Amukashtatna nu nakasar pujuartai

1. Jesús ni unuiniamuri armiania nuna Jerusalén urukattawai timia?

Jesús jakatin ishichik ajas ni unuiniamuri armiania nuna ukunmatai turunatniun ujakarmiayi. Jesús timiania nuka Jerusalén tura Yuus enentaimtutai jea amiania nu emesnararmiania nui uminkiamiayi. Jesús ni unuimiamurin junis timiayi “Ju̱ pepru Jerusaréṉka a̱a̱ tanishri̱i̱n suntar téntakar matsatu wáinkiurmeka emesratin jeá nekaattarme” tu timiayi (Ruk. 21:20). Ainis nankaamakuinkia nuyanka warik pisara wetarum timiayi. Jesús timiania nuka Romanmaya suntar Jerusalenkan tentakarmiania nui uminkiamiayi (Ruk. 21:​21, 22).

2. Kristu aents Judeanam tura Jerusalennum pujuarmiania nuna Pablo waritmia?

² Romanmaya suntar Jerusalenkan tentakartin ishichik uwi ajasmanum Pablo Jerusalennum tura Judeanam Kristu aents pujuinian papiin aatar akuptukarmiayi. Nu papiin Pablo aarmiania nuka Hebreos papiiyaiti. Jerusalén emesnartin asamtai iwiarnarar pujuarat tusa nu papiin aar akuptukarmiayi. Nu nunkanmaya Kristu aents armiania nuka jakaij tuiniakka ni jeencha tura surutain takuarmiania nunasha ikiukiar pisarartiniuyayi. Pablo Jerusalenkan junis timiayi: “Kame ju̱ nuṉkanam amukachmin pepru atsawai. Antsu ukunam ti shiir pepru átatna nu nákaji” tu timiayi (Isr. 13:14).

3. Wari amukashtinia nakasar pujaj?

³ Kristu aents Jerusalennum tura Judeanam pujuarmiania nu pisarar wearu asarmatai wishikcharmiashia tumaitkiusha Kristu aentska ainis turawaru asar jakacharmiayi. Yamaiya juisha kuit ikiaunkatin enentaimtachu asakrin tura itiurchatan iwiararat tusar yaksha anaikiatin enentaimtichu asakrin wishikramin ainiaji. Iikia yamai irunna nuka amukatniuana nu nekaji antsu Yuus anaikiamu warinkish iwiarattana nuka amukashtin asamtai nakasar pujaji (Isr. 11:10; Mat. 6:33). Ju unuimiateamunmanka hebreo aents Kristu aents armiania nuna chicharkarmiania nu unuimiatrattaji. Ukunmatai atiniuyania nuka amukashtin asamtai nakasar pujuartinniasha tura Jerusalén emesnakui jakaij tusar iwiarnartinniasha itiura yainkiarmia nuna nekaattaji. Tura nuyasha iisha ni turawarmiania aitkiasrik turatai tusar wari turamniaitiaj nusha nekaattaji.

JEHOVAKA PENKE INIAITIAMSASHTATJI TU ENENTAIMSARTAI

4. Kristu aentscha Jerusalenkan urukamtaiya shiir enentaimtin armia?

⁴ Kristu aentscha Jerusalenkan urukamtaiya shiir enentaimtin armia? 33 uwitin emka Kristu aents ajasarmiania nuka Jerusalennumia armiayi tuma asamtai Kristu aentsnaka Jerusalenkan shiir enentaimtiarmiayi. Yaunchuk Kristu aentsun wainkiartasa irunturar chichamprin armiania nu nui pujuarmiayi. Tura aintsan Kristu aentska nui ni jeen tura warinkisha nukap takuarmiayi. Aintsaitkiuisha Jesuska nin nemarin armiania nunaka Jerusalennumianka tura Judeanmayasha nuyanka jinki wetiniaitrume tu timiayi (Mat. 24:16).

