Urashobora gushika ku migambi yawe y’ivy’impwemu

1. Ni ingorane iyihe ishikira abatari bake muri twebwe?

HOBA hari umugambi w’ivy’impwemu wishingiye mugabo bikakugora kuwushikako?b Nimba vyaragushikiye, nturi wenyene. Nk’akarorero, uwitwa Philip yaripfuza gusenga kenshi no kuryohora amasengesho yiwe, ariko akabura umwanya wo kubigira. Erika yari afise umugambi wo kudacerwa amakoraniro yo gusohoka mu ndimiro, ariko yaguma ayacerwa nka yose. Tomáš na we yaragerageje kenshi gusoma Bibiliya yose. Avuga ati: “Gusoma Bibiliya ntivyandyohera. Narabigerageje incuro zitatu, ariko buri gihe sinarenga mu gitabu c’Abalewi.”

2. Kubera iki tudakwiye gucika intege nimba hari umugambi twishingiye mugabo tutarashikako?

² Nimba hari umugambi wishingiye mugabo ukaba utarawushikako, ntucike intege. Mbere n’umugambi usanzwe, akenshi usanga kuwushikako bisaba umwanya n’akigoro. Ukuba gusa wipfuza gushika ku mugambi wawe, birerekana ko uha agaciro ubucuti ufitaniye na Yehova be n’uko wipfuza kumuha ivyiza kuruta. Yehova arashima akigoro ugira. Ariko rero, ntiyiteze ko umuha ivyo udashoboye. (Zab. 103:14; Mika 6:8) Ni co gituma ukwiye kwishingira umugambi ubona ko woshikako. None umaze kuwushinga, wokora iki kugira uwushikeko? Reka turabe ivyiyumviro bimwebimwe vyogufasha.

NUTSIMBATAZE ICIPFUZO CO KUWUSHIKAKO

3. Kubera iki bihambaye ko ugira icipfuzo co gushika ku migambi yawe?

³ Nimba dushaka gushika ku migambi yacu birahambaye ko tugira icipfuzo co kuyishikako. Ufise ico cipfuzo, uca ukora uko ushoboye kwose kugira ngo uyishikeko. Icipfuzo twokigereranya n’umuyaga usunika ubwato kugira bushike iyo buja. Umuyaga ugumye uhuhuta, burateba bugashika iyo buja. Ubaye mwinshi hoho, buca bushikayo ningoga. Natwe dutsimbataje icipfuzo co gushika ku migambi yacu, vyoshoboka ko tuyishikako. Umuvukanyi yitwa David wo muri El Salvador avuga ati: “Iyo ufise icipfuzo, uca wihata. Ntureka ngo hagire ikikubuza gushika ku mugambi wawe.” Ni ibiki none vyogufasha kurushiriza kugira icipfuzo?

4. Ni igiki twosenga dusaba? (Abafilipi 2:13) (Raba n’ishusho.)

⁴ Nusenge usaba kurushiriza kugira icipfuzo. Yehova abicishije ku mpwemu yiwe, arashobora kugufasha kugira icipfuzo co gushika ku mugambi wawe. (Soma Abafilipi 2:13.) Hari igihe twishingira umugambi kuko tuba tuzi ko ari igisabwa, kandi nta kibi kirimwo. Ariko rero twoshobora kuba vy’ukuri tudafise icipfuzo co kuwushikako. Ni ko vyagendeye mushiki wacu umwe wo mu Buganda yitwa Norina. Yari yarishingiye umugambi wo kuyobora inyigisho ya Bibiliya naho atavyiyumvamwo, kuko yikengera ko atari azi kwigisha neza. None ni igiki camufashije? Avuga ati: “Naratanguye gusenga Yehova buri musi, ngo amfashe kurushiriza kugira icipfuzo co kuyobora inyigisho ya Bibiliya. Muri ico gihe nyene, naciye nihatira kuryohora uburyo nigisha. Inyuma y’amezi makeyi, narabonye ko narushirije kuvyiyumvamwo. Muri uwo mwaka nyene, nararonse abantu babiri nigisha Bibiliya.”

5. Ni ibiki twozirikanako vyotuma turushiriza kugira icipfuzo co gushika ku mugambi wacu?

⁵ Nuzirikane ku vyo Yehova yagukoreye. (Zab. 143:5) Intumwa Paulo yarazirikanye ku buntu atabereye Yehova yamugiriye, aca aramukorera yivuye inyuma. (1 Kor. 15:9, 10; 1 Tim. 1:12-14) Na wewe niwarushiriza kuzirikana ku vyo Yehova yagukoreye, uzorushiriza kugira icipfuzo co gushika ku mugambi wawe. (Zab. 116:12) Raba icafashije mushiki wacu umwe wo muri Hondurasi gushika ku mugambi wiwe wo kuba umutsimvyi asanzwe. Avuga ati: “Narazirikanye ku kuntu Yehova ankunda cane. Yaranteye iteka ryo kuba mu basavyi biwe. Aranyitwararika akongera akankingira. Kubizirikanako vyatumye ndushiriza kumukunda no kugira icipfuzo co gutangura ubutsimvyi.”

