ნოემბერ

მშობელ ქორეთ-და, ქიმეხვარით თქვან სქუალეფს მუნეფიშ ასაკშო შესაფერის კომენტარეფიშ მომზადებას. კანკალეშა კრებაშ შეხვალამეფს ვარჩიენთ თიცალ სერიოზულ საკითხეფს, მუნერით რე ოჯახურ პრობლემეფ დო ზნეობრივ საკითხეფ. მარა თე დროს ხოლო შეილებნა თიცალ აბზაც დოგორათ, ნამდგაშა თქვან სქუალეფს ართ ვარდა ჟირ კომენტარ არაგადენა. თეს გეძინელ, ქიმეხვარით თქვან ბაღანეფს ქიგეგან, მუშენ შილებე ვა კითხას ჩამტარებელქ ირ ხეშ ეჭოფუას. თე ირფელიშ ენწყუმა ბაღანას მეხვარებ, გურ ვეგიტახას, მუჟამსით თიშ მანგიორო შხვას ქარაგადაფუანა კომენტარს (1 ტიმ. 6:18). არძას შემლებნა თიცალ კომენტარეფ მუვამზადათ, მუდგათ ქოთ იეჰოვას განვადიდენთ დო ქოთ თანაქრისტიანეფს ელვუკინანთ გურშა (იგავ. 25:11). მინშა შილებე, გარჩიებაშ დროს, ჩქინ პირად გამოცდილებაშე მუდგარენეფ ქიმიფშინუათ, მარა ფრთხილას ოკო ვორდათ, ნამდა ჩქინ დუდშე ბრელ ვეფჩუათ (იგავ. 27:2; 2 კორ. 10:18). თეშ მანგიორო, ირიათო ოკო ვეცადათ, ნამდა ჩქინ კომენტარეფს მთელ ყურადღება იეჰოვაშა, თიშ სიტყვაშა დო თიშ ხალხშა გეგნიბღათ (გამოცხ. 4:11). w23.04 24, 25 ¶17, 18

კურცხას ქუდოფსქიდათინ თიშო ჸოროფა მნიშვნელოვან რე (მათ. 22:37—39). ღორონთიშ ჸოროფა მოხვარნა, გუვაგრძელათ მსახურება თიმწკუმა ხოლო, მუჟამსით შილებე თეს სირთულეეფქ ქუმაჸუნას (2 ტიმ. 1:7, 8). მოყვასიშ ჸოროფა აღბძრენა, არძა საშვალება გეგმიბრინუათ, ნამდა სახიოლო ამბე გეგნოფჩათ. მაგალთო, ვუქადაგათ ტელეფონით ვარდა წერილეფით. ჩქი იმენდ მიღნა, ნამდა თინეფ ართ დღასით დითირუნა დო ქიდიჭყანა თიშ კეთებას, მუთ სწორ რე (ეზეკ. 18:27, 28). მოყვასიშ ჸოროფას თით ხოლო გიმიფრჩქინანთ, ნამდა მიჸორა თანაქრისტიანეფ დო გურშა ელვუკინანთ დო ვამანგარენთ თინეფს (1 თეს. 5:11). მუჭოთ ჯარიშკოჩეფ ელურენა დო ამანგარენა ართიანს ბრძოლაშ დროს, თეშ ჩქი ხოლო, გურშა ელვუკინანთ ართიანს. შეგნებულო ჩქი ხოლო დღას ვა უწყუნუანთ გურს თანაქრისტიანეფს დო გლახა გამკეთეს-და, მანგიორს ვეგნუგანთ (1 თეს. 5:13, 15). ჸოროფას გიმიფრჩქინანთ თიმწკუმა ხოლო, მუჟამსით პატის ფცენთ თი ჯიმალეფს, მით კრებას ხემძღვანელენა (1 თეს. 5:12). w23.06 10 ¶6; 11 ¶10, 11

პირველ საშვალება, მუთ რწმენაშ გამანგარებას მიმეხვარებნა, გიშაჸიდირალშე ფიქრ რე, მუშენდა ზუსტას თინა მარწმუნენა, ნამდა ღორონთიშ არძა დუნაპირებ შისრულებ. მუჟამსით ფიფქრენთ, მუშენ გიშამჸიდეს ღორონთიქ დო მუშმადიდა მსხვერპლშა იდჷ თიქ, უმოსო იბრწმუნებუთ, ნამდა ულიებ სიცოცხლე დო უჯგუშ მომავალწკუმა დაკავშირებით თიშ დუნაპირებ აუცილებერო შისრულებ. მუშენ შემლებნა თეშ რაგად? მუჭო გიშამჸიდეს იეჰოვაქ? თიქ მუშ საჸოროფო, ხვალეგუნაჭყეფ სქუა დო ხოლოშიან მეგობარ, ზეცაშე დედამიწაშა ქუმაშქვჷ, ნამდა დაბადებედკო, მუჭოთ სრულყოფილ ადამიან. დედამიწას ცხოვრებაშ დროს, იესოს ქიანაშ სირთულეეფშა აჸუ გარზებელქ. თინა ადამიანეფქ ატანჯეს დო ბოლოს წამებულო დოჸვილეს. წერმიდგინით, მუშმადიდა მსხვერპლშა იდჷ იეჰოვაქ ჩქინ გიშაჸიდირალო! ჩქინ მოჸოროფე ღორონთ, მუშ სქუას წამებაშო დო ტანჯებათ ღურაშო დღას ვა მასქიდუდ ხვალე თიშენ, ნამდა გვალო ჭიჭე ხანით ნობღვედესკო უჯგუშ ცხოვრება (იოან. 3:16; 1 პეტ. 1:18, 19). რახანს იეჰოვაქ თეშმადიდა მსხვერპლშა იდჷ დო მუშ ძვირფას სქუა ჩქინო გაწირ, თიშ შესაძლებლობას ხოლო ქომჩანა, ნამდა ახალ ქვეყნიერებას ულიებ სიცოცხლეთ გეფხარათ. w23.04 27 ¶8, 9

ქაკონო იეჰოვას ღურელეფიშ გათელება? მუშო ოკო რაგად, ქო. თიქ ბიბლიაშ მუსხირენ მაჭარალს დაჭარაფუ გათელებაშ გურშენ, ნამუთ მომავალს იჸუაფ (ეს. 26:19; გამოცხ. 20:11—13). იეჰოვა ირიათო ასრულენს მუშ დოდვალირ პირობას (იეს. 23:14). მუშო ოკო რაგად, თის მანგარო ოკო, ნამდა სიცოცხლე დურთინუას ღურელეფს. დეფიფქრათ პატრიარქ იობიშ სიტყვეფშე. თინა დარწმუნებულ რდჷ, ნამდა დოღურუდ-და, იეჰოვას მენატრებუდ დო კინ მაკორნედ თიშ ძირაფა (იობ. 14:14, 15). იეჰოვა ვათირე. თის ზუსტას თეცალ გრძნობეფ უღჷ მუშ არძა მსახურიშ მიმართ, მიდგას ღურაშ ლურით ლურს დო მანგარო ოკო, არძას დურთინუას სიცოცხლე, ნამდა რდან ჯამრთელეფ დო ბედნერეფ. მუშ რაგად შემლებნა თი მილიარდობით ადამიანშე, მიდგას ონდო ცოცხალეფ რდეს, ვემიაჩეს საშვალებაქ, გეჩინებაფესკო იეჰოვა? ჩქინ მოჸოროფე ღორონთის ოკო, თინეფს ხოლო დურთინუას სიცოცხლე (საქ. 24:15). თის უღჷ სურვილ, თინეფს ხოლო მიაჩან შესაძლებლობაქ, გინირთან თიშ მეგობრეფო დო მარადიულო იცხოვრან დედამიწას (იოან. 3:16). w23.04 9 ¶5, 6

