Kijan ou pé sèten ou ka fè Jéova plézi ?

1. Ki lidé sèwten sèwvitè a Jéova ka mèt an tèt a yo défwa ?

A SÈLMAN, sa ka rasiré-nou dè sav kè Jéova kontan toutmoun adan pèp a-y ! Bib-la ka di : « Jéova enmé pèp a-y » (Sòm 149:4). Kanmenmsa, désèwten adan nou tèlman dékourajé, kifè yo ka mandé-yo : « Men é mwen, ès Jéova enmé-mwen ? » An tan lontan, onlo sèwvitè a Jéova ki té fidèl té ni dimal a kwè kè Jéova té kontan-yo (1 Sam. 1:6-10 ; Jòb 29:2, 4 ; Sòm 51:11).

2. Kimoun ki ni favè a Jéova ?

² Labib ka montré on mannyè ki klè kè menmsi nou enpawfè, nou pé ni favè a Bondyé. Kijan sa posib ? Fò nou montré nou ni fwa an Jézi é fò nou pran lèbatèm (Jan 3:16). Lè nou ka pran lèbatèm, nou ka montré toutmoun kè nou rèpanti-nou é kè nou pwomèt Bondyé kè nou ké fè volonté a-y (Akt 2:38 ; 3:19). Jéova kontan toubònman lè i ka vwè tout sé éfò-la nou ka fè la pou vin bon bon zanmi èvè-y. Toutotan nou ka kontinyé ba-y sa nou ni dè méyè pou tchenbé pwomès an-nou, nou ka rété bon bon zanmi èvè Jéova é nou ka fè-y plézi (Sòm 25:14).

3. Ka nou ké vwè adan awtik-lasa ?

³ Magrésa, poukwa sèwten ni lenprésyon kè yo pa ni favè a Bondyé ? Kijan Jéova ka montré kè i kontan-nou ? Kijan on krétyen pé sèten i ni favè a Bondyé ?

POUKWA SÈWTEN NI LENPRÉSYON KÈ YO PA NI FAVÈ A BONDYÉ

4-5. Menmsi ou ni tandans a kwè ou pa ni valè, dè ki biten ou pé sèten ?

⁴ Dépi yo toupiti, onlo adan nou ni tandans a kwè kè yo pa ni pon valè (Sòm 88:15). Mi sa on frè non a-y sé Adrián ka di : « An toujou mèt an tèt an mwen an sé on zéwo douvan on chif. Lè an té timoun, an té ka priyé pou fanmi an mwen viv an paradi-la, men pou mwen, an pa té mérité sa. » Tony li pa grandi adan on fanmi ki té Témwen ; mi sa i ka di : « Fanmi an mwen pa janmen di-mwen kè yo té enmé-mwen oben kè yo té fyèw dè mwen. An fin pa kwè kè an pa té alahotè. »

⁵ Si ou mèt an tèt a-w kè ou pa vo ayen, sonjé sé Jéova limenm ki atiré-w owa a-y (Jan 6:44). I ka vwè bèl kalité kè ou ni é kè pétèt voumenm pa’a vwè, é i sav kimoun ou yé vréman (1 Sam. 16:7 ; 2 Kron. 6:30). Alò ou pé kwè-y a san pou san lè i ka di kè ou ni onlo valè pou-y (1 Jan 3:19, 20).

6. Ka lapòt Pòl té ka pansé dè limenm ?

⁶ Avan yo té konnèt lavérité, sèwten adan nou fè dé biten ki pa té bon, kifè, jousalè, yo ka santi-yo koupab (1 Pyè 4:3). Tin dòt, menmsi yo ka sèvi Jéova fidèlman, fò yo goumé èvè défo yo ni. É-w menm, ès dépawfwa ou ka kwè ou pa’a mérité padon a Jéova ? Si sé sa, a pa-w tousèl, onlo sèwvitè a Jéova ki té ka sèvi-y fidèlman té ka pansé menm biten. Pa ègzanp, lapòt Pòl ni lokazyon di « pòv boug ki an yé » pou palé dè-y é dè défo a-y (Wom. 7:24). Sé vré, i rèpanti-y dè péché a-y é i pran lèbatèm. Men, magrésa i té ka di kè ‘pawmi sé apòt-la sé-y ki té pli piti’ é ‘sé-y ki té prèmyé pawmi moun ki péché’ (1 Kor. 15:9 ; 1 Tim. 1:15).

