Yafaduhu Dödöu, Omuso Dödö Yehowa Khöu!

1. Hadia manö niʼaombösi tödö niha samosumange Yehowa?

TATU omuso sibai dödöda börö me imane Sura Niʼamoniʼö, ”Omuso dödö Yehowa ba nono mbanuania.” (Si. 149:4) Hizaʼi, itaria so ösa zaombö tödö ba lamane, ’Hadia omuso dödö Yehowa khögu?’ Ato ndra samosumange Yehowa si lö faröi ba götö Zura Niʼamoniʼö si no irai morasoi faʼaombö dödö simane daʼö.—1 Sa. 1:​6-10; Yob. 29:​2, 4; Si. 51:11.

2. Haniha zi tola mangomusoiʼö tödö Yehowa?

² Itutunö khöda Sura Niʼamoniʼö wa niha si lö moʼahonoa tola laʼomusoiʼö dödö Yehowa. Hewisa lalania? Moguna taforomaʼö wa mamati ita khö Yesu Keriso ba tebayagö idanö. (Yoh. 3:16) Daʼö zangoromaʼö föna niha sato wa no tafalalini gera-erada moroi ba horö si no tafalua ba tafabuʼu ba wamalua somasi Lowalangi. (Hal. 2:38; 3:19) Omuso dödö Yehowa na tafalua daʼö ba wangoromaʼö wa omasi ita tobali si fahuwu khönia. Na tafalua wondrege zi sökhi ba wondrorogö buʼusa lida ba wamosumange yaʼia, no taʼomusoiʼö dödö Yehowa ba omasi ia tobali si fahuwu khöda.—Si. 25:14.

3. Hadia wanofu-nofu nitutunöda?

³ Hizaʼi, hana wa so ösa niha sangumaʼö wa lö omuso dödö Lowalangi khöra? Hewisa wangoromaʼö Yehowa wa omuso dödönia khöda? Ba hadia zinangea ifalua si samösa niha Keriso ba wangaʼaroʼö faʼafaduhu dödönia wa omuso dödö Lowalangi khönia?

HANA WA SO ÖSA NIHA SANGUMAʼÖ WA LÖ OMUSO DÖDÖ LOWALANGI KHÖRA?

4-5. Hadia zi tola tafaduhusi tödö hewaʼae tarasoi wa lö eluaha waʼaurida?

⁴ Ato ba gotaluada zorasoi iʼotarai me iraono wa lö eluaha waʼaurira. (Si. 88:15) Imane talifusöda ira matua sotöi Adrián, ”Lö tebulö urasoi wa lö eluaha waʼaurigu. Me ide-idedo, no irai uʼandrö khö Lowalangi enaʼö auri nösi nomogu ba Waradaiso, hizaʼi faduhu dödögu wa tebai urugi daʼö.” Imane Tony, niʼebuaʼö ba nösi nomo si tenga Samaduhuʼö Yehowa, ”Lö irai lawaʼö khögu ira satuagu wa laʼomasiʼö ba laʼameʼegö tödö ndraʼo. Daʼö mbörö wa uwaʼö tödögu tebai uʼomusoiʼö dödöra.”

⁵ Na itaria tarasoi wa lö eluaha waʼaurida, tola tatörö tödöda wa Yehowa zondröni yaʼita khönia. (Yoh. 6:44) Iʼila mbua-bua si sökhi niʼokhögöda, ba abölö aboto ba dödönia hewisa ita zindruhunia. (1 Sa. 16:7; 2 Ng. 6:30) Börö daʼö, tola tafaduhusi tödö ia me iwaʼö wa ebua sibai mbölida fönania.—1 Yo. 3:​19, 20.

