ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
© 2023 Watch Tower Bible and Tract Society of Pennsylvania
လါမၢ်ၡး ၄-၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၁၆-၁၇
“ယဟိဝၤယွၤ မ့ၢ်ယတၢ်ဂ့ၤတၢ်ဝါ အဂံၢ်ခီၣ်ထံး”
သးစၢ်သ့ၣ်ဧၢ, နအိၣ်ဒီး တၢ်သူၣ်မံသးမုာ်သ့
ဃုထၢတံၤသကိးလၢ အဂ့ၤ
၁၁ ဖး စံးထီၣ်ပတြၢၤ ၁၆:၃ တက့ၢ်. စီၤဒၤဝံးသ့ၣ်ညါဝဲလၢ အဝဲကဘၣ်ဃုဝဲ တံၤသကိးလၢအဂ့ၤ ဒ်လဲၣ်န့ၣ်လီၤ. အဝဲ ‘ဘၣ်အသး’ လၢကဃုအတံၤသကိးလၢ ပှၤလၢအအဲၣ်ယဟိဝၤယွၤအဃိ အဝဲဒိးန့ၢ်ဘၣ်တၢ်သးခုဖးဒိၣ် ခီဖျိအရ့လိာ်အသးဒီး အတံၤသကိးတဖၣ်အံၤအဃိလီၤ. ဒီးမ့ၢ်လၢအသကိးတဖၣ်န့ၣ် မၤထွဲဝဲကစၢ်ယွၤ အတၢ်သိၣ်တၢ်သီလၢ အစီအဆှံအဃိ အဝဲပာ်ဖျါထီၣ်ဝဲလၢ အသကိးတဖၣ်န့ၣ်မ့ၢ် “ပှၤစီဆှံ” လီၤ. ဘၣ်ဃးဒီး ပှၤဃုထၢတံၤသကိးန့ၣ် ပှၤကွဲးထါစံးထီၣ်ပတြၢၤလၢ အဂၤတဂၤ တူၢ်ဘၣ်ဝဲဒ်န့ၣ်စ့ၢ်ကီးလီၤ. အဃိအဝဲတဲဝဲလၢ “ယဒီတံၤဒီသကိးဒီး ကယဲၢ်ပှၤလၢအပျံၤနၤ, ဒီးတိၢ်န့ၢ်ဖံးဃာ် နတၢ်မၤလိာ်တဖၣ်န့ၣ်လီၤ.” (စံးထီၣ်ပတြၢၤ ၁၁၉:၆၃) ဒ်ပမၤလိဘၣ်လၢ တၢ်မၤလိလၢအပူၤကွံာ်တခါအသိး ပသ့ၣ်ညါဘၣ်လၢ ပဝဲသ့ၣ်တဖၣ်စ့ၢ်ကီး ပဃုထၢပတံၤသကိးလၢ ပှၤလၢအအဲၣ်ယဟိဝၤယွၤ ဒီးဒိကနၣ်အကလုၢ်တဖၣ်သ့ဝဲလီၤ. ပဃုထၢ ပတံၤသကိးလၢ ပှၤလၢအသးနံၣ် တဒ်သိးဒီးပှၤ သ့ဝဲစ့ၢ်ကီးလီၤ.
တၢး၁၄ ၂/၁၅ ၂၉ ¶၄
“ထံၣ်ဘၣ် ယဟိဝၤယွၤ အတၢ်ဂ့ၤတၢ်ဝါ”
စီၤဒၤဝံး တဲဝဲလၢ “ယဟိဝၤယွၤ ဟ့ၣ်ယၤတၢ်လၢ ယလိၣ်ဘၣ်ခဲလၢာ်, အဝဲမၤပှဲၤယခွး ဒီးဒီသဒၢ ယတၢ်န့ၢ်သါလီၤ. တၢ်လီၢ်လၢ အမုာ်တဖၣ်န့ၣ် ဘၣ်တၢ်ထိၣ်န့ၢ်ဒွးန့ၢ်လၢယဂီၢ်လံ.” (စံး ၁၆:၅, ၆) စီၤဒၤဝံး စံးဘျုးဘၣ် ယဟိဝၤယွၤ ခီဖျိအ ‘ဟ့ၣ်အီၤတၢ်လၢအလိၣ်ဘၣ်ခဲလၢာ်,’ အဲၣ်ဒိးတဲဝဲ စီၤဒၤဝံး စံးဘျုးဘၣ် ကစၢ်ယွၤ ခီဖျိ အဒိးန့ၢ်ဘၣ်တၢ်ရ့လိာ်သးဒီး ကစၢ်ယွၤ ဘူးဘူးတံၢ်တံၢ် ဒီးမၤဘၣ်ကစၢ်ယွၤ အတၢ်မၤအဃိ. ဒ်စီၤဒၤဝံးအသိး ပမ့ၢ်ထံၣ်ဘၣ် တၢ်ကီတၢ်ခဲအါမး သနာ်က့ ပဒိးန့ၢ်ဘၣ် တၢ်ဆိၣ်ဂ့ၤလၢ နီၢ်သးတခီအါမး. မ်ပကဆဲး အိၣ်လၢတၢ်ဘူၣ်တၢ်ဘါ အမ့ၢ်အတီအပူၤ လၢတၢ်သးခုအပူၤ ဒီး “ကွၢ်ဃီၤ” ယဟိဝၤယွၤ အနီၢ်သးအတၢ်လုၢ်ဟံၣ် လၢ “တၢ်သူၣ်မံသးမုာ်အပူၤ.”
တၢး၀၈ ၂/၁၅ ၃ ¶၂-၃
ပာ်ယဟိဝၤယွၤ လၢနမဲာ်ညါထီဘိ
၂ ပှၤလၢလံာ်စီဆှံအပူၤ လၢပှၤအါဂၤသ့ၣ်ညါအဂ့ၢ် ဒ်သိးဒီး စီၤအၤဘြၤဟၣ်, နီၢ်စၤရါ, စီၤမိၤၡ့, နီၢ်ရူၤသး, စီၤဒၤဝံး, နီၢ်အ့ၤစတၢ်, တၢ်မၢဖိပီလူး ဒီးပှၤအဂၤတဖၣ်န့ၣ် ပဟံးန့ၢ် တၢ်မၤလိလၢ အဝဲသ့ၣ်အအိၣ် သ့ဝဲအါမး. ပှၤလၢလံာ်စီဆှံပူၤလၢ ပှၤတသ့ၣ်ညါအဂ့ၢ် အါအါဘၣ်တဖၣ်နာ်က့ ပမၤလိန့ၢ်တၢ်လၢ အဝဲသ့ၣ်အအိၣ်သ့. ပမ့ၢ်ဆိကမိၣ်ထံ ပှၤလၢလံာ်စီဆှံပူၤတဖၣ် အဂ့ၢ်န့ၣ် ကမၤစၢၤပှၤလၢ ပကမၤဒ် ပှၤကွဲးထါစံးထီၣ်ပတြၢၤ တဲဝဲအသိး. အဝဲတဲဝဲလၢ “ယပာ် ယဟိဝၤယွၤလၢ ယမဲာ်ညါ ထီဘိလီၤ. အဝဲအိၣ်လၢ ယစုထွဲတခီအဃိ ယကဆၢထၢၣ် ဂၢၢ်ဂၢၢ်ကျၢၤကျၢၤ ထီဘိလီၤ.” (စံး ၁၆:၈) လံာ်စီဆှံတဆၢအံၤ အဲၣ်ဒိးတဲဝဲ အခီပညီဒ်လဲၣ်.
၃ ပှၤသုးဖိတဖၣ်န့ၣ် ညီနုၢ်အသူဝဲနး လၢစုထွဲတခီ ဒီးမ့မ့ၢ်လၢစုစ့ၣ်တခီန့ၣ် စိာ်ဃာ်ဝဲ ကတီၤအဃိ အစုထွဲတခီန့ၣ် တၢ်ဒီသဒၢတအိၣ်ဘၣ်. အဃိ အသကိးတဂၤ မ့ၢ်ဒုးတၢ်လၢ အစုထွဲတခီန့ၣ် ကကဲထီၣ် တၢ်ဒီသဒၢလၢအဂီၢ်. ပမ့ၢ်ပာ်ဒိၣ် ယဟိဝၤယွၤ ဒီးမၤအတၢ်ဘၣ်သးန့ၣ် အဝဲ ကဒီသဒၢပှၤ. အဃိ ပကတဲသကိး ဘၣ်ဃးဒီး ပမ့ၢ်ဆိကမိၣ်ထံ တၢ်ဂ့ၢ်လၢ လံာ်စီဆှံပူၤတဖၣ်န့ၣ် ကမၤဂၢၢ်ကျၢၤထီၣ် ပတၢ်နာ် ဒီးကမၤစၢၤပှၤ ဒ်သိးပက “ဆဲးပာ်ယဟိဝၤယွၤ လၢပမဲာ်ညါ.”
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၇၁၄
မဲာ်ပှာ်ဖိ
ဧ့ၤဘြံၤအတၢ်ကတိၤ အဲၡီၤ ဒီး အ့ယံၤ န့ၣ် ပှၤမ့ၢ်ကွဲးအီၤတပူၤဃီန့ၣ် အခီပညီလိၤလိၤ မ့ၢ်ဝဲ “မဲာ်ချံပိာ်ခွါဆံးဆံးဖိ.” (၅ မိၤ ၃၂:၁၀; ကတိၤ ၇:၂) ဖဲလံာ်သးသယုၢ်တၢ် ၂:၁၈ သူဝဲတၢ်ကတိၤလၢ ဘး (ဖိမုၣ်) လၢအခီပညီထီၣ်စ့ၢ်ကီးလၢ “မဲာ်ချံအဖိမုၣ်.” ဒီးပထံၣ်ဘၣ်လၢ ပှၤကွဲးဖှိၣ်ဝဲ တၢ်ကတိၤတဖၣ်အံၤလၢ စံးထီၣ်ပတြၢၤ ၁၇:၈ အပူၤ (အဲၡီၤ ဘး အ့ယံၤ) ဒီးအခီပညီလိၤလိၤမ့ၢ်ဝဲ “မဲာ်ချံပိာ်ခွါဆံးဆံးဖိ ဒီးမဲာ်ချံအဖိမုၣ်.” တၢ်ကတိၤခံဖျၢၣ်အံၤ အဲၣ်ဒိးတဲဝဲ မဲာ်ပှာ်ဖိ. လီၤဂာ်လၢ အဲၣ်ဒိးတဲဝဲ ပှၤတဂၤအဂီၤ ဆံးဆံးဖိလၢ အထံၣ်လီၤဝဲလၢ ပှၤဂၤအမဲာ်ချံပူၤ.
ပမဲာ်ချံန့ၣ် အကပုာ်လုးကဖီလီ ဒီးအဘၣ်ဒိညီမး. အဃိ ခိၣ်ဆူၣ်ဆံးဆံးဖိတဘိ မ့တမ့ၢ် တၢ်ကမူၣ်ဆံးဆံးဖိတခါ မ့ၢ်နုာ်လီၤလၢ ပမဲာ်ချံပူၤန့ၣ် ပသ့ၣ်ညါတဘျီဃီလီၤ. ပမဲာ်ချံအကဘျၣ်လၢ အဒီသဒၢဝဲ ပမဲာ်ပှာ်ဖိန့ၣ် ပကဘၣ် ကွၢ်ထွဲအီၤဂ့ၤဂ့ၤ, မ့ၢ်လၢ ပမဲာ်ချံအကဘျၣ်တခါအံၤ မ့ၢ်ဘၣ်ဒိ မ့တမ့ၢ် ခီဖျိလၢ တၢ်ဆူးတၢ်ဆါ အဃိ တၢ်ကိၣ်လိၣ်လၢ အလီၤဂာ်ဒ်သိးဒီးတၢ်အၢၣ် မ့ၢ်အိၣ်ထီၣ်လၢ ပမဲာ်ချံပူၤန့ၣ် ပမဲာ်ကကဒု မ့တမ့ၢ် ပမဲာ်ချံတထံၣ်တၢ်လၢၤဘၣ်သ့. အဃိ တၢ်တမံၤမံၤလၢ အလိၣ်ဘၣ် တၢ်ဒီသဒၢ ဒီးတၢ်ကဟုကယာ်န့ၣ် လံာ်စီဆှံ ဒိလီၤအီၤလၢ မဲာ်ပှာ်ဖိ. ဒီးကစၢ်ယွၤ အကလုၢ်ကထါ လံာ်စီဆှံန့ၣ် ပကဘၣ်ပာ်လုၢ်ပာ်ပှ့ၤအီၤဒ်န့ၣ်. (ကတိၤ ၇:၂) ၅ မိၤၡ့ ၃၂:၁၀ တဲဝဲလၢ ကစၢ်ယွၤ ဒီသဒၢ ပှၤအံၣ်စရ့လးဖိတဖၣ်ဒ် “မဲာ်ပှာ်ဖိအသိး.” အဃိ ဒ်ပၢ်တဂၤအသိး ယဟိဝၤယွၤ ဒီသဒၢဝဲ ပှၤအံၣ်စရ့လးဖိတဖၣ်. စီၤဒၤဝံး ဃ့ဝဲလၢ ကစၢ်ယွၤ ကဒီသဒၢ ဒီးကကဟုကယာ်အီၤဒ် “မဲာ်ပှာ်ဖိအသိး.” (စံး ၁၇:၈) ဒီးအဒုၣ်အဒါ မ့ၢ်ဟဲထီဒါအီၤန့ၣ် အအဲၣ်ဒိးဝဲလၢ ယဟိဝၤယွၤ ကမၤစၢၤအီၤလၢအဆိအချ့. (ထိၣ်သတြီၤဒီး ကၤ ၂:၈)
လါမၢ်ၡး ၁၁-၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၁၈
“ယဟိဝၤယွၤ . . . မ့ၢ်ပှၤလၢ အမၤပူၤဖျဲးယၤ”
တၢး၀၉ ၅/၁ ၁၄ ¶၄-၅
တၢ်သးခုလၢ အဟဲလၢ ယဟိဝၤယွၤအအိၣ်န့ၣ် မ့ၢ်ဝဲ ပတၢ်ဂံၢ်တၢ်ဘါ
၄ လံာ်စီဆှံ ထိၣ်သတြီၤဝဲ ယဟိဝၤယွၤဒီး တၢ်လၢအသးသမူ တအိၣ်ဘၣ်တဖၣ်စ့ၢ်ကီး. လံာ်စီဆှံတဲဝဲလၢ ကစၢ်ယွၤမ့ၢ် “အံၣ်စရ့လး အလၢၢ်,“ “လၢၢ်” ဒီး “တၢ်အိၣ်သဒၢအလီၢ်.” (၂ ၡမူၤအ့လး ၂၃:၃; စံးထီၣ်ပတြၢၤ ၃၂:၄) ဘၣ်မနုၤအဃိ ပှၤထိၣ်သတြီၤ ကစၢ်ယွၤ ဒ်န့ၣ်လဲၣ်. လၢၢ်ဖးဒိၣ်န့ၣ် အကိၤဒီး ပှၤသုးအီၤတန့ၢ်ဘၣ်. ဒ်န့ၣ်အသိး ယဟိဝၤယွၤန့ၣ် အကဲတၢ်အိၣ်သဒၢအလီၢ် လၢပဂီၢ်ထီဘိ.
၅ လံာ်စံးထီၣ်ပတြၢၤအပူၤန့ၣ် တၢ်လၢအထိၣ်သတြီၤဝဲဒီး ကစၢ်ယွၤ အတၢ်ဂ့ၤတၢ်ဝါန့ၣ် အိၣ်ဝဲအါမး. အဒိ စံးထီၣ်ပတြၢၤ ၈၄:၁၁ န့ၣ်ထိၣ်သတြီၤဝဲ ယဟိဝၤယွၤဒီး “မုၢ် ဒီးကတီၤတဘ့ၣ်,” မ့ၢ်လၢ ယဟိဝၤယွၤန့ၣ် မ့ၢ်ဝဲ တၢ်ကပီၤ, တၢ်မူ, တၢ်ဂံၢ်တၢ်ဘါ ဒီးတၢ်ဒီသဒၢ အဂံၢ်ခီၣ်ထံးအဃိ. ဒီး စံးထီၣ်ပတြၢၤ ၁၂၁:၅ န့ၣ်ပာ်ဖျါထီၣ်ဝဲလၢ “ယဟိဝၤယွၤ မ့ၢ်ဝဲ တၢ်ကဒုလၢ အအိၣ်လၢ နစုထွဲတခီ.” ဒ်တၢ်ကဒု ဒီသဒၢပှၤလၢ မုၢ်အတၢ်ကိၢ်အသိး ယဟိဝၤယွၤ ဒီသဒၢပှၤလၢ တၢ်ကီတၢ်ခဲ လၢအလီၤဂာ်ဒီးတၢ်ကိၢ် ဒီးအဒီသဒၢပှၤလၢ အ “စု” ဒီးအ “ဒံးဆ့” ဖီလာ်.—ယၡါယၤ ၅၁:၁၆; စံးထီၣ်ပတြၢၤ ၁၇:၈; ၃၆:၇.
ယဟိဝၤယွၤ မၤစၢၤပှၤ ဒ်သိးဒီး ပလဲၤခီဖျိတၢ်ကီတၢ်ခဲကန့ၢ် ဒီးကသးခုထီဘိ
၅ “ဖဲသုကိးပသူထီၣ်လၢ တၢ်မၤစၢၤအဂီၢ်အခါ ကစၢ်ယွၤ ကပာ်ဖျါထီၣ်လၢ အဘၣ်သူၣ်ဘၣ်သးသု သပှၢ်တၢၢ်.” ဆၢကတီၢ်ခဲအံၤ တၢ်ကတိၤအံၤန့ၣ် အမၤမုာ်ထီၣ်ပသး သပှၢ်တၢၢ်. (ယၡါယၤ ၃၀:၁၉) ပမ့ၢ်ဃ့ထုကဖၣ်လၢ ပသးဒီဖျၢၣ်န့ၣ် ယဟိဝၤယွၤ ကကနၣ်ပှၤ လီၤတံၢ်လီၤဆဲး ဒီးအကမၤစၢၤပှၤ တဘျီဃီ. ဝံယၡါယၤ တဲဝဲလၢ “ဖဲအနၢ်ဟူ သုတၢ်ကိးပသူထီၣ်အခါ အဝဲကစံးဆၢသု တဘျီဃီ.” တကးဒံးဘၣ် ပသ့ၣ်ညါဘၣ်လၢ ပှၤလၢ အဃ့တၢ်မၤစၢၤ လၢကစၢ်ယွၤအအိၣ်န့ၣ် ကစၢ်ယွၤဘၣ်သး မၤစၢၤအဝဲသ့ၣ် သပှၢ်တၢၢ်. ပသ့ၣ်ညါဘၣ် ဒ်အံၤအဃိ မၤစၢၤပှၤလၢ ပကအိၣ်ဒီး တၢ်တူၢ်န့ၢ်ခီၣ်ကဲ ဒီးတၢ်သးခု.
ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ကဃ့ဘါထုကဖၣ်တၢ်အဂီၢ်
ကစၢ်ယွၤလၢ အတ့လီၤမူခိၣ်ဒီးဟီၣ်ခိၣ်တဂၤန့ၣ် ဟ့ၣ်ပှၤတၢ်ခွဲးတၢ်ယာ်လၢ ပကဃ့ဘါထုကဖၣ်တၢ်လၢအအိၣ်. ဆိကမိၣ်ကွၢ် ပတဲတၢ်ဒီးအီၤလၢ ကျိာ်တမံၤဂ့ၤတမံၤဂ့ၤ ဒီးတၢ်ဆၢကတီၢ် တတီၤဂ့ၤတတီၤဂ့ၤန့ၢ်ခဲလၢာ်. ပမ့ၢ်အိၣ်လၢ တၢ်ဆါဟံၣ်မ့ၢ်ဂ့ၤ လၢဃိာ်ပူၤမ့ၢ်ဂ့ၤ ပနာ်သ့လၢ ယဟိဝၤယွၤ ကဒိကနၣ်ပတၢ်ထုကဖၣ်. အဃိ ပပာ်လုၢ်ပာ်ပှ့ၤ တၢ်ခွဲးတၢ်ယာ်တခါအံၤဒိၣ်မး.
နလဲၤခီဖျိ တၢ်သူၣ်ကိၢ်သးဂီၤ ကန့ၢ်ဒ်လဲၣ်
၂. ဆိကမိၣ်ထံက့ၤတၢ်. တၢ်မၤကွၢ်လၢ နလဲၤခီဖျိအီၤ န့ၢ်ထဲဒၣ်လၢ ယဟိဝၤယွၤ အတၢ်မၤစၢၤန့ၣ် အိၣ်တဘျီဘျီဧါ. ပမ့ၢ်ဆိကမိၣ်ထံက့ၤ တၢ်လၢယဟိဝၤယွၤမၤစၢၤတ့ၢ် အခ့အပှၤလၢပျၢၤတဖၣ်ဒ်လဲၣ်န့ၣ် ပဂံၢ်ပဘါကဆူၣ်ထီၣ် ဒီးပတၢ်နာ်န့ၢ်အီၤ ကဟဲအါထီၣ်. (စံးထီၣ်ပတြၢၤ ၁၈:၁၇-၁၉) ဒီပုၢ်ဝဲၢ်ခွါကၠါၡဝၤ လၢအမ့ၢ်တၢ်အိၣ်ဖှိၣ်သးပှၢ်န့ၣ် တဲဝဲလၢ “ယကွဲးလီၤဃာ် ယတၢ်ဃ့ထုကဖၣ်လၢ ကစၢ်ယွၤစံးဆၢဝဲတဖၣ် အဃိ အမၤစၢၤယၤဒ်သိး ယကသ့ၣ်နီၣ်က့ၤ တၢ်ဆၢကတီၢ်လၢ ယဃ့ထုကဖၣ်လၢ ယဟိဝၤယွၤအအိၣ် ဒီးတၢ်ဂ့ၢ်တၢ်ကျိၤလၢ ယဃ့အီၤ, ဒီးအစံးဆၢယတၢ်ထုကဖၣ် ဒ်ယလိၣ်ဘၣ်အီၤအသိး.” ဖဲပဆိကမိၣ်ထံက့ၤ တၢ်လၢယဟိဝၤယွၤမၤစၢၤတ့ၢ်ပှၤ လၢအပူၤကွံာ်အခါ ပကအိၣ်ဒီး တၢ်ဂံၢ်တၢ်ဘါလၢ ပကလဲၤခီဖျိ ပတၢ်သူၣ်ကိၢ်သးဂီၤအဂီၢ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၄၃၂ ¶၂
ခ့ရူာ်
ခ့ရူာ်အဂီၤတဖၣ်အံၤန့ၣ် အတလီၤဂာ်ဒ်သိးဒီး တၢ်ဂီၤတၢ်ဖှီၣ်လၢ အလီၤပျံၤလီၤဖုးလၢ အအိၣ်ဒီးအဒံးဆ့ လၢပှၤဘါတၢ်ဂီၤတၢ်ဖှီၣ်တဖၣ် ဘူၣ်ထီၣ်ဘါထီၣ်ဝဲန့ၣ်ဘၣ်. ပှၤယူဒၤဖိ လၢပျၢၤတဖၣ် နာ်ဝဲလၢ ခ့ရူာ်တဖၣ်အံၤန့ၣ် အက့ၢ်အဂီၤ လီၤဂာ်ဒ်သိးဒီး ပှၤကညီ. (ဘၣ်ဃးဒီး တၢ်ဂ့ၢ်အံၤ လံာ်စီဆှံ တတဲဝဲ တၢ်နီတမံၤဘၣ်) ဒီးခ့ရူာ်အဂီၤတဖၣ်အံၤ ပှၤတ့အီၤ မူာ်မူာ်နီၢ်နီၢ် ဒီးအဝဲသ့ၣ် ဘၣ်တၢ်ဒိလီၤအီၤလၢ မူခိၣ်ကလူးတဖၣ် အတၢ်လၤကပီၤ ဒီးပှၤတ့အီၤ လီၤတံၢ်လီၤဆဲး “ဒ်တၢ်အဒိ” လၢယဟိဝၤယွၤ ဟ့ၣ်လီၤစီၤမိၤၡ့အသိး. (၂ မိၤ ၂၅:၉) ဘၣ်ဃးဒီး ခ့ရူာ်တဖၣ်န့ၣ် တၢ်မၢဖိပီလူး တဲဝဲလၢ “ခ့ရူာ်လၢအပှဲၤဒီး တၢ်လၤကပီၤတဖၣ် အိၣ်ဝဲလၢ တလါအံၤအဖီခိၣ်.” (ဧ့ၤ ၉:၅) ယဟိဝၤယွၤ တဲဝဲလၢ “ယကပာ်ဖျါထီၣ်ယသး လၢနအိၣ် ဖဲန့ၣ် ဒီးယကတဲတၢ်ဒီးနၤ လၢတလါ အခိၣ်ကျး အဖီခိၣ်. . . . လၢခ့ရူာ် လၢအအိၣ်လၢ တၢ်အၢၣ်လီၤအီလီၤ အတလါ အဖီခိၣ် ခံဒုအဘၢၣ်စၢၤ.” ဖဲခ့ရူာ်အိၣ်ဝဲအလီၢ်န့ၣ် ပာ်ဖျါထီၣ်ဝဲလၢ ယဟိဝၤယွၤ အိၣ်ဝဲဖဲတၢ်လီၢ်တတီၤန့ၣ်. (၂ မိၤ ၂၅:၂၂; ၄ မိၤ ၇:၈၉) ယဟိဝၤယွၤတဲဝဲလၢ အက “ဆ့ၣ်နီၤလၢ အလီၢ်ပစိာ်လၢ ခ့ရူာ်တဖၣ် အဖီခိၣ်.” (၁ မူၤ ၄:၄; ၂ မူၤ ၆:၂; ၂ စီၤပၤ ၁၉:၁၅; ၁ ကွဲး ၁၃:၆; စံး ၈၀:၁; ၉၉:၁; ၡါ ၃၇:၁၆.) ခ့ရူာ်န့ၣ် ဘၣ်တၢ်ဒိလီၤအီၤလၢ “လ့ၣ်ကဟၣ်” လၢကစၢ်ယွၤ ဒိးဝဲ. (၁ ကွဲး ၂၈:၁၈) ဒီးတၢ်လၢခ့ရူာ်အဒံးန့ၣ် အဒီသဒၢတၢ် ဒီးအလဲၤတၢ်ချ့မး. အဃိ ဖဲစီၤဒၤဝံး ကွဲးဝဲလၢ ယဟိဝၤယွၤ ဟဲ “ဒိးဝဲခ့ရူာ် ဒီးဟဲယူၤဝဲ . . . လၢမူခိၣ်ကလူးအဒံးတဖၣ်အဖီခိၣ်” အခါ အအဲၣ်ဒိးတဲဝဲလၢ ဖဲအလိၣ်ဘၣ်တၢ်မၤစၢၤအခါ ကစၢ်ယွၤဟဲမၤစၢၤအီၤချ့ချ့.—၂ မူၤ ၂၂:၁၁; စံး ၁၈:၁၀.
လါမၢ်ၡး ၁၈-၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၁၉-၂၁
“မူခိၣ်လီၣ်ဖျါထီၣ် ကစၢ်ယွၤ အလၤကပီၤ”
တၢး၀၄ ၁/၁ ၈ ¶၁-၂
မ်တၢ်ခဲလၢာ် လီၣ်ဖျါထီၣ် ကစၢ်ယွၤအလၤကပီၤ
စီၤယံးၡဲ အဖိခွါ စီၤဒၤဝံးန့ၣ် အကဲပှၤကွၢ်သိလၢ အနီၢ်ဆံးခါလံၤလံၤ ဒီးအကွၢ်သိလၢ တၢ်လီၢ်လၢအဘူးဒီး ဝ့ၢ်ဘ့ၤသလ့ဃ့ၣ်. ဖဲအဝဲ ကွၢ်အပါအသိတဖၣ်အခါ လၢမုၢ်နၤလၢ သိတဖၣ်အီၣ်ဆၣ်အလီၢ်န့ၣ် အဝဲအိၣ်ထဲတဂၤ ဒီးကကွၢ်ထီၣ် မူခိၣ်လၢ အပှဲၤဒီးဆၣ်တဖၣ်အါဘျီ. အဃိ အဝဲကမၢကမၣ်ဝဲဒိၣ်မး ဒီးသးစီဆှံ ထိၣ်ဟူးထိၣ်ဂဲၤထီၣ်အီၤလၢ ကကွဲးဝဲ ထါစံးထီၣ်ပတြၢၤ အဆၢဒိၣ် ၁၉. အတဲဝဲလၢ “မူခိၣ်လီၣ်ဖျါထီၣ် ကစၢ်ယွၤအလၤကပီၤ ဒီးမူကပိာ်လိၤ ပာ်ဖျါထီၣ်ဝဲ အစုအတၢ်မၤလီၤ. ဘၣ်ဆၣ် အဝဲသ့ၣ်အကလုၢ်န့ၣ် ဟူထီၣ်လၢ ဟီၣ်ခိၣ်ဒီဘ့ၣ် ဒီးအဝဲသ့ၣ်အတၢ်ကစီၣ်န့ၣ် ရၤလီၤအသးလၢ ဟီၣ်ခိၣ်အနၢၣ် အကတၢၢ်လီၤ.”—စံးထီၣ်ပတြၢၤ ၁၉:၁, ၄.
၂ ယဟိဝၤယွၤ အတၢ်ဘၣ်တ့လၢ မူခိၣ်တဖၣ်န့ၣ် တတဲတၢ်ကတိၤ နီတဖျၢၣ်ဘၣ်သနာ်က့ အဝဲသ့ၣ် စံးထီၣ်ပတြၢၤ ကစၢ်ယွၤအလၤကပီၤ ကိးမုၢ်နံၤ ကိးမုၢ်နၤဒဲးလီၤ. ဒီးအဝဲသ့ၣ် တအိၣ်ပတုာ် နီတဘျီဘၣ်. အဝဲသ့ၣ် အကလုၢ်တသီၣ်ဘၣ် သနာ်က့ အဝဲသ့ၣ် ပာ်ဖျါထီၣ် ကစၢ်ယွၤ အလၤကပီၤ “လၢဟီၣ်ခိၣ်ဒီဘ့ၣ်.” မ့မ့ၢ် ပှၤဟီၣ်ခိၣ်ဖိလၢ အအိၣ်ဒီး တၢ်သးတီတဖၣ်န့ၣ် လံာ်စီဆှံ ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကစံးထီၣ်ပတြၢၤ ယဟိဝၤယွၤ လၢအကလုၢ်. လံာ်စီဆှံ တဲဝဲလၢ “ပှၤအဒူၣ်တဖၣ်သ့ၣ်ဧၢ, ဟ့ၣ်ယဟိဝၤယွၤ တၢ်လၢအကြၢးဒီးအီၤ, ယူးယီၣ် ယဟိဝၤယွၤလၢ အတၢ်လၤကပီၤ ဒီးအတၢ်ဂံၢ်တၢ်ဘါ အဃိတက့ၢ်. ဟ့ၣ်ယဟိဝၤယွၤ တၢ်လၤကပီၤ ဒ်အကြၢးဒီး အမံၤအသိး.” (စံးထီၣ်ပတြၢၤ ၉၆:၇, ၈) ပှၤလၢအအိၣ်ဒီး တၢ်ရ့လိာ်သးဒီး ယဟိဝၤယွၤ ဘူးဘူးတံၢ်တံၢ်တဖၣ်န့ၣ် အဲၣ်ဒိး စံးထီၣ်ပတြၢၤ ယဟိဝၤယွၤလၢ သူၣ်ဒီဖျၢၣ်သးဒီဖျၢၣ် ဒ်စံးထီၣ်ပတြၢၤ ဟ့ၣ်ဂံၢ်ဟ့ၣ်ဘါဝဲအသိး. ပစံးထီၣ်ပတြၢၤ ကစၢ်ယွၤအလၤကပီၤ ကသ့ဒ်လဲၣ်.
တၢး၀၄ ၆/၁ ၁၁ ¶၈-၁၀
တၢ်ဘၣ်တ့တဖၣ် လီၣ်ဖျါထီၣ် ကစၢ်ယွၤ အလၤကပီၤ
၈ စီၤဒၤဝံး ပာ်ဖျါထီၣ်ဝဲ ယဟိဝၤယွၤ အတၢ်ဘၣ်တ့လၢ အလီၤလိၢ်လီၤလး အဂၤတခါအဂ့ၢ်. အဝဲတဲဝဲလၢ “လၢမူခိၣ်န့ၣ် ကစၢ်ယွၤတ့ဝဲ ဒဲတဖျၢၣ်လၢ မုၢ်အဂီၢ်လီၤ. ဒီးမုၢ်န့ၣ် လီၤဂာ်ဒ် တလးမူးပိာ်ခွါ လၢအဟးထီၣ်လၢ တလးမူးပိာ်ခွါ အဒၢးပူၤအသိး ဒီးမုၢ်န့ၣ် သူၣ်ဖှံသးညီဝဲ ဒ်ပှၤလၢအဂံၢ်ဆူၣ်တဂၤလၢ အဃ့ၢ်ဝဲလၢ အကျဲပူၤအသိးလီၤ. ဒီးမုၢ်န့ၣ် ဟဲထီၣ်ဝဲလၢ မူခိၣ်လၢအံၤတကပၤ ဒီးလဲၤတရံးဝဲတုၤလၢ အဝဲတကပၤလီၤ. ဒီးလၢမုၢ်အတၢ်ကိၢ် အဖီလာ်န့ၣ် တၢ်တအိၣ်သဒၢ နီတမံၤဘၣ်.”—စံးထီၣ်ပတြၢၤ ၁၉:၄-၆.
၉ မုၢ်န့ၣ် ပှၤမ့ၢ်ထိၣ်သတြီၤအီၤဒီး ဆၣ်အဂၤတဖၣ်န့ၣ် အတဒိၣ်အါအါဘၣ်. ဘၣ်ဆၣ် မုၢ်န့ၣ်အကဲဝဲ ဆၣ်လၢ အလီၤကမၢကမၣ်တဖျၢၣ်. ဒီးဟီၣ်ခိၣ်ဖျၢၣ်လၢ အလဲၤတရံးအီၤတဖၣ်န့ၣ် တထဲသိးဒီးအီၤဘၣ်. လံာ်တဘ့ၣ်တဲဝဲလၢ “မုၢ်န့ၣ် အတယၢၢ်ဃၢဝဲဒိၣ်မး.” ဒီးဟီၣ်ခိၣ်ဖျၢၣ်လၢ အလဲၤတရံးအီၤသ့ၣ်တဖၣ် မ့ၢ်ပာ်ဖှိၣ်ထီၣ်အသးခဲလၢာ်န့ၣ် အဃၢဒိၣ်န့ၢ်မုၢ် ထဲတစဲးဖိလီၤ. ဟီၣ်ခိၣ်ဖျၢၣ်န့ၣ် အအိၣ်ယံၤဒီးမုၢ် အမံးလာ် ၉၃ ကကွဲၢ် [အကကွဲၢ် ၁၅၀ ကံလိမံထၢၣ်]. ဒီးခီဖျိလၢ မုၢ်အတၢ်ထုးဃၢအဃိ ဟီၣ်ခိၣ်န့ၣ် တယံၤထီၣ်ဒီးမုၢ် မ့တမ့ၢ် တဘူးဒိၣ်ထီၣ်ဒီးမုၢ်ဘၣ်. မုၢ်အတၢ်ကိၢ်လၢ အဟဲလီၤလၢ ဟီၣ်ခိၣ်န့ၣ် အကကွဲၢ်တကထိပူတပူၤမၣ် တအိၣ်ဘၣ်. ဘၣ်ဆၣ် တၢ်ကိၢ်အံၤ အယၢဝဲလၢ ပှၤတၢ်သးသမူခဲလၢာ်အဂီၢ်.
