ARTIK POU ÉTIDYÉ 24
To pouvé rivé fè sa to prévwè fè pou Jéova
« Donk annou pa arété fè sa ki bon, paské lò tan-an ké rivé nou ké rékòlté » (GAL. 6:9).
KANTIK 84 Wi mo la !
KOUTWÉY ASOU SA NOU KÉ WÈa
1. Kisa ki ja rivé roun patché frè ké sò ?
ÈS sa ja rivé to gen roun òbjèktif èspirityèlb épi sa té rèd pou to té rivé fè sa to té prévwè ? Si a sa, a pa to rounso. Philip té lé priyè pi souvan épi vin pi vayan annan sa zafè-a, mé sa té rèd pou i té trapé tan pou i té priyè. Erika té lé rivé annan réinyon prédikasyon-yan anvan yé koumansé, mé i pa té ka rivé : a près tout tan i té an rétar. Tomáš éséyé li tout Labib-a plizyèr fwa. Mé i ka di : « Anfèt, mo pa té ka pran plézi li Labib-a. Mo éséyé trwa fwa, chak kou mo té ka rivé annan Liv Lévitique, mo té ka lésé tonbé. »
2. Poukisa nou pa divèt dékourajé si nou pa ka rivé fè sa nou prévwè ?
2 Si to gen roun òbjèktif èspirityèl épi to pa ka rivé fè sa to prévwè, pitèt to ka santi ki to pa vo anyen. Mé a pa pou to krè sa paské menm si òbjèktif-a piti, sa ka pran tan é sa ka doumandé to fè éfòr. Kou to lé rivé fè sa to prévwè fè, sa ka montré ki to lanmityé ké Jéova enpòrtan pou to é ki to lé bay li sa to gen ki miyò. É tout éfòr to ka fè enpòrtan pou li. I pa ka doumandé to bay li plis ki sa to pouvé bay li (Ps. 103:14 ; Mich. 6:8). Atò, tchenbé kont di to sitiasyon épi chwazi roun bagaj to sir to ké rivé fè. Apré sa, kisa to pouvé fè ? Men déztrwa lidé.
SA ENPÒRTAN POU TO MOTIVÉ
Doumandé Jéova bay to plis « anvi aji » (gadé paragraf 3-4).
3. Poukisa sa enpòrtan pou nou motivé ?
3 Si nou lé rivé fè sa nou prévwè, a pou nou motivé. Roun moun ki motivé, a roun moun ki vréman anvi rivé fè sa i prévwè. Nou pouvé konparé sa anvi-a ké kouran-an ki ka idé roun kannon vansé. Si i gen bokou dlo ké kouran, sa ké pi fasil pou moun-an rivé koté i lé alé-a. É si i gen bokou kouran menm, i ké menm pouvé rivé pi vit. Menm fason-an, pi nou motivé, pi nou ké pouvé rivé fè sa nou prévwè. David, roun frè ki ka rété Salvador, ka di : « Lò to motivé, to ka fè plis éfòr. To ka vréman fè atansyon pou anyen pa anpéché to fè sa to prévwè fè. » Donk kisa to pouvé fè pou to plis motivé ?
4. Kisa nou pouvé doumandé Jéova ? (Philippiens 2:13 ; gadé zimaj-a osi).
4 Doumandé Jéova bay to plis « anvi aji ». Gras a so lèspri sen, Jéova pouvé bay to anvi rivé fè sa to prévwè (li Philippiens 2:13). Détan, nou ka chwazi roun òbjèktif paské nou savé ki a sa nou divèt fè, é a roun bon bagaj. Mé pitèt a pa roun òbjèktif nou vréman kontan. A sa ki rivé Norina, roun sò ki ka rété Ouganda. I té désidé trapé roun léson biblik pou dirijé, mé i pa té motivé paské pou li, i pa té ka ansényé byen. Kisa ki idé l’ ? I ka èspliké : « Touléjou, mo koumansé doumandé Jéova fè mo plis anvi dirijé roun léson biblik. É pou sa mo té ka fè alé annan menm sans ké sa mo té ka doumandé li, mo koumansé fè éfòr pou mo ansényé pi byen. Apré déztrwa mwa, mo wè ki mo té plis anvi dirijé roun léson biblik. Sa lannen-an, mo koumansé dé léson biblik. »
