Mungasuwila Ukuti e Yehova Wamiwikako Amano

1. Avyani vino awawomvi wa kwe Yehova wamwi wakavwilika?

TUKAKWIVWA icete ukumanya ukuti e Yehova watuwikako amano swensinye ponga swe wantu wakwe. E Baibolo yikati: “Imfumu e Leza akasechela mu wantu wakwe.” (Amalu. 149:4) Lelo wamwi wakayivwa uwuwi, nu kuyikolowozya ukuti, ‘Uzye kweni nene palwane e Yehova wambikako amano?’ Wonye avino na wawomvi wa kwe Yehova wamwi awa cisinka wano walembwa mu Baibolo wayivwanga.—1 Sam. 1:​6-10; Job 29:​2, 4; Amalu. 51:11.

2. Awantu wamusango ci wano wakawa aviwuza vya kwe Yehova?

² E Baibolo yitapita na mumbali ukulanda ukuti awantu wano watapwililika wangawa aviwuza vya kwe Yehova. Avyani vino tuzipizile ukucita pa kuti tuwe swe viwuza vyakwe? Tuzipizile ukusuwila e Yesu Klistu nu kubatizwa.(Yoha. 3:16) Nga twacita wo-o, tukalanjizya awantu wanji ukuti tulapizile swinya tukalaya ne Yehova ukuti twandi twacita ukulonda kwakwe. (Imili. 2:38; 3:19) E Yehova akakwivwa icete nkaninye nga walola twacita wo-o pa kutivye tuwe swe viwuza vyakwe. Cinji acakuti, nga twatwalilila ukuficilisya umulapo witu uwakuyipa, akatuwikako sana amano swinya akatulola ukuti swe viwuza vyakwe.—Amalu. 25:14.

3. Amawuzyo ci yano twandi twasuke mwe co-o icipande?

³ Mwe co-o icipande twandi twasuke amawuzyo ya kuti: Amulandu ci wuno mpindi zimwi wamwi wakalola ngati e Yehova atawawikako amano? Uzye e Yehova akalanjizya wuli ukuti watuwikako amano? Avyani vino vingalenga umwina Klistu asinincizye ukuti e Yehova wamuwikako amano?

VINO VINGALENGA WAMWI WALOLA NGATI E YEHOVA ATAWAWIKAKO AMANO

4-5. Avyani vino tuzipizile twakwizuka nga ca kuti tukuyilola ngati tutacindama?

⁴ Swe wavule tukayilola ukuti tutacindama ukufumilila ku wutici. (Amalu. 88:15) Umwanawitu uwizina lya kuti Adrián watili: “Lyonsinye nkayilola ukuti ntacindama. Nkakwizuka impindi yimwi pano napefile ukuti ulupwa lwane lwize lwinjile mu Paradaise. Lelo nene nayilolanga ukuti ntafisilepo ukuwamo.” Ne e Tony wino atakulizile mu lupwa lwakapepa watili: “Awakwasi wane wasitela wanenepo ukuti wankunda. Nanti ukunenapo ukuti ne mwana umuzima. Na co-o calenzile nayivwa ukuti pasi icili consinye icizima cino nacitanga cino cawasecelesyanga.”

⁵ Nga ca kuti mpindi zimwi na sweswe tukayilola ngati tutacindama, tuzipizile twakwizuka ukuti e Yehova umweneco awino watupalamika kwe weliwe. (Yoha. 6:44) Kwawa cimwi icizima cino walola mwe sweswe cino calenga acite wo-o, swinya awino wamanya na vino vyawa mu myezo yitu. (1 Sam. 16:7; 2 Imila. 6:30) Fwandi tuzipizile ukumusuwila nga watunena ukuti twacindama.—1 Yoh. 3:​19, 20.

