ოქტომბერ

დღას ქოჸოფეთო თიცალ სიტუაციას, მუჟამსით გაიჭირდეს მორჩილებაშ გიმორჩქინაქ? თაშ მოხვად მეფე დავითიშ შემთხვევას ხოლო, ათეშენ, თიქ ლოცვას ღორონთის თხუ: „სქან მორჩილებაშ სურვილ გომრჩქინ გურს“ (ფსალმ. 51:12). დავითის მანგარო უჸორდჷ იეჰოვა, მარა მინშა იშენით უჭირდჷ, დემორჩილკო თის. თაშ რე ჩქინ შემთხვევას ხოლო. მუ რე თეშ მიზეზ? პირველ, ჩქი დაუმორჩილებლობა მემკვიდრეობათ მიბღით ჩქინ პირველ მშობლეფშე. მაჟია, სატანა ირფელს ორთჷ, ნამდა ვედვემორჩილათ იეჰოვას, მუჭოთ ართ დროს მუქ აკეთ (2 კორ. 11:3). მასმა, თიცალ ხალხ შქას ფცხოვრენთ, მით მუნეფიშ ნებაშა ცხოვრენა დო გიმირჩქინანა დაუმორჩილებლობას (ეფეს. 2:2). ათეშენ ბრელ ოკო იფხანდათ, ნამდა ქივეწინააღმდეგათ, მუჭოთ ჩქინ ცოდამ მიდრეკილებეფს, თეშ სატანა დო თიშ ქვეყნიერებას ხოლო, ნამდა შემალებუან დევემორჩილათ იეჰოვა ღორონთის დო თინეფს, მიდგას იეჰოვაქ გარკვეულ უფლებამოსილება მეჩჷ. w23.10 6 ¶1

მუს ბგურაფლენთ იესოშ სასწაულშე, მუჟამსით წყარ ღვინო გინართინუ? თე სასწაულ თანდაბლობას მოგურუანა. თის დუდიშ ცქვაფა ვა დუჭყაფ თე სასწაულით დო ვართ დღას იცქვანდჷ თი ირფელით, მუდგას ორთუდ. თეშ გინაწონს, თინა გიმირჩქინანდჷ თანდაბლობას დო ირიათო მუშ ზეციერ მუმას ადიდენდჷ (იოან. 5:19, 30; 8:28). ჩქი ხოლო იესოშ მაგალითის ქიმვაჸუნუთ დო თანდაბლობას გეგმიფრჩქინანთ-და, დღას ვეფცქვანდათ იჸი თი ირფელით, მუდგას ვორთუთ. იეჰოვაშ მსახურებას მუდგა საქმეს ვავორთუდათინ, ჩქინ დუდ ვარინ, თინა ოკო მოამაყდან, ნამდა ღორონთიშ მსახურებაშ პატი მიღნა (იერ. 9:23, 24). თე ირფელს დუდ დუვანებათინ, იეჰოვაშ მოხვარაშ უმშო მუ მაკეთებედეს?! (1 კორ. 1:26—31). თანდაბლეფ ქიპჸუაფუთ-და, ვაფთქუანთ, მუ სიკეთე ვაკეთით შხვეფშო. ჩქინო თიშ რჩქინა ხოლო დასაბაღ იჸუაფ, ნამდა იეჰოვა მორწყენა დო აფასენს თი ირფელს, მუდგას ვორთუთ (ქეშუდარით მათეშ 6:2—4; ებრ. 13:16). მუშო ოკო რაგად, ჩქი განვადიდენთ იეჰოვას, მუჟამსით მეპჸუნთ იესოშ მაგალითის დო გიმიფრჩქინანთ თანდაბლობას (1 პეტ. 5:6). w23.04 4 ¶9; 5 ¶11, 12

ღორონთიშ შთაგონებათ მოციქულ პავლექ ქრისტიანეფს ელუჩ, ნამდა ხვალე მუნეფიშ დუდშო ვეფიქრესკო. მუჭო შემლებნა თე რჩევაშ გიმორნაფა კრებაშ შეხვალამეფს? ჯგირ იჸუაფ, ირიათო ფშუდან დო ვაგმოჭყორდან, ნამდა ჩქინცალო შხვეფს ხოლო ოკონა კომენტარეფს მონაწილებაშ მეღება. მუჟამსით მეგობრეფწკუმა ართო ვორეთ ირიათო ჩქი ვეფჩიებუთ დო შხვეფს ხოლო ვარზენთ რაგადიშ საშვალებას, მუშენდა მოკონა, თინეფქ ხოლო გეგმოხანტან მუნეფიშ აზრ. თეშნერო, მოკონა, კრებაშ შეხვალამეფს, მუთ შილებენ მეტიქ ქოთქუას კომენტარ. და დო ჯიმალეფს გურშა ელვუკინათინ თიშ ართ-ართ საშვალება თინა რე, ნამდა ქიმეფჩათ შესაძლებლობა გეგმოხანტან მუნეფიშ აზრ (1 კორ. 10:24). მოკლე კომენტარეფს გუვაკეთენთ-და, გარჩიებას მონაწილებაშ მეღებაშ საშვალება უმოს ბრელს ქიმიაჩამუ. თიმწკუმა ხოლო, მუჟამსით მოკლე კომენტარს გაკეთენთ, ეცადით აბზაცის მოჩამილ არძა აზრ თქვა ვემიშინუათ. თეს ვა გეთვალისწინენთ-და, შილებე შხვას ვა დასქიდას ორაგადექ. w23.04 22, 23 ¶11—13

მნიშვნელოვან რე, გუვაგრძელათ შხვეფიშ მოხვარა, განსაკუთრებულო მსახურებას მონაწილებაშ მეღებათ. ჩქი მსახურებაშ დროს ხოლო ოკო დუხუჯუათ არძანერ სიტუაციას, მუშენდა ვუქადაგუთ განსხვავებულ მრწამსიშ, შეხედულებეფიშ დო წარმომავლობაშ ადამიანეფს. თე მხარეთ ბრელ მუდგარენიშ გურაფა შემლებნა მოციქულ პავლეშ მაგალითშე. იესოქ თინა „უცხოტომელეფიშ მოციქულო გიშეგორ“ (რომ. 11:13). მუშ დავალებაშ შესრულებაშ დროს თინა უქადაგუდ ბერძნეფს, იუდეველეფს, განათლებურ დო უბრალო კათას, სახელმწიფო მოხელეეფს დო მეფეეფს. ჭეშმარიტება თინეფიშ გურშა ქიმიღკონ თიშენ, პავლე „არძაშო ირფელ“ გინირთუდ (1 კორ. 9:19—22). თინა ყურადღებას აქციენდჷ მუშ მარჩქილეეფიშ მრწამსის, ულირ ცხოვრებას დო წარმომავლობას დო თინეფწკუმა ჩიებაშ დროს თე ირფელს ითვალისწინენდჷ. მუჟამსით პავლე მოციქულცალო, მსახურებაშ დროს ჩქი ხოლო ქუდუხუჯუანთ ადამიანეფს დო თითოულს ინდივიდუალურო მევუდირთუთ, ქადაგებას ჯგირ შედეგეფს ქიმვოჭირინუანთ. w23.07 23 ¶11, 12