6. Hewisa dödö Waulo ba horö nifaluania ba zilalö?

⁶ Fatua lö tafahaʼö ita ba zindruhu, so ösa ba gotaluada zamalua horö irege itegu-tegu manö ita tödöda irugi iadaʼa. (1 Fe. 4:3) So göi niha Keriso si lö faröi mamosumange Yehowa, hizaʼi lö tebulö lalawa walömoʼahonoara. Hewisa ndraʼugö? Hadia itaria örasoi wa lö iʼefaʼö zalamö Yehowa? Na simanö, tatu terara dödömö me öʼila wa so nono mbanua Yehowa tanö böʼö samorege ba wolawa fangera-ngera simane daʼö. Duma-dumania, tefakao sibai Waulo me ifuli itörö tödönia walömoʼahonoania. (Rom. 7:24) Tatu manö, no ifalalini gera-erania Faulo ba no tebayagö ia idanö. Hizaʼi ba wamaiginia, yaʼia andrö ’sinenge fondrege zide-ide’ ba ’fondrege zebua horö’.—1 Ko. 15:9; 1 Ti. 1:15.

7. Hadia zinangea tatörö tödöda na itegu-tegu manö ita tödöda?

⁷ No ifabuʼu Amada si so ba zorugo wa hasambalö iʼefaʼö zalada na tafalalini gera-erada. (Si. 86:5) Tobali, na sindruhu-ndruhu taʼandrö waʼebolo dödönia ba horö si no tafalua, tatu faduhu dödöda wa hasambalö ifalua Yehowa niwaʼönia ba iʼefaʼö zalada.—Kol. 2:13.

8-9. Hewisa wolawada fangera-ngera wa tebai taʼomusoiʼö dödö Yehowa?

⁸ Omasi ita fefu ba wamalua fondrege zi sökhi ba wangai halöwö khö Yehowa. Hizaʼi, so zorasoi wa fefu nifaluara lö ibönö ba wangomusoiʼö tödönia. Imane talifusöda ira alawe sotöi Amanda, ”Si so ba wangera-ngeragu, moguna oya zinangea ufalua na omasido ubeʼe wondrege zi sökhi khö Yehowa. Daʼö mbörö wa asese ufalua zi töra moroi ba zi sagu khögu. Ba na tebai ufalua zi no uʼera-era, uwaʼö tödögu wa no afatö dödö Yehowa ubeʼe ba lö saʼae omuso dödönia khögu.”

⁹ Hewisa wolawada fangera-ngera wa tebai taʼomusoiʼö dödö Yehowa? Törö tödöu wa Yehowa andrö tenga Lowalangi sabeʼe. Lö irai iʼandrö khöda töra moroi ba zi tola tafalua. Iʼameʼegö tödö fefu nifaluada khönia, asala fondrege zi sökhi daʼö. Baero daʼö, angerönusi duma-duma niha si so ba Zura Niʼamoniʼö samosumange Yehowa soroi ba dödö. Duma-dumania Faulo. Si fao faʼowölö-ölö, iforege weʼamöi misa ba mbanua niha Keriso ba zi hauga fakhe. No ngafulu ribu kilometer lala nitörönia ba oya mbanua niha Keriso nifasindronia. Hizaʼi, me tebulö zalua khönia irege lö oya saʼae ginötö niʼogunaʼönia ba wanuriaigö, hadia daʼö geluahania wa lö saʼae omuso dödö Lowalangi khönia? Tenga. Lö tebulö ifalua Faulo hadia zi tola ifalua, ba ifahowuʼö ia Yehowa. (Hal. 28:​30, 31) Simane salua khö Waulo, tola manö göi tebulö zi tola tafalua khö Yehowa. Hizaʼi, sabölö tohude ninehegö Yehowa yaʼia daʼö ohitö dödöda ba wamosumange yaʼia. Datatutunö hadia manö nifalua Yehowa ba wangoromaʼö wa omuso dödönia khöda.

HEWISA WANGOROMAʼÖ YEHOWA WA OMUSO DÖDÖNIA KHÖDA?

