Ukuzifyako Amapepo Yitu

1. Avyani vino Yehova akatunena ukucita?

AKWEWENI kuno tungaya pa kuti awatusansamusya nu kututungulula? Tungaya vye kwe Yehova mutupunye! Nu mweneconye avino akatunena ukucita, akati “pepanji impindi zyonsi.” (1 Tes. 5:17) Tungalanda nawe mwi pepo impindi iyili yonsinye, swinya tungamulenga ukuti awatutungulula mwe vyonsinye vino tukacita. (Imilu. 3:5, 6) Pa mulandu wa kuti e Yehova akatupa ivizima ivivule, ni mpindinye iyakulanda nawe mwipepo atatupimila.

2. Avyani vino twandi tusambilile mwe co-o icipande? (Lolani ni cikope.)

² Tukasalifya nkaninye e Yehova pa kutupa lo-o ulongo ulwa kulanda nawe mwipepo. Nomba, impindi zimwi tukapotwa ukuwa ni mpindi ya kupepa. Ne limwi tukatalika ukulola ngati tutamanya ukupepa. Ilyasi ilizima alyakuti, e Baibolo ingatwavwa nga tukuyivwa wo-o, swinya ingatutungulula. Awuli umulandu wuno twandi tulande pe vino tungasambililako kwe Yesu pe vyo wasyangako impindi ya kupepa. Twalanda na pa vintu 5 vino tuzipizile twakwizuka pano tukupepa.

YESU WASYANGAKO IMPINDI YA KUPEPA

3. Avyani vino Yesu wamanyile pi pepo?

³ E Yesu wamanyile ukuti, Yehova wacindamika nkaninye amapepo yitu. Ku cakulolelako, pano atani ayize mu nsi, walinji ne Yehova kwi yulu imyaka imintapendwa! Pa mpindi yonsinye yo-o yino walinji nu Mukwasi wakwe kwi yulu, walolanga vino wasukanga amapepo ya wawomvi wakwe awisuwilo. Ku cakulolelako, waweniko pano wasusile ipepo lya kwe Hana, Davidi, Eliya, na wanji awa cisinka. (1 Sam. 1:10, 11, 20; 1 Izya. 19:4-6; Amalu. 32:5) Fwandi tutanga tuzunguke wo-o vino wanenile awasambilizi wakwe ukuti wapepa lyonsinye kwe Yehova, nu kusuwila ukuti aliwasuka!​—Mat. 7:7-11.

4. Avyani vino Yesu wacitanga pa kupepa?

⁴ Awasambilizi wasambililangako kwe vino Yesu wakunzile ukupepa. Wapepanga lyonsinye pano wawombanga umulimo wakwe. Nomba pa kuti acite wo-o, watantisile impindi ya kupepa, amuno ivya kucita vyamuvulilanga nkaninye. Wawanga nawantu awavule icakuti atasyalanga ni mpindi yakucitako vinji. (Mar. 6:31, 45, 46) Lelo nanti ciwe wo-o, wasinincizyanga ukuti wasyako impindi ya kupepa. Ku cakulolelako, wanda wumwi walawizile umwa kwe pwi ukuya mu kupepa, lyo ali wenganye! (Mar. 1:35) Ne impindi yimwi wacesizye akupepa vye kwe Yehova, ukumulenga ukuti amwavwe ukupingulapo icete pa cintu icicindame cino walondanga ukucita. (Luk. 6:12, 13) Ne uwusiku pano atani afwe, wapefile imiku imivule. Walenganga kwe Yisi ukuti amwavwe ukucita icintu cino calinji acitale pe vyonsinye.​—Mat. 26:39, 42, 44.

5. Uzye tungakolanya wuli e Yesu?

⁵ Cino tukusambililako kwe Yesu acakuti, tuzipizile twasyako impindi yakupepa, asa mulandu nu kuti tuli ni vyakucita ivivule. Swinya ndi wulyanye vino Yesu wacitanga, impindi ya kupepa yizipizile ukuyiwela. Nga tukulonda tungasolapo ukuti twapepa umutondo tondo nanti tungapepa amanguzi, ukulingana na vino sweweneco twatantika. Nga twacita wo-o, tulilanjizya ukuti tukasalifya pe co-o icawila cino Yehova watupa. E nkazi wumwi uwizina lyakuti Lynne, akakwizuka vino wayivwile pano wamanyile pa longo luno twawa nalo ulwa kupepa, watili “Nalile namanya ukuti ningalanda ne Yehova pa mpindi iyili yonsinye yino nkulonda, natalisile ukumulola ukuti we ciwuza wane uwapa mwezo swinya nalondanga nu kuzifyako amapepo yane.” Ukwasowa nu kuvwilika, swensinye avino tukayivwa. Acino lekani tulande pa vintu 5 vino tuzipizile twakwizuka pano tukupepa.