5. Pou nou plis motivé, asou kisa nou divèt pran tan réfléchi ?
5 Pran tan réfléchi asou sa Jéova fè pou to (Ps. 143:5). Apot Pòl té ka pran tan réfléchi asou favèr Jéova té bay li i pa té mérité-a, é sa té ka pousé li fè plis pou li (1 Cor. 15:9, 10 ; 1 Tim. 1:12-14). Menm fason-an, pi to ké réfléchi asou sa Jéova fè pou to, pi to ké anvi rivé fè sa to prévwè (Ps. 116:12). Roun sò ki ka rété Honduras té lé divini pyonyé pèrmanan. I ka èspliké sa ki idé l’ rivé divini pyonyé : « Mo pran tan réfléchi asou lanmou Jéova gen pou mo. I idé mo jwenn so pèp, i ka pran swen di mo é i ka protéjé mo. Lò mo réfléchi asou tousa, sa fè mo kontan li plis é sa bay mo plis anvi adoré li. »
6. Ki ròt bagaj nou divèt fè pou nou plis motivé ?
6 Réfléchi asou bénédiksyon to ké trapé si to ka rivé fè sa to prévwè. Erika, sò-a nou palé anvan-an, té lé rivé anvan réinyon pou prédikasyon-an koumansé é i rivé fè l’. Kouman i fè sa ? I ka di : « Mo randé mo kò kont ki lò mo té ka rivé an rétar annan réinyon pou prédikasyon-an, mo té ka raté roun patché bagaj. Si mo té ka rivé pi bònò, mo té ké pouvé di mo frè ké sò-ya bonjou épi pasé roun ti moso tan ké yé. Mo té ké la osi pou kouté sa yé ka di annan sa réinyon-yan. Konsèy yé ka bay ka fè nou tchò pi kontan é ka pèrmèt nou vin pi vayan annan prédikasyon-an. » Erika réfléchi asou bénédiksyon i té ké trapé si i té ka rivé annan réinyon pou prédikasyon-an anvan i koumansé, é i rivé. É to menm, ki bénédiksyon to ké jwenn si to ka rivé fè sa to prévwè ? Si to gen roun òbjèktif parapòrta fason to ka li Labib-a ouben fason to ka priyè, sonjé ki gras a sa, to lanmityé ké Jéova ké vin pi fò (Ps. 145:18, 19). Si sa to lé, a gen roun kalité roun krétyen divèt gen, sonjé ki sa ké pèrmèt to gen pi bon rélasyon ké ròt-ya (Col. 3:14). To pouvé marké asou roun papyé poukisa to lé rivé fè sa to prévwè. Apré sa, rouli souvan sa to marké. Tomáš, nou ja palé anvan, ka di : « Pi mo ka wè poukisa mo divèt fè sa mo prévwè, pi sa ka ankourajé mo kontinyé. »
7. Kisa ki idé Julio ké so madanm rivé fè sa yé té prévwè fè ?
7 Pasé tan ké krétyen ki ké ankourajé to (Prov. 13:20). Julio ké so madanm té lé fè plis annan prédikasyon-an é yé rivé fè l’. Kouman yé fè sa ? Men sa Julio ka réponn : « Nou chwazi zanmi ki té ka ankourajé nou pa anbandonnen nou òbjèktif. Nou té ka kozé souvan ké yé di sa nou té prévwè fè. Roun patché annan yé té chwazi menm kalité òbjèktif ki nou, é yé té rivé fè sa yé té désidé. É yé té ka bay nou bon konsèy. Yé té ka doumandé nou osi kisa nou té ja rivé fè é yé té ka ankourajé nou lò nou té bézwen ankourajman. »
SI TO PA MOTIVÉ
Travay pou to rivé fè sa to prévwè (gadé paragraf 8).
