Dɔwɔwɔwo

17 Azɔ wozɔ mɔ to Amfipoli kple Apolonia, eye wova ɖo Tesalonika,+ afi si Yudatɔwo ƒe ƒuƒoƒe aɖe le. 2 Eya ta abe ale si Paulo wɔnɛ ene+ la, ege ɖe eme, eye wòdzro Ŋɔŋlɔawo me kpli wo sabat etɔ̃ sɔŋ;+ 3 eɖea nu me heyɔa nya tso ŋɔŋlɔawo me tsɔ ɖoa kpe edzi be ehiã be Kristo la nakpe fu,+ eye wòafɔ tso ame kukuwo dome,+ eye wògblɔna be: “Ame siae nye Kristo la, Yesu sia si ŋu nya gblɔm mele na mi.” 4 Eya ta wo dometɔ aɖewo va zu xɔsetɔwo, eye wowɔ ɖeka kple Paulo kpakple Sila.+ Nenema kee Helatɔ siwo vɔ̃a Mawu la ƒe ha gã aɖe kple nyɔnu bubume geɖewo hã va wɔ ɖeka kpli wo.

5 Ke esi Yudatɔwo ʋã ŋu+ ta la, woƒo ablɔ me ŋutsu vlo dɔaɖekemawɔlawo nu ƒu, eye woɖo gbevuha aɖe hede zitɔtɔ dua me. Wodze Yason ƒe aƒe dzi kple susu be yewoakplɔ Paulo kple Sila ade asi na gbevuha la. 6 Esi womekpɔ wo o la, wohe Yason kple nɔvi aɖewo yi dua me dziɖulawo gbɔ, eye wole ɣli dom be: “Ame siawo, siwo de zi anyigba la dzi nɔlawo katã me la, va ɖo afi sia hã,+ 7 eye Yason ya xɔ wo ɖe eƒe aƒe me. Ame siawo katã le tsitre tsim ɖe Kaisaro ƒe sewo ŋu esi wole gbɔgblɔm be fia bubu aɖe li, si nye Yesu.”+ 8 Esi wose nya siawo la, vɔvɔ̃ ɖo ameha la kple dua me dziɖulawo; 9 eye esi woxɔ megbedaga si hiã le Yason kple ame bubuawo si vɔ la, woɖe asi le wo ŋu wodzo.

10 Enumake nɔviawo ɖo Paulo kple Sila ɖe Beroia le zã me. Esi wova ɖo la, woyi Yudatɔwo ƒe ƒuƒoƒe la. 11 Ke ame siawo ɖɔ ʋu wu ame siwo le Tesalonika, elabena woxɔ nya la kple dzi faa, eye wonɔa Ŋɔŋlɔawo me dzrom tsitotsito gbe sia gbe be yewoakpɔ ɖa be nya siawo le eme hã. 12 Eya ta wo dometɔ geɖewo zu xɔsetɔwo. Nenema kee Hela nyɔnu bubumewo kple ŋutsu geɖewo hã va zu xɔsetɔwo. 13 Ke esi Yudatɔ siwo le Tesalonika la se be Paulo le gbeƒã ɖem Mawu ƒe nya le Beroia hã la, wova afi ma be yewoade adã tame na ameawo ahade zi wo me.+ 14 Enumake nɔviawo na Paulo dzo yi ƒu gome,+ ke Sila kple Timoteo ya tsi afi ma. 15 Ame siwo kplɔ Paulo ɖo ɖa la kplɔe va ɖo keke Atene ke, eye hafi woadzo la, Paulo de gbe asi na wo be woagblɔ na Sila kple Timoteo+ be woava ye gbɔ kaba.

