La Ŋ Dɛɛniaŋ Vellaa Velle o Bɔŋaŋndaŋ

1. Le yɛɛ naŋ yɔŋgu yɛ mulioo o bɔŋaŋndaŋ?

LE YƐƐ naŋ kua yɛ o bɔŋaŋndaŋ? Sabu kpeekpeiyo cho le Chɛhowa saŋgalaa ni. (Sam 26:​12; 111:​1) Ŋ kuɛ vɛlɛ o bɔŋaŋndaŋ le miŋ dɛɛniaŋ kɔltaŋ vellaa velle o teleŋnda kala kalalaŋ ndaŋ niŋ. (1 Tɛsa. 5:​11) Miŋ tosa sɔɔŋ muŋ kpou te ŋ heelu pɛ baa miŋ yɔŋgu mulioo.

2. A teleŋ kuɛɛ naŋ sɔla yɛ fondaa le mulilaŋ yɔŋgoo o bɔŋaŋndaŋ?

² O lɔɔ o lɔɔ bɛŋgu, miŋ sɔla fondaa le mulilaŋ yɔŋgoo o bɔŋaŋndaŋ. Le tamaseliiyo, o lɔɔ mɛɛlulaŋ, ŋ tiuba miŋ yɔŋgu muli naa te pɛɛku Bandu Mɛŋgɛlaa wa pɛ tosaŋndo. O bɔŋaŋ naŋ bii o lɔɔ tɛɛŋndo, ŋ tiuba miŋ yɔŋgu muli naa te pɛl Nyɛm Tɔɔmaŋ Mɛlɛkaŋ ɔɔ Pɛɛku Baabui Kundaa wa pɛ tosaŋndo. Ŋ tosa vɛlɛ hei o pɛlta cheleŋ wa le suukaŋndo laŋ.

3. Simulta kuɛɛ komallɛ naa lepum, nduyɛ vɛɛ Hibuluiya 10:​24, 25 mala yɛ naa?

³ Naa kpou yeema miŋ saŋgala Chɛhowa, nduyɛ miŋ dɛɛniaa chaaŋaa naa laalaŋnda kɔltaŋ. Kɛ te ŋ wa pɛ mulilaŋ yɔŋgoo, lepum mi simultaŋ la komal naa. Naapum mi siooŋnde bii naa le mulilaŋ yɔŋgoo, ɔɔ miŋ nɔ yeemɛi tau le mulioo yɔŋgoo, kɛ a tɔɔliaa naa chuaa mɛɛ naŋ yeema yɛ le. Te ŋ nɔ pɛ simultaŋ ndaŋ, nyɛ mala naa wo cho o yau kiilanɔɔ Pɔɔl poonyial Hibuluiya wo niŋ. Mɛɛ o wa suɛi a mɛɛ bɔŋaŋnda naalaŋ la cho la sɔvɛ yɛ okɔɔ, mbo dimi maa ŋ nɔ miŋ handu kɔltaŋ le ‘dɛɛniaŋndo vellaa velle.’ (Nuawɔ Hibuluiya 10:​24, 25.) Te ŋ loonuŋ pɛ maa ŋ tiuba miŋ dɛɛniaa acheleŋnda kɔltaŋ o yɔŋ bɛɛ aa muli tɛtɛlɔɔ naŋ yɔŋgu ni, keŋ mala naa ŋ yɔŋ isiooŋ le baa heeloo le. Nduyɛ te o yɔŋ pɛ maa a tɔɔliaa naa chua mɛɛ naŋ yeema yɛ le, ŋ nɔ miŋ wa a kɔl kɛndɛ le mɛɛ acheleŋnda o kundaa niŋ cho fondaa sɔlaa le mulilaŋ yɔŋgoo yɛ.—1 Pitɛ 3:​8.

4. Ɔɔ sɔɔŋ ŋgaa naŋ cho pɛɛku o buŋgɛi hei niŋndoŋ?

⁴ O buŋgɛi hei niŋ, ŋ cho fɛŋ pɛɛku a mɛɛ naŋ dɛɛniaŋ kɔltaŋ vellaa velle o kunda pɔmbɔɔ niŋ yɛ okɔɔ, naa wanaa bɔɔ ve le mulilaŋ yɔŋgu le wa. Okoŋ kɔɔli, ŋ cho pɛɛku mɛɛ naŋ dɛɛniaŋ kɔltaŋ vellaa velle o kunda bɛndoo niŋ, naa waŋnda wa tau le mulilaŋ yɔŋgoo wa. O mɛɛlulaŋ, ŋ cho pɛɛku sɔɔŋ naŋ nɔ miŋ tosa le mi muli naa dɛɛniaa acheleŋnda kɔltaŋ ndo.

