E Rekareka ia Iehova!

“E rekareka i te Atu ra, aua e tivata, e te tuatua akaou atu nei au, Kia rekareka rai kotou.”​—PHILIPI 4:4.

1. Eaa ra tatou ka manako ei i ta Paulo i tuatua i tona karanga anga e kia rekareka ua rai te au Kerititiano?

I TEIA au tuatau, e meangiti ua te au tumu no te rekareka. Te aravei atura te au tangata one-pueu, e te au Kerititiano tikai, i te au turanga tei akatupu ra i te maromaroa​—te angaanga kore, te oraanga makimaki, te matenga o te aronga tei akaperepereia, te au manamanata i te pae o te tu tangata, me kore te patoi anga a te au mema pamiri irinaki kore me kore a te au oa o mua ana. No reira akapeea tatou te marama anga i te raurau anga a Paulo, ‘E rekareka aua e tivata’? I te akamanako anga i te au turanga tau kore e te ngata ta tatou ka akakoromaki ra, ka rauka ainei teia? Na te uriuri anga i te akapapa anga o teia au tuatua e tauturu i te akamarama mai i teia mea.

E Rekareka​—Eaa ra e Akapeea?

2, 3. Eaa te puapinga o te rekareka, mei tei akatutuia i te turanga o Iesu e te au Iseraela taito?

² “E rekareka i te Atu ra, aua e tivata, e te tuatua akaou atu nei au, Kia rekareka rai kotou.” Penei ka riro teia au tuatua tei orongaia ki te au Iseraela i etai 24 anere mataiti i topa ei akamaara ia tatou: “Te rekareka no Iehova ra ko to kotou punanga ketaketa ia,” me kore i tau ki te urianga Moffatt: “Te rekareka i Tei Mutu Kore ra ko to kotou maroiroi ia.” (Nehemia 8:10) Ka oronga mai te rekareka i te maroiroi e mei tetai punanga ketaketa ka riro ia ei akapumaana anga e te paruru anga. Kua riro te rekareka ei tauturu i te tangata tiama ko Iesu kia akakoromaki. “Ko tei akakoromaki i te satauro, kare i akono i te akama, i te [“rekareka,” NW] i tukuia mai ki mua i tona aroaro, e te noo ra i teianei i te pae katau i te terono o te Atua.” (Ebera 12:2) Te taka ua ra, e na te rekareka ua anga noatu te au tuatau ngata e mea puapinga ia no te ora.

³ I mua ua ake i te tomoanga ki roto i te Enua Taputouia, kua akaueia te au Iseraela: “E ka rekareka koe i te au meitaki ravarai ta to Atua ta Iehova i o mai noou, e no to ngutuare ra, ko koe, e te ngati Levi, e te tangata ke e noo i o ou ra.” Te ka tupu mai mei te kore anga e tavini ia Iehova ma te rekareka ka pakari ia. “Ka rokoia mai koe e teia katoa nei au kino, ka aru tikai ia koe, e ka piri rava kia koe, e kia mate rava atu koe ra: . . . No te mea kare koe i akamori i to Atua ra ia Iehova, ma te pereperekavana, e ma te rekareka o te ngakau ra, i te maata oki o te au mea katoa ra.”​—Deuteronomi 26:11; 28:45-47.

4. Eaa te tumu e kore ei tatou e rekareka?

⁴ E puapinga i reira kia rekareka te toenga o te anana iti o teia tuatau e to ratou au taeake ko te “mamoe ke atu”! (Ioane 10:16) Na te ripitianga i tana ako, “e te tuatua akaou atu nei au,” te akakite ra a Paulo i te puapinga o te rekarekaanga i te au meitaki ravarai ta Iehova i rave no tatou. Te pera ainei tatou? Me kua pakari roa tatou i te akono i te oraanga matauia o te au ra e i etai taime te ngaropoina anga ia tatou te au tumu no te rekareka? Te putunga ainei te au manamanata e riro atura te reira ei arai i ta tatou akara anga i te Patireia e tona au akameitakianga? Te tuku ainei tatou i tetai atu au mea​—te akarongo kore anga i te au ture a te Atua, te kopaeanga i te au kaveinga tu-Atua, me kore te akangaropoinaanga i te au angaanga Kerititiano​—ei keia i te rekareka mei ia tatou nei?

