Julho

Ceukijanyi kuti zvese zvakanangwa ndi Jesu no kuithwa kubatanijavo no mushamaiso jaakaita, zvinovonesa kuti iyena waitevejera mazwiro a Baba wake no murangariro. (Joh. 14:9) Ngozvapi zvatingajija ngo pamusoro po mushamaiso jakaithwa ndi Jesu? Jesu na Babake vanotida maningi. Paainga pasi pano, Jesu wakakhombija kuti iyena waida vandhu ngo kushandisa simba rake pakuita mushamaiso kuti apungure zvineso zvainga no vandhu. Vhaza imweni mapofu maviri akakumbira besero kuna Jesu. (Mat. 20:​30-34) Vonanyi kuti Jesu ‘wakava no pena’ perapo ovarapa. Gama rakashandiswari apa ro Cigiriki rokuti ‘wakava no pena’ rinonangira mazwiro o mukatikati anova no mundhu. Njira iyi inovonesari rudo, yakaita kuti Jesu apekeje zvokuha vandhu vainga no njara no kurapa nyamapere. (Mat. 15:32; Mrko. 1:41) Jehovha Mwari wo ‘pena’ no Mwana wake Jesu vanotida maningi, vanohwajihwa maningi no kuneseka ngo matambujiko atinosonganari nawo. (Ruk. 1:78; 1 Ped. 5:7) Ivona vanoda kupeja zvineso zvese zviri kutambujari vandhu. w23.04 3 ¶4-5

Tinodikana kutiza mugariro jinotiita kuti tide kuita zvakashata, zvinoithwa ngo nyika ino ya Sathana. Tingazaja murangariro wedu ngo zviro zvaushoni ngo kuverenga no kujija Bhaibheri. Kwenda kumusongano no kuita basa ro kucumaera kunobeserazve kuti titame kuzaja murangariro wedu ngo zviro zvakashata. Inga muviyo, Jehovha anogondesa kuti aazotisiyi kuti tiejwe mbhera paticikakwanisi kucungirira. (1 Vak. 10:​12, 13) Umwe nga umwe wedu tinodikana kuita mukumbiro kuti tienderere mberi takagondeka kuna Jehovha mu njiku jino jokupejisira jinonesari. Psakanyi nguva pa njiku yokuita mukumbiro ngo mwoyo wese. (Nduy. 62:8) Kujanyi Jehovha no kumubonga ngo zvese zvaanomuitira. Mukumbirenyi kuti amubesere kuti muve no cicunge mu basa ro kucumaera. Deketeranyi kuti amubesere kuhwisana no cineso ciri cese camuri kusongana naco no kucinyisa. Mucatendera kuti ciricese nee ari wese amuite kuti mutame kuita mukumbiro kuna Jehovha mukuvo wese. w23.05 7 ¶17-18

Ngenyi tinoenda ku musongano? Maningi-ningi, kuitira kukuja Jehovha. (Nduy. 26:12; 111:1) Cimwenizve, tinoendazve ku musongano kuti tivangisane ngocedu mu nguva jino jo kunesa. (1 Vat. 5:11) Patinomusa mukono kuti tipe mupinguro, tinonga tecibesera kuti zviro zviviri izvi zvikwanirisike. Asi patinonga tecipa mupinguro, tingava no zvineso. Tinganeseka kuti tipe mupinguro kana tingatoda kupa mupinguro asi totama kukhombijwa ko vhaza jakawanda inga zvotaida. Waro zvicinyi zvingatibesera? Pauro wakananga kuti tinodikana ‘kuvangisana ngocedu.’ Patinozwisisa kuti vamweni vari pa musongano vangavangiswa ngo magama atingananga anovonesa rutendo hwedu, zvinozotiita kuti tide kupa mupinguro. Kudari tikatama kukhombijwa kuti tipe mupinguro ko vhaza jakawanda, tingadakara ngokuti vamweni vari kukwanisa kupa mupinguro javo.—1 Ped. 3:8. w23.04 20 ¶1-3

Painga papera kuziviswa kuti Vajudha vaingaya ku uranda ku Bhabhironiya ko makore anokwana kuita 70, vainga vasujunuhwa kuti vahwirire ku nyika kwavo ku Iziraeri. (Esdh. 1:​2-4) Ndi Jehovha wakaitaro kuti izvi zviitike. Ngokuti Vabhabhironiya avaicaizokwanisa vega kusujunura varanda vavo. (Isa. 14:​4, 17) Asi Bhabhironiya rainga rahwiswa, mutongi mupsa waingaro ecitonga wakananga kuti Vajudha vangahwirira havo kanyi kwavo. Vajudha vese maningi-ningi musoro jo mbhuri vaidikana kutema civaringo cinosisira: Co kuenderera mberi vari mu Bhabhironiya kana kuenda ku nyika kwavo. Civaringo ici cingaita kuti cainesa kuciita. Zvecivoneka kuti vazinji vainga vaavasharuka, zvaizovanesera maningi kuita hwendohwo. Cimwenizve, zvecivoneka kuti Vajudha vazinji vakabarihwa ku Bhabhironiya, avacaizivazve nyika imweni kusiyapo yondhoyo. Kwavari Iziraeri yainga nyika yo majibaba avo. Zvinovoneka kuti Vajudha vamweni vainga vecibudirira ku Bhabhironiya. Ngo kudaro, zvaizovanesera kusiya nyumba javo jaushoni kuenda ku nyika yo vacikazivi. w23.05 14 ¶1-2

