Julio

El tkanoʼn Jesús toj jun tten tzʼaqli qe t-ximbʼetz Jehová ex aju kubʼ tnaʼn. El nikʼbʼaj tiʼj jlu tuʼn tkyaqilju tqʼama ex bʼant tuʼn ik tzeʼn qe milagro (Juan 14:9). ¿Tiʼ xnaqʼtzbʼil jaku tzʼel qiʼn kyiʼj milagro bʼant tuʼn Jesús? Jaku tzʼel qnikʼ tiʼj qa kʼujlaʼnxix qoʼ tuʼn ex tuʼn Jehová. Tej tten Jesús tzalu twitz Txʼotxʼ, kubʼ tyekʼin qa kʼujlaʼn qe xjal tuʼn tej kybʼant milagro tuʼn tuʼntzun ya miʼn kybʼisun. Jun maj, xi kyqanin kabʼe moẍ onbʼil te Jesús tuʼn tkyaqil tqʼajqʼajel kywiʼ (Mat. 20:​30-34). In tzaj tyekʼin txʼolbʼabʼil lu qa tzaj «qʼaqʼan tkʼuʼj Jesús kyiʼj» ex yajxitl, kubʼ tqʼanin kywitz. Aju yol griego ajbʼen tuʼn t-xi qʼamet tzaj «qʼaqʼan tkʼuʼj kyiʼj», atz in yolin tiʼj bʼis jaku kubʼ tnaʼn jun xjal toj tanmi. Tej ttzaj qʼaqʼin tkʼuʼj Jesús kyiʼj xjal, kubʼ tyekʼin qa kʼujlaʼn qe tuʼn ex onin jlu tiʼj tuʼn t-xi tqʼoʼn kywa ex kubʼ tqʼanin jun xjal attoq lepra tiʼj (Mat. 15:32; Mar. 1:41). Tuʼntzunju, qʼuqli qkʼuʼj tiʼj qa kʼujlaʼn qoʼ tuʼn Jehová tuʼnju «in qʼaqʼan tkʼuʼj qiʼj». Ax ikx, kʼujlaʼn qo tuʼn Jesús ex in tzaj kybʼis aj qikʼ toj nya bʼaʼn (Luc. 1:78; 1 Ped. 5:7). Kyaj tuʼn tpon ambʼil tuʼn tkubʼ kynajsaʼn tkyaqil nya bʼaʼn in qo ok weʼ twitz. w23.04 3 párr. 4, 5

Nim toklen tuʼn tok qxqʼuqin qibʼ tuʼn miʼn tjaw quʼjin ex tuʼn miʼn tok qbʼiʼn qe tiʼchaq tbʼanel in che ela toj kywitz xjal ateʼ tjaqʼ tkawbʼil Satanás. Tuʼn tok qxqʼuqin qximbʼetz, tbʼanel qa ma qo xnaqʼtzan tiʼj Biblia, tuʼn qxiʼ kyoj chmabʼil ex tuʼn qpakbʼan. Ex in tzaj tqʼamaʼn Jehová qe qa mlay qo ok weʼ twitz jun nya bʼaʼn aju mlayx tzikʼx quʼn (1 Cor. 10:​12, 13). Nim toklen tuʼn qnaʼn Dios tuʼntzun qten tzʼaqli twitz Jehová kyoj ambʼil kwest. Taj Jehová tuʼn qyolin «tukʼil tuj naʼj Dios tuʼn tkyaqil» qkʼuʼj (Sal. 62:8). Tuʼntzunju, qʼonka tilil tuʼn tjaw tnimsaʼna ex tuʼn t-xi tqʼoʼna chjonte te tiʼj tkyaqilju in bʼant tuʼn. Qaninxa te tuʼn ttzaj tqʼoʼn tipumala tuʼn tpakbʼana, tuʼn texa kywitz problem ex tuʼn miʼn tkubʼ tiʼja kyuʼn nya bʼaʼn. Miʼn txi tqʼoʼna ambʼil te alkyexku tiʼ tuʼn tel tiʼn ambʼil tiʼja tuʼn tnaʼna Dios te Jehová. w23.05 7 párr. 17, 18

¿Tiquʼn in qoʼx kyoj chmabʼil? In qoʼx kyoj chmabʼil tuʼnju qaj tuʼn tjaw qnimsaʼn Jehová ex atzun jlu mas nim toklen (Sal. 26:12; 111:1). Ax ikx in bʼaj qonin qibʼ kyoj chmabʼil tuʼnju in qo anqʼin kyoj ambʼil kwest (1 Tes. 5:11). Pero jakulo qo ok weʼ twitz junjun nya bʼaʼn. ¿Alkyeqe? Tnejel, bʼalo jaku qo tzaj xobʼ tuʼn tjaw qiʼn qqʼabʼ tuʼn qcomentarin ex tkabʼin, in jaw qiʼn qqʼabʼ nim maj ex mintiʼ in tzaj qqʼoʼn jun qyol ik tzeʼn ximen quʼn. Tqʼama apóstol Pablo jlu: «Qo ximan tiʼj tuʼn qkyuwsante qibʼ qxolx». Qa ma qo ximen tiʼj qa jaku qo onin kyiʼj txqantl aj t-xi qqʼoʼn jun qcomentario kyukʼil nya nim yol, kʼonil jlu qiʼj tuʼn miʼn qtzaj xobʼ aj tjaw qiʼn qqʼabʼ. Qatzun mintiʼ saj qʼoʼn ambʼil qe tuʼn t-xi qqʼoʼn jun qcomentario ik tzeʼn in kubʼ qximen, jaku qo tzalaj kyiʼj txqantl tuʼnju in tzaj qʼoʼn ambʼil kye tuʼn t-xi kyqʼamaʼn jun kyyol (1 Ped. 3:8). w23.04 20 párr. 1-3

Otoq tzʼetz tqʼamaʼn rey tqanil qa jakutoq che etz judiy otoq che ten junlo 70 abʼqʼi toj tnam Babilonia ex jakutoq che meltzʼaj toj tnam Israel (Esd. 1:​2-4). Oʼkx Jehová jakutoq bʼant jlu tuʼn. In xi qqʼamaʼn jlu tuʼnju mintiʼtoq in netz kytzaqpiʼn xjal te Babilonia qe xjal in chex kyiʼn pres (Is. 14:​4, 17). Noqtzun tuʼnj, kubʼ tiʼj tnam Babilonia ex tzaj tqʼamaʼn akʼaj gobierno qa jakutoq che meltzʼaj judiy toj kytnam. Tuʼntzunju, kykyaqil judiy ex mas qe wibʼaj toj ja, iltoq tiʼj tuʼn tkubʼ kyximen qa che eletz toj tnam moqa ax tuʼn kykyaj ten. Pero ateʼ junjun kwest ela toj kywitz. ¿Tiquʼn? Tuʼnju ateʼtoq junjun otoq che tijen ex kwestlo ela toj kywitz tuʼn kyviajarin. Ax ikx, nim kye otoq che ul itzʼj toj tnam Babilonia ex oʼkxtoq lugar aju ojtzqiʼn kyuʼn. Ex kubʼ kyximen qa ttxʼotxʼ kyxeʼchel aju tnam Israel. Nya oʼkxju, axlo ikx otoq che ok junjun te qʼinun toj tnam Babilonia. Tuʼntzunju, kwest ela toj kywitz tuʼn tkyaj kytzaqpiʼn tbʼanel kyja ex kynegocio tuʼn kyxiʼ toj jun lugar mintiʼ ojtzqiʼn kyuʼn. w23.05 14 párr. 1, 2