၁၀ ပှၤကွဲးထါစံးထီၣ်ပတြၢၤ ထိၣ်သတြီၤဝဲမုၢ်ဒ် “ပှၤလၢအဂံၢ်ဆူၣ်တဂၤ” လၢအဃ့ၢ်ဝဲဆူ ဟီၣ်ထံးမူထံး လၢအံၤတကပၤ ဆူအဝဲတကပၤ လၢတနံၤအတီၢ်ပူၤ ဒီးအအိၣ်ဘှံးဝဲဖဲ မုၢ်နၤခီ လၢ “ဒဲတဖျၢၣ်” အပူၤ. ဖဲမုၢ်လီၤနုာ်ဝဲအခါ အလီၤဂာ်ဒ် အလဲၤနုာ်အိၣ်ဘှံးဝဲလၢ “ဒဲတဖျၢၣ်” အပူၤ. ဒီးဖဲမုၢ်ဟဲထီၣ်လၢ ဂီၤခီအခါန့ၣ်အ “လီၤဂာ်ဒ် တလးမူးပိာ်ခွါ လၢအဟးထီၣ်လၢ တလးမူးပိာ်ခွါ အဒၢးပူၤအသိး.” စီၤဒၤဝံးကဲ ပှၤကွၢ်သိအဃိ ဖဲမုၢ်နၤအဆၢကတီၢ် တၢ်ဂိၢ်ဒိၣ်ထဲလဲၣ်န့ၣ် အသ့ၣ်ညါဝဲ. (၁ မိၤၡ့ ၃၁:၄၀) မုၢ်အတၢ်ကပီၤ မၤကလၢၤထီၣ်အီၤ ဒီးတၢ်လီၢ်လၢ အခိၣ်အဃၢၤ တဘျီဝံၤတဘျီန့ၣ် အဝဲတဲဖျါထီၣ်ဝဲ. မုၢ်န့ၣ် လဲၤတၢ်လၢ မုၢ်ထီၣ်တုၤလၢမုၢ်နုာ် ဒီးတလီၤဘှံးဘၣ်အဃိ လီၤဂာ်ဒ် “ပှၤလၢအဂံၢ်ဆူၣ်တဂၤ” လၢအအိၣ်ကတဲာ်ကတီၤအသးထီဘိ လၢကလဲၤတၢ်အဂီၢ်.
g၉၅ ၁၁/၈ ၇ ¶၃
တၢ်ဘၣ်တ့ကစၢ်လၢ ပှၤအါဂၤ တသ့ၣ်ညါအီၤဘၣ်
ပမ့ၢ်ဆိကမိၣ်ထံအါထီၣ် တၢ်ဘၣ်တ့တဖၣ်အဂ့ၢ်န့ၣ် ကမၤစၢၤပှၤ ဒ်သိးပကသ့ၣ်ညါအါထီၣ် တၢ်ဘၣ်တ့ကစၢ်အဂ့ၢ်. ဘၣ်တဘျီန့ၣ် ယ့ၣ်ၡူးမၢ အပျဲၢ်အဘီၣ်တဖၣ် ကွၢ်ထံကွၢ်ဆးဝဲ ဖီတဖၣ်လၢ အမဲထီၣ်လၢ ကၤလံၤလါအပူၤ. အဝဲတဲဝဲလၢ “ဟံးန့ၢ်တၢ်မၤလိလၢ ဖီဒ့ၣ်ညါလၢ တၢ်ပျီပူၤန့ၣ်တက့ၢ်. ဖီဒ့ၣ်ညါ တမၤတၢ်ဘၣ် ဒီးတထါတၢ် စ့ၢ်ကီးဘၣ် ဘၣ်ဆၣ် ဖီဒ့ၣ်ညါတဖၣ် မဲထီၣ်ဝဲ ဂ့ၤဂ့ၤဘၣ်ဘၣ်လီၤ. ယကတဲဘၣ်သုလၢ စီၤၡလိၤမိၤန့ၣ် အိၣ်ဒီးအလၤအကပီၤ လီၤဘီလီၤမုၢ် သနာ်က့ အကူတၢ်ကၤတၢ်န့ၣ် တဖျါဂ့ၤထဲသိးဒီး ဖီဒ့ၣ်ညါတဖီးဘၣ်.” (မးသဲ ၆:၂၈, ၂၉) ဖီဒ့ၣ်ညါလၢ အဃံလၤတဖၣ်အံၤန့ၣ် အဒုးသ့ၣ်ညါပှၤလၢ ကစၢ်ယွၤ ကမၤလၢပှဲၤ ပှၤဟီၣ်ခိၣ်ဖိတဖၣ် အတၢ်လိၣ်ဘၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ယဟိဝၤယွၤ အတၢ်တိာ်ပာ် ကဟဲလၢပှဲၤထီၣ်ဝဲ သပှၢ်ကတၢၢ်
၅ ယဟိဝၤယွၤပာ်လီၤဝဲ အတၢ်ဘၣ်တ့ခဲလၢာ်လၢ အလီၢ်အလီၢ်ဒၣ်ဝဲတခါစုာ်စုာ်လီၤ. အဝဲပာ်လီၤဝဲတၢ်ဘျၢလၢ န့ဆၢၣ်အဂီၢ် ဒီးပှၤဟီၣ်ခိၣ်ဖိအဂီၢ်လီၤ. အဝဲပာ်လီၤဝဲတၢ်ဘျၢတဖၣ်အံၤ ဒ်သိး အတၢ်ဘၣ်တ့ခဲလၢာ် ကလဲၤအသးဘၣ်လီၢ်ဘၣ်စးအဂီၢ်လီၤ. (စံး ၁၉:၇-၉) လၢမူဟီၣ်ကယၢအပူၤ တၢ်ဘၣ်တ့ခဲလၢာ်န့ၣ် အကဲဘျုးလၢအသနၢၣ်ဒၣ်ဝဲလီၤ. အဒိ ဟီၣ်ခိၣ်အတၢ်ထုးဃၢန့ၣ် ထုးဃာ်ဝဲကလံၤလၢ အအိၣ်ဝးတရံးဟီၣ်ခိၣ် ဒီးပၢၤဃာ်ဝဲပီၣ်လဲၣ်ဒီး ထံထီၣ်ထံလီၤဒ်သိး ကလဲၤအသးဘၣ်လီၢ်ဘၣ်စးအဂီၢ်လီၤ. ဟီၣ်ခိၣ်တၢ်ထုးဃၢ မ့ၢ်တအိၣ်ဘၣ်န့ၣ် တၢ်သးသမူလၢဟီၣ်ခိၣ်ချၢ မူဝဲတသ့နီတမံၤဘၣ်. ယဟိဝၤယွၤပာ်လီၤဝဲ တၢ်ဘျၢတဖၣ်အံၤအဃိ အတၢ်ဘၣ်တ့လၢ မူဟီၣ်ကယၢအပူၤအံၤ လဲၤအသးဘျ့ဘျ့ဆှီဆှီလီၤ. တၢ်သ့ၣ်တဖၣ်အံၤ ပာ်ဖျါထီၣ်ဝဲလၢ ကစၢ်ယွၤအိၣ်ဒီး အတၢ်တိာ်ပာ်လၢဟီၣ်ခိၣ် ဒီးပှၤဟီၣ်ခိၣ်ဖိအဂီၢ်လီၤ. လၢပတၢ်စံၣ်တဲၤတဲလီၤတၢ်မၤအပူၤ ပမၤစၢၤပှၤဂၤ ဒ်သိးအဝဲသ့ၣ်ကသ့ၣ်ညါထီၣ် တၢ်ဘၣ်တ့ကစၢ်အဂ့ၢ်လီၤ.—လီၣ်ဖျါ ၄:၁၁.
ijwfq ၄၅
ယဟိဝၤပှၤအုၣ်အသးတဖၣ် မၤဝဲကစၢ်အတၢ်အီၣ်လၢ ဟါအီၣ်န့ၣ် ဘၣ်မနုၤအဃိ လီၤဆီလိာ်အသးဒီးတၢ်ဘူၣ်တၢ်ဘါလၢ အဂၤတဖၣ်လဲၣ်
“ကစၢ်အတၢ်အီၣ်လၢ ဟါအီၣ်” န့ၣ်ဘၣ်တၢ်ကိးစ့ၢ်ကီးအီၤလၢ တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံန့ၣ်လီၤ. ကစၢ်အတၢ်အီၣ်လၢ ဟါအီၣ်အမူးအံၤ ပမၤအီၤလီၤတံၢ်လီၤဆဲး ဒ်လံာ်စီဆှံပာ်ဖျါဝဲအသိးန့ၣ်လီၤ. (၁ ကရံၣ်သူး ၁၁:၂၀) ဘၣ်ဃးဒီးမူးပွဲအံၤ တၢ်ဘူၣ်တၢ်ဘါအါဖု အတၢ်စူၢ်တၢ်နာ်ဒီးအလုၢ်အလၢ်တဖၣ် တလီၤပလိာ်လိာ်အသး ဒီးလံာ်စီဆှံဘၣ်.
တၢ်တိာ်ပာ်
ကစၢ်အတၢ်အီၣ်လၢဟါအီၣ် အတၢ်တိာ်ပာ်မ့ၢ်ဝဲ ပကသ့ၣ်နီၣ်ထီၣ်ယ့ၣ်ၡူးဒီး ပာ်ဖျါထီၣ် တၢ်စံးဘျုးစံးဖှိၣ် ကစၢ်အတၢ်ဟ့ၣ်လုၢ်ထီၣ်အသးလၢ ပဂီၢ်န့ၣ်လီၤ. (မးသဲ ၂၀:၂၈; ၁ ကရံၣ်သူး ၁၁:၂၄) တၢ်မၤမူးပွဲအံၤန့ၣ် တမ့ၢ်တၢ်ဘူၣ်တၢ်ဘါလုၢ်လၢ်တခါလၢ ကမၤကဆှီထီၣ်ကွံာ်ပတၢ်ဒဲးဘးဘၣ်. လံာ်စီဆှံသိၣ်လိပှၤလၢ ပတၢ်ဒဲးဘး ကဘၣ်တၢ်ပျၢ်ကွံာ်အီၤခီဖျိ ပတၢ်နာ်ယ့ၣ်ၡူးအဃိလီၤ. တမ့ၢ်လၢတၢ်ဘူၣ်တၢ်ဘါ အလုၢ်လၢ်အဃိဘၣ်.—ရိမ့ၤ ၃:၂၅; ၁ ယိၤဟၣ် ၂:၁, ၂.
ဘၣ်မၤအီၤပှဲၤဘျီလဲၣ်
ယ့ၣ်ၡူးမၤလိာ်ဝဲ အပျဲၢ်အဘီၣ်တဖၣ်လၢ ကဘၣ်မၤကစၢ်အတၢ်အီၣ်လၢဟါအီၣ်အမူးလီၤ. ဘၣ်ဆၣ်အဝဲသ့ၣ် ကဘၣ်မၤဝဲ တနံၣ်ပှဲၤဘျီလဲၣ်န့ၣ် အဝဲတတဲဝဲလီၤတံၢ်လီၤဆဲးဘၣ်. (လူၤကၣ် ၂၂:၁၉) ပှၤတနီၤနီၤစံးဝဲလၢ ပကြၢးမၤအီၤ ကိးလါဒဲး, တနီၤစံးဝဲလၢ ကိးနွံဒဲး ဒီးအဂၤတနီၤစံးဝဲလၢ ကိးနံၤဒဲးန့ၣ်လီၤ. ဘၣ်ဆၣ် သမံသမိးကွၢ် တၢ်ဂ့ၢ်လၢလာ်တဖၣ်အံၤတက့ၢ်.
ယ့ၣ်ၡူးစးထီၣ်မၤဝဲ ကစၢ်အတၢ်အီၣ်လၢဟါအီၣ်အမူးဖဲ မုၢ်နံၤလၢ ပှၤယူဒၤဖိ မၤဝဲဘူၣ်လဲၤကပာ်အနံၤန့ၣ်လီၤ. ဒီးယ့ၣ်ၡူးသံဝဲဖဲ မုၢ်နံၤအဝဲန့ၣ်လီၤ. (မးသဲ ၂၆:၁, ၂) တၢ်အံၤတမ့ၢ် တၢ်ဘၣ်အတီၤဘၣ်. ယ့ၣ်ၡူးအတၢ်ဟ့ၣ်လုၢ်ထီၣ်သးန့ၣ် လံာ်စီဆှံထိၣ်သတြီၤဝဲဒီး ဘူၣ်လဲၤကပာ်အသိဖိလီၤ. (၁ ကရံၣ်သူး ၅:၇, ၈) ဘူၣ်လဲၤကပာ်မူးပွဲန့ၣ် ဘၣ်တၢ်မၤအီၤ တနံၣ်တဘျီလီၤ. (၂ မိၤၡ့ ၁၂:၁-၆; ၃ မိၤၡ့ ၂၃:၅) ဒ်န့ၣ်အသိး ခရံာ်ဖိလၢညါတဖၣ်စ့ၢ်ကီး မၤဝဲတၢ်သ့ၣ်နီၣ်ထီၣ်ယ့ၣ်ၡူးအတၢ်သံအမူး တနံၣ်တဘျီလီၤ. ဒီးယဟိဝၤပှၤအုၣ်အသးတဖၣ်စ့ၢ်ကီး မၤဝဲဒ်န့ၣ်အသိးလီၤ.
မုၢ်နံၤမုၢ်သီ ဒီးတၢ်ဆၢကတီၢ်
တၢ်အဒိလၢ ယ့ၣ်ၡူးပာ်လီၤတ့ၢ်ဝဲန့ၣ် မၤစၢၤပှၤဒ်သိးပကသ့ၣ်ညါလၢ ပကဘၣ်မၤမူးပွဲအံၤလၢ မုၢ်နံၤမုၢ်သီ ဒီးတၢ်ဆၢကတီၢ်ဖဲလဲၣ် ဒီးပကဘၣ်မၤအီၤ တနံၣ်ပှဲၤဘျီလဲၣ်န့ၣ်လီၤ. ကစၢ်ခရံာ်စးထီၣ်မၤဝဲ မူးပွဲအံၤဖဲ ခ.န ၃၃ လါနံစၣ် ၁၄ သီ မုၢ်လီၤနုာ်ဝံၤအလီၢ်ခံလီၤ. ဒီးမၤဝဲဒ်လံာ်စီဆှံ အလံာ်နံၣ်လံာ်လါ (ပှၤအံၣ်စရ့လးဖိလၢပျၢၤ အလံာ်နံၣ်လံာ်လါ) အသိးလီၤ. (မးသဲ ၂၆:၁၈-၂၀, ၂၆) ဒ်ခရံာ်ဖိလၢညါတဖၣ် မၤဝဲအသိး ပဆဲးမၤမူးပွဲအံၤ ကိးနံၣ်ဒဲးလီၤ.
တၢ်သ့ၣ်နီၣ်ထီၣ်အမူးအံၤ ဘၣ်တၢ်မၤအီၤအဆိကတၢၢ်တဘျီ ဖဲ ခ.န ၃၃ လါနံစၣ် ၁၄ သီမုၢ်ယဲၢ်နံၤသနာ်က့ တနံၣ်ဘၣ်တနံၣ် လါနံစၣ် ၁၄ သီန့ၣ်တဘၣ်လၢ မုၢ်ယဲၢ်နံၤကိးဘျီဒဲးဘၣ်. ဘၣ်ဃးဒီးတၢ်ဒွး လါနံစၣ် အမုၢ်နံၤမုၢ်သီလၢ တနံၣ်ဘၣ်တနံၣ်အဂီၢ်န့ၣ် ပတသူစိၤခဲအံၤ ပှၤယူဒၤဖိအလံာ်နံၣ်လံာ်လါဘၣ်. ပဒွးမုၢ်နံၤမုၢ်သီဒ် ယ့ၣ်ၡူးအပျဲၢ်အဘီၣ်လၢညါတဖၣ် ဒွးဝဲအသိးလီၤ.
ကိၣ်ဒီး စပံးထံ
မူးပွဲအသီအံၤအဂီၢ် ယ့ၣ်ၡူးသူဝဲကိၣ်လၢ တအိၣ်ဒီးကိၣ်မံၣ် ဒီးစပံးထံဂီၤလၢအအိၣ်တ့ၢ်လၢ ဘူၣ်လဲၤကပာ်န့ၣ်လီၤ. (မးသဲ ၂၆:၂၆-၂၈) ဒ်ယ့ၣ်ၡူးပာ်လီၤတ့ၢ်ဝဲ တၢ်အဒိအသိး ပတသူ ကိၣ်လၢအပၣ်ဃုာ်ဒီးကိၣ်မံၣ် မ့တမ့ၢ် လၢအပၣ်ဃုာ်ဒီးတၢ်အဂုၤအဂၤတဖၣ်ဘၣ်. စပံးထံဂီၤလၢ အပၣ်ဃုာ်ဒီး တၢ်ဆၢ မ့တမ့ၢ် တၢ်အဂုၤအဂၤန့ၣ် ပတသူစ့ၢ်ကီးဘၣ်.
ခရံာ်ဖိကရၢကရိအဂၤတဖၣ် သူဝဲကိၣ်လၢအပၣ်ဒီး ကိၣ်မံၣ်န့ၣ်လီၤ. ဘၣ်ဆၣ် လံာ်စီဆှံဒိလီၤဝဲကိၣ်မံၣ်လၢ တၢ်ဒဲးဘး မ့တမ့ၢ် တၢ်လီတၢ်ဝ့ၤလီၤ. (လူၤကၣ် ၁၂:၁; ၁ ကရံၣ်သူး ၅:၆-၈; ကလၤတံ ၅:၇-၉) လၢတၢ်န့ၣ်အဃိ ခရံာ်အနီၢ်ခိ လၢအတအိၣ်ဒီးတၢ်ဒဲးဘးန့ၣ် ဘၣ်တၢ်ဒိလီၤအီၤလၢ ကိၣ်လၢတအိၣ်ဒီးကိၣ်မံၣ် ဒီးတပၣ်ဃုာ်ဒီး တၢ်အဂုၤအဂၤတဖၣ်န့ၣ်လီၤ. (၁ ပ့းတရူး ၂:၂၂) လုၢ်လၢ်တခါလၢအမ့ၢ် ပှၤသူတၢ်ဆၢထံ (grape juice) လၢစပံးထံအလီၢ်န့ၣ် တလီၤပလိာ်လိာ်သးဒီးလံာ်စီဆှံဘၣ်. လံာ်စီဆှံတတြီဝဲ တၢ်အီသံးသနာ်က့ မ့ၢ်လၢခရံာ်ဖိကရၢကရိတနီၤ တြီဝဲအဃိ မၤဝဲဒ်န့ၣ်အသိးလီၤ.—၁ တံၤမသ့း ၅:၂၃.
ကိၣ်ဒီးစပံးထံန့ၣ် တမ့ၢ်ယ့ၣ်ၡူးအသွံၣ်ဒီး အညၣ်နီၢ်နီၢ်ဘၣ်
ကိၣ်လၢတအိၣ်ဒီးကိၣ်မံၣ် ဒီးစပံးထံဂီၤ လၢဘၣ်တၢ်သူအီၤလၢ တၢ်သ့ၣ်နီၣ်ထီၣ်အမူးပွဲန့ၣ် ဘၣ်တၢ်ဒိလီၤအီၤလၢ ခရံာ်အသွံၣ်ဒီးအညၣ်န့ၣ်လီၤ. ပှၤတနီၤနီၤနၢ်ပၢၢ်ဝဲ ကိၣ်ဒီး စပံးထံန့ၣ် ဆီတလဲအသးလၢ ယ့ၣ်ၡူးအသွံၣ်ဒီးအညၣ် လၢတၢ်လီၤလးအပူၤန့ၣ်လီၤ. ဘၣ်ဆၣ်တမ့ၢ်ဒ်န့ၣ်ဘၣ်. ဒ်သိးပကနၢ်ပၢၢ် တၢ်ဂ့ၢ်တဖၣ်အံၤအဂီၢ် ပကကွၢ်သကိးလၢ လံာ်စီဆှံအပူၤန့ၣ်လီၤ.