8. Kisa ki ka riské rivé nou si nou ka fè éfòr sèlman lò nou cho ? (gadé zimaj-a osi).
8 A pa tout tan nou cho pou fè roun bagaj. Lò sa ka rivé nou, ès sa lé di ki nou pa ké vansé pyès ? Non, annou pran roun èkzanp. Lò kouran-an fò, i pouvé ralé roun kannon fasilman koté moun-an lé alé-a. Mé a pa tout tan kouran-an fò, é détan, i pa gen kouran menm. Ès sa lé di ki kannon-an pa pouvé kontinyé vansé ? Pa oblijé. I gen pagay annan roun kannon épi i gen sa ki gen motèr. Donk moun-an pouvé sèrvi so pagay ouben motèr-a pou i kontinyé vansé. Menm fason roun jou kouran-an pouvé fò épi rounòt jou i pouvé fèb, nou menm osi jòdla nou pouvé cho pou fè roun bagaj, épi dimen nou pa cho pyès. Mé si nou ka fè éfòr pou nou rivé fè sa nou prévwè sèlman lò nou cho pou nou fè l’, nou pa ké rivé pyès koté. Menm fason moun-an ki asou so kannon ka chaché ròt fason pou i rivé koté i lé alé-a, nou menm osi nou pouvé chaché ròt mwayen pou nou rivé fè sa nou désidé menm lò nou pa djè anvi fè l’. A vré, a pou nou fòrsé nou kò pou nou fè l’, mé a pa ti bénédiksyon nou ké jwenn. Anvan nou wè kisa nou pouvé fè, annou réponn roun késyon sèrten moun ka pozé yé kò.
9. Ès a roun mové bagaj si nou ka fòrsé nou kò fè sa nou désidé fè menm lò nou pa anvi fè l’ ?
9 Jéova lé nou adoré l’ ké lajwa é ké tout nou tchò (Ps. 100:2 ; 2 Cor. 9:7). Donk ès nou divèt fòrsé nou kò fè sa nou prévwè lò nou pa djè anvi fè l’ ? Gadé sa apot Pòl di : « Mo ka bay mo kò kou é mo ka ralé l’ kou roun èsklav » (1 Cor. 9:25-27). Menm lò i pa té anvi fè sa Jéova té ka doumandé li fè, Pòl té ka fòrsé so kò fè l’. Ès Jéova té kontan sa Pòl té ka fè pou li ? Asiré pa pitèt. I béni tout éfòr i fè (2 Tim. 4:7, 8).
10. Si nou ka fè éfòr pou nou rivé fè sa nou prévwè menm si nou pa djè anvi fè l’, ki bénédiksyon nou ké jwenn ?
10 Menm fason-an, Jéova kontan lò i ka wè nou ka fè éfòr pou nou rivé fè sa nou prévwè menm lò nou pa cho pou fè l’. Sa ka fè l’ plézi paské i savé ki nou ka fè l’ pas nou kontan li. Pitèt nou pa kontan sa nou ka fè, mé nou kontan li. Menm fason i béni éfòr Pòl fè, i ké béni éfòr nou ké fè osi (Ps. 126:5). É lò nou ké wè ki Jéova ka béni nou, sa ké pouvé bay nou anvi aji. Lucyna, roun sò ki ka rété Pològn ka di : « Détan, mo pa anvi alé préché, èspésyalman lò mo las. Mé apré, lò mo ka rouvini mo tou kontan, a roun bèl kado. » Annou wè aprézan kisa nou pouvé fè lò nou pa motivé.
11. Kouman Jéova pouvé idé nou kontrolé nou kò plis ?
11 Doumandé Jéova idé to kontrolé to kò. Roun moun ki ka kontrolé so kò, ka kontrolé sa i ka rousanti ké sa i ka fè osi. Souvan sa lé di osi ki moun-an ka kontrolé so kò pou i pa fè mové bagaj. Mé nou bézwen kontrolé nou kò osi pou nou fè bon bagaj, èspésyalman si sa nou gen pou fè-a pa fasil ouben si nou pa cho pou fè l’. Pa bliyé ki kontrolé so kò, a roun kalité enpòrtan ki ka fè parti di frwi lèspri Bondjé-a. Donk, pou to gen sa kalité-a, doumandé Jéova so lèspri sen (Luc 11:13 ; Gal. 5:22, 23). David, nou ja palé anvan-an, té lé pran labitid étidyé pi souvan. I ka èspliké kouman lapriyè idé li : « Mo té ka doumandé Jéova idé mo kontrolé mo kò. Gras a li, mo rivé fè roun bon program pou étidyé épi swiv li. »
