Olketa Reference for Laef and Ministry Meeting Buk
© 2025 Watch Tower Bible and Tract Society of Pennsylvania
JULY 7-13
GUD SAMTING FROM BIBLE PROVERBS 21
Olketa Wise Principle for Wanfala Hapi Marit
Hao Nao Iu Savve Disaed Long Wisefala Wei?
Hem no wise for kwiktaem disaedem samting. Proverbs 21:5 givim warning: “Olketa plan bilong man wea careful bae kasem reward, bat evriwan wea kwiktaem tumas bae garem need.” Olsem example, olketa teenager wea feeling nao muvim olketa shud givim moa taem for tingting gud firstaem and no kwiktaem for marit. Sapos nomoa, olketa bae kasem wanem William Congreve, man from England for raet long start bilong mek-18 century, talem wea tru evribit: “Pipol wea kwiktaem for marit bae garem moa taem for feel sorre abaotem datwan.”
g-E 7/08 7 ¶2
Hao for Buildim Wanfala Successful Marit
Showimaot wei for hambol. “Iufala mas no laek raoa olowe and mas no praod, bat iufala mas hambol and ting lo olketa narawan olsem olketa winim iufala.” (Philippians 2:3) Staka problem kamap bikos marit partner praod and trae for blamem partner blo hem instead for hambol for faendem wei for stretem datwan between tufala. Wei for hambol savve helpem iu for stap klia lo wei for evritaem tingse iu nao stret lo eni raoa.
“Hapi Witim Waef wea Iu Tekem Taem Iu Young”
13 Waswe sapos wei wea tufala deal witim each other nao mekem hevi kamap insaed marit? For savve hao for stretem datwan hem minim tufala mas waka hard. Olsem example, maet hem kamap wei bilong tufala for tok nogud long each other. (Proverbs 12:18) Olsem iumi storyim long firstfala article, wei for duim olsem savve barava spoelem marit. Wanfala proverb long Bible hem sei: “Hem moabeta for man stap long bush winim wei for stap witim waef wea toktok tumas and mek trabol.” (Proverbs 21:19) Sapos iu wanfala waef and marit bilong iu olsem, askem iuseleva, ‘Waswe, wei bilong mi hem mekem hem hard for hasband bilong mi laek stap witim mi?’ Bible hem talem olketa hasband olsem: “Gohed for lovem waef bilong iufala and no kros tumas long olketa.” (Colossians 3:19) Sapos iu wanfala hasband, askem iuseleva, ‘Waswe, waef bilong mi lukaotem love from narawan bikos mi no showimaot love long hem?’ Hem tru, iumi no iusim olketa samting hia olsem excuse for duim dirty fasin. Bat wei wea kaen samting olsem savve happen hem gudfala reason for storyim olketa problem tugeta.
Faendem Gudfala Point
Olketa Vision and Profesi Abaotem Kingdom Olketa Fulfill
9 Distaem Jesus hem wanfala King wea garem bigfala paoa. Hem no raed antap wanfala young donkey nao. Bible storyim hao hem raedem wanfala horse, wea long Bible diswan piksarem war. (Proverbs 21:31) Long Revelation 6:2 hem sei: “Lukim! wanfala white horse; and man wea sidaon antap long hem garem wanfala bow; and olketa givim hem wanfala crown, and hem go aot for win and for winim faet bilong hem.” Nara samting moa, David, man wea raetem psalm hem sei olsem abaotem Jesus: “Stik bilong strong bilong iu, Jehovah bae sendem go aot from Zion, and sei: ‘Go and rul midolwan olketa enemy bilong iu.’”—Psalm 110:2.
JULY 14-20
GUD SAMTING FROM BIBLE PROVERBS 22
Olketa Wise Principle for Trainim Pikinini
Waswe, Bae Olketa Pikinini blo Iu Servem Jehovah Taem Olketa Growap?
