ရိမ့ၤ
၁၂ လၢတၢ်န့ၣ်အဃိ ဒီပုၢ်ဝဲၢ်သ့ၣ်ဧၢ, ဒ်ကစၢ်ယွၤ အတၢ်သးကညီၤအိၣ်ဝဲအသိး ယဃ့ကညးသုလၢ သုကဟ့ၣ်လုၢ်ထီၣ်သုနီၢ်ခိ ဒ်တၢ်လုၢ်လၢအမူဝဲ, စီဆှံဝဲ ဒီးလၢကစၢ်ယွၤ တူၢ်လိာ်ဝဲန့ၣ်လီၤ. ဒီးဖဲသုမၤ အတၢ်မၤစီဆှံအခါ သူသုတၢ်သ့တၢ်ဘၣ်လၢ သုကပဲာ်ထံနီၤဖးတၢ်တက့ၢ်. ၂ တဘၣ်ကွၢ်လိမၤဒိး ဟီၣ်ခိၣ်အံၤလၢၤတဂ့ၤ. မ့မ့ၢ်လဲလိာ် သုတၢ်ဆိကမိၣ်တဖၣ် ဒ်သိး သုကဆီတလဲထီၣ် သုသးအဂီၢ်တက့ၢ်. သုမ့ၢ်မၤဒ်န့ၣ်န့ၣ် သုကသ့ၣ်ညါလီၤသုသး လီၤတံၢ်လီၤဆဲးလၢ ကစၢ်ယွၤ အတၢ်ဘၣ်သးန့ၣ် မ့ၢ်တၢ်လၢအဂ့ၤ, တၢ်လၢအကြၢးဝဲဘၣ်ဝဲ ဒီးတၢ်လၢအလၢအပှဲၤလီၤ.
၃ ခီဖျိလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် အိၣ်လၢယဖီခိၣ်အဃိ ယတဲဘၣ် ပှၤအိၣ်လၢသုကျါ ကိးဂၤဒဲးလၢ တဘၣ် ဆိကမိၣ်ဒိၣ်လီၤသုသး အါန့ၢ်ဒံး သုကြၢးဆိကမိၣ်တဂ့ၤ. ဒ်ကစၢ်ယွၤဟ့ၣ်လီၤသု တၢ်စူၢ်တၢ်နာ် တဂၤစုာ်စုာ်အသိးန့ၣ် ဆိကမိၣ်လီၤသုသး ဖဲအကြၢးအဘၣ်တက့ၢ်. ၄ ပနီၢ်ခိအက့ၢ်အဂီၤ အိၣ်ဝဲအါမံၤ ဘၣ်ဆၣ် အက့ၢ်အဂီၤတဖၣ်အံၤ အတၢ်မၤန့ၣ် တမ့ၢ်တၢ်တမံၤဃီဘၣ်. ၅ ဒ်န့ၣ်အသိး ပဝဲဒၣ်အံၤ ပမ့ၢ်အိၣ်အါဂၤသနာ်က့ ပမ့ၢ်နီၢ်ခိတဂၤဃီလၢ ခရံာ်အပူၤလီၤ. ဘၣ်ဆၣ် ပဝဲတဂၤဒီးတဂၤ ပမ့ၢ်တၢ်အက့ၢ်အဂီၤတဖၣ် လၢအဘၣ်ထွဲလိာ်သးလီၤ. ၆ တၢ်ဟ့ၣ်လၢ ပဒိးန့ၢ်ဘၣ်အီၤန့ၣ် ဒိးသန့ၤထီၣ်အသးလၢ တၢ်သးကညီၤ ဒိၣ်ဒိၣ်မုၢ်မုၢ်အဖီခိၣ် အဃိ အတဒ်သိးလိာ်အသးဘၣ်. အဃိ ပတၢ်ဟ့ၣ် မ့မ့ၢ်တၢ်တဲတၢ် ဒ်ဝံအသိးန့ၣ် မ်ပတဲတၢ်ဒ်ဝံအသိး ဒ်ပတၢ်နာ်အိၣ်ဝဲအသိး န့ၣ်တက့ၢ်. ၇ မ့မ့ၢ် တၢ်အခ့အပှၤတၢ်မၤန့ၣ် မ်ပမၤတၢ်အခ့အပှၤ တၢ်မၤအံၤတက့ၢ်. ဒီးမ့မ့ၢ် ပှၤလၢ အသိၣ်လိတၢ်န့ၣ် မ်အသိၣ်လိတၢ်တက့ၢ်. ၈ မ့မ့ၢ်ပှၤလၢ အဟ့ၣ်ဂံၢ်ဟ့ၣ်ဘါတၢ်န့ၣ် မ်အဟ့ၣ်ဂံၢ်ဟ့ၣ်ဘါ ပှၤဂၤတက့ၢ်. ဒီးပှၤလၢ အဟ့ၣ်နီၤလီၤတၢ်န့ၣ် မ်အဝဲ ဟ့ၣ်နီၤလီၤတၢ်လၢ တၢ်သူၣ်အိၣ်သးအိၣ် အပူၤတက့ၢ်. ဒီးပှၤလၢ အတီခိၣ်ရိၤမဲတၢ်န့ၣ် မ်အမၤဝဲဆူၣ်ဆူၣ်တက့ၢ်. ဒီးပှၤလၢ အပာ်ဖျါထီၣ် တၢ်သးကညီၤန့ၣ် မ်အမၤဝဲလၢ တၢ်သးခုအပူၤတက့ၢ်.