LA Ŋ DƐƐNIAŊ VELLAA VELLE O KUNDA PƆMBƆƆ NIŊ

5. Vɛɛ naŋ dɛɛniaŋ yɛ kɔltaŋ vellaa velle te ŋ wa pɛ o kunda pɔmbɔɔ niŋ?

⁵ O kunda pɔmbɔɔ niŋ, lepum wanaa bɔɔ ve le mulilaŋ yɔŋgu le. Teleŋndaŋ lapum mɛɛ mi wana cho chilaŋ chuaa wo chum le teleŋ tiŋ, malaŋ o sɔla waŋndo le mulioo yɔŋgoo. Hei tosa mi bɔŋaŋndo viou tau, nduyɛ wanaa wa o bɔŋaŋndo wa sɔla kɔl dɛɛniaa le. Yɛɛ ŋ nɔ yɛ ma tosa? Wa baa heeloo teleŋ o teleŋ. Te a wa pɛ hei tosaa, a cho acheleŋnda yoomuaŋ luei le mi nda bɛɛ wa mulioo yɔŋgoo teleŋ o teleŋ.

6-7. Yɛɛ mala yɛ naa miŋ soliŋ siooŋnde o kɔl le mulilaŋ yɔŋgoo?

⁶ Te o wa yɛ maa mi siooŋnde wa num le mulioo yɔŋgoo? Mi hei yɔŋnuŋ wanaa bɔɔbɔɔ. Te bahawɛiyo hoo ŋ nɔ ni, mɛɛ nuuviaa nɛila ŋ tiuba ma soliŋ siooŋnde o kɔl le mulilaŋ yɔŋgoo wo, le halikpeŋ ma dɛɛniaa puaapiliaa a ndepiliaa numnda kɔltaŋ. Vɛɛ ŋ tosa yɛ keŋ?

⁷ Naapum a tiuba ma saaluŋ sɔɔŋ mala numndoŋ o buŋgaŋ Bandu Mɛŋgɛlaŋ hiou woŋ niŋ.b Sɔɔŋ muŋ ipilɛ cho hei ni. Bɛɛndiaŋ nyɛkɛndɛi. (Pulɔ. 21:​5) Te o yɔŋ pɛ maa sina buŋgɛi naŋ cho wa pɛɛkoo ve nyɛkɛndɛi, keŋ mala num ma wa fɛɛsɛŋ le mulioo yɔŋgoo. Tofawɔ vɛlɛ suɛi cheleŋ. Yɔŋgu muli numndo o biŋgi. (Pulɔ. 15:​23; 17:​27) Muli tɛtɛlɔɔ tosa a buulaŋ tau le. Nduyɛ pɛŋ, sɔɔŋ tɛtɛlɔŋ ɔɔ diomnda tɛtɛlɛlaŋ dimioo mala puaapiliaa a ndepiliaa numnda, ma bii muli numndo bila mbo hiou sɔɔŋ dimioo tau o muli numndo niŋ. Te ŋ yɔŋgu pɛ mulila tɛtɛlɛlaŋ ŋ ve tofa o yau choo le, mi keŋ chɔm kpendekele maa ŋ bɛɛndiaŋ nyɛkɛndɛi, nduyɛ maa ŋ bii buŋgɛi keŋ bila.

8. Vɛɛ Chɛhowa cha yɛ sɛmbɛ naŋ duau le mulioo yɔŋgoo wo?

⁸ Te o wa yɛ ma dɔu sɔɔŋ muŋ o wali niŋ, kɛ mi siooŋnde wa wɔ num le mulioo yɔŋgoo? Nɔ tiindaŋndo maa Chɛhowa che sɛmbɛ ŋ cho dɔwɔɔ wo nyɛ sɔvɛ. (Luku 21:​1-4) Loonuŋ maa o dimul naa le miŋ tosa mbo hiou mɛɛ naŋ tiuba yɛ le. (Filipi. 4:​5) Sina nyɛ ŋ tiuba le tosaa wo, nduyɛ ma kɛsi kpeleŋndo le ndu tosaa. Piɛi o Chɛhowa lo le mbo ke num kɔl simulaa. O kandɔŋndo, naapum a kɛsi kpeleŋndo le mulioo yɔŋgoo o biŋgi.