7 Sapos iu wanfala marit couple and iu laek for garem pikinini, askem iuseleva: ‘Waswe, mi wanfala wea hambol, and garem spiritual tingting wea Jehovah savve chusim mi for lukaftarem wanfala niu laef wea spesol?’ (Sams 127:3, 4) Sapos iu wanfala parents, askem iuseleva: ‘Waswe, mi teachim pikinini blo mi for luksavve hao wei for waka hard hem important?’ (Eklesiastes 3:12, 13) ‘Waswe, mi traem best for helpem pikinini blo mi for luksavve lo olketa danger wea savve spoelem hem, wea hem maet feisim lo world blo Satan?’ (Provebs 22:3) Hem hard for iu protectim pikinini blo iu from evri challenge wea hem maet feisim. Datwan hem no isi. Bat iu savve redyim olketa for olketa problem wea olketa savve feisim lo laef, taem iu teachim olketa lo kaenfala wei lo hao olketa savve depend lo Bible for advaes. (Readim Provebs 2:1-6.) Olsem example, sapos wanfala relative hem stop for worshipim Jehovah, helpem pikinini blo iu for luksavve why hem important for gohed faithful lo Jehovah. (Sams 31:23) Or sapos samwan wea iu lovem hem dae, showim lo olketa pikinini blo iu hao for iusim Bible for deal witim wei for sorre and for garem peace.—2 Cor. 1:3, 4; 2 Tim. 3:16.
Parents, Trainim Pikinini blo Iu for Lovem Jehovah
17 Start for trainim pikinini taem hem smol yet. Taem parents barava start early for trainim pikinini, hem bae moabeta. (Provebs 22:6) Tingim Timothy, wea gogo witim aposol Paul taem hem young. Eunice, mami blo Timothy, and granmami blo hem Lois, teachim hem taem hem “baby yet.”—2 Tim. 1:5; 3:15.
18 Nara couple lo Côte d’Ivoire, Jean-Claude and Peace, olketa win for teachim sixfala pikinini evriwan for lovem and servem Jehovah. Wanem nao helpem tufala for win? Tufala followim example blo Eunice and Lois. Datfala couple sei, “Mitufala teachim toktok blo God lo olketa pikinini blo mitufala taem olketa baby yet, mitufala start no longtaem bihaen olketa born.”—Diutronomi 6:6 7.
19 Wanem nao hem minim for teachim Toktok blo Jehovah lo pikinini blo iu? Lo Diutronomi 6:7 datfala Hebrew toktok for teach, hem minim for “teachim and remindim olketa thru lo wei for repeatim samting evritaem.” For duim datwan, parents need for spendem staka taem witim pikinini. Maet parents savve feel nogud taem olketa repeatim evritaem sem toktok lo pikinini. Nomata olsem, parents savve ting lo diswan olsem wanfala wei for helpem pikinini minim Toktok blo God and for followim datwan.
Parents—Showimaot Gudfala Example for Pikinini Bilong Iu
Hem tru, olketa pikinini bae act olsem pikinini, and samfala taem wei bilong samfala hem for bighed. (Genesis 8:21) Wanem nao parents savve duim? Bible hem sei: “Krangge fasin hem stap insaed long heart bilong wanfala boy; stik bilong discipline nao bae aotem datwan from hem.” (Proverbs 22:15) Samfala ting long diswan olsem wanfala wei wea hem ova tumas for deal witim pikinini wea no fitim taem bilong iumi. For tok stret, Bible hem againstim raf fasin and enikaen wei for spoelem narawan. Datfala “stik” savve piksarem wei for panisim olketa, bat tu, hem savve piksarem paoa wea parents iusim long stretfala wei, bat long wei for showimaot love and wea bae helpem pikinini for future bilong olketa for olowe.—Hebrews 12:7-11.
Faendem Gudfala Point
Hapi lo Olketa Samting wea Iumi Duim for Jehovah
11 Datfala tokpiksa helpem iumi for luksavve hem important for waka hard and duim gud eni waka iumi duim for Jehovah, and datwan nao bae mekem iumi barava hapi. So hem gud for “barava busy” lo preaching waka and lo kongregeson. (Acts 18:5; Heb. 10:24, 25) Iumi laek for prepare gud for olketa meeting mekem iumi savve givim koment wea strongim narawan, and duim gud eni student assignment wea iumi kasem lo midol week meeting. Sapos olketa askem iumi for duim eni waka lo Kingdom Hall, kam lo taem wea olketa markem and duim gud datfala waka. Tinghae and waka hard for kamap gud lo eni assignment iumi kasem. (Provebs 22:29) Taem iumi waka hard and duim gud eni waka iumi kasem, bae iumi barava hapi. (Gal. 6:4) And tu, bae iumi hapi nomata narawan kasem wanfala privilege wea iumi laekem.—Rome 12:15; Gal. 5:26.