In tzaj tqʼoʼn Tyol Dios txokbʼil qiʼj tuʼn tten mas qipumal tuʼn tikʼx quʼn, tuʼn tten mas qʼaqʼbʼil qkʼuʼj ex qkʼujlabʼil. In tzaj tqʼamaʼn Lucas 21:19 jlu: «Qa ma tzikʼx kyuʼne, ok kykambʼaʼye kychwinqlale axix tok». Atzun toj Colosenses 3:12 in kanet consej jlu quʼn: «Qʼaqʼanx kykʼuʼje tiʼj juntl». Ex in che kanet yol lu quʼn toj 1 Tesalonicenses 4:9 ex 10: «Ax Dios ma xnaqʼtzan kyeye tuʼn kykʼujlante kyibʼe kyxolxe. [ . . . ] Pero qo kubʼsale kywitze, erman, kukx tuʼn tchʼiy kykʼujlalile». Aqeju yol lu, e xi qʼamaʼn kye okslal otoq kubʼ kyyekʼin qa in nikʼx kyuʼn, qa at qʼaqʼbʼil kykʼuʼj ex kykʼujlabʼil. Pero iltoq tiʼj tuʼn kukx tkubʼ kyyekʼin qe tbʼanel kymod lu. Ax jlu tuʼn tbʼant quʼn toj ambʼil jaʼlo. ¿Tiʼ jaku tzʼonin qiʼj? Jaku tzʼonin qiʼj qa ma tzʼel qnikʼ tiʼj tzeʼn kubʼ kyyekʼin tnejel okslal qe mod lu ex tzeʼn jaku tzʼel qkanoʼn kyiʼj. Qa ma bʼant jlu quʼn, kʼonil qiʼj tuʼn tbʼaj qbʼinchaʼn qten naʼmxtoq tul nimxix yajbʼil. Ex aj t-xi tzyet ambʼil lu, mas nya kwest kʼelel toj qwitz tuʼn tikʼx quʼn tuʼnju ya otoq kubʼ qyekʼin qʼuqbʼil qkʼuʼj. w23.07 3 párr. 4, 8

In tzaj tqʼoʼn bʼe lu ambʼil qe tuʼn kukx qajbʼen te Jehová toj ambʼil jaʼlo ex tuʼn qtzalaj kyiʼj kʼiwlabʼil tzul tiʼn Tkawbʼil Dios toj ambʼil tzul. Tuʼntzunju, in nok tilil kyuʼn skʼoʼn maj ex qe txqantl ẍneʼl tuʼn kukx kyten toj bʼe lu (Juan 10:16). Atxix toj 1919, o che etz nim millón xinaq, xuʼj ex kʼwal toj Nintz tnam Babilonia moqa kyoj okslabʼil nya axix tok. Ex o txi tzyet tuʼn kybʼet toj «bʼe Xjan». Tej kyetz judiy toj Babilonia, el tiʼn Jehová alkyexku tiʼ jakutoq tzʼok te tolsabʼil toj kybʼe (Is. 57:14). ¿Axpe jlu bʼant tuʼn tiʼj «bʼe Xjan» at toj ambʼil jaʼlo? Axju. Tej atxtoq nim syent abʼqʼi tuʼn tjapun 1919, e ajbʼen junjun xinaq tuʼn Jehová tuʼn tbʼaj kybʼinchaʼn bʼe (mojbʼankuya tukʼil Isaías 40:3). Jaku txi qqʼamaʼn qa bʼant junjun aqʼuntl kyuʼn tuʼntzun kyonin kyiʼj xjal at jun tbʼanel kyanmi. Iktzun tten e onin kyiʼj tuʼn tkyaj kytzaqpiʼn okslabʼil nya ax tok ex tuʼn kykʼulin te Jehová junx tukʼil ttnam. w23.05 15, 16 párr. 8, 9

Taj Jehová tuʼn qajbʼen te tukʼil tzalajbʼil ex tuʼn tkyaqil qanmi (2 Cor. 9:7). Qa ikju, ¿tiquʼn kʼokel tilil quʼn tuʼn tjapun twi jun qximbʼetz qa nya qaj tuʼn t-xi qbʼinchaʼn tuʼn tkyaqil qkʼuʼj? Qo ximen tiʼjju bʼaj tiʼj Pablo. Tqʼama jlu: «Ex nnoʼk nkʼixbʼisaʼne nximlale ex nnoʼk nqʼoʼne te nmajene» (1 Cor. 9:​25-27). Ok tilil tuʼn apóstol Pablo tuʼn t-xi tbʼinchaʼn aju tajtoq Jehová tuʼn tbʼant tuʼn, axpe ikx qa nyaxix tgantoq tuʼn tbʼant tuʼn. ¿Tzalajpe Jehová tiʼjju bʼant tuʼn Pablo? Tzalaj ex tzaj tkʼiwlaʼn Pablo tuʼnju ok tilil tuʼn (2 Tim. 4:​7, 8). In tzalaj Jehová aj tok tqʼoʼn twitz tiʼj qa in nok tilil quʼn tuʼn tjapun twi qximbʼetz, axpe ikx qa nyaxix qgan tuʼn t-xi qbʼinchaʼn. ¿Tiquʼn? Tuʼnju in nel tnikʼ tiʼj qa kʼujlaʼn quʼn maske nya tkyaqil maj qgan aqʼuntl in kubʼ qximen tuʼn tbʼant quʼn toj ttnam. Tzaj kʼiwlaʼn Pablo tuʼn Jehová, ax ikx qe jaku qo tzaj tkʼiwlaʼn qa ma tzʼok tilil quʼn (Sal. 126:5). Aj tel qnikʼ tiʼj qa in qo tzaj tkʼiwlaʼn Jehová tuʼnju otoq tzʼok tilil quʼn, kʼonil jlu qiʼj tuʼn tten mas qgan tuʼn t-xi qbʼinchaʼn aqʼuntl toj ttnam. w23.05 29 párr. 9, 10

