Jehová tuke ikiakatmartatui

1. Judío aents Babilonianam pujuarmiania nui itiur pujuarmia?

Judío aents Babilonianam matsamiarmiania nui enentaimsatai. Jerusalenkan emesainiamun wainkiaruyayi. Tunaan najanawaru asarmatai yaja nunkanam Babilonianam jukiaruyayi (2 Crón. 36:​15, 16, 20, 21 TNM). Babilonianam pujuiniaksha penkertaku pujuarmiayash tumainti (Jrm. 29:​4-7). Tumaitkiusha nui pujustinkia yupichuchichuyayi tura aini pujustinian nakitiarmiayi. Israel aents nui pujus junis timiayi: “Papirúnianmaya̱ entsanam yantamach nui̱ matsamsar Seun enentáimtusar útniuyaji” tu timiayi (YKan. 137:1). Judío aentska kuntuts matsamiarmiania nu nekaamniaitji tumaitkiusha ya ikiakararminiuya?

2, 3. a) Judío aents Babilonianam matsamiarmiania nuna yaintaj tusa Jehová itiurkamia? b) Ju akankamunmasha wariniua unuimiatrattaj?

² Jehovaka tuke ikiakatmaji (2 Kur. 1:3). Tura ninin weamainiana nunaka anenaiti tuma asa ikiakartasa wakeriniaiti. Judío aents Babilonianam pujuarmiania nuka ene enentaimia ajasar nini ataksha waketkiartiniuyania nuna nekamiayi (Isa. 59:20). Tuma asa judío aentsun Babilonianam juiniatsain 100 uwi taasu ai Isaiasan papiin aarat tusa utsukmiayi. Urukamtai nu papiin aarat tusa utsukmia? Isaías junis aarmiayi: “‘Wi shuar shiir enentáimtikrarum waramtiksatarum’ tawai atumí Yusri̱” tu aarmiayi (Isa. 40:1). Jehovaka judío aents Babilonianam pujuarmiania nuna ikiakartin asa Isaiasan papiin aamtikramiayi.

³ Iisha urutainsha yaksha ikiakatrat tusar wakeriniaitji. Ju unuimiateamunmanka judío aents Babilonianam matsamiarmiania nuna Jehová itiura ikiakararmia nuna unuimiatrattaji. Emkaka ene enentaimia ajainianka Jehovaka tsankurartatjai timiania nuna nekaattaji. Nuyasha Jehová ukunmatai penker pujustin atatui judío aentsun tiarmiania nuna tura aintsan sapijmiakarain tusasha yainkiarmiania nunanush nekaattaji. Nuna unuimiatkur Jehová yamaisha itiura ikiakatmaj nu nekaattaji.

JEHOVAKA WAITNENKARTIN ASA TSANKUKRATNIUITI

4. Jehovasha waitnenkartin asa itiurkamia? (Isayas 55:7).

⁴ Yuus papii Jehovan junis tawai: “Nisha ii Aparí̱nti. Iin waitnentramaji” tu tawai (2 Kur. 1:3). Waitnenkratin asa judío aents Babilonianam matsamiarmiania nuna ene enentaimia ajainianka tsankurattajai tu timiayi (Isayas 55:7 aujsata). Jehová junis timiayi: “Túrasha amukashtin waitnenkartutairja̱i̱ weantúktatjame” tu timiayi (Isa. 54:8). Nunasha itiuran turatniuya? Judío aentska tunaamkaru asar waitsartiniuyayi tumaitkiusha Babilonianmanka tuke matsamsashtatrume tu timiayi (Isa. 40:2). Judío aents ene enentaimia ajasaruyania nuka Jehová timiania nui enentaimsar kakararminiuyayi.

5. Judío aents enentaimiarmiania nujaisha nankaamas iikia Jehová nekas waitnenkartiniaiti urukamtai ainis taji?

⁵ Wari nekaaj? Jehovaka ti tsankukratniuiti. Judío aents Babilonianam matsamiarmiania nuka nuna nekarmiayi. Tura iisha yamaiya jui nu paant nekaji. Jehová tsankukratkattsa warinia turait nu neka asar nuka nekasaiti tu taji. Isaías timiania nuka nukape uwi nankaamasu ai Jehová aentsu tunaarin akikmakat tusa ni uchirin akupkamiayi. Jesús ii tumashrin akikmakmiania nujai ii tunaari asakarma aminiaitji (Tur. 3:​19, 20; Isa. 1:18; Ipi. 1:7). Jehovaka ti waitnenkartiniaiti.

