, be ti sran akpiakpi ablanan-nin-kun nin ya nnun (41.500).

42 Be niannin Nɛftali i osu’n nun,+ yɛ be kali yasua nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n be kwlaa. Kɛ be awlobo’n nin be si’m be awlo’m be fa ti’n, i su yɛ be niannin naan b’a klɛ be dunman-ɔn. 43 Nɛftali akpasua’n nunfuɛ nga be klɛli be dunman’n, be ti akpiakpi ablenun-nin-nsan nin ya nnan (53.400).

44 Moizi nin Aarɔn nin Izraɛli lɔ kpɛnngbɛn blu-nin-nɲɔn (12) mɔ be ti be si’m be awlo’m be su kpɛn’n, be klɛli sran kwlaa sɔ’m be dunman. 45 Izraɛlifuɛ nga be le afuɛ ablaɔn (20) nin afuɛ ablaɔn (20) tra su mɔ be kwla di sonja’n, be si’m be awlo’m be su kpɛn’m be klɛli be kwlaa be dunman. 46 Be kwlaa nga be klɛli be dunman’n, be ti akpiakpi ya nsiɛn akpi nsan ya nnun ablenun (603.550).+

47 Sanngɛ b’a klɛman Levi+ akpasua’n nun awlobo’m be dunman’n b’a wlaman be nun wie.+ 48 Zoova seli Moizi kɛ: 49 “Levi akpasua’n nunfuɛ’m be liɛ’n, nán klɛ be dunman. Yɛ nán ka be wla Izraɛlifuɛ onga’m be nun.+ 50 Fa Aenguɛ’n* i tannin sua’n,+ nin i nun ninnge mun ɔ nin i wun ninnge kwlaa wlɛ i Levifuɛ’m be sa nun.+ Maan be sua tannin sua’n nin i nun ninnge kwlaa+ nga be fa di nun junman’n. Asa ekun’n, maan be di tannin sua’n nun junman.+ Yɛ maan be nanmue’n sin yia tannin sua’n.+ 51 Sɛ amun waan amún fá tannin sua’n amún kɔ́ amun ɲrun’n, maan Levifuɛ’m be tutu.+ Sɛ kusu amun waan amún kplán tannin sua’n, maan Levifuɛ’m be kplan. Sran nga b’a mɛnmɛn i atin* naan ɔ mɛntɛn i’n, maan be kun i.+

52 Wafa nga be bubuli Izraɛlifuɛ’m be nun mɔ be tran akpasua nsannsan’n,*+ maan sran kun niɛn i akpasua liɛ’n naan ɔ kplɛn i tannin sua’n nanmue nga be kleli i’n nun. 53 Maan Levifuɛ’m be tran sin yia Aenguɛ’n* i tannin sua’n. I liɛ’n, n su faman Izraɛlifuɛ’m be wun ya.+ Asa ekun’n, maan Levifuɛ’m be nian Aenguɛ’n* i tannin sua’n, i lika.”*+

54 Ndɛ nga Zoova kan kleli Moizi’n, Izraɛlifuɛ’m be niɛnnin i kwlaa’n su be yoli i sɛsɛsɛ.

2 Zoova seli Moizi nin Aarɔn be kɛ: 2 “Wafa nga be bubuli Izraɛlifuɛ’m be nun mɔ be tran akpasua nsannsan’n,+ maan sran kun nian kɛ i akpasua liɛ’n wo’n, naan ɔ tran i si’m be awlo’m be flanga’n* i wun lɛ. Maan be tranwlɛ’n i ɲrun kaci kan tannin sua mɔ n yi min wun nglo nun’n wo lɔ’n, yɛ maan be sin yiɛ i.

3 “Be nga bé trán wia afiliɛ lɔ’n, be yɛle sonja akpasua nsan nga Zida akpasua’n yɛ ɔ dun be ɲrun’n. Maan sonja’m be tran akpasuaakpasua. Nasɔn+ m’ɔ ti Aminadabu i wa’n yɛ ɔ ti Zida i osu’n nunfuɛ’m be su kpɛn-ɔn. 4 I sran nga be klɛli be dunman mɔ be kwla di sonja’n, be ti akpiakpi ableso-nin-nnan nin ya nsiɛn (74.600).+ 5 Be nga bé trán be wun lɛ’n, be yɛle Isakaa akpasua’n nunfuɛ mun. Netanɛli+ m’ɔ ti Ziaa i wa’n yɛ ɔ ti Isakaa i osu’n nunfuɛ’m be su kpɛn-ɔn. 6 I sran nga be klɛli be dunman mɔ be kwla di sonja’n, be ti akpiakpi ablenun-nin-nnan nin ya nnan (54.400).+ 7 Be nga bé trán be wun lɛ’n, be yɛle Zabilɔn akpasua’n nunfuɛ mun. Eliabu+ m’ɔ ti Elɔn i wa’n yɛ ɔ ti Zabilɔn i osu’n nunfuɛ’m be su kpɛn-ɔn. 8 I sran nga be klɛli be dunman mɔ be kwla di sonja’n be ti sran akpiakpi ablenun-nin-nso nin ya nnan (57.400).+

9 “Sonja nga Zida akpasua’n yɛ ɔ dun be ɲrun’n, be kwlaa be ti sran akpiakpi ya akpiakpi ablaɔcuɛ-nin-nsiɛn nin ya nnan (186.400). Be yɛ ɔ fata kɛ be dun mmua be tu be bo-ɔ.+

10 “Be nga bé trán ngua lɔ’n, be yɛle sonja akpasua nsan nga Ribɛnin+ akpasua’n yɛ ɔ dun be ɲrun’n. Maan sonja’m be tran akpasuaakpasua. Sedeu m’ɔ ti Elizii+ i wa’n yɛ ɔ ti Ribɛnin i osu’n nunfuɛ’m be su kpɛn-ɔn. 11 I sran nga be klɛli be dunman mɔ be kwla di sonja’n, be ti akpiakpi ablanan-nin-nsiɛn nin ya nnun (46.500).+ 12 Be nga bé trán be wun lɛ’n, be yɛle Simeɔn akpasua’n nunfuɛ mun. Selumiɛli+ m’ɔ ti Zirisadai i wa’n yɛ ɔ ti Simeɔn i osu’n nunfuɛ’m be su kpɛn-ɔn. 13 I sran nga be klɛli be dunman mɔ be kwla di sonja’n, be ti akpiakpi ablenun-nin-ngwlan nin ya nsan (59.300).+ 14 Be nga bé trán be wun lɛ’n, be yɛle Gadi akpasua’n nunfuɛ mun. Eliasafu+ m’ɔ ti Reiɛli i wa’n yɛ ɔ ti Gadi i osu’n nunfuɛ’m be su kpɛn-ɔn. 15 I sran nga be klɛli be dunman mɔ be kwla di sonja’n, be ti akpiakpi ablanan-nin-nnun nin ya nsiɛn ablenun (45.650).+

16 “Sonja nga Ribɛnin akpasua’n yɛ ɔ dun be ɲrun’n, be kwlaa be ti akpiakpi ya akpiakpi ablenun-nin-kun nin ya nnan ablenun (151.450). Be bo tulɛ’n nun’n, be yɛ be ti be nɲɔn su’n niɔn.+

17 “Kɛ bé fá tannin sua mɔ n yi min wun nglo nun’n bé kɔ́’n,+ maan Levi akpasua nunfuɛ’m be ka Izraɛlifuɛ onga’m be afiɛn.

“Kɛ bé kɔ́’n, maan be nian wafa nga be tran’n su be wɔ.+ Maan sran kun nin sonja akpasua nsan nga i nun yɛ ɔ wo’n, be wɔ.

18 “Be nga bé trán wia atɔliɛ lɔ’n, be yɛle sonja akpasua nsan nga Efraimun akpasua’n yɛ ɔ dun be ɲrun’n. Maan sonja’m be tran akpasuaakpasua. Elisama+ m’ɔ ti Amiidi i wa’n yɛ ɔ ti Efraimun i osu’n nunfuɛ’m be su kpɛn-ɔn. 19 I sran nga be klɛli be dunman mɔ be kwla di sonja’n, be ti sran akpiakpi ablanan nin ya nnun (40.500).+ 20 Be nga bé trán be wun lɛ’n, be yɛle Manase akpasua’n nunfuɛ mun.+ Gamaliɛli+ m’ɔ ti Pedazu i wa’n yɛ ɔ ti Manase i osu’n nunfuɛ’m be su kpɛn-ɔn. 21 I sran nga be klɛli be dunman mɔ be kwla di sonja’n, be ti akpiakpi ablasan-nin-nɲɔn nin ya nɲɔn (32.200).+ 22 Be nga bé trán be wun lɛ’n, be yɛle Bɛnzamɛn akpasua’n nunfuɛ mun. Abidan+ m’ɔ ti Gideɔnin i wa’n yɛ ɔ ti Bɛnzamɛn i osu’n nunfuɛ’m be su kpɛn-ɔn. 23 I sran nga be klɛli be dunman mɔ be kwla di sonja’n, be ti akpiakpi ablasan-nin-nnun nin ya nnan (35.400).+

24 “Sonja nga Efraimun akpasua’n yɛ ɔ dun be ɲrun’n, be kwlaa be ti akpiakpi ya akpi mɔcuɛ nin ya kun (108.100). Be bo tulɛ’n nun’n, be yɛ be ti be nsan su’n niɔn.+

25 “Be nga bé trán nglo lɔ’n, be yɛle sonja akpasua nsan nga Dan akpasua’n yɛ ɔ dun be ɲrun’n. Maan sonja’m be tran akpasuaakpasua. Aiezɛɛ+ m’ɔ ti Amisadai i wa’n yɛ ɔ ti Dan i osu’n nunfuɛ’m be su kpɛn-ɔn. 26 I sran nga be klɛli be dunman mɔ be kwla di sonja’n, be ti akpiakpi ablesiɛn-nin-nɲɔn nin ya nso (62.700).+ 27 Be nga bé trán be wun lɛ’n, be yɛle Azɛɛ akpasua’n nunfuɛ mun. Paziɛli+ m’ɔ ti Okran i wa’n yɛ ɔ ti Azɛɛ i osu’n nunfuɛ’m be su kpɛn-ɔn. 28 I sran nga be klɛli be dunman mɔ be kwla di sonja’n, be ti akpiakpi ablanan-nin-kun nin ya nnun (41.500).+ 29 Be nga bé trán be wun lɛ’n, be yɛle Nɛftali akpasua’n nunfuɛ mun. Aira+ m’ɔ ti Enan i wa’n yɛ ɔ ti Nɛftali i osu’n nunfuɛ’m be su kpɛn-ɔn. 30 I sran nga be klɛli be dunman mɔ be kwla di sonja’n, be ti akpiakpi ablenun-nin-nsan nin ya nnan (53.400).+

31 “Sonja nga Dan akpasua’n yɛ ɔ dun be ɲrun’n, be kwlaa be ti akpiakpi ya akpiakpi ablenun-nin-nso nin ya nsiɛn (157.600). Be bo tulɛ’n nun’n, be yɛ be ka siɛn-ɔn.+ Kɛ bé kɔ́’n, maan sran kun nin sonja akpasua nsan nga i nun yɛ ɔ wo’n, be wɔ.”

32 Izraɛlifuɛ nga be klɛli be dunman’n be yɛ be o lɛ-ɔ. Kɛ be si’m be awlo’m be fa ti’n i su yɛ be niannin be klɛli be dunman-ɔn. Be kwlaa nga be klɛli be dunman mɔ be kwla di sonja’n, be ti akpiakpi ya nsiɛn akpi nsan ya nnun ablenun (603.550).+ 33 Sanngɛ b’a klɛman Levifuɛ’m be dunman+ b’a wlaman Izraɛlifuɛ onga’m be nun.+ Afin i sɔ yɛ Zoova waan Moizi yo-ɔ. 34 Izraɛlifuɛ’m be yoli like kwlaa nga Zoova seli Moizi kɛ be yo’n. Kɛ be nin sonja akpasua nsan nga i nun yɛ be wo’n,+ bé bó be nanmue’n, annzɛ bé tú be bo’n,+ wafa nga be awlobo’n nin be si’m be awlo’m be fa ti’n, i su yɛ be nian-ɔn.

3 I nun mɔ Zoova kán ndɛ klé Moizi Sinai oka’n su lɔ’n,+ nn Moizi nin Aarɔn be osu’n nunfuɛ mun yɛ. 2 Aarɔn i mma’m be dunman mun yɛ: I wa kpɛn’n suan Nadabu. I sinma mun yɛle Abiu+ nin Eleazaa+ nin Itamaa.+ 3 Aarɔn i mma’m be dunman mun yɛ be o lɛ-ɔ. Be yɛ be guali be ti su ngo mɔ be sieli be kɛ be yo Ɲanmiɛn ɲrun jranfuɛ’n niɔn.+ 4 Sanngɛ Nadabu nin Abiu be wuli Zoova i ɲrun lɛ. Afin be fali sin ng’ɔ nin i fataman’n, be fa sieli i Zoova ɲrun+ Sinai aawlɛ flɛnnɛn’n nun lɔ. B’a wuman ba. Eleazaa+ nin Itamaa+ be nin be si Aarɔn yɛ be dili Ɲanmiɛn ɲrun jranlɛ junman’n niɔn.

5 I sin’n, Zoova seli Moizi kɛ: 6 “Fa Levifuɛ mun+ wunnge wa, fa be sie i Aarɔn m’ɔ ti min ɲrun jranfuɛ’n i ɲrun lɛ naan be ukɛ+ i. 7 Maan be di junman ng’ɔ fata kɛ be di man Aarɔn nin Izraɛlifuɛ’m be kwlaa’n tannin sua mɔ n yi min wun nglo nun’n, i ɲrun lɛ. Yɛle kɛ be di min tannin sua’n i wun junman mun. 8 Maan be nian tannin sua mɔ n yi min wun nglo nun’n, i nun ninnge’m be kwlaa+ be lika. Yɛ maan be di junman ng’ɔ fata kɛ be di man Izraɛlifuɛ mun’n. Yɛle kɛ be di min tannin sua’n i wun junman mun.+ 9 Fa Levifuɛ mun man Aarɔn nin i mma mun. Be fali sran sɔ mun mannin. Yɛle kɛ be fali be Izraɛlifuɛ’m be nun be mɛnnin i.+ 10 Fa min ɲrun jranlɛ junman’n wla Aarɔn nin i mma’m be sa nun. Min ɲrun jranlɛ junman’n yɛ ɔ fata kɛ be di-ɔ.+ Sran kwlaa nga b’a mɛnmɛn i atin* m’ɔ mantan min lika’n, maan be kun i.”+

11 Zoova kannin ndɛ kleli Moizi ekun. Ɔ seli kɛ: 12 “Nian, m’an fa Levifuɛ mun Izraɛlifuɛ’m be nun naan be sin Izraɛlifuɛ’m be wa klikli’m be osu.+ Levifuɛ’m bé káci min liɛ. 13 Afin ba klikli’m be ti min liɛ.+ I nun mɔ n kunnin Ezipti lɔ ba klikli mun’n,+ n sieli Izraɛlifuɛ’m be mma klikli mun ɔ nin be nnɛn’m be mma klikli’m be ngunmin naan be yo min liɛ klonglo.+ Ɔ fata kɛ be yo min liɛ. Zoova yɛle min.”

14 Zoova kannin ndɛ kleli Moizi Sinai aawlɛ flɛnnɛn’n+ nun ekun. Ɔ seli kɛ: 15 “Nian kɛ Levifuɛ’m be awlobo mun nin be si’m be awlo’n be fa ti’n su naan klɛ be nun yasua’m be dunman. Klɛ ba yasua nga b’a di anglo kun annzɛ anglo kun tra su’n, be kwlaa be dunman.”+ 16 Moizi niannin ndɛ nga Zoova kan kleli i’n su sɛsɛsɛ yoli. Yɛle kɛ ɔ klɛli be dunman. 17 Levi i mma’m be dunman mun yɛ: Gɛɛsɔn, Keati, yɛ Merari.+

18 Gɛɛsɔn i mma mɔ be dunman’n kali be awlobo’m be su’n be yɛ: Libnin nin Simei.+

19 Keati i mma mɔ be dunman’n kali be awlobo’m be su’n be yɛ: Amramun nin Izeari nin Ebrɔn ɔ nin Uziɛli.+

20 Merari i mma mɔ be dunman’n kali be awlobo’m be su’n be yɛ: Mali+ nin Misi.+

Levifuɛ’m be si’m be awloboawlobo mun yɛ be o lɛ-ɔ.

21 Gɛɛsɔn i osu’n nun yɛ Libninfuɛ+ mun nin Simeifuɛ’m be awlobo’m be fin-ɔn. Gɛɛsɔnfuɛ’m be awloboawlobo mun yɛ be o lɛ-ɔ. 22 Ba yasua nga b’a di anglo kun nin anglo kun tra su mɔ be klɛli be dunman’n, be kwlaa be ti akpi nso ya nnun (7.500).+ 23 Gɛɛsɔnfuɛ’m be awlobo’m be boli be nanmue Ɲanmiɛn i tannin sua’n i sin lɔ,+ wia atɔliɛ lɔ lika’n nun. 24 Gɛɛsɔnfuɛ’m be si’m be awlobo’m be su kpɛn’n yɛle Eliasafu m’ɔ ti Laɛli i wa’n. 25 Junman ng’ɔ fata kɛ Gɛɛsɔn i mma’m+ be di i tannin sua mɔ n yi min wun nglo nun’n i nun’n, yɛle kɛ be nian min tannin sua’n,+ nin tannin fanunfanun nga be o su’n,+ nin rido+ ng’ɔ o tannin sua mɔ n yi min wun nglo nun’n i anuan’n nun’n, be lika. 26 Asa ekun’n, maan be nian tannin+ nga be fa bo sin yiali awlo’n, nin awlo mɔ Ɲanmiɛn i tannin sua’n nin tɛ yiwlɛ’n be o i klun’n i anuan’n nun rido’n,+ ɔ nin i ɲanman’m be lika. Be yɛ be siesie ninnge kwlaa sɔ mun-ɔn.

27 Keati i osu’n nun yɛ Amramunfuɛ mun nin Izearifuɛ mun nin Ebrɔnfuɛ mun nin Uziɛlifuɛ’m be awlobo’m be fin-ɔn. Keatifuɛ’m be awloboawlobo mun yɛ be o lɛ-ɔ.+ 28 Ba yasua nga b’a di anglo kun nin anglo kun tra su mɔ be klɛli be dunman’n, be kwlaa be ti akpi mɔcuɛ ya nsiɛn (8.600). Be yɛ be nian lika m’ɔ ti Ɲanmiɛn liɛ’n i lika-ɔ.+ 29 Keatifuɛ’m be awlobo’m be boli be nanmue Ɲanmiɛn i tannin sua’n i ngua lɔ lika’n nun.+ 30 Keatifuɛ’m be si’m be awloboawlobo’m be su kpɛn’n yɛle Ɛlizafan m’ɔ ti Uziɛli i wa’n.+ 31 Junman ng’ɔ fata kɛ be di’n yɛle Alaka’n,+ nin tabli’n,+ nin kannin siewlɛ’n,+ nin tɛ yiwlɛ mun,+ nin ninnge+ nga be fa di junman lika m’ɔ ti Ɲanmiɛn liɛ’n nun’n, nin rido’n,*+ be lika nianlɛ. Be yɛ be siesie ninnge kwlaa sɔ mun-ɔn.+

32 Levifuɛ’m be kpɛnngbɛn’m be kwlaa be su kpɛn’n, yɛle Eleazaa.+ Aarɔn m’ɔ ti Ɲanmiɛn ɲrun jranfuɛ’n i wa-ɔ. I yɛ ɔ nian be nga be di junman lika m’ɔ ti Ɲanmiɛn liɛ’n nun’n, be kwlaa be su-ɔ.

33 Merari i osu’n nun yɛ Malifuɛ mun nin Misifuɛ’m be awlobo’m be fin-ɔn. Merarifuɛ’m be awloboawlobo mun yɛ be o lɛ-ɔ.+ 34 Ba yasua nga b’a di anglo kun nin anglo kun tra su mɔ be klɛli be dunman’n, be kwlaa be ti akpi nsiɛn ya nɲɔn (6.200).+ 35 Merarifuɛ’m be si’m be awloboawlobo’m be su kpɛn’n yɛle Ziriɛli m’ɔ ti Abiaili i wa’n. Merarifuɛ’m be awlobo’m be boli be nanmue Ɲanmiɛn i tannin sua’n i nglo lɔ lika’n nun.+ 36 Junman ng’ɔ fata kɛ Merarifuɛ’m be di’n, yɛle Ɲanmiɛn i tannin sua’n i kadri mun+ nin waka trolotrolo mun,+ nin sua ja mlomlo mun,+ nin sua ja mlomlo’m be takawlɛ mun, ɔ nin sua’n i nun ninnge mun+ be lika nianlɛ. Be yɛ be siesie ninnge kwlaa sɔ mun-ɔn.+ 37 Asa ekun’n, be nian waka mlomlo nga be fa bo sin yiali awlo’n, nin waka’m be ja takawlɛ mun,+ nin kpɛngbɛ nga be fa tra tannin nga be fa bo sin yiali awlo’n be ase’n, ɔ nin tannin sɔ’m be ɲanman mun be lika.

38 Moizi nin Aarɔn nin i mma’m be boli be nanmue Ɲanmiɛn i tannin sua’n i ɲrun lɛ wia afiliɛ lɔ bue liɛ’n su, yɛle kɛ tannin sua mɔ Ɲanmiɛn yi i wun nglo nun’n i ɲrun lɛ. Be yɛ be nian lika m’ɔ ti Ɲanmiɛn liɛ’n, i lika be man Izraɛlifuɛ mun-ɔn. Sran kwlaa nga b’a mɛnmɛn i atin* m’ɔ mantan sua’n, saan bé kún i.+

39 Moizi nin Aarɔn be yoli like nga Zoova seli be kɛ be yo’n. Be niannin kɛ Levifuɛ’m be awlobo’m be fa ti’n su kpɛkun be klɛli be nun yasua nga b’a di anglo kun nin anglo kun tra su’n, be dunman. Be kwlaa be ti akpiakpi ablaɔn-nin-nɲɔn (22.000).

40 I sin’n, Zoova seli Moizi kɛ: “Klɛ Izraɛlifuɛ’m be mma yasua klikli nga b’a di anglo kun nin anglo kun tra su’n,+ be kwlaa be dunman. Kpɛkun ka be. 41 Fa Levifuɛ mun man min naan be sin Izraɛlifuɛ’m be mma klikli’m be kwlaa be osu.+ Kpɛkun fa Levifuɛ’m be nnɛn mun naan be sin Izraɛlifuɛ’m be nnɛn’m be mma klikli’m be kwlaa be osu. Zoova yɛle min.”+ 42 Moizi niannin like nga Zoova seli i kɛ ɔ yo’n i su sɛsɛsɛ yoli. Ɔ klɛli Izraɛlifuɛ’m be mma klikli’m be kwlaa be dunman. 43 Izraɛlifuɛ’m be mma yasua klikli nga b’a di anglo kun nin anglo kun tra su mɔ be klɛli be dunman’n, be kwlaa be ti akpiakpi ablaɔn-nin-nɲɔn ya nɲɔn ableso-nin-nsan (22.273).

44 Zoova seli Moizi ekun kɛ: 45 Fa Levifuɛ mun naan be sin Izraɛlifuɛ’m be mma klikli’m be kwlaa be osu. Yɛ fa Levifuɛ’m be nnɛn mun naan be sin Izraɛlifuɛ’m be nnɛn’m be osu. Maan Levifuɛ’m be kaci min liɛ. Zoova yɛle min. 46 Kɛ a kali Izraɛlifuɛ nin Levifuɛ’m be mma klikli mun’n, Izraɛlifuɛ’m be wa ya nɲɔn ableso-nin-nsan (273) nga be tɔ su’n,+ fa sika fa kpɔ be ti.+ 47 Sran kun i ti sika nga á fá’n ti sikli nnun.*+ Maan be nian Ɲanmiɛn i sua’n nun lɔ sikli liɛ’n* su naan b’a sunnzun. Sikli kun ti gera ablaɔn (20).*+ 48 Fɛ i sɔ sika’n man Aarɔn nin i mma mun. Ba nga be tɔli su’n, be ti kpɔlɛ sika-ɔ.” 49 Be nga be tɔli su mɔ Levifuɛ’m b’a kwlá sinman be osu’n, Moizi fali be ti kpɔlɛ sika nga be mannin’n. 50 Sika ng’ɔ fɛli i Izraɛlifuɛ’m be mma klikli’m be sa nun’n, ɔ ti sikli akpi kun ya nsan ablesiɛn-nin-nnun (1.365). Ɲanmiɛn i sua’n nun lɔ sikli liɛ’n i su yɛ be niannin naan b’a sunnzun-ɔn. 51 Moizi niannin like nga Zoova seli i kɛ ɔ yo’n su sɛsɛsɛ yoli. Ɔ fali be ti kpɔlɛ sika’n wlali Aarɔn nin i mma’m be sa nun, kɛ nga Zoova waan ɔ yo’n sa.

4 Zoova seli Moizi nin Aarɔn be kɛ: 2 “Amun nian Levifuɛ’m be nun naan amun klɛ Keati i mma’m+ be dunman. Amun nian kɛ be awlobo mun nin be si’m be awlo’n be fa ti’n su, naan amun klɛ 3 be kwlaa nga be le afuɛ ablasan (30)+ lele m’ɔ́ fá jú afuɛ ablenun’n (50),+ mɔ be o be nga be mannin be junman tannin sua mɔ n yi min wun nglo nun’n be nun’n,+ be dunman.

4 “Junman ng’ɔ fata kɛ Keatifuɛ’m be di i tannin sua mɔ n yi min wun nglo nun’n i nun’n,+ yɛ ɔ o lɛ-ɔ. Ɔ ti min liɛ klonglo. 5 Kɛ amún tú amun bo’n, maan Aarɔn nin i mma’m be wlu tannin sua’n nun. Yɛ maan be yi rido+ ng’ɔ kpɛ lika’n nun’n, naan be fa kata Mmla’n* i alaka’n+ su. 6 Maan be fa tannin nga nzue nun nnɛn nga be flɛ i fɔku’n i kplo yɛ be fa yoli’n, be kata su. Kpɛkun maan be fa tannin kun mɔ i wunmuan’n ti ble’n, be fa sie su. Yɛ maan be siesie waka nga be fa sua’n.+

7 “Asa ekun’n, maan be fa tannin ble kun be sɛ i tabli’n nga be sie su kpanwun+ nga be fa man Ɲanmiɛn’n su. Kpɛkun maan be fa kpongbo pɛplɛɛplɛ mun, nin klowa mun, nin kpongbo ba mun, nin ondoman nga be fa nzan nga be guɛ i tɛ yiwlɛ’n su’n be gua nun’n,+ be fa be sie su. Maan kpanwun nga be fa man Ɲanmiɛn’n,+ ɔ tran su titi. 8 Maan be fa tannin ɔkwlɛ bioun kun be fa sɛ be su. Yɛ maan be fa tannin nga fɔku kplo yɛ be fa yoli’n, be kata tabli’n su. Kpɛkun maan be siesie waka nga be fa sua’n.+ 9 I sin’n, maan be fa tannin ble kun kata kannin siewlɛ’n+ nin kannin mun+ nin pɛnsi mun, nin sin guawlɛ mun,+ ɔ nin ninnge nga kannin’m be ngo’n wo nun’n be su. 10 Maan be fa tannin kun mɔ fɔku kplo yɛ be fa yoli’n, be cici i nin i su ninnge kwlaa be wun. Yɛ be fa sie waka kun su naan be sua. 11 Maan be fa tannin ble kun fa sɛ sika ɔkwlɛ tɛ yiwlɛ’n+ su. Kpɛkun maan be fa tannin nga fɔku kplo yɛ be fa yoli’n be kata su. Yɛ maan be siesie waka nga be fa sua’n.+ 12 I sin’n, maan be fa ninnge+ nga be fa di junman titi Ɲanmiɛn i lika’n nun’n, be fa be sie i tannin ble kun nun. Kpɛkun maan be fa tannin kun mɔ fɔku kplo yɛ be fa yoli’n, be kata su. Yɛ maan be fa sie waka kun su naan be sua.

13 “Maan be yi nzuɛn* ng’ɔ o tɛ yiwlɛ’n+ nun’n naan be fa tannin ɔkwlɛ kankan kun fa sɛ su. 14 Yɛ maan be fa ninnge nga be fa di junman tɛ yiwlɛ’n su’n, be sie su. Yɛle kɛ sin guawlɛ mun, nin atiɛ je mun, nin peli mun, nin kpongbo mun, nin tɛ yiwlɛ’n i wun ninnge’m be kwlaa.+ Maan be fa tannin kun mɔ fɔku kplo yɛ be fa yoli’n, be sɛ su. Yɛ maan be siesie i waka nga be fa sua’n.+

15 “Kɛ amún tú amun bo’n, maan Aarɔn nin i mma’m be wie min lika’n+ nin i nun ninnge’m be kwlaa be su kata. Kpɛkun maan Keati i mma’m be wlu lɔ naan be sua be.+ Sanngɛ nán maan be kan min lika’n. Sɛ be kɛn i’n, bé wú.+ Tannin sua mɔ n yi min wun nglo nun’n i nun junman ng’ɔ fata kɛ Keati i mma’m be di’n, yɛ ɔ o lɛ-ɔ.

16 “Aarɔn m’ɔ ti min ɲrun jranfuɛ’n i wa Eleazaa+ yɛ ɔ fata kɛ ɔ nian ngo nga be fa sɔ kannin mun’n,+ nin ansan fanninfannin’n,+ nin ble annzɛ i wunsu ninnge nga be fa man Ɲanmiɛn titi’n, ɔ nin ngo nga be fa gua be ti su’n,+ be su-ɔ. Min tannin sua’n i wunmuan’n nin i nun ninnge kwlaa, yɛle kɛ min lika’n nin ninnge nga be fa di nun junman’n, i yɛ ɔ́ nían be kwlaa be su-ɔ.

17 Zoova seli Moizi nin Aarɔn be ekun kɛ: 18 “Nán maan Keatifuɛ’m be awlobo’m+ be wie nunnun Levifuɛ’m be afiɛn. 19 Sanngɛ amun yo like nga man be naan kɛ bé wúnnge ninnge nga be ti min liɛ klonglo’n+ be wun’n, b’a ka nguan nun, naan b’a wuman. Maan Aarɔn nin i mma’m be wlu lɔ naan be kle be junman kunngun ng’ɔ fata kɛ be di’n, ɔ nin like ng’ɔ fata kɛ sran kun sua’n. 20 Nán maan Keatifuɛ’m be se kɛ bé wlú lɔ bé kó nían ninnge nga be ti min liɛ’n bɔ kaan sa. Afin sɛ be yo sɔ’n, bé wú.”+

21 I sin’n, Zoova seli Moizi kɛ: 22 “Nian kɛ Gɛɛsɔn i mma’m+ be awlobo mun nin be si’m be awlo’n be fa ti’n su naan klɛ be dunman. 23 Klɛ be nga be le afuɛ ablasan (30) lele m’ɔ́ fá jú afuɛ ablenun’n (50), mɔ be o be nga be mannin be junman tannin sua mɔ n yi min wun nglo nun’n be nun’n, be kwlaa be dunman. 24 Ninnge ng’ɔ fata kɛ Gɛɛsɔn i mma’m be nian be lika’n naan be sua’n be yɛ:+ 25 Bé súa min sua’n i tannin mun, tannin sua+ mɔ n yi min wun nglo nun’n, nin i su tannin’n, nin tannin nga be fali fɔku kplo yɛ be fa yoli’n m’ɔ o su’n,+ nin rido ng’ɔ o tannin sua mɔ n yi min wun nglo nun’n i anuan’n nun’n,+ 26 nin tannin nga be siesieli m’ɔ bo sin yia awlo’n,+ nin awlo mɔ min tannin sua’n nin tɛ yiwlɛ’n be o i klun’n i anuan nun rido’n,+ nin be ɲanman mun, nin ninnge kwlaa nga be o nun’n, ɔ nin ninnge kwlaa nga be fa di nun junman’n. Be junman liɛ’n yɛ ɔ o lɛ-ɔ. 27 Aarɔn nin i mma mun yɛ bé nían Gɛɛsɔn i mma’m+ be junman’n nin ninnge kwlaa nga bé súa be’n be su-ɔ. Fa ninnge kwlaa sɔ’m be sualɛ’n wla be sa nun naan ɔ kaci be junman. 28 Tannin sua mɔ n yi min wun nglo nun’n, i nun junman ng’ɔ fata kɛ Gɛɛsɔn i awlobo’m be di’n, yɛ ɔ o lɛ-ɔ.+ Aarɔn m’ɔ ti min ɲrun jranfuɛ’n i wa Itamaa+ yɛ ɔ́ nían be junman’n su-ɔ.

29 “Nian kɛ Merari i mma’m+ be awlobo mun nin be si’m be awlo’n be fa ti’n su naan klɛ be dunman. 30 Klɛ be nga be le afuɛ ablasan (30) lele m’ɔ́ fá jú afuɛ ablenun’n (50), mɔ be o be nga be mannin be junman tannin sua mɔ n yi min wun nglo nun’n be nun’n, be kwlaa be dunman. 31 Tannin sua sɔ’n i ninnge ng’ɔ fata kɛ be sua’n+ be yɛ: Min sua’n i kadri mun,+ nin i waka trolotrolo mun,+ nin sua ja mlomlo mun,+ nin sua ja sɔ’m be takawlɛ mun,+ 32 nin waka mlomlo+ nga be fa bo sin yiali awlo’n, nin waka sɔ’m be ja takawlɛ mun,+ nin kpɛngbɛ nga be fa tra tannin nga be fa bo sin yiali awlo’n be ase’n,+ nin be ɲanman mun, ɔ nin be ninnge kwlaa. Maan be siesie ninnge kwlaa sɔ mun. Kɛ á klé sran kun i like ng’ɔ fata kɛ ɔ sua’n, bo like sɔ’n i dunman’n kle i. 33 Tannin sua mɔ n yi min wun nglo nun’n, i nun junman ng’ɔ fata kɛ Merari i awlobo’m+ be di’n, yɛ ɔ o lɛ-ɔ. Aarɔn m’ɔ ti min ɲrun jranfuɛ’n i wa Itamaa yɛ ɔ́ nían be junman’n su-ɔ.”+

34 Moizi nin Aarɔn nin kpɛnngbɛn’m+ be niannin kɛ Keati i mma’m+ be awlobo mun nin be si’m be awlo’m be fa ti’n su naan b’a klɛ be dunman. Be klɛli 35 be nga be le afuɛ ablasan (30) lele m’ɔ́ fá jú afuɛ ablenun’n (50), mɔ be o be nga be mannin be junman tannin sua mɔ Ɲanmiɛn yi i wun nglo nun’n i nun’n,+ be kwlaa be dunman. 36 Kɛ be niannin be awlobo’m be nun’n, be kwlaa nga be klɛli be dunman’n, be ti akpi nɲɔn ya nso ablenun (2.750).+ 37 Keatifuɛ’m be awlobo’m be nun sran nga be di junman tannin sua mɔ Ɲanmiɛn yi i wun nglo nun’n i nun’n, mɔ be klɛli be dunman’n, be kwlaa yɛ be o lɛ-ɔ. Moizi nin Aarɔn be yoli like nga Zoova seli Moizi kɛ be yo’n. Yɛle kɛ be klɛli be dunman.+

38 Kɛ Gɛɛsɔn i mma’m+ be awlobo mun nin be si’m be awlo’n be fa ti’n su yɛ be niannin naan b’a klɛ be dunman-ɔn. Be klɛli 39 be nga be le afuɛ ablasan (30) lele m’ɔ́ fá jú afuɛ ablenun’n (50), mɔ be o be nga be mannin be junman tannin sua mɔ Ɲanmiɛn yi i wun nglo nun’n be nun’n, be kwlaa be dunman. 40 Kɛ be niannin be awlobo mun nin be si’m be awlo’n be nun’n, be kwlaa nga be klɛli be dunman’n, be ti akpi nɲɔn ya nsiɛn ablasan (2.630).+ 41 Gɛɛsɔn i mma’m be awlobo’m be nun sran nga be di junman tannin sua mɔ Ɲanmiɛn yi i wun nglo nun’n i nun’n mɔ be klɛli be dunman’n, be kwlaa yɛ be o lɛ-ɔ. Moizi nin Aarɔn be yoli like nga Zoova seli be kɛ be yo’n. Yɛle kɛ be klɛli be dunman.+

42 Kɛ Merari i mma’m be awlobo mun nin be si’m be awlo’n be fa ti’n su yɛ be niannin naan b’a klɛ be dunman-ɔn. Be klɛli 43 be nga be le afuɛ ablasan (30) lele m’ɔ́ fá jú afuɛ ablenun’n (50), mɔ be o be nga be mannin be junman tannin sua mɔ Ɲanmiɛn yi i wun nglo nun’n be nun’n,+ be kwlaa be dunman. 44 Kɛ be niannin be awlobo’m be nun’n, be kwlaa nga be klɛli be dunman’n, be ti akpi nsan ya nɲɔn (3.200).+ 45 Merari i mma’m be awlobo’m be nun sran nga be klɛli be dunman’n, be kwlaa yɛ be o lɛ-ɔ. Moizi nin Aarɔn be yoli like nga Zoova seli Moizi kɛ be yo’n. Yɛle kɛ be klɛli be dunman.+

46 Kɛ Levifuɛ sɔ’m be awlobo mun nin be si’m be awlo’n be fa ti’n, i su yɛ Moizi nin Aarɔn nin Izraɛlifuɛ’m be su kpɛnngbɛn’m be niannin naan b’a klɛ be kwlaa be dunman-ɔn. Be klɛli 47 be nga be le afuɛ ablasan (30) lele m’ɔ́ fá jú afuɛ ablenun’n (50), be kwlaa be dunman. Sran sɔ mun yɛ be mannin be junman tannin sua mɔ Ɲanmiɛn yi i wun nglo nun’n i nun-ɔn. Yɛ be yɛ ɔ fata kɛ be sua ninnge nga be o nun’n niɔn.+ 48 Be kwlaa nga be klɛli be dunman’n, be ti akpi mɔcuɛ ya nnun ablaɔcuɛ (8.580).+ 49 Kɛ nga Zoova kan kleli Moizi sa’n, junman ng’ɔ fata kɛ sran kun di’n, ɔ nin like ng’ɔ fata kɛ sran kun sua’n, i su yɛ be niannin naan b’a klɛ be dunman-ɔn. Ndɛ nga Zoova kan kleli Moizi’n, be niannin su sɛsɛsɛ naan b’a klɛ be dunman.

5 Zoova kannin ndɛ kleli Moizi ekun. Ɔ seli i kɛ: 2 “Se Izraɛlifuɛ’m be kɛ be kan sran kwlaa nga kokowe wo i wun’n,+ nin sran nga i wun nzue gua’n,+ ɔ nin sran ng’ɔ kannin fuɛn mɔ w’a tran fiɛn nun’n+ be bo nanmue’n nun. 3 I yasua-o, i bla-o, amun kan be bo naan be jaso nanmue’n nun. I liɛ’n, be su faman fiɛn m’ɔ o be wun’n be saman+ be nga be wo nanmue’n nun mɔ n tran be afiɛn’n.”+ 4 Izraɛlifuɛ’m be niannin su be yoli. Be kannin sran sɔ’m be bo nanmue’n nun. Ndɛ nga Zoova kan kleli Moizi’n, Izraɛlifuɛ’m be niannin su sɛsɛsɛ be yoli.