10. Hewisa enaʼö tola ’tafondrondrongo’ me iwaʼö Yehowa wa omuso dödönia khöda? (Yohane 16:27)

¹⁰ Ibeʼe khöda Zura Niʼamoniʼö. Iʼalui lala Yehowa ba wangoromaʼö ba nono mbanuania wa iʼomasiʼö ba omuso dödönia khöra. Ba Zura Niʼamoniʼö, dua kali iwaʼö Yehowa khö Yesu wa iʼomasiʼö ba omuso dödönia khö Nononia andrö. (Mat. 3:17; 17:5) Hadia omasiʼö örongo wehede Yehowa me ifaduhuʼö wa omuso dödönia khömö? Lö fahuhuo khöda Yehowa moroi ba zorugo, hizaʼi iʼogunaʼö Daromalinia, Sura Niʼamoniʼö. Na tabaso wehede Yesu safönu faʼomasi khö ndra nifahaʼönia, no amaedola ”tafondrondrongo” wehede Yehowa khöda. (Baso Yohane 16:27.) Moʼahonoa Yesu ba woloʼö amuata Namania. Börö daʼö, na tabaso wehedenia khö ndra nifahaʼönia si lö faröi ba si lö moʼahonoa, tola takhalaigö wa no fehede Yehowa khöda daʼö.—Yoh. 15:​9, 15.

11. Na alua khöda gabula dödö, hadia daʼö geluahania wa lö saʼae omuso dödö Yehowa khöda? Tutunö. (Yakobo 1:12)

¹¹ Ibeʼe zoguna khöda. Omasi sibai Yehowa wanolo yaʼita, ihenaigö zoguna khöda. Itaria, itehegö Yehowa alua khöda gabula dödö, simane salua khö Yobi, niha satulö tödö. (Yob. 1:​8-11) Na alua khöda gabula dödö, tenga daʼö geluahania wa lö saʼae omuso dödö Yehowa khöda. Sindruhunia, daʼö ginötö khöda ba wangoromaʼö khö Yehowa wa taʼomasiʼö ba sindruhu-ndruhu tafaduhusi tödö ia. (Baso Yakobo 1:12.) Sagötö alua khöda gabula dödö, ba daʼö taʼila hawaʼebua waʼomasinia hegöi fanolo nibeʼenia enaʼö anau gölöda.

12. Hadia wamahaʼö nihalöda moroi ba zalua khö Dmitrii?

¹² Angeragö zalua khö dalifusöda ira matua si toröi ba Asia sotöi Dmitrii. Aheta ia ba halöwönia, ba lö isöndra halöwö ba zi hauga waŵa. Börö daʼö, ihalö gangetula ba wonönö ginötö niʼogunaʼönia ba wanuriaigö si tobali tandra wa ifaduhusi tödö Yehowa. No hauga waŵa numalö ginötö ba lö manö nisöndrania halöwönia. Lö ara aefa daʼö, göna ia fökhö sabölö-bölö irege tebai ifazawa ia moroi ba warate. Ibörögö iwaʼö tödönia wa tebai tobali ia foʼomo hegöi ama si sökhi ba nösi nomonia, ba ibörögö aombö dödönia alai lö saʼae omuso dödö Yehowa khönia. Hizaʼi, ba zi samuza inötö ba zi bongi, icetak ononia ba garate nösi ayati si so ba Yesaya 30:​15, ”Na lö miböhöli waʼafaduhu dödö ba lö mangiwa dödömi, hasambalö abölö ami.” Ibeʼe garate daʼö ba ngai warate bapania ba imane, ”E Pa, na fawuka gera-eramö, törö tödömö ayati daʼa e.” Aboto ba dödö Dmitrii wa moguna iʼandrö saohagölö khö Yehowa börö me lö tebulö iʼasogö zoguna ba nösi nomonia, ö niʼa, niʼonukha hegöi nahia waʼatoröi. Imane Dmitrii, ”Sinangea ufalua iadaʼa yaʼia daʼö uhonogö dödögu ba ufaduhusi tödö Lowalangigu.” Na alua khöu gabula dödö si fagölö, yafaduhu dödöu wa iʼameʼegö tödö ba itolo ndraʼugö Yehowa enaʼö anau gölöu.