6. Jehová waitnenkartiniana nuisha urukamtai enentaimsatniuitiaj? (Nakumkamusha iista).

⁶ Yaunchuk umitmakmanum enentaimsar kuntuts enentaimiakrinkia Isayas 55:7 nui tana nu ikiakatmarminiaitji. Yaunchuk umitmaku asar waitiakrikia ti kuntuts enentaimminiaitji. Tumaitkiusha tunaa najanaitiajnia nu etserkaitkiurkia Jehová ii tunaarin tsankurtampraitji tu enentaimsatniuitji. Ninkia ii tunaarin tsankukratkanka nui enentaimias pujuchuiti (Jirimías 31:34 nui tana nujai apatkam iista). Iisha aitkiasrik nui enentaimsar pujushtiniaitji. Yaunchuk awajiruitiajnia nui Jehovaka enentaimtsui antsu yamai najaneajnia nui enentaimiawai (Ezeq. 33:​14-16 TNM). Jukerusan Yuus waitnenkartin asa yaunchuk umitmaku asar itiurchat nankaamajnia nuna mash emenkaktatui.

7. Uuntri ainiajai natsamtsuk aujmattsatai tusar wari itiurkatniuitiaj?

⁷ Tura tunaa najanamu etserkachu asar itiurchat enentaimiakrikia wari turatniuitiaj? Uuntri anaikiamu ainiana nu yainkiarat tusar aujsatniuitiajnia nuna Yuusa chichame aujmateawai (San. 5:​14, 15). Ii tunaamkaitiajnia nu ujakartin yupichuchichu aminiaiti. Tumaitkiuisha Jehová nu aishmankan iin yainkratkarat tusa anaikiaiti. Ene enentaimia ajasuitkiurkia Jehová tura uuntri anaikiamu ainiana nusha waitnentamujai yainmakartatajnia nui enentaimsar natsamtsuk uuntri ainiajai aujmattsatin wakerittiaji. Ii yachi Arthura naartinian Jehová waitnenta asa itiur ikiakarmia nu nekaatai. Ninkia umitmaku asa ti itiurchat enentaimmiayi. Ninkia junis tawai: Misu tsanirmamun chikichik uwi jeastatuk ii pujumiajai. Tuma pujai iruntramunam iik nekaamatniun Yuus amasuitiajnia nunanun jintinkratman antukmiajai. Nuna antukan nuarnasha tura uuntri anaikiamu armiania nunasha wi turamun ujakarmiajai. Nuna turan wampu nekapramiajai tumaitkiusha wi turamiajna nui enentaimsan itiurchat nekapmiajai. Uuntri armiania nuka Jehovaka nakitramprachuiti, ninkia anenkratin asa chicharkartiniaiti tu turutiarmiayi. Ni turutiarmiania nuka shiir enentaimsatniun yainkiamiayi tura itiurchat enentaimmiancha kajinmatkimiajai ii yachi tu tawai. Ii yachi Arthur naartinkia yamaikia precursor regular tura iruntramunam yaimin anaikiamuiti. Ene enentaimia ajasakrinkia Jehová tsankukratniuana nu neka asar shiir enentaimiaji.

JEHOVAKA URUMA NUI PENKER PUJUTTAJNIA NUNA UJATMAJI

8. a) Jehovasha judío aents armiania nuna itiurkattajrume timia? b) Isayas 40:​29-31 tana aintsan judío aentscha Jehová timiania nui enentaimsar urukawarminiuya?

⁸ Babilonianam uunt anaikiamu a wearmiania nuka chikich nunkanmania achikiar itiamu armiania nunaka penkesha akupcha armiayi. Tuma asamtai judío aents nui pujuarmiania nuka Jerusalennumka atakka waketkishtiniapitjia tu enentaimsarminiuyayi (Isa. 14:17). Tumaitkiusha Jehovaka Babilonianmaya jiktiatajrume tu timiayi. Jehová nuna turawain tusa yaksha warinkish itiurkashminiuyayi (Isa. 44:26; 55:12). Jehovajainkia Babiloniaka nunka juyuri aintsauyayi (Isa. 40:15). Nunka juyurin nase umpui yupichuch emenkakminiana ainis Jehovaka judío aentsun Babilonianmaya yupichuch uwemtikrartiniuyayi. Judío aents Babilonianam pujuarmiania nuka Jehová timiania nui enentaimsar shiir enentaimsarminiuyayi. Isaiassha junis aarmiayi: “Uunt Yusan nákainia nuka ataksha kakaram ajasár ukukuí nanaak yakí̱ wekaana núnis wekasartatui” tu aarmiayi (Isayas 40:​29-31 aujsata). Jehová uwemtikiattajrume timiania nui enentaimsar judío aentska kakararminiuyayi.