Tzaj tqʼamaʼn apóstol Pablo qa mlay che kyaj anqʼin xjal mintiʼ in che xqʼuqin moqa in che jtan aj tul tqʼij Jehová. Aj tikʼ jtan jun xjal, mintiʼ in nok tqʼoʼn twitz tiʼj ambʼil ex tiʼjju in bʼaj ttxlaj. Ax ikx, mintiʼ naʼn tuʼn qa nim kyoklen junjun tiʼchaq ex mlay tzʼel tnikʼ tiʼj tiʼ tuʼn t-xi tbʼinchaʼn. Chʼixme ax jlu in bʼaj kyiʼj xjal toj ambʼil jaʼlo tuʼnju mintiʼ in nok kyqʼoʼn toklen kyamiwbʼil tukʼil Dios (Rom. 11:8). Mintiʼ in xi kynimen qa in qo anqʼin kyoj «mankbʼil tqʼijlalil» ex qa ya chʼix tul nimxix yajbʼil (2 Ped. 3:​3, 4). Atzun qe, nim toklen toj qwitz tuʼn kukx qxqʼuqin ex tuʼn miʼn qikʼ jtan (1 Tes. 5:6). Tuʼntzunju, tbʼanel tuʼn miʼn qjaw sekʼpaj ex tuʼn miʼn ttzaj bʼaj qkʼuʼj. ¿Tiquʼn? Tuʼntzun miʼn tkubʼ qkʼuʼj kyuʼn xjal tuʼn tokx qqʼon qibʼ toj política ex tuʼn qonin kyiʼj. Ex mas kʼokel tilil kyuʼn tuʼn tkubʼ qkʼuʼj kyuʼn akux in nul laqʼeʼ tqʼijlalil Jehová. Pero mintiʼ tuʼn ttzaj bʼaj qkʼuʼj tuʼnju kʼonil xewbʼaj xjan qiʼj tuʼn miʼn qtzaj xobʼ ex tuʼn tel qnikʼ tiʼj alkye mas bʼaʼn (Luc. 12:​11, 12). w23.06 10 párr. 6, 7

¿Tiʼ in nul toj twiʼya aj tok tbʼiʼna in che yolin txqantl tiʼj Sansón? Bʼalo in tzaj tnaʼna qa ten nim tipumal, pero ax ikx el txalpaj Sansón ex tzaj nim nya bʼaʼn tiʼj tuʼn jlu. Ok tqʼoʼn Jehová twitz tiʼj qʼuqbʼil tkʼuʼj kubʼ tyekʼin ex xi tqʼoʼn ambʼil tuʼn tkubʼ tzʼibʼin aju ikʼ toj tanqʼibʼil toj Biblia tuʼntzun tel qiʼn jun xnaqʼtzbʼil tiʼj. Ajbʼen Sansón tuʼn Jehová tuʼn tonin tiʼj tnam te Israel. Tej tikʼ nim syent abʼqʼi, tuʼn tonbʼil xewbʼaj xjan tzaj tqʼamaʼn Jehová te apóstol Pablo tuʼn tkubʼ ttzʼibʼin tbʼi Sansón toj jun lista kyiʼj junjun tmajen kubʼ kyyekʼin qʼuqbʼil kykʼuʼj (Heb. 11:​32-34). Ok qeʼ tkʼuʼj Sansón tiʼj Jehová, axpe ikx tej tok weʼ kywitz nya bʼaʼn. Jaku tzʼel qiʼn tbʼanel xnaqʼtzbʼil tiʼj ex jaku tzʼonin qiʼj tuʼn tchʼiy qʼuqbʼil qkʼuʼj. w23.09 2 párr. 1, 2

Jaku ten qipumal tuʼn tikʼx quʼn qa kukx ma txi qqʼamaʼn te Jehová tkyaqilju tkuʼx toj qanmi (1 Tes. 5:17). Bʼalo mintiʼ in nok weʼya twitz jun nya bʼaʼn toj ambʼil jaʼlo. Pero, ¿in nokpe tilil tuʼna tuʼn tjyona onbʼil tukʼil Jehová aj ttzaj tqʼoja, aj ttzaj bʼaj tkʼuʼja ex qa mintiʼ in nel tnikʼa tiʼjju tuʼn tbʼant tuʼna? Qa naqʼliya tuʼn t-xi tqanina onbʼil te Jehová toj alkyexku ambʼil, mas nya kwest kʼelel jlu toj twitza toj ambʼil tzul aj kytzaj mas nya bʼaʼn. Ex kʼokel qeʼ tkʼuʼja tiʼj qa ojtzqiʼn tuʼn Jehová toj alkye ambʼil mas tbʼanel tuʼn tonin tiʼja (Sal. 27:​1, 3). Maslo nya kwest kʼelel toj qwitz tuʼn tikʼx nimxix yajbʼil quʼn qa ma che ikʼx nya bʼaʼn quʼn toj ambʼil jaʼlo (Rom. 5:3). ¿Tiquʼn in xi qqʼamaʼn jlu? In tzaj kyqʼamaʼn nim erman qa aj kyex twitz jun nya bʼaʼn, mas in ten kyipumal tuʼn kyex kywitz txqantl. Aj tok kyqʼoʼn kywitz tiʼj qa in nonin Jehová kyiʼj, mas in nok qeʼ kykʼuʼj tiʼj qa kukx taj tuʼn tonin kyiʼj. Aj tel kynikʼ tiʼj jlu, in nonin kyiʼj tuʼn tten kyipumal aj kyok weʼ twitz juntl nya bʼaʼn (Sant. 1:​2-4). w23.07 3 párr. 7, 8

In ximen Jehová kyiʼj txqantl tuʼnju in kubʼ tin tibʼ ex in kubʼ tyekʼin qʼaqʼbʼil tkʼuʼj. Jun techel, kubʼ tyekʼin qa kubʼ tin tibʼ tej chʼixtoq tkubʼ t-xiten tnam te Sodoma. E ajbʼen junjun anjel tuʼn tuʼn t-xi tqʼamaʼn te Lot tuʼn kyxi oq kywi witz. Noqtzun tuʼnj, tzaj xobʼ Lot ex xi tqʼamaʼn kye anjel tuʼn t-xi qʼoʼn ambʼil kye tuʼn kyxi Zóar, juntl tal tnam otoq kubʼ t-ximen Dios tuʼn tkubʼ t-xiten. Jakutoq txi tqʼamaʼn Jehová te Lot tuʼn t-xi tbʼinchaʼn aju xi tqʼamaʼn te, pero mintiʼ bʼant jlu tuʼn. Sino xi tqʼoʼn ambʼil te Lot tuʼn t-xiʼ Zóar ex mintiʼ kubʼ t-xiten (Gén. 19:​18-22). Tej tikʼ ambʼil, ax ikx kubʼ tyekʼin Jehová qʼaqʼbʼil tkʼuʼj kyiʼj xjal te Nínive. Tuʼnju kubʼ kybʼinchaʼn xjal nim nya bʼaʼn, xi tqʼamaʼn Jehová te profeta Jonás tuʼn t-xi tqʼamaʼn kye qa oktoq kbʼel xiten tnam. Pero tuʼnju ajtz tiʼj kyanmi xjal, tzaj qʼaqʼin tkʼuʼj Jehová kyiʼj ex ya mintiʼ kubʼ tbʼinchaʼn aju otoq tqʼama (Jon. 3:​1, 10; 4:​10, 11). w23.07 21 párr. 5

¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Jehoás? Jaku txi qqʼamaʼn qa ok Jehoás ik tzeʼn jun tzeʼ mintiʼ xi tlokʼ toj txʼotxʼ tuʼnju iltoq tiʼj tuʼn tonin juntl xjal tiʼj. Ex atzun jlu bʼant tuʼn tnejel pal Jehoiadá, el tpaʼn ambʼil tuʼn tonin tiʼj. Pero tej tkyim Jehoiadá, xi tbʼiʼn Jehoás kyyol nejenel te Judá otoq tzʼel kypan kyibʼ tiʼj Jehová. Tuʼn jlu, in nel qnikʼ tiʼj qa mintiʼ tuʼn tten tchiylal Jehová qiʼj noq tuʼnju atzun jlu in bʼant kyuʼn erman ex qe qfamiliar moqa noq tuʼnju in che onin qiʼj. Tuʼn tten jun tbʼanel qamiwbʼil tukʼil Jehová, nim toklen tuʼn tok qkʼujlaʼn ex tuʼn qrespetarin te. Ex jaku bʼant jlu quʼn qa ma tzʼel qpaʼn ambʼil tuʼn qxnaqʼtzan, tuʼn qximen tiʼjju in jaw quʼjin ex tuʼn qnaʼn Dios (Jer. 17:​7, 8; Col. 2:​6, 7). Mintiʼ in tzaj tqanin Jehová qe tuʼn t-xi qbʼinchaʼn jun tiʼ mlay bʼant quʼn. Tkyaqilju taj tuʼn t-xi qbʼinchaʼn, jaku tzʼel qnikʼ tiʼj kyukʼil yol tkuʼx toj Eclesiastés 12:13. In tzaj tqʼamaʼn jlu: «Nimana te Dios ex japunx qe tmandamyent tuʼna, ex atzun bʼaʼn tuʼn tbʼant kyuʼn xjal». Qa ma ten tchiylal Jehová qiʼj, jaku qo ex twitz alkyexku nya bʼaʼn qo okel weʼ twitz ex jaku qo ten tzʼaqli twitz. Ex mintiʼ jun tiʼ jaku tzʼel qʼinte ambʼil qe tuʼn tten jun tbʼanel qamiwbʼil tukʼil Jehová. w23.06 19 párr. 17-19

In nonin Jehová qiʼj tuʼn tok qeʼ qkʼuʼj tiʼj aj ttzaj tqʼamaʼn qe yol lu: «Ex tma Dios aju qʼuql tuj tqʼuqbʼil jatum in kawin» (Apoc. 21:5a). Oʼkx in tzaj yolin Jehová oxe maj kyoj witzikʼ in yolin uʼj te Apocalipsis tiʼj ex in tzaj tqʼamaʼn qe yol lu jun maj naʼmxtoq t-xi tzyet tuʼn tyolin. Mintiʼ ajbʼen jun anjel nix Jesús tuʼn Jehová tuʼn ttzaj tqʼamaʼn tqanil lu, sino ax tzaj yolin. Tuʼn jlu, jaku tzʼok qeʼ qkʼuʼj tiʼjju in tzaj tqʼamaʼn yajxitl tuʼnju «mibʼan te Dios nikʼan yol» (Tito 1:2). Tuʼntzunju, jaku tzʼok qeʼ qkʼuʼj tiʼj qa ax tok che kjapunel qe yol tkuʼx toj Apocalipsis 21:5 ex 6. Ax ikx tzaj tqʼamaʼntl Jehová jlu: «Tkyaqil kʼokel te akʼaj wuʼne». Atzun jlu kbʼantel tuʼn Jehová toj ambʼil tzul. Ex tuʼnju qʼuqli tkʼuʼj tiʼj qa kjapunel twi tyol, in nok ik tzeʼn ya in bʼant tuʼn toj ambʼil jaʼlo (Is. 46:10). w23.11 3, 4 párr. 7, 8

Ok tilil tuʼn apóstol Pedro tuʼn kukx kybʼant chʼixpubʼil tuʼn. Qo xnaqʼtzan kyiʼj junjun techel. Tej t-xi tqʼamaʼn Jesús qa iltoq tiʼj tuʼn tok weʼ kywitz nya bʼaʼn ex tuʼn tkubʼ bʼyoʼn tuʼntzun tjapun kywi profecía, xi kawin tuʼn Pedro (Mar. 8:​31-33). Ax ikx, kukxlo qʼojin Pedro kyukʼil txqantl apóstol tuʼn tel kynikʼ tiʼj alkye mas nim toklen (Mar. 9:​33, 34). Ex toj qonikʼen tej naʼmxtoq tkyim Jesús, el ttxʼemin Pedro tẍkyin jun xjal (Juan 18:10). Ex tojx qonikʼen aju, xi tqʼamaʼn oxe maj qa mintiʼtoq ojtzqiʼn Jesús tuʼn tuʼnju tzaj xobʼ (Mar. 14:​66-72). Tuʼn jlu, kubʼ tnaʼn nim bʼis ex jaw oqʼ. Tzaj tbʼis Pedro tiʼj tkyaqilju otoq bʼant tuʼn, pero kukx xi qʼuqbʼaʼn tkʼuʼj tuʼn Jesús. Tej tjaw anqʼin Jesús, xi tqʼoʼn ambʼil te Pedro tuʼn tkubʼ tyekʼin qa kukx kʼujlaʼntoq tuʼn. Ex xi tqʼoʼn txokbʼil tiʼj tuʼn t-xqʼuqin kyiʼj t-ẍneʼl (Juan 21:​15-17). Tukʼil tzalajbʼil xi tbʼiʼn Pedro tyol Jesús. Tuʼntzunju, ten kyxol tnejel okslal e jaw skʼoʼn tuʼn xewbʼaj xjan toj Pentecostés atz Jerusalén. w23.09 22 párr. 6, 7

Xi tqʼamaʼn apóstol Pedro qe yol lu kye ansyan: «Kypastorin oke qe t-ẍneʼl Dios» (1 Ped. 5:​1-4). Kʼujlaʼn qe erman kyuʼn ansyan ex kyaj tuʼn kyxqʼuqin kyiʼj. Pero atlo maj jaku kubʼ kyximen ansyan qa mlay japun twi kyoklen kyuʼn tuʼnju at nim tiʼchaq tuʼn t-xi kybʼinchaʼn moqa otoq che sikt. Qa a jlu in bʼaj tiʼja, ¿tiʼ jaku bʼant tuʼna? Qʼamanxa te Jehová tiʼ in kubʼ tnaʼna. Kubʼ ttzʼibʼin Pedro jlu: «Qa at jun in ajbʼen kye txqantl, tzʼajbʼenx tuʼn tipumal Dios» (1 Ped. 4:11). Bʼalo in che ok weʼ erman kywitz nya bʼaʼn mintiʼ solución kyiʼj toj ambʼil jaʼlo. Pero miʼn tzikʼ tnaʼl tuʼna qa mas tbʼanel onbʼil jaku txi tqʼoʼn Jesús kye jaʼlo ex toj ambʼil tzul tuʼnju a pastor mas nim toklen. ¿Tiʼtzun taj Jehová tuʼn tbʼant kyuʼn ansyan? Taj tuʼn tok kykʼujlaʼn qe erman, tuʼn kyxqʼuqin kyiʼj ex tuʼn tkubʼ kyqʼoʼn jun tbʼanel techel kywitz. w23.09 29, 30 párr. 13, 14

