Me Pau Mai a Iehova i ta Tatou Pure

1-2. Eaa ta tatou ka akamanako no runga i ta tatou pure?

I MANAKO ana ainei koe e me ka pau mai a Iehova i taau pure? Me koia ia, kare ko koe ua te manako akapera ra. Maata te au taeake e te au tuaine tei manako akapera ana, me tupu te manamanata kia ratou. Me te manamanata ra tatou, penei ngatā ia tatou i te kite e akapeea a Iehova me pau mai i ta tatou pure.

² Ka uriuri akaou tatou te tumu ka irinaki papu tatou e ka pau mai a Iehova i te pure a tona aronga akamori. (1 Ioa. 5:15) Ka uriuri katoa tatou i teia au uianga: Eaa tatou ka manako ei e kare a Iehova e pau mai i ta tatou pure? Akapeea a Iehova me pau mai i ta tatou pure i teia tuatau?

PENEI KARE A IEHOVA E PAU MAI I TA TATOU PURE I TA TATOU I MANAKO ANA

3. Eaa a Iehova i inangaro ei kia pure tatou kiaia?

³ Te akapapu maira te Pipiria e te aroa maata maira a Iehova ia tatou e e aronga akaperepereia tatou kiaia. (Haga. 2:7; 1 Ioa. 4:10) No reira aia i pati mai kia pure tatou no tana tauturu anga. (1 Pete. 5:6, 7) Inangaro aia i te tauturu kia piri vaitata tatou kiaia e kia akakoromaki ua i to tatou manamanata.

4. Akapeea tatou i kite ei e kua pau mai a Iehova i te pure a tona aronga akamori? (Akara katoa i te tutu.)

⁴ I roto i te Pipiria, kua tatau tatou e kua pau mai a Iehova i te pure a tona aronga akamori. Kua kite ainei koe i tetai akaraanga? Akapeea te Ariki ko Davida? E maata tona au enemi i roto i tona oraanga, e kua pure putuputu aia kia Iehova no te tauturu. Tetai atianga, kua pati akatenga aia: “E Iehova, e akarongo mai i taku nei pure; e ariu mai i to taringa ki taku e pati nei: e akarongo mai iaku i taau ra tuatua-mou, e taau ra tuatua-tika.” (Sala. 143:1) Kua pau a Iehova i ta Davida pure no te akaora iaia. (1 Samu. 19:10, 18-20; 2 Samu. 5:17-25) Kua rauka ia Davida i te tuatua papu e: “Te vaitata mairā Iehova i te aronga i kapiki atu iaia.” Papu katoa ia tatou te reira.​—Sala. 145:18.

5. Kua pauia ainei te pure a te aronga akamori a Iehova i ta ratou i manako ana? Oronga mai i tetai akaraanga. (Akara katoa i te tutu.)

⁵ Penei kare a Iehova e pau mai i ta tatou pure i ta tatou i manako ana. Kua tupu teia ki te apotetoro ko Paulo. Kua pati aia ki te Atua kia akaateaia ‘te tara i roto i tona kopapa.’ E toru taime to Paulo pure anga no teia manamanata. Kua pau mai ainei a Iehova i taua pure? Ae, kare mei ta Paulo i manako ana. Kare tona manamanata i akaateaia, mari ra kua oronga a Iehova i te maroiroi kiaia kia tavini tiratiratu ua rai Iaia.​—2 Kori. 12:7-10.

6. Tetai au taime, eaa te tumu ka manako tatou e kare a Iehova e pau mai i ta tatou pure?

⁶ Tetai taime penei e pau anga ke te ka orongaia mai kare tatou i manako atu ana. Papu ia tatou e kua kite a Iehova e ka akapeea aia te tauturu anga ia tatou. E “maata ua atu tana kia rave i te au mea katoa ta tatou e pati nei, e ta tatou e manako nei, i te mana i ririnui i roto ia tatou nei.” (Ephe. 3:20) No taua tumu, ka pauia mai ta tatou pure i te taime kare tatou i manako atu ana.