5 Zoova seli Moizi ekun kɛ: 6 “Se Izraɛlifuɛ’m be kɛ: ‘Sɛ yasua kun annzɛ bla kun yo sa tɛ nga klɔ sran’m be yo’n be nun kun’n, naan ɔ nantiman klanman Zoova ɲrun’n, ɔ fata kɛ ɔ kan sa ng’ɔ yoli’n i su ndɛ.+ 7 Maan ɔ* di sa tɛ ng’ɔ* yoli’n i nanwlɛ.+ Kpɛkun ɔ yi sa ng’ɔ yoli’n i nuan su sika’n man. Sɛ be bu sika sɔ’n nun nnun’n, ɔ fata kɛ ɔ fɛ i bue kun uka su+ naan ɔ fa man sran ng’ɔ yoli i sa’n. 8 Sanngɛ sɛ sran nga be yoli i sa’n i osufuɛ wie nunman lɛ naan b’a fa sika’n b’a mɛn i’n, maan be fa man Zoova. Ɔ́ yó min ɲrun jranfuɛ’n i liɛ. Bua ɲin nga be yi naan be nin Ɲanmiɛn be afiɛn w’a sɛ ekun’n i liɛ’n, maan min ɲrun jranfuɛ’n fa yi i ti tɛ naan e nin i e afiɛn w’a sɛ ekun.+

9 “‘Like kwlaa nga Izraɛlifuɛ’m be waan bé fá mán min+ mɔ be fa kɔ min ɲrun jranfuɛ’n i ja su’n, ɔ ti i liɛ.+ 10 Like kwlaa nga sran kun fá mán min’n, ɔ ti i liɛ. Kannzɛ like nga bé fá mán’n ti sɛ ti sɛ’n, maan ɔ yo min ɲrun jranfuɛ’n i liɛ.’”

11 Zoova seli Moizi ekun kɛ: 12 “Kan ndɛ yɛ’n kle Izraɛlifuɛ mun. Se be kɛ: ‘Wienun-ɔn, yasua kun i yi’n fa atin tɛ yɛ ɔ nin i be nantiman klanman. 13 Sɛ yasua uflɛ nin i be lali+ naan i wun siman sɔ naan b’a wunmɛn i’n, ɔ maan ɔ yoli i wun finfin sanngɛ lalofuɛ fi nunman lɛ naan w’a kan’n, naan b’a trɛmɛn i’n, 14 sɛ i wun’n si i ti kwla naan ɔ bu i kɛ i yi’n nin i be nantiman klanman’n, kannzɛ bɔbɔ bla’n yoli i wun finfin annzɛ w’a yoman’n sɔ’n, 15 maan yasua’n fɛ i yi’n wɔ Ɲanmiɛn ɲrun jranfuɛ’n i ja su. Kɛ ɔ́ kɔ́’n, maan ɔ fa bla’n i ti like ɔ wɔ. Yɛle kɛ maan be bubu ɔɔzu sanmlɛn efa kun nun blu naan ɔ fa bue kun* blɛ min. Nán maan ɔ gua su ngo. Yɛ nán maan ɔ fa ansan ufue sie su. Afin ɔɔzu sɔ mɔ be man’n, ɔ ti kwla silɛ’n i ti like mɔ be yi man-ɔn. Like sɔ mɔ be yi man’n, ɔ kpɛn be wla kɛ be yoli sa tɛ.

16 “‘Maan min ɲrun jranfuɛ’n fa bla’n wɔ naan ɔ fɛ i jran Zoova ɲrun.+ 17 Maan min ɲrun jranfuɛ’n sa nzue klengle m’ɔ o ufa sɛ kun nun’n, yɛ ɔ fa min tannin sua’n nun lɔ asiɛ wun ndutre kan. Kpɛkun maan ɔ fa guɛ i nzue’n nun. 18 Maan min ɲrun jranfuɛ’n yo maan bla’n jran Zoova ɲrun. Maan ɔ ɲannji bla’n i ti mmuɛn’n, kpɛkun ɔ fa like mɔ be yi man m’ɔ kpɛn be wla kɛ be yoli sa tɛ’n wlɛ i bla’n i sa klun. Ɔ ti kwla silɛ’n i ti like mɔ be yi man-ɔn.+ I sin’n, maan min ɲrun jranfuɛ’n fa nzue wiwi mɔ maan ɲrɛnnɛn* tɔ sran su’n.+

19 “‘Maan min ɲrun jranfuɛ’n kan ndɛ kle bla’n naan bla’n ta nda. Maan ɔ se i kɛ: “Kɛ a o ɔ wun bo’n,+ sɛ yasua uflɛ fi nin wɔ b’a laman’n, sɛ w’a faman atin tɛ yɛ w’a yoman ɔ wun finfin’n, nán maan nzue wiwi nga yo maan ɲrɛnnɛn tɔ ɔ su. 20 Sanngɛ sɛ a fali atin tɛ, kusu nn a o ɔ wun bo, yɛ a yoli ɔ wun finfin, kpɛkun a nin yasua uflɛ m’ɔ timan ɔ wun’n be lali’n...”+ 21 Maan min ɲrun jranfuɛ’n kan ndɛ kle bla’n naan bla’n ta nda.* Maan ɔ se bla’n kɛ: “Maan Zoova yo maan kɛ ɔ nvle’n nunfuɛ’m bé bó sannzan annzɛ bé tá nda’n, be bo ɔ dunman. Yɛ maan Zoova yo naan ɔ sɔwa’n* wiewie* ɔ bo, kpɛkun ɔ ku’n wla. 22 Nzue yɛ’n mɔ maan ɲrɛnnɛn tɔ́ ɔ su’n, ɔ́ wlú ɔ klun aya’n nun. Ɔ́ wlá ɔ ku’n, yɛ ɔ́ yó maan ɔ sɔwa’n* wíewíe* ɔ bo.” Maan bla’n tɛ su kɛ: “Maan ɔ yo sɔ! Maan ɔ yo sɔ!”

23 “‘I sin’n, maan min ɲrun jranfuɛ’n klɛ sannzan sɔ mun fluwa’n nun. Yɛ maan ɔ fa nzue wiwi’n nunnun ndɛ ng’ɔ klɛli’n. 24 Kpɛkun maan ɔ fa nzue wiwi’n mɔ maan ɲrɛnnɛn tɔ sran su’n man bla’n kɛ ɔ nɔn. Nzue wiwi sɔ’n wlú i nun, kpɛkun ɔ́ wún ɲrɛnnɛn. 25 Maan min ɲrun jranfuɛ’n fa kwla silɛ’n i ti like mɔ be yi man’n+ bla’n i sa nun, naan ɔ toto wɔ i ɲrun nin i sin Zoova ɲrun. Yɛ maan ɔ fa wɔ tɛ yiwlɛ’n i wun lɔ. 26 Maan min ɲrun jranfuɛ’n fa like mɔ be yi man’n i sa buɛ kun. Ɔ ti like nga be su fa man Ɲanmiɛn’n i nzɔliɛ. Yɛ maan ɔ yrɛ i tɛ yiwlɛ’n su naan wunsrɛn fite.+ I sin’n, maan ɔ fa nzue’n man bla’n kɛ ɔ nɔn. 27 Kɛ bla’n ko nɔn nzue’n, sɛ ɔ yoli i wun finfin’n, naan ɔ yoli sa wie m’ɔ kle kɛ ɔ nin i wun’n b’a nantiman klanman’n, nzue mɔ maan ɲrɛnnɛn tɔ sran su’n, ɔ́ wlú i nun kpɛkun ɔ́ wún ɲrɛnnɛn. I ku’n wlá, i sɔwa’n* wíewíe* i bo. Kpɛkun kɛ i nvle’n nunfuɛ’m bé bó sannzan’n, bé bó i dunman. 28 Sanngɛ sɛ bla’n w’a yomɛn i wun finfin naan fiɛn kaan sa nunmɛn i wun’n, sa sɔ’n su tɔmɛn i su. Ɔ maan ɔ kwla wunnzɛ, yɛ ɔ kwla wu ba.

29 “‘Kwla silɛ’n i su mmla’n yɛ ɔ o lɛ-ɔ.+ Kɛ bla kun fa atin tɛ m’ɔ yo i wun finfin, kusu nn ɔ o i wun bo’n, 30 annzɛ kɛ yasua kun si i yi’n i ti kwla m’ɔ bu i kɛ i yi’n nin i b’a nantiman klanman’n, ɔ fata kɛ ɔ fɛ i yi’n ko jran Zoova ɲrun. Yɛ maan min ɲrun jranfuɛ’n nian mmla kwlaa nga su sɛsɛsɛ. 31 Be su manman yasua’n i ndɛ. Sanngɛ bla’n wá kán sa tɛ ng’ɔ yoli’n i ti ndɛ.’”

6 Zoova seli Moizi ekun kɛ: 2 “Kan ndɛ yɛ’n kle Izraɛlifuɛ mun. Se be kɛ: ‘Sɛ yasua kun annzɛ bla kun ta nda kun m’ɔ ti i liɛ ngunmin kɛ ɔ́ yó Zoova i Nazirifuɛ’n,*+ 3 nán maan ɔ nɔn duvɛn annzɛ nzan uflɛ mɔ sran nɔn-ɔn, ɔ kwla bo’n. Asa ekun’n, vinɛgli nga be fali duvɛn annzɛ nzan uflɛ mɔ sran nɔn-ɔn ɔ kwla bo’n yɛ be fa yoli’n, nán maan ɔ nɔn be wie fi.+ Nán maan ɔ nɔn nzan nga viɲin mma yɛ be fa yoli’n. Nán maan viɲin mma wie fi, i mɔnnɛn-o, i kee-o, ɔ kɛn i nuan. 4 Blɛ mɔ sran’n te yo Nazirifuɛ’n, ɔ fataman kɛ ɔ di like nga viɲin mma yɛ be fa yoli’n. Nán maan ɔ di viɲin mma nga w’a bloman’n. I wun bui bɔbɔ’n, nán maan ɔ di.

5 “Blɛ mɔ sran’n te yo Nazirifuɛ’n, nán maan razuaa kɛn i ti’n.+ Maan ɔ yo sanwun. Yɛle kɛ maan i timuɛn’n ka kɛ ngalɛ’n sa lele naan blɛ nga be sieli i kɛ ɔ yo Zoova liɛ klonglo’n w’a wie. 6 Blɛ mɔ sran sɔ’n ti Zoova liɛ klonglo’n, nán maan ɔ mantan* saka. 7 Kannzɛ bɔbɔ i si annzɛ i nin annzɛ i niaan bian annzɛ i niaan bla yɛ ɔ wu’n, nán maan ɔ kan fiɛn.+ Afin nzɔliɛ ng’ɔ kle kɛ ɔ ti Ɲanmiɛn i Nazirifuɛ’n, ɔ o i ti’n su.

8 “‘Blɛ mɔ sran’n te yo Nazirifuɛ’n, ɔ ti Zoova liɛ klonglo. 9 Sanngɛ sɛ sran wie kpɛ tɔ i wun lɛ naan ɔ wu+ naan fiɛn kɛn i’n, kusu nn nzɔliɛ ng’ɔ kle kɛ ɔ ti Nazirifuɛ’n wo i ti’n su’n, cɛn nga ɔ́ kpló i wun fiɛn’n, maan ɔ kpu i ti’n su.+ I cɛn ba nso’n su yɛ ɔ fata kɛ ɔ kpu i ti’n su-ɔ. 10 I cɛn ba mɔcuɛ su’n, maan ɔ fa auble nɲɔn annzɛ okunmomo ba nɲɔn naan ɔ fa man min ɲrun jranfuɛ’n tannin sua mɔ n yi min wun nglo nun’n i anuan’n nun lɛ. 11 Kpɛkun min ɲrun jranfuɛ’n fá anunman’m be nun kun fá yí sa tɛ’n i ti tɛ. Yɛ ɔ́ fá kun’n yí tɛ nga kɛ bé yí’n be yra nnɛn’n i kɔlikɔli’n naan ɔ nin Ɲanmiɛn be afiɛn sɛ.+ Afin sran’n i saka’n ti’n, ɔ yoli sa tɛ. I sin’n, maan ɔ yo i wun* sanwun cɛn sɔ’n nun. 12 Maan ɔ fɛ i wun wla Zoova sa nun ekun naan ɔ di i Naziri blɛ’n. Yɛ maan ɔ fa bua kun m’ɔ nin-a traman afuɛ kun’n naan ɔ fa yi sa tɛ’n i ti kpatalɛ tɛ. Sanngɛ kɛ mɔ fiɛn kɛnnin i’n kusu nn ɔ te yo Nazirifuɛ’n ti’n, be kwlá kaman cɛn ng’ɔ dili be laa’n wlɛmɛn i cɛn ng’ɔ fata kɛ ɔ di’n nun kun.

13 “‘Mmla ng’ɔ fata kɛ sran ng’ɔ ti Nazirifuɛ’n ɔ di su’n yɛ: Kɛ ɔ ko wie i Naziri blɛ’n i di’n,+ maan be fɛ i wɔ tannin sua mɔ n yi min wun nglo nun’n i anuan’n nun lɔ. 14 Kɛ ɔ ju lɔ’n, maan ɔ fɛ i sa nun like man Zoova. Yɛle kɛ ɔ man bua gbanflɛn ng’ɔ nin-a traman afuɛ kun m’ɔ ti kpa’n, naan be fa yi tɛ nga kɛ bé yí’n be yra nnɛn’n i kɔlikɔli’n.+ Asa ekun’n, ɔ man bua bla ng’ɔ nin-a traman afuɛ kun mɔ lɛ fi nunmɛn i wun’n, naan be fa yi sa tɛ’n i ti tɛ.+ Asa’n, maan ɔ yi bua ɲin kun ekun m’ɔ lɛ fi nunmɛn i wun’n naan be fa yi bo kun yolɛ tɛ.+ 15 Asa kusu’n, maan ɔ fa kpanwun kukluuklu* nga levii nunman nun mɔ be fali sanmlɛn mlɛnnɛnnɛn kpa nin ngo yɛ be tɔnnin’n, nin kpanwun paplapa mɔ levii nunman nun mɔ be fali ngo kpɛkpɛli i wun’n, ɔ nin ble annzɛ i wunsu like uflɛ mɔ be fa man Ɲanmiɛn’n,+ ɔ nin nzan nga be fa guɛ i tɛ yiwlɛ’n su’n,+ ɔ gua be gbogbo kun nun naan ɔ fa bla. 16 Min ɲrun jranfuɛ’n fá ninnge sɔ mun síe be Zoova ɲrun. I sin’n, ɔ́ yí sa tɛ’n i ti tɛ’n nin tɛ nga kɛ bé yí’n be yra nnɛn’n i kɔlikɔli’n. 17 Maan min ɲrun jranfuɛ’n fa bua ɲin’n yi bo kun yolɛ tɛ’n man Zoova. Yɛ ɔ fa kpanwun mɔ levii nunman nun’n mɔ be o gbogbo’n nun’n, ɔ sie su. Maan ɔ fa ble annzɛ i wunsu like+ ɔ nin nzan nga be fa gua tɛ yiwlɛ’n su’n, ɔ fa sie i Ɲanmiɛn ɲrun wie.

18 “‘Maan Nazirifuɛ’n kpu i ti’n mɔ be nin-a yimɛn i le’n su+ tannin sua mɔ n yi min wun nglo nun’n i anuan’n nun lɛ. Kpɛkun maan ɔ fɛ i timuɛn sɔ m’ɔ fuli i Naziri blɛ’n nun’n, ɔ guɛ i sin nga be trɔli be fa yili bo kun yolɛ tɛ’n nun. 19 Maan Nazirifuɛ’n yi like ng’ɔ kle kɛ ɔ ti Nazirifuɛ’n. I sin’n, maan min ɲrun jranfuɛ’n fa bua m’ɔ ti bewa’n i walɛ kun,+ nin kpanwun kukluku* kun mɔ levii nunman nun’n mɔ be o gbogbo’n nun’n, ɔ nin kpanwun paplapa kun mɔ levii nunman nun’n, naan ɔ fa wla Nazirifuɛ’n i sa nun. 20 Maan min ɲrun jranfuɛ’n toto be wɔ i ɲrun nin i sin, kɛ like mɔ be toto i be man Zoova’n sa.+ Bé fá mán min ɲrun jranfuɛ’n naan ɔ yo i liɛ. Bé fá like nga be toto i Ɲanmiɛn ɲrun’n i wue’n nin like nga be mannin’n i sɔwa’n, bé mɛ́n i wie.+ Kɛ ɔ ko wie i yo’n, sran m’ɔ ti Nazirifuɛ laa’n kwla nɔn duvɛn.

21 “‘Sɛ Nazirifuɛ kun ta nda’n, mmla ng’ɔ fata kɛ ɔ di su’n yɛ:+ Sɛ ɔ ta nda naan like nga ɔ kwla man Zoova’n ɔ tra like nga b’a dun mmua b’a kle i’n su’n, maan ɔ di nda ng’ɔ tali’n su. Naziri yolɛ’n i su mmla’n ti’n, maan ɔ di nda ng’ɔ tali’n su.’”

22 I sin’n, Zoova seli Moizi kɛ: 23 “Kan kle Aarɔn nin i mma’m be kɛ: ‘Kɛ amún bó muae+ mán Izraɛlifuɛ mun’n, amun se kɛ:

24 “Maan Zoova yo maan ɔ liɛ yo ye.+ Maan ɔ nian ɔ su.

25 Maan Zoova kle ɔ kɛ i klun jɔ ɔ wun+ naan ɔ si ɔ aunnvɔɛ.

26 Maan Zoova kpɛ i ɲin ɔ su lɔ, yɛ ɔ yo maan ɔ wun jɔ ɔ fɔuun.”’+

27 Yɛ maan be fa min dunman’n sie Izraɛlifuɛ’m be su+ naan n yra be su.”+

7 Cɛn nga Moizi wieli Ɲanmiɛn i tannin sua’n i kplan’n,+ ɔ guali su ngo+ yɛ ɔ yoli maan be sieli i ngunmin naan ɔ yo Ɲanmiɛn liɛ. Ɔ yoli tannin sua’n i nun ninnge mun nin tɛ yiwlɛ’n nin ninnge nga be fa di nun junman’n+ be sɔ wie. Kɛ ɔ guali be su ngo’n, m’ɔ sieli be ngunmin naan be yo Ɲanmiɛn liɛ’n,+ 2 Izraɛli kpɛnngbɛn+ mɔ be ti akpasua’m be su kpɛn’n, be fali like mannin Ɲanmiɛn. Izraɛli akpasua’m be su kpɛnngbɛn sɔ mun yɛ be niannin Izraɛlifuɛ’m be dunman klɛlɛ’n su-ɔ. 3 Be fali kakaklolo nsiɛn mɔ be su ti katawa’n, ɔ nin nannin tola blu-nin-nɲɔn (12) be ɔli Zoova ɲrun. Kakaklolo kun ti kpɛnngbɛn nɲɔn liɛ, yɛ be tinuntinun be yili nannin* kunngun. Be fali ninnge sɔ mun sieli i Ɲanmiɛn i tannin sua’n i ɲrun lɛ. 4 Zoova seli Moizi kɛ: 5 “Sɔ ninnge nga be fa mannin’n nun. Afin bé wá fá be dí junman tannin sua mɔ n yi min wun nglo nun’n i nun. Sɔ nun naan fa man Levifuɛ mun. Nian kɛ sran kun i junman’n fa ti’n su naan fa like ng’ɔ fata kɛ ɔ fa di i junman’n mɛn i.”

6 Moizi sɔli kakaklolo nin nannin’m be nun, kpɛkun ɔ fa mannin Levifuɛ mun. 7 Ɔ niannin kɛ Gɛɛsɔnun i mma’m be junman’n+ fa ti’n su naan w’a man be kakaklolo nɲɔn nin nannin tola nnan. 8 Kpɛkun ɔ niannin kɛ Merari i mma’m be junman’n fa ti’n su naan w’a man be kakaklolo nnan nin nannin tola mɔcuɛ. Aarɔn m’ɔ ti Ɲanmiɛn ɲrun jranfuɛ’n i wa Itamaa yɛ ɔ nian be junman’n su-ɔ.+ 9 Keati i mma’m be liɛ’n, w’a manman be like fi. Afin be sua ninnge nga be fa di junman lika m’ɔ ti Ɲanmiɛn liɛ klonglo’n nun’n.+ Be wati su yɛ be sua ninnge sɔ mun-ɔn.+

10 Cɛn kunngba nga be guali tɛ yiwlɛ’n su ngo mɔ be yili i nglo’n,*+ i nun yɛ Izraɛli kpɛnngbɛn’m be fali like mannin Ɲanmiɛn-ɔn. Kɛ be fali be ninnge mun sieli be tɛ yiwlɛ’n i ɲrun lɛ’n, 11 Zoova seli Moizi kɛ: “Tɛ yiwlɛ’n i nglo yilɛ’n ti’n, maan Izraɛli kpɛnngbɛn’m be man min like. Maan cɛn kun kpɛnngbɛn kun fɛ i liɛ’n bla, cɛn kun kpɛnngbɛn kun fɛ i liɛ’n bla.”

12 Cɛn ba klikli’n su’n, Aminadabu i wa Nasɔn+ m’ɔ fin Zida akpasua’n nun’n, ɔ fɛli i like liɛ’n bali. 13 Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130).* Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70).* Be niannin Ɲanmiɛn i sua’n nun lɔ sikli liɛ’n*+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.*+ 14 Asa ekun’n, ɔ mannin klowa* kun m’ɔ ti sika ɔkwlɛ’n. I nɔnnin’n ti sikli blu,* yɛ ansan yi i piɛ. 15 Ɔ mannin nannin ba kun, nin bua ɲin kun, nin bua ba yasua kun m’ɔ nin-a traman afuɛ kun’n naan be fa yi tɛ nga kɛ bé yí’n be yra nnɛn’n i kɔlikɔli’n,+ 16 nin boli ba yasua kun naan be fa yi sa tɛ’n i ti tɛ’n.+ 17 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n naan be fa yi bo kun yolɛ tɛ’n.+ Like nga Nasɔn m’ɔ ti Aminadabu+ i wa’n mannin’n yɛ ɔ o lɛ-ɔ.

18 Cɛn ba nɲɔn su’n, Ziaa i wa Netanɛli+ m’ɔ ti Isakaa akpasua’n i su kpɛn’n, ɔ fɛli i like liɛ’n bali. 19 Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 20 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 21 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n naan be fa yi tɛ nga kɛ bé yí’n be yra nnɛn’n i kɔlikɔli’n,+ 22 nin boli ba yasua kun naan be fa yi sa tɛ’n i ti tɛ’n.+ 23 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun, mɔ b’a di afuɛ kun’n naan be fa yi bo kun yolɛ tɛ’n.+ Like nga Netanɛli m’ɔ ti Ziaa i wa’n mannin’n yɛ ɔ o lɛ-ɔ.

24 Cɛn ba nsan su’n, Elɔn i wa Eliabu+ m’ɔ ti Zabilɔn i osu’n nunfuɛ’m be su kpɛn’n, 25 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 26 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 27 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n naan be fa yi tɛ nga kɛ bé yí’n be yra nnɛn’n i kɔlikɔli’n,+ 28 nin boli ba yasua kun naan be fa yi sa tɛ’n i ti tɛ’n.+ 29 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun, mɔ b’a di afuɛ kun’n naan be fa yi bo kun yolɛ tɛ’n.+ Like nga Eliabu+ m’ɔ ti Elɔn i wa’n mannin’n yɛ ɔ o lɛ-ɔ.

30 Cɛn ba nnan su’n, Sedeu i wa Elizii+ m’ɔ ti Ribɛnin i osu’n nunfuɛ’m be su kpɛn’n, 31 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 32 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 33 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n naan be fa yi tɛ nga kɛ bé yí’n be yra nnɛn’n i kɔlikɔli’n,+ 34 nin boli ba yasua kun naan be fa yi sa tɛ’n i ti tɛ’n.+ 35 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun, mɔ b’a di afuɛ kun’n naan be fa yi bo kun yolɛ tɛ’n.+ Like nga Elizii+ m’ɔ ti Sedeu i wa’n mannin’n yɛ ɔ o lɛ-ɔ.

36 Cɛn ba nnun su’n, Zirisadai i wa Selumiɛli+ m’ɔ ti Simeɔn i osu’n nunfuɛ’m be su kpɛn’n, 37 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 38 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 39 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n naan be fa yi tɛ nga kɛ bé yí’n be yra nnɛn’n i kɔlikɔli’n,+ 40 nin boli ba yasua kun naan be fa yi sa tɛ’n i ti tɛ’n.+ 41 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ’n.+ Like nga Selumiɛli+ m’ɔ ti Zirisadai i wa’n mannin’n yɛ ɔ o lɛ-ɔ.

42 Cɛn ba nsiɛn su’n, Deiɛli i wa Eliasafu+ m’ɔ ti Gadi i osu’n nunfuɛ’m be su kpɛn’n, 43 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 44 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 45 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n naan be fa yi tɛ nga kɛ bé yí’n be yra nnɛn’n i kɔlikɔli’n,+ 46 nin boli ba yasua kun naan be fa yi sa tɛ’n i ti tɛ’n.+ 47 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ’n.+ Like nga Eliasafu+ m’ɔ ti Deiɛli i wa’n mannin’n yɛ ɔ o lɛ-ɔ.

48 Cɛn ba nso su’n, Amiidi i wa Elisama+ m’ɔ ti Efraimun i osu’n nunfuɛ’m be su kpɛn’n, 49 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 50 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 51 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n, naan be fa yi tɛ nga kɛ bé yí’n be yra nnɛn’n i kɔlikɔli’n,+ 52 nin boli ba yasua kun naan be fa yi sa tɛ’n i ti tɛ’n.+ 53 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ’n.+ Like nga Elisama+ m’ɔ ti Amiidi i wa’n mannin’n yɛ ɔ o lɛ-ɔ.

54 Cɛn ba mɔcuɛ su’n, Pedazu i wa Gamaliɛli+ m’ɔ ti Manase i osu’n nunfuɛ’m be su kpɛn’n, 55 ɔ fɛli i like liɛ’n mannin. Ɔ mannin asiɛti kun mɔ sika be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 56 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 57 Ɔ mannin nannin ba kun, nin bua ɲin kun, nin bua ba yasua kun m’ɔ nin-a traman afuɛ kun’n naan be fa yi tɛ nga kɛ bé yí’n be yra nnɛn’n i kɔlikɔli’n,+ 58 nin boli ba yasua kun naan be fa yi sa tɛ’n i ti tɛ’n.+ 59 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ’n.+ Like nga Gamaliɛli+ m’ɔ ti Pedazu i wa’n mannin’n yɛ ɔ o lɛ-ɔ.

60 Cɛn ba ngwlan su’n, Gideɔnin i wa Abidan+ m’ɔ ti Bɛnzamɛn i osu’n nunfuɛ’m be su kpɛn’n,+ 61 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 62 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 63 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n, naan be fa yi tɛ nga kɛ bé yí’n be yra nnɛn’n i kɔlikɔli’n,+ 64 nin boli ba yasua kun naan be fa yi sa tɛ’n i ti tɛ’n.+ 65 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ’n.+ Like nga Abidan+ m’ɔ ti Gideɔnin i wa’n mannin’n yɛ ɔ o lɛ-ɔ.

66 Cɛn ba blu su’n, Amisadai i wa Aiezɛɛ+ m’ɔ ti Dan i osu’n nunfuɛ’m be su kpɛn’n, 67 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 68 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 69 Ɔ mannin nannin ba kun, nin bua ɲin kun, nin bua ba yasua kun m’ɔ nin-a diman afuɛ kun’n, naan be fa yi tɛ nga kɛ bé yí’n be yra nnɛn’n i kɔlikɔli’n,+ 70 nin boli ba yasua kun naan be fa yi sa tɛ’n i ti tɛ’n.+ 71 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ’n.+ Like nga Aiezɛɛ+ m’ɔ ti Amisadai i wa’n mannin’n yɛ ɔ o lɛ-ɔ.

72 Cɛn ba blu-nin-kun (11) su’n, Okran i wa Paziɛli+ m’ɔ ti Azɛɛ i osu’n nunfuɛ’m be su kpɛn’n, 73 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 74 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 75 Ɔ mannin nannin ba kun, nin bua ɲin kun, nin bua kun m’ɔ nin-a diman afuɛ kun’n, naan be fa yi tɛ nga kɛ bé yí’n be yra nnɛn’n i kɔlikɔli’n,+ 76 nin boli ba yasua kun naan be fa yi sa tɛ’n i ti tɛ.+ 77 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ.+ Like nga Paziɛli+ m’ɔ ti Okran i wa’n mannin’n yɛ ɔ o lɛ-ɔ.

78 Cɛn ba blu-nin-nɲɔn (12) su’n, Enan i wa Aira+ m’ɔ ti Nɛftali i osu’n nunfuɛ’m be su kpɛn’n, 79 ɔ fɛli i like liɛ’n mannin. Ɔ mannin asiɛti kun mɔ sika yɛ be fa yoli’n. I nɔnnin’n ti sikli ya kun ablasan (130). Ɔ mannin kpongbo kun mɔ sika yɛ be fa yoli’n. I nɔnnin’n ti sikli ableso (70). Be niannin Ɲanmiɛn i sua’n nun lɔ sikli liɛ’n+ su naan b’a sunnzun. Sanmlɛn mlɛnnɛnnɛn kpa mɔ be fali ngo sanngannin nun’n, ɔ yi like nɲɔn sɔ mun piɛ. Ɔ ti ble annzɛ i wunsu like mɔ be fa man Ɲanmiɛn-ɔn.+ 80 Asa ekun’n, ɔ mannin klowa kun m’ɔ ti sika ɔkwlɛ’n. I nɔnnin’n ti sikli blu, yɛ ansan yi i piɛ. 81 Ɔ mannin nannin ba kun, nin bua ɲin kun, nin bua ba yasua kun m’ɔ nin-a traman afuɛ kun’n, naan be fa yi tɛ nga kɛ bé yí’n be yra nnɛn’n i kɔlikɔli’n,+ 82 nin boli ba yasua kun naan be fa yi sa tɛ’n i ti tɛ’n.+ 83 Kpɛkun ɔ mannin nannin nɲɔn, nin bua ɲin nnun, nin boli yasua nnun, nin bua ba yasua nnun mɔ b’a di afuɛ kun’n, naan be fa yi bo kun yolɛ tɛ’n.+ Like nga Aira+ m’ɔ ti Enan i wa’n mannin’n yɛ ɔ o lɛ-ɔ.

84 Kɛ be guali tɛ yiwlɛ’n su ngo mɔ bé yí i nglo’n,+ ninnge nga Izraɛli kpɛnngbɛn’m be fa mannin Ɲanmiɛn’n, be yɛ: asiɛti blu-nin-nɲɔn (12) mɔ sika yɛ be fa yoli’n, nin kpongbo blu-nin-nɲɔn (12) mɔ sika yɛ be fa yoli’n, nin klowa blu-nin-nɲɔn (12) mɔ sika ɔkwlɛ yɛ be fa yoli’n.+ 85 Asiɛti kun i nɔnnin’n ti sikli ya kun ablasan (130), yɛ kpongbo kun i nɔnnin’n ti sikli ableso (70). Kɛ be kɛn i wunmuan’n bo nun’n, i kwlaa i nɔnnin’n ti sikli akpi nɲɔn sikli ya nnan (2.400).* Be niannin Ɲanmiɛn i sua’n nun lɔ sikli liɛ’n+ su naan b’a sunnzun. 86 Klowa blu-nin-nɲɔn (12) nga ansan yi be piɛ’n, sika ɔkwlɛ yɛ be fa yoli be-ɔ. Kun i nɔnnin’n ti sikli blu. Be niannin Ɲanmiɛn i sua’n nun lɔ sikli liɛ’n su naan b’a sunnzun. Kɛ be kan sika ɔkwlɛ nga be fa yoli klowa mun’n be kwlaa bo nun’n, i nɔnnin’n ti sikli ya kun ablaɔn (120).* 87 Nnɛn nga be fa yili tɛ nga kɛ bé yí’n be yra nnɛn’n i kɔlikɔli’n, be ti nannin blu-nin-nɲɔn (12), nin bua ɲin blu-nin-nɲɔn (12), nin bua ba yasua blu-nin-nɲɔn (12) mɔ b’a di afuɛ kun’n, yɛ be fa ble annzɛ i wunsu like mɔ be fa man Ɲanmiɛn’n be uka su. Nnɛn nga be fa yili sa tɛ’n i ti tɛ’n, be ti boli blu-nin-nɲɔn (12). 88 Nnɛn nga be fa yili bo kun yolɛ tɛ’n, be ti nannin ablaɔn-nin-nnan (24), nin bua ɲin ablesiɛn (60), nin boli yasua ablesiɛn (60), nin bua ba yasua ablesiɛn (60) mɔ b’a di afuɛ kun’n. Kɛ be guali tɛ yiwlɛ’n su ngo+ mɔ bé yí i nglo’n,+ ninnge sɔ mun yɛ Izraɛli kpɛnngbɛn’m be mannin-ɔn.

89 Kɛ Moizi wlu tannin sua mɔ Ɲanmiɛn yi i wun nglo nun’n nun naan ɔ nin Ɲanmiɛn* bé kókó yalɛ’n,+ ɔ ti sran kun i nɛn’n Mmla’n* i alaka’n i su tre’n su,+ seribɛn nɲɔn’m be afiɛn.+ Yɛ Ɲanmiɛn kan ndɛ kle i.

8 Zoova seli Moizi kɛ: 2 “Kan kle Aarɔn kɛ: ‘Kɛ a sɔ kannin mun’n, maan kannin nso’m be kpaja kannin siewlɛ’n i ɲrun lɛ.’”+ 3 Like nga Aarɔn yoli’n yɛ: Ɔ sɔli kannin mun naan be kpaja kannin siewlɛ’n+ i ɲrun lɛ lika’n nun. Afin i sɔ yɛ Zoova seli Moizi kɛ ɔ yo-ɔ. 4 Be fali maato be boli+ sika ɔkwlɛ yɛ be fa yoli kannin siewlɛ’n niɔn. Be boli sika ɔkwlɛ yɛ be fa yoli i afiɛn trolo’n nin i nɲrɛ mun-ɔn. Kannin siewlɛ nga Zoova fa kleli Moizi aolia nun’n,+ i su yɛ be niannin be yoli-ɔ.

5 Zoova kan ndɛ kleli Moizi ekun. Ɔ seli i kɛ: 6 “Fa Levifuɛ mun Izraɛlifuɛ’m be nun naan yo be sanwun.+ 7 Like nga á yó naan b’a yo sanwun’n yɛ: Fa be wun fiɛn kplolɛ nzue m’ɔ salo sa tɛ’n kpɛntɛnkpɛntɛn be wun. Yɛ maan be fa razuaa be yi be wunnɛn wunmuan’n su ndrɛ’n. Asa ekun’n, maan be kpu be tralɛ mun, yɛ be yo be wun sanwun.+ 8 I sin’n, maan be fa nannin ba kun+ nin i su sanmlɛn mlɛnnɛnnɛn kpa mɔ be fali ngo be sanngannin nun’n, be bla.+ Fa nannin ba kun ekun naan fa yi sa tɛ’n i ti tɛ.+ 9 Kpɛkun fa Levifuɛ mun bla tannin sua mɔ n yi min wun nglo nun’n i ɲrun lɛ naan yia Izraɛlifuɛ’m be kwlaa.+ 10 Kɛ a fa Levifuɛ mun ba Zoova ɲrun’n, maan Izraɛlifuɛ’m be fa be sa fua be su.+ 11 Kpɛkun maan Aarɔn fa Levifuɛ mun man.* Maan ɔ fa be man Zoova i ɲrun lɛ, kɛ like mɔ kɛ Izraɛlifuɛ’m bé mán’n, be toto’n sa.+ Yɛ maan be di Zoova i junman’n.+

12 “I sin’n, maan Levifuɛ’m be fa be sa’n sie i nannin’m be ti’n su.+ Kpɛkun fa kun yi sa tɛ’n i ti tɛ. Yɛ fa kunfuɛ’n yi tɛ nga kɛ bé yí’n be yra nnɛn’n i kɔlikɔli’n man Zoova naan fa kpata Levifuɛ’m be ti.+ 13 Fa Levifuɛ mun jran Aarɔn nin i mma’m be ɲrun, naan fa be man* Zoova kɛ like nga bé mán’n, be toto’n sa. 14 Fa Levifuɛ mun Izraɛlifuɛ’m be nun naan sie be ngunmin. Maan Levifuɛ’m be kaci min liɛ.+ 15 I sin’n, maan Levifuɛ’m be ko di junman tannin sua mɔ n yi min wun nglo nun’n i nun. Wafa nga a ko yo be sanwun’n, naan w’a fa be w’a man* kɛ like nga bé mán’n be toto’n sa’n, yɛ ɔ o lɛ-ɔ. 16 Afin be fali sran sɔ mun mannin. Yɛle kɛ be fali be Izraɛlifuɛ’m be nun be mannin min. Ń fá be naan be sin Izraɛlifuɛ’m be wa klikli’m+ be osu. Kpɛkun bé káci min liɛ. 17 Afin Izraɛlifuɛ’m be wa klikli mun nin be nnɛn’m be wa klikli’m be ti min liɛ.+ I nun mɔ n kunnin sran nin nnɛn’m be wa klikli mun Ezipti lɔ’n,+ n yoli be sanwun naan be kaci min liɛ. 18 Ń fá Levifuɛ mun naan be sin Izraɛlifuɛ’m be wa klikli’m be kwlaa be osu. 19 Ń fá Levifuɛ mun mán Aarɔn nin i mma mun. N fali be Izraɛlifuɛ’m be nun n mannin be naan be di junman man Izraɛlifuɛ mun tannin sua mɔ n yi min wun nglo nun’n i nun.+ Asa ekun’n, bé yó like ng’ɔ fata kɛ be yo man Izraɛlifuɛ mun naan y’a siesie e afiɛn’n. Be dunman nun ti’n, sɛ Izraɛlifuɛ’m be wunnge lika m’ɔ ti min liɛ’n i wun’n, ɲrɛnnɛn su tɔman be su.”+

20 Moizi nin Aarɔn nin Izraɛlifuɛ’m be kwlaa be yoli sɔ mannin Levifuɛ mun. Like kwlaa nga Zoova seli Moizi kɛ Izraɛlifuɛ’m be yo man Levifuɛ mun’n, be yoli. 21 Ɔ maan Levifuɛ’m be yoli be wun sanwun. Be kpuli be tralɛ mun.+ Kpɛkun Aarɔn fali be mannin* kɛ like nga bé mán’n be toto’n sa’n, Zoova i ɲrun lɛ.+ I sin’n, Aarɔn yoli like ng’ɔ fata kɛ ɔ yo man be naan be nin Ɲanmiɛn be afiɛn w’a sɛ ekun’n, kɛ ɔ ko yo naan w’a yo be sanwun’n ti.+ 22 Kɛ ɔ yoli sɔ’n, Levifuɛ’m be ɔli be junman’n i dilɛ tannin sua mɔ Ɲanmiɛn yi i wun nglo nun’n i nun, yɛ Aarɔn nin i mma’m be nian be su. Like kwlaa nga Zoova seli Moizi kɛ be yo man Levifuɛ mun’n, be yoli.

