Omikanda Viokulilongesa Omukanda Wovilinga Omwenyo Wetu Woukilisitau
© 2024 Watch Tower Bible and Tract Society of Pennsylvania
2-8 YA TUNGONKHE
OLUMONO LUKAHI MONDAKA YA HUKU | OVIIMBO 79-81
Humba Enyina Enene Liomunkhima
Omutala Womulavi 2/2017 pefo 10 § 5
Otyilikutila Tyeyovo — “Otyiawa Tyimwe” Tyatunda ku Tate
5 Oñgeni tupondola okulekesa okuti tuhole enyina lia Jeova? Novituwa vietu. Jeova uhanda tukale tyasukuka. (Tanga 1 Petulu 1:15, 16.) Otyo tyilekesa okuti tuna okumufenda nokumutavela nomutima auho. Namphila tumoneswa ononkhumbi, tulinga ononkhono mbokutyinda omuenyo welikuata kumwe nomalongeso a Jeova. Tyina tutyinda omuenyo welikuata novitumino via Jeova, tuetela omunkhima enyina Liae. (Mat. 5:14-16) Tulekesa okuti ovitumino viae viaviuka iya Satanasi onkhembi. Onthue tuvakuankhali, tulinga oviponyo. Mahi tyina tuamalingi oviponyo, tulivela nokuyekapo okulinga ovipuka vipenyesisa enyina lia Jeova. — Ovii. 79:9.
Onotesitu mbo Mbimbiliya Mbahangununwa 3 §§ 4-5
Ova Loma 10:13 — “Ukalavandya Enyina lya Siovaa”
M’Ombimbiliya, onondaka ‘okukalavandya enyina lya Siovaa,’ kambupopi vala okunoñgonoka enyina liae nokulitumbula pokumufenda. (Oviimbo 116:12-14) Mahi tupu mbupopia okuyumba onthumbi mu Huku nokumwiita etukwateseko tyina pena tyimwe tuhanda ine tyetulemena. — Oviimbo 20:7; 99:6.
Enyina lya Huku ankho ku Sesusi Kilisitu liesukisa unene. Etyi alongesa ovalongwa etyi vena okupopia pokulikwambela, wehimbika ñgaa: “Tate yetu keulu, enyina liove lisukukiswe.” (Mateusi 6:9) Sesusi tupu wapopia okuti omwenyo wahapu, utei kokunoñgonoka Hekulu yenyina olio, nokumutavela, nokumuhumba. — Swau 17:3, 6, 26.
Olumono Lwa Huku
Perspicaz Vol. 2 pefo 145
Susee
Enyina lya Susee Liapopiwa Unene. Mokonda povana va Sakoo wapopiwa vali unene o Susee, otyo pamwe tyina papopiwa omihoko aviho vyo Isilayeli, apaende vala enyina lya Susee. (Ovii. 80:1) Na tyina pamwe papopiwa omihoko ekwii vyo Isilayeli, papopiwa vala enyina lya Susee. (Ovii. 78:67; Amo. 5:6, 15; 6:6) Tupu enyina lya Susee lipopiwa momaulo Ombimbiliya. Emonekelo Isekiyele amwene, omuhoko wa Susee wapewa onohika onombali. (Isek. 47:13) Imwe ponopundi mbepunda-umbo, oya Susee, ya ‘Siovaa Omo Eli.’ (Isek. 48:32, 35) Pokwapopia okuhonyekwa kwovanthu va Huku, Susee wapopiwa okuti omunene watyo wotyilongo tyimwe, Sundaa apopiwa okuti omunene watyo wotyilongo otyikwavo. (Isek. 37:15-26) Eulo Ombadiya apopia lilekesa okuti “eumbo lya Susee” nalio malikahanya “eumbo lya Isauu.” (Oba. 18) Ya Sakaliya wapopia okuti Siovaa makayovola “eumbo lya Susee.” (Sak. 10:6) Mo Isilayeli yokeulu, mwapopiwa omuhoko wa Susee, hawa Efalaii. — Ehol. 7:8.
Tya Susee okwapopiwa m’Eholololo 7:8, tyilekesa okuti eulo Sakoo apopile etyi ehungi kokunkhia, tupu lipopia o Isilayeli yokeulu. Naina ou ankho Wokupa Ononkhono Sakoo, Siovaa Huku, wava Sesusi Kilisitu Ngomunthita omuwa, aave omwenyo wae ayovole “onongi” mbae. (Swau 10:11-16) Sesusi tupu oe emanya liopevindi kwapumphama ondywo ya Huku yati umwe no Isilayeli yokeulu. (Efe. 2:20-22; 1 Pet. 2:4-6) Ya omunthita oo emanya liopevindi, ukahi na Huku Omukulami. — Swau 1:1-3; Ovil. 7:56; Hemb. 10:12; tyeeleka Ehim. 49:24, 25.
9-15 YA TUNGONKHE
OLUMONO LUKAHI MONDAKA YA HUKU | OVIIMBO 82-84
Hambukilwa Ovilinga Unavio
Omutala Womulavi 6/2016 pefo 8 §§ 2-3
Oityi Tulilongesila Koviila?
Ovanthu ankho vakala mo Jerusalei vatyiliya okutala ovityiyu viovimphiapia viatungilwa momalukaka onondyuo. Ovityiyu vimwe ankho vili Mondyuo ya Huku yatungwa na Salomau. Tupu, ovimphiapia ankho vitungila ovityiyu mondyuo ya Huku kese nima, ankho vivasa omphangu ikahi nawa omu ankho omailona avio apondola okukala tyapama.
Omuhoneki w’Oviimbo 84, umwe povana va Koraa ankho undapa mondyuo ya Huku osimanu ike monohanyi epandu, wamuene ovityiyu ovio mondyuo ya Huku. Ankho uhambukwa unene okutala ovimphiapia vikala omuvo auho mondyuo ya Jeova iya apopi okuti: “Ondyuo yove ongwa unene, Jeova ngombo yovita! Neivaluka unene ondyuo yove, nakala tyihena ononkhono mokonda nahanda okukala pepata liove. Alo umwe oviila vivasa omphangu mondyuo yove iya ovimphiapia vivasa ovityiyu opo vitekule omailona avio kombanda yondyuo yove, Jeova ngombo yovita, Hamba yange, Huku yange!” (Oviimbo 84:1-3) Okuti onthue kumwe novana vetu, tupanda okukala kumwe novanthu va Huku? — Oviimbo 26:8, 12.