მუჭო შეილებნა გემანგარათ მომავალიშ იმენდ? მაგალთო დედამიწას მარადიულო ცხოვრებაშ იმენდ ქოიღნან-და, წეკითხით თი ბიბლიურ მუხლეფ, სოდეთ ეჭარილ რე, მუნერ იჸუაფ სამოთხე დო დეფიქრით თე ირფელშე (ეს. 25:8; 32:16—18).ხშირას იფიქრით თიშე, მუნერ იჸუაფ ცხოვრება ახალ ქვეყნიერებას.მომავალიშ იმენდშენ დაფიქრებას დო ახალ ქვეყნიერებაშ წარმოდგენას დროს გეგმურთუნთ-და, უმოს ქექაშო გეგნიბღანთ თი სირთულეეფს დო პრობლემეფს, ნამუთ ამდღა მიღნა (2 კორ. 4:17).რშუდან, იეჰოვაშე მეღებულ თე დიდებულ იმენდ გუგამანგარენა დო ქიმერჩანა ძალეფს სირთულეეფიშ გარზებელო.ათეშენ, მუჟამსით გინაფლენთ, ნამდა დავალებაშ შეიოსრულებერო, სირთულეეფიშ გარზებელო ვარდა ხიოლ ვადინუათინ თიშო, მოხვარა გოსაჭირნა, ლოცვას გურ გეგნუფაჩით იეჰოვას დო პირად გურაფაშ საშვალებათ, გორით თიშ ხემძღვანელობა. მიღით გურიშელაკინა დო მოხვარა თანაქრისტიანეფშე, ირიათო რშუდან მომავალიშ დიდებულ იმენდ დო თოლშა ქეწირინეთ თინა. თე ირფელიშ უკულ, ღორონთ მუშ დიდებულ ძალათ გუგამანგარენა დო შეგალებენა, „მოთვინებათ დო ხიოლით გაურზათ ირფელს“ (კოლ. 1:11). w23.10 17 ¶19, 20

მარდულობაშ ქიანაშ მიზეზ მიღნა, მუთ შემლებნა, ლოცვას მიფშინუათ. შემლებნა იეჰოვას მადლობა ვუწუათ თი ირფელ ჯგირშო, მუთ მიღნა, მუშენდა თე ირფელს ზუსტას თინა მარზენა (იაკ. 1:17). მაგალთო, ჩქინ ღორონთის შემლებნა მადლობა ვუწუათ სქვამ დედამიწაშე დო სარკო გუნაჭყეფუეფშე. თეს გეძინელ, შემლებნა ვუმარდუდათ სიცოცხლეშო, ნამდგათ ფხარენთ, ჩქინ ოჯახშო, მეგობრეფშო დო იმენდშო, ნამუთ ღორონთიქ მუჩეს. დო მუთ არძაშ უმოს მნიშვნელოვან რე, მოკონა მადლობა ვუწუათ თიშ გურშენ, ნამდა მიღნა თიწკუმა მეგობრობაშ პატი. ჩქი თიცალ ქვეყნიერებას მიხვადუნა ცხოვრება, სოდეთ ხალხ ვეგმირჩქინანს მარდულობას. ათეშენ, შილებე მონდომაქ დემესაჭირან, ნამდა დეფიფქრათ თიშე, მუს ორთჷ იეჰოვა პირადო ჩქინო დო უკულ მარდულობა გეგმოფხანტათ. ამდღა ბრელ ადამიან მუშ სურვილეფიშ დაკმაყოფილებაშე ფიქრენს დო ვართ ხოლო თიშე, მუჭო შეულებნა მარდულობა გეგმოხანტან თი ირფელშე, მუთ უღნა. თინეფიშ აზროვნება ჩქინდა ხოლო ქიმოქმედენს-და, ჩქინ ლოცვეფ ქაგურუ სიას, სოდეთ ხვალე მოთხოვნეფ იჸი გიმოჭარილ. თექ ვა მოხვადასინ, აუცილებერ რე, გუვავითარათ მარდულობა დო ირიათო გეგმოფხანტათ თი ირფელშო, მუდგას იეჰოვა ჩქინო ორთჷ (ლუკ. 6:45). w23.05 4 ¶8, 9

ჩქინ მოჸოროფე მუმას გურს უჭუანს თიშ ძირაფა, მუჭო იტანჯებნა მუშ მსახურეფ (ეს. 63:9). თეშ უმკუჯინუო, იეჰოვა ვა ფთხილანა თიცალ სირთულეეფშე, ნამუთ მალწყარ დო დაჩხირცალ რე (ეს. 43:2). მარა თინა მოპირნა, ნამდა, მუდგაქ ვა მოხვადასინ, ირიათო ჩქინწკუმა იჸუაფ დო ვა დუშვენს, ნამდა განსაცდელეფქ ვეგშისწორებენ ფერ ზიან ქუმმორინუან. ხვალე თენა ვარინ, იეჰოვა მუშ ძალიერ წმინდა შურით მოხვარნა, ქუგურზათ განსაცდელეფს (ლუკ. 11:13; ფილ. 4:13). ათეშენ შემლებნა დარწმუნებულეფ ვორდათ, ნამდა ჩქინ ღორონთ საჭირო დროს ქომჩანა ირფელს, მუთ მიმეხვარებნა, ქუგურზათ განსაცდელეფს დო ვა ვოდინუათ თიშ მიმართ ართგურობა. იეჰოვა ჩქინდე ელჷ, ნამდა მივენდებუთ თის (ებრ. 11:6). მინშა შილებე სირთულეეფიშ დროს იფიფქრათ, ნამდა მეტიშ გარზება ვეშემლებუნა დო შილებე თიშ ეჭვიქ ხოლო გომრჩქინდან, ქიმმეხვარებნა დო ვარ იეჰოვა. მარა ბიბლია მარწმუნენა, ნამდა ღორონთიშ ძალაშ ჭყოლოფათ შემალებენა გივორჯგინათ ირნერ სირთულეს (ფსალმ. 18:29). ათეშენ, თიშ მანგიორო, ნამდა იეჰოვაშ მოხვარაშა ეჭვ გემშებღათ, მთელ გურით ოკო იბლოცათ დო ბჯერდან, ნამდა თინა ქუპასუხენს ჩქინ ოთხუალს (იაკ. 1:6, 7). w23.11 22 ¶8, 9

