यर्मिया
३ मानिसहरू भन्छन्: “कुनै पुरुष आफ्नी पत्नीसित अलग भयो र त्यस स्त्रीले उसलाई छोडेर अर्कैसित गई भने के त्यो पुरुषले त्यस स्त्रीलाई फेरि आफूकहाँ ल्याउँछ र?”
के त्यो देश बिटुलो भएको छैन र?+
यहोवा घोषणा गर्नुहुन्छ, “तिमीले धेरैसित वेश्यावृत्ति गरेकी छ्यौ+
र अब मकहाँ फर्केर आउन चाहन्छ्यौ?
२ आफ्नो आँखा उठाएर नाङ्गो डाँडाहरूतिर हेर।
तिमी नबिटुलिएको कुनै ठाउँ छ र?
मरुभूमिको फिरन्तेझैँ*
तिमी बाटोछेउ आफ्ना प्रेमीहरूलाई पर्खँदै बस्यौ।
तिमीले आफ्नो वेश्यावृत्ति र दुष्कर्मले
यस देशलाई बिटुलो पाऱ्यौ।+
३ त्यसकारण झरी थामिएको छ,+
वर्षायाममा पनि पानी परेको छैन।
विवाहित भएर पनि वेश्यावृत्ति गर्ने निर्लज्ज स्त्रीजस्तै तिमी छाडा देखिन्छ्यौ;
तिमीलाई लाज सरम पटक्कै छैन।+
४ तर अहिले तिमी मलाई यसरी पुकार्छ्यौ,
‘हे मेरो बुबा, तपाईँ मेरो सानैदेखिको घनिष्ठ साथी हुनुहुन्छ!+
५ के तपाईँ सधैँ रिसाइरहनुहुन्छ?
के तपाईँ सधैँ द्वेष राखिरहनुहुन्छ?’
तिमी यस्तै-यस्तै कुरा गर्छ्यौ
तर खराब काम भने आफूले सकेजति गरिरहन्छ्यौ।”+
६ राजा योसियाहको समयमा+ यहोवाले मलाई यसो भन्नुभयो: “‘विश्वासघाती इस्राएलले के गरी, तिमीले देख्यौ? वेश्यावृत्ति गर्न त्यो भएभरका अग्ला डाँडाहरूमा र झ्याम्म परेका सबै रूखमुनि गई।+ ७ त्यसले यी सबै दुष्कर्म गरेपछि पनि मैले त्यसलाई मकहाँ फर्कन अनुरोध गरिरहेँ+ तर त्यसले इन्कार गरी। अनि यहुदाले आफ्नी विश्वासघाती दिदीले गरेको काम हेरिरही।+ ८ जब मैले यो देखेँ, तब व्यभिचार* गरेर विश्वासघात गर्ने इस्राएललाई+ छोडपत्र दिएर पठाइदिएँ।+ यो देखेर पनि त्यसकी विश्वासघाती बहिनी यहुदालाई कुनै डर लागेन; त्यसले पनि वेश्यावृत्ति गरी।+ ९ त्यसले* वेश्यावृत्तिलाई हल्कासित लिई अनि ढुङ्गा र रूखसित व्यभिचार गरेर देशलाई बिटुलो पारिरही।+ १० यति हुँदाहुँदै पनि त्यसकी विश्वासघाती बहिनी यहुदा सारा हृदयले मकहाँ फर्किन, त्यसले मकहाँ फर्केको ढोङ मात्र गरी,’ यहोवा घोषणा गर्नुहुन्छ।”
११ अनि यहोवाले मलाई भन्नुभयो: “विश्वासघाती इस्राएल धोकेबाज यहुदाभन्दा धर्मी देखिएकी छे।+ १२ गएर उत्तरतिर यस्तो घोषणा गर:+
“‘“हे विश्वासघाती इस्राएल, मतिर फर्क,” यहोवा घोषणा गर्नुहुन्छ।’+ ‘“म तिमीलाई आँखा तर्नेछैनँ+ किनकि म वफादार छु,” यहोवा घोषणा गर्नुहुन्छ।’ ‘“म सधैँ रिसाइरहन्नँ। १३ केवल आफ्नो गल्ती स्विकार किनकि तिमीले यहोवा आफ्ना परमेश्वरको विरोध गरेकी छ्यौ। तिमीले झ्याम्म परेको प्रत्येक रूखमुनि परदेशीहरूसित* व्यभिचार गऱ्यौ तर मेरो आज्ञा भने पालन गरिनौ,” यहोवा घोषणा गर्नुहुन्छ।’”
