E Fakamanuia Kae Puipui ne Ieova a Tino Faka‵logo

“Kae so se tino e saga tonu mai ki a au ka maua ne ia te saogalemu. Ka tokagamalie tena olaga, kae seai se mea e mataku ki ei.”​—FAATAOTO 1:​33.

NE KAI‵KAI a punuā moa fulufuluā kae e seai lele eiloa se lotou mea e iloa e uiga ki se manu eva lasi mai luga i a latou. E seki leva, ne tagi malosi atu ki luga a te mātua o punuā moa kae ‵fola ana kapa‵kau. Ne ‵tele fakavave atu ana punuā moa, kae ne faka‵lafi fakavave ei latou mai lalo i ana kapa‵kau. Ne gata atu ei te osoatuga o te manu eva lasi tenā.a Se a la te akoakoga e maua mai i ei? E iku atu te fakalogo ki te faka‵saoga!

² E tāua malosi ‵ki eiloa te akoakoga tenā ki Kelisiano i aso nei, me ko fakaoti ne Satani ana mafi ke ‵po aka ei a tino o te Atua. (Fakaasiga 12:​9, 12, 17) E taumafai eiloa a ia ke fakamasei ‵tou fakatuanaki ko te mea ke se fiafia mai a Ieova kae galo atu ei te fakamoemoega ki te ola se-gata-mai. (1 Petelu 5:⁠8) Kae kafai e fakapili‵pili atu faeloa tatou ki te Atua kae faka‵logo fakavave ki fakatonutonuga e maua ne tatou e auala i tena Muna mo tena fakapotopotoga, ka mafai eiloa o tali‵tonu tatou ki tena tausiga atafai. Ne tusi mai te faisalamo, penei: “E fakamalumalu ifo ne ia koe ki ona kapakau; ko malu ei koe i tena tausiga; a tena fakamaoni ka ‵pui ne ia koe, ko malu lei ei koe.”​​—⁠Salamo 91:⁠4.

Ne Oso Atu ki se Atufenua Ona ko te sē Fakalogo

³ I te taimi ne fakalogo ei te atufenua o Isalaelu ki a Ieova, ne maua faeloa ne latou a mea aogā i tena tausiga mo tena atafai ki a latou. Kae i te ukega o taimi, ne tiakina ne tino te lotou Atua telā ne faite ne ia latou kae ne ‵fuli atu ki atua lakau mo fatu​—⁠kolā ‘e se mafai o fesoasoani atu io me e faka‵sao latou.’ (1 Samuelu 12:21) Ona ko te tumau o te fenua kātoa i te ‵teke atu, ne seki mafai ei o toe faka‵lei aka. Tela la, ne fakaasi mai ne Iesu tena fanoanoa i ana pati konei: “Ielusalema, Ielusalema! Ne tamate ne koe a pelofeta, kae peipei ki fatu a ave fekau a te Atua ne uga atu ki a koe! Ko uke a taimi ne manako au o fakapulupulu koutou ki oku lima, e pela eiloa mo se moa fafine e fakapulupulu ana tama ki ona kapakau, kae ne seki talia ne koe au! Nei la, e maofa valevale te otou fenua.”​​—⁠Mataio 23:​37, 38.

⁴ Ne fakamaoni mai ne mea ma‵sei kolā ne oko atu ki Isalaelu fakalogogatā i te 70 T.A. me ko tiakina ne Ieova latou. I te tausaga tenā, ne tauave ne kautau o Loma te lotou fakailoga, se pou mo te fakatusa o te aeto i ei, kae ne fai pelā me ne eva ifo ki luga i Ielusalema kae tamate valevale a tino i ei. Ne ‵fonu eiloa te fa‵kai i te taimi tenā i tino kolā ne olo atu o fakamanatu te Paseka. Ne seki fiafia te Atua ki olotou taulaga e uke ‵ki ne fai. A te mea tenā se fakamasauāga fakafanoanoa o pati a Samuelu ki te Tupu sē fakalogo, ko Saulo, penei: “Se a te mea e manako ki ei te Aliki: ko te fakalogo io me ko taulaga? E sili atu te fakalogo ki a ia i lo te ofo atu o te mamoe tafasili i te ‵lei ki a ia.”​​—⁠1 Samuelu 15:⁠22.