ლიბ ხასიათ შინაგან ძალაშ მაძირაფალ რე დო ვართ ხოლო სისუსტეშ. ზუსტას შინაგან სიმტკიცე რე საჭირო, ნამდა ვა ვოდინუათ სიმშვიდე დაძაბულ სიტუაციაშ დროს. ლიბ ხასიათ „წმინდა შურიშ ნაყოფიშ“ ართ-ართ თვისება რე (გალ. 5:22, 23). ბერძნულ სიტყვას, ნამუთ თარგმნილ რე, მუჭოთ „ლიბ ხასიათ“, მინშა გოხენდილ ცხენიშ ეიოჭარალო ირინუანდეს. მართალ რე, გოხენდუაშ უკულ ცხენ მშვიდ რე, მარა მუშ ძალას ვადინუანს დო კინ ჯვეშობურო ძალიერ რე. ჩქი მუჭო შემლებნა გუვავითარათ ლიბ ხასიათ დო ვა ვოდინუათ შინაგან სიმტკიცე? თეშ კეთება ჩქინ ძალეფით ვეშმალებენა. თეშო საჭირო რე, ღორონთის ლოცვას წმინდა შურ დო მოხვარა ქოფთხუათ თე ძვირფას თვისებაშ გავითარებელო. შხვეფიშ გამოცდილებაქ ოძირუ, ნამდა ლიბ ხასიათიშ გავითარება შეიოლებერ რე. ბრელ ჩქინ და დო ჯიმა გიმირჩქინანს ლიბ ხასიათის დო გემუანო პასუხენს თი კათას, მით თინეფიშ გაღიზიანებას ოცად. თეშ შედეგო, ხალხის იეჰოვაშ მოწმეეფშენ ჯგირ წარმოდგენა ოსქიდუ (2 ტიმ. 2:24, 25). w23.09 15 ¶3

ღორონთიშ შთაგონებათ მოციქულ იოანექ ხილუას ძირჷ 24 უხუცეს, მით ზეცას განადიდენდეს იეჰოვას დო იჩიებდეს: „სი გოკუთვნჷ დიდება, პატი დო ძალიერება“ (გამოცხ. 4:10, 11). ართგურ ანგელოზეფს ხოლო ანაყუ მიზეზ უღნა, ნამდა განადიდან იეჰოვა, მუშენდა იეჰოვაწკუმა ართო რენა ზეცას დო ჯგირო იჩინენა თის. თეს გეძინელ, ოკვირნა ღორონთიშ კეთებულ საქმეეფს დო ორწყენა თიშ თვისებეფს, ნამუთ თე საქმეეფშე იძირე. ათეშენ, ძალიერ სურვილ უღნა, ნამდა განადიდან ღორონთ (იობ. 38:4—7). ჩქი ხოლო მოკონა, განვადიდათ იეჰოვა ჩქინ ლოცვეფს. მაგალთო, შემლებნა ლოცვეფს ალალას გეგმოფხანტათ, მუ მობწონა თიშ პიროვნებას დო მუს ვაფასენთ არძაშ უმოსო. ბიბლიაშ კითხირიშ დო გიმორკვიებაშ დროს ქეცადით, ქოძირათ თი თვისებეფ, ნამუთ განსაკუთრებულო მორწონა იეჰოვაშ პიროვნებას (იობ. 37:23; რომ. 11:33). უკულ ქუწით იეჰოვას, მუშენ აფასენთ თე თვისებეფს. ღორონთიშ განდიდება თიშ გურშენ ხოლო შემლებნა, ნამდა მოხვარნა, მუჭოთ ჩქი, თეშ მთელ საჯიმალოს. ხვალე თენა ვარინ, ირიათო ზრუნენს ჩქინდე დო ფთხილანა (1 სამ. 2:1, 2). w23.05 3, 4 ¶6, 7

1919 წანას ღორონთიშ ხალხიქ გეთავისფალ „დიდ ბაბილონშე“. თე წანას იესოქ დანიშნჷ „ართგურ დო გონიერ მონა“, ნამდა ალალ გურიშ კათას ქიმეხვარესკო, ახალას გონწყუმილ „სიწმინდეშ შარას“ გილულას (მათ. 24:45—47). თი ართგურ კათაშ ჭყოლოფათ, მიდგაქ ულირს მიღეს მონაწილება „სიწმინდეშ შარაშ“ მომზადებას, თინეფს, მით თე შარას დიჭყანდჷ გილულას შეიალებედ, უმოსო გეჩინებაფესკო იეჰოვა დო ქიგეგესკო თიშ განზრახვეფიშ გურშენ (იგავ. 4:18). თეს გეძინელ, თიშ საშვალება ხოლო ქიმიაჩამდეს, ნამდა იცხოვრესკო იეჰოვაშ ნორმეფიშ თანახმას. მუშო ოკო რაგად, იეჰოვა თინეფშე ველუდ, ნამდა ხეთეშე დითირუდეს დო ირფელს ართუცფას გეგშასწორენდეს. თეშ მანგიორო, თინა დროს არზენდჷ დო ჭიე-ჭიეთ ოგურუანდჷ მუშ ხალხის. წერმიდგინით, მუნერ ბედნერეფ იპჸუაფუთ, მუჟამსით ირნერო შემალებენა ღორონთიშ მოსაწონო იფცხოვრათ. არძა შარას ოსაჭირ რეგულარულ მიკოჯინა. 1919 წანაშე მოჸუნაფილ „ართგურ დო გონიერ მონა“ აგრძელენს „სიწმინდეშ შარაშ“ მომზადებას, ნამდა უმოს მეტ ადამიანს შეიალებუას ქიდიტუას „დიდ ბაბილონ“. w23.05 17 ¶15; 19 ¶16

ხემძღვანელ საბჭოშ წევრეფ პირადო ამზადენა ხემძღვანელ საბჭოშ შხვადოშხვა კომიტეტიშ დამხმარეეფს. თინეფ უკვე ამდღარშე ასრულენა ქიანაშ სერიოზულ პასუხიშმგებლობას ორგანიზაციას დო მზათ რენა, ცხებულეფიშ ზეცაშა ულაშ უკულ გაგრძელან ქრისტეშ შხურშე ზრუნვა. სოდგარენ დიდ გაჭირებაშ ბოლოშო, ცხებულეფ ზეცაშა იჸუაფუნა ჸუნაფილ, დედამიწას დოსქილადირ ქრისტეშ მიმაჸუნალეფ ართგურო გაგრძელენა წმინდა თაყვანიშმცემლობაშ მეჸუნას. იესოშ ხელმძღვანელობათ ღორონთიშ თაყვანიშმცემელეფს მუთუნ ვა მაკორდუნა. მართალ რე, თე დროს „გოგ“, ერეფიშ კოალიცია, ღორონთიშ ხალხის ქიგიანთხუ, მარა თე თავდასხმა ბრელ ხანს ვეგეგრძელებ დო ვა გაჩერებე იეჰოვაშ თაყვანიშცემა (ეზეკ. 38:18—20). თინა აუცილებერო ირსხენს მუშ ხალხის. მოციქულ იოანექ ხილუას ძირჷ „ანაყუ ხალხ“, მიდგაქ „დიდ გაჭირება მიკორთეს“ (გამოცხ. 7:9, 14). w24.02 5, 6 ¶13, 14