5. Kristu aents anearar pujusarat tusa Pablo waritmia?

⁵ Pablo Kristu aentska Jerusalennumia pisartaj tusar iwiarnarar pujuarat tusa wakerimiayi.Tuma asa sacerdote armiania nu Yuusan suaji tusar Yuus enentaimtutai jeanam warinkisha aesainiana nunaka Jehová penker iiyatsui tusa Pablo Kristu aents armiania nuna ujakarmiayi (Isr. 8:13). Tura Jerusalennum matsamiarmiania nuka Jesusan nakitrarusha iruniarmiayi. Ainis asamtai Yuus enentaimtutai jeanka Jehovan enentaimtustai tusar aentska nui wechartiniuyayi nuyasha nu jeaka emesnartiniuyayi (Ruk. 13:​34, 35).

6. Israernum 13:​5, 6 nui Pablo timiania nunasha urukamtain ainis timia?

⁶ Pablo Kristu aents hebreo armiania nuna aatramiania nuinkia Jerusalennumka warinkisha suruinia asarmatai nuinkia nukap kuit amiayi. Romanmaya aents papiin ain Jerusalenka tui tuinsha nekaamuiti tu timiayi. Judío aents chikich irutkamunmayasha Yuusan enentaimtuiniak nampermatai tusar Jerusalennum kaun wearmiayi. Chikich irutkamunmaya Jerusalennum tainiak warinkisha sumainia asarmatai Jerusalennumka kuit amiayi. Ainis asamtai Kristu aents kuitian takakainiasha irunmiayi. Tuma asamtai Pablo junis timiayi: Aya kuitiak enentaimtusrum pujusairap takakearmena nujain warasrum pujustarum Pablo tu timiayi. Tura junasha timiayi: Yuuska kanakchattajai tura penke ikiukchattajrume turamprume tu timiayi (Israernum 13:​5, 6 aujsata; Muis. 31:6; YKan. 118:6). Kristu aents Jerusalennum tura Judeanam matsamiarmiania nuka arusan ni jeencha tura surutairincha tura warinkish takuarmiania nuna ikiukiartiniuyayi. Tuma asamtai Pablo timiania nuka anearar pujustinian yainkiarmiayi. Jerusalennumianka pisarar aran wearu asar aya junik pujuartiniuyayi.

7. Jehová nekas yainkiattawai urukamtaiya ainis tuke enentaimsatniuitiaj?

⁷ Iisha ju nekatniuitji: Ti waitsatin tsawan jeakui uwempramij tusar yaunchunia Kristu aents itiur pujuarmia aitkiasrik iisha iwiarnarar tura anearar pujutniuitji (Ruk. 21:​34-36; Mat. 24:21). Jehovaka penkesha ikiurkishtatui tu enentaimiu asar warinkisha takakma ikiuktiatjiash tumainti. Ti waitsatin tsawan jeamtai jeashmanman junis animiastiniaitji: Wi najaneajna nujain kuitniaka imiankaska enentaimtatsjana nu antsu Jehová yainkiattawai tu enentaimiajna nu paantashit? (1 Ti. 6:17). Yaunchuk Kristu aents pujuarmiania nui nankaamasmiania nuka ukunmatai turunattana nui nu jeatsain iwiarnarar pujustinian yainmakminiaitji. Tumaitkiusha ti waitsatin tsawan atatna nuinkia ti itiurchat nankaamastatji. Ainis nankaamakui wari turattaj nusha itiur nekamniaitiaj?

UUNTRI ANAIKIAMU AINIANA NU UMIRKARTAI

8. Jesussha ni unuiniamuri armiania nuna wari turatarum tiniuya?

⁸ Pablo Hebreos papiin aarmiania nui arusan Romanmaya suntar Jerusalenkan tentakarmiayi. Ainis turunamtai Kristu aentska Jerusalén emesnartiniuyania nuna paant nekaawar nuyainianka pisarar wearmiayi (Mat. 24:3; Ruk. 21:​20, 24). Tumaitkiusha tuin pisarartiniuya? Jesuska nainniumani pisartarum tu tiniuyayi (Ruk. 21:21). Nukap nain irunea asamtai tu nainniuman pisarartin armia?