⁵ Faitalia te faka‵mafa fakafia atu ne Ieova a te tāua o te fakalogo, ne iloa ‵lei foki eiloa ne ia a mea e mafai o fai ne tino sē ‵lei katoatoa. (Salamo 130:​3, 4) E manako a ia ki tino loto fakamaoni ‵tonu kae faka‵logo ona ko te fakatuanaki, te alofa, mo te mataku katoatoa ma fakafanoanoa atu ki a ia. (Teutelonome 10:​12, 13; Faataoto 16:6; Isaia 43:10; Mika 6:8; Loma 6:17) Ne fakaasi mai me e mafai o maua te vaegā fakalogo penā i “tino talitonu fakamaoni i aso ko teka,” kolā ne tumau i te fakamaoni i taimi o fakalavelave fakama‵taku, ke oko foki eiloa ki te mate. (Epelu 11:​36, 37; 12:⁠1) Ko oko eiloa i te fakafiafia ne tino konei a te loto o Ieova! (Faataoto 27:11) Ne fakamaoni a nisi tino i te kamataga, kae ne taka‵vale fakamuli latou me ne seki tumau i te faka‵logo. E tokotasi mai i tino konei ko te Tupu ko Ioasa i Iuta mua.

Ne Fakamaseigina se Tupu Ona ko Taugasoa Ma‵sei

⁶ Ne sao amate atu eiloa a te Tupu ko Ioasa i tena folikiga. I te taimi ko fitu ei a tausaga o Ioasa, ne loto toa a te Faitaulaga ko Ieoiata o puke mai tou tagata mai te koga ne ‵muni ei ko te mea ke fai mo fai te tupu. Ona ko te mea ne fai a Ieoiata telā ne mataku ki te Atua e pelā me se tamana kae se tino fakatonutonu foki ki a Ioasa, ne fai ne te tupu foliki tenei “a mea lei i mua o te Aliki, i aso koi ola ei a te faitaulaga ko Ieoiata.”​​—⁠2 Nofoaiga Tupu 22:10–​23:​1, 11; 24:​1, 2.

⁷ Ne aofia i galuega ‵lei a Ioasa ko te fakafouga o te faletapu o Ieova​—⁠se mea telā ne “mafaufau [a Ioasa] o fakafou.” Ne fakamasaua atu a ia ki te Faitaulaga Sili ko Ieoiata me e ‵tau o ‵tae mai a lafoga mō te faletapu mai Iuta mo Ielusalema, e pelā mo te mea “ne fakatonu ne Mose,” ke ‵togi te faiga o te galuega ki te fakafouga o te faletapu. E fakamaoni mai i ei, me ne manumalo a Ieoiata i te fakamalosi atu ki te tupu foliki ke sukesuke kae fakalogo ki te Tulafono a te Atua. Ne iku atu ki te fakaotiga fakavave o te faletapu mo meāfale i te faletapu.​​—⁠2 Nofoaiga 24:​4, 6, 13, 14; Teutelonome 17:⁠18.

⁸ Se mea fakafanoanoa, me ne seki tumau te fakalogo o Ioasa ki a Ieova. Kaia? E fai mai te Muna a te Atua ki a tatou, penei: “I te taimi ne mate atu ei a Ieoiata, ne futi mai ne takitaki o Iuta a te Tupu ko Ioasa ke fakalogo atu ki a latou. Tela la, a tino ko se tapuaki i te Faletapu o te Aliki, te Atua o olotou tupuga, kae ko kamata o tapuaki ki tupua mo fakatusa o te atua fafine ko Asaila. Ko te agasala a latou tena, ko ala ei te kaitaua o [te] Aliki ki Iuta mo Ielusalema.” Ko fakamalosiga sē ‵lei a takitaki o Iuta ne iku atu ei ki te sē fakalogo o te tupu ki pelofeta a te Atua, e tokotasi mai i a latou ko te tama a Ieoiata ko Sakalia, telā ne polopoloki ne ia mo te loto toa a Ioasa mo ana tino ona ko te lotou sē faka‵logo. I lō te salamō, ne fakatonu atu a Ioasa ke peipei a Sakalia ki fatu ke oko ki te mate. Ne fai a Ioasa mo fai se tagata sē alofa kae sē fakalogo me ne fakavāivāi a ia ona ko fakamalosiga sē ‵lei o taugasoa ma‵sei!​​—⁠2 Nofoaiga Tupu 24:​17-22; 1 Kolinito 15:⁠33.