5. Eaa ra ka ngata ei no tetai tangata tu tau kore kia rekareka?

⁵ “Kia kitea meitakiia oki to kotou [“tu tau,” NW] i te tangata katoa. Te vaitata nei te Atu.” (Philipi 4:5) Ko te tangata tu tau kore te ngere ra aia i te tu tau meitaki. Penei kare aia e akono ana i tona turanga pae kopapa, te tuku puapinga kore ua anga i tona kopapa ki raro ake i te apiapi anga anoano koreia me kore te tu taitaia. Penei kare aia i apii ake i te ariki i tona au kotinga e te noo i tau ki te reira. Penei te akanoo ra aia i te au akakoroanga teitei roa e i reira te tauta anga i te itae i te reira noatu eaa te ka tupu. Me kore ra penei ka akariro aia i tona au kotinga ei kotoe anga no te akamarieanga me kore te aruaru kore anga. Te ngere anga i te tu tau meitaki e e tu tau kore tona, e ngata iaia i te rekareka.

6. (a) Eaa te mea te tau ra te au Kerititiano kia kite ia tatou ra, e aea anake ua teia mei teia te tu? (e) Akapeea te au tuatua a Paulo ia 2 Korinetia 1:24 e Roma 14:4 i te tauturu anga ia tatou kia rauka te tu tau?

⁶ Noatu e ka akara mai te aronga patoi e e aronga auouo tatou, kia kite ua rai te au Kerititiano ia tatou ei aronga tu tau. E ka kite ratou i te reira me e tu tau meitaki to tatou e kare e tapapa mai i te tu tiama mei ia tatou uaorai me kore mei tetai pae atu. Tei maata rava atu, kia kopae tatou i te tukuanga i te au apainga teiaa tei maata atu i ta te Tuatua na te Atua i akaue ra ki runga i tetai atu. Te karanga ra te apotetoro ko Paulo e: “Kare ra mei te mea e ko matou te atu o to kotou akarongo, ei tauturu ra matou i to kotou rekareka.” (2 Korinetia 1:24) Ei Pharisea i mua ana, kua kite meitaki a Paulo e te au ture maro tei tukuia e tei raveia e te aronga mana akaaere ka akakore ia i te rekareka, inara te au manako tauturu tei orongaia mai e te au taeake angaanga ra, ka akamaata ia i te reira. Ko te tika e e “te vaitata nei te Atu” e tau ia kia akamaara i te tangata tu tau e kare tatou e ‘akaapa atu i to tetai ke ra tavini. Tei uaorai pu tona mou e tona inga.’​—Roma 14:4.

7, 8. Eaa ra te au Kerititiano ka tapapa atu ei i te au manamanata, inara akapeea ratou i te rekareka ua atu anga?

⁷ “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” (Philipi 4:6) Te kite nei tatou i te “kino maata” ta Paulo i tata ra. (2 Timoteo 3:1-5) No reira kia tapapa atu te au Kerititiano i te au manamanata. Ta Paulo au tuatua ‘e rekareka aua e tivata’ kare te reira e kopae i te tika e i tetai au taime ka manako puapinga kore ua me kore akamaroiroi kore tetai Kerititiano tiratiratu. I to Paulo uaorai turanga, kua akakite tikai aia e: “Kua kako matou i te mate, kare ra i apiapi: kua pekapeka matou, kare ra i ope te manakoanga: Kua takinga-kinoia, kare ra i akarukeia: kua uriia ki raro, kare ra i mate rava.” (2 Korinetia 4:8, 9) Inara, na te tu rekareka o tetai Kerititiano e akamaru mai e i te openga te taomi atu i te au taime taitaia poto ua e te maromaroa pakari. Ka oronga mai ia i te maroiroi tei anoanoia no te opara ua atu ki mua, auraka rava e akangaropoina i te au tumu e manganui no te rekareka.

⁸ Me tupu mai te au manamanata, noatu eaa te tu, ka pati akaaka te Kerititiano rekareka no to Iehova tauturu na roto i te pure. Kare aia e tuku ua atu ki te taitaia pakari. I muri ake i te rave anga i tana ka rauka i tau iaia uaorai no te rapakau i te manamanata, ka akaruke aia i te ka tupu mai ki roto i nga rima o Iehova kia rotai ki te pati anga: “E tuku koe i taau apainga kia Iehova ra, e nana koe e tauturu mai.” I te reira taime, ka rave ua atu te Kerititiano i te akameitaki ia Iehova no Tona tu meitaki ravarai.​—Salamo 55:22; akara katoa ia Mataio 6:25-34.

9. Akapeea te kite o te tuatua mou i te oronga anga mai i te au o te manako e eaa te meitaki ka tupu ki rungao i tetai Kerititiano?

