Mafilipi

4 Hakulicwalo, mizwale ba ka bo ni lata ni bo ni nyolezwi, mina ba ba li tabo ya ka ni kuwani ya ka ya bulena, mu tiyele cwalo ku Mulena, mina balatiwa ba ka.

2 Ni eleza Euodia, ni eleza ni Sintike, kuli ba be ni muhupulo o swana ku Mulena. 3 Ki cwalo, na ku kupa ni wena, wena ya beleka ni na luli, kuli u zwelepili ku tusa basali ba, ba ba belekile ni na ka taata bakeñisa taba ye nde hamoho ni Klementi ni ba bañwi kaufela bo ni beleka ni bona, ili bao mabizo a bona a mwa buka ya bupilo.

4 Mu be ba ba tabile kamita ku Mulena. Ni sa kutela hape ni li, mu be ba ba tabile! 5 Kutwisiso* ya mina i zibahale kwa batu kaufela. Mulena u fakaufi. 6 Mu si ke mwa bilaela ka se siñwi, kono mwa lika kaufela mu zibise Mulimu ze mu kupa ka tapelo ni ka kupo hamoho ni buitumelo; 7 mi kozo ya Mulimu ye fita kutwisiso kaufela i ka sileleza lipilu za mina ni minahano ya mina ka Kreste Jesu.

8 Ka ku feleleza mizwale, mu zwelepili ku nahanisisa lika kaufela ze li za niti, lika kaufela ze li za butokwa, lika kaufela ze lukile, lika kaufela ze kenile, lika kaufela ze lateha, lika kaufela ze bulelwa hande, lika kaufela ze nde, ni lika kaufela ze lukela ku lumbwa. 9 Mu eze lika ze ne mu itutile ni ze ne mu amuhezi ni ku utwa ni ku bona ku na; mi Mulimu wa kozo u ka ba ni mina.

10 Ni tabile hahulu ku Mulena kuli cwale hasamulaho wa nako ye telele mu kalile ku ni hupula hape. Nihaike kuli ne mu nahananga za ka, ne mu si na kolo ya ku bonisa cwalo. 11 Ha ni buleli cwalo kabakala kuli ni mwa butokwi, kakuli ni itutile ku kolwa ka ze ni na ni ku si na taba ni miinelo ye ni li ku yona. 12 Na ziba mwa ku pilela ka lika ze nyinyani ni mwa ku pilela ka lika ze ñata. Mwa lika kaufela ni mwa miinelo kaufela ni itutile mwa ku pilela ka ku kula lico ni ka ku lapa, mwa ku pilela ha ni atezwi ni mwa ku pilela ha ni si na se siñwi. 13 Ni fumana maata mwa lika kaufela ka yena ya ni fa maata.

14 Nihakulicwalo, ne mu ezize hande ku ni tusa mwa ñalelwa ya ka. 15 Mane mina Mafilipi, hape mwa ziba kuli mu mano ituta taba ye nde lwa pili, ha ne ni zwile kwa Masedonia, ne ku si na puteho nihaiba i liñwi ye ne tusani ni na mwa taba ya ku fana ni ku amuhela, kwandaa mina mu nosi; 16 kakuli nihaiba ha ne ni li mwa Tesalonika, ne mu ni lumezi se siñwi lwa pili mane ni lwa bubeli, ku ze ne ni tokwile. 17 Haki kuli ni bata mpo, kono ni bata muselo o tahisa hahulu kekelezo mwa pulukelo ya mina. 18 Kono ni na ni ze ni tokwa kaufela mane ni ku fitelela fo. Ha ni tokwi se siñwi, ha u bona cwale ni amuhezi ku Epafrodite se ne mu lumile, ili munko o munati, sitabelo se si kateleha, se si tabisa ku Mulimu. 19 Mi cwale Mulimu wa ka u ka mi fa ze mu tokwa kaufela ku likana ni butuna bwa bufumu bwa hae ka Kreste Jesu. 20 Cwale ku Mulimu wa luna yena Ndate ku be kanya kamita ni mita. Amen.

21 Mu ni fitiseze litumeliso za ka ku ba ba kenile kaufela ba ba swalisana ni Kreste Jesu. Mizwale ba ba li ni na ba mi lumelisa. 22 Ba ba kenile kaufela, kono sihulu ba ndu ya Sesare, ba mi lumelisa.

23 Haike sishemo sa Mulena Jesu Kreste si be ni moya o mu bonisa.