Kuthuwathuwe, Yehova anowurumedha

1. Mubuwelo baani adhaari a Yehova akale yahoweliwa owanana malabo mamodha?

SOLIBIHA vanlubale onona ele anawoga Bibiliya egi: ‘Yehova anodhivela nlogo naye.’ (Sal. 149:4) Malabo mamodha iyo podi okwerebeya ofiyedha wikohaga: ‘Miyo gihikanna thima vamentoni va Yehova?’ Adhaari owinjhiva oororomeleya a Yehova akale, malabo mamodha yowikoha nimakalelo yala. — 1 Sam. 1:6-10; Jó 29:2, 4; Sal. 51:11.

2. Baani anarumedhiwa ni Yehova?

² Bibiliya anowoniha pamadhene wihina athu oohilogomana podi omuhagalasa Yehova ni orumedhiwa ni Oliye. Nimakalelo baani? Nnohowela woniha wi nnomuroromela Yesu Kiristu ni obaddiziwa. (Juwa. 3:16) Nerana ndala, nnowoniha vaari va anamwinjhi wi nihithwaruwa ni nihimala ompaganya Yehova werana efunelo yaye. (Dho. 2:38; 3:19) Yehova anoothabwa ohagalala vanlubale neragana dhithu ndha wihina ninfiyedhe. Nilibihedhaga wihina nakwanihedhe mpaganyo nerilihuna, Yehova anere onirumedha ni nnakale akwaye nyingala ginyingalevo. — Sal. 25:14.

3. Makoho baani nnafunihu wawakula muwari mwa ohudhera wula?

³ Ethu baani enaathukulela athu amodha wubuwela wi Yehova kanarumedha? Ethu baani Yehova aneriyena wihina oonihe wi anonirumedha? Ki nnalibihe aavi nroromelo nehu nowihina Yehova anonirumedha?

ETHU BAANI ENAATHUKULELA ATHU AMODHA WUBUWELA WI YEHOVA KANAARUMEDHA?

4-5. Naarive ohivahaga thima ebaribari baani onahoweliwe okanna?

⁴ Owinjhiva wa iyo kannivaha thima obajha ehima. (Sal. 88:15) Ddibila anithaniwa Adrián anawoga egi: “Miyo gubuwelesa wi kaginna thima. Dhithu ginuubuwelimi ngali mwaana waali olobela gilobaga wihina amudhi aaga evolowe mparayizu. Mbwenye miyo kagiwoona okala muthu apama ni oofwanelela wihina givolowe mparayizu.” Tony, ddibila dhaala ahileliwe mwibaribarini, anawoga egi: “Makolo aaga kinawogege wi enogidhivela obe yowithukula mwaha wa miyo. Mbwenye aliwa yawogesa wihina kaginanda werana dhithudha mwamakalelo apama.”

⁵ Akala malabo mamodha oniwoona ninga kunna thima, kudduwale wi kawo muthu mmodha ahili mwinnyene Yehova usakunle wihina okale mudhaari aye. (Juwa. 6:44) Yehova anowoona ethu yapama wa kadda muthu wa iyo, oliye ohunona murima wehu. Teto makalelo iyo nniwonihu ehihiyana ni makalelo Oliye ananooniye. (1 Sam. 16:7; 2 Cró. 6:30) Bumwahaya Yehova awogaga wi oli athima vamentoni vaye, kuwanganyedhege. — 1 Juwa. 3:19, 20.

6. Murumiwi Pawulo akala aavi ubuwelaga wodhela yothega eriliyena kale?

⁶ Nihinathi ohudhera ebaribari, owinjhiva wa iyo podi wera naherana dhithu dhinanithukulela wivaha nibili ofiyedha peeno. (1 Ped. 4:3) Ni addibilaya ebanjhe kale omulabela Yehova nuroromeleya, enowanana mubuwelo wabure. Ki we, malabo mamodha ononamo wi Yehova kuulevelenle? Akala siyeyo enupadduwela, kudduwale wi adhaari a Yehova akale yahikanna makathamiho mamodhave. Motajhiha, murumiwi Pawulo oothabwa wukuuwa ubuwelaga dhoviriganiha dhaye. (Rom. 7:24) Ebaribari wi oliye ahithwaruwa ni ahibaddiziwa, mbwenye naarive dhigaali ndo, oliye iwoona ninga ‘ole ahinna thima,’ teto wa athu oothega iwoona ninga ‘oobajhaya.’ — 1 Kor. 15:9; 1 Tim. 1:15.