⁹ “E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:7) No te kite o te tuatua mou Puka Tapu ka akarangatira ia i te manako o te Kerititiano mei te au pikikaa e ka tauturu iaia i te akatupu i te au tu manako meitaki. (2 Timoteo 1:13) I reira ka tauturuia aia i te kopae i te tu tarevake me kore pakari kore te ka takino i te au pirianga au ma tetai pae atu. I te mea e kia akaapiapiia e te tu tika kore e te kino, ka tuku aia i tona irinakianga ki roto ia Iehova ei rapakau i te au manamanata o te tangata nei na roto i te Patireia. Ka riro teia tu au o te manako ei paruru i tona ngakau, ka akono ia i tana au manako ma, e ka paruru i tona manakoanga i te pae o te tu tika. I tetai tua ko te au manako ma e te manako tika, te oronga maira ia i te au tumu e manganui no te rekareka, noatu te au manamanata e te au taomi anga tei apainaia mai e tetai ao oripu ua.

10. Ka kitea anake uaia te rekareka mou na te tuatuaanga me kore te manakoanga i teaa?

¹⁰ “E teianei, e aku au taeake, ko te au mea mou ra, te au mea tau meitaki ra, te au mea tika ra, te au mea viivii kore ra, te au mea rekarekaia ra, te au mea rongo meitaki ra, te vai ra tetai meitaki, te vai ra tetai mea paapaaia ra, e akamaara i taua au mea ra.” (Philipi 4:8) Kare tetai Kerititiano e reka ana i te tuatua me kore te manakoanga i te au mea kino. Te kopae tikai ra teia i te maata anga o te au tamataora anga o teianei ao. Kare e rauka i tetai i te tamou i te rekareka Kerititiano me akaki aia i tona manako e te ngakau ki te au pikikaa, te takatakata kino ra, e te au mea tika kore, te akono tau kore, kare e tu meitaki, te makitakita, e te viivii. Te akakite ngoie ua ra, e kare e kitea e tetai te rekareka mou na te akakianga i tona manako e te ngakau ki te repo. I roto i ta Satani ao pikikaa, mei teaa atura te akamaroiroi i te kite e e manganui ta te au Kerititiano au mea meitaki no te manako e te uriuri!

E Manganui te Au Tumu no te Rekareka

11. (a) Eaa te mea auraka rava kia akangaropoinaia, e no teaa ra? (e) Eaa ta te tae anga ki tetai uruoaanga pa enua i akatupu ki runga i tetai tereketi e tana vaine?

¹¹ I te tuatuaanga no runga i te au tumu no te rekareka, auraka tatou e akangaropoina i to tatou akataeake anga i te pa enua. (1 Petero 2:17) Koi akaari ei te au pupu enua e te au pupu eteniki o teianei ao i te makitakita pakari no tetai e tetai, te piri vaitata ra te iti tangata o te Atua ma te aroa i te ngai okotai. Te kiteaia ra to ratou tu taokotai i te au uruoaanga pa enua. I tetai tei raveia i te 1993 i Kiev, Ukarania, kua tata tetai tereketi no Unaite Teite mai e: “Te au roimata rekareka, te au mata oraora, te au takave anga putuputu mei te pamiri ra, e te au aravei anga tei akaariia e te au pupu te tairiiri ra i te au tamaru karakara e te au orei i runga i te taitiamu te akaari anga i te taokotai anga teokaratiki. Kua ki to matou au ngakau i te parau i ta Iehova i akatupu temeio ua ra i roto i te akataeake anga i te ao katoa. Kua akakeu oonu tikai teia ia maua ko taku vaine e kua kapiti mai i tetai aiteanga ou ki to maua akarongo.”

12. Akapeea a Isaia 60:22 i te akatupu angaia i mua tikai i to tatou nga mata?

¹² Mei teaa atura te akamaroiroi no te au Kerititiano i teia tuatau i te kite i te au totou Puka Tapu tei akatupuia i mua tikai i to ratou au mata! Ka tamanako ana, ei akaraanga, te au tuatua a Isaia 60:22: “E riro te mea ngiti okotai ei tausani; e ko tei mea ngiti poepoe ra, e riro ïa ei enua maroiroi: naku, na Iehova, e akarapurapu i te reira i tona tuatau.” I te anauanga o te Patireia i te 1914, e 5,100​—e mea ngiti okotai—​te tutu aere ra ma te maroiroi. Inara i te tuatau o te rima mataiti i topa, kua tupu ana te maata o te akataeake anga ao katoa i te vaito anga averiti o te 5,628 Au Kite tei papetito ouia i te epetoma okotai! I te 1993, kua itaeia tetai take e 4,709,889 au orometua maroiroi tei itaeia. Ka akamanako ana! Tera te aite anga “te mea ngiti okotai” o te 1914 te vaitata tikai ra ki te riro anga ei “tausani”!

