Yuusa suntari warinia turin ainia aitkiasrik turawartai

1, 2. a) Yuusa suntarijiaisha warinma metekchaitiaj? b) Yuusa suntarijiaisha warinma metektakuitiaj?

Ashi nunkanmaya ii yachi ii umaisha tura Yuusa suntarisha Jehovan enentaimtuinia asar nu shuarnumian ainis ainiawai tura anenkratin ainiawai. Jehová amincha nui pachitkia ati tusa yainmakuiti (Tan. 7:​9, 10). Yuusa suntarin enentaimkiur nijiainkia metekchaitiajnia nui enentaimminiaitji. Ninkia aentstijiaisha nankaamas emka najanamu ainiawai (Juup 38:​4, 6, 7). Ti kakaram tura tunaartincha ainiawai tura aintsan penkera nuna tuke turin ainiawai (Ruk. 9:26).

² Yuusa suntarijiainkia metekchaitkiursha nekas nekaamka metektakuitji. Watskea Yuusa suntarisha tura iisha Jehová urukuit ainis iniakmamniuitji. Wari turattsar wakeraj nuka iik enentaimsar turiniaitji, ii naarisha achiakeaji tura ii urukuitiaj nusha metekrakchaitji tura Jehovanu najaneajnia nusha metekrak nuke najantsuji. Nuyasha Yuusa suntari aintsan iisha Jehová enentaimtustasar wakeraji (1 Pit. 1:12).

3. Yuusa suntariniusha wari nekaamniaitiaj?

³ Yuusa suntarijiai metektaku asar ni najanainiana nu ikiakatmaji tura iisha aitkiasrik turatniun jintintramji. Ju unuimiateamunmanka Yuusa suntari aintsan nankaamantu enentaimcha, chikich aentscha anen tura katsuntin nuyasha Jehová iruntramurin yajauch turamu ain tusar yainkratainiana aitkiasrik iisha itiur turamniaitiaj nu nekaattaji.

YUUSA SUNTARINKIA NANKAAMANTU ENENTAIMCHA AINIAWAI

4. a) Yuusa suntarisha nankaamantu enentaimcha asar itiurin ainia? b) Urukamtai nankaamantu enentaimcha ainia? (Yus Kanta 89:7).

⁴ Yuusa suntari ainiana nuka nankaamantu enentaimcha ainiawai. Ti neka, ti kakaram, ti enentaimin ainiayat Jehová tana imiatrusan najanin ainiawai (YKan. 103:20). Jehová warinkisha turat tusa tsankateamsha ni paant juaktin enentaijiai najancha ainiawai tura kakaram ainiana nuna nekaartuawarat tusar nu enentaijiainsha najancha ainiawai. Yuus wakeramun najanainiak warau ainiawai. Ni naari nekaachmaitkiuisha ainis turin ainiawaia (Náṉ. 32:​24, 29; 2 Ak. 19:35). Ni paant juaktinian enentaimcha ainiawai antsu Jehová paant juakat tu enentaimin ainiawai. Yuusa suntari ainiana nusha urukamtai nankaamantu enentaimcha ainia? Jehovan anen asar tura ti arantin asar nankaamantu enentaimcha ainiawai (Yus Kanta 89:7 aujsata).

5. Yuusa suntarinkia Juan nin tikishmatramiania nui itiurkamia? (Nakumkamusha iista).

⁵ Yuusa suntari nankaamantu enentaimcha asar itiurin ainia nu nekaatai. Yuusa suntari aya neachma apóstol Juankan ukunmatai turunatniun iimtiksamiayi. Nuka 96 uwitin nui turunamiayash tumainti (Apu. 1:1). Juan Yuusa suntari iimtiksam urukamia? Tikishmar enentaimtustasa ajamiayi tura Yuusa suntarinkia ainis turawain tusa warik junis timiayi: “Íimsakia áinkiaip. Wisha ámiji̱a̱i̱ métek tura yatsumja̱i̱ métek Jesusa nekas chichame̱n tuke umirin ainia núnisan Yusa yáintri̱ntjiai. Yusak shiir awajsatniuiti” tu timiayi (Apu. 19:10). Yuusa suntarinkia winia paant awajtusat tusa enentaimcha asa ainis timiayi. Yuusa suntarinkia Juannaka Jehovan nekaska enentaimtusat tusa wakerimiayi. Nuyasha Juannaka nankaka enentaimchamiayi. Juanjainkia nankaamas Jehovan nukape uwi enentaimtimiayi tura ti kakarmauyayi. Tumaitiat nankaamantu enentaimcha asa amijiai metek Yuusa yaintrinjiai tu timiayi. Juankan ainis turawaip timiania nuisha kakantrachmiayi antsu waitnentas ainis timiayi. Juan ainis turamia nuinkia warak ainis turachiash tu enentaimsachmiashia.

