ບົດຄວາມສຶກສາທີ 43
ພະເຢໂຫວາຈະເຮັດໃຫ້ເຈົ້າເຂັ້ມແຂງໄດ້ແນວໃດ?
“[ພະເຢໂຫວາ] ຈະເຮັດໃຫ້ພວກເຈົ້າໝັ້ນຄົງ ພະອົງຈະເຮັດໃຫ້ພວກເຈົ້າເຂັ້ມແຂງແລະບໍ່ຫວັ່ນໄຫວ.”—1ປຕ. 5:10
ເພງ 38 ພະອົງຈະເຮັດໃຫ້ເຈົ້າເຂັ້ມແຂງ
ໃຈຄວາມສຳຄັນa
1. ຜູ້ຮັບໃຊ້ຂອງພະເຈົ້າໃນສະໄໝແຕ່ກີ້ໄດ້ຮັບກຳລັງຈາກໃສ?
ຫຼາຍເທື່ອຄຳພີໄບເບິນບອກວ່າ ຜູ້ຮັບໃຊ້ຂອງພະເຢໂຫວາເຂັ້ມແຂງ. ແຕ່ຄົນທີ່ເຂັ້ມແຂງທີ່ສຸດກໍບໍ່ໄດ້ຮູ້ສຶກເຂັ້ມແຂງຕະຫຼອດ. ຕົວຢ່າງເຊັ່ນ: ບາງເທື່ອກະສັດດາວິດຮູ້ສຶກວ່າລາວ “ໝັ້ນຄົງ [ແຂງແກ່ນ] ຄືກັບພູ” ແຕ່ບາງເທື່ອລາວກໍ “ຢ້ານຫຼາຍ.” (ເພງ. 30:7, ລ.ມ) ແຊມຊັນກໍຄືກັນ. ລາວແຂງແຮງຫຼາຍເມື່ອໄດ້ຮັບພະລັງຈາກພະເຈົ້າ ແຕ່ລາວກໍຍອມຮັບຄືກັນວ່າເມື່ອບໍ່ມີພະລັງນັ້ນ “ເຫື່ອແຮງຂອງ [ລາວ] ຊິໝົດໄປ. [ລາວ] ຊິເປັນຄືກັບຜູ້ຊາຍຄົນອື່ນໆ.” (ຜຕສ. 14:5, 6; 16:17) ເຫັນໄດ້ແຈ້ງວ່າຜູ້ຮັບໃຊ້ທີ່ສັດຊື່ເຫຼົ່ານີ້ຈະເຂັ້ມແຂງໄດ້ເມື່ອເຂົາເຈົ້າໄດ້ຮັບກຳລັງຈາກພະເຢໂຫວາເທົ່ານັ້ນ.
2. ເປັນຫຍັງໂປໂລຈຶ່ງເວົ້າວ່າ ຕອນໃດທີ່ລາວອ່ອນແອລາວກໍແຮ່ງເຂັ້ມແຂງຂຶ້ນ? (2 ໂກຣິນໂທ 12:9, 10)
2 ໂປໂລຍອມຮັບວ່າລາວກໍຕ້ອງການກຳລັງຈາກພະເຢໂຫວາ. (ອ່ານ 2 ໂກຣິນໂທ 12:9, 10) ໂປໂລກໍຄືກັບພວກເຮົາຫຼາຍຄົນທີ່ຕ້ອງຮັບມືກັບບັນຫາສຸຂະພາບ. (ຄລຕ. 4:13, 14) ບາງເທື່ອລາວຕ້ອງພະຍາຍາມຫຼາຍແທ້ໆເພື່ອຈະເຮັດສິ່ງທີ່ຖືກຕ້ອງ. (ຣມ. 7:18, 19) ນອກຈາກນັ້ນ ໂປໂລຍັງກັງວົນແລະຢ້ານວ່າຈະເກີດຫຍັງຂຶ້ນກັບລາວ. (2ກຣ. 1:8, 9) ເຖິງວ່າໂປໂລຈະອ່ອນແອ ແຕ່ລາວພັດແຮ່ງເຂັ້ມແຂງຂຶ້ນ. ຍ້ອນຫຍັງ? ຍ້ອນພະເຢໂຫວາໃຫ້ກຳລັງລາວແລະເພິ່ນໄດ້ເຮັດໃຫ້ລາວເຂັ້ມແຂງ.
3. ເຮົາຈະຕອບຄຳຖາມຫຍັງແດ່ໃນບົດຄວາມນີ້?
