Ale Si Míakpe Ðe Ame Siwo Mesu Te Na Biblia Ƒe Nufiafia Gbalẽa Sɔsrɔ̃ Haɖe O Ŋu
1. Ame sia amee adi le gɔmedzedzea me be yeaxɔ Biblia ƒe Nufiafia gbalẽa? Ðe eme.
1 Ele be ame nasrɔ̃ nu si tututu Biblia fia hafi ava zu Yehowa subɔla. Gake ame geɖe le subɔsubɔha siwo mexɔ Kristo dzi se o me, eye womexɔe se hã be Mawu ƒe Nyae Biblia nye o. Ame bubuwo hã mexɔ Mawu dzi se kura o, eye womedea bubu Biblia ŋu hã o. Dɔwɔnu kawo zãm nɔvi aɖewo le tsɔ le kpekpem ɖe ame siwo medi le gɔmedzedzea me be yewoaxɔ Biblia ƒe Nufiafia gbalẽa o ŋu? Aɖaŋuɖoɖo siwo gbɔna la tso gbeƒãɖela siwo tso dukɔ 20 sɔŋ me gbɔ.
2. Ne ame aɖe gblɔ be yemexɔ Mawu dzi se o la, nya kae míate ŋu abiae, eye nu ka tae?
2 Ame Siwo Mexɔ Mawu Dzi Se O: Ne ame aɖe gblɔ be yemexɔ Mawu dzi se o la, anyo be míabiae nu si tae. Ðe wòxɔ amedzɔtsolãme ƒe nufiafia dzi sea? Ðe megaxɔ Mawu dzi se o le nu madzɔmadzɔ wɔwɔ si xɔ aƒe ɖe xexea me alo le subɔsubɔhawo ƒe alakpanuwɔwɔ ta? Ðe wòtso dukɔ siwo me woxea mɔ ɖe Mawu dzi xɔxɔ se nu mea? Ðewohĩ menye ɖe wògbe be Mawu meli o, ke boŋ mekpɔe be ehiã be woaxɔ Edzi ase o. Gbeƒãɖela geɖe kpɔe be ne yewobia nyawo abe, “Nenemae wòwɔna na wò xoxoxoa?” ene la, ameawo dina be yewoaƒo nu. Ðo toe, eye mègaxɔ nya le enu o. Ne míese nu si ta amea mexɔ Mawu dzi se o gɔme ko hafi míate ŋu anya ale si míaɖo nya ŋu nɛ kple agbalẽ si tututu míanae.—Lod. 18:13.
3. Aleke míate ŋu ade bubu amewo kple woƒe dzixɔsewo ŋu?
3 Ne èle nya ŋu ɖom nɛ la, kpɔ nyuie be nàgana amea nase le eɖokui me be èle tsitre tsim ɖe yeƒe susuwo ŋu o. Nɔvi aɖe si tso Amerika ɖo aɖaŋu be: “Ame sia ame kpɔ mɔ atia nu si dzi wòaxɔ se, eya ta ele vevie be nàde bubu tiatiawɔblɔɖe sia ŋu. Le esi míanɔ agbagba dzem be míazi míaƒe susu ɖe amewo dzi teƒe la, anyo wu be míabia nya siwo ana amewo nabu tame ahawɔ woawo ŋutɔwo ƒe nyametsotso boŋ.” Nutome sue dzikpɔla aɖe gblɔ be ne yese aƒemenɔlaa ƒe susu vɔ la, yebiana zi geɖe be, “Èbu eŋu kpɔ nenye be nya sia hã ate ŋu anye nyateƒea?”
4. Aleke míate ŋu akpe ɖe Buddhatɔwo ŋu?
4 Buddhatɔ geɖe menya naneke tso Mawu ŋu o. Le Britain la, gbeƒãɖela aɖewo lɔ̃a agbalẽ gbadza si nye Lasting Peace and Happiness—How to Find Them zazã ne wole gbeƒã ɖem na wo. Ne wodzro ŋgɔdonyaa me kpli wo vɔ la, wodzroa akpa si nye “Ðe Wɔla Gã Aɖe Li Ŋutɔŋutɔa?” me, eye eyome wodzroa akpa si nye “Mɔfiagbalẽ Si Nye Yayra Na Ameƒomea Katã” hã me. Emegbe wotsɔa Biblia ƒe Nufiafia gbalẽa fiaa aƒemenɔlaa hegblɔna be: “Ne mèxɔ Mawu dzi se o gɔ̃ hã la, Biblia sɔsrɔ̃ aɖe vi na wò, elabena mɔfiame siwo le eme wɔa dɔ.” Mɔɖela aɖe si ɖea gbeƒã le anyigbamama si me Chinagbedolawo le me le Amerika la gblɔ be: “Nuxexlẽ doa dzidzɔ na nutoa me tɔ geɖe. Eya ta zi geɖe la, woxlẽa agbalẽ si míena wo la wua enu hafi míetrɔna yina. Gake esi womese nu si ta woanɔ anyi be woasrɔ̃ Biblia kpli wo gɔme o ta la, zi geɖe la, metsɔa Nya Nyui gbalẽ gbadza la naa wo zi gbãtɔ si medo go wo, elabena wotrɔ asi le eŋu be amewo nadi be woadzro eme kpli yewo.” Nutome sue dzikpɔla aɖe si le subɔsubɔm le Chinagbedolawo ƒe nutome sue aɖe me le Amerika gblɔ be anya wɔ be woana Biblia ƒe Nufiafia gbalẽa le yiyi zi gbãtɔ me. Gake anyo wu be woadze nusɔsrɔ̃a gɔme tso ta 2 lia, si ƒo nu tso Biblia ŋu, tsɔ wu be woadze egɔme tso ta 1, si ƒo nu tso Mawu ŋu.