Omutala Womulavi 15/7/2008 pefo 30 §§ 3-4
Pola Pokati, Kala Nehambu
Tyina omunthu akulupa, hamwe uvela, ketyivili vali okuundapa unene movilinga vya Siovaa. Ine una ovana ovapii, upondola okulitehelela okuti nomuvo vala wokulilongesa Ombimbiliya, nokwenda komaliongiyo utupwale mokonda uumanena vala movana vae. Okuti okusoka vala kovipuka wehevili okulinga, tyipondola okukutyika okutala evi uvila okulinga?
Omanima amwe konyima oku, omu Levita umwe ankho upeleya okukala notyipuka tyimwe tyehetei kwee. Ankho una elao liokuundapa mondywo ya Huku onosimanu onombali omanima atyo aeho. Mahi pahe ngwe ankho otyipuka ahanda okukala-mo. (Ovii. 84:1-3) Oityi tyemukatesileko okuhambukilwa etyi evila okulinga? Ngwe wanoñgonokele okuti okukala vala onthiki ike mepata liondywo ya Huku, elao limwe enene. (Ovii. 84:4, 5, 10) Naina noonthwe twahasokei vala kovipuka twehevili okulinga, mahi tuhambukilwei ovipuka tuvila okulinga.
Omutala Womulavi 1/2020 pefo 17 § 12
Ove Wakolela Unene ku Siovaa, Huku Yove!
12 Inkha uvela, hinangela okuti Siovaa wii atyiho ukahi nokulambela. Ngotyo, muita ekukuateseko okutala otyitateka tyove monkhalelo yaviuka. Konyima, tanga Ombimbiliya. Inkha utanga Ombimbiliya, movasi-mo onondaka ononyingi mba Siovaa mambukupameka. Haunene tala nawa ono velesikulu mbupopia okuti Siovaa wesuka unene no ove. Okulinga ngotyo, momono okuti Siovaa una okankhenda novaumbili vae ovakuatyili. — Ovii. 84:11.
Olumono Lwa Huku
Perspicaz Vol. 2 pefo 350
Omona Wehena He
Mokonda ankho tyapepuka unene okuhesuku novana vehena he, vehena ava veveyakulila, Siovaa wapopia onondaka “omona wehena he,” opo alekese ine ova Isilayeli vaviukisa umwe. Tyina ankho ova Isilayeli vena oupanga wapama na Huku, vatekula nawa omona wehena he. Mahi pahe tyina ankho valinga vala ovipuka ovivi, tyokutekula nawa ovana vehena he, vetyiyeka-po. (Ovii. 82:3; 94:6; Isa. 1:17, 23; Sele. 7:5-7; 22:3; Isek. 22:7; Sak. 7:9-11; Mal. 3:5) Vana ankho vatekula onya omona wehena he, Siovaa uvetela onkhano. (Epal. 27:19; Isa. 10:1, 2) Siovaa Mondaka yae wapopia-mo okuti oe Omuyovoli (Omih. 23:10, 11), Omukwatesiko (Ovii. 10:14) o He (Ovii. 68:5) yovana ovo. Siovaa uveamena (Epal. 10:17, 18), una okankhenda navo (Ose. 14:3), uveungumanesa (Ovii. 146:9) uvehupisa. — Sele. 49:11.
Tyimwe tyitwiimbukisa okuti tuvakilisitau votyotyili, omomu tutekulila ovahepe, naava vahiwapo no vohe. Tiaku wapopila ovakilisitau okuti: “Mwene efendelo liasukuka liehena onkhako komaiho a Huku yetu Tate yetu, olieli: okusuka nonosona, novahepe pononkhumbi mbavo, okwahakala nonkhako youye.” — Tia. 1:27.
16-22 YA TUNGONKHE
OLUMONO LUKAHI MONDAKA YA HUKU | OVIIMBO 85-87
Elikwambelo Litukwatesako Atukoleleya
Omutala Womulavi 15/5/2012 pefo 28 § 10
Okuti Ukahi Nokulekesa Omunkhima Wa Jeova?
10 Opo tulekese omunkhima wa Huku, tupu tuesukisa “okutualako okulikuambela.” (Loma 12:12) Tuesukisa okulikuambela ku Jeova etukuateseko okumuumbila monkhalelo etavela. Tupondola okumuita ospilitu sandu, nekolelo, nononkhono opo tuanye omakengelelo, nounongo ‘wokuundapesa nawa ondaka yotyili.’ (2 Tim. 2:15; Mat. 6:13; Luka 11:13; 17:5) Ngetyi omona etei ku he, nonthue tutei ku Tate yetu, Jeova. Inkha tumuita etukuateseko okumuumbila vali nawa, tupondola okukala nonthumbi yokuti metyilingi. Tuhasokei okuti omalikuambelo etu maanumanesa Jeova! Moluotyo, tuhivilikei Jeova nomalikuambelo, nokumupandula, nokuovola ehongolelo liae haunene tyina tuvasiwa novitateka, nokuita etukuateseko okumuumbila monkhalelo inkhimaneka enyina liae likola. — Ovii. 86:12; Tia. 1:5-7.
Omutala Womulavi 5/2023 pefo 13 §§ 17-18
Oñgeni Siovaa Akumbulula Omalikwambelo Etu?
17 Tanga Oviimbo 86:6, 7. Ndaviti ankho una onthumbi yokuti Siovaa utehelela omalikwambelo ae, eekumbulula. Noove upondola okukala nonthumbi ngooyo. Tyamoneka umwe nawa monthele ei, okuti Siovaa upondola okutwavela ounongo, nononkhono opo tutyivile okukoleleya. Ngwe upondola okutuma vana tulilongesa navo na vana vehelilongesa-le vetukwateseko movipuka twesukisa.
18 Tyotyili, Siovaa ha apeho pokukumbulula omalikwambelo etu matyeende umwe ngeetyi onthwe tusoka. Mahi otyipuka onthwe twii otyetyi: Ngwe makumbulula omalikwambelo etu, etwavela umwe etyi onthwe twesukisa momuvo watyo. Naina, twalako okulikwambela kwe nonthumbi yokuti mekukwatesako pehepano, ya mouye omupe “makafwisapo etyi ovanthu vatyo aveho vahanda”. — Ovii. 145:16.