23 Zoova seli Moizi ekun kɛ: 24 “Like ng’ɔ fata kɛ Levifuɛ’m be yo’n yɛ: Kɛ yasua kun ko ɲan afuɛ ablaɔn-nin-nnun’n (25), maan ɔ fɛ i wun wla be nga be di min tannin sua’n nun junman’n be nun. 25 Sanngɛ kɛ ɔ ko ɲan afuɛ ablenun (50) gua su’n, maan ɔ yaci junman’n i dilɛ. Nán ɔ di junman’n wie kun. 26 Ɔ kwla ukɛ i niaan nga be te di junman min tannin sua’n nun’n. Sanngɛ nán maan ɔ di junman lɔ. Wafa ng’ɔ fata kɛ a siesie Levifuɛ mun nin be junman dilɛ’n, yɛ ɔ o lɛ-ɔ.”+

9 Kɛ Izraɛlifuɛ’m be fin Ezipti lɔ fiteli’n, i afuɛ nɲɔn su’n, i anglo klikli’n nun’n,+ Zoova kannin ndɛ kleli Moizi. Kɛ ɔ́ yó sɔ’n, nn be o Sinai aawlɛ flɛnnɛn’n nun lɔ. Ɔ seli kɛ: 2 “Cɛn nga n kleli’n,+ i su yɛ ɔ fata kɛ Izraɛlifuɛ’m be di Delɛ Cɛn’n+ titi-ɔ. 3 Anglo nga i cɛn ba blu-nin-nnan (14) su’n, kɛ sɛnzɛ’n ko tɔ’n,* maan amun di cɛn’n kɛ nga n kleli amun’n sa. Ɔ fata kɛ amun nian cɛn sɔ’n i dilɛ’n i su mmla’n nin like nga n kleli amun’n, be kwlaa su naan amun a di.”+

4 Ɔ maan Moizi seli Izraɛlifuɛ’m be kɛ be di Delɛ Cɛn’n. 5 Anglo klikli’n i cɛn ba blu-nin-nnan (14) su’n, kɛ sɛnzɛ’n tɔli’n* be dili Delɛ Cɛn’n Sinai aawlɛ flɛnnɛn’n nun lɔ. Like kwlaa nga Zoova kleli Moizi’n, i su yɛ Izraɛlifuɛ’m be niannin naan b’a di cɛn sɔ’n niɔn.

6 Sran wie’m be kannin saka. Ɔ maan fiɛn kannin be.+ I sɔ’n ti’n, be kwlá diman Delɛ Cɛn’n wie cɛn sɔ’n nun. Be ko wunnin Moizi nin Aarɔn be wun.+ 7 Yɛ be seli Moizi kɛ: “E o fiɛn nun, afin e kannin saka. ?Ngue ti yɛ i sɔ’n ti’n, e kwlá manman Zoova like kɛ Izraɛlifuɛ onga’m be sa cɛn ng’ɔ kleli’n su-ɔ?”+ 8 Moizi tɛli be su kɛ: “Amun minndɛ min wa naan n ko tie ndɛ nga Zoova wá kán’n naan amun a si like nga i waan amun yo’n.”+

9 Zoova seli Moizi kɛ: 10 “Kannzɛ bɔbɔ amun nun kun annzɛ amun anunman’m be nun kun kannin saka naan i sɔ’n ti’n fiɛn kɛnnin i’n,+ annzɛ kusu ɔ tuli ajalɛ ɔli mmua’n, sanngɛ maan ɔ di Delɛ Cɛn’n wie fa man Zoova. 11 Maan be di cɛn sɔ’n anglo nɲɔn su’n+ i cɛn ba blu-nin-nnan’n (14) su, kɛ sɛnzɛ’n ko tɔ’n.* Maan be di Delɛ Cɛn’n i nnɛn’n nin kpanwun mɔ levii nunman nun’n ɔ nin nɲa wiwi mun.+ 12 Nán maan be yaci wie lɛ naan aliɛ cɛn su.+ Yɛ nán maan be bobo nnɛn’n i owie ba kun sa.+ Maan be nian Delɛ Cɛn dilɛ’n i mmla’n kwlaa su naan b’a di. 13 Sanngɛ sɛ fiɛn w’a kanman sran kun, annzɛ w’a tuman ajalɛ w’a ɔman lika, kpɛkun-ɔn ɔ diman Delɛ Cɛn’n wie’n, maan be kun i.+ Afin like ng’ɔ fata kɛ ɔ fa man Zoova cɛn ng’ɔ kleli’n su’n, w’a fa mɛnmɛn i. Sran sɔ’n ɲɛ́n i sa tɛ’n i nuan like.

14 “‘Sɛ aofuɛ kun tran amun afiɛn’n, maan ɔ di Delɛ Cɛn’n wie fa man Zoova.+ Maan ɔ nian Delɛ Cɛn dilɛ’n i su mmla’n nin like nga n kleli amun’n, be kwlaa su.+ I aofuɛ-o, i ɔnvuɛ-o, mmla kunngba’n yɛ ɔ fata kɛ be di su-ɔ.’”+

15 Cɛn kunngba nga be kplannin Ɲanmiɛn i tannin sua’n,+ ɲanmiɛn ble’n jrannin tannin sua’n su, yɛle kɛ Aenguɛ’n* i tannin sua’n su. Sanngɛ kɔnguɛ’n, like wie kɛ sin sa wa jrannin tannin sua’n i su lele lika’n fa cɛnnin.+ 16 Kɛ lika’n ko cɛn’n, ɲanmiɛn ble’n jran tannin sua’n su. Kpɛkun kɔnguɛ’n, like kɛ sin sa’n yɛ ɔ wo lɛ-ɔ.+ Kɛ ɔ yoli sɔ titi-ɔ. 17 Kɛ ɲanmiɛn ble’n ko jaso tannin sua’n su’n, Izraɛlifuɛ’m be kusu be tu be bo wie.+ Kpɛkun lika nga ɲanmiɛn ble’n ko jran lɛ’n, lɛ yɛ Izraɛlifuɛ’m be bo be nanmue’n niɔn.+ 18 Kɛ Zoova ko se Izraɛlifuɛ’m be kɛ be wɔ’n, nn be su kɔ. Yɛ kɛ Zoova ko se be kɛ be bo be nanmue’n, nn be su bo.+ Sɛ ɲanmiɛn ble’n nin-a jasoman Ɲanmiɛn i tannin sua’n su’n, be te o lɛ. 19 Kɛ ɲanmiɛn ble’n jran tannin sua’n su cɛn ba kpanngban’n, Izraɛlifuɛ’m be fa Zoova i nuan ndɛ’n su. Ɔ maan be tuman be bo.+ 20 Ɔ ju wie’n, kɛ ɲanmiɛn ble’n jran tannin sua’n su’n, ɔ diman cɛn kpanngban. Sɛ Zoova se be kɛ be ka be nanmue’n nun lɛ’n, be tuman be bo. Kpɛkun kɛ Zoova se be kɛ be wɔ’n, nn be su kɔ. 21 Ɔ ju wie kusu’n, kɛ ɔ fɛ i kɔnguɛ lele nglɛmun’n yɛ ɲanmiɛn ble’n ka tannin sua’n su-ɔ. Nglɛmun’n, kɛ ɲanmiɛn ble’n ko tu i bo’n, nn be kusu be su tu be bo wie. Sɛ ɔ tu i bo wia nun-o annzɛ kɔnguɛ-o, be tu be bo wie.+ 22 Sɛ ɲanmiɛn ble’n jran tannin sua’n su’n cɛn ba nɲɔn, annzɛ anglo kun annzɛ kusu ɔ cɛ kpa bɔbɔ’n, sɛ ɔ nin-a tumɛn i bo’n, Izraɛlifuɛ’m be ka nanmue’n nun lɛ, be tuman be bo. Sanngɛ kɛ ɔ ko tu i bo’n, nn be kusu be su tu be bo wie. 23 Kɛ Zoova ko se be kɛ be bo nanmue’n, nn be su bo. Yɛ kɛ Zoova ko se be kɛ be wɔ’n, nn be su kɔ. Zoova i ndɛ ng’ɔ fa wla Moizi nuan’n be niannin su, be yoli like nga Zoova seli be kɛ be yo’n.

10 I sin’n, Zoova seli Moizi kɛ: 2 Fa sika yo awɛ nɲɔn+ naan kɛ á wá yíayía sran mun’n, annzɛ kɛ amún wá tú amun bo amun nanmue’n nun’n, w’a bo. 3 Kɛ be bo awɛ nɲɔn mun’n, maan sran’m be kwlaa be to ɔ tannin sua mɔ n yi min wun nglo nun’n, i anuan’n nun lɛ.+ 4 Sanngɛ sɛ be bo awɛ kunngba cɛ’n, maan kpɛnngbɛn mun mɔ be ti sran akpi su kpɛn’n, be ngunmin yɛ be to ɔ lɔ-ɔ.+

5 “Sɛ amún bó awɛ’n naan amun toto nun’n, maan be nga be tran wia afiliɛ lɔ’n,+ be tu be bo. 6 Kɛ amún bó awɛ’n naan amun toto nun’n i kpɛ nɲɔn su’n, maan be nga be tran ngua lɔ’n,+ be tu be bo. Maan be bo awɛ’n i kɛ ngalɛ’n sa naan akpasuaakpasua nga be tran likawlɛ’n, be tu be bo.

7 “Kɛ amun waan amún yía sran’m be wunmuan’n, amun bo awɛ mun.+ Sanngɛ kɛ amún bó’n, nán amun toto nun. 8 Aarɔn i mma mɔ be ti min ɲrun jranfuɛ’n be yɛ ɔ fata kɛ be bo awɛ mun-ɔn.+ I sɔ’n ti mmla, yɛ ɔ fata kɛ amun bɔbɔ nin amun osu’n nunfuɛ mun amun nanti su tititi.

9 “Sɛ amun kpɔfuɛ wie fa alɛ wla amun sin amun mɛn’n nun naan amun nin be su ko kun’n, amun bo awɛ mun naan sran’m be si kɛ alɛ kunlɛ w’a ju.+ I liɛ’n, amun Ɲanmiɛn Zoova i wla kpɛ́n amun su, kpɛkun ɔ́ dé amun amun kpɔfuɛ’m be sa nun.

10 “Asa ekun’n, kɛ amún dí amun cɛn mun’n+ ɔ nin anglo le kun mɔ amún yí tɛ nga kɛ bé yí’n be yra nnɛn’n i kɔlikɔli’n+ ɔ nin bo kun yolɛ tɛ’n,+ amun bo awɛ mun. Afin amun aklunjɔɛ dilɛ blɛ-ɔ.+ I liɛ’n, amun Ɲanmiɛn’n i wla kpɛ́n amun su. Amun Ɲanmiɛn Zoova yɛle min.”+

11 I afuɛ nɲɔn su’n, i anglo nɲɔn su’n, i cɛn ba ablaɔn (20) su’n,+ ɲanmiɛn ble’n jasoli Aenguɛ’n* i tannin sua’n su.+ 12 Ɔ maan Izraɛlifuɛ’m be tuli be bo Sinai aawlɛ flɛnnɛn’n nun lɛ. Kɛ bé tú be bo’n, wafa nga be kleli be’n i su yɛ be niannin naan b’a wɔ-ɔ.+ Kpɛkun Ɲanmiɛn ble’n ko jrannin Paran aawlɛ flɛnnɛn’n nun lɔ.+ 13 Kpɛ klikli nga bé tú be bo kɛ nga Zoova kan kleli Moizi kɛ be yo’n sa’n, yɛ ɔ o lɛ-ɔ.+

14 Be nga be dun mmua tuli be bo’n, be yɛle sonja akpasua nsan nga Zida akpasua’n yɛ ɔ dun be ɲrun’n. Be tuli be bo akpasuaakpasua. Nasɔn+ m’ɔ ti Aminadabu i wa’n yɛ ɔ ti i sonja’m be su kpɛn-ɔn. 15 Netanɛli+ m’ɔ ti Ziaa i wa’n yɛ ɔ ti Isakaa akpasua’n nun sonja’m be su kpɛn-ɔn. 16 Eliabu+ m’ɔ ti Elɔn i wa’n yɛ ɔ ti Zabilɔn akpasua’n nun sonja’m be su kpɛn-ɔn.

17 Kɛ be tutuli Ɲanmiɛn i tannin sua’n,+ yɛ Gɛɛsɔnun i mma mun+ nin Merari i mma+ mɔ be sua Ɲanmiɛn i tannin sua’n, be ɔli-ɔ.

18 I sin’n, sonja akpasua nsan nga Ribɛnin akpasua’n yɛ ɔ dun be ɲrun’n, be tuli be bo. Be tuli be bo akpasuaakpasua. Elizii+ m’ɔ ti Sedeu i wa’n yɛ ɔ ti i sonja’m be su kpɛn-ɔn. 19 Selumiɛli+ m’ɔ ti Zirisadai i wa’n yɛ ɔ ti Simeɔn akpasua’n nun sonja’m be su kpɛn-ɔn. 20 Eliasafu+ m’ɔ ti Deiɛli i wa’n yɛ ɔ ti Gadi akpasua’n nun sonja’m be su kpɛn-ɔn.

21 I sin’n, Keatifuɛ mɔ be sua ninnge nga be o lika m’ɔ ti Ɲanmiɛn liɛ’n+ nun’n, be ɔli. Ɔ fata kɛ be kplan Ɲanmiɛn i tannin sua’n kwlaa naan b’a ju lɔ.

22 I sin’n, sonja akpasua nsan nga Efraimun akpasua’n yɛ ɔ dun be ɲrun’n, be tuli be bo. Be tuli be bo akpasuaakpasua. Elisama+ m’ɔ ti Amiidi i wa’n yɛ ɔ ti i sonja’m be su kpɛn-ɔn. 23 Gamaliɛli+ m’ɔ ti Pedazu i wa’n yɛ ɔ ti Manase akpasua’n nun sonja’m be su kpɛn-ɔn. 24 Abidan+ m’ɔ ti Gideɔnin i wa’n yɛ ɔ ti Bɛnzamɛn akpasua’n nun sonja’m be su kpɛn-ɔn.

25 I sin’n, sonja akpasua nsan nga Dan akpasua’n yɛ ɔ dun be ɲrun’n, be tuli be bo. Be tuli be bo akpasuaakpasua. Be yɛ be ka akpasua’m be kwlaa be sin lɔ be sasa be-ɔ. Aiezɛɛ+ m’ɔ ti Amisadai i wa’n yɛ ɔ ti i sonja’m be su kpɛn-ɔn. 26 Paziɛli+ m’ɔ ti Okran i wa’n yɛ ɔ ti Azɛɛ akpasua’n nun sonja’m be su kpɛn-ɔn. 27 Aira+ m’ɔ ti Enan i wa’n yɛ ɔ ti Nɛftali akpasua’n nun sonja’m be su kpɛn-ɔn. 28 Kɛ Izraɛlifuɛ’m bé kɔ́’n, be nin be sonja’m be su be wun su kɛ ngalɛ’n sa.+

29 I sin’n, Moizi kannin ndɛ kun kleli Obabu m’ɔ ti Reiɛli*+ i wa’n. Reiɛli sɔ’n ti Madianfuɛ, yɛ ɔ ti Moizi i sia. Moizi seli Obabu kɛ: “E su ko tran lika nga Zoova seli kɛ ɔ́ fá mán e’n nun.+ Ɔ maan bla e wɔ.+ É nían ɔ lika, afin Zoova waan ɔ́ mán Izraɛlifuɛ’m be ninnge kpakpa mun lɔ.”+ 30 Sanngɛ ɔ seli kɛ: “N su kɔman wie. Ń sá min sin min mɛn’n nun. Ń kɔ́ min osufuɛ’m be sin.” 31 Yɛ ɔ seli i kɛ: “Yaci, nán yaci e kɔ. Afin a si lika nga e kwla bo nanmue aawlɛ flɛnnɛn’n nun’n. Yɛ a kwla kle e atin’n. 32 Sɛ a nin e kɔ’n,+ ye nga Zoova wá yó e’n, é yó ɔ wie.”

33 Ɔ maan be fɛli i Zoova i oka’n+ su lɛ be ɔli. Be nantili cɛn ba nsan. Yɛ cɛn ba nsan sɔ’m be nun’n, be fali Zoova i Aenguɛ’n i alaka’n+ dunnin mmua naan ɔ kunndɛ lika nga be kwla tran lɛ be lo wunmiɛn’n.+ 34 Wia nun’n, kɛ bé tú be bo be nanmue’n nun’n, Zoova i ɲanmiɛn ble’n+ o be ti su.

35 Kɛ bé súa Alaka’n bé kɔ́ lika kun’n, Moizi se kɛ: “Ee Zoova, jaso.+ Maan ɔ kpɔfuɛ’m be bo sanndi. Yɛ maan be nga be kpɔ wɔ’n, be wanndi ɔ ɲrun.” 36 Kɛ be ko tɛkɛ i ase’n, ɔ se kɛ: “Zoova, sa ɔ sin Izraɛlifuɛ mɔ be kwlá kaman be’n,* be wun.”+

11 Sran’m be wa ijɔli tɛtɛ Zoova ɲrun. Kɛ Zoova tili’n, ɔ fali ya. Kpɛkun sin fin Zoova wun lɔ, ɔ wa yrali be nga be o nanmue’n i tiwa lɔ’n be nun wie mun. 2 Kɛ sran’m be kpan flɛli Moizi’n, ɔ kpatali Zoova.+ Yɛ sin’n nuannin-ɔn. 3 I sɔ’n ti’n, be flɛli lika sɔ’n kɛ Tabera.* Afin sin fin Zoova wun lɔ, ɔ wa yrali be.+

4 Sran wafawafa kpanngban kpa*+ nga be o be afiɛn’n, be konvi wa yoli kpli.+ Yɛ Izraɛlifuɛ’m be kusu be wa sunnin ekun. Be seli kɛ: “?Wan yɛ ɔ́ mán e nnɛn naan y’a di-ɔ?+ 5 Nanwlɛ, e wla kpɛn jue nga e di i Ezipti lɔ mɔ e yiman dein’n, ɔ nin kɔnkɔnbru nin pasitɛki, nin puaro, nin jaba, nin lai mɔ e di be’n be su!+ 6 Sanngɛ e yɛ e su yo kokloo yɛ. Sɛ w’a yoman kɛ manin’n sa’n, e wunman like uflɛ.”+

7 Manin’n+ ti kɛ koriandri mma’n sa.+ Ɔ fa waka bue nzue nga be flɛ i deliɔmun’n. 8 Sran’m be sanndi lika’n nun yɛ be isa-ɔ. I sin’n, be tin annzɛ be si i kpokpo nun. Kpɛkun be tɔn i sɛ’n nun annzɛ be fa yo kpanwun klukluuklu wie mun.+ Kɛ bé dí’n, ɔ yo fɛ kɛ gato mɔ be guali nun ngo’n sa. 9 Kɔnguɛ’n, kɛ bɔlɛ ufue’n gúa nanmue’n su’n, manin’n gua wie.+

10 Moizi tili sran’m be sunlɛ. Kɛ awlobo kun sun’n, uflɛ su i su. Be o be tannin sua’m be anuan nun lɛ yɛ be sun-ɔn. Ɔ maan Zoova fali ya dan kpa.+ I sɔ’n w’a yoman Moizi i fɛ wie. 11 Yɛ Moizi seli Zoova kɛ: “?Ngue ti yɛ a yoli ɔ sufuɛ’n i tɛ sɔ-ɔ? ?Ngue ti yɛ w’a siman min aunnvɔɛ, mɔ a fali sa ng’ɔ o sran kwlaa nga’m be su’n sieli min ti su kɛ trɔ sa-ɔ?+ 12 ?Sran kwlaa nga’m be ti min ku sɛ nun ba? ?Min yɛ n wuli be mɔ i ti yɛ a se min kɛ: ‘Fa be sie i ɔ wue’n nun kɛ junman difuɛ* kun su fa ba nɔnman sie i wue nun sa’ naan n fa be wɔ lika nga a seli kɛ á fá mán be nannan mun’n i nun-ɔn?+ 13 ?Nin yɛ ń kó ɲán nnɛn naan m’an fa man sran kwlaa nga mun-ɔn? Be sun gua min wun sa trilili. Be waan: ‘Man e nnɛn naan e di!’ 14 Min ngunmin n kwlá suanman sran kwlaa nga’m be bo. Ɔ ti kekle man min ngboko.+ 15 Sɛ a ko yo sɔ’n, nn kpɛ i kpo kun min.+ Sɛ ɔ waan á sí min aunnvɔɛ’n, nán yo maan n wun ɲrɛnnɛn kun.”

16 Zoova tɛli Moizi su kɛ: “Yia yasua ableso (70) mɔ be ti Izraɛli kpɛnngbɛn’n, mɔ a si kɛ be ti nvlefuɛ’m be nuan ndɛ kanfuɛ’n,+ naan fa be kɔ kɛ tannin sua nga n yi min wun nglo’n nun’n wo lɔ’n. Kpɛkun maan be jran ɔ wun lɛ. 17 Ń wá jrá,+ yɛ ń kán ndɛ klé wɔ lɔ.+ Kpɛkun ń yí min wawɛ ng’ɔ o ɔ su’n i wie+ mán be. Ɔ maan bé úka wɔ naan w’a nian sran’m be lika. Ɔ ngunmin a su diman junman sɔ’n kun.+ 18 Se sran’m be kɛ: ‘Amun yo amun wun sanwun ainman liɛ ti.+ Saan amún dí nnɛn. Afin kɛ amun sunnin’n, Zoova tili.+ Amun seli kɛ: “?Wan yɛ ɔ́ mán e nnɛn naan y’a di-ɔ? Ezipti lɔ’n flunman.”+ I sɔ’n ti’n, Zoova wá mán amun nnɛn, yɛ amún dí.+ 19 Nán cɛn ba kun, annzɛ nɲɔn, annzɛ nnun, annzɛ blu, annzɛ ablaɔn (20) cɛ yɛ amún dí nnɛn-ɔn, 20 sanngɛ amún dí i anglo wunmuan kun. Amún dí i lele ɔ́ bɔ́n amun bue’n nun. Ɔ maan amun konvi’n tú su.+ Afin amun kacili amun sin sili Zoova m’ɔ wo amun afiɛn’n. Amun sunnin i ɲrun, yɛ amun seli kɛ: “?Ngue ti yɛ e jasoli Ezipti lɔ-ɔ?”’”+

21 I sin’n, Moizi seli kɛ: “Sran nga e nin be o wa’n, be nun sonja’m be ti akpiakpi ya nsiɛn (600.000).+ Ɔ nin i sɔ ngba’n, a seli kɛ: ‘Ń mán be nnɛn bé dí. Bé dí i lele anglo wunmuan kun.’ 22 ?Sɛ be kun bua nin boli nin nannin’m be kwlaa’n, ɔ́ jú be? ?Annzɛ kusu’n, sɛ be tra jenvie’n nun jue’m be ngba’n, ɔ́ jú be?”

23 Yɛ Zoova seli Moizi kɛ: “?Zoova i sa’n ti tika ti-ɔ?+ Sɛ ndɛ nga n kan’n, ɔ́ kpɛ́n su annzɛ ɔ su kpɛnman su’n, á wá wún i siɛn’n.”

24 Yɛ Moizi fiteli-ɔ. Ɔ kannin Zoova i nuan ndɛ’n kwlaa kleli be. Kpɛkun ɔ fali nvle’n su kpɛnngbɛn’m be nun sran ableso (70), kpɛkun ɔ siesieli be tɛɛn bo sin yiali tannin sua’n.+ 25 Zoova jrali ɲanmiɛn ble kun nun.+ Ɔ kan ndɛ kleli i.+ Kpɛkun ɔ yili wawɛ ng’ɔ o i su’n wie+ mannin kpɛnngbɛn ableso (70) mun be tinuntinun. Kɛ Ɲanmiɛn wawɛ’n jrali be su cɛ’n, be yoli kɛ Ɲanmiɛn nuan ijɔfuɛ mun sa.*+ Sanngɛ b’a yomɛn i sɔ kun.

26 Sran sɔ’m be nun nɲɔn be kali nanmue’n nun lɔ. Kun suan Ɛldadi, yɛ kun suan Medadi. Be o be nga be klɛli be dunman’n be nun wie. Sanngɛ b’a ɔman kɛ tannin sua’n o lɔ’n. Ɲanmiɛn wawɛ’n jrali be su wie. Kpɛkun be yoli kɛ Ɲanmiɛn nuan ijɔfuɛ mun sa nanmue’n nun. 27 Yɛ gbanflɛn kun wanndi ko seli Moizi kɛ: “Ɛldadi nin Medadi be su yo kɛ Ɲanmiɛn nuan ijɔfuɛ mun sa nanmue’n nun.” 28 Ɔ maan Zozie+ m’ɔ ti Nɛn i wa’n, mɔ kɛ ɔ fɛ i kaan nun’n ɔ ti Moizi i ukafuɛ’n, ɔ seli kɛ: “Min min Moizi, nán yaci be lɛ naan be yo sɔ!”+ 29 Sanngɛ Moizi tɛli i su kɛ: “?A su si min ti kwla? Nán yo sɔ. N klo kɛ Zoova i sran’m be kwlaa be yo i nuan ijɔfuɛ, naan Zoova fɛ i wawɛ’n man be.” 30 I sin’n, Moizi nin Izraɛli kpɛnngbɛn’m be sali be sin nanmue’n nun lɔ.

31 Kpɛkun be ja nun lɛ’n, Zoova yoli maan aunmuan kun wa fitali. Ɔ fali aoko mun jenvie’n su lɔ lele be wa guali nanmue’n i sin.+ Kɛ be guali sa lele’n, saan á nánti cɛn ba kun naan w’a wie be kpɛ. Be o nanmue’n i bue kwlaa su. Yɛ be tian be wiengu su asiɛ’n su lele ɔ fa ju kude kɔe nɲɔn.* 32 Ɔ maan sran’m b’a lafiman. Cɛn sɔ’n nun’n, i nglɛmun-o, i nnɔsua-o, i kɔnguɛ-o, be isali aoko mun lele. Kɛ lika’n cɛnnin’n, be isali wie ekun lele. Sɛ be waan sran kun w’a isaman wie-o, yɛle ɔmɛɛ* blu. Be wlɛli nnɛn’n lele be sin yiali nanmue’n. 33 Sanngɛ kɛ sran’m be fali nnɛn’n wlali be nuan nun mɔ be waan bé kpísa’n, Zoova fali be wun ya dan kpa. Zoova fali ɲrɛnnɛn yili be su. Ɔ kunnin be nun kpanngban kpa.+

34 I sɔ’n ti’n, be tɔnnin lika sɔ’n i dunman kɛ Kibrɔtu-Ataava.*+ Afin lɛ yɛ be sieli be nga be konvi’n yoli kpli’n mun-ɔn.+ 35 Kɛ sran’m be fɛli i Kibrɔtu-Ataava lɛ’n, be ɔli Azerɔtu. Kpɛkun be trannin Azerɔtu lɛ.+

12 Kusu bla mɔ Moizi jɛli i’n ti’n, Miriamun nin Aarɔn be kɛnnin i wun ndɛ tɛ. Afin ɔ jali Kusu bla.+ 2 Be seli kɛ: “?Moizi ngunmin yɛ Zoova kannin ndɛ kleli i-ɔ? ?W’a kanman ndɛ w’a kleman e wie?”+ Zoova tili ndɛ nga be kannin’n.+ 3 Moizi sɔ’n ti wun ase kanfuɛ* dan.+ Asiɛ wunmuan’n su’n, sran fi timan wun ase kanfuɛ kɛ i sa.

4 Kɛ ɔ yoli sɔ cɛ’n, Zoova seli Moizi nin Aarɔn ɔ nin Miriamun be kɛ: “Amun nsan’n, amun fite. Amun wɔ tannin sua mɔ i nun yɛ n yi min wun nglo’n i nun lɔ.” Yɛ be nsan’n be ɔli-ɔ. 5 Zoova jrali ɲanmiɛn ble’n nun,+ kpɛkun ɔ jrannin tannin sua’n i anuan’n nun lɛ. Ɔ flɛli Aarɔn nin Miriamun. Yɛ be nɲɔn’n be wunngeli i wun lɔ-ɔ. 6 Yɛ ɔ seli kɛ: “Amun yaci, amun sie amun su. Sɛ ɔ ti kɛ amun nun kun ti Zoova nuan ijɔfuɛ’n, nn ń yí min wun nglo ń klé i aolia nun.+ Yɛ ń kán ndɛ ń klé i laliɛ nun.+ 7 Sanngɛ min sufuɛ Moizi liɛ’n, ɔ timan sɔ. N fali min awlo wunmuan’n n wlɛli i sa nun.*+ 8 E nin i e koko yalɛ kɛ sran kun nin i wiengu be fa koko yalɛ’n sa.+ N kan ndɛ n kle i weinwein, n kɛnmɛn i ɲanndra nun. Yɛ ɔ wun wafa nga Zoova ti’n i jrɛiin. ?Ngue ti yɛ kɛ amún kán min sufuɛ Moizi i wun ndɛ tɛ’n, srɛ w’a kunman amun-ɔn?”

9 Zoova fali be wun ya dan kpa. Kpɛkun ɔ jasoli be wun lɛ. 10 Kɛ ɔ yoli sɔ’n, ɲanmiɛn ble’n jasoli tannin sua mɔ Ɲanmiɛn yi i wun nglo nun’n i su lɛ. Bé nían-ɔn, kokowe w’a yo Miriamun. Kokowe sɔ’n fɛn fuai kɛ laglasi ng’ɔ fin nglo lɔ gua munkɛnmunkɛn’n sa.+ Kɛ Aarɔn kpɛli i ɲin niannin Miriamun’n, ɔ wunnin kɛ kokowe w’a yo i.+ 11 Be ja nun lɛ’n, Aarɔn seli Moizi kɛ: “Min min, ń kpáta wɔ! Yaci, nán maan sa tɛ nga e yoli’n, i nuan like’n ka e su. E dili sinnzin dan. 12 Yaci, nán maan ɔ yo kɛ ba kun m’ɔ wuli i nin klun, mɔ kɛ bé gúɛ i ase’n, i wunnɛn’n i bue kun w’a tutu puapua’n sa!” 13 Yɛ Moizi kpan flɛli Zoova-ɔ. Ɔ seli kɛ: “Ɲanmiɛn, yaci. Yo i juejue! Yaci!”+

14 Zoova tɛli Moizi su kɛ: “?Sɛ i si ti i nuan nzue tɛ i ɲrun’n nun’n, i ɲin su guaman ase cɛn ba nso? Maan be sie i klɛ nun nanmue’n i sin lɔ+ naan ɔ ka lɔ cɛn ba nso. I sin’n, ɔ kwla sɛ i sin nanmue’n nun.” 15 Ɔ maan be ko sieli Miriamun i klɛ nun nanmue’n i sin lɔ cɛn ba nso.+ Sran’m b’a tuman be bo lele naan Miriamun w’a sɛ i sin. 16 I sin’n, be jasoli Azerɔtu+ lɛ, yɛ be ko boli be nanmue’n Paran aawlɛ flɛnnɛn’n nun lɔ.+

13 Zoova kannin ndɛ kun kleli Moizi. Ɔ seli i kɛ: 2 “Sunman sran naan be wɔ be ko kpla* Kanaan mɛn mɔ n su wa fa man Izraɛlifuɛ mun’n. Akpasua kun nun’n, fa sran kun. Maan sran sɔ’n yo i akpasua’n nunfuɛ’m+ be su kpɛn.”+

3 Moizi sunmannin be kɛ nga Zoova seli i kɛ ɔ yo’n sa. Ɔ maan be fɛli i Paran aawlɛ flɛnnɛn’n+ nun lɛ be ɔli. Be nga be ɔli’n, be kwlaa be ti Izraɛlifuɛ’m be su kpɛn. 4 Be dunman mun yɛ: Ribɛnin akpasua’n nun’n, Samia m’ɔ ti Zakiri i wa’n. 5 Simeɔn akpasua’n nun’n, Safati m’ɔ ti Ori i wa’n. 6 Zida akpasua’n nun’n, Kalɛbu+ m’ɔ ti Zefine i wa’n. 7 Isakaa akpasua’n nun’n, Igali m’ɔ ti Zozɛfu i wa’n. 8 Efraimun akpasua’n nun’n, Oze+ m’ɔ ti Nɛn i wa’n. 9 Bɛnzamɛn akpasua’n nun’n, Paliti m’ɔ ti Rafu i wa’n. 10 Zabilɔn akpasua’n nun’n, Gadiɛli m’ɔ ti Sodi i wa’n. 11 Zozɛfu akpasua’n nun’n,+ yɛle kɛ Manase akpasua liɛ’n nun’n,+ Gadi m’ɔ ti Susi i wa’n. 12 Dan akpasua’n nun’n, Amiɛli m’ɔ ti Gemali i wa’n. 13 Azɛɛ akpasua’n nun’n, Setu m’ɔ ti Misɛli i wa’n. 14 Nɛftali akpasua’n nun’n, Nabi m’ɔ ti Vɔfsi i wa’n. 15 Gadi akpasua’n nun’n, Geiɛli m’ɔ ti Maki i wa’n. 16 Be nga Moizi sunmannin be kɛ be ko kpla mɛn’n be nian’n, be dunman mun yɛ be o lɛ-ɔ. Moizi tɔnnin Oze m’ɔ ti Nɛn i wa’n i dunman kɛ Zozie.*+

17 Kɛ Moizi súnman be kɛ be ko kpla Kanaan mɛn’n, ɔ seli be kɛ: “Amun wɔ Negɛbu. I sin’n, amun wɔ okaoka lika’m be nun lɔ.+ 18 Amun nian wafa nga mɛn sɔ’n ti’n.+ Yɛ amun nian sɛ be nga be tran mɛn sɔ’n nun’n, be le wunmiɛn annzɛ be leman wunmiɛn-o, annzɛ kusu sɛ be sɔnnin annzɛ b’a sɔnman-o. 19 Sɛ mɛn sɔ’n ti kpa annzɛ ɔ ti tɛ-o, sɛ be sisili be klɔ’m be wun annzɛ be nannan lɛ ngbɛn-o, amun nian. 20 Asa ekun’n, amun nian sɛ lɔ asiɛ’n yo like ye annzɛ ɔ yoman like ye-o.+ Yɛ amun nian sɛ waka o lɔ-o annzɛ waka nunman lɔ-o. Amun yo yakpafuɛ+ naan amun fa mɛn sɔ’n nun lɔ waka mma’n wie bla.” Blɛ sɔ’n nun’n, nn viɲin mma klikli’m be tilɛ w’a ju.+

21 Ɔ maan be ko kplali mɛn’n niannin. Be fɛli i Zinin aawlɛ flɛnnɛn’n+ nun lɔ lele be juli Reɔbu,+ Lebo-Amati*+ i wun lɛ’n. 22 Kɛ be juli Negɛbu lɔ’n, be ɔli Ebrɔn.+ Lɔ yɛ Aiman nin Sesai nin Talmai+ nin Anakifuɛ’m+ be tran-ɔn. Kɛ be kplannin Ebrɔn sɔ’n, ɔ dili afuɛ nso naan b’a kplan Zoan m’ɔ o Ezipti lɔ’n. 23 Kɛ be juli Ɛskɔlu Kongo’n+ nun’n, be kpɛli viɲin sa mma kun. Viɲin sɔlɛ kunngba yɛ ɔ o su-ɔ. Sran nɲɔn be fa sieli i waka trolo kun su naan b’a sua. Be tili grenadie mma nin figie mma wie.+ 24 Be wa flɛli lika sɔ’n kɛ Ɛskɔlu* Kongo’n.+ Afin lɔ yɛ Izraɛlifuɛ’m be kpɛli viɲin sɔlɛ’n niɔn.

25 Be fali cɛn ba ablanan (40)+ be kplali mɛn’n naan b’a sa be sin. 26 Be ko toli Moizi nin Aarɔn nin Izraɛlifuɛ mun Kadɛsi+ lɔ, Paran aawlɛ flɛnnɛn’n nun. Be kannin like kwlaa nga be wunnin i’n, i ndɛ kleli be. Kpɛkun be fali waka mma nga be fɛli i mɛn sɔ’n nun lɔ’n kleli be. 27 Ndɛ nga be kan kleli Moizi’n yɛ: “E ɔli mɛn nga a sunmannin e lɔ’n nun. Nanwlɛ, nɔnnɔn nin awɛma nzue be sonji lɔ.+ Nian, lɔ waka mma’n i wie yɛ.+ 28 Sanngɛ be nga be tran mɛn sɔ’n nun’n, be le wunmiɛn kpa. Be klɔ nga be sisili be wun’n be ti dandan kpa. Asa ekun’n, e wunnin Anakifuɛ mun lɔ.+ 29 Amalɛkifuɛ’m+ be tran Negɛbu asa’n su.+ Yɛ Ɛtifuɛ mun nin Zebisifuɛ mun+ nin Amɔɔfuɛ’m+ be tran okaoka lika’m be nun. Asa ekun’n, Kanaanfuɛ’m+ be tran jenvie’n i wun lɛ,+ ɔ nin Zurdɛn’n i nuan lɛ.”

30 Kalɛbu kunndɛli kɛ ɔ́ gúa sran mɔ be o Moizi i ɲrun lɛ’n, be awlɛn su nzue. I sɔ’n ti’n, ɔ seli kɛ: “Nán maan e sisi e bo. Amun e wɔ. É fá mɛn sɔ’n, afin é kwlá lɔfuɛ mun.”+ 31 Sanngɛ be nga be nin i be ɔli mɛn’n i nianlɛ’n, be seli kɛ: “E nin sran sɔ mun e kwlá kunman. Afin be wunmiɛn’n tra e liɛ’n lelele.”+ 32 Asa ekun’n, be kannin mɛn nga be ko niannin’n i ndɛ tɛtɛ+ kleli Izraɛlifuɛ mun sa trilili. Be seli kɛ: “Mɛn nga e wlanwlannin nun’n, ɔ yo sro. Sɛ amun kɔ lɔ’n, saan amún wú. Yɛ sran nga e wunnin be lɔ’n, be kwlaa be ti sa jajraajraa, be yo sro.+ 33 E wunnin Nefilimun mun lɔ. Anaki i mma+ mɔ be ti Nefilimun’m be osu’n i nunfuɛ mun-ɔn. Kɛ e wunnin be’n, e kacili kɛ lalo sa be ɲrun. Yɛ be kusu’n, kɛ be buli e sɔ wie-ɔ.”

