DUTERONOMI

1 Nanga amazwi awathethwa nguMoses kuwo onke amaSirayeli, kummandla waseYordan entlango, kwintlango ephambi kweSufu, phakathi kweParan, iTofele, iLabhan, iHatseroti neDizahabhi. 2 Ziintsuku eziyi-11 ukusuka eHorebhe ukuya eKadeshe-bharneya+ xa uhamba ngendlela eya kwiNtaba ISehire. 3 Ngonyaka we-40,+ ngenyanga ye-11, ngosuku lokuqala, uMoses wathetha namaSirayeli ewaxelela yonke into uYehova awayemyalele ukuba awaxelele yona. 4 Wakwenza oku emva kokuba oyise uSihon+ ukumkani wama-Amori, owayehlala eHeshbhon, no-Ogi+ ukumkani waseBhashan, owayehlala eAshtaroti e-Edreyi.+ 5 Kummandla waseYordan, kwilizwe lakwaMowabhi, uMoses wawacacisela amaSirayeli uMthetho,+ esithi:

6 “UYehova uThixo wethu wathi kuthi eHorebhe, ‘Lide eli xesha nihleli kulo mmandla weentaba.+ 7 Jikani niye ngakummandla weentaba wama-Amori+ nakuzo zonke iindawo eziyijikelezileyo, eArabha,+ kummandla weentaba, eShefela, eNegebhi, kunxweme lolwandle,+ kwilizwe lakwaKanan, eLebhanon,*+ nide niyokufika kumlambo omkhulu, uMlambo UmEfrate.+ 8 Jongani nali ilizwe phambi kwenu. Ngenani nilithathe ilizwe awafunga ngalo uYehova kookhokho benu, uAbraham, uIsake+ noYakobi,+ ukuba uza kulinika bona nenzala yabo eza kulandela emva kwabo.’+

9 “Ngelo xesha ndathi kuni, ‘Andikwazi ukunithwala ndodwa.+ 10 UYehova uThixo wenu unandisile, yaye namhlanje nibaninzi oku kweenkwenkwezi zamazulu.+ 11 Kwanga uYehova uThixo wookhokho benu anganandisa aniphindaphinde+ kaliwaka. Kwanga anganisikelela kanye njengoko enithembisile.+ 12 Ndingawuthwala njani ndodwa umthwalo onini, neengxaki zenu nokuxabana kwenu?+ 13 Kwizizwe zenu, zikhetheleni amadoda alumkileyo, aqondayo nanamava, yaye ndiza kuwamisela ukuba abe ziinkokheli zenu.’+ 14 Nina nathi, ‘Le nto uthi masiyenze ilungile.’ 15 Ngoko ndazithatha iinkokheli zezizwe zenu, amadoda alumkileyo nanamava, ndawamisela ukuba abe ziinkokheli zenu, iintloko zamawaka, iintloko zamakhulu, iintloko zamashumi amahlanu, iintloko zamashumi namagosa ezizwe zenu.+

16 “Ngelo xesha ­ndaziyalela iijaji zenu ndathi, ‘Xa kukho abantu abanengxaki baze bayizise kuni ukuze ixoxwe, nimele nigwebe ngobulungisa+ nokuba abo bantu ngamaSirayeli bobabini okanye omnye ngumntu wasemzini.+ 17 Ityala lomntu ophantsi limameleni+ ngokulinganayo nelomntu obalulekileyo.+ Sanukuboyika abantu+ kuba nguThixo ogwebayo;+ yaye ukuba ityala liyanohlula, liziseni kum, ndilive.’+ 18 Ngelo xesha ndaniyalela zonke izinto enifanele nizenze.

19 “Emva koko semka eHorebhe sanqumla la ntlango inkulu, yoyikekayo+ enayibonayo xa sasisiya kummandla weentaba wama-Amori,+ kanye njengokuba uYehova uThixo wethu wasiyalelayo, sada safika eKadeshe-bharneya.+ 20 Ndathi kuni, ‘Nifikile kummandla weentaba wama-Amori, esiwunikwa nguYehova uThixo wethu. 21 Jongani, uYehova uThixo wenu ulinika nina eli lizwe. Ngoko nyukani, nilithathe ibe lelenu, kanye njengokuba uYehova uThixo wookhokho benu watshoyo.+ Sanukoyika.’

22 “Kodwa ke nonke neza kum naza nathi, ‘Masithumeleni amadoda ayokusihlolela eli lizwe, aze abuye asichazele ukuba sihambe ngeyiphi indlela ibe zinjani izixeko esiza kudlula kuzo.’+ 23 Elo cebiso labonakala lilihle kum, ngoko ndakhetha amadoda ayi-12, ndathatha yanye kwisizwe ngasinye.+ 24 Ahamba ke aya kummandla weentaba,+ afika kwiNtlambo Yase-Eshkoli, aza alihlola elo lizwe. 25 Athatha ezinye zeziqhamo zalo, asiphathela zona aza athi, ‘Lihle ilizwe uYehova uThixo wethu asinika lona’+ 26 Kodwa zange nifune ukuya, anawuthobela umyalelo kaYehova uThixo wenu.+ 27 Nanisoloko nikhalaza ezintenteni zenu nisithi, ‘UYehova wayesicaphukela le nto wasikhupha eYiputa ukuze asinikele kuma-Amori, asitshabalalise. 28 Injani le ndawo siya kuyo? Abantakwethu basoyikisa+ xa bathi: “Phaya kukho abantu abomeleleyo nabade kunathi, izixeko zabo zikhulu yaye zibiyelwe ngeendonga ezinde ezifikelela emazulwini,*+ yaye sibone nama-Anaki.”’+

29 “Ngoko ndathi kuni, ‘Mabanganothusi okanye banoyikise.+ 30 UYehova uThixo wenu uza kuhamba phambi kwenu yaye uza kunilwela,+ kanye njengokuba nambonayo eYiputa enilwela.+ 31 Nasentlango nazibonela ukuba uYehova uThixo wenu wanithwala ngendlela indoda emthwala ngayo unyana wayo, nada naza kufika apha.’ 32 Kodwa phezu kwayo yonke loo nto, anizange nikholwe kuYehova uThixo wenu,+ 33 owayehamba phambi kwenu ukuze anikhangelele indawo yokuhlala. Wayebonakala ngomlilo ebusuku nangomqulu welifu emini, ukuze anibonise indlela.+

34 “Ngalo lonke elo xesha uYehova waziva izinto enanizithetha, yaye zamcaphukisa kakhulu waza wafunga wathi,+ 35 ‘Akukho nanye indoda ephuma kwesi sizukulwana sibi iza kulibona ilizwe elihle endafunga ukulinika ooyihlo,+ 36 ngaphandle kukaKalebhi unyana kaYefune. Yena uza kulibona, ibe ilizwe awahamba kulo ndiza kulinika yena noonyana bakhe, kuba yena wamlandela uYehova ngayo yonke intliziyo yakhe.*+ 37 (UYehova wacatshukiswa nandim lo ngenxa yenu, waza wathi, “Nawe awuzukungena phaya.+ 38 UYoshuwa unyana kaNun omi phambi kwakho,+ nguye oza kungena kwela lizwe.+ Mkhuthaze*+ kuba nguye oza kukhokelela amaSirayeli kulo.”) 39 Ngapha koko, abantwana benu enathi baza koxuthwa+ noonyana benu abangayaziyo into elungileyo nembi, ngabo abaza kungena kwela lizwe, yaye ndiza kulinika bona, bahlale kulo.+ 40 Kodwa ke nina phindelani entlango nihambe ngendlela eya kuLwandle Olubomvu.’+

41 “Nakuva loo mazwi nathi kum, ‘Simonile uYehova. Ngoku siza kunyuka siyokulwa, kanye njengokuba uYehova uThixo wethu esiyalele!’ Ngoko nonke nathatha izixhobo zemfazwe, kuba nicinga ukuba kuza kuba lula ukunyuka niyokuhlasela kuloo ntaba.+ 42 Kodwa wathi uYehova kum, ‘Yithi kubo: “Sanukunyuka niyokulwa,+ kuba andizukuba nani. Ukuba niyenyuka niza koyiswa ziintshaba zenu.”’ 43 Ngoko ndanixelela kodwa anizange nindimamele, nasuka anawuthobela umyalelo kaYehova, nazama ukunyuka ngenkani. 44 Ngoko ama-Amori awayehlala kuloo ntaba anihlangabeza aza anileqa ngathi ziinyosi, anichithachitha eSehire ukuya kutsho eHorma. 45 Ngoko nabuya naza kukhala kuYehova, kodwa uYehova zange animamele, futhi zange anihoye. 46 Yiloo nto nahlala ixesha elide kangaka eKadeshe.

2 “Ngoko saphindela entlango, sahamba ngendlela eya kuLwandle Olubomvu, kanye njengokuba uYehova wayetshilo kum,+ yaye sahamba iintsuku ezininzi ngakwiNtaba ISehire. 2 Ekugqibeleni wathi uYehova kum, 3 ‘Kudala nihamba ngakule ntaba. Ngoku jikani niye ngasemntla. 4 Uze ubayalele abantu uthi: “Niza kugqitha ngakumda wabantakwenu, inzala kaEsawu,+ abahlala eSehire,+ yaye baza kunoyika,+ ibe nani nimele nilumke. 5 Nize ningalwi nabo* kuba andizukuninika ilizwe labo, andizukuninika nendawo le elingene unyawo, kuba iNtaba ISehire ndiyinike uEsawu ukuba ahlale kuyo.+ 6 Nimele nikubhatalele ngemali ukutya eniza kukutya, namanzi eniza kuwasela.+ 7 Kuba uYehova uThixo wenu uye wayisikelela yonke into eniyenzileyo. Ulwazi kakuhle uhambo lwenu kule ntlango inkulu. UYehova uThixo wenu ebekunye nani kule minyaka iyi-40, yaye akukho nto beniyidinga.”’+ 8 Ngoko sadlula ngakubantakwethu abayinzala kaEsawu,+ abahlala eSehire, asahamba ngendlela eya eArabha, e-Elati nase-Etsiyon-gebhere.+

“Emva koko sajika sahamba ngendlela eya kwintlango yakwaMowabhi.+ 9 Emva koko uYehova wathi kum, ‘Uze ungalwi namaMowabhi, kuba andizukuninika ilizwe lawo ukuba nihlale kulo, kuba iAri ndiyinike inzala kaLote ukuba ihlale kuyo.+ 10 (Apho kwakukade kuhlala amaEma,+ abantu abanamandla, abaninzi kakhulu nabade njengama-Anaki. 11 NamaRefa+ ayefana nama-Anaki,+ yaye amaMowabhi ayewabiza ngokuba ngamaEma. 12 ESehire kwakuhlala amaHori,+ kodwa inzala kaEsawu yalithimba ilizwe lawo, yawatshabalalisa, yaza yahlala kulo.+ NamaSirayeli aza kwenza loo nto kubantu belizwe elililifa lawo, uYehova aza kuwanika lona nakanjani na.) 13 Ngoku ke hambani nize niwele iNtlambo YeZerede.’ Sayiwela ke iNtlambo YeZerede.+ 14 Sahamba iminyaka eyi-38 ukusuka eKadeshe-bharneya sada sawela iNtlambo YeZerede, lade lafa lonke ibandla lamadoda emfazwe, kanye njengokuba uYehova wayelifungele.+ 15 Isandla sikaYehova sasisilwa nawo ukuze siwatshabalalise,+ ade aphela.

16 “Ngokukhawuleza emva kokuba efe onke amadoda emfazwe,+ 17 uYehova waphinda wathetha nam wathi, 18 ‘Namhlanje uza kudlula ngakumhlaba wakwaMowabhi, oko kukuthi, iAri. 19 Xa usondela kuma-Amoni, uze ungawakhathazi okanye uwaqale, kuba andizukukunika ilizwe lawo ukuba uhlale kulo, kuba ndilinike inzala kaLote ukuba ihlale kulo.+ 20 Neli ilizwe kwakusithiwa lelamaRefa.+ (Kwakukade kuhlala amaRefa apho, yaye ama-Amoni ayewabiza ngokuba ngamaZamzumim. 21 Ayengabantu abanamandla, abaninzi kakhulu nabade njengama-Anaki;+ kodwa uYehova wawatshabalalisa phambi kwama-Amoni, yaye ama-Amoni awagxotha aza ahlala endaweni yawo; 22 Wayenzela loo nto inzala kaEsawu, ngoku ehlala eSehire,+ xa wawatshabalalisayo amaHori+ phambi kwayo, ukuze alithimbe ilizwe aze ahlale endaweni yawo de kube namhlanje. 23 Wona ama-Avi ayeneendawo zokuhlala ezifikelela eGaza,+ de amaKafetori awayephuma eKafetori*+ awatshabalalisa aza ahlala endaweni yawo.)

24 “‘Sukani nize niwele iNtlambo YeArnon.+ Jongani, ndimnikela esandleni senu uSihon+ umAmori, ukumkani waseHeshbhon. Loxutheni ilizwe lakhe, nimhlasele. 25 Ukususela namhlanje, ndiza kwenza zonke izizwana ezisemhlabeni zinoyike xa zisiva ngani. Ziza kuphazamiseka zize zingcangcazele* ngenxa yenu.’+

26 “Xa sasisentlango yeKedemoti+ ndathumela abathunywa kuKumkani uSihon waseHeshbhon benamazwi oxolo,+ athi, 27 ‘Ndicela ukunqumla elizweni lakho. Ndiza kuhamba endleleni kuphela, ndingaphumi kuyo.+ 28 Ndiza kukuthenga kuwe ukutya namanzi. Ndicela nje undivumele ndinqumle ngeenyawo, 29 ndide ndiyiwele iYordan, ndingene kwilizwe uYehova uThixo wethu asinika lona. Nenzala kaEsawu ehlala eSehire namaMowabhi ahlala eAri andivumela ndanqumla.’ 30 Kodwa uKumkani uSihon waseHeshbhon akazange asivumele sinqumle, kuba uYehova uThixo wakho wamyeka wanenkani+ nentliziyo yakhe yalukhuni, ukuze amnikele esandleni sakho, njengokuba kunjalo ngoku.+

31 “Emva koko uYehova wathi kum, ‘Jonga, sendimnikele kuwe uSihon nelizwe lakhe,+ lithimbe.’ 32 Wathi akuphuma uSihon nabo bonke abantu bakhe, eze kulwa nathi eYahatsa,+ 33 uYehova uThixo wethu wamnikela kuthi, samoyisa yena noonyana bakhe nabo bonke abantu bakhe. 34 Sazithimba zonke izixeko zakhe saza sazitshabalalisa, kunye namadoda, abafazi nabantwana ababekuzo. Akukho mntu samshiya ephila.+ 35 Sathatha imfuyo kuphela, kunye nezinye izinto esazithatha kwizixeko esazithimbayo. 36 Akukho dolophu singazange sifikelele kuyo, ukusuka eArohere+ esecaleni kweNtlambo YeArnon (kunye nesixeko esisentlanjeni), ukuya kutsho eGiliyadi. UYehova uThixo wethu wazinikela kuthi zonke.+ 37 Kodwa ke anizange nisondele kwilizwe lama-Amoni,+ kuwo wonke ummandla ongakwiNtlambo YeYabhoki,+ nakwizixeko ezikummandla weentaba, okanye kuyo nayiphi na indawo uYehova uThixo wethu athe makungayiwa kuyo.

3 “Emva koko sajika sahamba ngeNdlela Eya EBhashan. UOgi ukumkani waseBhashan waphuma nabantu bakhe bonke, wazokusihlasela e-Edreyi.+ 2 Wathi uYehova kum, ‘Sukumoyika, kuba ndiza kumnikela kuwe nabo bonke abantu bakhe nomhlaba wakhe. Nakuye uza kwenza laa nto uyenze kuSihon ukumkani wama-Amori, obehlala eHeshbhon.’ 3 Ngoko uYehova uThixo wethu wamnikela esandleni sethu uKumkani uOgi waseBhashan nabo bonke abantu bakhe yaye samxabela, de akwabikho mntu usindayo. 4 Emva koko sazithimba zonke izixeko zakhe. Sathatha zonke iidolophu zabo, sathatha izixeko eziyi-60, wonke ummandla waseArgobhi, ubukumkani bukaOgi eBhashan.+ 5 Zonke ezi zixeko zazikhuselwe ngeendonga eziphakamileyo, zineegeyithi neepali zokuvala, sathatha needolophu ezininzi ezisemaphandleni. 6 Kodwa ke sazitshabalalisa,+ kanye njengokuba senzayo kuKumkani uSihon waseHeshbhon, satshabalalisa zonke izixeko, amadoda, abafazi nabantwana.+ 7 Sathatha yonke imfuyo nezinto ezazikwezo zixeko.

8 “Ngelo xesha salithatha ilizwe kookumkani ababini bama-Amori+ ababekummandla weYordan, sasusela kwiNtlambo YeArnon saya kutsho kwiNtaba IHermon+ 9 (amaSidon ayeyibiza intaba iHermon ngokuba yiSiriyon, yaye wona ama-Amori ayeyibiza ngokuba yiSenire), 10 sathatha zonke izixeko ezikumhlaba othe tyaba, yonke iGiliyadi nayo yonke iBhashan ukuya eSaleka nase-Edreyi,+ izixeko zobukumkani bukaOgi eBhashan. 11 UKumkani uOgi waseBhashan wayengumRefa wokugqibela owayesaphila. Ibhokisi yakhe yomngcwabo yayenziwe ngentsimbi, yaye iseseRabha yama-Amoni. Yayiziikubhite* ezisithoba ubude, neekubhite ezine ububanzi ngokwekubhite eqhelekileyo. 12 Salohlutha ngelo xesha ilizwe: ukusuka eArohere+ engakwiNtlambo YeArnon, nehafu yommandla weentaba waseGiliyadi, ndaza izixeko zelo lizwe ndazinika amaRubhen namaGadi.+ 13 Enye ihafu yeGiliyadi nayo yonke iBhashan yobukumkani bukaOgi ndiyinike ihafu yesizwe sakwaManase.+ Wonke ummandla waseArgobhi eseBhashan wawusaziwa ngokuba lilizwe lamaRefa.

14 “UYayire+ unyana kaManase wathatha wonke ummandla waseArgobhi+ ukuya kutsho kumda wamaGeshure nowamaMahakati,+ waza ezo lali zaseBhashan wazithiya ngegama lakhe wathi yiHavoti-yayire,*+ kude kube namhlanje. 15 Yena uMakire ndamnika iGiliyadi.+ 16 Wona amaRubhen namaGadi+ ndawanika iGiliyadi ukuya kutsho kumda ophakathi kweNtlambo YeArnon, ukuba ube ngumda nokuya kutsho kwintlambo yaseYabhoki, engumda wama-Amoni, 17 neArabha neYordan nomda osusela eKinereti ukuya kutsho kuLwandle LwaseArabha, uLwandle LweTyiwa,* phantsi kwamathambeka ePisga, empumalanga.+

18 “Emva koko ndaniyalela ndathi: ‘UYehova uThixo wenu uninike eli lizwe ukuba libe lelenu. Onke amadoda angamakroti aza kuthatha izixhobo aze awele phambi kwabantakwabo, amaSirayeli.+ 19 Ngabafazi benu nabantwana benu abaza kushiyeka kwizixeko endininike zona kunye nemfuyo yenu (kuba ndazi kakuhle ukuba ninemfuyo eninzi), 20 ade uYehova abanike ukuphumla abantakwenu njengokuba esenza kuni, bade bahlale kulo ilizwe uYehova uThixo wenu abanika lona ngaphaya kweYordan. Emva koko nonke niza kubuyela kwimihlaba yenu endininike yona.’+

21 “Emva koko ndayalela uYoshuwa+ ndathi: ­‘Uzibonele ngamehlo akho into uYehova uThixo wakho ayenze kwaba kumkani babini. UYehova uza kwenza into efanayo kuzo zonke izizwe oza kuya kuzo.+ 22 Nimele ningazoyiki, kuba nguYehova uThixo wenu onilwelayo.’+

23 “Ngelo xesha ndamcenga uYehova ndathi, 24 ‘Yehova Nkosi enguMongami, uqalile ukusibonisa isicaka sakho ubukhulu bakho nengalo yakho enamandla,+ kuba nguwuphi uthixo emazulwini okanye osemhlabeni owenza imisebenzi emikhulu kangaka njengawe?+ 25 Ndiyakucela, ndivumele ndiwele ndilibone ilizwe elihle elingaphesheya kweYordan, loo mmandla mhle weentaba neLebhanon.’+ 26 Kodwa uYehova wayesenomsindo kum ngenxa yenu+ waza akandimamela. UYehova wasuka wathi kum, ‘Kwanele! Ungaphinde uthethe nam ngale nto. 27 Nyuka uye phezu kwentaba yePisga,+ uze ulibone ilizwe entshona, emntla, emzantsi nasempuma, kuba awuzukuyiwela iYordan.+ 28 Misela uYoshuwa,+ umkhuthaze uze umomeleze, kuba nguye oza kuwela+ phambi kwaba bantu, yaye nguye oza kubangela aba bantu balithathe ilizwe oza kulibona.’ 29 Yonke le nto yenzeka ngoxa sasihlala entlanjeni phambi kweBhete-peyore.+

4 “Ngoku ke Sirayeli, zimamele izigwebo nemithetho endinifundisa yona ukuba niyithobele, ukuze niphile,+ ningene nize nilithathe ilizwe uYehova uThixo wookhokho benu aninika lona. 2 Nize ningongezi yaye ninganciphisi kwilizwi endininika lona,+ ukuze niyenze imiyalelo kaYehova uThixo wenu endininika yona.