LA Ŋ DƐƐNIAŊ VELLAA VELLE O KUNDA BƐNDOO NIŊ

9. Simul kuɛɛ komallɛ naa te ŋ wa pɛ o kunda bɛndoo niŋ?

⁹ Te o yɔŋ pɛ maa kunda numndo nɔ wanaa dimiaa yooŋgu kɛndiaa tau, mɛɛ num bɛɛ nɔ simul cheleŋ. Kɛlɛŋgaa mi puaapiliaa yɔŋguŋ tau le mulilaŋ yɔŋgoo. Le hei, naapum a chue num teleŋ o teleŋ te. Le tamaseliiyo, teleŋ ndepilɛnɔ pilɛ diolaŋ Daniɛɛli wa o kunda pɔmbɔɔ niŋndo, teleŋ o teleŋ mi ndoo yɔŋgu mulilaŋ.c Nduyɛ mi ndoo wa a kɔl kɛndɛ tau. Mbo cha ndi pɛŋ maa nɛiyo opilɛ o saŋgala Chɛhowa wo cho koŋ ni, vɛlɛ maa nɛi koŋ o soliŋ kpeku ni le acheleŋnda kɔltaŋ dɛɛniaa a le tiindaŋ ndɔɔ kindioo poŋ o tonyala Baabuiyo niŋ. Kɛ mɛɛ o kuɛ o kunda bɛndoo niŋ, lepum haaa mi bɔŋaŋndo ndoo chuu, lepilɛ koni ndaa chua ndu le mulioo yɔŋgoo ni. Mbo dimi aa: “Mi tambu kɔl tau, nduyɛ mi yaa yiyaŋ naŋ chaa dikeŋnaŋndo cho ya hiɔlɔŋndo ni. Te hei ndii tɔɔliaa pɛ yɔŋnɔŋ, mi yaa yiyaŋ maa kpɛsɛkɛɛ nda cho ya ndi tosallo ni.”

10. Yɛɛ ŋ nɔ yɛ ma tosa le ma nɔ mulilaŋ tau le yɔŋgoo?

¹⁰ Baa nyɛ yɔŋnuŋ Daniɛɛli wo komal num niŋ pa? Te lende i cho ni, mɛɛ lepum ma yiyaŋ maa o bɛnda ma chalnuŋ, okoŋ ma yaŋ nilaŋ. Kɛ wu ŋdial le mulioo yɔŋgoo le. Yɛɛ mala yɛ num? Bɛɛndiaa mulilaŋ tau le bɔŋaŋ kɛ kɛ. Okoŋ te a chue num o bɔŋaŋndo kandɔŋndo le, naapum a cho num chua tuupa mi bɔŋaŋndo chuu. Te a wa pɛ buŋgɛi Bandu Mɛŋgɛlaa bɛɛndiaa, yiyaŋ a mɛɛ pɛl kɛ kɛ chɛlaŋ a suɛi lebolii buŋgɛi keŋ yɛ. Hei tosaa cho num mala ma bɛɛndiaa mulila kɛndɛlaŋ tau. Le handɔɔ lechoo, naapum a bɛɛndiaŋ le mulioo yɔŋgoo o pɛlta nɔ tonyala kendu bila biyɔɔ laŋ choo. (1 Kɔliŋ. 2:​10) Le yɛɛ? Kanifuule lepum wanaa bɔɔ yɔŋguŋ le mulioo yɔŋgoo o pɛlta waa lende choo le. Te o wa yɛ maa mi che bɛɛ a dɔu sɔɔŋ muŋ o wali niŋ, kɛ bɔŋaŋnda bɔɔbɔɔ a chue num le mulioo yɔŋgoo le? Mɛɛ naapum o bɛnda ma suukaŋ a wana cho chilaŋ chuaa wo tuupa mi bɔŋaŋndo kanduŋ, okoŋ ma chɔm ndu pɛl ŋ yeema mulioo yɔŋgoo wo.

11. Yɛɛ Filipiaŋnda 2:​4 dɛɛniaa yɛ naa le tosaa?

¹¹ Nuawɔ Filipiaŋnda 2:​4. Sanaa a nyina diandaa Chɛhowaa, mi kiilanɔɔ Pɔɔl dɛɛniaa Kilisiɔŋnda le ma landuŋ kɔl le dɛnɛ kɛndɛ acheleŋnda. Vɛɛ naŋ duau yɛ silaa hoo o wali niŋ a teleŋ bɔŋaŋndo? Ŋ tosa hei te ŋ loonuŋ pɛ maa acheleŋnda bɛɛ yeema ma yɔŋgu mulioo.

12. Ɔɔ nɛi kɛndɔɔ opilɛ o naŋ dɛɛniaa acheleŋnda o bɔŋaŋndaŋ ndo? (Tofa vɛlɛ fotueiyo.)