၉ မ်သုတၢ်အဲၣ်န့ၣ် ပူၤဖျဲးဒီး တၢ်ပာ်မၤအသးတက့ၢ်. သးဟ့တၢ်အၢ ဒီးဟံးဃာ်တၢ်ဂ့ၤတက့ၢ်. ၁၀ အဲၣ်လိာ်သုသး ဒ်ဒီပုၢ်ဝဲၢ်တံၢ်နီၢ်အသိး ဒီးကဟုကယာ်လိာ်သုသး တဂၤဒီးတဂၤ လၢတၢ်သူၣ်အိၣ် သးအိၣ်အပူၤတက့ၢ်. ပာ်ဖျါထီၣ်ဆိ တၢ်ယူးယီၣ်ပာ်ကဲ လၢပှၤဂၤအဖီခိၣ်တက့ၢ်. ၁၁ မၤတၢ်ဆူၣ်ဆူၣ် ဒီးတဘၣ်ကၢၣ်တဂ့ၤ. ပျဲသးစီဆှံ မၤဆူၣ်ထီၣ်သုသးတက့ၢ်. ဒီးမၤတၢ်ဒ် ကုၢ်အသိးလၢ ယဟိဝၤယွၤ အဂီၢ်တက့ၢ်. ၁၂ မ်သုတၢ်မုၢ်လၢ်န့ၣ် မၤသးခုသုသးတက့ၢ်. ဖဲသုဘၣ်ကီဘၣ်ခဲအခါ အိၣ်ဂၢၢ်ဆိးကျၢၤတက့ၢ်. ဆဲးဃ့ဘါထုကဖၣ်တၢ် ထီဘိတက့ၢ်. ၁၃ ဟ့ၣ်နီၤလီၤတၢ်လၢ ပှၤစီဆှံတဖၣ်အအိၣ် ဒ်အဝဲသ့ၣ် အတၢ်လိၣ်ဘၣ် အိၣ်ဝဲအသိးတက့ၢ်. ပာ်ဖျါထီၣ် တၢ်သးအိၣ်တူၢ်လိာ် ပှၤတမှံၤ ထီဘိတက့ၢ်. ၁၄ ဆဲးဆိၣ်ဂ့ၤ ပှၤလၢ အမၤအၢမၤနးသုတက့ၢ်. ဆိၣ်ဂ့ၤတၢ်ဒီး တဘၣ် ဆိၣ်အၢတၢ်တဂ့ၤ. ၁၅ ပှၤလၢအသးခုန့ၣ် သးခုဃုာ်ဒီးအီၤတက့ၢ်. ဒီးပှၤလၢအဟီၣ်န့ၣ် ဟီၣ်ဃုာ်ဒီးအီၤတက့ၢ်. ၁၆ သူၣ်အိၣ်သးအိၣ် ပှၤဂၤဒ်နသးအိၣ်လီၤ နနီၢ်ကစၢ်အသး အသိးတက့ၢ်. တဘၣ်သးစၢၢ်ဆၢ တၢ်လၢအဒိၣ်အထီတဂ့ၤ, သးစၢၢ်ဆၢတၢ်လၢ အပတီၢ်ဖုၣ်တက့ၢ်. တဘၣ် ဆိကမိၣ်လီၤသုသးလၢ သုမ့ၢ်ပှၤကူၣ်တၢ်သ့န့ၣ်တဂ့ၤ.
၁၇ တဘၣ်မၤဆၢ တၢ်အၢလၢတၢ်အၢ လၢပှၤနီတဂၤတဂ့ၤ. ဂုာ်ကျဲးစၢး မၤတၢ်လၢ ပှၤခဲလၢာ်ထံၣ်ဝဲလၢ အဂ့ၤန့ၣ်တက့ၢ်. ၁၈ ဂုာ်ကျဲးစၢးအဂ့ၤကတၢၢ်ဒ်သိး မ့ၢ်သ့န့ၣ် အိၣ်ဃူအိၣ်ဖိးဒီးပှၤကိးဂၤဒဲးတက့ၢ်. ၁၉ ပှၤလၢတၢ်အဲၣ်အီၤသ့ၣ်ဧၢ, တဘၣ်ဟ့ၣ်ကၣ်တၢ်တဂ့ၤ. မ့မ့ၢ် ဟ့ၣ်ကစၢ်ယွၤ အတၢ်သးဒိၣ်အခွဲးတက့ၢ်. တၢ်ကွဲးအသးအိၣ်ဝဲလၢ “ယဟိဝၤယွၤ တဲဝဲလၢ ‘တၢ်ဟ့ၣ်ကၣ်န့ၣ် မ့ၢ်ယတၢ်လီၤ, ယကဟ့ၣ်ကၣ်တၢ်လီၤ.’” ၂၀ ဘၣ်ဆၣ် “နဒုၣ်နဒါ မ့ၢ်လီၤဘဲန့ၣ် ဒုးအီၣ်အီၤတက့ၢ်. ဒီးအဝဲ မ့ၢ်အဲၣ်ဒိးအီထံန့ၣ် ဒုးအီအီၤတက့ၢ်. နမ့ၢ်မၤဒ်န့ၣ်န့ၣ် နကပာ်ဖှိၣ် မ့ၣ်အူကဖးလၢ အခိၣ်လိၤလီၤ.”* ၂၁ တဘၣ်ပျဲတၢ်အၢ မၤနၢၤနၤတဂ့ၤ. မ့မ့ၢ် ဆဲးမၤနၢၤတၢ်အၢလၢ တၢ်ဂ့ၤန့ၣ်တက့ၢ်.