მუშმასქვამათ რე ეჭარილ ნამდვილ ჸოროფა! თე სიტყვეფ არწმუნენს დაქორწინებულ წყვილეფს, ნამდა შეულებნა უღდან ძალიერ დო ულიებ ჸოროფა ართიანიშ მიმართ. ჩილ დო ქომონჯშა რე დამოკიდებულ, იჸუაფ დო ვარ თინეფიშ ჸოროფა ირიათო ძალიერ. მაგალთო, დაჩხირს ირიათო დიშკას ქიმთუტურუანთ-და, ბორბონჩია იჸუაფ, მარა თეშ კეთებას მივოტენთ-და, თინა დოშქირტუ. თეშნერო, ჩილ დო ქომონჯიშ ჸოროფა უმოს ძალიერ იჸუაფ, მუჟამსით ჟირხოლო მუთხილუანს თი ურთიერთობას, ნამუთ ართიან შქას უღნა. მინშა შილებე ფინანსურ დო ჯამრთელობაშ პრობლემეფქ ვარდა ბაღანეფიშ რდუალაწკუმა დაკავშირებულ სირთულეეფქ იმოქმედას ჩილ დო ქომონჯიშ ჸოროფაშა დო ჭიე-ჭიეთ დოშქირიტას თინა. თაშ ნამდა, „იაჰიშ ალქ“ ვაშქირტასინ, ჩილ დო ქომონჯიქ ირფელ ოკო გაკეთან, ნამდა გამანგარან იეჰოვაწკუმა ხოლოშიან ურთიერთობა. w23.05 20, 21 ¶1—3

ახალგაზრდეფ, მუ ოკო აკეთათ, ნამდა გავითარათ გაბედულება? შილებე თქვან მშობლეფ გაბედულეფ რდან დო თქვა ხოლო ელაიჩანდან, რდათ გაბედულეფ, მარა თე თვისება ოჯახურ მემკვიდრეობა ვა რე, ნამდგას მშობლეფშე მიღენთ. თინა თქვანით ოკო გავითარათ. თე პროცეს ახალ უნარიშ გავითარებას მოგენს. ახალ მუდგარენიშ დაგურაფალო ართ-ართ საშვალება რე, ყურადღებათ დევეკვირათ მასწავლებერს დო ჩქი ხოლო თეშ გუვაკეთათ ირფელ, მუჭოთ თინა ორთჷ. თეშნერო, გაბედულებაშ გავითარებას მიმეხვარებნა, ყურადღებათ დევეკვირათ თინეფს, მით გიმირჩქინანა თე თვისებას დო მივაჸუნათ თინეფიშ მაგალითის. საჭირო რე, დანიელცალო ჯგირო ქენვანჭათ ღორონთიშ სიტყვას, ხშირას დო ალალას იბლოცათ, მივენდათ იეჰოვას დო ბჯერდან, ნამდა ირიათო მიმეხვარებნა. თეშ უკულ, მუჟამსით ჩქინ რწმენა გეგმიცადებ, ვა გამჭირდუნა გაბედულებაშ გიმორჩქინა. გაბედულ ადამიანეფს ხშირას შხვეფ ხოლო პატის ცენა. შილებე თეცალ საქციელით ალალ გურიშ კათას ხოლო მეხვარან იეჰოვაშ გაჩინებაფას. თაშ ნამდა, მართალო ჯგირ მიზეზეფ მიღნა, გუვავითარათ გაბედულება. w23.08 2 ¶2; 4 ¶8, 9

ბერძნულ სიტყვას, ნამუთ თარგმნილ რე, მუჭოთ შემოწმება, ჯვეშო ძვირფას მეტალიშ, მაგალთო, ოქროშ ვარდა ვარჩხილიშ შემოწმებაშ კონტექსტის ირინუანდეს, ნამდა დერწმუნესკო ქორდჷ დო ვარ თინა ნამდვილ. თეშნერო, ჩქი ხოლო ოკო შევამოწმათ, თაშ ქოფთქუათინ, დებრწმუნათ ქორენ დო ვარ მართალ თინა, მუდგას იფრჩქილეთ ვარდა ბკითხულენთ. თენა ბრელით უმოს მნიშვნელოვან იჸუაფ ჩქინო დიდ გაჭირებაშ მონჭაფაწკუმა ართო. თიშ მანგიორო, ნამდა ხეთეშე ქიდებჯერათ ირფელ, მუდგას შხვეფ იჩიებნა, ოკო გეგმიბრინუათ სწორას აზროვნებაშ უნარ დო ირფელ, მუდგას ბკითხულენთ ვარდა იფრჩქილუაფუთ, ოკო ქეშუდარათ თის, მუდგას ბიბლიაშე დო იეჰოვაშ ორგანიზაციაშე ბგებულენთ. თაშ ქიმიფქციებუთ-და, ვევაჸუნუთ დემონეფიშ პროპაგანდას დო ვედებღორებუთ (იგავ. 14:15; 1 ტიმ. 4:1). მიჩქნა, ნამდა იეჰოვაშ მსახურეფ, მუჭოთ ჯგუფ, გინასქიდნა დიდ გაჭირებას. მარა ვა მიჩქნა, მუ შილებე მომღან ჩქინდე თითოულს ჭუმენერ დღაქ (იაკ. 4:14). ვა უღჷ მნიშვნელობა, დიდ გაჭირებას ჩქინ თოლით ბძირუნთ დო ვარ თიშახ ბღურუთ, ბოლოშა ართგურეფ ქუდოფსქიდუთ-და, ღორონთშე ჯილდოს — მარადიულ სიცოცხლეს მიბღენთ. მორთ, მთელ ყურადღება ჩქინ დიდებულ იმენდშა მაფდან გინოღალირ დო მზათ ვორდათ იეჰოვაშ დღაშო! w23.06 13 ¶15, 16

მუშო ოკო რაგად, ჩქი ზუსტას ვა მიჩქნა, მუჭო შისრულებ ნამთინე ბიბლიურ წინასწარმეტყველება (დან. 12:8, 9). მართალ რე, კილ-კილშა ვა მიჩქნა, მუჭო შისრულებ წინასწარმეტყველებეფ, მარა თენა ვა ნიშნენს, ნამდა თინეფ ვეშისრულებ. მუშო ოკო რაგად, ჩქი ვონდუთ იეჰოვას დო ბოლოშა დარწმუნებულ ვორეთ, ნამდა თინა საჭირო დროს ქუგმოგებაფუანა თი ირფელს, მუდგას ამდღა ვენვანჭუთ, მუჭოთ თეს ულირს ორთუდ. მალას კეთებულ იჸუაფ განცხადება „მშვიდობა დო უსაფრთხოებაშ“ გურშენ (1 თეს. 5:3). მუდგაშ უკულ მთავრობეფ დუდის ქიგიანთხუნა ტყურა რელიგიას დო განადგურენა თის (გამოცხ. 17:16, 17). თეშ უკულ ღორონთიშ ხალხის ხოლო ქადირთუნა, მუდგას არმაგედონიშ ომ ქუმაჸუნუ (ეზეკ. 38:18, 19; გამოცხ. 16:14, 16). თე მოვლენეფ მალას მოხვადუ, მარა ონდო თე დრო დოდირთუდას, მორთ მარდულობა გეგმოფხანტათ ჩქინ მოჸოროფე ზეციერ მუმაშ მიმართ თით, ნამდა ქიდვეკვირათ ბიბლიურ წინასწარმეტყველებეფს დო შხვეფს ხოლო ქიმვეხვარათ თეშ კეთებას. w23.08 13 ¶19, 20