6. Uzye umutumwa Paulo wayivwanga wuli pe vino wawembusile lyo atani abatizwe?

⁶ Swe wamwi pano tutani tusambilile icine, kuli vimwi vino twawembusile vyo vyalenga twayivwa uwuwi ukufika na peyo-o impindi. (1 Pet. 4:3) Na wina Klistu nye wano wakawombela e Yehova ni cisinka, kwawa vimwi vino vikalenga wakwivwa uwuwi. Uzye na mwemwe mukalola ngati e Yehova atanga amitetele? Nga vino cawa, lyo ukumanya ukuti na wawomvi wa kwe Yehova nye awa cisinka avino wakayivwa kwandi kumyavwe. Ku cakulolelako, umutumwa Paulo wivwanga uwuwi nkaninye nga cakuti welenganya pa viwipe vino wacitanga pa mulandu nu kukanapwililika. (Roma. 7:24) Kweni nanti aca kuti wayivwanga wo-o, lyo walapila kaali kwe vino wawembukanga swinya lyo wabatizwa nu kubatizwa. Lelo nanti ciwe wo-o, umweneco wayilolanga ukuti ‘awakupelelechezya’ pa watumwa wonsinye swinya ‘amuwembu umulutilizye.’—1 Kor. 15:9; 1 Tim. 1:15.

7. Avyani vino tuzipizile twakwizuka pe vino twawembusile kaali?

⁷ Umukwasi witu uwa kwi yulu watulaya ukututetela nga ca kuti twalapila. (Amalu. 86:5) Fwandi nga ca kuti twalapila ukufuma pansi ya mwezo pe vino twawembusile, tuzipizile ukusuwila ukuti e Yehova watutetela.—Kolo. 2:13.

8-9. Tungacita wuli pa kuti tuleke ukuyivwa ukuti tusakuwombela e Yehova ukufikapo?

⁸ Swensinye tukalonda ukuwombesya nkaninye mu mulimo wa kwe Yehova pa kuti twamusecelesya. Lelo nanti ciwe wo-o, wamwi wakalola ngati watanga wawombesye. E nkazi uwizina lya kuti Amanda watili: “Nelenganyanga ukuti pa kuti ciloleke ukuti nkuwomba ukufika pano papelezile amaka yane, nzipizile nawombesya nkaninye mu mulimo wa kwe Yehova. Acino imiku imivule nelezyanga na maka yane yonsinye ukucita ivintu vino ntanga nkumanisye nu kukumanisya. Ne nga navilwa ukuficilisya, nivwanga uwuwi nkaninye nu kulola ukuti ne Yehova nye akundola ukuti napotwa.”

⁹ Tungacita wuli pa kuti tuleke ukuyivwa ukuti tusakuwombela e Yehova ukufikapo? Tuzipizile twakwizuka ukuti e Yehova akamanya nga ca kuti ivintu vyapiluka mu wumi witu. Swinya asikwenecela ukuti twamucitila ivintu vino tutanga tukumanisye. Akasalifya pe vyonsinye vino tukamucitila, cikuluvye nga tukumuwombela ukufika pano papelezile amaka yitu. Cinji aca kuti, mwakwelenganyako na pa wantu wano walembwa mu Baibolo wano wawombelanga e Yehova ni myezo yawo yonsinye. Ku cakulolelako lekani tulande pe vino calinji kwe Paulo. Wawombesizye nkaninye pa myaka imivule, wapitanga ukuya ku ncende zya kutali swinya wapanzile na mawungwe amavule. Lelo ivintu vizile avipiluka mu wumi swinya walesile nu kuwombesya ndi vino wawombesyanga pa kutalika. Nanti ciwe wo-o, e Yehova atalesile ukumuwikako amano. Swinya e Yehova wamupaazile pa mulandu wa kuti watwalilizile ukumuwombela ukufika pano papelezile amaka yakwe. (Imili. 28:​30, 31) Nasweswenye ivintu vingapiluka mu wumi ndi wulyanye vino calinji kwe Paulo. Nga cawa wo-o, tuzipizile twakwizuka ukuti cino cacindama asa vino tukumuwombela, lelo acino cikulenga twacita wowo. Lekani tulandeko pa nzila zimwi zino zikalanjizya ukuti e Yehova watuwikako amano