ယ့ၣ်ၡူးမ့ၢ်မၢဝဲ အပျဲၢ်အဘီၣ်တဖၣ် အီအသွံၣ်နီၢ်ကီၢ်န့ၣ် ကကဲထီၣ်တၢ်ကမၤကမၣ် ယွၤအတၢ်မၤလိာ်လၢ ဘၣ်ဃးဒီးတၢ်သွံၣ်န့ၣ်လီၤ. (၁ မိၤၡ့ ၉:၄; မၤတၢ် ၁၅:၂၈, ၂၉) ဘၣ်ဆၣ်တမ့ၢ်လၢ ယ့ၣ်ၡူးကမၤဝဲဒ်န့ၣ်ဘၣ်. ယ့ၣ်ၡူးတသိၣ်လိပှၤဂၤလၢ ကမၤကမၣ် ယွၤအတၢ်မၤလိာ် လၢဘၣ်ဃးဒီး တၢ်သွံၣ်အံၤ နီတဘျီဘၣ်.—ယိၤဟၣ် ၈:၂၈, ၂၉.
ဖဲယ့ၣ်ၡူးစံးဝဲလၢ အသွံၣ်က “ဘၣ်လူလီၤအသး” အခါ ယ့ၣ်ၡူးတဘၣ်တၢ်မၤသံ အီၤဒံးဘၣ်. လၢတၢ်န့ၣ်အဃိ တၢ်မၢဖိတဖၣ် မ့ၢ်အီဝဲယ့ၣ်ၡူးအသွံၣ်န့ၣ် တမ့ၢ်လၢယ့ၣ်ၡူးကတဲဝဲဒ်န့ၣ်ဘၣ်.—မးသဲ ၂၆:၂၈.
ယ့ၣ်ၡူးဟ့ၣ်လုၢ်ထီၣ်အသးထဲ “တဘျီ” ဒီးဝံၤဝဲလီၤ. (ဧ့ၤဘြံၤ ၉:၂၅, ၂၆) ဖဲကစၢ်အတၢ်အီၣ်လၢဟါအီၣ်န့ၣ် ပှၤလၢအီၣ်ကိၣ် ဒီးအီစပံးထံ အိၣ်ဝဲအဃိ ကိၣ်ဒီးစပံးထံ မ့ၢ်ဆီတလဲအသးလၢ ယ့ၣ်ၡူးအသွံၣ် ဒီးအညၣ်နီၢ်နီၢ်န့ၣ် ယ့ၣ်ၡူးကဘၣ်ဟဲဟ့ၣ်လုၢ်ထီၣ်အသး တလီၢ်လီၢ်လီၤ.
ယ့ၣ်ၡူးစံးဝဲလၢ “မၤတၢ်အံၤလၢ တၢ်သ့ၣ်နီၣ်ထီၣ်က့ၤယၤအဂီၢ်” န့ၣ်တက့ၢ်. ယ့ၣ်ၡူးတတဲဝဲလၢ မၤတၢ်အံၤလၢ “တၢ်လုၢ်ထီၣ်ယၤအဂီၢ်” န့ၣ်ဘၣ်.—၁ ကရံၣ်သူး ၁၁:၂၄.
ပှၤတနီၤနီၤန့ၣ် ခီဖျိလၢအဝဲသ့ၣ် နၢ်ပၢၢ်ကမၣ်ဝဲတၢ်ကတိၤတနီၤလၢ လံာ်စီဆှံအပူၤအဃိ အဝဲသ့ၣ်နာ်ဝဲလၢ ကိၣ်ဒီးစပံးထံန့ၣ် ကဲထီၣ်ယ့ၣ်ၡူးအသွံၣ် ဒီးအညၣ်နီၢ်ကီၢ်န့ၣ်လီၤ. အဒိ တၢ်ကွဲးကျိာ်ထံ လံာ်စီဆှံအါဘ့ၣ် ပာ်ဖျါထီၣ်ဝဲ ဖဲယ့ၣ်ၡူးကတိၤတၢ် ဘၣ်ဃးဒီး စပံးထံန့ၣ် အဝဲစံးဝဲလၢ “အအံၤမ့ၢ်ယသွံၣ်” န့ၣ်လီၤ. (မးသဲ ၂၆:၂၈) ဘၣ်ဆၣ်သနာ်က့ ယ့ၣ်ၡူးအတၢ်ကတိၤအံၤ ဘၣ်တၢ်ကွဲးကျိာ်ထံစ့ၢ်ကီးအီၤလၢ “အအံၤအခီပညီမ့ၢ်ယသွံၣ်,” “အအံၤဘၣ်တၢ်ဒိလီၤအီၤလၢယသွံၣ်” မ့တမ့ၢ် “အအံၤအဲၣ်ဒိးစံးဝဲယသွံၣ်” န့ၣ်လီၤ. ဖဲယ့ၣ်ၡူးသိၣ်လိတၢ်အခါ ညီနုၢ်အဝဲသူဝဲတၢ်ကတိၤဒိအဃိ ဘၣ်ဃးဒီးကိၣ်ဒီးစပံးထံအံၤစ့ၢ်ကီး ယ့ၣ်ၡူးသူဝဲတၢ်အဒိန့ၣ်လီၤ.—မးသဲ ၁၃:၃၄, ၃၅.
မတၤတဖၣ်အီၣ်ကိၣ် ဒီးအီစပံးထံလဲၣ်
ဖဲယဟိဝၤပှၤအုၣ်အသးတဖၣ် မၤကစၢ်တၢ်အီၣ်လၢဟါအီၣ်အခါ ပှၤလၢအအီၣ်ကိၣ် ဒီးအီစပံးထံန့ၣ် အိၣ်ဝဲဒၣ်စှၤဂၤလီၤ. ဘၣ်မနုၤအဃိလဲၣ်.
ခီဖျိလၢ ယ့ၣ်ၡူးဂၢ်လီၤအသွံၣ်အဃိ “တၢ်အၢၣ်လီၤအီလီၤအသီ” ဘၣ်တၢ်ဒုးအိၣ်ထီၣ်အီၤလီၤ. ဒီးဘၣ်တၢ်ပာ်က့ၤအီၤလၢ တၢ်အၢၣ်လီၤအီလီၤအလီၢ်လံၤလၢ ယဟိဝၤယွၤဒီး ပှၤအံၣ်စရ့လးဖိလၢပျၢၤတဖၣ်မၤဝဲအလီၢ်န့ၣ်လီၤ. (ဧ့ၤဘြံၤ ၈:၁၀-၁၃, ခ့ခါစှီၤကျိာ်) ပှၤလၢအပၣ်ဃုာ်လၢ တၢ်အၢၣ်လီၤအီလီၤအသီအပူၤန့ၣ် ကအီၣ်ဝဲ ကိၣ်ဒီးအီစပံးထံလၢ ကစၢ်တၢ်အီၣ်လၢဟါအီၣ်န့ၣ်လီၤ. တမ့ၢ်လၢ ပှၤခရံာ်ဖိခဲလၢာ် ပၣ်ဃုာ်လၢ တၢ်အၢၣ်လီၤအီလီၤအသီအပူၤဘၣ်, ထဲဒၣ် “ပှၤလၢအဘၣ်တၢ်ကိး” အီၤဆူယွၤအအိၣ်လၢ ကျဲလီၤဆီန့ၣ်လီၤ. (ဧ့ၤဘြံၤ ၉:၁၅; လူၤကၣ် ၂၂:၂၀) အဝဲသ့ၣ် ကပၢဃုာ်တၢ်ဒီး ခရံာ်လၢ မူခိၣ်လီၤ. ဒီးလံာ်စီဆှံစံးဝဲလၢ ထဲဒၣ်ပှၤ ၁၄၄,၀၀၀ န့ၣ်ကဒိးန့ၢ်ဘၣ် တၢ်ခွဲးတၢ်ယာ်လီၤဆီအံၤန့ၣ်လီၤ.—လူၤကၣ် ၂၂:၂၈-၃၀; လီၣ်ဖျါ ၅:၉, ၁၀; ၁၄:၁, ၃.
ပှၤလၢ ဘၣ်တၢ်ကိးအီၤလၢ “သိလၢအစှၤတဖု” န့ၣ် ကပၢဃုာ်တၢ်ဒီးခရံာ်လီၤ. မ့မ့ၢ်ပဝဲအါတက့ၢ်န့ၣ် မုၢ်လၢ်ဝဲလၢ ကပၣ်ဃုာ်လၢ “ပှၤဂီၢ်မုၢ်ဖးဒိၣ်” အကျါ ဒီးကအိၣ်မူဘၣ်လၢ ဟီၣ်ခိၣ်လီၤထူလီၤယိာ်န့ၣ်လီၤ. (လူၤကၣ် ၁၂:၃၂; လီၣ်ဖျါ ၇:၉, ၁၀) ပအိၣ်ဒီးတၢ်မုၢ်လၢ်လၢ ပကအိၣ်မူဘၣ်လၢ ဟီၣ်ခိၣ်သီအပူၤဒီး ပတအီၣ်ကိၣ်ဒီးအီစပံးထံသနာ်က့ ပပာ်ဖျါထီၣ် ပတၢ်စံးဘျုးစံးဖှိၣ် ယ့ၣ်ၡူးအတၢ်ပှ့ၤက့ၤ ခီဖျိပလဲၤထီၣ် အတၢ်သ့ၣ်နီၣ်ထီၣ်အမူးန့ၣ်လီၤ.—၁ ယိၤဟၣ် ၂:၂.
လါမၢ်ၡး ၂၅-၃၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၂၂
လံာ်စီဆှံ တဲဆိပာ်စၢၤဝဲ ဘၣ်ဃးဒီး ယ့ၣ်ၡူးအတၢ်သံအဂ့ၢ်
ဖဲယ့ၣ်ၡူးတချုးသံဒံးဘၣ်အခါ ဘၣ်မနုၤအဃိ အယၢၤထီၣ်ဝဲ စီၤဒၤဝံးအတၢ်ကတိၤဖဲ စံးထီၣ်ပတြၢၤ ၂၂:၁ န့ၣ်လဲၣ်
တချုးဖဲ ယ့ၣ်ၡူးသံဒံးဘၣ်န့ၣ် အတဲဝဲတၢ်ကတိၤလၢ မးသဲ ၂၇:၄၆ အပူၤ “ယကစၢ်ယွၤဧၢ, ယကစၢ်ယွၤဧၢ, ဘၣ်မနုၤအဃိ နပာ်တ့ၢ်ကွံာ်ယၤလဲၣ်.” ဖဲယ့ၣ်ၡူးတဲဝဲဒ်န့ၣ်အခါ အဝဲမၤလၢပှဲၤထီၣ်ဝဲ စီၤဒၤဝံးအတၢ်ကတိၤလၢ စံးထီၣ်ပတြၢၤ ၂၂:၁ အပူၤလီၤ. (မၢ်ကူး ၁၅:၃၄) ပမ့ၢ်တဲလၢ ယ့ၣ်ၡူးယၢၤထီၣ်ဝဲ တၢ်ကတိၤအံၤ ခီဖျိလၢအသးဟးဂီၤ မ့တမ့ၢ် အတၢ်နာ်ကစၢ်ယွၤလီၤစှၤဝဲန့ၣ် ကမၣ်ဝဲလီၤ. (မးသဲ ၁၆:၂၁; ၂၀:၂၈) တကးဒံးဘၣ် ယ့ၣ်ၡူးသ့ၣ်ညါစ့ၢ်ကီးဝဲလၢ ဖဲအကသံအခါန့ၣ် ယဟိဝၤယွၤတ “မၤကရၢဝးတရံး” အီၤလၢ ကဒီသဒၢအီၤအဂီၢ်ဘၣ်. (ယိၤဘး ၁:၁၀) ယ့ၣ်ၡူး မ့ၢ်ထံၣ်ဘၣ်ဒီးတၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ ယဟိဝၤယွၤပျဲဝဲလၢ ယ့ၣ်ၡူးကပာ်ဖျါထီၣ် အတၢ်သးတီတုၤလၢ အသံတစုလီၤ.—မၢ်ကူး ၁၄:၃၅, ၃၆.
တၢး၁၁ ၈/၁၅ ၁၅ ¶၁၃
အဝဲသ့ၣ်ထံၣ်န့ၢ် မ့းၡံအၤ
၁၃ စီၤဒၤဝံး တဲဆိပာ်စၢၤဝဲလၢ ပှၤကတဲဆါ မ့းၡံအၤ. (ဖး စံးထီၣ်ပတြၢၤ ၂၂:၇, ၈.) ဖဲယ့ၣ်ၡူးအိၣ်လၢ သ့ၣ်တၢၣ်လိၤအခါ ပှၤတဲဆါအီၤ. လံာ်မးသဲ တဲဝဲလၢ “ပှၤလၢအလ့ၢ်ထီၣ်လ့ၢ်လိၤ ဖဲန့ၣ်တဖၣ် ဒုၣ်ဒွဲၣ်စံးအၢယ့ၣ်ၡူး ဒီးဂံၤဂုၤအခိၣ် ဒီးတဲဝဲလၢ “ပှၤလၢအတဲဝဲလၢ အကမၤလီၤပှီၢ်ကွံာ် တၢ်လုၢ်ဟံၣ် ဒီးကသူၣ်ထီၣ်က့ၤအီၤလၢ သၢသီအတီၢ်ပူၤတဂၤဧၢ, မၤပူၤဖျဲးလီၤနသးသၢၤ. နမ့မ့ၢ် ကစၢ်ယွၤအဖိခွါန့ၣ် ဟဲက့ၤလီၤလၢ တၢ်မၤအၢမၤနး အသ့ၣ်တၢၣ် အလိၤသၢၤ.” ဒီးပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် ဒီးပှၤသူၣ်က့သးပှၢ်တဖၣ်စ့ၢ်ကီး တဲဝဲလၢ “ပှၤဂၤန့ၣ် အမၤပူၤဖျဲးဝဲ မ့မ့ၢ်အနီၢ်ကစၢ်န့ၣ် အမၤပူၤဖျဲးလီၤအသး တသ့ဘၣ်. အဝဲမ့မ့ၢ် အံၣ်စရ့လးအစီၤပၤန့ၣ် မ်အဟဲက့ၤလီၤလၢ တၢ်မၤအၢမၤနး အသ့ၣ်တၢၣ် အလိၤခဲအံၤ ဒီးပကစူၢ်က့ၤနာ်က့ၤအီၤသၢၤ. အဝဲနာ်န့ၢ် ကစၢ်ယွၤ ဒီးအတဲဝဲလၢ အမ့ၢ် ကစၢ်ယွၤအဖိခွါလီၤ. အဃိ ကစၢ်ယွၤ မ့ၢ်လီကီအီၤန့ၣ် မ်အမၤပူၤဖျဲးအီၤသၢၤ.” (မး ၂၇:၃၉-၄၃) ယ့ၣ်ၡူးပာ်အသး မုာ်မုာ်ခုၣ်ခုၣ် ဒီးလဲၤခီဖျိဝဲ တၢ်သ့ၣ်တဖၣ်အံၤ ဂ့ၤဂ့ၤဘၣ်ဘၣ်. ယ့ၣ်ၡူး ပာ်လီၤတၢ်ဒိဂ့ၤတဲာ်ဘၣ် လၢပဂီၢ်.
တၢး၁၁ ၈/၁၅ ၁၅ ¶၁၄
အဝဲသ့ၣ်ထံၣ်န့ၢ် မ့းၡံအၤ
၁၄ ပှၤကဖးတၢ်ဒ်သိး ကနီၤဖးလိာ်အသးလၢ မ့းၡံအၤအကူအသိး. ပှၤကွဲးထါစံးထီၣ်ပတြၢၤ တဲဝဲလၢ “အဝဲသ့ၣ် နီၤဖးလိာ်အသးလၢ ယတၢ်ကူတၢ်သိးတဖၣ် ဒီးအဝဲသ့ၣ် ဖးတၢ်လၢ ယတၢ်ကူတၢ်သိး အဂီၢ်လီၤ.” (စံး ၂၂:၁၈) ဒ်လံာ်စီဆှံ တဲဝဲအသိး “ဖဲ [ရိမ့ၤသုးဖိတဖၣ်] ပျၤထီအီၤလၢ သ့ၣ်တၢၣ်အလိၤဝံၤအခါ အဝဲသ့ၣ်ဖးတၢ် ဒ်သိး ကနီၤဖးလိာ်အသးလၢ ယ့ၣ်ၡူးအကူအကၤ အဂီၢ်လီၤ.”—မး ၂၇:၃၅; ဖး ယိၤဟၣ် ၁၉:၂၃, ၂၄.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ကဲထီၣ်ပှၤဒိဂ့ၤတဲာ်ဘၣ် လၢတၢ်စံးတၢ်ကတိၤ
၁၂ ပဝဲခဲလၢာ်န့ၣ် ပပၣ်ဃုာ်လၢ တၢ်အိၣ်ဖှိၣ်အပူၤသ့ခီဖျိ ပသးဝံၣ်တၢ် ဒီးဟ့ၣ်ထီၣ်တၢ်စံးဆၢလၢ ပကတဲာ်ကတီၤ ပာ်စၢၤအီၤဂ့ၤဂ့ၤ. (စံးထီၣ်ပတြၢၤ ၂၂:၂၂) ပှၤတနီၤန့ၣ် သးဝံၣ်တၢ် ဒီးဟ့ၣ်ထီၣ်တၢ်စံးဆၢလၢ တၢ်အိၣ်ဖှိၣ်အပူၤ တဘူၣ်ဘၣ်. နၤမီၤ နတူၢ်ဘၣ်ဒ်န့ၣ်စ့ၢ်ကီးဧါ. ပှၤလၢအမဲာ်ဆှးဒီး ပျံၤတၢ်ဒ်သိးဒီးနၤအိၣ်စ့ၢ်ကီး. အဃိ နမ့ၢ်မၤလိ ဘၣ်ဃးဒီး အဝဲသ့ၣ် လဲၤခီဖျိ အတၢ်ကီတၢ်ခဲ န့ၢ်ဒ်လဲၣ်န့ၣ် ကကဲထီၣ်တၢ်မၤစၢၤ လၢနဂီၢ်လီၤ.
