“La Sim Nyɛkɛndɛ Yi, La Kpeŋaŋ Te”

1-2. O nɛi kuɛɛ choo Kilisiɔŋnɔɔ cho yɛ maa chiɛi choo choo wo? (1 Kɔliŋtiaŋ 15:​58)

A WƆSI 1978, ma taŋgul chiɛi choo choo vilɛi vilɛiyo o Tokoyo niŋ, lɛŋnde Chepaŋndeŋ. Mi waŋnda yiyaŋ maa chiɛi koŋ viu niŋ isisi le kanifuule, teleŋnda bɔɔbɔɔ mi lɛŋnde nyiiyaaleŋ le yɔŋnuŋ o chiee bɛndu koŋ niŋ. Yɛɛ wanaa taŋgul chiɛi koŋ nda tosa yɛ le mbo viou isisi? Mi wanaa kaŋ tosa a sabu le mi chiɛi koŋ wa o kala kala, nduyɛ mbo biunuŋ mɛɛ mɛɛ lɛŋndeŋ le nyiiya. Kilisiɔŋnda cho ko maa chiɛi choo choo koŋ. O nɛi kuɛɛ choo?

² Kilisiɔŋnɔɔ nɔ mbo sim nyɛkɛndɛ yi, vɛlɛ mbo chɔm sinapɛŋgoo. O nɔ mbo wa o kala poŋ o kpeŋaŋ te, te o hiŋ pɛ a sawala Chɛhowalaŋ diikɔŋndo okɔɔ. (Nuawɔ 1 Kɔliŋtiaŋ 15:​58.) Mbo wa “o bɛɛndiaŋ le diikɔŋndo” nduyɛ o feŋaŋ o laalaŋ ndɔɔ choo le. O baa pilɔɔ choo, mbo wa vɛlɛ “wana kindu isɔɔ dimul te wo,” ɔɔ mbo chɔm sinapɛŋgoo, te o che pɛ saboo le keŋ tosaa. (Chemi. 3:​17) Te Kilisiɔŋnɔɔ pɛɛku pɛ le kpeŋ kpeŋndo hoo sinaa, keŋ mala ndu o ve wana baŋ isɔɔ ɔɔ mbo wa wana saalaŋ isɔɔ le wo le. O buŋgɛi hei niŋ, ŋ cho pɛɛku miŋ che mɛɛ naŋ nɔ miŋ sim nyɛkɛndɛ yi yɛ. Ŋ cho vɛlɛ chɔ nɛilaŋ la ŋuɛɛnu la Setana soliŋ kpeku le naa dialloŋ diyɔɔ wo vɛlɛ a mɛɛ naŋ sim yi o laalaŋ naa choo yɛ.

VƐƐ NAŊ SIM YƐ NYƐKƐNDƐ YI?

3. Sawala kuɛɛ Chɛhowa ke yɛ naa o Walta Kiilaa 15:​28, 29 niŋ?

³ Chɛhowa cho Wana ke naa Sawalaŋ ndo ni, nduyɛ teleŋ o teleŋ mbo tosa ndi tɛtɛlɛ le mi wanaa nduaa bii sawala ndɔlaŋ bila. (Aisaya 33:​22) Le tamaseliiyo, mi dialii kuumbaŋ choo ve o wɔsiŋ kɛmɛ tasoŋ niŋ chɔm Kilisiɔŋnda nɛilaŋ layaa la mala nda ma sim nyɛkɛndɛ yi wo: (1) Kilisiɔŋnda nɔ ma fafaŋ nyɛm lasooluu woŋ, nduyɛ Chɛhowa kinɛi nda nɔ ni ma piɛi, (2) a nɔ ma diikuŋ sawa Chɛhowaa le koowaŋ fafaŋndo, nduyɛ (3) a nɔ ma diikuŋ sawala Chɛhowalaŋ le kaa ihini nɔɔlɛiyo fafaŋndo. (Nuawɔ Walta Kiilaa 15:​28, 29.) Vɛɛ Kilisiɔŋnda hau diikuŋ yɛ Chɛhowa o nɛila yaalaŋ ndaŋ niŋ?