9. Judío aentscha Jehová tiniuana nunaka nekas umiktatui urukamtai tu enentaimsarminiuya?

⁹ Judío aentska Jehová yaunchuk timiania nu imiatrusan uminkian wainkiaru asar yamaisha ni tiniuana nunaka nekas umiktatui tu enentaimiarminiuyayi. Asirianmaya aents Israel aentsun nupetkar nui pujuinianka yaruakarmiania nuna nekarmiayi (Isa. 8:4). Nuyasha Babilonianmaya aents Jerusalenkan emesrar nui matsatainian yaruak wenan wainkiaruyayi (Is. 39:​5-7 TNM). Babilonianmaya uunt naamka Sedequiasan jiin ukustur Babilonianam jukiniuyania nunasha nekarmiayi (Jrm. 39:7; Isk. 12:​12-16). Jehová tiniuyania nuka mash uminkiauyayi (Isa. 42:9; 46:10). Tuma asamtai Babilonianmaya uwemtikrattajrume Jehová tu timiania nunaka nekas turattawai tu enentaimsarmiayash tumainti.

10. Shiiram nunkanu kajinmatkij tusar itiurkatniuitiaj?

¹⁰ Wari nekaaj? Majat enentaimprar pujakrinkia Jehová tiniuana nu ikiakatmarminiaitji. Ju nunkanam ti itiurchat irunmanum pujaji tura ii nemasrisha ti kakaram ainiawai tumaitkiuisha majatrashtiniaitji. Jehovaka uruma nuinkia itiurchatcha atsamunam ti penker amunam tuke iwiaku pujuttarme turameaji. Jehová ainis tana nu penkesha kajinmatkishtiniaitji. Nui enentaimchakrikia aa warinkisha ti penker irunu ventana wapik asamtai mushatma iiyajnia ainis aminiaitji. Ainis nankaamasain tusar itiurkatniuitiaj? Shiiram nunkanam pujamusha uruku atata nui enentaimsatai tusar tsawan ankawartai. Uruma nui penker pujuttajnia nuna papii aujmatu aujsartai nuyasha videosha nuna aujmatu iisartai tura nampet nuna pachis nampeamu antukartai. Nuyasha Jehovajai aujmatkur shiiram nunkanu wari uminkiat tusar wakeraj nu tiartai.

11. Ii umai tsuamashtai sunkuran achimiaku kakartaj tusa itiurea?

¹¹ Ii umai Joy tsuamashtai sunkuran achimiaku ni tana nu aujmattsatai. Uruma nui Jehová turattana nu itiura ikiakaruit nuna aujmateak junis tawai: Penke kakarmachu nekapeakun Jehovan itiur nekapeaj nuna uja uja amajniuitjiai. Wari ninkia wi tajana nuna anturtiniaiti. Jehovaka kakartinian kakarman surusuiti tu tawai (2 Kur. 4:7). Ninkia shiiram nunkanmanka yaksha nui pujaka jaajai tichattana nuisha enentaimniuiti (Isa. 33:24). Iisha ii itiur nekapeaj nu Jehová mash ujakrikia tura uruma nui turattana nui enentaimiakrikia kakaram ajastatji.

12. Jehová ni chichakmarin nekas umiktatui urukamtai ainis taji? (Nakumkamusha iista).

¹² Judío aents Babilonianam pujusar enentaimiarmia aintsan Jehová tiniuana nunaka nekas umiktatui taji. Yamaiya jui Jehová tiniuana nuna itiur umia nui enentaimsartai. Watskea Yuus papii tana aintsan uunt matsatkamu ti kakaram awai, nuka kakarmaitiat iiksan kakarmachuiti (Tan. 2:42, 43). Nuyasha ti uurma tui tuinsha nankaama antaji tura Yuusa chichamesha ashi nunkanam etsereaji (Mat. 24:​7, 14). Yamai Jehová timiania nu timiatrusan nankaama wainiakur uruma nui turatniun Jehová tiniuana nusha nekas turunattawai tu enentaimiaji.

SAPIJMIAKCHATNIUN JEHOVÁ YAINMAJI

13. a) Babilonianmaya jinkiartin ishichik ajasarmiania nui judío aentscha wari itiurchatna wainkiartiniuya? b) Isayas 41:​10-13 nui tana aintsan judío aents Babilonianam pujuarmiania nunasha Jehová itiura ikiakararmia?

