Пристас зор, кай амарэ молитвы тэ авэн май лашэ

1. Со о Иегова ԥэнэн пэстирэ служытелёнэнди? (Диқэн кадяжэ и картинка.)

КАСТЭ амэ можэм тэ взвисавас пала помощь и совето? Атвето пэ када вопросо амэ ӷанас — амэ можэм тэ взвисавас каринг о Иегова. Во екжэно амэнди пала када ԥэнэн. Во камэл, кай лэстирэ служытеля тэ мангэнпэ часто. Андэ Библия дажэ ԥэнэнпэ: «На парашэн тэ мангэнпэ» (1 Фес. 5:17). Амэ можэм свободно тэ мангаспэ лэсти и тэ родас лэско руковоцтво, саво поможый амэнди андэ всаворэ ситуацыи андэ жызня (Прит. 3:5, 6). О Иегова — фартэ щедро Дэл. Важ када амэ можэм лэсти тэ мангаспэ андэ любо время.

2. Со амэ роздиқаса андэ кадэя статья?

² Амэ фартэ цэнисарас и возможность тэ мангаспэ. Но дэкала найвушэро тэ виарақас и время пэ када, важ кода кай амэндэ всаворэндэ фартэ бут дила. Кадяжэ, возможно, амэ диқас, кай варисо трэбуй тэ стерас, кай амарэ молитвы тэ авэн инке май лашэ. Бут советоря пала када амэ можэм тэ виарақас андэ Библия. Андэ кадэя статья амэ роздиқаса, сар лэ Иисусоско примеро поможыя амэнди тэ витидас и время, кай тэ мангаспэ. Кадяжэ амэ роздиқаса панч важни маменторя, пала со амэ можэм тэ мангаспэ, кай амарэ молитвы тэ авэн май лашэ.

О ИИСУСО ВИТИДЭЛАС И ВРЕМЯ ВАЖ И МОЛИТВА

3. Со о Иисусо ӷанэнас пала молитва?

³ О Иисусо ӷанэнас, кай лэ Иеговасти фартэ куч и молитвы, савэ ԥэнэн лэстирэ служытеля. Англа кода, сар тэ авэл о Иисусо пэ ԥув, во диқэлас, сар лэско Дад атвечал пэ молитвы. Например, о Иисусо сас рядом лэ Иеговаса, кала во атвечал пэ молитва ла Аннати, лэ Давидости, лэ Ильясти и бутэ служытелёнэнди, савэ лэс кандэнас (1 Сам. 1:10, 11, 20; 1 Цар. 19:4—6; Пс. 32:5). Важ када о Иисусо сытярэлас пэстирэ учениконэн, кай вонэ тэ мангэнпэ часто и тэ патян, кай о Иегова дэла атвето пэ лэндирэ молитвы (Матф. 7:7—11).

4. Сости амэ сытювас анда лэ Иисусоско примеро пала молитва?

⁴ О Иисусо подя примеро лэ учениконэнди, сар трэбуй тэ мангэнпэ. Кала о Иисусо служыяс пэ ԥув, во часто обратияспэ кай о Иегова андэ молитва. Пэ када во трэбуй сас тэ витидэл время, важ кода кай паша лэстэ всегда сас мануша (Мар. 6:31, 45, 46). О Иисусо ущелас рано тэсара, кай тэ мангэлпэ екжэно. Еқвар, англа кода, сар тэ прилэл важно ришэния, во дя дума лэ Иеговаса андэ молитва вся и рят (Луки 6:12, 13). Англа пэстири смэрть, и рят, во упалэ и упалэ мангэласпэ пэстирэ Дадэсти, важ кода кай пашолас само ԥари время андэ лэстири служэния пэ ԥув (Матф. 26:39, 42, 44).

5. Сар амэ можэм тэ сытювас кай о Иисусо?