4. Vɛɛ naŋ chɔm yɛ maa Chɛhowa kinɛi naŋ cho piɛiyo ni? (Sɔɔŋ Chɔɔmaŋndoŋ 4:​11)

⁴ Ŋ nɔ miŋ fafaŋ nyɛm lasooluu woŋ, nduyɛ Chɛhowa kinɛi naŋ nɔ ni miŋ piɛi. O sindɔɔ niŋ, mbo dimul Isɔluɛiya maa ndu kinɛi nda nɔ ni ma piɛi. (Ditɔnɔ. 5:​6-10) Mɛɛ Nyina Wɔɔŋndo tɔɔndaŋ Chiisu, mi Chiisu chɔm kpendekele maa Chɛhowa kinɛi naŋ nɔ ni miŋ piɛi. (Maa. 4:​8-10) Le hei, kposoŋ bɛɛ ŋ nɔ miŋ piɛi piɔmnda le. O faŋaŋ okoŋ kɔɔli, ŋ nɔ miŋ biilu simlachiaa lepiɛiya, simlachiaa le yalale chieeŋndeŋ, ɔɔ wanaa pɛlnuŋ ladio o chieeŋndo niŋ nda naŋ chaa mɛlɛka nda cho ni le. Kɛ, ŋ nɔ miŋ sim nyɛkɛndɛ yi o kumbuii Chɛhowɛi choo, nduyɛ ndu kinɛi naŋ nɔ ni miŋ piɛi kanifuule, ndu “toosiaa nyɔɔŋ kpou ni.”​—Nuawɔ Sɔɔŋ Chɔɔmaŋndoŋ 4:​11.

5. Le yɛɛ naŋ nɔ yɛ miŋ diikuŋ sawa Chɛhowa ke naa a yoomoo vɛlɛ a koowaŋ okɔɔ wo?

⁵ Ŋ nɔ miŋ diikuŋ sawa Chɛhowa yɔŋgu a yoomoo vɛlɛ a koowaŋ okɔɔ wo. Le yɛɛ? Kanifuule o dimi maa o koowaŋ niŋ yoomoo cho ni, nduyɛ ke sɔvɛ fula ndu o ba wo yoomoo cho ni. (Lɛvi. 17:​14) Teleŋ tase o dimul waŋnda chieeya le ma de visioŋ ndo, mbo dimul nda maa a dia koowaŋ te. (Chɛ. 9:​4) Mɛɛ o wa vɛlɛ Muuse sawalaŋ kioo le Isɔluɛiya, mbo suaa vɛlɛ a sawa pilɔɔ hoo kpe okɔɔ. (Lɛvi. 17:​10) Nduyɛ, mbo ke dialii kuumbaŋ choo ve o wɔsiŋ kɛmɛ tasoŋ niŋ nɛi chɔmaa le ma dimul Kilisiɔŋnda kpou maa, a nɔ ma ‘hiou lachi a koowaŋ fafaŋndo.’ (Walta. 15:​28, 29) Ŋ nɔ miŋ sim nyɛkɛndɛ yi le sawaa hoo diikɔŋndo te ŋ wa pɛ kɛɛsiaa tosaa a danda makoŋgo naŋ nɔ miŋ chɛllo okɔɔ.b