IVINTU 5 VINO TUZIPIZILE TWAKWIZUKA PANO TUKUPEPA

6. Ukulingana nu Ukuwumbulika 4:10, 11, avyani vino e Yehova wazipila ukupocelela?

⁶ Muwalumbanya Yehova. Mu cilolwa cakuzungusya, umutumwa Yohani waweni wasongo 24 kwi yulu wa kupepa Yehova. Wamulumbanyanga, nu kuvwanga amazwi yakuti, e Yehova wayana ukupocelela “uwukankala, numuchinzi namaka.” (Wazyani Ukuwumbulika 4:10, 11.) Awangeli wa kwe Yehova awa cisinka na wonye wawa ni milandu imivule iya ku mulumbanizizyapo. Teyelenganyani pe co-o, wakakwikala nawe kwi yulu swinya wa mumanya icete sana! Wakalola ni miwele yakwe mwe vyo akacita. Nga walola vyonsinye vyo-o, wakalondesya sana ukumulumbanya nu kumucindika!​—Job 38:4-7.

7. Avyani vino tungalumbanizizyapo e Yehova?

⁷ Nasweswenye tuzipizile twalumbanya e Yehova pano tukumunena vino tukuyivwa! Tuwamunena vino twakunda mwe weliwe nu mulandu wuno tukamucindicila. Pano mukuyisambilizya Baibolo, mwakwelezya na maka ukulola imiwele ya kwe Yehova yino yikamifika sana pa mwezo. (Job 37:23; Roma. 11:33) Nga mwayilola, mutasulako vye lelo muwamunena vino mukuyivwa pe vino wawa. Mungamulumbanya na pe vino akatwavwa nu kwavwa awanawitu na wankazi. Swinya mutakwiwilila na vino akatusakamala nu kutucinjilila!​—1 Sam. 1:27; 2:1, 2.

8. Ukulingana ne 1 Watesalonika 5:18, avyani vimwi vino tungasalifizyapo e Yehova?

⁸ Muwamusalifya. Twawa ni milandu imivule iyakumusalifizyapo. (Wazyani 1 Watesalonika 5:18.) Tungamusalifya pa vizima vino twawa navyo amuno icawupe consinye icizima cikafuma kwe weliwe. (Jemu. 1:17) Ku cakulolelako, yelenganyani pa nsi ni vintu vyakuzungusya vino welewula, tungamusalifya pe vyonsinyene vyo-o, ukuwikako nu wumi nye wuno watupa. Tungamusalifya na pa lupwa, iviwuza ni suwilo lya kunkolelo lyo twawa nalyo. Asa vyo-o vitupu, tungamusalifya na pe vyo watuzumilizya ukuwi viwuza vyakwe.

9. Amulandu ci wuno tuzipizile ukuwombesya pa kuti twasalifya?

⁹ Munsi muno twikala, mwizula vye awantu wano wasisalifya. Wakawika vye amano kwe vino wakulonda, ukucila ukusalifya pe vyo wali na vyo. Fwandi tuzipizile ukuwombesya nkaninye pa kuti twakwelenganya pe vino vingalenga tuwasalifya Yehova. Amuno nga tutacenjezile, tungapepela vye pe vino tukulonda, ukucila ukumusalifya pe vino akatucitila. Nomba nga tusakulonda ica musango wo-o ukutuciticila, tuzipizile twawombesya nkaninye ukumusalifya pe vyonsinye vino akatucitila.​—Luk. 6:45.

10. Uzye ukusalifya kwavwizye wuli e nkazi wumwi ukusipicizya? (Lolani ni cikope.)

¹⁰ Ukusalifya kungatwavwa ukusipicizya intazi. Lekani tulande pe nkazi uwizina lya kuti Kyung-sook wino walandwapo mu Ulupungu lwa kwa Kalinda ulwa January 15, 2015. We-e nkazi, wizile alwala e kansa ya kwe pwapwa iyiwipisye. Watili, “Yo-o indwala yalenganga nayivwa uwuwi nkaninye. Nayivwanga ngati pasi icili consinye cino nsyazile naco. Swinya ni vwanga intete.”Acani cino camwavwizye ukusipicizya, asa mulandu na wo-o vino wayivwanga? Walanzile ukuti cila wanda uwusiku pano atani aye mu kulala, wayanga pa musonje wa ng’anda mu kupepa. Swinya pano akupepa, atapepelanga mu mwezo lelo wafumyangako izwi nu kulumbula ivintu 5 vino akusalifizyapo e Yehova pe wowo uwanda. Ukucita wo-o, kwalenzile atasakamikwa nkani, swinya kwalenzile awavwambisya ukulanjizya vino wakunda e Yehova. Na cino cizile acifumamo acakuti, wizile alola vino Yehova akakwavwa awawomvi wakwe nga cakuti wakupita mu ntazi swinya wizile ayiluka nu kuti, ivizima vino vikatuciticila mu wumi avino vyavula ukucila intazi zino tukapitamo. Ngati awulyanye vino calinji kwe Kyung-sook, na sweswenye twawa ni vivule ivya kusalifizyapo Yehova nanti acakuti tukupita mu ntazi. Ukusalifya Yehova mwipepo, kungatwavwa ukusipicizya nu kutwalilila ukuteka umwezo.

