1 Petero

2 E TENANA, e kopae rava atu i te akamoupuku, e te au pikikaa ravarai, e te tapikipiki, e te vareae, e te au tuatua kikino katoa ra,

2 Kia kaki tikai kotou mei te tamariki anau ou, i te u iro koreia ra, i te tuatua, kia pakari kotou i te reira;

3 Mei te mea e kua tongi kotou i te takinga-meitaki o te Atu.

4 Ko kotou oki, i te aere anga mai kiaia i te toka ora ra, i kopae mouia ra oki e te tangata, i akonoia ra e te Atua, e te meitaki maata,

5 Kua patu katoaia kotou, i te toka ora ra, ei are vaerua, ei kau taunga tapu, ei apai i te atinga vaerua, e tau i te Atua ia Iesu Mesia.

6 Tei roto oki i te tuatua i tataia ra e, “I na, te akamou nei au i tetai toka tiavā i Ziona, e toka akonoia, e te meitaki maata; e ko te irinaki i te reira, kare rava ïa e akama.”

7 E teianei, ia kotou i te aronga i akarongo ra, e meitaki maata ïa tona; kareka i te aronga akarongo kore ra, “ko te toka i akarukeia e te aronga patu are ra, ko tei akariroia ei toka tiavā;”

8 E “ei toka tukiaanga, e ei mato turorianga,” i te aronga i turori i te tuatua no te akarongo kore; i akonoia oki ratou no te reira.

9 E uki ikiia ra kotou, e kau taunga ariki, e iti-tangata tapu, e aronga okoia; kia akakite ua kotou i tona meitaki, to tei kapiki ia kotou i to roto i te poiri, kia tae ki tona mārama umereia ra:

10 Ko kotou, kare te tangata no te Atua i muatangana, i teianei ra e tangata ïa no te Atua; ko tei kore i aroaia mai i muatangana, i teianei ra kua aroaia mai ïa.

11 E aku au akaperepere e, te ako atu nei au ia kotou, i te tangata ke, e te tuitarere, auraka e akatika i to te kopapa nei au anoano, ko tei tamaki mai ïa i te vaerua;

12 Kia meitaki ta kotou tuatua i rotopu i te au etene: ta ratou oki i akakino mai ia kotou, mei te mea e aronga rave tuatua kino, kia akara ra ratou i ta kotou tuatua meitaki, kia akameitaki ratou i te Atua i te rā e rokoia mai ei ra.

13 E kauraro i te au taoonga katoa o te tangata i te Atu ra; i te ariki ra ei runga rava atu ïa;

14 E te au tutara ra, ei aronga ungaia mai e ia ei tutaki atu i te aronga i rave i te kino ra, e ei akameitaki i te aronga i rave i te meitaki ra.

15 Ko to te Atua ïa anoano, kia mopani kotou i te vaa o te kite kore o te tangata neneva ra i ta kotou tuatua meitaki.

16 Ei aronga rangatira kotou, auraka ra taua rangatira ra e akariroia ei tapoki tuatua kino, ei tavini ra kotou no te Atua.

17 E akangateitei atu i te tangata ravarai. E aroa atu i te au taeake. Ka mataku i te Atua. Ka akateitei i te Ariki.

18 E te au tavini ra, e kauraro marie i to kotou aronga pu tikai ra ma te mataku, eiaa i te pu meitaki anake ra e te maru, i te aronga maru kore katoa ra.

19 Ko te mea meitaki oki te reira, kia akakoromaki te tangata i te aue no te mate tika kore, no te akava-ngakau i te Atua.

20 Kia pāpāia ra kotou i ta kotou uaorai ara, ka akakoromaki ei kotou, eaa ua to reira akameitaki-anga? kia mate ra kotou ma te akono meitaki, ka akakoromaki ei kotou, e mea meitaki ïa i te Atua.

21 I kapikiiaʼi oki kotou; i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae:

22 “I tei kore roa i rave i te ara, kare ua e pikikaa i kitea i tona vaa:

23 Ko tei kore i akakino atu, kia akakinoia mai aia ra; e kia mate aia ra, kare aia i tuatua tutaki atu; kua tuku ra iaia uaorai kiaia nona te manako tika ra:

24 Ko tei maranga iaia uaorai ta tatou ara i tona uaorai kopapa ki runga i te satauro, kia akono tatou, ko tei matara mai i te ara ra, i te tuatua-tika: “no tona oki karavarava i oraʼi” kotou.

25 Mei te mamoe i aere ke ra oki kotou, kua oki maira i teianei ki te Tiaki, ki te Episekopo, o to kotou au vaerua.