7. Eaa tatou ka taui ei i ta tatou ka pure? Oronga mai i tetai akaraanga.

⁷ Penei ka taui tatou i ta tatou e pure ra me kite tikai tatou eaa to Iehova anoano. Akamanako i te akaraanga o Martin Poetzinger. Kare i roa i muri ake i te akaipoipoanga, kua tukunaia te Taeake Poetzinger ki roto i tetai puakapa mouauri Nazi. I te akamaataanga, kua pati aia kia Iehova kia akaatea mai iaia mei te puakapa tamamae anga kia oki aia i te akono i tana vaine e te rave i tana angaanga tutu aere. Inara, e rua epetoma i muri mai, kare a Iehova i tuku iaia kia aere. No reira kua pure aia: “E Iehova, akaari mai koe i taau e inangaro ra kia rave au.” Kua akamata aia i te akamanako i te au taeake e akakoromaki katoa ra i roto i te puakapa. Maataanga ia ratou te manamanata ra no ta tatou vaine e te tamariki. Kua pure te Taeake Poetzinger: “E Iehova, te akameitaki atu nei au ia koe no taku angaanga ou. E tauturu mai iaku kia akaketaketa e kia akamaroiroi au i toku au taeake.” E iva mataiti tona nooanga i roto i te puakapa i te rave i te reira!

8. Eaa te mea puapinga ka akamaara tatou me pure tatou?

⁸ Kia akamaara tatou e ka akatupu a Iehova i tona akakoroanga i te tuatau tana i akanoo. Kapiti mai ki taua akakoroanga te takore anga i te au manamanata te akatupu ra i te mamae i teia tuatau—mei te tumatetenga natura, te maki e te mate. Na roto i tona Patireia e akatupu ei a Iehova i tona akakoroanga. (Dani. 2:44; Apo. 21:3, 4) Inara, kia tae ki taua tuatau, ka tuku a Iehova ia Satani kia tutara i teianei ao.b (Ioa. 12:31; Apo. 12:9) Me ka akakore a Iehova i tei tamanamanata i te tangata i teia tuatau, ka manakoia e te puapinga nei ta Satani tutaraanga. Ia tatou e tapapa atura i te tuatau e akatupu ei a Iehova i tetai o tana au taputou, kare aia e akaruke ia tatou ma te kore e tauturu. Ka uriuri tatou i tetai au mataara ka tauturu mai a Iehova ia tatou.

AU MATAARA KA PAU MAI A IEHOVA I TE AU PURE I TEIA TUATAU

9. Akapeea a Iehova me tauturu ia tatou me rave tatou i te au ikianga? Akatutu mai.

⁹ Ka oronga mai aia i te pakari. Taputou mai a Iehova e ka oronga mai aia i te pakari me rave tatou i te au ikianga meitaki. Ka inangaro tatou i te pakari no te au ikianga ka ō mai i roto i to tatou oraanga, me kare e akaipoipo me kore ka akaipoipo. (Iako. 1:5) Akara ana i tei tupu ki tetai tuaine ko Maria, kare aia i akaipoipo.c Mataora ua aia i te tavini ei painia tamou i tona aravei anga i tetai taeake. Karanga aia: “E pakari maira to maua pirianga ei oa, kua pakari mai rai to maua inangaro i tetai e tetai. Kua kite au e ka rave au i tetai ikianga. Kua pure pakari au no runga i te reira. Ko ta Iehova aratakianga taku e anoano ra, kua kite katoa mai au e kare na Iehova e rave i taku ikianga.” Kua kite aia e kua pau mai a Iehova i tana pure na roto i te pakari. Akapeea ra? Iaia e kimikimi ra i roto i ta tatou au puka, kua kite mai aia i tetai au atikara e pau ra i tana au uianga. Kua akarongo katoa aia ki te akoanga meitaki a tona metua vaine tiratiratu. Kua tauturu taua akoanga ia Maria kia akamanako meitaki. No reira kua rauka iaia i te iki meitaki.

10. Ia Philipi 4:13, eaa ta Iehova ka rave i te tauturu i tona aronga akamori? Oronga mai i tetai akaraanga. (Akara katoa i te tutu.)

