Èle Dzadzraɖoɖi Na Ŋkeke Vevitɔ Kekeake Le Ƒea Mea?

GAƑOƑO ʋɛ aɖewo do ŋgɔ na Yesu ƒe ku la, eɖo mɔ tɔxɛ aɖe si dzi woato aɖo ŋku eƒe kua dzi la anyi. Emegbe wova yɔa ŋkuɖodziwɔna sia be “Aƒetɔ ƒe fiẽnuɖuɖu.” (1 Korintotɔwo 11:20) Yesu de se sia tsɔ te gbe ɖe eƒe vevienyenye dzi be: “Minɔ esia wɔm hena ŋkuɖoɖo dzinye.” (Luka 22:19) Enye wò didi be nàɖo to Yesua? Ekema àbu ŋkeke si dzi Yesu ƒe kua dze le ƒe sia me be enye ŋkeke vevitɔ le ƒea me.

Ke ŋkeke ka tututu dzie wòle be nàɖo ŋku Yesu ƒe kua dzi? Eye nu kae akpe ɖe ŋuwò be nànɔ dzadzraɖoɖi bliboe be nàse vevienyenye si le wɔna sia ŋu la gɔme? Ele be Kristotɔ ɖe sia ɖe nade ŋugble le biabia siawo ŋu nyuie.

Zi Nenie Woaɖui Le Ƒe Me?

Zi geɖe la, ƒe sia ƒee míeɖoa ŋku ŋkeke veviwo dzi. Le kpɔɖeŋu me, togbɔ be afɔku si dzɔ le September 11, 2001 dzi nɔa ŋku dzi na ame siwo le New York City, siwo ƒe ame veviwo ku esi nu vlo wɔlawo dze Xexeame Katã ƒe Asitsaƒegã dzi hã la, gɔmesese vevi aɖe nɔa ɣletiŋkeke si dzi ŋkeke ma dze le ƒea me la ŋu na wo.

Nenema kee le Biblia ƒe ɣeyiɣiwo me la, woɖoa ŋku nudzɔdzɔ veviwo ƒe sia ƒe. (Ester 9:21, 27) Yehowa de se na Israel viwo be woanɔ ŋku ɖom ale si yeɖe wo nukutɔe tso kluvinyenye me le Egipte la dzi ƒe sia ƒe. Le Biblia me la, woyɔ ŋkeke ma be Ŋutitoto, eye Israel viwo ɖunɛ zi ɖeka le ƒe me, le ɣletiŋkeke si tututu dzi woɖe wo la dzi.—2 Mose 12:24-27; 13:10.

Esi Yesu ɖu Ŋutitotoŋkekenyuia kple eƒe apostolowo vɔ teti ye wòɖo nuɖuɖu tɔxɛ aɖe, si anye kpɔɖeŋu na ale si woanɔ ŋku ɖom eƒe kua dzi la, anyi. (Luka 22:7-20) Zi ɖeka le ƒe mee woɖua Ŋutitotoŋkekenyuia. Eya ta míate ŋu aƒo nya ta be ele be woawɔ ŋkuɖodziwɔna yeye sia si xɔ ɖe Ŋutitotoŋkekenyuia teƒe la hã zi ɖeka le ƒe me. Gake le ŋkeke ka dzi?

Ŋkeke Ka Dzie Woaɖui?

Be míaɖo nya sia ŋu la, ele be míase nu eve aɖewo gɔme. Gbãtɔe nye be, le Biblia ŋlɔɣiwo la, ŋkekea dzea egɔme fiẽ, le ɣeɖoto, eye wòwua enu le ŋkeke si kplɔe ɖo dzi ƒe ɣeɖoto. Eya ta ŋkeke ɖeka ƒe didime nye tso fiẽ va se ɖe fiẽ.—3 Mose 23:32.

Eveliae nye be, ɣletigbalẽ si míezãna egbea to vovo na Biblia me tɔ. Ɣletiwo abe March kple April ene medze le Biblia me o, ke boŋ eƒo nu tso ɣletiwo abe Adar kple Nisan ene ŋu. (Ester 3:7) Yudatɔwo xlẽa ɣletiwo tso dzinu yeye dzi yi dzinu yeye dzi. Woɖua Ŋutitotoŋkekenyuia le Nisan, si nye woƒe ɣletigbalẽa ƒe ɣleti gbãtɔ, ƒe ŋkeke 14 lia dzi. (3 Mose 23:5; 4 Mose 28:16) Ŋkeke ma, si nye Nisan 14 lia, dzie Romatɔwo klã míaƒe Aƒetɔ Yesu Kristo ɖe ati ŋuti. Esia nye ƒe 1,545 tso esime woɖu Ŋutitotoŋkekenyui gbãtɔ. Ŋkeke tɔxɛ aɖee Nisan 14 lia nye vavã!

Ke ŋkeke ka dzie Nisan 14 lia dzena le ɣletigbalẽ si míezãna egbea dzi? Míetea ŋu nyaa ŋkekea to akɔntabubu bɔbɔe aɖe dzi. Ne dzinu yeye do le ɣeyiɣi si gogo adame ƒe gɔmedzedze le anyigba ƒe dziehenutowo me (ŋkeke kple zã ƒe didime sɔna le ɣeyiɣi sia me), eye wòdze wokpɔ le Yerusalem le ɣeɖoto la, ɣemaɣie Nisan 1 dzea egɔme. Ne míexlẽ ŋkeke 14 tso ɣemaɣi la, adze Nisan 14 lia dzi. Zi geɖe la, dzinua sɔna tegblẽe le ŋkeke ma dzi. Le Biblia ƒe akɔntabubu sia nu la, le ƒe sia me la, Nisan 14 lia dze Kwasiɖa, April 17, 2011 dzi, le ɣeɖoto.a

