Sigui Konfia den e Stat Permanente

1. Kiko Hesus a bisa ku lo pasa ku Herúsalèm?

UN PAR di dia promé ku Hesukristu muri, el a duna su siguidónan un profesia. El a atvertí nan ku lo yega e dia ku un ehérsito lo rondoná Herúsalèm. (Luk. 21:20) Anto ku ora nan mira esei, nan mester a bai mesora for di Hudea.—Luk. 21:​21, 22.

2. Ki konseho Pablo a duna e rumannan na Hudea i Herúsalèm?

² Un par di aña promé ku e ehérsito a bini, Apòstel Pablo a skirbi e rumannan na Hudea i Herúsalèm un mensahe importante. E karta, konosí awe komo Hebreonan, tabatin konsehonan ku lo a yuda e rumannan ta prepará pa bandoná Herúsalèm. Pa nan por a skapa e destrukshon dje stat, nan mester tabata dispuesto pa bandoná nan kas- i negoshinan. P’esei Pablo a kòrda nan: “Nos no tin un stat permanente, ma nos ta spera ansiosamente riba e stat ku tin ku bini.”—Heb. 13:14.

3. Kiko “e stat ku tin berdadero fundeshi” ta, i dikon nos ta sigui konfia den dje?

³ Ora ku e rumannan a bandoná Herúsalèm i Hudea, hopi hende kisas a chèrcha nan òf bisa nan ku ta ko’i kèns nan ta hasi. Pero nan desishon a salba nan bida. Awe tambe hende ta pensa ku nos ta kèns pasobra nos no ta pone nos konfiansa den hende ni buska siguridat den e mundu akí. Dikon nos ta hasi esei? Pasobra nos sa ku destrukshon di e mundu malbado akí ta na kaminda. P’esei, nos ta sigui buska, òf konfia, den Dios su Reino pasobra e ta “e stat ku tin berdadero fundeshi.”a (Heb. 11:10; Mat. 6:33) Bou di kada suptema di e artíkulo akí nos lo wak: (1) kon Pablo su konseho a yuda e rumannan di promé siglo pa sigui konfia den Dios su Reino, (2) kon Pablo a prepará nan pa loke tabata na kaminda i (3) kon su konseho ta yuda nos awe.

KONFIA DEN ESUN KU HAMAS LO BANDONÁ BO

4. Menshoná e motibunan dikon Herúsalèm tabata importante pa e rumannan.

⁴ Tabatin vários motibu pakiko e rumannan di promé siglo mira Herúsalèm komo un stat importante. Ei a funda e promé kongregashon kristian na mundu i e kuerpo gobernante tabata einan. Ademas, hopi ruman tabatin kasnan i hopi pertenensia den e stat. Pero no ta for di Herúsalèm so Hesus a bisa su siguidónan ku nan tabatin ku sali, ma for di henter Hudea.—Mat. 24:16.

5. Kon Pablo a prepará e rumannan pa loke tabata na kaminda?

⁵ Pablo kier a prepará e rumannan pa loke tabata na kaminda. P’esei el a kòrda nan ku pa Yehova, e tèmpel, e saserdotenan i e sakrifisionan ofresí na Herúsalèm no tabata importante mas. (Heb. 8:13) Ademas, mayoria di hudiu na Herúsalèm a nenga e Mesías. Pues pa adorá Yehova, hende no tabatin nodi di bai na e tèmpel na Herúsalèm. Anto pronto e tèmpel ei lo a ser destruí.—Luk. 13:​34, 35.

6. Dikon e rumannan tabatin mester di e konseho ku Pablo a duna nan na Hebreonan 13:5 i 6?

⁶ Tempu ku Pablo a skirbi Hebreonan, Herúsalèm tabata un stat próspero. Un eskritor romano di e tempu ei a bisa ku Herúsalèm tabata e stat di mas famoso den Oriente. Tres biaha pa aña hudiunan di vários pais tabata bai Herúsalèm pa selebrá e fiestanan. Ora nan a yega nan tabata gasta hopi sèn. Anto e situashonnan akí a pone ku algun ruman probablemente lo a traha hopi sèn tambe. Kisas ta p’esei Pablo a bisa nan: “Laga boso manera di biba ta liber di amor pa plaka, i keda kontentu ku loke boso tin.” Djei el a sita un teksto ku a resaltá un garantia ku Yehova a duna na kada un di su sirbidónan: “Hamas lo mi bandoná bo, i hamas lo mi laga bo desampará.” (Lesa Hebreonan 13:​5, 6; Deu. 31:6; Sal. 118:6) Tabata masha importante pa e rumannan na Herúsalèm i Hudea kòrda riba e promesa ei. Pasobra djis un par di aña despues ku nan a haña Pablo su karta, nan mester a laga nan kas, negoshi i mayoria di nan pertenensianan. Nan mester a kuminsá di nobo na un otro kaminda i esei no tabata fásil.