JULY 21-27
GUD SAMTING FROM BIBLE PROVERBS 23
Olketa Wise Principle Saed lo Alcohol
Garem Balance Tingting Abaotem Alcohol
5 Waswe sapos man drinkim staka alcohol bat hem careful for nara man no luksavve hem drunk? For samfala pipol, hem hard for luksavve sapos olketa drunk nomata olketa drinkim staka alcohol. Nomata olsem, man wea tingse kaen wei olsem hem gud nomoa hem laea long hemseleva. (Jeremiah 17:9) Gogo, maet hem start for depend long alcohol and “drinkim tumas wine.” (Titus 2:3) Wanfala woman for raet, Caroline Knapp, hem sei olsem abaotem wei wea man gogo for depend long alcohol: “For kamap man wea depend long alcohol hem samting wea isisi nomoa kamap, hem no samting wea happen kwiktaem.” Tru nao, wei for ova tumas long alcohol hem wanfala trap wea savve barava spoelem man!
6 Tingim tu disfala warning bilong Jesus: “Lukluk gud long iufala seleva, nogud heart bilong iufala kamap hevi from iufala ova tumas for kaikai and drink and from wari bilong living, and seknomoa datfala day kasem iufala kwiktaem olsem wanfala trap. From hem bae kasem evriwan wea stap long earth.” (Luke 21:34, 35) Man no need for drunk bifor hem sleep and kamap lesy—long body and tu long spiritual saed. Waswe sapos taem hem olsem, day bilong Jehovah kam nao?
it-1-E 656
Wei for Drunk
Bible barava stopem. Wei for drinkim strong drink gogo man hem drunk hem samting wea Bible hem barava stopem. Datfala wise man wea raetem buk blo Proverbs storyim klia piksa abaotem effect blo wei for ova tumas for drinkim alcohol, wea datwan hem stret witim wat science faendem. Hem talem disfala warning: “Hu nao safa? Hu nao wari? Hu nao raoa? Hu nao komplen? Hu nao garekil nating nomoa? Hu nao eye blo hem no savve lukluk gud? Olketa wea spendem staka taem for drinkim wine. Olketa wea lukaotem wine wea olketa mixim. No lukluk lo red kala blo wine. Taem hem shaen insaed kap [taem wine hem luk naes tumas, hem shaen], and hem teist naes tumas [taem hem isisi go daon followim throat]. Bikos lo end bae hem baet olsem wanfala snek, and hem savve poisonim man olsem viper snek [hem savve mekem man for sik lo body (for example, hem savve kosim cirrhosis lo liver) and sik lo tingting (savve kosim delirium tremens), and hem savve killim man dae]. Eye blo iu bae lukim olketa samting wea no real [alcohol savve affectim olketa part lo brain wea kontrolem iumi, blokem olketa for no duim waka blo olketa; olketa wei wea man no savve showim taem hem normal bae showaot; bae hem imaginim olketa samting wea no tru; hem savve storyim olketa samting gogo hem extram story; hem bae duim olketa samting wea hem savve shame for duim taem hem normal], and heart blo iu bae talem olketa nogud toktok [hem bae no hol bak for talem tingting and wat hem laek for duim].”—Pr 23:29-33; Ho 4:11; Mt 15:18, 19.
Datfala raeta gohed describem samting wea happen lo man wea drunk, hem sei: “And iu bae olsem man wea leidaon lo midol sea [hem savve experiencem feelim for konfius wea samwan wea draon hem experiencem, gogo hem no savve lo eniting], olsem man wea leidaon lo top blo mast blo ship [olsem datfala part blo ship wea hem seksek tumas, laef blo man wea drunk hem stap danger from accident, stroke, faet, and olketa nara samting]. ‘Olketa hitim mi, bat mi nating feelim nomoa. Olketa killim mi, bat mi nating savve lo datwan [hem nao wanem man wea drunk talem, hem olsem hem story lo hemseleva; hem no savve wat nao gohed raonem hem and wat olketa narawan duim lo hem]. Wat taem nao bae mi wekap? Mi needim nara drink moa [hem mas sleep mekem hem normal bak moa, bat drink hia mekem hem kamap slave and hem luk forward moa for narataem wea hem bae drink].’” Hem bae poor, from hem spendem tumas staka selen lo alcohol and tu bae no reliable and no savve duim eni waka.—Pr 23:20, 21, 34, 35.