6. Ni ikindi kintu ikihe codufasha kurushiriza kugira icipfuzo co gushika ku mugambi wacu?

⁶ Nuzirikane ku vyiza wokwironkera uwushitseko. Raba ivyafashije umwe Erika twavuga gushika ku mugambi wiwe wo kudacererwa. Avuga ati: “Narabonye ko gucererwa ikoraniro ryo kuja mu ndimiro vyatuma mpomba ibintu vyinshi. Ariko gushika kare vyotumye ndamukanya n’abavukanyi nkongera nkamarana akanya na bo. Vyotumye kandi numva ivyiyumviro vyomfashije kuryohora igikorwa co mu ndimiro no kukinezerererwa.” Kuba Erika yarazirikanye ku vyiza yokwironkeye ashitse kare, vyaratumye ashika ku mugambi wiwe. Ni ivyiza ibihe nawe wozirikanako? Nimba ufise umugambi wo gusoma Bibiliya canke wo gusenga, nuzirikane ku kuntu bizokomeza ubucuti ufitaniye na Yehova. (Zab. 145:18, 19) Nimba na ho ufise umugambi wo gutsimbataza kamere kanaka, nuzirikane ku kuntu bizotuma urushiriza kubana neza n’abandi. (Kol. 3:14) Ubona gute ugize urutonde rw’ibintu vyose vyotuma wipfuza gushika ku mugambi wawe? Nuce uza urarusuzuma. Umwe Tomáš twavuga kare agira ati: “Uko ndushiriza kubona imvo zotuma nshika ku mugambi wanje, ni ko ndushiriza kugira akigoro ko kuwushikako.”

7. Ni igiki cafashije Julio n’umugore wiwe gushika mu mugambi wabo?

⁷ Niwifatanye n’abakuremesha gushika ku mugambi wawe. (Imig. 13:20) Raba ivyafashije Julio n’umukenyezi wiwe gushika ku mugambi wabo wo kwagura umurimo. Avuga ati: “Twifatanya n’abagenzi baturemesha gushika ku mugambi wacu kandi twarayaga na bo ibiwerekeye. Kubera ko benshi muri bo bari baramaze gushika ku mugambi nk’uwo, barashobora kuduha ivyiyumviro ngirakamaro. Baranatubaza aho tugejeje imyiteguro, bakongera bakaturemesha igihe vyaba bikenewe.”

IGIHE ATA CIPFUZO DUFISE

8. Vyogenda gute hamwe tworondera gushika ku mugambi wacu igihe gusa twumva ko dufise icipfuzo? (Raba n’ishusho.)

⁸ Tuvugishije ukuri, birashika twese tukabura icipfuzo co gukora ikintu kanaka. None ivyo vyoba bisobanura ko tudashobora gushika ku mugambi wacu? Habe namba. Raba akarorero: Umuyaga urashobora gusunika ubwato kugira ngo bushike iyo buja. Ariko rero, hari igihe umuyaga uba mwinshi, ikindi gihe ukaba muke canke na ho ukabura. None ivyo bica bituma ubwato buhagarara? Habe na gato. Nk’akarorero, abatwara ubwato bamwebamwe usanga bafise imoteri, abandi na bo ingafe. Barashobora gukoresha kimwe muri ivyo kugira ubwato bugume bugenda. Icipfuzo co gushika ku mugambi wacu na co nyene twokigereranya n’umuyaga. Mu bihe bimwebimwe kirakomera, mu bindi na ho kikagabanuka canke kikabura. Hamwe rero tworondera gushika ku mugambi wacu ari uko gusa dufise icipfuzo, twoshobora kutazokwigera tuwushikako. Ariko nka kurya nyene uwutwara ubwato yikora ku bindi bintu kugira ashike iyo aja, ni ko natwe tugerageza gushika ku mugambi wacu naho ata cipfuzo twoba dufise. Naho bisaba akigoro, tuwushitseko turahimbarwa. Imbere yo kuraba ivyo twokora, reka tubanze twishure ikibazo coshobora kuvyuka.