14 Sran’m be kwlakwla be mannin be nɛn’n su be sunnin. Be sunnin kɔnguɛ lele lika’n fa cɛnnin.+ 2 Izraɛlifuɛ’m be wunmuan’n be ijɔli wunkunwunkun. Be kannin Moizi nin Aarɔn be wun ndɛ tɛtɛ.+ Sran’m be kwlaa be seli kɛ: “Sɛ ɔ ti kɛ e wuli Ezipti mɛn’n nun lɔ’n, annzɛ aawlɛ flɛnnɛn nga nun wa’n, nn ɔ flunman! 3 ?Ngue ti yɛ Zoova fali e bali mɛn nga nun naan be fa tokofi be kun e-ɔ?+ E yi nin e mma’m bé káci kɛ like nga alɛ kunfuɛ’m be ɲɛn i alɛ nun’n sa.+ ?Sɛ e sa e sin Ezipti lɔ’n,+ ɔ timan kpa?” 4 I kpa bɔbɔ’n, be seli be wiengu kɛ: “Maan e sie e su kpɛn kun naan e sa e sin Ezipti lɔ.”+

5 Yɛ Moizi nin Aarɔn be utuli be ɲin ase Izraɛlifuɛ’m be kwlaa be ɲrun lɛ. 6 Zozie+ m’ɔ ti Nɛn i wa’n nin Kalɛbu+ m’ɔ ti Zefine i wa’n, mɔ be ɔli mɛn’n i kpla nianlɛ wie’n, be titili be wun tralɛ’m be nun. 7 Yɛ be seli Izraɛlifuɛ kwlaa sɔ mun kɛ: “Mɛn nga e ko kpla niannin’n, nanwlɛ, ɔ ti kpa dan.+ 8 Sɛ Zoova jran e sin’n, ɔ́ fá e wlú mɛn sɔ’n nun yɛ ɔ́ fá mán e. Nɔnnɔn nin awɛma nzue be sonji lɔ.+ 9 Sanngɛ nán amun yo ɲin kekle Zoova su. Yɛ nán amun sro mɛn sɔ’n i nunfuɛ mun.+ Afin é núnkún be.* Be leman like fi naan w’a sasa be. E liɛ’n, Zoova o e sin.+ I sɔ’n ti’n, nán srɛ kun amun.”

10 Sran’m be kwlaa be waan bé fínfín be yɔbuɛ.+ Sanngɛ Zoova yili i wun nglo ɲanɲanɲan i tannin sua’n su kleli Izraɛlifuɛ’m be wunmuan’n.+

11 Yɛ Zoova seli Moizi kɛ: “?Cɛn onin ko naan sran nga’m b’a yaci min finfin yolɛ?+ N yoli abonuan sa kpanngban n kleli be. ?Ɔ maan cɛn onin ko naan b’a lafi min su?+ 12 Ń má fá tukpacɛ m’ɔ sa ndɛndɛ’n ń yí be su naan be nunnun sekeseke. Yɛ ń má yó naan a kaci nvle kun. Nvle sɔ’n yó dan, kpɛkun ɔ́ ɲán kwlalɛ trá sran nga mun.”+

13 Sanngɛ Moizi seli Zoova kɛ: “Sɛ a yo sɔ’n, Eziptifuɛ mɔ be sa nun yɛ a fali ɔ wunmiɛn dan’n deli ɔ nvle’n nunfuɛ mun’n, bé tí.+ 14 Kpɛkun bé kán klé mɛn nga nunfuɛ mun. Be kusu be tili i kɛ wɔ Zoova, a o nvle nga nunfuɛ’m be afiɛn+ naan a yili ɔ wun nglo weiin kleli be.+ Zoova yɛle wɔ. Yɛ ɔ ɲanmiɛn ble’n wo be ti su. Asa ekun’n, wia nun’n a o ɲanmiɛn ble’n nun, kpɛkun kɔnguɛ’n a o sin’n nun yɛ a dun mmua be ɲrun-ɔn.+ 15 Sɛ a nunnun be ngba kpɛ kunngba’n,* nvle nga be tili ɔ su ndɛ’n, bé sé kɛ: 16 ‘Zoova kwlá faman sran nga mun kɔman mɛn ng’ɔ tali nda kɛ ɔ́ fá mán be’n nun. I sɔ’n ti yɛ ɔ nunnunnin be aawlɛ flɛnnɛn’n nun-ɔn.’+ 17 Zoova, yaci, maan ɔ kwlalɛ’n yo dan kɛ nga a fa kannin’n sa. A seli kɛ: 18 ‘Zoova faman ya ndɛndɛ. Ɔ klo sran dan.+ Ɔ yaci sa cɛ. Ɔ yaci fɔnlɛ’n nin sa tɛ’n cɛ. Sanngɛ sran ng’ɔ yo sa tɛ’n, ɔ yacimɛn i lɛ sa ngbɛn. Fɔnlɛ nga siɛ’m be fɔn’n, ɔ nian su tu be mma mun nin be anunman’m be mma liɛ’m be fɔ lele fa ju be akpasua nnan su’n su.’+ 19 Yaci, fɔnlɛ nga sran nga’m be fɔnnin’n, yaci cɛ be, klolɛ mɔ a klo sran dan’n ti. Kɛ ɔ fɛ i Ezipti lɔ lele’n, wafa nga a yacili be sa tɛ mun cɛli be’n, yaci cɛ be sɔ ekun.”+

20 Yɛ Zoova seli kɛ: “Kɛ mɔ a kpatali min’n ti’n, m’an yaci m’an cɛ be.+ 21 Sanngɛ kɛ mɔ n wo lɛ sakpasakpa’n ti’n, Zoova i aɲrunɲan’n ɔ́ yí asiɛ wunmuan’n.+ 22 Be nga be wunnin min aɲrunɲan’n nin abonuan sa+ nga n yoli be Ezipti lɔ nin aawlɛ flɛnnɛn’n nun wa’n, mɔ b’a fɔkɔ min awlɛn lele+ kpɛ blu’n, mɔ b’a faman ndɛ nga n kannin’n su’n,+ 23 be ɲinma su taman mɛn nga n tali be si’m be nda kɛ ń fá mán be’n. Be nga be yoli min finfin’n, be nun wie fi su wunman mɛn sɔ’n.+ 24 Sanngɛ min sufuɛ Kalɛbu+ w’a buman akunndan kɛ be sa. I liɛ’n, ɔ tuli i klun fali min ndɛ’n su. I sɔ’n ti’n, ń fɛ́ i ń wlú mɛn nga i ja tiali lɔ’n nun. Yɛ i osu’n nunfuɛ’m bé trán mɛn sɔ’n nun.+ 25 Kɛ mɔ Amalɛkifuɛ mun nin Kanaanfuɛ’m+ be tran kongo’n nun’n ti’n, ainman’n amun sa amun sin. Amun fa Jenvie Ɔkwlɛ’n i atin’n naan amun wɔ aawlɛ flɛnnɛn’n nun.”+

26 Zoova seli Moizi nin Aarɔn be kɛ: 27 “?Cɛn onin ko naan klunwifuɛ nga’m b’a yaci min wun ndɛ kanlɛ wunkunwunkun?+ Min wun ndɛ nga be kan’n, n tili.+ 28 Se be kɛ: ‘Zoova waan yoo: “Kɛ mɔ n wo lɛ sakpasakpa’n ti’n, ndɛ nga amun kannin mɔ n tili’n, i nuan like yɛ ń fá yó amun-ɔn.+ 29 Amun kwlaa nga amun le afuɛ ablaɔn (20) nin ablaɔn (20) tra su mɔ be klɛli amun dunman’n, amun nun sran nga be kannin min wun ndɛ’n,+ amun fuɛn’n ká aawlɛ flɛnnɛn’n nun wa.+ 30 Sɛ w’a yoman kɛ Kalɛbu m’ɔ ti Zefine i wa’n nin Zozie m’ɔ ti Nɛn i wa’n be sa’n,+ amun nun wie fi su wluman mɛn nga n tali nda* kɛ amún trán nun’n i nun.+

31 “‘“Amun mma mun mɔ amun seli kɛ bé káci kɛ like nga alɛ kunfuɛ’m be ɲɛn i alɛ nun’n sa’n,+ be yɛ ń fá be ń wlú lɔ-ɔ. Be ɲinma tá mɛn nga amun a bumɛn i like fi’n.+ 32 Sanngɛ amun liɛ’n, amun fuɛn’n ká aawlɛ flɛnnɛn nga nun. 33 Amun mma’m bé kánkán bua afuɛ lele ablanan (40)+ aawlɛ flɛnnɛn’n nun. Sa tɛ nga amun yoli’n,* be yɛ bé wá fɛ́ i su afɛ’n niɔn. Ɔ́ yó sɔ lele amun nun kasiɛn’n wú, yɛ i fuɛn’n ká aawlɛ flɛnnɛn’n nun.+ 34 Cɛn ba ablanan (40)+ yɛ amun fa kplali mɛn’n niɔn. Sa tɛ nga amun yoli’n, amún wá wún i su afɛ afuɛ ablanan (40).+ Cɛn ba kun ti afuɛ kun, cɛn ba kun ti afuɛ kun. I liɛ’n, wafa nga i bo’n gua man be nga be tanndan min ɲrun’n,* amún sí i.

35 “‘“N bɔbɔ Zoova, min yɛ n kannin-ɔn. Like nga ń má fá yó klunwifuɛ nga mun’n, mɔ be kwlaa be bo yoli kun be jasoli min wun’n, yɛ ɔ o yɛ: Bé núnnún sekeseke aawlɛ flɛnnɛn nga nun. Bé wú wa.+ 36 Sran nga Moizi sunmannin be kɛ be ko kpla mɛn’n be nian’n, mɔ kɛ be sali be sin’n be wa kannin mɛn sɔ’n i wun ndɛ tɛtɛ’n, be dunman nun ti yɛ Izraɛlifuɛ’m be kwlaa be kɛnnin i wun ndɛ tɛtɛ-ɔ.+ 37 Nanwlɛ, sran sɔ mɔ be wa kannin mɛn sɔ’n i wun ndɛ tɛtɛ’n, sa wá ɲán be. Kpɛkun bé wú Zoova ɲrun lɛ.+ 38 Sanngɛ Zozie m’ɔ ti Nɛn i wa’n nin Kalɛbu m’ɔ ti Zefine i wa’n, mɔ be o be nga be ko kplali mɛn’n be nun wie’n, be liɛ’n bé ká nguan nun.”’”+

39 Kɛ Moizi kannin ndɛ sɔ mun kleli Izraɛlifuɛ’m be kwlaa’n, be sunnin dan kpa. 40 Kɛ lika’n cɛnnin’n, be jasoli nglɛmun ndɛ kpa’n naan bé kɔ́ okaoka’m be nun lɔ. Be seli kɛ: “E yoli sa tɛ. Sanngɛ e yɛ e o yɛ, lika nga Zoova kɛnnin i ndɛ’n e waan é kɔ́ lɔ.”+ 41 Sanngɛ Moizi seli be kɛ: “?Ngue ti yɛ amun faman Zoova i nuan ndɛ’n su-ɔ? Sɛ amun kɔ’n, i bo su guaman kpa manman amun. 42 Nán amun wɔ. Afin Zoova nunman amun sin. Ɔ maan amun kpɔfuɛ’m bé kwlá amun.+ 43 Afin Amalɛkifuɛ mun nin Kanaanfuɛ’m be o amun ɲrun lɔ.+ Bé fá tokofi kún amun. Kɛ mɔ amun kacili amun sin sili Zoova ti’n, Zoova su jranman amun sin.”+

44 Ɔ nin i sɔ ngba’n, be fali ɲin kekle be ɔli okaoka’m be nun.+ Sanngɛ Moizi nin Zoova i aenguɛ’n i alaka’n, b’a tuman be bo nanmue’n nun lɛ.+ 45 Yɛ Amalɛkifuɛ nin Kanaanfuɛ mɔ be tran okaoka sɔ’m be nun’n, be bali. Be kwlali be, yɛ be fuannin be lele fa juli Ɔɔma.+

15 Zoova seli Moizi ekun kɛ: 2 “Kan ndɛ kle Izraɛlifuɛ mun. Se be kɛ: ‘Kɛ amun ko ju mɛn nga n su fa man amun naan amun tran nun’n i nun’n,+ 3 sɛ sran kun waan ɔ́ fá nnɛn kun yí tɛ sin su mán Zoova’n, sɛ bua annzɛ boli annzɛ nannin yɛ i waan ɔ́ fá yí tɛ naan ɔ bɔn Zoova i bue nun fannin’n,+ maan ɔ yo tɛ nga kɛ bé yí’n be yra nnɛn’n i kɔlikɔli-o,+ annzɛ nda ngunmin kun mɔ sran’n tali’n i ti tɛ-o,+ annzɛ tɛ nga be yi i cɛn dilɛ blɛ’n nun-o,+ 4 maan sran sɔ’n fa ble annzɛ i wunsu like mɔ be fa man Zoova’n uka su. Maan ɔ fa sanmlɛn mlɛnnɛnnɛn kpa+ efa kun naan ɔ bubu nun blu, naan ɔ fa bue kun* bla. Maan ɔ bubu ngo inin kun nun nnan, naan ɔ fa bue kun* sanngan sanmlɛn’n nun naan w’a fa ba. 5 Asa ekun’n, kɛ amún yí tɛ nga kɛ bé yí’n be yra nnɛn’n i kɔlikɔli’n+ annzɛ amún fá bua ba yasua kun yí tɛ’n, maan amun bubu duvɛn inin kun nun nnan, naan amun fa bue kun gua tɛ yiwlɛ’n su. 6 Sɛ bua ɲin kun yɛ amún fá yí tɛ’n, amun fa sanmlɛn mlɛnnɛnnɛn kpa efa kun naan amun bubu nun blu, naan amun fa bue nɲɔn* be fa man min. Amun bubu ngo inin kun nun nsan, naan amun fa bue kun* sanngan sanmlɛn’n nun naan amun a fa ba. 7 Asa ekun’n, amun bubu duvɛn inin kun nun nsan, naan amun fa bue kun gua tɛ yiwlɛ’n su naan ɔ bɔn Zoova i bue nun fannin.

8 “‘Sanngɛ sɛ nannin yasua kun yɛ amún fá yí tɛ nga kɛ bé yí’n be yra nnɛn’n i kɔlikɔli’n,+ annzɛ amún fá yí nda kun m’ɔ ti i liɛ ngunmin i ti tɛ’n,+ annzɛ bo kun yolɛ tɛ mán Zoova’n,+ 9 amun fa sanmlɛn mlɛnnɛnnɛn kpa efa kun naan amun bubu nun nsan, naan amun fa bue kun uka nannin’n su naan amun a fa ba.+ Amun bu ngo inin sin kun naan amun fa sanngan sanmlɛn sɔ’n nun. 10 Asa ekun’n, amun fa duvɛn inin sin kun gua tɛ yiwlɛ’n su+ kɛ like mɔ be fa sie i sin’n su naan ɔ bɔn Zoova i bue nun fannin’n sa. 11 Nannin yasua, annzɛ bua ɲin, annzɛ bua ba yasua, annzɛ boli kwlaa nga amún fá yí tɛ’n, wafa ng’ɔ fata kɛ amun yo’n yɛ ɔ o lɛ-ɔ. 12 Sɛ nnɛn kunngba annzɛ nnɛn kpanngban yɛ amún mán’n, kɛ amún fá nnɛn kun yí tɛ’n, amun sie su sanmlɛn mlɛnnɛnnɛn kpa mɔ be sɛnngɛnnin i nin ngo’n ɔ nin nzan. 13 Kɛ Izraɛlifuɛ kun waan ɔ́ yí tɛ nga be fa sie i sin su naan ɔ bɔn Zoova i bue nun fannin’n, wafa ng’ɔ fata kɛ ɔ yo’n yɛ ɔ o lɛ-ɔ.

14 “‘Sɛ aofuɛ kun tran amun afiɛn annzɛ ɔ nin amun o nun w’a cɛ, naan i waan ɔ́ yí tɛ nga be fa sie i sin su naan ɔ bɔn Zoova i bue nun fannin’n, wafa nga amun yo’n, i su yɛ ɔ fata kɛ ɔ nian-ɔn.+ 15 Maan ɔ yo amun bɔbɔ-o,* annzɛ aofuɛ nga be tran amun afiɛn-o, mmla kunngba’n i su yɛ amun di-ɔ. Amun osu’n nunfuɛ’m be kwlaa bé dí mmla sɔ’n su tititi. Wafa nga Zoova bu amun’n, i sɔ yɛ ɔ bu aofuɛ mun wie-ɔ.+ 16 Mmla kunngba’n su yɛ amun nin aofuɛ nga be o amun afiɛn’n amun di-ɔ. I Izraɛlifuɛ-o, i aofuɛ-o, ajalɛ kunngba nga n fa’n, i su yɛ amun kwlaa amun di-ɔ.’”

17 Zoova seli Moizi ekun kɛ: 18 “Kan ndɛ kle Izraɛlifuɛ mun. Se be kɛ: ‘Kɛ amun ko ju mɛn nga n su fa amun kɔ lɔ’n nun’n, 19 mɔ amún dí mɛn sɔ’n nun lɔ kpanwun’n,*+ amun man Zoova like. 20 Amun fa amun ninnge’m be mma klikli’n+ be sanmlɛn klikli ng’ɔ timan mlɛnnɛnnɛn’n, naan amun fa tɔn kpanwun kukluuklu* naan amun fa man min. Maan like nga amún mán’n, ɔ yo kɛ ɔɔzu annzɛ ble bowlɛ’n nun like nga amun man’n sa. 21 Maan amun bɔbɔ nin amun osu’n nunfuɛ mun amun fa amun ninnge’m be mma klikli’n be sanmlɛn klikli ng’ɔ timan mlɛnnɛnnɛn’n i bue be man Zoova tititi.

22 “‘Mmla kwlaa nga Zoova fa mannin Moizi’n, sɛ amun fɔn naan amun a nantiman su’n, 23 yɛle kɛ like kwlaa nga Zoova waan amun yo’n, mɔ kɛ Zoova mán Moizi mmla’n, ɔ seli kɛ amun nin amun osu’n nunfuɛ mun amun di su titi’n, 24 sɛ fɔnlɛ yɛ amun fɔnnin naan Izraɛlifuɛ’m be siman sɔ’n, maan Izraɛlifuɛ’m be wunmuan’n be fa nannin ba ng’ɔ ti yasua’n kun be yi tɛ nga kɛ bé yí’n be yra nnɛn’n i kɔlikɔli’n naan ɔ bɔn Zoova i bue nun fannin. Maan be fa ble annzɛ i wunsu like be uka su, yɛ be man min nzan kɛ nga be kleli amun kɛ amun yo’n sa.+ Asa ekun’n, amun fa boli ba kun yi sa tɛ’n i ti tɛ wie.+ 25 Maan min ɲrun jranfuɛ’n yi Izraɛlifuɛ’m be wunmuan’n be ti tɛ naan e nin be e afiɛn w’a sɛ. I liɛ’n ń yáci be sa tɛ’n ń cɛ́ be.+ Afin fɔnlɛ yɛ be fɔnnin-ɔn. Asa kusu’n, fɔnlɛ nga be fɔnnin’n ti’n, be yili tɛ nga kɛ bé yí’n, be fa nnɛn’n sie i sin su’n mannin Zoova. Kpɛkun be yili be sa tɛ’n i ti tɛ wie mannin Zoova. 26 Ń yáci Izraɛlifuɛ’m be kwlaa ɔ nin aofuɛ nga be o be afiɛn’n, be sa tɛ’n ń cɛ́ be. Afin fɔnlɛ yɛ be wunmuan’n be fɔnnin-ɔn.

27 “‘Sɛ fɔnlɛ yɛ sran kun fɔnnin’n, maan ɔ fa boli bla ng’ɔ nin-a traman afuɛ kun’n man naan be fa yi sa tɛ’n i ti tɛ.+ 28 Maan min ɲrun jranfuɛ’n yi sran nga nɛ́n i ɲinfu yɛ ɔ fɔnnin’n i ti tɛ man Zoova naan ɔ nin i be afiɛn w’a sɛ. Ɔ maan min ɲrun jranfuɛ’n yí afiɛn siesielɛ tɛ’n, kpɛkun ń yáci sran sɔ’n i sa tɛ’n ń cɛ́ i.+ 29 Sɛ Izraɛlifuɛ kun annzɛ aofuɛ nga be tran amun afiɛn’n be nun kun yo sa kun mɔ nɛ́n i ɲinfu yɛ ɔ yoli’n, mmla kunngba’n yɛ ɔ fata kɛ amun kwlaa amun di su-ɔ.+

30 “‘Sɛ Izraɛlifuɛ kun annzɛ aofuɛ kun i ɲinfu yo sa tɛ’n,+ nn w’a saci Zoova wun. Ɔ maan ɔ fata kɛ be kun i.* 31 Maan be kun i, afin w’a buman Zoova i nuan ndɛ’n i like fi,+ yɛ w’a nantimɛn i mmla’n su. Ɔ́ ɲɛ́n i sa tɛ’n i nuan like.’”+

32 I nun mɔ Izraɛlifuɛ’m be o aawlɛ flɛnnɛn’n nun lɔ’n, be wunnin bian kun m’ɔ su isa yie Wunmiɛn-lolɛ-cɛn’n nun’n.+ 33 Be nga be wunnin kɛ ɔ su isa yie’n, be fɛ i ɔli Moizi nin Aarɔn ɔ nin Izraɛlifuɛ’m be kwlaa be ja su. 34 Be trɛli i, yɛ be niɛnnin i su kpa,+ afin be siman like trele ng’ɔ fata kɛ be fa yo i’n.

35 Zoova seli Moizi kɛ: “Maan be kun bian sɔ’n.+ Maan Izraɛlifuɛ’m be wunmuan’n be fɛ i wɔ nanmue’n i sin lɔ naan be finfin i yɔbuɛ.”+ 36 Ɔ maan kɛ nga Zoova kan kleli Moizi sa’n, Izraɛlifuɛ’m be wunmuan’n be fali bian’n ɔli nanmue’n i sin lɔ. Kpɛkun be finfinnin i yɔbuɛ lele ɔ wuli.

37 Zoova seli Moizi ekun kɛ: 38 “Kan ndɛ kle Izraɛlifuɛ mun. Se be kɛ be yo be tralɛ’n i nuan njɔlɛ tɛɛn. Yɛ be fa jese ble sinsin be tralɛ’n i nuan njɔlɛ sɔ’n i su nglo lɛ tɛɛn wie. Maan be nin be osu’n nunfuɛ’m be yo i sɔ tititi.+ 39 ‘Amun yo amun tralɛ’m be nuan njɔlɛ mun sɔ. I liɛ’n, kɛ amún wá wún i’n, amún wla kpɛ́n mmla kwlaa nga Zoova fa mannin amun’n su, yɛ amún nánti be su.+ Nán amun yo like nga amun awlɛn’n nin amun ɲinma’n be su amun bo kɛ amun yo’n. Afin sɛ amun yo sɔ’n, amún sɔ́ amuin mun.*+ 40 I sɔ’n úka amun naan amun wla w’a kpɛn min mmla’m be kwlaa be su. Kpɛkun amún nánti be su. Ɔ maan amún yó sanwun amun Ɲanmiɛn’n i ɲrun.+ 41 Amun Ɲanmiɛn Zoova yɛle min. N fali amun Ezipti lɔ n fiteli naan ń klé amun kɛ min yɛ n ti amun Ɲanmiɛn’n niɔn.+ Amun Ɲanmiɛn Zoova yɛle min.’”+

16 Levi+ i wa nga be flɛ i kɛ Keati’n,+ i wa liɛ Izeari,+ i wa Kore+ ɔ nin Ribɛnin+ i osu’n nunfuɛ wie’m be bo wa yoli kun. Sran sɔ mun yɛle Eliabu+ i wa Datan nin Abiramun ɔ nin Pelɛti i wa Ɔnun. 2 Be nin sran ya nɲɔn sran ablenun (250) mɔ be ti Izraɛlifuɛ’n, be jasoli Moizi wun. Sran sɔ’m be ti akpasua su kpɛn, yɛ be ti sran’m be nuan ndɛ kanfuɛ, kpɛkun be le ɲrun kpa. 3 Be bo yoli kun+ be ko toli Moizi nin Aarɔn. Yɛ be seli be kɛ: “Amun liɛ’n w’a flan e ngboko! Izraɛlifuɛ’m be wunmuan’n, be ti Ɲanmiɛn liɛ klonglo.+ Ɔ leman be nun kun sa m’ɔ timɛn i liɛ-ɔ. Yɛ Zoova o be afiɛn.+ ?Yɛ nn ngue ti yɛ amun yo amun wun kpakpa Zoova i sran’m be su-ɔ?”

4 Kɛ Moizi tili i sɔ’n, ɔ utuli i ɲin ase. 5 Kpɛkun ɔ seli Kore nin be nga be su i su’n be kɛ: “Ainman nglɛmun’n, Zoova wá klé sran ng’ɔ kpɛli i+ m’ɔ ti i liɛ klonglo m’ɔ fata kɛ ɔ mɛntɛn i’n.+ Sran ng’ɔ́ fɛ́ i’n,+ i sɔfuɛ’n yɛ ɔ́ mɛ́ntɛn i-ɔ. 6 I sɔ’n ti’n, Kore, a nin ɔ sin jranfuɛ’m be kwlaa,+ amun fa sin guawlɛ mun.+ 7 Ainman’n, amun gua be nun sin, kpɛkun amun fa ansan sie be su Zoova ɲrun lɛ. Sran nga Zoova kpɛ́ i’n,+ i sɔfuɛ’n yɛ ɔ ti i liɛ klonglo-ɔ. Levifuɛ mun,+ amun liɛ’n w’a flan!”

8 I sin’n, Moizi seli Kore kɛ: “Levifuɛ mun, amun yaci, amun sie amun su. 9 Izraɛli i Ɲanmiɛn’n fali amun Izraɛlifuɛ’m be nun sieli amun ngunmin.+ Ɔ mannin amun atin kɛ amun wunnge i wun naan amun di junman Zoova i tannin sua’n nun. Ɔ mannin amun atin naan amun jran Izraɛlifuɛ’m be ɲrun naan amun di junman man be. ?I sɔ’n timan like dan amun ɲrun?+ 10 Asa ekun’n, ɔ fali wɔ nin ɔ niaan mun mɔ amun ti Levi i mma mun’n naan amun wunnge i wun. ?I sɔ’n timan like dan amun ɲrun? ?Ɲanmiɛn ɲrun jranlɛ junman’n yɛ amun su kpli i ekun-ɔn?+ 11 I sɔ’n ti’n, a nin ɔ sran mɔ b’a yia yɛ’n, amun a jaso Zoova wun. ?Wan yɛle Aarɔn mɔ i ti yɛ amun kɛn i wun ndɛ tɛtɛ-ɔ?”+

12 I sin’n, Moizi toli Datan m’ɔ ti Eliabu i wa’n nin Abiramun+ be ngaliɛ kɛ be bla. Sanngɛ be seli kɛ: “E kɔman lika fi! 13 A ko fali e mɛn kun mɔ nɔnnɔn nin awɛma nzue be sonji lɔ’n nun naan á bá e kunlɛ aawlɛ flɛnnɛn’n nun. ?Like nga a yoli’n, ɔ juman wɔ?+ Ɔ nin i sɔ ngba’n, w’a jaso e su ekun naan ɔ ngunmin á síe e. 14 Nán mɛn kun mɔ be diman nɔnnɔn nin awɛma nzue’n+ be yalɛ nun’n i nun yɛ a fa e bali-ɔ. Asa kusu’n, w’a manman e fie nin viɲin. ?Ɔ waan bian nga’m be su ɔ su kɛ aɲinsifuɛ mun sa ti-ɔ?* Nanwlɛ, e kɔman lika fi!”

15 I sɔ’n yoli Moizi i ya dan naan w’a se Zoova kɛ: “Nán kpɛ ɔ ɲin nian be ble annzɛ i wunsu like nga bé fá mán wɔ’n. M’an deman be aflunmun ba kun sa. Asa ekun’n, m’an yoman be nun wie fi i tɛ.”+

16 I sin’n, Moizi seli Kore kɛ: “A nin be nga be su ɔ su’n, be ko jran Zoova ɲrun ainman. A nin be nin Aarɔn amun ko jrɛnjrɛn i ɲrun. 17 Maan sran kun fɛ i sin guawlɛ’n naan ɔ gua nun ansan. I sin’n, maan ɔ fɛ i sin guawlɛ’n kle Zoova. Maan ɔ sran’m be fa be sin guawlɛ ya nɲɔn ablenun’n (250), be bla wie. A nin Aarɔn amun uka be su. Maan sran kun fɛ i sin guawlɛ’n bla.” 18 Yɛ be fali be sin guawlɛ’n be bali-ɔ. Be guali be nun sin nin ansan. Kpɛkun be nin Moizi nin Aarɔn be wa jrannin tannin sua mɔ Ɲanmiɛn yi i wun nglo nun’n, i anuan’n nun lɛ. 19 Kɛ Kore yiɛli i sran mun+ mɔ be ko jrannin be ɲrun tannin sua mɔ Ɲanmiɛn yi i wun nglo nun’n i anuan’n nun lɛ’n, Zoova yili i wun nglo ɲanɲanɲan sran’m be kwlaa be ɲrun lɛ.+

20 Zoova seli Moizi nin Aarɔn kɛ: 21 “Amun jaso sran nga’m be afiɛn naan n ka lɛ n nunnun be kpɛ kunngba.”+ 22 Yɛ be utuli be ɲin ase-ɔ. Be seli kɛ: “?Ɲanmiɛn, wɔ mɔ a man sran’m be kwlaa be nguan’n,+ sran kunngba cenje i sa tɛ’n ti’n, á fá Izraɛlifuɛ’m be wunmuan’n be wun ya?”+

23 I sin’n, Zoova seli Moizi kɛ: 24 “Kan ndɛ kle sran’m be ngba. Se be kɛ: ‘Amun jaso Kore nin Datan nin Abiramun+ be tannin sua’m be wun lɛ!’”

25 Ɔ maan Moizi ko toli Datan nin Abiramun. Izraɛli kpɛnngbɛn’m+ be nin i yɛ be ɔli-ɔ. 26 Moizi seli sran’m be kwlaa kɛ: “Amun yaci, amun jaso klunwifuɛ nga’m be tannin sua’m be wun lɛ. Yɛ nán amun sa kan be ninnge’m be wie fi, kɛ ɔ ko yo naan be sa tɛ’n ti’n, amun a wuman’n ti.” 27 Be jasoli Kore nin Datan nin Abiramun be tannin sua’m be wun lɛ. Datan nin Abiramun be kusu be fiteli be wa jrannin be tannin sua’m be anuan’n nun lɛ. Be yi nin be mma mun nin be mma kanngan’m be o be wun lɛ.

28 Yɛ Moizi seli kɛ: “Like ng’ɔ́ wá klé kɛ nán min bɔbɔ min tiaun nun yɛ n jaso n yo ninnge kwlaa nga mun’n, naan Zoova yɛ ɔ sunmannin min’n yɛ: 29 Sɛ sran nga’m be wu kɛ nga sran’m be kwlaa be fa wu’n sa’n, naan sa ng’ɔ ju sran onga’m be kwlaa be su’n i kunngba’n yɛ ɔ ju be su’n, nn nán Zoova yɛ ɔ sunmannin min-ɔn.+ 30 Sanngɛ sɛ like nga Zoova wá fá yó be’n ɔ ti abonuan’n, yɛle kɛ sɛ asiɛ’n trɛ i nuan’n nun ɔ mɛn be bɔbɔ nin be bo ninnge kwlaa’n naan be jra Ndia’n* nun kli’n, amún wún i wlɛ kɛ sran sɔ’m be yoli Zoova i finfin.”

31 Kɛ i nuan’n tɔli cɛ’n, asiɛ’n kpacili be bo.+ 32 Kɛ asiɛ’n i nun kpacili’n,* ɔ mɛnnin be nin be awlofuɛ mun ɔ nin Kore i sa nun sran+ mun nin be bo ninnge’m be kwlaa. 33 Ɔ maan be bɔbɔ-o, be sa nun sran mun-o, be jrali Ndia’n* nun kli. Yɛ asiɛ’n katali be su kplu. Be nunnunnin Izraɛlifuɛ’m be afiɛn.+ 34 Kɛ bé kpán’n, Izraɛlifuɛ nga be o be wun lɛ’n, be wanndili. Srɛ m’ɔ kun be’n ti’n, be seli kɛ: “Ɔ cɛman naan asiɛ’n w’a mɛn e wie!” 35 I sin’n, sin kun fin Zoova wun lɔ+ ɔ yrali yasua ya nɲɔn ablenun (250) nga be su fa ansan mɛn i’n be sekeseke.+

36 I sin’n, Zoova seli Moizi kɛ: 37 “Se min ɲrun jranfuɛ Eleazaa m’ɔ ti Aarɔn i wa’n kɛ ɔ isa sin guawlɛ mun,+ afin be ti min liɛ klonglo. Se i ekun kɛ ɔ fa sin’n ko sanndi i mmua lɔ. 38 Maan ɔ fa be nga be yoli sa tɛ mɔ i ti’n be wuli’n, be sin guawlɛ mun fa yo kpongbo paplaapla mun naan be fa kata tɛ yiwlɛ’n+ i wun. Afin be fa bali Zoova ɲrun. Ɔ maan be ti min liɛ klonglo. Ninnge sɔ’m bé káci kɛ nzɔliɛ sa Izraɛlifuɛ’m be ɲrun.”+ 39 I sɔ’n ti’n, Ɲanmiɛn ɲrun jranfuɛ Eleazaa isali be nga sin yrali be sekeseke’n be sin guawlɛ mɔ be fali aaba yoli’n. Kpɛkun ɔ boli be naan be fa kata tɛ yiwlɛ’n i wun 40 kɛ nga Zoova seli Moizi kɛ ɔ kan kle i’n sa. Ɔ kpɛn Izraɛlifuɛ’m be wla kɛ sɛ b’a manman sran kun* i atin’n, yɛle kɛ sɛ sran sɔ’n timan Aarɔn i osu’n nunfuɛ’n, ɔ fataman kɛ ɔ wɔ Zoova ɲrun lɔ ko yra ansan.+ Asa ekun’n, ɔ kpɛn be wla kɛ nán maan sran fi yo kɛ Kore nin be nga be suli i su’n, be sa.+

41 Kɛ aliɛ cɛnnin’n, Izraɛlifuɛ’m be wunmuan’n be kannin Moizi nin Aarɔn be ndɛ tɛtɛ.+ Be seli kɛ: “Amun sran nɲɔn’n yɛ amun kunnin Zoova i sran mun-ɔn.” 42 Kɛ be ngba be yiali sɔ mɔ bé kán Moizi nin Aarɔn be ndɛ tɛtɛ’n, be kpɛli be ɲin kan tannin sua mɔ Ɲanmiɛn yi i wun nglo nun’n wo lɔ’n. Bé nían-ɔn, ɲanmiɛn ble’n wa kata tannin sua’n su. Kpɛkun Zoova yili i wun nglo ɲanɲanɲan.+

43 Moizi nin Aarɔn be ɔli kan tannin sua mɔ Ɲanmiɛn yi i wun nglo nun’n wo lɔ’n.+ 44 Yɛ Zoova seli Moizi kɛ: 45 “Amun jaso sran nga’m be afiɛn naan n nunnun be kpɛ kunngba.”+ Kɛ be tili ndɛ sɔ’n, be utuli be ɲin ase.+ 46 Kpɛkun Moizi seli Aarɔn kɛ: “Fa sin guawlɛ’n naan fa tɛ yiwlɛ’n+ nun sin gua nun. Yɛ gua nun ansan. Kpɛkun kɔ sran’m be afiɛn lɔ ndɛndɛ kó kpáta Ɲanmiɛn naan sran’m be nin i be afiɛn sɛ.+ Afin Zoova w’a fa be wun ya. Ɲrɛnnɛn’n w’a bo i bo!” 47 Be ja nun lɛ’n, Aarɔn fali sin guawlɛ mɔ Moizi seli i kɛ ɔ fa’n. Kpɛkun ɔ wanndi ɔli sran’m be afiɛn lɔ. Afin ɲrɛnnɛn’n w’a tɔ sran’m be su. Ɔ maan ɔ guali sin guawlɛ’n nun ansan, kpɛkun ɔ kpatali Ɲanmiɛn naan sran’m be nin i be afiɛn sɛ. 48 Ɔ jrannin be nga b’a wu’n nin be nga be ɲin te o su’n, be afiɛn. Kɛ ɔ yoli sɔ’n yɛ ɲrɛnnɛn’n wieli-ɔ. 49 Be nga ɲrɛnnɛn’n tɔli be su mɔ be wuli’n, be ti akpiakpi blu-nin-nnan nin ya nso (14.700). Be nga Kore ti’n, be wuli’n be nunman nun wie. 50 I sin’n, Aarɔn ko toli Moizi tannin sua nga Ɲanmiɛn yi i wun nglo nun’n i anuan’n nun lɛ. Kɛ ɔ́ yó sɔ’n, nn ɲrɛnnɛn’n w’a wie.

17 Zoova seli Moizi kɛ: 2 “Kan ndɛ kle Izraɛlifuɛ mun. Nian be akpasua’m* be nun naan fa akpasua’m be su kpɛn’m+ be sa nun kpɔnman kunngunngun. Maan i ngba yo kpɔnman blu-nin-nɲɔn (12). Yɛ klɛ be dunman’n be kpɔnman’m be su sɛsɛsɛ. 3 Klɛ Aarɔn i dunman’n Levi i kpɔnman’n su. Afin akpasua’m be su kpɛn’m be tinuntinun be man kpɔnman kun. 4 Fa kpɔnman mun ko sie be tannin sua mɔ n yi min wun nglo nun’n i nun, Mmla’n* i alaka’n+ i ɲrun lɔ kɛ n yi min wun nglo titi n kle wɔ lɛ’n.+ 5 Sran nga ń má fɛ́ i’n,+ i kpɔnman liɛ’n fɛ́fɛ́. Ɔ maan min wun ndɛ tɛtɛ nga Izraɛlifuɛ’m be kan’n,+ ɔ nin amun ndɛ tɛtɛ nga be kan’n,+ ɔ́ kpɛ́ kpe.”

6 Moizi kan ndɛ sɔ’n kleli Izraɛlifuɛ mun. Yɛ be akpasua’m be su kpɛn’m be kwlaa be fali be kpɔnman’m be mɛnnin i-ɔ. Sran kun nin i kpɔnman kun. Ɔ maan kpɔnman nga be fa bali’n ti blu-nin-nɲɔn (12). Aarɔn i kpɔnman liɛ’n wo nun wie. 7 Kpɛkun Moizi fali kpɔnman mun sieli i Aenguɛ’n* i tannin sua’n nun Zoova ɲrun lɛ.

8 Kɛ lika’n cɛnnin mɔ Moizi ɔli Aenguɛ’n* i tannin sua’n nun lɔ’n, ɔ́ nían-ɔn, Levi akpasua’n nun kpɔnman mɔ Aarɔn i dunman’n klɛ su’n w’a fɛfɛ. Ɔ wunnin kɛ w’a fɛfɛ, w’a bo nɲrɛ, kpɛkun i su amandi mma’m b’a blo. 9 Yɛ Moizi fali kpɔnman kwlaa nga be o Zoova ɲrun’n fiteli-ɔ. Kpɛkun ɔ fa kleli Izraɛlifuɛ mun. Be nianniannin kpɔnman mun naan sran kun w’a fɛ i liɛ’n.

10 Yɛ Zoova seli Moizi kɛ: “Fa Aarɔn i kpɔnman’n+ ko sie i Mmla’n* i alaka’n i ɲrun lɔ ekun naan ɔ kaci kɛ nzɔliɛ sa+ ɲin keklefuɛ’m+ be ɲrun. I liɛ’n, bé yáci min wun ndɛ tɛtɛ kanlɛ. Ɔ maan be su wuman.” 11 Be ja nun lɛ’n, Moizi yoli like nga Zoova seli kɛ ɔ yo’n. Ɔ niannin su yoli i sɛsɛsɛ.