१४ “हे विश्वासघाती छोरा हो, मकहाँ फर्क,” यहोवा घोषणा गर्नुहुन्छ, “किनकि म तिमीहरूको साँचो मालिक* भएको छु; म तिमीहरूको हरेक सहरबाट एक जनालाई र हरेक कुलबाट दुई जनालाई सियोनमा ल्याउनेछु।+ १५ अनि म तिमीहरूलाई मेरो मनले रुचाएका गोठालाहरू दिनेछु+ र तिनीहरूले तिमीहरूलाई ज्ञान र अन्तर्दृष्टि* दिनेछन्। १६ तिमीहरूको सङ्ख्या औधी बढ्नेछ र यस देशमा तिमीहरू फैलिनेछौ,” यहोवा घोषणा गर्नुहुन्छ।+ “तिनीहरूले यसो भन्नेछैनन्, ‘यहोवाको करारको सन्दुक!’* तिनीहरूको मनमा त्यसको सम्झनै आउनेछैन न त त्यसको अभाव नै खट्किनेछ। अनि त्यो फेरि कहिल्यै बनाइनेछैन। १७ त्यसबेला तिनीहरूले यरुसलेमलाई यहोवाको सिंहासन भन्नेछन्+ अनि सबै जाति यहोवाको नामको प्रशंसा गर्न यरुसलेममा जम्मा गराइनेछन्।+ तिनीहरू हठी हुनेछैनन् न त फेरि आफ्नो हृदयको दुष्ट विचारअनुसार नै चल्नेछन्।”
१८ “त्यस समयमा यहुदाको घराना इस्राएलको घरानासित मिल्नेछ+ र मैले तिमीहरूको पुर्खालाई अधिकारस्वरूप दिएको देशमा तिनीहरू एकसाथ उत्तर देशबाट आउनेछन्।+ १९ मैले मनमनै सोचेँ, ‘मैले यिनीहरूलाई आफ्ना छोराहरूजस्तै ठानेँ अनि जातिजातिहरूमाझ एउटा असल देश, सबैभन्दा सुन्दर देश यिनीहरूलाई अधिकारस्वरूप दिएँ!’+ मलाई यस्तो लाग्यो, ‘यिनीहरूले मलाई “मेरो बुबा!” भनेर बोलाउनेछन् अनि मेरो पछि लाग्न कहिल्यै छोड्नेछैनन्।’ २० यहोवा परमेश्वर घोषणा गर्नुहुन्छ, ‘हे इस्राएलको घराना, आफ्नो पतिलाई धोका दिने पत्नीले जस्तै तिमीहरूले पनि मलाई धोका दियौ।’”+
२१ नाङ्गा डाँडाहरूमा एउटा आवाज सुनिन्छ,
इस्राएलका मानिसहरूको रोदन र पुकाराको आवाज।
किनभने तिनीहरू टेढो बाटोमा लागेका छन्
अनि यहोवा आफ्ना परमेश्वरलाई बिर्सेका छन्।+
२२ “हे विश्वासघाती छोरा हो, फर्क।
म तिमीहरूको विश्वासघाती हृदयलाई निको पार्नेछु।”+
“हामी आयौँ, हामी तपाईँकहाँ फर्केर आयौँ
किनकि हे यहोवा, तपाईँ हाम्रा परमेश्वर हुनुहुन्छ।+
२३ डाँडाकाँडा तथा पहाडपर्वतमा हल्लीखल्ली गरेर हामीले आफैलाई धोका दियौँ।+
इस्राएलको उद्धार गर्ने त यहोवा हाम्रा परमेश्वर मात्र हुनुहुन्छ।+
२४ तर त्यो व्यर्थको देवताले हामी सानो छँदादेखि नै हाम्रा पुर्खाहरूको मेहनत,+
तिनीहरूका भेडाबाख्रा र गाईवस्तु,
तिनीहरूका छोराहरू र छोरीहरू सबै खोसेको छ।
२५ अब हामी लाजले गर्दा घोप्टो परौँ
अनि हाम्रो अपमानले हामीलाई ढाकोस्
किनकि हामीले यहोवा हाम्रा परमेश्वरविरुद्ध पाप गरेका छौँ।+
हाम्रो पुर्खाले अनि हामीले सानो छँदादेखि आजको दिनसम्मै पाप गऱ्यौँ,+
हामीले यहोवा हाम्रा परमेश्वरको आज्ञा पालन गरेनौँ।”