3 ພະເຢໂຫວາສັນຍາວ່າຈະເຮັດໃຫ້ເຮົາເຂັ້ມແຂງຄືກັນ. (1ປຕ. 5:10) ແຕ່ເຮົາກໍຕ້ອງເຮັດສ່ວນຂອງເຮົາເພື່ອຈະໄດ້ຮັບກຳລັງນັ້ນ. ຕົວຢ່າງເຊັ່ນ: ຈັກລົດເຮັດໃຫ້ລົດແລ່ນໄປໄດ້. ແຕ່ຄົນຂັບລົດກໍຕ້ອງຢຽບຄັນເລັ່ງເພື່ອລົດຈະເຄື່ອນທີ່ໄດ້. ຄ້າຍຄືກັນ ພະເຢໂຫວາກໍພ້ອມຈະໃຫ້ກຳລັງເຮົາ ແຕ່ເຮົາກໍຕ້ອງເຮັດບາງຢ່າງເພື່ອຈະໄດ້ກຳລັງນັ້ນ. ພະເຢໂຫວາໃຫ້ຫຍັງເຮົາແດ່ເພື່ອຊ່ວຍເຮົາໃຫ້ເຂັ້ມແຂງ? ແລະເຮົາຕ້ອງເຮັດຫຍັງເພື່ອຈະໄດ້ກຳລັງນັ້ນ? ເຮົາຈະໄດ້ຄຳຕອບໂດຍເບິ່ງວ່າພະເຢໂຫວາຊ່ວຍຜູ້ຮັບໃຊ້ 3 ຄົນຂອງເພິ່ນໃຫ້ເຂັ້ມແຂງໄດ້ແນວໃດ. ສາມຄົນນີ້ແມ່ນຜູ້ພະຍາກອນໂຢນາ ມາຣີແມ່ຂອງພະເຢຊູ ແລະອັກຄະສາວົກໂປໂລ. ເຮົາຈະເບິ່ງອີກວ່າ ພະເຢໂຫວາຍັງໃຊ້ວິທີຄ້າຍໆກັນນັ້ນແນວໃດເພື່ອຊ່ວຍຜູ້ຮັບໃຊ້ຂອງເພິ່ນໃນທຸກມື້ນີ້.
ເຂັ້ມແຂງໄດ້ຍ້ອນການອະທິດຖານແລະການສຶກສາສ່ວນຕົວ
4. ເຮົາຈະໄດ້ກຳລັງຈາກພະເຢໂຫວາໂດຍວິທີໃດ?
4 ວິທີໜຶ່ງທີ່ເຮົາຈະໄດ້ກຳລັງຈາກພະເຢໂຫວາແມ່ນການອະທິດຖານ. ພະເຢໂຫວາຕອບຄຳອະທິດຖານຂອງເຮົາໂດຍໃຫ້ “ກຳລັງທີ່ຫຼາຍກວ່າປົກກະຕິ.” (2ກຣ. 4:7) ເຮົາຍັງໄດ້ກຳລັງຈາກພະເຢໂຫວາເມື່ອເຮົາອ່ານຄຳພີໄບເບິນແລະຄິດຕຶກຕອງກ່ຽວກັບເລື່ອງນັ້ນ. (ເພງ. 86:11) ຄຳເວົ້າຂອງພະເຢໂຫວາທີ່ຢູ່ໃນຄຳພີໄບເບິນ “ມີພະລັງຫຼາຍ.” (ຮຣ. 4:12) ເມື່ອເຈົ້າອະທິດຖານຫາພະເຢໂຫວາແລະອ່ານຄຳພີໄບເບິນ ເຈົ້າກໍຈະໄດ້ກຳລັງເພື່ອຈະອົດທົນ ມີຄວາມສຸກສະເໝີ ແລະເຮັດວຽກຮັບໃຊ້ທີ່ຍາກໆໄດ້ສຳເລັດ. ໃຫ້ເຮົາມາເບິ່ງວ່າພະເຢໂຫວາຊ່ວຍຜູ້ພະຍາກອນໂຢນາໃຫ້ເຂັ້ມແຂງໄດ້ແນວໃດ.
5. ເປັນຫຍັງຜູ້ພະຍາກອນໂຢນາຕ້ອງໄດ້ຮັບຄວາມຊ່ວຍເຫຼືອເພື່ອຈະເຂັ້ມແຂງ?
5 ຜູ້ພະຍາກອນໂຢນາຕ້ອງໄດ້ຮັບຄວາມຊ່ວຍເຫຼືອເພື່ອຈະເຂັ້ມແຂງ. ຕອນທີ່ລາວໜີຈາກວຽກມອບໝາຍທີ່ພະເຢໂຫວາໃຫ້ລາວໄປເຮັດ ລາວເກືອບຕາຍຍ້ອນພາຍຸໃຫຍ່ ແລະລາວຍັງເຮັດໃຫ້ຄົນອື່ນທີ່ຢູ່ໃນເຮືອເກືອບຕາຍຄືກັນ. ຕອນທີ່ລາວຖືກໂຍນລົງທະເລ ປາໃຫຍ່ໄດ້ກືນລາວລົງໄປໃນທ້ອງ. ຢູ່ຫັ້ນມືດແລະເປັນຕາຢ້ານຫຼາຍ. ເຈົ້າຄິດວ່າໂຢນາຊິຮູ້ສຶກແນວໃດ? ທຳອິດ ລາວອາດຄິດວ່າໂຕເອງຊິຕາຍໃນທ້ອງປາ ແລະລາວອາດຄິດວ່າພະເຢໂຫວາຄືຊິຖິ້ມລາວແລ້ວ. ໂຢນາຕ້ອງຢ້ານຫຼາຍແທ້ໆ.
ຄືກັບໂຢນາ ສິ່ງໃດຈະຊ່ວຍເຮົາໃຫ້ເຂັ້ມແຂງເມື່ອເຈິບັນຫາ?(ເບິ່ງຂໍ້ 6-9)
6. ຕາມໂຢນາ 2:1, 2, 7 ສິ່ງໃດຊ່ວຍໂຢນາໃຫ້ເຂັ້ມແຂງຕອນທີ່ຢູ່ໃນທ້ອງປາ?