მუ ოკო ვაკეთათ წმინდა შურიშ მიოღებელო? თეშო საჭირო რე, იბლოცათ, გეგმიბრკუათ ღორონთიშ სიტყვა დო მონაწილება მიბღათ თი საქმეეფს, ნამდგას იეჰოვა მუშ ორგანიზაციაშ საშვალებათ ხემძღვანელენს. თეს გუვაკეთენთ-და, გუვავითარენთ „წმინდა შურიშ ნაყოფის“ (გალ. 5:22, 23). ღორონთ მუშ წმინდა შურს ხვალე თინეფს არზენს, მით ოცად, ვადინუას სუფთა აზროვნება დო თიშ შესაბამისო მიქცუას. იეჰოვა მეტო ვემეჩანს მუშ წმინდა შურს თინეფს, მიდგას უწმინდურ ფიქრეფ უღჷ დო თეშ შესაბამისო იქციებ (1 თეს. 4:7, 8). თეს გეძინელ, წმინდა შურ ირო მიბღათინ, წინასწარმეტყველებეფს არდებულო ოკო ვა ვუჯინათ (1 თეს. 5:20). თე მუხლის მოშინაფილ სიტყვა „წინასწარმეტყველებეფს“ იგულისხმებ ღორონთიშ წმინდა შურით გინოჩამილ ცნობეფ, ნამუთ ოხუ იეჰოვაშ დღას დო თი მნიშვნელოვან დროს, ნამდგასით ფცხოვრენთ. ოკო ვეფიფქრათ, ნამდა არმაგედონშახ დიო ხოლო ბრელ მეძჷ დო თე დღა ჩქინ სიცოცხლეს ვა დოდირთუ. თეშ გინაწონს, ღორონთიშ მოსაწონო მოქციებათ დო სიწმინდეშ დაცვებათ ოკო ვოძირუათ, ნამდა თე დღას ირ წუთის ველუთ დო შურ მოლნა, მუჟამ დოდირთუ თინა (2 პეტ. 3:11, 12). w23.06 12 ¶13, 14

მუ ოკო ვაკეთათ, მუჟამსით ჩქინ ელექტრონულ მოწყობილობას პორნოგრაფიულ სურათ გამკორჩქინდუ? მუშო ოკო რაგად, ხეთეშე ოკო ჩუთხინუათ თოლ. თეშ კეთება უმოს ადვილ მაჸინა, მუჟამსით ქიგიფშინანთ, ნამდა იეჰოვაწკუმა ხოლოშიან ურთიერთობა შხვა ირფელშე ძვირფას რე. მართალ რე, ნამთინე სურათ შუროთ ვა რე პორნოგრაფიულ, მარა იშენით შეულებ გომრჩქინან სექსუალურ სურვილეფ. აუცილებერ რე, თეცალ მასალას ხოლო ეუჩილითუათ დუდ, მუშენდა ვამკონა, ჩქინ გურს დო გონებას აკაბცხა ადგილ ხოლო მეფჩათ უზნეო ფიქრეფს (მათ. 5:28, 29). ტაილანდის მახორუ, ართ უხუცეს ჯიმა, დავიდ, თეცალ მუდგარენს იჩიებ: „მუჟამსით თიცალ სურათის ქავუხვადუქ, ნამუთ იშენდოიშენ პორნოგრაფიულ ვა რე, ჩქიმ დუდის ვოკითხუქ, ქიმეწონებ დო ვარ იეჰოვას თინეფიშ გოჯინას გუვაგრძელენქ-და? თეშე დაფიქრება მოხვარ, სწორას მიფქცუე“. ბრძნულას მოქციებას მოხვარნა იეჰოვაშ მიმართ ჯანსაღ შიშიშ გავითარება, მუშენდა, მუჭოთ ბიბლიაშე ბგებულენთ „იეჰოვაშ შიშშე მოურს სიბრძნე“. w23.06 23 ¶12, 13

შილებე „დიდ გაჭირებაშ“ დროს ჩქი ხოლო დემესაჭირან თე მითითებაშ მეჸუნაქ დო მინაულარქ მაჸუან „ოთახშა“, ნამუთ შილებე კრება რდას. და დო ჯიმალეფწკუმა ართო ღორონთიშ მსახურებას გუვაგრძელენთ-და, იეჰოვა მოპირნა, ნამდა „დიდ გაჭირებაშ“ დროს დოფთხილანა. ათეშენ ამდღარშე ბრელ ოკო იფხანდათ, ნამდა თანაქრისტიანეფიშ მიმართ ხვალე მოთვენა ვარინ, ძალიერ ჸოროფა ხოლო გეგმიფრჩქინათ, მუშენდა ჩქინ რსხებაქ შილებე თეშა იჸუას დამოკიდებულქ! მუჟამსით „იეჰოვაშ დიდ დღა“ ქიდიჭყაფუ, მთელ კაცობრიობას მანგარ რთულ პერიოდ ქუდუდირთუ (სოფ. 1:14, 15). იეჰოვაშ ხალხ ხოლო ქეშეფხვადუთ სირთულეეფს, მარა ამდღარშე მივემზადებუთ-და, ვა ვოდინუანთ შინაგან სიმშვიდეს, შემალებენა შხვეფიშ მოხვარა დო გურზუთ ირნერ სირთულეს, ნამდგას შეფხვადუთ.მუჟამსით ჩქინ და დო ჯიმალეფ სირთულეეფს ქეშეხვადნა, თინეფიშ გაჭირებაშ გურშა მეღალათ, შემალებენა ირნერო მივეხვარათ დო ქელუდირთათ თინეფს. ხვალე თენა ვარინ, თანაქრისტიანეფიშ მიმართ ძალიერ ჸოროფას ამდღარშე გუვავითარენთ-და, მომავალს მუდგაქ ვა მოხვადასინ, მუთუნით ვეჩვეთხიებუთ თინეფს. ჩქინ მოჸოროფე ღორონთ იეჰოვა დუმაჯილდოვენა დო ქომჩანა ულიებ სიცოცხლეს თიცალ მსოფლიოს, სოდეთ ვეჸუაფ უბედრობა დო მითინ ვეგიშინანს ულირს (ეს. 65:17). w23.07 7 ¶16, 17