3 “Nizibonele ngamehlo enu oko uYehova wakwenzayo kuBhahali wasePehore; uYehova uThixo wenu watshabalalisa wonke umntu oyindoda kuni owalandela uBhahali wasePehore.+ 4 Kodwa nonke nina nibambelela nkqi kuYehova uThixo wenu nisaphila nanamhlanje. 5 Jongani, ndinifundise imithetho nezigwebo,+ kanye ngendlela uYehova uThixo wam andiyalele ngayo, ukuze niyithobele kwilizwe eniza kulithatha ibe lelenu. 6 Nimele niyithobele kakuhle,+ kuba loo nto iza kubonisa abantu abaza kuva ngale mithetho, ukuba nilumkile+ yaye niyaqonda,+ ibe baza kuthi, ‘Olu hlanga lukhulu lungabantu abalumkileyo nyhani nabaqondayo.’+ 7 Kuba luluphi uhlanga olukhulu olunoothixo abasondeleyo kulo ngendlela uYehova uThixo wethu asondele ngayo kuthi nanini na simfuna?+ 8 Iluluphi uhlanga olukhulu olunemithetho elungileyo nezigwebo njengawo wonke lo Mthetho ndiwubeka phambi kwenu namhlanje?+

9 “Hlala nje wena uzilumkele yaye uzigade, ukuze ungazilibali izinto oye wazibona ngamehlo akho ukuze zingemki entliziyweni yakho ubomi bakho bonke. Uze uzixelele noonyana bakho nabazukulwana bakho.+ 10 Ngemini owema ngayo phambi koYehova uThixo wakho eHorebhe, uYehova wathi kum, ‘Bahlanganise abantu, ukuze beve amazwi am,+ bafunde ukundoyika+ yonke imihla abayiphila emhlabeni nokuze bafundise noonyana babo.’+

11 “Ngoko ke nasondela, nema emazantsi entaba, ibe intaba yayivutha, umlilo wawuvutha ukuya kutsho emazulwini. Kwakukho amafu yaye kumnyama thsu.+ 12 Yaye uYehova wathetha nani esemlilweni.+ Neva nje amazwi, kodwa anabona mntu,+ yaba lilizwi lodwa.+ 13 Wenza isivumelwano nani+ awaniyalela ukuba nisigcine, oko kukuthi iMithetho Elishumi.+ Emva koko wayibhala kumacwecwe amatye amabini.+ 14 Ngelo xesha uYehova wandiyalela ukuba ndinifundise izigwebo nemithetho, ekuza kufuneka niyithobele kwilizwe eniza kungena kulo nilithathe.

15 “Ngoko zigadeni, ekubeni ningazange nibone mntu ngemini uYehova awathetha nani eHorebhe esemlilweni, 16 ningenzi ububi ngokwenza umfanekiso wayo nantoni na, nokuba ngowendoda okanye ngowebhinqa,+ 17 nokuba ngowasiphi na isilwanyana esisemhlabeni, okanye wentaka ebhabha esibhakabhakeni,+ 18 nokuba ngowayo nantoni na erhubuluzayo emhlabeni, okanye ngowayiphi na intlanzi esemanzini aphantsi komhlaba.+ 19 Xa ujonga emazulwini uze ubone ilanga, inyanga neenkwenkwezi, wonke nje umkhosi wamazulu, uze ungahendelwa ukuba uqubude kuwo, uwukhonze.+ Ezi zinto uYehova uThixo wakho uzinike bonke abantu phantsi kwamazulu. 20 Kodwa uYehova ukhuphe nina kwiziko lokunyibilikisa intsimbi, eYiputa, ukuba nibe ngabantu bakhe*+ yedwa njengokuba kunjalo namhlanje.

21 “UYehova wacatshukiswa ndim ngenxa yenu,+ waza wafunga esithi andizukuyiwela iYordan okanye ndiye kwilizwe elihle uYehova uThixo wenu aninika lona.+ 22 Kuba ndiza kufela apha; andizukuyiwela iYordan,+ kodwa nina niza kuyiwela, nilithathe libe lelenu eli lizwe lihle. 23 Nize nilumke, ningasilibali isivumelwano uYehova uThixo wenu awasenza nani,+ yaye ningazenzeli umfanekiso oqingqiweyo, ofana nayo nayiphi na into uYehova uThixo wakho ayaleleyo.+ 24 Kuba uYehova uThixo wakho ungumlilo otshabalalisayo,+ uThixo ofuna ukuba umntu azinikele ngokupheleleyo kuye.+

25 “Ukuba niba noonyana nabazukulwana, yaye seninexesha elide nihleli elizweni, nize nizonakalise, nenze umfanekiso oqingqiweyo+ wayo nantoni na, yaye nenze okubi emehlweni kaYehova uThixo wenu, nimcaphukise,+ 26 amazulu nomhlaba ngamangqina am namhlanje okuba nakanjani na niza kukhawuleza nitshabalale kwilizwe eniya kuhlala kulo, njengokuba niwela iYordan. Anizukuhlala ixesha elide kulo, niza kutshayelwa nithi tu.+ 27 UYehova uza kunisasaza phakathi kwezizwe,+ yaye bambalwa kuni abaza kusinda+ phakathi kweentlanga aza kunigxothela kuzo uYehova. 28 Apho kuza kunyanzeleka nikhonze oothixo bomthi nabamatye, abenziwe ngabantu,+ oothixo abangaboniyo okanye abangevayo okanye abangatyiyo okanye abanganukisiyo.

29 “Ukuba nithe nilapho namfuna uYehova uThixo wenu,+ nimfune ngentliziyo yenu yonke nangomphefumlo* wenu wonke,+ nakanjani na niza kumfumana. 30 Xa nisengxakini enkulu, zibe zinehlele nezi zinto ekuhambeni kwexesha, niza kutsho nibuyele kuYehova uThixo wenu nize nilimamele ilizwi lakhe.+ 31 Kuba uYehova uThixo wakho unguThixo onenceba.+ Akazukukulahla okanye akuyeke utshabalale okanye asilibale isivumelwano awasifungela ookhokho benu.+

32 “Khawubuzise ngamaxesha angaphambili, asusela mhla uThixo wenza umntu emhlabeni. Khangelisisani nisusele kwesinye isiphelo samazulu nise kwesinye. Ngaba yakha yenzeka into enkulu ngolu hlobo? Ngaba ukhona umntu owakhe weva into efana nayo?+ 33 Ngaba sikhona esinye isizwe esakhe seva ilizwi likaThixo liphuma emlilweni ngendlela nina enaliva ngayo, saza saqhubeka siphila?+ 34 Ngaba uThixo wakhe wazama ukuzithathela uhlanga phakathi kweentlanga ngemigwebo,* ngemiqondiso, ngemimangaliso,+ ngeemfazwe,+ ngesandla esomeleleyo,+ ngengalo eyoluliweyo nangezenzo ezoyikekayo+ njengoko uYehova uThixo wenu wenzayo phambi kwenu eYiputa? 35 Waziboniswa ezi zinto ukuze wazi ukuba uYehova nguThixo wokwenene;+ akekho omnye ngaphandle kwakhe.+ 36 Wakuvisa ilizwi esemazulwini ukuze akulungise, yaye emhlabeni wakubonisa umlilo wakhe omkhulu, ibe weva amazwi akhe ephuma emlilweni.+

37 “Ngenxa yokuba wayebathanda ookhokho bakho, uye wakhetha inzala* yabo,+ wanikhulula ngokwakhe eYiputa ngamandla akhe amakhulu. 38 Phambi kwenu wagxotha izizwe ezinkulu nezinamandla kunani, ukuze aningenise, ­aninike umhlaba wazo ube lilifa lenu, njengokuba kunjalo ­namhlanje.+ 39 Yazini ke namhlanje, futhi niyifake ezintliziyweni zenu into yokuba uYehova unguThixo wokwenene emazulwini phezulu nasemhlabeni phantsi.+ Akakho omnye.+ 40 Nimele niyigcine imithetho nemiyalelo yakhe endiniyalela yona namhlanje, ukuze nihlale ixesha elide kumhlaba aninika wona uYehova uThixo wenu.”+

41 Ngelo xesha uMoses wakhetha izixeko ezithathu kwicala elingasempuma kweYordan.+ 42 Ukuba umntu ubulele omnye ngempazamo, abe ebengamcaphukeli,+ umele abalekele kwesinye sezi zixeko ukuze ahlale ephila.+ 43 Nazi ke ezo zixeko: iBhetsere+ esentlango kumhlaba othe tyaba iza kuba yeyamaRubhen, iRamoti+ eseGiliyadi iza kuba yeyamaGadi, ize iGolan+ eseBhashan ibe yeyamaManase.+

44 Lo nguMthetho+ uMoses awawunika amaSirayeli. 45 Ezi zizikhumbuzo nezigwebo uMoses awazinika amaSirayeli emva kokuba ephume eYiputa,+ 46 kummandla waseYordan kwintlambo emelene neBhete-peyore,+ kumhlaba kaKumkani uSihon wama-Amori, owayehlala eHeshbhon,+ owoyiswa nguMoses namaSirayeli emva kokuba ephume eYiputa.+ 47 Bawuthatha umhlaba wakhe nokaKumkani uOgi+ waseBhashan, ookumkani ababini bama-Amori ababekummandla ongasempuma kweYordan, 48 ukususela eArohere,+ esecaleni kweNtlambo YeArnon, ukuya kutsho kwiNtaba ISiyon, oko kukuthi iHermon,+ 49 nayo yonke iArabha ekummandla ongasempuma kweYordan, ukuya kutsho kuLwandle LwaseArabha kumazantsi amathambeka asePisga.+

5 UMoses wawabiza onke amaSirayeli, wathi kuwo: “Khanincede maSirayeli nimamele imithetho nezigwebo endinixelela zona namhlanje, yaye nimele nizifunde nize nizithobele. 2 UYehova uThixo wethu wenza isivumelwano nathi eHorebhe.+ 3 Esi sivumelwano uYehova akazange asenze nookhokho bethu, kodwa wasenza nathi sonke silapha namhlanje. 4 UYehova wathetha nani ubuso ngobuso entabeni, esemlilweni.+ 5 Ngelo xesha ndandimi phakathi kwenu noYehova+ ukuze ndinixelele ilizwi likaYehova, kuba noyikiswa ngumlilo naza anayonyuka intaba.+ Wathi:

6 “‘NdinguYehova uThixo wakho, owakukhupha elizweni laseYiputa, kwindlu yobukhoboka.+ 7 Uze ungabi nabanye oothixo ngaphandle kwam.*+

8 “‘Uze ungazenzeli umfanekiso oqingqiweyo+ okanye into efana nayo nantoni na esemazulwini phezulu, esemhlabeni phantsi, okanye esemanzini phantsi komhlaba. 9 Uze ungaqubudi kuzo okanye uzikhonze,+ kuba mna Yehova Thixo wakho, ndinguThixo ofuna umntu azinikele ngokupheleleyo,+ yaye ndohlwaya oonyana ngesiphoso sootata babo, ndohlwaya isizukulwana sesithathu nesesine sabo bandicaphukelayo.+ 10 Kodwa ndibathanda ndingagungqi abo bandithandayo nabathobela imiyalelo yam, kude kuse kwisizukulwana sewaka.

11 “‘Uze ungaliphathi ngokungathi yinto engenaxabiso igama likaYehova uThixo wakho,+ kuba uYehova soze angamohlwayi nabani na oliphatha ngokungathi yinto engenaxabiso igama lakhe.+

12 “‘Wubhiyozele umhla weSabatha ukuze uwugcine ungcwele, kanye njengokuba ekuyalele uYehova uThixo wakho.+ 13 Umele uwenze wonke umsebenzi wakho iintsuku ezintandathu,+ 14 kodwa wona umhla wesixhenxe uyisabatha kuYehova uThixo wakho.+ Awumelanga wenze nawuphi na umsebenzi,+ wena, unyana wakho, intombi yakho, ikhoboka lakho, ikhobokazana lakho, inkunzi yakho yenkomo, idonki yakho, nasiphi na isilwanyana sakho sasekhaya nomntu wasemzini ohlala kwizixeko zakho,+ ukuze ikhoboka lakho nekhobokazana lakho liphumle njengawe.+ 15 Uze ukhumbule ukuba wawulikhoboka kwilizwe laseYiputa yaye uYehova uThixo wakho wakukhupha apho ngesandla esomeleleyo nangengalo eyoluliweyo.+ Yiloo nto uYehova uThixo wakuyalela ukuba uwubhiyozele umhla weSabatha.

16 “‘Mhloniphe utata wakho nomama wakho,+ njengokuba ekuyalele uYehova uThixo wakho, ukuze uphile ixesha elide yaye uphumelele* kwilizwe akunika lona uYehova uThixo wakho.+

17 “‘Uze ungabulali.+

18 “‘Uze ungakrexezi.*+

19 “‘Uze ungebi.+

20 “‘Uze ungangqini into ebubuxoki ngommelwane wakho.+

21 “‘Uze ungamnqweneli um­fazi wommelwane wakho.+ Uze ungayinqweneli indlu yommelwane wakho, intsimi yakhe, ikhoboka lakhe, ikhobokazana lakhe, inkunzi yakhe yenkomo, idonki yakhe okanye nantoni na yommelwane wakho.’+

22 “Le miyalelo* uYehova wayixelela lonke ibandla lenu entabeni. Wathetha ngelizwi elikhulu esemlilweni nakwilifu elimnyama thsu,+ yaye zange ongeze enye into. Emva koko wayibhala kumacwecwe amatye amabini waza wawanika mna.+

23 “Kodwa ngokukhawuleza xa neva ilizwi likhwaza ebumnyameni, kwabe kusitsha nentaba,+ zonke iinkokheli zezizwe zenu nabadala beza kum. 24 Emva koko nathi, ‘UYehova uThixo wethu usibonisile uzuko nobukhulu bakhe, yaye silivile ilizwi lakhe liphuma emlilweni.+ Namhlanje sibonile ukuba uThixo angathetha nomntu aze aqhubeke ephila.+ 25 Ngoku ke kutheni siza kude sife nje? Kaloku ekubeni lo mlilo umkhulu, unokusitshabalalisa. Ukuba siqhubeka sisiva ilizwi likaYehova uThixo wethu, siza kufa nakanjani na. 26 Kuba kubo bonke abantu ngubani owakha weva ilizwi loThixo ophilayo liphuma emlilweni njengathi waza waqhubeka ephila? 27 Makusondele wena kuye, ukuze uve yonke into aza kuyithetha uYehova uThixo wethu, yaye nguwe oza kuxelela thina yonke into uYehova uThixo wethu ayithethileyo, thina ke siza kumamela size siyenze.’+

28 “Ngoko uYehova waweva amazwi enawathethayo kum, waza wathi uYehova kum, ‘Ndiwavile amazwi abawathethe kuwe abantu. Ilungile yonke into abayithethileyo.+ 29 Akwaba nje bebenokuhlala benentliziyo ebenza bandoyike+ baze bayithobele yonke imiyalelo yam;+ izinto beziza kubahambela kakuhle bona noonyana babo ngonaphakade!+ 30 Yiya kubo uze uthi: “Buyelani ­ezintenteni zenu.” 31 Kodwa wena shiyeka apha nam, ndikuxelele yonke imiyalelo yam, imithetho yam nezigwebo zam oza kubafundisa zona nabamele bazigcine kwilizwe endibanika lona ukuba bahlale kulo.’ 32 Ngoku ke nina nimele niqiniseke ukuba nenza kanye le nto uYehova uThixo wenu aniyalele yona,+ ningajiki niye ekunene okanye ekhohlo.+ 33 Nifanele nihambe kanye ngendlela aniyalele ngayo uYehova uThixo wenu,+ ukuze niphile, niphumelele yaye nandise iintsuku zenu kwilizwe eniza kulithatha libe lelenu.+

6 “Ngoku ke nantsi imiyalelo, imithetho nezigwebo uYehova uThixo wenu afuna nizifundiswe, ukuze nizithobele xa niwela nisiya kwilizwe eliza kuba lelenu, 2 ukuze nimoyike uYehova uThixo wenu, nize niyithobele yonke imithetho yakhe nemiyalelo yakhe aniyalele yona, wena, unyana wakho nomzukulwana wakho,+ ubomi benu bonke ukuze niphile ixesha elide.+ 3 Umele umamele Sirayeli, uthobele ukuze uphumelele uze wande kwilizwe eligcwele ubisi nobusi, kanye njengokuba uYehova uThixo wookhokho bakho ekuthembisile.

4 “Mamela Sirayeli: ­UYehova uThixo wethu nguYehova mnye.+ 5 Umele umthande uYehova uThixo wakho ngentliziyo yakho yonke nangomphefumlo* wakho wonke+ nangamandla akho onke.*+ 6 La mazwi ndikuyalela wona namhlanje amele abe sentliziyweni yakho, 7 uze uwabethelele* ebantwaneni* bakho+ yaye uthethe ngawo xa uhleli endlini yakho, xa uhamba endleleni, xa ulala naxa uvuka.+ 8 Wabophelele esandleni sakho ukuze uwakhumbule, uwabophelele nasebunzi.+ 9 Wabhale emigubasini yendlu yakho nakwiingcango zesixeko.

10 “Xa uYehova uThixo wakho ekungenisa kwilizwe awalifungela ookhokho bakho, uAbraham, uIsake noYakobi,+ ekungenisa kwizixeko ezikhulu nezihle ongazakhanga,+ 11 kwizindlu ezigcwele izinto ezintle ongazisebenzelanga, ekunika namaqula ongawembanga, intsimi yeediliya nemithi yeminquma ongayityalanga, utye wanele,+ 12 uze ulumke, ungamlibali uYehova+ owakukhupha kwilizwe laseYiputa kwindlu yobukhoboka. 13 Uze umoyike uYehova uThixo wakho,+ umkhonze+ yaye ufunge ngegama lakhe.+ 14 Nize ningalandeli abanye oothixo, nabaphi na oothixo bezizwana eziningqongileyo,+ 15 kuba uYehova uThixo wenu ophakathi kwenu nguThixo ofuna umntu azinikele ngokupheleleyo kuye.+ Kungenjalo uYehova uThixo wenu uza kuba nomsindo+ anitshabalalise phezu komhlaba.+

16 “Nize ningamlingi uYehova uThixo wenu,+ ngendlela enamlinga ngayo eMasa.+ 17 Nize nizimisele ukugcina imiyalelo kaYehova uThixo wenu, nezinto anikhumbuza zona nemithetho yakhe aniyalele ukuba niyithobele. 18 Umele wenze okufanelekileyo nokulungileyo emehlweni kaYehova, ukuze uphumelele, nokuze ungene ulithathe ilizwe elihle uYehova awalifungela ookhokho bakho,+ 19 ngokuthi uzigxothe zonke iintshaba zakho, kanye njengoko uYehova wathembisayo.+

20 “Kwixesha elizayo, xa unyana wakho ekubuza esithi, ‘Zithetha ukuthini ezi zikhumbuzo, le mithetho nezi zigwebo uYehova uThixo wakho akuyalele zona?’ 21 uze uthi kunyana wakho, ‘Sasingamakhoboka kaFaro eYiputa, kodwa uYehova wasikhupha apho ngesandla esinamandla. 22 Sathi sijongile uYehova waqhubeka ethumela imiqondiso nemimangaliso emikhulu netshabalalisayo eYiputa,+ kuFaro nakwindlu yakhe yonke.+ 23 Wasikhupha apho ukuze asizise apha asinike eli lizwe awalifungela ookhokho bethu.+ 24 Emva koko uYehova wasiyalela ukuba siyithobele yonke le mithetho nokuba simoyike uYehova uThixo wethu ukuze izinto zihlale zisihambela kakuhle,+ nokuze sihlale siphila+ njengokuba kunjalo namhlanje. 25 Siya kuba singamalungisa ukuba siyithobela kakuhle yonke le miyalelo ukuze sithobele uYehova uThixo wethu, kanye njengokuba esiyalele.’+

7 “Xa uYehova uThixo wakho ekungenisa kweli lizwe osele uza kungena kulo ulithathe,+ uza kuzisusa phambi kwakho iintlanga ezinabantu abaninzi kunawe:+ amaHiti, amaGirgashi, ama-Amori,+ amaKanan, amaPerizi, amaHivi namaYebhusi,+ iintlanga ezisixhenxe nezinabantu abaninzi nezinamandla kunawe.+ 2 UYehova uThixo wakho uza kuzinikela kuwe, yaye wena uza kuzoyisa.+ Umele nakanjani uzitshabalalise.+ Uze ungenzi sivumelwano nazo, yaye ungazisizeli.+ 3 Uze ungatshatiselani nazo. Iintombi zakho uze ungaziniki oonyana bazo, okanye uthathele oonyana bakho iintombi zazo.+ 4 Kuba ziza kwenza oonyana bakho bayeke ukundilandela, bakhonze abanye oothixo;+ yaye uYehova uza kuba nomsindo, aze akhawuleze anitshabalalise.+

5 “Ngoko nantsi into emaniyenze kuzo: Zidilizeni izibingelelo zazo, niziqhekeze iintsika zazo ezingcwele,+ zigawuleni iipali zazo ezingcwele,*+ nize niyitshise imifanekiso yazo eqingqiweyo.+ 6 KuYehova uThixo wenu nisisizwana esingcwele, ibe uYehova uThixo wenu unikhethile ukuba nibe ngabantu bakhe, abantu bakhe abakhethekileyo,* kuzo zonke izizwana eziphezu komhlaba.+

7 “UYehova akazange anithande aze anikhethe kuba nisisizwana esinabona bantu baninzi.+ Kaloku nanisesona sizwana sincinci.+ 8 Kodwa kungenxa yokuba uYehova wayenithanda yaye efuna ukugcina isifungo awayesenze kookhokho benu,+ le nto uYehova wanikhuphayo ngesandla esomeleleyo, wanikhulula kwindlu yobukhoboka,+ phantsi kukaFaro ukumkani waseYiputa. 9 Nazi kakuhle ukuba uYehova uThixo wenu nguThixo wokwenene, uThixo othembekileyo, osigcinayo isivumelwano nongagungqiyo ekuthandeni izizukulwana eziliwaka zabo bamthandayo nabayithobelayo imiyalelo yakhe.+ 10 Kodwa abo bamcaphukelayo uza kuziphindezelela ngokwakhe kubo, ngokubatshabalalisa.+ Akazukulibazisa ukohlwaya abo bamcaphukelayo. Uza kuziphindezelela ngokwakhe. 11 Ngoko qinisekani ukuba niyayigcina imiyalelo nemithetho nezigwebo endiniyalela zona namhlanje, ngokuthi nizithobele.