Olumono Lwa Huku
Perspicaz Vol. 1 pefo 556 § 6
Omutima
Okufenda “Nomutima Auho.” Opo omutima uundape nawa, ovipuka aviho mokati kao vina okuundapa nawa, nomutima wotyimo tyokufenda Huku kaupondola okutepuka. Ndaviti welikwambelele, aiti okuti: “Waneka omutima wange ndyitile enyina liove.” Otyo tyilekesa okuti omutima womunthu upondola okulitepuka aukala vivali, movipuka ehole neevi atila owoma. (Ovii. 86:11) Omunthu watyo ngoo, upondola okukala “womutima nthele-mbali” — wahatokotele mokufenda Huku. (Ovii. 119:113; Ehol. 3:16) Omunthu upondola okukala ‘nomitima vivali’ (otyo okuti: ou omutima ou, ou omutima ou), mokuhetekela okuundapela ovahona vevali; omunthu okuti, oku upopia etyi mahi olingi otyikwavo. (1 Ehi. 12:33; Ovii. 12:2 okatoi.) Sesusi ovanthu vatyo ngoovo wevepopile umwe unene. — Mat. 15:7, 8.
23-29 YA TUNGONKHE
OLUMONO LUKAHI MONDAKA YA HUKU | OVIIMBO 88-89
Outumini wa Siovaa oo Waviuka Vali
Omutala Womulavi 6/2017 pefo 22 § 5
Aamena Outumini Wavilapo wa Jeova!
5 Tala ehunga ekuavo lilekesa omokonda yatyi Jeova omutumini waviuka. Uundapesa outumini monkhalelo yaviuka. Utupopila okuti: “Ame Jeova, Una uundapesa oluembia olunene, no nondunge nouviuki kombanda yoohi.” (Sele. 9:24) Jeova kahongolelwa novitumino viovanthu opo atokole etyi tyaviuka. Mahi, ovitumino viae apakako viaviuka. Jeova wavela ovanthu ovitumino iya vituka kouviuki wae. Omuhoneki wo no Salmu wati: “Otyipundi tyoutumini wae o tyouviuki.” Moluotyo, ovitumino aviho no nondonga nomatokolo a Jeova viaviuka. (Ovii. 89:14; 119:128) Satanasi wapopia okuti Jeova ha Mutumini ukahi nawa. Mahi, Satanasi ketyivili okutumina nawa ouye.
Omutala Womulavi 6/2017 pefo 23-24 §§ 10-11
Aamena Outumini Wavilapo wa Jeova!
10 Ovitumino via Jeova kavialemene. Mahi, vana vevitavela vayovoka nokukala nehambu. (2 Kol. 3:17) David wapopila Jeova okuti: “Ponthele yae pena omunkhima nouwa uhuvisa, ponthele yae pena ononkhono nehambu.” (1 Ehi. 16:7, 27) Omuhoneki umwe wo salmu utiwa Etã, wahoneka okuti: “Vena ehambu ovanthu vana vei oityi okukuilila nehambu. Jeova, ovo vatualako okuendela motyimimi tyove. Vahambukilwa enyina liove onthiki aiho, vankhimanekwa mokonda youviuki wove.” — Ovii. 89:15, 16.
11 Tyina tusokolola kokankhenda okanene ka Jeova, tyituavela onthumbi yokuti outumini wae wavilapo waviuka. Tulitehelela ngo muhoneki wo salmu wapopila Huku okuti: “Onthiki ike mondyuo yove hahe vali tyipona ovityita ekwi komphangu onkhuavo!” (Ovii. 84:10) Jeova wetutunga, iya wii nawa etyi tyitukalesa nehambu. Oe una okankhenda iya utuavela atyiho tuesukisa. Ovipuka aviho Jeova etuita tulinge vituetela ouwa. Namphila pamwe okulinga etyi etuita tyesukisa ononkhono, mahi apeho tukala nehambu tyina tutavela ku Jeova. — Tanga Isaiya 48:17.
Omutala Womulavi 15/10/2014 pefo 7 § 14
Kala Nekolelo Liapama Liokuti Ouhamba Maukafuisapo Ehando Lia Huku
14 Jeova una etyi alaele Ohamba David yo Isilayeli yokohale. Omulao oo, utiwa omphango Huku alinga na David. (Tanga 2 Samuwele 7:12, 16.) Jeova walaele okuti Mesiya matundu mombunga ya David. (Luka 1:30-33) Jeova ankho wapopia vali ovipuka ovikuavo konthele yonthuko ya Mesiya. Jeova wapopile okuti omona oo wa David ‘makala’ Ohamba Youhamba wa Mesiya. (Esek. 21:25-27) Ouhamba wa David maukatumina apeho mokonda Jesus, omona wa David, “makakalako apeho, iya otyipundi tyae tyoutumini matyikakalako ngekumbi.” (Ovii. 89:34-37) Tupondola okukala nonthumbi yokuti outumini wa Mesiya maukaetela ovanthu oviwa viahapu iya kamaukatumina omapita!
Olumono Lwa Huku
Achegue-se a Jeová pefo 281 §§ 4-5
“Ove Vala Omukwatyili”
4 Omu mutyipopila ovihonekwa vyo Hembeleu, “okukakatela,” tyituka mokankhenda omunthu alinga otyipuka akakatela, kayekeko atee avitula etyi ahandela otyipuka otyo. Okukakatela haukwatyili vala hamwe oti okuyumbwa onthumbi. Omunthu upondola okulinga evi vimuyumbisa onthumbi mokonda vala yavakwavo. Mahi okukakatela tyituka molwembia. Ondaka okuyumbwa onthumbi, pamwe ipopiwa vala nomovipuka viehena omwenyo. Mongeleka Omwiimbi wapopia ohanyi wati, ‘ombangi yotyili yo meulu’ mokonda kaikambe iya umwe apeho. (Ovii. 89:37) Mahi katyitavela okupopia ohanyi oti ina oukwatyili. Omokonda yatyi? Omokonda oukwatyili utuka konthyole, ngwe ovipuka viehena omwenyo vitupu onthyole.