ბიბლია ხშირას ღორონთიშ ართგურ ქომოლკათას ძალიერ პიროვნებეფო მიშინუანს. მარა თინეფ შქას არძაშ უმოს ძალიერეფს ხოლო მინშა ძალა ელიებუდეს დო თიცალ გრძნობა უღდეს, ითამ მუთუნიშ კეთება ვეშულებდეს. მაგალთო, მუჭოთ ბიბლიაშე ბგებულენთ, მეფე დავით ნამთინეშა „გვალაცალო მანგარას“ გერდჷ დო ნამთინეშა შქურნაფილ რდჷ (ფსალმ. 30:7). სამსონს ხოლო, მიდგას განსაკუთრებულ ფიზიკურ ძალა უღუდ, ჯგირო არჩქილედ, ნამდა თენა ღორონთიშ დო თიშ წმინდა შურიშ ჭყოლოფა რდჷ დო თიშ უმშო დესუსტებუდ დო შხვეფცალ იჸუაფუდ (მსაჯ. 14:5, 6; 16:17). თე ართგურ ქომოლკოჩეფ იეჰოვაქ გამანგარ დო ხვალე თიშ ჭყოლოფათ რდეს ძალიერეფ. მოციქულ პავლეს ჯგირო არჩქილედ, ნამდა სირთულეეფიშ გარზებელო თის ხოლო ოსაჭირუდ ძალა იეჰოვაშე (2 კორ. 12:9, 10). პავლეს ჯამრთელობაშ პრობლემეფ უღუდ (გალ. 4:13, 14). მინშა არასრულყოფილებაშ გურშენ სწორიშ კეთება ხოლო უჭირდჷ (რომ. 7:18, 19) დო მინშა მანგარ შქურნაფილ რდჷ (2 კორ. 1:8, 9). მარა მუჟამსით თეზმა სირთულეს ობრძოლუდ დო სუსტ რდჷ, ზუსტას თიმწკუმა გინირთჷ ძალიერო. მუშ ჭყოლოფათ მოხვად თექ? თინა იეჰოვაქ გამანგარ დო მეჩჷ ძალა, ნამუთ გარზებელო ოსაჭირუდ. w23.10 12 ¶1, 2

უღირსობაშ გრძნობა მინშა სი ხოლო ქოიღუნ-და, ქიგიშინ, ნამდა იეჰოვას იჩინენქინ თენა თეშ ვა მოხვალამე; მუქ მეიჸონ მუშ ხოლოშა (იოან. 6:44). თინა ორწყე ჩქინ ჯგირ თვისებეფს, თიცალეფს ხოლო, ნამდგას შილებე კინ ჩქი ვა ვორწყედათ, დო უჩქჷ, მუნერ გურიშ ვორეთ (2 მატ. 6:30). ათეშენ, მუჟამსით მირაგადუნა, ნამდა თიშო მანგარ ძვირფასეფ ვორეთ, შემლებუნა ბჯერდან, ნამდა თენა მართალო თაშ რე (1 იოან. 3:​19, 20). ჭეშმარიტებაშ გაგებაშახ ნამთინეს შილებე თიცალ მუდგარენ მაფუდან ნაკეთებ, მუდგაშ გურშენ ამდღა ხოლო მაწუხენა სინდის (1 პეტ. 4:3). თინეფ ხოლო, მით მთელ ცხოვრება რე, იეჰოვას ართგურო ომსახურუნა, ობრძოლუნა მუდგარენ სისუსტეეფს. თქვან შემთხვევას ხოლო თაშ ქორე დო გურ ბრალს ქიგერდვანან-და, გურშა ელაიკინანა თიშ რჩქინა, ნამდა ღორონთიშ შხვა ართგურ მსახურეფს ხოლო უღუდეს თეცალ გრძნობეფ. მაგალთო, მუჟამსით პავლე მოციქულ მუშ არასრულყოფილებაშე ფიქრენდჷ, თქუ, ცოდა კოჩ ვორექია (რომ. 7:24). თის უკვე ნარღებულ აფუდ ღორონთიშ წოხოლე თი ირფელ, მუთ ულირს დაშუ დო ნათილ ხოლო რდჷ, მარა მუშ დუდშე იშენ თქუ, „მოციქულეფ შქას არძაშ უნაკლებაშ“ დო ცოდამეფშე „პირველ“ ვორექია (1 კორ. 15:9; 1 ტიმ. 1:15). w24.03 27 ¶5, 6

იეჰოაშიშ მეღებულ გლახა გადაწყვეტილებაშე, ართ-ართ, მუდგას ბგურაფლენთ თინა რე, ნამდა გიშებგორათ თიცალ მეგობრეფ, მით ჯგირო იმოქმედენა ჩქინდა. თიცალეფ, მიდგას უჸორა იეჰოვა დო ოკონა თიშ გურიშ გახარება. ვამკონა, მეგობრეფო ხვალე ჩქინ მახანეფ პჸუნდან. ქიგიშინით, ნამდა იეჰოაშ ბრელით უკლაშ რდჷ მუშ მეგობარ იეჰოიადაშე. ჯგირ იჸუაფ, ჩქინ დუდის თეცალ მუდგარენეფ ბკითხათ: „ქუმოხვარნანო ჩქიმ მეგობრეფ იეჰოვაშ მიმართ რწმენაშ გამანგარებას? აღბძრენანო, იფცხოვრე ღორონთიშ ნორმეფიშ თანახმას? ქოუჸორანო იეჰოვაშე დო ჭეშმარიტებაშე ჩიება? ქაფასენანო ღორონთიშ ნორმეფს? ხვალე თის მირაგადნანო, მუდგაშ მორჩქილაფა მოკო დო ვარ უღნა თიშ გაბედულება, რჩევა ქომჩან, მუჟამსით თენა მოსაჭირ?“ (იგავ. 27:​5, 6, 17). ალალას ქოფთქუათინ, მუთუნ ჯგირობუას ვა მომღანა თიცალ მეგობრეფ, მიდგას ვა უჸორა იეჰოვა. მარა თინეფ, მიდგას იეჰოვა უჸორა, თქვანო ჯგირ მეგობრეფ იჸუაფნა დო ირიათო მიგეხვარებნა (იგავ. 13:20). w23.09 9, 10 ¶6, 7

„ალფა“ ბერძნულ ანბანიშ პირველ ასო რე დო „ომეგა“ — ბოლო. თე შედარებაშ გიმორნაფათ იეჰოვა აარგამენს, ნამდა, მუჟამსით მუდგარენ საქმეს დიჭყანს, თის აუცილებერო ბოლოშახ ქიმიჸუნანს. მუჟამსით იეჰოვაქ ადამ დო ევა გაჭყჷ, თინეფს უწუ: „ინაყოფიერით, გემრავლით, გეიოფშით დედამიწა“» (დაბ. 1:28). თაშ ნამდა, მუშ განზრახვაშ გაცხადებაშ დროს იეჰოვაქ, თაშ ქოფთქუათინ, თქუ „ალფა“. თე განზრახვა თიმწკუმა შისრულებ, მუჟამსით ადამ დო ევაშ მორჩილ დო სრულყოფილ გამნარყ გეიოფშანს დედამიწას დო თის სამოთხეთ გინართინუანს. მუჟამსით თენა ქუმოხვადუ დო ღორონთიშ განზრახვა საბოლათ შისრულებ, თინა თაშ ქოფთქუათინ, თქუანს „ომეგა“. მუჟამსით იეჰოვაქ გათუ „ცაშ, დედამიწაშ დო თი ირფელიშ გოჭყაფა, მუთ თექ რე“, ხოლო ართ მტკიცებულება მუჩეს, მუდგათ ოძირუ, ნამდა მუშ განზრახვა აუცილებერო შისრულებ. თეშ კეთებათ დუმარწმუნეს, თაშ ქოფთქუათინ, გარანტია მუჩეს, ნამდა მუდგაქ ვა მოხვადასინ, მა-7 დღაშ ბოლოს დედამიწა დო კაცობრიობაწკუმა დაკავშირებულ მუშ განზრახვას აუცილებერო შეასრულენს (დაბ. 2:1-3). w23.11 5 ¶13, 14