9. Vyoba ari bibi kuguma tugira akigoro ko gushika ku mugambi wacu n’igihe tutaba tuvyiyumvamwo? Sigura.

⁹ Yehova yipfuza ko tumukorera tubikunze kandi duhimbawe. (Zab. 100:2; 2 Kor. 9:7) None twoba dukwiye kugira akigoro ko gushika ku mugambi wacu kandi tutavyiyumvamwo? Zirikana ku karorero k’intumwa Paulo. Yavuze ati: “Umubiri wanje ndawukubitagura ibipfunsi nkawujana nk’umuja.” (1 Kor. 9:25-27) Paulo yarihatira gukora iciza, mbere n’igihe yaba yumva ko atabishaka. None Yehova yoba yarashimye ivyo Paulo yamukoreye? Cane nyene! Ushima ari ko biri, yarabimuhereye n’impera.​—2 Tim. 4:7, 8.

10. Ni ivyiza ibihe twironkera iyo twihatiye gushika ku mugambi wacu naho ata cipfuzo tuba dufise?

¹⁰ Muri ubwo buryo nyene, Yehova arahimbarwa igihe abonye ko tugira akigoro ko gushika ku mugambi wacu, n’igihe twoba tutabishaka. Naho tuba turiko dukora ico gikorwa atari ukubera ko tugikunda, biramuhimbara kuko aba azi ko turiko tugikora tubitumwe n’uko tumukunda. Yehova azoduhezagira nk’uko nyene yahezagiye Paulo. (Zab. 126:5) Twiboneye ingene aduhezagira, twoshobora gutangura kugira icipfuzo co gushika ku mugambi wacu. Mushiki wacu wo muri Polonye yitwa Lucyna avuga ati: “Hari igihe numva ntashaka kuja mu ndimiro, canecane igihe mba ndushe. Ariko umunezero ngira iyo mvuyeyo, uba ari uwudasanzwe.” Nimuze turabe ivyo twokora igihe ata cipfuzo dufise co gushika ku mugambi wacu.

11. Yehova ashobora gute kudufasha kurushiriza kwigumya?

¹¹ Nusenge usaba ukwigumya. Umuntu yigumya ntahuruduka mu vyo avuga no mu vyo akora. Ukwigumya birimwo iciyumviro co kwifata ngo ntukore ikintu kibi. Ariko rero, turakeneye kandi ukwigumya kugira ngo dukore iciza, canecane igihe turiko dukora igikorwa kigoye canke twumva ko tudashaka. Niwibuke ko ukwigumya ari kimwe mu bigize icamwa c’impwemu y’Imana. Ni co gituma ukwiye gusaba Yehova impwemu nyeranda kugira igufashe gutsimbataza iyo kamere ihambaye. (Luka 11:13; Gal. 5:22, 23) Umwe David twavuga, yarasiguye ingene isengesho ryamufashije. Yipfuza kurushiriza kwubahiriza urutonde rwiwe rwo kwiyigisha. Avuga ati: “Narasaba Yehova ngo amfashe kurushiriza kwigumya. Yaramfashije maze ndashiraho urutonde rwiza rwo kwiyigisha nongera ndarwubahiriza.”

12. Ibivugwa mu Musiguzi 11:4 vyodufasha gute gushika ku migambi yacu y’ivy’impwemu?

¹² Nturindire ko ibintu vyose bimera nk’uko ushaka. Muri iyi si, ibintu birashobora kutazokwigera bimera nk’uko tuvyipfuza. Turindiriye ko bimera nk’uko tuvyipfuza, ntituzokwigera dushika ku mugambi wacu. (Soma Umusiguzi 11:4.) Umuvukanyi yitwa Dayniel avuga ati: “Ibintu ntivyama biba nk’uko tuvyipfuza. Aho kurindira rero, dukwiye nyabuna gutangura umugambi wacu.” Umuvukanyi wo mu Buganda yitwa Paul na we, aravuga ikindi kintu gikwiye gutuma tutigiza inyuma ivyo gufata ingingo. Avuga ati: “Iyo dutanguye umugambi wacu naho ibintu bitaba vyifashe neza, tuba duhaye Yehova akaryo ko kuduhezagira.”​—Mal. 3:10.

13. Kubera iki ari vyiza guhera ku migambi mitomito?

¹³ Nuhere ku migambi mitomito. Iyo twishingiye umugambi usa n’uwugoye, turashobora kubura icipfuzo co kuwushikako. Nimba nawe wishingiye umugambi wishingiye nk’uwo, ubona gute uwugabaguyemwo imigambi mitomito? Nimba wipfuza gutsimbataza kamere kanaka, ubona gute utanguye kuyigaragaza mu tuntu dutoduto? Nimba wipfuza gusoma Bibiliya yose, ubona gute uhereye kuza urayisoma mu mwanya mutomuto? Umwe Tomáš twavuga mu ntangamarara, vyaramugoye gushika ku mugambi wo gusoma Bibiliya mu mwaka umwe. Avuga ati: “Nasanze nasoma vyinshi. Naciye nsubira kugerageza kuyisoma, mugabo ngasoma gusa imirongo mikeya buri musi nkongera nkayizirikanako. Ivyo vyatumye gusoma Bibiliya birushiriza kundyohera.” Uko gusoma Bibiliya vyarushiriza kumuryohera, ni ko yongereza umwanya wo gusoma. Amaherezo, yarasomye Bibiliya yose.c