¹² Yiyaŋndɔ a hei okɔɔ. Te a wa pɛ baltaŋ a chaaŋaa numnda, baa numpilɛ koni suaa teleŋ o teleŋ ni, a ke nda teleŋndo le mi nda bɛɛ soo le? Sako. Kanifuule a yeema mi nda bɛɛ soo. O nɛi pilɛ koŋ choo, ŋ nɔ miŋ ke acheleŋnda fondaa le mi nda bɛɛ yɔŋgu mulioo o bɔŋaŋndaŋ. Nduyɛ pɛŋ, nɛila kɛndɛla naŋ dɛɛniaa puaapiliaa a ndepiliaa naa laŋ, opilɛ cho nda fondaa kioo le ma tɛɛsiaa a laalaŋ ndaa okɔɔ ni. (1 Kɔliŋ. 10:​24) Ŋ tofaŋndɔ mɛɛ naŋ tosa hei yɛ.

13. Yɛɛ naŋ nɔ yɛ miŋ tosa le mi acheleŋnda bɛɛ yɔŋgu mulilaŋ?

¹³ Ŋ nɔ miŋ yɔŋgu mulioo o biŋgi. Hei tosa mi wanaa bɔɔbɔɔ sɔla fondaa le mulioo yɔŋgoo. Bɛnduaa kundaa a wanaa dimiaa yooŋgu kɛndiaa nɔ taasioo tau wa, nɔ ni ma kɛsi tamaseliiyo o hei niŋ. O yɔŋ bɛɛ mi muli numndo wa o biŋgi, suaa a sɔɔŋ kulloŋ tau okɔɔ le. Te a soo pɛ a nyɛ o nyɛ cho o pɛllo niŋ okɔɔ, keŋ tosa acheleŋnda nɔ lɛ nyɛ le dimi le. Le tamaseliiyo, pɛllo hoo nɔ sɔɔŋ kulloŋ ŋmuuŋ. Te o yɔŋ pɛ maa num fɛŋ nda cho chua le mulioo yɔŋgoo, o bɛnda bɔɔ ma soo a ipilɛ okɔɔ. Keŋ tosa mi muli numndo wa o biŋgi, nduyɛ mi acheleŋnda nɔ nyɛ le dimioo.

14. Yɛɛ ŋ nɔ yɛ ma soliŋ kpeku le sinaa mɛɛ kpɛ ŋ nɔ ma muli nyunalaŋ yɛ? (Tofa vɛlɛ fotueiyo.)

¹⁴ Soliŋ taasi numndo kpeku, le sinaa mɛɛ ŋ nɔ ma muli nyunalaŋ yɛ. Te ŋ wa pɛ baa heeloo teleŋ o teleŋ, keŋ tosa mi wana cho chilaŋ chuaa wo yiyaŋ maa o nɔ mbo wa naa tɔɔliaa chuaa mi che bɛɛ acheleŋnda yɔŋgu wɔ muli le. Hei tosa mi acheleŋnda vi ŋdial le baa heeloo.—Ikili. 3:​7.

15. (a) Yɛɛ naŋ nɔ yɛ miŋ tosa le, te a chue naa le mulioo yɔŋgoo le? (b) Yɛɛ wana cho chilaŋ chuaa wo nɔ yɛ mbo tosa? (Tofa kɔfoo hoo, “Te A Wa Pɛ Chilaŋ Chuaa.”)

¹⁵ Te o yɔŋ pɛ mi wanaa dimiaa yooŋgu kɛndiaa bɔɔbɔɔ wa balaŋ heeloo le mulioo yɔŋgoo, Lepum a chue naa teleŋ o teleŋ mɛɛ naŋ yeema le mulioo yɔŋgoo yɛ le. Nduyɛ pɛŋ, naapum wana wa chilaŋ chuaa wo chue naa le haaa mi bɔŋaŋndo chuu. Hei tosa miŋ tambu kɔl. Kɛ ŋ nɔ miŋ bii wana koŋ o kɔl te.—Ikili. 7:​9.

16. Nɛi cheleŋ kuɛɛ naŋ dɛɛniaa yɛ acheleŋnda le mulila nda yɔŋgu laŋ?

¹⁶ Te o yɔŋ pɛ maa a chue num teleŋ o teleŋ le mulioo yɔŋgoo mɛɛ ŋ yeema yɛ le, mɛɛ yaŋ nilaŋ yekeŋ te acheleŋnda wa pɛ mulioo yɔŋgoo, okoŋ ma chandu nda te bɔŋaŋndo chuu pɛ. Mi puaapiliaa a ndepiliaa numnda naŋ kɔl tau, te a chandu nda pɛ le mulila nda yɔŋgu laŋ. (Pulɔ. 10:​21) Nduyɛ pɛŋ, nɛiyo opilɛ o naŋ dɛɛniaŋ vellaa velle wo cho acheleŋnda chandɔɔ ni.