იუდეველეფს ბაბილონშე ისრაელშა რთულ შარა აჸიდეს ოულარ, მუდგაშოთ სოდგარენ ოთხ თუთა დესაჭირებდეს. მარა იეჰოვაქ დეპირ, ნამდა ჩაუთხინუანდჷ ნებისმიერ დაბრკოლებას, მუდგაქ შილებედ თინეფს ისრაელშა დორთას ეცილკო. მართალ რე, ართგურ იუდეველეფს ბაბილონიშ დატებელო მსხვერპლშა აჸიდეს ოულარ, მარა ჯგირო უჩქუდეს, ნამდა ისრაელშა დორთათ ბრელით უმოს კურთხევეფს მიღენდეს. არძაშ უმოს დიდ კურთხევა თინა რდჷ, ნამდა თექ შეიალებედეს, ღორონთის თავისფალო ცესკო თაყვან. ბაბილონს 50-შე უმოს ტაძარ რდჷ, მარა თინეფ შქას ნამთინ ვა რდჷ იეჰოვაშ, მუშენდა არძას ტყურა ღორონთეფს ცენდეს თაყვანს. თი ქალაქის სამსხვერპლოეფ ხოლო ვა რდჷ, სოდეთ ისრაელეფს შეიალებედეს მსხვერპლიშ შეწირუა, მუდგას მოსეშ კანონ ითხინდჷ თინეფშე, დო ვართ მღვდელეფ რდეს, მით თე საქმეს შეასრულენდეს. თეს გეძინელ, ბაბილონს ღორონთიშ ხალხშე უმოს თინეფ რდეს, მიდგას იეჰოვა დო თიშ ნორმეფ მუთუნო ვემიორჩქუდეს. თაშ ნამდა, ვითანთასობით ღორონთიშმოშიშ იუდეველს შურ ოლუდ, მუჟამ დირთუდ მშობლიურ დიხაშა, სოდეთ შეიალებედეს, კინ აღადგინესკო ჭეშმარიტ თაყვანიშმცემლობა. w23.05 14, 15 ¶3, 4

მოსაჭირუნა ღორონთიშ წმინდა შურიშ მოხვარა, ნამდა თეშ გუაგრძელათ მოქციება, „მუჭოთ სინთეშ სქუალეფს“ ოსქვანს, მუშენდა უზნეობათ ეფშა ქიანას ზნეობრივ სისუფთავეშ დაცვება ჭიჭე ამბე ვა რე (1 თეს. 4:​3—5, 7, 8). ღორონთიშ წმინდა შურით შემალებენა ვებრძოლათ ქვეყნიერებაშ აზროვნებას, მუდგაშა მიშურს ფილოსოფიურ აზრეფ დო თიცალ დამოკიდებულებეფ, მუთ ღორონთიშ აზროვნებას ვემურე. ღორონთიშ წმინდა ძალა თის ხოლო მიმეხვარებუნა, თაშ ქოფთქუათინ, გუავითარათ „თი ირფელ, მუთ ჯგირ დო მართალ რე“ (ეფეს. 5:9). წმინდა შურიშ მიოღებელო ართ-ართ საშვალება ლოცვა რე. იესოქ თქუ, ნამდა იეჰოვა ქიმეჩანს წმინდა შურს თინეფს, მით თხინსჷ (ლუკ. 11:13). თის თიმწკუმა ხოლო ბღებულენთ, მუჟამსით ქრისტიანულ შეხვალამეფს ართო განვადიდენთ იეჰოვას (ეფეს. 5:19, 20). წმინდა შურს შეულებ თეშ იმოქმედას ჩქინდა, ნამდა შემალებუან ღორონთიშ მოსაწონო ცხოვრებაქ. w24.03 23, 24 ¶13—15

უმოს მოთვინება გოსაჭირუნანო? თაშ ქორენ-და, ქილოცით. მოთვინება წმინდა შურიშ ნაყოფ რე (გალ. 5:22, 23). ათეშენ, იეჰოვას ოკო ფთხუათ წმინდა შურ, ნამდა ქიმმეხვარან თე თვისებაშ გავითარებას. მაგალთო, მუჟამსით ჩქინ მოთვინება გიმიცადებ, იეჰოვას მუშ წმინდა ძალას ფთხინთ, ნამდა ვა ვოდინუათ მოთვინება (ლუკ. 11:13). შემლებნა იეჰოვას თინა ხოლო ფთხუათ, ნამდა ქიმმეხვარან საკითხეფს თიშ თოლით ვუჯინათ. მუშო ოკო რაგად, ლოცვაშ უკულ ირნერო ოკო ვეცადათ, ირდღას გეგმიფრჩქინათ მოთვინება. მუთ უმოსო ფთხინთ იეჰოვას ქიმმეხვარან თე თვისებაშ გავითარებას დო მუთ უმოსო ვეცადებუთ თეშ კეთებას, თით უმოსო გიდგუნს მოთვინება ჩქინ გურს ჩხვიჩხვეფს დო გინირთუ ჩქინ პიროვნებაშ ნაწილო. ბიბლიას ბრელ თიცალ ადამიანიშ მაგალით რე ინოჭარილ, მით გიმირჩქინანდეს მოთვინებას. თინეფშე დაფიქრება, ჩქი ხოლო მოხვარნა თე თვისებაშ გიმორჩქინას. w23.08 22 ¶10, 11

გათელებურ იესოქ პეტრე თიშა ხოლო დარწმუნ, ნამდა იეჰოვა ირიათო ელუდირთუდ დო იზრუნენდჷ თიშე. მუჟამსით პეტრე დო შხვა მოციქულეფ ოჩხომშა რდეს ულირ, იესოქ კინ სასწაულებრივო ოჭოფაფუ ქიანაშ ჩხომ (იოან. 21:​4—6). მუშო ოკო რაგად, თე სასწაულ პეტრეს დარწმუნენდჷ, ნამდა იეჰოვა აუცილებერო იზრუნენდჷ თიშ მატერიალურ საჭიროებეფშო დო ქუგაშინანდჷ იესოშ სიტყვეფს ხოლო, ნამდა ღორონთ აუცილებერს ვარკენს თინეფს, მით ცხოვრებას პირველ ადგილს თიშ სამეფოს გიორინუანს (მათ. 6:33). ზუსტას ათეშენ, პეტრექ გინოჭყვიდ, ნამდა მუშ ცხოვრებას პირველ ადგილს მეჩხომეობა ვარინ, ღორონთიშ სამეფო ქიგიორინუკო. პეტრე დუდგინოდვალირ მაქადაგებელ რდჷ, მუდგაშ შედეგო ბრელქ გეგჷ სახიოლო ამბე. მაგალთო, ახ. წ. 33 წანას, ჟარნეჩდომავითა დღაშ დღახუს, ანთასობით ადამიანქ მირჩქილუ პეტრეშ ქადაგება დო ინათ (საქ. 2:​14, 37—41). უმოს გვიანო, თიქ სამარიელეფს დო უცხოტომელეფს მეხვარ, გინირთესკო ქრისტეშ მიმაჸუნალეფო (საქ. 8:​14—17; 10:​44—48). არგამა რე, იეჰოვაქ აკურთხჷ პეტრე დო გიმირინუ თიშო, ნამდა არძანერ ადამიანქ ქიგეგკო სახიოლო ამბე. w23.09 20 ¶1; 23 ¶11

