Matthaia Ziak

24 Tin, biak in aṭanga Isua a kal chhuah laiin, a zirtîrte chuan biak in sak dân entîr tûrin an rawn pan a. 2 Ani chuan an hnênah: “Hêng zawng zawng hi in hmu em? Tih tak meuhvin ka hrilh a che u, he hmuna lung inrem rêng rêng hi tih chim loh pakhat mah a awm lo vang,” a ti a.

3 Tin, Oliv Tlânga a ṭhut laiin zirtîrte chu anmahni chauhvin a hnênah an lo kal a: “Chûng thilte chu engtikah nge a lo thlen ang? I lo awm lehna* leh khawvêl* tâwp chhinchhiahna chu eng nge ni ang? Min hrilh rawh,” an ti a.

4 Isua chuan heti hian a chhâng a: “Tu mahin an bum loh nân che u fîmkhur rawh u. 5 ‘Krista chu ka ni,’ tiin ka hming chhâlin mi tam tak an lo kal ang a, mi tam tak an bum ang. 6 Tin, indo thâwmte leh indo thuthangte in hre bawk ang. In mangan loh nân fîmkhur rawh u, chûngte chu lo thleng tûr rêng a ni si a; nimahsela, tâwpna chu a la ni rih lo vang.

7 “Hnam hrang leh hnam hrang an indo vang a, ram hrang leh ram hrang an indo vang a, hmun hrang hrangah ṭâmte a tla ang a, lîrte a nghîng ang. 8 Chûng zawng zawng chu hrehawm* inṭanna a ni ang.

9 “Tin, mite’n an ti duhdah che uin, an ti hlum ang che u; ka hming avângin hnam zawng zawng huat in la ni ang. 10 Tichuan, mi tam tak an tlu ang a, an inphatsanin an inhaw tawn ang. 11 Zâwlnei der tam tak lo chhuakin, mi tam tak an bum ang a. 12 Suahsualna* a pun zêl avângin mi tam zâwk hmangaihna a dai ang. 13 Nimahsela, a tâwp thlenga chhel taka tuar apiang chu chhandam an ni ang. 14 Tin, he Ram chanchin ṭha hi hnam zawng zawng hriattîrna tûrin khawvêl ram zawng zawngah hrilhin a awm ang a, chumi zawhah chuan tâwpna chu a lo thleng ang.

15 “Chutichuan, zâwlnei Daniela’n ti boraltu tenawm a sawi kha hmun thianghlima a ding in hmuh hunah (a chhiartuin hriatthiamna hmang rawh se), 16 Judai rama awmte chu tlângahte tlânchhe rawh se. 17 In chunga awm chu in chhûnga a bungruate la tûrin chhuk lo sela, 18 lova hnathawk chu a silhfên la tûrin haw hek suh se. 19 Chûng nîte chu raipuarte leh nau pawmte tân a va hrehawm lehzual dâwn êm! 20 In tlânchhiat hun chu thlasikah emaw, Sabbath nîah emaw a thlen loh nân ṭawngṭai reng rawh u. 21 Chumi hunah chuan hrehawm nasa tak a lo awm ang, chutianga nasa chu khawvêl awm ṭan tirh ata tûn thlengin a la awm ngai lo va, awm pawh a awm leh tawh hek lo vang. 22 Tin, chûng nîte chu tih tawi ni lo sela chuan, tu mah an dam khawchhuak lo vang; nimahsela, thlante avângin chûng nîte chu tih tawi a ni ang.

23 “Tu pawhin, ‘En teh u! Krista chu heta hi a awm e!’ emaw, ‘Sawta saw a awm e!’ emaw tia an hrilh che u chuan âwih suh ang che u. 24 Krista derte leh zâwlnei derte an lo chhuak ang a, thlante meuh pawh bum tumin chhinchhiahnate leh thil mak ropui takte an la ti dâwn si a. 25 Ka hrilh lâwk tawh che u hi, hre reng ang che u. 26 Tichuan, mite’n, ‘En teh u! Ani chu thlalêrah a awm e,’ tia an hrilh che u chuan kal chhuak suh ula; ‘En teh u! Ani chu pindan chhûngrilah a awm e,’ tia an hrilh che u pawhin âwih hek suh ang che u. 27 Khawchhak lam aṭangin kâwl a lo phe a, khawthlang lam thleng pawha a ên ṭhîn ang hian, mihring Fapa lo awm lehna* pawh chutiang chiah chu a ni dâwn si a. 28 Khawiah pawh saruang awmna hmun apiangah mupuite* an awm khâwm ang.