⁹ Ona ko te fulitua atu ki a Ieova, ne a mea ne ‵tupu ki a Ioasa mo ana taugasoa ma‵sei, ko takitaki o te fenua? Ne olo atu se kautau a Sulia, se “kautau foliki fua,” kae ne fakatakavale ne latou a Iuta kae “ne tamate ne latou a takitaki katoa.” Ne faimālō ne te kautau a Sulia a te tupu ke tuku atu ana kope totino e pelā foki mo aulo mo siliva mai te faletapu. E tiga eiloa ne sao a Ioasa, kae ne kamata o vāivāi kae fakamasakisaki tou tagata. Mai tua malie ifo fua, ne tamate ei a ia ne tino ‵teke mai i ana tavini foki eiloa. (2 Nofoaiga Tupu 24:​23-25; 2 Tupu 12:​17, 18) Ko tafaga la te ‵tonu o pati a Ieova ki a Isalaelu, penei: “Kafai se fakalogo koutou ki te Aliki te otou Atua, kae se tausi mo te fakamaoni ki ana fakatonuga mo tulafono . . . , ko te mea ka oko mai ki a koutou a mea masei katoa konei”!​​—⁠Teutelonome 28:⁠15.

Ne Sao se Failautusi Ona ko te Fakalogo

¹⁰ E mata, e loto vāivāi koe i nisi taimi ona ko te mu‵tana o tino kolā e fetaui mo koe i te galuega faka-Kelisiano e fia‵fia ki te tala ‵lei? E mata, e kaisano koe ki tino mau‵mea mo olotou vaegā olaga? Kafai e penā loa, ke mafaufau faka‵lei ki a Paluka, te failautusi a Ielemia, mo pati fakatonutonu a Ieova kolā ne fai atu ki a ia ona ko tena alofa.

¹¹ Ne tusi ne Paluka ki lalo se fekau fakapelofeta i te taimi ne saga atu ei a Ieova ki a ia. Kaia? Me ne kamata o muimui a Paluka ona ko tena vaegā olaga kae ne manako a ia ki se isi mea tai ‵lei atu i lō tena tauliaga fakapito i te taviniga ki te Atua. Ona ko tena iloaga i te ‵fuliga o te kilokiloga a Paluka, ne tuku atu ei ne Ieova se fakatonutonuga manino kae alofa, penei: “E a, e taumafai koe o salasala ki se togafiti lei mo koe? Sa fai te mea tena. Ka aumai ne au a te mala ki tino katoa, ka ko koe e fakasao tou ola i so se koga e fano koe ki ei.”​​—⁠Ielemia 36:​4; 45:⁠5.

¹² E mata, e mafai o lavea atu ne koe i pati a Ieova ki a Paluka te lasi o Tena atafai ki te tagata ‵lei tenei, telā ne tavini atu i te fakamaoni mo te loto toa ki a ia fakatasi mo Ielemia? E penā foki i aso nei, e lasi te atafai o Ieova ki tino kolā e tofotofogina ke kausaki atu ki mea kolā e mafau‵fau latou ki ei me e ‵gali atu i te olaga masei tenei. Se mea fakafiafia, me e pelā mo Paluka, ne ‵saga atu a vaegā tino e tokouke penā, ki pati fakatonutonu a‵lofa mai i taina faka-te-agaga ma‵tua. (Luka 15:​4-7) E tonu, ke na fakamautinoa aka ne tatou katoa me e seai eiloa se fakamoemoega i aso mai mua mō tino kolā e salasala ki “se togafiti lei” mō latou eiloa i te olaga tenei. E se gata fua i te sē maua ne latou a te fiafia tonu, kae e silia atu te masei, ka fakaseai atu latou fakatasi mo te lalolagi mo ana manakoga ma‵sei katoa.​—⁠Mataio 6:​19, 20; 1 Ioane 2:​15-17.