Faendem Gudfala Point
Kwestin From Reader
Olsem example, wei wea samwan hem baonsa maet hem saen hao man hia ova tumas long kaikai, bat diswan no evritaem tru. Maet samwan hem baonsa from hem garem sik. Maet hem born kam witim wei for baonsa. Iumi shud no forgetim hao wei for baonsa hem samting wea iumi savve lukim, bat wei for ova tumas long kaikai hem kam from tingting bilong man. Baonsa hem showaot taem man garem staka gris long body bilong hem bat wei for ova tumas long kaikai hem wei for greedy. So, wei for ova tumas long kaikai hem no showaot long big bilong body bilong man bat long tingting bilong man saed long kaikai. Samwan savve garem normal size long body or maet hem barava thin bat maet hem wanfala wea ova tumas long kaikai. And tu, long difren ples long world pipol garem difren tingting long wanem size or sheip long body nao luk naes.
JULY 28–AUGUST 3
GUD SAMTING FROM BIBLE PROVERBS 24
Strongim Iuseleva for Olketa Hard Taem
it-2-E 610 ¶8
Persecution
Olketa Christian tinghae tu lo reward wea olketa wea no givap bae kasem. Jesus sei olsem abaotem datfala reward: “Olketa wea pipol persecutim olketa from olketa duim stret samting, olketa hapi, bikos Kingdom blo heven hem blo olketa.” (Mt 5:10) Knowledge blo olketa abaotem resurrection hope and knowledge abaotem Man wea provaedem datfala hope, datwan nao strongim olketa. Hem strongim olketa for loyal lo God nomata olketa man wea raf sei bae olketa killim olketa dae. And bikos olketa garem faith lo gud samting wea kamaot from dae blo Jesus, olketa no fraet for dae. (Heb 2:14, 15) Hao Christian ting lo samting hem important for helpem hem gohed faithful nomata hem kasem persecution. Bible sei: “Iufala mas garem datfala sem tingting wea Christ Jesus tu hem garem, wea . . . obeyim God go kasem taem hem dae, yes, hem dae lo wanfala post.” (Php 2:5-8) “From [Jesus] tingim datfala hapi wea hem bae kasem, datwan mekem hem for standap strong and no shame nomata hem dae lo wanfala post.”—Heb 12:2; lukim tu 2Co 12:10; 2Th 1:4; 1Pe 2:21-23.
Gohed for Hapi Nomata Long Hard Taem
12 Proverbs 24:10 hem sei: “Waswe, iu feel wikdaon taem iu kasem trabol? Bae iu no strong nao.” Nara proverb hem sei: “Taem heart hem sorre tumas, bae man hem no hapi nao.” (Prov. 15:13) Samfala Christian sorre tumas gogo olketa no savve duim nao Bible reading and ting raonem Bible. Olketa no strong for prea, and maet olketa no laek for hipap witim olketa brata and sista. Wei for gohed olsem savve spoelem iumi.—Prov. 18:1, 14.
13 Bat wei for tingim gud saed long samting bae helpem iumi for tingim olketa samting long laef bilong iumi wea savve mekem iumi hapi. David hem sei: “God bilong mi, mi hapi tumas for duim samting wea iu laekem.” (Ps. 40:8) Taem iumi kasem hard taem, iumi mas no letem diswan stopem iumi for gohed worshipim Jehovah. Wanfala samting wea iumi savve duim for no sorre tumas hem for duim olketa samting wea mekem iumi hapi. Jehovah talem iumi savve hapi taem iumi readim Bible and ting raonem evritaem. (Ps. 1:1, 2; Jas. 1:25) Iumi readim “olketa naes toktok” long Bible and herem tu long olketa meeting. Diswan savve strongim iumi and mekem iumi hapi.—Prov. 12:25; 16:24.
Kwestin From Reader
Provebs 24:16 hem sei: “Nomata trabol hemi kasem gudfala man plande taem bat hemi savve standap moa.” Waswe, disfala verse hem storyim man wea foldaon lo sin staka taem bat God hem gohed for forgivim hem?
Really, disfala verse hem no minim datwan. Bat verse hia hem storyim samwan wea foldaon and getap moa, wea minim hem gohed for feisim olketa problem bat hem no givap and hem winim datwan.
Tru nao, Provebs 24:16 hem no minim wei for “foldaon” lo sin, bat hem minim for feisim olketa problem and hard taem, wea maet kasem man staka taem. Lo disfala nogud world distaem, man wea raeteous savve feisim olketa problem saed lo health and olketa nara hard taem. Maet hem savve feisim tu wei wea gavman persecutim olketa. Bat hem savve trustim hao God bae sapotim hem and helpem hem for deal witim datwan, and hem savve winim datwan. Askem iuseleva: “Haomas taem nao iu lukim olketa servant blo God olketa winim problem blo olketa?” Why nao olsem? Bikos iumi sure hao Jehovah “oltaem hemi helpem olketa hu i garem trabol and hemi mekem strong tingting blo olketa hu i klosap for givap.”—Sams 41:1-3; 145:14-19.