Soko ra Mwari rinotivangisa kuti tienderere mberi tecisakurira mugariro wo kucungirira, pena no rudo. Ruka 21:19 inoti: “Munozoponesa upenyu hwenyu ngo kucungirira kwamunoita.” Vakorose 3:12 inoti: “Tatijirananyi . . . pena.” No 1 Vatesaronika 4:​9, 10 inoti: “Imwimwi kamare munojijiswa kudisana ngo cenyu ndi Mwari. . . . Asi itusu tinomuvangisa kuti muenderere meciengejera kuita kudaro.” Magama o mavhesi aya akatarihwa Makristu ainga ecikhombija kucungirira, pena no rudo. Asi ivona vaidikana kuenderera mberi vecikhombija mugariro iji. Itusu tinodikana kuita zvakafanana. Kuti mubesereke, vonanyi kuti Makristu o muzana ro kutanga akakhombijisa kudini mugariro iji. Perapo vonanyi kuti mungatevejeresa kudini vajiji ava no kuva no cokwadi cokuti takanasiririka kuitira dambujiko guru. Panozotanga dambhujiko guru, munonga majijira kucungirira i munozova makanasiririka kuti muenderere mbheri mecicungirira. w23.07 3 ¶4, 8

Azvinenyi tiri vokuzojwa kana tiri vo ‘mavhuta amweni,’ tinodikana kuramba tecifamba mu “Gwanja Rakaceneswa.” Izvi zvinozotibesera kuti tienderere mberi tecishandira Jehovha nyamasi uno no kumbejiyo apo Umambo ukazoviisa makomborero mu nyika imbza. (Joh. 10:16) Kuvhira mu gore ra 1919 Kristu Aviya, zviuru zvo vanarume, vanakaji no vana, zvakabuda ku Bhabhironiya Guru, cine ro pasi pese ro manamatire o kunyepa, zvotanga kufamba mu gwanja iri ro kuezanisira. Vajudha pavakavha ku Bhabhironiya, Jehovha wakavabesera pa zvineso zvavo ngo njira iri yese. (Isa. 57:14) Tingativo kudini ngo “Gwanja Rakaceneswa” ra nyamasi uno? Pa mazana o makore ricito raguma gore ro 1919, Jehovha wakashandisa vandhu vaimureremeja kuti vabesere pakucenesa gwanja kuvha ku Bhabhironiya Guru. (Ezanisanyi na Isaya 40:3) Ivona vakaita basa rinosisira ro kucenesa gwanja ro kumujimu kuitira kuti vandhu vaya vano mwoyo yakarungama vavhe ku Bhabhironiya Guru kuti vaende ku paradhiso yo kumujimu, ino kwakamusijihwa kunamata kwakacena. w23.05 15-16 ¶8-9

Jehovha anoda kuti tijipire no kumushandira takadakara. (2 Vak. 9:7) Izvi zvinoreva kuti tinodikana kuenderera mberi tecishanda ngo simba kuti tikwanirise zvido zvedu ticikadi? Ambovonanyi muezaniso wo mupostori Pauro. Iyena wakati: “Ndinotambuja muviri wangu, ndiciuita muranda.” (1 Vak. 9:​25-27) Pikija mupostori Pauro paainga acina cido cokuita zviro zvaiinga avhunjwa ndi Jehovha kuti aiite, iyena waivangisira kuti azviite. Kunanga kuti Jehovha wakadakarira zvaakaitihwa ndi Pauro? Hina. Iyena wakamukomborera ngo kuvangisira kwake. (2 Tim. 4:​7, 8) Mu njira yakaezana, Jehovha anodakara maningi paanotivona tecishanda ngo simba kuti tikwanirise cido catakagaja pikija patinonga tecijizwa ticina cido cokuzviita. Iyena anodakara ngokuti pikija asipi mukuvo wese watinoita basero ngokuti tinorida, anoziva kuti tinonga teciita zvondhozvo ngokuti tinomuda. Inga Jehovha wakakomborera Pauro, iyena anozotikomboreravo pakuvangisira kwedu. (Nduy. 126:5) Patinoeja kuvona makomborero a Jehovha, tingatotanga kujizwa tino cido cokuzviita. w23.05 29 ¶9-10

Mupostori Pauro wakaezanisa vaya vacikaponi pa njiku ya Jehovha no vese vari kuvata. Ivona avaripi kuziva zviri kuitika pazvakavatendenejaro no kupera kuri kuita nguva. Ngo kudaro, ivona avakwanisi kuziva zviro zvinosisira zviri kuitika no kuda kuita ciricese. Vazinji nyamasi uno, vakavata pa divi ro umwari. (Varo. 11:8) Ivona avatendi kuti tiri kupona “munjiku jo kupejisira” nokutizve dambujiko guru rinozoviya sambiri pano. (2 Ped. 3:​3, 4) Zvinosisira maningi kuti tigare takamuka kudivi ro umwari. (1 Vat. 5:6) Ngo kudaro, tinodikana kuva vandhu vakathiva. Ngenyi? Ngokuti atizotenderi kunghwinira mu zvomatongehwe o nyika no zvimweni zvinoitika nyamasi uno. Kangaije kuvangirijwa kuti tibesere matongore o nyika, kunoengejeka maningi njiku ya Jehovha painonga yeciguma. Pikija zvakadaro, atidikani kuthimwa-thimwa ngo zviro zvatinozodikana kuita. Mujimu wa Jehovha unozotibesera kuti tive no murangariro waushoni no wakagajana no kuda kutema zvivaringo zvaushoni.—Ruk. 12:​11, 12. w23.06 10 ¶6-7