5 Omu mutyipopila Ombimbiliya, ondaka oukwatyili ilikwata nokankhenda. Iyemba koupanga ukala pokati kovanthu vevali, umwe omukwatyili ku mukwavo. Hatyipuka-ko tyitahwa-tahwa vala ngomanyonda elunga atahwa-tahwa nomphepo. Mahi oukwatyili, olwembia olunene, lwati olo lwapama, olwo luna ononkhono mbokupitakana movitateka ovinene.
30 YA TUNGONKHE ATEE 6 YA KULINDI
OLUMONO LUKAHI MONDAKA YA HUKU | OVIIMBO 90-91
Yumba Onthumbi mu Siovaa, Momono Omwenyo Omule
Omutala Womulavi 3/2019 pefo 5 §§ 3-5
Etyi Ovanthu Vehole Okulinga Opo Vahankhie
Ovanongo ovanyingi vapopia okuti namphila ovanthu vekahi nokulinga atyiho opo vahakulupe, mahi no ngotyo ovanthu kamavetyivili okuyawisa komanima vakalako hono. Otyili tyokuti omuenyo wovanthu wapiluluka unene tunde motyita 19. Hono ovanthu vakalako vali ehimbwe mokonda younthate iya pahe vetyivila okuhakula omauvela omanyingi. Tupu vena ovihemba no nombasina. Mahi ovanongo vamwe vapopia okuti otyo katyilekesa okuti komuvo tukala nomuenyo kuayawiswa; mokonda ovanthu kamavayeke-po okukulupa nokunkhia.
Omanima 3.500 okualamba, omuhoneki umwe wo Mbimbiliya utiwa o Moisesi wapopile okuti: “Ononthiki mbomuenyo wetu mbuvasa vala pomanima omakwi epandu-vali. Iya vana vokuakola vakalako omanima omakwi etyinana. Mahi no ngotyo omanima atyo oo, eyula ononkhumbi novitateka. Omanima atyo kaasete okulamba iya konyima atuende nkholo.” (Oviimbo 90:10) Ovanthu valinga atyiho opo vayawise komuvo tukala nomuenyo. Mahi okuti vetyivila? Au. Omuenyo wetu utualako vala ngetyi ankho ukahi pomuvo wa Moisesi.
Mahi tyelikalela novanthu, mouye muna ovipuka ovinyingi vikalako omanima omanyingi. Mongeleka, osikisa yomelunga enkhuhu, nehuku liongonge yomelunga, vikalako omanima alamba po 200. Tupu omukwa upondola okukalako omanima omanyingi-nyingi. Tyina tueleka omuenyo wetu novipuka ovikuavo vikalako omanima omanyingi, pamwe tupondola okulipula okuti: ‘Okuti tuatyitwa opo tukaleko vala omanima 70 ine 80?’
Omutala Womulavi 1/2019 pefo 5, okakasa
Okuti Huku Una Enyina?
Ovanthu ovanyingi vehole okulipula okuti: Inkha ouye novipuka aviho vikahi-mo pena ou wevitunga, opo Huku watuka-pi? Hamwe nove welipulile-ale ngotyo.
Ovanongo mouye vehole okupopia okuti ouye uno ne evi vilimo vina onthyimbi. No nondaka ombo, Ombimbiliya ipopia okuti: “Ponthyimbi Huku watunga eulu nohi.” — Ehimbikilo 1:1.
Ouye kawelitungile vala awike. Kaweileko vala awike. Petupu otyipuka tyiya vala atyike. Inkha potete etyi ouye wehenetungwe ankho kutupu natyike, opo ñgeno hono kutupu ouye. Kuonthue tyipuiya okunoñgonoka nawa atyiho, mokonda penale etyi tyikahiko tunde tyakohale, tyahalingi onthele youye uno tyatunga ouye uno. Siovaa Huku una epondolo liahaelekwa, iya omunongo vali ku aveho, Oe Watunga atyiho ponthyimbi. — Swau 4:24.
Ombimbiliya ipopia konthele ya Huku okuti: “Puetyi nkhele onomphunda mbehenetungwe, ine etyi nkhele uhenelinge ohi, ngatyina ityitwa no nongembia, tunde komuvo uhapu alo komuvo uhapu, ove vala Huku.” (Oviimbo 90:2) Ngotyo, tunde tyakohale Huku oko ekahi-ale. “Ponthyimbi” oe watunga ouye uno novipuka aviho vilimo. — Eholololo 4:11.
Omutala Womulavi 6/2022 pefo 18 §§ 16-17
Oluembia Lutukuatesako Okufinda Owoma
16 Satanasi utyii okuti onthue tuhole omuenyo wetu. Mahi ngwe wapopia okuti ovanthu vapondola okuyekapo etyi vena opo vahupe, atee umwe vapondola okuyekapo okufenda Siovaa. (Som. 2:4, 5) Mahi otyipuka otyo Satanasi apopia omatutu. Mokonda Satanasi oe una ounongo wokueta ononkhia, oe ukuatelela mowoma tuna nononkhia opo etuyondye iya etuyapula ku Siovaa. (Hemb. 2:14, 15) Pamwe Satanasi uhongiliya ovanthu opo vapopie okuti ine tufenda Siovaa mavetuipa. Tupu pamwe tyina tuvela Satanasi omo aendelela, pahe onondotolo no vamwe mombunga yetu avetukuluminya tupakwe ohonde, otyipuka Siovaa eyele. Iya tupu pamwe vetukuluminya umwe vala opo tukahakulwe kovimbanda.
17 Namphila onthue tuhahande okunkhia, mahi tutyii okuti Siovaa kametuyekepo atee umwe tyina tuamankhi. (Tanga Ova Loma 8:37-39.) Tyina omunthu epanga lya Siovaa, atee umwe tyina ankhia Siovaa kemulimbwa, kwe ongatyina umwe vala ena omuenyo. (Luka 20:37, 38) Vokuankhia Siovaa mekevekondola vali komuenyo. (Som. 14:15) Siovaa unale etyii afeta opo tukakaleko nomuenyo uhapu (Swau 3:16) Tutyii okuti Siovaa utuhole unene iya ututekula nawa. Ngotyo tyina tuamahongwa, natyina tuavela unene, onthue tuyumba onthumbi mu Siovaa iya atumuiti ounongo. Otyo, otyo umwe Valérie nomulume wae valingile. — Ovii. 41:3.