12 Kɛ ɔ yoli sɔ’n, Izraɛlifuɛ’m be seli Moizi kɛ: “Y’a wie wu. Saan wulɛ cɛ yɛ é wú-ɔ, e ngba é wú sekeseke! 13 Sran ng’ɔ mantan Zoova i tannin sua’n bɔɔ kaan sa’n, ɔ́ wú.+ ?Kɛ ngalɛ’n sa yɛ ɔ fata kɛ e wu-ɔ?”+

18 Zoova seli Aarɔn kɛ: “Sɛ sran kun fɔn naan fiɛn kan min lika’n,+ ɔ bɔbɔ nin ɔ mma mun ɔ nin ɔ osu’n nunfuɛ mun yɛ amún fɛ́ i su afɛ’n niɔn. Asa ekun’n, sɛ sran kun fɔn naan ɔ yo min ɲrun jranlɛ junman mɔ amun di’n i finfin’n, a nin ɔ mma mun yɛ amún fɛ́ i su afɛ’n niɔn.+ 2 Fa ɔ niaan mɔ be ti Levi akpasua’n nunfuɛ’n, yɛle kɛ ɔ si i akpasua’n nunfuɛ mun, naan be uka wɔ, yɛ be di junman man wɔ+ nin ɔ mma mun Aenguɛ’n* i tannin sua’n+ i ɲrun lɛ. 3 Maan be di junman nga a fa wlali be sa nun’n, yɛ be di min tannin sua’n i nun junman’n kwlaa.+ Sanngɛ nán maan be wunnge lika m’ɔ ti min liɛ klonglo’n i nun ninnge mun ɔ nin tɛ yiwlɛ’n be wun koko. Afin sɛ be yo sɔ’n bé wú, yɛ amún wú wie.+ 4 Maan be uka ɔ. Tannin sua mɔ n yi min wun nglo nun’n, i nun like ng’ɔ fata kɛ be yo’n, maan be yo. Yɛ maan be di tannin sua’n i nun junman’n kwlaa. Nán maan sran nga b’a mɛnmɛn i atin’n,* ɔ wunnge amun wun koko.+ 5 Like kwlaa ng’ɔ fata kɛ amun yo i lika m’ɔ ti min liɛ klonglo’n+ nun’n nin tɛ yiwlɛ’n+ su’n, amun yo. I liɛ’n, n su faman Izraɛlifuɛ’m be wun ya kun.+ 6 N fali Levifuɛ mun mɔ be ti amun niaan’n Izraɛlifuɛ’m be nun n mannin amun.+ Be fa be mannin Zoova naan be di tannin sua mɔ n yi min wun nglo nun’n, i nun junman.+ 7 Min ɲrun jranlɛ junman m’ɔ fata kɛ a nin ɔ mma’m be di’n, yɛle tɛ yiwlɛ’n nin rido’n i sin lɔ junman’n.+ Ɔ fata kɛ amun di junman sɔ’n.+ N fali min ɲrun jranlɛ junman’n n mannin amun. Sran nga b’a mɛnmɛn i atin* naan ɔ wunnge lɔ’n, maan be kun i.”+

8 Zoova seli Aarɔn ekun kɛ: “Like nga Izraɛlifuɛ’m be fa man min’n, n bɔbɔ m’an fa wla ɔ sa nun naan a nian su.+ Like kwlaa nga Izraɛlifuɛ’m be fa man m’ɔ ti min liɛ klonglo’n, n fɛli i bue n mannin wɔ nin ɔ mma mun. Ɔ́ yó sɔ tititi.+ 9 Like nga be fa man min m’ɔ ti min liɛ klonglo’n, mɔ be fa sie i sin su’n, i bue ng’ɔ́ yó amun liɛ’n yɛ: Like kwlaa nga be fa man’n, yɛle kɛ ble nin i wunsu like,+ nin like nga be fa yi sa tɛ’n i ti tɛ’n,+ nin like nga be fa yi sa tɛ’n i ti kpatalɛ tɛ’n+ mɔ be fa man min’n. Ninnge sɔ’m be ti min liɛ klonglo, yɛ be ti wɔ nin ɔ mma’m be liɛ. 10 Di i lika kun m’ɔ ti min liɛ klonglo’n nun.+ Yasua’m be kwlaa be kwla di wie. Aliɛ sɔ’n ti min liɛ klonglo, yɛ ɔ ti ɔ liɛ.+ 11 Like ng’ɔ ti ɔ liɛ’n i wie ekun yɛ: Ninnge nga Izraɛlifuɛ’m be fa blɛ min’n+ ɔ nin like kwlaa nga kɛ bé mán’n be toto’n.+ N fali be n mannin ɔ bɔbɔ nin ɔ wa yasua nin ɔ wa bla mun. Ɔ́ yó sɔ tititi.+ Ɔ awlo’n nun sran kwlaa ng’ɔ ti sanwun’n, ɔ kwla di wie.+

12 “Be ngo’n nin be duvɛn uflɛuflɛ’n nin be ble’n* be nun kpafuɛ’n, yɛle kɛ be ninnge klikli mun+ mɔ be fa man Zoova’n, n fali be n mannin wɔ.+ 13 Be fie’m be su ninnge klikli nga bé fá blɛ́ Zoova’n, bé yó ɔ liɛ.+ Ɔ awlo’n nun sran kwlaa ng’ɔ ti sanwun’n, ɔ kwla di wie.

14 “Like kwlaa nga be fa man Ɲanmiɛn mlɔnmlɔn* Izraɛli mɛn’n nun’n, be ti ɔ liɛ.+

15 “Sran annzɛ nnɛn’m be wa klikli+ mɔ bé fá blɛ́ Zoova’n, bé yó ɔ liɛ. Sanngɛ ɔ fata kɛ a kpɔ sran’m be wa klikli’m be ti.+ Kpɔ nnɛn nga be ti fiɛn’n,* be wa klikli’m be ti wie.+ 16 Kɛ be ko di anglo kun annzɛ anglo kun tra su’n, fa sika kpɔ be ti. Sika sɔ’n ti sikli nnun.*+ Maan be nian min sua’n nun lɔ sikli’n liɛ’n* su be sunnzun. Ɔ ti gera ablaɔn (20).* 17 Nannin tola annzɛ bua ba yasua annzɛ boli’m be wa klikli’m be liɛ’n, nán kpɔ be ti wie.+ Afin be ti min liɛ klonglo. Fa be mmoja’n kpɛntɛnkpɛntɛn i tɛ yiwlɛ’n su.+ Yɛ yra be lui’n tɛ yiwlɛ’n su naan i wunsrɛn’n bɔn Zoova i bue nun fannin.+ 18 Yɛ be nnɛn’n ti ɔ liɛ. Be nnɛn’n ti ɔ liɛ kɛ nnɛn nga be toto i naan b’a fa man’n i wue’n ɔ nin nnɛn’n i sɔwa fama’n be ti ɔ liɛ’n sa.+ 19 Like kwlaa nga be ti min liɛ klonglo mɔ Izraɛlifuɛ’m bé fá mán Zoova’n,+ n fa be n mannin ɔ bɔbɔ nin ɔ wa yasua nin ɔ wa bla mun. Ɔ́ yó sɔ tititi+ Zoova ɲrun. Ɔ ti aenguɛ kun m’ɔ́ trán e afiɛn tititi-ɔ.”*

20 Zoova seli Aarɔn ekun kɛ: “A su ɲanman aja like Izraɛli mɛn’n nun. Yɛ be asiɛ’n i bue wie fi su yoman ɔ liɛ.+ Ɔ like liɛ nga a ko ɲɛn i’n yɛle min. Aja like nga a ko ɲɛn i Izraɛlifuɛ’m be afiɛn’n yɛle min.+

21 “Levi i mma’m be liɛ’n, junman mɔ be di i tannin sua mɔ n yi min wun nglo nun’n ti’n, be aja like liɛ nga n fa mannin be’n, yɛle like kwlaa nga sran’m be le i Izraɛli mɛn’n nun’n i blusu’n.+ 22 Nán maan Izraɛlifuɛ’m be wunnge tannin sua mɔ n yi min wun nglo nun’n i wun lɔ kun. Sɛ be yo sɔ’n nn b’a yo sa tɛ. Ɔ maan bé wú. 23 Levifuɛ mun yɛ ɔ fata kɛ be di tannin sua mɔ n yi min wun nglo nun’n, i nun junman-ɔn. Sɛ Izraɛlifuɛ’m be fɔn’n, Levifuɛ mun yɛ bé fɛ́ i su afɛ’n niɔn.+ Maan be nin be osu’n nunfuɛ’m be nanti mmla sɔ’n su tititi. Nán maan be kunndɛ aja like Izraɛlifuɛ’m be afiɛn.+ 24 Afin be like liɛ nga n mannin be’n yɛle blusu nga Izraɛlifuɛ’m bé wá mán Zoova’n. I ti yɛ n seli be kɛ nán maan be kunndɛ aja like Izraɛlifuɛ’m be afiɛn-ɔn.”+

25 Zoova seli Moizi kɛ: 26 “Se Levifuɛ’m be kɛ: ‘Amun like liɛ nga amun ko ɲɛn i Izraɛlifuɛ’m be sa nun’n, yɛle blusu nga n fɛli i be sa nun n mannin amun’n.+ Amun fa blusu sɔ’n i blusu’n be man Zoova.+ 27 Amun like liɛ mɔ amún fá mán’n yɛ ɔ o lɛ-ɔ. Ɔ́ yó kɛ amun bɔbɔ amun fie su ble annzɛ ɔɔzu+ annzɛ amun duvɛn annzɛ amun ngo yɛ amun su fa man sa. 28 I liɛ’n, amun kusu amún fá blusu kwlaa nga amun ɲɛn i Izraɛlifuɛ’m be sa nun’n i wie mán Zoova. Blusu sɔ’n i bue ng’ɔ fata kɛ amun fa man Zoova’n, amun fa man min ɲrun jranfuɛ Aarɔn. 29 Amun fa ninnge kpakpa kwlaa nga be fa man amun’n, i wie man Zoova+ naan ɔ yo i liɛ klonglo.’

30 “Yɛ se be kɛ: ‘Levifuɛ mun, kɛ amun fa ninnge sɔ’m be nun kpakpa’m be man’n, ɔ ti kɛ amun bɔbɔ amun fie su ble annzɛ ɔɔzu annzɛ amun duvɛn annzɛ amun ngo yɛ amun su fa man sa. 31 Amun nin amun awlofuɛ mun amun kwla di i lika kwlaa nga amun klo’n nun. Afin tannin sua mɔ n yi min wun nglo nun’n i nun junman nga amun di’n, i nuan akatua-ɔ.+ 32 Kɛ ɔ ko yo naan amun a yoman sa tɛ’n, amun fa ninnge nga be fa man amun’n be nun kpakpa’n wie man. Nán amun yo Izraɛlifuɛ’m be ninnge nga be fa man min’n be finfin. Sɛ amun yo sɔ’n, amún wú.’”+

19 Zoova kannin ndɛ kleli Moizi nin Aarɔn ekun. Ɔ seli kɛ: 2 “Mmla nga Zoova mannin’n yɛ ɔ o yɛ: ‘Amun se Izraɛlifuɛ mun kɛ be man amun nannin bla ɔkwlɛ kun mɔ lɛ kaan sa nunmɛn i wun+ mɔ kusu be nin-a faman waka fi be nin-a siemɛn i kɔmin su le’n. 3 Kpɛkun amun fa man min ɲrun jranfuɛ Eleazaa. Maan ɔ fa nnɛn’n wɔ nanmue’n i sin lɔ. Yɛ maan be kun nnɛn’n i bɔbɔ i ɲin bo lɛ. 4 I sin’n, maan min ɲrun jranfuɛ Eleazaa fɛ i sa mma’n bo nnɛn mmoja’n nun, naan ɔ fa kpɛntɛnkpɛntɛn tannin sua mɔ n yi min wun nglo nun’n+ i ɲrun lika’n i ndɛnman su kpɛ nso. 5 Kpɛkun maan be yra nannin bla’n i ɲin bo lɛ. Nnɛn’n i kplo-o, i nnɛn ba-o, i mmoja-o, i sewie-o, maan be yrɛ i wunmuan’n.+ 6 Maan min ɲrun jranfuɛ’n fa sɛdri waka nin izɔpu+ nin tannin ɔkwlɛ kun naan ɔ to be yi sin mɔ i nun yɛ be su yra nannin bla’n nun. 7 I sin’n, maan min ɲrun jranfuɛ’n kpu i tralɛ mun naan i bɔbɔ* fa nzue wunnzin. I sin yɛ ɔ kwla sɛ i sin nanmue’n nun ekun-ɔn. Sanngɛ ɔ́ trán fiɛn nun lele nnɔsua.

8 “‘Maan sran ng’ɔ yrali nannin blaʼn ɔ kpu i tralɛ mun nzue’n nun yɛ maan i bɔbɔ* fa nzue wunnzin. Sanngɛ ɔ́ trán fiɛn nun lele nnɔsua.

9 “‘Maan sran kun m’ɔ ti sanwun’n, ɔ isa nannin blaʼn i nzuɛn’n,+ naan ɔ fa ko guɛ i nanmue’n i sin lɔ lika kun m’ɔ ti sanwun’n nun. Maan Izraɛlifuɛ’m be wunmuan’n be fa sie. Afin i sɔ like’n yɛ bé fá gúa nzue nga be fa kplo sran annzɛ like i wun fiɛn’n nun-ɔn.+ Ɔ ti sa tɛ’n i ti tɛ yilɛ. 10 Maan sran ng’ɔ isa nannin blaʼn i nzuɛn’n, ɔ kpu i tralɛ mun. Sanngɛ ɔ́ trán fiɛn nun lele nnɔsua.

“‘Ɔ ti mmla kun m’ɔ fata kɛ Izraɛlifuɛ mun nin aofuɛ nga be tran be afiɛn’n be di su tititi-ɔ.+ 11 Sran ng’ɔ kan sran saka’n, ɔ́ trán fiɛn nun lele cɛn ba nso.+ 12 I cɛn ba nsan su’n, maan i sɔfuɛ’n fa nzue kplo i wun fiɛn’n. Kpɛkun i cɛn ba nso su’n, ɔ́ yó sanwun. Sanngɛ sɛ i cɛn ba nsan su’n, w’a kplomɛn i wun fiɛn’n, ɔ su yoman sanwun i cɛn ba nso’n su. 13 Sran ng’ɔ kan saka naan ɔ kplomɛn i wun fiɛn’n, nn w’a yo Zoova i tannin sua’n+ i fiɛn. Maan be kun i sɔfuɛ’n.*+ Afin b’a faman nzue nga be fa kplo fiɛn’n,+ b’a kpɛntɛnkpɛntɛnmɛn i wun. Ɔ maan ɔ te yo fiɛn. Yɛ fiɛn sɔ’n kɛ́ i wun.

14 “‘Sɛ sran kun wu tannin sua kun nun’n, mmla ng’ɔ fata kɛ amun di su’n yɛ: Sran kwlaa ng’ɔ o tannin sua sɔ’n nun’n, ɔ nin sran kwlaa ng’ɔ wlu lɔ’n, bé trán fiɛn nun cɛn ba nso. 15 Kpongbo kwlaa nga i su ti tikewa mɔ b’a kataman su kpa’n,* ɔ́ trán fiɛn nun wie.+ 16 Sran kwlaa ng’ɔ o gua su m’ɔ kan sran kun mɔ be fali tokofi be kunnin i’n annzɛ saka’n annzɛ sran owie’n annzɛ asieliɛ’n, ɔ́ trán fiɛn nun cɛn ba nso.+ 17 Fiɛn m’ɔ kannin sran’n ti’n, maan be ko fa nnɛn nga be fa yili sa tɛ’n i ti tɛ mɔ be yrɛli i’n i nzuɛn’n wie gua kpongbo kun nun. Kpɛkun maan be ko sa nzue mɔnnɛn wie gua su. 18 I sin’n, maan sran kun m’ɔ ti sanwun’n+ fa izɔpu+ bo i nzue’n nun. Kpɛkun ɔ fa kpɛntɛnkpɛntɛn tannin sua’n, nin kpongbo kwlaa nga be o nun’n, nin sran nga be o nun’n, nin sran ng’ɔ kannin sran owie’n annzɛ sran mɔ be kunnin i’n annzɛ saka’n annzɛ asieliɛ’n, be wun. 19 I cɛn ba nsan nin nso su’n, maan sran ng’ɔ ti sanwun’n fa kpɛntɛnkpɛntɛn sran nga fiɛn w’a kɛn i’n i wun. Cɛn ba nso su’n,+ ɔ́ kpló i wun fiɛn’n. I sin’n, maan sran nga fiɛn kɛnnin i’n, ɔ kpu i tralɛ mun. Kpɛkun ɔ́ yó sanwun nnɔsua nun.

20 “‘Sɛ fiɛn kan sran kun naan ɔ kplomɛn i wun fiɛn’n, maan be fɛ i sran’m* be nun naan be kun i.+ Afin ɔ yoli Zoova i lika’n i fiɛn. B’a faman nzue nga be fa kplo be wun fiɛn’n b’a fa kpɛntɛnkpɛntɛnmɛn i wun. Ɔ maan ɔ ti fiɛn.

21 “‘Maan sran ng’ɔ fa be wun fiɛn kplolɛ nzue’n+ kpɛntɛnkpɛntɛn sran wun’n, ɔ kpu i tralɛ mun. Yɛ ɔ nin sran ng’ɔ kannin nzue nga be fa kplo be wun fiɛn’n, bé trán fiɛn nun lele nnɔsua. Maan i sɔ’n kaci mmla naan amun nanti su tititi. 22 Like kwlaa nga sran ng’ɔ o fiɛn nun kɛn i’n, ɔ́ yó fiɛn wie. Yɛ sran ng’ɔ kɛn i sɔ like’n, ɔ́ trán fiɛn nun lele nnɔsua.’”+

20 Anglo klikli’n nun’n, Izraɛlifuɛ’m be kwlaa be juli Zinin aawlɛ flɛnnɛn’n nun naan b’a ko tran Kadɛsi.+ Lɛ yɛ Miriamun+ wuli-ɔ. Kpɛkun be sieli i lɛ.

2 Sran’m be ɲanman nzue.+ I sɔ’n ti’n, be kpɛ sin yiali Moizi nin Aarɔn. 3 Be fali ndɛnngan wlali Moizi sin.+ Be seli kɛ: “Kɛ e niaan’m be wuli Zoova ɲrun’n, sɛ ɔ ti kɛ e wuli wie’n, nn ɔ flunman. 4 ?Ngue ti yɛ amun fali Zoova i sran mun* bali aawlɛ flɛnnɛn nga nun naan e nin e nnɛn mun e wu wa-ɔ?+ 5 ?Ngue ti yɛ amun ko fali e Ezipti lɔ bali lika tɛ kain nga nun-ɔn?+ Be kwlá luaman like wa. Figie nin viɲin nin grenadie waka ba kun sa nunman wa. E ɲanman nzue bɔbɔ naan y’a nɔn.”+ 6 Kɛ ɔ yoli sɔ’n, Moizi nin Aarɔn be jasoli sran’m be kwlaa be ɲrun lɛ be ɔli tannin sua mɔ Ɲanmiɛn yi i wun nglo nun’n i ɲrun lɔ. Kɛ be juli lɔ’n, be utuli be ɲin ase. Kpɛkun Zoova yili i wun nglo ɲanɲanɲan kleli be.+

7 Yɛ Zoova seli Moizi kɛ: 8 “Fa kpɔnman’n naan a nin ɔ niaan bian Aarɔn amun yia sran’m be kwlaa. I sin’n, kan ndɛ kle yɔbuɛ’n be ɲrun lɛ naan nzue fin nun fite. Yo maan nzue fin yɔbuɛ’n nun fite naan fa man sran’m be kwlaa nin be nnɛn mun.”+

9 Moizi fali kpɔnman m’ɔ o Zoova ɲrun’n+ kɛ ng’ɔ seli i kɛ ɔ yo’n sa. 10 I sin’n, Moizi nin Aarɔn be flɛli sran’m be kwlaa yɔbuɛ’n i ɲrun lɛ naan Moizi w’a se be kɛ: “Ɲin keklefuɛ mun, amun sie amun su! ?Amun waan e yo naan nzue fin yɔbuɛ nga nun fite man amun?”+ 11 Yɛ Moizi mɛnnin i sa’n su-ɔ. Ɔ fɛli i kpɔnman’n fa finnin yɔbuɛ’n kpɛ nɲɔn. Kpɛkun nzue kpanngban kpa fin yɔbuɛ’n nun guali sa wɔɔ, naan sran’m be ngba be nin be nnɛn’m b’a nɔn.+

12 Kɛ ɔ cɛli kan’n, Zoova seli Moizi nin Aarɔn be kɛ: “Amun a kleman kɛ amun lafi min su. Yɛ amun a yiman min ayɛ Izraɛlifuɛ’m be ɲrun naan b’a wun kɛ n ti sanwun. I sɔ’n ti’n, amun su faman sran nga mun* kɔman mɛn nga ń fá mán be’n nun.”+ 13 Meriba* lɔ nzue’n+ yɛ ɔ o lɛ-ɔ. Lɛ yɛ Izraɛlifuɛ’m be kunndɛli Zoova i ndɛnngan m’ɔ yili i nglo kleli be kɛ ɔ ti sanwun’n niɔn.

14 I sin’n, Moizi sunmannin sran Kadɛsi lɛ naan be ko to Edɔmun famiɛn’n.+ I waan be se i kɛ: “Ndɛ nga ɔ niaan Izraɛli+ kan’n yɛ: ‘A si kpa kɛ y’a wun e ɲrun dan. 15 E si’m be ɔli Ezipti.+ Yɛ be trannin lɔ afuɛ* kpanngban kpa.+ Sanngɛ Eziptifuɛ’m be yoli e bɔbɔ nin e si’m be tɛtɛ.+ 16 Kɛ e sun flɛli Zoova’n,+ ɔ tieli. Ɔ maan ɔ sunmɛnnin i anzi kun,+ yɛ ɔ fali e Ezipti lɔ fiteli. Kɛ é sé yɛ’n, e o Kadɛsi. Klɔ sɔ’n wo ɔ lika’n i aɲialiɛ’n su. 17 Yaci, man e atin maan e sin ɔ mɛn’n nun. E su sinman viɲin fie annzɛ fie uflɛ wie fi nun. Yɛ e su nɔnman amun gbo’m be nun nzue. Famiɛn i Akpɔ’n su yɛ é sín trele-ɔ. E su kpaciman bɛ su annzɛ fama su. É kɔ́ trelele naan y’a kpɛ ɔ mɛn’n.’”+

18 Sanngɛ Edɔmun famiɛn’n seli i kɛ: “Nán amun sin min mɛn’n nun. Sɛ amun yo sɔ’n, ń fá tokofi ń kó kpá amun atin.” 19 Yɛ Izraɛlifuɛ’m be seli i kɛ: “Atin dan’n su yɛ é sín-ɔn. Sɛ e bɔbɔ annzɛ e nnɛn mun e nɔn ɔ nzue’n, é túɛ i ti kalɛ.+ Ɔ mɛn’n nun sinlɛ ngbɛn yɛ e waan é sín-ɔn.”+ 20 Sanngɛ Edɔmun famiɛn’n tɛli su kɛ: “Nán amun sin wa.”+ Kpɛkun ɔ fali sran kpanngban kpa nin sonja sroesroe kpa ɔ wa buli be ɲrun. 21 Edɔmun famiɛn’n w’a kplinman su kɛ Izraɛlifuɛ’m be sin i lika’n nun. I sɔ’n ti’n, be sinnin lika uflɛ.+

22 Izraɛlifuɛ’m be kwlaa be fɛli i Kadɛsi lɛ be ɔli Ɔru Oka’n su.+ 23 Kɛ be juli Ɔru Oka m’ɔ o Edɔmun mɛn’n i aɲialiɛ’n su’n, Zoova seli Moizi nin Aarɔn be kɛ: 24 “Aarɔn su wa wu, yɛ bé síe i kɛ nga be fa sieli i nannan mun’n sa.*+ Ɔ su juman mɛn nga n su wa fa man Izraɛlifuɛ mun’n i nun lɔ wie. Afin Meriba lɔ nzue’n+ i fa manlɛ’n su’n, amun sran nɲɔn’n, amun yoli ɲin kekle min su. 25 Fa Aarɔn nin i wa Eleazaa naan fa be fu Ɔru Oka’n su lɔ. 26 Yi Aarɔn i tralɛ mun+ naan fa wla i wa Eleazaa.+ Afin Aarɔn wá wú lɛ.”*

27 Ɔ maan Moizi yoli like nga Zoova seli i kɛ ɔ yo’n. Be fuli Ɔru Oka’n su sran’m be kwlaa be ɲrun lɛ. 28 Moizi yili Aarɔn i wun tralɛ mun fa wlɛli i wa Eleazaa. Kpɛkun Aarɔn wuli oka’n i ti su lɛ.+ I sin’n, Moizi nin Eleazaa be fin oka’n su be jrali. 29 Kɛ Izraɛlifuɛ’m be kwlaa be wunnin kɛ Aarɔn wuli’n, be sunnin i lele cɛn ba ablasan (30).+

21 Aradi lɔ famiɛn m’ɔ ti Kanaanfuɛ’n,+ ɔ tran Negɛbu. Be seli i kɛ Izraɛlifuɛ’m b’a fa Atarimun atin’n naan be su ba. Kɛ ɔ tili i sɔ’n, ɔ nin be kunnin alɛ naan w’a tra be nun wie mun w’a ɔ. 2 I sɔ’n ti’n, Izraɛlifuɛ’m be tali Zoova i nda. Be seli kɛ: “Sɛ a fa sran nga mun wla e sa nun’n, é sáci be klɔ mun sekeseke.” 3 Zoova tili Izraɛlifuɛ’m be nuan ndɛ’n. Kpɛkun ɔ fali Kanaanfuɛ mun wlali be sa nun. Ɔ maan Izraɛlifuɛ’m be nunnunnin be nin be klɔ mun sekeseke. I sɔ’n ti’n, be wa tɔnnin lika sɔ’n i dunman kɛ Ɔɔma.*+

4 Kɛ be fɛli i Ɔru Oka’n+ wun lɛ’n, be fali atin ng’ɔ kɔ Jenvie Ɔkwlɛ’n su lɔ’n naan bé sín Edɔmun mɛn’n+ i sin lɔ. Kɛ ɔ́ yó sɔ’n, nn afɛ’n w’a ti sran’m be kpa. 5 Ɔ maan be wa kannin Ɲanmiɛn nin Moizi be wun ndɛ tɛtɛ.+ Be seli kɛ: “?Nzu ti yɛ amun ko fali e Ezipti lɔ naan e wa wu aawlɛ flɛnnɛn nga nun wa-ɔ? Aliɛ nin nzue nunman wa,+ yɛ kpanwun tɛ nga w’a flan e.”+ 6 I sɔ’n ti’n, Zoova fali wuo wie mɔ be le bɔyre kpa’n bali Izraɛlifuɛ’m be afiɛn. Wuo’m be kali be. Ɔ maan be nun kpanngban be wuli.+

7 Kɛ ɔ yoli sɔ’n, sran’m be ko toli Moizi naan b’a se i kɛ: “E yoli sa tɛ, afin e kannin wɔ nin Zoova amun wun ndɛ tɛtɛ.+ I sɔ’n ti’n, kpata Zoova man e naan ɔ yi wuo mun e afiɛn.” Yɛ Moizi kpatali Ɲanmiɛn mannin be-ɔ.+ 8 Zoova seli Moizi kɛ: “Yi like kun m’ɔ ti kɛ wuo ng’ɔ le bɔyre kpa’n sa naan fa sie i waka trolo kun su. I liɛ’n, sran nga wuo’n kɛ i naan ɔ nian wuo’n i nzɔliɛ ng’ɔ o waka’n su’n, ɔ su wuman.” 9 Moizi w’a sisimɛn i bo. Ɔ fali aaba yoli like kun kɛ wuo sa.+ Kpɛkun ɔ fa sieli i waka trolo kun su.+ Sran nga wuo kɛ i m’ɔ nian aaba wuo’n, ɔ ka nguan nun.+

10 I sin’n, Izraɛlifuɛ’m be tuli be bo lɛ naan b’a ko bo be nanmue Obɔtu lɛ.+ 11 Kɛ be fɛli i Obɔtu lɛ’n, be ko boli be nanmue Ize-Abarimun+ m’ɔ o Moabu i ɲrun lɛ aawlɛ flɛnnɛn’n nun’n, wia afiliɛ lɔ bue liɛ’n su. 12 I sin’n, be fɛli i lɛ be ko trannin Zerɛdi Kongo’n nun.+ 13 Be fɛli i lɛ ekun be ko trannin Aanɔn asa’n su lɔ.+ Aanɔn o aawlɛ flɛnnɛn ng’ɔ bo i bo Amɔɔfuɛ’m be mɛn’n i tiwa lɔ’n nun. Ɔ o Moabu mɛn’n nin Amɔɔfuɛ’m be aɲialiɛ’n su. 14 I ti yɛ Zoova i Alɛ fluwa’n nun’n, be kan “Vaɛbu m’ɔ o Sufa lɔ’n ɔ nin Aanɔn kongo mun’n, 15 ɔ nin lika nga nzue’n sin m’ɔ kɔ Aa klɔ’n i wun lɛ lele fa ju Moabu i nuan su lɔ’n,” be ndɛ’n niɔn.

16 I sin’n, be ɔli Beɛɛ. Gbo sɔ’n su lɔ yɛ Zoova kannin ndɛ kleli Moizi-ɔ. Ɔ seli i kɛ: “Yia sran mun naan n man be nzue naan be nɔn.”

17 Blɛ sɔ’n nun’n, Izraɛlifuɛ’m be toli jue seli kɛ:

“Gbo, maan nzue fin ɔ nun fite! (An sɔ su!)*

I sin’n, be fɛli i aawlɛ flɛnnɛn’n nun lɛ be ɔli Matana. 19 Kɛ be tuli be bo Matana lɛ’n, be ɔli Naaliɛli. I sin’n, be fɛli i Naaliɛli lɛ be ɔli Bamɔtu.+ 20 Be fɛli i Bamɔtu lɛ be ɔli Moabu mɛn’n+ nun lɔ kongo’n nun, Pisga i nglonglo lɔ.+ Kɛ a o su’n, ɔ ɲin ta Zesimɔn* lika m’ɔ o i bo ngua’n.+

21 Izraɛli sunmannin sran Amɔɔfuɛ’m be famiɛn Siɔn i sin naan be se i kɛ:+ 22 “Man e atin maan e sin ɔ mɛn’n nun. E su kpaci kɔman viɲin fie annzɛ fie uflɛ nun. E su nɔnman amun gbo wie fi nun nzue. Famiɛn i Akpɔ’n su yɛ é sín trele-ɔ. É kɔ́ trelele naan y’a kpɛ ɔ mɛn’n.”+ 23 Sanngɛ Siɔn w’a manman Izraɛlifuɛ’m be atin kɛ be sin i mɛn’n nun. I kpa bɔbɔ’n, ɔ yiɛli i sran mun, kpɛkun ɔ fali alɛ wlali Izraɛlifuɛ’m be sin aawlɛ flɛnnɛn’n nun lɔ. Be ko toli be Zaazi lɔ, kpɛkun be nin be kunnin.+ 24 Izraɛlifuɛ’m be fali tokofi be kwlali be.+ Kpɛkun be fali be mɛn’n.+ Mɛn sɔ’n fɛ i Aanɔn+ lele fa ju Zabɔku+ m’ɔ o Amɔnfuɛ’m be mɛn’n i wun lɔ’n. Afin Zazɛɛ+ yɛ ɔ o Amɔnfuɛ’m be mɛn’n i nuan su-ɔ.+

25 Izraɛlifuɛ’m be fali klɔ sɔ’m be ngba. Kpɛkun be trannin Amɔɔfuɛ’m+ be klɔ’m be kwlaa be su. Be trannin Ɛsbɔn nin klɔ nga be o i asa’n su’n* be kwlaa be su. 26 Afin Siɔn m’ɔ ti Amɔɔfuɛ’m be famiɛn’n i klɔ’n yɛle Ɛsbɔn. Ɔ nin Moabu famiɛn’n be kunnin, kpɛkun ɔ deli i mɛn wunmuan’n i sa nun lele fa juli Aanɔn lɔ. 27 I sɔ’n ti’n, sran’m be di asanse be se kɛ:

“Amun bla Ɛsbɔn.

Maan be kplan Siɔn klɔ’n naan ɔ taka kpa.

Ɔ yrali Aa m’ɔ o Moabu lɔ’n. Ɔ yrali sran dandan nga be o Aanɔn i lika mɔ be o nglonglo kpa’n be nun’n.

29 Moabu, yako! Amun nga amun o Kemɔsu+ lɔ’n, bé núnnún amun!

Ɔ yo maan i wa yasua’m be tɔ blo, yɛ i wa bla’m be kaci Siɔn m’ɔ ti Amɔɔfuɛ’m be famiɛn’n i bisuafuɛ.

31 Kɛ ɔ yoli sɔ’n, Izraɛlifuɛ’m be trannin Amɔɔfuɛ’m be mɛn’n nun. 32 I sin’n, Moizi sunmannin sran wie mun naan be ko kpla Zazɛɛ+ be nian. Be deli klɔ nga be mɛntɛn* i lɛ’n, yɛ be fuannin Amɔɔfuɛ nga be tran lɛ’n. 33 I sin’n, be blili ko fali Basan Atin’n. Kpɛkun Ɔgu+ m’ɔ ti Basan famiɛn’n nin i sran’m be kwlaa be bali naan be nin be kún alɛ Edrei lɛ.+ 34 Yɛ Zoova seli Moizi kɛ: “Nán sro i.+ Afin ń má fɛ́ i bɔbɔ nin i sran’m be ngba nin i mɛn’n ń wlá ɔ sa nun.+ Ɔ maan like nga a fa yoli Siɔn m’ɔ ti Amɔɔfuɛ’m be famiɛn m’ɔ tran Ɛsbɔn’n, i kunngba’n yɛ á fá yó i-ɔ.”+ 35 Ɔ maan i bɔbɔ-o, i mma mun-o, i sran mun-o, be kunnin be wunmuan’n. I sran’m be nun kun sa w’a kaman lɛ.+ I sin’n, be fɛli i mɛn’n.+

22 Izraɛlifuɛ’m be jasoli lɛ be ko boli be nanmue Moabu aawlɛ flɛnnɛn’n nun, Zurdɛn’n i nuan lɛ, Zeriko+ i wun lɛ. 2 Balaki+ m’ɔ ti Zipɔɔ i wa’n wunnin like kwlaa nga Izraɛlifuɛ’m be yoli Amɔɔfuɛ mun’n. 3 Izraɛlifuɛ’m be sɔnnin kpa liɛ su. I sɔ’n ti’n, srɛ kunnin Moabufuɛ mun dan. Izraɛlifuɛ’m be ti’n, be wawɛ’n tɔli blo.+ 4 Ɔ maan Moabufuɛ’m be seli Madian lɔ kpɛnngbɛn’m+ be kɛ: “Sran kpanngban nga’m bé wá sáci ninnge nga be sin yia e’n be kwlaa, kɛ nga nannin’n fa didi ijre mɔ ba kun sa kaman lɛ’n sa.”

Blɛ sɔ’n nun’n, nn Balaki m’ɔ ti Zipɔɔ i wa’n yɛ ɔ ti Moabu famiɛn’n niɔn. 5 Ɔ sunmannin sran wie mun Balaamun m’ɔ ti Beɔɔ i wa’n i sin, Petɔru lɔ.+ Petɔru’n wo i mɛn’n nun lɔ Nzue Ba’n* i nuan. Ɔ yiɛli i naan w’a se i kɛ: “Nian! Sran kpanngban wie’m be fin Ezipti lɔ b’a ba. Yɛ b’a kpa asiɛ’n su sa waa.+ Be wa trannin min ɲrun wa. 6 Yaci, bla naan bo sran kpanngban sɔ’m be sannzan man min,+ afin be le wunmiɛn tra min. Atrɛkpa’n, ń kwlá be, yɛ ń fúan be min asiɛ’n su. Afin n si kpa kɛ sran nga a bo muae mɛn i’n, ɔ́ ɲán muae. Yɛ sran nga a bo i sannzan’n, ɲrɛnnɛn tɔ́ i su.”

7 Ɔ maan Moabu lɔ kpɛnngbɛn mun nin Madian lɔ kpɛnngbɛn’m be fali sika nga bé fá yí wunnzue’n, kpɛkun be ɔli Balaamun sin.+ Kɛ be juli lɔ’n, be kannin Balaki i nuan su ndɛ’n kleli i. 8 Ɔ seli be kɛ: “Amun la wa kɔnguɛ’n. Ndɛ kwlaa nga Zoova wá kán klé min’n, ń kán klé amun.” Ɔ maan Moabu lɔ sran dandan sɔ’m be kali Balaamun wun lɛ.

9 Ɲanmiɛn wa seli Balaamun kɛ:+ “?Wan mun yɛle sran nga be nin wɔ be o lɛ’n?” 10 Balaamun tɛli Ɲanmiɛn Kpli su kɛ: “Balaki m’ɔ ti Zipɔɔ i wa’n, m’ɔ ti Moabu famiɛn’n sunmannin be naan be wa se min kɛ: 11 ‘Nian! Sran kpanngban wie’m be fin Ezipti lɔ b’a ba. Yɛ b’a kpa asiɛ’n su sa waa. Bla naan bo be sannzan man min.+ Atrɛkpa’n, ń kwlá be, yɛ ń kán be bo.’” 12 Sanngɛ Ɲanmiɛn seli Balaamun kɛ: “Nán su be su. Nán bo sran sɔ’m be sannzan, afin n yrali be su.”+

13 Balaamun jasoli nglɛmun, kpɛkun ɔ seli Balaki i sran’m be kɛ: “Amun sa amun sin amun mɛn’n nun. Afin Zoova w’a manman min atin kɛ e nin amun e wɔ.” 14 Ɔ maan Moabu lɔ sran dandan’m be sali be sin. Be ko toli Balaki naan b’a se i kɛ: “Balaamun waan ɔ nin e baman.”

15 Sanngɛ Balaki sunmɛnnin i mɛn’n nun sran dandan wie mun ekun. Be sɔnnin, yɛ be le ɲrun tra be ng’ɔ dun mmua sunmannin be’n. 16 Be ko toli Balaamun naan b’a se i kɛ: “Ndɛ nga Balaki m’ɔ ti Zipɔɔ i wa’n kan’n yɛ: ‘Yaci, nán maan sa wie ti’n, á sé kɛ a su toman min wa. 17 Ń yó maan á ɲán ɲrun kpa, yɛ like kwlaa nga a se min kɛ n yo’n, ń yó. Ɔ maan, yaci, bla naan bo sran nga’m be sannzan man min.’” 18 Sanngɛ Balaamun tɛli Balaki i sufuɛ’m be su kɛ: “Sɛ Balaki fɛ i sua mɔ sika annzɛ sika ɔkwlɛ yi i piɛ’n man min bɔbɔ’n, n su yoman like nga Zoova w’a seman min kɛ n yo’n. Sɛ like sɔ’n ti kaan-o annzɛ ɔ ti dan-o, n su yoman.+ 19 Sanngɛ amun yaci, amun ka wa kɔnguɛ’n wie. I liɛ’n, sɛ Zoova kán ndɛ uflɛ klé min-o.”+

20 Ɲanmiɛn wa seli Balaamun kɔnguɛ kɛ: “Sɛ sran ngalɛ’m be bali ɔ flɛlɛ’n, a nin be wɔ. Sanngɛ ndɛ nga ń wá kán klé wɔ’n i ngunmin cɛ yɛ ɔ fata kɛ a kan-ɔn.”+ 21 Ɔ maan Balaamun jasoli nglɛmun. Ɔ siesieli i aflunmun’n* naan ɔ nin Moabu lɔ sran dandan’m b’a ɔ.+

22 Sanngɛ kɛ Ɲanmiɛn wunnin kɛ Balaamun su kɔ’n, ɔ fali ya dan kpa. Ɔ maan Zoova i anzi’n ko jrɛnnin i ɲrun atin’n su lɛ naan ɔ́ tɛ́nndɛn i ɲrun. Balaamun liɛ’n, ɔ o i aflunmun’n su, yɛ i sufuɛ’m be nun nɲɔn be o i wun lɛ. 23 Aflunmun’n wunnin kɛ Zoova i anzi’n jin atin’n nun, yɛ tokofi kun wo i sa nun. I sɔ’n ti’n, ɔ kunndɛli kɛ ɔ́ yáci atin’n lɛ naan ɔ́ sín ijre nun. Sanngɛ Balaamun boli aflunmun’n naan ɔ sɛ i sin atin’n nun. 24 I sin’n, Zoova i anzi’n ko jrannin viɲin fie nɲɔn be afiɛn atin fii kun nun. Talɛ mɔ be fali yɔbuɛ yɛ be fa sisili’n wo atin’n i bue nɲɔn’m be su. 25 Kɛ aflunmun’n wunnin Zoova i anzi’n, ɔ fɛli i wun miannin talɛ’n fii. Ɔ maan talɛ’n miannin Balaamun i ja’n. Yɛ ɔ tɔli i bolɛ su ekun-ɔn.