NTUCIKE INTEGE HAGIZE IBIGUCIRAMWO

14. Ni ibiki vyoshobora kuduciramwo?

¹⁴ Ikibabaje, naho twoba dufise ugushaka kandi tukagira akigoro, harashobora kugira ibiduciramwo. Nk’akarorero, “ibishika giturumbuka” vyoshobora gutuma tubura umwanya wo gushika ku mugambi wacu. (Umus. 9:11) Turashobora gushikirwa n’ingorane iduca intege, tukabura inkomezi zo gushika ku mugambi wacu. (Imig. 24:10) Umubiri wacu munyagasembwa, na wo nyene urashobora gutuma tudashika ku mugambi wacu. (Rom. 7:23) Canke na ho, turashobora gusa kwumva ko turushe. (Mat. 26:43) Ni ibiki none vyodufasha kurengera ivyoduciramwo?

15. Igihe hagize ikiguciramwo mu mugambi wawe, biba bisobanura ko vyakunaniye? Sigura. (Zaburi 145:14)

¹⁵ Hagize ikiguciramwo ntuce wibaza ko vyakunaniye. Bibiliya iravuga ko ingorane zishobora kudushikira zisubiriza. Ariko iravuga kandi ko dushobora gusubira guhaguruka, canecane iyo tubifashijwemwo na Yehova. (Soma Zaburi 145:14.) Wa muvukanyi Philip twavuga, ukuroranirwa kwiwe akubona muri ubu buryo: Avuga ati: “Singumiza umutima ku ncuro nanirwa gushika ku mugambi wanje, ahubwo ndawushira ku ncuro nsubira kugira akigoro ngo ndawushikeko.” Umwe David na we agira ati: “Ibinciramwo singerageza kubibona nk’intambamyi, ahubwo ndabibona nk’akaryo ko kwereka Yehova ko ndamukunda cane.” Ego cane, ushikiwe n’ibiguciramwo mugabo ukaguma urondera gushika ku mugambi wawe, uba weretse Yehova ko wipfuza kumuhimbara. Ese ingene Yehova ahimbarwa iyo abonye akigoro ugira ko gushika ku mugambi wawe!

16. Ibiguciramwo bishobora kukwereka iki?

¹⁶ Nukure icigwa ku biguciramwo. Nuzirikane ku caguciriyemwo maze wibaze uti: ‘Nohindura iki kugira ntihagire igisubira kunciramwo?’ (Imig. 27:12) Ariko rero, hari igihe ibiguciramwo bica bituma ubona ko wishingiye umugambi utoshobora gushikako. Nimba nawe ari ko bimeze, nusubire gusuzuma umugambi wawe, urabe nimba utakurengeye.d Yehova ntaca abona ko ata co umaze ngo ni uko wananiwe gushika ku mugambi ukurengeye.​—2 Kor. 8:12.

17. Kubera iki dukwiye kuguma twibuka imigambi tumaze gushikako?

¹⁷ Nugume wibuka ivyo umaze gushikako. Bibiliya ivuga ko ‘Imana itari iyitagororotse ngo yibagire igikorwa cawe.’ (Heb. 6:10) Nawe rero ntukwiye kucibagira. Nuzirikane ku migambi umaze gushikako, kwaba ari ukugiranira ubucuti na Yehova, kubwira abandi ibimwerekeye, canke kubatizwa. Nk’uko nyene wateye imbere ugashika ku migambi wari warishingiye, urashobora kubandanya utera imbere ugashika ku mugambi ufise ubu.​—Flp. 3:16.

18. Dukwiye kwibuka iki igihe twihatira gushika ku mugambi twishingiye? (Raba n’ishusho.)

¹⁸ Yehova agufashije, urashobora gushika ku mugambi wawe, nka kurya nyene uwutwara ubwato ashika iyo aja. Ariko rero, niwibuke kandi ko abatwara ubwato benshi usanga bahimbarirwa urugendo bagira. Na wewe rero, uko ubandanya kwihatira gushika ku mugambi wishingiye mu vy’impwemu, nunezererwe kubona ingene Yehova agufasha akongera akaguhezagira. (2 Kor. 4:7) Niwumirako, uzokwironkera mbere imihezagiro myinshi kuruta.​—Gal. 6:9.