Nim toklen tuʼn tok qxqʼuqin qibʼ tuʼn miʼn tten qximbʼetz ik tzeʼn qeju mintiʼ in che nimen te Jehová. Qa ma ten qximbʼetz ik tzeʼn kye xjal, jaku tzʼel qiʼn kyoklen tkawbʼil Jehová ex jaku tzʼel qpan qibʼ tiʼj (1 Cor. 3:19). Qa ma qo ok lepeʼ tiʼj «kynabʼl xjal», jaku qo ximen tiʼj qex qajbʼil. Qo ximen tiʼjju bʼaj toj congregación te Pérgamo ex Tiatira. Ateʼ junjun okslal e kubʼ tzʼaq toj yaẍbʼil ex e kʼulin kywitz tilbʼilal ik tzeʼn kye txqantl xjal. Xi tqʼoʼn Jesús consej kye kabʼe congregación lu tuʼnju xi kyqʼoʼn ambʼil te yaẍbʼil (Apoc. 2:​14, 20). Toj ambʼil jaʼlo, jakulo tzʼok tilil kyuʼn xjal tuʼn tten qximbʼetz ik tzeʼn kye. Jakulo tzaj kyqʼamaʼn junjun qfamiliar moqa qamiw tuʼn qikʼ kyibʼaj tkawbʼil Jehová ex tuʼn tkubʼ qbʼinchaʼn aju qex qaj. Ex jakulo tzaj kyqʼamaʼn qe qa tbʼanel tuʼn tkubʼ qbʼinchaʼn aju in kubʼ qximen ex qa mintiʼ kyajbʼen tkawbʼil Dios. Atlo maj, jaku kubʼ qximen qa nya chikʼli qe tqanil in tzaj tqʼoʼn Jehová qe. Ex tuʼn jlu jakulo kubʼ qximen tuʼn qikʼ tibʼajju «tzʼibʼan tuj Tuʼjil» (1 Cor. 4:6). w23.07 16 párr. 10, 11

Il toq tiʼj tuʼn tten tipumal María, aju ttxuʼ Jesús. ¿Tiquʼn? Tuʼnju mintiʼtoq tojtzqibʼil tiʼj tzeʼn tuʼn kyjaw chʼiyset kʼwal, pero kxqʼuqiltoq tiʼj Mesías. Ex tuʼnju naʼmxtoq tkubʼ mojeʼ tukʼil José, ¿tzeʼn jaku txi tchikʼbʼaʼn te qa otoq tzʼok ten jun tal? (Luc. 1:​26-33). ¿Tiʼ onin tiʼj María tuʼn tjapun twi jun oklenj kwest tuʼn? Jyon onbʼil kyukʼil txqantl. Jun techel, xi tqanin mas tqanil te anjel Gabriel tiʼj oklenj tzaj tqʼoʼn Jehová te (Luc. 1:34). Ax ikx, xiʼ visitarilte jun tfamiliar «tuj txʼotxʼ Judea», aju Elisabet tbʼi. Tbʼanel tuʼnju bʼant jlu tuʼn María, xi tfelicitarin Elisabet te ex tuʼn tonbʼil xewbʼaj xjan tzaj tqʼamaʼn Elisabet jun profecía tiʼj tal María tzul itzʼj (Luc. 1:​39-45). Atzunte María xi ttzaqʼweʼn: «Nimxix ma tbʼincha [Jehová] tuʼnju at tipumal» (Luc. 1:​46-51). Ajbʼen Gabriel ex Elisabet tuʼn Jehová tuʼn t-xi tqʼuqbʼaʼn tkʼuʼj María. w23.10 14, 15 párr. 10-12

O che jaw skʼoʼn 144,000 okslal tuʼn xewbʼaj xjan ex at jun tbʼanel kyamiwbʼil tukʼil Jehová. Che ajbʼel okslal lu te pal toj kyaʼj junx tukʼil Jesús (Apoc. 14:1). Akux ateʼ tzalu twitz Txʼotxʼ, in che jaw skʼoʼn tuʼn xewbʼaj xjan ex in che ok te tkʼwal Dios. In kubʼ techlaʼn «Lugar Xjan» aju tbʼanel kyamiwbʼil skʼoʼn maj at tukʼil Jehová (Rom. 8:​15-17). Atzun «Lugar Mas Xjanxix», in kubʼ techlaʼn kyaʼj jatumel in nanqʼin Jehová. Yajtzun cortina moqa «xbʼalun» kubʼ qʼoʼn t-xol «Lugar Xjan» ex «Lugar Mas Xjanxix», ¿tiʼ in kubʼ techlaʼn? In kubʼ techlaʼn t-xmilal Jesús. Tej tok Jesús ik tzeʼn kye xjal, mlaytoq bʼant tuʼn t-xiʼ toj kyaʼj ex tuʼn tajbʼen te Tnejel Pal toj templo mintiʼ qʼanchaʼl. Noqtzun tuʼnj, tej t-xi tqʼoʼn tchwinqlal te chojbʼil, xi tqʼoʼn ambʼil kye okslal skʼoʼn maj tuʼn kyxiʼ toj kyaʼj. Tuʼn ttzaj kykʼamoʼn okslal skʼoʼn maj oklenj jlu, kjel kyqʼoʼn kyxmilal at toj ambʼil jaʼlo (Heb. 10:​19, 20; 1 Cor. 15:50). w23.10 28 párr. 13

Mintiʼ tzaj tqʼoj Gedeón tej kyyolin xjal te Efraín nya bʼaʼn tiʼj ex xi tqʼoʼn jun tzaqʼwebʼil toj tumel (Juec. 8:​1-3). Kubʼ tyekʼin qa kubʼ tin tibʼ tej kyok tbʼiʼn ex tukʼil tbʼanel tmod jyon tiʼj mujbʼabʼil. Qa at kynabʼil ansyan in nel kykanoʼn tiʼj Gedeón. Aj kyok ten txqantl yolil nya bʼaʼn kyiʼj, in che ok kybʼiʼn ex in xi kyqʼoʼn jun tzaqʼwebʼil toj tumel kye (Sant. 3:13). Aj tbʼant jlu kyuʼn, in che onin tuʼn tten mujbʼabʼil toj congregación. Jaw nimsaʼn Gedeón kyuʼn txqantl tej tkubʼ kyiʼj xjal te Madián tuʼn, pero onin kyiʼj tuʼn tjaw kynimsaʼn Jehová (Juec. 8:​22, 23). ¿Tzeʼn jaku tzʼel kykanoʼn ansyan tiʼj techel kyaj tqʼoʼn Gedeón? Jaku tzʼel kykanoʼn tiʼj aj tjaw kynimsaʼn Jehová aj tbʼant jun tiʼ kyuʼn (1 Cor. 4:​6, 7). Jun techel, qa ma txi qʼamaʼn te jun ansyan qa tbʼanel qʼon xnaqʼtzbʼil, jaku txi tqʼamaʼn qa atz in jatz tkyaqil toj Biblia ex kyoj uʼj in che etz tuʼn ttnam Jehová. Tbʼanel qa ma che ximen ansyan tiʼj qa in jaw kynimsaʼn Jehová aj kyqʼon xnaqʼtzbʼil moqa oʼkxkyaj tuʼn tok kyqʼoʼn txqantl kywitz kyiʼj. w23.06 4 párr. 7, 8