Ngozvapi zvamunorangarira pamunozwa zina rokuti Samusoni? Kangaije munorangarira mwanarume ano simba rakakura maningi. Izvi ngo zvokadi. Asi Samusoni wakatema civaringo cainga cakashata cakaita kuti ave no muviyo jinohwaja maningi. Pikija zvakadaro, Jehovha wakabatikana pa zvese zvakaithwa ndi Samusoni kuti amushandire, woita kuti muezaniso wake wo kugondeka utahwe mu Bhaibheri. Jehovha wakashandisa Samusoni kuti aite zviro zvinoshamaisa maningi kuitira kubesera vandhu vaainga akakheta, Vaiziraeri. Mazana o makore akazotevera Samusoni naafa, Jehovha wakafemera mupostori Pauro kuti atare zina ra Samusoni pa munda-nda-nda wo vandhu vainga vakakhombija rutendo unoshamaisa. (Vahe. 11:​32-34) Muezaniso wa Samusoni ungativangisa. Iyena waithemba Jehovha pikija paaisongana no mugariro jinonesa. Tingajija ngo muezaniso wa Samusoni no kuvona manera ungativangisa. w23.09 2 ¶1-2

Itusu tingakwanisa kucungirira ngo kuita mukumbiro kuna Jehovha mukuwo wese no kubhuya ngo pamusoro po zviro zvatiri kuneseka ndizvona. (1 Vat. 5:17) Zvingaita kuti imwimwi amuripi kuhwisana no zvineso zvakawanda wari uno. Kureva kuti imwimwi munoita mukumbiro kuna Jehovha, mecikumbira besero rake paya pamunonga mecineseka kana paya pamunonga mucikazivi zvokuita? Kudari imwimwi mecikumbira besero ra Jehovha ngo pamusoro po zvineso zvo njiku no njiku wari uno, munozokwanisa kukumbira besero rake pa zvineso zvese zvamunozosongana nazvo kumbejiyo. Ngo kudaro, munozova no cokwadi cokuti Jehovha anozomubesera paya pamunoda besero no kuthembazve kuti iyena anoziva kuti ngozvapi zvaanodikana kumuitira. (Nduy. 27:​1, 3) Zvinozotirerukira kucungirira pa dambujiko guru kudari tikacungirira nyamasi uno. (Varo. 5:3) Ngenyi tingananga zvondhozvo? Hama jimweni jakavona kuti kucungirira muejo umwe nga umwe wo jaisongana najo, zvaizovabesera kuzocungirira muejo jaizoviya. Kucungirira kwakavabesera kuti vavangise rutendo hwavo pakuthemba kuti Jehovha wakanasiririka kuti avabesere. Rutendo wakavabesera kuti vacungirire zvineso zvaizoviyazve.—Jako. 1:​2-4. w23.07 3 ¶7-8

Kujidodokesa kwa Jehovha no pena yaanokhombija zvinoita kuti iyena ave mundhu anozwisisa. Inga muezaniso, kujidodokesa kwa Jehovha kwakanasa kuvoneka paiida kuparaja vandhu vakashata ku Sodhoma no Gomora. Ecishandisa ngirozi jake, Jehovha wakavhunja Roti kuti atizire ku ndau yakakhwirira. Asi Roti waithya kuenda konayo. Ngo kudaro, wakakumbira kuti iyena no mbhuri yake vatizire ku dhorobha ro Zowari, dhorobha rokuti Jehovha wainga akananga kuti waizoriparaja. Jehovha waizovhunja Roti kuti ateverere ndhungamiriro jake acikangunguti. Kunja kwa zvondhozvo, Jehovha wakatendera zvakanangwari ndi Roti no kutama kuzoparaja dhorobhero. (Gen. 19:​18-22) No pakhirira mazana o makore, Jehovha wakakhombija pena ku vagari vo Ninivhe. Iyena wakatumira muporofita wake Jona kuti aende kozivisa kuti vagari vo Ninivhe vaizoparajwa. Asi vandhu vo Ninivhe pavakakhauya, Jehovha wakavazwira pena osunga kutama kuvaparaja.—Jon. 3:​1, 10; 4:​10, 11. w23.07 21 ¶5

Ngozvapi zvatingajija ngo muezaniso wa Jehoasi? Iyena waidari inga muti uno miji jicizivi kwenda pasi. Waida kucijikihwa kuti uime. Jehoyadha waimubesaya paakafa, Jehoasi wakatanga kupurukira zvainangwa ngo vapanduki, wogumira pa kuva mundhu acizivi kugondeka kuna Jehovha. Izvi zvinonasa kuvonesa kuti kuthya kwatinoita Jehovha, akudikani kucijikira pa zvinoitwa ngo Makristu amweni kana no vo pa mbhuri yedu. Kuti tienderere mberi takavanga ku divi ro umwari, tinodikana kuvangisa tega kuthya kwatinoita Jehovha ngo kuita mukumbiro, kujija no kurangarijisisa. (Jer. 17:​7, 8; Vako. 2:​6, 7) Jehovha aatikumbiri kuti tiite zviro zvaticikakwanisi. Zvaanotikumbira basi zvakanasa kugurisihwa pana Mucumaeri 12:​13, iyo inoti: “Ithyai Mwari wo cokwadi, zwirai mupango jake, ngokuti izvi ndizvona zvinosisira maningi mu upenyu wo vandhu.” Patinothya Mwari, tinozokwanisa kuhwisana no zvineso kumbejiyo no kwenderera mberi takagondeka. Apana cinozokwanisa kupeja ushamwari hwedu na Jehovha. w23.06 19 ¶17-19