နာ်လၢနအိၣ်ဒီး တၢ်မ့ၢ်တၢ်တီနီၢ်နီၢ်
၁၄ ဒ်သိးပတၢ်နာ်ယဟိဝၤယွၤ ကဂၢၢ်ကျၢၤထီၣ်အဂီၢ် ဝံအတၢ်စံးပာ်န့ၣ် မ့ၢ်တၢ်အရ့ဒိၣ်မးလၢပဂီၢ်လီၤ. ဝံအတၢ်စံးပာ်တဖၣ် မၤဂၢၢ်ကျၢၤထီၣ် နတၢ်နာ်ဒ်လဲၣ်. ဘၣ်သ့ၣ်သ့ၣ် နကတဲဝံတၢ်စံးပာ် လၢအမ့ၢ် “မုၣ်နံၤအခံကတၢၢ်တဖၣ်” အဂ့ၢ်လီၤ. (၂ တံၤမသ့း ၃:၁-၅; မးသဲ ၂၄:၃, ၇) ဘၣ်ဆၣ် ဝံအတၢ်စံးပာ်အဂၤတဖၣ်လၢ အဟဲလၢထီၣ်ပှဲၤထီၣ်န့ၣ် မၤဂၢၢ်ကျၢၤထီၣ် နတၢ်နာ်ကသ့ဒ်လဲၣ်. အဒိ ဖဲ ဒၤနံးယ့လး အဆၢဒိၣ် ၂ ဒီးအဆၢဒိၣ် ၁၁ န့ၣ် ဝံအတၢ်စံးပာ်လၢ အဟဲလၢထီၣ်ပှဲၤထီၣ်တ့ၢ်တဖၣ် ဒီးကဆဲးလၢပှဲၤထီၣ်ဒံးတဖၣ်န့ၣ် နတဲနၢ်ပၢၢ်ကသ့ဧါ. နတၢ်နာ် မ့ၢ်ဒိးသန့ၤထီၣ်အသးလၢ လံာ်စီဆှံတၢ်မ့ၢ်တၢ်တီန့ၣ် နတၢ်နာ် တဟးဂီၤဝဲညီညီဘၣ်. ဆိကမိၣ်ကွၢ် ပဒီပုၢ်ဝဲၢ်တဖၣ်အတၢ်လဲၤခီဖျိလၢ အထံၣ်ဘၣ်ဝဲတၢ်မၤအၢမၤနး ဖဲဟီၣ်ခိၣ်တၢ်ဒုးခံဘျီတဘျီ လၢကီၢ်ကၠၢမနံၣ်အပူၤန့ၣ်တက့ၢ်. ဝံအတၢ်စံးပာ် ဘၣ်ဃးဒီး မုၢ်နံၤခံကတၢၢ်န့ၣ် အဝဲသ့ၣ်တနၢ်ပၢၢ်ဝဲဂ့ၤဂ့ၤဒံးဘၣ် သနာ်က့ အဝဲသ့ၣ်နာ်ကစၢ်ယွၤ အကလုၢ်ကထါလၢလၢပှဲၤပှဲၤလီၤ.
၁၅ ဖဲနးစံၣ်ကၠၢမနံၣ် ပၢတၢ်အခါ ပဒီပုၢ်ဝဲၢ်မုၣ်ခွါ လၢအကထိတဖၣ် လီၤဘၣ်လၢနးစံၣ်အဃိာ်ပူၤလီၤ. ဟ့ၣ်တလၢး ဒီး SS အသုးခိၣ်ဖးဒိၣ် ဟဲရံးခၠံၣ် ဟ့မလၢး သးဟ့ဝဲယဟိဝၤပှၤအုၣ်အသးတဖၣ်လီၤ. ဒီပုၢ်ဝဲၢ်မုၣ်တဂၤတဲဝဲလၢ ဖဲအဝဲသ့ၣ်အိၣ်လၢဃိာ်ပူၤအခါ သုးခိၣ်ဟ့မလၢး တဲအဝဲသ့ၣ်လၢ “သုယဟိဝၤယွၤန့ၣ် ကပၢတၢ်လၢမူခိၣ်. ခဲအံၤ လၢဟီၣ်ခိၣ်န့ၣ် ပပၢတၢ်လီၤ. မတဂၤတူၢ်တၢ် ကန့ၢ်ယံာ်လဲၣ် ခိးကွၢ်, သုယဟိဝၤပှၤအုၣ်အသးမး ပဝဲနးစံၣ်လဲၣ်.” တၢ်မနုၤမၤစၢၤ ယဟိဝၤယွၤအခ့အပှၤတဖၣ် ဒ်သိးကဆဲးအိၣ်ဒီး တၢ်သးတီအဂီၢ်လဲၣ်.
၁၆ လံာ်စီဆှံကၠိဖိတဖၣ်န့ၣ် သ့ၣ်ညါဝဲလၢ ယွၤအဘီအမုၢ်န့ၣ် စးထီၣ်ပၢတၢ်ဖဲ ၁၉၁၄ နံၣ်န့ၣ်လီၤ. ဖဲအဝဲသ့ၣ်ထံၣ်ဘၣ်ဒီး တၢ်မၤကွၢ်နးနးကလဲာ်အခါ အဝဲသ့ၣ်အတၢ်နာ် တဟးဂီၤဘၣ်. တကးဒံးဘၣ် အဝဲသ့ၣ်နာ်ဝဲ သပှၢ်ကတၢၢ်လၢ ဟီၣ်ခိၣ်အပဒိၣ်ပပှၢ်တဖၣ် မၤပတုာ်ဝဲ ကစၢ်ယွၤအတၢ်တိာ်ပာ် တန့ၢ်ဘၣ်လီၤ. ဟ့ၣ်တလၢး တိာ်ပာ်ဝဲလၢ အကမၤလီၤမၢ်ကွံာ် တၢ်ဘူၣ်တၢ်ဘါလၢအမ့ၢ်အတီ ဒီးအဲၣ်ဒိးသုးကွံာ်ဝဲ ယွၤအဘီအမုၢ်အတၢ်ပၢန့ၣ်လီၤ. ဘၣ်ဆၣ် ပဒီပုၢ်ဝဲၢ်တဖၣ်သ့ၣ်ညါဝဲ သပှၢ်ကတၢၢ်လၢ ဟ့ၣ်တလၢးအတၢ်ပၢ ကကတၢၢ်ကွံာ်ဝဲလီၤ.
၁၇ တၢ်လၢဒီပုၢ်ဝဲၢ်သ့ၣ်တဖၣ် နာ်ဝဲန့ၣ် တမ့ၢ်အဝဲသ့ၣ်နာ်ကြီတၢ်ဘၣ်. တယံာ်တမီၢ် နးစံၣ်အတၢ်ပၢ ဟးဂီၤကွံာ်ဝဲလီၤ. ဒီးသုးခိၣ်ဟ့မလၢး လၢအတဲတ့ၢ်ဝဲ “ခဲအံၤ လၢဟီၣ်ခိၣ်န့ၣ် ပပၢတၢ်လီၤ” န့ၣ်လၢခံ အဘၣ်ဃ့ၢ်မှံဟးဖျိး လၢအသးသမူအဂီၢ်လီၤ. ဖဲအဃ့ၢ်ပူၤဖျဲးအသးအဖၢမုၢ်န့ၣ် အဝဲထံၣ်လိာ်အသးဒီး ဒီပုၢ်ဝဲၢ်ခွါ လူၣ်ခ့ၤ လၢအမ့ၢ်တ့ၢ် ပှၤဃိာ်ဖိတဂၤလီၤ. ဒီးဖဲန့ၣ် ဟ့မလၢး သံကွၢ်အီၤလၢ “လံာ်စီဆှံကၠိဖိ, ခဲအံၤ တၢ်ကဲထီၣ်အသးဒ်လဲၣ်.” ဒီပုၢ်ဝဲၢ်ခွါ လူၣ်ခ့ၤ တဲဘၣ်က့ၤအီၤလၢ ယဟိဝၤပှၤအုၣ်အသးတဖၣ် သ့ၣ်ညါပာ်စၢၤဝဲ ဖးယံာ်လံလၢ နးစံၣ်အတၢ်ပၢန့ၣ် ကဟးဂီၤကွံာ် ဒီးယဟိဝၤပှၤအုၣ်အသးတဖၣ် ကဒိးန့ၢ်ဝဲတၢ်သဘျ့လီၤ. ခီဖျိလၢ ဟ့မလၢး တဲဆါတ့ၢ်ဘၣ် ယဟိဝၤပှၤအုၣ်အသးတဖၣ်အဃိ ခဲအံၤန့ၣ် အဝဲတဲဆၢက့ၤတၢ်တသ့ နီတမံၤလၢၤဘၣ်လီၤ. လၢခံကတၢၢ်န့ၣ် အမၤသံလီၤအနီၢ်ကစၢ်အသးလီၤ. ပမၤလိန့ၢ် တၢ်မနုၤလဲၣ်. ပနီၢ်ကစၢ်တၢ်မၤလိလံာ်စီဆှံ ဃုာ်ဒီးဝံအတၢ်စံးပာ်တဖၣ်န့ၣ် ကမၤဂၢၢ်ကျၢၤထီၣ် ပတၢ်နာ်ကစၢ်ယွၤဒီး ဖဲပထံၣ်ဘၣ် တၢ်မၤအၢမၤနးအခါ ပကဘၣ်အိၣ်ဂၢၢ်ဆိးကျၢၤလီၤ.—၂ ပ့းတရူး ၁:၁၉-၂၁.
လါအ့ဖြ့ၣ် ၁-၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၂၃-၂၅
“ယဟိဝၤယွၤ မ့ၢ်ယပှၤကွၢ်သိ”
ပှၤလၢအဃုယဟိဝၤယွၤန့ၣ် တၢ်အဂ့ၤလၢ အတန့ၢ်ဘၣ်ဝဲန့ၣ် တအိၣ်နီတမံၤဘၣ်
၅ ဖဲစီၤဒၤဝံးတဲဝဲလၢ “တၢ်ဂ့ၤ” လၢယဟိဝၤယွၤ အခ့အပှၤတဖၣ် “တန့ၢ်ဘၣ်န့ၣ် တအိၣ်နီတမံၤဘၣ်” အခါ အအဲၣ်ဒိးတဲဝဲ အခီပညီဒ်လဲၣ်. ဖဲစံးထီၣ်ပတြၢၤ အဆၢဒိၣ် ၂၃အပူၤန့ၣ် အဝဲကွဲးဝဲ တၢ်ကတိၤလၢ အလီၤဂာ်လိာ်သးဒ်န့ၣ်. အဃိ ပမ့ၢ်ဆိကမိၣ်ကွၢ် အတၢ်ကတိၤတဖၣ်န့ၣ် ပတယာ်ကွၢ်တၢ်စံးဆၢသ့ဝဲ. (ဖး စံးထီၣ်ပတြၢၤ ၂၃:၁-၆.) စံးထီၣ်ပတြၢၤ အဆၢဒိၣ် ၂၃ န့ၣ်စီၤဒၤဝံး စးထီၣ်ကွဲးဝဲလၢ “ယွၤမ့ၢ်ယပှၤကွၢ်သိ, တၢ်တမိၣ်န့ၢ်ဘၣ်ယသးလၢ တၢ်နီတမံၤဘၣ် [တၢ်လၢယတန့ၢ်ဘၣ်န့ၣ် တအိၣ်နီတမံၤဘၣ်, NWT].” ဝံၤဒီး အဆၢဖိအဂၤတဖၣ်န့ၣ် အဆဲးတဲဝဲ တၢ်လၢအရ့ဒိၣ်နီၢ်ကီၢ် လၢအမ့ၢ် တၢ်ဆိၣ်ဂ့ၤလၢ အဒိးန့ၢ်ဘၣ်ဝဲ ခီဖျိ အတူၢ်လိာ်ယဟိဝၤယွၤ ဒ်ပှၤကွၢ်သိအဃိလီၤ. တၢ်သ့ၣ်တဖၣ်န့ၣ်မ့ၢ်ဝဲ ယဟိဝၤယွၤ ဆှၢအီၤလၢ “ကျဲအတီအလိၤတဖၣ်အပူၤ” ဒီးဖဲစီၤဒၤဝံး ဘၣ်မုာ်ဂ့ၤဘၣ်ဖှီၣ်ဂ့ၤ ယဟိဝၤယွၤ ဆဲးကွၢ်ထွဲမၤစၢၤအီၤလၢ တၢ်သးတီအပူၤ. ဒီးစီၤဒၤဝံးအိၣ်လၢ ယဟိဝၤယွၤ အသိအတၢ် “အီၣ်ဆၣ်အလီၢ်လါဟ့အပူၤ” ဘၣ်ဆၣ် အသ့ၣ်ညါဝဲလၢ တမ့ၢ်လၢ အတၢ်အိၣ်မူန့ၣ် ကပူၤဖျဲးဒီး တၢ်ကီတၢ်ခဲ ထီဘိဘၣ်. အတဲဝဲလၢ အဘၣ်လဲၤတၢ်လၢ “တၢ်သံအကဒုအကစၢၢ်ကဆူးပူၤ” အဃိပသ့ၣ်ညါသ့လၢ တဘျီတခီၣ်န့ၣ် အသးကဟးဂီၤ ဒီးအဒုၣ်အဒါ ကအိၣ်ဝဲ. ဘၣ်ဆၣ် မ့ၢ်လၢယဟိဝၤယွၤမ့ၢ် အပှၤကွၢ်သိအဃိ အဝဲ “တပျံၤဘၣ်တၢ်အၢဘၣ်.”
၆ ဖဲစီၤဒၤဝံး တဲဝဲလၢ တၢ်အဂ့ၤလၢ အတန့ၢ်ဘၣ်ဝဲန့ၣ် တအိၣ်နီတမံၤဘၣ်အခါ အဝဲအဲၣ်ဒိးတဲဝဲလၢ အအိၣ်ဒီး တၢ်ကိးမံၤဒဲးလၢ ကမၤစၢၤအီၤ ဒ်သိးအကအိၣ်ဘူးဒီး ယဟိဝၤယွၤအဂီၢ်. အတၢ်သးခုန့ၣ် တဒိးသန့ၤထီၣ်အသးလၢ တၢ်စုလီၢ်ခီၣ်ခိၣ်တဖၣ် အဖီခိၣ်ဘၣ် အဝဲသးခုလၢ တၢ်လၢယဟိဝၤယွၤဟ့ၣ်အီၤတဖၣ်. ဒီးတၢ်အရ့ဒိၣ်ကတၢၢ်လၢ အတၢ်အိၣ်မူအပူၤန့ၣ် မ့ၢ်ဝဲ ကစၢ်ယွၤ အတၢ်ဆိၣ်ဂ့ၤ ဒီးအတၢ်ဒီသဒၢလီၤ.
တၢး၁၁ ၅/၁ ၃၁ ¶၅
“ယဟိဝၤယွၤ မ့ၢ်ယပှၤကွၢ်သိ”
ယဟိဝၤယွၤ လုၢ်အီၣ်လုၢ်အီ အသိတဖၣ်. သိတဖၣ် ကအီၣ်ဘၣ်အဆၣ်အဂီၢ် ဘၣ်ဒိးသန့ၤထီၣ်အသး လၢအကစၢ်အအိၣ်. ပဝဲစ့ၢ်ကီး ပတၢ်လိၣ်ဘၣ်လၢ နီၢ်သးတကပၤန့ၣ် ထဲဒၣ်ယဟိဝၤယွၤတဂၤ မၤစၢၤပှၤသ့. (မးသဲ ၅:၃) ယဟိဝၤယွၤ ကတဲာ်ကတီၤန့ၢ်ပှၤတၢ်အါမး, အဝဲကတဲာ်ကတီၤန့ၢ် အခ့အပှၤလၢ တၢ်အီၣ်တၢ်အီလၢလၢပှဲၤပှဲၤ လၢစီၢ်နီၤခိၣ်အလိၤ. (အဆၢဖိ ၅) လံာ်စီဆှံ ဒီးလံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံန့ၣ် မ့ၢ်ဝဲနီၢ်သး အတၢ်အီၣ်တၢ်အီတဖၣ်. ဒီးလံာ်လဲၢ်တဖၣ်အံၤ မၤစၢၤပှၤဒ်သိး ပကသ့ၣ်ညါ ကစၢ်ယွၤအတၢ်တိာ်ပာ် ဒီးပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၁ ၂/၁၅ ၂၄ ¶၁-၃
အဲၣ်တၢ်တီတၢ်လိၤ လၢနသးဒီဖျၢၣ်
ယဟိဝၤယွၤ ဆှၢဝဲအပှၤဂီၢ်မုၢ်လၢ “ကျဲတီကျဲလိၤတဖၣ်” ခီဖျိလၢ အတၢ်ကတိၤ ဒီးအသးစီဆှံ. (စံး ၂၃:၃) ပမ့ၢ်ပှၤတလၢတပှဲၤဘၣ်အဃိ တဘျီတခီၣ် ပကအဲၣ်ဒိး ဟးယံၤဒီး ကျဲအံၤ. အဃိ ဒ်သိး ပကမၤကဒါက့ၤ တၢ်တီတၢ်လိၤအဂီၢ် ပကဘၣ်ထဲးဂံၢ်ထဲးဘါ. ဘၣ်ဆၣ် ဒ်သိးပမၤကန့ၢ်အဂီၢ် တၢ်မနုၤ ကမၤစၢၤပှၤလဲၣ်. ဒ်ယ့ၣ်ၡူးအသိး ပကဘၣ်အဲၣ် တၢ်တီတၢ်လိၤ.—ဖး စံးထီၣ်ပတြၢၤ ၄၅:၇.
၂ “ကျဲတီကျဲလိၤတဖၣ်” န့ၣ် မ့ၢ်မနုၤလဲၣ်. ကျဲန့ၣ်အဲၣ်ဒိးတဲဝဲ ကျဲဆံးဆံးဖိ လၢပှၤဟးလၢခီၣ်. ကျဲတဖၣ်အံၤန့ၣ် မ့ၢ်ဝဲ ယဟိဝၤယွၤ အတၢ်ဘျၢ အတီအလိၤလၢ အပာ်လီၤဃာ်ဝဲ. ဧ့ၤဘြံၤ အတၢ်ကတိၤလၢအမ့ၢ် ‘တၢ်တီတၢ်လိၤ’ န့ၣ် အဲၣ်ဒိးတဲဝဲ ပှၤတဂၤ အတၢ်အိၣ်မူ သကဲာ်ပဝးလၢ အလီၤပလိာ်ဒီး တၢ်တီတၢ်လိၤ လီၤတံၢ်လီၤဆဲး. ယဟိဝၤယွၤမ့ၢ် “တၢ်တီတၢ်လိၤ အဂံၢ်ခီၣ်ထံး” အဃိ ပှၤလၢအဘူၣ်ထီၣ်ဘါထီၣ်အီၤတဖၣ်န့ၣ် အအဲၣ်ဒိး မၤထွဲဝဲ ထဲဒၣ်ကစၢ်ယွၤ အတၢ်သိၣ်တၢ်သီ အတီအလိၤ လၢဘၣ်ဃးဒီး တၢ်သကဲာ်ပဝး.—ယံး ၅၀:၇.