¹⁰ Ka oronga mai aia i te maroiroi kia akakoromaki ua tatou. Mei tana i rave no te apotetoro ko Paulo, ka oronga mai a Iehova i te maroiroi ta tatou e anoano ra kia akakoromaki i te au timataanga. (E tatau ia Philipi 4:13.) Akamanako ana te tauturu anga a Iehova i tetai taeake ko Benjamin kia akakoromaki ua aia i tona turanga manamanata. Maataanga o tona oraanga mapu, e noo ana a Benjamin e tona ngutuare tangata i roto i te puakapa tuitarere i Aperika. Karanga a Benjamin: “Kua pure putuputu au kia Iehova, te pati anga kiaia kia oronga mai i te maroiroi kia rave au i tana e mareka ra. Kua pau mai a Iehova i taku pure na te oronga mai anga i te manako ʼau, te mataku kore kia tutu aere, e te au puka kia piri vaitata au kiaia. Karanga katoa aia: “Tatau anga au i te au tua o te Au Kite e te kite anga kua tauturu a Iehova ia ratou kua akamaroiroiia au kia vai tiratiratu.”

11-12. Akapeea a Iehova me iki i to tatou au taeake e te au tuaine kia pau mai i ta tatou pure? (Akara katoa i te tutu.)

¹¹ Ka akakeu aia i to tatou au taeake e te au tuaine. Te po i mua ake ka oronga aia i tona oraanga, kua pure akatenga a Iesu. Kua pati aia kia Iehova kia kore tetai ke e akamanako e e tangata kino aia e kia akaapaia no te reira. Kua tauturu a Iehova ia Iesu na te tono mai anga i tetai angera kia akamaroiroi iaia. (Luka 22:42, 43) Ka tauturu katoa a Iehova ia tatou na te atoro anga akamaroiroi a to tatou au taeake me kore au tuaine. Ka kimi tatou katoatoa i te au atianga tau kia oronga i te “tuatua meitaki” ki to tatou au taeake.​—Mase. 12:25.

¹² Akamanako ana i tei tupu ki tetai tuaine ko Miriam. I tetai epetoma i muri ake te mate anga tana tane, te noo ra a Miriam koia ua i te kainga, ma te maromaroa e te taitaia. Kua aue aia e kua inangaro i te tuatua ki tetai tangata. Karanga aia: “Kare oku maroiroi i te ringi aere i tetai ke, no reira kua pure au kia Iehova. Iaku e aue ra e te pure ra, tangi mai taku tereponi. Ko tetai tangata pakari, e oa akaperepereia.” Kua akapumaana te taeake pakari e tana vaine ia Miriam. Papu iaia e na Iehova i akakeu i teia taeake kia ringi mai iaia.

13. Akakite mai i tetai akaraanga i to Iehova akakeu anga i te aronga kare e akamori ana iaia i te pau mai i ta tatou pure?

¹³ Ka akakeu aia i te au tangata kare e akamori ana iaia. (Mase. 21:1) Tetai taime, ka pau mai a Iehova i te pure a tona iti tangata na te akakeu anga i te aronga irinaki kore kia tauturu mai ia ratou. Ei akaraanga, kua akakeu aia i te Ariki ko Aretekasaseta kia akatika ia Nehemia kia oki ki Ierusalema i te patu akaou i te oire. (Nehe. 2:3-6) Teia tuatau katoa, ka akakeu a Iehova i te aronga kare e akamori ana iaia kia tauturu ia tatou.

14. Eaa taau e reka ra mei te tua o Soo Hing? (Akara katoa i te tutu.)

¹⁴ Kua irinaki tetai tuaine ko Soo Hing e na Iehova i tauturu iaia na roto i tona taote. Kua rokoia tana tamaiti e tetai maki manako kino pakari. Te kino anga ta raua tamaiti i roto i tetai u anga motoka, kua akaruke raua ko tana tane i ta raua ngai angaanga i te akono iaia. Inara kua tupu te manamanata no te moni. Karanga mai a Soo Hing e kua manako aia e kare e rauka iaia i te akakoromaki i tetai ua atu manamanata. Kua pure akatenga aia kia Iehova i te pati i tana tauturu. Kua iki te taote i te kimi i tetai ravenga i te tauturu ia ratou. Tei tupu mai, kua oronga mai te kavamani i te tauturu ia ratou i te pae o te moni e i tetai ngai mama ua te tutaki no ratou. Muri mai, karanga a Soo Hing e: “Kua kite matou i ta Iehova tauturu anga ia matou. Koia tikai “tei akarongo i te pure ra.”​—Sala. 65:2.