Pakutanga ko vhesi iyi Mwari anotithembesa kudari: “Wiya waigara pacigaro co umambo, wakati.” (Apok. 21:5a) Magama aya anosisira maningi ngokuti Jehovha wakamananga mu bhuku ra Apokaripsi ko vhaza jinokwana kuita ndhatu. Wakathembesa masoko aya asipi ngirozi nee asipi Jesu asi ndiyena Jehovha kamare. Izvi zvinotikhohwesa kamare kuti itusu tingathemba kamare masoko amweni anonangwa pa vhesi 5. Ngenyi? Ngokuti ‘Jehovha aanyepi.’ (Tit. 1:2) Ngo kudaro, tinonasa kuthemba kamare magama atinowana mu bhuku ra Apokaripsi 21:​5, 6. Vonanyi gama ro kuti: “Vonai!” Gama ro Cigiriki rakasandujwa rokuti “vonai!” rinonangwa ko vhaza jakawanda mu bhuku ra Apokaripsi. Ngozvapizve zvimweni zvakazonanga Mwari? Iyena wakati: “Ndiri kuita kuti zviro zvese zviite zvipsa.” Jehovha anozoita cinjo kumbejiyo, iyena ano cokwadi cese kuti anozokwanirisa zvaakagondesa. Cimwenizve, ari kunanga inga kuti cinjo iji watopera kujiita.—Isa. 46:10. w23.11 3-4 ¶7-8

Pedhru wakaenderera mberi ecihwisana no kurembejeka kwake. Vonanyi muezaniso munganani. Jesu paakananga kuti waizotambujika no kufa kuti akwanirise zviporofita zvo Bhaibheri, Pedhru wakananga kuti izvi azvicaizoitika. (Mrko. 8:​31-33) Ko vhaza jakawanda, Pedhru no vapostori vamweni vakavereketesana ngo kuda kuziva kuti ndiyani wainga mukuru pakati pavo. (Mrko. 9:​33, 34) Pa usiku Jesu acito afa, Pedhru wakaita zviro mu njira icikaripi yaushoni, woceka njeve yo mwanarume umweni. (Joh. 18:10) Usiku hwondhowo, Pedhru wakathya maningi wogumira pa kuramba kuti Jesu asipi shamwari yake. (Mrko. 14:​66-72) Izvi zvakaita kuti Pedhru aceme maningi, wakanyangajwa maningi ngo zvaakaitari. Pikija zvakadaro, Jesu aazivi kumuramba. Paakapera kumuswa, Jesu wakapa mukana Pedhru kuti akhombije rudo hwake kwaari. Iyena wakagaja Pedhru basa imbza, ro kuva muhavisi anojidodokesa no anongwarira mavhuta ake. (Joh. 21:​15-17) Pedhru wakaita zvaakakumbihwa ndi Jesu. Iyena waengeyovo ku Jerusarema pa njiku yo Pentekoste, wakavavo pa cikwata cokutanga co vakazojwa ngo mujimu mucena wa Mwari. w23.09 22 ¶6-7

Mupostori Pedhru wakavhunja vakuru kudari: “Havisanyi mushambi wa Mwari.” (1 Ped. 5:​1-4) Kudari imwimwi muri mukuru, tinozviziva kuti munoda maningi hama jenyu no hambzaji no kuda kuvataja. Asi nguva jimweni mungatovona kuti imwimwi makaremba maningi, makabatikana kana amutokwanisi kuita basa renyu. Waro ngozvapi zvamungaita? Vhunjanyi Jehovha manera amuri kujizwa. Pedhru wakatara kudari: “Kudari mundhu ecishandira, ngaashandire ngo simba ra Mwari; kuti Mwari apuwe nduma.” (1 Ped. 4:11) Kangaije hama no hambzaji jiri kusongana no zvineso zvokuti zviri kunesa kupera mu nyika ino yatiri kuponari. Asi ceukijanyi kuti “muhavisi mukuru” Jesu Kristu, anokwanisa kuvataja ushoni kupinda imwimwi. Iyena anokwanisa kuita zvondhozvo wari no mu nyika imbza. Mwari anokumbira basi kuti vakuru vade hama no kuvahavisa ushoni no kuva “muezaniso ku mushambi uwu.” w23.09 29-30 ¶13-14