6 ຕອນທີ່ໂຢນາຢູ່ໃນທ້ອງປາຜູ້ດຽວ ລາວໄດ້ເຮັດຫຍັງເພື່ອຈະເຂັ້ມແຂງ? ລາວອະທິດຖານຫາພະເຢໂຫວາ. (ອ່ານໂຢນາ 2:1, 2, 7) ເຖິງວ່າລາວບໍ່ໄດ້ເຊື່ອຟັງພະເຢໂຫວາ ແຕ່ລາວກໍກັບໃຈແລະໝັ້ນໃຈວ່າພະເຢໂຫວາຈະຟັງຄຳອະທິດຖານທີ່ຖ່ອມໃຈຂອງລາວ. ໂຢນາຍັງຄິດເຖິງຂໍ້ຄຳພີຫຼາຍຂໍ້ນຳ. ເຮົາຮູ້ເລື່ອງນີ້ຍ້ອນຄຳອະທິດຖານຂອງລາວທີ່ຢູ່ໃນໂຢນາບົດ 2. ລາວໃຊ້ຄຳເວົ້າທີ່ຄ້າຍໆກັບຄຳເວົ້າທີ່ຢູ່ໃນປຶ້ມຄຳເພງ. (ຕົວຢ່າງໃຫ້ສົມທຽບໂຢນາ 2:2, 5 ກັບ ຄຳເພງ 69:1; 86:7) ເຫັນໄດ້ແຈ້ງວ່າໂຢນາຮູ້ຈັກຂໍ້ຄຳພີເຫຼົ່ານັ້ນດີ. ຂໍ້ຄຳພີເຫຼົ່ານັ້ນເຮັດໃຫ້ລາວໝັ້ນໃຈວ່າພະເຢໂຫວາຈະຊ່ວຍລາວແທ້ໆ. ຫຼັງຈາກທີ່ພະເຢໂຫວາຊ່ວຍລາວໃຫ້ປອດໄພແລ້ວ ລາວກໍພ້ອມທີ່ຈະເຮັດວຽກທີ່ພະເຢໂຫວາໃຫ້ລາວໄປເຮັດ.—ຢນ. 2:10–3:4
7-8. ພີ່ນ້ອງຊາຍຄົນໜຶ່ງຢູ່ໄຕ້ຫວັນໄດ້ຮັບກຳລັງແນວໃດຕອນທີ່ເຈິບັນຫາ?
7 ຕອນທີ່ເຮົາເຈິບັນຫາຫຼາຍຢ່າງໃນຊີວິດ ຕົວຢ່າງຂອງໂຢນາຊ່ວຍເຮົາໄດ້. ໃຫ້ເຮົາມາເບິ່ງປະສົບການຂອງພີ່ນ້ອງຊີໝິງbຢູ່ໄຕ້ຫວັນ. ລາວມີບັນຫາສຸຂະພາບຮ້າຍແຮງ ແລະຍັງຕ້ອງອົດທົນກັບການຕໍ່ຕ້ານຢ່າງໜັກຈາກຄົນໃນຄອບຄົວນຳ. ພີ່ນ້ອງຊີໝິງໄດ້ກຳລັງຈາກພະເຢໂຫວາໂດຍການອະທິດຖານແລະສຶກສາສ່ວນຕົວ. ລາວເລົ່າວ່າ: “ບາງເທື່ອຕອນທີ່ເຈິບັນຫາຂ້ອຍອຸກໃຈຫຼາຍຈົນບໍ່ມີສະມາທິຈະສຶກສາສ່ວນຕົວ. ໃຈຂ້ອຍບໍ່ສະຫງົບເລີຍ.” ແຕ່ລາວກໍບໍ່ຍອມແພ້. ລາວເລົ່າຕໍ່ວ່າ: “ເມື່ອເປັນແບບນີ້ ທຳອິດ ຂ້ອຍອະທິດຖານຫາພະເຢໂຫວາ ແລ້ວຂ້ອຍກໍຊຸບຫູຟັງໃສ່ຫູແລະຟັງເພງລາຊະອານາຈັກ. ບາງເທື່ອຂ້ອຍກໍຮ້ອງນຳຄ່ອຍໆຈົນກວ່າຂ້ອຍຈະສະຫງົບໃຈ ແລ້ວຂ້ອຍຈຶ່ງເລີ່ມສຶກສາສ່ວນຕົວ.”
8 ການສຶກສາສ່ວນຕົວຊ່ວຍພີ່ນ້ອງຊິໝິງໃຫ້ເຂັ້ມແຂງ. ຕອນທີ່ລາວຟື້ນໂຕຈາກການຜ່າຕັດໃຫຍ່ ນາງພະຍາບານບອກວ່າເມັດເລືອດແດງຂອງລາວຕ່ຳຫຼາຍ ລາວອາດຈະຕ້ອງໃສ່ເລືອດ. ແຕ່ໃນຄືນກ່ອນທີ່ລາວຈະຜ່າຕັດລາວໄດ້ອ່ານເລື່ອງຂອງພີ່ນ້ອງຍິງຄົນໜຶ່ງທີ່ຕ້ອງຜ່າຕັດໃຫຍ່ຄືກັນກັບລາວແລະເມັດເລືອດແດງຂອງພີ່ນ້ອງຍິງຄົນນັ້ນກໍຕ່ຳກວ່າຂອງລາວຫຼາຍ ແຕ່ລາວກໍບໍ່ຍອມໃສ່ເລືອດແລະຍັງສາມາດຟື້ນໂຕໄດ້. ປະສົບການນັ້ນເຮັດໃຫ້ພີ່ນ້ອງຊິໝິງມີກຳລັງໃຈທີ່ຈະຮັກສາຄວາມສັດຊື່ຕໍ່ໆໄປ.