6. Yuusa suntari nankaamantu enentaimcha ainiana ainis atai tusar itiurkatniuitiaj?

⁶ Yuusa suntari nankaamantu enentaimcha ainiana ainis atai tusar itiurkamniaitiaj? Warinmansha Yuusna najankur tukini wekashkur tura ti neka ainis ajachkur nankaamantu achattaji (1 Kur. 4:7). Jehová nukap uwi enentaimta asar turutskesha warinmansha anaikiamu asar chikichjaish nankaamas enentaimtumaschatniuitji. Warinmansha Yuusna ti nukap yaimiakrisha nankaamaku enentaimin achatniuitji (Ruk. 9:48). Yuusa suntari itiurin ainia aitkiasrik iisha chikich aents yaintasar wakeraji tura ii imia nankaamakua ainis enentaimtiksachartiniaitji.

7. Yaksha chichareakur nankaamantu enentaimcha atai tusar wari turatniuitiaj?

⁷ Nuyasha ii yachi ii umainsha turutskesha ii uchirinsha awajiame tusar chicharkatniuitkiursha chichareakur nankaamantu enentaimtsuk titiniaitji. Urutainsha yaksha nakak chicharkamniaitji tumaitkiusha Yuusa suntari Juankan itiur chicharkamia aitkiasrik aneasmajai turattsar wakeraji. Yaksha nakak takursha imiancha ainis enentaimtiksashtiniaitji. Nankaamantu enentaimchaitkiurkia arantamujai aneamujai Yuusa chichamejai chicharkartatji (Kurs. 4:6).

YUUSA SUNTARINKIA AENTSTIN ANENMAINIAJI

8. a) Rúkas 15:10 tana aintsan Yuusa suntari aentsun anena asar itiurin ainia? b) Yuusa suntarisha Yuusa chichame etsermanumsha itiur yainmainiaj? (nakumkamusha iista).

⁸ Yuusa suntarinkia aentsun anen ainiawai. Yaksha tunaa najana ene enentaimia ajas Jehovai waketkimtainkia Yuusa suntarinkia warau ainiawai. Tura aintsan aents Jehovanu nekaa ni iwiakmarincha yapajiakuinkia warau ainiawai (Rúkas 15:10 aujsata). Yuusa suntarinkia Yuusa chichame etsermanumsha yainmainiaji (Apu. 14:6). Ninkia aentsjai nakak aujmatcha ainiawai tumaitkiusha ya Yuusna nekaattsa wakeruinia nu eakartinian yainmainiaji. Tumaitkiusha ashi aents wainkiatniunam Yuusa suntarinkia yainmaji tu tichamniaitji. Turasha Jehovaka ni kakarmarijiaisha yainmakrin penker aents wainkiarminiaitji turutskesha winia nekarat tusa nu aentsun ni kakarmarijiaisha yainminiaiti (Hech. 16:​6, 7 TNM). Jehovaka ni suntarijiainkia nukap takakmawiti tuma asamtai Yuusa chichame etsermanumsha ni suntarijiai tuke yainmaktatji. (Seainiam Yuus yainkiarmiayi tana nui iista).b