26 Zoova i anzi’n buli be wun naan w’a ko jran lika fii kun nun. Lɛ liɛ’n, be ɲanman sinwlɛ bɛ su annzɛ fama su. 27 Kɛ aflunmun’n wunnin Zoova i anzi’n, ɔ lali Balaamun i bo lɛ. I sɔ’n ti’n, Balaamun fali ya dan kpa. Ɔ fɛli i kpɔnman’n boli i ekun. 28 Kɛ ɔ yoli sɔ’n, Zoova maan aflunmun’n ijɔli.*+ Ɔ seli Balaamun kɛ: “?Ngue yɛ n yoli ɔ mɔ i ti yɛ w’a bo min kpɛ nsan sɔ-ɔ?”+ 29 Balaamun tɛli aflunmun’n su kɛ: “A yoli min finfin ti-ɔ. Sɛ ɔ ti kɛ tokofi wo min sa nun’n, nn n kunnin wɔ lalaa!” 30 Yɛ aflunmun’n tɛli Balaamun su kɛ: “?Kɛ ɔ fɛ i laa lele andɛ’n, nán aflunmun nga a fu su’n yɛle min? ?M’an yo ɔ kɛ ngalɛ’n sa le?” Ɔ tɛli aflunmun’n su kɛ: “Cɛcɛ!” 31 Yɛ Zoova tikeli Balaamun i ɲinma-ɔ.+ Ɔ maan ɔ wunnin Zoova i anzi m’ɔ jin atin nun’n nin i sa nun tokofi’n. Kɛ ɔ wunnin i cɛ’n, ɔ kluli kpɛkun ɔ utuli i ɲin ase.

32 Yɛ Zoova i anzi’n seli i kɛ: “?Ngue ti yɛ a boli ɔ aflunmun’n kpɛ nsan sɔ-ɔ? Nian! Min yɛ n tanndannin ɔ ɲrun-ɔn, afin wɔ ajalɛ’n timan min liɛ’n su.+ 33 Aflunmun’n wunnin min, yɛ ɔ kunndɛli kɛ ɔ́ sín min nvɛnwun. Ɔ yoli sɔ kpɛ nsan.+ Sɛ ɔ ti kɛ w’a sinman min nvɛnwun’n, nn kɛ é sé yɛ’n, n kunnin wɔ lalaa, kpɛkun n yacili i lɛ.” 34 Balaamun seli Zoova i anzi’n kɛ: “M’an yo sa tɛ. N siman kɛ a jin atin’n nun naan a su minndɛ min. Siɛn’n, sɛ ɔ ti tɛ ɔ ɲrun’n, ń sá min sin.” 35 Sanngɛ Zoova i anzi’n seli Balaamun kɛ: “A nin bian nga’m be wɔ. Sanngɛ ndɛ nga n kan kle wɔ’n, i ngunmin cɛ yɛ ɔ fata kɛ a kan-ɔn.” Ɔ maan Balaamun nin Balaki i sran dandan’m be ɔli.

36 Kɛ Balaki tili i kɛ Balaamun su ba’n, ɔ ɔli ndɛndɛ kpa ko kpɛli i atin Moabu klɔ’n nun lɔ. Klɔ sɔ’n wo i mɛn’n i tiwa lɔ, Aanɔn’n i nuan lɛ. 37 Balaki seli Balaamun kɛ: “?M’an sunmanman sran kɛ ɔ ko flɛ wɔ? ?Ngue ti yɛ w’a baman min wun wa-ɔ? ?A bu i kɛ n kwlá yoman naan w’a ɲan ɲrun dan ti-ɔ?”+ 38 Balaamun tɛli Balaki su kɛ: “Yoo, m’an ba siɛn’n. Sanngɛ nán n bɔbɔ min ndɛ liɛ ng’ɔ o min klun’n yɛ ń kán-ɔn. Ndɛ nga Ɲanmiɛn fa wla min nuan’n, i ngunmin cɛ yɛ ń kán-ɔn.”+

39 Ɔ maan Balaamun nin Balaki be ɔli Kirati-Uzɔti. 40 Yɛ Balaki fali nannin nin bua yili tɛ. Kpɛkun ɔ fali nnɛn’n wie mannin Balaamun nin sran dandan nga be nin i be o lɛ’n. 41 Kɛ i aliɛ cɛnnin’n, Balaki fali Balaamun ɔli Bamɔti-Baali. Kɛ ɔ o lika sɔ’n nun lɔ’n, ɔ wun sran’m be kwlaa.+

23 Balaamun seli Balaki kɛ: “Kplan tɛ yiwlɛ nso wa,+ naan kunndɛ nannin tola nso nin bua ɲin nso fa man min.” 2 Be ja nun lɛ’n, Balaki yoli like nga Balaamun seli i kɛ ɔ yo’n. Yɛ be nɲɔn’n be fali nannin tola kun nin bua ɲin kun fa yili tɛ tɛ yiwlɛ’m be su kunngunngun.+ 3 I sin’n, Balaamun seli Balaki kɛ: “Jran wa, ka ɔ tɛ nga kɛ á yí’n a yrali nnɛn mun kɔlikɔli’n, i wun wa. Ń kɔ́ min ɲrun lɔ kan. Atrɛkpa’n, Zoova yí i wun nglo klé min. Yɛ ndɛ kwlaa ng’ɔ́ kán klé min’n, ń bó su klé wɔ.” Kpɛkun ɔ ɔli kpɔlɛ kun i ti su lɔ.

4 I sin’n Ɲanmiɛn yili i wun nglo kleli Balaamun.+ Yɛ Balaamun seli i kɛ: “M’an kplan tɛ yiwlɛ nso m’an lɔngɔ su. Yɛ n yili be su tɛ. Kun su nannin tola kun nin bua ɲin kun.” 5 Zoova fali ndɛ kun wlali Balaamun i nuan.+ Kpɛkun ɔ seli i kɛ: “Sa ɔ sin Balaki i wun lɔ. Ndɛ ng’ɔ fata kɛ a kan kle i’n yɛ ɔ o lɛ-ɔ.” 6 Yɛ ɔ sɛli i sin-ɔn. Ɔ wunnin kɛ Balaki nin Moabu lɔ sran dandan’m be kwlaa be jin tɛ yiwlɛ’m be wun lɛ. 7 Yɛ ɔ kannin ndɛ nga seli kɛ:+

‘Bla naan bo Zakɔbu i sannzan man min.

Bla wa kan Izraɛli i ndɛ tɛtɛ.’+

 8 ?Be nga Ɲanmiɛn w’a boman be sannzan’n, n bo be sannzan-ɔn, ɔ yo ye?

?Yɛ be nga Zoova w’a kanman be ndɛ tɛtɛ’n, n kan be ndɛ tɛtɛ-ɔ, ɔ yo ye?+

Maan n wu kɛ sran kpa’m be liɛ’n sa,

13 Balaki seli i kɛ: “Yaci, bla maan e wɔ lika uflɛ mɔ a kwla wun be’n. A su wunman be ngba, be bue kaan sa yɛ á wún be-ɔ. Kpɛkun bo be sannzan lɛ man min.”+ 14 Yɛ ɔ fɛli i ɔli Zofimun fie’n nun, Pisga i ti su nglonglo kpa’n su lɔ.+ Kpɛkun ɔ kplannin tɛ yiwlɛ nso naan w’a fa nannin tola kun nin bua ɲin kun w’a fa yi tɛ be su kunngunngun.+ 15 Balaamun seli Balaki kɛ: “Ka ɔ tɛ nga a yili mɔ a yrali nnɛn mun kɔlikɔli’n, i wun wa. Ń kɔ́ min ɲrun lɔ naan Ɲanmiɛn yi i wun nglo kle min.” 16 Zoova yili i wun nglo kleli Balaamun. Kpɛkun ɔ fali ndɛ kun wlɛli i nuan naan w’a se i kɛ:+ “Sa ɔ sin Balaki i wun lɔ. Ndɛ ng’ɔ fata kɛ a kan kle i’n yɛ ɔ o lɛ-ɔ.” 17 Kɛ ɔ wa toli Balaki’n, ɔ wunnin kɛ ɔ su minndɛ i tɛ ng’ɔ yili be’n, be wun lɛ. Moabu lɔ sran dandan’m be o i wun lɛ wie. Yɛ Balaki usɛli i kɛ: “?Ngue ndɛ yɛ Zoova kannin-ɔn?” 18 Balaamun kannin ndɛ nga seli kɛ:+

“Balaki, jaso naan sie ɔ su.

Zipɔɔ i wa, tie min ndɛ’n.

?Sɛ ɔ kan kɛ ɔ́ yó like kun’n, ɔ su yoman?

?Sɛ ndɛ kun fin i nuan fite’n, ɔ su yiɛmɛn i nuan?+

22 Ɲanmiɛn fa be Ezipti lɔ fite.+

Ɔ ti kɛ blo nannin’n* i wɛ mun sa, yɛ ɔ uka be.+

Blɛ sɔ’n nun’n, be kwla kan Zakɔbu nin Izraɛli be ndɛ se kɛ:

‘Amun nian sa nga Ɲanmiɛn yoli’n.’

25 Yɛ Balaki seli Balaamun kɛ: “Sɛ ɔ li a kwlá boman be sannzan’n, nán bo muae kusu man be.” 26 Balaamun tɛli i su kɛ: “?M’an seman wɔ kɛ like kwlaa nga Zoova se min kɛ n yo’n, yɛ ń yó-ɔ?”+

27 Balaki seli Balaamun kɛ: “Yaci, bla maan n fa ɔ wɔ lika uflɛ. Atrɛkpa’n, Ɲanmiɛn Kpli kplín su kɛ a bo be sannzan lɔ.”+ 28 Yɛ Balaki fɛ i ɔli Peɔɔ i ti su nglo lɔ. Kɛ be wo lɔ’n, be wun Zesimɔn.*+ 29 Balaamun seli Balaki kɛ: “Kplan tɛ yiwlɛ nso wa, naan kunndɛ nannin tola nso nin bua ɲin nso fa man min.”+ 30 Balaki yoli like nga Balaamun seli i kɛ ɔ yo’n. Kpɛkun ɔ fali nannin tola kun nin bua ɲin kun fa yili tɛ tɛ yiwlɛ’m be su kunngunngun.

24 Kɛ Balaamun wunnin i kɛ Zoova klo kɛ be yra Izraɛlifuɛ’m be su’n, w’a kunndɛman kɛ ɔ́ wúa be amuin kun.+ Sanngɛ ɔ kpɛli i ɲin aawlɛ flɛnnɛn’n su lɔ. 2 Kɛ Balaamun mɛnnin i ti’n su’n, ɔ wunnin Izraɛlifuɛ mɔ b’a trantran akpasuaakpasua’n.+ Kpɛkun Ɲanmiɛn wawɛ’n jrɛli i su.+ 3 Yɛ ɔ kannin ndɛ nga:+

10 I sɔ’n ti’n, Balaki fali Balaamun i wun ya dan kpa. Ɔ boli ndɛ ya su, yɛ ɔ seli i kɛ: “Min kpɔfuɛ’m be sannzan bolɛ ti yɛ n flɛli wɔ-ɔ.+ Sanngɛ muae yɛ a bo mannin be lele kpɛ nsan-ɔn. 11 Ɔ maan sa ɔ sin kɔ ɔ tranwlɛ icra’n. Min waan ń yó naan a ɲan ɲrun dan.+ Sanngɛ nian! Zoova yoli maan w’a ɲanman ɲrun.”

12 Balaamun tɛli Balaki su kɛ: “?M’an seman sran nga a sunmannin be’n kɛ: 13 ‘Sɛ Balaki fɛ i sua mɔ sika annzɛ sika ɔkwlɛ w’a yi i piɛ’n man min bɔbɔ’n, n su kwlá yoman like nga n bɔbɔ n klo’n, naan kannzɛ like sɔ’n ti kaan-o annzɛ ɔ ti dan-o, n su yoman like nga Zoova w’a seman min kɛ n yo’n? ?M’an seman kɛ ndɛ nga Zoova se min kɛ n kan’n yɛ ń kán-ɔn’?+ 14 N su kɔ min fuɛ’m be sin. Sanngɛ bla maan n kan sa nga cɛn wie lele’n, sran sɔ’m bé wá yó ɔ sran liɛ mun’n i ndɛ n kle wɔ.” 15 I sɔ’n ti’n, ɔ kannin ndɛ nga:+

20 Kɛ ɔ wunnin Amalɛki’n, ɔ kɛnnin i ndɛ’n ekun:

21 Kɛ ɔ wunnin Keninfuɛ mun’n,+ ɔ kɛnnin i ndɛ’n ekun:

“Ɔ tranwlɛ’n wo lika kpa’n nun. Yɔbuɛ’n su yɛ a tran-ɔn.

22 Sanngɛ sran kun wɔ́ Kainin nun.

?Ɔ́ dí le nɲɛ naan Asirifuɛ’m b’a tra wɔ b’a wɔ?”

23 Ɔ kɛnnin i ndɛ’n ekun:

“Amun yako! ?Kɛ Ɲanmiɛn wá yó i sɔ like’n, wan yɛ ɔ́ fíte nun-ɔn?

Sanngɛ i kusu, ɔ́ núnnún sekeseke wie.”

25 Kɛ ɔ yoli sɔ’n, Balaamun+ jasoli naan w’a sɛ i sin i klɔ. Balaki kusu fɛli i atin’n ɔli.

25 I nun mɔ Izraɛlifuɛ’m be o Sitimun lɔ’n,+ be kunndɛli Moabu lɔ bla mun.+ 2 Bla sɔ’m be seli Izraɛlifuɛ’m be kɛ be bla naan be ko sɔ be amuin mun wie.+ Yɛ be ɔli-ɔ. Be dili like kpɛkun be kotoli be amuin’m be bo.+ 3 Ɔ maan Izraɛlifuɛ’m be ko sɔli Baali ng’ɔ o Peɔɔ’n+ wie. I sɔ’n ti’n, Zoova fali be wun ya dan kpa. 4 Zoova seli Moizi kɛ: “Tra be nga be dun sran sɔ’m be ɲrun’n. Kpɛkun kun be naan sende be saka’n nglo, wia klengle kpa’n* nun Zoova i ɲrun lɛ. I liɛ’n, Zoova gúa Izraɛlifuɛ’m be wun ya dan ng’ɔ fali’n, i ase.” 5 Yɛ Moizi seli Izraɛlifuɛ’m be jɔlɛ difuɛ’m be kɛ:+ “Maan sran kun kun i sran nga be ko sɔli Baali ng’ɔ o Peɔɔ’n.”+

6 Kɛ ɔ yoli sɔ’n, bé nían-ɔn, Izraɛlifuɛ kun su fa Madian talua kun+ ba i niaan’m be wun lɛ, Moizi nin Izraɛlifuɛ’m be kwlaa be ɲrun lɛ. Kɛ ɔ́ yó sɔ’n, nn be o tannin sua mɔ Ɲanmiɛn yi i wun nglo nun’n i anuan’n nun lɛ, be su sun. 7 Kɛ Fineasi+ m’ɔ ti Eleazaa i wa’n, mɔ i kusu ti Ɲanmiɛn ɲrun jranfuɛ Aarɔn i wa’n, ɔ wunnin i sɔ cɛ’n, ɔ jasoli sran’m be afiɛn lɛ. Kpɛkun ɔ fali cua kun. 8 Ɔ wluli Izraɛlifuɛ sɔ’n i sin tannin sua’n nun lɔ. Ɔ fali cua’n kplannin bian’n nin bla’n be nɲɔn’n be nun. Cua’n kplannin bla fuɛ’n i bla lika.* Yɛ ɲrɛnnɛn ng’ɔ tɔli Izraɛlifuɛ’m be su’n wieli-ɔ.+ 9 Be nga ɲrɛnnɛn tɔli be su mɔ be wuli’n, be ti akpiakpi ablaɔn-nin-nnan (24.000).+

10 I sin’n, Zoova seli Moizi kɛ: 11 “N fali Izraɛlifuɛ’m be wun ya dan. Sanngɛ Fineasi+ m’ɔ ti Eleazaa i wa’n, mɔ i kusu ti min ɲrun jranfuɛ Aarɔn i wa’n, i ti’n m’an gua min ya’n i ase. Afin be nga be nin min nantiman klanman’n, w’a tranman lɛ w’a nianman be sa ngbɛn.+ I sɔ ti yɛ maan m’an nunnunman be sekeseke-ɔ, kannzɛ bɔbɔ n kunndɛ kɛ Izraɛlifuɛ’m be su min kunngba cɛ’n.+ 12 I sɔ’n ti’n, se i kɛ e nin i é trá fɔundi aenguɛ. 13 Aenguɛ sɔ’n ti’n, i bɔbɔ nin i osu’n nunfuɛ’m bé yó min ɲrun jranfuɛ tititi.+ Afin be nga be nin i Ɲanmiɛn’n be nantiman klanman’n, w’a tranman lɛ w’a nianman be sa ngbɛn.+ Yɛ ɔ yoli maan e nin Izraɛlifuɛ mun e siesieli e afiɛn.”

14 Izraɛlifuɛ nga be kunnin i nin Madian talua’n suan Zimiri. Salu m’ɔ ti Simeɔn i mma’m be awlo’m be su kpɛn kun’n, i wa-ɔ. 15 Yɛ be flɛ Madian talua nga be kunnin i’n kɛ Kɔsbi. Zii+ m’ɔ ti Madian lɔ akpasuaakpasua’m be su kpɛn kun’n i wa-ɔ.+

16 I sin’n, Zoova seli Moizi kɛ: 17 “Amun klɔklɔ Madianfuɛ mun naan amun kun be.+ 18 Afin be klɔklɔli amun. Peɔɔ ndɛ’n nun,+ ɔ nin Madian lɔ kpɛnngbɛn’n i wa Kɔsbi m’ɔ ti be niaan bla’n, mɔ kɛ ɲrɛnnɛn tɔli amun su’n be kunnin i’n,+ i ndɛ’n nun’n, be fali gblɛ be ɲannin amun.”+

26 Kɛ ɲrɛnnɛn’n wieli’n,+ Zoova seli Moizi nin Aarɔn m’ɔ ti i ɲrun jranfuɛ’n i wa Eleazaa kɛ: 2 “Amun klɛ Izraɛlifuɛ’m be kwlaa nga be le afuɛ ablaɔn (20) nin afuɛ ablaɔn (20) tra su’n be dunman. Amun nian kɛ be si’m be awlo’m be fa ti’n su naan amun ka be kwlaa nga be kwla di sonja’n.”+ 3 Moizi nin Ɲanmiɛn ɲrun jranfuɛ Eleazaa+ be kannin ndɛ kleli be Moabu lɔ aawlɛ flɛnnɛn’n nun.+ Kɛ ɔ́ yó sɔ’n, nn b’a ju Zurdɛn’n i nuan lɛ, Zeriko+ i wun lɔ. Be seli kɛ: 4 “Amun klɛ be nga be le afuɛ ablaɔn (20) nin afuɛ ablaɔn (20) tra su’n be dunman, kɛ nga Zoova kan kleli Moizi’n sa.”+

Izraɛlifuɛ nga be fin Ezipti mɛn’n nun lɔ fiteli’n be yɛ: 5 Izraɛli i wa kpɛnngbɛn Ribɛnin.+ Ribɛnin+ i mma mun yɛ: Anɔkufuɛ’m be fin Anɔku i osu’n nun, Palufuɛ’m be fin Palu i osu’n nun, 6 Ɛzrɔnfuɛ’m be fin Ɛzrɔn i osu’n nun, Kaaminfuɛ’m be fin Kaamin i osu’n nun. 7 Ribɛnin i osu’n nunfuɛ mun yɛ be o lɛ-ɔ. Be nga be klɛli be dunman’n, be ti akpiakpi ablanan-nin-nsan ya nso ablasan (43.730).+

8 Palu i wa yɛle Eliabu. 9 Eliabu i mma mun yɛle Nemiɛli nin Datan nin Abiramun. Datan nin Abiramun sɔ’m be ti sran’m be nuan ndɛ kanfuɛ. Be yɛ be nin Kore i sran’m+ be fali be ɲin cili Moizi+ nin Aarɔn mɔ be yoli ɲin kekle Zoova su’n+ niɔn.

10 Asiɛ’n i nun kpacili, kpɛkun ɔ mɛnnin be. Kore liɛ’n, sin yrɛli i nin sran ya nɲɔn ablenun (250)+ nga be suli i su’n be sekeseke. I sɔ sa’n juli naan sran’m be fa tu be wun fɔ.+ 11 Sanngɛ Kore i mma’m b’a wuman wie.+

12 Simeɔn i mma’m+ be osuosu mun yɛ: Nemiɛlifuɛ’m be fin Nemiɛli i osu’n nun, Zamininfuɛ’m be fin Zaminin i osu’n nun, Zakɛnfuɛ’m be fin Zakɛn i osu’n nun, 13 Zerafuɛ’m be fin Zera i osu’n nun, Saulufuɛ’m be fin Saulu i osu’n nun. 14 Simeɔn i osu’n nunfuɛ mun yɛ be o lɛ-ɔ. Be ti akpiakpi ablaɔn-nin-nɲɔn ya nɲɔn (22.200).+ 

15 Gadi i mma’m+ be osuosu mun yɛ: Zefɔnfuɛ’m be fin Zefɔn i osu’n nun, Agifuɛ’m be fin Agi i osu’n nun, Suninfuɛ’m be fin Sunin i osu’n nun, 16 Ɔzninfuɛ’m be fin Ɔznin i osu’n nun, Erifuɛ’m be fin Eri i osu’n nun, 17 Arɔdufuɛ’m be fin Arɔdu i osu’n nun, Arelifuɛ’m be fin Areli i osu’n nun. 18 Gadi i mma’m be osu’n nunfuɛ mun yɛ be o lɛ-ɔ. Be nga be klɛli be dunman’n, be ti akpiakpi ablanan ya nnun (40.500).+

19 Zida+ i mma mun yɛle Ɛri nin Onan.+ Sanngɛ Ɛri nin Onan be wuli Kanaan mɛn’n nun lɔ.+ 20 Zida i mma’m be osuosu mun yɛ: Selafuɛ’m be fin Sela i osu’n nun,+ Perɛzifuɛ’m be fin Perɛzi i osu’n nun,+ Zerafuɛ’m be fin Zera i osu’n nun.+ 21 Perɛzi i mma mun yɛ: Ɛzrɔnfuɛ’m be fin Ɛzrɔn i osu’n nun.+ Amilifuɛ’m be fin Amili i osu’n nun.+ 22 Zida i osu’n nunfuɛ mun yɛ be o lɛ-ɔ. Be nga be klɛli be dunman’n, be ti akpiakpi ableso-nin-nsiɛn nin ya nnun (76.500).+

23 Isakaa i mma’m+ be osuosu mun yɛ: Tolafuɛ’m be fin Tola i osu’n nun,+ Puninfuɛ’m be fin Puva i osu’n nun, 24 Zasubufuɛ’m be fin Zasubu i osu’n nun, Simunrɔnfuɛ’m be fin Simunrɔn i osu’n nun. 25 Isakaa i osu’n nunfuɛ mun yɛ be o lɛ-ɔ. Be nga be klɛli be dunman’n, be ti akpiakpi ablesiɛn-nin-nnan nin ya nsan (64.300).+

26 Zabilɔn i mma’m+ be osuosu mun yɛ: Serɛdifuɛ’m be fin Serɛdi i osu’n nun, Elɔnfuɛ’m be fin Elɔn i osu’n nun, Zaleɛlifuɛ’m be fin Zaleɛli i osu’n nun. 27 Zabilɔn i osu’n nunfuɛ mun yɛ be o lɛ-ɔ. Be nga be klɛli be dunman’n, be ti akpiakpi ablesiɛn nin ya nnun (60.500).+

28 Zozɛfu i mma’m+ be osuosu mun yɛ: I mma mun yɛle Manase nin Efraimun.+ 29 Manase+ i mma mun yɛ: Makiifuɛ’m be fin Makii i osu’n nun.+ Makii wuli Galaadi.+ Galaadifuɛ’m be fin Galaadi i osu’n nun. 30 Galaadi i mma mun yɛ: Iezɛɛfuɛ’m be fin Iezɛɛ i osu’n nun, Elɛkifuɛ’m be fin Elɛki i osu’n nun, 31 Asriɛlifuɛ’m be fin Asriɛli i osu’n nun, Sisɛmunfuɛ’m be fin Sisɛmun i osu’n nun, 32 Semidafuɛ’m be fin Semida i osu’n nun, Efɛɛfuɛ’m be fin Efɛɛ i osu’n nun. 33 Efɛɛ i wa Zelofeadi w’a wuman ba yasua. Bla ngunmin yɛ ɔ wuli be-ɔ.+ Zelofeadi+ i wa bla sɔ mun yɛle Mala nin Nowa nin Ɔgla nin Milka yɛ Tiiza. 34 Manase i osu’n nunfuɛ mun yɛ be o lɛ-ɔ. Be nga be klɛli be dunman’n, be ti akpiakpi ablenun-nin-nɲɔn nin ya nso (52.700).+

35 Efraimun i mma’m+ be osuosu mun yɛ: Sutelafuɛ’m be fin Sutela i osu’n nun,+ Bekɛɛfuɛ’m be fin Bekɛɛ i osu’n nun, Taanfuɛ’m be fin Taan i osu’n nun. 36 Sutela i mma liɛ mun yɛ: Eranfuɛ’m be fin Eran i osu’n nun. 37 Efraimun i osu’n nunfuɛ mun yɛ be o lɛ-ɔ. Be nga be klɛli be dunman’n, be ti akpiakpi ablasan-nin-nɲɔn nin ya nnun (32.500).+ Zozɛfu i mma’m be osuosu mun yɛ be o lɛ-ɔ.

38 Bɛnzamɛn i mma’m+ be osuosu mun yɛ: Belafuɛ’m be fin Bela i osu’n nun,+ Asibɛlifuɛ’m be fin Asibɛli i osu’n nun, Airamunfuɛ’m be fin Airamun i osu’n nun, 39 Sefufamunfuɛ’m be fin Sufamun i osu’n nun, Ufamunfuɛ’m be fin Ufamun i osu’n nun. 40 Bela i mma mun yɛle Aridi nin Naaman.+ Aridifuɛ’m be fin Aridi i osu’n nun, Naamanfuɛ’m be fin Naaman i osu’n nun. 41 Bɛnzamɛn i mma’m be osuosu mun yɛ be o lɛ-ɔ. Be nga be klɛli be dunman’n, be ti akpiakpi ablanan-nin-nnun nin ya nsiɛn (45.600).+

42 Dan i mma’m+ be osuosu mun yɛ: Suamunfuɛ’m be fin Suamun i osu’n nun. Dan i osuosu mun yɛ be o lɛ-ɔ. 43 Suamun i osu’n nunfuɛ nga be klɛli be dunman’n, be kwlaa be ti akpiakpi ablesiɛn-nin-nnan nin ya nnan (64.400).+

44 Azɛɛ i mma’m+ be osuosu mun yɛ: Imnafuɛ’m be fin Imna i osu’n nun, Isivifuɛ’m be fin Isivi i osu’n nun, Beriafuɛ’m be fin Beria i osu’n nun. 45 Beria i mma mun yɛ: Ebɛɛfuɛ’m be fin Ebɛɛ i osu’n nun, Malkiɛlifuɛ’m be fin Malkiɛli i osu’n nun. 46 Be flɛ Azɛɛ i wa bla’n kɛ Sera. 47 Azɛɛ i mma’m be osuosu mun yɛ be o lɛ-ɔ. Be nga be klɛli be dunman’n, be ti akpiakpi ablenun-nin-nsan nin ya nnan (53.400).+

48 Nɛftali i mma’m+ be osuosu mun yɛ: Zazeɛlifuɛ’m be fin Zazeɛli i osu’n nun, Guninfuɛ’m be fin Gunin i osu’n nun, 49 Zezɛlifuɛ’m be fin Zezɛli i osu’n nun, Silɛmunfuɛ’m be fin Silɛmun i osu’n nun. 50 Nɛftali i mma’m be osuosu mun yɛ be o lɛ-ɔ. Be nga be klɛli be dunman’n, be ti akpiakpi ablanan-nin-nnun nin ya nnan (45.400).+

51 Izraɛlifuɛ’m be kwlaa nga be klɛli be dunman’n, be ti akpiakpi ya nsiɛn akpi kun nin ya nso ablasan (601.730).+

52 I sin’n, Zoova seli Moizi kɛ: 53 “Maan be nian sran sɔ’m be dunman mɔ be klɛli’n su naan b’a cɛ asiɛ’n* nun b’a man be.+ 54 Akpasua nga i nun sran’m be sɔnnin’n, maan aja like* nga á fá mán be’n, ɔ yo dan. Yɛ akpasua nga i nun sran’m b’a sɔnman’n, maan be aja like liɛ’n yo kaan.+ Kɛ sran’m be nuan fa ti’n, nian su naan w’a cɛ asiɛ’n nun. 55 Sanngɛ maan be tu fɔtɔ naan b’a cɛ asiɛ’n nun.+ Maan be nian be si’m be akpasua’m be dunman’n su naan b’a fa be aja like’n b’a man be. 56 Maan be tu fɔtɔ, yɛ be nian kɛ akpasua’m be nun sran’m be nuan fa ti’n su naan b’a cɛ asiɛ’n nun.”

57 Levi i osu’n nunfuɛ+ nga be klɛli be dunman’n be yɛ: Gɛɛsɔnunfuɛ’m be fin Gɛɛsɔnun i osu’n nun, Keatifuɛ’m be fin Keati i osu’n nun,+ Merarifuɛ’m be fin Merari i osu’n nun. 58 Levifuɛ’m be osuosu mun yɛ: Libninfuɛ mun,+ Ebrɔnfuɛ mun,+ Malifuɛ mun,+ Musifuɛ mun,+ Korefuɛ mun.+

Keati wuli Amramun.+ 59 Be flɛ Amramun i yi’n kɛ Zokebɛdi.+ Levi i wa bla-ɔ. Ɔ nin i yi’n be wuli i Ezipti lɔ. Amramun nin Zokebɛdi be wuli Aarɔn nin Moizi nin be niaan bla Miriamun.+ 60 Aarɔn kusu wuli Nadabu nin Abiu nin Eleazaa ɔ nin Itamaa.+ 61 Sanngɛ Nadabu nin Abiu be wuli. Afin sin ng’ɔ nin i fataman’n yɛ be fa sieli i Zoova ɲrun-ɔn.+

62 Ba yasua nga b’a di anglo kun ɔ nin anglo kun tra su mɔ be klɛli be dunman’n,+ be kwlaa be ti akpiakpi ablaɔn-nin-nsan (23.000). B’a klɛman be dunman Izraɛlifuɛ’m be nun wie.+ Afin be su manman be aja like kɛ Izraɛlifuɛ onga’m be sa.+

63 Be nga Moizi nin Ɲanmiɛn ɲrun jranfuɛ Eleazaa be klɛli be dunman’n be yɛ be o lɛ-ɔ. Kɛ bé klɛ́ Izraɛlifuɛ’m be dunman’n, nn b’a ju Moabu lɔ aawlɛ flɛnnɛn’n nun Zurdɛn’n i nuan lɛ, Zeriko i wun lɔ. 64 Sanngɛ sran sɔ’m be nunman be nga Moizi nin Aarɔn m’ɔ ti Ɲanmiɛn ɲrun jranfuɛ’n, be klɛli be dunman Sinai aawlɛ flɛnnɛn’n nun lɔ’n, be nun wie.+ 65 Afin Zoova kannin sran sɔ’m be ndɛ seli kɛ: “Saan bé wú aawlɛ flɛnnɛn’n nun.”+ Ɔ maan be nun kun sa w’a kaman lɛ, saan Kalɛbu m’ɔ ti Zefine i wa’n ɔ nin Zozie m’ɔ ti Nɛn i wa’n.+

27 Manase wuli Makii, Makii wuli Galaadi, Galaadi kusu wuli Efɛɛ. Yɛ Efɛɛ i wa yɛle Zelofeadi. Zelofeadi i wa bla mun+ yɛ: Mala nin Nowa nin Ɔgla nin Milka ɔ nin Tiiza. Be ti Zozɛfu i wa Manase i osu’n nunfuɛ. Cɛn kun’n, ba bla sɔ’m be bali. 2 Be wa toli Moizi nin Ɲanmiɛn ɲrun jranfuɛ Eleazaa nin kpɛnngbɛn mun+ nin Izraɛlifuɛ’m be kwlaa tannin sua mɔ Ɲanmiɛn yi i wun nglo nun’n i ɲrun lɛ. Kpɛkun be seli kɛ: 3 “E si wuli aawlɛ flɛnnɛn’n nun lɔ. Nán kɛ ɔ o be nga be jrannin Kore sin+ mɔ be bo yoli kun be yoli ɲin kekle Zoova su’n, be nun wie ti-ɔ. I bɔbɔ i sa tɛ’n ti yɛ ɔ wuli-ɔ. Kusu w’a wuman ba yasua. 4 ?Ba yasua mɔ e si w’a wumɛn i’n ti yɛ i dunman’n núnnún i osu liɛ’n nun-ɔn? Amun man e lika kɛ e si’n i niaan’m be liɛ’n sa.” 5 Moizi kannin be ndɛ’n kleli Zoova.+

6 I sin’n, Zoova seli Moizi kɛ: 7 “Zelofeadi i wa bla’m be ndɛ yo fɛ. Man be lika kɛ be si’n i niaan’m be liɛ’n sa. Yɛ fa be si i aja like liɛ’n man be.+ 8 Kpɛkun se Izraɛlifuɛ’m be kɛ: ‘Sɛ bian kun wu naan ɔ leman ba yasua’n, amun fɛ i aja like’n be mɛn i wa bla’n. 9 Sɛ w’a wuman ba bla’n, amun fa mɛn i niaan yasua mun. 10 Sɛ ɔ leman niaan yasua’n, amun fa mɛn i si i niaan yasua mun. 11 Kusu sɛ i si leman niaan yasua’n, maan be fɛ i aja like’n be mɛn i osufuɛ ng’ɔ mɛntɛn i koko kpa’n naan ɔ kaci i liɛ. Maan i sɔ’n kaci mmla naan Izraɛlifuɛ’m be nanti su titi, kɛ nga Zoova kan kleli Moizi’n sa.’”

12 I sin’n, Zoova seli Moizi kɛ: “Fu Abarimun oka+ nga su naan nian mɛn nga n su wa fa man Izraɛlifuɛ mun’n.+ 13 Kɛ ɔ ɲinma ko gua mɛn sɔ’n i wun’n, á wá wú+ kɛ nga ɔ niaan bian Aarɔn wuli’n sa.+ 14 Afin kɛ Izraɛlifuɛ’m be kunndɛli min ndɛnngan Zinin aawlɛ flɛnnɛn’n+ nun lɔ mɔ n yoli maan nzue’n fiteli’n, amun a faman min ndɛ’n su. Amun a yiman min ayɛ be ɲrun naan b’a wun kɛ n ti sanwun.+ Sa sɔ’n juli Meriba lɔ nzue ndɛ’n su,+ Zinin aawlɛ flɛnnɛn’n nun lɔ lika nga be flɛ i kɛ Kadɛsi’n+ nun.”

15 I sin’n, Moizi seli Zoova kɛ: 16 “Zoova, wɔ mɔ a man sran’m be kwlaa be nguan’n, fa sran kun sie i sran’m be su. 17 I sɔfuɛ’n wlú yɛ ɔ́ fíte sran’m be kwlaa be ɲrun. Kpɛkun ɔ́ fá be fíte yɛ ɔ́ fá be wlú. Ɔ maan Zoova i sran’m be su yoman kɛ bua mɔ be leman sunianfuɛ’n sa.” 18 I sɔ’n ti’n, Zoova seli Moizi kɛ: “Fa Zozie m’ɔ ti Nɛn i wa’n. Ɔ ti juejuefuɛ. Fa ɔ sa fuɛ i su.+ 19 I sin’n, fɛ i kɔ min ɲrun jranfuɛ Eleazaa nin Izraɛlifuɛ’m be kwlaa be ɲrun lɛ naan fa junman’n wlɛ i sa nun be kwlaa be ɲrun.+ 20 Fa sasu* nga a le i’n i wie mɛn i.+ I liɛ’n, Izraɛlifuɛ’m be kwlaa bé fá ndɛ ng’ɔ kan’n su.+ 21 Maan ɔ jran Eleazaa m’ɔ ti min ɲrun jranfuɛ’n i ɲrun. I yɛ ɔ́ fá Urimun’n+ úsa Zoova i sa naan ɔ kan like ng’ɔ fata kɛ ɔ yo’n niɔn. Sɛ ɔ se sran’m be kɛ be fite’n, annzɛ ɔ se kɛ be wlu’n, i bɔbɔ nin Izraɛlifuɛ’m be ngba, yɛle kɛ sran’m be kwlaa bé fɛ́ i nuan ndɛ’n su.”