9. ຖ້າບັນຫາໃນຊີວິດເຮັດໃຫ້ເຈົ້າອຸກໃຈຫຼາຍຈົນໝົດແຮງ ເຈົ້າຈະເຮັດແນວໃດ? (ເບິ່ງຮູບ)
9 ຕອນທີ່ເຈົ້າກຳລັງເຈິບັນຫາ ເຈົ້າເຄີຍອຸກໃຈຫຼາຍຈົນບໍ່ຮູ້ວ່າຊິອະທິດຖານແນວໃດບໍ? ຫຼືບັນຫານັ້ນເຮັດໃຫ້ເຈົ້າໝົດແຮງຈົນສຶກສາສ່ວນຕົວບໍ່ໄດ້ບໍ? ຖ້າເປັນແບບນັ້ນ ພະເຢໂຫວາເຂົ້າໃຈດີວ່າເຈົ້າກຳລັງເຈິຫຍັງຢູ່. ດັ່ງນັ້ນ ເຖິງວ່າເຈົ້າອະທິດຖານສັ້ນໆແຕ່ເຈົ້າກໍໝັ້ນໃຈໄດ້ວ່າພະເຢໂຫວາຈະໃຫ້ສິ່ງທີ່ເຈົ້າຈຳເປັນຕ້ອງໄດ້ຮັບແທ້ໆ. (ອຟຊ. 3:20) ຖ້າເຈົ້າບໍ່ສະບາຍ ໝົດແຮງ ຫຼືເຈັບປວດໃຈຫຼາຍຈົນອ່ານຄຳພີໄບເບິນຫຼືສຶກສາສ່ວນຕົວບໍ່ໄດ້ ເຈົ້າອາດຟັງຟາຍສຽງການອ່ານຄຳພີໄບເບິນຫຼືຟັງຟາຍສຽງການອ່ານປຶ້ມອື່ນໆຂອງອົງການກໍໄດ້ ຫຼືເຈົ້າອາດຟັງເພງຂອງອົງການຫຼືເບິ່ງວິດີໂອໃນເວັບໄຊ jw.org. ຖ້າເຈົ້າອະທິດຖານຫາພະເຢໂຫວາແລະພະຍາຍາມສັງເກດວ່າເພິ່ນຈະຕອບເຈົ້າແນວໃດຜ່ານທາງສິ່ງທີ່ເພິ່ນຈັດກຽມໄວ້ ກໍສະແດງໃຫ້ເຫັນວ່າເຈົ້າເຕັມໃຈໃຫ້ພະເຢໂຫວາຊ່ວຍເຈົ້າໃຫ້ເຂັ້ມແຂງ.
ເຂັ້ມແຂງໄດ້ຍ້ອນພີ່ນ້ອງຮ່ວມຄວາມເຊື່ອ
10. ພີ່ນ້ອງຮ່ວມຄວາມເຊື່ອຈະຊ່ວຍເຮົາໃຫ້ເຂັ້ມແຂງໄດ້ແນວໃດ?
10 ພະເຢໂຫວາສາມາດໃຊ້ພີ່ນ້ອງຮ່ວມຄວາມເຊື່ອເພື່ອຊ່ວຍເຮົາໃຫ້ເຂັ້ມແຂງ. ເຂົາເຈົ້າຈະ “ໃຫ້ກຳລັງໃຈ [ເຮົາ] ຫຼາຍ” ຕອນທີ່ເຮົາເຈິບັນຫາຫຼືໄດ້ຮັບວຽກມອບໝາຍທີ່ຍາກໆ. (ກລຊ. 4:10, 11) ແຮ່ງເຮົາຢູ່ “ໃນຍາມທີ່ຍາກລຳບາກ” ເຮົາກໍແຮ່ງຕ້ອງມີໝູ່. (ສຸພາ. 17:17, ລ.ມ) ຕອນທີ່ເຮົາຮູ້ສຶກອ່ອນແອ ພີ່ນ້ອງກໍພ້ອມທີ່ຈະຊ່ວຍເຮົາໃຫ້ມີສິ່ງຈຳເປັນ ໃຫ້ກຳລັງໃຈເຮົາ ແລະເຮັດໃຫ້ເຮົາເຂັ້ມແຂງເພື່ອຈະຮັບໃຊ້ພະເຢໂຫວາຢ່າງສັດຊື່ຕໍ່ໆໄປໄດ້. ໃຫ້ເຮົາມາເບິ່ງວ່າມາຣີແມ່ຂອງພະເຢຊູໄດ້ຮັບຄວາມຊ່ວຍເຫຼືອຈາກຄົນອື່ນແນວໃດເພື່ອຈະເຂັ້ມແຂງ.
11. ເປັນຫຍັງມາຣີຕ້ອງໄດ້ຮັບຄວາມຊ່ວຍເຫຼືອເພື່ອຈະເຂັ້ມແຂງ?