13. (a) Eaa tei tupu ana mei te 1914 mai? (e) Akapeea te Au Kite o Iehova te akono anga i te kaveinga o ta Paulo au tuatua ia 2 Korinetia 9:7?

¹³ Mei te mea e i te 1914 kua aere te Ariki Mesia ki mua no te akavi i rotopu i tona au enemi. Kua turuia tana tutara anga e te au tangata puareinga tei oronga ua i te taime, te maroiroi, e te moni no te rave i te angaanga tutu aere i te ao katoa e pera katoa te rave i te angaanga akatuanga i te pa enua. (Salamo 110:2, 3) Te rekareka ra te Au Kite o Iehova e te raveia ra te au akaputu anga moni no te akaoti i teia au angaanga, noatu e kare te moni e akakite putuputuia ana i ta ratou au uipaanga.a (Akaaite ia 1 Paraleipomeno 29:9.) Kare te au Kerititiano mou e anoanoia kia akakeuia kia oronga; te manako ra ratou i te reira ei akameitakianga no te turu i to ratou Ariki i tei rauka ra ia ratou, okotai tangata “i tana i akakoro i roto i tona ngakau; eiaa ma te noinoi, e mei te mea e no te umuumu.”​—2 Korinetia 9:7.

14. Eaa te turanga i kiteaia i rotopu i te iti tangata o te Atua mei te 1919 mai, te oronga anga i te teea tumu no te rekareka?

¹⁴ Te akaou anga tei akakiteia no te akamori anga mou i rotopu i te iti tangata o te Atua kua riro mai ia ei anga i tetai parataito vaerua. Mei te 1919 mai kua akamaata atu te reira i tona au kotinga. (Salamo 14:7; Isaia 52:9, 10) Tei tupu? Kua kite te au Kerititiano mou i te “rekareka e te pereperekavana.” (Isaia 51:11) Te ua meitaki te tupu ra e akaari anga tika te reira i te ka rauka i te vaerua tapu o te Atua i te akatupu na roto i te au tangata tiama kore. Ka aere pouroa te meitaki e te ngateitei kia Iehova, inara eaa te akameitakianga maata rava atu te vaira i te riro anga mai ei tangata angaanga na te Atua? (1 Korinetia 3:9) Te rava ua ra to Iehova ririnui ei akatupu i te au toka, me ka anoanoia, no te akakite i te tuatua o te tuatua mou. Inara, kare aia i iki ana no te rave i te reira, mari ra, ko te akakeu i te au mea ora puareinga tei maaniia ki te one-pueu ei rave i tona anoano.​—Luka 19:40.

15. (a) Eaa te au tupuanga o teia tuatau ta tatou ka aru ma te manako atu? (e) Eaa ta tatou tupu anga e akara atura ki mua ma te rekareka?

¹⁵ Ma te ki i te mataku, te akara nei te au tavini o Iehova i te au tupu anga o teianei ao, i te reira e akatupu ra i te au totou Puka Tapu puapinga ra. Te tauta pakari nei te au enua​—ma te puapinga kore ra—​no te akatupu i tetai au tamou. Te maro ra te au tupuanga ia ratou kia kapiki i te akaaerenga United Nations kia akono i te au ngai manamanata o teianei ao. (Apokalupo 13:15-17) I te reira taime, kua akara takere te iti tangata o te Atua ma te tapapa anga maata ki tetai o te au tupu anga rekareka maata rava atu tei tupu, koia oki te vaitata ua maira te ra. “Kia rekareka tatou, e kia pereperekavana e e akameitaki oki iaia: kua tae oki ki te akaipoipo anga a te Punua-mamoe, e kua akamanea tana vaine iaia uaorai.”​—Apokalupo 19:7.

Tutu Aere Anga​—E Apainga Teiaa me e Mea Rekarekaia?

16. E akatutu mai e akapeea te kore anga e taangaanga i tana i apii ra i te keia anga i te rekareka mei tetai Kerititiano.

¹⁶ “I te au mea oki ta kotou i kite ra, ta kotou i āriki, ta kotou i akarongo, e ta kotou i kite mai iaku ra, ka rave ïa: e e noo te Atua au ki o kotou.” (Philipi 4:9) Na te taangaanga anga i ta ratou e apii ra, ka rauka i te au Kerititiano i te tapapa atu i te akameitakianga a te Atua. Ko tetai o te au mea puapinga rava atu ta ratou ka apii mai koia ko te anoano o te tutu aere anga i te tuatua meitaki ki tetai pae atu. E tikai, koai te ka rekareka i te au o te manako me kore te rekareka me tapupu aia i te akakite anga tuatua mei te au tangata ngakau tika tei irinaki ra to ratou uaorai oraanga i te akarongoanga i te reira?​—Ezekiela 3:17-21; 1 Korinetia 9:16; 1 Timoteo 4:16.