Olumono Lwa Huku
Omutala Womulavi 5/2017 pefo 5
Okuti ove una oandyu imwe ikuyunga?
Ombimbiliya kaipopi okuti kese munthu una oandyu imuyunga. Jesus wati: “Liyungei opo muhatombe nawike povatutu ava [ovalongwa va Kristu], ame ndyimupopila okuti onoandyu mbae keulu apeho mbukahi nokutala otyipala tya Tate yange, uli keulu.” (Mateusi 18:10) Jesus katile kese munthu una oandyu imwe imuyunga, mahi wati onoandyu mbesuka na kese wike povalongwa vae. Moluotyo, ovafendi votyotyili kavalingi ovipuka tyawina avapake omuenyo wavo motyiponga opo onoandyu mba Huku mbuveyakulile.
Okuti otyo tyilekesa okuti onoandyu kambu-kuatesa-ko ovanthu? Au. (Oviimbo 91:11) Vamwe velitehelela okuti vehole okukuatesuako no noandyu, pamwe mbuvehongolela. Ongotyo tyelitehelele Kenneth wapopiwa konthyimbi yonthele ei. Onthue katupondola okutesa onkhango, hamwe etyi apopia otyili. Onombangi mba Jeova vehole okukuatesuako no noandyu movilinga viavo viokuivisa. Mokonda onoandyu kambumoneka komaiho ovanthu, onthue katupondola okupopia okuti Huku utuma onoandyu mbae opo mbukuatesako ovanthu mu kese tyilinga valinga. Mahi no ngotyo okupandula Huku muetyi ehole okutukuatesako katyapengele. — Ova Kolosu 3:15; Tiaku 1:17, 18.
7-13 YA KULINDI
OLUMONO LUKAHI MONDAKA YA HUKU | OVIIMBO 92-95
Okufenda Siovaa Otyo Omwenyo Ukahi Vali Nawa!
Omutala Womulavi 4/2018 pefo 28 § 5
Vakuendye, Okuti Mukahi Nokuovola Ovilinga Meongano Lya Huku?
5 Ehunga liakolela vali onthue tuna opo tuovole okukala novilinga meongano, omokonda tuhanda okupandula Jeova mokonda yohole ena nonthue iya novipuka etulingila. Omuhoneki umwe wono Salmu wati: “Otyiwa okupandula Jeova . . . Mokonda ove wanthyambukiswa, Jeova, novipuka walinga. Ame ndyikuililila nehambu mokonda yovilinga vio mankhanya ove.” (Ovii. 92:1, 4) Soka vala kovipuka aviho Jeova ekuavela: omuenyo, ekolelo, no Mbimbiliya, novakuatate iya nekevelelo liokukala nomuenyo uhapu Momphangu Yombembwa. Tyina wovola okukala novilinga meongano, una nokulekesa ku Jeova okuti wemupandula mokonda yovipuka ovio aviho iya otyo matyipameka vali oupanga wove nae.
Omutala Womulavi 11/2018 pefo 23 § 8
Olie Ukahi Nokuhongolela Omalusoke Ove?
8 Ngetyi tyilinga vohe voluembia, Jeova uhanda ovana vae vakale nomuenyo una ehambu. (Isa. 48:17, 18) Mokonda yotyo, utulongesa onondonga konthele yo ñgeni tuna okutyinda omuenyo wetu no ñgeni tuna okutekula vakuetu. Utukonga opo tutale ovipuka monkhalelo evitala, nokutyinda omuenyo welikuata netyi ahanda. Otyo katyituilika kovipuka oviwa, mahi tyitukuatesako okukala ovanongo, nokulinga omatokolo omawa. (Ovii. 92:5; Omih. 2:1-5; Isa. 55:9) Tupondola okutualako okulinga ovipuka tuhole, mahi no ngotyo otyo tulinga omatokola maetukalesa nehambu. (Ovii. 1:2, 3) Tyina tusoka nga Jeova, tupolako ouwa mononkhalelo ononyingi!
Omutala Womulavi 1/2020 pefo 19 § 18
Ove Wakolela Unene ku Siovaa, Huku Yove!
18 Ankho wakulupa, uhalimbueko okuti Siovaa nkhele uhanda okukuavela ovilinga. (Ovii. 92:12-15) Sesusi wetulongesa okuti Siovaa upanda etyi tumulingila, namphila pamwe tusoka okuti katyihi. (Luka 21:2-4) Ngotyo, linga vala etyi uvila. Ovipuka vimwe uvila okulinga, okupopila vakuenyi konthele ya Siovaa, nokuitilako vakuenyi momalikuambelo ove, nokuvelunda opo vatualeko okukala ovakuatyili ku Siovaa. Ove wakolela unene ku Siovaa, ha mokonda vala yetyi walinga, mahi omokonda umutavela nomutima auho. — 1 Kol. 3:5-9.
Olumono Lwa Huku
Achegue-se a Jeová pefo 176 § 18
‘Waya Kohi Ounongo wa Huku!’
18 Tala oñgeni omutumwa Paulu apopia ounongo wa Siovaa wehena ou weelekwa nao: “Waya kohi ouhona wa Huku, nounongo wae, nenoñgonoko liae liaya kohi! Apa paya onomphela mbae kapavahiwa-le, onondyila mbae kambuvahiwa!” (Ova Loma 11:33) M’Ongeleku, Paulu wahimbika onondaka ombo noletela “Ó”, ipopia okuhuva — nokuteketa. Ondaka y’Ongeleku apopia okuti “waya kohi,” tupu ipopia ‘etoto liaya kohi.’ Otyipuka otyo wetyipopia opo tyitukwateseko okunoñgonoka ounongo wa Siovaa. Tyina tusoka kounongo Siovaa ena, ongatyina tukahi nokutala etoto liaya unene kohi, liahamoneka apa liehulila! (Oviimbo 92:5) Okusoka kotyipuka otyo tyitukwatesako okuliola omutima.
14-20 YA KULINDI
OLUMONO LUKAHI MONDAKA YA HUKU | OVIIMBO 96-99
“Kalavandyei Oviwa Ovipe”!
Omutala Womulavi 1/3/2011 pefo 6 §§ 1-2
Onondaka Onongwa Oityi?
