प्रेषितहरूका कार्य
१२ त्यसैबेलातिर राजा हेरोदले मण्डलीका कसै-कसैको खेदो गर्न थाले।+ २ उनले युहन्नाको+ दाइ याकुबलाई तरबारले मारे।+ ३ यसबाट यहुदीहरू खुसी भएको देखेर उनी पत्रुसलाई पनि गिरफ्तार गर्न अघि सरे। (त्यतिबेला अखमिरा रोटीको चाड*+ चलिरहेको थियो।) ४ हेरोदले तिनलाई पक्रेर झ्यालखानामा हाले+ अनि चार-चार जना सैनिकको चार वटा समूह बनाएर पालैसित पहरा दिन खटाए किनकि उनले निस्तार चाड* सिद्धिएपछि तिनलाई जनतासामु उभ्याउने* विचार गरेका थिए। ५ त्यसैले पत्रुस झ्यालखानामै रहिरहे तर मण्डलीले तिनको लागि परमेश्वरलाई तनमनले प्रार्थना गरिरहेको थियो।+
६ हेरोदले पत्रुसलाई जनतासामु उभ्याउन चाहेको दिनको अघिल्लो रात तिनी दुई जना सैनिकको बीचमा सुतिरहेका थिए। तिनी दुइटा साङ्लोले बाँधिएका थिए अनि पहरेदारहरूले ढोकामा पहरा दिइरहेका थिए। ७ तर हेर! यहोवा* परमेश्वरका स्वर्गदूत तिनको छेवैमा उभिए+ अनि झ्यालखानाको त्यो कोठा उज्यालो भयो। ती स्वर्गदूतले पत्रुसको कोखामा थपथपाएर तिनलाई यसो भन्दै जगाए: “छिटो उठ!” अनि तिनको हातको साङ्लो खुस्कियो।+ ८ ती स्वर्गदूतले तिनलाई भने: “लुगा लगाऊ* र आफ्नो जुत्ताको फित्ता कस।” तिनले त्यसै गरे। फेरि उनले तिनलाई भने: “तिम्रो खास्टो ओढ र मेरो पछिपछि आऊ।” ९ अनि तिनी बाहिर निस्के र उनको पछिपछि लागे तर स्वर्गदूतले जे-जे गरिरहेका छन्, ती सबै साँच्चै भइरहेको हो भनेर तिनलाई थाह थिएन। वास्तवमा तिनले दर्शन* देखिरहेको छु भन्ठानेका थिए। १० जब तिनीहरू पहरेदारहरूको पहिलो र दोस्रो चौकी पार गरेर सहरतिर जाने फलामे ढोकामा पुगे, तब त्यो तिनीहरूका लागि आफसेआफ खुल्यो। बाहिर निस्केपछि तिनीहरू एउटा गल्लीमा पुगे; तब उत्तिखेरै ती स्वर्गदूत तिनलाई छोडेर गए। ११ तब पत्रुसले वास्तवमा के भइरहेको छ भनी बुझे र यसो भने: “अब भने मलाई थाह भयो, यहोवा* परमेश्वरले आफ्नो स्वर्गदूत पठाएर मलाई हेरोदको हातबाट छुटाउनुभएछ अनि यहुदीहरूले जे आशा गरिरहेका थिए, त्यस्तो हुनबाट बचाउनुभएछ।”+
१२ यो कुरा बुझेपछि तिनी मर्कुस भनिने युहन्नाकी+ आमा मरियमको घरमा गए। त्यहाँ धेरै जना चेला भेला भएर प्रार्थना गरिरहेका थिए। १३ तिनले मूलढोका ढकढक्याउँदा रोदा नाम गरेकी नोकर्नी ढोका खोल्न आइन्। १४ पत्रुसको स्वर चिनेपछि उनी असाध्यै खुसी भइन् र ढोकै नखोली दगुर्दै भित्र फर्किन् अनि पत्रुस बाहिर ढोकामा उभिरहेका छन् भनेर खबर गरिन्। १५ उनीहरूले उनलाई भने: “तिमी बौलायौ कि के हो?” तर उनले पत्रुस साँच्चै आएका हुन् भनेर जिद्दी गरिरहिन्। तब उनीहरूले भन्न थाले: “त्यसोभए त्यो तिनको स्वर्गदूत होला।” १६ तर पत्रुसले ढोका ढकढक्याइरहे। जब उनीहरूले ढोका खोले, तब तिनलाई देखेर उनीहरू छक्क परे। १७ तर तिनले हातले चुप लाग्ने इसारा गरे अनि यहोवा* परमेश्वरले तिनलाई कसरी झ्यालखानाबाट बाहिर ल्याउनुभयो भनी उनीहरूलाई सविस्तार सुनाए। त्यसपछि तिनले यसो भने: “यो कुरा याकुब+ र अरू भाइहरूलाई खबर गर।” तब त्यहाँबाट निस्केर तिनी अर्कै ठाउँमा गए।
१८ जब उज्यालो भयो, तब पत्रुस कहाँ गए होला भनेर सैनिकहरूबीच खैलाबैला मच्चियो। १९ हेरोदले तिनलाई धुइँधुइँती खोजे तर कतै नभेटेपछि उनले पहरेदारहरूलाई केरकार गरे अनि तिनीहरूलाई सजाय दिन हुकुम गरे।+ त्यसपछि उनी यहुदियाबाट सिजरिया ओर्ले र केही समय त्यहीँ बिताए।
२० उनी टायर र सिदोनका मानिसहरूसित निकै रिसाएका थिए।* त्यसैले त्यहाँका मानिसहरू एकै मतका भएर हेरोदसामु उपस्थित भए अनि राजघरानाको रेखदेख गर्ने बलस्तसलाई मनाएर तिनीहरूले शान्ति-प्रस्ताव अघि सारे किनकि तिनीहरूले हेरोदकै देशबाट खाद्यान्न पाउँथे। २१ तब तोकिएको दिनमा हेरोद शाही पोसाक पहिरिएर न्यायासनमा बसे अनि तिनीहरूसामु भाषण दिन थाले। २२ उनको कुरा सुनेर त्यहाँ भेला भएका मानिसहरू यसो भन्दै कराउन थाले: “यो त मानिसको होइन, देवताको बोली हो!” २३ परमेश्वरलाई महिमा नदिएकोले यहोवा* परमेश्वरका स्वर्गदूतले उत्तिखेरै उनलाई प्रहार गरे अनि स्याउँस्याउँती किरा परेर उनी मरे।
२४ तर यहोवा* परमेश्वरको वचन बढ्दै र फैलँदै गयो।+
२५ अर्कोतर्फ बर्णाबास+ र सावलचाहिँ यरुसलेममा राहत सामग्री वितरण गर्ने+ काम सकेर एन्टिओक फर्के। तिनीहरूले मर्कुस भनिने युहन्नालाई+ पनि आफूसँगै ल्याए।