6. Sɛmbɛ kuɛɛ naŋ nɔ yɛ miŋ dɔu le miŋ diikuŋ sawa Chɛhowa ke naa le kaa ihini nɔɔlɛiyo fafaŋndo wo?

⁶ Ŋ nɔ miŋ diikuŋ sawala Chɛhowa ke naa le kaa ihini nɔɔlɛiyo fafaŋndo laŋ. (Hibu. 13:​4) Mi kiilanɔɔ Pɔɔl dimi maa, naŋ “dii” dialuŋ naŋ, le yeemaŋ wɔɔŋ cho muŋ o chieeŋndo choo woŋ. Hei sim ni maa, ŋ nɔ miŋ kindiŋ o nɛi o nɛi niŋ le yeemaŋ nɔɔlɛiyoŋ fafaŋndo. Nduyɛ, ŋ nɔ miŋ tofa ɔɔ miŋ tosa nyɛ o nyɛ nyindu naa le kaa ihini nɔɔlɛiyo tosaa wo le. (Kolo. 3:​5; Choobu 31:​1) Te tɔɔndaŋndo komal naa pɛ, ŋ nɔ miŋ tosa nyɛ chɔ chɔ le yiyaŋndaŋ ɔɔ sɔɔŋ tosa miŋ tɛɛmbuu chaŋyɛi nɛi a Chɛhowa woŋ fafaŋndo.

7. Yɛɛ naŋ nɔ yɛ miŋ kɛɛsiaŋ o kɔl le tosaa, nduyɛ le yɛɛ?

⁷ Chɛhowa yeema naa miŋ ‘diikuŋ ndu a kɔllo kpou.’ (Luomaŋ. 6:​17) Nyɛ o nyɛ o dimul naa pɛ le tosaa, le tɔnɔ naa o wa ni. Nduyɛ kposoŋ bɛɛ ŋ tiuba miŋ siŋga sawala ndɔlaŋ te. (Aisaya 48:​17, 18; 1 Kɔliŋ. 6:​9, 10) Ŋ nɔ miŋ kindiŋ kpoke le ndu kɔllo nɛŋioo vɛlɛ miŋ nɔ yiyaŋ pilɛ wana ŋchondoo ndoo nɔ wo. Mbo poonyiaa aa: “I kɛɛsiaa a kɔl nuu kpou, le mi lo nyɛ sawala num ndaŋ la dimi wo tosaa, haaa a yoomu nuu mɛɛlulaŋ.” (Sam 119:​112) Kɛ, mi Setana kindiŋ o nɛi o nɛi niŋ le naa dialloŋ diyɔɔ. Nɛila kuɛɛ o soliŋ yɛ kpeku?

VƐƐ SETANA KINDIŊ YƐ LE NAA DIALLOŊ DIYƆƆ?

8. Vɛɛ Setana cho yɛ hau nyɛpalaa waŋnda tusi naa choo wo soliŋndo kpeku le naa dialloŋ diyɔɔ?

⁸ Nyɛpalaa nda tusi naa choo wo. Mi Nyina Wɔɔŋndo nyindu waŋnda le naa nyɛpalaa tusioo choo le halikpeŋ miŋ vi ŋdial. Kpeleŋ ndɔɔ cho le mbo “de” naa ni. Keŋ sim ni maa, o yeema mbo tɛɛmbuu chaŋyɛi nɛi a Chɛhowa. (1 Pitɛ 5:​8) Mi waŋnda ndaa kɔŋgɔliaŋ Kilisiɔŋnda o wɔsiŋ kɛmɛ tasoŋ niŋ, mi ndaa lɔɔ nda, nduyɛ mi ndaa dii nda le mɛɛ ndaa kɛɛsiaŋ o kɔl le simndaŋ nyɛkɛndɛ yi yɛ. (Walta. 5:​27, 28, 40; 7:​54-60) Setana cho wɔ hiouwɔɔ lachi kɛ a naa nyɛpalaa tusioo choo. Hei cho kpendekele te ŋ che pɛ mɛɛ nda cho puaapiliaa a ndepiliaa naa nyɛpalaa tusioo choo o Lɔɔsiaa a o lɛŋii cheleŋnde niŋ yɛ. Nduyɛ, mi wanaa simul naa wa tusi puaapiliaa a ndepiliaa nyɛpalaa choo o nɛilaŋ lapum niŋ.