22 Like nga Zoova seli Moizi kɛ ɔ yo’n, ɔ niannin su yoli. Ɔ fali Zozie ɔli Ɲanmiɛn i ɲrun jranfuɛ Eleazaa ɔ nin sran’m be kwlaa be ɲrun, 23 kpɛkun ɔ fɛli i sa fuɛli i su naan w’a fa junman’n w’a wlɛ i sa nun+ kɛ nga Zoova kan kleli Moizi’n sa.+

28 Zoova seli Moizi ekun kɛ: 2 “Kan ndɛ kle Izraɛlifuɛ mun. Se be kɛ: ‘Like ng’ɔ fata kɛ amun fa man min’n, yɛle kɛ min aliɛ’n, amun fa man min. Blɛ ng’ɔ ti i nuan su’n i su’n, amun fa like nga be fa sie i sin su m’ɔ bɔn min bue nun fannin’n be man min.’+

3 “Yɛ se be kɛ: ‘Like ng’ɔ fata kɛ amun fa sie i sin’n su be man Zoova’n yɛ: Cɛn kwlakwla’n, amun fa bua ba yasua nɲɔn mɔ b’a di afuɛ kun’n, be yi tɛ nga kɛ bé yí’n be yra nnɛn’n i kɔlikɔli’n.+ 4 Amun fa bua ba yasua sɔ’m be nun kun yi tɛ nglɛmun. Yɛ kɛ sɛnzɛ’n ko tɔ’n,* amun fa kun’n yi tɛ.+ 5 Kɛ amún yí tɛ’n, amun fa ble annzɛ i wunsu like be uka su. Yɛle kɛ amun fa like sɔ’n i sanmlɛn mlɛnnɛnnɛn kpa efa kun, yɛ amun bubu nun blu naan amun fɛ i bue kun* bla. Amun fa olivie mma nga be sili’n i ngo inin kun, naan amun bubu nun nnan, yɛ amun fɛ i bue kun* sanngan sanmlɛn sɔ’n nun naan amun a fa ba.+ 6 Tɛ nga kɛ bé yí’n be yra nnɛn’n i kɔlikɔli mɔ n kɛnnin i ndɛ Sinai Oka’n su lɔ kɛ amun yi i titi’n,+ yɛ ɔ o lɛ-ɔ. Amun fa sie i sin’n su naan ɔ bɔn Zoova i bue nun fannin. 7 Kɛ amún yí tɛ sɔ’n, amun sie su nzan. Amun bubu nzan inin kun nun nnan naan amun fɛ i bue kun sie bua ba yasua’m be su kunngunngun.+ Yɛ amun fa nzan kekle’n guɛ i lika m’ɔ ti min liɛ klonglo’n nun man Zoova. 8 Kɛ sɛnzɛ’n ko tɔ’n,* amun fa bua ba yasua kun’n yi tɛ. Amun fa ble annzɛ i wunsu like ɔ nin nzan sie su man min kɛ nga amun fa yo i nglɛmun’n sa. Amun fa sie i sin’n su naan ɔ bɔn Zoova i bue nun fannin.+

9 “‘Sanngɛ Wunmiɛn-lolɛ-cɛn’n nun’n,+ amun fa bua yasua nɲɔn mɔ b’a di afuɛ kun’n, mɔ be ti kpa’n be yi tɛ man min. Yɛ amun fa sanmlɛn mlɛnnɛnnɛn kpa efa kun yɛ amun bubu nun blu, naan amun fɛ i bue nɲɔn* be bla. Amun fa ngo sanngan sanmlɛn mlɛnnɛnnɛn kpa sɔ’n nun, yɛ amun fa nzan sie su. 10 Tɛ ng’ɔ fata kɛ amun yi i Wunmiɛn-lolɛ-cɛn’n nun’n, ɔ nin cɛn kwlakwla’n yɛ ɔ o lɛ-ɔ. Kɛ amún yí tɛ sɔ mun’n, amun yra nnɛn’m be kɔlikɔli, yɛ amun fa nzan sie su.+

11 “‘Anglo kwlaa i cɛn ba klikli su’n, amun fa nannin ba nɲɔn, nin bua ɲin kun ɔ nin bua ba yasua nso m’ɔ lɛ fi nunman be wun mɔ b’a di afuɛ kun’n, naan amun fa yi tɛ nga kɛ bé yí’n be yra nnɛn’n i kɔlikɔli’n man Zoova.+ 12 Asa ekun’n, amun fa sanmlɛn mlɛnnɛnnɛn kpa efa kun, amun bubu nun blu naan amun fɛ i bue nsan, yɛ amun sɛnngɛn i nin ngo+ naan amun fa sie nannin’m be su kunngunngun. Yɛ amun fa sanmlɛn mlɛnnɛnnɛn kpa efa kun, amun bubu nun blu naan amun fɛ i bue nɲɔn, yɛ amun sɛnngɛn i nin ngo naan amun fa sie bua ɲin’n su.+ 13 Asa ekun’n, amun fa ble annzɛ i wunsu like i sanmlɛn mlɛnnɛnnɛn kpa efa kun, amun bubu nun blu naan amun fɛ i bue kun, yɛ amun sɛnngɛn i nin ngo naan amun fa sie bua ba yasua’m be su kunngunngun be fa yi tɛ nga kɛ bé yí’n be yra nnɛn’n i kɔlikɔli’n. Ɔ ti like m’ɔ bɔn fannin+ mɔ be fa sie i sin’n su man Zoova-ɔ. 14 Nzan nga amún fá síe nannin’m be su kunngunngun’n ti duvɛn inin sin kun.+ Amun bubu duvɛn inin kun nun nsan naan amun fɛ i bue kun sie i bua ɲin’n su.+ Yɛ amun bubu duvɛn inin kun nun nnan naan amun fɛ i bue kun sie bua ba yasua’m be su kunngunngun.+ Tɛ nga kɛ bé yí’n be yra nnɛn’n i kɔlikɔli m’ɔ fata kɛ amun yi i anglo kwlaa nun’n, yɛ ɔ o lɛ-ɔ. 15 Kɛ amún yí tɛ nga kɛ bé yí’n be yra nnɛn’n i kɔlikɔli’n, mɔ amun sie su nzan’n, amun fa boli ba kun yi sa tɛ’n i ti tɛ man Zoova.

16 “‘Anglo klikli’n i cɛn ba blu-nin-nnan (14) su’n ti Delɛ Cɛn nga be di man Zoova’n.+ 17 Anglo sɔ’n i cɛn ba blu-nin-nnun (15) su’n, cɛn dilɛ kun wo lɛ. Amun di kpanwun mɔ levii nunman nun’n lele cɛn ba nso.+ 18 Cɛn klikli su’n, amun yia naan amun su min. Cɛn sɔ’n nun’n, ɔ fataman kɛ amun di junman kekle. 19 Yɛ amun fa nannin ba nɲɔn, nin bua ɲin kun ɔ nin bua ba yasua nso mɔ b’a di afuɛ kun’n, naan amun fa yi tɛ nga kɛ bé yí’n be yra nnɛn’n i kɔlikɔli’n man Zoova. Nán maan lɛ fi tran nnɛn sɔ’m be wun.+ 20 Kɛ amún fá ninnge sɔ mun mán’n, amun fa ble annzɛ i wunsu like i sanmlɛn mlɛnnɛnnɛn kpa nga be sɛnngɛnnin i nin ngo’n be sie su.+ Yɛle kɛ amun bubu sanmlɛn’n i efa kun nun blu naan amun fɛ i bue nsan sie nannin’m be su kunngunngun, yɛ amun fɛ i bue nɲɔn sie bua ɲin’n su. 21 Yɛ amun fɛ i bue kun sie i bua ba yasua nso’m be su kunngunngun. 22 Asa ekun’n, amun fa boli kpakpuɛ kun yi sa tɛ’n i ti tɛ naan e nin amun e siesie e afiɛn. 23 Amun yi tɛ sɔ mun fa uka tɛ nga amun yi be nglɛmun kwlakwla, mɔ kɛ bé yí’n be yra nnɛn’n i kɔlikɔli’n be su. 24 Amun yi tɛ’m be kɛ ngalɛ’n sa cɛn kwlakwla, sɔ lele cɛn ba nso, kɛ aliɛ* yɛ be su fa man min sa. Ɔ ti like mɔ be sie i sin’n su m’ɔ bɔn Zoova i bue nun fannin-ɔn. Kɛ amún fá like sɔ’n mán’n, amun yi tɛ nga kɛ bé yí’n be yra nnɛn’n i kɔlikɔli’n, yɛ amun fɛ i su nzan’n sie su. 25 Cɛn nso su’n, amun yia naan amun su min.+ Cɛn sɔ’n nun’n, ɔ fataman kɛ amun di junman kekle.+

26 “‘Cɛn nga amún fá amun fie su ninnge’m be mma klikli’n bé mán’n,+ yɛle kɛ amun lemɔcuɛ’m be ti cɛn dilɛ’n+ nun mɔ amún fá ble annzɛ i wunsu like uflɛuflɛ mán Zoova’n,+ amun yia naan amun su min. Cɛn sɔ’n nun’n, ɔ fataman kɛ amun di junman kekle.+ 27 Yɛ amun fa nannin gbanflɛn nɲɔn, nin bua ɲin kun ɔ nin bua ba yasua nso mɔ b’a di afuɛ kun’n, naan amun fa yi tɛ nga kɛ bé yí’n be yra nnɛn’n i kɔlikɔli’n man Zoova naan ɔ bɔn i bue nun fannin.+ 28 Kɛ amún fá ninnge sɔ mun mán’n, amun fa ble annzɛ i wunsu like i sanmlɛn mlɛnnɛnnɛn kpa nga be sɛnngɛnnin i nin ngo’n be sie su. Yɛle kɛ amun bubu sanmlɛn’n i efa kun nun blu naan amun fɛ i bue nsan sie nannin’m be su kunngunngun, yɛ amun fɛ i bue nɲɔn sie bua ɲin’n su. 29 Yɛ amun fɛ i bue kun sie i bua ba yasua nso’m be su kunngunngun. 30 Asa ekun’n, amun fa boli ba yasua kun yi tɛ naan e nin amun e siesie e afiɛn.+ 31 Kɛ amún fá ninnge sɔ mun mán’n, amun yi tɛ nga kɛ bé yí’n be yra nnɛn’n i kɔlikɔli’n, yɛ amun fa ble annzɛ i wunsu like uka su. Nán maan lɛ fi tran nnɛn sɔ’m be wun,+ yɛ amun fa nzan sie be su.

29 Anglo nso su’n i cɛn ba klikli’n nun’n, amun yia be su min. Nán amun di junman kekle wie fi.+ Cɛn sɔ’n nun’n, amun bo awɛ’n.+ 2 Amun fa nannin ba kun m’ɔ ti yasua’n, nin bua ɲin kun, nin bua ba yasua nso mɔ b’a di afuɛ kun’n, naan amun fa yi tɛ nga kɛ bé yí’n be yra nnɛn’n i kɔlikɔli’n, naan ɔ bɔn Zoova i bue nun fannin. Nán maan lɛ fi tran nnɛn sɔ’m be wun. 3 Kɛ amún yí tɛ sɔ’n, amun fa ble annzɛ i wunsu like i sanmlɛn mlɛnnɛnnɛn kpa mɔ be sɛnngɛnnin i nin ngo’n be sie su. Yɛle kɛ amun bubu sanmlɛn sɔ’n i efa kun nun blu naan amun fɛ i bue nsan sie nannin’n su, yɛ amun fɛ i bue nɲɔn sie bua ɲin’n su. 4 Yɛ amun fɛ i bue kun sie i bua ba yasua nso’m be su kunngunngun. 5 Yɛ amun fa boli yasua kun yi sa tɛ’n i ti tɛ naan e nin amun e siesie e afiɛn. 6 Amun yi tɛ sɔ’n fa uka tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi be anglo kwlaa nun’n nin i su ble annzɛ i wunsu like ng’ɔ fata kɛ amun fa man’n,+ ɔ nin tɛ nga kɛ bé yí’n be yra nnɛn’n i kɔlikɔli m’ɔ fata kɛ amun yi i titi’n nin i su ble annzɛ i wunsu like ng’ɔ fata kɛ amun fa man’n,+ ɔ nin nzan ng’ɔ fata kɛ amun fa sie su’n be su.+ Amun yo i kɛ nga n kleli amun’n sa. Ɔ ti like mɔ be yrɛ i sin’n su m’ɔ bɔn Zoova i bue nun fannin-ɔn.

7 “‘Anglo nso sɔ’n i cɛn ba blu’n su’n, amun yia naan amun su min.+ Amun yo amun wun aunnvɔɛfuɛ.* Yɛ nán amun di junman wie fi.+ 8 Amun fa nannin ba kun m’ɔ ti yasua’n, nin bua ɲin kun, nin bua ba yasua nso mɔ b’a di afuɛ kun’n, naan amun fa yi tɛ nga kɛ bé yí’n be yra nnɛn’n i kɔlikɔli’n, naan ɔ bɔn Zoova i bue nun fannin. Nán maan lɛ fi tran nnɛn sɔ’m be wun.+ 9 Kɛ amún yí tɛ sɔ’n, amun fa ble annzɛ i wunsu like i sanmlɛn mlɛnnɛnnɛn kpa mɔ be sɛnngɛnnin i nin ngo’n be sie su. Yɛle kɛ amun bubu sanmlɛn sɔ’n i efa kun nun blu naan amun fɛ i bue nsan sie nannin’n su, yɛ amun fɛ i bue nɲɔn sie bua ɲin’n su. 10 Yɛ amun fɛ i bue kun sie i bua ba yasua nso’m be su kunngunngun. 11 Asa ekun’n, amun fa boli ba yasua kun fa yi sa tɛ’n i ti tɛ’n. Kɛ ɔ́ yó sɔ’n nn amun a yi sa tɛ’n i ti tɛ nga amun yi naan y’a siesie e afiɛn’n,+ ɔ nin tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, ɔ nin i su ble annzɛ i wunsu like ng’ɔ fata kɛ amun fa man’n, ɔ nin nzan ng’ɔ fata kɛ amun fa sie su’n.

12 Anglo nso su’n, i cɛn ba blu-nin-nnun’n (15) su’n, amun yia naan amun su min. Nán amun di junman kekle wie fi. Yɛ amun di cɛn fa manman Zoova lele cɛn ba nso.+ 13 Amun fa nannin ba nga be ti yasua’n blu-nin-nsan (13), nin bua ɲin nɲɔn, nin bua ba yasua blu-nin-nnan (14) mɔ b’a di afuɛ kun’n, naan amun fa yi tɛ nga kɛ bé yí’n be yra nnɛn’n i kɔlikɔli’n+ naan ɔ bɔn Zoova i bue nun fannin. Nán maan lɛ fi tran nnɛn sɔ’m be wun.+ 14 Kɛ amún yí tɛ sɔ’n, amun fa ble annzɛ i wunsu like i sanmlɛn mlɛnnɛnnɛn kpa mɔ be sɛnngɛnnin i nin ngo’n be sie su. Yɛle kɛ amun bubu sanmlɛn sɔ’n i efa kun nun blu naan amun fɛ i bue nsan sie nannin blu-nin-nsan mun (13) be su kunngunngun, yɛ amun fɛ i bue nɲɔn sie bua ɲin nɲɔn’m be su kunngunngun. 15 Yɛ amun fɛ i bue kun sie i bua ba yasua blu-nin-nnan mun (14) be su kunngunngun. 16 Asa ekun’n, amun fa boli ba kun yi sa tɛ’n i ti tɛ’n. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

17 “‘Cɛn ba nɲɔn’n su’n, amun fa nannin ba yasua blu-nin-nɲɔn (12), nin bua ɲin nɲɔn, nin bua ba yasua blu-nin-nnan (14) mɔ b’a di afuɛ kun’n. Nán maan lɛ fi tran nnɛn sɔ’m be wun.+ 18 Yɛ amun fa ble annzɛ i wunsu like ɔ nin nzan ng’ɔ fata kɛ amun fa sie nannin mun, nin bua ɲin mun, ɔ nin bua ba yasua’m be su’n. Amun nian kɛ be nuan fa ti’n su naan amun yo i kɛ nga n kleli amun’n sa. 19 Asa ekun’n, amun fa boli ba kun fa yi sa tɛ’n i ti tɛ’n. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

20 “‘Cɛn ba nsan’n su’n, amun fa nannin yasua blu-nin-kun (11), nin bua ɲin nɲɔn, nin bua ba yasua blu-nin-nnan (14) mɔ b’a di afuɛ kun’n. Nán maan lɛ fi tran nnɛn sɔ’m be wun.+ 21 Yɛ amun fa ble annzɛ i wunsu like ɔ nin nzan ng’ɔ fata kɛ amun fa sie nannin mun, nin bua ɲin mun, ɔ nin bua ba yasua’m be su’n. Amun nian kɛ be nuan fa ti’n su naan amun yo i kɛ nga n kleli amun’n sa. 22 Asa ekun’n, amun fa boli kpakpuɛ kun fa yi sa tɛ’n i ti tɛ. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

23 “‘Cɛn ba nnan’n su’n, amun fa nannin yasua blu, nin bua ɲin nɲɔn, nin bua ba yasua blu-nin-nnan (14) mɔ b’a di afuɛ kun’n. Nán maan lɛ fi tran nnɛn sɔ’m be wun.+ 24 Yɛ amun fa ble annzɛ i wunsu like ɔ nin nzan ng’ɔ fata kɛ amun fa sie nannin mun, nin bua ɲin mun, ɔ nin bua ba yasua’m be su’n. Amun nian kɛ be nuan fa ti’n su naan amun yo i kɛ nga n kleli amun’n sa. 25 Asa ekun’n, amun fa boli ba kun fa yi sa tɛ’n i ti tɛ. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

26 “‘Cɛn ba nnun’n su’n, amun fa nannin yasua ngwlan, nin bua ɲin nɲɔn, nin bua ba yasua blu-nin-nnan (14) mɔ b’a di afuɛ kun’n. Nán maan lɛ fi tran nnɛn sɔ’m be wun.+ 27 Yɛ amun fa ble annzɛ i wunsu like ɔ nin nzan ng’ɔ fata kɛ amun fa sie nannin mun, nin bua ɲin mun, ɔ nin bua ba yasua’m be su’n. Amun nian kɛ be nuan fa ti’n su naan amun yo i kɛ nga n kleli amun’n sa. 28 Asa ekun’n, amun fa boli kpakpuɛ kun fa yi sa tɛ’n i ti tɛ. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

29 “‘Cɛn ba nsiɛn’n su’n, amun fa nannin yasua mɔcuɛ, nin bua ɲin nɲɔn, nin bua ba yasua blu-nin-nnan (14) mɔ b’a di afuɛ kun’n. Nán maan lɛ fi tran nnɛn sɔ’m be wun.+ 30 Yɛ amun fa ble annzɛ i wunsu like ɔ nin nzan ng’ɔ fata kɛ amun fa sie nannin mun, nin bua ɲin mun, ɔ nin bua ba yasua’m be su’n. Amun nian kɛ be nuan fa ti’n su naan amun yo i kɛ nga n kleli amun’n sa. 31 Asa ekun’n, amun fa boli kpakpuɛ kun fa yi sa tɛ’n i ti tɛ. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

32 “‘Cɛn ba nso’n su’n, amun fa nannin yasua nso, nin bua ɲin nɲɔn, nin bua ba yasua blu-nin-nnan (14) mɔ b’a di afuɛ kun’n. Nán maan lɛ fi tran nnɛn sɔ’m be wun.+ 33 Yɛ amun fa ble annzɛ i wunsu like ɔ nin nzan ng’ɔ fata kɛ amun fa sie nannin mun, nin bua ɲin mun, ɔ nin bua ba yasua’m be su’n. Amun nian kɛ be nuan fa ti’n su naan amun yo i kɛ nga n kleli amun’n sa. 34 Asa ekun’n, amun fa boli kpakpuɛ kun fa yi sa tɛ’n i ti tɛ. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

35 “‘Cɛn ba mɔcuɛ’n su’n, amun yo aɲia ngunmin kun. Nán amun di junman kekle wie fi.+ 36 Amun fa nannin yasua kun, nin bua ɲin kun, nin bua ba yasua nso mɔ b’a di afuɛ kun’n, naan amun fa yi tɛ nga kɛ bé yí’n be yra nnɛn’n i kɔlikɔli’n naan ɔ bɔn Zoova i bue nun fannin. Nán maan lɛ fi tran nnɛn sɔ’m be wun.+ 37 Yɛ amun fa ble annzɛ i wunsu like ɔ nin nzan ng’ɔ fata kɛ amun fa sie nannin’n, nin bua ɲin’n, ɔ nin bua ba yasua’m be su’n. Amun nian kɛ be nuan fa ti’n su naan amun yo i kɛ nga n kleli amun’n sa. 38 Asa ekun’n, amun fa boli kpakpuɛ kun fa yi sa tɛ’n i ti tɛ. Kɛ ɔ́ yó sɔ’n, nn amun a yi tɛ nga kɛ bé yí’n be yra nnɛn’n i kɔlikɔli’n m’ɔ fata kɛ amun yi i titi’n, mɔ amun fa ble annzɛ i wunsu like ɔ nin nzan be sie su’n.+

39 “‘Amun cɛn’m be dilɛ blɛ’m be nun’n, amun fa ninnge sɔ mun man Zoova.+ Ninnge ng’ɔ fata kɛ amun fa man ekun’n, be yɛle ninnge nga amun tali nda kɛ amún fá mán’n,+ nin ninnge nga amun bɔbɔ amun klo kɛ amún fá mán’n,+ ɔ nin tɛ nga kɛ bé yí’n be yra nnɛn’n i kɔlikɔli’n,+ ɔ nin ble nin i wunsu like mɔ be fa man’n,+ ɔ nin nzan nga be fa man’n,+ ɔ nin bo kun yolɛ tɛ mun.’”+ 40 Mmla nga Zoova fa mannin Moizi’n, Moizi kɛnnin i kwlaa kleli Izraɛlifuɛ mun.

30 Moizi kannin ndɛ kleli Izraɛlifuɛ’m be akpasua’m be su kpɛn mun.+ Ɔ seli kɛ: “Mmla nga Zoova mannin’n yɛ: 2 Sɛ yasua kun ta Zoova i nda+ kɛ ɔ́ yó like wie mɛ́n i’n, annzɛ kusu ɔ fin i bɔbɔ i nuan fiteli kɛ ɔ su yoman like kun’n,+ nán maan ɔ kaci i nuan.+ Ɔ fata kɛ ɔ yia nda kwlaa ng’ɔ tali’n i nuan.+

3 “Sɛ talua kun m’ɔ te o i si i awlo se Zoova kɛ ɔ́ yó like wie mɛ́n i’n, annzɛ kusu ɔ ta nda se kɛ ɔ su yoman like kun’n, 4 naan i si ti i kɛ i wa’n tali nda annzɛ kusu ɔ fin i wa’n bɔbɔ i nuan fiteli kɛ ɔ su yoman like wie’n, naan i si w’a kanman ndɛ fi’n, maan talua’n yia nda ng’ɔ tali’n i nuan. Yɛ nán maan ɔ yo like kwlaa ng’ɔ seli kɛ ɔ su yoman’n be nun wie fi. 5 Sanngɛ sɛ i si ti i kɛ i wa’n tali nda annzɛ ɔ fin i wa’n bɔbɔ i nuan fiteli kɛ ɔ su yoman like wie’n naan i si waan ɔ kplinman su’n, ɔ fataman kɛ ɔ yiɛ i nuan. Zoova yáci cɛ́ i, afin i si’n yɛ w’a kplinman su-ɔ.+

6 “Sanngɛ sɛ talua’n ko ja bian naan ɔ fata kɛ ɔ yia nda ng’ɔ tali’n i nuan, annzɛ ɔ yia ndɛ mɔ w’a bumɛn i sin m’ɔ kannin’n i nuan’n, 7 cɛn nga i wun ti i kɛ i yi’n tali nda annzɛ kusu ɔ fin i yi’n bɔbɔ i nuan fiteli kɛ ɔ su yoman like wie’n, sɛ w’a kanman ndɛ fi’n, maan talua’n yia nda ng’ɔ tali’n i nuan. Yɛ nán maan ɔ yo like kwlaa ng’ɔ seli kɛ ɔ su yoman’n be nun wie fi. 8 Sanngɛ cɛn nga bian’n ti i kɛ i yi’n tali nda annzɛ ɔ fin i yi’n bɔbɔ i nuan fiteli kɛ ɔ su yoman like wie’n, kusu nn w’a bumɛn i sin kpa’n, ɔ kwla se kɛ nán maan i yi’n yiɛ i nuan.+ I lɛ nun’n, Zoova yáci cɛ́ talua’n.

9 “Sanngɛ sɛ ɔ fin angbeti bla kun annzɛ bla kun mɔ i wun’n yrɛli i’n i nuan fite kɛ ɔ́ yó like wie’n, maan ɔ yo like kwlaa ng’ɔ tali nda kɛ ɔ́ yó’n.

10 “Sanngɛ sɛ bla kun ta nda annzɛ ɔ fin i nuan fite kɛ ɔ su yoman like wie, kusu nn ɔ o bian bo’n, 11 naan i wun’n tili sanngɛ w’a kanman ndɛ fi annzɛ w’a seman kɛ ɔ kplinman su’n, maan bla’n yia nda ng’ɔ tali’n i nuan. Yɛ nán maan ɔ yo like kwlaa ng’ɔ seli kɛ ɔ su yoman’n be nun wie fi. 12 Sanngɛ cɛn nga bian’n ti i kɛ i yi’n tali nda annzɛ ɔ fin i yi’n bɔbɔ i nuan fiteli kɛ ɔ su yoman like wie’n naan bian’n tannin bla’n kɛ ɔ yiɛ i nuan’n, ɔ fataman kɛ ɔ yiɛ i nuan.+ Zoova yáci cɛ́ i, afin i wun’n yɛ ɔ tanninnin i kɛ ɔ yiɛ i nuan-ɔn. 13 Kɛ bla kun ta nda’n, annzɛ ndɛ wie fin i nuan fite kɛ ɔ su yoman like kun’n, sɛ i wun’n klo’n, ɔ kwla mɛn i atin. Sɛ ɔ klo kusu’n, ɔ kwla se kɛ ɔ mɛnmɛn i atin kɛ ɔ yiɛ i nuan. 14 Sanngɛ sɛ ɔ ta nda naan kɛ cɛn’m bé sín’n, i wun’n kanman ndɛ fi’n, i sɔ’n kle kɛ ɔ mɛnnin i atin kɛ ɔ yia nda ng’ɔ tali be’n be nuan, annzɛ nán maan ɔ yo like kwlaa ng’ɔ seli kɛ ɔ su yoman’n be nun wie fi. I wun’n yɛ ɔ mɛnnin i sɔ yolɛ’n i wun atin-ɔn. Afin kɛ ɔ tili’n w’a kanman ndɛ fi. 15 Sanngɛ sɛ cɛn ng’ɔ tili ndɛ’n ɔ sinnin naan kɛ ɔ́ cɛ́ kɔ́’n yɛ ɔ se kɛ ɔ kplinman su’n, ɔ́ fá bla’n i sa tɛ’n i su afɛ’n.+

16 “Yasua nin i yi be afiɛn ndɛ’n, ɔ nin siɛ nin i wa talua m’ɔ te o i awlo’n nun’n be afiɛn ndɛ mɔ Zoova fɛli i su mmla mannin Moizi’n, yɛ ɔ o lɛ-ɔ.”

31 Zoova seli Moizi kɛ: 2 “Tu Izraɛlifuɛ’m be klunngbɔ+ Madianfuɛ’m be su.+ I sin’n, á wá wú kɛ ɔ nannan mun sa.”+

3 I sɔ’n ti’n, Moizi seli sran mun kɛ: “Amun fa alɛ ninnge man amun nun yasua mun naan be nin Madianfuɛ’m be ko kun, naan be tu Zoova i klunngbɔ Madianfuɛ’m be su. 4 Amun fa sran akpi kun (1.000) Izraɛli akpasua’m be kwlaa be nun kunngunngun naan be di sonja.” 5 Kɛ ɔ yoli sɔ’n, be fali sran akpi kun (1.000)+ Izraɛli akpasua’m be nun kunngunngun. Ɔ maan sran akpiakpi blu-nin-nɲɔn (12.000) yɛ be mannin be alɛ ninnge mun naan be kun alɛ-ɔ.*

6 I sin’n, Moizi mannin sran akpi kun (1.000) mɔ be fali be akpasua’m be nun kunngunngun’n be atin naan be wɔ. Be nin Eleazaa m’ɔ ti Ɲanmiɛn ɲrun jranfuɛ i wa Fineasi+ yɛ be ɔli-ɔ. I yɛ ɔ sua ninnge nga be fa su Ɲanmiɛn’n nin awɛ nga be bo’n niɔn.+ 7 Be nin Madianfuɛ’m be kunnin kɛ nga Zoova seli Moizi kɛ be yo’n sa. Be kunnin yasua’m be kwlakwla. 8 Asa ekun’n, be kunnin Madianfuɛ’m be famiɛn mun. Famiɛn sɔ mun yɛle Evi, nin Rekɛmun, nin Zii, nin Ur, ɔ nin Reba. Be sran nnun’n, be ti Madianfuɛ’m be famiɛn. Be fali tokofi be kunnin Balaamun+ m’ɔ ti Beɔɔ i wa’n wie. 9 Sanngɛ Madianfuɛ’m be yi nin be mma’m be liɛ’n, be trali be ɔli. Kpɛkun be fali be bua nin be boli mun nin be nannin’m be ngba. Yɛ be fɛnnin be bo ninnge kwlaa. 10 Be wɔli be klɔ dandan nga be wa trannin be su’n ɔ nin be nanmue’m be kwlaa be nun. 11 Ninnge nga be ɲɛnnin i’n, i sran-o, i nnɛn-o, be fɛli i kwlaa ɔli. 12 Be fali sran nga be trali be’n ɔ nin ninnge nga be ɲɛnnin i’n be ɔli Moizi nin Ɲanmiɛn ɲrun jranfuɛ Eleazaa ɔ nin Izraɛlifuɛ’m be kwlaa be sin. Kɛ ɔ́ yó sɔ’n, nn b’a bo be nanmue Moabu aawlɛ flɛnnɛn’n nun,+ Zurdɛn’n i ɲrun lɛ, Zeriko i wun lɛ.

13 Moizi nin Ɲanmiɛn ɲrun jranfuɛ Eleazaa ɔ nin Izraɛlifuɛ’m be su kpɛn’m be ko kpali be atin nanmue’n i sin lɔ. 14 Moizi fali sran nga be sieli be sonja’m be su kpɛn’n, mɔ be ti sran akpi su kpɛn’n nin sran ya su kpɛn mɔ be fin alɛ kunlɛ be bali’n, be wun ya dan kpa. 15 Moizi seli be kɛ: “?Amun yacili bla’m be ngba be lɛ, amun a kunman be? 16 Amun nian! Be yɛ Peɔɔ ndɛ’n nun’n,+ be fali Balaamun i nuan ndɛ’n su mɔ be lakali Izraɛlifuɛ mun maan be nin Zoova b’a nantiman klanman’n+ niɔn. Ɔ maan ɲrɛnnɛn’n tɔli Zoova i sran’m be su.+ 17 I sɔ’n ti’n, amun kun ba yasua mun nin bla nga be nin yasua b’a si sua’n be kwlaa. 18 Sanngɛ ba bla nga be nin yasua nin-a siman sua le’n, amun yaci be lɛ.+ 19 Kpɛkun amun tran nanmue’n i sin lɔ cɛn ba nso. Sɛ amun bɔbɔ annzɛ be nga amun trali be bali’n, be nun kun kunnin sran annzɛ ɔ kannin saka’n,+ maan i sɔfuɛ’n kplo i wun fiɛn+ cɛn ba nsan’n su ɔ nin cɛn ba nso’n su. 20 Asa ekun’n, amun yo tralɛ mun nin ninnge nga be fali nnɛn kplo annzɛ boli ndrɛ annzɛ waka yɛ be yoli’n, be kwlaa be sanwun.”

21 Ɲanmiɛn ɲrun jranfuɛ Eleazaa seli yasua nga be fin alɛ kunlɛ bali’n be kɛ: “Mmla nga Zoova fa mannin Moizi’n yɛ: 22 ‘Amun fa sika ɔkwlɛ nin sika nin aaba nin blalɛ nin etɛn nin sunmun be ngunmin cɛ, 23 ɔ nin ninnge kwlaa nga be kwlá yraman’n, amun to be yi i sin’n nun naan be yo sanwun. I sin’n, amun fa nzue nga be fa kplo be wun fiɛn’n yo be sanwun wie.+ Ninnge kwlaa nga be kwla yra’n, amun fa nzue’n yo be sanwun. 24 Cɛn ba nso’n su’n, amun kpu amun tralɛ mun. I liɛ’n, amún yó sanwun. Ɔ maan amun kwla tran nanmue’n nun.’”+

25 I sin’n, Zoova seli Moizi kɛ: 26 “Ka nnɛn nin sran nga be trali be bali’n naan amun si be nuan. A nin min ɲrun jranfuɛ Eleazaa ɔ nin Izraɛlifuɛ’m be si’m be awlobo’n be su kpɛn mun yɛ amun di junman sɔ’n niɔn. 27 Bu ninnge nga amun ɲannin be’n be nun nɲɔn naan be nga be ko kunnin alɛ’n be fa bue kun. Kpɛkun maan Izraɛlifuɛ’m be onga’m be fa bue kun.+ 28 Sonja nga be ko kunnin alɛ’n, ninnge nga be ɲɛnnin i nun’n, maan be yi Zoova liɛ be mɛn i. Sɛ sran-o, annzɛ nannin-o, annzɛ aflunmun-o, annzɛ boli-o, annzɛ bua-o, kɛ be fa ya nnun’n (500), maan be yi kun man naan ɔ yo Ɲanmiɛn liɛ. 29 Niɛn i bue nga sonja’m be ɲɛnnin i’n nun naan yi Zoova liɛ’n fa man min ɲrun jranfuɛ Eleazaa.+ 30 Niɛn i bue nga Izraɛlifuɛ’m be ɲɛnnin i’n nun naan yi Levifuɛ mɔ be nian Zoova i tannin sua’n i lika’n,+ be liɛ man be.+ Sɛ sran-o, annzɛ nannin-o, annzɛ aflunmun-o, annzɛ boli-o, annzɛ bua-o, annzɛ klɔ nnɛn wafa uflɛ-o, kɛ be fa ablenun’n (50), maan be yi kun man be.”

31 Like nga Zoova seli Moizi kɛ ɔ yo’n, Moizi nin Ɲanmiɛn ɲrun jranfuɛ Eleazaa be niɛnnin i kwlaa su yoli. 32 Ninnge onga nga alɛ kunfuɛ’m be fa bali’n, ɔ ti bua nin boli akpiakpi ya nsiɛn akpiakpi ableso-nin-nnun (675.000), 33 nannin akpiakpi ableso-nin-nɲɔn (72.000), 34 aflunmun akpiakpi ablesiɛn-nin-kun (61.000). 35 Bla nga be trali be bali mɔ be nin yasua nin-a siman sua le’n,+ be ti akpiakpi ablasan-nin-nɲɔn (32.000). 36 Kɛ be cɛcɛli bua nin boli’m be nun’n, alɛ kunfuɛ’m be liɛ nga be ɲɛnnin i’n ti akpiakpi ya nsan akpiakpi ablasan-nin-nso ɔ nin ya nnun (337.500). 37 Yɛ boli nin bua nga be fa mannin naan ɔ yo Zoova liɛ’n, be ti ya nsiɛn ableso-nin-nnun (675). 38 Be nannin liɛ nga be ɲɛnnin i’n ti akpiakpi ablasan-nin-nsiɛn (36.000), yɛ nga be fa mannin naan ɔ yo Zoova liɛ’n ti ableso-nin-nɲɔn (72). 39 Be aflunmun liɛ nga be ɲɛnnin i’n ti akpiakpi ablasan ɔ nin ya nnun (30.500), yɛ nga be fa mannin naan ɔ yo Zoova liɛ’n ti ablesiɛn-nin-kun (61). 40 Be sran liɛ nga be ɲɛnnin i’n ti akpiakpi blu-nin-nsiɛn (16.000), yɛ nga be fa mannin naan ɔ yo Zoova liɛ’n ti ablasan-nin-nɲɔn (32). 41 I sin’n, ninnge nga be mannin naan ɔ yo Zoova liɛ’n, Moizi fa wlali Ɲanmiɛn ɲrun jranfuɛ Eleazaa sa nun+ kɛ nga Zoova seli i kɛ ɔ yo’n sa.

42 Kɛ Moizi buli ninnge nga alɛ kunfuɛ’m be fa bali’n nun’n, m’ɔ mannin be liɛ’n, ɔ fɛli i bue kun mannin Izraɛlifuɛ mun. 43 Be liɛ nga be ɲɛnnin i’n ti bua nin boli akpiakpi ya nsan akpiakpi ablasan-nin-nso ɔ nin ya nnun (337.500), 44 nannin akpiakpi ablasan-nin-nsiɛn (36.000), 45 aflunmun akpiakpi ablasan ɔ nin ya nnun (30.500), 46 sran akpiakpi blu-nin-nsiɛn (16.000). 47 Moizi niannin i bue nga Izraɛlifuɛ’m be ɲɛnnin i’n nun naan w’a yi Levifuɛ mɔ be nian Zoova i tannin sua’n i lika’n,+ be liɛ w’a man be+ kɛ nga Zoova seli i kɛ ɔ yo’n sa. Sɛ sran-o, annzɛ nnɛn-o, kɛ be fa ablenun’n (50), ɔ yili kun mannin Levifuɛ mun.

48 I sin’n, sonja’m be su kpɛnngbɛn mun mɔ be ti sran akpi su kpɛn’n+ ɔ nin sran ya su kpɛn’n, be wa toli Moizi. 49 Kpɛkun be seli Moizi kɛ: “E mɔ e ti ɔ sufuɛ’n, e kali e sran nga be ɔli alɛ kunlɛ’n. Yɛ ba kun sa w’a tuman nun.+ 50 I sɔ’n ti’n, e tinuntinun e waan é fá like nga e ɲɛnnin i’n é mán Zoova: Sika ɔkwlɛ ninnge mun, nin be ja kɔmin nun ɲanman mun, nin be sa kɔmin nun ɲanman mun, nin be sa nga mɔ be fa sie ninnge’m be nzɔliɛ’n, nin asunmanndi mun, ɔ nin njuaba wie mun ekun. E waan é fá mán Zoova naan e nin i e siesie e afiɛn.”

51 Moizi nin Ɲanmiɛn ɲrun jranfuɛ Eleazaa be sɔli sika ɔkwlɛ ninnge mun nin njuaba sɔ’m be kwlaa nun. 52 Sika ɔkwlɛ ninnge nga sran akpi su kpɛn mun ɔ nin sran ya su kpɛn’m be fa mannin Zoova’n, i kwlaa’n yoli sikli akpiakpi blu-nin-nsiɛn nin ya nso ablenun (16.750).* 53 Kɛ sonja’m be ɔli alɛ kunlɛ’n, be tinuntinun be fali like lɔ bali. 54 Moizi nin Ɲanmiɛn ɲrun jranfuɛ Eleazaa be sɔli sika ɔkwlɛ nga sran akpi su kpɛn mun ɔ nin sran ya su kpɛn’m be fa mannin’n nun. Kpɛkun be fa ko sieli i tannin sua mɔ Ɲanmiɛn yi i wun nglo nun’n i nun naan Izraɛlifuɛ’m be wla kpɛn like nga Zoova yo mannin be’n su.*

32 Ribɛnin i mma mun+ nin Gadi i mma’m+ be le nnɛn kpanngban kpa. Be wunnin kɛ Zazɛɛ lɔ lika’n+ nin Galaadi lɔ lika’n be ti nnɛn tawlɛ klanman kpa. 2 I sɔ’n ti’n, Ribɛnin i mma mun nin Gadi i mma’m be wa toli Moizi nin Ɲanmiɛn ɲrun jranfuɛ Eleazaa ɔ nin Izraɛlifuɛ’m be su kpɛn mun. Be seli be kɛ: 3 “Lika nga be o Atarɔti, nin Dibɔn, nin Zazɛɛ, nin Nimra, nin Ɛsbɔn,+ nin Eleale, nin Sebamun, nin Nebo+ ɔ nin Beɔn+ be asa’n su’n, 4 mɔ Zoova kwlali lɔfuɛ mun fa mannin Izraɛlifuɛ mun’n,+ ɔ ti nnɛn tawlɛ klanman. Kusu ɔ sufuɛ’m be le nnɛn kpanngban kpa.”+ 5 Be seli ekun kɛ: “Sɛ ɔ ti ɔ klun su’n, fa lika sɔ’n man ɔ sufuɛ mun naan be tran nun. Nán fa e kpɛ Zurdɛn’n.”