⁵ Лэ Иисусоско примеро сытярэл амэн тэ витидас и время важ и молитва, скати бы дила амэндэ тэ на авэл. Амэ заранее можэм тэ погиндосарас и тэ запистросарас, кала када тэ терас. Например, тэ ущяс май рано или тэ пэрас тэ совас набут май позно. Кадя амэ сыкаваса лэ Иеговасти, кай цэнисарас лэско подарко. Кала и ԥэй, савя ақарэн Линн, поля, пэскати дэ куч и возможность тэ мангэлпэ, када ла фартэ ля лэ одестар. Вой ԥэнэн: «Кала мэ уӷанглэм, кай моӷу андэ любо время тэ дав дума лэ Иеговаса, мэ полэм, кай во можэт тэ авэл мэрно пашутно друӷо. Тоди мэ закамлэм, кай мэрнэ молитвы тэ авэн май лашэ». И бут андар амэндэ када тожэ чуствуют. Важ када давайте роздиқаса, пала со амэ можэм тэ мангаспэ. Подаса дума пала панч важни маменторя.

ПАНЧ ВАЖНИ МАМЕНТОРЯ, ПАЛА СО АМЭ МОЖЭМ ТЭ МАНГАСПЭ

6. Сар ԥэнэнпэ андэ Откровение 4:10, 11, со прижал лэ Иеговасти?

⁶ Хвалин лэ Иеговас. О апостало Иоано андэ видения додиқля, кай по нэбо 24 царёря хвалин лэ Дэвлэс. Вонэ ԥэнэнас лэ Иеговасти: «Достойно [ту] тэ прилэс слава и честь». (Проадинон Откровение 4:10, 11.) Кай и верни анӷелоря тожэ исин бут причины, васо тэ хвалин лэ Иеговас. Вонэ жувэн лэса по нэбо и важ када лэс фартэ драго ӷанэн. Вонэ диқэн, со терэл о Иегова и када побудий лэн тэ хвалин лэс (Иов 38:4—7).

7. Пала со амэ можэм тэ хвалисарас лэ Иеговас?

⁷ Амэ тожэ андэ пэстирэ молитвы трэбуй тэ хвалисарас лэ Иеговас. Например, амэ можэм лэсти тэ ԥэнас, васо лэс любисарас и со амэнди чалёл андэр лэстэ. Кала ту адинос или изучаеш и Библия, старысав тэ шос сама пэ лэ Иеговастирэ качестворя, особено пэ кодэла, савэ тути чалён (Иов 37:23; Рим. 11:33). Тоди росԥэн лэ Иеговасти, со тутэ по ди. Кадяжэ амэ можэм тэ хвалисарас лэ Иеговас, важ кода кай во дэл зор амэнди, амарэ ԥралэнди и ԥэянди. Во постояно заботийпэ и фэрий амэн (1 Сам. 1:27; 2:1, 2).

8. Пала со можно тэ блаӷодарисарас лэ Иеговас? (1 Фессалоникийцам 5:18).

⁸ Блаӷодарин лэ Иеговас. Амэндэ исин бут причины, васо тэ блаӷодарисарас лэ Иеговас. (Проадинон 1 Фессалоникийцам 5:18.) Давайте ласа тэ ԥэнас лэсти наис пала лашымос, саво амэндэ исин. Важ кода кай всаворэ лашэ и совершэни подаркоря лэстар (Иак. 1:17). Например, амэ можэм тэ блаӷодарисарас лэс важ о шукаримос, саво исин пэ ԥув, важ вся, со во создал. Кадяжэ лэсти можно тэ ԥэнас наис важ и жызня, ери, друӷоря и важ и надежда. Ай инке, кай во домэкля тэ ашас лэстирэ пашутнэ друӷоря.

9. Васо трэбуй тэ пристас о зор, кай тэ авас блаӷодарни лэ Иеговасти?