11. Amulandu ci wuno awasambi walondekwanga ukuwa awasipe pano e Yesu wanyocezile kwi yulu?

¹¹ Muwamulenga ukuti awamyavwa ukuwa awasipe pano mukuwomba umulimo wakuwizya. Pano e Yesu atani anyocele kwi yulu, wizusizyeko awasambilizi wakwe pa mulimo wawo uwakuwizya “mwe Yerusalemu, na mwe Yudeya monsi, na mwe Samariya, ukufika nakuno insi yapakula.” (Imili. 1:8; Luk. 24:46-48) Mukupita kwa mpindi, awaYuda wizile awalema umutumwa Yohani ne Peter nu kuwatwala mucilwe ca Sanhedrini. Swinya wawatinizye nkaninye nu kuwanena ukuti waleke ukuwizya. (Imili. 4:18, 21) Uzye e Peter ne Yohani wacisile wuli pano calinji wo-o?

12. Ukulingana ni Imilimo 4:29, 31, avyani vino awasambilizi wacisile?

¹² Asa mulandu na vino wawatinizye, e Peter ne Yohani wanenile intunguluzi zya simapepo ukuti: “Mwemwenye nalwinu panzyani chino chatuzipila pankolelo pakwe Leza, ukuwatontela mwemwe pamwi ukutontela Leza. Amuno tutanga tuleke chino twayilolela naminso yitu twivwa namakutwi yitu.” (Imili. 4:19, 20) Pano e Peter ne Yohani wawasapuzile, awasambilizi wapefile kwe Yehova ukuti watwalilile ukucita ukulonda kwakwe. Wapefile ukuti: “Utuzumilizye, swewazya wako, ukuti tuwavwanga amazwi yako nukusinga konsi.” E Yehova wasusile lyo-o ipepo lya kufuma pansi ya mwezo.​—Wazyani Imilimo 4:29, 31.

13. Avyani vino tungasambililako kwe Jin-hyuk?

¹³ Tungakolanya awasambilizi wa kwe Yesu, ukupitila mukutwalilila ukuwomba umulimo wakuwizya pano awa mu wuteko watunena ukuti tuleke. Lekani tulandeko pa mwanawitu e Jin-hyuk wino wamunyefile pa mulandu wakukana yinjila uwusilika. Pano we-e umwanawitu walinji mu cifungo, wamupile umulimo wakutwalila awafungwa wawuye ivya kulya ni vintu vinji vino vyalondekwanga. Lelo nanti ciwe wo-o watamuzumilizizye ukulanda pa vya mu Baibolo kano vye pe vinji. Wapefile kwe Yehova ukuti amwavwe ukusipa nu kuwa umucenjele pa kuwizizyako wanji pa mpindi iyili yonsinye yino wasyucila. (Imili. 5:29) Watili: “E Yehova wasusile amapepo yane. Wanjavwizye ukuwa ne musipe nu kumpa amano yakutalika ukutungulula amasambililo amavule mu mamineti vye 5 lyo tuli pa mulyango. Ne uwusiku nawalembelanga amakalata yakuwapa uwanda wuno wukukonkapo.” Na sweswenye tungasuwila ukuti e Yehova wandi atwavwe ukutwalilila ukuwomba umulimo wakuwizya. Swinya Ndi wulyanye vino calinji kwe Jin-hyuk, tungapepa ukuti atwavwe ukuwa swe wasipe nu kutupa amano.

14. Weweni wino angatwavwa ukusipicizya intazi? (Amalumbo 37:3, 5)

¹⁴ Muwamulenga ukuti awamyavwa ukusipicizya intazi. Swe wavule tukapita mu ntazi ponga ngati akulwala, ukufwilwa wino twakunda, ukutucuzya, intazi zya mu ndupwa apano ni ntazi vye zinji. Ne ivikuko ni zya nkondo vikalenga cawomelako ukusipicizya zyo-o intazi. Acino ivya musango wo-o nga vyacitika, mwanena Yehova vyonsinye vino vili ku mwezo. Mwamulondololela ngati awulyanye vino mungalondololela e ciwuza winu uwa pa mwezo, nu kusuwila ukuti ‘alimyavwa.’​—Wazyani Amalumbo 37:3, 5.