9. Chɔmndɔ tamaseliiyo a mɛɛ naŋ nɔ miŋ wa yekeŋ o nyɛkindilaa bɛŋgu yɛ.

⁹ Nyɛkindilaa. Mi Setana soliŋ vɛlɛ “nɛila ndɔla kaŋgalaalaŋ” kpeku le naa nyɛkindilaa handɔɔ choo. (Ɛfi. 6:​11) Ŋ tofaŋndɔ tamasi puaapilɛnɔ pilɛ diolaŋ Bɔb. Ma kua a puaapilɛnɔɔ hoo o fondaŋ chiɔuwaa le ndu yambɔɔ. Kɛ mbo dimul wanaa chiɔuwaa maa kposoŋ bɛɛ a nɔ ma miŋgi ndu koowaŋ o ŋdial te. Mi wana chiɔuwaa wa ndu yambɔɔ wo chɛl kɛɛsiaa ndɔɔ. Mɛɛ yuŋgu Bɔb wo miiŋgu o ndalo bɛɛ, mi wana wa ndu yambɔɔ wo kua ndu yilɔɔ ichɔl pilɛ. Mbo dimul ndu maa a cho ndu koowaŋ landɔɔ le, kɛ a cho koowaŋ nɔ o ba le wana sinaŋ dɛnɛ loo. Naapum, wana chiɔuwaa koŋ ndoo yiyaŋ maa Bɔb cho yiyaŋ ndɔɔ siŋga te wanaa nduaa faŋaŋ pɛ. Kɛ mi Bɔb sim nyɛkɛndɛ yi o kɛɛsiaa ndɔɔ choo. Mbo dimul ndu maa a nɔ ma landu ndu koowaŋ te, mɛɛ mɛɛ bahawɛi ndɔɔ wa.

10. Le yɛɛ yiyaŋ iwana chieeyaa chɛlɔɔ cho yɛ suɛi kpundɛ? (1 Kɔliŋtiaŋ 3:​19, 20)

¹⁰ Yiyaŋ iwana chieeyaa. Te ŋ chɛl pɛ yiyaŋ iwana chieeyaa, naapum mi keŋ tosa miŋ faŋaŋ Chɛhowa o ibuŋ, nduyɛ ŋ diikuŋ sawala ndɔlaŋ te. (Nuawɔ 1 Kɔliŋtiaŋ 3:​19, 20.) Mi “taasi chieeŋndo” hoo nyindu waŋnda le ma kɛɛ Chɛhowa diikɔŋndo. Mi Kilisiɔŋnda apum o kundaa Pɛkamɔm a Tayatilua niŋ chɛl yiyaŋ iwana chieeyaa le balaŋ wouwo o piɔmnda sooluuwo niŋ, vɛlɛ a o kaala nɔɔlɛila waŋnda wa tosaa o chiooŋ muŋ niŋ ndaŋ. Mi Chiisu ke kundala laŋ sila kala kalaa le ma soli balaŋ o kaala nɔɔlɛila nda wa tosaalaŋ niŋ. (Sɔɔŋ. 2:​14, 20) Hau bɛɛ, mi simullo komal naa le yiyaŋ iwana chieeyaa chɛlɔɔ. Lepum mi wanayaŋ naŋ a wanaa sina naa wa dɛɛniaa naa le miŋ tɛɛmbuu sawala Chɛhowalaŋ. Le tamaseliiyo, naapum ma dimul naa maa o cho suɛi wɔɔŋ le yeemaŋ naŋ peeloo le, vɛlɛ maa sawala paandulaŋ la cho o Baabuiyo niŋ ni.