Tinodikana kubhasopa pa kushandisa zvinoithwa ngo vandhu. Kudari tikarangarira manera anorangarira vandhu vacikazwiri mutemo ja Jehovha, tingatogumiravo pakuita inga ndivona. (1 Vak. 3:19) “Uzivi hwo nyika ino” kazinji unoita kuti vandhu vatame kuzwira Mwari. Makristu amweni o Pergamu no Tiyatira, akatanga kurangarira inga manera airangarira vandhu vainga vakavatendeneja, vainga vecinamata zvithombe no kuita zvo uhure. Jesu wakatumira mbhangiro yakavanga ku ungano mbiri iji ngokuti ivona vaitendera kuti vandhu mu ungano vaite uhure. (Apok. 2:​14, 20) Nyamasi uno, vandhu vanotivangirija ngo njira iri yese kuti tiite zvakashata. Vandhu vo pambhuri yedu no shamwari vangatoeja kutikhohwesa kuti apana cakashata pakutama kuzwira mutemo ja Mwari. Inga muezaniso, ivona vangatonanga kuti apana cakashata kudari itusu tinoda kuita mukuzwirana no zvatinoda, kana ndhungamiriro jo Bhaibheri ajicashandi. Tingatoguma pakurangarira kuti ndhungamiriro jatinopuwa ndi Jehovha ajizivi kunasa kujeka. Kangaije tingajizwa teciejwa kuti tiite ‘kupindirija zviro zvakatahwa.’—1 Vak. 4:6. w23.07 16 ¶10-11

Mariya, mai wa Jesu, waida simba. Iyena wainga acizivi kurovohwa asi waizova no mimba. Iyena wainga acizivi kumborera mwana asi waidikana kurera mwana waizova Mesiya. Zvecivoneka kuti iyena wainga acizivi kumbovata no mwanarume, waizozvisanangurisa kudini kuno uwo waizomurovora Josefa? (Ruk. 1:​26-33) Mariya wakawanisa kudini simba? Iyena wakakumbira besero ro vamweni. Inga muezaniso, iyena wakakumbira besero kuno ngirozi inozwi Gabhiriyeri kuti imuvhunje zvimweni ngo pamusoro po basero. (Ruk. 1:34) No papera mukuvo mushoma, iyena wakaita hwendo kuenda ku “ndharaundha yo matundhu, ku dhorobha ro Judha,” ku ukama hwake Erizabheti. Hwendo uhu hwakabesera maningi. Erizabheti wakasimba Mariya nokutofemehwa kuti anange ciporofita ngo pamusoro po mwana wainga ari mu ndani ma Mariya. (Ruk. 1:​39-45) Mariya wakananga kuti Jehovha “watatija simba rake ngo mukono wake.” (Ruk. 1:​46-51) Jehovha wakashandisa Erizabheti no ngirozi Gabhiriyeri kuti amuvangise. w23.10 14-15 ¶10-12

Makristu manganani akazojwa ngo mujimu mucena ari kubusa ushamwari unosisira na Jehovha. Vo 144.000 vanozoshanda inga vapiri pamwepo na Jesu Kristu kumatenga. (Apok. 14:1) Ndau Yakacena yo tabherinake inoimirira vakakhethwa inga vana vo kumujimu va Mwari pavainga pasi pano. (Varo. 8:​15-17) Ndau Yakacenesesa yo tabherinake inoimirira kudenga ndau inogara Jehovha. “Jira” raiguraya Ndau Yakacena no Yakacenesesa rinoimirira muviri wa Jesu Kristu. Paainga pasi pano no muviri wo mundhu aacaidikana kuhwirira kudenga kuti aende kova Mupiri Mukuru wo mu themberi yo kumujimu. Pakupira muviri wake inga muripo Jesu wakafunungura gwanja kuitira upenyu wo kumatenga kuitira Makristu ese akazojwa. Kudari inga ndi Jesu, Makristu o kuzojwa anodikana kusiya muviri wawo wo kunyama kuti vaashire mupocero wavo wo kumatenga.—Vahe. 10:​19, 20; 1 Vak. 15:50. w23.10 28 ¶13

Vaefraimu pavakashora Gidhiyoni, iyena wakadavira ngo njira yaushoni. (Vato. 8:​1-3) Iyena aazivi kudavira ngo kunyangajwa. Iyena wakakhombija kuti waijidodokesa ngo kupurukira kuneseka kwavo no kubhuya navo ngo kungwarira kwese no kuvaita kuti vanyarare. Vakuru vano uzivi vanotevejera Gidhiyoni ngo kunasa kupurukira no kudavira ushoni kudari vakashohwa. (Jako. 3:13) Ngo kuita kudaro zvinoita kuti ungano ive no runyararo. Gidhiyoni paakasimbhwa ngo vamweni ngo kunyisa kwaakaita Vamidhiyani, iyena wakapa rukujo Jehovha. (Vato. 8:​22, 23) Vakuru vangatevejeresa kudini Gidhiyoni nyamasi uno? Vanodikana kupa rukujo Jehovha pa zviro zvavanoita. (1 Vak. 4:​6, 7) Inga muezaniso, mukuru paanosimbhwa ngo kunasa kwake kujijisa ushoni, anodikana kukhombija kwazvinovha zvaanojijisaro, mu Bhaibheri kana kujijiswa kwatinoithwa ngo sangano ra Jehovha. Vakuru nguva jese vanodikana kujivona pacavo kuti vari kujikuja kana kuti haiwa. w23.06 4 ¶7-8

