Ozali komibongisa mpo na mokolo oyo eleki ntina na mbula?
KAKA mwa bangonga moke liboso akufa, Yesu abandisaki molulu moko ya ntina mingi mpo na kokanisaka liwa na ye. Molulu yango ekómaki kobengama “bilei ya mpokwa ya Nkolo,” to “elambo na Nkolo.” (1 Bakorinti 11:20; Biblia haut fleuve) Mpo na komonisa ntina ya molulu yango, Yesu apesaki etinda oyo: “Bósalaka boye po na kokanisa ngai.” (Luka 22:19, Bible na lingala ya lelo oyo) Osepelaka kotosa Yesu? Soki ezali bongo, okomona ete mokolo ya liwa ya Yesu ezali mokolo oyo eleki ntina na mobu.
Kasi, ntango nini mpenza osengeli kosala molulu yango? Mpe ndenge nini okoki mpenza koyeba ete omibongisi mpenza mpo na kososola ntina ya molulu yango? Wana ezali mituna oyo mokristo mokomoko asengeli kotalela na likebi mpenza.
Mbala boni?
Mbala mingi, tokanisaka makambo ya ntina mbula na mbula. Na ndakisa, atako makambo ya nsɔmɔ oyo esalemaki na mokolo ya 11 Sɛtɛmbɛ 2001, ezalaka kaka na mitó ya bato ya engumba New York, oyo bandeko na bango bakufaki ntango World Trade Center ebebisamaki, kasi mbula nyonso ntango dati yango ekómaka ezalaka na ntina mingi mpo na bango.
Ndenge moko mpe, na ntango ya kala, bazalaki kokanisa makambo ya ntina mbula na mbula. (Estere 9:21, 27) Yehova asɛngaki Bayisraele bákanisaka mbula na mbula mokolo oyo Nzambe asalaki likamwisi mpo na kobimisa bango na boombo na Ezipito. Biblia ebengaka molulu yango Elekeli, mpe Bayisraele bazalaki kosala molulu yango mbala moko na mbula na dati oyo basikolamaki.—Kobima 12:24-27; 13:10.
Yesu autaki kosilisa kosala molulu ya Elekeli ná bantoma na ye ntango abandisaki molulu moko ya ntina mingi oyo esengelaki kokóma ndakisa mpo na kokanisaka liwa na ye. (Luka 22:7-20) Bazalaki kokanisa Elekeli mbula na mbula. Yango wana, tokoki koloba ete molulu wana ya sika oyo ezwá esika ya Elekeli esengeli mpe kosalemaka mbala moko na mbula. Kasi na dati nini?
Ntango nini?
Mpo na koyanola na motuna yango, tosengeli koyeba makambo mibale. Ya liboso, na ntango ya kala mokolo ezalaki kobanda na mpokwa, ntango moi elali, mpe ezalaki kosuka na mpokwa ya mokolo oyo elandi, ntango moi elali. Na yango, mokolo ezalaki kobanda na mpokwa moko tii na mpokwa mosusu.—Balevi 23:32.
Ya mibale, Biblia esalelaka te manaka oyo tosalelaka lelo oyo. Na esika ya kobenga basanza na bankombo lokola Marsi mpe Aprili, Biblia elobelaka nde basanza lokola Adare mpe Nisana. (Estere 3:7) Bayuda bazalaki kotánga basanza kolongwa na ntango sanza ya sika ebimi tii ntango sanza mosusu ya sika ekoya kobima. Bazalaki kosala Elekeli na mokolo ya 14 Nisana, sanza ya liboso ya manaka na bango. (Balevi 23:5; Mitángo 28:16) Mokolo yango, 14 Nisana ekokani na mokolo oyo Baroma babakaki Nkolo na biso Yesu Kristo na nzete. Akufaki mbula 1 545 nsima ya kosalema ya Elekeli ya liboso. Mokolo ya 14 Nisana ezali mpenza mokolo ya ntina mingi!