11. Te ŋ yeema pɛ miŋ hiou lachi a simndaŋ nyɛkɛndɛ yi, yɛɛ naŋ nɔ yɛ miŋ fafaŋ? 

¹¹ Teleŋndaŋ lapum, miŋ yiyaŋ maa, nɛi chɔmaa Chɛhowa ke naa wo cho letuu le. Nduyɛ pɛŋ, lepum, mi simullo komal naa le miŋ “huulu sɔɔŋ cho ŋ poonyiaa woŋ choo.” (1 Kɔliŋ. 4:​6) Mi simlachiaa lepiɛiya o palɛi Chiisu ve niŋ tosa hakioo o nɛiyo hoo choo. Ma kɛsi sawalaŋ a ba nda, le halikpeŋ ma handu waŋnda wolɔɔla lusulɛilaŋ choo. (Maa. 23:​4) Mi Chɛhowa soliŋ Diom ndɔɔ vɛlɛ a kɔɔna ndɔɔ kpeku le naa nɛila chɔmaalaŋ kioo. Ŋ nɔ sabu o sabu le nyɛ cheleŋ handɔɔ o nɛila chɔmaala naŋ sɔla laŋ choo le. (Pulɔ. 3:​5-7) Lelaŋ, ŋ nɔ miŋ huulu nyɛ cho o poonyiaa o Baabuiyo niŋndo ɔɔ miŋ kɛsi sawalaŋ a nyɛ cho o Baabuiyo niŋ te wo okɔɔ le chaaŋaa naa laalaŋnda le.

12. Vɛɛ Setana soliŋ yɛ hau ‘sɔɔŋ lachoowaŋ’ kpeku?

¹² Choolaŋ. Mi Setana soliŋ ‘sɔɔŋ lachoowaŋ’ a “yiyaŋnda chieeŋndo” hoo kpeku le naa huiyo. Mbo tosa vɛlɛ hei le miŋ wa a piɔuviaŋ. (Kolo. 2:​8) O wɔsiŋ kɛmɛ tasoŋ niŋ, sɔɔŋ muŋ ŋtiŋ wa ni, yiyaŋnda iwana chieeya laŋ, pɛɛkula Chuula laa tolnuŋ o Baabuiyo choo le laŋ, a pɛɛkula cheleŋ maa Kilisiɔŋnda ndaa nɔ ma diikuŋ sawala Mɛlɛka ndoo ke Muuselaŋ ndo. Sɔɔŋ lachoowaŋ cho muŋ ni kanifuule, miŋ tosa mi waŋnda faŋa kɔllo o Chɛhowa choo, wana pɛɛkula tonyalaŋ la fula o ba wo. Hau, mi Setana soliŋ intanɛtiiyo kpeku le choolaŋ a konala lachoowala simlachiaa le yalale chieeŋndeŋ a dimilaŋ pɛŋgɛlaa. Miŋ cha sɔɔŋ waa nuaa a teleŋ Naa Kolonaa.c Mi Seiyaa Chɛhowaa tol nɛila chɔmaala kɔɔna Chɛhowaa kɔɔli laŋ, fafaŋ buulaŋnda wanaa wa choolaŋ ndaŋ nilaŋ yaŋɔɔ wa ndaa sɔla laŋ.—Maa. 24:​45.

13. Le yɛɛ naŋ nɔ yɛ miŋ fafaŋ sɔɔŋ faŋa naa kɔllo o sɔɔŋ sɔviɔŋ choo woŋ?

¹³ Nyɛm faŋa naa kɔllo o sɔɔŋ sɔviɔŋ choo woŋ. Pesiŋ bɛɛ ŋ nɔ miŋ faŋa kɔllo “o sɔɔŋ hiou wa ŋ sɔvɛ woŋ choo” le. (Filipi. 1:​9, 10) Te ŋ faŋa pɛ kɔllo o sɔɔŋ muŋ choo, mi keŋ tosa miŋ chua teleŋndo o sɔɔŋ cho ŋ sɔvɛ tau le woŋ choo. Sɔɔŋ muŋ ŋtiŋ cho ni, diolaŋ, koli kolilaŋ, yelelaŋndo, a wallo. Sɔɔŋ muŋ tiuba miŋ faŋa naa kɔllo o sɔɔŋ hiou wa ŋ sɔvɛ o yoomoo niŋ ndoŋ choo. (Luku 21:​34, 35) Le handɔɔ lechoo, lepaa o lepaa miŋ tuei a mɛɛ waŋnda hiŋaŋ diomndaŋ o sɔɔŋ chieeŋndoŋ choo vɛlɛ a o sɔɔŋ lemasaŋ choo yɛ o intanɛtiiyo choo. Ŋ nɔ miŋ tɛɛmbuu teleŋ naa le sɔɔŋ muŋ nilaŋ yaŋɔɔ le. Te o cho koŋ te, ŋ cho nda kandɔɔ tooloo o pɔmpɔmbɔ o kɔlta naalaŋ niŋ. Mi Setana soliŋ nɛilaŋ ndaŋ kpou kpeku le halikpeŋ miŋ vi ŋdial le nyɛ cho o kɛndɔɔ wo tosaa. Ŋ tofaŋndɔ nyɛ naŋ nɔ miŋ tosa le nɛila ndɔlaŋ fafaŋndo, nduyɛ miŋ sim nyɛkɛndɛ yi wo.