7. Ka fò nou sonjé anrapò èvè péché kè nou fè avan ?

⁷ Pap’an nou ki an syèl-la ka pwomèt kè si nou ka rèpanti-nou, i ké padonné-nou (Sòm 86:5). Donk, si ou ka règrété sé péché-la ou ni lokazyon fè la dan lèpasé, ou pé fè Jéova konfyans zyé-fèmé : i ja padonné-w (Kol. 2:13).

8-9. Si dapré-w ou pé’é jen fè asé pou ni favè a Jéova, kijan ou pé rivé about a lidé-lasa ?

⁸ Noutout nou vlé fè tousa nou pé pou nou sèvi Jéova. Men pétèt nou ka di-nou kè nou pé’é jen fè asé pou ni favè a Jéova. Mi sa on sè non a-y sé Amanda di : « An toujou pansé kè pou an ba Jéova sa an ni dè méyè, fò an toujou chèché a fè plis ki sa an ja ka fè. Alò, souvan an ka touvé-mwen ka vlé fè plis ki sa an pé fè vréman. Kifè lè an pa’a rivé, sa ka désèvwa-mwen, é dapré mwen sa ka désèvwa Jéova osi. »

⁹ Si pou vou, ou pé’é jen fè asé pou fè Jéova plézi, kijan ou pé rivé about a lidé-lasa ? Sonjé Jéova sé on Bondyé ki rézonab. I pé’é jen mandé-w fè plis ki sa ou pé fè vréman. Kèlkèswa sa nou ka fè an sèwvis a-y, toutotan nou ka ba-y sa nou ni dè méyè, i kontan. Alò pran tan réfléchi asi sèwvitè a Jéova an tan a Labib ki sèvi-y èvè tout tchè a yo. Gay lapòt Pòl pa ègzanp. Pannan lanné é lanné i pòté bon mannèv, i fè milyé é milyé kilomèt é i fòwmé onpakèt lasanblé. Men lè sitiyasyon a-y chanjé, é kè i pa té ni mwayen préché afon kon avan, ès sa vlé di i pa té ni favè a Bondyé ankò ? Anponjan ! I kontinyé fè sa i té pé é Jéova béni-y (Akt 28:30, 31). Menmjan la, sa ou pé ba Jéova jòdla, pétèt dèmen ou pé’é pé ba-y li ankò. Men sa ki enpòwtan pou-y, sé poukwa ou ka fè-y. Alèla, an-nou vwè plizyè mannyè Jéova ka montré kè i kontan-nou.

KIJAN JÉOVA KA MONTRÉ KÈ I KONTAN-NOU ?

10. Kijan ou pé « tann » Jéova di-w kè i kontan-w ? (Jan 16:27).

¹⁰ Pa mwayen a Labib. Lè Jéova enmé on moun, i ka montré moun-lasa kè i kontan-y é i ka pran plézi fè sa. Jéova ni lokazyon di Gason a-y Jézi kè i té enmé-y é kè i té ka fè-y plézi é i fè sa a 2 rèpriz (Mat. 3:17 ; 17:5). Ès ou té’é enmé tann Jéova di-w kè i kontan-w ? Ou pé ké tann on vwa sòti an syèl pou palé ba-w, men Jéova ka palé ba-w pa mwayen a Pawòl a-y Labib. Ou pé ‘tann-li’ ka di-w kè i kontan-w lè ou ka li sa Jézi di adan Lézévanjil (li Jan 16:27). Jézi té ka imité pèwsonalité a Pap’a-y on mannyè ki pawfè. Kifè, plizyè fwa, i ni lokazyon di disip a-y ki té fidèl kè i té enmé-yo é kè i té kontan-yo menmsi yo té enpawfè. Lè ou ka li an Bib-la sa Jézi di disip a-y, sé konsi Jéova ka di-w sé pawòl-lasa (Jan 15:9, 15).

11. A pa pas ou ka jwenn éprèv sa vlé di kè ou pa ni favè a Jéova. Poukwa nou ka di sa ? (Jak 1:12).

¹¹ Adan sa i ka fè. Jéova anvi édé-nou. I ka montré sa pa ègzanp lè i ka ban-nou sa nou bizwen pou viv. Men dépawfwa, i pé pèwmèt kè nou jwenn éprèv, menmjan i pèwmèt sa pou Jòb (Jòb 1:8-11). Alò vinvwè ou jwenn on bout-rèd, ès sa vé di kè ou pèd favè a Jéova ? Awa, fò ou vwè sa pito kon on lokazyon dè montré-y kè ou enmé-y fò é kè ou ka fè-y konfyans (li Jak 1:12). Anplisdisa, sa ka ba-w lokazyon vwè kijan Jéova enmé-w é kijan i ka soutyenn-vou.