Qa mintiʼ in tzaj qkʼamoʼn aju in xi qqanin toj qnaʼj Dios, bʼaʼn tuʼn qximen, «¿tojpe tumel aju in xi nqanine toj nnaʼj Diose?». Chʼixme tkyaqil maj, in kubʼ qximen qa ojtzqiʼn quʼn alkyeju mas bʼaʼn te qe. Noqtzun tuʼnj, atlo maj mlay tzaj tiʼn tbʼanel qe aj tikʼ ambʼil. Jakulo txi qqanin toj qnaʼj Dios tzeʼn qaj tuʼn t-xi bʼinchaʼn tiʼj jun problem, pero atlo maj at juntl tumel mas tbʼanel. Ex atlo maj mintiʼ toklen aju in xi qqanin tukʼil tajbʼil Jehová (1 Juan 5:14). Jun techel, qo ximen kyiʼj kabʼe mambʼaj in xi kyqanin te Jehová tuʼn kukx tten kykʼwal toj axix tok. Jaku kubʼ qximen qa toj tumel aju xi kyqanin. Noqtzun tuʼnj, mintiʼ in nok t-obligarin Jehová qe xjal tuʼn kyajbʼen te. Sino taj tuʼn qajbʼen te ex qe qkʼwal tuʼnju in tzaj anqʼin toj qanmi (Deut. 10:​12, 13; 30:​19, 20). Qa ikju, ¿tiʼtzun jaku txi kyqanin mambʼaj te Jehová? Jaku txi kyqanin te tuʼn tonin kyiʼj tuʼn tpon xnaqʼtzbʼil toj tanmi kykʼwal tuʼntzun tok tkʼujlaʼn Jehová ex tuʼn tok te tamiw (Prov. 22:6; Efes. 6:4). w23.11 21 párr. 5; 23 párr. 12

¿Tiquʼn jaku txi qqʼamaʼn qa in kubʼ qyekʼin qkʼujlabʼil aj t-xi qqʼuqbʼaʼn kykʼuʼj txqantl? In tzaj tqʼamaʼn jun xjal in xnaqʼtzan tiʼj Biblia qa aju yol griego ajbʼen tuʼn Pablo tuʼn ttzaj tqʼamaʼn «kyqʼuqbʼam kykʼuʼje», a t-xilen «tuʼn qten ttxlaj jun xjal ex tuʼn qonin tiʼj toj ambʼil kwest». Tuʼntzunju, aj qonin tiʼj jun erman in nok weʼ twitz jun nya bʼaʼn, in qo onin tiʼj tuʼn kukx tbʼet toj bʼe te chwinqlal. Aj tbʼant jlu quʼn, in kubʼ qyekʼin qkʼujlabʼil tiʼj erman (2 Cor. 7:​6, 7, 13). ¿Atpe toklen qʼaqʼbʼil qkʼuʼj tukʼilju tuʼn t-xi qqʼuqbʼaʼn kykʼuʼj txqantl? At. Qa in tzaj qʼaqʼin tkʼuʼj jun xjal tiʼj juntl, in nonin tiʼj ex in xi tqʼuqbʼaʼn tkʼuʼj. Tuʼn jlu, in nel qnikʼ tiʼj qa tnejel in tzaj qʼaqʼin qkʼuʼj tiʼj juntl naʼmxtoq t-xi qqʼuqbʼan tkʼuʼj. Chʼixme ax jlu in bʼant tuʼn Jehová. Tzaj tqʼamaʼn Pablo qa in tzaj tqʼuqbʼaʼn Jehová qkʼuʼj noq tuʼnju in tzaj qʼaqʼin tkʼuʼj qiʼj. Tqʼama jlu: «Atzunte Mambʼajju kukx in qʼaqʼan tkʼuʼj qiʼj, ex atzunte Diosju kukx in tqʼuqbʼaʼn qkʼuʼj» (2 Cor. 1:3). w23.11 9, 10 párr. 8-10

Kykyaqil tmajen Jehová ojtzqiʼn kyuʼn qa che okel weʼ twitz nim nya bʼaʼn. Qo ximen tiʼjju tqʼama apóstol Pablo kye okslal te Tesalónica: «Tej qtene kyukʼile, bʼiʼx xi qmaʼne kyeye qa il tiʼj tuʼn qyajlanjtz, ex kyjaʼtzun tten in bʼaj qiʼj, bʼaʼn jlu kyuʼne» (1 Tes. 3:4). Ax ikx tqʼama jlu kye okslal te Corinto: «Qajbʼile tuʼn kybʼinteye tiʼj ju yajbʼil qeye [ . . . ], mintiʼ qipaye ex o qmaye qa tuʼn qnaje» (2 Cor. 1:8; 11:​23-27). Ax ikx kye tmajen Jehová toj ambʼil jaʼlo, ojtzqiʼn kyuʼn qa che okel weʼ kywitz nya bʼaʼn (2 Tim. 3:12). Atxix tej tok qeʼ tkʼuʼja tiʼj Jesús ex tej tok lepeʼya tiʼj, bʼalo o tzʼok kybʼinchaʼn tamiwa moqa qe toj tjaya jun nya bʼaʼn tiʼja. ¿Ope tzaj nya bʼaʼn tiʼja toj aqʼuntl tuʼnju mintiʼ in sbʼuʼna? (Heb. 13:18). ¿Ope tzʼok weʼya twitz ambʼil kwest tukʼil Gobierno tuʼnju in yolina tiʼj qʼuqbʼil tkʼuʼja kyukʼil txqantl? Noq alkyexku nya bʼaʼn qo okel weʼ twitz, qo tzalaj ik tzeʼn tqʼama Pablo. w23.12 10, 11 párr. 9, 10

Ok weʼ Jacob kywitz nim nya bʼaʼn. Kubʼ tqʼoʼn Simeón ex Leví kychʼixwi tfamilia Jacob ex bʼaj kytzʼilsaʼn tbʼi Jehová. Nya oʼkxju, ax ikx kyim Raquel, aju t-xuʼjil Jacob tej tul itzʼj tkabʼin tal. Ex tuʼnju tzaj nim weʼyaj toj nim ambʼil, xiʼ Jacob anqʼil toj tnam Egipto tej otoq tijen (Gén. 35:​16-19; 37:28; 45:​9-11, 28). Maske ok weʼ Jacob twitz nim nya bʼaʼn, kukx ok qeʼ tkʼuʼj tiʼj Jehová ex kyiʼj ttziybʼil. Ex kubʼ tyekʼin Jehová qa in tzalajtoq tiʼj. Jun techel, ten nim tqʼinumabʼil noq tuʼnju onin Jehová tiʼj. Ex jaku txi qqʼamaʼn qa xi tqʼoʼn Jacob nim chjonte te Jehová tej tok tkeʼyin twitz José juntl maj, maske kubʼ t-ximen qa otoq kyim. Ikʼx tkyaqil nya bʼaʼn lu tuʼn Jacob tuʼnju attoq jun tbʼanel tamiwbʼil tukʼil Jehová (Gén. 30:43; 32:​9, 10; 46:​28-30). Ax ikx qe, jaku qo ex twitz alkyexku nya bʼaʼn in qo ok weʼ twitz qa at jun tbʼanel qamiwbʼil tukʼil Jehová. w23.04 15 párr. 6, 7