12 “Ukuba niyaqhubeka nizimamela ezi zigwebo, nizithobele yaye nizenze, uYehova uThixo wenu uza kusigcina isivumelwano sakhe aze anithande ngokungagungqiyo kanye njengokuba wafungayo kookhokho benu. 13 Uza kunithanda, anisikelele aze anandise. Uza kunisikelela ngabantwana abaninzi,+ ngesivuno esivela emhlabeni wenu, ngokutya kwenu okuziinkozo, ngewayini yenu entsha, ngeoli yenu,+ ngamathole eenkomo zenu nangamatakane eegusha zenu, kwilizwe awafunga kookhokho benu ukuba uza kuninika lona.+ 14 Kubo bonke abantu niza kuba ngabona basikelelweyo;+ akukho ndoda okanye mfazi ungazukuba nabantwana, yaye akuzukubakho mfuyo ingazaliyo.+ 15 UYehova uza kuzisusa zonke izifo kuni, yaye akazukunizisela izifo ezibi enazibonayo eYiputa.+ Endaweni yoko uza kuzizisa kubo bonke abo banicaphukelayo. 16 Nize nizitshabalalise* zonke izizwana uYehova uThixo wenu azinikela kuni.+ Nize ningazisizeli,+ yaye ningazikhonzi izithixo zazo,+ kuba loo nto iza kunifaka engxakini.+

17 “Ukuba ningacinga le nto ezintliziyweni zenu, ‘Ezi ntlanga zinabantu abaninzi kakhulu kunathi. Siza kuzigxotha njani?’+ 18 nize ningazoyiki.+ Nimele nikhumbule into awayenzayo uYehova uThixo wenu kuFaro nakuyo yonke iYiputa,+ 19 izigwebo* ezikhulu enazibonayo, imiqondiso, imimangaliso,+ isandla esinamandla nengalo eyoluliweyo uYehova uThixo wenu awanikhupha ngayo apho.+ Yiloo nto kanye uYehova uThixo wenu aza kuyenza kuzo zonke izizwana enizoyikayo.+ 20 UYehova uThixo wenu uza kubenza badakumbe abo bashiyekileyo,+ nabanizimeleyo bade batshabalale. 21 Nize ningoyikiswa zizo, kuba uYehova uThixo unani,+ unguThixo onamandla nowoyikekayo.+

22 “Ngokuqinisekileyo uYehova uThixo wenu uza kuzisusa kancinci kancinci ezi ntlanga phambi kwenu.+ Awuzukuvunyelwa ukuba uzitshabalalise ngokukhawuleza, ukuze izilwanyana zasendle zingabi ninzi ngaphezu kwenu. 23 UYehova uThixo wenu uza kuzinikela kuni ezo ntlanga nizoyise, nide nizitshabalalise.+ 24 Ookum­kani bazo uza kubanikela esandleni senu,+ yaye niza kuwacima amagama abo phantsi kwamazulu.+ Akukho mntu uza kumelana nani+ nide nizitshabalalise ezo ntlanga.+ 25 Nimele niyitshise imifanekiso yoothixo bazo.+ Nize ningayibaweli isilivere negolide ekuyo okanye niyithathe,+ ukuze inganirhintyeli kuba uYehova uThixo wenu uyayenyanya.+ 26 Animele nize nezinto ezenyanyekayo ezindlini zenu kuze kufuneke nani nitshatyalaliswe njengazo. Zifanele zibe nezothe kuni, yaye nizicaphukele nyhani kuba zifanelwe yintshabalalo.

8 “Qinisekani ukuba niyithobela yonke imiyalelo endininika yona namhlanje, ukuze niqhubeke niphila,+ nande nize ningene nilithathe ilizwe uYehova awalifungela ookhokho benu.+ 2 Nize niyikhumbule indlela ende anihambise kuyo uYehova uThixo wenu entlango kule minyaka iyi-40,+ ukuze anithobe, anivavanye+ azokutsho azi oko kusezintliziyweni zenu,+ azi ukuba niza kuyithobela na imiyalelo yakhe okanye anizukuyithobela. 3 Ngoko wanithoba, waniyeka nalamba,+ waza wanondla ngemana,+ into enaningayazi, nababengayazi nootata benu, ukuze nazi ukuba ubomi bomntu abuxhomekekanga ekutyeni kuphela, kodwa buxhomekeke nakuyo yonke into ethethwa nguYehova.+ 4 Iimpahla zenu khange ziguge, ibe neenyawo zenu khange zidumbe kule minyaka iyi-40.+ 5 Niyazi kakuhle into yokuba uYehova uThixo wenu ebenilungisa kanye njengokuba utata emlungisa unyana wakhe.+

6 “Ngoku ke nize niyithobele imiyalelo kaYehova uThixo wenu, ngokuhamba ngeendlela zakhe yaye nimoyike. 7 Kuba uYehova uThixo wenu uningenisa kwilizwe elihle,+ ilizwe elinemijelo yamanzi, imithombo ehamba kumathafa aneentlambo nasezintabeni, 8 ilizwe lengqolowa nerhasi, lemithi yeediliya, imithi yamafiya neerharnati,+ ilizwe leoli yeminquma nobusi,+ 9 ilizwe ongazukunqatyelwa kukutya kulo okanye udinge nto, ilizwe elinamatye anentsimbi, ilizwe elineentaba oza kufumana ikopolo kuzo.

10 “Nize nithi ke nakutya nanele, nimdumise uYehova uThixo wenu ngenxa yokuba eninike ilizwe elihle.+ 11 Nize nilumke ningamlibali uYehova uThixo wenu ngokungayithobeli imiyalelo yakhe, izigwebo zakhe nemithetho yakhe aniyalela yona namhlanje. 12 Xa nitye nanela, nakha izindlu ezintle nahlala kuzo,+ 13 xa umhlambi wenu weenkomo noweegusha usanda, nesilivere negolide yenu isanda, yaye ninezinto ezininzi kakhulu; 14 nize ningazivumeli iintliziyo zenu ziphakame,+ zinenze nimlibale uYehova uThixo wenu, owanikhupha kwilizwe laseYiputa, endlini yobukhoboka,+ 15 owanihambisa kwintlango enkulu neyoyikekayo,+ eneenyoka ezinetyhefu noonomadudwane, eyomileyo yaye ingenamanzi. Wanikhuphela amanzi eliweni+ 16 waza wanondla ngemana entlango,+ into ootata benu ababengayazi, ukuze anithobe+ aze anivavanye ukuze izinto zinihambele kakuhle kwixesha elizayo.+ 17 Ukuba nizixelela le nto, ‘Ngamandla ethu nezandla zethu ezomeleleyo ezisizisele obu butyebi,’+ 18 nize nikhumbule ukuba nguYehova uThixo wenu oninika amandla aninceda nifumane ubutyebi,+ ukuze agcine isivumelwano awasenza nookhokho benu, njengokuba kunjalo namhlanje.+

19 “Ukuba nikhe nje namlibala uYehova uThixo wenu, nalandela abanye oothixo, nabakhonza naza naqubuda kubo, ndiyanilumkisa namhlanje ukuba niza kutshabalala nakanjani na.+ 20 Njengeentlanga uYehova azitshabalalisayo phambi kwenu, niza kutshabalala ngolo hlobo nani kuba ningalimamelanga ilizwi likaYehova uThixo wenu.+

9 “Yivani maSirayeli, namhlanje niwela iYordan+ nisiya kuhlutha ilizwe kwiintlanga ezinkulu nezinamandla kunani,+ niyokohlutha izixeko ezikhulu ezibiyelwe ngeendonga ezirhec’ izulu,+ 2 isizwe sabantu abanamandla nabade, oonyana baka-Anaki,+ enibaziyo nenivileyo kusithiwa ngabo, ‘Ngubani onokumelana noonyana baka-Anaki?’ 3 Ngoko ke nimele nazi namhlanje ukuba uYehova uThixo wenu uza kuwela phambi kwenu.+ Ungumlilo otshabalalisayo+ yaye uza kubatshabalalisa. Uza kuboyisa phambi kwenu ukuze nikhawuleze nibagxothe* kanye njengokuba uYehova enithembisile.+

4 “Xa uYehova uThixo wenu ezigxotha ezi ntlanga phambi kwenu, nize ningathi ezintliziyweni zenu, ‘Kungenxa yokuba ndililungisa le nto uYehova endingenise kweli lizwe ukuba ndilithathe.’+ Kunoko, kungenxa yokwenza kwazo ububi+ le nto uYehova ezigxotha phambi kwenu. 5 Akaniniki eli lizwe ukuba nilithathe ngenxa yokuba ningamalungisa okanye nineentliziyo ezilungileyo. Kunoko kungenxa yokwenza kwazo ububi le nto uYehova uThixo wenu ezigxotha phambi kwenu+ ukuze uYehova afezekise amazwi awawafungela ookhokho benu, uAbraham,+ uIsake+ noYakobi.+ 6 Ngoko ke yazini le nto, ayikokuba ningamalungisa le nto uYehova uThixo wenu eninika eli lizwe lihle ukuba nilithathe, kuba nisisizwana esinenkani.*+

7 “Khumbulani, ningaze niyilibale indlela enamcaphukisa ngayo entlango uYehova uThixo wenu.+ Ukususela ngemini enaphuma ngayo eYiputa nade nazokufika apha, beningamthobeli uYehova.+ 8 Nkqu naseHorebhe namcaphukisa uYehova, wada uYehova wacaphuka kangangokuba wafuna ukunitshabalalisa.+ 9 Xa ndenyuka intaba ndiyokuthatha amacwecwe amatye,+ amacwecwe esivumelwano uYehova awasenza nani,+ ndahlala apho iintsuku eziyi-40 nobusuku bazo,+ ndingatyi kutya yaye ndingaseli manzi. 10 Emva koko uYehova wandinika loo macwecwe mabini amatye ebhalwe ngomnwe wakhe, kwaye kuwo kwakubhalwe onke amazwi awayewathethile uYehova kuni entabeni, esemlilweni mhla ibandla lalihlanganisene ngakuloo ntaba.+ 11 Zathi zakuphela iintsuku eziyi-40 neengokuhlwa eziyi-40, uYehova wandinika amacwecwe amabini amatye, amacwecwe esivumelwano, 12 waza uYehova wathi kum, ‘Yehla ngokukhawuleza, kuba abantu bakho owabakhupha eYiputa benze ububi.+ Bakhawuleze bayishiya indlela endabayalela ukuba bahambe ngayo. Bazenzele umfanekiso wesinyithi.’+ 13 Emva koko uYehova wathi kum: ‘Ndisibonile esi sizwana, ukuba sisizwana esinenkani.*+ 14 Ndiyeke ndisitshayele, ndicime negama laso phantsi kwamazulu, ndize ndenze wena uhlanga olukhulu nolunabantu abaninzi kunaso.’+

15 “Emva koko ndajika ndehla entabeni, ngoxa intaba yayivutha,+ ndiphethe amacwecwe amabini esivumelwano ezandleni zam.+ 16 Ndajonga, ndabona ukuba nimonile uYehova uThixo wenu! Nanizenzele ithole lenkomo lesinyithi. Nakhawuleza naphuma endleleni uYehova awayeniyalele ukuba nihambe ngayo.+ 17 Ngoko ndathatha loo macwecwe mabini ndawalahla phantsi, ndawaphula aziingceba phambi kwenu.+ 18 Ndaqubuda phambi koYehova, njengasekuqaleni, iintsuku eziyi-40 neengokuhlwa eziyi-40. Andityanga kutya, yaye andiselanga manzi,+ ngenxa yazo zonke izono zenu enazenzayo ngokwenza ububi emehlweni kaYehova, nimcaphukisa. 19 Kuba ndandisoyika kakhulu ngenxa yomsindo uYehova awayenawo kuni,+ kuba wayefuna ukunitshabalalisa. Kodwa ke uYehova wandimamela nangelo xesha.+

20 “UYehova waba nomsindo omkhulu kuAron kangangokuba wayefuna ukumtshabalalisa,+ kodwa ngelo xesha ndathetha noThixo ndimcengela. 21 Emva koko ndathatha loo nto eyanibangela naba nesono, ithole,+ ndaza ndalitshisa. Ndalityumza, ndalicola laluthuli emva koko ndaluphosa emanzini omlambo owawuphuma entabeni.+

22 “NaseTabhera,+ eMasa+ naseKibroti-hatava,+ namcaphukisa uYehova waba nomsindo. 23 Xa uYehova wathi hambani eKadeshe-bharneya+ waza wathi, ‘Nyukani nilithathe ilizwe endiqinisekileyo ukuba ndiza kuninika lona!’ nawulwa loo myalelo kaYehova uThixo wenu,+ yaye zange nibe nokholo,+ zange nimthobele. 24 Nanimlwa uYehova ukususela ngemini endanazi ngayo.

25 “Ndaqhubeka ndiqubuda phambi koYehova iintsuku eziyi-40 neengokuhlwa eziyi-40.+ Ndaqubuda kuba uYehova wayesithi uza kunitshabalalisa. 26 Ndaqalisa ukumcenga uYehova ndathi, ‘Yhini Yehova Nkosi enguMongami, sukubatshabalalisa abantu bakho. Bangabantu bakho abakhethekileyo+ owabakhulula ngobukhulu bakho, waza wabakhupha eYiputa ngesandla esomeleleyo.+ 27 Khumbula uAbraham, uIsake noYakobi abakhonzi bakho.+ Sukujonga ukuba nenkani kwesi sizwana, ukwenza kwaso ububi nesono saso.+ 28 Kungenjalo abantu belizwe owasikhupha kulo basenokuthi: “UYehova akakwazanga ukusingenisa kwilizwe awasithembisa sona esi sizwana, yaye kuba esicaphukela, wasikhupha ukuze asibulalele entlango.”+ 29 Ngabantu bakho, abantu bakho wedwa,+ owabakhupha ngamandla akho amakhulu nangengalo yakho eyoluliweyo.’+

10 “Ngelo xesha uYehova wathi kum, ‘Ziqingqele amacwecwe amatye abe mabini njengalawa okuqala,+ uze unyuke uze kum entabeni; uzenzele netyeya* ngomthi. 2 Ndiza kubhala kuloo macwecwe amazwi ebekula macwecwe okuqala, uze uwabeke kwityeya.’ 3 Ngoko ke ndayenza ityeya ngomthi womnga, ndaqingqa namacwecwe amabini amatye njengalawa okuqala, ndaza ndenyuka intaba, ndiwaphethe ngezandla loo macwecwe.+ 4 Emva koko uThixo wawabhala loo mazwi awayewabhale ekuqaleni,+ iMithetho Elishumi,*+ amazwi uYehova awayewathethe kuni entabeni, esemlilweni,+ ngemini ibandla elalihlanganisene ngayo;+ emva koko uYehova wandinika wona. 5 Emva koko ndajika, ndehla entabeni+ ndaza loo macwecwe ndawafaka kwityeya endandiyenzile, apho aye ahlala khona, kanye njengokuba uYehova wayendiyalele.

6 “AmaSirayeli emka eBheheroti Bhene-yahakan aya eMosera. UAron wafela apho, wangcwatyelwa khona,+ waza uEleyazare unyana wakhe waba ngumbingeleli endaweni yakhe.+ 7 Bemka apho baya eGudegoda, basuka eGudegoda baya eYotebhata,+ ilizwe elinemijelo yamanzi.

8 “Ngelo xesha uYehova wakhetha isizwe sakwaLevi+ ukuba sithwale ityeya kaYehova yesivumelwano,+ sime phambi koYehova ukuze simsebenzele, size sisikelele egameni lakhe,+ njengokuba sisenza namhlanje. 9 Yiloo nto uLevi engenaso isabelo somhlaba okanye ilifa nabantakwabo. NguYehova ilifa lakhe, kanye njengoko uYehova uThixo wenu watshoyo kuye.+ 10 Mna ndahlala entabeni njengasekuqaleni iintsuku eziyi-40 neengokuhlwa eziyi-40,+ nangelo xesha uYehova wandiva.+ UYehova wagqiba kwelokuba anganitshabalalisi. 11 Emva koko uYehova wathi kum, ‘Khokela abantu nize nilungiselele ukuhamba, ukuze balithathe ilizwe endafunga kookhokho babo ukuba ndiza kubanika lona.’+

12 “Ngoku ke Sirayeli, yintoni uYehova uThixo wakho ayifunayo kuwe?+ Yile kuphela: yoyika uYehova uThixo wakho,+ uhambe ezindleleni zakhe zonke,+ umthande, umkhonze uYehova uThixo wakho ngentliziyo yakho yonke nangomphefumlo* wakho wonke,+ 13 uze uthobele imiyalelo nemithetho kaYehova endikuyalela yona namhlanje, ukuze izinto zikuhambele kakuhle.+ 14 Jonga, amazulu ngakaYehova uThixo wakho, nditsho amazulu awo amazulu, nomhlaba nayo yonke into ekuwo.+ 15 Kodwa ngookhokho benu uYehova aye wasondela kubo waza wabathanda, yaye ukhethe nina nzala yabo+ phakathi kwazo zonke izizwana, njengoko kunjalo namhlanje. 16 Ngoko ke cocani iintliziyo zenu+ nize niyeke ukuba nenkani.*+ 17 Kuba uYehova uThixo wenu nguThixo woothixo+ neNkosi yeenkosi, nguThixo omkhulu, onamandla, owoyikekayo, ongenamkhethe+ nongasamkeliyo isinyobo. 18 Umenzela ubulungisa umntwana ongenatata nomhlolokazi,+ yaye uyamthanda umntu wasemzini,+ umnika ukutya neempahla. 19 Nani nimele nimthande umntu wasemzini, kuba naningabantu basemzini eYiputa.+

20 “Uze umoyike uYehova uThixo wakho, umkhonze,+ unamathele kuye yaye ufunge ngegama lakhe. 21 Nguye omele umdumise.+ UnguThixo wakho okwenzele zonke ezi zinto zinkulu nezimangalisayo aye azibona amehlo akho.+ 22 Ookhokho bakho baya eYiputa beyi-70,+ kodwa ngoku uYehova uThixo wakho unenze naba baninzi oku kweenkwenkwezi zamazulu.+

11 “Uze umthande uYehova uThixo wakho,+ uhlale uzenza izinto afuna uzenze, uthobele imithetho yakhe, izigwebo zakhe nemiyalelo yakhe. 2 Ezi zinto ndizibhekisa kuni, kungekhona oonyana benu abangayaziyo nabangayibonanga ingqeqesho kaYehova uThixo wenu,+ ubukhulu bakhe,+ isandla sakhe esinamandla+ nengalo yakhe eyoluliweyo. 3 Abazange bayibone imimangaliso kaThixo nezinto awazenza eYiputa kuFaro ukumkani waseYiputa nakulo lonke ilizwe lakhe;+ 4 okanye oko wakwenza kumkhosi waseYiputa, kumahashe kaFaro nakwiinqwelo zakhe zokulwa, xa wazigubungela ngamanzi oLwandle Olubomvu ngokuya zazinileqa, waza uYehova wazitshabalalisa ngonaphakade.+ 5 Abazange bazibone izinto uThixo awanenzela* zona entlango, nada naza kufika kule ndawo, 6 okanye into awayenza kuDatan noAbhiram oonyana bakaEliyabhi unyana kaRubhen, xa kwavuleka umhlaba waza wabaginya phambi kwawo onke amaSirayeli, waginya neentsapho zabo, iintente zabo nabo bonke abantu nemfuyo eyayibalandela.+ 7 Nazibonela ngamehlo enu zonke izinto ezinkulu uYehova awazenzayo.

8 “Nimele niyithobele yonke imiyalelo endiniyalela yona namhlanje, ukuze nibe luhlanga olomeleleyo nize ningene, nilithathe ilizwe, 9 nokuze nihlale ixesha elide+ kwilizwe uYehova awafunga ukulinika ookhokho benu nenzala yabo,+ ilizwe eligcwele ubisi nobusi.+

10 “Eli lizwe eniza kulithatha alifani nelizwe laseYiputa enaphuma kulo, apho nanityala imbewu nize niyinkcenkceshele nzima, njengegadi yemifuno. 11 Kodwa ilizwe enisele niza kuwela ningene kulo, lilizwe elineentaba neentlambo.+ Lifumana amanzi emvula.+ 12 Lilizwe alikhathalelayo uYehova uThixo wakho. Amehlo kaYehova uThixo wakho asoloko ekulo, ukususela ekuqaleni konyaka ukuya ekupheleni kwawo.

13 “Ukuba nizimisele ukuthobela imiyalelo yam endiniyalela yona namhlanje, nize nimthande uYehova uThixo wenu, nimkhonze ngentliziyo yenu yonke nangomphefumlo* wenu wonke,+ 14 ndiza kulinika imvula ilizwe lenu ngexesha elifanelekileyo, imvula yasekwindla nemvula yasentwasahlobo, yaye niza kutsho niqokelele ukutya kwenu okuziinkozo, iwayini yenu entsha neoli yenu.+ 15 Emadlelweni enu kuza kubakho utyani ukuze imfuyo yenu itye, nize nani nitye nanele.+ 16 Nize nilumke ukuba intliziyo yenu ingahendeki, nikhonze abanye oothixo yaye niqubude kubo.+ 17 Kungenjalo uYehova uza kucaphuka kakhulu, awavale amazulu kuze kunganethi,+ uze nomhlaba ungabi namveliso, nikhawuleze nitshabalale kwilizwe elihle uYehova aninika lona.+

18 “La mazwi nimele niwabethelele ezintliziyweni nasemiphefumlweni yenu, niwabophelele ezandleni zenu ukuze niwakhumbule, niwabophelele nasebunzi.+ 19 Nize niwafundise abantwana benu, nithethe ngawo xa nihleli ezindlini zenu, xa nihamba endleleni, xa nilala naxa nivuka.+ 20 Nize niwabhale emigubasini yezindlu zenu nasezigeyithini, 21 ukuze nina noonyana benu nihlale ixesha elide+ kwilizwe uYehova awafunga ukulinika ookhokho benu,+ nihlale kulo yonke imihla amazulu esephezu komhlaba.