საეგებიოთ, იერუსალიმიშ განადგურებაშე ჟირ წანაშ უკულ ბაბილონიშ მეფე ნაბუქოდონოსორს სიზმარს ქიანაშმადიდა ქანდაკებაქ ქიგიაძირ, თე სიზმარქ მანგარო განერვიან თინა. თიქ არძა მუშ ჭკვერკათას დარცქინ, ნამდა თე სიზმარს დო თიშ ენწყუმას ვა უწინდეს-და, დოჸვილუნდჷ. მეფეშ თე სიტყვეფ დანიელს ხოლო ოხუდ (დან. 2:3—5). დანიელს ოჯინეთ ვა უღუდ საქმე, ხეთეშე ოკო იმოქმედკო, თაშ ვემიქციებუდ-და, ბრელს დოჸვილუნდეს. ათეშენ „მიდართჷ დანიელქ მეფეშა დო თხუ, ნამდა სიზმარიშ ეიონწყუმალო დრო ქიმეჩკო“ (დან. 2:16). თეცალ მოქმედება დანიელიშ მხარეშე გაბედულებას დო რწმენას ითხინდჷ, მუშენდა ბიბლიას სოთინ ვა რე ინოჭარილ, ნამდა აიშახ თის მიდგაინშა სიზმარ აფუდ ენწყუმილ. თიქ მუშ მეგობრეფს — შადრაქის, მეშაქის დო აბედნეგოს ქოთხუ, „ილოცესკო, ნამდა იეჰოვაქ გუცხადკო თინეფს თე საიდუმლო“ (დან. 2:18). იეჰოვაქ ქუპასუხ თინეფიშ ლოცვეფს. შედეგო, დანიელქ, ღორონთიშ მოხვარათ, გენწყჷ ნაბუქოდონოსორიშ სიზმარ, მუდგაშ ჭყოლოფათ თიქ დო მუშ მეგობრეფქ ღურას გეგნუსქიდეს. w23.08 3 ¶4

დეფიქრით თი ჯგირ შედეგეფშე, მუთ მოთვინებაშ გიმორჩქინას მოჸუნს. მუჟამსით მოთვინებას გიმიფრჩქინანთ, უმოს მშვიდას ბგინაფლენთ დუდის დო ბედნერეფ ვორეთ. თეს გეძინელ, მიღნა უჯგუშ ფიზიკურ ჯამრთელობა დო ემოციურ მდგომარეობა. მუჟამსით შხვეფიშ მიმართ მოთვინებას გიმიფრჩქინანთ, თეთ ხეს ვუნწყუნთ ართიანშქას ჯგირ ურთიერთობას დო კრებაშ ართობას. მიდგაინ ჩქინ გაღიზიანებას ქაცადუნ-და, ადვილო ვებრისხებუთ, მუთ ხოლო უმოსო გაუფრაშენს სიტუაციას (ფსალმ. 37:8; იგავ. 14:29). დო მუთ არძაშ უმოს მნიშვნელოვან რე, მუჟამსით მოთვინებას გიმიფრჩქინანთ, მეპჸუნთ ჩქინ ზეციერ მუმაშ მაგალითის დო ხოლოშიან ურთიერთობას ვავითარენთ თიწკუმა. მოთვინება მართალო მანგარ ჯგირ თვისება რე, ნამდგაშ გიმორჩქინას ჯგირობუა მოუღ არძაშო. მართალ რე, ირიათო ვა რე ადვილ, ვორდათ მომთმენეფ, მარა იეჰოვაშ მოხვარათ შემალებენა, ხოლო უმოსო გუვავითარათ თე თვისება დო გიმიფრჩქინათ თინა. ჩქი მოთვინებათ ველუთ ღორონთიშ დუნაპირებ ახალ ქვეყნიერებას დო შემლებნა დარწმუნებულ ვორდათ, ნამდა „იეჰოვა ოკვირ თინეფს, მიდგას მუშ შიშ უღჷ, თინეფს, მით თიშე სიკეთეს ელჷ“ (ფსალმ. 33:18). მორთ გინოჭყვიდილ მაფდან, ირიათო გიმიფრჩქინათ მოთვინება. w23.08 22 ¶7; 25 ¶16, 17

იაკობ იჩიებუდ, ნამდა კოჩიქ შილებე თქუას რწმენა მიღუნია, მარა საქმეეფშე გვალო შხვა იძირედას (იაკ. 2:1—5, 9). იაკობიქ ჯგირო ენწყჷ, ნამდა ვართ თი კოჩიშ რწმენას უღუდ ფას, მით ქოძირუნდჷ, ნამდა დას ვარდა ჯიმას მიკაქუნალ დო ოჭკუმალ ვაპალუდ, მარა მუთუნნერო ვემეხვარებუდ (იაკ. 2:14—16). იაკობიქ მუშ წერილს რახაბ მიშინუ, მუჭოთ ჯგირ მაგალით, მიდგაქ რწმენა საქმეეფით ოძირუ (იაკ. 2:25, 26). თის გუნაგონ აფუდ იეჰოვაშ გურშენ დო უჩქუდ, ნამდა თინა ისრაელეფს ირიათო ელურდჷ დო უკინენდჷ ხუჯის (იეს. 2:9—11). რახაბიქ რწმენა საქმეეფით ქაძირუ, მუჟამსით მუშ ჸუდეშა შურ დო გურით მიღჷ ჟირ ისრაელ მზვერავ დო დოთხილუ თინეფ, მუჟამსით თინეფიშ სიცოცხლე საფრთხეშ თუდო რდჷ. შედეგო, თე არასრულყოფილ, უცხოტომელ ოსურქ, აბრაამცალო მართალო იჸუ მერჩქინელქ. თიშ მაგალითშე ჯგირო იძირე, მუსხით მნიშვნელოვან რე, რწმენა საქმეეფით ხოლო გეგმოფხანტათ. w23.12 5, 6 ¶12, 13

ქრისტიანეფ ხვალე ძირითად ბიბლიურ საკითხეფიშ რჩქინას ვეგებჯერდუთ. მოკონა, ტომბა ბიბლიურ საკითხეფს ხოლო ქინვანჭათ, მუდგას ღორონთიშ წმინდა შურ მიმეხვარებნა (1 კორ. 2:9, 10). შეილებნა პირად გურაფას ქინახუნუათ თიცალ საკითხეფ, მუთ ხოლო უმოსო დუგაახლოვენა იეჰოვაწკუმა. მაგალთო, შეილებნა ქიდეკვირათ, მუჭო გიმირჩქინანდჷ თინა ჸოროფას ჯვეშ დროს მახორუ მუშ მსახურეფიშ მიმართ დო მუჭო ამტკიცენს თენა, ნამდა თქვა ხოლო მანგარო უჸორთ. შეილებნა თინა ხოლო გეგმირკვიათ, მუნერ თაყვანიშცემას ითხინდჷ ღორონთ ისრაელეფშე დო ქეშუდარათ თის, ამდღა მუნერ თაყვანიშცემას ითხინს ჩქინდე. თეს გეძინელ, შეილებნა უმოს დეტალურო გეგმირკვიათ, მუჭო შისრულ იესოშე რაგადებულ წინასწარმეტყველებეფქ თიშ დედამიწას ცხოვრებაშ დო მსახურებაშ დროს. თქვა ხოლო თე ჩარჩოს მოჩამილ ვარდა შხვა საკითხეფიშ გიმორკვიება ქუგოკონან-და, შეილებნა გეგმირინუათ „გინაჯინალ კოშკიშ პუბლიკაციეფიშ საძიებელ“ ვარდა „იეჰოვაშ მოწმეეფიშ ორკვიებელ სახემძღვანელო“. ბიბლიაშ უმოს ტომბაშო გიმორკვიება მოიღანა ხიოლს, გაიმანგარენა რწმენას დო მიგეხვარებნა, მიღათ რჩქინა ღორონთიშ გურშენ (იგავ. 2:4, 5). w23.10 18, 19 ¶3-5

