Iintlanganiso Zokusinceda Senze Abafundi
IVEKI EQALA NGODISEMBA 31
12 imiz: Izaziso zasekuhlaleni neZaziso ezikhethiweyo kuBulungiseleli Bethu BoBukumkani. Balaselisa usuku olukhethekileyo lwamaphephancwadi ngoAprili 6. Balaselisa umnikelo wangoJanuwari. Chaza amagama eempapasho ezindala eninazo esitokhweni. Qwalasela iintshayelelo ezisenokusetyenziswa noMxholo Wencoko omtsha. Ukuba iincwadi ezindala ezibonisiweyo azikho, balaselisa ukusetyenziswa kwencwadi ethi Iindaba Ezilungileyo.
18 imiz: “Musa Ukutyhafa.” Ingxubusho yeengongoma eziziintloko zenqaku. Funa amacebiso kubaphulaphuli xa kuxutyushwa isiqendu 3. Yiba nomvakalisi ofanelekayo esenza umboniso womnikelo, esebenzisa amacebiso akwisiqendu 5. Likhuthaze ibandla ukuba lihlale lixakekile enkonzweni yasentsimini yaye lingatyhafi okanye lidinyazwe kukungabi namdla okanye inkcaso elihlangabezana nayo.
15 imiz: Ukuxabisa Umsebenzi Owenziwa Ngumveleli Wesiphaluka. Xubusha nabaphulaphuli umbandela ophantsi kothi “Umveleli Wesiphaluka” kwiphepha 47-50 lencwadi ethi Ukulungelelaniselwa Ukufeza Ubulungiseleli Bethu. Usihlalo ufanele agxininise indlela esinokungenelwa ngayo ngokuluxhasa ngokupheleleyo utyelelo. Sifanele siwuxabise umzekelo wokuhlonel’ uThixo omiselwa ngumveleli wesiphaluka nowakwakhe ekuphumezeni isabelo sabo.
Ingoma 147 nomthandazo wokuqukumbela.
IVEKI EQALA NGOJANUWARI 7
8 imiz: Izaziso zasekuhlaleni. Yithi gqaba-gqaba ngeengongoma ezikumaphephancwadi ezisenokusetyenziswa ekunikeleni ubungqina kule veki.
20 imiz: “Ngaba Abantwana Bakho Sebelungele Ukubuyela Esikolweni?” Ukuqwalaselwa kwenqaku nabaphulaphuli ngemibuzo neempendulo. Mazifundwe iziqendu nezibhalo. Ukuba kukho nawaphi na amava asekuhlaleni abonisa iingongoma ezibalaseliswayo, la anokubaliswa ngokuvuma kwexesha.
17 imiz: Sinokuhlala Njani Somelele? Ungcelele lodliwano-ndlebe lokubalaselisa imfuneko yokuhlala somelele singatyhafi. (1) Dlan’ indlebe nababini okanye abathathu abebekhonza kangangeminyaka emininzi nabayimizekelo emihle. Ziziphi iingcinezelo zokuyeka ukushumayela abaye bahlangabezana nazo baza bazoyisa? Yintoni ebancedileyo ukuba bahlale bomelele baze bangatyhafi? (Banokukhankanya umthandazo, ukubakho rhoqo ezintlanganisweni, ufundisiso lobuqu, ukukhuthazwa ngabanye, njalo njalo.) Yintoni abayenzayo ukuze balumkele ukuthob’ isantya okanye ukuyeka? (Banokukhankanya ukubaluleka kokunxulumana rhoqo nabazalwana kwiintlanganiso, ukuhlala besenza ufundisiso lobuqu, ukuxabisa ulwalamano lwabo noYehova, njalo njalo.) Baye bakulondoloza njani ukulungelelana kokomoya? (Banokukhankanya uncedo lwabadala okanye lwabanye, ukubeka kuqala izilangazelelo zoBukumkani ebomini, ukuthandaza kuYehova, njalo njalo.) (2) Dlan’ indlebe nabantwana abathile abangabavakalisi abakhutheleyo nabayimizekelo emihle. Yintoni eye yabanceda ukuba baye rhoqo enkonzweni yasentsimini? Abazali babancede njani? Ngaba abanye abavakalisi bayabakhuthaza baze babancede enkonzweni yasentsimini? Luyintoni usukelo lwabo enkonzweni kaYehova? Qukumbela ngokwenza impinda emfutshane yeengongoma eziye zaphuhliswa kolu dliwano-ndlebe.
Ingoma 10 nomthandazo wokuqukumbela.
IVEKI EQALA NGOJANUWARI 14
10 imiz: Izaziso zasekuhlaleni. Ingxelo yemali nezaziso zokufunyanwa kweminikelo. Lincome ibandla ngokuxhasa kwalo umsebenzi wazwenibanzi neNgxowa-mali yoMbutho yeeHolo zoBukumkani. Tsalela ingqalelo kwinkcazelo ekwelithi “Zilungiselele Iphulo Lokuhambisa Umrhumo WeMboniselo,” uze ukhuthaze abavakalisi ukuba bafake isicelo samaphephancwadi awongezelelekileyo abawafunayo. Abavakalisi basengathanda ukuphatha iWatch Tower Publications Index 1986-1989 kwiNtlanganiso Yenkonzo kwiveki ezayo.