7. Ethu baani nahinahowelihu odduwala?

⁷ Yehova anopaganya wi nathwaruwa mwaha wa dhothega dhehu oliye anere onilevelela. (Sal. 86:5) Nathwaruwa ni murima wehu waatene, iyo podi ororomela wi ele Yehova anawogiye ebaribari, oliye ohunilevelela. — Kol. 2:13.

8-9. Nnande aavi ogonjhiha mubuwelo wowihina kannanda onvaha Yehova ele nnandihu ni omuhagalasa?

⁸ Aatene iyo nnofuna werana dhatedhene nnandihu wihina nimulabele Yehova. Mbwenye malabo mamodha, iyo podi wubuwelaga wi kannerana dhithu dhowinjhiva wihina nirumedhiwe ni Yehova. Murogola dhaala anithaniwa Amanda anawoga egi: “Miyo ginubuwela wihina onvaha Yehova ele ginandimi fuwawenjhedhedha mabasa ginamparelimi. Mwaha wa yeyo ginoxixa werana dhithu gahinandimi, vano gahanda ginowukuwa ni ginowubuwela wi ni Yehovaya ohuukuwa ni miyo.”

⁹ Nnande aavi ogonjhiha mubuwelo wowihina kannanda onvaha Yehova ele nnandihu ni omuhagalasa? Eli wodhela ohidduwala wihina Yehova kananiloba dhithu nahinandihu teto kahi muthu oorusa. Oliye anovaha thima ethu-sithu nnerihuna, thabwathabwa neragana ni murima wehu wamutene. Ohiya eyo, we podi opendda wodhela dhopadduwa dha athu enafwanyeya mBibiliyani yamulabenle Yehova ni murima wewa wamutene. Motajhiha, kamubuwele murumiwi Pawulo oliye ahilaba nuuviheya muwari mwa yaka dhowinjhiva eeddaga olenddo dholapela ni akaviheraga wiita mulogo dhowinjhiva. Mbwenye dhithudha mwigumini mwaaye nusadduwa, wodhela ohanda olaleya ninga alaleyesiye kale, nerege Yehova kaavaha thima dhithu oliye eriyena? Naari, Pawulo ahididela werana ele andiye teto Yehova ahimureeliha. (Dho. 28:30, 31) Ni makalelo mamodhave, dhithu nnamparelihu Yehova malabo mamodha podi osadduwa mwigumini mwehu. Mbwenye yathimaya sithu enanithukulela omulabela Yehova. Vano nnere woona ethu baani Yehova aneriyena wihina oonihe wi anonirumedha.

ETHU BAANI YEHOVA ANERIYENA WIHINA OONIHE WI ANONIRUMEDHA?

10. Nnande aavi “ovuruwana” ndhu na Yehova nnirumedhaga? (Juwawu 16:27)

¹⁰ Wodhela Bibiliya. Yehova anosayela makalelo owawoniha adhaari aye wihina anowadhivela ni anowarumedha. Bibiliya anowoga dila biili Yehova awogiliye ni mwanaye Yesu, wihina oliye aali mwanaye amudhiveliye ni amurumedhiye. (Mat. 3:17; 17:5) Were odhiveliwa ahere Yehova awoga wi anowurumedha? Peeno Yehova kanawoga ni iyo tho-tho, mbwenye Yehova anawoga ni iyo wodhela Bibiliya. Iyo podi ovuruwana ndhu na Yehova nnirumedhaga, wodhela wawileri madhu a Yesu enafwanyeya mu malivuru a Evanjelyu. (Omwileri Juwawu 16:27.) Yesu ahitajhiha pamadhene dhikalelo dha Ababe. Vano iyo nawilerigi madhu apama Yehova awogiliye ni athu ohilogomana iyo podi wubuwelaga ninga di mwinnyene Yehova anawoga ni iyo. — Juwa. 15:9, 15.

11. Mwahaya bwaddi ofwanyiwa makathamiho kinatapulela wihina kannarumedhiwa ni Yehova? (Tiyago 1:12)

¹¹ Wodhela dhithu ananereliye. Yehova anofuna onikavihera mudhidhi watene. Motajhiha, Oliye anonivaha dhithu dhomwilini nnahowelihu. Malabo mamodha Yehova podi wenya iyo ofwanyiwa makathamiho, ndala ninga yampadduweliwa Jo. (Jó 1:8-11) Mbwenye ofwanyiwa makathamiho kinatapulela wihina kannarumedhiwa ni Yehova. Ohiya eyo, ofwanyiwa makathamiho winonivaha ofuru wowoniha wi nnomudhivela vanlubale Yehova ni nnomuroromela ni murima wehu wamutene. (Omwileri Tiyago 1:12.) Teto iyo nnere wanda woona odhivela nnikavihero na Yehova mwaha woona makalelo Yehova ananikaviheriye wihina nidhowegeve nivilelaga.