პეტრეშ გიმორნაფილ ბერძნულ სიტყვა, ნამუთ თარგმნილ რე, მუჭოთ „მთელ გურით“, პირდაპირ გაგებათ ნიშნენს „გოფაჩილს“. მუხლიშ მაჟია ნაწილს ეჭარილ რე, მუ შედეგის მომღანა მთელ გურით ჸოროფაშ გიმორჩქინა. მუჭოთ თევრეშე ბგებულენთ, თეცალ ჸოროფა და დო ჯიმალეფიშ ცოდეფს გინოფორუნს. წერმიდგინით, ნამდა თქვან სტოლს ბრელ კილ უღჷ, ნამთინე დიხას გონწკირილ რე, ნამთინეს — გოცხაბარელ. მარა შეილებნა თის სტოლსაფინ ქიგნარჩათ, ნამუთ სტოლიშ ხვალე ართ დო ჟირ კილს ვარინ, მუთ ქოუღუნ არძას დოფორუნს. თეშნერო და დო ჯიმალეფიშ მიმართ მთელ გურით ჸოროფა მიმეხვარებნა, დოფობრათ, თაშ ქოფთქუათინ, ქუვაპატუათ ხვალე ართ დო ჟირ შეცდომა ვარინ, „ბრელ ცოდა“. და დო ჯიმალეფიშ მიმართ ჩქინ ჸოროფა თიცალ ძალიერ ოკო რდას, ნამდა შემლებდან ირიათო ვაპატუათ თინეფს, თიმწკუმა ხოლო, მუჟამსით თეშ კეთება მანგარ რთულ რე (კოლ. 3:13). მუჟამსით შხვეფს ვაპატიენთ, თინეფიშ მიმართ ძალიერ ჸოროფას გიმიფრჩქინანთ დო მუთ არძაშ უმოს მნიშვნელოვან რე, თეშნერ მოქმედებათ ვოძირანთ, ნამდა მოკონა, გურ გუხარათ იეჰოვას. w23.11 11, 12 ¶13-15

მეფე იოშია 26 წანერ რდჷ, მუჟამსით იეჰოვაშ ტაძარიშ აღდგენაშ საქმეს ქეშუდირთჷ. თე დროს მღვდელმთავარ ხილკიაქ ქოძირ იეჰოვაშ კანონიშ წიგნ, ნამუთ მოსექ ისრაელეფს მეჩჷ. მუჟამსით მეფექ თექ ენოჭარილ სიტყვეფ ქიმირჩქილუ, ხეთეშე გინოჭყვიდ, გაკეთკო ირფელ, მუთ საჭირო რდჷ დო კილ-კილშა მიაჸუნკო თის, მუთ კანონიშ წიგნის ინოჭარუდ (2 მატ. 34:14, 18—21). ქოიღნანო ბიბლიაშ რეგულარულო კითხირიშ სურვილ? თეს ქართუთ-და, ქუმორწონანო თე პროცეს? ქიმკიწონენთო თი ბიბლიურ მუხლის, ნამდგაქ შილებე პირადო თქვა მიგეხვარან? მუჟამსით იოშია 39 წანერ რდჷ, თიცალ შეცდომა დუშვჷ, მუდგათ ღურა ქუმუღ მუშ დუდის. თიშ მანგიორო, ნამდა იეჰოვას ქოთხუკო ხემძღვანელობა, მუშ დუდის მიენდჷ (2 მატ. 35:20—25). მუს ბგურაფლენთ თავრეშე? ვა უღჷ მნიშვნელობა, მუ ასაკის ვორეთ დო მუსხი წანა რე, ბიბლიას იბრკვიენთ, ირიათო იეჰოვა ოკო ბგორათ დო თიშა ვორდათ დაიმენდებულ. თეშო საჭირო რე, იეჰოვას რეგულარულო ფთხუათ ლოცვას ხემძღვანელობა, გეგმიბრკვიათ თიშ სიტყვა დო გეფთვალისწინათ რჩევეფ, ნამდგას მოწიფულ თანაქრისტიანეფ მარზენა. თეს გუვაკეთენთ-და, ბედნერეფ იპჸუაფუთ დო ნაკლებ იჸი თიშ შანს, ნამდა მუდგაინს სერიოზულო მეფჩირთათ (იაკ. 1:25). w23.09 12 ¶15, 16

ბიბლიას მოშინაფილ რე ბრელ თიცალ ართგურ ოსურკათა, მიდგას უჸორდჷ იეჰოვა დო ომსახურუდ თის. თინეფ რდეს „ზომიერეფ დო ირნერო ართგურეფ“ (1 ტიმ. 3:11). მარა ახალგაზრგა დალეფს მუნეფიშ კრებეფს ხოლო შეულებნა ძირან სულიერო მოწიფულ დალეფ, მიდგაშეთ ბრელ მუდგარენიშ გურაფა შეიალებენა. ახალგაზრდა დალეფ, გეგშეგორით სულიერო მოწიფულ მუსხირენ და, მიდგაშ მაგალითის მიაჸუნუთ. ქიდეკვირით თინეფიშ ძვირფას თვისებეფს დო დეფიქრით, თქვა მუჭო შეილებნა თინეფიშ გიმორჩქინა. თანდაბალ და, მიდგას უჸორს იეჰოვა, ირიათო ომორჩილ დო მეჸუნს ღორონთიშ დოდგინელ მეთაურობაშ პრინციპის, მუჭოთ კრებას თეშ ოჯახის ხოლო (1 კორ. 11:3). w23.12 18, 19 ¶3-5