Kudari zvatakumbira Jehovha azvizivi kuitika, tingajivhujisa kudari: ‘Kureva kuti ndiri kukumbira ciro caushoni?’ Itusu nguva jimweni tinorangarira kuti tinoziva kuti ngozvapi zvaushoni kwatiri. Kangaije zvatiri kukumbiraro pakufamba ko nguva azvizovi zvaushoni kwatiri. Kudari tiri kuita mukumbiro kuti titonge shwiro iri yese, kangaije kungava no njira jimweni jakanaka kuti titonge shwiroyo. Cimwenizve, zviro zvimweni zvatinomukumbira azvizwirani no kuda kwake. (1 Joh. 5:14) Rangariranyi ngo muezaniso wo vabari vakakumbira kuna Jehovha kuti mwana wavo aenderere mberi ari mucokwadi. Zvakadari inga kuti apana cakashata pacikumbiro ici. Asi Jehovha narini aazovangiriji mundhu kuti amushandire. Iyena anoda kuti tese kubatanijavo no vana vedu tikhete kumushandira. (Dhot. 10:​12, 13; 30:​19, 20) Ngo kudaro, kusiyapo kukumbira Jehovha kuti mwana aenderere mberi ari mu cokwadi, vabari vangakumbira kuti Jehovha abesere mwana wavo abaiwe mwoyo ngo cokwadi nokuda kuti Jehovha ave shamwari yake.—Maz. 22:6; Vaef. 6:4. w23.11 21 ¶5; 23 ¶12

Ngenyi zvinosisira kutondhoja hama no hambzaji jedu? Bhuku rimweni rinosanangura gama rakashandiswa ndi Pauro kuti “kutondhoja” recirevera “kugara pamutivi po mundhu paanonga ecihwisana no zvineso.” Ngo kudaro, patinovangisa hama jedu no kujibesera, tinonga tecijimusa kuti jienderere mberi jecifamba mugwanja ro upenyu. Patinokumbatira hama jedu kana kuti hambzaji tecicema najo, tinokhombija kuti tinojida maningi. (2 Vak. 7:​6, 7, 13) Ari wese paanozwira unyasha mundhu ari kutambujika, anozoda kumuvangisa no kumunyaraja. Angazviitisa kudini? Cokutanga, anovazwira unyasha perapo ovatondhoja. Vonanyi kuti Pauro wakaezanisira kudini unyasha unopa Jehovha no kutitondhoja kwaanoita. Pauro wakananga kuti Jehovha ndi “Baba vakazara ngo usizi na Mwari anotondhoja vandhu vari pa mugariro jiri jese.”—2 Vak. 1:3. w23.11 9-10 ¶8-10

Vajiji vese va Jesu vanozosongana no matambujiko. Vonanyi muezaniso wa mupostori Pauro. Iyena wakavhunja kudari Makristu o ku Tesaronika: “Patainga na imwimwi, taimuvhunja kuti tinozotambujika, izvi ndizvona zviri kuitika.” (1 Vat. 3:4) Iyena wakavhunjazve kudari Makristu o ku Korinte: “Hama, itusu atidi kuti mugare mucikazivi matambujiko atakasongana nawo . . . Itusu takatambujika maningi kupinda simba redu, tainga toda kufa.” (2 Vak. 1:8; 11:​23-27) Nyamasi uno, itusu tingaveteravo kusongana no matambujiko ari ese. (2 Tim. 3:12) Makamboteverehwa no kushohwa ngo ndava yo rutendo wenyu kuna Jesu? Kureva kuti makambova no zvineso kubasa ngo ndava yo kugondeka kwenyu? (Vahe. 13:18) Kana makamboteverehwa ngo utongi ngo kucumaera ngo pamusoro po vetero yenyu? Azvinenyi kuti mukhaindinyi wo matambujiko atiri kusongana nawo, mupostori Pauro wakananga kuti itusu tingadakara. w23.12 10-11 ¶9-10

Jakobe wakasongana no zvineso zvakawanda. Vana vaviri va Jakobe, Simeyau na Revhi, vakaviisa zvineso ku mbhuri yavo no kushoresa zina ra Jehovha. Kusiyapo zvondhozvo, Rakeri mukaji waidiwa maningi ndi Jakobe wakafa paainga ecibara mwana wo cipiri. Cimwenizve, ngo ndava yo njara yainga yakakura maningi, Jakobe wakatodikana kuthutha kuti aende ku Ejipita paainga wa harahwa. (Gen. 35:​16-19; 37:28; 45:​9-11, 28) Pikija zvakadaro, Jakobe aazivi kuruza rutendo hwake kuna Jehovha no kuzvigondiso Zvake. Cimwenizve, Jehovha wakavonesa kuna Jakobe kuti iyena wainga ecitendehwa ndiyena. Inga muezaniso, Jehovha wakakomborera Jakobe kudivi ro kunyama. Amborangariranyi mudakaro wakava na Jakobe, Jehovha paakaita kuti iyena asonganezve no mwana wake Josefa uwo waairangarira kuti wainga akafa kare. Ushamwari wakavanga wainga na Jakobe na Jehovha, wakamubesera kuti iyena akwanise kubudirira pa zvineso zvaisongana nazvo. (Gen. 30:43; 32:​9, 10; 46:​28-30) Patinova no ushamwari wakavanga na Jehovha tinokwanisa kucungirira zvineso zvatinosongana nazvo zvotainga ticikaveteri. w23.04 15 ¶6-7