Faendem Gudfala Point
Kwestin From Reader
Long bifor, sapos man laek for marit and garem pikinini, hem mas tingim diswan firstaem: ‘Waswe, mi fit for lukaftarem waef bilong mi and sapotim hem and eni pikinini wea maet mitufala garem bihaen?’ Taem hem no marit yet, hem mas waka long garden. Dastawe Today’s English Version Bible transleitim datfala scripture olsem: “No buildim haos bilong iu and startim famili sapos iu no redyim firstaem garden bilong iu and garem waka for kasem selen.” Waswe, toktok hia fitim distaem tu?
Ia. Man wea laek marit mas redi gud firstaem bifor hem marit. Sapos hem fit for waka, hem mas waka nao. Man mas waka hard for provaedem wanem famili needim, bat Bible talem hao man mas tingim feeling bilong narawan long famili and duim olketa samting for helpem olketa worshipim Jehovah tu. Sapos nomoa, pipol wea no biliv long God gud winim hem! (1 Tim. 5:8) Dastawe taem wanfala young man tingting for marit and garem pikinini, hem gud for hem ting raonem olketa kwestin hia: ‘Waswe, mi fit for provaedem wanem famili needim? Waswe, mi redi for kamap hed long famili and helpem famili for worshipim Jehovah? Waswe, bae mi evritaem duim famili study witim waef and olketa pikinini?’ Bible talem hem important tumas for hasband duim olketa samting hia.—Deut. 6:6-8; Eph. 6:4.
So young man wea laek marit mas ting raonem gud Proverbs 24:27. Young gele wea laek marit tu mas duim olsem. Hem gud for hem tingim sapos hem redi for duim waka bilong waef and mami. Young hasband and waef savve ting raonem olketa semkaen kwestin tu taem tufala tingting for garem pikinini. (Luke 14:28) Taem pipol bilong God followim kaonsel olsem long Bible, olketa bae no kasem staka nogud samting bat famili bilong olketa bae hapi.
AUGUST 4-10
GUD SAMTING FROM BIBLE PROVERBS 25
Olketa Wise Principle Saed lo Toktok wea Iumi Talem
Iumi Laekem Toktok Bilong Iumi for Mekem Jehovah Hapi
6 Why nao hem important for toktok long taem wea hem fitim? Proverbs 25:11 sei: “Toktok wea man talem long taem wea barava fitim hem naes tumas olsem olketa gold apple wea stap long silver karving.” Olketa gold apple luk naes, bat olketa barava luk naes taem olketa stap long silver karving. Long sem wei tu, maet iumi garem gudfala samting for talem long narawan. Bat sapos iumi talem datwan long taem wea barava fitim, samting wea iumi talem bae barava encouragem hem. Bae iumi storyim example long diswan.
7 Sapos iumi toktok long taem wea no fitim, maet pipol no acceptim or kasem gud samting from wanem iumi talem. (Readim Proverbs 15:23.) Olsem example, long March 2011, wanfala earthquake and tsunami distroem staka taon long east saed long Japan. Winim 15,000 pipol nao dae. Samfala famili and fren bilong staka Jehovah’s Witness tu dae. Nomata olsem, olketa Witness hia iusim Bible for helpem nara pipol wea kasem sem samting tu. Olketa brata and sista savve staka pipol long Japan olketa Buddhist and olketa no savve long Bible, so olketa luksavve hem no stretfala taem for storyim resurrection long olketa. Bat olketa talem samting for comfortim pipol hia and storyim why nao olketa nogud samting olsem happen long gudfala pipol.
Iumi Laekem Toktok Bilong Iumi for Mekem Jehovah Hapi
15 Wanem iumi talem long narawan hem important, bat hao iumi story long olketa narawan hem important tu. Pipol laekem tumas for lisin long Jesus bikos hem story kaen long olketa. (Luke 4:22) Taem iumi tok kaen long pipol, olketa bae laek for herem wanem iumi talem. (Prov. 25:15) Sapos iumi respectim olketa narawan and tingim feeling bilong olketa, bae iumi story kaen long olketa. Hem nao samting wea Jesus duim. Olsem example, taem hem lukim bigfala sekson bilong pipol wea wakabaot kam for herem wanem hem storyim, hem sorre tumas long olketa so hem “teachim olketa plande samting.” (Mark 6:34) Nomata taem pipol tok spoelem Jesus, hem no tok spoelem olketa.—1 Pet. 2:23.