NƐILA CHELEŊNDA NAŊ TIUBA MIŊ DƐƐNIAŊ VELLAA VELLE LAŊ

17. (a) Vɛɛ kalaŋ chuauwa mala yɛ chuauwaa ndaa le ma bɛɛndiaa mulila kɛndɛlaŋ? (b) A mɛɛ vidueiyo chɔm yɛ, nɛila hiɔɔlula kuɛɛ naŋ nɔ yɛ miŋ tol kɔɔli te ŋ wa pɛ bɛɛndiaŋndo le mulioo yɔŋgoo? (Tofa vɛlɛ tɛɛsiaa amatou.)

¹⁷ Ɔɔ nɛi cheleŋ naŋ dɛɛniaŋ vellaa velle o bɔŋaŋndaŋ ndo? Te kala chuaa ŋ cho ni, mala chuauwaa numnda ma bɛɛndiaa mulila nda tiuba le yɔŋgoo laŋ. (Maa. 21:​16) Lepum, nyɛ naŋ wa pɛɛkoo wo wa a bahawɛila yuŋgoo, ɔɔ a kaalaŋ lapum okɔɔ. Kɛ naapum mi pɛllo opilɛ ɔɔ latiɔɔŋ la wa, naa chuaambuaa tiuba ma muli wa. Nduyɛ mala chuauwaa numnda ma bii bila, le sabu nda chue nda teleŋ o teleŋ te wo, te a heelu pɛ baa. Hei mala o yɔŋ bɛɛ ma chue nda le, a tembu kɔl te.—1 Timo. 6:​18.d

18. Yɛɛ naŋ nɔ yɛ miŋ fafaŋ tosaa te ŋ wa pɛ mulioo yɔŋgoo? (Pulɔwaa 27:​2)

¹⁸ Naa kpou tiuba miŋ bɛɛndiaa mulila saŋgala Chɛhowa nduyɛ mi la dɛɛniaa chaaŋaa naa laalaŋnda kɔltaŋ ndaŋ. (Pulɔ. 25:​11) Mi che bɛɛ lepum o bɛnda miŋ soo a sɔɔŋ naŋ yɔŋnaŋndo okɔɔ, kɛ ŋ nɔ miŋ fafaŋ suɛi tau a naapila okɔɔ. (Nuawɔ Pulɔwaa 27:​2; 2 Kɔliŋ. 10:​18) Ŋ nɔ miŋ handu kɔl naa kpou o Chɛhowa, Diom ndɔɔ, vɛlɛ a o wanaa nduaa choo. (Sɔɔŋ. 4:​11) I cho tonya maa, te o yɔŋ pɛ mi nyunaa le pɛllo wa le ma soo a numpila okɔɔ, o bɛnda ma tosa lende. Tamaseliiyo a hei okɔɔ cho o pɛl cho lachi wo niŋ.

19. (a) Yɛɛ wa niŋ fulamakɔɔlioo te ŋ chɛl pɛ mi acheleŋnda o kundaa niŋ yɔŋgu mulila ndalaŋ? (Luomaŋnda 1:​11, 12) (b) Yɛɛ ŋ hɛnaŋ yɛ tau a mulilaŋ yɔŋgoo o bɔŋaŋndaŋ okɔɔ?

¹⁹ Mi che bɛɛ sawa cho a mɛɛ naŋ nɔ miŋ yɔŋgu mulioo yɛ okɔɔ le, kɛ naa kpou nɔ miŋ kindiŋ o nɛi o nɛi niŋ, le mi mulila naalaŋ la dɛɛniaa acheleŋnda kɔltaŋ. Hei sim ni maa, ŋ nɔ miŋ wa mulioo lepilɛŋ pilɛŋ. Ɔɔ i sim vɛlɛ maa, ŋ nɔ miŋ hini kɔl te ŋ sɔla pɛ fondaa le mulioo yɔŋgoo, nduyɛ miŋ wa vɛlɛ a kɔl kɛndɛ te acheleŋnda sɔla pɛ fondaa le ma yɔŋgu muli ndaa. Te ŋ handu pɛ kɔllo o yeemɛi acheleŋnda nɔ o kundaa niŋ le mulioo yɔŋgoo wo, keŋ mala mi naa kpou dɛɛniaŋ kɔltaŋ vellaa velle.—Nuawɔ Luomaŋnda 1:​11, 12.