მუჟამსით პავლე მოციქულქ კორინთელეფშა მეჭარილ წერილს რწმენაშე, იმენდშე დო ჸოროფაშე იჩუ, თქუ, ნამდა თენეფშე „არძაშ უდიდაშ ჸოროფა რე“ (1 კორ. 13:13). საინტერესო რე, მუშენ? რწმენა დო იმენდ ამდღა მოსაჭირნა, ონდო ახალ ქვეყნიერებას ველუთ, მარა მომავალს, მუჟამსით თე დრო ქუდოდირთუ დო ღორონთიშ არძა დუნაპირებ შისრულებ, თინეფ მეტო ვედმესაჭირებუნა. მუშ რაგად შილებე ჸოროფაშე? რწმენაშ დო იმენდიშ გინაწონს, ჸოროფაშ გიმორჩქინა ადამიანეფიშ დო იეჰოვაშ მიმართ მთელ მარადიულობას დემესაჭირებუნა. ზუსტას ათეშენ თქუ პავლექ, ნამდა „ჸოროფა უდიდაშ რე“. მაგალთო, ჸოროფათ შხვეფშე გიშებგორუთ დო თიშ გიმორჩქინათ ვოძირანთ, ნამდა ჭეშმარიტ ქრისტიანეფ ვორეთ. იესოქ მუშ მოწაფეეფს უწუ: „ართიან შქას ჸოროფა ქუგაღვენუნან-და, თეთ ქიგეგენა, ნამდა ჩქიმ მოწაფეეფ რეთ“ (იოან. 13:35). თეს გეძინელ, ჸოროფა მოხვარნა, უმოს ართობა მიღდან ართიან შქას. პავლე მოციქულქ ჸოროფაშ გურშენ თქუ, ნამდა „სრულყოფილ კავშირ რე, ნამუთ ართობას უნწყუნს ხეს“ (კოლ. 3:14). იოანექ თანაქრისტიანეფს მეჭარ: „მიდგას ღორონთ უჸორს, მუშ ჯიმა ხოლო ოკო უჸორდას“ (1 იოან. 4:21). თაშ ნამდა, მუჟამსით გიმიფრჩქინანთ ჸოროფას ართიანიშ მიმართ, თეშნერო ვოძირანთ, ნამდა მიჸორა ღორონთ. w23.11 8 ¶1, 3

ბიბლია ქრისტიანულ ცხოვრებას, რულას უდარენს. თინა, მით გეგნოკვათუნს ფინიშიშ ხაზის, ჯილდოთ მარადიულ სიცოცხლეს მიღენს (2 ტიმ. 4:7, 8). ჩქი მონდომა ოკო ვადვარკათ დო ირფელ ოკო გუვაკეთათ, ნამდა ვემვოტუათ რულა, მუშენდა ფინიშიშ ხაზწკუმა ასე ვორეთინ თიცალ ხოლოს დღას ვა პჸოფეთ. მოციქულ პავლე მირაგადუნა, ჩქი მუ მიმეხვარებნა თეშ კეთებას. თინა ელამჩანა, ნამდა „ჩეფთხინუათ ირფელ, მუთ მამონკენა დო მოთვინებათ იბრულათ წოხოლე ეწომიძნან თი შარა“. პავლეს თინა ვა უგულისხმებ, ნამდა ქრისტიანქ სიცოცხლეშ შარას შურო მუთუნ ოკო ვეგლეღას. თინა გულისხმენდჷ ზედმეტ ოღალს, ნამდგაქ შილებე მეცილან რულას დო დოფშულიდან. სიცოცხლეშ შარას რულას მუთუნქ ვემეცილანინ, საჭირო რე, ხეთეშე გეგშეფჩინათ, მუ მამონკენა დო დრო ვებღათინ თეშ, უცფას ჩეფთხინუათ. მარა ფრთხილას ოკო ვორდათ, ნამდა თინეფს თიცალ მუდგარენეფ ხოლო ვა უჸუნუათ, მუთ აუცილებერო ოღალ მაფუნა, მუშენდა თაშ ქიმიფქციებუთ-და, ვეშმალებენა გუვაგრძელათ სიცოცხლეშო რულა (2 ტიმ. 2:5). w23.08 26 ¶1, 2

გონიერებაშ გიმორჩქინა მოხვარნა, ნამდა პატი ფცათჷ შხვეფიᲨ შეხედულებეფს. მაგალთო, ნამთინე დას მოწონს მაკიაჟიშ კეთება, მარა ნამთინეს — ვარ. ნამთინე ქრისტიანს ოსიამოვნ ზომიერო ალკოჰოლიშ მეღება, მარა ნამთინეს გინოჭყვიდილ აფჷ, შურო ვემკანჭას თის. თეს გეძინელ, არძა ქრისტიანს მოკონა, ჯგირ ჯამრთელობა მიღდან, მარა თითოულ მკურნალობაშ განსხვავებულ მეთოდის გიშებგორუნთ. ქოფიფქრენთ, ნამდა ირიათო მართალ ვორეთ დო ქუვოცადუთ შხვეფ ხოლო ჩქინ აზრშა ქიმიპჸონათ-და, შილებე დუვაბრკოლათ და დო ჯიმალეფ დო კრებაშ ართობას ხოლო ვეცილათ (1 კორ. 8:9; 10:23, 24). იეჰოვას ჩქინდა მკაცრ წესეფ ვემუჩამ თიწკუმა დაკავშირებით, მუ ოკო მიკიფქუნათ. თეშ მანგიორო, მუჩეს პრინციპეფ, ნამდგათ შემლებნა იფხემძღვანელათ თე საკითხის. ჩქინ მიკაქუნალ ღორონთის ოკო განადიდენდას დო თინა „მოკრძალებურო დო გონივრულო“ ოკო რდასჷ გიშაგორილ (1 ტიმ. 2:9, 10). ნამთინს ვა მოკონა, ჩქინ მიკაქუნალით ზედმეტ ყურადღება მიფქცუათ. ბიბლიურ პრინციპეფ უხუცესეფს ხოლო ოხვარ, კანონეფ ვა დადგინან მიკოქუნა დო ვარცხნილობაწკუმა დაკავშირებით. w23.07 23, 24 ¶13, 14