⁹ Трэбуй тэ гиндосарас пала кода, васо амэ лично блаӷодарни лэ Иеговасти. Возможно, пэ када трэбуй тэ пристас о зор. Андэ люма и мануша часто гиндон кати пала кода, со вонэ моӷут тэ получин. Бутэнди дажэ и по гиндо на авэл, кай тэ блаӷодарин лэ Дэвлэс пала кода, со ужэ исин. Если амэ пэрэласа кацавэ гиндоря, тоди амэ лэ Дэвлэстар ласа кати варисо тэ мангас. Кай кацаво тэ на авэл, трэбуй тэ пристас о зор, кай тэ авас блаӷодарни лэ Иеговасти пала вся, со во важ амэндэ терэл (Луки 6:45).

10. Сар кода, кай и ԥэй сас блаӷодарно, поможысардя лати тэ пэрэандярэл о ԥаримос? (Диқэн кадяжэ и картинка.)

¹⁰ Кала о мануш блаӷодарно, лэсти май вушэро тэ пэрэандярэл о ԥаримос. Акэ со сас еқа ԥьяса, савя ақарэн Кюнг-Сукb. Латэ андэ лёхки арақлэ найлащи дук. Вой ԥэнэн: «О насвалимос халя ман зорэстар. Манди здэласпэ, кай мэ хасардэм вся... и мандэ сас бари дар». Со поможысардя лати тэ виритярэл о ԥаримос? Кажно вэчэро, англа кода, сар тэ пэрэл тэ совэл, и ԥэй ваздэласпэ пэ крыша и вслух ԥэнэнас лэ Дэвлэсти наис пала панч блаӷословении, савэ латэ сас андо дес. Кадя вой ашэлас май спокойно и камэлас тэ ԥэнэн лэ Иеговасти, сар дэ фартэ вой лэс любий. И ԥэй пар пэстэ поля, сар о Иегова поможый лэстирэ служытелёнэнди тэ пэрэандярэн о ԥаримос. Вой диқля, кай о лашымос лэ Дэвлэстар андэ амари жызня май бут, чем и трудности. Сар и кадэла ԥьятэ, амэндэ исин бут васо тэ авас блаӷодарни лэ Дэвлэсти, дажэ если и ԥари время цырдэлпэ фартэ долӷо. Если амэ блаӷодарисарас лэ Иеговас андэ молитва, када поможыя амэнди тэ виритярас о ԥаримос и амэндэ авэла спокойство по ди.

11. Васо, кала о Иисусо жыля по нэбо, лэ учениконэнди трэбуй сас смилость?

¹¹ Мангэн лэ Иеговас тэ поможый тумэнди тэ авэн смили андэ служэния. Англа кода, сар о Иисусо тэ жал по нэбо, во ԥэндя пэстирэ учениконэнди, кай вонэ тэ росԥэнэн пала лэстэ «андо Иерусалимо, па вся Иудея и Сама́рия и па вся ԥув» (Дила 1:8; Луки 24:46—48). Потом, посли када прожыля набут время и иудейски барэдэра андэ вера, астардэ лэ Петрос и лэ Иоанос и андэ́ лэн андо Ӷлавно иудейско сындо. Вонэ приԥэнэнас, кай кадэла верни лэ Дэвлэстирэ служытеля тэ парашэн тэ проповедуют и дажэ ԥэнэнас, кай умарэна лэн (Дила 4:18, 21). Сар андярдэ пэс о Пётро и о Иоано?

12. Со стердэ и ученикоря, сар ԥэнэнпэ андэ Дила 4:29, 31?