16 Esi Paulo nɔ wo lalam le Atene la, ekpɔ be dua me yɔ fũu kple legbawo, eye esia te ɖe eƒe gbɔgbɔ dzi. 17 Eya ta edzroa nu me kple Yudatɔwo kpakple ame siwo vɔ̃a Mawu le ƒuƒoƒe la, kple ame siwo wòdoa goe le asi me gbe sia gbe. 18 Ke xexemenunyala siwo woyɔna be Epikurotɔwo kple Stoatɔwo dometɔ aɖewo va he glãka kplii, eye wo dometɔ aɖewo gblɔ be: “Nya kae nu kpoloe ƒola sia di be yeagblɔ?” Bubuawo be: “Ewɔ abe dutamawuwo ŋuti gbeƒãɖela aɖee wònye ene.” Elabena ele Yesu kple tsitretsitsi ŋuti nya nyui la gblɔm.+ 19 Eya ta wokplɔe yi Areopago la, eye wogblɔ be: “Àte ŋu ana míanya nu si nufiafia yeye sia si ŋu nya gblɔm nèle la nyea? 20 Elabena èle nu siwo míaƒe towo mese kpɔ o la gblɔm, eye míedi be míanya nu si tututu nu siawo fia.” 21 Le nyateƒe me la, Atenetɔwo kple amedzro siwo le afi ma la mezãa woƒe vovoɣiwo ɖe naneke ŋu o, negbe be woanɔ nya yeyewo gblɔm alo anɔ wo sem ko. 22 Azɔ Paulo tsi tsitre ɖe Areopago+ la titina, eye wògblɔ be:

“Atenetɔwo, mekpɔe be le nu sia nu me la, edze abe mievɔ̃a mawuwo ŋutɔ wu ame bubuwo ene.+ 23 Le kpɔɖeŋu me, esi mele tsa ɖim hele ŋku lém ɖe nu siwo miesubɔna ŋu nyuie la, mekpɔ vɔsamlekpui aɖe hã si ŋu woŋlɔ ɖo be, ‘Mawu Si Womenya O La Tɔe.’ Eya ta nu si mienya o, evɔ miehele esubɔm la, eya ŋu nya gblɔm mele na mi. 24 Mawu si wɔ xexea kple nu siwo katã le eme, eya, si nye dziƒo kple anyigba ƒe Aƒetɔ la,+ menɔa gbedoxɔ siwo wotsɔ asi wɔe la me o;+ 25 eye menye ame ƒe asiwo hãe woatsɔ awɔ nane nɛ, abe ɖe nane le ehiãm ene o,+ elabena eya ŋutɔe naa agbe kple agbegbɔgbɔ+ kpakple nuwo katã ame sia ame. 26 Eye wòna dukɔ sia dukɔ dzɔ tso ame ɖeka me,+ be woanɔ anyigba blibo la dzi,+ eye wòɖo ɣeyiɣiwo kple liƒowo ɖi na amegbetɔwo nɔƒewo,+ 27 be woadi Mawu, ne ɖe woatsa asi adii kura gɔ̃ hã, ne woake ɖe eŋu vavã,+ togbɔ be le nyateƒe me la, mele adzɔge tso mía dometɔ aɖeke gbɔ hafi o. 28 Elabena eyae na míele agbe, eye míeʋãna, eye míeli, abe ale si miaƒe hakpanyaŋlɔla aɖewo gɔ̃ hã gblɔe ene be, ‘Elabena viawoe* míawo hã míenye.’

29 “Eya ta esi míenye Mawu ƒe viwo*+ ta la, mele be míasusu be Mawu le abe sika alo klosalo alo kpe ene o, eye mele abe nane si ƒe nɔnɔme amegbetɔ wɔ aɖaŋutɔe la ene o.+ 30 Nyateƒee, Mawu ŋe aɖaba ƒu ɣeyiɣi siwo me amegbetɔwo wɔ nu le manyamanya me+ la dzi; ke azɔ la, ele gbɔgblɔm na amewo katã le afi sia afi be woatrɔ dzi me. 31 Elabena eɖo ŋkeke aɖe ɖi, si dzi wòɖo tame be yeadrɔ̃ ʋɔnu+ anyigbadzinɔlawo katã le dzɔdzɔenyenye me to ŋutsu aɖe si wòɖo la dzi, eye wòna eŋuti kpeɖodzi amewo katã esi wòfɔe ɖe tsitre tso ame kukuwo dome.”+

32 Ke esi wose tsitretsitsi tso ame kukuwo dome ŋu nya la, wo dometɔ aɖewo de asi fewuɖuɖu me,+ ke bubuwo gblɔ be: “Míagase nya sia tso gbɔwò ɣebubuɣi.” 33 Eya ta Paulo dzo le wo gbɔ, 34 ke ame aɖewo va wɔ ɖeka kplii, eye wozu xɔsetɔwo. Ame siawo dometɔ aɖewoe nye Dionisio, si nye ʋɔnudrɔ̃la le Areopago ʋɔnudrɔ̃ƒea, kple nyɔnu aɖe si ŋkɔe nye Damaris, kpakple ame bubu aɖewo.