6 Moizi seli Ribɛnin i mma mun nin Gadi i mma’m be kɛ: “?Amun niaan’m be su kɔ alɛ kunlɛ, kpɛkun amun liɛ’n amún ká wa? 7 Amun kunndɛ kɛ amún búbú Izraɛlifuɛ’m be sa sin naan nán be kpɛ Zurdɛn’n be ko fa mɛn nga Zoova su wa fa man be’n. ?Ngue ti yɛ amun yo sɔ-ɔ? 8 I nun mɔ n sunmannin amun si mun Kadɛsi-Baanea lɛ naan be ko nian mɛn’n, sa kunngba sɔ’n yɛ be yoli-ɔ.+ 9 Kɛ be juli Ɛskɔlu kongo’n nun+ lɛ mɔ be wunnin mɛn nga Zoova su wa fa man be’n, be bubuli Izraɛlifuɛ’m be sa sin kɛ nán maan be wɔ lɔ.+ 10 Cɛn sɔ’n nun’n, Zoova fali be wun ya dan kpa. I sɔ’n ti’n, ɔ tali nda seli kɛ:+ 11 ‘Sran nga be fin Ezipti lɔ fiteli mɔ be le afuɛ ablaɔn (20) annzɛ afuɛ ablaɔn tra su’n, be su wunman mɛn+ nga n tali Abraamun nin Izaaki ɔ nin Zakɔbu+ be nda kɛ ń fá mán be’n. Afin b’a tuman be klun b’a faman min ndɛ’n su. 12 Zefine m’ɔ ti Kenizifuɛ’n i wa Kalɛbu+ nin Zozie+ m’ɔ ti Nɛn i wa’n be ngunmin cɛ yɛ bé wún mɛn sɔ’n niɔn. Afin be liɛ’n, be tuli be klun be fali Zoova i ndɛ’n su.’+ 13 I sɔ’n ti’n, Zoova fali Izraɛlifuɛ’m be wun ya dan kpa. Yɛ ɔ fa be wlannin sa daan aawlɛ flɛnnɛn’n nun lele afuɛ ablanan (40).+ Ɔ maan be kwlaa nga be yoli sa tɛ Zoova ɲrun blɛ sɔ’n nun’n, be wuli sekeseke.+ 14 Siɛn’n, amun si’m be ajalɛ nun yɛ amun a sin-ɔn. Sa tɛ yofuɛ kɛ amun sa’n, amun su wa yo maan Zoova fa Izraɛlifuɛ’m be wun ya dan kpa ekun. 15 Sɛ amun yaci i su sulɛ’n, i kusu yáci Izraɛlifuɛ mun aawlɛ flɛnnɛn’n nun. Kpɛkun amun dunman nun ti’n, sran nga’m bé liɛ’n wíe mlɔnmlɔnmlɔn.”

16 I sin’n, be wa seli Moizi kɛ: “Man e atin naan e fa yɔbuɛ e sisi e nnɛn’m be wun kuku, yɛ e kplan klɔ mun naan e mma’m be tran nun. 17 É trá e alɛ ninnge’m be nun titi naan y’a kwla kun alɛ.+ Yɛ é dún mmua Izraɛlifuɛ’m be ɲrun. É yó sɔ lele naan y’a fa be y’a wlu be lika liɛ’n nun. Kɛ ɔ́ yó sɔ’n, nn e mma’m be o klɔ nga be sisili be wun’n nun. Ɔ maan mɛn nga nunfuɛ fi su kleman be yalɛ. 18 Sɛ Izraɛlifuɛ’m be tinuntinun be nin-a ɲanman asiɛ nin-a tranman su’n, e nin-a saman e sin.+ 19 E su ɲanman aja like be wun lɔ, Zurdɛn’n i sin lɔ. Afin e aja like liɛ’n wo Zurdɛn’n i wia afiliɛ wa.”+

20 Moizi tɛli be su kɛ: “Sɛ amun yo nga’n, yɛle kɛ sɛ amun fa alɛ ninnge mun Zoova ɲrun naan amun kɔ alɛ kunlɛ’n,+ 21 sɛ amun tinuntinun amun fa alɛ ninnge mun naan amun kpɛ Zurdɛn’n Zoova ɲrun’n, kɛ ɔ ko fuɛn i kpɔfuɛ mun i ɲrun’n,+ 22 mɔ Zoova ɲrun’n mɛn’n w’a yo amun liɛ siɛn’n,+ amun kwla sa amun sin.+ Yɛ Zoova nin Izraɛlifuɛ’m be su manman amun ndɛ. Kpɛkun lika nga káci amun liɛ mlɔnmlɔn Zoova ɲrun.+ 23 Sanngɛ sɛ amun a yoman sɔ’n, nn amun a fɔn Zoova wun. Maan amun wun i wlɛ kusu kɛ amún wún amun sa tɛ’n i su afɛ’n. 24 I sɔ’n ti’n, amun kplan klɔ mun naan amun mma’m be tran su, yɛ amun sisi kuku man amun nnɛn mun.+ Sanngɛ amun yia ndɛ nga amun kannin’n i nuan.”

25 Gadi i mma mun nin Ribɛnin i mma’m be tɛli Moizi su kɛ: “Ɔ sufuɛ’m bé yó kɛ nga e min’n kannin’n sa sɛsɛsɛ. 26 E mma mun, nin e yi mun, nin e nannin mun, nin e bua mun ɔ nin e boli mun bé ká Galaadi klɔ’m be su wa.+ 27 Sanngɛ ɔ sufuɛ’m bé kpɛ́ Zurdɛn’n. Yasua’m be kwlaa bé fá be alɛ ninnge mun naan bé kó kún alɛ Zoova ɲrun,+ kɛ nga e min’n fa kannin’n sa.”

28 Ɔ maan Moizi kannin ndɛ kleli Ɲanmiɛn ɲrun jranfuɛ Eleazaa, nin Zozie m’ɔ ti Nɛn i wa’n ɔ nin Izraɛlifuɛ’m be akpasua’m be su kpɛnngbɛn mun. 29 Moizi seli be kɛ: “Sɛ Gadi i mma mun nin Ribɛnin i mma’m be nin amun kpɛ Zurdɛn’n, naan be fa be alɛ ninnge mun be ko kun alɛ Zoova ɲrun naan amun fa mɛn’n, maan amun fa Galaadi lɔ lika’n man be naan be tran nun.+ 30 Sanngɛ sɛ b’a faman be alɛ ninnge mun naan be nin amun a kpɛman Zurdɛn’n, bé trán amun afiɛn Kanaan mɛn’n nun.”

31 Gadi i mma mun nin Ribɛnin i mma’m be tɛli su kɛ: “Like nga Zoova seli ɔ sufuɛ mun kɛ be yo’n yɛ é yó-ɔ. 32 É fá alɛ ninnge mun é kpɛ́ Zurdɛn’n Zoova ɲrun, kpɛkun é wlú Kanaan mɛn’n nun.+ Sanngɛ asiɛ nga bé mán e’n, maan ɔ yo Zurdɛn’n i bue nga su wa.” 33 I sɔ’n ti’n, Moizi fali Siɔn m’ɔ ti Amɔɔfuɛ’m be famiɛn’n i famiɛn diwlɛ’n+ mannin Gadi i mma mun, nin Ribɛnin i mma mun+ ɔ nin Manase m’ɔ ti Zozɛfu i wa’n i akpasua’n nunfuɛ’m be bue kun.+ Yɛ ɔ fali Ɔgu m’ɔ ti Basan famiɛn’n i famiɛn diwlɛ’n,+ yɛle kɛ asiɛ nga klɔ’m be o su’n, nin klɔ nga be mantan be lɛ’n mannin be wie.

34 Gadi i mma’m be kplannin Dibɔn,+ nin Atarɔti,+ nin Aroɛɛ,+ nin 35 Atrɔti-Sofan, nin Zazɛɛ,+ nin Zɔgbea,+ nin 36 Bɛti-Nimra+ ɔ nin Bɛti-Aran.+ Be kplannin klɔ mun, kpɛkun be sisili be wun. Yɛ be fali yɔbuɛ sili be nnɛn’m be kuku mun wie. 37 Ribɛnin i mma’m be kplannin Ɛsbɔn,+ nin Eleale,+ nin Kiriataimun,+ nin 38 Nebo+ ɔ nin Baali-Meɔn+ (be kacili klɔ sɔ’m be dunman’n). Asa ekun’n, be kplannin Sibma. Kpɛkun be tɔnnin klɔ nga be kplannin be uflɛ’n be dunman uflɛ.

39 Manase i wa Makii i mma liɛ’m+ be ko utuli Galaadi klɔ’n. Kpɛkun be fali klɔ’n naan b’a fuan Amɔɔfuɛ nga be tran lɔ’n. 40 I sɔ’n ti’n, Moizi fali Galaadi mannin Manase i wa Makii i mma mun. Yɛ be trannin su-ɔ.+ 41 Manase i wa Zairi kusu ko utuli be klɔ mɔ be ti tannin sua ngunmin’n naan w’a fa be. Kpɛkun ɔ tɔnnin be dunman kɛ Avɔti-Zairi.*+ 42 Noba liɛ’n, ɔ ko utuli Kenati nin klɔ nga be mantan lɛ’n naan w’a fa be. Kpɛkun ɔ fɛli i bɔbɔ dunman mɔ yɛle Noba’n sieli klɔ’n su.

33 Kɛ Izraɛlifuɛ’m be fin Ezipti lɔ fiteli’n,+ be ɔli akpasuaakpasua.+ Moizi nin Aarɔn yɛ be dun be ɲrun-ɔn.+ Lika nga be sinnin be nun’n yɛ. 2 Moizi klɛli lika nga be sinnin be nun’n be dunman. Zoova yɛ ɔ seli i kɛ ɔ yo sɔ-ɔ. Lika kunngunngun nga be sinnin be nun’n be yɛ:+ 3 Anglo klikli’n i cɛn ba blu-nin-nnun’n (15) su’n,+ be jasoli Ramunsɛsi lɔ.+ Kɛ be dili Delɛ Cɛn mɔ lika’n cɛnnin’n,+ be jasoli lɔ Eziptifuɛ’m be kwlaa be ɲrun. Srɛ w’a kunman be.* 4 Kɛ ɔ́ yó sɔ’n, nn Eziptifuɛ’m be su sie be mma klikli mɔ Zoova kunnin be’n.+ Afin Zoova dili be amuin’m be jɔlɛ, yɛ ɔ kleli be ɲrɛnnɛn.+

5 Ɔ maan kɛ Izraɛlifuɛ’m be jasoli Ramunsɛsi lɔ’n, be ko boli be nanmue Sukɔtu.+ 6 Kɛ be fɛli i Sukɔtu lɛ’n, be ko boli be nanmue Etamun.+ Lika sɔ’n wo aawlɛ flɛnnɛn’n i nuan lɛ. 7 I sin’n, kɛ be fɛli i Etamun lɛ’n, be bli ɔli Piairɔtu. Lika sɔ’n wo Baali-Zefɔn+ i ɲrun lɛ. Kpɛkun be ko boli be nanmue Migidɔlu+ i ɲrun lɛ. 8 I sin’n, be jasoli Piairɔtu lɛ. Be sinnin jenvie’n i afiɛn+ be ɔli aawlɛ flɛnnɛn’n nun lɔ.+ Kpɛkun be nantili cɛn ba nsan Etamun aawlɛ flɛnnɛn’n nun+ naan b’a ko bo be nanmue Mara lɔ.+

9 I sin’n, be fɛli i Mara lɛ be ɔli Elimun. Kɛ be juli Elimun lɛ’n, be wunnin nzue ti blu-nin-nɲɔn (12) nin nglesia ableso (70). I sɔ’n ti’n, be boli be nanmue lɛ.+ 10 Kɛ be fɛli i Elimun lɛ’n, be ko boli be nanmue Jenvie Ɔkwlɛ’n i nuan lɛ. 11 I sin’n, be tuli be bo Jenvie Ɔkwlɛ’n i nuan lɛ naan b’a ko bo be nanmue Sinin aawlɛ flɛnnɛn’n nun.+ 12 Kɛ be tuli be bo Sinin aawlɛ flɛnnɛn’n nun’n, be ko boli be nanmue Dɔfka. 13 I sin’n, be fɛli i Dɔfka lɛ be ko boli be nanmue Alusi. 14 Kɛ be fɛli i Alusi lɛ’n, be ko boli be nanmue Refidimun.+ Kɛ be juli lɔ’n, b’a ɲanman nzue naan b’a nɔn. 15 I sin’n, be fɛli i Refidimun lɛ naan b’a ko bo be nanmue Sinai aawlɛ flɛnnɛn’n nun.+

16 Kɛ be tuli be bo Sinai aawlɛ flɛnnɛn’n nun’n, be ko boli be nanmue Kibrɔtu-Ataava.+ 17 Kɛ be tuli be bo Kibrɔtu-Ataava lɛ’n, be ko boli be nanmue Azerɔtu.+ 18 Kɛ be fɛli i Azerɔtu lɛ’n, be ko boli be nanmue Ritima. 19 I sin’n, be tuli be bo Ritima lɛ naan b’a ko bo be nanmue Rimɔn-Perɛzi. 20 Kɛ be fɛli i Rimɔn-Perɛzi lɛ’n, be ko boli be nanmue Libina. 21 Kɛ be fɛli i Libina lɛ’n, be ko boli be nanmue Risa. 22 I sin’n, be tuli be bo Risa lɛ naan b’a ko bo be nanmue Keelata. 23 Kɛ be fɛli i Keelata lɛ’n, be ko boli be nanmue Sefɛɛ Oka’n i wun lɛ.

24 I sin’n, be fɛli i Sefɛɛ Oka’n i wun lɛ be ko boli be nanmue Arada. 25 Kɛ be fɛli i Arada lɛ’n, be ko boli be nanmue Makelɔtu. 26 Kɛ be tuli be bo+ Makelɔtu lɛ’n, be ko boli be nanmue Taati. 27 I sin’n be tuli be bo Taati lɛ naan b’a ko bo be nanmue Tera. 28 Kɛ be fɛli i Tera lɛ’n, be ko boli be nanmue Mitika. 29 I sin’n, be fɛli i Mitika lɛ naan b’a ko bo be nanmue Asmona. 30 I sin’n, be tuli be bo Asmona lɛ naan b’a ko bo be nanmue Mɔzerɔtu. 31 Kɛ be fɛli i Mɔzerɔtu lɛ’n, be ko boli be nanmue Bene-Zaakan.+ 32 Kɛ be fɛli i Bene-Zaakan lɛ’n, be ko boli be nanmue Ɔɔ-Agidgadi. 33 Kɛ be tuli be bo Ɔɔ-Agidgadi lɛ’n, be ko boli be nanmue Zɔtubata.+ 34 I sin’n, be fɛli i Zɔtubata lɛ naan b’a ko bo be nanmue Abrona. 35 Kɛ be fɛli i Abrona lɛ’n, be ko boli be nanmue Ɛziɔn-Gebɛɛ.+ 36 Kɛ be fɛli i Ɛziɔn-Gebɛɛ lɛ’n, be ko boli be nanmue Zinin aawlɛ flɛnnɛn’n nun,+ yɛle kɛ Kadɛsi lɔ.

37 I sin’n, be fɛli i Kadɛsi lɛ be ko boli be nanmue Ɔru Oka’n i bo lɛ.+ Lika sɔ’n wo Edɔmun mɛn’n i tiwa su. 38 Zoova seli Aarɔn kɛ ɔ fu Ɔru Oka’n su. Kɛ ɔ fuli su’n, ɔ wuli lɔ. Kɛ be jasoli Ezipti lɔ’n i afuɛ ablanan’n (40) su’n, i anglo nnun su’n, i cɛn ba klikli’n su yɛ ɔ wuli-ɔ.+ 39 Kɛ Aarɔn wú Ɔru Oka’n su’n, nn ɔ le afuɛ ya kun ablaɔn-nin-nsan (123).

40 Aradi lɔ famiɛn’n+ m’ɔ ti Kanaanfuɛ’n, ɔ tran Negɛbu asa’n su lɔ Kanaan mɛn’n nun. Ɔ tili i kɛ Izraɛlifuɛ’m be su ba.

41 I sin’n, be fɛli i Ɔru Oka’n+ i wun lɛ be ko boli be nanmue Zalmona. 42 Kɛ be fɛli i Zalmona lɛ’n, be ko boli be nanmue Punɔn. 43 I sin’n, be fɛli i Punɔn lɛ be ko boli be nanmue Obɔtu.+ 44 Kɛ be fɛli i Obɔtu lɛ’n, be ko boli be nanmue Ize-Abarimun. Lika sɔ’n wo Moabu mɛn’n i tiwa su.+ 45 I sin’n, be fɛli i Imun* lɛ be ko boli be nanmue Dibɔn-Gadi.+ 46 Kɛ be fɛli i Dibɔn-Gadi lɛ’n, be ko boli be nanmue Almɔn-Diblataimun. 47 Kɛ be fɛli i Almɔn-Diblataimun lɛ’n, be ko boli be nanmue Abarimun okaoka’m be nun,+ Nebo i ɲrun lɛ.+ 48 Kpɛkun be tuli be bo Abarimun okaoka’m be nun naan b’a ko bo be nanmue Zeriko i ɲrun lɔ, Zurdɛn’n i nuan lɛ. Lika sɔ’n wo Moabu aawlɛ flɛnnɛn’n nun.+ 49 Be boli be nanmue Moabu aawlɛ flɛnnɛn’n nun Zurdɛn’n i nuan lɛ. Be nanmue’n fɛ i Bɛti-Zesimɔti lele fa ju Abɛli-Sitimun.+

50 Zoova kannin ndɛ kleli Moizi Moabu aawlɛ flɛnnɛn’n nun Zurdɛn’n i nuan lɛ, Zeriko i ɲrun lɛ. Ɔ seli i kɛ: 51 “Se Izraɛlifuɛ’m be kɛ: ‘Amun su wa kpɛ Zurdɛn’n yɛ amún wlú Kanaan mɛn’n nun.+ 52 Amun kan be nga be tran lɔ’n be bo naan be jaso amun ɲrun. Yɛ amun saci be yɔbuɛ nga be takali be mɔ be sɔ be’n,+ ɔ nin be amuin nga be kloli blalɛ yɛ be fa yoli’n.+ Amun nunnun be amuin sɔwlɛ* mun sekeseke.+ 53 Kpɛkun amun fa be mɛn’n naan amun tran nun. Afin ń fá mán amun sakpa naan ɔ kaci amun liɛ.+ 54 Amun tu fɔtɔ naan amun a cɛcɛ asiɛ’n nun+ b’a man amun awloboawlobo mun. Be nga be sran’m be sɔnnin’n, maan lika nga amún fá mán be’n, ɔ yo dan. Be nga be sran’m b’a sɔnman’n, maan lika nga amún fá mán be’n, ɔ yo kaan.+ Lika nga fɔtɔ’n kle’n, yɛ ɔ ti sran kun i aja like liɛ’n niɔn. Kɛ amun si’m be akpasua’m be fa ti’n, i su yɛ bé nían naan amun a ɲan amun aja like’n niɔn.+

55 “‘Sanngɛ sɛ amun a kanman be nga be tran lɔ’n be bo naan b’a jasoman amun ɲrun lɛ’n,+ bé káci kɛ like wie m’ɔ kaka amun ɲinma su’n sa. Yɛ bé káci kɛ owieowie mun sa, bé wɔ́wɔ́ amun nvɛnwun. Kpɛkun bé klé amun yalɛ lelele mɛn nga amún wá trán nun’n nun.+ 56 Ɔ maan like nga m’an fua kɛ ń fá yó be’n, ń fá yó amun bɔbɔ.’”+

34 Zoova seli Moizi ekun kɛ: 2 “Se Izraɛlifuɛ’m be kɛ: ‘Kɛ amún wá kɔ́ Kanaan mɛn’n nun’n,+ mɛn sɔ’n m’ɔ́ wá káci amun aja like’n, i nuan su’n yɛ.+

3 “‘Amun mɛn’n i ngua lɔ lika’n, ɔ bo i bo Zinin aawlɛ flɛnnɛn’n nun, Edɔmun mɛn’n i nuan su lɛ. Yɛ amun mɛn’n i ngua lɔ lika’n i wia afiliɛ lɔ bue liɛ’n su’n, ɔ fɛ i Jenvie ng’ɔ ti Njin Nzue Klakla’n i nuan su lɛ.+ 4 Awɛ’n bli sin kɛ a fu Akrabimun+ i ngua lɔ’n kpɛkun ɔ kɔ lele ju Zinin. Yɛ ɔ nin Kadɛsi-Baanea+ m’ɔ o ngua lɔ’n be yia. Kpɛkun ɔ fu kɔ Azaa-Adaa+ lele ɔ ju Azmɔn. 5 Kɛ ɔ fɛ i Azmɔn lɛ’n, ɔ bli sin Ezipti Kongo’n nun. Kpɛkun i nuan su’n yɛle Jenvie’n.*+

6 “‘Wia atɔliɛ lɔ bue liɛ’n su’n, amun awɛ’n yɛle Jenvie Dan’n* i nuan su’n. Amun mɛn’n i wia atɔliɛ lɔ lika’n i nuan su’n yɛ ɔ o lɛ-ɔ.+

7 “‘Amun mɛn’n i nglo lɔ lika’n i nuan su’n yɛ: Kɛ amun fɛ i Jenvie Dan’n i nuan lɛ’n, amun ja awɛ’n lele fa ju Ɔru Oka’n su lɔ. 8 Kɛ amun fɛ i Ɔru Oka’n su lɛ’n, amun ja awɛ’n lele fa ju Lebo-Amati.*+ Yɛ amun wɔ lele ju Zedadi.+ 9 Kɛ amun fɛ i lɛ ekun’n, amun ja awɛ’n sin Zifrɔn lele fa ju Azaa-Enan.+ Amun mɛn’n i nglo lɔ lika’n i nuan su’n yɛ ɔ o lɛ-ɔ.

10 “‘Wia afiliɛ lɔ bue liɛ’n su’n, kɛ amún já awɛ’n, amun bo i bo Azaa-Enan lɛ lele fa ju Sefamun. 11 Kɛ ɔ fɛ i Sefamun lɛ’n, maan awɛ’n sin Ribla, Ainin i wia afiliɛ lɔ. Maan ɔ jra naan ɔ san kpɔlɛ nga be o Kinerɛti Jenvie’n* i wia afiliɛ lɔ’n.+ 12 Awɛ’n fɛ i lɛ lele ko to Zurdɛn’n, yɛ i nuan su’n yɛle Jenvie ng’ɔ ti Njin Nzue Klakla’n.+ Amun mɛn’n+ nin i nuan su’n yɛ ɔ o lɛ-ɔ.’”

13 Moizi seli Izraɛlifuɛ mun kɛ: “Mɛn ng’ɔ fata kɛ be tu fɔtɔ naan b’a cɛcɛ nun b’a man amun’n, yɛ ɔ o lɛ-ɔ.+ Mɛn sɔ’n yɛ Zoova waan be fa man akpasua ngwlan nin akpasua kun ekun i bue kun nunfuɛ mun-ɔn. 14 Afin Ribɛnin akpasua nunfuɛ mun nin Gadi akpasua nunfuɛ mun ɔ nin Manase akpasua nunfuɛ’m be bue kun b’a dun mmua b’a ɲan be aja like liɛ’n.+ 15 Be akpasua nɲɔn mun nin akpasua kun ekun i bue kun nunfuɛ’m b’a dun mmua b’a ɲan be aja like liɛ’n Zurdɛn i bue kun lɔ, Zeriko i ɲrun lɛ, wia afiliɛ lɔ bue liɛ’n su.”+

16 Zoova seli Moizi ekun kɛ: 17 “Be nga bé wá cɛ́ mɛn’n nun mán amun’n, be dunman mun yɛ: Min ɲrun jranfuɛ Eleazaa+ nin Zozie+ m’ɔ ti Nɛn i wa’n. 18 Akpasua kun nun’n, amun fa kpɛn kun, akpasua kun nun’n, amun fa kpɛnngbɛn kun naan be uka amun naan amun a cɛ mɛn’n m’ɔ ti amun aja like’n nun.+ 19 Sran sɔ’m be dunman mun yɛ: Kalɛbu+ m’ɔ ti Zefine i wa’n, ɔ fin Zida akpasua’n nun,+ 20 Semiɛli m’ɔ ti Amiidi i wa’n, ɔ fin Simeɔn akpasua’n nun,+ 21 Elidadi m’ɔ ti Kislɔn i wa’n, ɔ fin Bɛnzamɛn akpasua’n nun,+ 22 Dan akpasua’n nun’n,+ amun fa kpɛnngbɛn kun. Amun fa Buki m’ɔ ti Zogli i wa’n. 23 Zozɛfu i mma+ mɔ be fin Manase akpasua’n nun’n be nun’n,+ amun fa kpɛnngbɛn kun. Amun fa Aniɛli m’ɔ ti Efɔdu i wa’n. 24 Efraimun akpasua’n nun’n,+ amun fa kpɛnngbɛn kun. Amun fa Kemuɛli m’ɔ ti Siftan i wa’n. 25 Zabilɔn akpasua’n nun’n,+ amun fa kpɛnngbɛn kun. Amun fa Ɛlizafan m’ɔ ti Paanaki i wa’n. 26 Isakaa akpasua’n nun’n,+ amun fa kpɛnngbɛn kun. Amun fa Palitiɛli m’ɔ ti Azan i wa’n. 27 Azɛɛ akpasua’n nun’n,+ amun fa kpɛnngbɛn kun. Amun fa Aiidi m’ɔ ti Selomin i wa’n. 28 Nɛftali akpasua’n nun’n,+ amun fa kpɛnngbɛn kun. Amun fa Pedaɛli m’ɔ ti Amiidi i wa’n.” 29 Be nga Zoova seli be kɛ be cɛ asiɛ’n nun man Izraɛlifuɛ mun Kanaan mɛn nun lɔ’n, be yɛ be o lɛ-ɔ.+

35 Zoova kannin ndɛ kleli Moizi ekun Moabu aawlɛ flɛnnɛn’n nun Zurdɛn’n i nuan lɛ,+ Zeriko i ɲrun lɛ. Ɔ seli i kɛ: 2 “Se Izraɛlifuɛ’m be kɛ be fa be aja like’n i bue man Levifuɛ mun. Yɛle kɛ maan be fa be klɔ’m be nun wie mun man be naan be tran su.+ Yɛ be fa klɔ sɔ’m be sin lɛ nnɛn didiwlɛ mun be man be wie.+ 3 Maan be tran klɔ sɔ’m be su. Yɛ maan be sie be nannin mun nin be bua mun nin be boli mun nin be ninnge mun ɔ nin be nnɛn onga’m be kwlaa lika sɔ’m be nun. 4 Klɔ nga amún fá mán Levifuɛ mun’n i sin lɛ lika nga nnɛn’m bé dídí lɛ’n, kɛ ɔ fɛ i klɔ’n i talɛ’n wun lɛ’n, maan ɔ wɔ lele ju kude akpi kun (1.000).* Amun sunnzun i sɔ bo sin yia klɔ’n. 5 Klɔ’n i sin lɔ’n, wia afiliɛ lɔ’n amun sunnzun kude akpi nɲɔn (2.000), i ngua lɔ’n amun sunnzun kude akpi nɲɔn (2.000), i wia atɔliɛ lɔ’n amun sunnzun kude akpi nɲɔn (2.000), yɛ i nglo lɔ’n amun sunnzun kude akpi nɲɔn (2.000). Maan lika sɔ’n yo nnɛn’m be didiwlɛ, yɛ maan klɔ’n kɛ i afiɛn.

6 “Amun fa fiawlɛ klɔ nsiɛn man Levifuɛ mun.+ I liɛ’n, sran ng’ɔ kun sran’n, ɔ kwla ko fia lɔ.+ Yɛ amun man be klɔ ablanan-nin-nɲɔn (42) ekun. 7 Ɔ maan klɔ kwlaa nga amún fá mán Levifuɛ mun’n, be ti ablanan-nin-mɔcuɛ (48), ɔ nin klɔ sɔ’m be sin lɔ nnɛn didiwlɛ mun.+ 8 Amun fa Izraɛlifuɛ’m be klɔ’m be nun wie mun man be.+ Akpasua nga i nunfuɛ’m be sɔnnin’n, maan be klɔ nga amún fá’n, ɔ sɔn. Yɛ akpasua nga i nunfuɛ’m b’a sɔnman’n, nán maan be klɔ nga amún fá’n, ɔ sɔn.+ Kɛ klɔ nga akpasua kun ɲannin be’n i nuan fa ti’n, i su yɛ ɔ́ nían naan w’a man Levifuɛ’m be liɛ-ɔ.”

9 Zoova seli Moizi ekun kɛ: 10 “Se Izraɛlifuɛ’m be kɛ: ‘Amun su wa kpɛ Zurdɛn’n naan amún wlú Kanaan mɛn’n nun.+ 11 Amun fa klɔ wie mun mɔ be su kɔlɛ su yoman kekle manman amun’n be fa yo fiawlɛ klɔ. I liɛ’n, sran ng’ɔ kun sran’n, mɔ nɛ́n i ɲinfu yɛ ɔ yoli sɔ’n, ɔ kwla wanndi kɔ lɔ.+ 12 Klɔ sɔ’m bé yó amun fiawlɛ klɔ, sran nga be kunnin i’n i fuɛ nga i waan ɔ́ tú i klunngbɔ*+ i dunman nun ti. I liɛ’n, sran kunfuɛ’n su wuman ka naan b’a di i jɔlɛ nzrafuɛ’m be ɲrun.+ 13 Like nga ti yɛ ɔ fata kɛ amun kpa fiawlɛ klɔ nsiɛn sɔ mun’n yɛ ɔ o lɛ-ɔ. 14 Zurdɛn’n i bue nga su’n, amun fa klɔ nsan,+ yɛ Kanaan mɛn’n nun’n, amun fa klɔ nsan.+ Amun fa klɔ sɔ mun yo fiawlɛ klɔ. 15 Sɛ Izraɛlifuɛ kun, annzɛ aofuɛ kun,+ annzɛ sran kun m’ɔ tran amun afiɛn’n, annzɛ sran uflɛ ɔ kun sran mɔ nɛ́n i ɲinfu yɛ ɔ yoli sɔ’n, maan ɔ wanndi wɔ lɔ. Klɔ nsiɛn sɔ’m bé yó amun fiawlɛ klɔ.+

16 “‘Sanngɛ sran ng’ɔ fa blalɛ fin i wiengu naan ɔ wu’n, ɔ ti sran kunfuɛ. Maan be kun i wie.+ 17 Sɛ yɔbuɛ kun kwla kun sran naan sran kun fɛ i sɔ yɔbuɛ’n fa fin i wiengu naan ɔ wu’n, ɔ ti sran kunfuɛ. Maan be kun i wie. 18 Sɛ waka kun kwla kun sran naan sran kun fɛ i sɔ waka’n fa fin i wiengu naan ɔ wu’n, ɔ ti sran kunfuɛ. Maan be kun i wie.

19 “‘Sran nga be kunnin i’n i fuɛ nga i waan ɔ́ tú i klunngbɔ* yɛ ɔ fata kɛ ɔ kun sran kunfuɛ’n wie-ɔ. Cɛn ng’ɔ nin i be yia nun’n, maan ɔ kun i. 20 Sɛ sran kun kpɔ i wiengu kun naan ɔ su i bo yi i ase naan ɔ wu’n, annzɛ ɔ fuɛli i ti* naan ɔ fa like wie fin i naan ɔ wu’n,+ 21 annzɛ kusu sɛ kpɔlɛ mɔ sran kun kpɔ i wiengu’n ti’n, ɔ fɛ i sa fin i naan ɔ wu’n, maan be kun sran sɔ’n wie. Afin ɔ ti sran kunfuɛ. Cɛn nga klunngbɔ tufuɛ’n nin i sɔfuɛ’n be yia nun’n, maan ɔ kun i wie.

22 “‘Sanngɛ sɛ ɔ kpɔman sran sɔ’n, naan nɛ́n i ɲinfu yɛ ɔ suli i bo’n, annzɛ sɛ ɔ fali like wie finnin i kusu nn w’a fuɛmɛn i ti* laa’n,+ 23 annzɛ kusu sɛ ɔ siman kɛ ɔ o lɛ naan ɔ suli yɔbuɛ wie bo yili i su kusu nn ɔ kpɔmɛn i’n, annzɛ w’a sunnzunman kɛ ɔ́ yó sran’n i like yaya’n naan ɔ wu’n, 24 maan nzrafuɛ’m be jrɛn i sɔ liɛ’m be su naan be di sran kunfuɛ’n nin klunngbɔ tufuɛ’n be afiɛn jɔlɛ’n.+ 25 Kpɛkun maan nzrafuɛ’m be de sran kunfuɛ’n klunngbɔ tufuɛ’n i sa nun. Yɛ maan be fɛ i sɛ i sin fiawlɛ klɔ ng’ɔ wanndi ɔli lɔ’n su. Maan ɔ ka lɔ lele saan min ɲrun jranfuɛ mɔ n kpɛli i’n* w’a wu.+

26 “‘Sanngɛ sɛ sran kunfuɛ’n tra fiawlɛ klɔ ng’ɔ wanndi ɔli su’n i awɛ’n su’n, 27 naan klunngbɔ tufuɛ’n wun i fiawlɛ klɔ’n i sin lɔ naan ɔ kun i’n, be su mɛnmɛn i ndɛ kɛ w’a kun sran. 28 Afin ɔ fata kɛ sran kunfuɛ’n ka fiawlɛ klɔ’n nun lɔ lele saan min ɲrun jranfuɛ dan’n w’a wu. Sanngɛ kɛ min ɲrun jranfuɛ dan’n ko wu’n, sran kunfuɛ’n kwla sɛ i sin i tranwlɛ lɔ.+ 29 Lika kwlaa nga amun bɔbɔ annzɛ amun mma’m bé trán’n, amun nian mmla sɔ’n su di sran’m be jɔlɛ tititi.

30 “‘Sɛ sran kun kunnin sran’n, saan b’a ti i wun ndɛ lalofuɛ+ wie’m be nuan nun, yɛ bé kún i wie-ɔ.+ Sanngɛ sɛ be ti sran kun i wun ndɛ lalofuɛ kunngba cɛ i nuan nun’n, nán be kun i. 31 Sɛ sran kun kunnin sran naan ɔ fata kɛ be kun i wie’n, naan be man amun like kɛ bé fá kpɔ́ i ti’n, nán amun sɔ nun. Afin kunlɛ yɛ ɔ fata kɛ be kun i-ɔ.+ 32 Asa ekun’n, sɛ sran kun wanndi ko fiali fiawlɛ klɔ kun su naan be man like kɛ bé fá kpɔ́ i ti naan ɔ sɛ i sin i tranwlɛ lɔ’n, kusu nn min ɲrun jranfuɛ dan’n nin-a wuman’n, nán amun sɔ nun.

33 “‘Nán amun saci asiɛ nga amun tran su’n, afin mmoja’n saci asiɛ.+ Yɛ sɛ be guali sran mmoja ase’n, be kwlá yoman asiɛ’n i sanwun.* Sɛ sran kun guɛ i wiengu kun i mmoja ase’n, saan b’a guɛ i liɛ’n i ase wie yɛ asiɛ’n yó sanwun ekun-ɔn.+ 34 Nán amun yo mɛn nga amun tran nun’n, mɔ n bɔbɔ n tran nun wie’n i fiɛn. Afin min Zoova, n tran Izraɛlifuɛ’m be afiɛn.’”+

36 Zozɛfu i wa Manase i wa liɛ Makii i wa Galaadi i osu’n nunfuɛ’m+ be awlo kpɛnngbɛn’m be wa toli Moizi nin kpɛnngbɛn mun, yɛle kɛ Izraɛlifuɛ’m be awlo’m be su kpɛnngbɛn mun. Kpɛkun be kannin ndɛ kleli be. 2 Be seli kɛ: “Zoova seli min min’n kɛ ɔ tu fɔtɔ naan ɔ cɛ asiɛ’n nun+ man Izraɛlifuɛ mun naan ɔ kaci be aja like. Yɛ Zoova seli min min’n kɛ ɔ fa e niaan bian Zelofeadi i aja like liɛ’n mɛn i wa bla mun.+ 3 Sɛ bla sɔ’m be ko ja akpasua uflɛ nun bian’n, be aja like’n su tranman e si’m be aja like liɛ’n nun kun. Afin ɔ́ kɔ́ akpasua nga bé wá kɔ́ nun’n i nunfuɛ’m be sa nun. Ɔ maan be aja like’n tú e aja like liɛ’n nun. 4 Kpɛkun kɛ Izraɛlifuɛ’m be Ti Ɲanlɛ Afuɛ’n+ ko ju’n, bla’m be aja like liɛ’n wá úka akpasua nga be ɔli nun’n, i nunfuɛ’m be aja like liɛ’n su. Ɔ maan be aja like’n tú e si’m be akpasua’n nun aja like liɛ’n nun.”

5 Kɛ ɔ yoli sɔ’n, Zoova kan ndɛ kleli Moizi naan Moizi w’a se Izraɛlifuɛ’m be kɛ: “Zozɛfu i mma’m be akpasua’n nunfuɛ’m be ndɛ yo fɛ. 6 Ndɛ nga Zoova kannin m’ɔ fata kɛ Zelofeadi i wa bla’m be di su’n yɛ: ‘Be kwla ja bian kwlaa nga be klo’n. Sanngɛ be si i akpasua nun bian yɛ ɔ fata kɛ be jɛ i-ɔ. 7 Nán maan Izraɛlifuɛ’m be akpasua kun nun aja like’n wɔ akpasua uflɛ nun. Maan Izraɛlifuɛ’m be si’m be aja like’n, ɔ ka be akpasua’n nun. 8 Sɛ bla kun di i si i aja’n, maan i si i akpasua nunfuɛ kun yɛ ɔ jɛ i-ɔ.+ I liɛ’n, Izraɛlifuɛ’m be si’m be aja like’n ká be sa nun titi. 9 Nán maan akpasua kun nun aja like’n, ɔ tɔ akpasua uflɛ nun. Maan Izraɛlifuɛ’m be akpasua kun nun aja like’n ɔ ka akpasua sɔ’n nun titi.’”

10 Zelofeadi i wa bla’m be nantili ndɛ nga Zoova kan kleli Moizi’n su.+ 11 Ɔ maan Zelofeadi i wa+ Mala nin Tiiza nin Ɔgla nin Milka ɔ nin Nowa be jali be si i niaan yasua’m be mma mun. 12 Yasua nga be jali be’n, be ti Zozɛfu i wa Manase i osu’n nunfuɛ. Be yoli sɔ naan be aja like’n ka be si i akpasua’n nunfuɛ’m be sa nun.

13 Mmla fanunfanun nga Zoova seli Moizi kɛ ɔ fa man Izraɛlifuɛ mun’n, yɛ be o lɛ-ɔ. Kɛ ɔ́ yó sɔ’n, nn be o Moabu aawlɛ flɛnnɛn’n nun, Zurdɛn’n i nuan lɛ, Zeriko i ɲrun lɛ.+