5. Nu ka tae dzigbɔɖi le vevie?
5 Exɔa ɣeyiɣi hafi amewo va xɔa Mawu dzi se, eya ta ehiã dzigbɔɖi. Ðewohĩ míaƒe dzeɖoɖo gbãtɔwo maʋã ame aɖewo woalɔ̃ ɖe edzi be Wɔla aɖe li o. Gake ate ŋu adzɔ be le ɣeyiɣi aɖe megbe la, woava lɔ̃ ɖe edzi be ɖewohĩ Wɔla aɖe li, alo woase nu si ta amewo xɔe se nenema la gɔme.
6. Anye nu ka tae ame aɖewo mekpɔa dzidzɔ ɖe Biblia ŋu o?
6 Ame Siwo Mekpɔa Dzidzɔ Ðe Biblia Ŋu Alo Kana Ðe Edzi O: Zi geɖe la, ame si alɔ̃ ɖe edzi be ɖewohĩ Mawu li la makpɔ dzidzɔ ɖe Biblia ƒe nufiafiawo ŋu o le esi mexɔe se be Mawu ƒe Nyae wònye o ta. Ðewohĩ dukɔ siwo me womexɔ Kristo dzi se le o mee wòtso alo ebua Biblia be enye Kristodukɔa ƒe agbalẽ dzro aɖe ko. Alo ɖewohĩ eva le dukɔ siwo me ame akpa gãtɔ gblɔna be Kristotɔwoe yewonye gake mekpɔa ŋusẽ aɖeke ɖe woƒe agbenɔnɔ dzi o la me, eya ta awɔ nɛ be Biblia maɖe vi aɖeke na ye o. Aleke míawɔ akpe ɖe ame sia ƒomevi ŋu be wòatsɔ ɖe le Biblia me eye wòalɔ̃ be woasrɔ̃ Biblia ƒe Nufiafia gbalẽa kpli ye mlɔeba?
7. Zi geɖe la, mɔ nyuitɔ ka dzie míato akpe ɖe amewo ŋu woakpɔ dzidzɔ ɖe Biblia ŋu?
7 Greece ƒe alɔdzedɔwɔƒea ka nya ta be: “Mɔ nyuitɔ si dzi míato akpe ɖe ame si mekpɔa dzidzɔ ɖe Biblia ŋu o la ŋu koe nye be, míaʋu Biblia axlẽe nɛ wòase. Gbeƒãɖela geɖe de dzesii be Biblia me nyawo wɔa dɔ ɖe amewo ƒe dzi dzi wu nya sia nya si yewoate ŋu agblɔ. (Heb. 4:12) Mawu ƒe ŋkɔ kpɔkpɔ le Biblia me ʋã ame geɖe wodi be yewoadzro Biblia me tsitotsito.” India alɔdzedɔwɔƒea gblɔ be: “Nusɔsrɔ̃ tso nyateƒe si ku ɖe agbe kple ku ŋu doa dzidzɔ na Hindutɔ geɖe—nenema kee nye xexe si me vovototodede amewo me manɔ o ƒe ŋugbe si Biblia do hã.” Ne gbeƒãɖelawo he susu yi nu siwo le fu ɖem na nutoa me tɔwo dzi la, enɔa bɔbɔe na wo be woafia nu si Biblia gblɔ be Mawu Fiaɖuƒea awɔ atsɔ aɖɔ nɔnɔmeawo ɖo la wo.