OVAKRISTAU vaivisa “onondaka onongwa Mbouhamba wa Huku” mokupopila vakuavo konthele yao, okuvehangununina okuti Ouhamba oo komutwe maukatumina ouye auho nouviuki. Anthi “onondaka onongwa” mo Mbimbiliya tupu mbuhangununwa mononkhalelo ononkhuavo. Mongeleka, tuvasamo “onondaka onongwa mbeyovo” (Oviimbo 96:2); “onondaka onongwa mba Huku” (Ova Loma 15:16); no “nondaka onongwa konthele ya Jesus Kristu.” — Maluku 1:1.
Ondaka onongwa muakutikinya otyili atyiho konthele yetyi Jesus apopia netyi ovalongwa vae vahoneka. Etyi ehenelonde keulu, Jesus wapopila ovalongwa vae okuti: “Endei, kalongesei ovanthu movilongo aviho opo vakale ovalongwa. Iya amuvembatisala menyina lia Tate, no lio Mona, no liospilitu sandu. Velongesei okutavela ovipuka aviho ame nemutuma.” (Mateusi 28:19, 20) Ngotyo, ovilinga vio Vakristau votyotyili, hakupopila vala vakuavo konthele Youhamba wa Huku, tupu vena okulinga ononkhono mbokulongesa ovanthu vakale ovalongwa.
Omutala Womulavi 1/9/2012 pefo 16 § 1
Oityi Matyikamoneka Monthiki Yekoyeso?
Ngetyi tyalekeswa polutalatu lukahi kokulio, ovanthu ovanyingi vasoka okuti Monthiki Yekoyeso, ovanthu ovanyingi mavakatualwa kotyipundi tya Huku opo vakoyeswe kese munthu okutalela kovipuka valingaile kohale—vamwe avapewa ondyambi yomuenyo keulu, ovakuavo avakamoneswa ononkhumbi onene mo ifelunu. Mahi, Ombimbiliya ilekesa okuti Onthiki Yekoyeso maiya okuyovola ovanthu kovivi. (Oviimbo 96:13) Huku waholovona Jesus, opo akale Omukoyesi makaeta vali ouviuki pala ovanthu aveho. — Tanga Isaiya 11:1-5; Ovilinga 17:31.
Omutala Womulavi 15/9/2012 pefo 17 §§ 18-19
Ombembwa Mokueenda Kuomanima Ovityita Ekwi — Nokomutwe!
18 Oupanga oo wombembua, wanyonua etyi Satanasi ahongiliya ovanthu okutyitukilapo outumini wa Jeova. Mahi, tunde mo 1914, Ouhamba wa Mesiya ukahi nokulipongiya opo ukakondoleko ombembwa newaneko. (Efe. 1:9, 10) Ovipuka ovinyingi oviwa nkhele “tuhenemone” hono, matukevimona mokueenda kuomanima Ovityita Ekwi Koutumini. Konyima makuya “onthyulilo” Youtumini wa Kristu Womanima Ovityita Ekwi. Oityi matyilandulako? Namphila Jesus apewa “outumini auho . . . keulu no pohi,” oe kahande okupunda omphangu ya Jeova. Nomutima weliola Jesus “mapakula ouhamba ku Huku, He yae.” Oe makaundapesa onkhalelo yae noutumini wae, “pala enkhimano lia Huku, Tate.” — (Mat. 28:18; Fili. 2:9-11)
19 Okupolelela opo, aveho mavatuminwa Nouhamba, mavakala tyehena onkhali. Mavalandula ongeleka ya Jesus, iya nomutima weliola mavetavela nehambu outumini wa Jeova. Mavakalekesa okuti vahanda umwe okutuminwa na Jeova, inkha valamba meheteko liahulililako. (Ehol. 20:7-10) Konyima yotyo, onomphuki ambuho, ovanthu nonoandyu, mavakaipawa. Oo maukakala omuvo wehambu enene! Ombunga aiho ya Jeova, keulu no pohi, maikemuhivilika. Iya Jeova makakala “ovipuka aviho kovanthu aveho.” — Tanga Oviimbo 99:1-3.
Olumono Lwa Huku
Perspicaz Vol. 1 pefo 427
Otyiimbo
Onondaka “otyiimbo otyipe” kambuvasiwa vala momukanda w’Oviimbo, mahi tupu mbuvahiwa momukanda wa Isaiya no w’omutumwa Swau. (Ovii. 33:3; 40:3; 96:1; 98:1; 144:9; 149:1; Isa. 42:10; Ehol. 5:9; 14:3) Apa onondaka “otyiimbo otyipe” mbapopiwa, okutala umwe nawa omu onondaka mbulilandulila, tutyimona okuti etyi tyikahi nokupopiwa-po outumini wa Siovaa. Otyo haunene tutyitalela kweetyi tyapopia omukanda Oviimbo 96:10, wati: “Siovaa wakala Ohamba.” Mokutala onondaka “otyiimbo otyipe,” mbupopia outumini wa Siovaa, neetyi maukalingila vana vakala keulu napano pohi. — Ovii. 96:11-13; 98:9; Isa. 42:10, 13.
21-27 YA KULINDI
OLUMONO LUKAHI MONDAKA YA HUKU | OVIIMBO 100-102
Tavela Olwembia Olunene lwa Siovaa
Omutala Womulavi 3/2023 pefo 12 §§ 18-19
Etyi Una Okulinga Umbatisalwe
18 Okuhole Siovaa, otyo otyipuka otyiwa una-tyo, tyesukisa vali unene. (Tanga Omihe 3:3-6.) Ine ove tyili-tyili uhole umwe Siovaa, matyikupe ononkhono otyivili okututumba tyina una ovitateka. Ombimbiliya yetyipopia-popia ehimbwe tyokuti Siovaa una olwembia olunene novanthu vae vemufenda. Otyo tyilekesa okuti ngwe ulikwata-po umwe novanthu vae, nii vala katutu keveyeke-po. (Ovii. 100:5) Ove watungwa otyifwika tya Huku. (Ehim. 1:26) Pahe oñgeni noove molekesa okuti tyili uhole umwe Huku?