¹³ E akoako mai foki ne te tala e uiga ki a Paluka se fakaakoakoga ‵lei ki te loto maulalo. Masaua me ne seki polopoloki ‵tonu atu eiloa ne Ieova a Paluka kae ne faipati atu e auala i a Ielemia, telā kāti ne iloa ‵lei ne Paluka tena tulaga sē ‵lei katoatoa mo ana vāivāiga. (Ielemia 45:​1, 2) Kae ne seki takavale a Paluka i te fakamatamata; ne fakaiku aka ne ia mo te loto maulalo me i te māfuaga tonu o pati fakatonutonu konā​​—⁠ko Ieova. (2 Nofoaiga Tupu 26:​3, 4, 16; Faataoto 18:12; 19:20) Tela la, kafai ko “agasala” tatou mo te sē iloa, kae e maua ne tatou a fakatonutonuga ‵tau mai te Muna a te Atua, ke na fakaakoako tatou ki te matua ‵lei, te malamalama i te feitu faka-te-agaga, mo te loto maulalo o Paluka.​​—⁠Kalatia 6:⁠1.

¹⁴ E fesoasoani atu foki a te uiga loto maulalo penā ki tino kolā e tuku mai ne latou a pati fakatonutonu. E fai mai te Epelu 13:​17, penei: “Faka‵logo ki otou takitaki kae sasale foki i olotou fakatonuga. E se mapu eiloa latou i te tausiga o otou agaga, me ‵tau mo latou o avatu se tala a olotou galuega ki te Atua. Kafai e faka‵logo koutou ki ei, e fai olotou galuega mo te fiafia, kae masei te se faka‵logo ki ei, ko fai ei olotou galuega mo te se fiafia, ko maumau ei olotou galuega mō koutou.” E ‵talo malosi atu faeloa a toeaina ki a Ieova, ke tuku atu te loto toa, te poto, mo te atamai ke fakataunu ei te feitu faigata tenei o te lotou galuega pelā me ne tausi mamoe! Ke na “fakaaloalo koutou ki tino penei.”​​—⁠1 Kolinito 16:⁠18.

¹⁵ E iloa ne tatou me ne ‵fuli eiloa ne Paluka ana mafaufauga me ne tuku atu ne Ielemia a te suā tofiga faigata ki a ia​—⁠ke fano ki te faletapu kae faitau atu ki luga a te suā fekau o te fakamasinoga telā ne fai atu ne Ielemia kae tusi ne ia ki lalo. E mata, ne fakalogo eiloa a Paluka? Ao, ne fai ne ia a ‘mea katoa e pelā eiloa mo te fakatonuga a Ielemia te pelofeta ki a ia.’ A te ‵tonuga loa, ne faitau atu foki ne ia te fekau tenā ki takitaki o Ielusalema, telā ne manakogina eiloa te loto toa i ei. (Ielemia 36:​1-6, 8, 14, 15) I te taimi ne fakatakavale ei ne Papelonia a te fa‵kai i tausaga kāti e 18 mai tua ifo i ei, mafaufau la ki te fiafia o Paluka mō tena fakasaoga ona ko te mea ne fakalogo a ia ki te faka‵pulaga a Ieova kae fakagata foki tena salasala atu ki se “togafiti lei” mō ia ake eiloa!​​—⁠Ielemia 39:​1, 2, 11, 12; 43:⁠6.