იეჰოვაქ მოძირეს, მუ მომღანა ნამდვილ ბედნერობას. თინეფშო, მით „უჭკუე ოსურიშ“ მოწვიებას ღებულენა, მთავარ თი დროებით სიამოვნება რე, ნამუთ ართ მეჯინათ „გემუანო“ იძირე. თეცალ მოქმედება მომავალს ღურას მუღანს (იგავ. 9:13, 17, 18). თე კათაშ გინაწონს, თინეფს, მით „სიბრძნეშ“ მოწვიებას ღებულენა გვალო შხვა შედეგეფ უღნა. (იგავ. 9:1). თეშნერო, ჩქი ბგურაფლენთ, მიჸორდან თინა, მუთ იეჰოვას უჸორს დო ბჯოგდან, მუთ თის ჯოგჷ (ფსალმ. 97:10). ბედნერეფ ვორეთ, ნამდა მიღნა შესაძლებლობა, შხვეფ ხოლო დუვაპატიჟათ თე სუფრაშა. თეშნერო, ჩქი ბგუთ თი მოინალეეფს, მით ქალაქიშ ემაღალია ადგილეფშე იძახნა: „გამოუცდელეფ თავრე გეგნურთით“. თენა ქოთ ჩქი დო ქოთ თინეფს, მით გიაჸუნუნა „გონიერეფიშ შარას“ ჯგირობუას მომღანა მუჭოთ ამდღა, თეშ მომავალს ხოლო. თე კათა ჩქინწკუმა ართო გეხარენს მარადიულ ცხოვრებათ (იგავ. 9:3, 4, 6). w23.06 24 ¶17, 18

მუს გინაფლენთ, მუჟამსით თანამშრომელ ვარდა თანაკლასელ თქვან მრწამსიშ გურშენ მუდგარენს გოკითხნა? თე დროს შილებე ჭიჭეთ ნერვიანენთ, მუთ ბუნებრივ რე. მარა დეფიფქრებუთ-და, თეცალ კითხვეფით შემლებნა გებგათ, მუს ფიქრენს ადამიან, მუშ წანსჷ დო თეწკუმა ართო, მერზიებნა საშვალება, სახიოლო ამბეშ გურშენ ვეჩუათ თის. მარა მინშა ნამთინე ადამიან მუდგარენს თიშენ მოკითხნა, ნამდა ვა მოთანხმუნა დო ნირზიშ წუმოჭყაფა ოკო. თენა ვამკვენა, მუშენდა ამდღა მსოფლიოს ჩქინ მრწამსიშ გურშენ ბრელ არასწორ ინფორმაცია რე გავრცელებურ (საქ. 28:22). ხვალე თენა ვარინ, მუჭოთ ბიბლიაშე ბგებულენთ, „ბოლო დღალეფს“, ნამდგას ფცხოვრენთ, ადამიანეფ იჸუაფუდეს „აჯამეფ“, შხვა სიტყვეფით ქოფთქუათინ, თინეფწკუმა შეიოლებერ ვეჸიდ საერთო ნინაშ გორუა დო თეს გეძინელ, იჸუაფუდეს სასტიკეფ ხოლო (2 ტიმ. 3:1, 3). შილებე გოინტერესნა, მუჭო უპასუხათ გემუანო დო ტაქტიანო თი პიროვნებას, მით თქვან რწმენაშ გურშენ ნირზის გიჭყანა. ართ სიტყვათ ქოფთქუათინ, თეს ლიბ ხასიათ მიგეხვარებნა. ლიბ ხასიათ უღუნ თი პიროვნება ადვილო ვერისხებ, მუჟამსით მიდგაინ თიშ გაღიზიანებას ოცად, დო სიმშვიდეს ვადინუანს თიმწკუმა ხოლო, მუჟამსით ზუსტას ვა უჩქჷ, მუჭო ოკო უპასუხას. w23.09 14 ¶1, 2

მინშა ორგანიზაციაშე თიცალ რჩევეფს ხოლო ბღებულენთ, ნამუთ ფთხილანა მატერიალიზმშე დო თიცალ მუდგარენიშ კეთებაშე, მუთ ღორონთიშ კანონეფშე გინმორთაფუანდეს. (ეს. 48:17, 18; 1 ტიმ. 6:9, 10). იეჰოვა დიდ გაჭირებაშ დო ანთასწანიან მართველობაშ დროს ხოლო გეგმირინუანს ადამიანეფს ჩქინ ოხემძღვანელებერო. მომავალს ხოლო ხემძღვანელობაშ მეჸუნაქ ქეშმალებუანინ, თეს ამდღარშე ოკო ვორთუდათ. მორთჷ, ირიათო ქიმვაჸუნათ იეჰოვაშ ხემძღვანელობას, თინეფ შქას თი მითითებეფს ხოლო, მუდგას დანიშნულ ჯიმალეფშე ბღებულენთ (ეს. 32:1, 2; ებრ. 13:17). შემლებუნა ბოლოშა მივენდათ ჩქინ ხემძღვანელს, იეჰოვას, ნამუთ ეწოპჸუნა, ნამდა უსაფრთხოთ გენომიჸონან ჩქინ დანიშნულებაშ ადგილშა, ახალ ქვეყნიერებაშა. w24.02 25 ¶17, 18

მართალ რე, მოციქულ პავლეშო იეჰოვაშ მსახურებას ხიოლ დო კმაყოფილება მოუღუდ, მარა ბრელ სირთულეს ხოლო ხვადუდ. თინა ხშირას შორ შარაშა მიშჷ, მუდგაშ კეთება თი დროს ვა რდჷ ადვილ. მუჭოთ ბიბლიაშე ბგებულენთ, თეცალ მოგზაურობაშ დროს, პავლე ხშირას რდჷ „საფრთხეს მალწყარეფს [დო] გიმარნაფალეფშე“. თეს გეძინელ, პავლე მოციქულს მინშა მოწინააღმდეგეეფ ლახუნდეს (2 კორ. 11:23—27). ხვალე თენა ვარინ, მინშა და დო ჯიმალეფ ვაფასენდეს თი ირფელს, მუდგას პავლე თინეფიშ მახვარებელო ორთუდ (2 კორ. 10:10; ფილ. 4:15). თე ირფელიშ უმკუჯინუო, მუქ მეხვარ პავლეს, ვემიოტუკო იეჰოვაშ მსახურება? თიქ წმინდა წერილეფიშ დო მუშ პირად გამოცდილებაშ ჭყოლოფათ, უმოსო გეჩინებაფუ იეჰოვაშ პიროვნება დო დერწმუნ, ნამდა ღორონთის მანგარო უჸორდჷ თინა (რომ. 8:38, 39; ეფეს. 2:4, 5). თე ირფელიშ შედეგო, პავლეს ხოლო უმოსო ქეჸოროფ იეჰოვა ღორონთიქ დო თე ჸოროფას თით ოძირანდჷ, ნამდა ირიათო ომსახურუდ „წმინდეფს“ (ებრ. 6:10). w23.07 9 ¶5, 6