၃ ပမ့ၢ်ဂုာ်ကျဲးစၢးမၤထွဲ ကစၢ်ယွၤ အတၢ်ဘျၢလၢ အတီအလိၤ လၢပသးဒီဖျၢၣ်န့ၣ် ပကဒိးန့ၢ်ဘၣ် ကစၢ်ယွၤ အတၢ်ဘၣ်သး လၢလၢပှဲၤပှဲၤ. (၅ မိၤ ၃၂:၄) ပမၤဒ်အံၤ ကသ့အဂီၢ် အဆိကတၢၢ်န့ၣ် ပကဘၣ်ဂုာ်ကျဲးစၢး ဃုသ့ၣ်ညါ ယဟိဝၤယွၤအဂ့ၢ် လၢအကလုၢ်ကထါ လံာ်စီဆှံအပူၤ. ပမၤလိအဂ့ၢ် မ့ၢ်အါထီၣ်န့ၣ် ပကဘူးဒိၣ်ထီၣ်ဒီးအီၤ ဒီးပတၢ်အဲၣ် အတၢ်တီတၢ်လိၤန့ၣ် ကအါထီၣ်ဝဲ. (ယၤ ၄:၈) ဖဲပကဘၣ် ဆၢတဲာ်တၢ် လၢအရ့ဒိၣ်အခါ ပကဘၣ်မၤထွဲ ကစၢ်ယွၤ အကလုၢ်ကထါ အတၢ်ဟံးစုနဲၣ်ကျဲ.
လါအ့ဖြ့ၣ် ၈-၁၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၂၆-၂၈
စီၤဒၤဝံး မၤဂၢၢ်ကျၢၤထီၣ် အတၢ်ဆၢတဲာ်လၢ ကမၤကစၢ်ယွၤ အတၢ်ဘၣ်သး
တြီဆၢကွံာ် တၢ်သူၣ်က့ၣ်သးကါ ဒီးပၢၤဃာ် တၢ်ဃူတၢ်ဖိး
၉ ဒ်သိး ပကမၤအါထီၣ် တၢ်ဆီၣ်လီၤသး, ပကသးမံဒီး တၢ်လၢအအိၣ်ဒီးပှၤ ဒီးပတအိၣ်ဒီး တၢ်သူၣ်က့ၣ်သးကါတဂ့ၤအဂီၢ် ပလိၣ်ဘၣ် ကစၢ်ယွၤ အသးစီဆှံ အတၢ်မၤစၢၤလီၤ. (ဖး ကလၤတံ ၅:၁၆; ဖံလံးပံၤ ၂:၃, ၄ တက့ၢ်.) ယဟိဝၤယွၤ အသးစီဆှံ မၤစၢၤပှၤဒ်သိး ပကသ့ၣ်ညါလီၤက့ၤ ပတၢ်ဆိကမိၣ် ဒီးပတၢ်တူၢ်ဘၣ်တဖၣ် အိၣ်ဒ်လဲၣ်န့ၣ်လီၤ. ခီဖျိလၢ ကစၢ်ယွၤ အတၢ်မၤစၢၤအဃိ ပမၤဂ့ၤထီၣ်က့ၤ ပတၢ်ဆိကမိၣ် ဒီးပတၢ်တူၢ်ဘၣ်လၢ အတဂ့ၤဘၣ်တဖၣ်သ့လီၤ. (စံးထီၣ်ပတြၢၤ ၂၆:၂; ၅၁:၁၀) ဆိကမိၣ်ကွၢ် စီၤမိၤၡ့ ဒီးစီၤပီလူး အဒိအတဲာ်တက့ၢ်. အဝဲသ့ၣ် ဟးဆှဲးတၢ်လၢအကဒုးအိၣ်ထီၣ် တၢ်သူၣ်က့ၣ်သးကါလၢ အဝဲသ့ၣ်အသးပူၤ န့ၢ်ဝဲဂ့ၤဂ့ၤလီၤ.
တဲတၢ်တီတီလိၤလိၤ
၁၅ နမ့မ့ၢ်ပှၤသးစၢ်တဂၤန့ၣ် ဘၣ်သ့ၣ်သ့ၣ် နကအဲၣ်ဒိးလၢ နသကိးတဖၣ် ဘၣ်သူၣ်ဘၣ်သးနၤလီၤ. ခီဖျိလၢပှၤသးစၢ်တနီၤနီၤ အတၢ်ပာ်သူၣ်ပာ်သးအိၣ်ဒ်အံၤအဃိ စးထီၣ်အိၣ်မူဝဲ တၢ်အိၣ်မူခံမၠိလီၤ. လၢအဟံၣ်ဖိဃီဖိ ဒီးလၢတၢ်အိၣ်ဖှိၣ်အပူၤန့ၣ် အဝဲသ့ၣ်ပာ်မၤအသးဒ်သိး အအိၣ်မူမၤထွဲ ကစၢ်ယွၤအတၢ်သိၣ်တၢ်သီ ဘၣ်ဆၣ် အဝဲသ့ၣ် မ့ၢ်အိၣ်လၢ ပှၤလၢအတဘူၣ်ထီၣ်ဘါထီၣ် ယဟိဝၤယွၤတဖၣ်အကျါ မ့တမ့ၢ် ဖဲအဝဲသ့ၣ်သူဝဲအ့ထၢၣ်နဲးအခါ မၤဝဲတမၠိလီၤ. ဘၣ်သ့ၣ်သ့ၣ်အဝဲသ့ၣ် ကသူဝဲတၢ်ကတိၤ လၢတဂ့ၤဘၣ်, ကူသိးဝဲတၢ်ကူတၢ်သိးလၢ အလီၤရၢၢ်, ဒိကနၣ်တၢ်သးဝံၣ်လၢ အလီၤသးဘၣ်အၢ, အီမူၤသံး, သူတၢ်မူၤတၢ်ဘှီး, ပာ်တၢ်အဲၣ်တီလၢ တၢ်ခူသူၣ်အပူၤ မ့တမ့ၢ် မၤတၢ်လၢအတဂ့ၤတဘၣ် လၢအဂၤသ့ၣ်တဖၣ်လီၤ. အဝဲသ့ၣ်လီန့ၢ် အမိၢ်ပၢ်, ဒီပုၢ်ဝဲၢ်မုၣ်ခွါတဖၣ် ဒီးယဟိဝၤယွၤလီၤ. (စံးထီၣ်ပတြၢၤ ၂၆:၄, ၅) ပတဲလၢပအဲၣ်ယဟိဝၤယွၤဘၣ်ဆၣ် ပမ့ၢ်မၤတၢ်လၢအဝဲသးဟ့ဝဲန့ၣ် ယဟိဝၤယွၤသ့ၣ်ညါဝဲလီၤ. (မၢ်ကူး ၇:၆) ပမ့ၢ်မၤထွဲ ကတိၤဒိ ၂၃:၁၇ န့ၣ်ကဂ့ၤဝဲလီၤ. ဖဲန့ၣ်တဲဝဲလၢ “မ်နသးအသုတသးကါ ပှၤတၢ်ဒဲးဘးဖိတဂ့ၤ. မ့မ့ၢ်အိၣ်လၢတၢ်ပျံၤယွၤအပူၤ သ့တနံၤကျၢၤတက့ၢ်.” (ကွၢ်တၢ်ဂ့ၢ်အဘျဲၣ်တက့ၢ်.)
ဘၣ်မနုၤအဃိ ပကြၢး ဘူၣ်ထီၣ်ဘါထီၣ်တၢ် တပူၤဃီလဲၣ်
၆ တၢ်ထီၣ်တၢ်အိၣ်ဖှိၣ်ရိဖှိၣ်န့ၣ် ဟ့ၣ်ဂံၢ်ဟ့ၣ်ဘါပှၤလီၤ. ဟီၣ်ခိၣ်လၢမုၣ်ကီၤလံၢ်ပၢဝဲတဘ့ၣ်အံၤ ကမၤစှၤလီၤပတၢ်နာ်, ကမၤကိၢ်မၤဂီၤပှၤ ဒီးကမၤသူၣ်အုးသးအုးပှၤလီၤ. ဘၣ်ဆၣ် ပတၢ်အိၣ်ဖှိၣ်ရိဖှိၣ်တဖၣ်န့ၣ် ဟ့ၣ်ဂံၢ်ဟ့ၣ်ဘါပှၤ ဒ်သိးပကဆဲးမၤ ယဟိဝၤယွၤ အတၢ်မၤအဂီၢ်န့ၣ်လီၤ. (ဖး မၤတၢ် ၁၅:၃၀–၃၂ တက့ၢ်.) လၢတၢ်အိၣ်ဖှိၣ်ရိဖှိၣ်အပူၤန့ၣ် ပတဲသကိးဝံအတၢ်စံးပာ်တဖၣ် လၢအဟဲလၢထီၣ်ပှဲၤထီၣ်တ့ၢ်ဝဲ အဂ့ၢ်န့ၣ်လီၤ. တၢ်အံၤကမၤစၢၤပှၤဒ်သိး ပကနာ်ကယဲၢ်တၢ်လၢ ယဟိဝၤယွၤအၢၣ်လီၤပာ်ဝဲလၢ ခါဆူညါ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်န့ၣ်လီၤ. ထဲန့ၣ်တကးဒံးဘၣ် ပဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် ဟ့ၣ်ဂံၢ်ဟ့ၣ်ဘါပှၤ တမ့ၢ်ထဲလၢ အတၢ်စံၣ်တဲၤတဲလီၤတၢ်ဘၣ်, အဝဲသ့ၣ် အတၢ်စံးဆၢ ဒီးအတၢ်စံးထီၣ်ပတြၢၤ ကစၢ်ယွၤလၢ တၢ်သးဝံၣ်စ့ၢ်ကီးန့ၣ်လီၤ. (၁ ကရံၣ်သူး ၁၄:၂၆) ဖဲပတဲသကိးတၢ်ဒီး ပဒီပုၢ်ဝဲၢ်တဖၣ်တချုးလၢ တၢ်အိၣ်ဖှိၣ်ရိဖှိၣ်စးထီၣ်ဒံးဘၣ် ဒီးဖဲပမၤတၢ်အိၣ်ဖှိၣ်မ့ၢ်ဝံၤအလီၢ်ခံန့ၣ်, ပဒိးန့ၢ်ဘၣ် တၢ်ဂံၢ်တၢ်ဘါလီၤ. မ့ၢ်လၢ ပအိၣ်ဒီးတံၤသကိးလၢ အကဟုကယာ်ပှၤနီၢ်နီၢ်အဃိန့ၣ်လီၤ.—၁ ကရံၣ်သူး ၁၆:၁၇, ၁၈.
၁၃ ဖဲပလဲၤထီၣ် တၢ်အိၣ်ဖှိၣ်ရိဖှိၣ်အခါ ပပာ်ဖျါထီၣ်န့ၢ်ယဟိဝၤယွၤလၢ ပအဲၣ်ဒိးသုးဘူးပသးဆူအအိၣ် ဒီးအဖိခွါအအိၣ်လီၤ. လၢတၢ်အိၣ်ဖှိၣ်ရိဖှိၣ်အပူၤန့ၣ် ပကမၤလိဘၣ်လံာ်စီဆှံ ဒီးယဟိဝၤယွၤအတၢ်ဘၣ်သး ဒီးပကဘၣ်အိၣ်မူဒ်လဲၣ်ဒ်လဲၣ်အဂ့ၢ်န့ၣ်လီၤ. (ယၡါယၤ ၃၀:၂၀, ၂၁) ဖဲပှၤလၢတမ့ၢ်ယဟိဝၤပှၤအုၣ်အသးတဖၣ် လဲၤထီၣ်တၢ်အိၣ်ဖှိၣ်ရိဖှိၣ်အခါဒၣ်လဲာ် အဝဲသ့ၣ် သ့ၣ်ညါဘၣ်ဝဲလၢ ယဟိဝၤယွၤ ဟံးစုနဲၣ်ကျဲပှၤန့ၣ်လီၤ. (၁ ကရံၣ်သူး ၁၄:၂၃-၂၅) ယဟိဝၤယွၤန့ၣ် ဟံးစုနဲၣ်ကျဲ တၢ်အိၣ်ဖှိၣ်ရိဖှိၣ်သ့ၣ်တဖၣ် ခီဖျိအသးစီဆှံ ဒီးတၢ်လၢပမၤလိဘၣ်တဖၣ်န့ၣ် ဟဲလၢကစၢ်ယွၤအအိၣ်လီၤ. လၢတၢ်န့ၣ်အဃိ ဖဲပလဲၤထီၣ်တၢ်အိၣ်ဖှိၣ်ရိဖှိၣ်အခါ ပကနၢ်ဟူဘၣ် ယဟိဝၤယွၤအကလုၢ်ကထါ ဒီးပကတူၢ်ဘၣ်လၢ အအဲၣ်ပှၤနီၢ်နီၢ်အဃိ ပကဘူးထီၣ်ဒီးအီၤလီၤ.
၁၈ ဘၣ်ဃးဒီးတၢ်ဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်နတူၢ်ဘၣ်ဒ် ဒီပုၢ်ဝဲၢ်တဂၤအံၤစ့ၢ်ကီးဧါ. နမ့ၢ်တူၢ်ဘၣ်ဒ်န့ၣ်ဒီး တၢ်ကီတၢ်ခဲမ့ၢ်အိၣ်သနာ်က့ ဂုာ်ကျဲးစၢးအဂ့ၤကတၢၢ် ဒ်သိးနကအိၣ်ဘၣ်ဒီး နဒီပုၢ်ဝဲၢ်တဖၣ်လၢ တၢ်အိၣ်ဖှိၣ်ရိဖှိၣ်အပူၤန့ၣ်တက့ၢ်. ပာ်ဖျါထီၣ်န့ၢ် ယဟိဝၤယွၤလၢ နတူၢ်ဘၣ်တၢ်ဒ်စီၤဒၤဝံး လၢအစံးဝဲ– “ယွၤဧၢ, ယအဲၣ်နဟံၣ်အလီၢ်” န့ၣ်တက့ၢ်.—စံးထီၣ်ပတြၢၤ ၂၆:၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၇/၁၅ ၂၈ ¶၁၅
ယဟိဝၤယွၤ မၤပူၤဖျဲး ပှၤလၢ အဘၣ်ကီဘၣ်ခဲတဖၣ်
၁၅ စီၤဒၤဝံး တဲဝဲလၢ “ယမိၢ် ဒီးယပၢ် မ့ၢ်ပာ်တ့ၢ်ကွံာ်ယၤဒၣ်လဲာ်
ယဟိဝၤယွၤ အနီၢ်ကစၢ်ဒၣ်ဝဲ ကတူၢ်လိာ်ယၤလီၤ.” (စံးထီၣ်ပတြၢၤ ၂၇:၁၀) ပသ့ၣ်ညါဘၣ်လၢ ယဟိဝၤယွၤ အတၢ်အဲၣ်န့ၣ် ဒိၣ်န့ၢ်ဒံး မိၢ်ပၢ်တဖၣ် အတၢ်အဲၣ်အဃိ ပသးခုဒိၣ်မး. မိၢ်ပၢ်တဖၣ် မ့ၢ်တကနၣ်ဃုာ်နၤဘၣ်, မ့ၢ်တရ့နၤဂ့ၤဂ့ၤဘၣ် ဒီးမ့ၢ်ပာ်တ့ၢ်နၤန့ၣ် နသးကဘၣ်ဒိ. သနာ်က့ မ့မ့ၢ်ယဟိဝၤယွၤန့ၣ် အတပာ်တ့ၢ်နၤ နီတဘျီဘၣ်. (ရိမ့ၤ ၈:၃၈, ၃၉) ယဟိဝၤယွၤန့ၣ် အမူၤဃီၤဝဲ ပှၤလၢအအဲၣ်ဝဲတဖၣ် ဆူအအိၣ်. (ယိၤဟၣ် ၃:၁၆; ၆:၄၄) ပှၤဟီၣ်ခိၣ်ဖိ မ့ၢ်ရ့ဒီးနၤ ဒ်လဲၣ်ဂ့ၤဒ်လဲၣ်ဂ့ၤ ယဟိဝၤယွၤအဲၣ်နၤဒိၣ်မး.
lmd တၢ်ဂ့ၢ်ဘၣ်ထွဲလိာ်သး က တၢ်ဂ့ၢ် ၃
ဟီၣ်ခိၣ်ကဘၣ်တၢ်မၤဂ့ၤထီၣ်က့ၤအီၤ.—ၡါ ၃၅:၁, ၂; လီၣ် ၁၁:၁၈.
လါအ့ဖြ့ၣ် ၁၅-၂၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| စံးထီၣ်ပတြၢၤ ၂၉-၃၁
တၢ်သိၣ်ဃီၣ်န့ၣ် ပာ်ဖျါထီၣ်ဝဲ ကစၢ်ယွၤ အတၢ်အဲၣ်
it-1 ၈၀၂ ¶၃
မဲာ်
လံာ်စီဆှံအတၢ်ကတိၤလၢ အမ့ၢ် “ပာ်သဒၢအမဲာ်” န့ၣ် အခီပညီအိၣ်ဝဲအါမံၤ. ညီနုၢ် ယဟိဝၤယွၤ မ့ၢ်ပာ်သဒၢအမဲာ်လၢ ပှၤတဂၤန့ၣ်အအိၣ်န့ၣ် အဲၣ်ဒိးတဲဝဲ အဝဲတဘၣ်သူၣ်ဘၣ်သးပှၤတဂၤန့ၣ်လၢၤဘၣ် မ့တမ့ၢ် အဝဲတမၤစၢၤပှၤတဂၤန့ၣ်လၢၤဘၣ်. တဘျီတခီၣ် ဖဲပှၤတဂၤ မ့တမ့ၢ် ပှၤဒီတဖု ဒ်သိးဒီး ပှၤအံၣ်စရ့လးဖိတဖၣ်တဒိကနၣ် ယဟိဝၤယွၤအကလုၢ်ဘၣ်အခါ ယဟိဝၤယွၤ မၤအဝဲသ့ၣ်ဒ်န့ၣ်. (ဘး ၃၄:၂၉; စံး ၃၀:၅-၈; ၡါ ၅၄:၈; ၅၉:၂) ဘၣ်ဆၣ် တဘျီတခီၣ် ပာ်သဒၢမဲာ်န့ၣ် အဲၣ်ဒိးတဲဝဲ ယဟိဝၤယွၤ တမၤစၢၤ အဝဲသ့ၣ်လၢၤဘၣ်, တစံးဆၢ အဝဲသ့ၣ်ဘၣ် ဒီးအဝဲအိၣ်ခိးဝဲလၢ တၢ်ဆၢကတီၢ်လၢ အပာ်ပနီၣ်ဝဲ ဟဲတုၤမၣ် အမၤစၢၤအဝဲသ့ၣ်. (စံး ၁၃:၁-၃) လၢစီၤဒၤဝံး အတၢ်ဃ့ထုကဖၣ်အပူၤ အဝဲတဲ ကစၢ်ယွၤလၢ “ကွၢ်လီၤယတၢ်ဒဲးဘးတဖၣ်တဂ့ၤ” န့ၣ်မ့ၢ်ဝဲအဃ့ဝဲလၢ ကစၢ်ယွၤကပျၢ်ကွံာ် အတၢ်ကမၣ် ဒီးသးပ့ၤနီၣ်ကွံာ် အတၢ်ဒဲးဘး.—စံး ၅၁:၉; ထိၣ်သတြီၤဒီး စံး ၁၀:၁၁.