7. Dikon for di awor nos tin ku siña konfia Yehova mas?

⁷ Loke nos ta siña: Un djis akí “tribulashon grandi” lo kuminsá i e mundu malbado akí lo ser destruí. (Mat. 24:21) Anto meskos ku e rumannan di promé siglo, nos mester keda lantá i prepará. (Luk. 21:​34-36) Durante tribulashon grandi, nos por pèrdè nos kas i tur loke nos tin. E momento ei, nos mester konfia kompletamente ku Yehova hamas lo bandoná nos. Pero for di awor, nos por mustra unda nos konfiansa ta. Puntra bo mes: ‘Mi desishon- i metanan ta mustra ku mi ta konfia den plaka òf den Yehova?’ (1 Tim. 6:17) Ta bèrdat ku nos por siña for di loke a pasa den promé siglo, pero e “tribulashon grandi” ku ta na kaminda ta algu ku nunka a yega di pasa promé. Kon nos lo haña sa presis kiko nos tin ku hasi ora e kuminsá?

OBEDESÉ “ESNAN KU TA DIRIGÍ”

8. Ki instrukshon Hesus a duna su siguidónan?

⁸ Un par di aña despues ku e rumannan na Hudea a haña Pablo su karta, nan a mira e ehérsito romano rondoná e stat na Herúsalèm. Esei a indiká ku pronto e stat lo a ser destruí i ku ta ora pa hui for di Herúsalèm i Hudea. (Mat. 24:3; Luk. 21:​20, 24) Pero hui bai unda? Hesus a bisa: “Laga esnan ku ta na Hudea hui bai den seru.” (Luk. 21:21) Pero kua di e serunan? Pasobra ta basta seru tabatin den e área rònt di Hudea.

9. Dikon kisas e rumannan tabata puntra nan mes ta kua seru nan mester a hui bai na dje? (Wak e mapa.)

⁹ Nan por a hui bai e serunan di Samaria, e serunan na Galilea, seru Hèrmòn, e serunan di Líbanòn i e serunan ku tabata na e otro banda di riu Yordan. (Wak e mapa.) Vários stat den e área yen di seru ei a parse safe. Por ehèmpel, e stat Gamla a parse safe pasobra e tabata riba un seru haltu i no por a yeg’é fásil. Algun hudiu a pensa esei i a bai einan. Pero e romanonan a ataká Gamla i destruyé i hopi habitante a pèrdè nan bida.b

10-11. (a) Kon Yehova a guia e rumannan? (Hebreonan 13:​7, 17) (b) Dikon tabata bon ku e rumannan a obedesé esnan ku tabata dirigí? (Wak e plachi.)

¹⁰ Ta parse ku Yehova a usa “esnan ku ta dirigí” e kongregashon pa guia e rumannan. E historiadó Eusebio a skirbi ku Dios a revelá na algun ruman hòmber di e kongregashon na Herúsalèm ku e rumannan tabatin ku hui for di Herúsalèm i bai Pela, un stat na Perea. Pela tabata un bon lugá pa e rumannan bai. Por a yeg’é basta fásil pasobra e no tabata leu for di Herúsalèm. Tambe, mayoria di habitante no tabata hudiu, pues lo no tabatin hudiu fanátiko ku kier a purba di bringa kontra e romanonan.—Wak mapa.

¹¹ E rumannan ku a “obedesé esnan ku ta dirigí” e kongregashon a hui bai e serunan na Pela. (Lesa Hebreonan 13:​7, 17.) Obedensia a skapa nan bida. Nan a konfia den Dios su Reino, “e stat ku tin berdadero fundeshi,” i Yehova no a laga nan na kaya.—Heb. 11:10.

12-13. Kon Yehova a guia su pueblo durante tempunan hopi difísil?

¹² Loke nos ta siña: Yehova ta usa e rumannan ku ta dirigí pa duna nos guia spesífiko. Den Beibel nos por lesa yen di relato kaminda Yehova a usa hendenan fiel pa guia su pueblo durante tempunan hopi difísil. (Deu. 31:23; Sal. 77:20) Anto awe nos tambe a mira ku Yehova ta usa rumannan ku ta dirigí pa guia nos.