22 “Ukuba niyayithobela yonke le miyalelo endininika yona nize niyenze, nimthande uYehova uThixo wenu,+ nihambe ngeendlela zakhe zonke nize nithi nca kuye,+ 23 uYehova uza kuzigxotha zonke ezi ntlanga phambi kwenu,+ yaye niza koxutha amazwe eentlanga ezinkulu nezinabantu abaninzi ngaphezu kwenu.+ 24 Zonke iindawo eniza kuhamba kuzo, ziza kuba zezenu.+ Umda wenu uza kususela entlango uye eLebhanon, ususele eMlanjeni, umlambo umEfrate, uye kulwandle lwasentshona.*+ 25 Akukho mntu uza kumelana nani.+ UYehova uThixo wenu uza kubenza banoyike baze bankwantye abantu belizwe eniza kuhamba kulo,+ kanye njengokuba enithembisile.

26 “Jongani, namhlanje ndibeka phambi kwenu intsikelelo nesiqalekiso:+ 27 intsikelelo niza kuyifumana ukuba niyayithobela imiyalelo kaYehova uThixo wenu endiniyalela yona namhlanje,+ 28 yaye niza kuqalekiswa xa ningayithobeli imiyalelo kaYehova uThixo wenu,+ niphume endleleni endiniyalela ukuba nihambe ngayo, nize nilandele oothixo ebeningabazi.

29 “Xa uYehova eningenisa kwilizwe eniza kuhlala kulo, nimele niyisikelele iNtaba YeGerizim, nize niyiqalekise iNtaba Ye-Ebhali.+ 30 Ngaba ezi ntaba azikho ngaphesheya kweYordan ngasentshona, kwilizwe lamaKanan ahlala eArabha, emelene neGiligali, ecaleni kwemithi emikhulu kaMore?+ 31 Niwela iYordan ukuze ningene nilithathe ilizwe aninika lona uYehova uThixo wenu.+ Xa sele nihlala kulo, 32 nize niqiniseke ukuba niyayithobela yonke imithetho nezigwebo endinixelela zona namhlanje.+

12 “Nantsi imithetho nezigwebo enimele niqiniseke ukuba niyayithobela, ngayo yonke imihla enihleli ngayo kwilizwe uYehova uThixo wookhokho benu aninike lona ukuba nihlale kulo. 2 Nifanele nizitshabalalise ngokupheleleyo zonke iindawo apho iintlanga eniza koxutha amazwe azo zibakhonzela khona oothixo bazo,+ nokuba kusezintabeni eziphakamileyo okanye ezindulini okanye phantsi kwayo nayiphi na imithi eluhlaza. 3 Nize nizidilize izibingelelo zazo, niziqhekeze iintsika zazo ezingcwele,+ nizitshise iipali zazo ezingcwele,* niyigawule imifanekiso eqingqiweyo yoothixo bazo,+ nibatshayele baphele oothixo bazo kuloo ndawo.+

4 “Nize ningamkhonzi ngolo hlobo uYehova uThixo wenu.+ 5 Kunoko ukuze nimkhonze uYehova uThixo wenu nimele niye kwindawo akhethe ukulibeka kuyo igama lakhe,+ nakwindawo akhethe ukuhlala kuyo phakathi kwezizwe zenu. 6 Nimele niyise apho iminikelo yenu etshiswayo,+ imibingelelo yenu, izishumi zenu,+ iminikelo yezandla zenu,+ iminikelo yezifungo zenu, iminikelo yenu yokuzithandela+ namazibulo emihlambi yenu yeenkomo neyeegusha.+ 7 Nina neentsapho zenu nimele nityele apho phambi koYehova uThixo wenu,+ nize nivuyiswe zizo zonke izinto enizenzileyo,+ kuba uYehova uThixo wenu unisikelele.

8 “Nize ningenzi ngale ndlela senza ngayo ngoku, le yokuba umntu esenza loo nto ayibona ilungile,* 9 kuba ningekafiki kwindawo yokuphumla+ nelilifa uYehova uThixo wenu aninika lona. 10 Xa niyiwelile iYordan+ naza nahlala kwilizwe aninika lona uYehova uThixo wenu, nakanjani na uza kuniphumza kwiintshaba zenu ezinijikelezileyo, yaye niza kuhlala nikhuselekile.+ 11 Nimele nise zonke ezi zinto endiniyalela zona kwindawo uYehova uThixo wenu akhethe ukulibeka kuyo igama lakhe,+ iminikelo yenu etshiswayo, imibingelelo yenu, izishumi zenu,+ iminikelo esuka ezandleni zenu nayo yonke iminikelo yezifungo enizenzela uYehova. 12 Nimele nivuye phambi koYehova uThixo wenu,+ nina noonyana benu, iintombi zenu, amakhoboka enu, amakhobokazana enu nabaLevi abahlala ezixekweni zenu kuba abanasabelo okanye lifa kunye nani.+ 13 Nize nilumke ningenzi iminikelo etshiswayo nakweyiphi na indawo.+ 14 Nize nenze imibingelelo kuphela kwindawo uYehova ayikhethayo, kumhlaba wesinye sezizwe zenu apho nifanele nenze yonke into endiniyalela yona.+

15 “Nanini na ninqwenela inyama, xhelani nitye,+ ngokobuninzi bezilwanyana uYehova anisikelele ngazo kuzo zonke izixeko zenu. Umntu ococekileyo nongacocekanga bangatya inyama njengoko bebeya kwenza xa bebesitya ibhadi okanye impunzi. 16 Kodwa nimele ningalityi igazi;+ nimele nilichithe emhlabeni njengamanzi.+ 17 Anivumelekanga ukuba nizityele ezixekweni zenu izishumi zokutya kwenu okuziinkozo, iwayini yenu entsha, ioli yenu, amazibulo emihlambi yenu yeenkomo neyeegusha,+ iminikelo yenu yezifungo enizenzileyo, iminikelo yenu yokuzithandela okanye iminikelo esuka ezandleni zenu. 18 Ezo zinto nimele nizitye phambi koYehova uThixo wenu, endaweni ayikhethileyo uYehova uThixo wenu.+ Zimele zityiwe nini, ngoonyana benu, ziintombi zenu, ngamakhoboka enu, ngamakhobokazana enu nangabaLevi abahlala ezixekweni zenu, yaye nimele nivuye phambi koYehova uThixo wenu ngenxa yazo zonke izinto enizenzileyo. 19 Qinisekani ukuba anibalibali abaLevi+ ngalo lonke ixesha nihlala kwilizwe lenu.

20 “Xa uYehova uThixo wenu ewandisa umhlaba wenu+ njengokuba enithembisile,+ nize nina nithi, ‘Sifuna inyama,’ yityeni kuba niyayibawela; ningayitya nanini na niyibawela.+ 21 Ukuba indawo uYehova uThixo wenu akhethe ukubeka igama lakhe kuyo+ ikude kuni, nimele nixhele kwiinkomo okanye kwiigusha uYehova aninike zona, kanye njengokuba ndiniyalele nize nizityele ngaphakathi ezixekweni zenu nanini na nizibawela. 22 Ningayitya loo nyama njengokuba beniza kutya ibhadi nempunzi;+ umntu ococekileyo nongacocekanga bangayitya. 23 Kodwa nje qinisekani ukuba anilityi igazi,+ kuba igazi bubomi,+ yaye animele nibutye ubomi nibudibanise nenyama. 24 Nimele ningalityi igazi, kodwa lichitheni emhlabeni njengamanzi.+ 25 Nimele ningalityi, ukuze izinto zinihambele kakuhle nina nabantwana benu, kuba nisenza izinto ezilungileyo emehlweni kaYehova. 26 Xa nisiza endaweni uYehova ayikhethileyo, yizani kuphela nezinto zenu ezingcwele kunye neminikelo yenu yezifungo. 27 Nize ninikele esibingelelweni sikaYehova uThixo iminikelo yenu etshiswayo, inyama negazi,+ yaye igazi lemibingelelo yenu limele lichithwe ecaleni kwesibingelelo+ sikaYehova uThixo wenu, kodwa yona inyama ningayitya.

28 “Qinisekani ukuba niyawathobela onke la mazwi ndiniyalela wona, ukuze izinto zihlale zinihambela kakuhle, nina nabantwana benu, kuba nisoloko nisenza izinto ezilungileyo nezifanelekileyo kuYehova uThixo wenu.

29 “Xa uYehova uThixo wenu ezitshabalalisa iintlanga eniza kuthatha umhlaba wazo+ nize nihlale kuwo, 30 nize nilumke ningalingelwa ukuba nenze eza zinto bezizenza xa sele zitshatyalalisiwe. Nize ningabuzisi ngoothixo bazo, nithi, ‘Zaziqhele ukubakhonza njani oothixo bazo ezi ntlanga? Nathi siza kwenza ngolo hlobo.’+ 31 Nize ningayenzi loo nto kuYehova uThixo wenu, kuba ezo ntlanga zenzela oothixo bazo zonke izinto uYehova azonyanyayo. Zide zitshise oonyana neentombi zazo emlilweni, zisenzela oothixo bazo.+ 32 Qinisekani ukuba nenza zonke izinto endiniyalele ukuba nizenze.+ Nimele ningongezi yaye ninganciphisi kuzo.+

13 “Ukuba phakathi kwenu kuvela umprofeti okanye umntu ophupha izinto ezingekenzeki aze azichaze yaye aninike umqondiso, 2 uze loo mqondiso nezo zinto ebezithethile zenzeke, abe esithi, ‘Masilandele abanye oothixo, oothixo ongabaziyo, yaye sibakhonze,’ 3 nize ningammameli loo mprofeti okanye loo mphuphi,+ kuba uYehova uThixo wenu unijongile+ ukuze abone ukuba niyamthanda na uYehova uThixo wenu ngentliziyo yenu yonke nangomphefumlo* wenu wonke.+ 4 Nimele nilandele uYehova uThixo wenu, nimoyike, nithobele imiyalelo yakhe yaye nimamele ilizwi lakhe. Nimele nimkhonze nize nibambelele nkqi kuye.+ 5 Kodwa loo mprofeti okanye loo mphuphi umele abulawe,+ kuba uye wanikhuthaza ukuba ningamthobeli uYehova uThixo wenu, owanikhupha eYiputa waza wanikhulula kwindlu yobukhoboka. Loo mprofeti uyenze loo nto ukuze anikhuphe endleleni uYehova uThixo wenu aniyalele ukuba nihambe ngayo. Nimele nibususe ububi phakathi kwenu.+

6 “Ukuba umntakwenu, umntwana kamama wakho, okanye unyana wakho okanye intombi yakho okanye umfazi omthandayo okanye umhlobo wakho omkhulu, uthetha nawe ecaleni ezama ukukuhenda, esithi, ‘Masiyokukhonza abanye oothixo,’ efuna niyokukhonza oothixo ongabaziyo,+ abangaziwa nangookhokho bakho, 7 abanye oothixo bezizwana eziningqongileyo, ezikufutshane okanye ezikude, ukusuka kwesinye isiphelo selizwe ukuya kwesinye, 8 uze ungavumi okanye ummamele,+ kwaye ungabi nasizi, umvele okanye umkhusele; 9 kunoko ufanele umbulale nakanjani na.+ Umele ube ngowokuqala ukumbulala, baze ke nabanye balandele.+ 10 Umele umbethe ngamatye ade afe,+ kuba efune ukukwahlukanisa noYehova uThixo wakho, owakukhupha eYiputa, kwindlu yobukhoboka. 11 Emva koko onke amaSirayeli aza kuyiva loo nto aze oyike, yaye soze kuphinde kubekho mntu phakathi kwawo owenza into embi ngolo hlobo.+

12 “Ukuba kunokwenzeka uthi ukwesinye sezixeko uYehova uThixo wakho akunika zona, uve kusithiwa, 13 ‘Kuphume amadoda angoongantweni aya kulahlekisa abantu besixeko, esithi: “Masiye kukhonza abanye oothixo,” oothixo eningabaziyo,’ 14 uze uyiqwalasele le nto, uyiphande kakuhle,+ yaye ukuba kuthe kanti le nto imbi kangaka yenzekile phakathi kwenu, 15 umele nakanjani na ubaxabele abantu beso sixeko ngekrele.+ Uze uyitshabalalise+ ngekrele yonke into ekuso, kwanemfuyo. 16 Emva koko umele uthathe zonke izinto zaso ezinqwenelekayo uyokuzibeka kwindawo kawonke-wonke, usitshise ngomlilo eso sixeko, yaye ezo zinto ziza kuba ngumnikelo opheleleyo kuYehova uThixo wakho. Siza kuhlala siyimfumba yamabhodlo. Sifanele singaze siphinde sakhiwe. 17 Uze ungathathi nto emele itshatyalaliswe,+ ukuze uYehova ayeke ukuba nomsindo, akwenzele inceba, akuvele yaye akwandise, kanye njengoko wafungayo kookhokho bakho.+ 18 Umele uthobele uYehova uThixo wakho, ngokuthi uthobele yonke imiyalelo yakhe endikuyalela yona namhlanje, ngaloo ndlela wenze into elungileyo emehlweni kaYehova uThixo wakho.+

14 “Ningoonyana bakaYehova uThixo wenu. Nimele ningazisiki+ emzimbeni okanye nichebe amabunzi enu ngenxa yomntu ofileyo.+ 2 KuYehova uThixo wenu nisisizwana esingcwele,+ ibe uYehova unikhethile ukuba nibe ngabantu bakhe, abantu bakhe abakhethekileyo,* phakathi kwazo zonke izizwana eziphezu komhlaba.+

3 “Nize ningatyi nantoni na eyenyanyekayo.+ 4 Nazi izilwanyana eninokuzitya:+ yinkunzi yenkomo, yigusha, yibhokhwe, 5 yimpunzi, libhadi, lixhama, yibhokhwe yasendle, yimbabala, yigusha yasendle negusha yasezintabeni. 6 Ningazitya zonke izilwanyana ezineempuphu ezicandeke ngokupheleleyo nezilwanyana ezetyisayo. 7 Kodwa ke nazi izilwanyana ezetyisayo nezineempuphu ezicandekileyo eningamele nizitye: inkamela, umvundla nembila, kuba ezi ziyetyisa kodwa iimpuphu zazo azicandekanga. Ngoko ke azicocekanga.+ 8 Nehagu nimele ningayityi kuba nangona iimpuphu zayo zicandekile, ayetyisi. Ngoko ke ayicocekanga. Animelanga niyitye inyama yezi zilwanyana okanye nizichukumise izidumbu zazo.

9 “Kwizinto ezihlala emanzini, nazi eninokuzitya: Zonke izinto ezinamaphiko namaxolo ningazitya.+ 10 Kodwa ke zonke izinto ezingenamaphiko namaxolo, nimele ningazityi. Azicocekanga.

11 “Zonke iintaka ezicocekileyo ningazitya. 12 Kodwa ke nimele ningazityi ezi: ukhozi, unomakhwezana, ixhalanga eli­mnyama,+ 13 ukhetshe obomvu, ukhetshe omnyama, lonke uhlobo loonongwevana, 14 lonke uhlobo lwamahlungulu, 15 inciniba, isikhova, ingabangaba, lonke uhlobo lookhetshe, 16 isikhova esincinci, isikhova esineendlebe ezinde, idada elinentamo ende, 17 ingcwangube, ixhalanga, ugwidi,* 18 ingwamza, lonke uhlobo lookhwalimanzi, ubhobhoyi nelulwane. 19 Zonke izidalwa ezinyakazelayo* ezinamaphiko azicocekanga. Nize ningazityi. 20 Zonke izidalwa ezibhabhayo ezicocekileyo ningazitya.

21 “Nize ningazityi izilwanyana ezifunyenwe zifile.+ Ningazinika abantu basemzini abahlala ezixekweni zenu, okanye nizithengisele abantu basemzini. Kuba nina ningabantu abangcwele kuYehova uThixo wenu.

“Nize ningalipheki itakane lebhokhwe ngobisi lukamama walo.+

22 “Nimele niqiniseke ukuba ninikela ngesishumi sayo yonke into eniyivelisayo emasimini enu, unyaka nonyaka.+ 23 Nimele nitye isishumi sokutya kwenu okuziinkozo, iwayini yenu entsha, ioli yenu, amazibulo emihlambi yenu yeenkomo neyeegusha phambi koYehova uThixo wenu, kwindawo aza kukhetha ukulibeka kuyo igama lakhe,+ ukuze nifunde ukuhlala nimoyika uYehova uThixo wenu.+

24 “Ukuba niza kuhamba ixesha elide yaye anizukukwazi ukuthwala isishumi nisise kwindawo uYehova uThixo wenu akhetha ukulibeka kuyo igama lakhe+ ngenxa yokuba ikude, (kuba uYehova uThixo wenu uza kunisikelela), 25 ngoko nimele nisithengise eso sishumi nize nithathe loo mali niye kwindawo uYehova uThixo wenu akhetha ukulibeka kuyo igama lakhe. 26 Emva koko ningathenga nokuba yintoni na eniyifunayo, nokuba ziinkomo, iigusha, iibhokhwe, iwayini nobunye utywala, nayo nantoni na enye eniyifunayo; yaye ezo zinto nimele nizityele phambi koYehova uThixo wenu nize nivuye, wena nendlu yakho.+ 27 Ningabalibali abaLevi abahlala ezixekweni zenu+ kuba abanasabelo okanye lifa kunye nani.+

28 “Qho xa kuphela iminyaka emithathu nimele nizise isishumi sayo yonke imveliso yonyaka, nize nisibeke esixekweni.+ 29 Emva koko kuza kuza abaLevi, ekubeni bengenasabelo nalifa kunye nani, kuze nabantu basemzini, abantwana abangenatata, nabahlolokazi abahlala ezixekweni zenu, baze batye banele,+ yaye uYehova uThixo wenu uza kunisikelela kuyo yonke into eniyenzayo.+

15 “Qho xa kuphela iminyaka esixhenxe nifanele niwacime amatyala abantu abanityalayo.+ 2 Imele yenziwe ngolu hlobo le nto: Wonke umntu oboleke ummelwane wakhe umele alicime elo tyala. Ufanele angamnyanzeli ummelwane wakhe okanye umntakwabo ukuba ambhatale, kuba xa engamnyanzeli wenza le nto ifunwa nguYehova.+ 3 Ningabanyanzela abantu basemzini ukuba babhatale,+ kodwa bona abantakwenu animele nibabhatalise. 4 Kodwa ke, phakathi kwenu akukho mntu uza kuba lihlwempu, kuba nakanjani na uYehova uza kunisikelela+ kwilizwe aninika lona uYehova uThixo wenu, 5 ukuba nje niyazimisela ukuthobela ilizwi likaYehova uThixo wenu, nize nithobele nalo myalelo ndininika wona namhlanje.+ 6 Kuba uYehova uThixo wenu uza kunisikelela njengoko enithembisile, yaye niza kubolekisa kwiintlanga ezininzi kodwa nina anizukuboleka kuzo.+ Niza kulawula iintlanga ezininzi kodwa zona azizukunilawula.+

7 “Ukuba omnye wabantakwenu uba lihlwempu kwesinye sezixeko zenu kwilizwe akunika lona uYehova uThixo wenu, uze ungayenzi lukhuni intliziyo yakho okanye ube ligqolo kumntakwenu olihlwempu.+ 8 Uze ube nobubele kakhulu kuye,+ umboleke nantoni na ayidingayo. 9 Uze ulumke ungacingi obu bubi entliziyweni yakho, ‘Usondele unyaka wesixhenxe, unyaka wokucima amatyala,’+ uze ke ungamenzeli bubele umntakwenu, ungamniki nto. Ukuba ukhe wakhala ngawe kuYehova, wena uza kuba nesono.+ 10 Umele umenzele ububele+ yaye ungamphi nto ukrokra, kuba xa unobubele, uYehova uThixo wakho uza kukusikelela kuyo yonke into oyenzayo.+ 11 Kuba aza kuhlala ekhona amahlwempu kwelo lizwe.+ Yiloo nto ndisithi kuwe, ‘Ufanele umenzele ububele umntakwenu oxhwalekileyo nolihlwempu elizweni lakho.’+

12 “Ukuba uthengiselwe umntu wakowenu, indoda okanye umfazi ongumHebhere, yaye sele ekusebenzele iminyaka emithandathu, ngonyaka wesixhenxe umele umkhulule.+ 13 Xa umkhulula, makangahambi ungamnikanga nto. 14 Ufanele umkhethele emhlambini wakho, kwibala lakho lokubhula, kwisixovulelo sakho seoli nesewayini. Ufanele umnike ngokwentsikelelo akusikelele ngayo uYehova uThixo wakho. 15 Uze ukhumbule ukuba wawulikhoboka kwilizwe laseYiputa waza wakukhulula uYehova uThixo wakho. Yiloo nto ndikuyalela ukuba wenze le nto namhlanje.

16 “Kodwa ukuba uthi kuwe, ‘Andifuni ukuhamba apha kwakho!’ kuba ekuthanda wena nentsapho yakho, yaye ebonwabile ngoxa ebehlala nawe,+ 17 uze umsondeze emnyango, emva koko umgqobhoze indlebe ngenyatyhoba, yaye uza kuhlala elikhoboka lakho. Nakwikhobokazana lakho uze wenze into efanayo. 18 Makungabi buhlungu kuwe xa umkhulula aze ahambe, kuba umsebenzi akwenzele wona kwiminyaka emithandathu ungaphezulu ngokuphindwe kabini kumsebenzi obunokwenziwa ngumntu oqeshiweyo, yaye uYehova uThixo wakho uye wakusikelela kuyo yonke into.