12. Ka ègzanp a Dmitri ka aprann-vou ?

¹² Gadé sa ki rivé Dmitri, on frè ki ka rété an Azi. I pèd travay a-y, é bon enpé mwa pasé avan i touvé ondòt. Alò pannansitan, pou montré Jéova kè i té ka fè-y konfyans, i désidé pasé plis tan ka préché. Plizyè mwa pasé men i pa té ka touvé travay. Aprésa i tonbé malad bon malad la é i té oblijé rété kouché. I koumansé mèt an tèt a-y kè i pa té on bon mari, é kè i pa té on bon papa é kè i té pèd favè a Jéova. Épi on jouswa, tifi a-y enprimé tèks a Izayi 30:15 asi on fèy-papyé. Vèwsé-lasa ka di : « Si zò rété kalm é si zò ni konfyans, sé sa ki ké fòs a zòt. » I menné-y ba-y an kouch a-y é i di-y : « Papa, lè ou pa’a santi-w byen, sonjé ti vèwsé-lasa. » É a moman-lasa, Dmitri réyalizé kè Jéova toujou fè ansòt pou fanmi a-y ni on dèkwa pou yo manjé, ni lenj pou yo mèt anlè yo é ni on twa anlè tèt a yo. Mi sa Dmitri ka di : « Sèl biten an té ni a fè sé té rété kalm é kontinyé fè Bondyé an mwen konfyans. » Si ou ka fasadé èvè on sitiyasyon kon ta Dmitri, ou pé sèten Jéova ka sousyé-y dè-w é kè i ké édé-w andiré.

13. Èvè kimoun Jéova ka sèvi pou fè-nou sav kè i enmé-nou, é kijan i ka fè sa ?

¹³ Pa mwayen a frè é sè an nou. Jéova ka sèvi èvè frè é sè an nou pou montré-nou kè i enmé-nou. Pa ègzanp, i pé itilizé-yo pou di-nou on ti pawòl ankourajan ki ka tonbé tèk. Sé sa on sè ki ka rété an Azi konstaté. I pèd travay a-y é i tonbé malad oséryé. Aprésa mari a-y fè on péché grav, kifè i pa té ansyen ankò. Mi sa sè-la ka di : « An pa té ka rivé konprann poukwa tousa biten té ka rivé-mwen. Pou mwen, an té fè on mové biten é Bondyé pa té kontan-mwen ankò. » I sipliyé Jéova pou Jéova pé sa rasiré-y. Kijan Jéova réponn-li ? Mi sa i èspliké : « Sé ansyen a lasanblé-la palé ban mwen é yo fan’an vwè kè Jéova té enmé-mwen toujou. » Déotwa tan apré i woumandé Jéova édé-y. Mi sa i ka rakonté : « Menmjou-la, an rèsèvwa on lèt déotwa frè é sè a lasanblé-la té maké pou mwen. Pli an té ka li lèt-lasa, pli an té sèten Jéova té tann-mwen. » É sé vré, souvantfwa Jéova ka sèvi èvè sèwvitè a-y pou fè-nou sav kè nou ni favè a-y (Sòm 10:17).

14. Ki dòt mannyè Jéova ka montré-nou kè i enmé-nou ?

¹⁴ Ondòt mannyè Jéova ka montré kè nou ni favè a-y, sé lè i ka sèvi èvè dòt krétyen pou ban-nou konsèy lè sa nésésè. O prèmyé syèk pa ègzanp, Jéova sèvi èvè lapòt Pòl pou maké 14 lèt ba sé lasanblé-la. Adan sé lèt-lasa, tin dé konsèy ki dirèk men ki plen lanmou osi. Poukwa Jéova fè lapòt Pòl maké sé konsèy-lasa ? Jéova sé on bon Papa, é i ka korijé timoun a-y kè i enmé (Pwov. 3:11, 12). Alò si yo ba-w on konsèy bazé si Labib, fò pa ou vwè sa konsi Jéova kòlè èvè-w, men sé plito on prèv ki ka montré kè Jéova enmé-w (Ébr. 12:6). Ki dòt prèv kè nou ni kè Jéova kontan-nou ?