ბრელ ოთანხმ თი აზრის, ნამდა საჭირო რე, პჸუნდან ხელისუფლება დო დევემორჩილათ თინეფიშ ნამთინე კანონს. მარა კინ თე ადამიანეფქ შილებე ვედემორჩილან ხელისუფლებაშ თიცალ კანონეფს, ნამუთ ვა მოწონა ვარდა მიორჩქუნა, ნამდა უსამართლო რე. ბიბლიაშე ბგებულენთ, ნამდა ადამიანურ მთავრობეფ ხალხიშ ტანჯებაშ მიზეზ რენა, თის ხოლო ბგებულენთ, ნამდა თინეფს სატანა აკონტროლენს დო მალას გენადგურებნა (ფსალმ. 110:5, 6; ეკლ. 8:9; ლუკ. 4:5, 6). ღორონთიშ სიტყვა თის ხოლო მოგებაფუანა, ნამდა „მით ხელისუფლებას ოწინააღმდეგ, ღორონთიშ დოდგინელ წესრიგიშ წინააღმდეგ მეურს“. ამდღა ღორონთ მთავრობეფს არზენს თიშ უფლებას, ნამდა წესრიგიშ დაცვებელო დადგინან წესეფ დო ჩქინდე თინეფიშ მორჩილებას ელჷ. ათეშენ, „მიდგას მუ ოკუთვნუნ“, თინა ოკო მეფჩათ, მუდგაშა მიშურს გინაგაფალეფიშ გაფა დო პატიცემა დო მორჩილებაშ გიმორჩქინა ხელისუფლებაშ მიმართ (რომ. 13:1—7). შილებე ნამთინე კანონიშ მორჩილება მიჭირდან, მუშენდა მიმორჩქუდან, ნამდა უსამართლო რე ვარდა თე კანონით ბრელ ოგაფურს ფთხინა. მარა თე ირფელიშ უმკუჯინუო, დოპჸუნთ იეჰოვაშ მითითებას დო ვომორჩილუთ ხელისუფლებას, ონდო თინეფ ღორონთიშ კანონიშ წინააღმდეგ ულას ვა მოფთხინა (საქ. 5:29). w23.10 8 ¶9, 10

მუჟამსით სამსონქ დებად ისრაელ ფილისტიმელეფიშ ხეს რდჷ აშალაფირ (მსაჯ. 13:1). თინეფ მანგარო იტანჯებდეს, მუშენდა ფილისტიმელეფ აჩაგრენდეს დო მანგარ გლახათ ოქცუდეს. ფილისტიმელეფიშ ხეშე მუშ ხალხიშ დარსხებელო იეჰოვაქ სამსონ გიშეგორ (მსაჯ. 13:5). თიშ შეიოსრულებერო სამსონქ ოკო მიენდკო ღორონთის. ართშა თის ფილისტიმელეფქ დუდის ქიგიანთხეს თი ადგილს, ნამდგას ლეხ ჯოხოდ დო ნამუთ, საეგებიოთ, იუდაშ ტერიტორიას რდჷ. იუდეველ ქომოლკოჩეფს მანგარო აშქურნეს დო გეგნოჭყვიდეს, სამსონ ნტერეფს გეგნოჩესკო. თაშ ნამდა, სამსონს კინ მუშიანეფქ ჟირ ახალ თოკით ხელეფ დუკირეს დო ფილისტიმელეფს ქიმუჸუნეს (მსაჯ. 15:9—13). მარა იეჰოვაშ წმინდა შურქ სამსონს სასწაულ ძალა ქიმეჩ, მუდგაშ ჭყოლოფათ თიქ თოკეფ გოსოფ დო დუდ დერსხჷ. უკულ ვირიშ მარჭვა ქოძირ, უცფას ქიხვამილუ დო ანთას ფილისტიმელ დოჸვილ (მსაჯ. 15:14—16). w23.09 2 ¶3, 4

ბიბლიაშე თის ხოლო ბგებულენთ, ნამდა იეჰოვაშ თე განზრახვა „მარადიულ“ რე დო თის ჭიე-ჭიეთ აარგამენს. იეჰოვას შეულებ მიოჭირინუას მუშ მიზანს, მუშენდა „ირფელს თიშო ორთჷ, ნამდა მუშ განზრახვა შეასრულას“ (იგავ. 16:4). თეს გეძინელ, შედეგეფ, ნამუთ თე განზრახვაშ შესრულებას მაჸუნუ, მარადიულ ჯგირობუას მიღანს. მორთ ქიგებგათ, მუ მიშურს იეჰოვაშ მარადიულ განზრახვაშა დო მუ ცვლილებეფ აკეთ თიშ მიოჭირნაფალო. იეჰოვაქ ადამ დო ევას ქუგაგებაფუ, მუ განზრახვა უღუდ თინეფწკუმა დაკავშირებით დო უწუ: „ინაყოფიერით, გემრავლით, გეიოფშით დედამიწა, ქემინჯით თის დო თქვა გომორჩილდან . . . არძა ცოცხალ არსება დედამიწას“ (დაბ. 1:28). სანარღოთ, ადამ დო ევაქ ვედემორჩილეს ღორონთის, მუდგაშ გურშენ თინეფიშ მთელ გამნარყიქ ცოდაშ მონათ გინირთჷ. მარა, თეს ვა უცილებ იეჰოვაშა, ნამდა შეასრულკო კაცობრიობა დო დედამიწაწკუმა დაკავშირებულ მუშ დუდშეიან განზრახვა დო თე მიზანიშ მიოჭირნაფალო შხვა შარა დოგორ. თიქ ხეთეშე გეგნოჭყვიდ, ზეცას სამეფო დაარსუკო, მუდგათ ბოლოშა ქიმიჸუნანდ დუდშეიან განზრახვას, დედამიწაწკუმა დაკავშირებით (მათ. 25:34). w23.10 20 ¶6, 7

იეჰოვას შეულებ მიმეხვარან, დუდ ვემუდვათ სისუსტეეფს დო ვებრძოლათ თინეფს. შილებე მუდგარენ სისუსტეს ბრელ ხან რე მუთ ვობრძოლუთ. მინშა ჩქინ სისუსტეეფ შილებე უმოს რთულ ჩათხინაფალ რდას, ვინემ თი სისუსტეეფ, ნამუთ მოციქულ პეტრეს უღუდ. მარა შემლებნა დარწმუნებულ ვორდათ, ნამდა იეჰოვა აუცილებერო ქომჩანა ძალეფს თინეფიშ გიორჯგინალო (ფსალმ. 94:18, 19). თეს ჯგირო ოძირანს ართ ჯიმაშ შემთხვევა, მით ჭეშმარიტებაშ გაგებაშახ ჰომოსექსუალ რდჷ. მართალ რე, იეჰოვაშ გაჩინებაფაშ უკულ თიქ სრულას დოთირუ მუშ ცხოვრება დო ღორონთიშ ნორმეფიშ თანახმას ცხოვრება ქიდიჭყჷ, მარა კანკალეშა არასწორ სურვილეფ იშენით ირჩქინანდჷ დუდის. მუქ მეხვარ თის, ვემიოტუკო ბრძოლა დო ვეიაჸუნკო არასწორ სურვილეფს? თინა იჩიებ: „დებრწმუნ, ნამდა იეჰოვა არძას მამანგარენა დო თინა ხოლო ქობძირ, ნამდა სისუსტეეფიშ უმკუჯინუო, იეჰოვაშ წმინდა შურიშ ჭყოლოფათ შეიოლებერ რე თიშ მოსაწონო ცხოვრება. ჩქიმ არასრულყოფილებაშ უმკუჯინუო, ღორონთ მირინუანს მუშ საქმეშ შეიოსრულებერო დო მარზენს ძალეფს“. w23.09 23 ¶12