8. Nya kae míate ŋu agblɔ na ame siwo media Biblia ƒe nya o le Kristodukɔa ƒe nuwɔnawo ta?
8 Ne Kristodukɔa ƒe nuwɔnawoe na ame aɖe media Biblia ƒe nya o la, ke anyo be míana wòanya be Kristodukɔa trɔ gbo Biblia ƒe nufiafiawo. India alɔdzedɔwɔƒea gblɔ be: “Ɣeaɖewoɣi la, ele be míana amewo nase egɔme be menye sɔlemehawo tɔe Biblia nye o.” Woka nya ta be agbalẽ gbadza si nye Tameɖoɖo kae Le Agbe Ŋu? Aleke Nàwɔ Ake Ðe Eŋu? ƒe akpa 4 lia dzɔa dzi na Hindutɔwo zi geɖe. Akpa ma ku ɖe ale si sɔlemehawo dze agbagba be yewoatɔ tsi Mawu ƒe Nya la ahatsrɔ̃e ɖa ŋu. Mɔɖela aɖe si le Brazil gblɔna na aƒemenɔlawo be: “Ðe manyo be nànya nu geɖe tso Biblia me nyawo ŋu oa? Ame geɖe le esia wɔm kple dzi faa eye menye kple susu be yewoava ɖo ha aɖe me ta o. Nu siwo gbegbe nàsrɔ̃ la awɔ nuku na wò.”
9. Nu ka tae mele be míana ta ne ame aɖe medi gbã be yeanya Biblia ƒe nufiafiawo o?
9 Yehowa kpɔa ame sia ame ƒe dzi me. (1 Sam. 16:7, 8; Lod. 21:2) Ele ame siwo si dzi ƒe nɔnɔme nyui le hem va tadedeagu vavãtɔ gbɔ. (Yoh. 6:44) Wo dometɔ akpa gãtɔ nye ame siwo mesrɔ̃ nu tso Mawu ŋu kpɔ o, eye womenya Biblia me nyawo hã o. Míaƒe gbeƒãɖeɖedɔa naa mɔnukpɔkpɔ amewo be ‘woakpɔ ɖeɖe,’ “eye nyateƒe ƒe sidzedze vavãtɔ la nasu wo si.” (1 Tim. 2:4) Eya ta ne ame aɖewo medi gbã be yewoanya Biblia ƒe nufiafiawo o la, mègana ta o! Zã dɔwɔnu siwo li nàtsɔ akpe ɖe wo ŋu be woatsɔ ɖe le Biblia me. Vivivi la, àte ŋu atrɔ numedzodzroa ayi Nuka Tututue Nye Biblia ƒe Nufiafia? gbalẽa, si koŋ míezãna tsɔ srɔ̃a Biblia kple amewo me.
[Aɖaka si le axa 4]
Ne aƒemenɔlaa gblɔ be yemexɔ Mawu dzi se o:
• Àte ŋu anya eƒe susu ne èbiae be, “Nenemae wòwɔna na wò xoxoxoa?”
• Ne Buddhatɔe wònye la, ke zã agbalẽ gbadza si nye Lasting Peace and Happiness—How to Find Them, axa 9-12.
• Ne aƒemenɔlaa xɔ amedzɔtsolãme ƒe nufiafiaa dzi se la, ke àte ŋu azã nu siwo gbɔna:
Nyɔ! ƒe nyati siwo nye “Ðe Wowɔea?”
Video si nye The Wonders of Creation Reveal God’s Glory
Agbalẽ gbadza si nye Agbe si me Dzidzeme Le—Alesi Woawɔ Anɔe, akpa 4; Was Life Created?; kple The Origin of Life—Five Questions Worth Asking
• Ne nu madzɔmadzɔ wɔwɔ kple fukpekpe tae amea megaxɔ Mawu dzi se o la, ke àte ŋu azã nu siwo gbɔna:
Agbalẽ si nye Is There a Creator Who Cares About You?, ta 10
Agbalẽ gbadza siwo nye Ðe Mawu Tsɔa Ðe Le Eme na Mí Vavãa?, akpa 6, kple Tameɖoɖo Kae Le Agbe Ŋu?, akpa 6
• Mitrɔ nusɔsrɔ̃a yi Biblia ƒe Nufiafia gbalẽa me enumake ne aƒemenɔlaa lɔ̃ ɖe edzi be ɖewohĩ Mawu li. Anyo wu ne miedze egɔme tso ta 2 lia, alo tso nyati aɖe si sɔ na amea dzi.
[Aɖaka si le axa 5]
Ne aƒemenɔlaa mexɔ Biblia dzi se o la, àte ŋu ate esia kpɔ:
• Midzro Life—How Did It Get Here? By Evolution or by Creation? gbalẽa ƒe ta 17 kple 18 me.
• Ne Hindutɔe wònye la, ke zã agbalẽ gbadza si nye Why Should We Worship God in Love and Truth?
• Ne Yudatɔe wònye la, ke zã agbalẽ gbadza si nye Will There Ever Be a World Without War?, axa 3-11.