19 “Onke amazibulo aziinkunzi kumhlambi wakho weenkomo noweegusha wangcwalisele uYehova uThixo wakho.+ Uze ungalenzisi nawuphi na umsebenzi izibulo eliphuma kumhlambi wakho weenkomo* yaye ungalichebi izibulo eliphuma kumhlambi wakho weegusha. 20 Wena nentsapho yakho nimele nilityele phambi koYehova uThixo wakho unyaka nonyaka, kwindawo uYehova aza kuyikhetha.+ 21 Kodwa ukuba linesiphene, oko kukuthi liyaqhwalela, liyimfama, okanye nasiphi na isiphene, ufanele ungabingeleli ngalo kuYehova uThixo wakho.+ 22 Nifanele nilityele ezixekweni zenu, lityiwe ngumntu ongacocekanga nococekileyo, ngokufanayo naxa nisitya ibhadi okanye impunzi.+ 23 Kodwa lona igazi lalo animele nilitye;+ nimele nilichithele emhlabeni njengamanzi.+

16 “Yikhumbule inyanga ka-Abhibhi,* uze wenzele uYehova uThixo wakho iPasika,+ kuba uYehova uThixo wakho wakukhupha eYiputa ebusuku ngenyanga ka-Abhibhi.+ 2 Uze uthathe kumhlambi weegusha nakoweenkomo,+ wenzele uYehova uThixo wakho+ umbingelelo wePasika kwindawo uYehova aza kukhetha ukulibeka kuyo igama lakhe.+ 3 Xa uwutya uze ungawudibanisi nento enegwele.+ Ufanele utye isonka esingenagwele, isonka sentlungu, iintsuku ezisixhenxe, kuba waphuma ngokungxama kwilizwe laseYiputa.+ Le nto umele uyenze ukuze uhlale uyikhumbula imini owaphuma ngayo kwilizwe laseYiputa.+ 4 Kumele kungabikho gwele kuwo wonke ummandla wenu iintsuku ezisixhenxe,+ yaye inyama eniza kubingelela ngayo ngengokuhlwa yosuku lokuqala mayingagcinwa kude kuse.+ 5 Awuzukuvunyelwa ukuba wenze umbingelelo wePasika nokuba kukwesiphi na isixeko kwezo akunika zona uYehova uThixo wakho, 6 umele wenziwe kwindawo uYehova uThixo wakho akhetha ukulibeka kuyo igama lakhe. Nimele niwenze umbingelelo wePasika ngokuhlwa emva nje kokutshona kwelanga,+ ngexesha enaphuma ngalo eYiputa. 7 Nize niwupheke, niwutyele+ kuloo ndawo aza kuyikhetha uYehova uThixo wenu,+ yaye kusasa ningabuyela ezintenteni zenu. 8 Niza kutya isonka esingenagwele iintsuku ezintandathu, nize ngosuku lwesixhenxe nibe nendibano engcwele yokukhonza uYehova uThixo wenu. Nimele ningasebenzi ngolo suku.+

9 “Nize nibale iiveki ezisixhenxe. Niza kuqala ukuzibala ezi veki xa niqalisa ukufaka irhengqa, nivuna ukutya okuziinkozo.+ 10 Emva koko niza kwenzela uYehova uThixo wenu iTheko Leeveki+ ngomnikelo wenu wokuzithandela, ngokobuninzi bezinto anisikelele ngazo uYehova uThixo wenu.+ 11 Nize nivuye phambi koYehova uThixo wenu kwindawo uYehova uThixo wenu akhetha ukulibeka kuyo igama lakhe, nivuye kunye noonyana benu, iintombi zenu, amakhoboka enu, amakhobokazana enu, abaLevi abakwizixeko zenu, abantu basemzini, abantwana abangenatata* nabahlolokazi abahlala kunye nani.+ 12 Khumbulani ukuba naningamakhoboka eYiputa,+ nize niyithobele le miyalelo.

13 “Nize nenze iTheko Lamakhusi*+ iintsuku ezisixhenxe xa niqokelela ukutya ebenikubhulile, ioli newayini. 14 Yonwabani kula matheko,+ nina noonyana benu, iintombi zenu, amakhoboka enu, amakhobokazana enu, abaLevi, abantu basemzini, abantwana abangenatata nabahlolokazi, abahlala kwizixeko zenu. 15 Niza kumenzela uYehova uThixo wenu eli theko+ iintsuku ezisixhenxe kwindawo uYehova aza kuyikhetha, kuba uYehova uThixo wenu uza kunisikelela ngesivuno esikhulu anisikelele nakuyo yonke into eniyenzayo,+ ibe niza konwaba kakhulu.+

16 “Kathathu ngonyaka onke amadoda amele aye kwindawo uYehova uThixo wenu aza kuyikhetha: kwiTheko Lezonka Ezingenagwele,+ iTheko Leeveki+ neTheko Lamakhusi,*+ yaye akukho nanye emele ize kuYehova ingaphethanga nto. 17 Indoda nganye mayinikele ngokwendlela ayisikelele ngayo uYehova uThixo wenu.+

18 “Nize nikhethe iijaji+ namagosa kuzo zonke izixeko aninika zona uYehova uThixo wenu, yaye zimele zibagwebe ngobulungisa abantu. 19 Nize ningabugqwethi ubulungisa,+ nibe nomkhethe+ okanye namkele isinyobo, kuba isinyobo siyawamfamekisa amehlo ezilumko,+ sigqwethe amazwi amalungisa. 20 Eyona nto imele ibaluleke kuni bubulungisa, ubulungisa kuphela,+ ukuze niqhubeke niphila kwilizwe aninika lona uYehova uThixo wenu.

21 “Nize ningatyali mthi oza kuba yipali engcwele*+ kufuphi nesibingelelo enisenzele uYehova uThixo wenu.

22 “Nize ningazakheli intsika engcwele,+ ngoba uYehova uThixo wenu uyayicaphukela loo nto.

17 “Animele ninikele kuYehova uThixo wenu ngenkunzi yenkomo okanye igusha enesiphene okanye enayo nantoni na embi, kuba uYehova uThixo wenu uyayenyanya loo nto.+

2 “Masithi kukho indoda okanye umfazi kwesinye sezixeko uYehova uThixo wenu aninika zona, owenza izinto ezimbi phambi koYehova uThixo wenu aze ophule isivumelwano sakhe,+ 3 ajike akhonze abanye oothixo aze aqubude kubo okanye kwilanga, inyanga, nazo zonke izinto ezisezulwini,+ nto leyo endingakhange ndithi yenzeni.+ 4 Xa niyixelelwa loo nto nifanele niyiphande ngokucokisekileyo. Ukuba nyhani yenzekile+ loo nto yenyanyekayo kwaSirayeli, 5 loo ndoda okanye umfazi owenze loo nto imbi umele asiwe kwigeyithi yesixeko, abethwe ngamatye de afe.+ 6 Loo mntu angabulawa ngobungqina babantu ababini okanye abathathu.+ Kodwa makangabulawa ngobungqina bomntu omnye.+ 7 Xa ebulawa umele aqale agityiselwe ngamangqina, kuze kulandele abanye abantu. Nimele nibususe ububi phakathi kwenu.+

8 “Ukuba kuvela ityala ekunzima ukuligweba kwesinye sezixeko zenu, nokuba lityala lokubulala, isimangalo, ubundlobongela obenziweyo+ okanye ezinye izinto ekuphikiswana ngazo, nimele niye kwindawo ayikhethileyo uYehova uThixo wenu.+ 9 Nize niye kubabingeleli abangabaLevi nakumntu oza kube eyijaji+ ngelo xesha, nibuze kubo yaye bona baza kunixelela isigqibo.+ 10 Nimele nenze ngokwesigqibo abanixelele sona bekulaa ndawo ikhethwe nguYehova. Qinisekani ukuba niyazenza izinto abaniyalele zona. 11 Nimele nenze ngokomthetho abanibonise wona nangokwesigqibo abanixelele sona.+ Nize ningemki kwisigqibo abanixelele sona, niye ekunene okanye ekhohlo.+ 12 Umntu oye wanekratshi, akammamela umbingeleli osebenzela uYehova uThixo wenu, okanye akayimamela ijaji umele afe.+ Nimele nibususe ububi kwaSirayeli.+ 13 Bonke abantu baza kuva baze boyike, batsho bayeke ukuba nekratshi.+

14 “Xa ningenile kwilizwe aninika lona uYehova uThixo wenu, yaye sele nihlala kulo nize nithi, ‘Masizikhethele ukumkani njengeentlanga ezisingqongileyo,’+ 15 nize nincede nibeke ukumkani okhethwe nguYehova uThixo wenu.+ Loo kumkani nimele nimkhethe kubantakwenu. Anivumelekanga ukuba nikhethe umntu wasemzini ongenguye umntakwenu. 16 Kodwa ke aze angazifuneli amahashe amaninzi+ okanye abuyisele abantu eYiputa ukuze afumane angakumbi,+ kuba uYehova uthe, ‘Ningaze niphinde nihambe ngale ndlela nibuyele eYiputa.’ 17 Makangazifuneli nabafazi abaninzi, ukuze intliziyo yakhe ingaphumi endleleni.+ Makangaziqokeleleli isilivere negolide eninzi.+ 18 Xa engena esihlalweni sobukumkani umele azikhuphelele encwadini* uMthetho ohlala kubabingeleli abangabaLevi.+

19 “Loo ncwadi imele ihlale ikuye, ayifunde yonke imihla yobomi bakhe,+ ukuze afunde ukumoyika uYehova uThixo wakhe aze athobele onke amazwi alo Mthetho nale miyalelo.+ 20 Ngoko intliziyo yakhe ayizukubaphakamela abantakwabo, aze angasuki kulo myalelo aye ekunene okanye ekhohlo, ukuze alawule ixesha elide kwaSirayeli, yena noonyana bakhe.

18 “Ababingeleli abangabaLevi naso sonke isizwe sabaLevi asizukuba nasabelo samhlaba okanye lifa kwaSirayeli. Baza kutya iminikelo eyenzelwa uYehova emlilweni, elilifa lakhe.+ 2 Ngoko abamele babe nelifa kunye nabantakwabo. NguYehova ilifa labo, njengoko ebaxelele.

3 “Nazi izinto abantu abamele bazinike ababingeleli: Wonke umntu owenza umbingelelo nokuba kungenkunzi yenkomo okanye ngegusha, umele anike umbingeleli umkhono, imihlathi nolusu. 4 Nimele ninike umbingeleli isivuno senu sokuqala sokutya okuziinkozo, iwayini yenu entsha, ioli yenu noboya bokuqala obuchetywe kwimihlambi yenu yeegusha.+ 5 UYehova uThixo wenu uye wakhetha uLevi noonyana bakhe kuzo zonke izizwe zenu ukuze bahlale besebenzela uYehova.+

6 “Kodwa ukuba umLevi uyemka kwesinye sezixeko zakwaSirayeli ahlala kuso,+ kuba enqwenela ukuya kwindawo ekhethwe nguYehova,*+ 7 angasebenza apho egameni likaYehova uThixo wakhe, njengabo bonke abantakwabo, abaLevi abahlala apho phambi koYehova.+ 8 Umele afumane ukutya okulinganayo nokwabo,+ ukongeza kwimali aye wayifumana xa ethengisa izinto zakhe ezililifa.

9 “Xa ningenile kwilizwe aninika lona uYehova uThixo wenu, nize ningalinganisi izinto ezenyanyekayo ezenziwa ziintlanga ezilapho.+ 10 Makungabikho mntu kuni obingelela* ngonyana wakhe okanye intombi yakhe emlilweni,+ kungabikho mntu uvumisayo,+ owenza imilingo,+ ochaza ikamva ngokuvumisa,+ othakathayo,+ 11 othakathayo, oya egqirheni+ okanye kumntu ochaza izinto kwangaphambili,+ okanye obuza ebantwini abafileyo.+ 12 Kuba nabani na ozenzayo ezi zinto uyenyanyeka kuYehova, yaye kungenxa yezi zinto le nto uYehova uThixo wenu ezigxotha ezi ntlanga phambi kwenu. 13 Nimele ningabi natyala kuYehova uThixo wenu.+

14 “Ezi ntlanga enoxutha ilizwe lazo ziqhele ukumamela abantu abenza imilingo+ nabavumisayo,+ kodwa uYehova uThixo wenu akafuni niyenze loo nto. 15 UYehova uThixo wenu uza kukhetha phakathi kwenu umprofeti ofana nam. Nimele nimmamele.+ 16 Nanicele loo nto kuYehova uThixo wenu eHorebhe ngemini ibandla elalihlanganisene ngayo,+ nisithi, ‘Mayingabi sithi abava ilizwi likaYehova uThixo wethu, yaye masingaphindi siwubone lo mlilo umkhulu, ukuze singafi.’+ 17 Emva koko uYehova wathi kum, ‘Bathethe kakuhle. 18 Ndiza kukhetha umprofeti ofana nawe phakathi kwabo+ yaye ndiza kumxelela into amakayithethe,+ aze yena abaxelele yonke into endimyalele yona.+ 19 Nakanjani ndiza kumphendulisa umntu ongawamameliyo amazwi am aza kuwathetha loo mprofeti egameni lam.+

20 “‘Ukuba kukho umprofeti oye wazigqatsa wathetha egameni lam ndingamthumanga okanye wathetha egameni labanye oothixo, umele afe.+ 21 Kodwa ke nisenokucinga le nto: “Siza kuyazi njani ukuba akayithunywanga nguYehova le nto ayithethayo?” 22 Xa loo mprofeti ethetha egameni likaYehova ize loo nto ebeyithetha ingenzeki, ebengathunywanga nguYehova. Loo mprofeti ebezigqatsa. Nize ningamoyiki.’

19 “Xa uYehova uThixo wenu etshabalalisa iintlanga zelizwe aninika lona uYehova uThixo wenu, yaye xa sele niloxuthile naza nahlala kwizixeko zazo nasezindlini zazo,+ 2 nimele nikhethe izixeko ezithathu kwilizwe aninika lona uYehova uThixo wenu.+ 3 Nimele nilahlule kathathu ilizwe uYehova uThixo wenu aninika ukuba nihlale kulo, nize nilungise iindlela ukuze umntu obulele omnye abalekele kwesinye sezo zixeko.

4 “Nantsi into amele ayenze ukuze angafi umntu obulele omnye: Xa ebetha omnye ngempazamo, ibe ebengamcaphukeli;+ 5 mhlawumbi ebeye naye ehlathini ukuze baqokelele iinkuni aze aphakamise isandla sakhe ukuze agawule umthi ngezembe, suke intloko yezembe iphuncuke emphinini iye kubetha omnye aze afe, lowo ubuleleyo umele abalekele kwesinye sezo zixeko ukuze angafi.+ 6 Kungenjalo, umphindezeli wegazi+ usenokumleqa enomsindo, amfumane aze ambulale kuba inde indlela eya kweso sixeko. Kodwa ke ebengafanelanga afe, kuba ebengamcaphukeli lowo ambuleleyo.+ 7 Yiloo nto ndisithi kuni: ‘Khethani izixeko zibe zithathu.’

8 “Ukuba uYehova uThixo wenu uwandisile umhlaba wenu njengokuba wafungayo kookhokho benu,+ waza waninika lonke ilizwe awathembisa ukulinika ookhokho benu,+ 9 nto leyo exhomekeke ekubeni nithobele lo myalelo ndininika wona namhlanje, wokumthanda uYehova uThixo wenu nokusoloko nihamba ngeendlela zakhe,+ nimele nongeze ezinye izixeko ezithathu kwezi zithathu.+ 10 Loo nto iza kwenza ukuba kungabikho gazi lamntu umsulwa elichithekayo+ kwilizwe uYehova uThixo wenu aninika lona, yaye anizukuba natyala lagazi.+

11 “Kodwa ukuba umntu uyamcaphukela omnye,+ aze amlalele, amenzakalise ade afe, akugqiba abalekele kwesinye sezi zixeko, 12 abadala besixeko sakhe bamele bambize baze bamnikele kumphindezeli wegazi, yaye umele afe.+ 13 Nimele ningamsizeli, yaye nimele nilisuse ityala lokuchitha igazi lomntu omsulwa kwaSirayeli,+ ukuze izinto zinihambele kakuhle.

14 “Xa sele nilifumene ilifa lenu kwilizwe aninika lona uYehova uThixo wenu, akukho mntu umele abhekelise umda wommelwane wakhe+ kwindawo owawubekwe kuyo ngookhokho benu.

15 “Akukho mntu umele agwetywe ngenxa yaso nasiphi na isono asenzileyo+ ngobungqina bomntu omnye. Ityala linokugwetywa kuphela xa kukho amangqina amabini okanye amathathu.+ 16 Ukuba ingqina elikhohlakeleyo limangalela omnye umntu lize limtyhole ngokwenza isono,+ 17 bobabini bamele beme phambi koYehova, naphambi kwababingeleli nabagwebi abaza kube begweba ngaloo mihla.+ 18 Abagwebi bamele baphandisise kakuhle,+ yaye ukuba loo mntu umangeleyo ulingqina lobuxoki yaye ebemtyhola umntakwabo, 19 nimele nimenze loo nto ebecebe ukuba yenziwe kumntakwabo,+ yaye nimele nibususe ububi phakathi kwenu.+ 20 Abantu baza kuyiva loo nto baze boyike, yaye akusoze kuphinde kubekho mntu owenza into embi ngolo hlobo phakathi kwenu.+ 21 Nimele ningabi nalusizi:+ ubomi bumele buphindezelwe ngobomi, ilihlo ngelihlo, izinyo ngezinyo, isandla ngesandla, unyawo ngonyawo.+

20 “Ukuba nilwa imfazwe neentshaba zenu nize nibone ukuba amahashe azo, iinqwelo zazo zokulwa namajoni azo maninzi kunawenu, nize ningoyiki, kuba uYehova uThixo wenu owanikhupha eYiputa unani.+ 2 Ngaphambi kokuba niyokulwa, umbingeleli umele asondele aze athethe nabantu.+ 3 Umele athi kubo, ‘Mamelani maSirayeli, ngoku niza kulwa neentshaba zenu. Yibani nesibindi. Sanukoyika okanye nothuke okanye ningcangcazele ngenxa yazo, 4 kuba uYehova uThixo wenu uhamba nani ukuze anilwele kwiintshaba zenu aze anisindise.’+

5 “Namagosa amele athethe nabantu athi, ‘Ngaba ukhona umntu owakhe indlu kodwa ongekayivuli? Makabuyele endlini yakhe. Kungenjalo usenokufa emfazweni ize indlu yakhe ivulwe ngomnye umntu. 6 Ngaba ukhona umntu otyale intsimi yeediliya kodwa ongekayivuni? Makabuyele endlini yakhe. Kungenjalo usenokufa emfazweni ize intsimi yakhe ivunwe ngomnye umntu. 7 Ngaba ukhona umntu ongeje umfazi kodwa ongekamtshati? Makabuyele endlini yakhe.+ Kungenjalo usenokufa emfazweni aze loo mfazi atshatwe ngomnye umntu.’ 8 Amagosa amele aphinde ababuze abantu athi, ‘Ngaba ukhona umntu owoyikayo nongenasibindi?+ Makabuyele endlini yakhe, ukuze angenzi abantakwabo boyike njengaye.’+ 9 Xa amagosa egqibile ukuthetha nabantu, amele akhethe iintloko zemikhosi ukuze zikhokele abantu.

10 “Xa nisondela esixekweni eniyokulwa naso, nimele niqale nixelele abantu baso ukuba nibanika ithuba lokunikezela.+ 11 Ukuba bayavuma baze banivulele, bonke abantu abalapho baza kuba ngamakhoboka enu, banisebenzele.+ 12 Kodwa ukuba abafuni ukuba seluxolweni nani, baze basuke balwe, nimele nisirhangqe eso sixeko, 13 yaye nakanjani na uYehova uThixo wenu uza kusinikela kuni, ibe nimele niwabulale ngekrele onke amadoda akuso. 14 Kodwa ke ningabathatha abafazi, abantwana, imfuyo nazo zonke izinto zeso sixeko. Ningazisebenzisa+ zonke izinto enizithathileyo kweso sixeko kuba nizinikwe nguYehova uThixo wenu.+

15 “Nimele nenze loo nto kuzo zonke izixeko ezikude kakhulu kuni, ezingezizo ezeentlanga ezikufutshane nani. 16 Animelanga nishiye kwanto iphila kwizixeko zezi ntlanga uYehova uThixo wenu aninika zona ukuba nihlale kuzo.+ 17 Kunoko nimele nizitshabalalise ngokupheleleyo ezi ntlanga; amaHiti, ama-Amori, amaKanan, amaPerizi, amaHivi namaYebhusi,+ kanye njengokuba uYehova uThixo wenu eniyalele; 18 ukuze zinganifundisi izinto ezenyanyekayo ezizenzela oothixo bazo, zinenze nimone uYehova uThixo wenu.+

19 “Ukuba niye narhangqa isixeko nasithimba, emva kokulwa naso iintsuku ezininzi, nize ningayigawuli imithi yaso. Ningazitya iziqhamo zaloo mithi.+ Ngaba nimele nihlasele umthi ngokungathi ngumntu? 20 Ningatshabalalisa kuphela imithi enaziyo ukuba ayityiwa. Ningayigawula nize nenze izixhobo zokuhlasela isixeko esilwa nani, side siwe.

21 “Ukuba kufunyenwe umntu ofileyo ethafeni kwilizwe aninika lona uYehova uThixo wenu, kube kungaziwa ukuba ubulewe ngubani, 2 abadala nabagwebi benu+ bamele baphume baze babale umgama osuka kweso sidumbu ukuya kwizixeko ezikufutshane. 3 Emva koko abadala besona sixeko sikufutshane bamele bathathe ithole lenkomo elingazange lasetyenziswa, nelingazange lafakwa dyokhweni. 4 Bamele balise entlanjeni ehamba amanzi, ekungazange kwalinywa okanye kwatyalwa nto kuyo. Bamele balaphule intamo elo thole lenkomo apho entlanjeni.+

5 “Ababingeleli abangabaLevi bamele beze kuba uYehova uThixo wenu ukhethe bona ukuba bamsebenzele,+ basikelele egameni likaYehova.+ Mabachaze ukuba kumele kwenziwe ntoni ngamatyala obundlobongela.+ 6 Emva koko bonke abadala beso sixeko sikufutshane nesidumbu bamele bahlambe izandla zabo+ phezu kwelo thole lenkomo laphulwe intamo entlanjeni, 7 baze bathi, ‘Ayizozandla zethu ezichithe eli gazi, yaye khange sibone xa lichithwa. 8 Owu Yehova, uze ungababeki tyala ngale nto abantu bakho amaSirayeli,+ yaye mabangabi natyala lokuchitha igazi lomntu omsulwa.’+ Ngoko ke abazukuba netyala legazi. 9 Xa nisenza into elungileyo emehlweni kaYehova, niza kube niyalisusa kuni ityala lokuchitha igazi lomntu omsulwa.