Pana Nduyo 23, Dhavhidhi wakakhombija kuthemba kwake kuti Jehovha waimuda no kumutaja. Iyena wakatara ngo pamusoro po ushamwari hwophedo hwaainga nahwo no Muhavisi wake Jehovha. Dhavhidhi waijizwa akajiviririka ecisiya kuti Jehovha amutungamirire, nokutizve iyena Waimuthemba mukuperera. Dhavhidhi waiziva kuti Jehovha waizomukhombijira rudo hwake njiku jese. Ngenyi Dhavhidhi wainga nokuthemba uku? Dhavhidhi wakavona kuti Jehovha waimutaja nguva jese ngokuti zvese zvaaida waizviwana. Ngo ndava yazvo, Dhavhidhi waiziva kuti Jehovha wainga shamwari yake nokutizve waimutendera. Ndiyo ndava, iyena waizviziva kuti azvinenyi no zvaizoitika kumbejiyo, Jehovha mukuvo wese waizomutaja. Kuthemba kwainga na Dhavhidhi ku rudo hwa Jehovha kwainga no simba guru maningi kupinda kuneseka kuri kwese hako, cimwenizve, Jehovha waida kuti agare akadakara mukuvo wese.—Nduy. 16:11. w24.01 29 ¶12-13

Kuvhira mu Hondo Yocipiri yo Nyika yese, vandhu va Jehovha vo mu nyika jakawanda vakakwanisa kucumaera no kubusa runyararo no rusujunuko. Kunasa kunanga, vandhu vazinji vakaziva Jehovha. Vashandiri vake vaciri kwenderera mberi vecicumaera mu nyika yese. Nyamasi unovo, Mukhumbi Unotonga uri kwenderera mberi wecitevera ndhungamiriro ja Kristu. Ivona vanoita zvondhozvo ngo kusotesesa kuti zvivaringo zvavo zvinozwirana no zvinodiwa ndi Jesu. Kunja kwa zvondhozvo, vavonereri vo ndharaundha no vakuru vanoshandiswa kuti vape ndhungamiriro ku ungano. Vakuru vokuzojwa vari ku “mukono muho” wa Jesu Kristu. (Apok. 2:1) Zvakajeka kuti vakuru vese ndi vandhu vacizivi kukwana ivona vangatoposa. Mosi na Joshuwa vaitoposavo nguva jimweni nee vapostori vaitoposavo. (Zviv. 20:12; Josh. 9:​14, 15; Varo. 3:23) Pikija zvakadaro, itusu tingakwanisa kuvona kuti Jesu ari kwenderera mberi ecitungamirira muranda wakagondeka no wakangwara no vakuru. Iyena anozoenderera mberi ecishandisa vanarume ava. Ngo kudaro, itusu tino mathangwe akakwana kuti tithembe ndhungamiriro jatiri kupuwa ndi Jesu ecishandisa vanarume ava vakagondeka. w24.02 23-24 ¶13-14

Itusuvo nyamasi uno, tingakhombija kukuja Jehovha ngo kubhuya naye ngo njira yaushoni, yo rudo no yokubongesera. Patinonga tiri mu basa rokucumaera cinangwa cedu ngocokuti vandhu vaviye kuna Jehovha nokuvabesera kuti vavone kuti Jehovha ndi Baba vano rudo. (Jako. 4:8) Kwatiri i cidakajiso cikuru kukhombija vandhu kuvhira mu Bhaibheri kuti Jehovha ndi Baba vano rudo, vakarungama, vano uzivi, simba nokutizve iyena anomugariro jimweni jinoshamaisa. Njira imweni yokukuja Jehovha no kumudakajisa, ngo yokumutevejera patinonga tecimushandira. Patinoita kudaro, tinonga takaparajana no nyika ino yakashata. Ngo kudaro, vandhu vanozovona kuti itusu takasiyana no vazinji no kutojivhunjisa kuti ngenyi. (Mat. 5:​14-16) Patinonga tecipona navo njiku no njiku tinozokwanisa kuvasanangurira kuti ngenyi takasiyana no vamweni. Inga muviyo, vandhu vamweni vanozobatikana pakujijira zvizinji ngo pamusoro pa Jehovha. Patinokuja Jehovha ngo njira iyi, iyena anozodakara maningi.—1 Tim. 2:​3, 4. w24.02 10 ¶7

Kuti muve Mukristu wakaivha munodikana kujijira kuva no mugariro jaushoni. Mugariro iji jinozomubesera kuti mukwanirise mabasa amakagajwa mu ungano no kuwana basa rinozomubesera kuti muenderere mberi mecitaja zvinodiwa zvo mbhuri yenyu. Cimwenizve, izvi zvinozomubeserazve kuti muve no ushamwari wakanaka no vamweni. Inga muezaniso, jijanyi kuverenga no kutara ushoni. Bhaibheri rinonanga kuti kuverenga Soko ra Mwari njiku jese no kurangarijisisa, zvinobesera mwanarume kuti ave no mudakaro no kubudirira pa zvese zvaanoita. (Nduy. 1:​1-3) Kuverenga Bhaibheri njiku jese zvinozomubesera kuti munase kuziva manera a Jehovha okurangarira no kumubesera kuti munase kurangarira ushoni no kujijira kushandisa ndhungamiriro jo mu Bhaibheri. (Maz. 1:​3, 4) Ungano inoda hama jinonasa kujijisa kuti vapekeje ndhungamiriro no mazano akacijikira mu Bhaibheri. Kudari mukaziva kuverenga nokutara ushoni zvinoita kuti muzokwanise kunasirira ushoni hurukuru jenyu no kunasirira ushoni mupinguro jinozovangisa rutendo wo hama. Zvamunotariraro zvinozomubesera kuti muvangise rutendo hwenyu no kuvangisavo vamweni. w23.12 26-27 ¶9-11