9. Yuusa suntari aentsun anenana aitkiasrik iisha aents aneasartai tusar itiurkatniuitiaj?

⁹ Yuusa suntari aentsun anenana aitkiasrik iisha aents aneasartai tusar itiurkatniuitiaj? Yanaksha ataksha testigo de Jehová ajasai tusar etserkarmatai Yuusa suntari warainiana aintsan warastiniaitji. Warasmajai ataksha shiir amajsartiniaitji tura ni shiir enentaimtajnia nu titiniaitji (Ruk. 15:​4-7; 2 Kur. 2:​6-8). Nuyasha Yuusa suntari aentsun anenana aitkiasrik turattsar Yuusa chichame tuke etserkatai tusar kakartiniaitji (Ecl. 11:6 TNM). Tura Yuusa suntari ii Yuusa chichame etsereakrin yainmainiajnia aitkiasrik iisha ii yachi ii umai Yuusa chichame etserkatniunam yainkiartiniaitji. Yama Yuusa chichamen etserkatniun juarainiana nu tura uuntmantu ainiana nusha nuyanchuka jaa pujuiniana nusha Yuusa chichame etserkarat tusar yainkiarminiaitji.

10. Sara turamiania nuna wari nekaamniaitiaj?

¹⁰ Yuusa chichame ti nukap etserkatin jeachkursha wari itiurkamniaitiaj? Yuusa suntarinkia Yuusa chichame etserkatniun yainmakarminiaitji. Ii umai Indianmaya Sarac naartin ni nankaamasmiania nu nekaatai. 20 uwi iniankas precursora ajasman takumiayi tumaitkiusha aya neachma sunkurmak nantaitniun tujinkiamiayi. Ainis nankaamak ti kuntuts enentaimmiayi. Tumaitkiusha ni umai ni kai shiir amajainiam tura Yuusa chichamencha tuke aujea asa penker enentaimpramiayi. Ii umainkia itiur etserniuya ainis etserkatniunka jeachmiayi. Ekemas papiin aar etserkatniuncha jeachmiayi, ayataik telefononmani etserkamniuyayi. Tuma asa yaunchuk aentsun Yuusnan uja wemiania nuna untsuk auj wemiayi.Tura untsukaram chikich aentscha Yuusa chichamen nekaattsar wakeruiniawai tu tiniu armiayi. Aini etseruk Sara 70 aentsun Yuusa chichame unuiyamun takumiayi. Nukap aentsun unuinia asa mashiniun unuiniartinian tujinmiayi. Tuma asa ni unuiniamu armiania nuna unuiniararat tusa ni Yuusnumia umain ni Yuusnumia kaincha susarmiayi. Ii umaijiai unuimiarmiania nuka iruntainiam wenasha irunui. Yuusa suntarinkia ii umai Sara jaayatcha Yuusa chichamen etserkattsa kakana ainis turuinianka yayainiak warainiawai.

YUUSA SUNTARINKIA KATSUNTIN AINIAWAI

11. Yuusa suntarisha warinia katsuntraruit?

¹¹ Yuusa suntarinkia ju nunkanam yajauch irunna nuna uwir uwir iiniaksha katsuntas pujuiniawai. Iwianch ni suntarijiai Jehovainia aran ajasarmiania nunasha Yuusa suntarinkia wainkiarmiayi (Náṉ. 3:1; 6:​1, 2; Jut. 6). Yuusa suntari iwianchi suntarin wajatramiania nuna Yuus papii aujmatui (Tan. 10:13). Yuusa suntarinkia warumchik aents Jehovan enentaimtusaruana nunasha wainkiaruiti. Ainis wainiainiaksha Jehovan tuke umirkaruiti tura warasmajai Jehovan enentaimtuiniawai. Ukunmatainkia Jehová yajauch turamun amuktatna nuna nekainiawai.

12. Katsuntratai tusar wari itiurkamniaitiaj?

¹² Yuusa suntari katsuntin ainiana aitkiasrik iisha turatai tusar itiurkatniuitiaj? Iisha yanaksha itiurchat awajainiamu wainminiaitji turutskesha Jehová enentaimta asakrin iincha kajertamiarminiaitji. Tumaitkiusha Jehovaka yajauchia nuna nekas amuktatui tu enentaimiaji. Tuma asamtai Yuusa suntari aitkiasrik penkera nu turatin yawetkishtiniaitji (Kar. 6:9). Nuyasha Jehová wi yaintatjarme turameaji (1 Kur. 10:13). Katsuntin atai tusar tura warasar pujustai tusar Jehová ni kakarmarin surusat tusar seatniuitji (Kar. 5:22; Kurs. 1:11). Amincha Jehová enentaimta asakmin kajertamainiakui itiurkamniaitiam? Sapijmiatsuk Jehová nekas yainkiattawai tu enentaimsata. Ninkia aminkia iniaitiamsashtatui tura kakarmancha amastatui (Isr. 13:6).