10 “Ukuba nilwa imfazwe neentshaba zenu, aze ­uYehova uThixo wenu azoyise, nizithimbe,+ 11 aze omnye kuni abone kuzo intombi entle, ayithande, afune ukuyitshata, 12 angayisa endlini yakhe. Imele ichebe iinwele, ilungise iinzipho, 13 izikhulule iimpahla ethinjwe izinxibile ize ihlale endlini yakhe. Imele imlilele utata wayo nomama wayo inyanga yonke,+ emva koko angabelana nayo ngesondo. Uza kuba ngumyeni wayo, yona ibe ngumfazi wakhe. 14 Kodwa ukuba akasayithandi umele ayiyeke ihambe iye+ kuloo ndawo ikhetha ukuya kuyo. Umele angayithengisi okanye ayiphathe kakubi, ekubeni eyinyanzele ukuba imtshate.

15 “Ukuba indoda itshate abafazi ababini, omnye imthanda ngaphezu komnye, babe bobabini beyizalele oonyana, unyana olizibulo ingowalo ungathandwayo,+ 16 xa loo ndoda isahlulela oonyana bayo ilifa layo, ayivumelekanga ukuba imenze izibulo unyana womfazi emthandayo endaweni yonyana olizibulo womfazi engamthandiyo. 17 Ifanele iqonde ukuba izibulo ngunyana womfazi engamthandiyo, ngoko imele imahlulele kwizinto zayo ngokuphindwe kabini, kuba usisiqalo samandla ayo okuzala. Ilungelo lobuzibulo lelakhe.+

18 “Ukuba indoda inonyana onenkani, oyinjubaqa nongabathobeliyo abazali bakhe,+ ibe baye bazama ukumlungisa kodwa akafuni ukubamamela,+ 19 abazali bakhe bamele bamthathe, bamse kubadala egeyithini yesixeko sakowabo, 20 baze bathi kwabo badala, ‘Unyana wethu lo unenkani, uyinjubaqa yaye akasithobeli. Utya kakhulu+ futhi ulinxila.’+ 21 Emva koko onke amadoda esixeko sakowabo amele ambethe ngamatye ade afe. Nimele nibususe ububi phakathi kwenu, emva koko onke amaSirayeli aza kuyiva loo nto aze oyike.+

22 “Ukuba umntu wenza isono esibangela ukuba agwetyelwe ukufa aze abulawe,+ axhonywe esibondeni,+ 23 isidumbu sakhe asimele sihlale sijinga esibondeni ubusuku bonke.+ Endaweni yoko, nimele niqiniseke ukuba niyasingcwaba kwangaloo mini, kuba umntu oxhonywe esibondeni uqalekisiwe nguThixo+ yaye nimele ningalingcolisi ilizwe uYehova uThixo wenu aninike ukuba nihlale kulo.+

22 “Ukuba ubona inkunzi yenkomo okanye igusha yomntakwenu ilahlekile, sukuyijonga nje.+ Umele nakanjani na uyibuyisele kumntakwenu. 2 Kodwa ukuba umnikazi wayo akahlali kufutshane nawe okanye awumazi, umele uyizise endlini yakho yaye umele uyigcine ade umnikazi wayo ayikhangele. Emva koko umele uyibuyisele kuye.+ 3 Ufanele wenze loo nto naxa ufumene idonki yomntakwenu, iimpahla zakhe okanye nantoni na yakhe elahlekileyo. Awumelanga uyijonge nje.

4 “Ukuba ubona idonki yomntakwenu okanye inkunzi yakhe yenkomo iwile endleleni, awumelanga uyijonge nje. Umele nakanjani na umncedise ayiphakamise.+

5 “Umfazi akafanelanga anxibe iimpahla zamadoda, nendoda ayifanelanga inxibe iimpahla zabafazi. Kuba nabani na owenza loo nto, uyenyanyeka kuYehova uThixo wenu.

6 “Ukuba uthe usahamba wathi gqi ngendlwane yentaka emthini okanye phantsi, inamantshontsho okanye amaqanda, yaye unina ehleli phezu kwamantshontsho okanye amaqanda, awumelanga uthathe unina kunye namantshontsho okanye namaqanda akhe.+ 7 Umele uqale umgxothe unina, emva koko ungawathatha amantshontsho okanye amaqanda. Uze wenze ngolo hlobo ukuze izinto zikuhambele kakuhle yaye uphile ixesha elide.

8 “Xa usakha indlu umele ulunyuse udonga eluphahleni,+ ukuze intsapho yakho ingabi netyala legazi ngenxa yomntu owileyo kuyo.

9 “Kwintsimi yakho yeediliya sukutyala olunye uhlobo lwembewu.+ Kungenjalo, sonke isivuno saloo mbewu uyityalileyo nesemithi yeediliya siza kuthathwa sisiwe kwindawo engcwele.

10 “Uze ungabophi inkunzi yenkomo nedonki xa ulima.+

11 “Uze unganxibi impahla eyenziwe ngoboya obuxutywe nelinen.+

12 “Ingubo yokwaleka umele uyenze ibe nemisonto edityanisiweyo kuzo zone iikona zayo.+

13 “Ukuba indoda iye yatshata umfazi, yabelana naye ngesondo yaza emva koko yamcaphukela,* 14 yamtyhola isithi uziphethe kakubi, ingcolise igama lakhe ngokuthi: ‘Ndiye ndamtshata lo mfazi, kodwa ndithe xa ndisabelana naye ngesondo andafumana bungqina bokuba akazange walala nandoda,’ 15 abazali bentombi bamele baye kubadala abasegeyithini yesixeko nobungqina bokuba le ntombi ayizange yalala nandoda. 16 Utata wale ntombi umele athi kubadala, ‘Le ndoda ndiyinike intombi yam ukuba ibe ngumfazi wayo, kodwa ngoku iyayicaphukela* 17 yaye iyityhola ngokuziphatha kakubi isithi: “Andifumananga nto ebonisa ukuba intombi yakho ayizange yalala nandoda.” Kodwa ke nabu ubungqina bokuba intombi yam ayizange yalala nandoda.’ Abazali baloo ntombi bamele balitwabulule elo laphu libubungqina phambi kwabadala besixeko. 18 Abadala besixeko+ baza kuyohlwaya loo ndoda.+ 19 Bamele bayihlawulise iishekele* zesilivere eziyi-100 baze bazinike utata waloo ntombi, kuba ingcolise igama lentombi yakwaSirayeli engazange yalala nandoda,+ yaye iza kuqhubeka ingumfazi wayo. Loo ndoda ayizukuvunyelwa ukuba iqhawule umtshato kunye nayo ubomi bayo bonke.

20 “Kodwa ke ukuba loo ndoda ithetha inyani, yaye abukho ubungqina bokuba loo ntombi ayizange yalala nandoda, 21 bamele bayise phambi komnyango wendlu katata wayo, yaye amadoda esixeko sakowayo amele ayibethe ngamatye ide ife, kuba yenze into elihlazo+ kwaSirayeli ngokwabelana ngesondo* ngoxa isahlala endlini katata wayo.+ Ngoko nimele nibususe ububi phakathi kwenu.+

22 “Ukuba kufunyenwe indoda ilele nomfazi wenye indoda, bobabini bamele bafe, loo ndoda kunye naloo mfazi.+ Nimele nibususe ububi kwaSirayeli.

23 “Ukuba intombi engazange yalala nandoda ingejiwe, ize idibane nenye indoda esixekweni, ilale nayo, 24 nize nibazise egeyithini yesixeko bobabini, nibabethe ngamatye bade bafe, kuba loo ntombi khange ikhale icele uncedo esixekweni, ibe yona loo ndoda ihlazise umfazi wommelwane wayo.+ Ngoko nimele nibususe ububi phakathi kwenu.

25 “Kodwa ke ukuba indoda idibana nentombi engejiweyo endle, ize iyoyise ngamandla, iyidlwengule, kumele kufe loo ndoda kuphela, 26 kodwa nize ningayenzi nto loo ntombi. Akukho nto iyenzileyo ifanelwe sisigwebo sokufa. Le nto ifana naxa umntu ehlasela omnye aze ambulale.+ 27 Kuba le ndoda idibene nayo endle, yaye le ntombi ingejiweyo iye yakhala, kodwa bekungekho mntu unokuyihlangula.

28 “Ukuba indoda idibana nentombi engazange yalala nandoda ibe ingangejwanga, iyinyanzele ukuba ilale nayo, baze babhaqwe,+ 29 loo ndoda iye yalala naloo ntombi imele inike utata waloo ntombi iishekele eziyi-50 zesilivere, ibe ngumfazi wayo.+ Ekubeni loo ndoda iye yayiphatha kakubi loo ntombi, ayivumelekanga ukuba iqhawule umtshato nayo ubomi bayo bonke.

30 “Indoda mayingatshati nomfazi katata wayo, ukuze ingamhlazisi.+

23 “Mayingangeni ebandleni likaYehova indoda ethenwe ngokutyunyuzwa amasende nenqunyulwe ilungu lobudoda.+

2 “Makangangeni ebandleni likaYehova unyana ozelwe ngaphandle komtshato.+ Makungabikho nzala yakhe ingena ebandleni likaYehova ukuya kutsho nakwisizukulwana sakhe seshumi.

3 “Makangabikho umAmoni okanye umMowabhi ongena ebandleni likaYehova.+ Makungaze kubekho nzala yawo ingena ebandleni likaYehova ukuya kutsho nakwisizukulwana sawo seshumi, 4 kuba awazange anincede aninike ukutya namanzi endleleni esuka eYiputa,+ kwakhona aqesha uBhileham unyana kaBhehore wasePetore eMesopotamiya ukuba aniqalekise.+ 5 Kodwa uYehova uThixo wenu akazange ammamele uBhileham.+ Kunoko uYehova uThixo wenu wasitshintsha isiqalekiso saba yintsikelelo,+ kuba uYehova uThixo wenu enithanda.+ 6 Ningaze nibanqwenelele okuhle okanye impumelelo ubomi benu bonke.+

7 “Uze ungamcaphukeli umEdom, kuba ungumntakwenu.+

“Uze ungamcaphukeli umYiputa, kuba wawungumntu wasemzini elizweni lakhe.+ 8 Abantwana bawo abasisizukulwana sesithathu bangangena ebandleni likaYehova.

9 “Xa niyokulwa neentshaba zenu, nize niziphephe zonke izinto ezingcolisayo.+ 10 Xa indoda iye yaphuma amadlozi ebusuku,+ imele iphume enkampini, ingabuyeli. 11 Emalanga, loo ndoda imele ihlambe ngamanzi, ize ibuyele enkampini ekutshoneni kwelanga.+ 12 Nimele nibe nendawo yangasese ngaphandle kwenkampu, nize nisebenzise yona. 13 Uze ube nolugxa phakathi kwezixhobo zakho. Xa uyokuzithuma ngaphandle kwenkampu, umele wembe umngxuma ngalo, emva koko uligqumelele ilindle lakho. 14 Kuba uYehova uThixo wenu uhamba-hamba phakathi kwenkampu yenu+ ukuze anihlangule aze azinikele ezandleni zenu iintshaba zenu. Inkampu yenu imele ibe ngcwele,+ ukuze angaboni nto engafanelekanga kuni aze emke, angabi sahamba nani.

15 “Uze ungalibuyiseli kwinkosi yalo ikhoboka elibalekele kuwe. 16 Lingahlala naphi na phakathi kwenu, nakweyiphi na indawo kwesinye sezixeko zenu, naphi na apho lithanda khona. Uze ungaliphathi kakubi.+

17 “Makungabikho nanye kwiintombi zakwaSirayeli ethengisa ngomzimba etempileni,+ kungabikho namnye nakoonyana bakaSirayeli owenza loo nto.+ 18 Umvuzo womntu othengisa ngomzimba* nimele ningawuzisi endlini kaYehova uThixo wenu ukuze nizalisekise isifungo, kuba bobabini bayenyanyeka kuYehova uThixo wenu.

19 “Awumele umbhatalise inzala umntakwenu,+ nokuba yeyemali, yeyokutya, okanye yeyayo nantoni na enokuba nenzala. 20 Ungambhatalisa inzala umntu wasemzini,+ kodwa awumele umbhatalise inzala umntakwenu,+ ukuze uYehova uThixo wenu anisikelele kuyo yonke into eniza kuyenza kwilizwe aninika ukuba nihlale kulo.+

21 “Ukuba wenza isifungo kuYehova uThixo wakho,+ khawuleza usifezekise eso sifungo.+ Kuba nakanjani uYehova uThixo wakho uza kusifuna kuwe; ukuba awuyenzi loo nto uya kube wenze isono.+ 22 Kodwa ukuba awufungi, awuzukuba natyala.+ 23 Uze uyenze into oyithethileyo,+ yaye uze wenze ngokwesifungo sokuzithandela osenze kuYehova uThixo wakho.+

24 “Ukuba ungena kwintsimi yeediliya yommelwane wakho, ungatya wanele, kodwa uze ungazifaki entweni oza kuhamba nayo.+

25 “Ukuba ungena kwintsimi yommelwane wakho yokutya okuziinkozo, ungazikha izikhwebu ezivuthiweyo ngesandla, kodwa ungafaki rhengqa kuloo ntsimi.+

24 “Ukuba indoda itshata umfazi, kodwa ayaneliseki nguye kuba ifumene into engafanelekanga ngaye, loo ndoda imele imbhalele isatifiketi sokuqhawula umtshato ize imnike,+ emva koko imcele ahambe.+ 2 Emva kokuba loo mfazi emkile endlini yaloo ndoda, angatshata nenye indoda.+ 3 Ukuba le ndoda yesibini iyamcaphukela* lo mfazi, ize imbhalele isatifiketi sokuqhawula umtshato okanye iyafa, 4 umyeni wakhe wokuqala owaqhawula umtshato naye akavumelekanga ukuba aphinde atshate naloo mfazi, kuba uye wangcoliswa yaye uYehova uyayenyanya loo nto. Nimele ningaliphatheli ityala ilizwe uYehova uThixo wenu aninika ukuba nihlale kulo.

5 “Xa indoda isanda kutshata, ayimele iye emkhosini okanye inikwe eminye imisebenzi. Imele iyekwe unyaka ihlale endlini yayo, ivuyise umfazi wayo.+

6 “Akukho mntu omele athimbe ilitye lokuguba okanye ilitye lokusila njengesibambiso,+ kuba ngokwenza loo nto uya kube uthatha indlela yokuziphilisa* yomntu ibe sisibambiso.

7 “Ukuba kukho umntu oye waqweqwedisa umntakwabo ongumSirayeli, wamphatha kakubi waza wamthengisa,+ loo mqweqwedisi makabulawe.+ Nimele nibususe ububi phakathi kwenu.+

8 “Xa kuvela isifo seqhenqa* qinisekani ukuba nizenza kakuhle zonke izinto enizixelelwa ngababingeleli abangabaLevi.+ Nimele nenze kanye loo nto endibayalele yona. 9 Yikhumbuleni into uYehova uThixo wenu awayenza kuMiriyam endleleni xa naniphuma eYiputa.+

10 “Ukuba uboleka ummelwane wakho nantoni na,+ sukungena endlini yakhe uyokuzithathela loo nto abambisa ngayo. 11 Umele ume ngaphandle, aze loo mntu umbolekileyo ayizise kuwe loo nto abambisa ngayo. 12 Ukuba loo mntu uyahlupheka, uze ungayokulala isekuwe loo nto abambise ngayo.+ 13 Umele nakanjani na uyibuyisele kuye loo nto ebebambise ngayo lakutshona ilanga, aze ayokulala into yakhe yokunxiba ikuye,+ ibe loo mntu uza kukusikelela. Loo nto iya kuthetha ukuba ulilungisa kuYehova uThixo wakho.

14 “Umele ungamqhathi umqeshwa odingayo nolihlwempu, enoba ngumntakwenu okanye ngumntu wasemzini ohlala kwesinye sezixeko zenu kwilizwe lenu.+ 15 Umele umnike kwangaloo mini umvuzo wakhe+ ngaphambi kokuba litshone ilanga, kuba uyadinga yaye ubomi bakhe buxhomekeke kuloo mvuzo. Kungenjalo uza kukhala ngawe kuYehova, yaye wena uza kuba netyala.+

16 “Ootata mabangafi ngenxa yoonyana babo, noonyana bangafi ngenxa yootata babo.+ Umntu makafele isono sakhe.+

17 “Uze ungasigqwethi isigwebo kumntu wasemzini okanye kumntwana ongenatata,*+ yaye umele ungayithathi into yokunxiba yomhlolokazi ibe sisibambiso.+ 18 Nize nikhumbule ukuba naningamakhoboka eYiputa yaye uYehova uThixo wenu wanikhulula apho.+ Yiloo nto ndiniyalela ukuba nenze le nto.

19 “Xa nivuna entsimini yenu kuze kubekho isithungu enisilibalayo, sanukubuya niye kusithatha. Sishiyeleni umntu wasemzini, umntwana ongenatata nomhlolokazi,+ ukuze uYehova uThixo wenu anisikelele kuyo yonke into eniyenzayo.+

20 “Xa nivuthulula imithi yenu yeminquma, nize ningaphindi niwavuthulule amasebe. Into eshiyekileyo iza kuba yeyomntu wasemzini, umntwana ongenatata nomhlolokazi.+

21 “Xa niqokelela iidiliya kwiintsimi zenu zeediliya, nize ningabuyi niyokuqokelela ezishiyekileyo. Ezo zimele zibe zezomntu wasemzini, ­umntwana ongenatata nomhlolokazi. 22 Khumbulani ukuba naningamakhoboka kwilizwe laseYiputa. Yiloo nto ndiniyalela ukuba nenze le nto.

25 “Ukuba amadoda ayaxabana, amele aye kwiijaji,+ yaye iijaji ziza kuligweba elo tyala zize zichaze ukuba ngowuphi omsulwa ibe ngowuphi onetyala.+ 2 Ukuba lowo wenze ububi ufanelwe kukubethwa,+ ijaji iza kuthi makalaliswe phantsi aze abethwe phambi kwayo. Imivumbo imele ilingane ububi abenzileyo. 3 Angabethwa imivumbo eyi-40,+ kodwa makungagqithwa kuyo. Ukuba angabethwa imivumbo engaphezu kwaleyo, umntakwenu angahlazeka phambi kwenu.

4 “Uze ungayivali umlomo ngesicheme inkunzi yenkomo xa ibhula.+

5 “Ukuba umntu uhlala nomntakwabo aze omnye kubo afe engenanyana, umfazi wendoda efileyo akamele atshate nenye indoda. Umntakwabo loo ndoda ifileyo umele atshate naloo mfazi, abe ngaloo ndlela utshate umfazi womntakwabo.+ 6 Umntwana wokuqala ozalwa nguloo mfazi kuza kuthiwa ngumntwana wale ndoda ifileyo,*+ ukuze igama layo lingacinywa kwaSirayeli.+

7 “Ukuba loo ndoda ayifuni kumtshata umfazi womntakwayo, loo mfazi ongumhlolokazi umele aye kubadala ngasegeyithini yesixeko aze athi, ‘Umntakwabomyeni wam akafuni ukuligcina igama lomntakwabo kwaSirayeli. Akavumi ukunditshata njengomfazi womntakwabo.’ 8 Abadala besixeko saloo ndoda bamele bayibize baze bathethe nayo. Ukuba isame iqinile isithi, ‘andifuni kumtshata,’ 9 loo mhlolokazi umele aye kuloo ndoda phambi kwamehlo abadala, ayikhulule imbadada,+ ayitshicele ebusweni aze athi, ‘Makwenziwe le nto kwindoda engafuni ukwakha umzi womntakwayo.’ 10 Emva koko, kwaSirayeli, igama laloo ntsapho liya kwaziwa ngokuba ‘Yindlu yomntu okhululwe imbadada.’

11 “Ukuba amadoda ayalwa, aze umfazi wenye kuwo angenelele, ekhusela indoda yakhe, olule isandla, athi nqaku amaphambili enye indoda, 12 uze usinqumle isandla sakhe, ungamsizeli.

13 “Uze ungabi neentlobo ezimbini zamatye okukala engxoweni yakho,+ elikhulu nelincinci. 14 Uze ungabi neentlobo ezimbini zezitya zokukala*+ endlini yakho, esikhulu nesincinci. 15 Ufanele ube nelitye lokukala elichanileyo nelifanelekileyo, ukuze uhlale ixesha elide kwilizwe akunika lona uYehova uThixo wakho.+ 16 Uyenyanyeka kuYehova uThixo wakho wonke umntu owenza into embi ngolo hlobo.+

17 “Nize ningayilibali into enayenziwa ngama-Amaleki endleleni xa naniphuma eYiputa,+ 18 indlela awadibana ngayo nani endleleni aza abaxabela bonke abo babeshiyekela ngasemva, ngenxa yokuba nanidinwe kakhulu yaye nityhafile. Ama-Amaleki awazange amoyike uThixo. 19 Xa uYehova uThixo wenu eniphumzile kuzo zonke iintshaba zenu ezinijikelezileyo kwilizwe uYehova uThixo wenu aninika lona ukuba libe lilifa lenu,+ nimele niwatshayele kuthi tu ama-Amaleki phantsi kwamazulu.+ Nize ningayilibali loo nto.