ပျဲယဟိဝၤယွၤ မၤမုာ်ထီၣ်နၤ
၁၈ တူၢ်လိာ် တၢ်သိၣ်က့ၤသီက့ၤတက့ၢ်. ဖဲယဟိဝၤယွၤ ဆှၢလီၤဝဲ ဝံနၤသၣ်ဆူ စီၤဒၤဝံးအအိၣ် ဒီးပာ်ဖျါထီၣ် စီၤဒၤဝံး အတၢ်ကမၣ်အခါ စီၤဒၤဝံး တတဲပူၤဖျဲးအသး ဒီးတတဲဝဲလၢ တၢ်လၢအမၤဝဲန့ၣ် တမ့ၢ်တၢ်လၢအအၢအသီ ဒိၣ်ဒိၣ်န့ၣ်ဘၣ်. တဘျီဃီန့ၣ် အဝဲတူၢ်လိာ်ဝဲလၢ အမၤကမၣ် နီၢ်ဘၤသၡ့ဘၤ ဒီးအဝၤ တကးဒံးဘၣ် လီၤဆီဒၣ်တၢ် အမၤကမၣ်ဘၣ် ယဟိဝၤယွၤလီၤ. အဃိ စီၤဒၤဝံးတူၢ်လိာ် ယဟိဝၤယွၤ တၢ်သိၣ်က့ၤသီက့ၤ ဒီးယဟိဝၤယွၤ ပျၢ်ကွံာ်အတၢ်ကမၣ်လီၤ. (၂ ၡမူၤအ့လး ၁၂:၁၀-၁၄) ပမ့ၢ်မၤဘၣ် တၢ်ကမၣ်ဖးဒိၣ်န့ၣ် ပကဘၣ် လဲၤတဲတၢ်ဒီး ပှၤလၢယဟိဝၤယွၤ ဃုထၢထီၣ်ဝဲလၢ အကွၢ်ထွဲပှၤန့ၣ်လီၤ. (ယၤကိာ် ၅:၁၄, ၁၅) ဒီးပတကြၢး တဲပူၤဖျဲးပသးဘၣ်. ပမ့ၢ်တူၢ်လိာ် ဒီးမၤထွဲ တၢ်သိၣ်က့ၤသီက့ၤ လၢအဆိအချ့န့ၣ် ပသးကမုာ်ထီၣ် ဒီးသးခုထီၣ်က့ၤ လၢအဆိအချ့လီၤ.
တၢ်ပီၢ်ယၢ်လီၤက့ၤသး အနီၢ်ကီၢ်န့ၣ် မ့ၢ်မနုၤလဲၣ်
၁၈ ပှၤလၢအဘၣ် တၢ်ဟီထီၣ်ကွံာ်အီၤတဂၤ မ့ၢ်ပီၢ်ယၢ်လီၤက့ၤအသး နီၢ်ကီၢ်န့ၣ်အဝဲကဟဲထီၣ် တၢ်အိၣ်ဖှိၣ်ထီဘိ ဒီးကမၤထွဲ တၢ်အိၣ်ဖှိၣ်သးပှၢ်တဖၣ် အတၢ်ဟ့ၣ်ကူၣ် ဒ်သိးဒီး ကဃ့ဘါထုကဖၣ် ဒီးမၤလိလံာ်စီဆှံ ထီဘိလီၤ. အဝဲကဂုာ်ကျဲးစၢးဟးဆှဲး တၢ်လၢ ကမၤလီၤဃံၢ်အီၤတဖၣ်လီၤ. အမ့ၢ်ဂုာ်ကျဲးစၢးမၤဂ့ၤထီၣ် အတၢ်ရ့လိာ်သးဒီး ယဟိဝၤယွၤန့ၣ် အနာ်သ့လၢ ယဟိဝၤယွၤကပျၢ်ကွံာ် အတၢ်ကမၣ် လၢာ်လၢာ်ဆ့ဆ့ ဒီးတၢ်အိၣ်ဖှိၣ်သးပှၢ်တဖၣ် ကတူၢ်လိာ်က့ၤအီၤလၢ တၢ်အိၣ်ဖှိၣ်အပူၤလီၤ. ဖဲတၢ်အိၣ်ဖှိၣ်သးပှၢ်တဖၣ် ဂုာ်ကျဲးစၢး ဃုသ့ၣ်ညါဝဲ မ့ၢ်ပှၤလၢအမၤကမၣ်တၢ်တဂၤ ပီၢ်ယၢ်လီၤအသး နီၢ်ကီၢ်ဧါအခါ အဝဲသ့ၣ်သ့ၣ်ညါဝဲလၢ ပှၤတဂၤဒီးတဂၤ အတၢ်အိၣ်သးန့ၣ် တဒ်သိးလိာ်သးဘၣ် အဃိ အဝဲသ့ၣ်ကဘၣ် သမံသမိးဝဲ မူာ်မူာ်နီၢ်နီၢ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၅/၁၅ ၁၉ ¶၁၃
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤအဂီၢ်
၃၁:၂၃—ပှၤလၢအပာ်ထီၣ်ထီသးန့ၣ် ယဟိဝၤယွၤ ကဟ့ၣ်ကၣ် အဝဲသ့ၣ်ဒ်လဲၣ်. ကစၢ်ယွၤ ကဟ့ၣ်ကၣ် အဝဲသ့ၣ် လၢတၢ်စံၣ်ညီၣ်. ဖဲပှၤတီပှၤလိၤတဂၤ မၤဘၣ် တၢ်ကမၣ်လၢ တၢ်တပာ်သူၣ်ပာ်သးအပူၤအခါ တၢ်ဟ့ၣ်ကၣ်လၢအဂီၢ်န့ၣ် မ့ၢ်ဝဲ ယဟိဝၤယွၤ အတၢ်သိၣ်က့ၤသီက့ၤ. ဘၣ်ဆၣ် ပှၤလၢအမၤဘၣ်တၢ်ကမၣ်တဂၤ မ့ၢ်တပီၢ်ယၢ်လီၤအသးန့ၣ် အကဲဝဲ ပှၤလၢအပာ်ထီၣ်ထီအသးအဃိ တၢ်ဟ့ၣ်ကၣ်လၢအဂီၢ်န့ၣ် မ့ၢ်ဝဲ တၢ်စံၣ်ညီၣ်နးမး.—ကတိၤဒိ ၁၁:၃၁; ၁ ပ့းတရူး ၄:၁၈.
လါအ့ဖြ့ၣ် ၂၂-၂၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံးထီၣ်ပတြၢၤ ၃၂-၃၃
ပမ့ၢ်မၤဘၣ် တၢ်ကမၣ်ဖးဒိၣ်န့ၣ် ဘၣ်မနုၤအဃိ ပဘၣ်အၢၣ်လီၤပတၢ်ကမၣ်လဲၣ်
တၢး၁၃ ၄/၁၅ ၃၁ ¶၁၆
ပ “တဟ့ၣ်အၡူဘၣ်”
၁၆ ပမ့ၢ်မၤဘၣ် တၢ်ကမၣ်ဖးဒိၣ်န့ၣ် ပကဘၣ်မၤဒ်လဲၣ်. ပကဘၣ်လဲၤဃ့ တၢ်မၤစၢၤလၢ အဆိအချ့. ပမ့ၢ်ပာ်ခူသူၣ် ပတၢ်ကမၣ်န့ၣ် ပတၢ်အိၣ်သး ကနးဒိၣ်ထီၣ်. ဖဲစီၤဒၤဝံး ပာ်ခူသူၣ် အတၢ်ကမၣ်အခါ အတူၢ်ဘၣ်ဝဲဒ်လဲၣ်န့ၣ် အတဲဝဲလၢ “ဖဲယအိၣ်ဘှ့ၣ်အခါ ယဂံၢ်ယဘါလီၤစၢ်ဝဲ မ့ၢ်လၢ ယသးဘၣ်ဒိဒိၣ်မး ဒီတနံၤညါအဃိလီၤ.” (စံး ၃၂:၃) ပမ့ၢ်ပာ်ခူသူၣ် ပတၢ်ကမၣ်န့ၣ် ပသးကဟးဂီၤ ဒီးပတၢ်ရ့လိာ်သးဒီး ကစၢ်ယွၤနာ်က့ ကဟးဂီၤကွံာ်. ဘၣ်ဆၣ် “ပှၤလၢ အအၢၣ်လီၤအတၢ်ကမၣ် ဒီးတမၤဝဲလၢၤဘၣ်န့ၣ် ကဒိးန့ၢ်ဘၣ် တၢ်သးကညီၤလီၤ.”—ကတိၤ ၂၈:၁၃.
cl ၂၆၂ ¶၈
ကစၢ်ယွၤမ့ၢ် ပှၤလၢအ “ပျၢ်ကွံာ်တၢ်ကမၣ်ညီ”
၈ စီၤဒၤဝံး တဲဝဲလၢ “လၢခံကတၢၢ်န့ၣ် ယတပာ်ခူသူၣ် ယတၢ်ကမၣ်လၢၤဘၣ် ဒီးယအၢၣ်လီၤ ယတၢ်ဒဲးဘးလၢ နအိၣ်လီၤ. . . . ဒီးနပျၢ်ကွံာ် ယတၢ်ကမၣ် ဒီးယတၢ်ဒဲးဘးတဖၣ်လီၤ.” (စံးထီၣ်ပတြၢၤ ၃၂:၅) ဧ့ၤဘြံၤအတၢ်ကတိၤလၢအမ့ၢ် “ပျၢ်ကွံာ်” န့ၣ် အခီပညီ အိၣ်စ့ၢ်ကီးလၢ “စိာ်ထီၣ်ကွံာ်.” ဖဲလံာ်စီဆှံအဆၢအံၤန့ၣ် အဲၣ်ဒိးတဲဝဲ ပှၤစိာ်ထီၣ်ကွံာ် “တၢ်ကမၣ်, တၢ်ဒဲးဘး” လၢအယံၤ. အဃိ အဲၣ်ဒိးတဲဝဲ ယဟိဝၤယွၤ စိာ်ထီၣ်ကွံာ် စီၤဒၤဝံး အတၢ်ဒဲးဘး ဒီးတၢၤကွံာ်ဝဲလၢအယံၤ. အဃိ စီၤဒၤဝံး ကတူၢ်ဘၣ်ဝဲလၢ အတၢ်ကမၣ် တအိၣ်လၢၤဘၣ် ဒီးအသးကမုာ်ထီၣ်. (စံးထီၣ်ပတြၢၤ ၃၂:၃) ပဝဲစ့ၢ်ကီး ပနာ်သ့ သပှၢ်ကတၢၢ်လၢ ပှၤလၢအနာ် ယ့ၣ်ၡူးအတၢ်ပှ့ၤက့ၤ ဒီးဃ့ပျၢ်ကွံာ် အတၢ်ကမၣ်န့ၣ် ကစၢ်ယွၤ ကဟံးထီၣ်ကွံာ် အတၢ်ဒဲးဘး ဒီးတၢၤကွံာ်ဝဲလၢအယံၤ.—မးသဲ ၂၀:၂၈.
တၢ်တူၢ်ဘၣ်လၢ ပတၢ်ကမၣ်အိၣ်—“မၤကဆှီထီၣ်ယၤလၢ ယတၢ်ဒဲးဘးန့ၣ်တက့ၢ်”
တၢ်အဘျုးလၢအဒိၣ်တခါန့ၣ် မ့ၢ်ဝဲစီၤဒၤဝံးဒိးန့ၢ်ဘၣ်က့ၤ တၢ်သးခုန့ၣ်လီၤ. အဝဲကွဲးဝဲလၢ– “ပှၤလၢအတၢ်ကမၣ် ဘၣ်တၢ်ပျၢ်လံ, လၢအတၢ်ဒဲးဘး ဘၣ်ကျၢၢ်ဘၢလံန့ၣ် ဘၣ်ဆိၣ်ဂ့ၤဝဲလီၤ.” (စံးထီၣ်ပတြၢၤ ၃၂:၁) ဒီးအဝဲဘါထုကဖၣ်ဝဲလၢ– “ယွၤဧၢ, ဒုးအဲးထီၣ်ယပျုၤန့ၣ်တက့ၢ်. ဒီးယထးခိၣ် ကစံးထီၣ်ပတြၢၤနၤလီၤ.” (စံးထီၣ်ပတြၢၤ ၅၁:၁၅) စီၤဒၤဝံး အိၣ်ဒီးတၢ်စံးဘျုးစံးဖှိၣ် ခီဖျိလၢကစၢ်ယွၤ ပျၢ်ကွံာ်အတၢ်ကမၣ် ဒီးအတၢ်သူၣ်တမုာ်သးတမုာ် လီၤမၢ်ကွံာ်ဝဲအဃိ အသးဆူၣ်ထီၣ်က့ၤလၢ ကတဲဘၣ် ပှၤဂၤလၢယဟိဝၤယွၤအဂ့ၢ်လီၤ.
ယဟိဝၤယွၤအဲၣ်ဒိးလၢ နကအိၣ်ဒီးတၢ်သူၣ်မံသးမံ လၢအဟဲခီဖျိလၢ သးလၢအသ့ၣ်ညါဒၣ်တၢ်လၢ အကဆှီန့ၣ်လီၤ. ဒီးအဝဲအဲၣ်ဒိးလၢ နကတဲဘၣ်ပှၤဂၤလၢ အဝဲအဂ့ၢ်ဒီး အတၢ်တိာ်ပာ်လၢ တၢ်သူၣ်ဖှံသးညီအပူၤလီၤ. (စံးထီၣ်ပတြၢၤ ၆၅:၁-၄) သ့ၣ်နီၣ်ထီၣ် ကစၢ်ယွၤအတၢ်ကွဲမုာ်လၢ အစံးဝဲ “သုတၢ်ဒဲးဘးကဘၣ်တၢ်တြူာ်ကွံာ်, ဒီးဒ်သိးတၢ်အခုၣ်တၢ်အမုာ် လၢကစၢ်အမဲာ်ညါ အကတီၢ်ကဘၣ်” န့ၣ်တက့ၢ်.—မၤတၢ် ၃:၁၉.
တၢ်ကဲထီၣ်အသးဒီး မၤသၣ်ဒ်န့ၣ်လီၤ. အဝဲစံးဝဲလၢ– “ယဖိခွါဆှၢန့ၢ်ယၤ တၢးထီခိးတၢ် ဒီး ပၢၢ်ထီၣ် မဲးကစံတဖၣ်လီၤ. ယက့ၤရ့လိာ်ယသးဒီး ယဟိဝၤယွၤကယီကယီလီၤ. ဘၣ်ဆၣ် လၢယကဟဲက့ၤကဒါက့ၤအဂီၢ် တၢ်ကီကတၢၢ်တခါ လၢယဂီၢ်န့ၣ် မ့ၢ်ဒၣ်ယကဘၣ်ဃ့ပျၢ်ကွံာ် ယတၢ်ကမၣ်တဖၣ် လၢယမၤတ့ၢ်အီၤန့ၣ်လီၤ. ဘၣ်ဆၣ် ယဃ့ဘါထုကဖၣ်ဆူ ယဟိဝၤယွၤအအိၣ် ဒီးဃ့ပျၢ်ကွံာ်ယတၢ်ကမၣ်လီၤ. ယကဟဲက့ၤဆူ ယဟိဝၤယွၤအအိၣ်အဂီၢ် တၢ်ဆၢကတီၢ်ကယံာ်ဝဲအနံၣ် ၄၀ န့ၣ် ယတဆိကမိၣ်နီတဘျီဘၣ်. နံၣ်တဖၣ်လဲၤပူၤကွံာ်ဝဲဘၣ်ဆၣ် ယတၢ်လဲၤခီဖျိ ပာ်ဖျါထီၣ်ဝဲလၢ ပှၤတဂၤဂ့ၤတဂၤဂ့ၤဒိးန့ၢ်ဘၣ်က့ၤ ယွၤအတၢ်အဲၣ်ဒီး တၢ်ခွဲးတၢ်ယာ်လၢ အကမၤကစၢ်ယွၤ အတၢ်မၤသ့ဝဲန့ၣ်လီၤ.”
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၅/၁၅ ၂၀ ¶၁
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ အဆိကတၢၢ်တဘ့ၣ်အဂီၢ်
၃၃:၆; တၢ်ဂ့ၢ်အဘျဲၣ်—“တၢ်ကသါ” မ့တမ့ၢ် “သးစီဆှံ” လၢအဟဲထီၣ်လၢ ယဟိဝၤယွၤ အထးခိၣ်န့ၣ် အကဲမနုၤလဲၣ်. သးစီဆှံန့ၣ် မ့ၢ်ဝဲ ကစၢ်ယွၤ အတၢ်စိတၢ်ကမီၤလၢ အသူဝဲဖဲ အတ့လီၤမူခိၣ် ဒီးတၢ်အိၣ်လၢအပူၤတဖၣ်အခါ. (၁ မိၤၡ့ ၁:၁, ၂) ဒီးဘၣ်တၢ်ကိးအီၤလၢ တၢ်ကသါလၢ အဟဲထီၣ်လၢ ကစၢ်ယွၤအထးခိၣ် မ့ၢ်လၢ ဒ်ပှၤမ့ၢ်အူလီၤကလံၤ ဆူၣ်ဆူၣ်န့ၣ် အလဲၤဝဲဖးယံၤအသိး ကစၢ်ယွၤမ့ၢ်အိၣ်လၢ တၢ်လီၢ်ဖးယံၤ သနာ်က့ အဆှၢလီၤဝဲ သးစီဆှံဒ်သိး ကမၤလၢပှဲၤထီၣ် အတၢ်ဘၣ်သးသ့ဝဲအဃိ.