• Midzro viɖe siwo le Biblia ƒe mɔfiamewo dzi wɔwɔ me la me. Àte ŋu azã nu siwo gbɔna atsɔ afia ale si Biblia ɖea vi na mí le agbe mee la aƒemenɔlaa:
Nyɔ! ƒe nyati siwo nye “Nu Si Akpe Ðe Ƒomewo Ŋu”
Video si nye The Bible—Its Power in Your Life
Agbalẽ gbadza siwo nye Nya Nyui Si Tso Mawu Gbɔ!, nusɔsrɔ̃ 9 kple 11; Agbalẽ si Nyo na Amesiame, axa 22-26; kple Agbe si Me Dzidzeme Le—Alesi Woawɔ Anɔe, akpa 2 lia.
Ne Buddhatɔe wònye la, zã agbalẽ gbadza si nye The Pathway to Peace and Happiness, axa 3-7.
Ne Moslemtɔe wònye la, zã agbalẽ gbadza si nye Real Faith—Your Key to a Happy Life, akpa 3 lia.
Ne èle gbeƒã ɖem le nuto siwo me amewo media Biblia ƒe nya le o me la, anyo wu ne mèyɔ agbalẽ si me nèɖe wò nufiame siwo me susu le tso la ƒe ŋkɔ o va se ɖe esime nètrɔ yi egbɔ zi gbɔ zi geɖe.
• Ðe ale si Biblia me nyagblɔɖiwo va emee me nɛ. Àte ŋu azã nu siwo gbɔna:
Video si nye The Bible—Accurate History, Reliable Prophecy
Agbalẽ gbadza si nye Agbalẽ si Nyo na Amesiame, axa 27-29
• Mitrɔ nusɔsrɔ̃a yi Biblia ƒe Nufiafia gbalẽa me ne aƒemenɔlaa bia nu si Biblia fia tso nyati vovovo aɖewo ŋu teti ko.
[Aɖaka si le axa 6]
Ne aƒemenɔlaa gblɔ be: “Nyemexɔ Mawu dzi se o” la, àte ŋu agblɔ be:
• “Mate ŋu aɖe nu si ta nye ya meka ɖe edzi be Wɔla aɖe li me na wò kpuiea?” Eyome midzro Reasoning gbalẽa, axa 84-86 me, alo tsɔ agbalẽ aɖe si ƒo nu tso Wɔlaa ŋu si xexlẽ dzɔ dzi na wò la yi nɛ.
• “Gake ne Mawu aɖe li la, ke ame ka ƒomevie nàdi be wòanye?” Aƒemenɔla geɖe gblɔna be yewoadi be yewoate ɖe Mawu si lɔ̃a ame, le dzɔdzɔe, kpɔa nublanui na ame, eye mekpɔa ame ŋkume o la ŋu. Fiae tso Biblia me be nɔnɔme nyui siawo katã le Mawu si. (Ðewohĩ àte ŋu azã Biblia ƒe Nufiafia gbalẽa ƒe ta 1, tso memama 6 lia.)
Ne aƒemenɔlaa gblɔ be: “Nyemexɔ Biblia dzi se o” la, àte ŋu agblɔ be:
• “Ame geɖewo gblɔa nya ma. Wo dometɔ aɖewo susu be Biblia mesɔ ɖe dzɔdzɔmeŋutinunya nu o, alo wosusu be mɔfiame siwo le eme mewɔa dɔ o. Meɖe kuku mabia lo, ète ŋu xlẽ Biblia kpɔa? [Ðe mɔ wòaɖo eŋu. Eyome tsɔ Agbalẽ si Nyo na Amesiame gbalẽ gbadza la ƒe ŋgɔdonya si le axa 3 lia fiae, eye nàtsɔ agbalẽa nɛ.] Ame aɖewo meka ɖe Biblia dzi o le esi sɔlemehawo trɔ gbo eƒe nufiafiawo ta. Ne megatrɔ va la, madi be matsɔ esia ƒe kpɔɖeŋu aɖe afia wò, le axa 4 kple 5.”
• “Menye wò ɖeka koe mexɔ Biblia dzi se o. Mate ŋu atsɔ nane si doa dzidzɔ nam le Biblia ŋu afia wòa? [Xlẽ Hiob 26:7 alo Yesaya 40:22, si ɖo kpe edzi be Biblia me nyawo sɔ ɖe dzɔdzɔmeŋutinunya nu.] Nufiame nyui geɖe le Biblia me siwo dzi wɔwɔ ɖea vi na ƒomewo. Ne megatrɔ va la, madi be matsɔ esia ƒe kpɔɖeŋu aɖe afia wò.”
• “Edzɔ dzi nam ŋutɔ be ègblɔ nya sia nam. Ne Mawu ŋlɔ agbalẽ aɖe na amegbetɔƒomea la, nya kae nèsusu be anɔ eme?” Eyome tsɔ Biblia me nya aɖe si wɔ ɖeka kple eƒe nyawo fiae.