26 “Ekugqibeleni, xa ningenile kwilizwe aninika lona uYehova uThixo wenu ukuba libe lilifa lenu, naloxutha naza nahlala kulo, 2 nimele nithathe kuzo zonke izivuno zenu zokuqala, eniza kuziqokelela kwilizwe aninika lona uYehova uThixo wenu, nizifake kwiibhaskithi, niye nazo kwindawo uYehova uThixo wenu aza kukhetha ukulibeka kuyo igama lakhe.+ 3 Nimele niye kumbingeleli oza kube ekho ngaloo mihla nize nithi kuye, ‘Namhlanje, ndizokuxela kuYehova uThixo wakho ukuba ndingenile kwilizwe uYehova awafunga kookhokho bethu ukuba uza kusinika lona.’+

4 “Umbingeleli uza kuyithatha loo bhaskithi uyiphetheyo, ayibeke phambi kwesibingelelo sikaYehova uThixo wakho. 5 Emva koko uze uthi phambi koYehova uThixo wakho, ‘Utata wayengumAram owayehamba ehlala,*+ yaye waya kuba ngumntu wasemzini eYiputa+ beyintsapho encinci.+ Kodwa apho waba luhlanga olukhulu, olunamandla nolunabantu abaninzi.+ 6 AmaYiputa asiphatha kakubi, asicinezela, asikhobokisa ngendlela engathethekiyo.+ 7 Ngoko sakhala kuYehova uThixo wookhokho bethu, waza uYehova wasiva, wayibona intlungu esikuyo, ingxaki nengcinezelo esasiphantsi kwayo.+ 8 Ekugqibeleni uYehova wasikhupha eYiputa ngesandla esinamandla nangengalo eyoluliweyo,+ ngezenzo ezoyikisa kakhulu, ngemiqondiso nangemimangaliso.+ 9 Emva koko wasizisa kule ndawo waza wasinika eli lizwe, ilizwe eligcwele ubisi nobusi.+ 10 Ngoku ndizise isivuno sokuqala selizwe uYehova andinike lona.’+

“Uze usibeke phambi koYehova uThixo wakho, uqubude phambi koYehova uThixo wakho. 11 Emva koko uze uvuye ngenxa yazo zonke izinto ezintle uYehova uThixo wakho akunike zona, wena, umLevi nomntu wasemzini ohlala nawe.+

12 “Xa ugqibile ukuqokelela+ sonke isishumi semveliso yakho ngonyaka wesithathu, unyaka wezishumi, umele usinike umLevi, umntu wasemzini, umntwana ongenatata* nomhlolokazi, baze batye banele kwizixeko zakho.+ 13 Emva koko uza kuthi phambi koYehova uThixo wakho, ‘Ndisikhuphe sonke isahlulo esingcwele endlini yam, ndaza ndasinika umLevi, umntu wasemzini, umntwana ongenatata nomhlolokazi,+ kanye njengokuba ubundiyalele. Khange ndingayithobeli okanye ndingayikhathaleli imiyalelo yakho. 14 Khange ndisitye esi sahlulo ndizilile, khange ndisiphathe ndingacocekanga yaye khange ndinikele nentwana yaso ngenxa yomntu ofileyo. Ndilithobele ilizwi likaYehova uThixo wam yaye ndiyenzile yonke into ubundiyalele yona. 15 Ngoko ke khawujonge ezantsi ukwindawo yakho yokuhlala engcwele, emazulwini, uze ubasikelele abantu bakho amaSirayeli nelizwe osinike lona,+ kanye njengokuba wafungayo kookhokho bethu,+ ilizwe eligcwele ubisi nobusi.’+

16 “Namhlanje uYehova uThixo wenu uyaniyalela ukuba niyenze yonke le mimiselo nezigwebo. Nimele nizithobele ngentliziyo yenu yonke+ nangomphefumlo* wenu wonke. 17 Namhlanje uYehova uniqinisekisile ukuba uza kuba nguThixo wenu njengokuba nihamba ngeendlela zakhe, nithobela imithetho,+ imiyalelo+ nemimiselo yakhe,+ nanjengokuba nimamela ilizwi lakhe. 18 Nani namhlanje nimqinisekisile uYehova ukuba niza kuba ngabantu bakhe, abantu bakhe abakhethekileyo,+ kanye njengokuba wanithembisayo, ibe niza kuyithobela yonke imithetho yakhe. 19 Yena uThixo uthe uza kuniphakamisela phezulu ngaphezu kwazo zonke ezinye iintlanga azenzileyo,+ njengokuba enithembisile, adunyiswe, aziwe aze azukiswe ngani, nibe sisizwana esingcwele kuYehova uThixo wenu,+ kanye njengokuba wathembisayo.”

27 UMoses nabo bonke abadala bakwaSirayeli bema phambi kwabantu. UMoses wathi kubo: “Yithobeleni yonke imiyalelo endininika yona namhlanje. 2 Ngemini eniza kuyiwela ngayo iYordan ningena kwilizwe aninika lona uYehova uThixo wenu, nize nimise amatye amakhulu, niwatyabeke.*+ 3 Xa seniwelile, nize nibhale amazwi alo Mthetho kuloo matye, ukuze ningene kwilizwe aninika lona uYehova uThixo wenu, ilizwe eligcwele ubisi nobusi, kanye njengokuba uYehova uThixo wookhokho benu wanithembisayo.+ 4 Xa seniyiwelile iYordan, nize ­niwamise la matye ­eNtabeni Ye-Ebhali,+ niwatyabeke,* kanye njengokuba ndiniyalela namhlanje. 5 Kwakhona nimele nimakhele uYehova uThixo wenu isibingelelo apho, isibingelelo samatye. Animelanga nisebenzise izixhobo zentsimbi kuwo.+ 6 Nifanele nisakhe ngamatye apheleleyo isibingelelo sikaYehova uThixo wenu, yaye nimele nenzele uYehova uThixo wenu iminikelo etshiswayo phezu kwaso. 7 Nimele nenze imibingelelo yobuhlobo,+ niyityele apho,+ nize nivuye phambi koYehova uThixo wenu.+ 8 Nize niwabhale ngokucacileyo kuloo matye onke amazwi alo Mthetho.”+

9 Emva koko uMoses nababingeleli abangabaLevi bathetha nawo onke amaSirayeli besithi: “Yithini cwaka nimamele maSirayeli. Namhlanje niye nangabantu bakaYehova uThixo wenu.+ 10 Nimele nilimamele ilizwi likaYehova uThixo wenu, nize niyithobele imiyalelo+ nemithetho yakhe, endiniyalela yona namhlanje.”

11 Ngaloo mini uMoses wabayalela abantu esithi: 12 “Izizwe eziza kuma eNtabeni YeGerizim+ ukuze zisikelele abantu emva kokuba niyiwelile iYordan nazi: SesakwaSimeyon, esakwaLevi, esakwaYuda, esakwaIsakare, esakwaYosefu nesakwaBhenjamin. 13 Nazi izizwe eziza kuma eNtabeni Ye-Ebhali+ ukuze ziqalekise: SesakwaRubhen, esakwaGadi, esakwa-Ashere, esakwaZebhulon, esakwaDan nesakwaNafetali. 14 Yaye abaLevi baza kuthetha nawo onke amadoda akwaSirayeli bekhwaza, besithi:+

15 “‘Uqalekisiwe umntu owenza umfanekiso oqingqiweyo+ okanye umfanekiso wesinyithi,+ into eyenyanyekayo kuYehova,+ engumsebenzi wezandla zomntu olichule,* aze ayifihle.’ (Yaye bonke abantu baza kuphendula bathi, ‘Amen!’)*

16 “‘Uqalekisiwe umntu odelela utata okanye umama wakhe.’+ (Bonke abantu baza kuthi, ‘Amen!’)

17 “‘Uqalekisiwe umntu onciphisa umda wommelwane wakhe.’+ (Bonke abantu baza kuthi, ‘Amen!’)

18 “‘Uqalekisiwe umntu owenza imfama ibhadule endleleni.’+ (Bonke abantu baza kuthi, ‘Amen!’)

19 “‘Uqalekisiwe umntu ogqwetha isigwebo+ somntu wasemzini, esomntwana ongenatata* okanye esomhlolokazi.’+ (Bonke abantu baza kuthi, ‘Amen!’)

20 “‘Uqalekisiwe umntu olala nomfazi katata wakhe, kuba uhlazisa utata wakhe.’+ (Bonke abantu baza kuthi, ‘Amen!’)

21 “‘Uqalekisiwe umntu olala nesilwanyana.’+ (Bonke abantu baza kuthi, ‘Amen!’)

22 “‘Uqalekisiwe umntu olala nodadewabo, intombi katata wakhe okanye kamama wakhe.’+ (Bonke abantu baza kuthi, ‘Amen!’)

23 “‘Uqalekisiwe umntu olala nomama womfazi wakhe.’+ (Bonke abantu baza kuthi, ‘Amen!’)

24 “‘Uqalekisiwe umntu oqubula ummelwane wakhe aze ambulale.’+ (Bonke abantu baza kuthi, ‘Amen!’)

25 “‘Uqalekisiwe umntu owamkela isinyobo ukuze abulale umntu omsulwa.’+ (Bonke abantu baza kuthi, ‘Amen!’)

26 “‘Uqalekisiwe umntu ongabambeleliyo kumazwi alo Mthetho ngokuthi awathobele.’+ (Bonke abantu baza kuthi, ‘Amen!’)

28 “Ukuba nakanjani niyalimamela ilizwi likaYehova uThixo wenu ngokuyithobela kakuhle yonke imithetho endiniyalela yona namhlanje, ngokuqinisekileyo uYehova uThixo wenu uza kuniphakamisa ngaphezu kwazo zonke ezinye iintlanga.+ 2 Zonke ezi ntsikelelo ziza kunifikela, zibe ninzi,+ ukuba niqhubeka nilimamela ilizwi likaYehova uThixo wenu:

3 “Niza kusikelelwa esixekweni, yaye niza kusikelelwa nasemaphandleni.+

4 “Baza kusikelelwa abantwana benu,+ isiqhamo somhlaba wenu, imfuyo yenu, amathole eenkomo zenu namatakane eegusha zenu.+

5 “Ziza kusikelewa iibhaskithi zenu,+ nezitya enixovela kuzo.+

6 “Niza kusikelelwa kuzo zonke iindawo eniya kuzo, nakuyo yonke into eniyenzayo.

7 “UYehova uza kuzenza zoyiswe phambi kwenu iintshaba zenu ezinihlaselayo.+ Ziza kunihlasela zisuka kwicala elinye kodwa ziza kuthi saa kwiindlela ezisixhenxe xa zinibaleka.+ 8 UYehova uza kubasikelela oovimba benu nayo yonke into eniyenzayo,+ yaye ngokuqinisekileyo uza kunisikelela kwilizwe aninika lona uYehova uThixo wenu. 9 UYehova uza kunenza isizwe sakhe esingcwele+ kanye njengokuba wanifungelayo,+ ngenxa yokuba niqhubeka nithobela imiyalelo kaYehova uThixo wenu yaye nihamba ngeendlela zakhe. 10 Zonke izizwana zomhlaba ziza kunyanzeleka ukuba zibone ukuba nibizwa ngegama likaYehova+ yaye ziza kunoyika.+

11 “UYehova uza kunenza nibe nabantwana abaninzi, nemfuyo eninzi, nesivuno esininzi+ kwilizwe uYehova awafunga kookhokho benu ukuninika lona.+ 12 UYehova uza kunivulela uvimba ogcweleyo, amazulu, ukuze alinike ilizwe lenu imvula ngexesha layo+ aze anisikelele kuyo yonke into eniyenzayo. Niza kubolekisa kwiintlanga ezininzi kodwa nina akuzukufuneka niboleke nto kuzo.+ 13 UYehova uza kunenza nibe yintloko, ningabi ngumsila, yaye niza kuba phezulu+ ningabi phantsi, ukuba niyaqhubeka nithobela imiyalelo kaYehova uThixo wenu endiniyalela yona namhlanje ukuba niyithobele nize niyenze. 14 Nimele ningemki kula mazwi endiniyalela wona namhlanje, niye ekunene okanye ekhohlo,+ nilandele abanye oothixo nize nibakhonze.+

15 “Ukuba anilimameli ilizwi likaYehova uThixo wenu, ningayithobeli yonke imithetho nemimiselo endiniyalela yona namhlanje, zonke ezi ziqalekiso ziza kunifikela:+

16 “Niza kuqalekiswa esixekweni, yaye niza kuqalekiswa nasemaphandleni.+

17 “Ziza kuqalekiswa iibhaskithi zenu,+ nezitya enixovela kuzo.+

18 “Baza kuqalekiswa abantwana benu,+ isiqhamo somhlaba wenu, imfuyo yenu, amathole eenkomo zenu neegusha zenu.+

19 “Niza kuqalekiswa kuzo zonke iindawo eniya kuzo, nakuyo yonke into eniyenzayo.

20 “UYehova uza kuniqalekisa, anenze nibhideke aze anohlwaye kuyo yonke into eniyenzayo nide nitshabalale, ninyamalale ngokukhawuleza, ngenxa yezinto ezimbi enizenzayo nangenxa yokuba nimlibele.*+ 21 UYehova uza kuzenza zithi nca kuni izifo ade abe unitshabalalisile kwilizwe eniza kuhlala kulo.+ 22 UYehova uza kunibetha ngesifo sephepha, ngokutshisa komzimba,+ ngokutshotshozela komzimba, ngobushushu bomzimba, ngekrele,+ ngokutshaza kwezityalo nangokungunda,+ ziza kunithi nca nide nitshabalale. 23 Isibhakabhaka senu siza kuba yikopolo, uze umhlaba ube yintsimbi.+ 24 UYehova uza kujika imvula kwilizwe lenu ibe ngumgubo nothuli, inethe phezu kwenu nide nitshabalale. 25 UYehova uza kunenza noyiswe ziintshaba zenu.+ Niza kuzihlasela nisuka kwicala elinye kodwa niza kuthi saa kwiindlela ezisixhenxe xa nizibaleka; niza kuba yinto eyoyikisayo kuzo zonke izizwe zomhlaba.+ 26 Izidumbu zenu ziza kuba kukutya kweentaka zezulu nezilwanyana ezisemhlabeni, kungabikho mntu uzigxothayo.+

27 “UYehova uza kunibetha ngamathumba aseYiputa, ngamathumba ngaphakathi ezimpundu, ngokhwekhwe nerhashalala, ninganyangeki. 28 UYehova uza kunenza niphambane, nibe ziimfama+ yaye nibhideke. 29 Niza kuphuthaphutha emini emaqanda njengemfama iphuthaphutha ebumnyameni,+ anizukuphumelela kuyo yonke into eniyenzayo; niza kuhlala niqhathwa yaye niphangwa, kungekho mntu onokunihlangula.+ 30 Uza kungeja umfazi, kodwa adlwengulwe yenye indoda. Uza kwakha indlu kodwa awuzukuhlala kuyo.+ Uza kutyala intsimi yeediliya, kodwa awuzukuzitya iziqhamo zayo.+ 31 Inkunzi yakho yenkomo iza kuxhelwa phambi kwamehlo akho kodwa awuzukufumana nencinci kuloo nyama. Idonki yakho iza kuthathwa ujongile yaye ayizukubuyiswa. Iigusha zakho ziza kuthathwa ziintshaba zakho kodwa akuzukubakho mntu ukuncedayo. 32 Oonyana bakho neentombi zakho baza kuthathwa ngabanye abantu,+ ngoxa ujongile, yaye uza kubakhumbula kodwa kube kungekho nto unokuyenza. 33 Isiqhamo somhlaba wakho nayo yonke into oyivelisayo, iza kutyiwa ngabanye abantu ongabaziyo+ yaye uza kuhlala uqhathwa, utyunyuzwa. 34 Izinto ozibonayo ziza kukuphambanisa.

35 “UYehova uza kukubetha ngamathumba abuhlungu nanganyangekiyo emadolweni nasemilenzeni, ukususela phantsi konyawo ukuya kutsho entloko. 36 UYehova uza kukusa wena nokumkani ozikhethele yena kuhlanga wena nookhokho bakho eningalwaziyo,+ yaye apho niza kukhonza abanye oothixo, oothixo abenziwe ngomthi namatye.+ 37 Uza kuba yinto eyoyikekayo, eyokuthukwa neyokugezelwa zizo zonke izizwana akusa kuzo uYehova.+

38 “Uza kuya nembewu eninzi emasimini, kodwa incinci into oza kuyivuna+ kuba iinkumbi ziza kuyitya iphele. 39 Uza kutyala intsimi yeediliya uze uyihlakule, kodwa awuzukusela wayini yaye awuzukuvuna nto,+ kuba iza kutyiwa ngumbungu. 40 Uza kuba nemithi yeminquma kuyo yonke imimandla yakho, kodwa awuzukuzithambisa ngaoli, kuba iminquma yakho iza kuvuthuluka. 41 Uza kuzala oonyana neentombi, kodwa abazukuhlala bengabakho, kuba baza kuthinjwa.+ 42 Ibubu lezinambuzane liza kuhlasela yonke imithi yakho nesiqhamo somhlaba wakho. 43 Umntu wasemzini ohlala nawe uza kuya enyuka, ngoxa wena uya usehla. 44 Wena uza kuboleka kuye, kodwa yena akazukuboleka nto kuwe.+ Uza kuba yintloko, uze wena ube ngumsila.+

45 “Nakanjani na, zonke ezi ziqalekiso+ ziza kunifikela, zinileqe zize zibe zininzi nide nitshabalale,+ ngenxa yokuba ningalimamelanga ilizwi likaYehova uThixo wenu ngokuthobela imiyalelo yakhe nemithetho yakhe aniyalele yona.+ 46 Ziza kuhlala kuni nenzala yenu njengophawu nesilumkiso ngonaphakade,+ 47 ngenxa yokuba anizange nimkhonze uYehova uThixo wenu ninemihlali yaye nivuya ezintliziyweni zenu xa naninezinto ezininzi kakhulu.+ 48 UYehova uza kuthumela iintshaba zenu kuni yaye nina niza kuzisebenzela+ nilambile,+ ninxaniwe, ninqatyelwe naziimpahla, yaye ningenanto. UThixo uza kubeka idyokhwe yentsimbi entanyeni yenu ade abe unitshabalalisile.

49 “UYehova uza kunizisela uhlanga oluvela kude+ ukuba luzokunihlasela. Luza kunixhwila njengokhozi,+ yaye luza kube luthetha ulwimi eningalwaziyo,+ 50 uhlanga oloyikekayo, olungazukumkhathalela umntu omdala okanye lube nenceba emntwaneni.+ 51 Olo hlanga luza kuyitya luyigqibe inzala yemfuyo yenu nesivuno senu nide nitshabalale. Aluzukushiya kutya okuziinkozo, nawayini intsha okanye naoli, lungazukushiya namathole eenkomo okanye amatakane eegusha, lude lunitshabalalise.+ 52 Luza kunirhangqa, lunivalele ngaphakathi kuzo zonke izixeko zenu kulo lonke ilizwe lenu, zide ziwe iindonga zenu eziphakamileyo nezikhuselekileyo enithembele ngazo. Nakanjani luza kunirhangqa kuzo zonke izixeko zenu kuwo wonke ummandla welizwe lenu uYehova uThixo wenu aninike wona.+ 53 Kuza kunyanzeleka nitye abantwana benu, inyama yoonyana neyeentombi zenu+ aninike zona uYehova uThixo wenu, ngenxa yobunzima obubangelwa kukurhangqwa kwenu, nentlungu eniyiziselwa lolo tshaba lwenu.

54 “Neyona ndoda ithambileyo nengayithandiyo into embi, ayizukumsizela umntakwabo okanye umfazi wayo emthandayo okanye oonyana bayo abashiyekileyo, 55 yaye ayizukubapha nentwana kwinyama yoonyana bayo ebatyayo, kuba ingenanto ishiyekileyo ngenxa yobunzima obubangelwa kukurhangqwa kwenu, nentlungu eniyiziselwa lolo tshaba kwizixeko zenu.+ 56 Umfazi othambileyo nongayithandiyo into embi, nongenakuyicinga nokuyicinga into yokubeka unyawo lwakhe emhlabeni kuba ethambile,+ akazukumsizela umyeni wakhe amthandayo okanye unyana wakhe okanye intombi yakhe. 57 Uza kutya nezinto eziphuma phakathi kwemilenze yakhe xa egqiba kuzala, atye kwanoonyana bakhe abazeleyo angabi nalusizi. Uza kuzityela emfihlekweni ngenxa yobunzima obubangelwa kukurhangqwa kwenu, nentlungu eniyiziselwa lolo tshaba.

58 “Ukuba aniwathobeli onke la mazwi oMthetho abhalwe kule ncwadi,+ yaye aniloyiki eli gama lizukileyo neloyikekayo+ likaYehova+ uThixo wenu, 59 uYehova uza kunibetha ngezibetho ezibuhlungu kakhulu, nina nenzala yenu, izibetho ezikhulu nezingapheliyo,+ nezifo ezibuhlungu nezinganyangekiyo. 60 Uza kunizisela zonke izifo zaseYiputa enanizoyika, yaye ngokuqinisekileyo uza kuzenza zithi nca kuni. 61 Ngaphezu koko uYehova uza kude anizisele zonke izifo nezibetho ezingabhalwanga kule ncwadi yoMthetho nide nitshabalale. 62 Nangona niye naba baninzi njengeenkwenkwezi zamazulu,+ bambalwa kuni abaza kushiyeka+ ngenxa yokuba ningalimamelanga ilizwi likaYehova uThixo wenu.

63 “Kanye ngendlela uYehova awayekuvuyela ngayo ukunenza niphumelele nize nande, uYehova uza kukuvuyela kwangaloo ndlela ukunitshabalalisa; niza kuncothulwa kweli lizwe niza kuhlala kulo.

64 “UYehova uza kunisasaza phakathi kwezizwana, nisuke kwesinye isiphelo somhlaba niye kwesinye,+ yaye apho niza kunyanzeleka ukuba nikhonze oothixo abenziwe ngomthi nangamatye, oothixo eningabaziyo nina nookhokho benu.+ 65 Anizukuba seluxolweni phakathi kwezo ntlanga,+ ningabi nayo nendawo yokuphumza unyawo lwenu. Kunoko uYehova uza kunenza nibe nexhala,+ adinwe amehlo enu yaye niphelelwe lithemba.+ 66 Niza kuphila ubomi bentshontsho, noyike ubusuku nemini, yaye ningaqiniseki ngobomi benu. 67 Ekuseni niza kuthi, ‘Akwaba bekusebusuku!’ nize ebusuku nithi, ‘Akwaba bekusekuseni!’ ngenxa yokoyika nangenxa yento eniza kuyibona. 68 Ngokuqinisekileyo uYehova uza kunibuyisela eYiputa ngeenqanawa, ngendlela endathi kuni ngayo, ‘Soze niphinde niyibone,’ yaye apho kuza kufuneka nizithengise kwiintshaba zenu ukuba nibe ngamakhoboka namakhobokazana, kodwa akukho mntu uza kunithenga.”