YƐƐ MALA YƐ NAA MIŊ LO ISISI NYƐKƐNDƐ YI?

14. Ɔɔ nyɔɔ opilɛ o mala naa miŋ lo isisi nyɛkɛndɛ yi o kumbuii Chɛhowɛi choo wo?

¹⁴ Yiyaŋ a sabu ŋ yɔŋgu yoomu numndo o Chɛhowa lo, nduyɛ ma sɔla yiŋɔɔ wo okɔɔ. Ma komal kpeleŋndo hoo kanifuule, num oo yeema ma sim o kumbuii Chɛhowɛi choo. Yiyaŋ a nyɛ tosa o teleŋ koŋ niŋ ma laalaŋ kɛsɛ maa a saaluŋ tonyaa wo. Mɛɛ ŋ pɛɛku tonya kpeekpeiyo a Finya num o choo choo niŋ okɔɔ, mi keŋ nyindu num le ma nɔ bɛɛleŋ le ndu vɛlɛ ma kaala ndu. Mi keŋ nyindu num vɛlɛ le ma nɔ laalaŋndo o ndu niŋ vɛlɛ ma mulul yɔŋ num wɔɔŋndo kɔɔ. Ma kɛɛsiaŋ o kɔl le kaala numnda wɔɔŋndaŋ malɔɔ, okoŋ ma bii yoomu numndo o nɛi chɛlaŋ a hɛnaŋ Mɛlɛkaa wo choo. Nduyɛ ma sinaŋ nyɛkɛndɛi mɛɛ ŋ sina maa Chɛhowa mal num haki. (Sam 32:​1, 2) O faŋaŋ okoŋ kɔɔli, ma kandu kɔlaŋ o bɔŋaŋnda leKilisiɔŋndaŋ, vɛlɛ ma kandu acheleŋnda dimullo a sɔɔŋ kɛndɛŋ ŋ wa pɛɛkoo woŋ okɔɔ. Mɛɛ ŋ yɔŋgu yoomu numndo o Chɛhowa lo vɛlɛ ma sɔla yiŋɔɔ, ma kandu kɔlaŋ o nɛi yoomoo choo. Nduyɛ, ma kɛɛsiaŋ o kɔl maa fɛɛŋ bɛɛ a feŋaŋ o nɛiyo hoo choo le.—Maa. 7:​13, 14.