Ne Ola a Tino i Taimi o te Fakalavelave Ona ko te Lotou Faka‵logo

¹⁶ I te taimi ne oko atu ei te gataga ki Ielusalema i te 607 T.L.M., ne toe lavea atu foki ei a te alofa atafai o te Atua ki tino faka‵logo. I te ‵lotoga eiloa o te fakalavelave, ne fai atu a Ieova ki te kau Iutaia, penei: “Au, te Aliki, ko tuku atu ne au ke filifili koutou i mea konei e lua: ko te auala tela e tau ki te ola, io me ko te auala e tau ki te mate. So se tino e nofo i te fa‵kai ka mate i te taua, io me i te fiakai, io me i te famai. Ka ko latou kola e olo ki tua o fakamalalo ki te kau Papelonia kola e taua ki te lotou fa‵kai, ka se mate. Ka manuia me ka fakasao olotou ola.” (Ielemia 21:​8, 9) E tiga eiloa ne ‵tau o fakasala a tino i Ielusalema ki te mate, ne fakaasi atu eiloa ne Ieova te alofa atafai ki tino kolā ne faka‵logo ki a ia, faitalia foki eiloa me toeitiiti e se toe ai se avanoaga ke ‵sao atu ei latou.b

¹⁷ E seai se fakalotolotolua me ne tofotofo aka foki te fakalogo o Ielemia ke fai ki te kau Iutaia ke fakagata te lotou taua atu. A te pogai e tasi, ona ko tena loto finafinau mō te igoa o te Atua. Ne seki manako tou tagata ke taku fakamasei te igoa tenā, ne fili kolā ne fai mai me ne manumalo latou ona ko te fesoasoani o olotou tupua ‵mate. (Ielemia 50:​2, 11; Tagiga a Ielemia 2:16) E se gata i ei, ne iloa ne Ielemia me kafai e fai atu ki tino ke fakagata te lotou taua atu, kāti ka fakasala a ia ki te mate me ka mafau‵fau a tino e tokouke me i a ia se sipāi. Kae ne seki pikimākau a ia, ne fakalogo eiloa a ia o fakaasi atu te fekau a Ieova. (Ielemia 38:​4, 17, 18) E folafola atu foki ne tatou se fekau telā e se fia‵fia ki ei a tino e pelā mo Ielemia. Ko te fekau foki eiloa telā ne māfua mai i ei te takalia‵lia o tino ki a Iesu. (Isaia 53:3; Mataio 24:⁠9) Tela la, ke mo a ma ‘ma‵taku tatou ki tino,’ kae ke na fai tatou pelā mo Ielemia, mai te faka‵logo mo te loto toa ki a Ieova, kae tali‵tonu katoatoa ki a ia.​​—⁠Faataoto 29:⁠25.

Te Fakalogo Māfai ko Oso Atu a Koku

¹⁸ Ko pili o fakaseai atu te lalolagi masei kātoa a Satani i se ‘fakalavelave tafasili i te masei.’ (Mataio 24:21) E seai se fakalotolotolua me mai mua i ei kae i te vaitaimi foki eiloa tenā, ka fe‵paki a tino o te Atua mo tofotofoga ‵lasi ki te lotou fakatuanaki mo te faka‵logo. E fai mai te Tusi Tapu me i a Satani, telā ko ‘Koka i te fenua o Makoku,’ ka oso katoatoa atu ki tavini a Ieova kae fakatoka tena kautau telā e fakamatala mai e pelā me se “kautau lasi kae malosi . . . , e pelā me se afa tela e agi i luga i te fenua.” (Esekielu 38:​2, 14-​16) E faka‵lafi a tino o te Atua, kolā e tokouke kae foliga mai me e faigofie o fakatakavale, mai lalo o “kapa‵kau” o Ieova kolā e ‵fola atu ne ia ke puipui ei a tino faka‵logo.