9. Urukamtain Kristu aentscha tuin pisartaj tu enentaimsarmia? (Mapasha iista).

⁹ Kristu aentska Samarianam nain irunmiania nui turutskesha Galilea nain irunmiania nui nuyanchuka Hermón nainnium tura aintsan Líbano nunkanam nain irunmiania nuinsha nuyasha Jordán entsa awini nain irunmiania nuinsha pisarar wearminiuyayi (mapa iista). Nain nukap irunu asar pisarar uumkamnia irunmiayi. Gamala irutkamuka naintian peperka waruk pakanam nui amiayi, nu irutkamunka yupichuch yaksha enkemtuachminiuyayi. Ainis asamtai nui pisarar uumumniaitji judío aents tu enentaimiainiasha irunmiayi tumaitkiusha Romanmaya suntarka Gamala irutkamun enkemtuawar nui pujuinianka maawarmiayi.a

10, 11. a) Kristu aents tui pisarartiniuya nunasha Jehová itiurkan ujakarmia? (Israernum 13:​7, 17). b) Kristu aents umikiaru asar urukawarmia? (Nakumkamusha iista).

¹⁰ Tui pisarartiniuya nunasha Kristu aentscha itiur nekaawarmia? Kristu aentsun wainiarmiania nuna Jehová ujakarmiayash tumainti. Aents unuimiaru Eusebio naartin junis timiayi: Kristu aentska Jerusalén emesnartin asamtai Pela irutkamunam pisarar wearat tusa Kristu aentsun wainin armiania nuna Yuus ujakarmiayash tumainti tu timiayi. Pela irutkamuka Jerusalennumia tijiuchiyayi tuma asamtai nui pisarar warik jeawarminiuyayi. Pelanmaya aentska judío aentscha asar Romanmaya aentsnumia ankan ajastai tusar ninkia manicharmiayi (mapa iista).

¹¹ Kristu aents armiania nuna Kristu aentsun wainin ainiana nu umirkatarum Pablo tu timiayi (Israernum 13:​7, 17 aujsata). Pablo timiania nunaka umikiaruka nainnium pisararu asar jakacharmiayi. Kristu aentska Yuusa anaikiamurin nakainia asarmatai Jehovaka penker wainkiarmiayi (Heb. 11:10 TNM).

12, 13. Ti itiurchat amunmasha nin enentaimtuiniana nunasha Jehová penker wainkiartasa warinia turait?

¹² Iisha ju nekatniuitji: Yamaiya juisha wari itiurkatniuitiaj nunaka uuntri anairamu ainiana nujai Jehová ujatmaji. Jehovaka nin enentaimtin armiania nuna uwemtikrartaj tusa emtiki juarmiania nuna ujakarmiania nunanun aujmatu Yuusa chichamen aarma irunui (Muis. 31:23; YKan. 77:20).

¹³ COVID-19 nu sunkur ashi nunkanam ukaki weakui wari turatniuyaj nunaka Testigos de Jehová takatrin irunturar chichamprin ainiana nu turamiarmaji. Tura aintsan uuntri anairamu ainiana nuna ni yachi ni umain penker wainkiartasa warinia turawartiniait nunasha tiarmai. COVID-19 amania nui 500 chichamjai iniankasar uunt tuakma menaintiu tsawanna internetnumani televisionnumanisha tura radionmanisha iniankakmiayi. Nu sunkur amania nui Yuusa chichame unuimiatratniuka iniaisachmaji nu turakur iruntrar pujumji. Uruma nuisha Testigos de Jehová takatrin irunturar chichamprin ainia nuna tura uuntri anaikiamu ainiana nunasha penker enentaimsar turawarat tusa Jehová jintiawartatui. Iisha ti waitsatin tsawan atin asamtai iwiarnarar pujuttsar Jehová nekas yainkratniuitji tu enentaimiu asar ni tana nusha umirkatniuitji tura Jehová iruntramurin emtuki juiniana nusha umirkartiniaitji.