Pamunonga mecithya rangarijisisanyi zvinozoita Jehovha kumbejiyo apo Sathana akazoparajwa. Kukhombijihwa kumweni kwakaithwa pa gungano ro muthundhu mu gore ro 2014 kwakakhombija manera atingarangarijisisa ngo mbhuri imweni yakabhuya masoko anowanika mu bhuku ra 2 Timoti 3:​1-5 ngo pamusoro po manera aunozova upenyu mu nyika imbza. Iyona yakati: “Mu nyika imbza tinozova no mukuvo jinozodakajisa maningi. Vandhu vanozodanana ngo cavo, vanozodisisa zviro zvokumujimu, vanozova vanojidodokesa, vanozwira vabari, vanobonga, vakagondeka, vanoda ukama, vanozwirana no vamweni, vanobhuya zvaushoni kuno vamweni, vanojibata, vandhu vakanaka, vanoda zvaushoni, vanothemba vamweni, vandhu vacikajikuji, vanodisisa zvinodakajisa Mwari, vanonamata Jehovha, vanorarama mukuzwirana no zvaanoda iwewe garai phedo navo.” Imwimwi munobhuya no ukama hwenyu kana kuti hama no hambzaji jenyu ngo pamusoro po manera unozova upenyu mu paradhiso? w24.01 6 ¶13-14

Zvinonyaraja maningi kuziva kuti Jehovha anotendera vandhu vake inga cikwata. Bhaibheri rinoti: “Jehovha anodakarira vandhu vake.” (Nduy. 149:4) Kazinji vamweni vanosuruvara, voguma pakujivhunjisa kudari: ‘Jehovha anonditendera pacangu?’ Vashandiri vazinji vakagondeka va Jehovha vo mu nguva jokare, vakambohwisanavo no murangariro jakasiyana-siyana. (1 Sam. 1:​6-10; Job. 29:​2, 4; Nduy. 51:11) Bhaibheri rinonasa kujekesa kuti vandhu vacizivi kukwana vangatendehwa ndi Jehovha. Kuitisa kudini? Tinodikana kuva no rutendo kuna Jesu no kubhabhatijwa. (Joh. 3:16) Ngokuita kudaro, tinozokhombija pambhene kuti takhauya ku zvishaishi zvedu no kuita mbhiko kuna Mwari kuti tinozoita kuda kwake. (Maba. 2:38; 3:19) Jehovha anodakara maningi patinoita mudanyu iji kuti tisakurire ushamwari hwedu naye. Patinonga tecienderera mberi teciita zvese zvatinokwanisa kuti tikwanirise mbhiko yatakaita, Jehovha anotitendera nokutivona inga shamwari jake jo phedo—Nduy. 25:14. w24.03 26 ¶1-2

Tingatevejera muezaniso wo vajiji kudari utongi ukatirambisa kucumaera. Tingathemba kuti Jehovha anozotibesera kuti tikwanirise basa redu ro kucumaera. Ngo kudaro, kumbiranyi cicunge, uzivi no besero rinovha ka Jehovha pa kuhwisana no zvineso. Vazinji vedu tiri kuhwisana no ndhendha, kufihwa ngo vadiwa vedu, zvineso pa mbhuri, kuteverehwa no zvimwenivo. Zviro zvakadari inga mutungu no hondo, zvakaita kuti tinesehwe kucungirira pa zvineso izvi. Vhunjanyi Jehovha zvamuri kuzwaro. Muvhunjenyi zvamuri kusongana nazvo inga manera amaizovhunja shamwari yenyu yo phedo. Ivanyi no cokwadi cokuti Jehovha ‘anozomubesera.’ (Nduy. 37:​3, 5) Kuita mukumbiro “mukuvo wese” kunozotibesera kuti tikwanise kucungirira patinotambujika. (Varo. 12:12) Jehovha anoziva zviri kusongana no vanamati vake, iyena “anozwa kukhuwa kwavo.”—Nduy. 145:​18, 19. w23.05 5-6 ¶12-15

Patinonga tecida kutema zvivaringo zvinosisira, tinodikana “kuzwisisa zvinoda Jehovha” toita mukuzwirana nazvo. (Vaef. 5: 17) Patinopsaka ndhungamiriro jinodikanwa kushandiswa pamugariro wedu, kunasa kunanga tinonga tecipsaka murangariro ja Mwari ngo pamusoro po shwiroyo. Mukuwo watinoshandisa ndhungamiriro jake kangaije tinozotema zvivaringo zvaushoni. Sathana muvengi wedu anoda kuti itusu tibatikane pa mabasa o nyika totama nguva yokushandira Jehovha. (1 Joh. 5:19) Mukristu angatanga kubatikana pakupsaka mare, jijo yo pamusoro-soro no basa, kusiyapo kubatikana pa mukana jaanajo kuti ashandire Jehovha. Izvi pazvinoitika zvinovonesa pambhene kuti iyena wapsaswa ngo murangariro wo nyika. Zvakajeka kuti kuita izvi azvizivi kushata asi atidikani kuzvidira pakutanga mu upenyu hwedu. w24.03 24 ¶16-17