¹⁹ E fakamasaua mai ne te tulaga tenei ki a tatou a te Faka‵saoga o Isalaelu mai Aikupito. Mai tua o mala fakalogo‵mae e sefulu kolā ne oko atu ki Aikupito, ne takitaki atu ei ne Ieova ana tino, e se i te auala toetoe ki te Fenua o te Folafolaga, kae ki te Tai Kula, telā e faigofie fua o ‵po aka kae taua atu ki a latou i ei. I te kilokiloga a se sotia, ne foliga mai te auala tenā e pelā me e fakamataku ‵ki. Moi ne nofo atu koe i konā, e mata, ka fakalogo koe ki pati a Ieova e auala i a Mose kae fanatu ki te Tai Kula mo te loto talitonu katoatoa, faitalia me e iloa ne koe me ko pili mai fua te Fenua o te Folafolaga māfai e fanatu i te suā auala?​​—⁠Esoto 14:​1-4.

²⁰ Kafai e fai‵tau tatou ki te Esoto mataupu e 14, e lavea atu ei ne tatou a te auala ne fakasaoloto ei ne Ieova ana tino i se auala fakaofoofogia ki tena ‵mana. Ko oko eiloa i te fakamalosi mai o vaegā tala penā ki te ‵tou fakatuanaki māfai e suke‵suke kae mafau‵fau ‵loto tatou ki ei! (2 Petelu 2:⁠9) E fesoasoani mai a te fakatuanaki malosi ke faka‵logo tatou ki a Ieova, faitalia foki eiloa me e foliga mai me e se fetaui a mea kolā e manako a ia ki ei mo fuafuaga ‵lei a tino. (Faataoto 3:​5, 6) Tela la, ke fesili ifo ki a koe eiloa, penei, ‘E mata, e taumafai au o fakamalosi aka toku fakatuanaki e auala i te faiga o sukesukega ‵loto ki te Tusi Tapu, ‵talo, kae mafaufau ‵mafa ki ei, e pelā foki mo te kau atu faeloa ki tino o te Atua?’​​—⁠Epelu 10:​24, 25; 12:​1-3.

E Tuku Mai ne te Fakalogo se Fakamoemoega

²¹ A tino kolā e faka‵logo nei ki a Ieova ka lagona ne latou te fakataunuga o pati i te Faataoto 1:​33, telā e fai mai, penei: “Kae so se tino e saga tonu [fakalogo] mai ki a au ka maua ne ia te saogalemu. Ka tokagamalie tena olaga, kae seai se mea e mataku ki ei.” Ko tafaga la te fakaofoofogia māfai ko fakataunu mai a pati fakamafanafana konei i te taimi e fakaoko mai ei te aso o te taui ma sui a Ieova! A te ‵tonuga loa, ne fai atu a Iesu ki ana soko, penei: “Kafai ko kamata o oko mai a mea konei, tu kae ‵kilo ki luga, me ko pili mai te otou fakaolataga.” (Luka 21:28) E manino ‵lei, me ko tino fua kolā e faka‵logo ki te Atua, ka maua ne latou te loto tali‵tonu ke faka‵logo ki pati konei.​​—⁠Mataio 7:⁠21.

²² A te suā pogai e maua ei te loto talitonu me e “se mafai lele o fai ne te Aliki Sili [ko Ieova] se mea kae seki fakaasi mai tena fuafuaga ki ana tavini ko pelofeta.” (Amosa 3:⁠7) I aso nei, e se fakaaogā ne te Atua a pelofeta e pelā mo aso mua; i lō te fai penā, ko oti ne fakatonu atu a ia ki se potukau o tavini fakamaoni ke tuku mai a mea‵kai faka-te-agaga i te taimi tonu ki tena kaukāiga. (Mataio 24:​45-47) Tela la, se mea tāua ke na faka‵logo fakavave tatou ki te “tavini” tenā! E pelā mo te mataupu telā ka ‵soko mai, a te vaegā fakalogo tenā e fakaasi atu foki ei ne tatou te ‵tou faka‵logo ki te pule o te “tavini,” ko Iesu. E ‵tau o “faka‵logo ki a Ia” a tino katoa.​​—⁠Kenese 49:⁠10.

[Fakamatalaga mai lalo]

E Masaua ne Koe?

• Se a te ikuga o te sē fakalogo faeloa o Isalaelu?

• Ne pokotia pefea a te Tupu ko Ioasa ona ko ana taugasoa, i te kamataga mo te fakaotiga o tena olaga?

