Aroma
12 Nĩ ũndũ ũcio ariũ a Ithe witũ, ndamũthaitha nĩ ũndũ wa tha cia Ngai, mũrute mĩĩrĩ yanyu ĩrĩ igongona rĩrĩ muoyo, itheru na rĩretĩkĩrĩka nĩ Ngai, ũguo nĩ kuuga mũrutage ũtungata mũtheru mũkĩhũthĩra ũhoti wanyu wa gwĩciria. 2 Na mũtige kwĩgerekanagia na andũ a mũtabarĩre ũyũ wa maũndũ,* ĩndĩ mũgarũrũke na njĩra ya kũgarũrĩra meciria manyu, nĩ getha mwĩmenyagĩre wendi ũrĩa mwagĩrĩru wa Ngai, mũkinyanĩru, na wa gwĩtĩkĩrĩka.
3 Tondũ kũgerera ũtugi mũnene ũrĩa niĩ heetwo, ngwĩra mũndũ o wothe gatagatĩ-inĩ kanyu ndageciragie ũhoro wake mwene makĩria ma ũrĩa kwagĩrĩire, no eciragie nĩguo agĩe na meciria mega, o ta ũrĩa Ngai aheete o mũndũ wĩtĩkio. 4 Nĩ gũkorũo o ta ũrĩa mwĩrĩ ũmwe ũkoragwo na ciĩga nyingĩ, no ciĩga icio itirutaga wĩra ũhaanaine-rĩ, 5 no taguo harĩ ithuĩ, o na gũtuĩka tũrĩ aingĩ, tũrĩ mwĩrĩ ũmwe thĩinĩ wa Kristo, no tũrĩ mũndũ ũmwe ũmwe-rĩ, tũrĩ ciĩga inyitithanĩtio hamwe. 6 Nĩ ũndũ ũcio, tondũ tũrĩ na iheo mwanya mwanya kũringana na ũtugi mũnene ũrĩa tũheetwo-rĩ, angĩkorũo tũheetwo kĩa ũrathi, nĩ tũrutage wĩra ũcio wa ũrathi kũringana na wĩtĩkio ũrĩa tũheetwo; 7 kana angĩkorũo nĩ ũtungata-rĩ, nĩ tũrutagei ũtungata ũcio; kana mũndũ ũrĩa ũrutanaga, nĩ athiĩ na mbere kũrutana; 8 kana ũrĩa ũmanagĩrĩria, nĩ omanagĩrĩrie; ũrĩa ũheanaga, nĩ aheanage eyendeire; ũrĩa ũrũgamagĩrĩra maũndũ, nĩ ekage ũguo na kĩyo; ũrĩa ũiguanagĩra tha, nĩ ekage ũguo akenete.
9 Wendo wanyu nĩ ũkorũo ũtarĩ na ũhinga. Thũũragai maũndũ marĩa moru; rũmagiai maũndũ marĩa mega. 10 Onanagiai wendo mũnene ta ũrĩa ũkoragwo na andũ a nyina ũmwe. Harĩ kũheana gĩtĩo, koragwoi mũrĩ a mbere. 11 Rutagai wĩra na kĩyo, mũtigatuĩke igũta. Rekei roho mũtheru ũtũmage mũgĩe na kĩyo. Tuĩkai ngombo cia Jehova.* 12 Kenagai nĩ ũndũ wa kĩĩrĩgĩrĩro kĩanyu. Kiragĩrĩriai rĩrĩa mũrĩ na mathĩna. Hoyagai hingo ciothe. 13 Heagai arĩa aamũre kũringana na mabataro mao. Nyitagai andũ ũgeni hingo ciothe. 14 Rathimagai arĩa mamũnyariraga; rathimagai andũ na mũtikamarumage. 15 Kenagai hamwe na arĩa marakena; rĩragai hamwe na arĩa mararĩra. 16 Onagai arĩa angĩ ta ũrĩa mwĩyonaga; mũtikaigage meciria manyu harĩ maũndũ manene, no mũkoragwo na mwerekera wa kwĩnyihia. Mũtigatuĩke ogĩ maitho-inĩ manyu ene.
17 Mũtikaneke mũndũ o na ũrĩkũ ũũru tondũ wa ũũru ũrĩa amwĩkĩte. Ĩkagai maũndũ marĩa andũ othe mangĩona marĩ mega. 18 Ĩkagai o ũrĩa wothe mũngĩhota mũkoragwo na thayũ hamwe na andũ othe. 19 Endwa akwa, mũtikerĩhagĩrie, no tigagĩrai Ngai onanie marakara make; tondũ nĩ kwandĩkĩtwo ũũ: “Jehova* oigĩte; ‘Kũrĩhanĩria nĩ gwakwa; nĩ niĩ ngaarĩhanĩria.’” 20 No “thũ yaku ĩngĩkorũo ĩhũtiĩ, mĩhe gĩa kũrĩa; ĩngĩkorũo ĩnyotiĩ, mĩhe gĩa kũnyua; nĩ gũkorũo gwĩka ũguo nĩ kũmĩigĩrĩra makara marĩ mwaki mũtwe.” 21 Ndũkanareke ũũru ũgũtoorie, ĩndĩ tooragia ũũru na njĩra ya gwĩkaga wega.