ANOANOIA TE AKARONGO ME KIMI E ME ĀRIKI I TA IEHOVA PAU ANGA

15. Eaa tei tauturu i tetai tuaine kia āriki e kua pauia mai tana pure?

¹⁵ Kare ta tatou au pure e pauia mai na roto i tetai au mataara umere. Inara ko te au pau anga i orongaia mai kia tatou ko te reira ta tatou e anoano ra kia vai tiratiratu ki to tatou Metua i te rangi. No reira e tapapa ua rai i ta Iehova pau anga no taau pure. Kua manako tetai tuaine ko Yoko e kare a Iehova e pau mai i tana pure, inara kua akamata aia i te tata i roto i tetai puka eaa tana i pati ana kia Iehova. Aere ua rai, kua akara akaou aia i tana puka i tata e kua kite mai e kua pau mai a Iehova i te maataanga o tana pure, e tetai atu au pure tei ngaropoina iaia. Mei tetai taime ki tetai taime, ka anoanoia tatou kia tāpu e kia akamanako akapeea a Iehova te pau mai anga i ta tatou pure.​—Sala. 66:19, 20.

16. Akapeea tatou me akaari i te akarongo no runga i ta tatou pure? (Ebera 11:6)

¹⁶ Ka akaari tatou i te akarongo kare e na te pure ua anga kia Iehova mari ra na te āriki katoa anga i tana pau anga no ta tatou pure noatu eaa te reira. (E tatau ia Ebera 11:6.) Akamanako ana i te akaraanga o Mike raua ko tana vaine ko Chrissy. To raua akakoroanga kia angaanga i ko i te Betela. “E maata te au taime to maua pati anga e te pure ua anga kia Iehova no runga i teia akakoroanga,” karanga ai a Mike, “inara kare roa maua i patiia mai ana.” Kua irinaki papu a Mike raua ko Chrissy e kua kite a Iehova akapeea me taangaanga meitaki ia raua i roto i tana angaanga. Kua rave raua i ta raua ka rauka i te rave, ko te tavini anga ei nga painia tamou i te ngai te anoano maataia ra te tauturu e te angaanga patu anga. I teia tuatau te rave nei raua i te angaanga tutaka. “Kare a Iehova i pau mai ana i ta maua au pure i ta maua i manako ana,” karanga ai a Mike, “kareka ra kua pau mai aia i te reira na te au mataara meitaki atu kare roa maua i manako ana.”

17-18. Ia Salamo 86:6, 7, eaa tei papu ia tatou?

¹⁷ E tatau ia Salamo 86:6, 7. Papu ia Davida tata salamo e kua akarongo e kua pau mai a Iehova i tana pure. Papu katoa rai ia koe. Te akapapu maira te au akaraanga i uriuriia i teia atikara e ka oronga mai a Iehova i te pakari e te maroiroi kia akakoromaki ua tatou. Ka akakeu aia i to tatou au taeake e te au tuaine me kore te aronga kare e akamori ana iaia kia tauturu mai ia tatou.

¹⁸ Mei te mea e kare a Iehova e pau mai i ta tatou pure na roto i te mataara ta tatou e manako ra, kua kite ra tatou e ka pau mai aia i te reira. Ka oronga mai aia i ta tatou e anoano ra e i te taime tikai e anoano ra tatou i te reira. No reira e pure ua rai no te akarongo, ma te irinaki papu e ka akono a Iehova ia koe i teianei e ka ‘akamerengo aia i te anoano o te au mea ora katoa nei’ i roto i te ao ou.​—Sala. 145:16.