VINO YEHOVA AKALANJIZYA UKUTI WATUWIKAKO AMANO

10. Uzye “tungivwa” wuli izwi lya kwe Yehova pano akutunena ukuti watuwikako amano? (Yohani 16:27)

¹⁰ Akawomvya Baibolo. E Yehova akalola inzila izya kutulanjizizyamo ukuti watuwikako amano swinya watukunda. E Baibolo yalandapo imiku yiwili pano wanenile e Yesu ukuti amwana wakwe umukundikwe swinya wino akasecelelamo. (Mat. 3:17; 17:5) Uzye mungakunda ukuyivwila kuno Yehova akuminena ukuti wamiwikako amano? Kweni tutanga twivwe izwi lya kwe Yehova pano akulanda na sweswe, lelo akalanda nasweswe ukuwomvya Izwi lyakwe e Baibolo. Pano tukuwazya amazwi yano Yesu wanenile awasambi wakwe, cikawa ngati “tukwivwa” kuno Yehova akutunena sweswe ya-a amazwi. (Wazyani Yohani 16:27.) E Yesu wakolanyanga nkaninye imiwele ya mukwasi wakwe. Fwandi nga twawazya amazwi yano wanenile awasambi wakwe wano watalinji awapwililike ukuti wawawikako amano, tungalola ngati e Yehova akunena sweswe ya-a amazwi.—Yoha. 15:​9, 15.

11. Amulandu ci wuno tutanga tulandile ukuti nga tukupita mu ntazi lyo e Yehova alesile ukutuwikako amano? (Jemusi 1:12)

¹¹ Akatupa vino vikulondekwa. E Yehova akavwambisya sana ukutwavwa ponga ngati akutupa vino tukulondekwa pa kuti tutwalilile ukuwa nu wumi. Kweni mpindi zimwi angazumilizya ukuti tupite mu ntazi ngati avino calinji kwe Job. (Job 1:​8-11) Nomba nga tukupita mu ntazi lyo citakusula mukuti e Yehova alesile ukutuwikako amano. Yikawavye ampindi ya kuti tulanjizye vino twamukunda na vino twamusuwila. (Wazyani Jemusi 1:12.) Swinya pano tukupita mwe zyozyo intazi, tulilola vino Yehova watukunda na vino akatwavwa ukusipicizya.

12. Avyani vino tungasambililako kwe Dmitrii?

¹² Katulandeko pa mwanawitu Dmitrii uwa ku Asia. We-e umwanawitu incito yizile yisila swinya wamazile imyezi imivule akuvwambavye yinji ukwasowa ukuti ayizane. Acino wizile apingulapo ukutalika ukuwombesya mu mulimo wakuwizya ukucila na vino calinji pano wawombanga incito. Papisile imyezi na yinjinye imivule ukwasowa ukuti ayizane. Ne ku cawulanda wizile alwala nkaninye ica kuti atakatukanga na pano alazile. Na co-o calenzile atalike ukuwayilola ngati atalinji amukwasi nanti umulume umuzima swinya wavwilikanga nga ca kuti e Yehova wacilinji akumuwikako amano. Wanda wumwi amanguzi, umwana wakwe umwanaci wamulembezile pa kapepala amazwi yano yawa pe Ayizeya 30:15 aya kuti: “Munsuwile. Apano muliwa namaka muwe umutende.” Swinya wizile amutwalila pano walazile nu kumunena ukuti, “Tata nga mwivwa uwuwi, mwakwizuka ya-a amazwi yano yawa pe lyo-o iwaliko.” Umwanawitu Dmitrii wizile ayiluka ukuti wazipizile ukusalifya e Yehova. Amuno ulupwa lwakwe walinji ni vyakulya, ivya kuzwala nu mwakwikala. Watili: “Cino nazipizile vye ukucita, akuteka umwezo nu kutwalilila ukusuwila Yehova.” Na mwemwenye nga ca kuti mukupita mu ntazi, muzipizile ukusuwila Yehova ukuti wandi awamisakamala swinya wandi awamyavwa ukusipicizya.