11 ມາຣີຕ້ອງໄດ້ຮັບຄວາມຊ່ວຍເຫຼືອເພື່ອຈະເຂັ້ມແຂງ. ລອງຄິດເບິ່ງວ່າມາຣີຊິອຸກໃຈຫຼາຍສ່ຳໃດຕອນທີ່ທູດສະຫວັນຄັບຣີເອນມາບອກວ່າລາວຈະຖືພາ ທັງໆທີ່ລາວຍັງບໍ່ໄດ້ແຕ່ງດອງ. ລາວບໍ່ເຄີຍມີລູກ ແຕ່ຕ້ອງລ້ຽງເດັກນ້ອຍຜູ້ໜຶ່ງທີ່ຈະກາຍເປັນເມຊີອາໃນອະນາຄົດ. ລາວຍັງບໍ່ເຄີຍມີເພດສຳພັນຈັກເທື່ອ ແຕ່ລາວຕ້ອງບອກໂຢເຊັບຄູ່ໝັ້ນຂອງລາວວ່າລາວຈະຖືພາ. ເລື່ອງທັງໝົດນີ້ຄືຊິຍາກຫຼາຍສຳລັບມາຣີ.—ລກ. 1:26-33
12. ຕາມລູກາ 1:39-45 ສິ່ງໃດຊ່ວຍມາຣີໃຫ້ເຂັ້ມແຂງ?
12 ສິ່ງໃດຊ່ວຍມາຣີໃຫ້ເຂັ້ມແຂງເພື່ອຈະເຮັດວຽກມອບໝາຍທີ່ພິເສດນີ້ແລະບໍ່ງ່າຍເລີຍ? ມາຣີຂໍຄວາມຊ່ວຍເຫຼືອຈາກຄົນອື່ນ. ມາຣີຂໍໃຫ້ທູດສະຫວັນຄັບຣີເອນບອກລະອຽດຕື່ມກ່ຽວກັບວຽກມອບໝາຍນີ້. (ລກ. 1:34) ຫຼັງຈາກນັ້ນ ມາຣີກໍເດີນທາງໄປ “ເຂດພູເຂົາ” ເຊິ່ງຢູ່ໃນເຂດແດນຂອງຕະກູນຢູດາເພື່ອໄປຫາເອລີຊາເບັດພີ່ນ້ອງຂອງລາວ. ການໄປຫາເອລີຊາເບັດເຮັດໃຫ້ມາຣີໄດ້ກຳລັງໃຈຫຼາຍ. ເອລີຊາເບັດຊົມເຊີຍມາຣີ ແລະພະເຢໂຫວາດົນໃຈເອລີຊາເບັດໃຫ້ເວົ້າເຖິງຄຳພະຍາກອນກ່ຽວກັບລູກຊາຍຂອງມາຣີທີ່ຍັງບໍ່ທັນເກີດ. (ອ່ານລູກາ 1:39-45) ມາຣີເວົ້າວ່າ ພະເຢໂຫວາ “ໃຊ້ລິດເດດເຮັດສິ່ງທີ່ຍິ່ງໃຫຍ່.” (ລກ. 1:46-51) ເຫັນໄດ້ແຈ້ງວ່າພະເຢໂຫວາໃຊ້ທູດສະຫວັນຄັບຣີເອນກັບເອລີຊາເບັດເພື່ອຊ່ວຍມາຣີໃຫ້ເຂັ້ມແຂງ.
13. ເມື່ອພີ່ນ້ອງຍິງຢູ່ໂບລີວີຂໍຄວາມຊ່ວຍເຫຼືອຈາກພີ່ນ້ອງ ຜົນເປັນແນວໃດ?
13 ຄືກັບມາຣີທີ່ໄດ້ຮັບຄວາມຊ່ວຍເຫຼືອຈາກຄົນອື່ນເພື່ອຈະເຂັ້ມແຂງ ພີ່ນ້ອງຮ່ວມຄວາມເຊື່ອກໍສາມາດຊ່ວຍເຈົ້າໃຫ້ເຂັ້ມແຂງໄດ້ຄືກັນ. ພີ່ນ້ອງດາຊູຣີທີ່ຢູ່ໂບລີວີຕ້ອງການແບບນັ້ນຄືກັນ. ພໍ່ຂອງລາວບໍ່ສະບາຍແຮງຈົນຕ້ອງເຂົ້າໂຮງໝໍແລະອາການຂອງພໍ່ລາວຢູ່ໃນຂັ້ນທີ່ປົວບໍ່ໄດ້. ດາຊູຣີຕ້ອງເບິ່ງແຍງພໍ່ຢູ່ໂຮງໝໍ. (1ຕມ. 5:4) ມັນບໍ່ງ່າຍເລີຍ. ລາວຍອມຮັບວ່າ: “ຫຼາຍເທື່ອຂ້ອຍຮູ້ສຶກວ່າເບິ່ງແຍງພໍ່ຕໍ່ໄປບໍ່ໄດ້.” ລາວຂໍໃຫ້ຄົນອື່ນຊ່ວຍບໍ? ຕອນທຳອິດລາວບໍ່ໄດ້ເຮັດແບບນັ້ນ. ລາວບອກວ່າ: “ຂ້ອຍບໍ່ຢາກລົບກວນພີ່ນ້ອງ. ຂ້ອຍຄິດວ່າຜູ້ທີ່ຊ່ວຍຂ້ອຍໄດ້ແທ້ໆແມ່ນພະເຢໂຫວາ. ແຕ່ຂ້ອຍກໍຄິດໄດ້ວ່າ ຖ້າຂ້ອຍບໍ່ຍອມໃຫ້ພີ່ນ້ອງຊ່ວຍ ມັນກໍໝາຍຄວາມວ່າຂ້ອຍກຳລັງພະຍາຍາມແກ້ບັນຫາຄົນດຽວ.” (ສຸພາ. 18:1) ດາຊູຣີຕັດສິນໃຈຂຽນໄປຫາພີ່ນ້ອງບາງຄົນແລະເລົ່າໃຫ້ເຂົາເຈົ້າຟັງວ່າມັນຍາກຫຼາຍສຳລັບລາວ. ລາວເລົ່າວ່າ: “ພີ່ນ້ອງທີ່ໜ້າຮັກໄດ້ຊ່ວຍຂ້ອຍໃຫ້ເຂັ້ມແຂງຫຼາຍແທ້ໆ. ຂ້ອຍຊຶ້ງໃຈຫຼາຍຈົນອະທິບາຍອອກມາເປັນຄຳເວົ້າບໍ່ໄດ້. ເຂົາເຈົ້າເອົາຂອງກິນມາໃຫ້ຂ້ອຍຢູ່ໂຮງໝໍແລະອ່ານຂໍ້ຄຳພີທີ່ໃຫ້ກຳລັງໃຈກັບຂ້ອຍ. ຂ້ອຍດີໃຈແທ້ໆທີ່ຮູ້ວ່າຂ້ອຍບໍ່ໄດ້ຢູ່ຄົນດຽວ. ເຮົາເປັນສ່ວນໜຶ່ງຂອງຄອບຄົວໃຫຍ່ຂອງພະເຢໂຫວາທີ່ພ້ອມຈະຊ່ວຍເຫຼືອກັນ ຮ້ອງໄຫ້ນຳກັນ ແລະສູ້ໄປນຳກັນ.”
