Jeremiya
37 Zvino Mambo Zedhekiya+ mwanakomana waJosiya akatanga kutonga panzvimbo paKoniya*+ mwanakomana waJehoyakimu, nekuti Mambo Nebhukadhinezari* weBhabhironi akamugadza kuti ave mambo munyika yeJudha.+ 2 Asi iye nevashandi vake nevanhu vemunyika yacho havana kuteerera mashoko aJehovha aakataura achishandisa muprofita Jeremiya.
3 Mambo Zedhekiya akatuma Jehukari+ mwanakomana waSheremiya naZefaniya+ mwanakomana wemupristi Maaseya kumuprofita Jeremiya, achiti: “Tinyengetererewo kuna Jehovha Mwari wedu.” 4 Jeremiya ainge akasununguka kufamba pakati pevanhu, nekuti vakanga vasati vamuisa mujeri.+ 5 Panguva iyi uto raFarao rakanga rasimuka kubva kuIjipiti,+ uye vaKadheya avo vainge vakakomba Jerusarema vakanzwa nezvazvo. Saka vakabva kuJerusarema.+ 6 Shoko raJehovha rakabva rauya kumuprofita Jeremiya, richiti: 7 “Zvanzi naJehovha Mwari waIsraeri, ‘Muti kuna mambo weJudha, uyo akutumai kuzondibvunza: “Inzwa! Uto raFarao iro riri kuuya kuzokubatsirai richadzokera kunyika yaro, Ijipiti.+ 8 Uye vaKadheya vachadzoka, vorwisa guta rino, voritora uye voripisa nemoto.”+ 9 Zvanzi naJehovha: “Musazvinyepera* muchiti, ‘VaKadheya vacharega kutirwisa,’ nekuti ivo havasi kuzoenda. 10 Kunyange kana mukauraya uto rese revaKadheya vari kukurwisai pongosara varume vanenge vakuvara chete, vaizongobuda mumatende avo, vopisa guta rino nemoto.”’”+
11 Uto revaKadheya parakarega kurwisa Jerusarema nekuda kweuto raFarao,+ 12 Jeremiya akasimuka kuJerusarema akaenda kunyika yaBhenjamini+ kuti anowana mugove wake ikoko pakati pevanhu vake. 13 Asi paakasvika paGedhi raBhenjamini, mukuru wevarindi, ainzi Irija mwanakomana waSheremiya mwanakomana waHananiya, akabata muprofita Jeremiya, akati: “Uri kutizira kuvaKadheya!” 14 Asi Jeremiya akati: “Aiwa! Handisi kutizira kuvaKadheya.” Asi iye haana kumuteerera. Saka Irija akabata Jeremiya, akapinda naye maiva nemachinda. 15 Machinda acho akatsamwira Jeremiya chaizvo,+ uye akamurova, akamuvharira*+ muimba yemunyori Jehonatani, iyo yakanga yava kushandiswa sejeri. 16 Jeremiya akaiswa mujeri repasi, mudzimba dzepasi, uye akaramba ari imomo kwemazuva mazhinji.
17 Mambo Zedhekiya akabva atumira shoko kuti vanomutora, uye mambo akamubvunza vari vega mumba* make.+ Akabvunza kuti, “Pane shoko rabva kuna Jehovha here?” Jeremiya akati, “Riripo!” uye akabva ati, “Muchaiswa muruoko rwamambo weBhabhironi!”+
18 Jeremiya akatiwo kuna Mambo Zedhekiya: “Chii chandakakutadzirai imi nevashandi venyu nevanhu ava, zvamakandiisa mujeri? 19 Zvino vaprofita venyu varipi avo vakakuprofitirai vachiti, ‘Mambo weBhabhironi haasi kuuya kuzokurwisai imi nenyika ino’?+ 20 Zvino ndinzweiwo ishe wangu mambo. Ndapota, inzwai chikumbiro changu chekunzwirwa nyasha. Musandidzorera kuimba yemunyori Jehonatani,+ nekuti ndingafira ikoko.”+ 21 Saka Mambo Zedhekiya akarayira kuti Jeremiya achengetwe muChivanze cheVarindi,+ uye aipiwa chingwa cheraundi zuva nezuva chaibva kumugwagwa wevabiki,+ kusvikira chingwa chese chaiva muguta chapera.+ Uye Jeremiya akaramba ari muChivanze cheVarindi.