ახალგაზრდა ჯიმალეფ, სულიერო მოწიფულ ქრისტიანეფო ავტომატურო ვეგნირთუთ. საჭირო რე, თქვან მხარეშე მუდგაინ გაკეთათ. ოკო გეგშეგორათ მიშ მაგალითის მიაჸუნუთ, გევითარათ სწორას აზროვნებაშ უნარ, რდათ სანდოეფ, გავითარათ თიცალ უნარეფ, ნამუთ ირდღაშიან ცხოვრებას გიმგოდირთუნა დო მემზადათ მომავალ პასუხიშმგებლობეფშო. მუჟამსით ფიქრენთ თი ირფელშე, მუთ ოკეთებელ გაფუნა, შილებე თენა რთულო გაძირედან, მარა თქვა შეგალებენა თეშ კეთება. რჯერდან, იეჰოვას ხოლო მთელ გურით ოკო, ნამდა მიგეხვარან (ეს. 41:10, 13). მუშო ოკო რაგად, კრებას და დო ჯიმალეფ ხოლო ირნერო ქელაიდირთუნა. თაშ ნამდა, მუჟამსით ირფელს გაკეთენთ, ნამდა რდათ სულიერო მოწიფულ ქრისტიან, თქვან ცხოვრება აზრიან დო კმაყოფილებათ ეფშა იჸუაფ. ახალგაზრდა ჯიმალეფ, მანგარო მიჸორთ! იეჰოვაქ აკურთხას თქვან მონდომა, ნამდა გინირთათ სულიერო მოწიფულ ქრისტიანო. w23.12 29 ¶19, 20

წერმიდგინით, ნამდა თანაქრისტიანეფ სოდგარენ ართო რდით აკოშაყარელ. დრო სასიამოვნოთ გატარით დო ართო გეგნიღითკო სურათ. პირველ სურათიქ გლახაქ გიშართჷ, ათეშენ ხოლო ჟირ სურათ გეგნიღით. ასე გვალო სუმ სურათ გიღნა. თე სურათეფიშ გოჯინაშ დროს ქოძირით, ნამდა ართ-ართ სურათის ართ ჯიმა ვეძიცანს. ათეშენ დოლასუნთ თის, მუშენდა ხოლო ჟირ სურათ გიღნა, სოდეთ არძა იძიცანს, თინეფ შქას თი ჯიმა ხოლო. ჩქი და დო ჯიმალეფწკუმა ართო ბრელ სასიამოვნო მოგონება მიღნა, მარა მინშა ნამთინე დაქ ვარდა ჯიმაქ შილებე თიცალ მუდგარენ მიწუან ვარდა გაკეთას, მუდგათ გურს ქელმოჭუანა. მუჭო ოკო მიფქცუათ თეცალ დროს? ირნერო ოკო ვეცადათ, თეცალ მოგონება ჩქინ გონებაშე გეშაბლასათ, მუჭოთ გლახა სურათის ბლასუნდით (ეფეს. 4:32). თეს მონდომა ოკო ვადვარკათ, მუშენდა თიწკუმა ბრელით უმოს ჯგირ, სასიამოვნო მოგონებეფ მაკავშირენა, ნამუთ ჯგირ სურათცალო ოკო დოფჩუათ დო ვეგიბჭყოლიდუათ. w23.11 12, 13 ¶16, 17

თაქ გიმორნაფილ ბერძნულ სიტყვეფშე იძირე, ნამდა ქრისტიან ოსურიშ მიკაქუნალშე შხვეფიშ აზრიშ დო გრძნობეფიშ პატიცემა ოკო იძირედას. მოამაყნა ჩქინ სულიერო მოწიფულ დალეფ, მიდგას ირო მოკრძალებურო მიკაქუნა. გურგოჩამილობა რე ხოლო ართ თვისება, მუთ სულიერო მოწიფულ დალეფქ ოკო გავითარან. მუ რე გურგოჩამილობა? თენა რე ინონჭაფაშ უნარ. თაშ ქოფთქუათინ, სწორ დო არასწორიშ გარჩიებაშ უნარ დო უკულ თიშ კეთება, მუთ სწორ რე. გურგოჩამილობაშ გიმორჩქინაშ ჯგირ მაგალით აბიგაილქ დომტუეს. მუჟამსით თიშ ქომონჯიქ, ნაბალქ, უგუნურ გადაწყვეტილება მიღჷ, თინეფიშ არძა ჸუდეშარქ საფრთხეშ თუდო ქიგედირთჷ. თე დროს აბიგაილქ ხეთეშე მოქმედება ქიდიჭყჷ. თიქ გურ ქუგუჩ, მუ აფუდ ოკეთებელ დო მუშ საქციელით ქიანაშ ადამიან ღურაშე ირსხჷ (1 სამ. 25:14—23, 32—35). გურგოჩამილობა ამდღა ჩქი ხოლო მოხვარნა, ქინვანჭათ, მუჟამ ოკო იფჩუათ დო მუჟამ ოკო ვა ფთქუათ მუთუნ. თეს გეძინელ, თე თვისება მოხვარნა, შხვეფიშ მიმართ პირად ინტერესიშ გიმორჩქინაშ დროს ვორდათ გაწონასწორებულეფ დო ზედმეტო ვემშაფრთათ თინეფიშ საქმეშა (1 თეს. 4:11). w23.12 20 ¶8, 9

მოციქულ პავლექ თე სიტყვეფ რომს მახორუ ქრისტიანეფს მეჭარ. თე და დო ჯიმალეფქ გეჩინებაფუეს იეჰოვა დო იესო ქრისტე, გეგმირჩქინეს რწმენა დო გინირთეს ქრისტიანეფო. თე ქრისტიანეფ ღორონთიქ მუნეფიშ რწმენაშ გურშენ მართალეფო მირჩქინ დო მუშ წმინდა შურით გიშეგორ, მუდგაშ ჭყოლოფათ ცხებულეფო გინირთეს (რომ. 5:1). თინეფქ დიდებულ იმენდ მიღეს, ნამუთ დღას ვეგემტყუნებუდ. უმოს გვიანო, პავლექ ეფესოს მახორუ ცხებულ ქრისტიანეფს მეჭარ თი იმენდიშ გურშენ, ნამუთ უღდეს დო უწუ, ნამდა თინა „მემკვიდრეობა“ რდჷ წმინდეფშო (ეფეს. 1:18). კოლოსელეფშა მეჭარილ წერილს, პავლე აარგამენს, ნამდა თე იმენდ ცხებულეფშო „ზეცას რე კინოჩუალირ“ (კოლ. 1:4, 5). თაშ ნამდა, ცხებულ ქრისტიანეფს ზეცას მარადიულ ცხოვრებაშ იმენდ უღნა, სოდეთ ქრისტეწკუმა ართო იმართველენა (1 თეს. 4:13—17; გამოცხ. 20:6). w23.12 9 ¶4, 5

