Abụ Ọma
Ntụziaka e nyere onye na-eduzi abụ. A ga-eji ụda Mehalat* kpọọ ya. Maskil.* Abụ Devid.
53 Ndị nzuzu* na-asị n’obi ha:
“Jehova adịghị.”+
Ihe ọjọọ ha na-eme rụrụ arụ, na-asọkwa oyi.
E nweghị onye na-eme ihe dị mma.+
2 Ma Chineke si n’eluigwe na-ele ndị mmadụ anya+
Ka ọ hụ ma è nwere onye na-aghọta ihe, ma è nwere onye na-achọ Jehova.+
3 Ha niile akwụsịla ime ihe dị mma.
Ha niile rụrụ arụ.
E nweghị onye na-eme ihe dị mma,
E nweghịdị otu onye.+
4 Ọ̀ bụ na e nweghị onye na-aghọta ihe n’ime ndị na-eme ihe ọjọọ?
Ha na-eri ndị m ka à ga-asị na ha na-eri nri.*
Ha anaghị efe Jehova.+
5 Ma oké ụjọ ga-ejide ha,
Ụdị ụjọ na-atụtụbeghị ha,*
N’ihi na Chineke ga-atụsasị ọkpụkpụ ndị na-alụso gị ọgụ.
Ị ga-emenye ha ihere, n’ihi na Jehova ajụla ha.
6 Ọ dị m ka ya bụrụ na a ga-esi na Zayọn zọpụta ndị Izrel.+
Ka Jekọb ṅụrịa ọṅụ, ka ndị Izrel nweekwa obi ụtọ
Mgbe Jehova ga-akpọlata ndị ya a dọọrọ n’agha.