იეჰოვა ქომონჯშე ითხინს, ნამდა უჸორდას მუშ ოსურ დო იზრუნას თიშ ფიზიკურ, ემოციურ დო სულიერ საჭიროებეფშო. თი თვისებეფ დო უნარეფ, ნამუთ თე სტატიას გუვარჩით, მუნერით რე, სწორას აზროვნებაშ უნარ, ოსურკათაშ პატიცემა დო სანდოობა, მიგეხვარებნა, რდათ ჯგირ ქომონჯ. დაქორწინებაშ უკულ, შილებე სქუალეფქ ქუგაშუან. იეჰოვაშ მაგალით მიგეხვარებნა, რდათ ჯგირ მუმა (ეფეს. 6:4). თინა ირიათო ურაგადუდ იესოს, ნამდა უჸორდჷ დო იწონუანდჷ თის (მათ. 3:17). თქვა ხოლო სქუა ქუგაჸვენუნან-და, ხშირას ქუწით თის, ნამდა გიჸორა დო ქაცქვეთ, მუჟამსით ჯგირო ქიმიქციებ. იეჰოვაშ მაგალითიშ მეჸუნათ მეხვარებუთ სქუას, გინირთას სულიერო მოწიფულ ქრისტიანო. მუჭო შეილებნა ამდღარშე მემზადათ თიშო, ნამდა მომავალს რდათ ჯგირ მუმა? თეშ მიოჭირნაფალო ჯგირ იჸუაფ, ოჯახის დო კრებას გეგმოხანტათ ჸოროფა შხვეფიშ მიმართ დო ქაცქუათ თინეფს (იოან. 15:9). w23.12 28, 29 ¶17, 18

შხვეფცალო, იეჰოვაშ ართგურ მსახურეფ ხოლო ფხვადუთ სირთულეეფს დო იბლახებუთ. თეს გეძინელ, შილებე შეფხვადათ წინააღმდეგობას ვარდა თხოზინს თინეფშე, მიდგას ჯოგჷ ღორონთიშ ხალხ. მართალ რე, იეჰოვა ვემოჩილითუანა თეცალ სირთულეეფს, მარა მოპირუნა, ნამდა ქიმმეხვარებუნა (ეს. 41:10). თიშ მოხვარათ შემალებენა, ვა ვოდინუათ ხიოლ, მიბღათ გონივრულ გადაწყვეტილებეფ დო არძაშ უმოს რთულ სიტუაციეფს ხოლო ართგურეფქ ქუდოფსქიდათ. იეჰოვა მოპირუნა, ნამდა ქომჩანა „ღორონთიშ მშვიდობას“ (ფილ. 4:​6, 7). თე მშვიდობას იგულისხმებ სიმშვიდე, ნამდგას ხვალე ღორონთწკუმა ხოლოშიან ურთიერთობაშ შედეგო ბღებულენთ. თინა „ნებისმიერ აზრშე უმოს რე“. ჩქი ბოლოშა ხოლო ვენვანჭუთ, მუ სარკო რე ღორონთიშ მშვიდობა. დღას ქუნორღვენანო თიცალ შემთხვევა, მუჟამსით მთელ გურით ლოცულენდით დო ხეთეშე ქიგინით, მუჭო დეგემშვიდეს დო ეგექექეს გურქ? ზუსტას თენა რე ღორონთიშ მშვიდობა. w24.01 20 ¶2; 21 ¶4

ღორონთიშ ჸოროფა გინაჭყვიდირაფუანს მუშ მსახურეფს, განადიდან ზეციერ მუმაშ სახელ. დავითის არჩქილედ, ნამდა იეჰოვაშ სახელიშ განდიდება თიშ განდიდებას ნიშნენდჷ. მუჟამსით სახელ იეჰოვას გებგონენთ, ჩქინ გონებაშა მოურს პიროვნება, მით თე სახელიშ უკახალე გერე, თიშ ძვირფას თვისებეფ დო დიდებულ საქმეეფ. დავითშო ზეციერ მუმა წმინდა რდჷ დო ოკოდ, შურ დო გურით განადიდუკო თინა. ლევიანეფ ხოლო, მიდგას ცხოვრება იეჰოვაშ განდიდებაშა აფუდეს მეძღვინელ, თანდაბლურო აღიარენდეს, ნამდა სიტყვეფ ვა უბაღუდეს, იეჰოვაშ სახელ თეშ განადიდესკო, მუჭოთ იმსახურენდჷ (ნეემ. 9:5). დარწმუნებულ ვორეთ, თეცალ თანდაბლურო დო შურ დო გურით რაგადებულ განსადიდებელ სიტყვეფ გურს უხარენდჷ იეჰოვას. w24.02 9 ¶6

იეჰოვაშ თოლს დამარცხებულ რეთ, მუჟამსით თი მიზანშა ვემგაჭირინეს, ნამუთ თქვანო არარეალურ რდჷ (2 კორ. 8:12). იფიქრით თიშე, მუდგას უკვე მიოჭირინეთ. ბიბლია იჩიებ: „ღორონთ უსამართლო ვა რე, ნამდა გიჭყოლიდუას . . . თქვან ხანდა“ (ებრ. 6:10). ათეშენ, თქვა ხოლო ვეგიჭყოლიდუათ თინა, მუდგას მიოჭირინეთ. დეფიქრით, თქვა შეგალებეს იეჰოვაწკუმა მეგობრულ ურთიერთობაშ გავითარებაქ, თიშ გურშენ შხვეფწკუმა ჩიებაქ დო ნათუაქ. მუჭოთ ულირს შეგალებეს თქვან სულიერ მიზნეფიშ მენჭირნაფაქ, თეშ ანწ ხოლო შეგალებენა თეშ კეთება. თეშნერო, ჩქინდა ხიოლ ხვალე მიზანიშ მენჭირნაფას ვარინ, თის ხოლო მოუღ, მუჭო მოხვარნა დო მაკურთხენა იეჰოვა ონდო თე მიზანშა იმჭუაფუთ (2 კორ. 4:7). სულიერ მიზნეფიშ მიოჭირნაფალო ირფელს გაკეთენთ-და, ხოლო უმოს კურთხევეფს მიღენთ (გალ. 6:9). w23.05 31 ¶16-18

იეჰოვას უჸორს გრძნობეფიშ გიმოხანტუა დო ოგინაფუანს მუშ ხალხის, ნამდა გურს უხარენა თის. ბიბლიას ჟირ შემთხვევა რე მოჩამილ, სოდეთ იეჰოვა იესოს ურაგად, ნამდა თინა რე მუშ საჸოროფო სქუა, ნამუთ მიწონუ (მათ. 3:17; 17:5). თქვა ხოლო გოკონანო, პირადო იეჰოვაშე „ქიმირჩქილუათ“, ნამდა გიწონუანა? მართალ რე, იეჰოვა ზეცაშე ვეგთქგოძახანა, მარა თიშ ხონარიშ გაგება ბიბლიაშე შეილებუნა. თეშ საშვალება მიღუნა, მუჟამსით სახარებეფს ენოჭარილ იესოშ სიტყვეფს ბკითხულენთ. იესო სრულყოფილო გიმირჩქინანდჷ მუამუშიშ თვისებეფს. ათეშენ, მუჟამსით ბკითხულენთ, მუჭო იწონუანდჷ იესო მუშ ართგურ მიმაჸუნალეფს, მით არასრულყოფილეფ რდესჷ, შემლებუნა წერმიბდგინათ, ნამდა იეჰოვა თე სიტყვეფს ჩქი მირაგადუნა (იოან. 15:​9, 15). სირთულეეფ მიღუნან ენა ვა ნიშნენს, ნამდა იეჰოვაშ მოწონა მივოდინეთ. სინამდვილეს, სირთულეეფიშ დროს საშვალება მერზიებუნა, ქუვოძირუათ იეჰოვას, მუჭო მიჸორა დო ვონდუთ (იაკ. 1:12). w24.03 28 ¶10, 11