13. Haniha niʼogunaʼö Yehowa ba wangoromaʼö wa omuso dödönia khöda, ba hewisa lalania?

¹³ Ibeʼe khöda ndra talifusöda. Iʼogunaʼö ndra talifusöda Yehowa ba wangoromaʼö wa omuso dödönia khöda. Duma-dumania, tola manö ifarou niha böʼö ba wameʼe khöda famarou dödö ba ginötö si tefaudu. Daʼö zalua khö dalifusöda ira alawe si toröi ba Asia me fawuka sibai gera-erania. Aheta ia ba halöwönia ba göna ia fökhö sabölö-bölö. Aefa daʼö, ifalua horö sebua foʼomonia irege aheta ia tobali satua sokubaloi. Imane talifusöda andrö, ”Lö uʼila hadia mbörö wa alua daʼa fefu. Uwaʼö tödögu wa alua daʼa börö me no ufalua zala ba lö saʼae omuso dödö Yehowa khögu.” Mangandrö dalifusöda andrö enaʼö ifaduhuʼö khönia Yehowa wa lö tebulö iʼomasiʼö ba omuso dödö Yehowa khönia. Hadia nifalua Yehowa? Imane talifusöda andrö, ”Fahuhuo khögu ndra talifusö satua sokubaloi ba lafasugi ba dödögu hawaʼebua waʼomasi Yehowa khögu.” Aefa daʼö, ifuli iʼandrö wanolo moroi khö Yehowa. ”Ba zi maʼökhö daʼö, utema zura moroi khö ndra talifusöda ba mbanua niha Keriso. Me ubaso wehedera si möi fondrara dödö, urasoi wa ifondrondrongo wangandrögu Yehowa.” Ba daʼa taʼila wa asese iʼogunaʼö niha böʼö Yehowa ba wangoromaʼö wa omuso dödönia ba nifaluada.—Si. 10:17.

14. Hadia nasa lala niʼogunaʼö Yehowa ba wangoromaʼö wa omuso dödönia khöda?

¹⁴ Iforomaʼö göi Yehowa wa omuso dödönia khöda yaʼia me ifarou dödö ndra talifusöda ba wameʼe khöda mene-mene ba ginötö moguna khöda daʼö. Duma-dumania, me abad siföföna, iʼogunaʼö Yehowa zinenge sotöi Faulo ba wanura 14 zura niʼehehaini khö ndra talifusönia si sara lala wamati. Ba zura daʼö, ibeʼe khöra Faulo mene-mene sabeʼe hizaʼi safönu faʼomasi. Hana wa ibeʼe Yehowa wanuturu lala khö Waulo ba wameʼe khöra mene-mene daʼö? Yehowa andrö Ama si sökhi, ba iʼotuʼö ’nono niʼomasiʼönia’. (Amd. 3:​11, 12) Börö daʼö, na tatema mene-mene si teʼodane-dane ba Zura Niʼamoniʼö, tenga daʼö geluahania wa no afatö dödö Yehowa khöda, hizaʼi daʼö dandra wa lö tebulö iʼomasiʼö ita Yehowa. (Heb. 12:6) Hadia nasa dandra sangoromaʼö wa omuso dödö Yehowa khöda?

TANDRA TANÖ BÖʼÖ WA OMUSO DÖDÖ YEHOWA KHÖDA

15. Haʼökhö ibeʼe Yehowa gehehania niʼamoniʼö, ba hana wa möi fangaʼaroʼö dödöda daʼö?

¹⁵ Ibeʼe Yehowa gehehania niʼamoniʼö ba niha sangomusoiʼö tödönia. (Mat. 12:18) Angeragö atö wanofu-nofu daʼa, ’Hadia no uforomaʼö mbua-bua geheha ba waʼaurigu sero maʼökhö?’ Hadia abölö öforomaʼö waʼebolo dödö iadaʼa moroi me lö niʼokhögömö faʼaboto ba dödö sanandrösa khö Yehowa? Sindruhunia, na lö tebulö ödouʼö wangoromaʼö mbua-bua geheha niʼamoniʼö, hasambalö itugu aboto ba dödömö wa omuso dödö Lowalangi khömö!—Faigi kotak ”Bua-Bua Geheha Yaʼia Daʼö . . .”