14. ເປັນຫຍັງເຮົາຄວນຍອມຮັບຄວາມຊ່ວຍເຫຼືອຈາກຜູ້ດູແລ?
14 ວິທີໜຶ່ງທີ່ພະເຢໂຫວາຊ່ວຍເຮົາໃຫ້ເຂັ້ມແຂງແມ່ນ ເພິ່ນຊ່ວຍເຮົາຜ່ານທາງຜູ້ດູແລ. ເຂົາເຈົ້າເປັນຂອງຂວັນທີ່ພະເຢໂຫວາໃຊ້ເພື່ອຊ່ວຍເຮົາໃຫ້ເຂັ້ມແຂງແລະສົດຊື່ນ. (ອຊຢ. 32:1, 2) ດັ່ງນັ້ນ ຖ້າເຈົ້າອຸກໃຈໃນເລື່ອງໃດເລື່ອງໜຶ່ງ ໃຫ້ເລົ່າໃຫ້ຜູ້ດູແລຟັງ ແລະຖ້າເຂົາເຈົ້າສະເໜີທີ່ຈະຊ່ວຍ ກໍໃຫ້ຍອມຮັບການຊ່ວຍເຫຼືອຈາກເຂົາເຈົ້າ. ພະເຢໂຫວາສາມາດໃຊ້ຜູ້ດູແລເພື່ອຊ່ວຍເຈົ້າໃຫ້ເຂັ້ມແຂງ.
ເຂັ້ມແຂງໄດ້ຍ້ອນຄວາມຫວັງກ່ຽວກັບອະນາຄົດ
15. ຄລິດສະຕຽນທຸກຄົນມີຄວາມຫວັງຫຍັງ?
15 ຄຳສັນຍາໃນຄຳພີໄບເບິນເຮັດໃຫ້ເຮົາມີຄວາມຫວັງແລະມີກຳລັງທີ່ຈະຮັບໃຊ້ພະເຢໂຫວາຕໍ່ໆໄປ. (ຣມ. 4:3, 18-20) ຄລິດສະຕຽນບາງຄົນມີຄວາມຫວັງທີ່ຈະມີຊີວິດຕະຫຼອດໄປໃນໂລກທີ່ງາມໆ. ສ່ວນບາງຄົນກໍມີຄວາມຫວັງທີ່ຈະມີຊີວິດຕະຫຼອດໄປໃນສະຫວັນ. ຄວາມຫວັງແບບນີ້ຊ່ວຍເຮົາໃຫ້ອົດທົນກັບບັນຫາ ປະກາດຂ່າວດີ ແລະເຮັດວຽກມອບໝາຍໃນປະຊາຄົມໄດ້. (1ທຊ. 1:3) ຄວາມຫວັງແບບດຽວກັນນີ້ກໍຊ່ວຍໂປໂລໃຫ້ເຂັ້ມແຂງຄືກັນ.
16. ເປັນຫຍັງໂປໂລຕ້ອງໄດ້ຮັບຄວາມຊ່ວຍເຫຼືອເພື່ອຈະເຂັ້ມແຂງ?
16 ໂປໂລຕ້ອງໄດ້ຮັບຄວາມຊ່ວຍເຫຼືອເພື່ອຈະເຂັ້ມແຂງ. ໃນຈົດໝາຍທີ່ລາວຂຽນໄປຫາພີ່ນ້ອງຢູ່ເມືອງໂກຣິນໂທ ລາວເວົ້າວ່າລາວເປັນຄືກັບເຄື່ອງໃຊ້ທີ່ແຕກງ່າຍທີ່ເຮັດຈາກດິນດາກ. ລາວ “ຖືກກົດດັນ” “ຮູ້ສຶກສັບສົນ” “ຖືກຂົ່ມເຫງ” ແລະ “ເຈັບປວດຫຼາຍ.” ທີ່ຈິງ ບາງເທື່ອລາວເກືອບຕາຍຊ້ຳ. (2ກຣ. 4:8-10) ໂປໂລຂຽນຈົດໝາຍສະບັບນີ້ຕອນທີ່ລາວເດີນທາງໄປປະກາດຮອບທີ 3. ຕອນນັ້ນ ລາວອາດບໍ່ຮູ້ຊ້ຳວ່າບັນຫາທີ່ລາວເຈິຍັງບໍ່ໝົດເທື່ອ. ລາວຈະຕ້ອງເຈິກັບກຸ່ມຄົນທີ່ໃຊ້ຄວາມຮຸນແຮງ ຖືກຈັບ ເຮືອແຕກ ແລະຖືກຄຸກ.