29 “Chûng ni hrehawm takte a thlen hnu lawkah chuan nî a thim ang a, thla a êng lo vang a, arsite vân aṭangin a tla ang a, vân thiltihtheihnate pawh a nghîng ang. 30 Tichuan, mihring Fapa chhinchhiahna chu vânah a lang ang a, leia chi tinrêngte chuan ṭap chungin an âwm an chûm ang a, mihring Fapa hi thiltihtheihna leh ropuina nasa tak nêna vân chhûm chunga a lo kal an la hmu ang. 31 Tin, a vântirhkohte chu tawtawrâwt ri nasa tak nên a tîr chhuak ang a, a thlante chu vân tâwp aṭanga a tâwp lehlam thleng, chhim leh hmâr, chhak leh thlang aṭangin an hruai khâwm ang.

32 “Theipui kûng tehkhin thu aṭang hian inzir rawh u: A zîk a lo no va, a hnah a lo chawr chuan nipui a hnai tih in hre ṭhîn. 33 Chutiang bawkin, chûng thil zawng zawng chu in hmuh hunah, ani chu kawngka bulah a ding tih hria ang che u. 34 Tih tak meuhvin ka hrilh a che u, chûng thil zawng zawng chu a thlen hma loh chuan he chhuan hi a boral tawp lo vang. 35 Lei leh vân a boral ang a, ka thu erawh chu a boral tawp lo vang.

36 “Nimahsela, chumi nî leh dârkâr chu Pa chauh lo chuan, vâna vântirhkohte pawhin, Fapa pawhin an hre lo. 37 Mihring Fapa lo awm lehna* chu Nova dam lai nîte ang bawk kha a ni ang. 38 Tuilêt hmate chuan, Nova lawnga a luh nî thlengin an eiin an in a, nupui pasal an innei ṭhîn. 39 Tui a lo lêt a, an zaa tih boral an nih vek thlengin eng mah an ngaihsak lo, mihring Fapa lo awm lehna pawh chutiang bawk chu a ni ang. 40 Tin, mi pahnihin lovah hna an thawk ang a, pakhat lâk a ni ang a, pakhat hnutchhiah a ni ang. 41 Hmeichhe pahnihin buh râwtsawmna hmunah buh an râwt ang a, pakhat lâk a ni ang a, pakhat hnutchhiah a ni ang. 42 Chutichuan, inring rengin awm rawh u, in Lalpa lo kal nî tûr chu in hre si lo.

43 “Hei hi hre rawh u: In neituin zâna rûkru lo kal hun tûr hria sela chuan a veng reng ang a, a inah a luhtîr lo vang. 44 Chuvângin, nangni pawh inring rengin awm rawh u, in rin loh hunah* mihring Fapa hi a lo kal dâwn si a.

45 “Bâwih rinawm leh fing tak, a puin a ina a bâwihte hnêna a hun taka chaw pe tûra a ruat chu tu ber nge ni ang? 46 A pu a lo haw huna bâwih chutianga thawk a hmuha chu a hlim ang! 47 Tih tak meuhvin ka hrilh a che u, a neih zawng zawng chunga hotuah a ruat ang.

48 “Nimahsela, chu bâwih chu lo sualin, ‘Ka pu a lo haw lawk dâwn lo ve,’ tia ngaihtuah a, 49 a bâwihpuite vua a, zu ruih hmangte hnêna a eia a in a nih chuan, 50 a beisei loh nîah leh a hriat loh dârkârah a pu chu a lo haw ang a, 51 ani chu a na thei ang bera hremin, mi vervêkte awmna hmunah a dah ang a. Chutah chuan ṭap leh ha ṭhialin a awm ang.