Tqʼama David toj Salmo 23 qa qʼuqli tkʼuʼj tiʼj qa kʼujlaʼn tuʼn Jehová ex qa ok t-xqʼuqin. Yolin tiʼj tbʼanel tamiwbʼil ten tukʼil ex tqʼama qa ok te Pastoril te. Mintiʼ tzaj xobʼ David tuʼnju el tnikʼ tiʼj qa tzaj tyekʼin Jehová tbʼe ex ok qeʼxix tkʼuʼj tiʼj. Ojtzqiʼnxix tuʼn qa kbʼeltoq tyekʼin Jehová tkʼujlabʼil tiʼj tkyaqil qʼij. ¿Tiquʼn ok qeʼ tkʼuʼj David tiʼj jlu? El tnikʼ David tiʼj qa ok xqʼuqin tuʼn Jehová tuʼnju xi tqʼoʼn aju at tajbʼen te. Ax ikx, ojtzqiʼntoq tuʼn qa ok Jehová te tamiw ex tzalaj tiʼj. Tuʼntzunju, ok qeʼ tkʼuʼj David tiʼj qa ktzajel tqʼoʼn Jehová aju at tajbʼen te noq tiʼxku bʼaj. Ok qeʼ tkʼuʼj tiʼj qa kʼujlaʼn tuʼn Jehová ex onin tiʼj tuʼn miʼn ttzaj bʼaj tkʼuʼj ex tzalaj (Sal. 16:11). w24.01 29 párr. 12,13

Atxix tej tkubʼaj Tkabʼ Nimaq Qʼoj twitz Tkyaqil Txʼotxʼ, o che pakbʼan tmajen Jehová kyoj nimku lugar. Axpe ikx, ateʼ nim xjal o tzʼok kyojtzqiʼn Jehová ex toj ambʼil jaʼlo in xi pakbʼet twitz tkyaqil Txʼotxʼ. Toj ambʼil jaʼlo, kukx in nok lepeʼ Kʼloj Xjal Qʼil Twitz Aqʼuntl tiʼj tqanil kyaj tqʼoʼn Jesús. In nok tilil kyuʼn tuʼn t-xi kyqʼoʼn tqanil kye erman, aju at toklen tukʼil t-ximbʼetz Jehová ex Jesús. In che ajbʼen superintendente te circuito ex qe ansyan kyuʼn tuʼn t-xi kyqʼoʼn tqanil lu kyoj congregación. Ateʼ qe ansyan skʼoʼn maj ex qe txqantl ansyan «tuj tbʼanqʼab» Jesucristo (Apoc. 2:1). Tuʼnju aj il qe, at maj in che el txalpaj ik tzeʼn Moisés, Josué ex qe apóstol (Núm. 20:12; Jos. 9:​14, 15; Rom. 3:23). Noqtzun tuʼnj, ojtzqiʼn quʼn qa a Jesús in kubʼ nej twitz majen ex qe ansyan ex kukx kbʼantel jlu tuʼn. Tuʼntzunju, bʼaʼn tuʼn tok qeʼ qkʼuʼj kyiʼj tqanil in tzaj qʼoʼn qe. w24.02 23, 24 párr. 13, 14

In jaw qnimsaʼn Jehová aj qyolin tiʼj tukʼil kʼujlabʼil ex aj t-xi qqʼoʼn chjonte te. Aj qpakbʼan, in qo onin kyiʼj xjal tuʼn kyok laqʼeʼ ttxlaj ex tuʼn tok kykʼujlaʼn ik tzeʼn qe (Sant. 4:8). Qgan tuʼn t-xi qyekʼin kye tukʼil Biblia qe tbʼanel tmod Jehová ik tzeʼn kʼujlabʼil, tzʼaqli, aju tnabʼil ex tipumal. Ax ikx, in jaw qnimsaʼn Jehová ex in tzalaj aj tok tilil quʼn tuʼn tel qkanoʼn tiʼj. Aj tbʼant jlu quʼn, in nok kyqʼoʼn xjal kywitz tiʼj qa junxitl qoʼ ik tzeʼn kye txqantl ex jaku kubʼ kyxjelin tiquʼn (Mat. 5:​14-16). Bʼalo jaku ten jun ambʼil qiʼj tuʼn qyolin kyukʼil tiʼj jlu. Qa at jun tbʼanel kyanmi xjal, kʼonil kyiʼj tuʼn kyok laqʼeʼ ttxlaj Jehová. Aj tjaw qnimsaʼn ik tzeʼn jlu, ktzalajel quʼn (1 Tim. 2:​3, 4). w24.02 10 párr. 7

Tuʼn toka te jun ermano at tnabʼil, il tiʼj tuʼn tbʼant junjun tiʼ tuʼna. Kʼonil jlu tiʼja tuʼn tbʼant junjun aqʼuntl toj congregación, tuʼn tkanet jun taqʼuna tuʼntzun txi tqʼoʼna aju at tajbʼen kye toj tjaya ex tuʼn ttena bʼaʼn kyukʼil txqantl. Jun techel, bʼaʼn tuʼn tbʼant tuʼjina ex ttzʼibʼina. In tzaj tqʼamaʼn Biblia qa aju xjal in uʼjin ex in ximen tiʼj, in tzalaj ex tbʼanel in nela tkyaqilju in bʼant tuʼn (Sal. 1:​1-3). Qa ma bʼant jlu tuʼna, ktel t-ximbʼetza ik tzeʼn te Jehová ex kximela toj tumel (Prov. 1:​3, 4). Kyaj erman tuʼn kyxi xnaqʼtzaʼn ex tuʼn t-xi qʼoʼn consej kye kyuʼn ermano o tzʼok kynabʼil. Qa ma bʼant tuʼjina ex ttzʼibʼina, jaku tzʼonin tiʼja tuʼn tbʼaj tbʼinchaʼna qe chikʼbʼabʼil ex qe comentario jaku tzʼonin kyiʼj txqantl. Ax ikx, jaku kubʼ ttzʼibʼina qe tqanil ex jaku che onin tqanil lu tuʼn tchʼiy qʼuqbʼil tkʼuʼja ex tuʼn tonina kyiʼj txqantl. w23.12 26, 27 párr. 9-11