17. ຕາມ 2 ໂກຣິນໂທ 4:16-18 ອັນໃດຊ່ວຍໂປໂລໃຫ້ອົດທົນກັບຄວາມລຳບາກຕ່າງໆ?
17 ໂປໂລເຂັ້ມແຂງໄດ້ຍ້ອນລາວຄິດເຖິງຄວາມຫວັງຂອງລາວໃນອະນາຄົດສະເໝີ. (ອ່ານ 2 ໂກຣິນໂທ 4:16-18) ລາວບອກພີ່ນ້ອງໃນເມືອງໂກຣິນໂທວ່າ ເຖິງວ່າຮ່າງກາຍຂອງລາວຈະ “ເສື່ອມໂຊມລົງເລື້ອຍໆ” ແຕ່ລາວກໍບໍ່ຍອມໃຫ້ເລື່ອງນີ້ເຮັດໃຫ້ລາວທໍ້ໃຈ. ໂປໂລຄິດເຖິງຄວາມຫວັງຂອງລາວໃນອະນາຄົດສະເໝີ. ຄວາມຫວັງທີ່ຈະມີຊີວິດຕະຫຼອດໄປໃນສະຫວັນເຮັດໃຫ້ລາວ “ໄດ້ຮັບກຽດຫຼາຍຂຶ້ນເລື້ອຍໆ” ຈົນເຮັດໃຫ້ລາວຍອມອົດທົນກັບຄວາມລຳບາກທຸກຢ່າງທີ່ລາວຕ້ອງເຈິ. ເມື່ອໂປໂລຄິດເຖິງຄວາມຫວັງນີ້ ລາວກໍ “ເຂັ້ມແຂງຂຶ້ນທຸກມື້.”
18. ຄວາມຫວັງຊ່ວຍທິໂຫເມຍກັບຄອບຄົວໃຫ້ເຂັ້ມແຂງໄດ້ແນວໃດ?
18 ທິໂຫເມຍພີ່ນ້ອງຊາຍຈາກບຸນກາຣີເຂັ້ມແຂງຂຶ້ນໄດ້ຍ້ອນລາວຄິດເຖິງຄວາມຫວັງໃນອະນາຄົດ. ສອງສາມປີກ່ອນ ດຣາໂກນ້ອງຊາຍຂອງລາວເສຍຊີວິດຍ້ອນອຸບັດຕິເຫດ. ເລື່ອງນີ້ເຮັດໃຫ້ທິໂຫເມຍເສຍໃຈຫຼາຍ. ເພື່ອຈະຮັບມືກັບເລື່ອງນີ້ໄດ້ ລາວກັບຄອບຄົວພະຍາຍາມນຶກພາບວ່າຊີວິດຈະເປັນແນວໃດໃນຕອນທີ່ມີການຟື້ນຄືນມາຈາກຕາຍ. ລາວເວົ້າວ່າ: “ເຮົາຈະລົມກັນວ່າ ເຮົາຈະໄປເຈິດຣາໂກຢູ່ໃສ? ເຮົາຈະເຮັດຫຍັງໃຫ້ລາວກິນ? ເຮົາຈະເຊີນໃຜແດ່ມາງານລ້ຽງຕ້ອນຮັບລາວ? ແລະເຮົາຈະເລົ່າເລື່ອງຫຍັງແດ່ໃຫ້ລາວຟັງກ່ຽວກັບສະໄໝສຸດທ້າຍ?” ທິໂຫເມຍບອກວ່າ ການຄິດເຖິງຄວາມຫວັງຢູ່ສະເໝີຊ່ວຍລາວກັບຄອບຄົວໃຫ້ເຂັ້ມແຂງຂຶ້ນຕໍ່ໆໄປແລະອົດທົນລໍຖ້າມື້ທີ່ພະເຢໂຫວາຈະປຸກນ້ອງຊາຍຂອງລາວໃຫ້ຟື້ນຄືນມາຈາກຕາຍ.