19 Otyipuka tyo tete una okulinga, okukala omunthu wokupandula. (1 Tes. 5:18) Ononthiki ambuho lipula okuti: ‘Oityi Siovaa hono alinga tyalekesa okuti unthyole?’ Tyina pahe wametyimono etyi Siovaa ekulingila, omupandula melikwambelo, mahi otyitumbula umwe otyipuka tyatyo ekulingila. Omu apositolu Paulu wetyinoñgonokele okuti Siovaa umulingila tupu ovipuka oviwa omokonda umuhole. Noove wesukisa okuhinangela okuti, Siovaa ukulingila tupu ovipuka oviwa omokonda ukuhole. (Tanga Ova Ngalasiya 2:20.) Lipula okuti: ‘Okuti naame nahanda-vo ndyilinge evi mavilekesa okuti ndyimuhole ngeetyi ngwe enthyole? Okuhole Siovaa, otyo matyikukwatesako ohemuyeke-po tyina uhongiliywa ulinge evi viahaviukile, tupu otyivili okukoleleya tyina una ovitateka. Okuhole Siovaa matyikupe umwe okukakatela movipuka wapanga okulinga ononthiki ambuho, ovipuka vipameka oupanga wenyi na Huku, nokulinga ovipuka mavilekesa umwe okuti uhole Tate yove.
Omutala Womulavi 2/2023 pefo 17 § 10
‘Kalei Nonondunge, Kalei Tyipahi!’
10 Ovipuka umwe vinyona tuna okuliyunga, okunyana omalele nomunthu mwehelinepele nae, hamwe okumuliengelela, okunwa unene, okulia unene, okupopia onondaka mbuleva, okutala onovindiu nonofilimi mbulekesa ovanthu valwa, nokutala ovipuka vilingisisa omunthu okusoka kovinepo ovivi, novipuka ovikwavo vali. (Ovii. 101:3) Ondyale yetu Eliapu kalitai-ale, lili nokwovola apa litukwata linyone oupanga wetu na Siovaa. (1 Pet. 5:8) Ine katukala umwe tyavindya Satanasi lipondola okupaka momutwe wetu, no momutima wetu ombuto yonkhi, youmphulu, yelungavi, onyengo, nokulipakako, nokupakela vakwetu onkhongo. (Ngal. 5:19-21) Ponthyimbi pamwe ovipuka ovio vipondola umwe okukala momutima wove mahi otyo uhetyimono-ale okuti vipondola okunyona oupanga wove na Siovaa. Mahi ine tuliyekela-vio atuheviyepe umwe liwa-liwa, mavikulila umwe mokati ketu avitunyono ngeholi lilia ovilia. — Tia. 1:14, 15.
Omutala Womulavi 15/7/2011 pefo 16 §§ 7-8
Okuti Motavela Omalondolo Ayandyuluka A Jeova?
7 Oityi tuna okulinga opo tulityilike ovalongesi vomatutu? Onthue katupopi navo ine okuvekonga veye momaumbo etu. Tupu katutange omikanda viavo, netyi vahoneka mo Internete, katuvetale motelevisau, katupopi konthele yetyi vahoneka mo Internete. Oityi tuatokolela okulityilika ovanthu ovo? Tete kuaviho, omokonda tuhole “Huku yotyili.” Moluotyo, katuhande okutehelela omalongeso omatutu ehelikuatele notyili tyo Ndaka ya Huku. (Ovii. 31:5; Swau 17:17) Tupu, tuhole eongano Jeova aundapesa pala okutulongesa otyili otyiwa unene. Eongano lia Jeova olio lietulongesa enyina lia Jeova netyi lihangununa, nevangelo liae konthele yoohi, netyi tyipita nonthue tyina tunkhia, nekevelelo lietutilo. Ove uhinangela ehambu wakala nalio etyi tete weiva otyili otyo novikuavo vali? Ngotyo, uhayeke ounkhembi wovalongesi omatutu ukuhongiliye okutyitukilapo eongano liekulongesa otyili otyo. — Swau 6:66-69.
8 Namphila ovalongesi vomatutu vapopia ovipuka ovinyingi, kamatuvelandula! Tutupu ehunga liokutehelela ovanthu vekahi ngo nonyombo mbuhena omeva. Vana vevetehelela, mavakasoya. Onthue tuatokola okukala ovakuatyili ku Jeova neongano liae. Eongano eli kalinetusoyese naluike, apeho lituavela omeva omanyingi asukuka otyili Tyondaka ya Huku. — Isa. 55:1-3; Mat. 24:45-47.
Olumono Lwa Huku
Perspicaz Vol. 2 pefo 624
Epato Liomelunga
Epato liomelunga tyina liamekuta umwe nawa, linthanana aliende pohika imwe likakale alike, tyina liamehiki oko liliyongamena-po, okulivasa uti vala hamwe emanya engonga. Otyo likala umwe ngootyo pamwe onoola ononyingi. Otyo tyipopia umwe nawa etyi omwiimbi nae akalele etyi eli movitateka, watile: “Ndyikuva-kuva vala ngepato liomelunga lili moluhandya.” (Ovii. 102:6) Ondaka “oluhandya”, yapopiwa apa, kaipopi oluhandya lwahakala ovanthu, mahi ipopia ohika ikala kokule naapa pakala ovanthu, ngomoviteta. Pena omuvo umwe omapato omelunga akakala moviteta vyo ko Solundau. Ko Isilayeli kuvahiwa onotipu ononthatu mbomapato oo omelunga. Haunene avahiwako vali, omapato omelunga omangonga (Pelecanus onocrotalus); omapato omelunga aunda-unda (Pelecanus crispus) nomapato omelunga omanthwima, (Pelecanus rufescens) mahi kaakakele.
Epato liomelunga lityihole tyokukala pomphangu yahakala ovanthu. Ngako litungila otyiiyu tyalio, alitekulila-ko omailona alio, kelunga likalia vala. Mokonda otyiila otyo tyityihole tyokukala ponomphangu mbahakala ovanthu, otyo Ombimbiliya ityipopila ngotyilekeso tyehanyauno. Poviila Isaiya apopia okuti mavikakala mepunda-umbo lyo Endoo tyina liamahanywapo, natyo opotyili. (Isa. 34:11) Pala okupopia ehanyauno liovanthu vakala motyilongo tyo Ninive, Sofoniya waulile okuti epato liomelunga malikakala motyilongo otyo. — Sof. 2:13, 14.