16 Iumi lovem famili and olketa fren bilong iumi, bat samfala taem iumi no tok kaen long olketa bikos iumi savve gud long olketa. Maet iumi feel olsem hem olraet nomoa for no tok kaen long olketa. Waswe, Jesus feel olsem hem olraet nomoa for no tok kaen long olketa fren bilong hem? Nomoa! Taem samfala disaepol raoa abaotem hu long olketa nao hem important, Jesus tok kaen long olketa and storyim example bilong smol pikinini for helpem olketa for stretem tingting bilong olketa. (Mark 9:33-37) Olketa elder savve followim example bilong Jesus taem olketa tok kaen long man wea olketa givim kaonsel long hem.—Gal. 6:1.
w95 4/1 26 ¶8
Muvim Each Other for Love-Im and Duim Gudfela Work—Hao?
8 Taem yumi servim God bilong yumi, yumi everywan savvy showim aot example wea muvim each other. Jesus barava muvim olketa wea listen long hem. Hem laekem tumas datfela work bilong Kristian ministry and hem mek hae long ministry. Hem say hem olsem kaikai for hem. (John 4:34; Romans 11:13) Way for show aot feeling olsem savvy affectim otherfela pipol. Waswe, long sem way tu yu savvy barava showim aot hapi bilong yu long ministry? Talem olketa gudfela experience bilong yu long olketa other wan insaed kongregeson, but careful for no story long proud way. Taem yu invite-im samfela for work withim yu, helpem them for faendem really hapi for story withim otherfela pipol abaotem Nambawan Creator bilong yumi, Jehovah.—Proverbs 25:25.
Faendem Gudfala Point
it-2-E 399
Mildness
Man wea no kros kwiktaem hem no wik bikos hem garem faith and hem strong. Hem balance and no kwiktaem lusim gudfala tingting blo hem. Wei for kros kwiktaem hem kamaot from wei for no feel sef, gohed for feel nogud lo samting wea happen, no garem faith and hope, and feeling wea man garem olsem hem no wei nao. Disfala proverb hem describem man wea isi for kros, hem sei: “Man wea no savve kontrolem kros blo hem, hem olsem taon wea olketa wall blo hem distroe.” (Pr 25:28) Hem isi for hem tingim olketa samting wea no stret, wea datwan bae mekem hem for duim olketa nogud samting.
AUGUST 11-17
GUD SAMTING FROM BIBLE PROVERBS 26
Stap Klia From “Samwan wea Stupid”
it-2-E 729 ¶6
Rain
Season. Tufala main season lo Promis Land hem summer and winter, pipol savve kolem tufala season hia lo drae season and rainy season. (Comparem Ps 32:4; Ca 2:11, ftn.) Start from samting olsem midol lo April go kasem midol lo October hem no rain big tumas. Disfala taem blo harvest, hem no savve rain olowe. Proverbs 26:1 showim dat rain lo taem blo harvest hem no samting wea happen olowe. (Comparem 1Sa 12:17-19.) Lo taem blo rainy season hem no savve rain full taem, samfala day skae hem klia. From disfala taem hem cold tu, pipol no savve go aotsaed. (Ezr 10:9, 13) So pipol barava needim wanfala haos for keepim olketa lo taem olsem.—Isa 4:6; 25:4; 32:2; Job 24:8.
w87-E 10/1 19 ¶12
Discipline Mekem Iumi Garem Peace
12 Samfala pipol needim strong discipline, olsem Proverbs 26:3 storyim: “Whip hem for horse, bridle hem for donkey, and stik hem for baksaed blo stupid pipol.” Samfala taem Jehovah letem nation blo Israel for kasem trabol for wat olketa seleva duim: “Olketa bighed againstim toktok blo God. Olketa no respectim kaonsel blo datfala Most Hae. So hem letem hard taem kasem olketa mekem olketa garem hambol heart. Olketa foldaon, and no eniwan for helpem olketa. Olketa singaot go lo Jehovah for help taem olketa kasem trabol. Hem sevem olketa from hard taem wea olketa kasem.” (Psalm 107:11-13) Bat samfala wea stupid barava bighed and no laek for acceptim discipline: “Man wea gohed stubborn nomata olketa stretem hem staka taem finis bae hem seknomoa kasem trabol and no savve gud bak.”—Proverbs 29:1.
it-2-E 191 ¶4
Kripol
Hao olketa iusim olsem saying. Wise King Solomon hem sei: “Man wea putim eni waka lo hand blo stupid man hem olsem samwan wea mekem tufala foot blo hem for kripol and spoelem hemseleva.” Man wea tekem samwan wea stupid for duim waka for hem, hem olsem hem spoelem hemseleva. Hem bae no miss for lukim wei wea waka blo hem no gohed, wea datwan spoelem hemseleva.—Pr 26:6.