MAI ANENAI AJARTAI TURA TSANKASHA ARTAI

14. Jerusalén emesnartin ishichik ajasmanum Kristu aentscha uruku artiniuya? (Israernum 13:​1-3).

¹⁴ Yaunchunia Kristu aentska anenain armiayi (Isr. 10:​32-34). Tumaitkiusha Jerusalén emesnartin ishichik ajasmanumka nunasha iniankas anenaiyarmiayi tura ti tsanka armiayi (Israernum 13:​1-3 aujsata). Ti waitsatin tsawan atatna nui iisha aitkiasrik turattaji.

15. Kristu aentscha urukamtaiya tsanka artiniuya tura mai anenaisha ajartiniuya?

¹⁵ Romanmaya suntar Jerusalenkan tentakar pujuiniayat waketrarmatai Kristu aents nui pujuiniaka aya nekas utsumiartiniuyania nunak jukiar pisararmiayi (Mat. 24:​17, 18). Nainniumani pisarar wenak tura tui pujuawartiniuya nui jeawarsha mai yainiai ajartiniuyayi. Nui pujuiniaka warinkish utsumcharmiashia ainis asamtai Kristu aentska mai anenai mai yainiai ajartiniuyayi. Nuyasha warinkish takakmancha ajamnaisartin armiayi (Tit. 3:14).

16. Ii yachi ii umai anea asar wari turamniaitiaj? (Nakumkamusha iista).

¹⁶ Iisha ju nekatniuitji: Ii yachi ii umainkia anena asar warinkish utsumainiakui yainiaitji. Nukap ii yachi ii umai meset akui turutskesha warinkish nankaamasmatai ni takakmanka ikiukiar tuinsha wu ainiawai, ainis nankaamasarunka ii yachi ii umai warijiainsha yain ainiawai tura Yuusnum kakararat tusarsha yain ainiawai. Ii umai Ucranianmaya meset akui nuyainianka pisar wemiayi tura ni junis tawai: Jehová itiur yainmakuitiaj nu paant nekaaitji tura ninkia umar tura kaer ainiana nujaisha yainkratkaiti. Ucranianam tura Hungrianam pujumiajna nuisha ti nukap yainmakarmaji. Tura yamaisha Alemanianam pujajnia juisha ti nukap yainmainiaji tu tawai. Tsankaitkiurninkia ii yachi ii umai utsumainiana nuna yainkiat tusar Jehová utsutmakminiaitji (Neka. 19:17; 2 Kur. 1:​3, 4).

17. Yamainian uruku atiniaitiaj?

¹⁷ Yamaiya jui mai yainiai ajatin penkeraiti tumaitkiusha uruma nuisha nekaska mai yainiai ajatin iniaisashtiniaitji (Awa. 3:​16-18). Ti waitsatin tsawan atatna nuinkia tsankaitkiur tura mai anenai ajakur katsuntrattaji, ainis atinian Jehová yamainian jintintrameaji.

UKUNMATAISHA WARIN NANKAAMASAT?

18. Kristu aents Jerusalennumia pisarar wearmiania aitkiasrik iisha turatai tusar warinma enentaimsar pujutniuitiaj?

¹⁸ Kristu aents Jerusalennumia pisarar nainniumani wearmiania nuke uwemprarmiayi. Jerusalennumia jinkiarmiania nuisha Jehovaka ajapa iniaisacharmiayi. Uruma nui wari nankaamastata nuka mashikia nekatsji. Ainis asamtaisha Jesús iwiarnarum pujustarum tiniu asamtai iwiarnarar pujutniuitji (Ruk. 12:40). Nuyasha Pablo jintinkratamiania nusha kajinmatkishtiniaitji. Tura aintsan Jehová penkesha ikiukchattajrume timiania nuisha enentaimsatniuitji (Isr. 13:​5, 6). Yuusa anaikiamuri yaintin iniaisachartai nu turakrikia ju nunka shiiram ajasmanum warasar tuke pujuttaji (Mat. 25:34).