Kasi, dati nini eyokanaka na mokolo ya 14 Nisana na manaka na biso? Kosala mwa mituya (calcul) ekosalisa biso tókóma na dati ya sikisiki. Mokolo ya 1 Nisana ebandaka ntango sanza ya sika ekómi pene ya eleko oyo mokolo mpe butu eumelaka ndenge moko bisika nyonso na mabele (ntango eleko ya prɛnta ebandaka na hémisphère ya nɔrdi) emonanaka polele ntango moi elalaka na Yerusaleme. Soki totángi mikolo 14 kobanda na molulu yango, tokokóma na mokolo ya 14 Nisana. Mbala mingi, dati yango ekweaka mokolo oyo sanza ebimaka mobimba. Na kolanda mayele wana oyo Biblia esaleli, mbula oyo, mokolo ya 14 Nisana ekobanda na kolala ya moi ya mokolo ya lomingo 17 Aprili 2011.a
Na mobu oyo, Batatoli ya Yehova bazali komibongisa mpo na koyangana elongo na baoyo nyonso bakosepela kokanisa liwa ya Yesu. Bazali mpe kobenga yo oya koyangana na bango. Tosɛngi yo okutana na Batatoli ya Yehova na esika ozali mpo oyeba ngonga mpe esika oyo likita yango ekozala. Bakosala molulu yango na ntɔngɔ to nsima ya midi te, kasi nde na mpokwa nsima ya kolala ya moi. Mpo na nini? Mpamba te na kolanda Biblia, molulu yango ebengami “bilei ya mpokwa.” (1 Bakorinti 11:25) Mpokwa ya mwalomingo 17 Aprili 2011 ezali mbala ya 1978 ya kosala molulu oyo Yesu abandisaki ya kokanisa liwa na ye. Ezali mpe na ebandeli ya mokolo yango 14 Nisana nde Yesu akufaki. Ezali nde na mokolo mosusu oyo eleki, oyo tosengeli kokanisaka liwa na ye?
Ndenge ya komibongisa
Okoki kosala nini uta sikoyo mpo na komibongisa mpo na molulu wana oyo esalemaka kaka mbala moko na mbula? Lolenge moko oyo okoki kosala ezali ya kokanisa na mozindo na oyo Yesu asalaki mpo na biso. Buku Biblia eteyaka mpenza nini?b esalisi bamilio ya bato bákóma mpenza na botɔndi mpo na ntina ya liwa ya Yesu.—Matai 20:28.
Lolenge mosusu ya kobongisa mitema na biso mpo na molulu wana ya ntina mingi ezali ya kotánga makambo oyo esalemaki tii na mokolo ya nsuka ya bomoi ya Yesu awa na mabele. Na nkasa oyo elandi okomona karte moko. Na lobɔkɔ ya mobali ya karte yango ezali na liste moko ya masolo ya Biblia oyo emonisi makambo oyo esalemaki liboso Yesu akufa. Na kati ya liste yango, ezali mpe na mikapo oyo euti na buku Moto oyo alekaki bato nyonso kino leloc oyo elimboli masolo yango.
Na lobɔkɔ ya mwasi ya karte yango, bakokanisi badati ya milulu yango ná mikolo oyo eyokani na mbula yango. Mpo na nini te kozwa ntango mpo na kotánga ata mwa mikapo ya Makomami mokolo mokomoko mpo na koyeba ndenge makambo elekaki tii na mokolo ya Bilei ya mpokwa ya Nkolo? Ekosalisa yo omibongisa mpo na mokolo oyo eleki ntina na mbula.
[Maloba na nse ya lokasa]
a Dati yango ekoki kokwea te na mokolo oyo Bayuda ya lelo basalaka Elekeli. Mpo na nini? Bayuda mingi lelo oyo basalaka Elekeli mokolo ya 15 Nisana, bakanisaka ete etinda oyo ezali na Kobima 12:6 elobelaka dati yango. (Talá Linɔ́ngi ya Mosɛnzɛli ya 15 Febwali 1990, lokasa 14, na Lifalanse.) Kasi, Yesu asalaki yango na mokolo ya 14 Nisana na boyokani na oyo elobamaki na Mibeko ya Moize. Mpo na koyeba makambo mosusu na ndenge ya kosala mpo na koyeba dati yango, talá Linɔ́ngi ya Mosɛnzɛli ya 15 Sɛtɛmbɛ 1977, nkasa 575-576 (na Lifalanse).
b Ebimisami na Batatoli ya Yehova. Talá nkasa 47-56, 206-208. Okoki komona buku yango na internet na adrɛsi oyo www.pr2711.com.
c Ebimisami na Batatoli ya Yehova.