Faendem Gudfala Point
it-1-E 846
Karangge Man
Taem iu ansarem wanfala karangge man “followim karangge wei blo hem” lo wei for sapotim rong idea blo hem, datwan showim iu agree lo karangge samting wea hem duim. For iumi no kamap karangge olsem, iumi laek followim kaonsel lo disfala proverb: “Iu mas no ansarem stupid man followim karangge wei blo hem.” Bat lo Proverbs 26:4, 5 showim dat sapos iu ansarem hem “followim karangge wei blo hem” lo wei for ting raonem tingting blo hem, showim lo hem dat idea blo hem karangge, and showim dat idea blo hem barava difren from wat hem stret, datwan bae helpem hem.
AUGUST 18-24
GUD SAMTING FROM BIBLE PROVERBS 27
Hao Iumi Kasem Gud Samting From Olketa Tru Fren
Jehovah Tinghae lo Pipol blo Hem wea Hambol
12 Man wea hambol hem tinghae lo kaonsel. Tingim disfala example: Iu lo wanfala meeting lo Kingdom Hall. Iu gohed story lo staka didifren wan, then bihaen samwan iu bin story witim hem kam and story smol lo iu, and sei ‘Wanfala smol pis kaikai hem stap lo teeth blo iu.’ Maet iu bae barava feel shame. Bat waswe, bae iu no thankiu lo hem from hem kam talem iu? Maet iu ting, ‘Mi wish nomoa samwan talem mi abaotem datwan lo firstaem!’ Olsem tu, iumi shud hambol and tinghae taem wanfala brata or sista hem no fraet for givim iumi kaonsel lo taem wea iumi needim. Iumi ting lo hem no olsem wanfala enemy bat olsem fren blo iumi.—Readim Provebs 27:5, 6; Gal. 4:16.
it-2-E 491 ¶3
Neiba
Bat, faith and trust wea iu garem lo wanfala fren, and advaes for kasem help from kaen man olsem lo taem blo need hem samting wea disfala proverb encouragem iumi for duim: “No lusim fren blo iu or fren blo dadi blo iu, and no go insaed haos blo brata blo iu lo day wea trabol kasem iu. Hem beta for go lo samwan wea stap klosap [sha·khenʹ] winim for go lo brata blo iu wea stap farawe.” (Pr 27:10) Lo hia luk olsem disfala raeta storyim dat iumi shud tinghae lo wanfala klos famili fren and depend lo hem for help winim wanfala klos relative olsem wanfala brata, if datfala brata hem stap farawe, bikos maet hem no redi or hem no stap lo ples wea hem bae isi for help olsem datfala famili fren.
Olketa Young Wan, Laef blo Iu Bae Hao?
7 Wanfala samting iumi savve lanem from bad disison wea Jehoash mekem nao, iumi mas chusim olketa frens wea lovem Jehovah and wea laek mekem hem hapi. Olketa frens olsem bae helpem iumi for duim gud samting. Iumi savve frens witim olketa wea olo or young winim iumi. Remember, Jehoash hem barava young winim fren blo hem Jehoiada. Taem iu chusim olketa frens, askem iuseleva: ‘Hao, olketa frens hia bae helpem mi for garem strong faith lo Jehovah? Waswe, olketa encouragem mi for followim olketa standard blo God? Hao, olketa story abaotem Jehovah and olketa Bible truth? Waswe, olketa respectim standard blo Jehovah? Hao, olketa talem nomoa wat mi laek for herem, or olketa no fraet for stretem mi taem mi start for go difren?’ (Prov. 27:5, 6, 17) For tok stret, if olketa frens blo iu no lovem Jehovah, iu shud no fren witim olketa. Bat if olketa frens blo iu lovem Jehovah, no let go lo olketa bikos bae olketa evritaem helpem iu!—Prov. 13:20.
Faendem Gudfala Point
Olketa Main Point From Buk Bilong Proverbs
27:21. Wei wea iumi ting long praise wea iumi kasem showimaot wanem kaen man nao iumi. Iumi showimaot iumi hambol sapos datfala praise wea iumi kasem muvim iumi for luksavve and talem hao really Jehovah nao mekem iumi fit for kasem datfala praise and datwan encouragem iumi for gohed servem hem. Taem praise hem mekem iumi tingse iumi winim olketa narawan, datwan showimaot iumi no hambol.