15. Tɔnɔ yɛɛ naŋ sɔla yɛ te ŋ chua pɛ teleŋndo le Diom Mɛlɛkaa pɛɛkoo, nduyɛ miŋ yiyaŋ lechoo?

¹⁵ Pɛɛku Diom Mɛlɛkaa, nduyɛ ma yiyaŋ lechoo. Mi yɔmndo lo isisi o kala poŋ te puunduŋ ndɔŋ luɛi pɛ lɛŋ di. O nɛi pilɛ koŋ choo, naa bɛɛ tiuba miŋ lo isisi nyɛkɛndɛ yi te laalaŋ naa tɔlnuŋ pɛ o Diom Mɛlɛkaa choo. Mɛɛ yɔmndo hindu fau, lende koni puunduŋ ndɔŋ kua a pɛŋgɛlaŋndo vɛlɛ a luɛiyɔɔ lɛŋ ni. Naa bɛɛ te ŋ pɛɛku pɛ Diom Mɛlɛkaa vɛlɛ miŋ yiyaŋ lechoo, mi keŋ tosa mi laalaŋ naa kendu poŋ, nduyɛ miŋ sina kɛsɛ maa nɛila Mɛlɛkalaŋ la bɛnda le naa ni. (Kolo. 2:​6, 7) Yiyaŋ a mɛɛ nɛila chɔmaala Chɛhowalaŋ, silala ndɔlaŋ, vɛlɛ a manda ndɔɔ mala niŋ buɛiyaa nduaa o paandoo niŋ yɛ okɔɔ. Le tamaseliiyo, mi Isikiaa tofa nyɛkɛndɛi mɛɛ maalikɛinɔɔ wa chiɛi o che o yilaŋnde niŋnde tuuwo. Mi yilaŋnde hei luei Isikiaa yoomuaŋ. Nduyɛ i pɛɛku naa sɔɔŋ sɔvɛ sɔviɔŋ te o hiŋ pɛ a mɛɛ naŋ diikuŋ sawala Chɛhowalaŋ le piɛile tonyaleŋ tooloo yɛ okɔɔ.d (Isi. 40:​1-4; 43:​10-12) Naa bɛɛ, miŋ sɔla tɔnɔɔ tau te ŋ chua pɛ teleŋndo le Diom Mɛlɛkaa pɛɛkoo, vɛlɛ miŋ yiyaŋ o sɔɔŋ yiŋgoloŋ cho leniŋndoŋ choo.

16. Vɛɛ tiindaŋ Bɔb ndoo nɔ o Chɛhowa niŋ a kɔllo kpou wo mala yɛ ndu? (Sam 112:​7)

¹⁶ Dɔu tiindaŋ numndo kpou o Chɛhowa niŋ. Mi Masaa Deeve suaa a mɛɛ ndoo kaala Chɛhowa a kɔl ndɔɔ kpou yɛ okɔɔ. Mbo soli chondei aa: “Oo Mɛlɛka, I dɔu tiindaŋ nuu kpou o num niŋ.” (Sam 57:​7) Naa bɛɛ nɔ miŋ dɔu tiindaŋ naa kpou o Chɛhowa niŋ. (Nuawɔ Sam 112:​7.) Ŋ tofaŋndɔ mɛɛ hei mala Bɔb naŋ soo suŋ a ndu okɔɔ wo yɛ. Mɛɛ wana chiɔuwaa dimul ndu maa a cho kooma hiviaŋ kɛsi le wana sinaŋ dɛnɛ loo, mbo dimul ndu kpendekele maa te o yɔŋ pɛ maa koowaŋ nda cho ndu hivi o ŋdial ni, mɛɛ o cho kɛɛsiaa tosa le mbo faŋaŋ o fondaŋ chiɔuwaa koŋ. O mɛɛlulaŋ kpɔŋ, mi Bɔb dimi aa: “Kiisaŋ ve ya kposoŋ te, nduyɛ I ve buulaŋ te.”

17. Yɛɛ naŋ pɛɛku yɛ o suɛi yɔŋnaŋii Bɔb ve niŋ? (Tofa vɛlɛ fotueiyo.)

¹⁷ Bɔb ndoo kɛɛsiaŋ fɛŋ o kɔl le simndaŋ nyɛkɛndɛ yi malaŋ o kua o fondaŋ chiɔuwaa. O tasoo, ndoo nɔ yeemɛi le Chɛhowa kɔllo nɛŋioo. O diiŋ ndɔɔ, mbo chua teleŋndo le pɛɛkoo nyɛ Baabuiyo a nyɛ yaula tɔlnuŋ o Baabuiyo choo laŋ la dimi a yoomoo vɛlɛ a koowaŋ okɔɔ wo. O yaa ndɔɔ, ndoo nɔ tiindaŋndo maa te ŋ tol pɛ nɛila chɔmaala Chɛhowalaŋ kɔɔli, miŋ sɔla tɔnɔlaŋ lefafɛɛŋ. Naa bɛɛ tiuba miŋ tiindaŋ Chɛhowa a kɔl naa kpou, mɛɛ mɛɛ tɔɔndaŋndaŋ la komal naa.