15. Uzye ipepo lingatwavwa wuli ‘ukuzizimichizya intazi’? Landani pa cakulolelako.

¹⁵ Ukupepa ukufuma pansi ya mwezo kungatwavwa ‘ukuzizimichizya intazi.’ (Roma. 12:12) E Yehova akamanya vino awawomvi wakwe wakupitamo, ‘akakwivwa ukulila kwawo awatula.’ (Amalu. 145:18, 19) E Kristie e payiniya uwa myaka 29 wasinincizya ukuti co-o acisinka. We-e nkazi wizile alwala ukwasowa nu kwenecela, na co-o calenzile awasakamikwa nkaninye. Ku cawulanda, mukupita kwa mpindi wizile amanya ukuti e mama wakwe nawe walwile indwala imbipisye yino yalinji nu kumukoma. E Kristie watili: “Napefile kwe Yehova ukuti awampa amaka yakusipicizya cila wanda. Swinya nelezyanga na maka ukukana lecelezya ivya wufumu, ponga ngati akuzanwa mu kulongana ni sambililo lya pa lwane.” Walanzile nu kuti: “Ipepo lyanjavwizye ukusipicizya intazi imbome zino napitangamo. Na manyile ukuti e Yehova atandecelezizye, na co-o calenzile ndakwivwako icete. Swinya nanti acakuti ntapozile paponye, e Yehova wasusile amapepo yane ukupitila mukumpa umutende wa mu melenganyo nu kunjavwa ukuteka umwezo.” Fwandi lyonsinye twakwizuka ukuti e “Leza wamanya umwakufyusizya nanti umwakupususizya awantu wakwe awazima kukwelezwa kwawo.”​—2 Pet. 2:9.

16. Amulandu ci wuno tukalondela e Yehova awatwavwa ukucimvya amelezyo?

¹⁶ Muwamulenga ukuti awamyavwa ukucimvya amelezyo. Pa mulandu wakuti tutapwililika, tukalwisyanya nu kuvwambisya ukucita iviwipe. E Satana akuwombesya na maka yakwe yonsinye ukulenga wo-o uwelezyo ukuwomelako. Inzila yonga yino akucitilamo wo-o, akonona amelenganyo yitu ukupitila mu vya kulesezyamo icitendwe. Mwe vyo-o ivya kulesezyamo icitendwe, mukawa ivintu iviwipe vino vingalenga tukane ukuwa swewasanguluke mu minso ya kwe Yehova swinya vino vingalenga tucite nu luwembu ulukulu.​—Mar. 7:21-23; Jemu. 1:14, 15.

17. Avyani vino tuzipizile ukucita nga cakuti twapepa kwe Yehova ukuti atwavwe ukucimvya amelezyo?(Lolani ni cikope.)

¹⁷ Nga cakuti tukulonda ukucimvya uwelezyo wakuvwambisya ukucita iviwipe, twalenga kwe Yehova ukuti atwavwe. Mwi pepo lya cilanjililo, e Yesu walanzile ukuti: “Utize uwatutwala mu kwelezwa, ukuwa utupulumusye ku muwipe.” (Mat. 6:13) E Yehova akalondesya nkaninye ukutwavwa. Nomba tuzipizile twamulenga mwi pepo ukuti atwavwe, nu kucita vino twapepelapo. Twakwelezya na maka ukuleka ukuteyelezya nanti ukuwazya ivintu iviwipe vino vizula mwe yo-o insi ya kwe Satana. (Amalu. 97:10) Swinya pa kuti tuwe na melenganyo amazima, tuzipizile twayisambilizya Baibolo. Cinji acakuti twazanwa mu kulongana nu kuwombako umulimo wa kuwizya. Nga twacita wo-o, Yehova watulaya ukuti atalileka uwelezyo wuno tutanga tukumanisye ukusipicizya wutuponele.​—1 Kor. 10:12, 13.

18. Avyani vino swensinye tuzipizile ukucita?

¹⁸ Swensinye tuzipizile twapepa sana kwe Yehova pa kuti tutwalilile ukuwa awacisinka mwe ya-a amanda matale. Cila wanda mwapawulako impindi ya kupepa ukufuma pansi ya mwezo. E Yehova akalonda ‘twamunena intazi zitu zyonsi’ mwipepo. (Amalu. 62:8) Mwalumbanya Yehova nu kumusalifya pa vizima vyonsinye vino akamicitila. Mwamulenga ukuti awamyavwa ukuwa awasipe pano muli mu mulimo wakuwizya. Cinji acakuti, mwamulenga ukuti awamyavwa ukusipicizya intazi izili zyonsinye nu kucimvya amelezyo yano mungapitamo. Mutazipizile ukuleka icili consinye nanti uwili wensinye ukumilesya ukupepa lyonsi kwe Yehova. Nomba uzye Yehova akakwasuka wuli amapepo yitu? Lyo-o iwuzyo alino tulilanzyanya mu cipande cino cikonsilepo.