12. Kouman prensip nou ka jwenn annan Ecclésiaste 11:4 ka idé nou pou òbjèktif èspirityèl nou ka chwazi ?
12 Pa antann tout bagaj roulé ron pou to désidé fè roun bagaj. Si to ka antann tout bagaj roulé ron annan sa monn-an, to pa ké janmen rivé fè sa to prévwè fè (li Ecclésiaste 11:4). Men sa roun frè yé ka aplé Dayniel ka di : « Tounen viré, i ké toujou gen roun bagaj. A pa pou to rété la ka antann, a pou to désidé fè roun bagaj. » Paul, roun frè ki ka rété Ouganda, ka di rounòt bagaj pou èspliké poukisa nou pa divèt di nou ké fè l’ pita : « Lò nou ka désidé fè roun bagaj menm lò sa rèd, nou ka bay Jéova roun bagaj pou i béni » (Mal. 3:10).
13. Poukisa sa pi bon pou nou chwazi òbjèktif ki pa tro fò pou nou ?
13 Chwazi òbjèktif ki pa tro fò pou to. Détan, nou pa motivé paské òbjèktif nou chwazi-a tro fò pou nou. Si to ka wè ki to òbjèktif tro fò pou to, ès to pouvé chwazi roun òbjèktif ki pi piti pou to rivé fè l’ ? Parèkzanp, si to lé gen roun kalité roun krétyen divèt gen, to pouvé éséyé montré sa kalité-a annan piti bagaj. Si to lé li tout Labib-a, to pouvé désidé li mwens pou koumansé. Tomáš, frè-a nou palé annan koumansman sa artik-a, té lé li Labib-a annan rounsèl lannen, mé i pa té ka rivé fè l’. I ka di : « Mo randé mo kò kont ki mo té désidé li tro bokou rounsèl kou. Donk mo désidé roukoumansé, mé sa kou-a, mo li mwens chak jou é mo pran tan réfléchi asou sa mo té ka li. É a la mo koumansé kontan sa mo té ka li. » Pi Tomáš té ka li, pi i té ka pran plézi li Labib-a. Donk i koumansé li l’ chak jou pi lontan, é i rivé li tout Labib-ac.
PA DÉKOURAJÉ LÒ SA PI RÈD
14. Kisa ki pouvé rivé nou tout ?
14 Malérèzman, menm si nou motivé épi nou ka kontrolé nou kò, nou tout ka jwenn problèm. Parèkzanp ‘bagaj nou pa prévwè’ pouvé anpéché nou gen tan pou nou fè sa nou prévwè (Eccl. 9:11). Nou pouvé jwenn problèm ki pouvé dékourajé nou (Prov. 24:10). Kou nou pa parfè, nou pouvé fè bagaj ki pa bon é sa pouvé fè ki sa pi rèd pou nou fè sa nou prévwè (Rom. 7:23). Ouben détan a jis las nou las (Mat. 26:43). Kisa nou pouvé fè lò nou gen sa kalité problèm-yan ?
15. Lò nou ka jwenn roun problèm, poukisa nou pa divèt di ki nou pa ké janmen rivé fè sa nou prévwè ? (Psaume 145:14).
15 Sonjé ki a pa paské to ka jwenn roun problèm ki to pa ké janmen rivé. Labib-a ka di ki nou pouvé jwenn problèm dèyè problèm ki pouvé jité nou atè. Mé i ka byen èspliké osi ki nou pouvé lévé, èspésyalman gras a Jéova (li Psaume 145:14). Men kouman Philip nou ja palé anvan-an ka wè bagaj-ya : « Mo pa ka gadé konmyen fwa mo tonbé, mé mo ka gadé konmyen fwa mo rivé lévé. » David, nou ja palé anvan osi, ka wè bagaj-ya konsa li menm : « Lò mo pa rivé fè roun bagaj, mo ka éséyé pa wè sa kou roun problèm, mé kou roun okazyon pou mo montré Jéova ki mo kontan l’. » Wi, si to ka kontinyé vansé menm lò to ka jwenn problèm, to ka montré Jéova ki to vréman lé fè l’ plézi. É imajiné kouman i dèt kontan lò i ka wè to ka kontinyé fè éfòr !