18. Vɛɛ tamasi Baluaki wo pɛɛku yɛ naa le laalaŋndo dɔwɔɔ o Chɛhowa niŋ? (Tofa fotueiyo o kɔɔ.)

¹⁸ Dɔu laalaŋndo o Chɛhowa niŋ. Mi Baluaki sɔla batiuwaa mɛɛ o dɔu laalaŋndo o nɛi chɔmaa Chɛhowaa niŋ. A teleŋ koŋ, puaa chɔuwa Isɔluɛi ndaa nɔ nyɛm chɔu le, nduyɛ ndaa bɛɛndiaŋ le lakɔ o chɔu le. A koŋ kpou, mi Chɛhowa dimul Baluaki le mbo kɔ chiŋalaŋ Sisɛlua a puaa nduaa chɔuwa. (Chɔɔchi. 5:​8) Mi wana lanɔ ndoo suaa le Chɛhowa wo dimul Baluaki, le mbo kuɛ a puaa nduaa chɔuwa o lɛŋnde dɛŋgbɛleŋ le ma kɔ chiŋalaŋ Sisɛlua a nyɛm ndɔŋ suaa naŋndoŋ 900. Mi che bɛɛ i wa wa ikala le mi puaa Isɔluɛiya ndaa tiu nyɛm muŋ ba o lɛŋnde dɛŋgbɛleŋ niŋ, kɛ mi Baluaki diikuŋ nɛi chɔmaa koŋ. Mɛɛ puaa chɔuwa wa Pembii Tabɔɔ ve tolɔɔ, mi Chɛhowa tosa mi piɔɔ bɛndu bɛndoo sia. Okoŋ, mi Sisɛlua nyɛm ndɔŋ nyaanaŋ suaa naŋndoŋ hau o looli koŋ niŋ, nduyɛ mi Chɛhowa tosa mi Baluaki yam nda. (Chɔɔchi. 4:​1-7, 10, 13-16) O nɛi pilɛ koŋ choo, Chɛhowa cho tosa miŋ sɔla batiuwaa te ŋ dɔu pɛ laalaŋndo o ndu niŋ vɛlɛ miŋ laalaŋ nɛila chɔmaala kɔɔna ndɔɔ ke naa laŋ.—Ditɔnɔ. 31:​6.

KƐƐSIAŊ O KƆL LE LOO ISISI NYƐKƐNDƐ YI

19. Le yɛɛ naŋ nɔ yɛ miŋ lo o laalaŋ naa choo?

¹⁹ Te ŋ cho wɔ pɛ o chieeŋ dɛnɛ wɔɔŋndo hoo niŋ, ŋ nɔ miŋ kɛɛsiaŋ o kɔl le miŋ lo isisi nyɛkɛndɛ yi o laalaŋ naa choo. (1 Timo. 6:​11, 12; 2 Pitɛ 3:​17) Maa ŋ kɛɛsiaŋ o kɔl maa fɛɛŋ bɛɛ nyɛpalaa nda tusi naa choo wo, nyɛkindilaa, yiyaŋ iwana chieeyaa, sɔɔŋ lachoowaŋ, a nyɛm faŋa naa kɔllo o sɔɔŋ sɔviɔŋ choo woŋ, tosa miŋ vi ŋdial o laalaŋ naa niŋ te. (Ɛfi. 4:​14) Nduyɛ, maa ŋ loŋnuŋ isisi nyɛkɛndɛ yi, miŋ wa a yɔŋgaŋ o Chɛhowa lo nyɛ o nyɛ hiiluu naa le, vɛlɛ miŋ hiou lachi a sawala ndɔlaŋ diikɔŋndo. O baa pilɔɔ choo, ŋ nɔ miŋ chɔm sinapɛŋgoo. O buŋgɛi cho lachi ve niŋ, ŋ cho pɛɛku a mɛɛ Chɛhowa nda Chiisu kɛsul naa tamasi kɛndɔɔ le miŋ chɔm acheleŋnda sinapɛŋgoo yɛ.