13. Awaweni wano Yehova akawomvya pakutulanjizya ukuti watuwikako amano, swinya akacita wuli wo-o?

¹³ Akawomvya awanawitu na wankazi. Akawawomvya pa kuti atulanjizye ukuti watuwikako amano. Ku cakulolelako, angawomvya wamwi ukwiza mukutunena amazwi amazima pa mpindi yilyanye pano tukulondekwa uwa kutuwomelezya. Wonye avino calinji kwe nkazi wumwi uwa ku Asia wino walinji ni ntazi izivule. Incito yino wawombanga yizile ayisila swinya wizile alwala nkaninye. Cinji aca kuti umulume wizile awamufuta pa wu eluda pa mulandu wakuti wacisile uluwembu ulukulu. We-e nkazi watili “Napotwanga ukwivwicisya cino calenganga ivya musango wo-o vyacitika. Nelenganyanga ukuti ncepamwi pali cimwi cino ndumvinye swinya e Yehova alesile ukumbikako amano.” We-e nkazi wapefile kwe Yehova ukuti amwavwe ukulola nga ca kuti acili wamuwikako amano. Uzye e Yehova wasusile wuli ipepo lyakwe? Watili: “Wa eluda wanjavwizye ukulola ukuti e Yehova acili wankunda.” Mukupita kwa mpindi wizile apepa na swinyanye ukuti e Yehova amwavwe. Walanzile ukuti “Uwanda wulyanye pano natili napepa, napocelezile e kalata ukufuma ku wanawitu na wankazi mwi wungwe. Pano nawazyanga amazwi yakuwomelezya yano yalinjimo, naweni ukuti e Yehova ayivwile ipepo lyane.” Ukwasowa nu kuvwilika, e Yehova akalanjizya ukuti watuwikako amano ukupitila mu mazwi yakuwomelezya yano yakafuma kwe wanji.—Amalu. 10:17.

14. Anzila ci yinji yino Yehova akatulanjizizyamo ukuti watuwikako amano?

¹⁴ Inzila yinji yino Yehova akalanjizizyamo ukuti watuwikako amano, akutulunjika ukuwomvya awanawitu. Ku cakulolelako, mu mpindi zya wina Klistu wakutalicila, e Yehova wanenile umutumwa Paulo ukulembela awina Klistu wawuye ama kalata 14. Mwe ya-a ama kalata mwalinji nu kusunda ukuzima swinya ukwa mukulungatika. Amulandu ci wuno e Yehova wanenezile umutumwa Paulo ukuwikamo ukusunda mwe ya-a ama kalata. Amuno e Yehova Amukwasi umuzima swinya akasunda awana wakwe “wano wakunda.” (Imilu. 3:​11, 12) Fwandi nga cakuti wumwi watusunda ukuwomvya amawaliko, lyo citakusula mu kuti e Yehova atupasile, lelo lyo cikulanjizya ukuti watukunda. (Hebe. 12:6) Avyani vinji vino vikalanjizya ukuti e Yehova watuwikako amano?

VINJI VINO VIKALANJIZYA UKUTI E YEHOVA WATUWIKAKO AMANO

15. Awaweni wano Yehova akapa umuzimu wutele, swinya amulandu ci wuno ukumanya co-o kucindamizile?

¹⁵ E Yehova akapa umuzimu wutele kwe wano wawikako amano. (Mat. 12:18) Tungayikolowozya ukuti, ‘Uzye nawako ni miwele yimwi yino yawa pa vikomwa vya kumuzimu?’ Uzye nkatekanizizya sana wanji ukucila pe vino nalinji pano ntani nsambilile pe Yehova? Ukwasowa nu kuvwilika, nga mukuya mukuwelako ni miwele imizima yino yawa pa vikomwa vya kumuzimu, apano mwandi mwaya mukusuwila ukuti e Yehova wamiwikako amano.—Lolani akambokosi kakuti “Ivikomwa vya Kumuzimu . . . ”