AUGUST 25-31
GUD SAMTING FROM BIBLE PROVERBS 28
Difference Between Wicked Man and Raeteous Man
w93-E 5/15 26 ¶2
Hao, Iu Obeyim Jehovah Witim Full Heart?
“RAETEOUS pipol no fraet olsem lion.” (Proverbs 28:1) Olketa showimaot faith, barava trustim Word blo God, and strong for duim waka blo Jehovah nomata lo taem wea hem danger.
it-2-E 1139 ¶3
Wei for Minim Samting
Olketa wea tane difren from datfala Source. Man wea no obeyim law blo Jehovah hem start for tane difren from God wea hem nao Man wea hem shud depend lo hem taem hem mekem eni disison and plan. (Job 34:27) Kaen man olsem hem letem heart blo hem for blindim hem for no luksavve dat samting wea hem duim hem rong and hem lusim wei for minim samting. (Ps 36:1-4) Nomata hem tingse hem worshipim God, hem tinghae lo tingting blo olketa man winim blo God. Hem laek followim datwan. (Isa 29:13, 14) Hem trae for explainim and mek excuse lo rong samting wea hem duim and ting lo datwan olsem “game” nomoa (Pr 10:23) and hem go difren, duim nogud samting, hem explainim samting wea no mek sense, gogo datwan mekem hem tingse God no lukim or luksavve lo rong samting wea hem duim, hem olsem hem sei paoa blo God for luksavve lo samting hem fail. (Ps 94:4-10; Isa 29:15, 16; Jer 10:21) Thru lo wat hem duim hem olsem hem sei, “Jehovah hem no stap” (Ps 14:1-3) and hem no warim Jehovah. From hem no followim olketa principle wea kam from God, hem no savve disaed gud, no minim gud olketa situation, no ting raonem evri samting wea join insaed datwan, and no mekem gudfala disison.—Pr 28:5.
it-1-E 1211 ¶4
Wei for Faithful
Man savve gohed garem wei for faithful, no from strong blo hemseleva, bat only thru lo strong faith and trust blo hem lo Jehovah and paoa blo Hem for sevem man. (Ps 25:21) God promisim dat hem bae kamap “shield” and hem bae “protectim man,” lo wei for gaedem road blo olketa wea wakabaot lo faithful wei. (Pr 2:6-8; 10:29; Ps 41:12) Wei wea olketa evritaem laek for kasem appruvol blo Jehovah mekem olketa for stedy lo laef, wea datwan helpem olketa for followim stret road for kasem goal blo olketa. (Ps 26:1-3; Pr 11:5; 28:18) Bat, olsem Job luksavve nomata man wea no garem blame savve safa bikos lo rul blo wicked pipol and hem savve dae witim pipol wea wicked, Jehovah mekem iumi sure dat hem savve lo laef blo man wea no garem blame and hem promisim dat inheritance blo man olsem bae no finis, future blo hem bae peaceful, and hem bae kasem olketa gud samting. (Job 9:20-22; Ps 37:18, 19, 37; 84:11; Pr 28:10) Olsem lo story blo Job, for man kasem respect hem no depend lo riches wea man garem, bat hem depend lo wei wea hem faithful. (Pr 19:1; 28:6) Olketa pikinini wea garem kaen parents olsem olketa hapi (Pr 20:7), dadi blo olketa showim gud example for olketa followim, and olketa kasem gud samting from gud nem and respect wea dadi blo olketa kasem.
Faendem Gudfala Point
Iu Savve Missim Spiritual Heart Attak
Ova tumas for trustim seleva. Planti man feel sure olketa healthy just bifor olketa kasem heart attak. Planti taem, olketa bin les for go for medical chekap or maet mekfani abaotem olsem samting olketa no needim. Olsem tu, samfala maet feel, bikos olketa bin Christian for longtaem, bae no eni samting savve happen long olketa. Olketa maet no ting for chekap long spiritual wei or lukluk long olketa seleva gogo olketa insaed trabol. Hem barava important for tingim gud kaonsel bilong aposol Paul abaotem wei for no ova tumas for trustim seleva: “Dastawe man wea tingse hem standap mas lukaot nogud hem foldaon.” Hem wise for iumi luksavve iumi no perfect and for olowe lukluk gud long iumiseleva long spiritual wei.—1 Corinthians 10:12; Proverbs 28:14.