Eya ta le ƒe sia me la, Yehowa Ðasefowo le dzadzraɖo wɔm be yewoaƒo ƒu kple ame siwo katã di be yewoaɖo ŋku Yesu ƒe kua dzi. Wole kpewòm vividoɖeameŋutɔe be nàwɔ ɖeka kpli yewo. Dze agbagba nàbia Ðasefo siwo le miaƒe nutoa me ne woagblɔ ɣeyiɣi kple teƒe si woawɔe le na wò. Menye ŋdi alo ŋdɔ mee woawɔ ŋkuɖodziwɔna sia o, ke boŋ le fiẽ me, ne ɣe ɖo to. Nu ka tae? Elabena Biblia gblɔ be ele be wòanye “fiẽnuɖuɖu.” (1 Korintotɔwo 11:25) Ƒe 1,978 enye esi tso esime Yesu ɖo ŋkuɖodziwɔna tɔxɛ sia anyi, eye le ƒe sia me la, edze Kwasiɖa, April 17, 2011 ƒe fiẽ dzi. Eye fiẽ sia nye ŋkeke si dzi Yesu ku, si nye Nisan 14 lia, la ƒe gɔmedzedze. Ðe ŋkeke aɖe gali si sɔ wu esia si dzi wòle be woaɖo ŋku Yesu ƒe kua dzia?

Ale Si Nàdzra Ðoe

Nu kae nàte ŋu awɔ atsɔ adzra ɖo ɖe zi ɖeka le ƒe me ƒe wɔna sia ŋu? Ðekae nye be nàde ŋugble le nu siwo Yesu wɔ na mí ŋu. Agbalẽ si nye Nuka Tututue Nye Biblia ƒe Nufiafia?b kpe ɖe ame miliɔn geɖe ŋu wokpɔ ŋudzedze ɖe nu si ta Yesu ku ɖo la ŋu.—Mateo 20:28.

Mɔ bubu si dzi míato adzra míaƒe dziwo ɖo ɖe ŋkeke sia ŋue nye be míaxlẽ nu tso nu siwo dzɔ do ŋgɔ na Yesu ƒe ŋkeke mamlɛtɔ le anyigba sia dzi ŋu. Le axa siwo kplɔe ɖo me la, àkpɔ aɖaka aɖe. Le aɖakaa ƒe ɖusikpa dzi la, wode dzesi ale si Nya Nyui Gbalẽ vovovoawo ƒo nu tso nu siwo dzɔ do ŋgɔ na Yesu ƒe ku la ɖi. Tsɔ kpe ɖe eŋu la, wofia asi agbalẽ si nye Ame Vevitɔ Kekeake Si Nɔ Anyi Kpɔc ƒe ta vovovo siwo ɖe nudzɔdzɔ mawo me la le eme.

Le aɖakaa ƒe miakpa dzi la, wotsɔ ŋkeke siwo dzi nuawo dzɔ le blema la sɔ kple ŋkeke siwo dzi wodze le ƒe sia me. Ðe manyo ŋutɔ be le ŋkeke ɖe sia ɖe gome la, nàxlẽ nya siwo le mawunyakpukpuiawo dometɔ aɖewo teti me ku ɖe nu siwo dzɔ do ŋgɔ na Aƒetɔ ƒe Fiẽnuɖuɖua ɖuɣi oa? Akpe ɖe ŋuwò be nànɔ dzadzraɖoɖi na ŋkeke vevitɔ kekeake le ƒea me ŋu.

[Etenuŋɔŋlɔwo]

[Nya si ɖe dzesi si le axa 22]

Ðo ŋku Yesu ƒe kua dzi Kwasiɖa, April 17, 2011

[Nyaɖoɖo/Nɔnɔmetatawo si le axa 23]

(Edze nyuie le agbalẽa ŋutɔ me)

KWASIÐA MAMLƐTƆ

2011 Braɖa April 12 ▪ Sabat Mateo

2012 ․․․․․ Marko

2013 ․․․․․ Luka

□ Yohanes 11:55–12:1

□ gt 101, pars. 2-4d

NISAN 9 (edze gɔme le ɣeɖoto)

2013 ․․․․․ ▪ Efia nu le gbedoxɔ me □ Marko 11:1-11

□ Luka 19:29-44

□ Yohanes 12:12-19

□ gt 102

NISAN 10 (edze gɔme le ɣeɖoto)

▪ Etsi Betania dɔ

2013 ․․․․․ ▪ Ekɔ gbedoxɔa ŋu □ Marko 11:12-19

□ gt 103, 104

NISAN 11 (edze gɔme le ɣeɖoto)

NISAN 12 (edze gɔme le ɣeɖoto)

□ Luka 22:1-6

Yohanes

□ gt 112, mm. 2-4

NISAN 13 (edze gɔme le ɣeɖoto)

NISAN 14 (edze gɔme le ɣeɖoto)

▪ Eɖu Ŋutitotoa □ Mateo 26:20-35

▪ Ena Yuda do go □ Luka 22:14-38

2013 ․․․․․ ▪ Apostoloawo si □ Marko 14:32-72

▪ Wotso kufia nɛ hewui □ Luka 22:63–23:56

▪ Woɖee le atia ŋu heɖi □ gt 121 va se ɖe 127, mm. 7

NISAN 15 (edze gɔme le ɣeɖoto)

▪ Sabat

Yohanes

□ gt 127, mm. 8-9

NISAN 16 (edze gɔme le ɣeɖoto)

2011 Kuɖa April 20 ▪ Wofɔe ɖe tsitre □ Mateo 28:1-15

□ Yohane 20:1-25

[Etenuŋɔŋlɔ]