¹³ Por ehèmpel, ora pandemia di COVID-19 a dal aden, “esnan ku ta dirigí” a manda instrukshon pa e ansianonan. E instrukshon a splika kon mester reuní i sigui adorá Yehova. Un par di luna despues, pa promé biaha den historia nos a tene kongreso via Internet, televishon i radio na 500 idioma. Durante henter e pandemia, nos tabatin kuminda spiritual na abundansia i a keda uní. P’esei, sea ki prueba bin den futuro, nos ta konvensí ku Yehova lo sigui yuda esnan ku ta dirigí tuma desishon sabí. Te asina leu nos a mira ku nos mester konfia Yehova i obedesé su instrukshonnan pa nos por ta prepará pa e tribulashon grandi i aktua sabí den e tempu hopi difísil ei. Pero ban wak ki otro kualidat nos mester tin.

STIMA OTRO I MUSTRA HOSPITALIDAT

14. Segun Hebreonan 13:​1-3, ki kualidatnan e rumannan mester tabatin promé ku e destrukshon di Herúsalèm?

¹⁴ Semper e rumannan na Herúsalèm i Hudea tabata stima otro. (Heb. 10:​32-34) Pero e lastu añanan promé ku e destrukshon di Herúsalèm, nan a mester a “stima otro” i “mustra hospitalidat” mas ku nunka.c (Lesa Hebreonan 13:​1-3.) Nos tambe stima nos rumannan, pero durante e tribulashon grandi nos tin ku stima otro mas ainda.

15. Dikon e rumannan hebreo mester a stima otro i sea hospitalario?

¹⁵ E ehérsito romano a rondoná Herúsalèm, pero diripiente nan a retirá. Mesora e rumannan a hui bai ku masha tiki pertenensia. (Mat. 24:​17, 18) Nan a yuda otro tantu durante nan biahe den e serunan komo ora nan a yega Pela. Hopi di nan tabatin “nesesidatnan urgente” pa kuminda, paña i lugá di biba. Pero nan a yuda otro, mustrando asina hospitalidat i ku di bèrdat nan tabata stima otro.—Tito 3:14.

16. Kon nos ta stima nos rumannan ku mester di nos yudansa? (Wak e plachi.)

¹⁶ Loke nos ta siña: Nos stima nos rumannan, p’esei nos ta yuda nan. Algun di nan a bira refugiado debí na guera i desaster natural. Di buena gana, hopi di nos ta yuda nan ku nan nesesidatnan spiritual i material. Un ruman muhé di Ukrania, ku a hui debí na guera, a bisa: “Nos a sinti kon Yehova ta dirigí nos i yuda nos. Nos rumannan na Ukrania a yama nos bon biní i yuda nos masha bon mes. Na Hungria i awor na Alemania tambe nos rumannan a yuda nos masha bon mes!” Ora nos mustra hospitalidat na nos rumannan i ta kuida nan, nos ta trahando huntu ku Yehova.—Pro. 19:17; 2 Kor. 1:​3, 4.

17. Dikon ta masha importante pa nos stima otro i mustra hospitalidat?

¹⁷ Nos por tin sigur ku den futuro, nos lo tin ku yuda otro mas ku awor. (Hab. 3:​16-18) P’esei Yehova ta siñando nos kon pa stima i mustra hospitalidat. E dos kualidatnan ei lo ta masha importante durante e tribulashon grandi.

LOKE TA NA KAMINDA

18. Kon nos por imitá e rumannan hebreo di promé siglo?

¹⁸ E rumannan ku a obedesé i hui bai e serunan a skapa di loke a pasa ku Herúsalèm. Aunke nan a bai laga tur kos, Yehova a kuida nan. Nunka el a bandoná nan. Ta bèrdat ku nos no sa kon presis tur kos lo pasa den futuro, pero Hesus a spièrta nos pa ta kla pa obedesé. (Luk. 12:40) Nos por apliká tambe loke nos a siña for di e karta di Pablo na e rumannan hebreo. Anto Yehova mes a primintí kada un di nos ku nunka lo e bandoná nos. (Heb. 13:​5, 6) Pues laga nos sigui konfia den Dios su Reino, e stat permanente, i disfrutá di su maravioso bendishonnan pa semper.—Mat. 25:34.