16. Haniha niʼogunaʼö Yehowa ba wanuriaigö turia somuso dödö, ba hewisa dödömö ba daʼö? (1 Tesalonika 2:4)

¹⁶ Ifaduhusi tödö Yehowa duria somuso dödö andre ba niha sangomusoiʼö tödönia. (Baso 1 Tesalonika 2:4.) Samösa dalifusöda ira alawe sotöi Jocelyn, itugu faduhu dödönia sanandrösa ba daʼö me itutunö duria somuso dödö ba niha böʼö. Samuza maʼökhö, maoso Jocelyn si fao faʼide-ide dödö. Imane, ”Lö faʼabölögu ba hulö lö hadöi guna waʼaurigu. Hizaʼi, me luo daʼö merintis ndraʼo, ba zi maʼökhö daʼö inötö weʼamöigu manuriaigö. Börö daʼö, ulau mangandrö ba möido manuriaigö.” Ba zihulö wongi daʼö, falukha Jocelyn khö Mary, sanemaʼö famahaʼö ba Zura Niʼamoniʼö. Hauga waŵa aefa daʼö, ifatunö Mary wa sindruhunia no hauga kali mangandrö ia khö Lowalangi fatua lö itoko mbawandruhö nomonia Jocelyn. Me ifuli itörö tödönia zalua andre, imane Jocelyn, ”Urasoi wa imane khögu Yehowa, ’Omuso dödögu khöu.’” Tatu manö, lö fefu niha omasi ira lafondrondrongo duria nifaʼemada. Hizaʼi, tola faduhu dödöda wa hasambalö omuso dödö Yehowa khöda na tabeʼe wondrege zi sökhi ba wamalua halöwö fanuriaigö.

17. Hadia wamahaʼö nihalömö moroi khö Vicky sanandrösa ba höli? (Sinunö 5:12)

¹⁷ Ihenaigö höli Yehowa ba wangefaʼö sala niha sangomusoiʼö tödönia. (1 Ti. 2:​5, 6) Hizaʼi, hewisa na tarasoi wa lö omuso dödö Yehowa khöda, hewaʼae no mamati ita ba höli ba no tebayagö ita idanö? Törö tödöu wa lö ero-ero tola tafaduhusi tödö hadia nirasoida. Ha Yehowa zi lö mamalö tafaduhusi tödö. Iʼameʼegö tödö niha samati ba höli, tobali ira niha satulö ba wamaiginia ba ifabuʼu wa ifahowuʼö ira. (Baso Zinunö 5:12; Rom. 3:26) Nehegö zalua khö dalifusöda ira alawe sotöi Vicky. Samuza inötö, ihaogö iʼangerönusi sanandrösa ba höli. Imane, ”Aboto ba dödögu wa no iʼotarai mböröta ebolo sibai dödö Yehowa khögu. . . . Hizaʼi, hulö umane khönia, ’Ambö ebua waʼomasimö khögu. Höli nibeʼe Nonomö lö tobönö ba wangefaʼö horögu.’” Me no iʼangerönusi mbuala höli andre, ibörögö irasoi wa iʼomasiʼö ia Yehowa. Tola göi tarasoi wa iʼomasiʼö ita Yehowa ba omuso dödönia khöda na taʼangerönusi sanandrösa ba höli.

18. Hadia zi faduhu dödöda na lö tebulö taʼomasiʼö Namada si so ba zorugo?

¹⁸ Hewaʼae no taforege wamalua fanuturu lala nitutunö ba artikel daʼa, hizaʼi itaria te tarasoi nasa waʼide-ide dödö ba faʼaombö dödö hadia omuso dödö Yehowa khöda mazui löʼö. Na alua daʼö, törö tödöu wa lö tebulö omuso dödö Yehowa ba ”niha sangomasiʼö yaʼia”. (Yak. 1:12) Börö daʼö, böi böhöli wangahatöʼö yaʼugö khö Yehowa ba nehegö hewisa wangoromaʼönia wa omuso dödönia khöu. Böi olifuʼö wa ”lö aröu [Yehowa] khöda zamösana”.—Hal. 17:27.