16. Si nou pa ka rivé fè sa nou prévwè, kisa sa pouvé anprann nou ?
16 Lò to pa ka rivé, wè sa kou roun okazyon pou to anprann roun bagaj. Réfléchi asou poukisa to pa rivé épi doumandé to kò : « Kisa mo divèt chanjé pou sa pa rivé mo ankò ? » (Prov. 27:12). É détan, si to pa ka rivé, pitèt sa lé di ki òbjèktif to chwazi-a tro fò pou to. Si to ka pansé ki to annan sa sitiasyon-an, a pou to rouwè to òbjèktif épi chwazi roun bagaj to pouvé fèd. Jéova pa ké di ki to pa vo anyen si to pa ka rivé fè roun bagaj to chwazi mé ki té tro rèd pou to (2 Cor. 8:12).
17. Poukisa nou pa divèt bliyé sa nou ja rivé fè ?
17 Pa bliyé sa to ja rivé fè. Labib-a ka di ki ‘Bondjé pa enjis pou i bliyé sa nou fè pou li’ (Héb. 6:10). Donk nou menm non plis nou pa divèt bliyé sa. Réfléchi asou sa to ja fè : pitèt to vin zanmi ké Jéova, to koumansé palé di li bay ròt-ya, ouben to batizé. To té gen roun òbjèktif, to fè progrè, é to rivé fè sa to té désidé. Donk poukisa aprézan to pa té ké pouvé kontinyé fè progrè épi rivé fè sa to désidé ? (Phil. 3:16).
Profité di vwayaj-a (gadé paragraf 18).
18. Toupannan nou ka fè éfòr pou nou rivé fè sa nou prévwè, kisa nou pa divèt bliyé fè ? (gadé zimaj-a osi).
18 Gras-a Jéova, to pouvé rivé fè sa to prévwè fè, menm fason roun moun annan so kannon tou kontan rivé koté i té lé alé-a. Mé, pa bliyé ki roun patché moun ki ka pran yé kannon ka pran plézi lò yé ka monté désann larivyè. To menm osi, toupannan to ka fè éfòr pou to rivé fè sa to prévwè, profité di vwayaj-a : pran tan pou to wè kouman Jéova ka idé to é ka béni to (2 Cor. 4:7). Si to pa ka lagé, Jéova ké béni to ankò plis (Gal. 6:9).
KANTIK 126 « Rété byen dibout, tchenbé rèd, divini vayan »
a Souvan, òrganizasyon Jéova-a ka ankourajé nou gen òbjèktif èspirityèl. Mé kisa nou pouvé fè si nou gen roun òbjèktif èspirityèl, mé nou pa ka rivé fè sa nou prévwè ? Annan sa artik-a, nou ké wè plizyèr bagaj nou pouvé fè pou nou rivé fè sa nou prévwè.
b POU BYEN KONPRANN : Roun òbjèktif èspirityèl, a tousa to ka prévwè fè pou to vin pi vayan annan roun bagaj ouben pou to sèrvi Jéova plis épi fè l’ plézi. Parèkzanp, to pouvé désidé chaché gen roun kalité roun krétyen divèt gen, ouben vin pi vayan annan roun bagaj to ka fè pou adoré Jéova, kou zafè li Labib-a, étidyé to rounso, ouben prédikasyon-an.
c Gadé liv Tirez profit de l’École du ministère théocratique, p. 10-11, § 5.
d Pou to gen plis enfòrmasyon asou sa, gadé artik « Des attentes raisonnables… pour être joyeux ! » annan La Tour de Garde 15 jwiyé 2008.