20 imiz: I-“Medical Document” Ne-“Identity Card.” Unobhala uyalela ukuba kudluliswe amakhadi aze aqwalasele iziqendu 1, 2, 4-7, 9 nese-10 zeleta evela kuMbutho kaJanuwari 1, 1990, mayela nalo mbandela. Qiqa nabaphulaphuli ngesizathu sokuba ifanele ilandelwe ngenyameko le miyalelo ukuze amakhadi asebenze ngokona kunempumelelo ukusikhusela. Abadala banokwenza uhlolisiso emva kwentlanganiso njengoko babenzile nyakenye. Musani ukukubekel’ amangomso ukuzalisa amakhadi nokuwatyobela ngokufanelekileyo.
15 imiz: “Ndinokuhlangabezana Njani Nengcinezelo Yoontanga?” Umdala ofanelekileyo uxubusha ngobuchule iingongoma ezikwisahluko 9 sencwadi ethi Abantu Abaselula kunye nababini abaselula abangumzekelo. Makathi gqaba-gqaba ebonisa ukuba umnqweno wokuthandwa nokwamkelwa ngoontanga unamandla kakhulu. Kwanabantu abakhulileyo banokuchatshazelwa yingcinezelo enjalo. Ngaba kube lula ngolu lutsha ukujamelana noku? Luye lwakwazi njani ukuxhathisa? Sebenzisa “Imibuzo Yengxubusho” ekwiphepha 80 ukuze wenze olu lutsha luthethe uze ubonise indlela ekunokwenzeka ngayo ukukhulisa amandla okuxhathisa ingcinezelo yoontanga. Wuncome umzekelo omhle omiselwa lulutsha ebandleni. UYehova uyakholiswa yihambo yalo entle yaye iyamzukisa.—IMize. 27:11.
Ingoma 108 nomthandazo wokuqukumbela.
IVEKI EQALA NGOJANUWARI 21
10 imiz: Izaziso zasekuhlaleni. Iindaba Ezingokobuthixo. Quka amalungiselelo enkonzo yasentsimini kule mpela-veki. Nikela amacebiso ngamanqaku akumaphephancwadi angoku anokuba nomtsalane ngokukhethekileyo kubantu abakwintsimi yasekuhlaleni. Wonk’ ubani ufanele eze nombhalo wephecana elithi Ubomi Kwihlabathi Elitsha Elinoxolo kwiNtlanganiso Yenkonzo kwiveki ezayo.
15 imiz: “Ukufeza Ubulungiseleli Bethu BoBukumkani Ngoncedo LweIndex.” Intetho ngumdala nothabatho-nxaxheba lwabaphulaphuli. Yenza umboniso wendlela umdala nesicaka solungiselelo abanokuyisebenzisa ngayo i-Index ekulungiseleleni utyelelo lokwalusa. Xubusha indlela yokufundisa abavakalisi ukusebenzisa i-Index ukuze bangenelwe kufundo lwabo lweBhayibhile lweeveki ngeeveki. Ukuba i-Index yesiNgesi ayikho, bonisa ukusetyenziswa kweSalathiso saminyaka le seMboniselo noVukani!
10 imiz: “Hlaziya Izalamane Zakho Ngamanzi Enyaniso.” Intetho esekelwe kwinqaku leMboniselo kaFebruwari 15, 1990, iphepha 25-7.
10 imiz: Imisebenzi Yesicaka Esinyamekela Uncwadi. Umveleli wenkonzo udlan’ indlebe nesicaka esinyamekela uncwadi, ehlolisisa iimbopheleleko ezibandakanyekileyo. Bekuya kuba kuhle ukubalaselisa iintswelo zasekuhlaleni ezinokuba negalelo ekuphuculeni ukuthatyathwa koncwadi ngaphambi nasemva kweentlanganiso.
Ingoma 203 nomthandazo wokuqukumbela.
IVEKI EQALA NGOJANUWARI 28
8 imiz: Izaziso zasekuhlaleni.
22 imiz: “Ukunikela Iindaba Ezilungileyo—Ngamaphecana Nangezimemo.” Ingxubusho yemibuzo neempendulo. Izibhalo mazifundwe. Emva kokuxubusha isiqendu 7, yiba novulindlela okanye omnye umvakalisi onobuchule esenza umboniso wokuqalisa isifundo kwibuyelo esebenzisa iphecana elithi Ubomi Kwihlabathi Elitsha Elinoxolo. Khuthaza abavakalisi ukuba basebenzise le ntshayelelo kumabuyelo, ngokukodwa xa bekunzima ukubafumana abaninimzi emakhaya emva kotyelelo lokuqala. Mema abaphulaphuli abalungiseleleyo ukuba bagqabaze ngendlela abaye baphumelela ngayo ekusebenziseni le ntshayelelo. Qinisekisa ukuba ibandla linesixa esaneleyo samaphecana nezimemo.
15 imiz: Ngaba Unokuba Nguvulindlela Ongumncedani NgoAprili? Ingxubusho enehlombe ngumzalwana onamava okuba nguvulindlela othe ngxi okanye ongumncedani. Dlan’ indlebe nabaliqela ababengoovulindlela babancedani ngaphambili. Luluphi uhlengahlengiso abalwenzayo ukuze bafikelele usukelo lwabo? Balaselisa amacebo asebenzisekayo abawenzayo. Njengoko ixesha leSikhumbuzo lisondela, khuthaza abavakalisi abanomdla ukuba baxubushe oko bakucebayo nomdala. Ngokuba nesimo sengqondo esihle ngoku, abaninzi baya kuyinandipha le nkonzo. Kwabanye lo isenokuba ngumchankcatho osa ekungeneleni inkonzo yobuvulindlela obuthe ngxi. (kmXO 2/90 iphe. 3) Iifomu zesicelo zinokufunyanwa kumveleli owongamelayo okanye unobhala.
Ingoma 151 nomthandazo wokuqukumbela.