12. Yopadduwa ya Dmitrii enanihudhiha ddi?

¹² Kasugwa ethu empadduwele ddibila dhaala anakala elabo yohAziya anithaniwa Dmitrii. Oliye ahayelela mabasa ni dhahivira mweri dhowinjhiva ahandile wafwanya mabasa. Vano oliye wawenjhedhedha mabasa aye oolaleya, ni makalelo yala ahoniha wihina oomuroromela Yehova. Dhahivira mweri dhowinjhiva, mbwenye kaanda wafwanya mabasa. Vano okala muredda ofiyedha ohandaga ovenya. Mwaha wa yeyo oliye obajha wubuwela wi kaali mulobwana newene babi apama, mwaha ohanda osamalela emudhi yaye. Teto owikohesa akala Yehova oomurumedha. Vano emahiyu dhaala agaali okwartu vakamani vaye, mwanaye mung’ono a mwanamuhiyana odhana papeli agalebilevo madhu a yolebela ya Isaías 30:15 enihina: ‘Kopolo dhenyu dhinadha mwaha okala oopwaseya ni oororomela.’ Vano mwanaye owoga egi: “Papa moona wi muhuthabwa othuwathuwa mubuwelege yolebela ela.” Dmitrii wonelamo wihina nnikavihero na Yehova emudhaye yahikanna yojha, dhowara ni mburo wokala. Oliye anowogave egi: “Ethu gahowelimi werana yaali opwaaseya ni odidela gimuroromelaga Mulugu aaga.” Akala onofwanyiwa makathamiho ninga yala, ororomele wihina Yehova anere wusamalela ni anere wukavihera wanda ovilela.

13. Yehova analabihedha aani wihina oonihe wi anonirumedha?

¹³ Wodhela addibilihu. Yehova podi walabihedha addibila ni arogola wihina oonihe wi anonirumedha. Motajhiha, Oliye podi omulabihedha ddibila obe murogola wihina awoge madhu mudhidhi enanlibiha wofwanelela. Siyeyo yampadduwenle murogola dhaala anakala ohAziya, afwanyiwa makathamiho oorusa vanlubale, oliye ahayelela mabasa ni okala muredda. Vano mamune werana yothega enlubale ni ohiya okala namaholela mulogo. Oliye anowoga egi: “Miyo kaganona mwahaya bwaddi dhithu ndhe dhigagipadduwela. Vano miyo obajha wubuwela wi gaherana ethu yabure vamentoni va Yehova ni wihina Oliye kaagirumedha.” Murogola ola olobela wa Yehova alobaga wihina Yehova amoonihe akala mwebaribarene oomudhivela. Ethu baani Yehova eriliye? Oliye anowogave egi: “Anamaholela mulogo othapanya ni miyo ni owoga wihina Yehova oogidhivela vanlubale.” Nuuvira mudhidhi oliye oloba nikavihero na Yehova dila yanabili. Oliye anowoga egi: “Nlabo nenne galobenlimi wa Yehova miyo wakela karta na addibila dhaala a mmulogoni, mudhidhi gilerigi karta nne nolibiha gahonelamo wihina Yehova ahigivuruwana.” Mwebaribarene malabo owinjhiva Yehova anowoniha wihina anonirumedha wodhela madhu apama enawogiwa ni addibila vamodha ni arogola. — Sal. 10:17.

14. Makalelo mamodha Yehova anonihiye wi anonirumedha baavi?

¹⁴ Yehova anowoniha wi anonirumedha wodhela walabihedha addibilihu wihina enivahe yolaga yahoweleyaga. Motajhiha, Yehova ahimulabihedha murumiwi Pawulo wihina aalebele mulogo makarta oovetheliwa owakwana 14. Mukartani muna murumiwi Pawulo ohuvaha dholaga dhowooneleyamo, mbwenye dhodhivela. Mbwenye mwahaya bwaddi Yehova adhe anvethelege Pawulo ovaha dholaga ndha? Mwaha wihina Yehova Baabi apama ni anasumulula anaaye ‘anaadhiveliye.’ (Pro. 3:11, 12) Bumwahaya naavahiwaga dholaga dhinadhela mBibiliyani, eyo kinatapulela wi niihiya orumedhiwa ni Yehova. Ohiya eyo, enoniha wihina Yehova anonidhivela. (Ebe. 12:6) Makalelo mamodha Yehova anonihiye wi anonirumedha baavi?