[Likanisi ya paragrafe na lokasa 22]
Kanisá liwa ya Yesu Mwalomingo, 17 Aprili 2011
[Etanda/Bililingi na nkasa 23, 24]
(Mpo na komona yango, talá mokanda)
PƆSƆ YA NSUKA
Mwamibale, 12 Aprili 2011
▪ Sabata
9 NISANA (ebandi na kolala ya moi)
Na ntango ya kala, mokolo ezalaki kobanda na mpokwa nsima ya kolala ya moi, mpe ezalaki kosuka na mokolo oyo elandi, ntango moi elali
▪ Fɛti ná Simo moto ya maba
▪ Maria apakoli ye mafuta ya narda
▪ Bayuda bayei kotala Yesu mpe Lazare
Mwamisato, 13 Aprili 2011
▪ Akɔti na Yerusaleme lokola mokonzi
▪ Ateyi na tempelo
□ gt 102
10 NISANA (ebandi na kolala ya moi)
▪ Alekisi butu na Betania
Mwaminei, 14 Aprili 2011
▪ Mobembo ya ntɔngɔ na Yerusaleme
▪ Apɛtoli tempelo
▪ Yehova alobi uta na likoló
11 NISANA (ebandi na kolala ya moi)
Mwamitano, 15 Aprili 2011
▪ Ateyi na tempelo mpe asaleli bandakisa
▪ Apameli Bafarisai
▪ Amoni likabo ya mwasi oyo mobali akufá
▪ Asakoli kokwea ya Yerusaleme
▪ Apesi elembo ya kozala na ye
12 NISANA (ebandi na kolala ya moi)
Mwapɔsɔ, 16 Aprili 2011
▪ Akɔti na Betania ná bayekoli kozanga kobenda likebi ya bato
▪ Yudasi ayokani na bakonzi ya mangomba mpo na kotɛka ye
13 NISANA (ebandi na kolala ya moi)
Mwalomingo, 17 Aprili 2011
▪ Petro ná Yoane babongisi Elekeli
▪ Yesu ná bantoma zomi balandi na nsima ya midi
□ gt 112, par. 5 tii 113, par. 1
14 NISANA (ebandi na kolala ya moi)
▪ Asali Elekeli
▪ Asukoli makolo ya bantoma
▪ Abimisi Yudasi
▪ Abandisi molulu ya kokanisa liwa na ye
□ gt 113, par. 2 tii na nsuka ya mokapo 116
midi ya butu
Mwayambo, 18 Aprili 2011
▪ Atɛkami mpe bakangi ye na elanga ya Getesemane
▪ Bantoma bakimi
▪ Basambisi ye na Sanedrina
▪ Petro awangani Yesu
□ gt 117 tii na nsuka ya mokapo 120
▪ Asambisami lisusu liboso ya Sanedrina
▪ Bakei na ye epai ya Pilate, na nsima epai ya Erode, bazongisi ye lisusu epai ya Pilate
▪ Bakateli ye etumbu ya liwa mpe babaki ye na nzete
▪ Akufi na ngonga soki ya misato nsima ya midi
▪ Balongoli nzoto na ye mpe bakundi yango
15 NISANA (ebandi na kolala ya moi)
▪ Sabata
Mwamibale, 19 Aprili 2011
▪ Pilate andimi kotya bakɛngɛli na lilita ya Yesu
16 NISANA (ebandi na kolala ya moi)
Mwamisato, 20 Aprili 2011
▪ Asekwi
▪ Amonani na bayekoli
□ gt 127, par. 10 tii 129, par. 10
[Maloba na nse ya lokasa]
d Mitángo oyo ezali awa ezali komonisa mikapo na buku Moto oyo alekaki bato nyonso kino lelo (gt). Mpo na karte oyo ezali na mikapo ya Biblia oyo emonisi na bosikisiki mikolo ya nsuka ya mosala ya Yesu, talá buku “Makomami nyonso mapemami na Nzambe mpe mazali na litomba,” lokasa 290, ebimisami na Batatoli ya Yehova.