DÒT PRÈV KI KA MONTRÉ KÈ JÉOVA KONTAN-NOU

15. Kimoun Jéova ka bay lèspri sen a-y, é poukwa sé on lidé ki ka rasiré-nou ?

¹⁵ Jéova ka ba moun ki ni favè a-y lèspri sen a-y (Mat. 12:18). Mandé-w : « Ès adan vi an mwen, an ka montré an ni sèwten kalité ki adan fwi a lèspri a Bondyé ? » Pa ègzanp, pétèt ou rèmawké kè ou ka pran plis pasyans èvè lézòt dépi ou konnèt Jéova. An réyalité, lè ou ni sèwten kalité ki adan fwi a lèspri a Bondyé, sa ka montré lèspri sen ka aji anlè-w é sé laprèv kè ou ni favè a Bondyé ! (gadé ti karé-la : « Fwi a lèspri sé . . .»).

16. Kimoun Jéova bay rèsponsabilité dè préché bon nouvèl-la, é lè ou ka réfléchi asi sa ka ou ka rèsanti ? (1 Tésalonisyen 2:4).

¹⁶ Jéova ka ba moun ki ni favè a-y on bèl rèsponsabilité : préché bon nouvèl-la (li 1 Tésalonisyen 2:4). An-nou vwè kijan Jocelyn, on sè an nou ki ka préché bon nouvèl-la, vin sèten dè sa. On jou, Jocelyn lévé é moral a-y té a zéwo. Mi sa i ka rakonté : « An pa té ni pon fòs é an té ka santi-mwen kon on manb initil. Men konm an té pyonyé, an té prévwa préché jou-lasa. Alò an fè on priyè é an ay préché. » Joumaten-lasa i jwenn èvè Mari, on ti madanm byen janti ki aksèpté étidyé Labib èvè-y. Détwa mwa apré, Mari fè-y sav kè sé priyé i té ka priyé Bondyé pou édé-y lè Jocelyn vin kongné asi pòt a-y. Lè Jocelyn vin sav sa, ka i rèsanti ? Mi sa i ka di : « Sé konsi Jéova té ka di-mwen “ou ni favè an mwen.” » Konfèdmanti, a pa toutmoun ki ké aksèpté mésaj-la nou ka préché-la. Men ou pé sèten kè Jéova kontan lè i ka vwè-w ka fè tousa ou pé pou préché bon nouvèl-la.

17. Ka sa Vicky di anrapò èvè laranson ka aprann-vou ? (Sòm 5:12).

¹⁷ Jéova ka padonné péché a moun ki ni favè a-y grasa ranson-la (1 Tim. 2:5, 6). Men pétèt ou ni dimal a kwè kè ou ni favè a Jéova, alòskè ou ni fwa adan ranson-la é kè ou ja batizé. Adan ka-lasa ka ou pé fè ? Sonjé, a pa toutlè nou pé fè sa nou ka rèsanti konfyans. Pawkont nou pé fè Jéova konfyans toutlè. Pou-y, dépi nou ni fwa an laranson, nou sé dé moun ki jis é i ka pwomèt i ké béni-nou (li Sòm 5:12 ; Wom. 3:26). Davwa Vicky pran tan réfléchi asi ranson-la, sa édé-y onlo. Mi sa i ka èspliké : « An rann-mwen kont kè Jéova aji èvè pasyans èvè mwen toubònman. Avan sa, sé konsi an té ka di Jéova “ou pé pa enmé on moun kon mwen, pa ni mwayen sakrifis a Gason a-w kouvè péché an mwen.” » Lè i pran tan réfléchi asi laranson, bèl kado-la Jéova fè-nou la, sé prèmyé fwa i rèsanti lanmou a Jéova konsa. Vou osi, si ou ka pran on tan pou réfléchi asi ranson-la, ou ké pé santi kè Jéova enmé-w é kè ou ni favè a-y.

18. Dè ki biten nou pé sèten si nou ka kontinyé enmé Pap’an-nou ki an syèl-la ?

¹⁸ Menmsi ou ka fè bon éfò pou mèt sé lidé-la nou vwè adan awtik-lasa an pratik, délè ou ké santi-w dékourajé é ou ké mandé-w ès ou ni favè a Jéova. Adan ka-lasa, sonjé i ka ba « moun ki ka kontinyé enmé-y » favè a-y (Jak 1:12). Alò kontinyé rété toupré Jéova é rété véyatif pou vwè kijan i ka montré-w ou ni favè a-y. É pou fin, pa jen oubliyé kè Jéova « pa lwen a ponyonn adan nou » (Akt 17:27).