DHITHU DHIMODHA DHINONIHA WIHINA YEHOVA ANONIRUMEDHA

15. Yehova anaavaha aani muzimu waye wotxena, ki eyo enanivaha ebaribari baani?

¹⁵ Yehova anowavaha muzimu waye wotxena ale anaarumedhiye. (Mat. 12:18) We podi wikoha: ‘Ginowanda wooniha ekalelo modha ya yowimma ya muzimu wotxena mwigumini mwaaga?’ Onowanda woona peeno akala onothabwa ovilela mohiyana ni kale ohunathi okala Namoona a Yehova? Wathabwaga woniha dhikalelo ndha dha yowimma ya muzimu wotxena, kunaganyedhege wi Yehova anowurumedha! — Osugwe kwaduru “Yowimma ya muzimu wotxena siila . . . ”

16. Yehova analabihedha aani wihina elaleye muthenga dhapama? (1 Tesalonika 2:4)

¹⁶ Wihina awakwanihedhe mabasa athima oolaleya muthenga dhapama Yehova analabihedha athu anarumeedhiye. (Omwileri 1 Tesalonika 2:4.) Kasugwa makalelo murogola dhaala anithaniwa Jocelyn akaviheriwiye mwaha wapara mabasa oolaleya. Labo dhaala Jocelyn aavenyile agaali owukuwene. Oliye anowoga egi: “Kaganna kopolo teto gahiyelela efunelo yokalawo, mbwenye miyo gaali piyonera mudhidhi yoole, teto naari labo naaga nodhowa mmalaleyelo, vano miyo olobela ni odhowa mmabasani oolaleya” Emambesi yele Jocelyn omunona Mary, muhiyana dhaala apama aarumendhe omuhudhera Bibiliya. Vano nuuvira mwana mweridhene ehudheraga, Mary owoga wihina labo nenne noobajha Jocelyn aafiyiliye vaade vaye, oliye eere olobela wa Mulugu amulobaga nikavihero. Ethu baani Jocelyn ahudhenriye ni yopadduwa ela? Oliye anowogave egi: “Yakala ninga Yehova awoga ni miyo egi ‘Miyo ginowurumedha.’” Ebaribari wi kahi athu aatene enaarumedhe muthenga nnalaleyihu. Mbwenye iyo podi okanna ebaribari wi Yehova anohagalala aanoonaga nilibihedhaga wihina nilaleye muthenga dhapama.

17. Onahudhera ddi ni ndhe awogile Vicky wodhela yowobola? (Salmo 5:12)

¹⁷ Yehova anolabihedha muthengo wa yowobola wihina aakaviherena ale anaarumedhiye. (1 Tim. 2:5, 6) Mbwenye ki akala mmurima mwehu nnowanganyedha akala Yehova anonirumedha, naarive nigamanle obaddiziwa ni nroromelaga yowobola? Kabiha wubuwela, iyo kannahowela ororomela malabo aamatene dhithu nnubuwelihu, mbwenye iyo podi omuroromela Yehova. Ale enamuroromela podi wooniwa ninga athu owogowa vamentoni vaye teto Oliye anopaganya wareeliha. (Omwileri Salmo 5:12; Rom. 3:26) Murogola dhaala anithaniwa Vicky, ahonelamo wihina opendda pamadhene wodhela thima enna yowobola, wahimukavihera vanlubale. Oliye anowoga egi: “Mohulegela miyo wonelamo wihina Yehova eere ogivilelana muwari mwa mudhidhi wowinjhiva. . . . Mwaha yakala ninga gawoga ni Yehova gegi: ‘Nyu kamunande omudhivela muthu ninga miyo teto mukutho wa mwaninyu kunande olevelela dhothega dhaaga.’” Murogola Vicky nupendda wodhela thima enna yowobola oliye obajha woona wi Yehova oomudhivela. Ni iyoya podi wambela woona wihina Yehova anonidhivela ni anonirumedha napendda wodhela yowobola.

18. Ebaribari baani nnahowelihu okanna nadhowagave nimudhivelaga Babi ehu Yehova?

¹⁸ Ebaribari wihina naarive nilibihedhaga wihina niparihedhe mabasa dhithu noonilihu muwari mwa ohudhera wula, malabo mamodha iyo podi okala owukuwene ni wambela wanganyedha akala Yehova anonirumedha. Eyo yapadduwa kuddiwale wi Yehova anowarumedha ‘ale yahinahiye omudhivela.’ (Tiya. 1:12) Bumwahaya odhowegeve onfiyedhaga Yehova ni wilibihedhege wonelamo dhithu Oliye analabihedhiye wihina oonihe wi anowurumedha. Teto kudduwale wi Yehova “kali wolapela wa kadda muthu wa iyo.”— Dho. 17:27.