¹³ Judío aents Babilonianam pujuarmiania nuna uwemtikrattajrume tinia Jehová ikiakararmiayi tura uwemtikrartiniuyania nu tsawan nuntumsamtai ti itiurchat atiniuyania nunasha Jehovaka nekaamiayi. Nu tsawan nuntumsamtai uunt anaikiamu Babilonia ayam chikich nunka iruniarmiania nuna nupetak Babiloniancha enkemtuatniuyania nuna Jehová yaunchuk tiniuyayi (Isa. 41:​2-5). Judío aents sapijmia pujuartiniuyashia? Nu nankaamatsain Jehová judío aentsun ikiakartaj tusa ju chichaman aamtikramiayi: “Sapijmiakaip. Warí Wi ámiji̱a̱i̱ pujajai. Ashamkaip. Warí Wikia ame Yúsrumetjai” tu aamtikramiayi (Isayas 41:​10-13 aujsata). Judío aentsnasha urukamtaiya “Warí Wikia ame Yúsrumetjai” ainis timia? Winia enentaimtursatniuitrume tusa ainis tichamiayi antsu wi atumin yaintaj tusan atumjiai pujuttajai nuna titiasa ainis timiayi (YKan. 118:6).

14. Judío aents sapijmiakarain tusa Jehová warinia itiurkamia?

¹⁴ Jehovaka judío aents armiania nuna ikiakartaj tusa ni ti nekana tura ti kakarmana nuisha enentaimtikrarmiayi. Nayaimpinmani iimsarum yaa iistarum, ashi yaa irunna nunaka wi najankaitjai tu timiayi tura nuna naarinkia chikichkimsan mash nekajai tu timiayi (Isa. 40:​25-28). Aintsan nin enentaimtuiniana nunasha chikichkimias ni naarin nekawai. Yaan ni kakarmarijiai najanamiania aintsan nin enentaimtuiniana nunasha yaintinian kakarman achiakeawai. Tuma asamtai judío aentska sapijmia pujuchartiniuyayi.

15. Judío aents Babilonianam pujuarmiania nu iwiarnarar pujuarat tusa Jehová itiurkamia?

¹⁵ Nuyasha iwiarnarar pujuartasa warinia turawartiniuya nunasha Jehová timiayi. Isaías papiinium Jehová junis timiayi: “Wii shuar arumna nutirmeka, atumi pujutairin wayarum waiti apentiarum. Winia kajetair nankaamam umkatarum” tu timiayi (Is. 26:20 TNM). Ju chichamka uunt anaikiamu Ciro Babilonian nupetkamiania nui uminkiamiayash tumainti. Ciro Babilonianam wayamiania nui ni jeen enkemawar pujuiniachuka maatarum ni suntarin tu timiania nuna yaunchuk nankaamasun unuimiatin griego aents Jenofonte naartin nuna aarmiayi. Babilonianmaya aentska ti sapijmiakcharmiashia. Tumaitkiusha judío aentska Jehová timiania nuna umikiaru asar uwemprarmiayash tumainti.

16. Ti waitsatin tsawan jeattana nuisha nui enentaimsar urukamtai sapijmiakchatniuitiaj? (Nakumkamusha iista).

¹⁶ Wari nekaaj? Jukerusan ti waitsatin tsawan jeattawai. Nu tsawan juarkui aentska waurkamnia nekapiartatui tura ti ashamiartatui. Tumaitkiusha iikia ainis nankaamaschattaji, wari ii Yuusrinkia Jehovayaiti tuma asamtai sapijmiakchattaji, uwempratin jeatemayi tusar kakaram ajasar shiir enentaimsattaji (Ruk. 21:28). Ashi nunkanmania aents iruntrar amukmaktaj tusar jatetmainiakrincha Jehová uwemtikramprattaji tu enentaimsattaji. Jehová ni suntarijiai ayamprutmaktatji. Nuyasha uwemprattsar wari itiurkatniuitiaj nunasha Jehová turamtiatji. Nunasha itiura turamtiataj? Nuka nekatsji tumaitkiusha ii tuimpia irunniuitiaj nui ujatmakartatji. Uwemprarat tusa init wayatniun Jehová timiania nuka iruntramunam pachinkiatin iniaisashtinniash timia tumainti. Iwiarnarar pujustai tusar wakera asar ii yachi ii umainia kanakchatniuitji, Jehová iruntramuri turameajnia nusha wakerusmajai umiktiniaitji. Jehová niyaiti ni iruntramurin emtikiana nuka tu enentaimsatniuitji (Isr. 10:​24, 25; 13:17).

17. Jehová ikiakatrat takumka wari itiurkatniuitiam?

¹⁷ Judío aentsjainkia Babilonianam pujustin yupichuchichuitkiuisha Jehová ikiakararmiayi. Iincha aitkiasan ikiakatmartatji. Tuma asamtai uruma nui warinkisha nankaamakuisha Jehová ikiakatrat tusam weamkata. Ninkia ti waitnenkratniuiti. Jehová uruma nui turattana nu kajinmatkij tusam tuke nui enentaimsam pujusta. Jehovaka ame Yuusrum asamtai warinmansha sapijmiakchatniuitme.