JEHOVÁ IRUNTRAMURIN YAJAUCHIA NU AIN TUSAR YUUSA SUNTARI IIN AINIAWAI

13. Amukatin tsawannum pujajnia jui Yuusa suntarisha wari takatna najanainia? (Mateo 13:​47-49 TNM).

¹³ Amukatin nuntumsamunam pujajnia jui Jehová ni suntarin takatan susaruiti (Mateo 13:​47-49 TNM aujsata). Yuusa chichame etsereakrin untsuri aents ashi nunkanmania Jehovai weamkarminiaiti. Jehovan enentaimtin ajastasar yapajniainiasha irunui tura chikichkia yapajniatniun nakitiainiasha irunui. Yuusa suntarinkia penker aents ainiana nuyainian yajauch aentsun akanainiawai. Ainis turuiniak Jehová iruntramurin yajauch ain tusar yaimiainiawai. Tumaitkiusha yaksha Jehovainia aran ajaska penkesha waketkishminiaiti tusar tatsuji turutskesha Jehová iruntramurinkia itiurchatka atsuwiti tusar ainis tatsuji. Yuusa suntarinkia Jehová iruntramurin yajauchia nu ain tusar yaimiainiawai.

14, 15. Yuusa suntari Jehová iruntramurin yajauch najanma ain tusar yaimiainiana aitkiasrik iisha yaimkiatai tusar wari turatniuitiaj? (Nakumkamusha iista).

¹⁴ Jehová iruntramurin yajauch ain tusar Yuusa suntari iiniana aitkiasrik turatai tusar iisha itiurkamniaitiaj? Ashi warinmansha yajauchia nu turawaij tusar kakakur ainis turattaji. Tuke penkera nu najankir wetasar penker aents ainiajai shiir amajnaisatniuitji tura warinkisha Jehovainia aran amajtamsamniaitiajnia nusha nakitratniuitji. Ainis turakrinkia yajauchia nuka Jehová iruntramurinkia atsuttawai (Sal. 101:3 TNM). Tura ii yachi ii umainsha Jehovan umirkarat tusar yainkiarminiaitji. Yaksha ii Yuusnumia yachi ii Yuusnumia umainsha tunaa najana nekaarkia itiurkatniuitiaj? Anea asar uuntri ainiana nujai aujmattsata timiniaitji. Tamaitiat uuntri ainiajai aujmatchakuinkia uuntri ainiana nu ii ujakartiniaitji. Ii yachi ii umainsha majatar pujana nuna warik yainkiarat tusar ainis turatniuitji (San. 5:​14, 15).

¹⁵ Yajauchia nuna najanainiaka jiikmia artiniaiti. Nu nankaamasmatainkia jiikmia ainiajainkia nawamnaikiashtatjid (1 Kur. 5:​9-13). Ainis turakur Jehová iruntramurin yajauch ain tusar yaimiaji. Nuyasha jiikmia ainiana nujai nawamnaiyachkur Jehovai waketkittsar warinia turawartiniait nuna turawarat tusar yainkiartatji. Tura Jehovai ataksha waketainiakuinkia Jehová nuya Yuusa suntari aintsan iisha warastatji (Ruk. 15:7).

16. Ameja Yuusa suntari aitkiasmek turattsam wari turatin enentaimiam?

¹⁶ Yuusa suntari najanainiana nu neka asar tura nijiai metek takakmakur shiir enentaimiaji. Yuusa suntarinkia nankaamantu enentaimcha ainiana aintsan atai tusar nuya aentsun anen ainiana aitkiasrik turatai tusar tura katsuntin ainiana aitkiasrik atai tusar kakarartai. Tura aintsan Jehová iruntramurin yajauchia nu ain tusar tuke yaimkiartai. Yuusa suntari turuiniana aitkiasrik iisha turakrikia Jehovan enentaimtuiniana nui iisha tuke pachitkia atatji.