Aj ttzaj xobʼa, ximana tiʼjju kbʼantel tuʼn Jehová toj ambʼil tzul jatumel ya otoq kubʼ najsaʼn Satanás. Toj asamblea te oxe qʼij te 2014, etz qʼoʼn jun yekʼbʼil, jatumel in yolin jun ermano tukʼil tfamilia tiʼjju jaku tzaj qʼamaʼn toj 2 Timoteo 3:1 a 5 noqwit atz in yolin tiʼj qanqʼibʼil toj ambʼil tzul: «Toj akʼaj twitz Txʼotxʼ, tzul tqʼijlalil te tzalajbʼil. Kʼokel kykʼujlan kyibʼ xjal, kʼokel kykʼujlaʼn axix tok, nya yasul qe, kbʼel kyin kyibʼ, kjawil kynimsaʼn Dios, che nimel kʼwal te kyman, kxel kyqʼoʼn chjonte, che tel tzʼaqli, kʼokel kykʼujlaʼn qe toj kyja, kjel bʼant tiʼj jun kyyol, che yolil bʼaʼn kyiʼj txqantl, kbʼantel kyjakʼunte kyibʼ, che okel te mans, kʼokel kykʼujlaʼn aju bʼaʼn, kʼokel qeʼ kykʼuʼj txqantl kyiʼj, bʼaʼn che ximen, mlay jaw kyniman kyibʼ, kʼokel kykʼujlaʼn Dios ex nya qe achbʼil, ax tok che ajbʼel te Dios. Miʼn tzʼel tpan tibʼa kyiʼj». ¿Naqʼli qoʼ tuʼn qyolin kyukʼil toj qja moqa kyukʼil erman tiʼj tzeʼn kʼokel qanqʼibʼil toj akʼaj twitz Txʼotxʼ? w24.01 6 párr. 13, 14

Tbʼanel aj tel qnikʼ tiʼj qa «in tzalaj Qman [Jehová] tiʼj ju tnam etzan tuʼn» (Sal. 149:4). Pero ateʼlo junjun qe jaku kubʼ t-ximen: «Ax tok, in tzalaj Jehová tiʼj ttnam, pero ¿in tzalajpe wiʼje?». Ax ikx e ten tmajen Jehová toj ambʼil ojtxe kwest ela kye tuʼn t-xi kynimen qa in tzalaj Jehová kyiʼj (1 Sam. 1:​6-10; Job 29:​2, 4; Sal. 51:11). In tzaj tqʼamaʼn Tyol Dios qa jaku tzalaj Jehová qiʼj maske aj il qoʼ. ¿Tiʼtzun il tiʼj tuʼn tbʼant quʼn? Bʼaʼn tuʼn tok qeʼ qkʼuʼj tiʼj Jesús ex tuʼn qbautisarin (Juan 3:16). Iktzun tten kbʼel qyekʼin kywitz txqantl qa otoq tzʼajtz tiʼj qanmi kyiʼj il otoq che bʼant quʼn ex qa otoq txi qtziyen te Dios qa qaj tuʼn t-xi qbʼinchaʼn aju tajbʼil (Hech. 2:38; 3:19). In kubʼ tnaʼn Jehová nim tzalajbʼil aj tbʼant jlu quʼn tuʼnju in kubʼ qyekʼin qa qaj tuʼn qok te tamiw. Qa ma tzʼok tilil quʼn tuʼn tjapun twi qyol otoq txi qtziyen te, ktzalajel qiʼj ex qo okel te tamiw (Sal. 25:14). w24.03 26 párr. 1, 2

Qa ma tzaj kyqʼamaʼn xjal qe tuʼn tkyaj qtzaqpiʼn tuʼn qpakbʼan, bʼaʼn tuʼn tel qkanoʼn kyiʼj t-xnaqʼtzbʼen Jesús ex tuʼn kukx tok tilil quʼn. Qʼuqli qkʼuʼj tiʼj qa kʼonil Jehová qiʼj tuʼn kukx qpakbʼan ex jaku txi qqanin qipumal ex qnabʼil te. Ax ikx, jaku txi qqanin te tuʼn ttzaj tqʼoʼn qipumal tuʼn kyikʼx nya bʼaʼn quʼn. Nim qe in qo bʼisun tuʼnju o kyim jun xjal kʼujlaʼn quʼn, in qo ok weʼ twitz ikʼbʼil, o tzaj jun yabʼil qiʼj moqa tuʼnju in qo ok weʼ twitz alkyexku juntl problem. Ex mas in che tzaj nya bʼaʼn qiʼj tuʼn pandemia ex tuʼn qʼoj. Tuʼntzunju, bʼaʼn tuʼn t-xi tqʼamaʼna tkyaqilju tkuʼx toj tanmiya te Jehová. Qʼamanxa te tiʼ in kubʼ tnaʼna ik tzeʼn in bʼant tuʼna aj tyolina tukʼil jun tamiwa. Jaku tzʼok qeʼ tkʼuʼja tiʼj qa kʼonil Jehová tiʼja (Sal. 37:​3, 5). Qa kukx ma qo naʼn Dios, jaku tzʼonin qiʼj tuʼn tikʼx quʼn aj qok weʼ kywitz nya bʼaʼn (Rom. 12:12). Ojtzqiʼn tuʼn Jehová tiʼ in che ok weʼ tmajen twitz ex «ok t-xi kyqanin onbʼil te in che tzaj tbʼiʼn» (Sal. 145:​18, 19). w23.05 5, 6 párr. 12-15

Aj tkubʼ qximen tuʼn tbʼant jun tiʼ quʼn, bʼaʼn tuʼn qjyon tqanil «tiʼj alkyeju tajbʼil» Jehová ex tuʼn t-xi qbʼinchaʼn (Efes. 5:17). Qa ma qo jyon kyiʼj nabʼil toj Tyol Dios tiʼjju in bʼaj qiʼj, in kubʼ qyekʼin qa in nok tilil quʼn tuʼn tel qnikʼ tiʼj alkye t-ximbʼetz Jehová. Ex qa ma che kubʼ qqʼoʼn toj xnaqʼtzbʼil, jaku jaw qjyoʼn aju mas tbʼanel. Taj «tajaw il» moqa Satanás tuʼn tok qqʼoʼn qwiʼ kyiʼj junjuntl tiʼchaq tuʼntzun miʼn tel qpaʼn ambʼil tuʼn qajbʼen te Jehová (1 Juan 5:19). Mas fácil tuʼn tok qqʼoʼn qwiʼ tiʼj pwaq, tiʼj xnaqʼtzbʼil ex tiʼj aqʼuntl twitzju tuʼn t-xi qjyoʼn junjuntl tumel tzeʼn tuʼn qajbʼen te Jehová. Qa ma bʼaj jlu qiʼj, jun yekʼbʼil tiʼj qa in qo ok lepeʼ tiʼj kyximbʼetz xjal. Ax tok, nya jun il tuʼn kybʼant qe tiʼchaq lu quʼn, pero mintiʼ tuʼn tkubʼ qqʼoʼn tnejel toj qanqʼibʼil. w24.03 24 párr. 16, 17