¹² О Пётро и о Иоано ԥэндэ лэ манушэнди, савэ пэр лэндэ тасавэнас: «Диқэн екжэнэ, хэба правильно англа Дэл тэ ашунас тумэн, ай най лэ Дэвлэс? Важ када амэ нэ можэм тэ ашас мулком и тэ на росԥэнас пала кода, со диқлям и ашундям» (Дила 4:19, 20). Кала лэ Петрос и лэ Иоанос одмэклэ, и ученикоря линэ тэ мангэн лэ Иеговас, кай во лэнди тэ поможый тэ терэн кода, со во камэл. Вонэ мангэнаспэ: «Поможысар тирэ рабонэнди смило тэ росԥэнэн о алав тутар». О Иегова дя атвето пэ лэндири одяли молитва. (Проадинон Дила 4:29, 31.)

13. Сости амэ сытювас анда кода, сар андярэлас пэс о Джино Хёко?

¹³ Амэ, сар кодэла ученикоря, тожэ можэм тэ авас смили и тэ росԥэнас важ о Дэл дажэ тоди, кала и власти стон запрето. Акэ примеро лэ ԥралэско, савэс ақарэн Джино Хёко. Лэс бэшардэ андо баруно, важ кода кай во на залэлас никастири риг андэ политика. Котэ лэсти динэсас задания тэ розындярэл о хамос лэ барунаренди, савэ бэшэнас андэ одиночно камера. Лэсти нащи сас лэнца тэ дэл дума пала Библия и пала авэр варисавэ темы. Во мангэласпэ пала смилость, кай если авэла возможность, во тэ росԥэнэн пала чачимос (Дила 5:29). Во росԥэнэн: «О Иегова атветил пэ мэрнэ молитвы и во дя манди смилость и мудрость. Мэ проандяравас пятиминутни изучении паша двэри, кай бэшэнас и барунаря. Ай вэчэром пистросаравас и письморя, савэ мэ пэрэдавас лэнди пэ авэр дес». Сар и о Джино Хёко амэ тожэ можэм тэ мангаспэ пала смилость и мудрость и тэ патяс, кай о Иегова поможыя амэнди тэ росԥэнас пала лэстэ.

14. Со поможыя тэ пэрэандярас о ԥаримос? (Псалом 37:3, 5).

¹⁴ Мангэнпэ лэ Иеговасти, кай во тэ поможый тумэнди тэ пэрэандярэн о ԥаримос. Бут андар мэндэ пэрэандярэн ԥаримос лэ зорэса — када, кала варисо дуқал или кала ԥарэс по ди. Варикасти ԥарэс, важ кода кай муля лэско пашутно мануш. Дэкастэ найвушэро ситуацыя андо ери. Ай кай авэр исин ԥаримос через и преследовании или авэр трудности. Кадяжэ кадэла трудности ашэн инке май ԥарэ через и бида андэ природа, пандэмия и войны. Росԥэнэн лэ Иеговасти вся, со по ди. Росԥэнэн лэсти пала пэстири ситуацыя кадя жэ, сар тумэ росԥэндоп када пэстирэ пашутнэ друӷости и патян: о Иегова стерэла вся, кай тумэнди тэ поможый! (Проадинон Псалом 37:3, 5.)

15. Сар и молитва поможый тэ пэрэандярас о ԥаримос? Росԥэнэн примеро.

¹⁵ Если тумэ вся и время мангэнпэ, када поможыя тэ «виритярэн о ԥаримос» (Рим. 12:12). О Иегова ӷанэн, савэ трудности пэрэандярэн лэстирэ служытеля. Андэ Библия ԥэнэнпэ, кай во «ашунэла, кала и мануша цыпина важ и помощь» (Пс. 145:18, 19). Када поля и пианерка, савя ақарэн Кристи, савяти 29 лет. Нэожыдано латэ римосайля фартэ о зор. И через када латэ сас бари депрэсия. Потом фартэ занасвайля латири дэй. И Кристи росԥэнэн: «Мэ кажно тэсара анда вся оди мангаваспэ лэ Иеговасти, кай во тэ дэл манди зор тэ прожував кадэва дес. Мэ теравас вся, кай тэ жував па пэско ӷрафико важ и дэвликони дила: ԥиравас пэ собрании, и проандяравас лично изучения». Вой кадяжэ росԥэнэн: «И молитва поможысардя манди тэ на умэкав и вас дажэ тоди, кала сас фартэ ԥари время. Мэ ӷанавас, кай о Иегова вся и время сас паша мандэ, кадэва гиндо фартэ, фартэ ман подритярэлас. Хоть и проблемы лэ зорэса най сразу ришылись, о Иегова атвечал пэ мэрнэ молитвы. Во дэлас спокойство андо ди». Давайте ласа тэ сэрас, кай «о Иегова ӷанэн, сар тэ фэрий лэ ԥаримастар кодэлэн, ко стол бари патив пэр лэстэ» (2 Пёт. 2:9).