• Ne a fakaakoakoga tāua e maua ne tatou mai i a Paluka?

• Kaia e se ‵tau lele eiloa o ma‵taku a tino faka‵logo a Ieova māfai ko pili mai te gataga o te olaga masei tenei?

[Fesili mo te Sukesukega]

1, 2. Kaia e tāua ei a te fakalogo ki te Atua? Ke fakamatala mai.

3. Se a te ikuga o te sē faka‵logo faeloa o tino Isalaelu?

4. Ne fakamaoni mai pefea i te 70 T.A. me ko tiakina ne Ieova a Ielusalema?

5. Se a te vaegā fakalogo telā e manako ki ei a Ieova, kae e iloa pefea ne tatou me e mafai foki o faka‵logo tatou?

6, 7. Ne pefea a faifaiga a te tupu ko Ioasa i te taimi koi ola ei a Ieoiata?

8. (a) Se a te pogai tonu ne fai ei ke gasolo o masei atu a Ioasa i te feitu faka-te-agaga? (e) Se a te mea ne iku fakamuli atu ki ei a te sē fakalogo o te tupu?

9. Ne faka‵mafa mai pefea ne te ‵toe fakasalaga o Ioasa mo takitaki o te fenua a te fakamataku o te manatu māmā ki te sē fakalogo?

10, 11. (a) Kaia e tāua ei ke mafaufau faka‵lei ki pati fakatonutonu a Ieova ki a Paluka? (e) Ne a pati fakatonutonu ne fai atu ne Ieova ki a Paluka?

12. Kaia e ‵tau o fakagata te salasala atu ki “se togafiti lei” mō tatou eiloa i te olaga masei tenei?

13. Se a te fakaakoakoga ki te loto maulalo e maua ne tatou i te tala e uiga ki a Paluka?

14. Kaia e tāua ei ke faka‵logo tatou ki tino kolā e fai ne latou te takitakiga i a tatou?

15. (a) Ne fakaasi atu pefea ne Ielemia tena loto talitonu ki a Paluka? (e) Ne taui atu pefea ki a Paluka ona ko tena fakalogo mo te loto maulalo?

16. Ne fakaasi atu pefea ne Ieova te alofa atafai ki tino Iutaia i Ielusalema i te taimi ne taua atu ei a te kau Papelonia i te 607 T.L.M.?

17. (a) Ne a auala e lua ne tofotofo aka ei te fakalogo o Ielemia i te taimi ne fakatonu atu a Ieova ki a ia ke fai atu ki tino Iutaia ke ‘‵tele atu ki te kau Papelonia’? (e) E mafai pefea o maua ne tatou a mea aogā mai te fakaakoakoga a Ielemia i te fakalogo mo te loto toa?

18. Ka tofotofo aka pefea a te faka‵logo o tavini a Ieova i aso mai mua?

19, 20. (a) Kaia ne tāua ‵ki eiloa te faka‵logo o te kau Isalaelu i te taimi ne olo atu ei latou i te Tai Kula? (e) E mafai pefea o aogā ki a tatou i aso nei, a te mafaufau ‵mafa ki te tala i te Tai Kula fakatasi mo te faiga o ‵talo?

21. Ne a fakamanuiaga ka maua ne tino kolā e faka‵logo ki a Ieova i aso nei mo aso mai mua?

22. (a) Se a te pogai e ‵tau ei o maua ne tino o Ieova a te loto talitonu? (e) Ne a nisi manatu ka sau‵tala tatou ki ei i te suā mataupu?

[Ata i te itulau e 23]

Ne fakalogo a Ioasa ki a Ieova, mai lalo i te takitakiga a Ieoiata

[Ata i te itulau e 25]

Ne fakamalosi atu a taugasoa ma‵sei o Ioasa ke tamate a te pelofeta a te Atua

[Ata i te itulau e 26]

Moi ne nofo atu koe i konā, e mata, ka fakalogo koe ki a Ieova kae molimau atu ki tena ‵mana fakaola tino?