17. Eaa ra ta tatou angaanga tutu aere ka riro ua rai ei tumu no te rekareka?

¹⁷ Mei teaa atura te rekareka i te kite i te au tangata tu mamoe i te puareinga ua i te apii mei ia Iehova! E tikai, ko te aronga te tavini ra ma te manako tika ka kite ua rai ratou i te tavini anga Patireia ei tumu anga no te rekareka. Te tumu maata no te mea ei Kite no Iehova ka akapaapaa ratou i Tona ingoa e te mou i Tona taoonga ei Tutara Ngateitei Rava. (1 Paraleipomeno 16:31) Ko te tangata tei kite ra i teia tika ka rekareka ia noatu me patoi pakari kore ua te au tangata i te tuatua meitaki tana ka apai ra. Kua kite aia e na te tutu aere anga ki te aronga irinaki kore a tetai ra ka ope ia; ka tupu ua atu te akapaapaaanga i te ingoa o Iehova e tuatau ua atu.

18. Eaa te akakeu ra i tetai Kerititiano kia rave i to Iehova anoano?

¹⁸ Te akakeu ra te akonoanga mou i te aronga te taangaanga ra i te reira kia rave i te au mea tei umuumuia e Iehova, kare e te anoanoia ra kia pera, mari ra no te mea te inangaro ra ratou i te rave i te reira. (Salamo 40:8; Ioane 4:34) E manganui te au tangata te kite ra i teia ei mea ngata no te marama. Kua akakite tetai vaine ki tetai Kite tei atoro ra iaia: “Kua kite koe, te tau ra koe kia akameitakiia. Kare rava au e aere mei tera are ki tera are te tutu aere i taku akonoanga mei ta kotou e rave ra.” Ma te mata katakata kua pau atu te Kite e: “Te marama ua ra au i toou manako. I mua ake ka riro mai ei au ei Au Kite o Iehova, kare rai e rauka ia koe i te maani iaku kia tuatua ki tetai atu au tangata no runga i te akonoanga. Inara i teianei te inangaro nei au i te pera.” Kua manako te vaine no tetai manga taime e kua taopenga e: “E tikai taau akonoanga ka oronga mai te reira i etai apinga kare taku. Penei e tau kia kimikimi au i te reira.”

19. Eaa ra i riro ei e ko teia tikai te taime no te rekareka?

¹⁹ I te irava tuatua 1994, tei akaari atea uaia i roto i to tatou au Are Uipaanga Patireia, te akamaara putuputu ua maira ia tatou e: “E irinaki kia Iehova ma to ngakau katoa ra.” (Maseli 3:5) E tumu maata atu ainei tetai te vaira no te rekarekaanga i te tuku i to tatou irinaki ki roto ia Iehova, koia to tatou punanga ketaketa e raukaʼi ia tatou te paruru anga? Kua akataka a Salamo 64:10 e: “Ka rekareka te aronga tuatua-tika ra ia Iehova, e ka irinaki iaia.” Kare teia i te taime no te tu papakitai ua me kore te tuku i te au. I te marama takitai e topa ra ka akapiri viviki ia ia tatou kia vaitata ki te tika anga ta te au tavini o Iehova i inangaro ra i te kite mei te au tuatau o Abela. Ko te taime teia no te irinaki ia Iehova ma to tatou ngakau katoa, te kiteanga e kare rava i mua atu ana a tatou au tumu e manganui no te rekareka!

[Au Tataanga Rikiriki i Raro]

Akapeea Koe me Pau?

◻ I tau kia Nehemia 8:10, eaa ra tatou ka rekarekaʼi?

◻ Akapeea a Deuteronomi 26:11 e Deuteronomi 28:45-47 i te akaari anga i te puapinga o te rekarekaanga?

◻ Akapeea a Philipi 4:4-9 i te tauturu anga ia tatou kia rekareka ua rai?

◻ Eaa te tumu ta te 1994 irava mataiti e oronga maira kia tatou no te rekareka?

[Tutu i te kapi 16]

Te rekareka ra te Au Kite Rutia e te Tiamani ei tuanga o tetai akataeakeanga pa enua

[Tutu i te kapi 17]

Te orongaanga i te tuatua mou ki tetai pae e tumu ia no te rekareka