16. Васо амэнди трэбуй лэ Иеговастири помощь, кай тэ на подаспэ лэ бэзэхэсти?

¹⁶ Мангэн лэ Иеговастар помощь, кай тэ на подэнпэ лэ бэзэхэсти. Амэ нэсовершэни и важ када амэ постояно борисавас, кай тэ терас правильно. О Сатана старыийпэ тэ терэл вся, кай амэнди тэ авэл инке май ԥарэс. И ек анда лэстири ловушка, када тэ римой амари годи через и билажавардэ развличении. Кацавэ развличении ԥэрэн амари годи найлашэ гиндонэнца. Када римой лэ манушэско ди и можэт тэ анэн каринг о баро бэзэх (Мар. 7:21—23; Иак. 1:14, 15).

17. Со важно тэ терас, кала мангас и помощь тэ на подаспэ лэ бэзэхэсти? (Диқэн кадяжэ и картинка.)

¹⁷ Кай тэ на попэрас андэ лэ Сатанастири ловушка, амэ трэбуй тэ мангас помощь лэ Иеговастар. О Иисусо, кала сытярэлас тэ мангэнпэ, ԥэндя: «Поможысар амэнди тэ на подаспэ лэ бэзэхэсти и фэрисар амэн лэ Сатанастар» (Матф. 6:13). О Иегова ӷотово амэнди тэ поможый, но амэ трэбуй тэ мангас лэс пала када. Ай тоди тэ терас кадя, сар манглямпэ. Кадяжэ важно тэ терас вся, со па амаро зор, кай и гиндоря анда кадэя люма тэ на влияют пар мэндэ (Пс. 97:10). Амэнди трэбуй тэ ԥэрас пэстири годи лашэ гиндонэнца, кала адиносарас и изучаем и Библия. Кадяжэ амэ фэрисараса пэстири годи, кала ласа тэ ԥирас пэ собрания и пэ служэния. Ай о Иегова пэстиря ригатар дэл алав, кай во на домэкэла ԥаримос, саво май баро амарэ зорэстар (1 Кор. 10:12, 13).

18. Со амэнди всаворэнди трэбуй тэ терас?

¹⁸ Кай тэ ашаспэ верни лэ Иеговасти андэ кадэла ԥарэ деса амэнди трэбуй май бут тэ мангаспэ, чем обычно. Кажно дес витидэн и время, кай анда вся оди тэ мангэнпэ лэ Иеговасти. Екжэно о Иегова камэл, кай тумэ тэ росԥэнэн лэсти вся, со тумэндэ по ди (Пс. 62:8). Хвалин лэ Иеговас и блаӷодарин лэс пала вся, со во терэл. Мангэн, кай во тэ поможый тумэнди тэ авэн смили андэ служэния. Мангэн, кай во тэ дэл зор, кала тумэндэ исин проблемы или кай тумэ тэ на подэнпэ лэ бэзэхэсти. На домэкэн, кай тумэнди варисо тэ мишает вся и время тэ мангэнпэ лэ Иеговасти. Но сар о Иегова атвечает пэ амарэ молитвы? Кадэва важно вопросо амэ роздиқаса андэ авэр статья.