ໃຫ້ນຶກພາບວ່າຊີວິດເຈົ້າໃນໂລກໃໝ່ຈະເປັນແນວໃດ?(ເບິ່ງຂໍ້ 19)c
19. ເຈົ້າຈະເຮັດໃຫ້ຄວາມຫວັງຂອງເຈົ້າຊັດເຈນຂຶ້ນໄດ້ແນວໃດ? (ເບິ່ງຮູບ)
19 ເຈົ້າຈະເຮັດໃຫ້ຄວາມຫວັງຂອງເຈົ້າຊັດເຈນຂຶ້ນໄດ້ແນວໃດ? ຖ້າເຈົ້າມີຄວາມຫວັງທີ່ຈະມີຊີວິດຕະຫຼອດໄປໃນໂລກທີ່ງາມໆ ໃຫ້ອ່ານວ່າຄຳພີໄບເບິນເວົ້າແນວໃດກ່ຽວກັບໂລກໃໝ່ແລະຄິດກ່ຽວກັບເລື່ອງນັ້ນ. (ອຊຢ. 25:8; 32:16-18) ລອງນຶກພາບວ່າຊີວິດໃນໂລກໃໝ່ຈະເປັນແນວໃດ. ລອງຄິດເບິ່ງວ່າເຈົ້າຈະເຈິກັບໃຜແດ່? ເຈົ້າໄດ້ຍິນສຽງຫຍັງ? ແລະເຈົ້າຮູ້ສຶກແນວໃດ? ເພື່ອຈະຊ່ວຍເຈົ້າໃຫ້ນຶກພາບອອກໄດ້ງ່າຍ ເຈົ້າອາດຈະເບິ່ງຮູບກ່ຽວກັບໂລກໃໝ່ໃນປຶ້ມຕ່າງໆຂອງອົງການ ຫຼືເບິ່ງມິວສິກວິດີໂອຕ່າງໆເຊັ່ນ: ວັນທີ່ໂລກໃໝ່ຈະມາ (ພາສາໄທ) ສັນຕິສຸກເລື້ອຍໄປ ຫຼືນຶກເຖິງເວລານັ້ນ. ຖ້າເຮົາຄິດເລື້ອຍໆກ່ຽວກັບຄວາມຫວັງເລື່ອງໂລກໃໝ່ ເຮົາກໍຈະຮູ້ສຶກວ່າບັນຫາທີ່ເຮົາເຈິ “ຢູ່ພຽງໄລຍະສັ້ນໆແລະບໍ່ໜັກ.” (2ກຣ. 4:17) ຄວາມຫວັງທີ່ພະເຢໂຫວາໃຫ້ເຈົ້າຈະເຮັດໃຫ້ເຈົ້າເຂັ້ມແຂງ.
20. ຕອນທີ່ເຮົາອ່ອນແອ ເຮົາຕ້ອງເຮັດແນວໃດເພື່ອຈະມີກຳລັງ?
20 ຕອນໃດທີ່ເຮົາຮູ້ສຶກອ່ອນແອ ໃຫ້ເຮົາຈື່ໄວ້ວ່າພະເຈົ້າຈະຊ່ວຍເຮົາໃຫ້ມີກຳລັງ. (ເພງ. 108:13) ພະເຢໂຫວາໄດ້ກຽມທຸກຢ່າງໃຫ້ເຮົາເພື່ອຈະຊ່ວຍເຮົາໃຫ້ເຂັ້ມແຂງ. ດັ່ງນັ້ນ ເມື່ອເຈົ້າຕ້ອງການຄວາມຊ່ວຍເຫຼືອເພື່ອຈະເຮັດວຽກມອບໝາຍໃຫ້ສຳເລັດ ເພື່ອຈະອົດທົນກັບຄວາມລຳບາກ ຫຼືເພື່ອຈະມີຄວາມສຸກຢູ່ສະເໝີ ໃຫ້ເຈົ້າອະທິດຖານຫາພະເຢໂຫວາແລະສຶກສາສ່ວນຕົວ. ເພື່ອຈະໄດ້ຮັບການຊີ້ນຳຈາກເພິ່ນ ໃຫ້ເຈົ້າຍອມຮັບຄວາມຊ່ວຍເຫຼືອຈາກພີ່ນ້ອງຮ່ວມຄວາມເຊື່ອແລະເຮັດໃຫ້ຄວາມຫວັງຂອງເຈົ້າຊັດເຈນຢູ່ສະເໝີ. ຖ້າເຈົ້າເຮັດແບບນັ້ນ ເຈົ້າກໍຈະ “ໄດ້ຮັບກຳລັງຈາກລິດເດດທີ່ຍິ່ງໃຫຍ່ຂອງ [ພະເຈົ້າ] ເພື່ອຈະອົດທົນຈົນເຖິງທີ່ສຸດແລະອົດກັ້ນດ້ວຍຄວາມຍິນດີ.”—ກລຊ. 1:11
ເພງ 33 ມອບພາລະຂອງເຈົ້າໄວ້ກັບພະເຢໂຫວາ
a ບົດຄວາມນີ້ຈະຊ່ວຍຄົນທີ່ຮູ້ສຶກອຸກໃຈຍ້ອນບັນຫາທີ່ກຳລັງເຈິຢູ່ ຫຼືຮູ້ສຶກວ່າວຽກມອບໝາຍທີ່ໄດ້ຮັບຍາກເກີນຄວາມສາມາດຂອງເຂົາເຈົ້າ. ເຮົາຈະໄດ້ຮຽນວ່າ ພະເຢໂຫວາຈະຊ່ວຍເຮົາໃຫ້ເຂັ້ມແຂງໄດ້ແນວໃດ ແລະເຮົາຕ້ອງເຮັດຫຍັງເພື່ອຈະໄດ້ຮັບຄວາມຊ່ວຍເຫຼືອຈາກເພິ່ນ.
b ຊື່ສົມມຸດ
c ຄຳອະທິບາຍຮູບ: ພີ່ນ້ອງຍິງຫູໜວກຄິດເຖິງຄຳສັນຍາໃນຄຳພີໄບເບິນ. ລາວເປີດເບິ່ງມິວສິກວິດີໂອເພື່ອຈະຊ່ວຍລາວໃຫ້ນຶກພາບອອກວ່າຊີວິດໃນໂລກໃໝ່ຈະເປັນແນວໃດ.