16. Awaweni wano Yehova wapa umulimo wakuwizya ilyasi lizima, swinya co-o cikalenga mwayivwa wuli? (1 Watesalonika 2:4)

¹⁶ E Yehova wapa awantu wano wawikako amano umulimo wakuwizya ilyasi ilizima. (Wazyani 1 Watesalonika 2:4.) Lolani ivizima vino e nkazi Jocelyn wazanilemo mukuwizizya wanji ilyasi lizima. Wanda wumwi we-e e nkazi wakatusile vye umusakamikwe. Watili: “Nakatusile umutonte swinya nayivwanga ngati ntacindama. Nomba peyoyo impindi nawombanga wu payiniya swinya wowo uwanda awuno natantisile ukuwomba mu mulimo. Acino napefile nu kuya mu mulimo.” Umutondo tondonye pano wawombanga, wizile alanzyanya nu mwanaci wumwi uwizina lya kuti Mary, wino wazumizile ukutalika ukusambilila Baibolo. Patili papita imyezi mitici ukufumilila pano watalicizile ukusambilila, e Mary wizile anena e Jocelyn ukuti pe wulyanye uwanda pano wayile akong’onsya ku cisakati, e Mary lyo atekupepa kwe Leza ukuti amwavwe. Avyani vino e Jocelyn wasambilizileko kwe vyo-o vino vyacitisile? Watili: “Nivwile ngati e Yehova akunena ukuti ‘Nakuwikako amano.’” Kweni asa we wonsi wano wangazumila ukuwawizizya. Lelo tungasuwila ukuti e Yehova akasecelela nga tukuwombesya ukufika pano papelezile amaka yitu ukunenako wanji ilyasi lizima.

17. Avyani vino mukusambililako kwe Vicky pe vino walanzile pa nzuwi? (Amalumbo 5:12)

¹⁷ E Yehova wapa awantu wano wawikako amano inzuwi ya mwana wakwe. (1 Tim. 2:​5, 6) Tungacita wuli nga ca kuti tucili tukuyivwa ukuti e Yehova atatuwikako amano nanti aca kuti twasuwila mu nzuwi swinya twabatizwa? Tuzipizile twakwizuka ukuti asa welyonsi pano tuzipizile ukusuwila vino tukuyivwa, lelo tuzipizile ukusuwila Yehova. E Yehova akalola awantu wano wasuwila mu nzuwi ukuti awalungamane. Swinya wawalaya ukuwapaala. (Wazyani Amalumbo 5:12; Roma. 3:26) Ukwelenganya sana pa nzuwi akuno kwavwizye ne nkazi Vicky. Wanda wumwi pa nsizi yakwelenganyapo sana, wizile atalika ukuyinena ukuti: “E Yehova watalika kaali ukwelezya na maka ukundanjizya ukuti wankunda, lelo cawa ngati nene nkamunena ukuti: ‘Utanga ukumanisye ukukunda umuntu ndi vino nene. Ni nzuwi ya mwana wakonye yitanga yiwombe kwe vino nawembuka.’” Nomba pa nsizi ya kwelenganya sana pa nzuwi, wizile atalika ukuyivwa ukuti e Yehova wamukunda. Na sweswenye tungayivwa ukuti e Yehova watukunda swinya watuwikako amano nga cakuti tukwelenganya pa nzuwi.

18. Avyani vino tuzipizile twakwizuka nga ca kuti twatwalilila ukukunda Umukwasi witu uwa kwi yulu?

¹⁸ Nanti aca kuti tungakwelezya na maka ukuwomvya vyo-o vino twasambilila mwe co-o icipande, mpindi zimwi tungayivwa uwuwi nu kulola ngati e Yehova atatuwikako amano. Nga mwatalika ukuyivwa wo-o, mwakwizuka ukuti e Yehova akawika amano kwe “wano wamukunda.” (Jemu. 1:12) Acino twalililani ukupalamila kwe weliwe nu kwelezya na maka ukulola inzila zino akalanjizizyamo ukuti wamiwikako amano. Lyonsinye mwakwizuka ukuti atawa ‘ukutali kuwili wensinye.’—Imili. 17:27.