29 La ngamazwi esivumelwano uYehova awayalela uMoses ukuba asenze nabantu bakwaSirayeli kwilizwe lakwaMowabhi, ukongeza kwisivumelwano awasenza nabo eHorebhe.+

2 Emva koko uMoses waqokelela onke amaSirayeli, wathi kuwo: “Nayibona yonke into uYehova awayenzayo eYiputa kuFaro, kuzo zonke izicaka zakhe, nakulo lonke nje ilizwe lakhe,+ 3 izigwebo ezinamandla enazibonayo, imiqondiso emikhulu nemimangaliso.+ 4 Kude kube namhlanje, uYehova akaninikanga intliziyo eqondayo, amehlo abonayo neendlebe ezivayo.+ 5 ‘Xa bendinikhokela kule minyaka iyi-40 entlango,+ iimpahla zenu khange ziguge yaye neembadada zenu khange ziguge.+ 6 Khange nitye sonka, khange nisele wayini okanye nantoni na ebutywala, ukuze nazi ukuba ndinguYehova uThixo wenu.’ 7 Ekugqibeleni nafika kule ndawo, waza uSihon ukumkani waseHeshbhon+ no-Ogi ukumkani waseBhashan,+ beza kulwa nathi, kodwa saboyisa.+ 8 Emva koko salithatha ilizwe labo saza salinika amaRubhen, amaGadi nehafu yesizwe sakwaManase ukuba ibe lelabo.+ 9 Ngoko ke wathobeleni amazwi esi sivumelwano nize niwenze ukuze yonke into eniyenzayo iphumelele.+

10 “Nonke nimi phambi koYehova uThixo wenu namhlanje, iinkosi zezizwe zenu, abadala benu, amagosa enu, onke amadoda akwaSirayeli, 11 abantwana benu, abafazi benu,+ abantu basemzini+ abakunye nani, ukususela kogawula iinkuni ukuya kutsho kokha amanzi. 12 Nilapha ukuze ningene kwisivumelwano sikaYehova uThixo wenu nakwisifungo sakhe asenza nani uYehova uThixo wenu namhlanje+ 13 ukuze anikhethe namhlanje nibe ngabantu bakhe,+ naye abe nguThixo wenu,+ kanye njengokuba eye wanithembisa waza wafunga kookhokho benu uAbraham,+ uIsake+ noYakobi.+

14 “Andisenzi nani nodwa esi sivumelwano nesi sifungo, 15 kodwa ndisenza kunye nabo bemi nathi phambi koYehova uThixo wethu namhlanje, kunye nabo bangekho kunye nathi apha namhlanje. 16 (Kuba niyazi kakuhle indlela esasihleli ngayo eYiputa nendlela esadlula ngayo kwiintlanga ezahlukahlukeneyo ngoxa nanisendleleni.+ 17 Yaye nanidla ngokuzibona izinto zazo ezilizothe nezithixo*+ zazo ezenyanyekayo, ezenziwe ngomthi nangelitye, ngesilivere nangegolide.) 18 Lumkani ukuba phakathi kwenu kungabikho ndoda okanye umfazi, intsapho okanye isizwe esiba nentliziyo eyekayo ukuthobela uYehova uThixo wethu namhlanje, size siyokukhonza oothixo bezo ntlanga,+ kungabikho ngcambu evelisa isiqhamo esinetyhefu nomhlonyane.+

19 “Kodwa ukuba umntu uva amazwi esi sifungo, aze azikhukhumalise entliziyweni yakhe athi, ‘Ndiza kuba seluxolweni, nokuba ndenza okufunwa yintliziyo yam,’ ize loo nto ibangele ukuba ehlelwe yintlekele yena nabantu abasondeleyo kuye,* 20 uYehova akazukumxolela.+ Kunoko uYehova uza kuba nomsindo kakhulu ngenxa yaloo mntu, yaye zonke ezi ziqalekiso zibhalwe kule ncwadi ziza kumfikela ngokuqinisekileyo,+ yaye nakanjani uYehova uza kulicima igama laloo mntu phantsi kwamazulu. 21 Emva koko uYehova uza kumkhetha phakathi kwazo zonke izizwe zakwaSirayeli, amzisele intlekele ngokuvumelana nazo zonke iziqalekiso ezikwisivumelwano esibhalwe kule ncwadi yoMthetho.

22 “Xa isizukulwana soonyana benu nomntu wasemzini ovela kwilizwe elikude bebona izibetho zelo lizwe nezifo uYehova alizisele zona ezizezi, 23 isalfure netyiwa, nokutsha, ukuze ilizwe lonke lingatyalwa okanye kukhule nto kulo, yaye kungabikho zityalo zintshulayo, njengaxa kwakutshatyalaliswa iSodom neGomora,+ iAdima neTsebhoyim,+ ezo uYehova awazitshabalalisa enomsindo yaye ecaphukile, 24 baza kuthi bona nazo zonke iintlanga, ‘Kwakutheni ukuze uYehova alitshabalalise eli lizwe?+ Wayecatshukiswe yintoni kangaka?’ 25 Abantu baza kuthi, ‘Kungenxa yokuba basaphula isivumelwano sikaYehova+ uThixo wookhokho babo, awasenza nabo xa wayebakhupha eYiputa.+ 26 Kodwa basuka bakhonza abanye oothixo baza baqubuda kubo, oothixo ababengabazi nawayengabavumelanga uThixo ukuba babakhonze.+ 27 UYehova wacaphuka kakhulu waza walizisela elo lizwe zonke iziqalekiso ezibhalwe kule ncwadi.+ 28 Emva koko uYehova wabancothula elizweni labo enomsindo+ yaye ecaphuke kakhulu, wabasa kwelinye ilizwe, abasekulo nangoku.’+

29 “UYehova uThixo wethu uyazazi zonke izinto ezifihlakeleyo,+ kodwa zona izinto afuna ukuzityhila uzinike thina nenzala yethu ngonaphakade, ukuze siwathobele onke amazwi alo Mthetho.+

30 “Xa zonke ezi zinto zisenzeka kuni, iintsikelelo neziqalekiso endizibeke phambi kwenu,+ niwakhumbule+ la mazwi nikuzo zonke iintlanga uYehova uThixo wenu anisasazele kuzo,+ 2 nibuyele kuYehova uThixo wenu+ yaye niwathobele onke amazwi akhe endiniyalela wona namhlanje, nina noonyana benu, nibuyele kuye ngentliziyo yenu yonke nangomphefumlo* wenu wonke,+ 3 uYehova uThixo wenu uza kubabuyisa abathinjwa benu,+ abe nenceba kuni+ aze aniqokelele kwakhona kuzo zonke izizwana anisasazele kuzo uYehova uThixo wenu.+ 4 Nokuba abantu benu basasazeke ukuya kutsho nakwezona ndawo zikude emhlabeni, uYehova uThixo wenu uza kuniqokelela aze anibuyise.+ 5 UYehova uThixo wenu uza kunibuyisela kwilizwe ababehlala kulo ootata benu nize nihlale kulo; uza kunenza niphumelele, anandise ngaphezu kwabo.+ 6 UYehova uThixo wenu uza kucoca intliziyo yenu neyenzala yenu,+ ukuze nimthande uYehova uThixo wenu ngentliziyo yenu yonke nangomphefumlo* wenu wonke, nize niphile.+ 7 Emva koko uYehova uThixo wenu uza kuzisa zonke ezi ziqalekiso kwiintshaba zenu ebezinicaphukela zaza zanitshutshisa.+

8 “Emva koko niza kubuya, nilimamele ilizwi likaYehova nize niyithobele yonke imiyalelo yakhe endiniyalela yona namhlanje. 9 UYehova uThixo wenu uza kunenza niphumelele kuwo wonke umsebenzi wezandla zenu,+ nibe nabantwana abaninzi, imfuyo eninzi nesivuno esininzi, ngoba uYehova uza kuphinda akuvuyele ukunenza niphumelele, kanye ngendlela awayekuvuyela ngayo ukubenza baphumelele ookhokho benu.+ 10 Kuba ngelo xesha niza kulimamela ilizwi likaYehova uThixo wenu, nithobele imiyalelo nemithetho ebhalwe kule ncwadi yoMthetho, nize nibuyele kuYehova uThixo wenu ngentliziyo yenu yonke nangomphefumlo* wenu wonke.+

11 “Lo myalelo endiniyalela wona namhlanje awunzimanga yaye uyafikeleleka.+ 12 Awukho semazulwini ukuba ningade nithi, ‘Ngubani na oza kunyuka aye emazulwini ayokusithathela wona, ukuze siwuve size siwuthobele?’+ 13 Awukho nangaphesheya kolwandle ukuba ningade nithi, ‘Ngubani na oza kusiwelela ulwandle ayokusithathela wona, ukuze siwuve size siwuthobele?’ 14 Kuba eli lizwi likufutshane kakhulu kuni, lisemilonyeni yenu nasezintliziyweni zenu,+ ukuze nilithobele.+

15 “Jongani, ndibeka phambi kwenu namhlanje ubomi nokulungileyo, ukufa nokubi.+ 16 Ukuba niyayimamela imiyalelo kaYehova uThixo wenu endiniyalela yona namhlanje, yokuba nimthande uYehova uThixo wenu,+ nihambe ngeendlela zakhe, nize nithobele imiyalelo yakhe, imithetho yakhe nezigwebo zakhe, niza kuphila,+ nande, aze uYehova uThixo wenu anisikelele kwilizwe eniza kuhlala kulo.+

17 “Ukuba intliziyo yenu iye yemka kuThixo,+ ningammameli, nize nitsaleleke ukuba niqubude kwabanye oothixo nibakhonze,+ 18 ndiyaniqinisekisa ukuba nakanjani niza kutshabalala.+ Anizukuhlala ixesha elide kwilizwe eninqumla iYordan nisiya kulo. 19 Amazulu nomhlaba ngamangqina namhlanje okuba, ndibeke phambi kwenu ubomi nokufa, intsikelelo nesiqalekiso.+ Khethani ubomi ukuze niphile,+ nina nenzala yenu,+ 20 ngokuthi nimthande uYehova uThixo wenu,+ nilimamele ilizwi lakhe,+ ninamathele kuye, kuba ububomi benu yaye niza kuhlala ixesha elide kwilizwe uYehova awafunga ukulinika ookhokho benu, uAbraham, uIsake noYakobi.”+

31 Emva koko uMoses wathetha la mazwi kuwo onke amaSirayeli, 2 wathi: “Namhlanje ndineminyaka eyi-120.+ Andizukukwazi ukuqhubeka ndinikhokela kuba uYehova uthe kum, ‘Awuzukuyiwela iYordan.’+ 3 NguYehova uThixo wenu oza kuwela phambi kwenu, yaye uza kuzitshabalalisa ngokwakhe ezi ntlanga phambi kwenu nize nithathe ilizwe lazo.+ NguYoshuwa oza kunikhokela xa niwela,+ njengoko uYehova etshilo. 4 UYehova uza kwenza ngendlela awenza ngayo kuSihon+ nakuOgi,+ ookumkani bama-Amori, nakwilizwe labo xa wabatshabalalisayo.+ 5 UYehova uza kuzoyisa, yaye nina nimele nenze kuzo yonke into endiniyalele yona.+ 6 Yibani nesibindi, nomelele.+ Sanukoyika okanye nothuswe zizo,+ kuba uYehova uThixo wenu uhamba phambi kwenu. Akasoze anishiye, engasoze anilahle.”+

7 Emva koko uMoses wabiza uYoshuwa waza wathetha naye phambi kwawo onke amaSirayeli esithi: “Yiba nesibindi uze womelele,+ kuba nguwe oza kungenisa aba bantu kwilizwe uYehova awafunga ukulinika ookhokho babo, yaye nguwe oza kubanika lona ukuba libe lilifa labo.+ 8 UYehova uhamba phambi kwakho yaye uza kuqhubeka enawe.+ Akasoze akushiye, engasoze akulahle. Uze ungoyiki okanye wothuke.”+

9 Emva koko uMoses wawubhala lo Mthetho+ waza wawunika ababingeleli abangabaLevi, abathwala ityeya kaYehova yesivumelwano, nabo bonke abadala bakwaSirayeli. 10 UMoses wabayalela wathi: “Qho xa kuphela iminyaka esixhenxe, ngexesha elibekiweyo ngonyaka wokucinywa kwamatyala abo banityalayo,+ xa nibhiyozela iTheko Lamakhusi,+ 11 xa onke amaSirayeli esiza phambi koYehova+ uThixo wenu kwindawo aza kuyikhetha, nize niwufunde lo Mthetho phambi kwawo onke amaSirayeli ukuze awuve.+ 12 Qokelelani abantu,+ amadoda, abafazi, abantwana nabantu basemzini abahlala ezixekweni zenu, ukuze bamamele, bafunde ngoYehova uThixo wenu baze bamoyike, baqiniseke ukuba bayawathobela onke amazwi alo Mthetho. 13 Oonyana babo ababengawazi lo Mthetho baza kutsho bamamele,+ baze bafunde ukumoyika uYehova uThixo wenu yonke imihla yokuphila kwenu kwilizwe eniwela iYordan nisiya kuhlala kulo.”+

14 Emva koko uYehova wathi kuMoses: “Jonga! Lisondele ixesha lokuba ufe.+ Biza uYoshuwa, nize nime ententeni yokuhlangana, ukuze ndimbeke abe yinkokheli.”+ Ngoko uMoses noYoshuwa baya ententeni yokuhlangana. 15 Emva koko uYehova wabonakala ententeni kumqulu welifu, yaye umqulu welifu wema ngakumnyango wentente.+

16 UYehova wathi kuMoses: “Jonga! Wena sele uza kufa, ibe aba bantu baza kuzenza abafazi abathengisa ngemizimba koothixo basemzini ababangqongileyo kwilizwe abaya kulo.+ Baza kundilahla+ baze basaphule isivumelwano endisenze nabo.+ 17 Ngelo xesha ndiza kuba nomsindo kubo,+ ndibalahle+ ndize ndibufihle ubuso bam kubo+ bade batshatyalaliswe. Emva kokuba behlelwe ziintlekele ezininzi nazizinto ezibuhlungu,+ baza kuthi, ‘Akungebi bethu uThixo wethu akekho phakathi kwethu le nto sifikelwe zezi ntlekele?’+ 18 Kodwa mna ndiza kuqhubeka ndibufihlile ubuso bam ngelo xesha, ngenxa yabo bonke ububi ababenzileyo ngokuya kukhonza abanye oothixo.+

19 “Ngoku ke bhalani le ngoma+ nize niyifundise amaSirayeli.+ Mawayifunde ukuze iwakhumbuze into eyenzekayo xa engamthobeli uThixo.+ 20 Xa sele ndiwangenisile kwilizwe endafunga ngalo kookhokho babo,+ ilizwe eligcwele ubisi nobusi,+ yaye xa sele etye anela, nezinto zawahambela kakuhle,*+ aza kujika aye kwabanye oothixo, abakhonze, andidelele aze asaphule isivumelwano sam.+ 21 Xa esehlelwa ziintlekele ezininzi nazizinto ezibuhlungu,+ le ngoma iza kuwakhumbuza ukuba kwenzeka ntoni xa engamthobeli uThixo (kuba inzala yawo ayimele iyilibale), kaloku sele ndiyazi iminqweno yawo+ kwangoku engekangeni kwilizwe endifunge ngalo.”

22 Ngaloo mini uMoses wayibhala phantsi le ngoma, waza wayifundisa amaSirayeli.

23 Emva koko wambeka* waba yinkokheli uYoshuwa+ unyana kaNun waza wathi: “Yiba nesibindi uze womelele,+ kuba nguwe oza kungenisa amaSirayeli kwilizwe endiwafungele ngalo,+ yaye ndiza kuba nawe.”

24 Emva nje kokuba uMoses egqibile ukuwabhala amazwi alo Mthetho encwadini,+ 25 wabayalela abaLevi abathwala ityeya kaYehova yesivumelwano wathi: 26 “Thathani le ncwadi yoMthetho,+ niyibeke ecaleni kwetyeya+ yesivumelwano kaYehova uThixo wenu, ukuze asebenzise yona xa enigweba. 27 Kuba ndikwazi kakuhle ukungathobeli+ nokuba nenkani kwenu.*+ Ukuba niye anamthobela uYehova uThixo wenu ngoxa bendisaphila kunye nani, kuza kubeka phi xa sele ndifile! 28 Ndibizeleni bonke abadala bezizwe zenu, namagosa enu ukuze ndiwathethe kubo la mazwi, aze amazulu nomhlaba abe ngamangqina.+ 29 Kuba ndazi kakuhle ukuba xa ndifile niza kwenza izinto ezimbi+ nize nimke kwizinto endiniyalele zona. Yaye ngokuqinisekileyo kwixesha elizayo niza kufikelwa yintlekele+ kuba niza kwenza izinto ezimbi emehlweni kaYehova yaye niza kumcaphukisa ngemisebenzi yezandla zenu.”

30 Emva koko uMoses wawathetha amazwi ale ngoma, waqala ekuqaleni wayokuphuma ekugqibeleni, limamele lonke ibandla lamaSirayeli:+

 3 Kuba ndiza kuthetha ngegama likaYehova.+

Thethani ngobukhulu bukaThixo wethu!+

 5 Ngabo abenze ububi.+

Abangobantwana bakhe, yaye ngabo ababangele loo nto.+

Basisizukulwana esigoso nesijijekileyo!+

15 Xa uYeshurun* watyebayo wakhabalaza.

Tyhini Yeshurun, utyebile ngoku, umkhulu yaye uvuthelene.+

29 Akwaba nje bebelumkile!+ Bebeza kucingisisa ngale nto.+

Bebeza kucinga ngekamva labo.+

Mabaphakame ke banincede.

Mababe yindawo yenu yokubalekela.

Ndiyabulala, yaye ndinika ubomi.+

44 Ngoko uMoses weza ehamba noHosheya*+ unyana kaNun, wawathetha amazwi ale ngoma abantu bemamele.+ 45 Akugqiba uMoses ukuthetha onke la mazwi kumaSirayeli, 46 wathi: “Wafakeni entliziyweni onke la mazwi ndinilumkisa ngawo namhlanje,+ ukuze niyalele oonyana benu ukuba bawenze onke amazwi alo Mthetho.+ 47 Kuba la asingomazwi njee, kodwa athetha ubomi kuni,+ yaye ngala mazwi ningaphila ixesha elide kwilizwe eniwela iYordan nisiya kuhlala kulo.”

48 Kwangaloo mini uYehova wathetha noMoses wathi: 49 “Nyuka le ntaba yaseAbharim,+ iNtaba INebho,+ ekwilizwe lakwaMowabhi, ejonge eYeriko, uze ubone ilizwe lakwaKanan endilinika amaSirayeli ukuba ahlale kulo.+ 50 Emva koko uza kufela kule ntaba uza kuyinyuka, uze uhlanganiselwe kubantu bakowenu,* njengoAron umntakwenu owafela kwiNtaba YeHore+ waza wahlanganiselwa kubantu bakowabo, 51 kuba nobabini anizange nithembeke kum phambi kwamaSirayeli emanzini aseMeribha+ yaseKadeshe entlango yeTsin, kuba anizange nindingcwalise phambi kwamaSirayeli.+ 52 Awuzukungena kwilizwe endilinika amaSirayeli, kodwa uza kulibonela kude.”+

33 Nantsi indlela uMoses, umntu kaThixo wokwenene, awawasikelela ngayo amaSirayeli ngaphambi kokuba afe.+ 2 Wathi:

7 Nantsi intsikelelo awamsikelela ngayo uYuda:+

 8 Wathi ngoLevi:+

12 Wathi ngoBhenjamin:+

13 Wathi ngoYosefu:+

18 Wathi ngoZebhulon:+

19 Baza kubizela abantu ezintabeni.

Baza kubingelela ngemibingelelo yobulungisa apho.

20 Wathi ngoGadi:+

“Uza kusikelelwa umntu owandisa imida kaGadi.+

Iinkokheli zabantu ziza kuqokelelana.

22 Wathi ngoDan:+

“UDan lithole lengonyama.+

Uza kutsiba ephuma kwaBhashan.”+

23 Wathi ngoNafetali:+

Hlala entshona nasemzantsi welizwe.”

24 Wathi ngoAshere:+

“UAshere usikelelwe ngoonyana.

29 Uyavuya wena Sirayeli!+

Uze uzinyathele emqolo.”*

34 Emva koko uMoses wenyuka esuka kwintlango yakwaMowabhi, waya eNtabeni YeNebho+ phezu kwePisga+ ejonge eYeriko.+ UYehova wambonisa lonke ilizwe, ukusuka eGiliyadi ukuya kutsho kwaDan,+ 2 wambonisa kwaNafetali nelizwe lakwaEfrayim nelakwaManase, wambonisa nalo lonke ilizwe lakwaYuda ukuya kutsho kulwandle lwasentshona,*+ 3 wambonisa neNegebhi+ neNgingqi+ yaseYordan, ithafa laseYeriko, isixeko semithi yesundu, ukuya kutsho eTsoware.+

4 Ngoko uYehova wathi kuye: “Nalo ke ilizwe endafunga ngalo kuAbraham, uIsake noYakobi, ndisithi, ‘Ndiza kulinika inzala yakho.’+ Ndikubonisile ke, kodwa awuzukuwela uye kulo.”+

5 Emva koko uMoses umkhonzi kaYehova wafela apho kwaMowabhi njengokuba wayetshilo uYehova.+ 6 Wamngcwabela entlanjeni yakwaMowabhi, emelene neBhete-peyore, kodwa akukho mntu ulaziyo ncam ukuba lindawoni ingcwaba lakhe nanamhlanje.+ 7 UMoses wafa eneminyaka eyi-120.+ Wayesabona kakuhle futhi esenamandla. 8 Abantu bakwaSirayeli bamlilela uMoses kwintlango yakwaMowabhi iintsuku eziyi-30.+ Emva koko zaphela iintsuku zokumlilela nokumzilela.

9 UYoshuwa unyana kaNun waba nobulumko obuni­nzi,* kuba uMoses ­wayembeke isandla;+ yaye amaSirayeli ammamela aza enza njengokuba uYehova wayeyalele uMoses.+ 10 Kodwa zange kuphinde kubekho mprofeti ufana noMoses kwaSirayeli,+ owayesaziwa nguYehova ubuso ngobuso.+ 11 UMoses wayenza yonke imiqondiso nemimangaliso uYehova awayemthume ukuba ayenze eYiputa, kuFaro nakuzo zonke izicaka zakhe, kulo lonke ilizwe lakhe,+ 12 ngesandla esomeleleyo nangamandla amangalisayo, phambi kwawo onke amaSirayeli.+