လါအ့ဖြ့ၣ် ၂၉–လါမ့ၤ ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံးထီၣ်ပတြၢၤ ၃၄-၃၅
“စံးထီၣ်ပတြၢၤ ယဟိဝၤယွၤ ကိးဆၢကတီၢ်ဒဲး”
တၢး၀၇ ၃/၁ ၂၂ ¶၁၁
မ်ပကစံးထီၣ်ပတြၢၤ သကိး ယဟိဝၤယွၤအမံၤ
၁၁ စီၤဒၤဝံးတဲဝဲလၢ “ယကစံးထီၣ်ပတြၢၤ ယဟိဝၤယွၤ ကိးဆၢကတီၢ်ဒဲး ဒီးအတၢ်စံးထီၣ်ပတြၢၤန့ၣ် ကအိၣ်လၢ ယထးခိၣ်လိၤ ထီဘိလီၤ.” (စံးထီၣ်ပတြၢၤ ၃၄:၁.) ဖဲစီၤဒၤဝံး ဘၣ်ဟးစံၣ်ဖျိးလၢ တၢ်လီၢ်အဂၤအခါ အကဘၣ်ယိၣ်တၢ်လၢ အနီၢ်ခိတၢ်လိၣ်ဘၣ်အဂီၢ်အါမး. သနာ်က့ အတၢ်ကတိၤအံၤ ပာ်ဖျါထီၣ်ဝဲလၢ အတပျဲဝဲ အတၢ်ဘၣ်ယိၣ်တဖၣ် မၤပတုာ်အီၤလၢ ကစံးထီၣ်ပတြၢၤ ယဟိဝၤယွၤအဂီၢ်ဘၣ်. ဖဲပထံၣ်ဘၣ် တၢ်ကီတၢ်ခဲအခါ ပကွၢ်လိစီၤဒၤဝံး အဒိအတဲာ်သ့. ပအိၣ်လၢ ကၠိမ့ၢ်ဂ့ၤ လၢတၢ်မၤလီၢ်မ့ၢ်ဂ့ၤ ဖဲပရ့ဒီး ပဒီပုၢ်ဝဲၢ်မုၣ်ခွါတဖၣ်အခါမ့ၢ်ဂ့ၤ ဒီးလၢပတၢ်စံၣ်တဲၤတဲလီၤတၢ်မၤ အပူၤမ့ၢ်ဂ့ၤ တၢ်အရ့ဒိၣ်ကတၢၢ်လၢပဂီၢ်န့ၣ် ကဘၣ်မ့ၢ်ဝဲ တၢ်စံးထီၣ်ပတြၢၤ ယဟိဝၤယွၤ. တၢ်ဂ့ၢ်လၢ ပကဘၣ်စံးထီၣ်ပတြၢၤ ယဟိဝၤယွၤန့ၣ် အိၣ်ဝဲအါမး. အဒိ ဖဲပဃုသ့ၣ်ညါ ယဟိဝၤယွၤ အတၢ်ဘၣ်တ့တဖၣ်အဂ့ၢ်အခါ ပသးခုဒိၣ်မး ဒီးပဃုသ့ၣ်ညါ အတၢ်ဘၣ်တ့တဖၣ်အဂ့ၢ် လၢာ်တသ့နီတဘျီဘၣ်. ဒီးယဟိဝၤယွၤ မၤစၢၤဝဲ အတၢ်ကရၢကရိ လၢဟီၣ်ခိၣ်အါမး. ပှၤဟီၣ်ခိၣ်ဖိတဖၣ် တမ့ၢ်ပှၤလၢပှၤပှဲၤဘၣ် သနာ်က့ ယဟိဝၤယွၤ သူဝဲ ပှၤဟီၣ်ခိၣ်ဖိ လၢအသးတီအါမး လၢကမၤအတၢ်မၤ. ပမ့ၢ်ထိၣ်သတြီၤကွၢ် တၢ်လၢကစၢ်ယွၤမၤဝဲ ဒီးတၢ်လၢ ပှၤလၢပှၤဟီၣ်ခိၣ်ဖိ ပာ်ဒိၣ်ဝဲတဖၣ် မၤဝဲန့ၣ် လီၤဆီလိာ်အသးဒိၣ်မး. အဃိ နကတူၢ်လိာ်စီၤဒၤဝံး အတၢ်ကတိၤအံၤလီၤ. စီၤဒၤဝံးတဲဝဲလၢ “အိ ယဟိဝၤယွၤဧၢ, လၢယွၤတဖၣ်အကျါန့ၣ် ယွၤလၢအလီၤဂာ်ဒီးနၤ တအိၣ်နီတဂၤဘၣ်. ပှၤလၢအမၤတ့ၢ်တၢ် ဒ်သိးဒီးနၤန့ၣ် တအိၣ်နီတဂၤဘၣ်”—စံးထီၣ်ပတြၢၤ ၈၆:၈.
တၢး၀၇ ၃/၁ ၂၂ ¶၁၃
မ်ပကစံးထီၣ်ပတြၢၤ သကိး ယဟိဝၤယွၤအမံၤ
၁၃ စီၤဒၤဝံးတဲဝဲလၢ “ယကပာ်ကဖၢလၢယသးလၢ ယဟိဝၤယွၤအပူၤလီၤ. ပှၤလၢအဆီၣ်လီၤသး ကနၢ်ဟူဝဲဒီး ကသူၣ်ခုသးခုဝဲလီၤ.” (စံးထီၣ်ပတြၢၤ ၃၄:၂) စီၤဒၤဝံး တပတြၢၤလီၤအသးလၢ တၢ်လၢအမၤဝဲ ကဲထီၣ်လိၣ်ထီၣ်တဖၣ်အဃိဘၣ်. အဒိ ဖဲအလံၣ်န့ၢ်လီန့ၢ် ဝ့ၢ်ကၤသးအစီၤပၤ န့ၢ်ဝဲအခါ အတပတြၢၤလီၤအနီၢ်ကစၢ်အသးဘၣ်. အသ့ၣ်ညါဝဲလၢ ဖဲအအိၣ်လၢ ဝ့ၢ်ကၤသးအခါ ယဟိဝၤယွၤဒီသဒၢအီၤ ဒီးအပူၤဖျဲးထီၣ်န့ၣ် ခီဖျိလၢ ယဟိဝၤယွၤ မၤစၢၤအီၤအဃိ. (ကတိၤဒိ ၂၁:၁) စီၤဒၤဝံး စံးထီၣ်ပတြၢၤ ယဟိဝၤယွၤ ဒီးအဝဲ တပတြၢၤလီၤအသးဘၣ်အဃိ ထိၣ်ဟူးထိၣ်ဂဲၤထီၣ် ပှၤလၢအဆီၣ်လီၤအသးတဖၣ် လၢကဟဲလၢယဟိဝၤယွၤအအိၣ်. ယ့ၣ်ၡူးစ့ၢ်ကီး မၤလၤကပီၤဝဲ ယဟိဝၤယွၤအမံၤအဃိ ထိၣ်ဟူးထိၣ်ဂဲၤထီၣ်ဝဲ ပှၤလၢအဆီၣ်လီၤသး ဒီးသးအိၣ်မၤလိတၢ်တဖၣ် လၢကဟဲလၢယ့ၣ်ၡူးအအိၣ်. ဒီးဆၢကတီၢ်ခဲအံၤစ့ၢ်ကီး ပှၤကိးကလုာ်ဒဲး လၢအအိၣ်ဒီးတၢ်ဆီၣ်လီၤသးတဖၣ်န့ၣ် ဟဲဃီၤဝဲလၢ ဟီၣ်ခိၣ်ဒီဘ့ၣ် ခရံာ်ဖိတၢ်အိၣ်ဖှိၣ်လၢ ယ့ၣ်ၡူးတီခိၣ်ရိၤမဲဝဲန့ၣ်အပူၤ. (ကလီးစဲ ၁:၁၈) ကစၢ်ယွၤအခ့အပှၤတဖၣ် မၤလၤကပီၤ ကစၢ်ယွၤအမံၤ ဒီးစံၣ်တဲၤတဲလီၤတၢ်လၢ တၢ်ဆီၣ်လီၤသးအပူၤ. အဃိ ဖဲပှၤလၢအဆီၣ်လီၤအသးတဖၣ် နၢ်ဟူဘၣ်ဝဲအခါ ခီဖျိလၢ သးစီဆှံ တၢ်မၤစၢၤအဃိ အဝဲသ့ၣ် နၢ်ပၢၢ်ထီၣ်ဝဲ ဒီးထိးဘၣ်အဝဲသ့ၣ်အသး.—ယိၤဟၣ် ၆:၄၄; မၤတၢ် ၁၆:၁၄.
တၢး၀၇ ၃/၁ ၂၃ ¶၁၅
မ်ပကစံးထီၣ်ပတြၢၤ သကိး ယဟိဝၤယွၤအမံၤ
၁၅ စီၤဒၤဝံးတဲဝဲလၢ “ယသံကွၢ်တၢ်လၢ ယဟိဝၤယွၤအအိၣ် ဒီးအဝဲစံးဆၢယၤ ဒီးအဝဲမၤပူၤဖျဲးယၤလၢ တၢ်လၢအမၤပျံၤမၤဖုးယၤခဲလၢာ်လီၤ” (စံးထီၣ်ပတြၢၤ ၃၄:၄) တကးဒံးဘၣ် အဝဲဆဲးတဲဝဲလၢ “ပှၤလၢအပတီၢ်ဖုၣ်တဂၤအံၤ ကိးထီၣ်တၢ် ဒီးယဟိဝၤယွၤ နၢ်ဟူဝဲလီၤ. ဒီးကစၢ်ယွၤ မၤပူၤဖျဲးအီၤလၢ အတၢ်နးတၢ်ဖှီၣ်ခဲလၢာ်လီၤ.” အဃိ ပသ့ၣ်ညါဘၣ်လၢ စီၤဒၤဝံး သးပ့ၤနီၣ်ဝဲ အတၢ်လဲၤခီဖျိတဖၣ်အံၤ တန့ၢ်ဘၣ်. (စံးထီၣ်ပတြၢၤ ၃၄:၆) ဖဲပရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်အခါ ပအိၣ်ဒီး တၢ်ခွဲးတၢ်ယာ်လၢ ကတဲပၠးဘၣ်အဝဲသ့ၣ် တၢ်လဲၤခီဖျိလၢ အကဲထီၣ်တၢ်ဂံၢ်တၢ်ဘါ. အဒိ လၢအပူၤကွံာ် ဖဲပထံၣ်ဘၣ်တၢ်ကီတၢ်ခဲအခါ ဒ်သိးပလဲၤခီဖျိကန့ၢ်အဂီၢ် ကစၢ်ယွၤမၤစၢၤတ့ၢ်ပှၤဒ်လဲၣ်န့ၣ် ပတဲပၠးအဝဲသ့ၣ်သ့. ပမ့ၢ်မၤဒ်န့ၣ်န့ၣ် ကကဲထီၣ် တၢ်ဂံၢ်တၢ်ဘါလၢ ပဒီပုၢ်ဝဲၢ်မုၣ်ခွါတဖၣ်အဂီၢ် ဒ်စီၤဒၤဝံး မၤဝဲအသိး. စီၤဒၤဝံး တဲက့ၤဝဲ အတၢ်လဲၤခီဖျိအဃိ ကဲထီၣ်တၢ်ဂံၢ်တၢ်ဘါလၢ ပှၤလၢအဆီၣ်ထွဲအီၤတဖၣ်အဂီၢ်. ဒီးပှၤလၢအဆီၣ်ထွဲအီၤတဖၣ် “ကွၢ်တၢ်လၢ [ယဟိဝၤယွၤ] အအိၣ်” အဃိ အဝဲသ့ၣ် “သူၣ်ဖှံသးညီဝဲလီၤ. အဝဲသ့ၣ် တထံၣ်ဘၣ် တၢ်မဲာ်ဆှးဘၣ်.” (စံးထီၣ်ပတြၢၤ ၃၄:၅) အဝဲသ့ၣ် ဘၣ်ဃ့ၢ်ပူၤဖျဲးအသးလၢ စီၤစီလူးအစုပူၤ သနာ်က့ အဝဲသ့ၣ် တမဲာ်ဆှးဘၣ်. အဝဲသ့ၣ် သ့ၣ်ညါဝဲလၢ ကစၢ်ယွၤ အိၣ်ဒီးစီၤဒၤဝံးအဃိ အဝဲသ့ၣ် သးခု. ဒ်န့ၣ်အသိး ပှၤလၢအမၤလိ လံာ်စီဆှံ သီသီတဖၣ်မ့ၢ်ဂ့ၤ ပှၤလၢအကဲထီၣ်ခရံာ်ဖိ ဖးယံာ်လံမ့ၢ်ဂ့ၤ အဝဲသ့ၣ်ဃ့တၢ်မၤစၢၤလၢယဟိဝၤယွၤအအိၣ်. ဒီးခီဖျိလၢ အဝဲသ့ၣ် ထံၣ်ဘၣ် ယဟိဝၤယွၤ အတၢ်မၤစၢၤလၢ အနီၢ်ကစၢ်အဃိ အဝဲသ့ၣ် ဒိးန့ၢ်ဘၣ်တၢ်သးခု ဒီးဆဲးအိၣ်ဒီးတၢ်သးတီ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၅/၁၅ ၂၀ ¶၂
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ အဆိကတၢၢ်တဘ့ၣ်အဂီၢ်
၃၅:၁၉— စီၤဒၤဝံး တဲဝဲလၢ တဘၣ်ပျဲ ပှၤလၢအသးဟ့အီၤတဖၣ် ကွၢ်တကျ့ အီၤတဂ့ၤန့ၣ် အဲၣ်ဒိးတဲဝဲ အခီပညီဒ်လဲၣ်. အဲၣ်ဒိးတဲဝဲလၢ စီၤဒၤဝံးအဒုၣ်အဒါတဖၣ် ကသးခုဝဲ ခီဖျိလၢ အတၢ်ကူၣ်အၢလၢ စီၤဒၤဝံးအဖီခိၣ် ကဲထီၣ်လိၣ်ထီၣ်အဃိ. စီၤဒၤဝံး ဃ့ဝဲဒ်သိး တၢ်သုတကဲထီၣ်အသး ဒ်န့ၣ်တဂ့ၤ.
မူးပွဲန့ၣ် အဘၣ်ကစၢ်ယွၤအသး ခဲလၢာ်ဧါ
၁ ဘၣ်မနုၤအဃိ မူးပွဲအါတက့ၢ်န့ၣ် တဘၣ် ယဟိဝၤယွၤအသးဘၣ်လဲၣ်.
နမ့ၢ်သ့ၣ်ညါဘၣ်လၢ မူးပွဲအါတက့ၢ်န့ၣ် အခီၣ်ထံးခီၣ်ဘိ ဟဲလၢ တၢ်စူၢ်တၢ်နာ်လၢအကမၣ် ဒီးဘၣ်ထွဲလိာ်သးဒီး တၢ်ဘူၣ်တၢ်ဘါလၢ အကမၣ်န့ၣ် နကဖုးဘၣ်နသး. မူးပွဲတဖၣ်အံၤ ဘၣ်ထွဲလိာ်သးဒီး တၢ်ဝံတၢ်နါ အတၢ်ဖံးတၢ်မၤ မ့တမ့ၢ် တၢ်သိၣ်လိလၢ အဘၣ်ဃးဒီး ပှၤကညီမ့ၢ်သံန့ၣ် အသးတသံဘၣ်. ဒီးမူးပွဲတနီၤနီၤန့ၣ် အခီၣ်ထံးခီၣ်ဘိဟဲလၢ တၢ်ဒုၣ်တၢ်ထု မ့တမ့ၢ် တၢ်စူၢ်တၢ်နာ် ဘၣ်ဃးဒီးတၢ်ဟဲဝံ. (ယၡါယၤ ၆၅:၁၁) အဃိ ယဟိဝၤယွၤ ဟ့ၣ်ပလီၢ်ဝဲ ပှၤလၢ အဘူၣ်ထီၣ်ဘါထီၣ်အီၤတဖၣ်လၢ “အိၣ်လီၤဆီဒီး အဝဲသ့ၣ် . . . [ဒီး]တၢ်တကဆှီဘၣ်န့ၣ် ထိးဘၣ်အီၤလၢၤတဂ့ၤ.”—၂ ကရံၣ်သူး ၆:၁၇.
၂ မူးပွဲလၢ အဘၣ်ဃးဒီး တၢ်မၤလၤကပီၤ ပှၤဟီၣ်ခိၣ်ဖိန့ၣ် ယဟိဝၤယွၤ ထံၣ်ဝဲဒ်လဲၣ်.
ယဟိဝၤယွၤ ဟ့ၣ်ပလီၢ်ပှၤလၢ တဘၣ် “နာ်န့ၢ် ပှၤဟီၣ်ခိၣ်ဖိ” တဂ့ၤ. (ဖး ယံးရမံယၤ ၁၇:၅.) မူးပွဲတနီၤနီၤန့ၣ် အမၤလၤကပီၤဝဲ ပှၤပၢတၢ်တဖၣ် ဒီးသုးဖိတဖၣ်. ဒီးမူးပွဲအဂၤတနီၤန့ၣ် မၤလၤကပီၤဝဲ ထံကီၢ်အတၢ်ပနီၣ် ဒ်သိးဒီးနီၣ်တယၢ် ဒီးထံကီၢ်အတၢ်သဘျ့. (၁ ယိၤဟၣ် ၅:၂၁) မ့မ့ၢ်လၢ မူးပွဲအဂၤတနီၤန့ၣ် အမၤလၤကပီၤဝဲ တၢ်ကရၢကရိတဖၣ်လၢ အဆီၣ်ထွဲမၤစၢၤ ထံဂ့ၢ်ကီၢ်ဂ့ၢ် ဒီးပှၤထံဖိကီၢ်ဖိ. အဃိ ပမ့ၢ်မၤမူးပွဲလၢ အမၤလၤကပီၤ ပှၤတဂၤဂၤ မ့တမ့ၢ် တၢ်ကရၢကရိတဖုဖု လီၤဆီဒၣ်တၢ် အမ့ၢ်ကဲမူးပွဲလၢ အထီဒါလိာ်သးဒီး ယဟိဝၤယွၤ အတၢ်တိာ်ပာ်န့ၣ် ယဟိဝၤယွၤ ကသးခုဧါ.
၃ ဘၣ်မနုၤအဃိ မူးပွဲတနီၤန့ၣ် ကစၢ်ယွၤ တဘၣ်သးဝဲဘၣ်လဲၣ်.
လံာ်စီဆှံတြီဝဲ “တၢ်အီသံးအါတလၢ, မူးပွဲလၢ အလီၤရၢၢ်လီၤစၢၢ် [ဒီး]တၢ်အီပြၢလိာ်သးလၢသံး.” (၁ ပ့းတရူး ၄:၃) လၢမူးပွဲတနီၤနီၤန့ၣ် အိၣ်ဒီး ပှၤလၢ အတပၢၤသူၣ်ပၢၤသးဘၣ် အဃိ အဝဲသ့ၣ် မၤကမၣ်မုၣ်ကမၣ်ခွါ. ဒ်သိး ပကဆဲးကဲဘၣ် ယဟိဝၤယွၤ အသကိးအဂီၢ် ပတဘၣ်မၤဘၣ်ဃးပသးဒီး မူးပွဲတဖၣ်အံၤဘၣ်.