ორიგინალ ნინას სიტყვა „თხილუა“ სამხედრო ტერმინ რდჷ. თის ირინუანდეს თი ჯარიშკოჩეფშე ჩიებაშ დროს, მით ქალაქის ნტერშე თხილანდეს. ქალაქიშ მახორუეფს სერით გემოშა ლურდეს, მუშენდა უჩქუდეს, ნამდა ჯარიშკოჩეფ ყარულენდეს კარმინოლს. თეშნერო, მუჟამსით ღორონთიშ მშვიდობა ჩქინ გურ დო გონებას თხილანს, სიმშვიდეს ბგინაფლენთ, მუშენდა მიჩქუნა, ნამდა უსაფრთხოთ ვორეთ (ფსალმ. 4:8). ხანაცალო, ჩქინ სიტუაციაქ ხეთეშე ვეთირას დო ვეგეუჯგუშასინ ხოლო, სიმშვიდეს იშენით ვა ვოდინუანთ (1 სამ. 1:16—18). მუჟამსით მშვიდას ვორეთ, უმოს ადვილ რე სწორას აზროვნება დო ჭკვერულ გადაწყვეტილებაშ მეღება. მუ ოკო ვაკეთათ? რთულ სიტუაციეფიშ დროს თაშ ქოფთქუათინ „ქუდუძახით გუშაგის“. მუჭო შემლებუნა თეშ კეთება? ვემიოტუათ ლოცვა, ონდო ვეგინანთ ღორონთიშ მშვიდობას (ლუკ. 11:9; 1 თეს. 5:17). თაშ ნამდა, რთულ სიტუაციას ქორეთ-და, ვემიოტუათ ლოცვა დო თქვა ხოლო ქიგინანთ ღორონთიშ მშვიდობას, ნამუთ დოთხილანს თქვან გურს დო გონებას (რომ. 12:12). w24.01 21 ¶5, 6

მუამუშიშ სახელიშ განწმენდაშ გურშენ იესოს ქიანაშიქ აჸუ გინაღალარქ — გაურზჷ წამებას, შეურაცხყოფას დო ეკაწამეს ტყურეფ. იესოს უჩქუდ, ნამდა ირფელ თეშ გაკეთ, მუჭოთ მუამუშის ოკოდ დო საონჯღორო მუთუნ ვა უღუდ (ებრ. 12:2). თინა ხოლო უჩქუდ, ნამდა თე არძაშ უმოს რთულ წუთეფს პირდაპირ სატანა ობრძოლუდ (ლუკ. 22:2—4; 23:33, 34). სატანაშ აზრით, თი ზომაშა ქიმიჸონანდჷ იესოს, ნამდა გოტახუნდჷ, მარა თიქ საონჯღოროთ წაგჷ. იესოქ საბოლათ დამტკიც, ნამდა სატანა მეტყურე რე დო იეჰოვაშ ართგურ მსახურეფ თიმწკუმა ხოლო ვართინუანა იეჰოვას ოჭიშის, მუჟამსით უკანასკნელშა რენა მიკოჭირებულ. მუჭო შემლებუნა გურ გაუხარათ ჩქინ მეფეს, იესოს? განადიდით იეჰოვაშ სახელ დო ქიმეხვარით ადამიანეფს, გეჩინებაფუან თინა. თეშნერო ქიმიაჸუნუთ იესოშ ნაკვალუს (1 პეტ. 2:21). იესოცალო, თქვა ხოლო გუხარენთ გურს იეჰოვას დო დამტკიცენთ, ნამდა თიშ ნტერ, სატანა, მეტყურე რე! w24.02 11, 12 ¶11—13

ულირ ხუთ წანაშ დინახალე მილიონშე უმოს ადამიანქ ინათ. მუჟამსით დუდის უძღვინენქ იეჰოვას, ოძირანქ, ნამდა გინოჭყვიდილ გაფჷ, გინირთე ქრისტეშ მოწაფეთ დო ღორონთიშ ნებაშ შესრულება ცხოვრებას პირველ ადგილს გიორინუე. მუ მეთხიებ ქრისტიანს ღორონთშა დუდიშ მეძღვინუაშ უკულ? იესოქ თქუ: „მითინს ჩქიმ მოწაფეთ გინორთა ქაკონ-და, ვარია ქოთქუას მუშ დუდშე“ (მათ. 16:24). ბერძნულ ფრაზა, ნამუთ თარგმნილ რე მუჭოთ „ვარია ქოთქუას მუშ დუდშე“ შილებე ნიშნენდას, პირდაპირ გაგებათ ვარია ქოფთქუათ ჩქინ დუდშე. იეჰოვაშა დუდიშ მეძღვინუაშ უკულ ვარია ოკო თქუე თი ირფელშე, მუთ ვემურე თიშ ნებას (2 კორ. 5:14, 15). თენა ნიშნენს, ვარია ქოთქუე „ხორციშ საქმეეფშე“, მაგალთო, მუნერით რე, სექსუალურ უზნეობა (გალ. 5:19—21; 1 კორ. 6:18). მუჭო ფიქრენქ, მონკა ოღალო გიმანჯირუნანო თეცალ ნორმეფიშ მეჸუნა? იეჰოვა ქომიჸორა დო თიშ კანონეფ ჩქინ საჯგირობუოთ რენ ქობჯერან-და, თაშ ვეჸუაფ (ფსალმ. 119:97; ეს. 48:17, 18). w24.03 2 ¶1; 3 ¶4

იეჰოვა წმინდა შურს არზენს თინეფს, მიდგას იწონუანს (მათ. 12:18). დეფიქრით თეცალ კითხვეფშე: ქიგმიფრჩქინანქო წმინდა შურიშ ნაყოფიშ თვისებეფს? ქიდიბგურეო მოთვინება დოვარ კინ თიცალ ვორექ, მუნერით იეჰოვაშ გაჩინებაფაშახ ვორდჷ? მუთ უმოსო გეგმირჩქინანთ წმინდა შურიშ თვისებეფს, თით უმოსო ქოძირუნთ, ნამდა გიღუნა იეჰოვაშ მოწონა. გიშაჸიდირალიშ საშვალებათ იეჰოვა ცოდეფს თინეფს პატიენს, მიდგას იწონუანს (1 ტიმ. 2:5, 6). მარა, თიშ უმკუჯინუო, ნამდა მიღუნა გიშაჸიდირალიშ რწმენა დო ნათილ ხოლო ვორეთ, შილებე ვა ბჯერდან, ნამდა მიღუნა იეჰოვაშ მოწონა. მუ ვაკეთათ თეცალ დროს? ვაგგოჭყორდან, ჩქინ გრძნობეფშა ირო ვენდებე; მინშა შილებე თინეფქ დუმაღორან. მარა იეჰოვაშ ნდობა შემლებუნა ირიათო მიღუდან. თინეფ, მიდგას გიშაჸიდირალიშ რწმენა უღუნა, იეჰოვაშ თოლს მართალეფო რენა მერჩქინელ დო თიშე კურთხევეფ ვემიოკორდუნა (ფსალმ. 5:12; რომ. 3:26). w24.03 30 ¶15; 31 ¶17