28 YA KULINDI ATEE 3 YA KUHUHU
OLUMONO LUKAHI MONDAKA YA HUKU | OVIIMBO 103-104
Ngwe Utyii Okuti “Tumbuma Yeheke”
Omutala Womulavi 7/2023 pefo 21 § 5
Hetekela Siovaa — Pola Pokati
5 Siovaa walinga tupu omunthu wapola pokati, omokonda una okankhenda, ulikondola koututu. Apa tutyimonena umwe okuti Siovaa ulikondola koututu, otyetyi alingile pweetyi ehungi kokuhanya-ko ovanthu onondingavivi vomo Sondoma. Siovaa watumine onoandyu mbae mbukapopile ondingaviwa Lote, ataulile kohika yonomphunda. Lote atili owoma okutaulila-ko. Apopila Siovaa ati, hahe ame no vomeumbo liange tutaulile ko Sowale. O Sowale ankho epunda-umbo limwe etutu vala, nalio Siovaa ankho wapanga okulihanya-ko. Siovaa ankho upondola okupopila Lote ati, linga vala etyi ame napopia kwapwa. Mahi hatyoko alingile, wahulile umwe vala kwooyo yapopia Lote, epunda-umbo ehelihanye-po. (Ehim. 19:18-22) Etyi pakala konyima oku, Siovaa walingile okankhenda ovanthu vomo Ninive. Watumine omuuli Sona evepopile okuti epunda-umbo lyo Ninive malihanywa-po, novanthu vatyo valinga ovivi. Mahi etyi vomo Ninive velivela, Siovaa eveetehila-mo onkhenda, epunda-umbo ehelihanye-po vali. — Sona 3:1, 10; 4:10, 11.
Omutala Womulavi 9/2023 pefo 6-7 §§ 16-18
Yumba Onthumbi mu Siovaa Nga Sasau
16 Namphila akondyele novitateka ovinyingi kombanda yeetyi alingile, mahi no ngootyo kayekele-po okwovola okulinga etyi Siovaa ahanda. Noonthwe ine tuna etyi twalinga tyapenga pamwe atuviyulwa umwe, oo hamwe ovilinga ankho tulinga atuvipolwa, twahayekei-po okulingila Siovaa. Wahalimbweko okuti, Siovaa ketuyeke-po. (Ovii. 103:8-10) Namphila pamwe tupengesa umwe, mahi no ngootyo Siovaa ketuyekepo-ale ngeetyi ahayekele-po Sasau.
17 Tala etyi tyalingile omukwendye umwe utiwa o Michael, mwene ankho uli umwe vala nokulinga nawa ovilinga vya Siovaa. Ankho omukwatesiko wovakulu vewaneno tupu omukokoli-ndyila. Mahi etyi pakala, alingi otyipuka tyimwe tyapenga atyimupolesa umwe ovilinga mewaneno. Ngwe wati: “Mwene ankho ovilinga vya Siovaa vili umwe nokundyenda nawa, ndyikati vala ñgana, nalinga umwe ngatyina uti naliata motyilindo. Ame ankho ndyityii umwe okuti Siovaa kamandyeke-po. Mahi ankho ndyisoka ine mandyityivili vali okukala noupanga na Siovaa ngou nali nao, nokulinga vali ovilinga mewaneno, novipuka ovikwavo ankho ndyilinga-le.”
18 Michael kasoyele, ngwe wati: “Nelipakele mweevi mavinkhwatesako opo ndyikale vali noupanga na Siovaa, okulilongesa nokusoka kweetyi natanga, nokumupopila atyiho tyili komutima wange melikwambelo.” Etyi pakala, Michael akala vali novilinga ali-ale navio mewaneno. Pahe omukulu wewaneno tupu omukokoli-ndyila. Wapopia wati: “Otyipuka nakwatesiwako, napamekwa, haunene umwe novakulu vewaneno, tyankhwatesako umwe andyityimono okuti Siovaa nkhele unthyole. Pahe ndyili vali nokulingila Siovaa mewaneno nomutima upumphi. Netyimona okuti naina Siovaa maevela aveho velivela umwe tyotyotyili.” Noonthwe tuyumbei-ko onthumbi, tyina twalinga etyi tyapenga atulikwatehila otyivi twalinga atwehetyiwa ne vali, atuyumbu vala onthumbi mu Siovaa, ngwe metuyambe, kametuyeke-po. — Ovii. 86:5; Omih. 28:13.
Omutala Womulavi 5/2023 pefo 26 § 2
Upondola Okutyivila Okulinga Etyi Wapanga
2 Ine pehepano ñgana una tyimwe wapanga mahi kuna nokutyivila, wahasoye. Pamwe na tyina otyipuka tyatyo wapanga otyitutu vala, pala utyivile okutyilinga pakala umwe ononthiki. Tyahanda umwe okulikwatesila. Nootyo una-tyo-ale komutima tyokuhanda okulinga etyi wapanga, tyilekesa okuti oupanga wove na Siovaa uuhole, uhanda umwe okumupa etyi tyikahi vali nawa. Siovaa ina upandula-le unene etyi ukahi nokulikwatesila, mokonda ngwe kekwiiti-ale etyi wehevili okumupa. (Ovii. 103:14; Mik. 6:8.) Otyo tyahandela umwe upange ovipuka movili okulinga. Tyina pahe wamapange tyimwe, oityi una okulinga opo utyivile okutyilinga? Pahe matulilongesa ovipuka vimwe vipondola okukukwatesako.
Olumono Lwa Huku
Achegue-se a Jeová pefo 55 § 18
Ounongo Wokutunga ovipuka — “Wokwalinga Eulu Nohi”
18 Ounongo wa Siovaa wokutunga ovipuka utulongesa-tyi? Ovipuka Huku atunga, vituhuvisa. Omwiimbi umwe wapopile okuti: “Siovaa, ovilinga viove kavilifwe pano! . . . Ohi yeyula ovilinga viove.” (Oviimbo 104:24) Otyo otyili! Ovanthu vokwatanga unene, vapopia okuti vanoñgonoka umwe ovipuka ovinyingi-nyingi vina omwenyo; mahi nkhele nii vala kavenenoñgonoke ovipuka aviho vina omwenyo kombanda yohi. Ovanthu vokutunga ovipuka vena apa vehikila. Mahi Siovaa welikalela, ounongo ena wokuhinda ovipuka nokuvitunga, utupu apa uhikila — kaupu.